<a href="https://kyzylorda-news.kz/">Kyzylorda-news.kz.</a> «Қазгидромет» РМК 21-26 наурызға арналған ауа райы болжамын ұсынады.
Синоптиктердің хабарлауынша, алдағы демалыс күндері еліміздің оңтүстік аймақтарына Ираннан жылы циклон өз әсерін тигізуде, осы циклонмен байланысты жаңбыр күтіледі. Алайда, республиканың батыс бөлігіне Исландиядан суық антициклон әсер етеді, бұл антициклон шығысқа жылжып, жауын-шашынның тоқтауына және Қазақстан Республикасының басым бөлігінде ауа температурасының төмендеуіне әкеледі.
Еліміздің солтүстік бөлігінде түнде ауа температурасы 5 градус аяз-3 градус жылыдан 12-25 градус аязға дейін, оңтүстік бөлігінде – 2-12 градус жылыдан 3 градус аяз-2 градус жылы, кей жерлерде 6-11 градус аязға дейін төмендейді. Түнде және таңертең кей жерлерде тұман күтіледі.

Демалыс күндері 25 градусқа дейін аяз болады

<a href="https://kyzylorda-news.kz/">Kyzylorda-news.kz.</a> Елбасының бүгінгі еліміздің барлық азаматтарын төзімділік танытуға, мемлекет қабылдап жатқан шараларды қолдау туралы Үндеуін мен де Сыр өңірінің бір азаматы ретінде құптаймын.
Себебі, осындай игі шараларды бірге атқарған жағдайда ғана біз қауіпті індеттің алдын алатындығымыз анық. Сын сағатта ел болып жұмылып, қатерлі індетте жеңуде ауызбірлігімізді көрсетуге дайынбыз!
Елбасы Үндеуінде «Әрбір азамат өзінің қолынан келетін үлесін қосуға тиіс. Мен бұл қиын кезеңде ел-жұртқа көмектескісі келетін және жәрдем бере алатын адамдардың қаражаты жинақталатын республикалық қор құруды ұсынамын және осындай жағдайда бұрынғыша отандық ірі кәсіпорындар да қолдауын көрсетеді» деп үлкен сенім білдірілген.
Біз де Елбасының сеніміне селкеу түсірмеуге тырысамыз. Әрбір бастамаға күшті қолдау білдіре беретін болсақ, ұлы мұраттарға жетерімізге кәміл сенемін. Сондықтан, сырбойылық кәсіпкерлерді Үндеуді бірауыздан қолдауға шақырамын.
Марат Сәрсенбаев, 
«Абай-Дәулет» ЖШС директорының орынбасары

Марат Сәрсенбаев: Бірлігімізді көрсетуге дайынбыз

<a href="https://kyzylorda-news.kz/">Kyzylorda-news.kz.</a> Шиелі индустриалды-аграрлық колледжінің тігін цехында медициналық бетперделер (маска) тігу қолға алынды.
Қызылорда қаласындағы “Далатекс” тігін фабрикасымен және Шиелі кентіндегі «Тоғжан» тігін шеберханасымен әлеуметтік әріптестік аясында жүзеге асып жатқан бетперде тігу сәтін бүгін аудан әкімі Қ.Мүбараков бақылап, сапасына және бағасына қатысты тиісті сала басшыларына тапсырмалар берді.
Қазіргі таңда Шиелі индустриалды-аграрлық колледжінің тігін цехынан бір күнде 1000-1500 дана бетперде шықса, тігіншілердің қолы үйренген кейін бір күнде одан да көп данасы пайдалануға беріледі деп күтілуде.
Дайын болған бетперделерді аудан орталығындағы дәріханаларда сату жұмыстары келісіліп, тұрғындарға қолжетімді бағада ұсыну жоспарлануда.
<img src="https://kyzylorda-news.kz/wp-content/uploads/2020/03/shielide-medicinalyq-betperdeler-tigw-qolgha-alyndy-2.jpg" alt="" />
<img src="https://kyzylorda-news.kz/wp-content/uploads/2020/03/shielide-medicinalyq-betperdeler-tigw-qolgha-alyndy.jpg" alt="" />

Шиеліде медициналық бетперделер тігу қолға алынды

<a href="https://kyzylorda-news.kz/">Kyzylorda-news.kz.</a> Білім және ғылым министрлігінің тапсырмасы бойынша Ұлттық биотехнология орталығы мен Биологиялық қауіпсіздік проблемаларының ғылыми-зерттеу институты бірлесіп, COVID-19 коронавирусына қарсы вакцина әзірлеуге кірісті, деп хабарлайды <a href="https://www.coronavirus2020.kz/kz/covid19-koronaviruska-karsy-vakcinasyn-azirleu-turaly_a3627849">coronavirus2020.kz</a>.
<blockquote>
 «Біздің ұйымдарда жинақталған тәжірибе баршылық. Заманға сай ғылыми база да бар. Өндіріс технологияларын дамытып, сынақтан өткізіп, шетелдік баламалардан тиімділігі кем түспейтін отандық дәрі-дәрмекті әзірлейтін мамандар жұмыс істейді», – деп мәлім етті ҚР БҒМ Биологиялық қауіпсіздік проблемаларының ғылыми-зерттеу институтынан.
</blockquote>
Мәселен, қаңтар айының соңында Ұлттық биотехнология орталығының ғалымдары COVID-19 коронавирусын 6 күннің ішінде анықтайтын тест жүйесін ойлап тапқан. Қазақстандық тест жүйесінің тиімділігі мен өткір сезімталдығы ресейлік және қытайлық диагностикалық диагностикумдардан кем еместігі анықталған.
Білім және ғылым министрлігі Ғылым комитетінің «Биологиялық қауіпсіздік мәселелері жөніндегі ғылыми-зерттеу институты» (Жамбыл облысы, Отар кенті) құс пен доңыз тұмауына қарсы вакциналарды жасап шығарған. Құрылғалы 60 жылдың ішінде институт биоқауіпсіздік, биотехнология, вирусология, микробиология және иммунология саласында үлкен тәжірибе жинақтады. Институт ғалымдары дәрі-дәрмектің 60-тан астам түрін, соның ішінде 30 вакцинаны, 16 сынақ жүйесін және 15-тен астам түрлі биологиялық өнімді жасап шығарды. Бұл институтта вирустардың генетикалық кітапханасының бірегей дерекқоры бар.
Вакциналарды дамыту бағдарламасы аясында биотехнологиялық және гендік инженерияның алдыңғы қатарлы әдістерін қолдана отырып, 5 кандидаттық вакцина жасалады. Ұқсас технологияларды вакциналар жасау саласында әлемдік көшбасшылар қолданады. Кандидаттық вакциналардың бес түрінің ішінен клиникалық зерттеулерді жүргізуге арналған ең тиімді және технологиялық тұрғыда жетілдірілген вакцина таңдап алынады.
<blockquote>
 «Әлемнің көптеген елі өздерінің вакциналарын әзірлеп шығарғанын жариялады. Алайда мұның бәрі клиникалық зерттеуді қажет етіп, жұмыс бір жылдан кейін аяқталады. Вакцинаны қабылдағанға дейін COVID-19 вирусының таралуының алдын алу қажет. Әйтсе де бұл тек мемлекет қабылдаған шараларға ғана емес, сонымен бірге әр адамға да байланысты. Сондықтан барлық алдын-алу шарасын сақтау қажет», – деп толықтырды ғылыми-зерттеу институтынан.
</blockquote>
Қосымша сұрақтар туындаған жағдайда институт басшыларына хабарласуға болады:
Раманқұлов Ерлан Мирхайдарұлы +77770111525 (Нұр-Сұлтан қаласы)
Зәкәрия Күнсұлу Дальтонқызы +77015364781 (Жамбыл облысы Отар кенті).

Қазақстанда COVID-19 вирусына қарсы вакцина дайындалып жатыр

Оқыған: Фариза ОМАРОВА
Тағдырдың жарлығын білесіздер – өзгерілмейді. Пендеде бір іс бар жалығу деген. Ол – тағдырда адаммен бірге жаратылған нәрсе, оны адам өзі тапқан емес. Оған егер бір еліксе, адам баласы құтылмағы қиын. Қайраттанып, сілкіп тастап кетсең де, ақырында тағы келіп жеңеді. Ақылы түгел, ойлы адамның баласы байқаса, осы адам баласының жалықпайтұғын нәрсесі бар ма екен? Тамақтан да, ойыннан да, күлкіден де, мақтаннан да, кербездіктен де, тойдан да, топтан да, қатыннан да көңіл, аз ба, көп пе, жалығады. Оның үшін бәрінің ғайыбын көреді, баянсызын біледі, көңілі бұрынғыдан да суый бастайды. Дүние бірқалыпты тұрмайды, адамның қуаты, ғұмыры бірқалыпты тұрмайды. Әрбір мақлұққа құдай тағала бірқалыпты тұрмақты берген жоқ. Енді көңіл қайдан бірқалыпты тұра алады?
Бірақ осы жалығу деген әрнені көрем деген, көп көрген, дәмін, бағасын, бәрінің де баянсызын біліп жеткен, ойлы адамнан шығады. Соншалық ғұмырының баянсызын, дүниенің әрбір қызығының акырының шолақтығын көрген-білгендер тіршіліктен де жалықса болады. Бұлай болғанда ақымақтық, қайғысыздық та бір ғанибет екен деп ойлаймын.

Абай Құнанбайұлының жиырмасыншы қара сөзі (АУДИО)

<a href="https://kyzylorda-news.kz/">Kyzylorda-news.kz.</a> Коронавирустың таралу қаупін азайту мақсатында көптеген банктер мен компаниялар қашықтан жұмыс істеу режиміне көшті. Қазақстандықтар көп жағдайда онлайн-төлемдер жасауда. Мұндай жағдайды қаржылық алаяқтар пайдалануы мүмкін. Бұл туралы ҚР Қаржы нарығын реттеу және дамыту агенттігіне баспасөз қызметі хабарлайды.
Агенттіктің хабарлауынша, алаяқтар банктер мен компаниялардың қашықтықтан жұмыс істеуін пайдаланып, халықтан қаражатты тартып алуға бағытталған түрлі алаяқтық әрекеттерді әзірлеп, іске асыруы мүмкін.
1-тәсіл: Дәрі-дәрмек сататын жалған сайт ашу
Алаяқтар қолданатын тәсілдердің бірі – медициналық маскалар мен дәрі-дәрмектер сататын банктердің, ұйымдардың, интернет-дүкендер мен дәріханалардың фишинг сайттарын (интернет-алаяқтықтың бір түрі – автор) жасауға байланысты болуы мүмкін. Пайдаланушыларға олардың төлем карталары туралы деректерді енгізу ұсынылады. Олай еткен жағдайда картадағы ақшадан айырылып қаласыз, яғни сізге жеткізілмейтін тауар үшін ақша төлейсіз.
2-тәсіл: Қаржы ұйымының қызметкері ретінде хабарласу
Алаяқтар өздерін қаржы ұйымының қызметкеріміз деп таныстыра отырып, азаматтарға алып-сатарлық мақсатта валюта сатып алу үшін төмен пайыздық мөлшерлемемен ірі сомаға кепілсіз кредиттер ресімдеуді ұсынады. Сондай-ақ, төтенше жағдайлар мен карантин уақытында өсімпұлдар болмайтыны туралы уәде береді.
3-тәсіл: Жарнама науқаны қосылғаны туралы ақпарат тарату
Алаяқтар салымдар бойынша жоғары пайыздар болатыны туралы уәде бере отырып, әлеуметтік желілерде немесе WhatsApp-та жарнама науқаны іске қосылғаны туралы ақпарат таратуы мүмкін. Өз ақшаңызды күмәнді ұйымдарға сеніп тапсырудың қажеті жоқ.
4-тәсіл: Коронавирусқа қатысты қайырымдылық жасауды ұсыну
Кейбір елдерде алаяқтар коронавирус жөнінде ақпарат жазылған электрондық хаттар таратады. Онда дербес деректерді енгізу немесе банк операцияларын жүргізу қажет болатын әртүрлі сілтемелер көрсетіледі. Осылайша, алаяқтар пайдаланушылардың жеке төлем деректерін алу үшін әртүрлі ұсыныс айтады. Мысалы, киберқылмыскерлер пайдаланушыларға инфекциямен күресу үшін қайырымдылық жасауды ұсынады және Дүниежүзілік денсаулық сақтау ұйымының хатын жіберіп, төлем карталары туралы деректерді алады.
5-тәсіл Онлайн төлем арқылы медициналық қызметтер ұсыну
Вишинг-алаяқтар әртүрлі қулыққа барады. Мысалы, ауырып қалған туысқандардың сенгіштігін пайдалана отырып, онлайн-төлем арқылы түрлі медициналық қызметтерге ақы төлеуді ұсынуы мүмкін. Бұл үшін олар телефон арқылы ақшаны есептен шығару үшін ЖСН, картаңыздың деректерін, SMS-хабарлама арқылы келген кодты сұрайды.
Қаржылық қызметтерді жүзеге асыру кезінде тұтынушылардың құқықтары бұзылған жағдайда Агенттікке қашықтан: пошта немесе курьер арқылы жеткізілетін жазбаша өтініш арқылы, оның ішінде Өңірлік өкілдер басқармасына жүгіне алады. Мұндай әрекет қауіпсіздікті қамтамасыз ету және COVID-19 таралуына жол бермеу мақсатында орындалады.

Төтенше жағдай кезінде алаяқтар қолданатын 5 тәсіл

<a href="https://kyzylorda-news.kz/">Kyzylorda-news.kz.</a> Нұр-Сұлтан, Алматы қалаларына коронавирус инфекциясы анықталып, шет мемлекеттерден келген азаматтардың тіркелуіне байланысты карантин жарияланып, соған сәйкес, еліміздің барлық облыстарында инфекцияның алдын алу бағытындағы шаралар күшейтілген болатын.
Қызылорда облысы бойынша коронавирус инфекциясы тіркелген жоқ. Дегенмен, коронавирус инфекциясының алдын алу бағытында аймағымызда да бірқатар жоспарлы жұмыстар жүргізілуде.
Нұр-Сұлтан және Алматы қалаларында COVID-19 инфекциясының тіркелуіне байланысты 2020 жылдың 19 наурызы сағат 00:00-ден бастап екі мегаполисте карантин режимі енгізілді және 22 наурыздан бастап толығымен жабылды.
<blockquote>
 «Осыған орай, біздің облысқа да азаматтар келе бастады. Коронавирус инфекциясының аймақта таралуының алдын алу мақсатында сақтық шаралары күшейтілуде. Яғни барлық қала, аудан кесіміндегі тауарлар мен көрсетілетін қызметтердің сапасы мен қауіпсіздігін бақылау және денсаулық сақтау саласы мамандары жергілікті аймақтар бойынша үй аралау жұмыстарын бастап, аталған қалалардан келген азаматтарды 14 күнге қоңырау шалу арқылы медициналық бақылауға алады. Қазіргі таңда сырттан келген азаматтарды Қызылорда облысы аумағына, яғни Жезқазған жолы, Арал, Жаңақорған аудандары жолдарына кемінде 4 бақылау өткізу бекетін (блокпост) қою бойынша жұмыстар жүргізілуде», – деп атап өтті облыстық Денсаулық сақтау басқармасы.
</blockquote>
Сондай-ақ, медицина қызметкерлері облыс шекараларына келушілердің тізімін анықтап, денсаулықтарын бақылауға алатын болады.
Осыған орай, облыстық Денсаулық сақтау басқармасы барша азаматтардан карантин жарияланған қалалардан келгенде және инфекцияның белгілерін байқаған жағдайда жедел жақын орналасқан емханаларға көрінуін, 103 жедел жәрдем қызметіне және 40-00-01 сенім телефонына хабарласуларын сұрайды.

Коронавирус: Қызылорда облысының аумағында 4 блокпост қойылады

<a href="https://kyzylorda-news.kz/">Kyzylorda-news.kz.</a> Елімізде төтенше жағдай жариялануына байланысты облыс әкімі Қуанышбек Ысқақов “Қызылорда-Павлодар” тас жолына қойылған медициналық-бақылау бекетінің жұмысымен танысты. Өңір басшысына қала әкімі және облыстық полиция департаментінің бастығы атқарылған жұмыстар туралы баяндама жасады.
Жалпы аймақта бүгіннен бастап Жезғазған, Түркістан, Ақтөбе бағыттары бойынша 4 медициналық-бақылау бекеті жұмыс істейді. Жауапты сала мамандары аймаққа келім-кетім көліктерді тоқтатып, азаматтардың жағдайын тексереді. Қауіпсіздік мақсатында азаматтардың жеке мәліметтері жинақталады.
Аталған бекеттерде облыстық денсаулық сақтау басқармасы, тауарлар мен көрсетілетін қызметтердің сапасы мен қауіпсіздігін бақылау департаменті және полиция департаменті қызметкерлері күшейтілген режимде жұмыс істейтін болады.
Аймақ басшысы медициналық-бақылау бекетіндегі сала мамандарына нақты тапсырмалар берді.
<blockquote>
 «Нұр-сұлтан, Қарағанды қаласынан келген азаматтарды толық тексеруден өткізіп,міндетті түрде арнайы анкета толтыру қажет. Мемлекет басшысы берген тапсырмалардың барлығы уақытылы, мүлтіксіз орындалуы керек. Сонымен қатар, ірі және шағын сауда нүктелеріндегі азық-түлік сататын бөлімдердегі тазалық талапқа сай болуы тиіс. Залалсыздандыру құрылғыларына, бетпердеге аса мән беріңіздер. Тамақтану орындары кешкі сағат 10:00-ге дейін ал мейрамханалар жұмысын мүлде тоқтату керек»,- деді облыс әкімі Қуанышбек Ысқақов.
</blockquote>
<img src="https://kyzylorda-news.kz/wp-content/uploads/2020/03/akimat-med.beket-1.jpg" alt="" />
<img src="https://kyzylorda-news.kz/wp-content/uploads/2020/03/akimat-med.beket-2.jpg" alt="" />
<img src="https://kyzylorda-news.kz/wp-content/uploads/2020/03/akimat-med.beket-3.jpg" alt="" />

Қызылорда облысында 4 медициналық-бақылау бекеті жұмысын бастады (ФОТО)

<a href="https://kyzylorda-news.kz/">Kyzylorda-news.kz.</a> Қазақстан Республикасының Тұңғыш Президенті – Елбасы Нұрсұлтан Назарбаевтың коронавирус індетіне байланысты Қазақстан халқына үндеуі дер кезінде жасалған маңызды және мақсатты бастама деп санаймын.
Үндеу мемлекет мүддесі мен ел азаматтарының денсаулығын қорғау үшін және індеттің алдын алуға бағытталған кешенді шараларды қамтиды.
Коронавирус індетінің күннен-күнге өршуі адам өміріне қауіп төндіріп қана қоймай, әлем экономикасының құлдырауына әкеліп соғуы мүмкін.
Сондықтан, әлемге, елімізге төніп тұрған үлкен қауіп-қатерге қарсы тұрып, осындай қиын сәтті бір ел, бір қоғам болып, бірге өткеруге және Мемлекет басшысы мен Үкімет тарапынан іске асырылып жатқан шұғыл әрі нақты шараларды қолдауға шақырамын.
Бұл мақсатта Сыр өңірінде азық-түлік пен ең қажетті тауарлардың, медициналық мақсатқа арналған заттардың тапшылығына жол бермеу үшін қолдан келер барлық көмегімді көрсетемін. Бұл мақсатта қорғаныс бетперделері мен жергілікті тұрғындар арасында коронавирус індетінің алдын алуға бағытталған ақпараттық-түсіндірме жадынамаларын әзірлеуге де өз қолдауымды білдірдім. 
Осындай, ел басына күн туған сәтте індетпен күресу үшін отандық кәсіпкерлер мен ірі кәсіпорындар да Елбасы бастамасына қолдау көрсетеді деп сенемін.
Мұрат СӘРСЕНБАЕВ, 
«Абай Дәулет» ЖШС директоры

Мұрат Сәрсенбаев: Маңызды бастама деп санаймын

<a href="https://kyzylorda-news.kz/">Kyzylorda-news.kz.</a> Қызылорда қаласы мен Жаңақорған ауданында «COVID-19» диагнозымен емделіп жатқандар бар екені туралы шындыққа жанаспайтын, көрінеу жалған ақпараттардың Whats-app мессенджері арқылы таратылуының 2 фактісі анықталды.
Бұл деректер бойынша Қазақстан Республикасы Қылмыстық кодексінің 274-бабы 4-бөлігінің)-тармағымен (төтенше жағдай кезінде көрінеу жалған ақпарат тарату) сотқа дейінгі тергеп-тексеру&nbsp; басталды.
Облыстық денсаулық сақтау департаментінің соңғы мәліметіне сәйкес облысымызда «COVID-19» диагнозымен науқастану жағдайы тіркелмеген. Күдік келтіріліп, карантинге жатқызылған тұлғаларда бұл диагноз расталған жоқ.
<blockquote>
 «Құқық қорғау және жергілікті атқарушы органдардың төтенше жағдай режимі жарияланған кезеңде қылмыс пен құқықбұзушылыққа жол бермеу жөнінде тиісті түсіндірме жүргізгеніне қарамастан жалған ақпарат тарату деректері кездесуде. Мұндай әрекет төтенше жағдай кезінде немесе ұрыс жағдайында немесе соғыс уақытында не жария іс-шаралар өткізу кезінде жасалатын болса, ол ауырлатушы мән-жай ретінде қарастырылып, ауыр қылмыс ретінде сараланады. Аталған қылмысты жасаған тұлғаларға үш жылдан жеті жылға дейінгі мерзімге бас бостандығын шектеу не сол мерзімге бас бостандығынан айыру жазасы тағайындалуы мүмкін», – деп атап өтті біздің ақпарат агенттігіне Қызылорда облысы прокуратурасының баспасөз қызметі.
</blockquote>

Коронавирус: Қызылордада жалған ақпарат таратқандар ұсталды

<a href="https://kyzylorda-news.kz/">Kyzylorda-news.kz.</a> Қазақстан Республикасының аумағында төтенше жағдайдың енгізілуіне байланысты шетел азаматтарына Қазақстан Республикасына кіруге және Қазақстан Республикасының аумағынан шығуға шектеулер қойылды. Шетелдіктердің елде болу ережелерін Қызылорда облысының полициясы түсіндірді.
<blockquote>
 «Төтенше жағдайға байланысты Қазақстан Республикасы ратификациялаған келудің визасыз тәртібі туралы халықаралық шарттар бар елдердің азаматтарына көші-қон саласындағы заңнама бұзылуын болдырмау мақсатында, олармен 180 күнтізбелік күннің әр кезеңінде 90 күнге дейін болу, уақытша тұруға арналған рұқсат 30 күнге дейін ұзартылады. Казақстан Республикасына әр түрлі санаттағы визалармен келген және мерзімдері аяқталған шетелдіктерді әрі қарай Қазақстан Республикасында болу үшін визалары ұзартылады», – деді облыстық Полиция департаменті Көші-қон қызметі басқармасының бастығы Аруын Жолдасбаев.
</blockquote>

Қызылорда облысына шетел азаматтары кіруге шектеу қойылды

<a href="https://kyzylorda-news.kz/">Kyzylorda-news.kz.</a> ҚМДБ-ның «Зекет» қайырымдылық қоры Қызылорда облысы бойынша өкілдігінің ұйымдастыруымен «Ел үлесі пәтерге» әлеуметтік жобасы аясында республика бойынша №191-нші пәтер кілті қармақшылық жалғызбасты анаға бұйырды.
Игі шараға қатысқан ҚМДБ-ның Қызылорда облысы бойынша Бас имамы Болатбек Ұласқанұлы, ҚМДБ «Зекет» қайырымдылық қорының облыстағы өкілі О.Жидебаев жиылған жұртшылықты келе жатқан ұлық мереке – Наурыз мейрамымен құттықтап, жаңа пәтердің кілтін көпбалалы анаға табыстады.
ҚМДБ-ға 30 жыл толуына орай, «30 жылдық мерейтойға 30 игі шара» ұранымен ұйымдастырылған сауапты шара қайырымдылық акциясына ұласты.
Акцияда Бас имам Б.Абуов жиылғандарға елдегі ахуалға байланысты қауіпсіздік шараларын түсіндіріп, тазалық талаптарын сақтауға шақырды. Соңында аудандағы әлеуметтік жағдайы аз қамтылған мұқтаж отбасыларға бір айлық мөлшеріндегі азық-түлік қапшығын үлестірді.
Бас имамның Қармақшы ауданына жасаған сапары одан әрі Төретам кентіндегі жаңа мешіттің құрылысымен танысуға жалғасты.

Қазақстан және Қызылорда облысының жаңалықтары