<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаев Орталық Азиядағы және Қазақстандағы БҰҰ әйелдері координациялық кеңесінің басшысы Джерен Гювен Гюрешпен кездесті. Кездесуде елімізде ерлер мен әйелдерге тең мүмкіндік берілгені, отбасы құндылықтарын сақтау мемлекеттік саясаттың басты бағытының бірі екені айтылды.<blockquote>«Қазақстан он бес жылдан астам уақыттан бері Біріккен Ұлттар ұйымының Әйелдер ұйымымен ашық әрі сенімді серіктес болып, өзара қарым-қатынасты дамытып келеді. Өзіңізге белгілі, Президентіміз Қасым-Жомарт Кемелұлы 2026 жылғы 15 наурызда Қазақстан Республикасының жаңа Конституциясына арналған республикалық референдум өткізу жөнінде Жарлыққа қол қойды. Бұл – еліміздің кемел келешегі үшін өз таңдауымызды жасап, қастерлі Отанымыздың берік негізін қалауға берілген тарихи мүмкіндік. Жаңа Ата Заңның жобасында неке ер адам мен әйел адамның ерікті және тең құқықты одағы екені нақтыланған. Бұл шешім дәстүрлі құндылықтарды ең жоғары құқықтық деңгейде қорғауға, әйелдер құқықтарын қорғауды күшейтуге бағытталған. Аймағымызда отбасы институтын дамыту, аналарды әлеуметтік қолдау бағытындағы жұмыстар нәтижелі іске асырылуда. Соңғы екі жыл қатарынан «Анаға тағзым» республикалық форумы өткізіліп келеді. Оған ҚР Президенті жанындағы әйелдер істері және отбасылық-демографиялық саясат жөніндегі комиссия төрағасы Балаева Аида Ғалымқызы, республиканың барлық аймағынан делегаттар қатысып, дәстүрлі тәжірибе алаңына айналды. Форум биыл да ұйымдастырылады. Қызылорда облысының әкімдігі ашық диалогқа, халықаралық әріптестік байланыстарға әрдайым дайын екенін мәлімдеймін», – деді Н.Нәлібаев.</blockquote>Өз кезегінде Джерен Гювен Гюреш бірлесіп жұмыс атқару ниетін білдіріп, алдағы жоспарларын бөлісті. Айта кетейік, бүгінде өңір халқының саны 845 135 адам, оның 419 819-ы, яғни 49,6%-ы – әйелдер. Қалалық жерде 185 мың, ауылдарда 230 мыңнан астам әйел тұрады.Облыста 160 мыңнан астам отбасы болса, оның 48 мыңнан астамы көпбалалылар, 17 мыңға жуық «Алтын алқа» және «Күміс алқа» иегері бар.Мемлекеттік қызметшілердің 45,4 пайызы, медицина қызметкерлерінің 88,1 пайызы, педагогтердің 78,3 пайызы, жалпы бюджеттік салада жұмыс істейтіндердің 62 пайызы, шағын және орта бизнестегілердің 55 пайызы – қыз-келіншектер.Координациялық кеңес басшысының Сыр өңіріне сапары аясында маңызды іс-шаралар ұйымдастырылады.

Облыс әкімі Орталық Азиядағы және Қазақстандағы БҰҰ әйелдері координациялық кеңесінің басшысымен кездесті

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың төрағалығымен өткен мәжілісте алдағы саяси науқан және Наурызнама мерекесін ұйымдастыру мәселелеріне байланысты мәжіліс өтті.Мәжілісте республикалық Референдумды аудан көлемінде заң талаптарына сәйкес, ашық әрі жоғары деңгейде өткізу мәселелері қаралды.Сонымен қатар, аудан басшысы Наурызнама онкүндігі аясында өтетін іс-шараларды мазмұнды әрі жоғары деңгейде ұйымдастыруды, әр күннің мазмұнына сай мәдени-рухани, ұлттық дәстүрді дәріптейтін шараларды кеңінен өткізіп, аудан тұрғындарының белсенді қатысуын қамтамасыз етуді жауапты сала басшылары мен кент және ауылдық округ әкімдеріне жүктеді.

Атқарылатын іс–шаралар жоспары талқыланды

<a href="https://kyzylorda-news.kz/">Kyzylorda-news.kz</a> Бүгін облыс әкімі Нұрлыбек Нәлібаев Reinke Manufacturing Co., Inc. компаниясының вице-президенті Филип Джарвиспен кездесті. Кездесуде өңірге инвестиция тарту мәселесі талқыланды.<blockquote>«Біз Reinke Manufacturing Co., Inc компаниясының ауыл шаруашылығына арналған ирригациялық жабдықтар мен механикалық суару жүйелерін өндіруге маманданғанын жақсы білеміз. Осыған орай, ирригациялық жабдықтар өндірісін біздің өңірде локализация жасау мәселесі қызықтырады.«Харвест» компаниясы біздің аймақта 23 мың гектарға жуық суармалы жерді игеруде ауқымды жұмысты бастап кетті. Бұл жобаның алғашқы кезеңінің өзіне кемінде 450 бірлік суармалы жүйе қажет. Екінші кезеңінде 35 мың гектар алқапқа 700 бірлік суармалы жүйе қолдану көзделуде.Біз өндірістік қуатты тікелей негізгі тұтынушы орналасқан аймаққа шоғырландыруды ең тиімді стратегия деп санаймыз. Себебі, бұл габаритті емес конструкцияларды тасымалдау шығынын жойып, сервистік қызмет көрсету жеделдігін қамтамасыз етеді.Жоғарыда айтылған факторларды ескере келе, Сізден осы жобаны орналастыру үшін біздің өңірді қолайлы әрі болашағы зор инвестициялық алаң ретінде қарастыруға шақырамыз. Өз тарапымыздан жобаны іске асырудың әр кезеңінде мүдделі инвесторларға жан-жақты қолдау көрсетуге және кешенді сүйемелдеуге кепілдік береміз», – деді аймақ басшысы.</blockquote>​Бүгінде өңірде қолайлы инвестициялық климат қалыптасып, ірі инвестициялық жобалар жүзеге асуда. Соңғы үш жылда аймақ экономикасына 4 млрд. АҚШ долларына жуық, былтыр 1 млрд. 600 млн. АҚШ долларынан астам инвестиция, 9 айдың қорытындысымен 205 млн. АҚШ долларынан астам тікелей шетелдік инвестиция тартылды.Экономиканы әртараптандыру мақсатында 2026-2029 жылдары аймақта 3 млрд. 400 млн. АҚШ долларға 48 инвестициялық жоба іске асырылып, 10308 жаңа жұмыс орны ашылады. Биыл 183 млн. АҚШ доллардың 21 жобасын іске қосу жоспарлануда.Фото: Қызылорда облысы әкімінің баспасөз қызметі

Аймақ басшысы Reinke Manufacturing компаниясының вице-президентімен кездесті

<a href="https://kyzylorda-news.kz/">Kyzylorda-news.kz</a>&nbsp;Қызылорда қаласында Kyzylorda Hub алаңында ұлттық технологиялық форум Digital Qazaqstan аясында ұйымдастырылатын Digital Qazaqstan Battle стартап-жобалар байқауының өңірлік жартылай финалы өтті. Шараның басты мақсаты – елімізде технологиялық кәсіпкерлікті дамыту, перспективалы стартаптарды анықтау және олардың әрі қарай дамуына қолдау көрсету.Жүлде қоры 19 млн теңгені құрайтын Digital Qazaqstan Battle байқауы Қазақстанның түрлі өңірлеріндегі инновациялық жобаларды біріктіретін маңызды алаң саналады. Байқау бірнеше кезеңнен тұрады: алдымен жобалар ұйымдастыру комитеті мен сарапшылар комиссиясының іріктеуінен өтеді, кейін өңірлік жартылай финалдарда үздік стартаптар анықталып, финалға жолдама алады. Байқаудың финалдық кезеңі 2026 жылғы 27 наурызда&nbsp;Шымкент қаласында Digital Qazaqstan ұлттық технологиялық форумы аясында өтеді.Қызылордадағы жартылай финалға әртүрлі бағыттағы 12 инновациялық стартап-жоба қатысты. Қатысушылар өз жобаларын қазылар алқасына ұсынып, олардың тиімділігі, инновациялық әлеуеті және нарықтағы даму мүмкіндіктері бойынша бағаланды.Жартылай финалға қатысқан жобалар қатарында: FoodLink – қоғамдық тамақтану орындарын толық цифрландыруға арналған SaaS-платформа; Cortex AI – рентген суреттеріндегі патология белгілерін анықтайтын жасанды интеллект жүйесі; Zhailau AI – мал шаруашылығын басқаруға арналған аппараттық және бағдарламалық жасақтаманы біріктіретін платформа; Sheber.kz – клиенттерді тұрмыстық қызмет көрсететін шеберлермен байланыстыратын онлайн-платформа; EPICfolio – студенттердің оқу бағдарламасынан тыс жетістіктерін автоматты бағалауға арналған AI-платформа; PhishGuard – фишинг және алаяқтық сайттардан қорғайтын жасанды интеллект негізіндегі жүйе; PrepAI – IELTS емтиханына дайындалуға арналған онлайн-платформа; AgriX – ауыл шаруашылығына арналған AI-платформа, ол жер жағдайына сәйкес егін егу және тыңайтқыш қолдану бойынша нақты ұсыныстар береді; MediaHub – медиакреаторларға арналған цифрлық экожүйе; Kutim.kz – тері жағдайын фотосурет арқылы талдап, күтім бойынша ұсыныстар беретін AI-платформа; EcoQogam – жастардың экологиялық белсенділігін арттыруға бағытталған геймификацияланған мобильді қосымша; ProjectZero AI – идеяларды веб-қосымшаларға айналдыруға мүмкіндік беретін low-code/no-code интеллектуалды платформасы.Жартылай финалдың қазылар алқасы құрамында Сабит Ибадулла (Қызылорда облысының цифрлық технологиялар басқармасының басшысы), Ғани Ерназаров («JSOFT» ЖШС директоры) және Антон Баев («Grand Technology» басшысы) болды. Бағалау барысында қазылар алқасы жобалардың масштабталу әлеуетіне, инновациялық тартымдылығына, даму көрсеткіштеріне және команда құрамына ерекше назар аударды.«Digital Qazaqstan Battle жартылай финалына қатысу мен үшін үлкен тәжірибе болды. Өз жобамды сарапшылар алдында таныстырып, олардың ұсыныстары мен бағасын алу – маңызды қадам. Енді финалда өңіріміздің атынан лайықты өнер көрсетуге тырысамын», – деді жеңімпаз атанған Cortex AI жобасының авторы Асылжан Абдуллаев.Бағалау нәтижесінде үздік жоба анықталып, ол Қызылорда өңірінің атынан 27 наурызда Шымкент қаласында өтетін Digital Qazaqstan Battle финалында бақ сынайды.«Digital Qazaqstan Battle – өңірлердегі талантты IT-командаларды анықтап, олардың жобаларын жаңа деңгейге шығаруға мүмкіндік беретін алаң. Қызылордадағы жартылай финалда ұсынылған жобалардың деңгейі жоғары болды, бұл өңірде технологиялық стартаптарға қызығушылық артып келе жатқанын көрсетеді», – деп атап өтті Kyzylorda Hub жетекшісі Жанарыс Тубекбаев.Digital Qazaqstan Battle байқауы еліміздегі технологиялық стартаптарды қолдауға және инновациялық экожүйені дамытуға бағытталған маңызды бастамалардың бірі. Мұндай алаңдар жас кәсіпкерлерге өз идеяларын таныстырып, сарапшылардан кері байланыс алуға және жобаларын жаңа деңгейге көтеруге мүмкіндік береді.

Қызылордада Digital Qazaqstan Battle стартап-баттлының өңірлік жартылай финалы ұйымдастырылды

<a href="https://kyzylorda-news.kz/">Kyzylorda-news.kz</a> 11 наурыз күні Қызылорда облысы кәсіпкерлер палатасының алаңында «Әділ әрі прогрессивті Қазақстанның халықтық Конституциясы үшін!» жалпыұлттық коалициясы өкілдерінің қатысуымен мазмұнды кездесу өтті.Жиынға Палата қызметкерлері, сондай-ақ «Қызылорда өңірлік инвестициялық орталығы» микроқаржылық ұйымының қызметкерлері қатысып, алдағы маңызды саяси науқан – 15 наурызда өтетін республикалық референдум аясында ұсынылып отырған конституциялық өзгерістер мен толықтырулар кеңінен талқыланды.Кездесу барысында шақырылған сарапшылар қатысушыларға конституциялық реформаның мәні мен маңызы туралы жан-жақты ақпарат беріп, жаңа Конституция жобасында көзделген негізгі өзгерістерді түсіндірді. Сарапшылар бұл өзгерістер елдегі құқықтық жүйені жетілдіруге, қоғамның дамуына және азаматтардың құқықтары мен бостандықтарын одан әрі нығайтуға бағытталғанын атап өтті.Алғашқы болып сөз алған Асылбек Теңелұлы жаңа Конституция мен қолданыстағы құжаттың арасындағы негізгі айырмашылықтарға тоқталып, оның тарихи алғышарттары мен қабылдану кезеңдері туралы кеңінен баяндады. Ол конституциялық реформаның ел дамуының жаңа кезеңіне сәйкес келетінін айтып, оның мемлекет басқару жүйесін жаңғыртудағы рөлін ерекше атап өтті.Келесі спикер Жанна Мейрамбекқызы өз сөзінде шағын және орта бизнесті қолдау бағытындағы жаңа тетіктерге тоқталды. Ол Мемлекет басшысының кәсіпкерлікті дамыту, бизнеске қолайлы орта қалыптастыру және отандық кәсіпкерлердің мүмкіндіктерін кеңейту жөнінде берген тапсырмаларына сәйкес енгізілген өзгерістер туралы айтып, бұл жаңашылдықтардың кәсіпкерлік саласының дамуына оң ықпал ететінін жеткізді.Өз кезегінде Әліби Төлепбергенұлы жаңа құжатта қарастырылған отбасы құндылықтарын қорғау мәселелері, діни ағымдарға қатысты реттеулер және Қазақстан халқы ассамблеясының қоғамдағы рөлі туралы кеңінен сөз қозғады. Ол аталған өзгерістер қоғамдағы тұрақтылық пен бірлікті сақтауға бағытталғанын атап өтті.Жалпыұлттық коалиция мүшесі әрі Палата директоры Пірмұхаммед Сыздық өз сөзінде мемлекеттік тілге қатысты енгізілген толықтыруларға тоқталып, жаңа өзгерістердің тіл мәртебесін нығайтудағы маңызын атап өтті. Сонымен қатар ол кездесуге қатысқан спикерлер мен қатысушыларға белсенділік танытқандары үшін алғысын білдірді. Кездесу еркін форматта өтіп, қатысушылар өздерін толғандырған сұрақтарын ашық қойып, пікір алмасу арқылы ортақ талқылау жүргізді.Сарапшылар қойылған сұрақтарға нақты жауап беріп, ұсынылған өзгерістердің мазмұнын жан-жақты түсіндірді. Жиын соңында сарапшылар алдағы референдумға барша азаматтарды белсенді қатысуға шақырып, елдің болашағын айқындайтын маңызды шешімге әрбір қазақстандықтың үлес қосуы қажет екенін атап өтті.Фото: Кәсіпкерлер палатасы

Референдум қарсаңында Кәсіпкерлер палатасында сарапшылармен кездесу өтті

<a href="https://kyzylorda-news.kz/">Kyzylorda-news.kz</a> &nbsp;Цифрлық ғасырдақұлаққаптар күнделікті өмірдің ажырамас бөлігіне айналды. Жолда музыка, серуен кезінде подкасттар тыңдау, онлайн-жиналыстар немесе&nbsp;телефон қоңыраулары болсын гарнитуралар бізбен тәулік бойы&nbsp;жұмыс істейді. Бұл ыңғайлы әрі айналадағы адамдарға кедергі келтірмейді. Бірақ құлаққапты үнемі пайдалану есту қабілетіне қалай әсер етеді? Қандай белгілер алаңдатуы тиіс? Пациенттерге қандай тексерулер қолжетімді?&nbsp;Осы және өзге де сұрақтарға көп бейінді облыстық аурухананың оториноларинголог дәрігері Елжас Өтеген жауап берді.– Облыс тұрғындары арасында есту қабілетінің бұзылуы қаншалықты жиі кездеседі?– Әлемдік статистика бойынша, әрбір он адамның үшеуі белгілі бір деңгейде есту қабілетінің бұзылуына тап болады. Қазақстанда есту мүшелерінің аурулары шамамен халықтың 5-7%-ында кездеседі.Көп жағдайда бұл орта және егде жастағы адамдар - жастың ұлғаюына байланысты есту қабілетінің табиғи төмендеуі әсер етеді. Алайда науқастардың едәуір бөлігі созылмалы қабыну процестерінің, әсіресе созылмалы отиттің асқынуынан зардап шегеді.Өкінішке орай, кейбір науқастар дәрігерге қаралмай, халықтық ем-дом тәсілдерімен өз бетінше емделуге тырысады. Соның салдарынан жедел қабыну созылмалы түрге ауысып, дабыл жарғағында перфорация (тесік) пайда болады.&nbsp;Бұл біртіндеп есту қабілетінің төмендеуіне әкеледі. Сондықтан маманға уақытылы жүгіну мұндай асқынулардың алдын алуға мүмкіндік береді.– Қандай алғашқы белгілер адамды алаңдатуы тиіс?– Құлақтағы қабыну ауруларының ең жиі кездесетін белгілері - құлақтың ауыруы, бітеліп тұрғандай сезім, естудің төмендеуі немесе күрт нашарлауы. Сондай-ақ құлақтағы шуыл немесе шыңылдау, бір жақ құлақпен нашар есту де алаңдатуы тиіс.Айта кету керек, отит тұқым қуалайтын ауру емес. Ол, мысалы, суық тиюден кейін пайда болуы мүмкін: адам басы дымқыл күйде сыртқа шықса, жел өтінде отырса немесе көлікте терезе ашық күйде ұзақ жүрсе.Көбіне бізге пациенттер отиттің созылмалы түрімен немесе холестеатомамен келеді. Холестеатома - ортаңғы құлақтағы қатерсіз, бірақ қауіпті болуы мүмкін ісік тәрізді түзіліс. Жақында біз ортаңғы құлақтағы полипке байланысты науқасқа ота жасадық. Бұл шырышты қабықтың грануляциялық тінінің қатерсіз өсіндісі. Пациентке полипотомия жасалды.Ең бастысы — құлақта қандай да бір жайсыздық пайда болса, өздігінен емделмей, дәрігерге қаралу қажет.– МӘМС жүйесінде қандай тексерулер мен емдеу түрлері қолжетімді?– Міндетті әлеуметтік медициналық сақтандыру (МӘМС) жүйесі аясында пациенттерге медициналық қызметтердің кең спектрі ұсынылады.Алғашқы қабылдауды жергілікті дәрігер жүргізеді, қажет болған жағдайда оториноларингологқа жолдайды. Мамандар отоскопия жүргізеді, &nbsp;яғни құлақты тексеріп, сонымен қатар мұрын мен тамақты қарайды.Диагностикалық әдістерге жатады:&nbsp;аудиометрия (есту қабілетін бағалау),&nbsp;тимпанометрия,&nbsp;компьютерлік томография (КТ),&nbsp;магниттік-резонанстық томография (МРТ).Аудиометрия қажетті жабдықтармен қамтамасыз етілген бірқатар емханаларда жүргізіледі. Дәрігер жолдамасы бойынша пациенттер КТ мен МРТ тексерулерінен тегін өте алады.Бұл қызметтерді алу үшін МӘМС жүйесінде сақтандырылған мәртебесі болуы қажет. Ал балалар, қарттар, мүгедектігі бар адамдар және басқа да әлеуметтік осал топтар мемлекет тарапынан сақтандырылған.– Есту мүшелеріне жасалатын хирургиялық&nbsp;оталар МӘМС аясында жүргізіле ме?– Иә, МӘМС аясында жоспарлы&nbsp;оталар жасалады.&nbsp;Тимпанопластика - дабыл жарғағының және қажет болған жағдайда ортаңғы құлақтағы есту сүйекшелерінің тұтастығын хирургиялық жолмен қалпына келтіру. Ота дабыл жарғағындағы тесікті жабуға, қабынған ошақты тазартуға және есту қабілетін жақсартуға мүмкіндік береді.&nbsp;Бұл кезде науқастың өз тіндері немесе арнайы импланттар қолданылады.2025 жылы тимпанопластика өңірде алғаш рет облыстық балалар ауруханасында жасалды. Қазіргі уақытта ересек пациенттер қажет болған жағдайда квота арқылы еліміздің жетекші медициналық орталықтарына жіберіледі. Болашақта бұл тәжірибені өңірде кеңейту жоспарланып отыр.Стапедопластика&nbsp;- отосклероз кезінде жасалатын жоғары тиімді микрохирургиялық&nbsp;ота. Бұл кезде қозғалмай қалған есту сүйекшесі (үзеңгі) протезбен алмастырылады.&nbsp;Ота көбіне жергілікті анестезиямен, микроскоп арқылы есту жолы арқылы жасалады. 80-90% жағдайда естуді айтарлықтай жақсартуға мүмкіндік береді.Сонымен қатар кохлеарлық имплантация&nbsp;- ауыр есту қабілетінің төмендеуінде қолданылатын естуді қалпына келтіру әдісі. Алайда стапедопластика мен кохлеарлық имплантация әзірге өңірде жүргізілмейді, пациенттер квота арқылы еліміздің басқа медициналық орталықтарына жіберіледі.Өңірде мастоидит кезінде шұғыл&nbsp;оталар жасалады. Бұл самай сүйегінің емізікше өсіндісінің бактериялық қабынуы. Ол ортаңғы отиттің ауыр асқынуы болып табылады және құлақтың артындағы қатты ауырсынумен, ісінумен, қызарумен, дене қызуының көтерілуімен және естудің төмендеуімен көрінеді. Ауру қауіпті болғандықтан, шұғыл хирургиялық емді қажет етеді. Мұндай&nbsp;оталар тегін жасалады.Сондай-ақ&nbsp;Емдеуге жатқызу бюросы арқылы полиптер, холестеатома және басқа да қатерсіз түзілістер кезінде&nbsp;оталар жүргізіледі.– Құлаққапты ұзақ жылдар пайдалану қандай салдарға әкелуі мүмкін? Есту қабілеті бұзылған адамдар саны арта ма?– Құлаққапты пайдалану мәселесі қоғамда жиі талқыланады, әсіресе оларды шектеу туралы сөз қозғалғанда. Бірақ құлаққаптың өзі қауіпті емес. Негізгі қауіп&nbsp;- дыбыс деңгейінің тым жоғары болуы және ұзақ уақыт тыңдау.Музыканы орташа дыбыс деңгейінде тыңдап, әрбір бір сағаттан кейін үзіліс жасау қауіпсіз болып саналады. Егер адам бірнеше жыл бойы күн сайын музыканы өте қатты дыбыспен тыңдаса, бұл ішкі құлақтағы сезімтал жасушалар мен есту жүйкесінің біртіндеп зақымдануына әкеледі.Бұл әсер бірден байқалмайды, уақыт өте келе жиналады. Мұны тамшы судың тасты біртіндеп тесетінімен салыстыруға болады. Алғашқы белгі көбіне құлақтағы шуыл немесе шыңылдау (тиннитус) болады. Уақыт өте келе тұрақты есту қабілетінің төмендеуі дамуы мүмкін.Қазіргі кезде есту қабілеті бұзылған&nbsp;адамдардың «жасарып» келе жатқанын байқап отырмыз. Бұрын құлақтағы шуыл мен естудің төмендеуіне көбіне 60 жастан асқан&nbsp;кісілер шағымданатын болса, қазір 25-30 жастағы пациенттер де жиі келеді. Оның бірнеше себебі бар, бірақ құлаққапты ұзақ уақыт бойы жоғары дыбыспен пайдалану&nbsp;-&nbsp;қауіп факторларының бірі.Ерте кезеңде біз есту функциясын сақтауға бағытталған қолдаушы ем тағайындаймыз. Бірақ ішкі құлақтың зақымданған жасушалары қалпына келмейтінін түсіну маңызды. Сондықтан алдын алу&nbsp;- дыбыс деңгейін бақылау және құлаққапты дұрыс пайдалану аса маңызды.– Пациенттерге берер кеңесіңіз…– Ең бастысы&nbsp;- дәрігерге баруды кейінге қалдырмау. Шағым болмаса да, есту қабілетін жылына кемінде бір рет тексеріп тұрған жөн.Егер қандай да бір күмәнді белгілер пайда болса, өздігінен емделмей, маманға жүгіну қажет. Қазіргі медицинада тиімді диагностика мен емдеу әдістері жеткілікті&nbsp;- ең бастысы, оларды уақытында пайдалану.– Сұхбат үшін рақмет!

Есту қабілетін қалай қорғауға болады? Дәрігер кеңесі

<a href="https://kyzylorda-news.kz/">Kyzylorda-news.kz</a> Елімізде Конституциялық реформаға енгізілген өзгерістерді халыққа жан-жақты түсіндіру мақсатындағы ақпараттық-насихат жұмыстары Қазалы ауданында жүйелі түрде жалғасуда. Осы бағытта Қазалы аудандық мәслихаты төрағасы Ғазиз Әліш мен «AMANAT» партиясы Қазалы аудандық филиалының атқарушы хатшысы Нұрғиса Жалғасбаев және мәслихат депутаттары Қазалы вагон пайдалану депосы қызметкерлерімен кездесті.Кездесу барысында Конституциялық реформаның негізгі бағыттары түсіндіріліп, заң үстемдігін нығайту, азаматтардың құқықтары мен бостандықтарын қорғау, қоғам мен мемлекет арасындағы жауапкершілікті арттыру секілді қағидаттарға назар аударылды.Жиын соңында Қазалы вагон пайдалану депосының еңбек ұжымы ел болашағы үшін қолға алынған бастамаларға әрдайым қолдау білдіретінін айтып, алдағы референдумның сәтті өтуіне тілектестік білдірді.

Конституциялық реформа: Демократиялық құндылықтардың негізі

<a href="https://kyzylorda-news.kz/">Kyzylorda-news.kz</a> «Әділетті және Прогрессивті Қазақстанның Халықтық Конституциясы үшін!» коалициясының аумақтық өкілдері Мұрат Тұрабаев, Насырбек Мырзабеков, Әшім Оразбекұлы, Дана Аман, Мұқанбетжан Салқынбаев, Даурен Досмағанбетов, Қанат Сәулебеков және Ержан Әбдешов «СЕМІЗБАЙ-У» ЖШС-нің жұмысшыларымен кездесу өткізді.Кездесудің негізгі мақсаты Қазақстан Республикасының жаңа Конституция жобасының мазмұнын еңбек ұжымына жан-жақты түсіндіру, оның қоғам өміріндегі маңызы мен артықшылықтарын кеңінен насихаттау болды. Жаңа конституция жобасында адам құқықтары мен бостандықтарын қорғау тетіктері күшейтіліп, заң үстемдігін қамтамасыз етуге айрықша мән берілгені айтылды. Сонымен қатар, әлеуметтік әділеттілік, тең мүмкіндіктер қағидаты, еңбек адамының мәртебесін арттыру, қауіпсіз еңбек жағдайларын қалыптастыру және әлеуметтік кепілдіктерді кеңейту мәселелері қамтылғаны түсіндірілді. Кездесу барысында мемлекеттік басқару жүйесін жетілдіру, қоғам мен билік арасындағы кері байланысты нығайту, азаматтардың шешім қабылдау үдерістеріне қатысу мүмкіндігін кеңейту бағытындағы өзгерістер де сөз болды.Кәсіпорын қызметкерлері өздерін толғандырған сауалдарын қойып, ұсыныс-пікірлерін білдірді. Әсіресе, еңбек қатынастары, әлеуметтік тұрақтылық және өңірлік даму мәселелері бойынша пікір алмасу өрбіді.Кездесу қорытындысында қатысушылар жаңа Конституция жобасының ел болашағы үшін маңыздылығын атап өтіп, алдағы жалпыхалықтық референдумға белсенді қатысуға дайын екендіктерін жеткізді.Мұндай ақпараттық-түсіндіру шаралары халықпен тікелей байланыс орнатуға, конституциялық реформалардың мәнін кеңінен түсіндіруге және азаматтық белсенділікті арттыруға бағытталған.

«Семізбай-У» ЖШС жұмысшыларына жаңа Конституция жобасы түсіндірілді

<a href="https://kyzylorda-news.kz/">Kyzylorda-news.kz</a> Жалағаш ауданында жаңа Конституция жобасын түсіндіруге бағытталған ақпараттық кездесулер жалғасуда. Осы аяда Ақсу ауылындағы «Сәрке батыр» шаруа қожалығының қызметкерлерімен кездесу өтті.Кездесу барысында қатысушыларға ұсынылып отырған Конституция жобасындағы негізгі өзгерістер, сондай-ақ алдағы референдумның маңызы туралы ақпарат берілді.Жиынға «Әділетті және Прогрессивті Қазақстанның Халықтық Конституциясы үшін!» аумақтық коалициясының мүшелері Қуат Ахетов, Бейбітжан Шілдебаев, Қалдыгүл Дәулет және Айқын Жақсылықова қатысты. Кездесу барысында Қуат Ахетов ұсынылып отырған конституциялық реформалардың негізгі бағыттарына тоқталып өтті.<blockquote>«Ұсынылып отырған өзгерістер мемлекеттік басқару жүйесін жетілдіруге, заң үстемдігін нығайтуға және азаматтардың құқықтары мен бостандықтарын қорғау тетіктерін дамытуға бағытталған», – деді ол.</blockquote>Сонымен қатар жиын барысында қатысушылар жаңа Конституция жобасына қатысты пікірлерін білдіріп, өздерін қызықтырған сауалдарын қойды. Коалиция мүшелері тарапынан қойылған сұрақтарға жауап берілді. Ұйымдастырушылардың айтуынша, мұндай кездесулердің мақсаты – тұрғындар мен еңбек ұжымдарын Конституция жобасының мазмұнымен таныстыру және референдум туралы ақпарат беру.Фото: Жалағаш ауданы

Ата Заң жобасы еңбек ұжымына таныстырылды

<a href="https://kyzylorda-news.kz/">Kyzylorda-news.kz</a> Өңірлік коалиция өкілдері Қызылөзек ауылдық округінің тұрғындарымен кездесіп, жаңа Конституция жобасын талқылады. Кездесу барысында заң жобасында қарастырылған негізгі өзгерістер таныстырылып, тұрғындардың сұрақтарына жауап берілді.Жиынға коалиция мүшелері Раушан Ысқақова, Қызжібек Абдраманова, Арайлым Байжігітова, Берік Шайнуров және ауыл әкімі Сәкен Әбдіжаппаров қатысты. Олар алдағы 15 наурызда өтетін республикалық референдумның мән-маңызы туралы ақпарат берді. Кездесу барысында қалалық коалиция мүшесі Раушан Ысқақова жаңа Конституция жобасында саяси жүйені жаңғырту мәселелеріне назар аударылғанын атап өтті.<blockquote>«Жаңа Конституция жобасында мемлекеттік басқару жүйесін жетілдіруге, билік тармақтары арасындағы тепе-теңдікті нығайтуға бағытталған бірқатар өзгерістер қарастырылған. Бұл бастамалар елдің саяси жүйесін одан әрі дамытуға ықпал етеді», – деді ол.</blockquote>Сондай-ақ жиында сөз алған коалиция мүшесі Арайлым Байжігітова құжатта жастар саясатына қатысты бағыттарға да назар аударылғанын айтты.<blockquote>«Жастардың сапалы білім алуына, кәсіби дамуына және қоғамдық өмірге белсенді қатысуына жағдай жасау – маңызды міндеттердің бірі. Жастар бастамаларын қолдау және олардың әлеуетін дамытуға бағытталған бағдарламалардың жүзеге асырылуы қоғамның дамуына оң ықпал етеді», – деді ол.</blockquote>Ал білім саласының өкілі, жалпыұлттық коалиция мүшесі Қызжібек Абдраманова ғылым мен білім саласын дамыту мәселелеріне тоқталды.<blockquote>«Ғылым мен инновация – ел дамуының маңызды факторларының бірі. Ғылыми зерттеулерді қолдау, жаңа технологияларды дамыту және білім беру сапасын арттыру – мемлекеттің стратегиялық бағыттарының қатарында», – деді ол.</blockquote>Кездесу барысында тұрғындар жаңа Конституция жобасына қатысты пікірлерін білдіріп, өздерін қызықтырған сауалдарын қойды. Ұйымдастырушылар мұндай кездесулердің мақсаты – тұрғындарды заң жобасының мазмұнымен таныстыру және референдум туралы ақпарат беру екенін атап өтті.Фото: Қызылөзек ауылдық округі

Қызылөзек ауылдық округінде жаңа Конституция жобасы талқыланды

<a href="https://kyzylorda-news.kz/">Kyzylorda-news.kz</a> Облыс әкімі Нұрлыбек Нәлібаевтың қатысуымен кадрлық өзгерістерге байланысты актив отырысы өтті. Оған жауапты сала басшылары мен зиялы қауым өкілдері қатысты.Аймақ басшысы осы уақытқа дейін «ҚазАвтоЖол» ҰК» АҚ Қызылорда облыстық филиалының директоры лауазымын атқарған Жүнісов Ерұлан Бақтыбайұлын зейнет жасына жетуіне байланысты құрметті еңбек демалысына шығарып салып, Қызылорда облысының Құрмет грамотасын, «Қызылорда облысының дамуына қосқан үлесі үшін» медалі мен Алғыс хат табыстады.<img src="https://knadmin.beoblood.kz/uploads/Predstavlen_direktor_Kyzylordinskogo_oblastnogo_filiala_AO_NK_Kaz_Avto_Zhol_80a6ce44a3.jpg" alt="Представлен директор Кызылординского областного филиала АО «НК «КазАвтоЖол».jpg"><blockquote>«Ерұлан Бақтыбайұлы өңіріміз арқылы өтетін республикалық маңызы бар автожолдардың сапасын жақсарту, логистикалық дәліздерді жетілдіру, жол апаттарын азайту бағытында нәтижелі жұмыс атқарды. Республикалық маңызы бар жол құрылысын сапалы әрі мерзімінде аяқтауда уақытпен санаспай, күндіз-түні қызмет етті.Президентіміздің тапсырмасымен басталған «Қызылорда – Жезқазған» автожолы құрылысының өңірімізге тиесілі бөлігінің уақытылы пайдалануға берілуіне зор үлесін қосты.Сізге зор алғысымыз бен ізгі ниетімізді білдіреміз. Деніңіз сау, әр күніңіз шаттыққа толы болсын!» – деді Н.Нәлібаев.</blockquote><img src="https://knadmin.beoblood.kz/uploads/Predstavlen_direktor_Kyzylordinskogo_oblastnogo_filiala_AO_NK_Kaz_Avto_Zhol_1_79947f968d.jpg" alt="Представлен директор Кызылординского областного филиала АО «НК «КазАвтоЖол»1.jpg">Сондай-ақ, облыс әкімі «ҚазАвтоЖол» ҰК» АҚ басқарма төрағасының бұйрығымен акционерлік қоғамның Қызылорда облыстық филиалы директоры лауазымына тағайындалған Керімқұлов Жасұлан Махамбетұлын таныстырды.<blockquote>«Әріптесіміз 1981 жылы Алматы облысында дүниеге келген. Қазақ көлік және коммуникация академиясында «Автомобиль жолдары мен әуеайлақтар құрылысы» мамандығы бойынша білім алған. Еңбек жолын Қазақстан жол ғылыми-зерттеу институтында инженер ретінде бастаған.2019-2020 жылдары Көлік министрлігі Автомобиль жолдары комитеті «Жол активтері сапасының ұлттық орталығының» Қызылорда облысы бойынша филиалы директоры қызметін атқарған. Жеке секторда және мемлекеттік мекемелерде түрлі басшылық лауазымдарда болған.Жасұлан Махамбетұлы аймағымыздағы жақсы және қанағаттанарлық жағдайдағы жолдар үлесін арттырып, «Батыс Еуропа – Батыс Қытай» автомобиль жолының Қызылорда-Ақтөбе бөлігін қайта жаңғырту жобасын сапалы іске асырып, мерзімінде пайдалануға беруді қамтамасыз етеді деп сенім артамыз», – деді Н.Нәлібаев.</blockquote>Басқосуда облыстық ардагерлер кеңесінің төрағасы Серік Дүйсенбаев, еңбек ардагері Өмірбек Шәменов сөз сөйледі. Ерұлан Бақтыбайұлын зейнет жасына жетуімен құттықтап, жаңа басшыға сәттілік тіледі.Фото: Нұрболат Нұржаубай

«ҚазАвтоЖол» ҰК» АҚ Қызылорда облыстық филиалының директоры таныстырылды

<a href="https://kyzylorda-news.kz/">Kyzylorda-news.kz</a> Жалағаш ауданында Қазақстан Республикасының жаңа Конституция жобасын халыққа түсіндіру мақсатында ақпараттық-түсіндіру жұмыстары жалғасуда.Бүгін ақпараттық-түсіндіру штабының төрағасы Ғани Сүлейменов әлеуметтік сала қызметкерлерімен кездесті. Кездесу барысында жаңа Конституция жобасының әзірлену кезеңдері, Қазақстан Республикасының Конституциялық кеңесі қызметі және ұсынылып отырған өзгерістердің маңызы түсіндірілді. Сондай-ақ заң жобасының қоғам дамуына және құқықтық негіздерді жетілдіруге ықпалы айтылды.Жиын ашық пікір алмасу форматында өтіп, сала мамандары өз ұсыныс-пікірлерін білдірді.<img src="https://knadmin.beoblood.kz/uploads/Zhala_ash_zha_a_Konstitucziya_2_c1859dfb62.jpg" alt="Жалағаш жаңа Конституция 2.jpg">

Қазақстан және Қызылорда облысының жаңалықтары