<a href="https://kyzylorda-news.kz/">Kyzylorda-news.kz</a> ақпараттық агенттігінің 24 ақпанға арналған жұлдыз-жорамалы.
Тоқты
Жақын адамыңызбен қарым-қатынасыңыз қиындай түседі. Оны жақсартамын деп әуреге түспеңіз. Тек түсінісу үшін уақыт беріңіз. Сонда ғана барлығы өз орнына келеді.
Торпақ
Қаржылық жағдайыңызды жақсартуға мүмкіндік бар. Бүгін көп шаршайсыз. Көңіл-күйіңіз түсіп, басыңыз ауырады. Үй шаруасы да әдеттегіден кебейіп кетуі мүмкін. Бірақ еш уайымдамаңыз, көмекке келетіндер бар.
Егіздер
Бүгін белсенділік танытып, шығармашылығыңызды шыңдай түсесіз. Қызықты ұсыныстар түсіп, жұмысқа деген ынтаңыз артады. Бірақ барлығы сіз ойлағандай болмайды. Шыдамды болыңыз. &nbsp;
Шаян
Бұрын жасап көрмеген іспен айналысыңыз. Сізге таңсық сауда-саттық саласы болуы мүмкін. Бұл салада мол табысқа кенелеріңіз анық. Бірақ сізге серік болар жан керек. Серіктестің өзіңіз таңдаңыз.
Арыстан
Қаржылық жағдайыңыз жақсарады немесе берілген тапсырманы сәтті аяқтайсыз. Бірақ арқаны кеңге салудың қажеті жоқ. Отбасыңызға көп көңіл бөліңіз. Жоспарларыңызды өзгертуге тура келеді. &nbsp;
Бикеш
Бүгін күш-қуатыңыз тасып тұр. Кез келген істе тәуекелге барып, оларды оң нәтижемен аяқтайсыз. Үйге жөндеу жұмыстарын немесе пайдасы мол зат сатып алар болсаңыз бүгін жолыңыз болады.
Таразы
Алға қойған мақсатыңызға бір табан жақындайсыз. Өзіңізге деген сенімділігіңіз артып, ішкі түйсігіңіздің алдамайтынына көзіңіз жетеді. Қайсыбір істі қолға алсаңыз да барлығын оңай атқара аласыз.
Сарышаян
Кәсіппен айналысатын «суқұйғыштар» үшін бұл күн сәтті болады. Бүгін сіздер өз ісіңізге қатысты жағымды жаңалық аласыз немесе ұсыныс түсуі мүмкін. Бірақ сол ұсынысты мақұлдамай тұрып, ұзақ ойланыңыз.
Мерген
Сіздің табандылығыңыз бен сырт келбетіңіз жұмыста оң нәтижеге қол жеткізуге көмектеседі. Жетістікке тез жетемін деп ойласаңыз, қателесесіз. «Асықпаған, арбамен қоян аулайды» демекші, мақсатқа асықпай жетуге болады.
Тауешкі
Достарыңыздың немесе серіктестеріңіздің көмегімен жұмысқа қатысты ұсыныс аласыз. Бұл ұсыныс сіздің табысыңызды арттырады не болмаса жаңа қызметке ауысасыз. Бірақ барлығын жан-жақты ойланып алыңыз. &nbsp;
Суқұйғыш
Өзіңіздің күш-жігеріңізге сенім артып, біраз шаруаны тындырасыз. Көптен ойға алған жоспарыңызды жүзеге асыратын кез келді. Жұлдыздар баспанаға қаражат жинау немесе алдағы күндерге ақша жинауға кеңес береді. &nbsp;
Балықтар
Қандайда бір істі артығымен орындағанды ұнатасыз. Іске тиянақтылығыңыздың арқасында табысыңызда көбейе түспек. Жұмыс бабымен жолға шығуыңыз мүмкін. Бұл материалдық жағдайыңызды жақсартатыны белгілі.

Жұлдыздар не дейді?

<a href="https://kyzylorda-news.kz/">Kyzylorda-news.kz.</a> Ғалымдар ұйқы қанбау, семіздік, диабет және жүрек ауруларының арты қандай қиыншылықтарға әкеп соғуы мүмкін екендігін айтып кетті, деп хабарлайды <a href="https://stan.kz/yyki-kanbauinin-kauiptiligi-aytildi-327454/">Stan.kz</a>.
Ресейдің жоғары жүйке жұмысы мен нейрофизиология институтына қарасты&nbsp;түс көру нейробиология зертханасының жетекшісі Владимир Дороховтың айтуынша, кейбір адамның бойында ұйқы&nbsp;гені болады екен. Бұл гені бар адамдар төрт сағат қана ұйықтап, сергек болып жүре алады.&nbsp;
Маман жұмыс уақытын ұзарту үшін көп ұйықтау дұрыс емес екендігін атап өтті. Бұған қоса ол ұйқы қанбағандық ағзаға кері ықпалын тигізуі мүмкін.&nbsp;
<blockquote>
 “Түнде ұйықтау өте маңызды. Себебі ұйықтаған кезде сіздің денеңіз өзін қалыпқа келтіреді. Ал егер&nbsp;ұйқы жетпесе, ол түрлі патологиялық ауытқушылыққа әкелуі мүмкін”, – деді зертхана жетекшісі.&nbsp;
</blockquote>
Сонымен қатар Дорохов пайдалы ұйқы гені болған тұлғалардың қатарына Маргарет Тэтчер, Наполеон Бонапарт, Александр Македонский мен Уинстон Черчильдің жатқызды.&nbsp;
<blockquote>
 “Олар төрт сағат қана ұйықтап, өздерінің жұмыстарын жүргізе берген. Бірақ бұл барлығына берілген қасиет емес”, – деп қосты ресейлік маман.&nbsp;
</blockquote>
Еске салайық, бұған дейін күндізгі уақытта шамадан тыс ұйықтаудың да зияны бар екендігі айтылған еді.

Ұйқы қанбаудың қауіптілігі айтылды

<a href="https://kyzylorda-news.kz/">Kyzylorda-news.kz.</a> Шын мәнінде өкіл ата-ана деген кім? Олардың міндеттері мен қызметтері қандай? Өкіл ата-ананы кім, қандай жағдайда таңдайды?
Дүние есігін ашқан кез келген сәбидің өкіл ата-анасы бар. Ол заман талабы сияқты. Бұрынғы кезде «кіндік шеше» деген қадір-қасиеті жоғары, жауапкершілікті арқалаған кісі болса, бүгінде олардың орнын өкіл ата-ана басқандай. Өкіл ата-ана көбінесе жақын достар арасынан таңдалынады. Кейбіреулер ырымдап қызметтік дәрежесі жоғары, абырой биігінен түспей жүрген ел азаматтарын таңдаса, енді біреулері «Біздегі қуаныш оларға да жұғысты болсын, сәбиге деген сағынышын біздің перзентімізді мәпелеп мауқын бассын» деген оймен перзент аңсап жүргендерге қолқа салады. “Шын мәнінде өкіл ата-ана деген кім?”, “Олардың міндеттері мен қызметтері қандай?”, “Өкіл ата-ананы кім және қандай жағдайда таңдайды?” деген секілді сұрақтардың жауабын іздеп көрген едік.
– Жалпы, өкіл ата-ана сәбидің туған ата-анасының келісімімен, қалауымен таңдалатын жан. Жалпы қазақ жетімін жылатып, қаңғыртып, тастап кетуден алыс болған халық. Тағдырдың жазуымен ата-анасынан ерте айырылып, жетім қалған баланы ата-анасының туысқандары немесе дос-жарандарының бірі өкілдік жасап, қамқорлығына алған. Міне, осы кісіге баланың өкіл әкесі деген атау берілген. Ол балаға өкіл болғанымен, өз ата-анасындай қамқор қорғаушы, мейірім шапағатқа бөлеуші, бауырына басып, мейірім көрсетуші болған. Оны өз перзенттерінен кем көрмей, бағып-қағып, қарнын тоқ, киімін бүтіндеп жетілдірген. Жағдайы келсе жоғары оқу орнына түсіріп, диплом алып берген. Қызметке орналастырып, өкіл әкелік міндетін мінсіз атқарған. Осы дәстүрді бүгінгі кезде қимас достар жалғап келе жатқаны қуантады. Екі достың балалары тең өсіп, бір үйдің балаларындай бауыр басады. Бауырмалдылық артып, көкжиектері кеңейеді. Қиын жағдайда да, қызықшылықта да бір-бірінің жанынан табылып, демеу болады. Перзентінің дүниеге келуінің құрметіне дастарқан жайып, ата-аналарын, ет-жақындарын, туыс-бауырларын, дос-жарандарын шақырып, ас береді. Осы қуанышты кеште отбасы мүшелері өз перзенттеріне ниеттеніп, жақындарының арасынан өкіл ата-ана таңдайды. Өкіл ата-ана мәртебесін арқалаған отбасылардың міндеттері еселенеді. Өкілдікке алған ұл немесе қызы үшін отқа да, суға да түсіп, қамқорлық жасайды. Ортақ перзенттерінің өскеніне қуанып, шалыс кетсе, демеп, қолдау көрсетеді. Өкіл ата-ана аталған күннен бастап бала еңбектегенде, тәй-тәй басып балабақшаға барғанда, алғаш мектеп табалдырығын аттағанда, жоғары оқу орнына түсіп, диплом алған кез келген қуанышты сәтті мүлт жібермейді. Тек қана қамқорлық көрсетіп, мейіріміне бөлегеннен басқа, қаржылай да қолдау жасап отырады. Сыйлық әперіп қуантады. Реті келсе кейбір қуаныштарына той жасап береді. Кей өкіл ата-аналар қызды ұзатуды өз міндеттеріне алса, енді бірі қыздың барлық жасауын дайындайды. Бұл бір жағынан қарасаң, айтарлықтай көмек.
– Ата-анасы өкіл ата-ананың құрметі жайлы жас өскіннің санасына сіңіріп отырады. Ол өкіл ата-анасын өз ата-анасынан кем көрмеуі тиіс. Оларға деген құрметі мен ізеті тең болуы керек. Кейбір қыздар бойжете бастағанда өз анасына айтуға ұялатын құпияларын өкіл анасымен бөліседі. Құрбыларымен арасындағы келіспеушіліктер мен түсініспеушілік кезінде кеңес алады. Ал жігіттер жағы да әкесіне айта алмаған арманын өкіл әкесі арқылы жеткізіп отырады. Жалпы алғанда өкіл ата-ананың болғаны туған ата-ана үшін де, ұл-қыз үшін де өте қажет.
«Өкіл ата-ана» – өскелең ұрпақтың бір-біріне бауырмалдылығын, мейірімділігін, жанашырлығын оятып, жауапкершілікті арттыратын керемет атау әрі үлгі тұтарлық дүние. Әрбір сәбидің қиын кезде жанұшыра жүгіріп келетін, қуанышында жүрегі жарылардай қуанатын адал өкіл ата-анасы болғай!
<a href="http://reactor.inform.kz/kz/okil-ata-ananyn-mindetin-bilesiz-be-a83005?utm_source=redtram&utm_medium=referral&utm_campaign=news&utm_content=569770019&utm_term=380124">Reactor.inform.kz</a>

Өкіл ата-ананың міндетін білесіз бе?

<a href="https://kyzylorda-news.kz/">Kyzylorda-news.kz.</a> Қыз баласы сұлулықты сүйеді. Сұлулық пен мезгілдің де үндесетінін де білген абзал. Мысалы, биыл көктемде қандай түс маникюр үшін өте ұтымды әрі сәнді болуы мүмкін?&nbsp; Ашық, жылы және қанық түстер келер көктемнің көркемдігін аша түседі. Сіз дайынсыз ба?
Ашық көк
<img src="https://kyzylorda-news.kz/wp-content/uploads/2020/02/lak1.jpg" alt="" />
Егер күйгелек, шапшаң болсаңыз, ашық көк түсті маникюр сізді бірқалыпты, сабырлы болуға шақырады. Сары не қара қыз болғаныңыз маңызды емес. Қар мен көк аспанның үйлесіміндей болған осы түсті таңдасаңыз, құрбыңыздан “Қандай әдемі, сүйкімді тырнақтар!” деген мақтау сөз естисіз.
Қызыл
<img src="https://kyzylorda-news.kz/wp-content/uploads/2020/02/lak2.jpg" alt="" />
Ешқашан өзектілігін жоймайтын классикалық түс маусым таңдамайды. Тіпті, теріңіздің түсіне, тырнақ формасына, саусақ ұзындығына, киім үлгісіне де “назар аудармайды”. Есіңізде болсын, қызыл түсті маникюр сән мен сымбат әлемінде мәңгілікке тұрақтап қалды.
Опа түсті
<img src="https://kyzylorda-news.kz/wp-content/uploads/2020/02/lak3.jpg" alt="" />
Романтикалық опа түсі – бейтарап болғаны соншалық, кеңсе қызметкеріне де, спорт сүйетін қыздарға да, жалпы бәріне жарасады. Бұл бояуға қосымша жылтыр сеуіп не сурет салудың қажеті жоқ.
Бонус: Неонды қызғылт
<img src="https://kyzylorda-news.kz/wp-content/uploads/2020/02/lak4.jpg" alt="" />
Барби стиліндегі нәзік және перламутр жылтырмен неонды ашық қызғылт түс осы көктемнің жазға ұласқан тұсында өте әдемі көрінері сөзсіз. Тым ерекше түстерді ұнатпасаңыз, біз ұсынған осы үлгіні байқап көріңіз.
<a href="https://massaget.kz/kyizdarga/sn/60955/">Massaget.kz</a>

Көктемгі маникюріңізді таңдадыңыз ба? (ФОТО)

<a href="https://kyzylorda-news.kz/">Kyzylorda-news.kz.</a> Денсаулық сақтау министрі медициналық бетперделерге байланысты елді дүрліктірмеуге шақырды, деп хабарлайды <a href="https://stan.kz/birtanov-327501/">Stan.kz</a>.
Шенеуніктің сөзінше, қазіргі кезде Қазақстан дәріханаларындағы жағдай мұқият қадағалауда екен.&nbsp;
<blockquote>
 “Біз жергілікті басқарушы органдармен бірігіп, дәріханалардағы жағдайды бақылап отырмыз. Кейбір аймақтарда бірқатар мәселелер туындауда. Кейбір кәсіпкерлер нарықта тасымалдаушылар мен дәріханалардың өзінен көптеген бетперделерді жаппай сатып алып, ҚХР-ға жіберуде екен. Бізге Қытай билігі бұған кедергі келтірмеуді сұрады. Егер&nbsp;қытайлықтар өздері келіп сатып алып жатса, біздің бұл жағдайға араласуымыз, әрине, заңсыз”, – деді министр.&nbsp;
</blockquote>
Бұған қоса министрі төтенше жағдайдың орын алуына байланысты қосымша бетперделер дайындалып қойылған.&nbsp;
<blockquote>
 “Оған алаңдамасақ та болады. Бізде қосымша бетперделер қоймада жинаулы тұр. Шикізаттың өзі Қытайда дайындалады. ҚХР-да кейбір заттардың экспортына тыйым салынған. Олардың қатарында жеке гигиеналық қорғанысқа арналған құралдар да бар. Нарыққа деген әсері байқалуда. Бірақ жалған ақпарат таратып мәселені ушықтырудың қажеті жоқ. Бетперделер тек ауырып жүргендерге керек”, – деді Біртанов.&nbsp;
</blockquote>
Министрдің сөзінше, елдегі бетперде тапшылығын алдын алу үшін оны шет мемлекеттерге тасымалдалуына шектеу қойылған.&nbsp;
<blockquote>
 “Егер азамат карантинге жабылса, оған бетперде керек емес. Бірақ қоғамдық жерде, ауырып жүрсеңіз, бетперде тастаған жөн. Олардың саны біздің елімізде жеткілікті. Медициналық бетперде тапшылығын алдын алу үшін оны шетелдерге тасымалдануына тыйым салдық. Барлық мемлекеттер осылай жасауда. Біз бір жылдың қамын жасап қойдық”, – деді Біртанов.&nbsp;
</blockquote>
Бұған дейін қазақстандықтар медициналық бетперделердің Қытайға жаппай тасымалдануын айтып дүрлігіпті.

Қазақстандықтар медициналық бетперделерді жаппай сатып алып, Қытайға жіберіп отырған

<a href="https://kyzylorda-news.kz/">Kyzylorda-news.kz.</a> Келмеске кеткен Кеңес дәуірінде жоғары білім алу үшін күндізгі, кешкі және сырттай оқытатын бөлімдерде оқушы едік. Ең жауапты жазғы сессия жақындап, тықыр таянып қалған кез болса керек. Өзіміз сияқты бір тілші ағайын күндіз білім алатын студентке: «Сізге сессияға дайындалу үшін қанша уақыт керек?» – деп сұрақ қойыпты. Онсыз да миы қатып жүрген жігіт көп ойланбастан мұрнын шұқылап, «Он күн жетіп қалады», – деп жауап беріпті.
Қадалған жерінен қан алатын журналист бұл сауалды кешкі бөлімде оқитын шашы жалбыраған қызға қойыпты. Таң сызат бермей жұмысына асығатын, апақ-сапақ кеште оқуына жүгіріп, әбден есі шығып жүрген студент: «Бес болса жарап қалар еді», – деп асығыс жауап береді. Бастаған ісін аяқтамақ болған тілші Қазақстанның бір қиыр шетінен келген, сырттай оқитын студентке баяғы сауалын қайталапты.
Әлгі батырдың пәтерге орналасып, оқу аудиториясына енді ғана бас сұққан кезі екен, алақ-жұлақ етіп: «Емтиханды қайда тапсырып жатыр, қазір-ақ тапсырып тастайын», – депті.
Дәркеш те ойланбастан-ақ емтиханды тапсыруға әзір студент­тердің қатарына жатады. Аудандық газетте қызмет атқаратын біздің батыр амандық болса, Ұлттық уни­верситеттің журналистика факуль­тетінің үшінші курсын біті­ріп, шікірейіп ауылға қайтпақшы. Бақылау жұмыстары, зачет, емтихан деп мұрыннан су кетіп, зыр жүгіріп жүрсе де, қарап жүрмей, Таңат досы айтпақшы, бет біткеннің сұлуы керемет қызбен танысты. Аты да әдемі – Айгүл! Алма жеп өскен Алматының бойжеткені аршыған жұмыртқадай аппақ, тал шыбықтай бұралған сымбатты денесінен де бір мін таба алмайсың. Көп жағдайда астананың сұлу бойжеткендері мұрындарын шүйіріп, тәкаппар болып келеді, ауылда өскен, орысшасы шамалы «мәмбеттермен» менсінбей сөйлесетіні және бар. Айгүлдің де қазақшасы шамалы, бір жақсысы, шамасы келгенше Дәркеш түсінетін тілмен сөйлесуге тырысады.
Көркіне жігіт біткен ғашық болатын сұлу болса да, өзін қарапайым ұстайды, мінезі де ашық жарқын. Ауылдағы «келін ал, келін ал» деп күнде миын шұқитын апасының сөзімен айт­қанда – Құдайдың өзі бере салған алтын қыз.
Айгүлмен алғашқы танысқан күндердің бірі болатын. Абай және Абылайхан көшелері қиылысқан жердегі Ұлттық кітапхананың оқу залына сәл кешірек келген Айгүл­ден Дәркеш далада ауа райының қандай болып тұрғанын сұрады.
– Ой, жаман, – дейді Айгүл кішкентай әдемі қыр мұрнын тыжырайтып – прямо, жаңбыр құлап тұр. Жігіт қалалық бойжеткеннің қызықтау шыққан жауабына күліп жіберді. 
– Неге күлесің? – деді Айгүл бұртиып.
– Жаңбыр құламайды, жауады.
– Солай ма, – деді бойжеткен әнтек жымиып – есте болсын, жаңбыр құламайды, жауады. Дәркеш, қарсы болмасаң, екеуміз өзара келісім жасайық: сен мені қазақша үйрет, ал мен сені орысшаға үйретейін. Байқаймын, орысшаң совсем шамалы екен, кеше екеуміз автобуста келе жатқанда саған әб­ден күлкім келді.
Егде орыс шалы­на орныңды беріп, әдептілік жаса­ғаның өте орынды. Бірақ «Дедушка, садитесь, я пешком постою», – дегенің тіпті жарамайды. Қанша дегенмен, сен КазГУ-дің журналис­тика факультетінің үшінші курс студентісің ғой.
Қыз бен жігіттің әзілі жарасып, қосарлана күлді.
Екеуі оқу залынан шыққанда жаңбыр басылып, күннің көзі шығып­ты. Жауыннан кейінгі көк­темгі Алматы сұлу арудай құлпы­рып, түрленіп шыға келген. Аудан­дық газеттің қызметкеріне қара­ғанда Айгүлдің бақуатты жанұядан шыққандығы бірден байқалады. Бойжеткен күнде тотықұстай та­ра­нып, түрлі-түсті киініп, әдемі болып келеді. 
Бүгін де үстіне бүрмелі ақ көй­лек киіп, құлпырып кетіпті. Құлын­шақтай сымбатты денесі қайта-қайта ұрланып қарамасыңа қой­майды. Дәркештің үстінде баяғы сұр костюм, бірінші курста оқып жүргенде алған қара шалбары да тоза бастапты. Ол еліктің лағындай әдемі қыздың жанында өзінен-өзі қуыстанып келеді. Айгүл де бір сәт үсті-басына сын көзбен қарағандай болды. Дәркеш қысылып, маңдайы тершіп қоя берді.
– Айгүл, үсті-басыма бұлайша қарай бермеші, ауылда бұдан басқа да киімдерім бар. Жақында Таңат досым әкеліп береді, – деді ол бі­ре­се айдай сұлу Айгүлге, біресе аяғындағы мыжырайған ескі топ­лиына қарап.
Жанында үлбіреп келе жат­қан сұлу бойжеткен күмістей сың­ғыр­лап күліп қоя берді.
Дәркеш одан бетер ыңғайсызданып, терлеп кеткен маңдайын сүрткілей берді.
– Рас айтамын, Айгүл. Таңат досым кеше келуі керек еді, неге екені белгісіз, кешігіп жатыр, – деді жігіт ақталғандай болып.
– Осындай да ұқсастық болады екен-ау, менің папам да мамаммен танысқанда дәл осылай депті, – деді Айгүл күлкісін әрең басып. – Ну что же, енді Таңатты күтеміз… Сөзі­нің соңын әзілге бұрған Айгүл жігітке еркелей-наздана қарады. Дәр­кештің бойынан үлкен жүк түскендей, бүкіл денесі жеңілдеп сала берді…
Кеңес дәуірінде сол кездегі ақшаның кәдімгідей құны бар болатын. Қалтаңда он сомың болса, сенен асқан бай, жомарт адам жоқ, сүйген қызыңды кездесуге ұялмай шақыра бересің. Жуалыдан келген Ромео бір күні Айгүлді «Арман» кинотеатрына киноға шақырды. Екеуі балмұздақ жеп, біраз серуендеген соң, Дәркеш билет алмақ болып, ұзыннан-ұзақ шұбатылған кезекке тұрған. Кезегі келіп, билет алайын десе, қалтасындағы Лениннің басы бейнеленген қып-қызыл ондық сомы жоқ, жанталаса олай қарады, бұлай қарады, жер жұтып қойғандай әлгі Құдай атып кеткір ақша зым-зия. Жігіттің маңдайынан тері бұрқ етіп, кезектен сытылып шықты да, өзін күтіп тұрған Айгүлге: «Қазір келемін» деп, қашпақ болсаң – зымыра дегендей, аялдама жаққа зытып кеп берді…
Осы оқиғадан соң Дәркеш Айгүлді көрсе тұра қашатын болды. Қарауға, бір ауыз сөз сөйлеуге бет жоқ. Ең жаманы, екеуі бір жоғары оку орнында оқиды, факультеті бас­қа болса да, кейде сыртынан кө­ріп қалады, ондайда біздің батыр тазы қуған қояндай зыта жөнеледі. Айгүл де өжет қыз екен. Бір күні оқу ғимаратынан шыға берісте «қаш­қынды» тыпыр еткізбей ұстап алды.
– Дәркеш, қызық жігіт екенсің, – деді Айгүл таңқала қарап, – өзің киноға шақырасың, өзің қашып кетесің. Одан кейін де мені көрсең тұра кеп қашатыныңды қалай түсі­нуге болады? Саған не болып жүр өзі, түсіндіріп айтсаңшы? 
Дәркештің шегінетін жері қалмай, бар шындықты міңгірлеп айтуға тура келді.
– Бар болғаны осы ма, – деді Айгүлдің ақ жүзіне қан жүгіріп, – бәрін түсіндіріп айтпадың ба? Во тебе на ауылдан келген Ромео. Сұлу бойжеткен сықылықтап күліп жіберді.
– Айтпақшы, Таңат досың келді ме? – деді Айгүл күлкісін әрең басып.
– Иә, келген, – деді жігіт сасқалақтап.
– Онда досың әкелген әдемі костюміңді киіп, сағат кешкі 6.00-де өзің қашып кеткен «Арман» кинотеатрының алдына кел, сені бүгін ата-анаммен таныстырамын, байқа, тағы да зытып кетіп жүрме…
Біздің Дәкең сессияны ойдағы­дай тапсырып, оның үстіне облыстық газетке қызметке ауысып, ауылға көңілді оралды. Әке-шешесінде ес жоқ, ол келген күні-ақ мүйізі қарағайдай бір қошқарды сойып тастап, кәдімгідей дүрілдетіп той жасады. Бригадирдің көмекшісі болып жұмыс істейтін Шотбай сәл қызыңқырап қалып:
«Құдайдың мұнысына да шүкір, біздің әулеттен де бір адам беделді қызметке ілікті-ау, әйтеуір. Анау-мынау емессің, бауырым, сенің алдыңда совхоздың директоры тұрмақ, райкомның өзі зыр жүгіретін болады. Қисық бас Ордашқа көмекші болып, қашанғы салпақтаймын. Айт бастықтарға, мені тезірек бөлім меңгерушісі етсін! – деп, оған шұғыл тапсырма беріп жатты.
Ертесіне Дәркеш әкесі екеуі шөп шабуға жиналды. Көк есек жегілген арбамен әкелі-балалы жандар тепеңдетіп тартып келеді.
– Балам, сенің жасыңда өзіміз бір рет емес, екі рет үйленіп тастап едік. Келіншек алатын түрің бар ма? – деді әкесі сұрақты төтеден қойып.
– Үйлену мәселесі осы бесжыл­дықтың жоспарында бар, көке, – дейді Дәркеш ыржиып. 
– Жөн, жөн, үйленгенің дұрыс, – деді әкесі, қалың мұртын сипап. – Қашанғы сүрбойдақ боласың. Айтпақшы, болашақ келін қай жердің қызы, әке-шешесі бар ма? 
– Құдалыққа дайындала беріңіз, көке. Келініңіз Алматының қызы, ата-аналары да жақсы адамдар.
– Әрине, құдалыққа барған дұрыс қой, – деп сәл ойланып қал­ған отағасы сөзін жалғады. – Қа­зақта «Тең – теңімен, тезек – қабымен» деген сөз бар. Қаланың ақсаусақ қызы ауылға сіңіп кете ала ма, бізге дұрыс келін болып кете ме? Алыстан арбалағанша, жақыннан дорбалаған дұрыс, балам. Ақыры келіншек аламын деп құлшынып отырсың, саған бір әдемі қалыңдықты өзім тауып берейін, оған қалай қарайсың? 
– Мынауыңыз ойланатын жайт екен. Онша-мұншаны жақтыра бермейтін менің әкеме ұнап қалған қандай қыз ол? – деді Дәркеш қулана күліп.
Осы кезде таңертеңгі сауыннан қайтып келе жатқан әкесінің құрдасы Төлеутайдың қызы Қалам­қас қарсы ұшырасып, ізетпен сәлем берді.
– Жаңағы айтқан қыз – осы, – деді әкесі сыбырлап.
– Әке, бұл болмас. Қаламқас сауыншы ғой. Ал, мен болсам – жорналиспін. Өзіңіз білесіз, қалада сиыр фермасы жоқ. Қаламқас үшін маған сүт фермасын ешкім де ашып бермейді.
Төкең шарт кетті:
– Сенің анау кәуектей ба­сыңда тауықтың миындай ақыл жоқ. Өзінше мұрнын шүйіріп, Қаламқасты менсінбейді бұл жаман. Алдымен сол қыз саған қарай ма екен? Біле білсең, ол бала тек ферма ғана емес, совхоздың маңдай алды сауыншысы, білдің бе? Өзі алтын асықтай, екі балтыры анау…
Дәркеш әкесінің сөзіне мырс етіп, бірте-бірте ұзап бара жатқан Қаламқасқа ұрлана қарады. Шынында да әке сөзінің жаны бар екен. Төлеутайдың сауыншы қызының екі балтыры оқтаудай түзу әрі сұлу екен.
Бір арба шөп шауып, оралған беттері жаңа ғана. Үлкен кесеге құйылған қымызды төңкеріп тас­тап, шөлін басқан Төкең таңер­теңгі әңгімесін қайтадан бастады.
– Дәркеш, ақылың болса, Төлеутайдың қызын ал, өзі сондай жақсы бала. Шешесі Ұлтуар да керемет әйел, қазақ атамыз « Анасын көріп, қызын ал» деп бекер айтпаған ғой, – деп, Қаламқастың екі аяғын жерге тигізбей мақтай жөнелді.
Жаңа ғана жайдары отырған Дәркештің анасы Төлеутайдың әйелі мен қызының атын естісімен жақтырмай тырысты да қалды.
– Әй, шал, жасың жетпіске жақын­дағанда алжиын дедің бе? Жас кезіңде Төлеутайдың келін­шегін аузыңның суы құрып мақтау­шы едің, енді оның қызын мақтай бастадың ба? Қол-аяғы алтын болса да, балам оның қызын алмайды, білдің бе?!
Самаурындай бұрқ ете қалған кемпір алдындағы қымызын сапыра бастады.
Сөзден тосылып қалған Төкең: «Балам, қымыз іш, қымыз іш», – деп шақшасын алып, насыбайын ата бастады…
Ертеңінде апасы Дәркешті және немере ағасы Өскенбайды ертіп, шұғыл түрде Алматыға құдалыққа аттанып кетті.
Доқтырхан ТҰРЛЫБЕК
<a href="https://qazaqadebieti.kz/21700/auyldan-kelgen-romeo">Qazaqadebieti.kz</a>

Ауылдан келген Ромео

<a href="https://kyzylorda-news.kz/">Kyzylorda-news.kz.</a> Ыстық душ пен ванна әртүрлі аурулары бар адамдарға, соның ішінде жүрек-қан тамырлары ауруларына қарсы. Яуза клиникалық ауруханасының бас дәрігері Виктор Лишин «градусын&nbsp;көтеруге болмайтын»&nbsp;адамдар туралы айтты, деп хабарлайды <a href="https://stan.kz/dariger-istik-dushtin-kimge-kauipti-ekenin-aytti-327537/">Stan.kz</a>.
Қант диабеті, варикозды қан тамырларының ұлғаюы, тромбоз, асқазан-ішек жүйесі аурулары және тері проблемалары: дерматит, псориаз, денеде кез-келген бөртпелер немесе тыртықтар үшін ыстық ванна мен душтан бас тартуға кеңес береді.
<blockquote>
 «Ваннаны қабылдаған кезде ыстық су қан ағымын&nbsp;ішкі ағзаларға белсенді түрде жеткізеді&nbsp;және бұл аурудың шиеленісуіне әкеледі», – деп түсіндірді Лишин.
</blockquote>
Бірақ суық тию кезінде ыстық душ немесе ванна дене температурасы 37 градустан аспаған кезде өте пайдалы екен айтты. Терапевт ваннаны қабылдауға өте ыңғайлы судың температурасы&nbsp;28-30 градус&nbsp;дейді.

Дәрігер ыстық душтың кімге қауіпті екенін айтты

<a href="https://kyzylorda-news.kz/">Kyzylorda-news.kz.</a> Қазақстандық боксшы Қанат Ислам (27-0, 21 КО) Дүниежүзілік бокс ұйымының (WBO) жаңартылған рейтингінде бір сатыға көтерілді, деп хабарлайды <a href="https://www.inform.kz/kz/kanat-islam-wbo-reytinginin-uzdik-ushtigine-kirdi_a3617053">ҚазАқпарат</a>.
Рангтер туралы кестенің жаңа шығарылымында жартылай орта салмақтағы WBO International атағының иегері мексикалық Хайме Мунгиядан (35-0, 28 КО) және британдық Лиам Уильямстен (22-2-1, 17 КО) кейін үшінші орынға тұрақтады. Орта салмақта WBO тұжырымы бойынша әлем чемпионы атағын АҚШ өкілі Деметриус Андраде (29-0, 18 КО) жеңіп алды.
Айта кетейік, бүгінге дейін өзінің соңғы айқасын Қанат Ислам 26 қазанда Алматы қаласында намибиялық Уолтер Каутондоквуға қарсы өткізіп, төрешілердің бірауызды шешімімен жеңіске жетті.

Қанат Ислам WBO рейтингінің үздік үштігіне кірді

<a href="https://kyzylorda-news.kz/">Kyzylorda-news.kz.</a> Қазақ халқы «кедейлік үш ағайынды» деп ұрпағын үш рухани дерттен, кеселден сақтандырған екен. Одан қашық жүруге шақырған. Адам баласында осы кеселдің, жоқ дегенде, біреуі болса да, кедейліктен арыла алмайтынын алға тартқан.
Этнограф Мәшһүр-Жүсіп Көпейұлы ағайынды үш кесел жайлы: «Бұрыңғылар «Кедейлік үш ағайынды болады» деген. Үлкені – кежірлік, ортаншысы – еріншектік, кенжесі – ұйқы. Бұл үшеуі – бірі желкеңнен тартып, бірі құйрығыңды жерге жабыстырып, бірі қисайта құлатып, жібермей жатқан соң, қолың қайда жетсін? Өзіңнен өзің көтіңнен кейін қарай кетіп қор боласың», – &nbsp;дейді. Қысқа да нұсқа қайырған өсиеттің астында не жатыр, соған үңіліп көрсек қалай болар екен?..
Кежірлік – кесапат
Кежірлік дегеніміз – біреудің тілін алмайтын, өзінің айтқанынан қайтпайтын тілазар, ақылға келмейтін қырсық адам. Кезінде Абылайханға келген диуана кемпір «қарғыстың ең үлкені түрі – «өзің білме және білгеннің тілін алма» деген қарғыс» деп айтқан екен. Өзің білмеген соң әрі білгеннің тілін алмаған соң, одан әрі кері кетіп, рухани азатыны, содан кедейлікке душар болатыны айдан анық.
Халқымыз кежір деп қыңыр, қырсық, менменшіл, тоңмойын, мойны айтқанға жар бермейтін бірбеткей адамды айтады. Қыңырлық – тәкаппарлыққа бастайтын тура жол. Ал тәкаппар адам – ешкімді де тыңдамай, өзін ғана дұрыс санайтын адам. Күнделікті өмірде «қырсық шалғыр», «ай қырсық-ай» деп айтып қалатын кезіміз болады. Бұдан біз кезінде жасаған қырсықтығымыз кері қайтып өзімізге қиындық, кедергі, зиян тигізуші жағдай боп оралатынын байқаймыз. Сондықтан қырсығың қиындық боп қайтып оралмас үшін қыңыр-қисықтықтан қашық болған жөн.
Еріншектің деген не?
Еріншектің не екенін «Еріншектің ертеңі бітпейді» деген мәтелден-ақ аңғаруға болады. Яғни, ештеңе істегісі келмей, шаруаны кейінге ысырып тастай беретін, аяқ-қолы сау бола тұра, жұмыстан қашатын жалқаулықты еріншектік дейміз.
Абай атамыз «Еріншектік – күллі дүниедегі өнердің дұшпаны. Талапсыздық, жігерсіздік, ұятсыздық, кедейлік – бәрі осыдан шығады» деп еріншіктік деген кеселдің тамырын дөп басып айтып кеткен. Дүниедегі жаманшылықтың басы – еріншектікте екендігін айтады. «Адам баласын қор қылатын үш нәрсе бар: әуелі – надандық, екіншісі – еріншектік, үшіншісі – залымдық» дейді тағы да Абай.
Еріншек адамның ештеңеге ұмтылмасы, қарекет қылмасы анық. Іс істегеннің өзінде, ауырдың үстімен, жеңілдің астымен жүріп, тындырымды шаруаның бір шетін шығара алмай, берекесін қашыратыны рас. Құлықсыз істеген істе не қайыр бар. Ал қайыры жоқ істе табыс та, нәтиже де болуы екіталай. Содан кедейлік, қайыршылық деген басталады. Егер шынайы табыс пен берекеге жеткіңіз келсе, қолға алған іске болаттай кірісіп, ниетіңізге бекем болыңыз.
Ұйқының кедейлікке қатысы қанша?
Халқымыз «ерте тұрған еркектің ырысы артық, ерте тұрған әйелдің бір ісі артық» дейді. Ұйқы мен еріншектік, жалқаулық – ұқсас ұғымдар. Еріншек ұйқышыл келеді. Күнін ұйқымен өткізіп, бәрінен құр қалады. Ал өзін сергек ұстағысы келген адам күнін ерте тұрудан бастайды.
Күн шыққан сәтте адамзатқа ырзық-несібе таратылады деген тәмсіл бар. Ол кезде ұйықтап жатқан адам несібеден құр қалады да, кешке дейін істеген ісінен нәтиже шықпай, өзімен-өзі титықтап бітеді. Ал істен нәтиже болмаған соң, табыс қайдан болсын? Кедейліктің, қарыз бен берешектің кесірі осыдан басталады.
Не істемек керек?
Сонымен, өміріңізді кедейлікпен өткізгіңіз келмесе, онда бабамыз айтып кеткен жоғарыдағы үш кесірден іргемізді алыс ұстайық.
Мәшһүр-Жүсіп Көпейұлы «Тіл алғыщ, елгезек болып үйрен – кежірліктен құтыласың. Тіпті, дәнеме қылмасаң да жаяу аяңдап, олай-бұлай жүріп үйрен – жалқаулықтан құтыласың. Дүние ақыреттің бірі болмаса, бірінің уайымын ойлап «қалай қыламын, қайтып есебін табамын?» деп ойға түс – ұйқышылдықтан құтыласың. Бұл үшеуінен құтылсаң, қолың әр нәрсеге жетеді» деп өсиет етеді. Мұндағы шарт – үш кесірден де бас тарту, ада болу. Бірі бойымда жоқ екен деп жүре беруге тағы болмайды. Қалған кесірден де аулақ болуға, онымен күресуге тырысқан абзал.
<a href="https://massaget.kz/layfstayl/madeniet/dep/60972/">Massaget.kz</a>

Кедейліктен құтылу үшін не істеу керек?

1992 жылы Қазақстан Республикасының Президенті Нұрсұлтан Назарбаев Пәкістанға ресми сапармен барды. Сапар барысында ол Пәкістан Премьер-Министрі Наваз Шарифпен келіссөздер жүргізді.
1993 жылы Алматыдағы Достық үйінде «Қазақстан-Венгрия» достық қоғамы құрылды.
1995 жылы Лондонда Ұлыбританиядағы Қазақстанның мәдени орталығы -Абай үйі ашылды.
2006 жылы Қазақстан Республикасы Президентінің Жарлығымен Ресейдің танымал балетмейстері Юрий Григорович «Достық» орденімен марапатталды. Ол бұл наградаға Қазақстан мен Ресей халықтарының арасында достық қатынастарды нығайтуға қосқан елеулі еңбегі үшін ие болды.
2012 жылы ҚР Ұлттық банкі Ислам қаржылық қызметтері бойынша кеңестің қауымдастырылған мүшесі ретінде қабылданды.

23 ақпан: Ел тарихында орын алған оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 23 ақпанға арналған жұлдыз-жорамалы.
Тоқты
Жұмыс жайлы көп ойланудың қажеті жоқ. Аяқталмаған істеріңіз қайтадан алдыңыздан шығады. Оларды аяқтау үшін көп уақыт пен мол қаражат қажет. Өзгелердің мәселелеріне араласпағаныңыз жөн.
Торпақ
Бүгін қабылдаған әрбір шешім дұрысынан болмақ. Жұлдыздар ненің дұрыс, ненің бұрыс екенін сілтеп отыратын болады. Жасаған әрбір ісіңіз алға басып, жұмысыңыз жандана түспек. Әрбір күніңіз өзіңізге сабақ болады.
Егіздер
Үйде немесе жұмыста мәселе туындауы мүмкін. Жағымсыз жаңалық көңіл-күйіңізді түсіріп, мазаңызды қашырады. Бұл орайда денсаулығыңызға абай болыңыз. Біраз шаршап қалуыңыз да мүмкін. &nbsp;
Шаян
Бүгін жаңа жұмыс бастамағаныңыз дұрыс. Сондай-ақ жақын адамыңызбен сөзге келіп қалудан сақтаныңыз. &nbsp;Егер алыс сапарға шығар болсаңыз, жолда абай болыңыз. «Сақтансаң, сақтаймын» дегенді ұмытпаңыз.
Арыстан
Өзгенің ісінен араласудан аулақ болыңыз. Біреуге көмектесемін деп, өзіңіз опық жеп қалмаңыз. Сіздің тапқырлығыңызға қызыға қарайтындар болады. Ішкі түйсігіңіз алдамайды. Сондықтан оған толық сенім артуға болады.
Бикеш
Эмоцияңызды сыртқа шығармауға тырысыңыз. Демалысты жақсы көңіл-күйде өткізуге тырысыңыз. Үй тіршілігін кейінге қалдырыңыз. Достарыңыз немесе туыстарыңыз көмек сұраса, қол ұшын беруден қашпаңыз.
Таразы
Бүгінгі күн сіз үшін қиынға соқпақ. Жақын адамыңызбен арадағы мәселені шешу қиынға соғады. Өз тәжірибеңізге ғана сүйеніп мәселені шешуге тырысыңыз. Тәуекелге бармаңыз. Денсаулығыңызды күтіңіз.
Сарышаян
Бүгін сізге барлығы қарсы тұрғандай сезінесіз. Бірақ уайымға берілудің қажеті жоқ. Жалғыз қалып, демалғаныңыз жөн. Бұл кейінгі кезде туындаған мәселелер туралы ойланып, олардан шығу жолдарын табуға көмектеседі. &nbsp;
Мерген
Бүгін ешбір істі қолға алмағаныңыз жөн. Қай жұмысты бастасаңыз да оң нәтиже бермесі анық. Бүгін қайырымдылық жасап, айналаңыздағыларға деген ренішіңізді ұмытқаныңыз жөн.
Тауешкі
Бүгін сізді мақтайтындар көп. Әрине, бұл сізге қуаныш сыйлайды. Өзіңіздің жаңа жоспарларыңызға серіктестер табасыз. Сейкесінше, табыс табудың жаңа көзін ашасыз.
Суқұйғыш
Жақындарыңызға көп көңіл бөліңіз. Үнемі жаныңыздан табылатын жандарға оларды жақсы көретініңізді айтып, сыйластығыңызды арттырыңыз. Кикілжіңге бармауға тырысыңыз.
Балықтар
Маңызды істерге қатысты шешім қабылдайсыз. Сондықтан мұқият болғаныңыз абзал. Басшылықпен келіспеушіліктер орын алуы мүмкін. Оған себеп, берілген тапсырманың дер кезінде орындалмауы.

<a href="https://kyzylorda-news.kz/">Kyzylorda-news.kz.</a> Қазақстан әлемде өз-өзіне қол жұмсаушылар саны бойынша үшінші орында. Соның ішінде, 15-19 жас аралығындағы жасөспірімдердің өзіне қол салуы жиі кездеседі. Басты себебі ретінде баланың ата-анамен қарым қатынасы мен болашаққа деген үміттің болмауы көрсетілген. Ғылымда бұл жас аралығын өтпелі кезең деп аталады. Баланың көңіл-күйі құбылмалы болатыны жасырын емес.
Өтпелі кезең қай жас аралығында өтеді?
Дүниежүзілік денсаулық сақтау ұйымының (ВОЗ) мәліметіне сәйкес өтпелі кезең 10 жастан басталып, 19 жасқа дейін жалғасады. Бұл уақытта баланың жыныстық жетілуі, дене пішінің өзгеріс мен психологиялық дамуы жүреді.&nbsp;
Балалық шақтан ересек өмірге өту үш кезеңге жіктеледі: бастапқы, ортаңғы, соңғы.&nbsp;
Бастапқы кезең: 10–14 жас
Бұл уақытта жыныстық жетіліп, физикалық дамиды. Қыздарда гормонды өзгерістер ер балаларға қараған 1–2 жыл ерте басталып, 3 жылға созылады. Ер балаларда 4 жыл уақытта алады.&nbsp; Бастапқы кезеңде жасөспірім тек бүгінгі күнмен өмір сүреді. Оларды әрекетінің болашаққа қалай әсер ететіні қызықтырмайды. Көңіл-күйлері құбылмалы болатындықтан, күйзеліске ұшырау жиі кездеседі. Олардың ортасы кеңейе бастайды: отбасы мен жақын достарынан бөлек, жаңа адамдармен тілдесуге құштарлығы артады.
Ортаңғы кезең: 15–17 жас
Бұл уақытта жыныстық жетілу тоқтайды. Қыздардың бойының өсуі баяулап, керісінше, ер балалар да жылдамдай түседі. Психологиялық тұрғыдан қиын мәселелерді шешіп қана қоймай, болашаққа жоспар құра алады. Олар отбасыдан алшақтап, еркіндікті қалайды. Соған қарамастан, ата-ананың беретін қамқорлығы мен қолдауы жасөспірімдердің өмірінде маңызды бола түседі.&nbsp;Жасөспірім өзінің құрдастарының ойына тәуелді бола түседі.&nbsp;
Соңғы кезең: 18 жастан кейін
Бұл кезең 21, кейде тіпті 24 жасқа дейін созылады. Соңғы кезеңде жастар саналы шешім қабылдайды, эмоциялық тұрақтылыққа ие болады. Олардың өз бетімен өмір сүруге қабілеті артады.
Өтпелі кезең ерекшеліктері:
Бұл уақытта жасөсіпірім екі жақтан түсетін күшті қатар алып жүруге мәжбүр. Бірінші гормондар ойнаса, екінші жағынан олар психологиялық жетілу кезеңінен өтеді. Өтпелі кезеңде орын алатын өзгерістер мынадай:&nbsp;
• Олар өзге біреудің ықпалымен бұрыс шешім қабылдауға қабілетті.
• Олардың есте сақтау қабілеті нашарлайды. Сондықтан, оқу үлгерімі де нашарлауы әбден мүмкін.
• Жазалау әдісі оларға кері әсірен тигізеді. &nbsp;
• Олар “нағыз” өздерін іздеумен болады. Сондықтан, шашын бояу, тату жасату, ашық киіну секілді нашар қылықтар шығаруы мүмкін.&nbsp;
Жасөспіріммен қалай тілдесу керек?
Өтпелі кезеңнен қашып құтылу мүмкін емес. Егер бала есейген сайын ата-анадан алшақтай бастаса уайымдаудың қажет жоқ. Бұл&nbsp;– қалыпты құбылыс. Сондықтан балаға еркіндік сыйлап, өз бетімен өмір сүруге дайынған дұрыс.&nbsp;
Баланың хоббиіне қызығушылық таныту
Егер жасөсіпірм ата-анасымен қызығушылықтары туралы сөйлессе, қуанған жөн. Демек, гормонды өзгерістерге қарамастан олардың арасында байланыс сақталып қалған. Бұл уақытта ата-ана барынша баланың хоббиі мен таңдауына сыйластық білдіргені дұрыс.&nbsp;
Сынға алмау
Күн сайын өзгеретін баланың “жаңа” денесіне сын айтудан аулақ болу керек. “Иығың үлкен”, “аяғың жалпақ”, “толып кетіпсің” деген сөздер баланың бүгіні мен болашақ өміріне қатты әсер етеді. Олар өзін қабылдай алмайды. Өзгелермен салыстыру арқылы ата-ана баланың сенімін жоғалтып алады.&nbsp;
Сұрақтар және кеңестермен мезі етпеу
Шектен тыс өбектеу, орынсыз кеңестер мен бітпейтін сұрақтар жасөспірімнің шамына тиеді. Егер сұраққа қалай болса, солай жауап берсе, тілдесу әдісін өзгерту керек.
Балаға өз ойын толық жеткізуге мүмкіндік беру арқылы онымен дұрыс қарым-қатынасты сақтап қалуға балады. Жасөспірім шақта онымен ересек адамдарша ақылдасу, сөйлесу болашақта өз жемісін береді. 
<a href="https://massaget.kz/kyizdarga/shayra/60450">Massaget.kz</a>

Қазақстан және Қызылорда облысының жаңалықтары

Жұлдыздар не дейді?

Ұйқы қанбаудың қауіптілігі айтылды

Өкіл ата-ананың міндетін білесіз бе?

Көктемгі маникюріңізді таңдадыңыз ба? (ФОТО)

Қазақстандықтар медициналық бетперделерді жаппай сатып алып, Қытайға жіберіп отырған

Ауылдан келген Ромео

Дәрігер ыстық душтың кімге қауіпті екенін айтты

Қанат Ислам WBO рейтингінің үздік үштігіне кірді

Кедейліктен құтылу үшін не істеу керек?

23 ақпан: Ел тарихында орын алған оқиғалар

Жұлдыздар не дейді?

Өтпелі кезең ерекшеліктері қандай?