<a href="https://kyzylorda-news.kz/">Kyzylorda-news.kz.</a> Еліміздің көптеген аймақтарында ауа райына байланысты ескерту жарияланды, деп хабарлайды <a href="https://www.inform.kz/kz/kazakstannyn-10-onirinde-kun-buzylady_a3612153">ҚазАқпарат</a>.
Нұр-Сұлтан мен өзге бірнеше өңірде ескерту жариялады Нұр-Сұлтанда​ қар аралас жаңбыр жауады, көктайғақ, тұман түсіп, боран соғады. Жел оңтүстік-батыстан солтүстік-батысқа ауысады, жел екпіні – 15-20 м/с, 23 м/с.
Ақмола облысының кей жерлерінде жауын-шашын болады. Тұман түсіп, көктайғақ болады, боран соғады. Оңтүстік-батыстан соққан желдің жылдамдығы 15-20 м/с, 23-28 м/с жетеді.
Ақтөбе облысында кей жерлерде жауын-шашын, көктайғақ, боран күтіледі. Оңтүстік-батыстан соққан жел солтүстік батысқа ауысады. Желдің күші – 9-14 м/с. 8-9 ақпанда түнде ауа температурасы күрт төмендейді, аяз -10 -20 градус.
Атырау облысының кей жерлерінде тұман түсіп, көктайғақ болады. Жел екпіні – 15-20 м/с. Батыс Қазақстан облысында​ да тұман түсіп,​ көктайғақ күтіледі.
Қарағанды облысында боран, тұман, көктайғақ болады. Жел жылдамдығы 15-20 м/с дейін күшейеді.
Қостанай, Солтүстік Қазақстан облыстарында жауын-шашын, көктайғақ, боран боалды. Жел оңтүстік-батыстан солтүстік-батысқа ауысады, екпіні 15-20 м/с, 23-28 м/с жетеді.
Қызылорда облысында тұман түседі. Желдің күші – 15-20 м/с.
Павлодар облысында​ боран, тұман, көктайғақ күтіледі. Жел екпіні – 15-20 м/с, 2 3 -28 м/с.

Қазақстанның 10 өңірінде күн бұзылады

<a href="https://kyzylorda-news.kz/">Kyzylorda-news.kz.</a> &nbsp;Азаматтардың мемлекеттік органдарға жүгіну жұмысын жеңілдетіп, өтінімдерді бақылау ісін жетілдіретін «Е-Өтініш» ақпараттық жүйесін дайындау жұмысы аяқталды, деп хабарлайды <a href="https://www.inform.kz/kz/e-otinish-akparattyk-zhuyesi-biyl-iske-kosylady_a3612142">ҚазАқпарат</a>.
<blockquote>
 «Халық үніне құлақ асатын мемлекет» тұжырымдамасын іске асыруда маңызды құрал ретінде айқындалған жобаны Бас прокуратура Президент Әкімшілігінің өтініштерін қарауды бақылау жөніндегі бөлімімен бірге әзірледі» делінген хабарламада.
</blockquote>
Өтініштерге қатысты процестерді цифрландыруды қамтамасыз ететін ақпараттық жүйе:
– мемлекеттік органдардың құзыретіне қарай өтініштерді автоматты түрде бөлуге;
– мемлекеттік органдар арасында сауалдар санын оңтайландыру есебінен өтініштерді қарау мерзімін қысқартуға;
– өтініштерді қарауда барлық саты мен мерзім бойынша өтініш берушіні ақпараттандыруға;
– мемлекеттік органдарға түскен өтініштердің бәрінің бірыңғай базасын құруға мүмкіндік береді.
Сонымен қатар, «Е-Өтініш» ақпараттық жүйесі өтініш берушімен кері байланыс ұстап, мемлекеттік органдардың жұмысына баға беруге жол ашады.
Мемлекеттік органдардың жауабына міндетті түрде жүйелі талдау жүргізіліп, бұл жұмыс жауапсыз қалдыру ісінің алдын алып, нақты салада өтініштерді қараудың бірыңғай тәжірибесін жолға қояды.
Қазіргі уақытта «Е-Өтініш» ақпараттық жүйесінің апробациясына дайындық жүргізілуде. Биыл оны барлық мемлекеттік органның жұмысына енгізу жоспарланған.

«Е-Өтініш» ақпараттық жүйесі биыл іске қосылады

<a href="https://kyzylorda-news.kz/">Kyzylorda-news.kz.</a> Еріктілер жылы аясында Қызылорда қаласындағы Назарбаев Зияткерлік мектебінде оқушылар арасында «Көмек еріктілері» клубы құрылды.
Еріктілер қозғалысы 7-12-сынып білім алушыларынан құралған. Олар негізгі бес бағыт бойынша жұмыс атқармақ. Мәселен, «педагогтар» пән мұғалімдерімен бірлесіп, үлгірімі төмен оқушыларға көмек көрсетсе, «медицина қызметкерлері» оқушылар арасында түрлі профилактикалық шараларды жүргізуге жәрдемдеседі. Эколог-волонтерлар тобы мектептің «Қысқы бағында» бөлме гүлдерді отырғызу жұмыстарын жүргізсе, «кітапханашылар ұйымы» мектептің кітаптар қорын реттеу, санын ұлғайту және кітапхана пайдалану ережелері туралы ақпараттандыру шараларын ұйымдастырмақ. Сонымен қатар, «асханашылар» тобы оқушылардың тамақтану режимін дұрыс орындалуын қамтамасыз етуде қажетті көмек көрсетеді.
Қазіргі уақытта еріктілер клубына 100-ге жуық оқушы мүше болуға ұсыныс білдірді. Алдағы уақытта жоспарланған шараларды жүзеге асыру арқылы өзге оқушыларды волонтерлыққа тартуға және азаматтық қоғамның белсенділігін арттыруға ықпал ету көзделуде. «Көмек еріктілері» клубының мақсаты – оқушыларды әлеуметтік жауапкершілік тұрғысынан тәрбиелеуге, отансүйгiштiкке баулу, мамандық тандаудағы кәсіби бағыт бағдар беруге бағытталған.
Айта кету керек, бүгінде елімізде 200-ден астам еріктілер ұйымы белсенді жұмыс жасайды, олардың 50 мыңнан аса белсенді еріктілері бар.
<a href="https://www.inform.kz/kz/kyzylordada-komek-eriktileri-kluby-kuryldy_a3611999">ҚазАқпарт</a>

Қызылордада «Көмек еріктілері» клубы құрылды

<a href="https://kyzylorda-news.kz/">Kyzylorda-news.kz.</a> Азаматтарға арналған үкімет» мемлекеттік корпорациясы коммерциялық емес АҚ Қызылорда облыстық филиалы ХҚКО-ның қалалық №1 бөлімінде «Әділет кеңес береді» атты акция ұйымдастырылды.
Шараға орталық қызметкерлерімен қатар Қызылорда облыстық әділет департаменті тіркеу қызметі саласындағы әдістемелік қамтамасыз ету және бақылау бөлімінің басшысы Е.Тәжікенов, құқықтық түсіндіру және халыққа заңгерлік қызмет көрсету бөлімінің басшысы А.Қосбергенова қатысты. Сонымен қатар аймақтағы бірқатар адвокаттар мен жеке нотариустар қатысты.
Заң өкілдері тұрғындардың толғандырған сұрақтарына жауап берді. Қала тұрғындары біршама құқықтық кеңестерге қол жеткізді.

Қызылордада «Әділет кеңес береді» акциясы өтті

<a href="https://kyzylorda-news.kz/">Kyzylorda-news.kz.</a> Қазақстанда 2020 жылдың қаңтарында жан басына есептегенде күнкөріс минимумы 30 мың теңгеге жетіп, 11,6 пайыз өсімді көрсетіп отыр, деп хабарлайды <a href="https://www.inform.kz/kz/kazakstanda-kunkoris-minimumy-12-payyzga-osti_a3612065">ҚазАқпарат</a>.
Зерттеуге сүйенсек, тура бір жыл бұрынғы көрсеткіш 26,9 мың теңге болып, жылдық өсім 4 пайызды құраған.
<blockquote>
 «Биыл қаңтар айында тауарлар мен қызметтердің бағасы өткен жылдың қаңтар айымен салыстырғанда 5,6 пайызға өсті. Оның ішінде азық-түлік тауарларының бағасы 9,2 пайыз, азық-түлікке жатпайтын тауарлар 5,2 пайыз, ақылы қызметтер 1,4 пайыз деңгейге өсті. Ең жоғары күнкөріс минимумы бұрынғыша Маңғыстау облысында – 35,4 мың теңгелік деңгейде. Бұл бүкіл ел бойынша орташа деңгейден 18 пайызға жоғары көрсеткіш», – делінген зерттеу қорытындысында.
</blockquote>
Көнкөріс минимумының мөлшері бойынша үздік үштікті Нұр-Сұлтан қаласы (33,5 мың тг) мен Алматы (33,1 мың тг) түйіндейді. Үздік бестік сапында сонымен қатар Алматы (30,7 мың) мен Түркістан (30,3 мың) облыстары тұр. Жалпы елде алты өңірде күнкөріс минимумының мөлшері орташа республикалық деңгейден жоғары. Ал күнкөріс минимумының төменгі деңгейі Павлодар (26,3 мың тг), Батыс Қазақстан (26,9 мың тг) және Ақтөбе (27,2 мың тг) облыстарында байқалады.

Қазақстанда күнкөріс минимумы 12 пайызға өсті

<a href="https://kyzylorda-news.kz/">Kyzylorda-news.kz.</a> &nbsp;Қазақстанның тұңғыш президенті – Елбасы Нұрсұлтан Назарбаев 18 наурыз күні Nur Otan партиясы саяси кеңесінің кеңейтілген отырысын өткізеді. Бұл туралы Елбасының баспасөз хатшысы Айдос Үкібай хабарлады.
<blockquote>
 “Nur Otan партиясының төрағасы, Елбасы Нұрсұлтан Назарбаев 2020 жылдың 18 наурызында партия саяси кеңесінің кеңейтілген отырысын шақыру туралы қаулыға қол қойды. Партияның негізгі міндеттері талқыланады”, – деді Айдос Үкібай.
</blockquote>
<img src="https://kyzylorda-news.kz/wp-content/uploads/2020/02/7nurotan2.jpg" alt="" />
Бұған дейін Назарбаев Nur Otan партиясы төрағасының бірінші орынбасары Бауыржан Байбекті қабылдаған болатын. Тұңғыш президентке партия активінің сапалық құрамын жақсарту бойынша жұмыс пен саяси кеңестің кеңейтілген отырысына дайындық туралы есеп берілді.

Нұрсұлтан Назарбаев өткізетін үлкен жиынның уақыты белгілі болды

<a href="https://kyzylorda-news.kz/">Kyzylorda-news.kz.</a> Бүгін Нұр-Сұлтан қаласында IV QAZFORUM 2020 конференциясы өтіп жатыр. Бұл туралы «Kyzylorda-news» ақпараттық агенттігінің тілшісі Фариза Омарова елордадан хабарлады.
ҚР-дағы АҚШ Елшілігі және Қазақстан Баспасөз клубы ұйымдастырған дәстүрлі шара қазақ тілді онлайн-медианы дамыту мәселелеріне арналған.
Жыл сайын форумға қазақ тілді БАҚ өкілдері, блогерлер мен сайттардың бас редакторлары қатысады. Олар жергілікті және шетелдік спикерлерден кәсіби тұрғыда тәжірибе алмасатын болады.
Бүгінгі форумға Қазақстанның түкпір-түкпірінен 200-ден астам медиамаман жиналды. Форумның тақырыбы – «Жаңа онжылдықтағы БАҚ: өзгерту уақыты және өзгеру уақыты». Онда қазақтілді БАҚ дамуының жаңа тенденциялары талқылаланады деп күтілуде.
IV QAZFORUM шымылдығын АҚШ елшісі Уильям Мозер ашты.
Шара қонақтары National Geographic Qazaqstan ұсынған фотосуреттер көрмесін тамашалауға мүмкіндік алды.
Форумның бірінші бөлігінде “Қазақ қоғамына қандай медиа қажет?” деген тақырыпта талқылау өтті. Қатысушылар “Интернет пен жаһандық цифрландыру ғасырында жаңа медиа медиа дәстүрлі БАҚ-ты алмастырды ма?” деген сұраққа жауап іздеп көрді. Осыған қоса іс-шараның екінші сессиясы сарапшылар БАҚ жетістіктеріне әсер ететін факторларға қатысты өз зерттеулерінің нәтижесін ұсынды.
QAZFORUM 2020 екінші сессиясы «Digital дәуірдегі біздің медиа» деген тақырыпқа өтуде.
Осы сессияда талқыланатын сұрақтардың бірі – «Жаңа он жылдықта табысты болу үшін медиа нарығының қазақ тілді сегментінде нені өзгерту қажет?». Сессия модераторы – саясаттанушы Айдос Сарым. Спикерлер ретінде Асхат Еркімбай (аймақтық медиа кеңесші, «Internews Kazakhstan»), Айгерім Жұмағұлова («Отырар» медиахолдингінің директоры),&nbsp; Қанат Сахария («Media Holding «Atameken Business» ЖШС бас директоры) және Ержан Қалымбайұлы («ULYS» диджитал журналының бас редакторы) қатысуда.
Асхат Еркімбай сессия барысында Орталық Азия елдеріндегі медиа тұтыну мен медиасауат бойынша әлеуметтік зерттеу нәтижесімен бөлісті.
Форум аясында қатысушылар үшін YouTube-те контент жасау, деректер базасымен зерттеулер жүргізу және мемлекеттік сатып алу бойынша мастер-кластар ұйымдастырылған.

Нұр-Сұлтанда IV QAZFORUM 2020 конференциясы өтуде (ВИДЕО)

<a href="https://kyzylorda-news.kz/">Kyzylorda-news.kz.</a> «Фрегат» үдемелі блогы мен британдық компанияның OneWeb ғарыш аппараты тиелген «Союз-2.1б» зымырантасығышы Байқоңыр айлағынан ғарышқа аттанды, деп хабарлайды <a href="https://www.inform.kz/kz/oneweb-sputnikteri-baykonyr-aylagynan-garyshka-ushyryldy_a3612007">ҚазАқпарат</a>.
«Союз 2.1б» зымырантасығышы белгіленген уақытта, яғни 7 ақпан күні сағат 03:42-де Байқоңыр ғарыш айлағының №31 алаңынан ұшырылды.
Роскосмос бұл оқиғаны тікелей эфирден көрсетті.
Стартқа 40 минут қалғанда «Роскосмос-ТВ» көрермен назарына Байқоңыр айлағындағы дайындық жұмысы туралы видеосюжеттерді, Роскосмос пен OneWeb компаниясының ынтымақтастығы туралы мамандармен сұхбатты, «Союз 2.1б» зымырантасығышы орнатылған Байқоңыр алаңынан тікелей эфирді ұсынды.
Нысан штаттық режимде ұшырылды. Тікелей эфир репортажын жүргізушілердің сөзіне сенсек, зымырантасығыштың алдыңғы екі басқышы белгіленген уақытта бөлініп шыққан, ал «Фрегат» үдемелі блогының бөлігі спутниктермен бірге старттан кейін арада 10 минут өткенде ажырады.
Ұшырылымның циклограммасына сәйкес одан кейінгі 3,5 сағатта ғарыш аппараттары «Фрегат-М» үдемелі блогынан бөлінеді, сөйтіп орбитадағы өз нүктелеріне жайғасады.
OneWeb төменорбиталды ғарыш аппараттары жер бетіндегі тұтынушыларды тікелей спутник байланысы арқылы жылдамдығы жоғары интернетпен қамтамасыз етуге арналған. Компания жалпы саны 500-ден астам спутникті Жер айналасындағы орбитаға шығарып, 2020 жылдан бастап оларды коммерциялық мақсатта пайдалануды көздеп отыр. OneWeb 2021 жылдан бастап Жерді 24-сағаттық байланыспен қамтымақ.
Еске сала кетейік, кеше «Союз МС-13» ғарыш кемесінің экипажы белгіленген уақытта Жезқазған қаласының маңына қонған болатын.

OneWeb спутниктері Байқоңыр айлағынан ғарышқа ұшырылды

<a href="https://kyzylorda-news.kz/">Kyzylorda-news.kz.</a> Өткен жылы аймақта 2264 үйді ұры-қары үптеп кеткен. Ал ағымдағы жылдың алғашқы айының өзінде 163 үйге ұры түскен.
Осынан кейін «Көрші бақылауы» жобасы қолға алынды.&nbsp; Шағын аудан немесе ауладағы көрші-қолаң бір-бірінің үйіне көз қырын салып қоюға келісті. Қонысының маңында бейтаныс адам айналшықтап жүрсе тұрғындар дереу полицияға хабар беруге уағдаласты.
2020 жыл Тәжікеновтер отбасы үшін шым-шытырық оқиғамен басталды. Жыл ауысар түні олардың пәтеріне ұры түсіп, үйдің астаң-кестеңін шығарған. Ақша мен әшекей бұйымдар қолды болды. Полиция келді, тіркеді, тергеді, тексерді бірақ қарасын батырып үлгерген ұры әлі табылмады.&nbsp;
<blockquote>
 «Домофон жұмыс істеп тұрса, ешкім аша қоймас еді. Енді бұл жерде камера да жоқ. Балалардың көңіл-күйі түсіп кетті. Жинағандары сынып. Қайта өздері үйде болмай қалды. Балалардың үйде қалып кетпегеніне шүкір деймін», – дейді қала тұрғыны Ақмарал Тәжікенова. &nbsp;
</blockquote>
«Көрші бақылауы» жобасы аясында полиция тұрғындарға өз қотырыңды өзің қасы демей, баспананы бірлесіп күзетуді ұсынып отыр. Алыс сапарға кеткенде көршілерге ескертіп, аймақтық полиция инспекторына үй-мүлкіңізді аманаттап кетсеңіз болады. Бейтаныс жандардың суыт жүрісіне бей-жай қарамай, тәртіп сақшыларына «сыбырлауды» әдетке айналдырған дұрыс.&nbsp;
<blockquote>
 «Көршім жұмыста 1-қабатта тұрады. Ақерке деген қыздың мамасы маған жазып жіберді: «Жанка апа, үй артындағы терезенің алдында белгісіз 2 ер, бір әйел отыр көріп жібересіз ба?» деп. 6-сынып оқитын немерем екеуміз қорықсақта барып көрдік. Расында 3 адам отыр. Үйге келіп, телефон алып учаскелік полицей Ерлан мен Бағдатқа хабар бердік. Ол біздің сигналға бірден келіп, ана кісілерді алып кетті», – дейді қала тұрғыны Жанна Жүсіпова.&nbsp;
 &nbsp;&nbsp;«Тұрғындар 102 арнасына қоңырау шалуына болады. Анонимді түрде де қабылдай береді аты-жөнін айтпаса да құқық бұзушылық, қылмыстың алдын алу мақсатында хабарлай беруге болады. Және де былтыр жылдың аяғында «Аймақ» ісшарасы өтті. Сол кезде біз аумақтағы бүкіл тұрғындардың пәтерлерін аралап, қай пәтерде кім тұратынын тізімдік есеп жасап, визитка таратқанбыз», – дейді учаскелік полиция инспекторы Бағдат Шахметов.&nbsp;
 &nbsp;«Бұл біздің жұмысымызды көптеп жеңілдетеді. Облыс орталығында байқағанымыз қазір қоғамның, азаматтардың қылмыстарды ашуға, болдырмауға және әкімшілік құқықбұзылыққа жол бермеуге қатысуы жоғарылап отыр. Бұл бізді қуантатын жағдай», – дейді ОПД бастығының бірінші орынбасары Шәмшидин Әмитов.&nbsp;
</blockquote>
Алыста орнатылған бейнебақылау камерасынан гөрі, қырағы көршің артық. Өйткені олар көшеде кім жүр, аулаға қандай көлік кіріп-шықты, кім келіп-кетті бәрін байқайды және шұғыл таратады. «Аула бақылауы» жобасы басталғалы 33 құқық бұзушының ұсталуы осыған дәлел.
<a href="https://24.kz/kz/zha-aly-tar/o-am/item/372581-yzylorda-oblysynda-p-ter-rly-y-azajmaj-t-r">«Хабар 24»</a>

Қызылорда облысында пәтер ұрлығы азаймай тұр

<a href="https://kyzylorda-news.kz/">Kyzylorda-news.kz.</a> &nbsp;8 ақпан күні ауыр атлетикадан халықаралық бірлік чемпионаты басталады, деп хабарлайды <a href="https://olympic.kz/kk/article/10867">Olympic.kz</a>.
Аталған додаға қатысатын Қазақстан құрамасы қазіргі таңда Шымкент қаласында дайындықтарын пысықтап жатыр.
Өзбекстан астанасы Ташкентте ел сапынан 4 спортшы шығады. Игорь Сон (61 кг), Илья Ильин (102 кг), Ибрагим Берсанов (109 кг) және Раушан Мешітханова (81 кг). Турнир 12 ақпанға дейін жалғасады.

Илья Ильин Ташкентте өтетін халықаралық турнирге қатысады

<a href="https://kyzylorda-news.kz/">Kyzylorda-news.kz.</a> Наурызбай қажы Тағанұлы енді Қазақстан мұсылмандары діни басқармасының төрағасы болды.
Жаңадан тағайындалған Бас мүфти бүгін Қазақстан мұсылмандары діни басқармасының кезектен тыс ІХ құрылтайында таныстырылды. Бұған дейін бірінші наиб мүфти қызметінде болған Наурызбай қажы Тағанұлы енді еліміздің мұсылмандарына рухани ұстаздық ететін болады.
Бұған дейін Бас мүфтидің қызметін атқарған Серікбай қажы Ораз Наурызбай қажы Тағанұлына сәттілік тіледі.
Еске сала кетелік, құрылтайға ҚР Ақпарат және қоғамдық&nbsp; даму &nbsp;министрі Дәурен Абаев және еліміздің түкпір-түкпірінен бас имамдар қатысты.
Өтпенов Наурызбай Тағанұлы 1977 жылдың 13 наурызында дүниеге келген.
Білімі:
1993-1997 жылдары Ташкенттегі «Имам Әл-Бұхари» атындағы Ислам институтында оқып жоғарғы діни білім алған.
1999-2001 жылдары ҚМДБ жанындағы Ислам институтын оқыған.
2009 жылы Мысыр Араб Республикасында қысқа мерзімде діни білімін жетілдірген.
2010 жылы Абай атындағы Алматы Мемлекеттік университетінің «Тарих» факультетін сырттай оқып бітіріп жоғарғы білім алған. 2011-2013 жылдары аталған университеттің «Дінтану» мамандығы бойынша магистратурасын бітірген.
2017 жылдан бастап «Нұр-Мүбарак» Египет ислам мәдениеті университетінде «Исламтану» мамандығы бойынша PhD докторантурасында оқуда.
Еңбек жолы:
1997-2006 жылдары Республикамыздың түрлі мешіттерінде имамдық қызметтерді атқарумен бастау алған.
2006-2011 жылдары ҚМДБ-ның Қарағанды өңіріндегі өкілі, Қарағанды қалалық №1 орталық мешітінің Бас имамы.
2011-2013 жылдары Қазақстан Республикасы Дін істері агенттігінің Діни бірлестіктермен байланыстар жөніндегі басқармасының Бас сарапшысы.
2013-2018 жылдары ҚМДБ төрағасының бірінші орынбасары, наиб мүфти, ҚМДБ-ның Астана қаласы бойынша өкілі, «Нұр Астана» орталық мешітінің Бас имамы.
2018 жылдың шілде-қазан айлары ҚМДБ төрағасының бірінші орынбасары, наиб мүфти, ҚМДБ-ның Түркістан қаласындағы кеңсе басшысы, Түркістан облысы бойынша өкілі имамы.
2018 жылдың қазан айынан бастап ҚМДБ төрағасының бірінші орынбасары, наиб мүфти, ҚМДБ-ның Нұр-Сұлтан қаласы бойынша өкілі, &nbsp;Республикалық «Әзірет Сұлтан» мешітінің Бас имамы.
Еңбек жолындағы жетістіктері:
Наурызбай Тағанұлының тікелей жетекшілігімен 2002-2005 жылдары ШҚО, Аягөз қаласында орталық және «Жаңауыл» мешіттерінің құрылысы сәтті жүргізіліп, іске қосылған. 2010-2011 жылдары Қарағанды қаласындағы орталық мешіттің салынуына үлес қосқан. Қарағанды облысында «Сұлу әлем», «Нұрлы мінбер», «Жұлдызды гол» атты жобаларды іске асырған. Республикалық БАҚ беттерінде жарияланған көптеген діни, рухани-танымдық мақалалар мен «Үміт сәулесі», «Мазһабсызбен сұхбат» атты кітаптардың авторы.
Марапаттары:
«Құрмет» орденінің иегері, Аягөз ауданының құрметті азаматы,&nbsp;Қазақтан Тәуелсіздігінің 20 жылдығы медалімен, Қазақтан Тәуелсіздігінің 25 жылдығы медалімен, Қарағанды облысы әкімінің құрмет грамотасымен, Нұр-Сұлтан қаласы әкімдерінің алғыс хаттарымен марапатталған.

Елімізде Бас Мүфти ауысты

<a href="https://kyzylorda-news.kz/">Kyzylorda-news.kz.</a> Қызылорда қаласының әкімі Нұрлыбек Нәлібаев есеп беру кездесулері аясында «Құқық қорғау қызметтері орталығында» қоғамдық қабылдау өткізді.
Қоғамдық қабылдауға 100-ден аса қала тұрғыны келіп, өздерін толғандырып жүрген өзекті мәселелері мен өтініш-тілектерін жеткізді.
Жеке қабылдауда көтерілген мәселелердің дені тұрғын үй, әлеуметтік көмекке қатысты болды. Сонымен қатар жер және коммуналдық мәселелері бойынша да барлық тұрғындарға түсініктеме беріліп, тиісті бөлім басшыларына тапсырмалар берілді. Атап айтар болсақ, 62 өтініш тұрғын үй мәселесі бойынша, 29 өтініш бойынша жәрдемақы, жұмыс, қаржылай көмек сұралған. Жер мәселесіне қатысты 6 өтініш келіп түссе, көше, жарық мәселесіне қатысты 12 өтініш қабылданды.
Қала әкімі әрбір көтерілген ұсыныс-пікірлер жеке танысып, бірін дер кезінде шешілуіне ықпал жасаса, толық зерделеуді қажет ететін және заңдылығына сәйкес шешілетін мәселелерді жауапты басшыларға тапсырды.
Жалпы, жыл басынан бері бүгінге дейін қала әкімі Нұрлыбек Нәлібаев қалаға қарасты кент, ауылдық округтерде, Қоғамдық кеңес алдында есеп беру және үш қоғамдық қабылдау, барлығы 14 кездесу өткізді.
Әрбір кездесуде тұрғындарды толғандыратын мәселелер талқыға салынып, оларды шешудің мүмкіндіктері мен тиімді жолдары сараланды.
<img src="https://kyzylorda-news.kz/wp-content/uploads/2020/02/7gorakimpriem2.jpg" alt="" />
<img src="https://kyzylorda-news.kz/wp-content/uploads/2020/02/7gorakimpriem3.jpg" alt="" />
<img src="https://kyzylorda-news.kz/wp-content/uploads/2020/02/7gorakimpriem4.jpg" alt="" />
<img src="https://kyzylorda-news.kz/wp-content/uploads/2020/02/7gorakimpriem5.jpg" alt="" />

Қазақстан және Қызылорда облысының жаңалықтары