<a href="https://kyzylorda-news.kz/">Kyzylorda-news.kz.</a> ҚР Экология, геология және табиғи ресурстар министрі Мағзұм Мырзағалиев Қызылорда облысына сапары туралы жазба жариялады.
<blockquote>
 «Еліміздің оңтүстік өңірінде жұмыс сапарымен жүрмін. Кеше Қызылорда облысының әкімі Г.Әбдіқалықовамен Кіші Аралға барып қайттым. Солтүстік Аралдағы ахуалды жақсартуда Көкарал бөгетінің құрылысы үлкен рөл атқарды және бүгінде ол жақтағы су көлемі 27 текше шақырымға жетті. Өңірдің экологиясы жақсарып, балық шаруашылығы қарқынды даму үстінде. Су қоймасында тіршілік ететін балықтың 20-дан астам түрі бар», – деп жазды министр&nbsp;<a href="https://twitter.com/MirzagalievKZ?ref_src=twsrc%5Egoogle%7Ctwcamp%5Eserp%7Ctwgr%5Eauthor">Twitter</a>&nbsp;парақшасында.
</blockquote>
Оның атап өтуінше, бөгеттің стратегиялық маңызы бар және оның жай-күйін бақылауға алып, үнемі күтіп ұстау қажет.
<blockquote>
 «Осы мақсатта бөгетті нығайту жұмыстарын жүргізу жоспарланған, жобалық-сметалық құжаттамасы әзірленіп жатыр. Жоба таяу келешекте жүзеге асырылатын болады және нысанды жаңғырту барысында жұмыс орындарын ашуға мүмкіндік береді», – деді Мағзұм Мырзағалиев.
</blockquote>

ҚР Экология министрі: Кіші Аралдың экологиясы жақсарып келеді

<a href="https://kyzylorda-news.kz/">Kyzylorda-news.kz.</a> Бүгін Қызылорда облысында көлік ішінде ұйықтап жатқан полицейлердің видеосы әлеуметтік желілерде таралып, қызу талқыланған болатын. Артынша Қызылорда облыстық Полиция департаментінің баспасөз қызметі олардың жұмыстан шығарылғанын мәлімдеді.
Аталған департаменттің баспасөз қызметінің хабарлауынша, 14 мамыр күні «Whatsapp» арқылы тараған қызметтік автокөлік ішінде ұйықтап жатқан екі полиция қызметкері туралы бейнежазба бойынша Қызылорда облысы Полиция департаментінің Өзіндік қауіпсіздік басқармасымен тексеру жұмыстары жүргізілген.
<blockquote>
 «Жедел түрде Департаменттің Тәртіптік Кеңесінде Әдеп кодексінің талаптарын бұзған екі қызметкердің және оларға тікелей жетекшілік жасайтын басшыларының жауапкершілігі қаралды. Тәртіптік Кеңес шешімімен Қызылорда қалалық Полиция басқармасының Жергілікті полиция қызметі бөлімінің патрульдік полиция батальонының қызмет инспекторлары ішкі істер органдарынан шығарылды. Сонымен қатар, қызметкерлердің тікелей басшыларына қатаң тәртіптік жаза қолданылды», – деп хабарлады облыстық Полиция департаментінің баспасөз қызметі.
</blockquote>

Қызылордада көлік ішінде ұйықтап жатқан полицейлер жұмыстан қуылды (видео)

<a href="https://kyzylorda-news.kz/">Kyzylorda-news.kz.</a> Көліктегі бас мемлекеттік санитар дәрігер Сәдуақас Байғабылов пойыздарда негізгі санитарлық-карантиндік шараларды белгілейтін қаулыға қол қойды.
Қаулы тасымалдаушылар жұмысына ғана қатысты емес. Құжатты вокзал әкімшілігі, тасымалдау саласындағы кәсіпорындар мен көлікке қызмет көрсету ұйымдары басшылыққа алады.
Вокзал ғимаратына тек билеті бар жолаушылар кіргізіледі. Жолаушылар маска тағуға, ал жолсеріктер бетпердемен қоса қолғап киюге міндетті.
Шығарып салушылар вокзал ғимаратына кіре алмайды, туысқандарымен сыртта қоштасуы тиіс. Вокзалдың өзіндік қауіпсіздік қызметі кіре берісте барлық адамның дене қызуын тексереді.
«Вокзал ішінде, пойызға отырарда және одан түсерде жолаушылар арасында әлеуметтік ара қашықтық сақталуы тиіс. Вагондар арасында жолаушылардың қозғалысы шектеледі», – деп мәлімдеді Сәдуақас Байғабылов.
Пойыз жүргеннен кейін жолсеріктер жолаушыларға анкета таратады.
Жылжымалы құрам вагондарында кондициялау, желдеткіш жүйелері мен желдеткіш сүзгісін ауыстыруға ревизия жүргізіледі.
Вокзал мен пойыздарда жұмыс істейтін қызметкерлер әр ауысым алдында медициналық тексерістен өтеді.
Егер жағдай тұрақталса, бұл шаралар кезең-кезеңмен жеңілдетіледі.
Бұған дейін жолаушылар пойыздары 1 маусымнан бастап жүретінін&nbsp;хабарлаған болатынбыз.

1 маусымнан бастап вокзалға тек билетпен кіргізеді: пойыз жолаушылары нені білуі тиіс?

<a href="https://kyzylorda-news.kz/">Kyzylorda-news.kz.</a> Биылғы оқу жылы 25 мамырда аяқталады. Бітіруші түлектер үшін «Аттестат тапсыру» және «Соңғы қоңырау» шаралары 3-4 маусым күндері өтеді.
Биылғы ерекшелік – мемлекеттік емтихандар өткізілмейді. Аттестатқа қорытынды баға жылдық бағалар негізінде қойылады. Облыс бойынша «Алтын белгіге» 573 оқушы үмкіткер.
Салтанатты шаралар мектептің сыртқы ауласында ұйымдастырылады. Санитарлық сақтық шаралары қатаң сақталатын болады. Жиынға бітірушілер мектеп формасымен қатысады.
Сондай-ақ, үйлерде, кафе, ресторандар да отырыстар өткізу және картежге шығуына қатаң тыйым салынды.
Жалпы оқу жылын аяқтау шараларын ұйымдастыруға, мектептерге сыйлық алуға оқушылар мен ата-аналардан, педагогтардан ақша жинауға рұқсат берілмейді.р

Биыл Қызылорда облысында 573 оқушы «Алтын белгіге» үміткер

<a href="https://kyzylorda-news.kz/">Kyzylorda-news.kz.</a> Сырдария ауданының орталығы – Тереңөзек кентіндегі орталық алаңға алып сағат орнатылды.
Сағаттың ұзындығы 14 метр, ені 5 метрді құрайды. Негізінен сағаттың кескіні Сыр күрішінің бейнесін сомдайды. Алып сағатты құрастыруға екі айға жуық уақыт кеткен.&nbsp;
Ерекше сағатты аудан тұрғындарына Ә.Тәжібаев атындағы №36 мектеп-лицейдің 1980 жылғы түлектері сый етті.
Айта кетейік, алдағы уақытта сағаттың айналысына гүлзар орналастырылатын болады.

Сырдария ауданында алып сағат пайда болды

<a href="https://kyzylorda-news.kz/">Kyzylorda-news.kz.</a> Ұялы байланыс операторларына төлем толық бір күнтізбелік айға жасалатын тарифтік жоспар құру міндеттелді, деп хабарлайды ҚР Цифрлық даму, инновациялар және аэроғарыш өнеркәсібі&nbsp;министрлігі.
ҚР Цифрлық даму, инновациялар және аэроғарыш өнеркәсібі министрлігі ұялы байланыс қызметтерін көрсету қағидаларын өзгертті. Енді мобильді операторлар абоненттерге өзге тарифтік жоспарлармен қатар, төлем бір күнтізбелік айға жасалатын тарифтік жоспарды да ұсынуы тиіс.
Өзгертулердің арқасында абоненттер тарифтік жоспарлардың ішінен өзіне қажетін таңдай отырып, оны толық бір ай пайдалана алады.
Мысалы, егер абонент тарифтік жоспарға айдың соңғы күні қосылса оның жеке шотынан байланыс қызметі үшін төлем келесі айдың соңғы күні шегеріледі.
Сонымен қатар, аталған тарифтік жоспардағы қызметтер көлемі аяқталғаннан кейін оператор абоненттің келісімінсіз қызметтің қосымша көлемі үшін ақы ала алмайды.
Мұнымен қоса, ережеге «базалық тарифтік жоспар» ұғымы енгізілді. Бұл тариф абоненттік төлемді талап етпейді, тек нақты пайдаланған минут немесе SMS санына ғана төлем жасай отырып, қоңырау шалуға және SMS жіберуге мүмкіндік береді.
«Базалық тарифтік жоспар» абонент нөмірді басқа ұялы байланыс операторының желісіне ауыстырғанда (MNP қызметі), жаңа тарифтік жоспарды таңдап үлгермегенде, сондай-ақ қолданыстағы тарифтік жоспар әрекет етуін тоқтатқан жағдайда қосылады.
Бұған дейін ұялы байланыс операторы абонентте қандай да бір тарифтік жоспар болмаса, оны өздері абоненттің келісімінсіз кез-келген тарифтік жоспарға қоса алатын.
Байланыс операторлары «базалық тарифтік жоспарға» өзгерісті жылына бір рет қана енгізе алады жәнебұл туралы ол абонентті нақты өзгерістерге дейін күнтізбелік отыз күн бұрын хабардар етуге міндетті.

Ұялы байланыс операторларына төлем толық бір айға жасалатын тариф құру міндеттелді

<a href="https://kyzylorda-news.kz/">Kyzylorda-news.kz.</a> 2020 жылы МӘМС жарналарын төлеуді қандай тұлғалар дербес жүргізеді? Бұл сұраққа «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов жауап берді.
<blockquote>
 «МӘМС жарналарын дербес төлеушілер мына түлғалар болып табылады: тіркелмеген жұмыссыз азаматтар, ҚР шегінен тыс жерлерге кеткен тұлғалар (ҚР шегінен тыс тұрақты тұруға кеткендерден басқа), жеке кәсіпкерлер және жеке практикамен айналысатын, салық есептілігін ұсынуды тоқтата тұрған немесе әрекетсіз деп танылған азаматтар», – деп хабарлады Б. Исмаханбетов.
 «Дербес төлеушілер өз пайдасына ай сайын МӘМС-ке аударады және жарналарды есептеу объектісінің 5% мөлшерінде 2020 жылдын 1 қаңтардан бастап жарналарды төлейді. Осылайша, МӘМС жарналарын дербес төлеушілер болып табылады және МӘМС-ке жарналарды дербес төлеушілер ретінде төлейді. Ол 1 ЕТЖ-ден 5%, немесе 2 125 теңгені құрайды», – деп түсіндірді Қор филиалының басшысы.
</blockquote>
Б. Исмаханбетовтың айтуынша, мәселен үй шаруасындағы әйел ресми түрде бала күтіміне байланысты демалыста болса, онда ол өзі үшін МӘМС жарнасын төлеудің қажеті жоқ, себебі декреттік демалыста жүрген кезеңінде мемлекет ол үшін МӘМС жарнасын төлейді.
Жалпы, мемлекет азаматтардың 15 санаты үшін төлемдерді жүзеге асырады.
Толығырақ Әлеуметтік медициналық сақтандыру қорының <a href="https://fms.kz/ru/content/lgotnym-kategoriyam-grazhdan">сайтынан</a> білуге болады.

2020 жылы МӘМС жарналарын төлеуді қандай тұлғалар дербес жүргізеді?

<a href="https://kyzylorda-news.kz/">Kyzylorda-news.kz.</a> Дене шынықтыру мұғалімдері сабақтан тыс спорт сабақтарын жүргізгені үшін базалық лауазымдық жалақыдан 100 пайыз мөлшерінде қосымша ақы алуы мүмкін. Бұл туралы ҚР Мәдениет және спорт министрі Ақтоты Райымқұлова мәлім етті, деп хабарлайды <a href="https://lenta.inform.kz/kz/kazakstanda-dene-shynyktyru-mugalimderine-kosymsha-aky-tolenui-mumkin_a3649664">ҚазАқпарат.</a>
<blockquote>
 «Мемлекет басшысының 2019 жылғы Қазақстан халқына Жолдауын іске асыру бойынша Жалпыұлттық іс-шаралар жоспарының 64-тармағын орындау аясында Дене шынықтыру және бұқаралық спортты дамыту жөніндегі 2020-2025 жылға арналған кешенді жоспары әзірленді. Бұл жоспарда мүдделі мемлекеттік органдардың, жергілікті атқарушы органдардың ұсыныстары толық ескерілiп, ҚР Премьер-Министрімен бекітілді. 2016 жылы Елбасы Нұрсұлтан Әбішұлы Назарбаев өзiнiң Жарлығымен халықты дене шынықтыру және спортпен жүйелі түрде шұғылдануға тарту деңгейін 35%-ға дейін арттыруды тапсырған болатын. Бұл кешенді жоспар осы көрсеткішке қол жеткізуді және халықтың дене шынықтыру мен спортпен айналысуы арқылы салауатты өмір салтына ұмтылысын қалыптастыруды көздейді», – деді министр Орталық коммуникациялар қызметіндегі онлайн баспасөз мәслихатында.
</blockquote>
Бұл тұрғыда халықтың барлық жас санаттары арасында дене шынықтыру мен бұқаралық спортты дамытуды және балалар үшін спорттық инфрақұрылымға барынша қол жеткізу жөніндегі шаралар қамтылған. Кешенді жоспар 34 тармақ пен 5 негізгі бағыттан тұрады: нормативтік-құқықтық қамтамасыз ету, мектеп және студенттік спорт, спорт желілерін кеңейту, салауатты өмір салтын насихаттау және кеңінен тарату, спорттық-бұқаралық іс-шаралары.
Бұқаралық спортты дамыту, сондай-ақ дене шынықтырумен және спортпен шұғылданатындардың санын арттыру мақсатында кешенді жоспарда негізгі бағыттар бойынша Қазақстан Республикасының 8 заңнамалық актісіне 33 түзету енгізе отырып, бұқаралық спорт жөніндегі заң жобасы Парламент Мәжілісіне енгізілді.
<blockquote>
 «Заң жобасына дене шынықтыру мұғалімдеріне сабақтан тыс спорт сабақтарын жүргізгені үшін базалық лауазымдық жалақыдан 100 пайыз мөлшерінде қосымша ақы енгізіліп отыр. Сондай-ақ, заң жобасында ұлттық спорт түрлерін дамыту бойынша шаралар көзделген. Білім берудің барлық деңгейлерінде дене тәрбиесі бойынша сабақтарда дене шынықтыру және спорт саласындағы уәкілетті орган бекіткен тізбеге сәйкес, ұлттық спорт түрлері бойынша міндетті компонент көзделіп отыр», – деді Ақтоты Райымқұлова.
</blockquote>

Қазақстанда дене шынықтыру мұғалімдеріне қосымша ақы төленуі мүмкін

<a href="https://kyzylorda-news.kz/">Kyzylorda-news.kz.</a> Еңбек және халықты әлеуметтік қорғау министрлігі мамыр айынан бастап мүгедек жандарға көбейтілген жәрдемақы берілетінін жариялады, деп хабарлайды <a href="https://lenta.inform.kz/kz/mamyr-ayynan-bastap-mugedek-zhandardyn-zhardemakysy-osedi_a3649445">ҚазАқпарат.</a>
Жалпы мүмкіндігі шектеулі жандарға берілетін жәрдемақы мөлшері күнкөріс минимумы мен республикалық бюджет туралы заңға сәйкес, мүгедектің себебі мен тобына байланысты беріледі. Еңбек және халықты әлеуметтік қорғау министрлігінің хабарлауынша 2020 жылы жәрдемақы мөлшері екі рет өскен.
<blockquote>
 «Өздеріңіз білетіндей, 2020 жылдың 1 қаңтарынан бастап инфляцияның болжамды 5 пайыздық деңгейін ескере отырып, жәрдемақылардың жыл сайынғы кезекті индексациясы жүргізілген болатын. Осы жылдың 1 сәуірінен бастап, Мемлекет басшысының 2020 жылғы 31 наурызда берген тапсырмасын орындау мақсатында мүгедектік бойынша берілетін мемлекеттік әлеуметтік жәрдемақылардың мөлшері жыл сайын 10 пайызға индекстеледі. Мамыр айынан бастап мүгедектік бойынша мемлекеттік әлеуметтік жәрдемақылар жоғарылатылған мөлшерде беріле бастайды», – деп хабарлайды министрліктен.
</blockquote>
Мәселен мүгедектік бойынша мемлекеттік әлеуметтік жәрдемақы мөлшері жалпы аурудан, еңбек зақымынан, кәсіпке байланысты ауру топтары бойынша: І топқа 62 723 теңгеден, II топқа – 49 983 теңгеден, III топқа – 33 975 теңгеден беріледі. 16 жасқа дейінгі мүгедек балалар 45 736 теңге алады. 16-18 жас аралығындағы мүгедек балалардың І тобына жататындар 62 723 теңге, II тобына жататындар 51 943 теңге, III тобына жататындарға 39 202 теңге беріледі. Мүгедек баланы асырап отырған адамға 45 736 теңге, ал І топтағы мүгедекті күтіп-бағып отырған адамға да 45 736 теңгеден тапсырылады.
<blockquote>
 «Төтенше жағдай кезінде мүгедектерге тамақ пен тұрмыстық пакет немесе 2 АЕК мөлшерінде ақшалай өтемақы берілді. 132 мыңнан астам мүмкіндігі шектеулі жанға және мүгедек баланы тәрбиелеп отырған отбасылплға «Birgemiz» қоғамдық қорынан 50 000 теңге көлемінде ақшалай көмек көрсетілді. Сонымен қатар, Қазақстан Республикасы Президентінің 1, 2, 3 топтағы мүгедектердің карантин және төтенше жағдай кезеңінде коммуналдық қызметтер бойынша төлем мөлшерін азайту жөніндегі жүйелі шараларды әзірлеу бөлігіндегі тапсырмасын орындау аясында мүгедек балаларды тәрбиелеп отырған отбасыларға, мүгедектер мен Ұлы Отан соғысының ардагерлері және мүгедектер мен Ұлы Отан соғысының ардагерлеріне теңестірілген адамдарға, басқа санаттағы азаматтарға 15000 теңге көлемінде ақшалай өтемақы қарастырылған», – делінген хабарламада.
</blockquote>
Сонымен қатар елде төтенше жағдай режимінің енгізілуіне байланысты медициналық-әлеуметтік сараптама жүргізу механизмдері қайта қарастырылды.
<blockquote>
 «Электронды үкімет» веб-порталындағы «Электронды қызмет» сервисі арқылы берілген электронды өтінім негізінде сырттай медициналық-әлеуметтік сараптама жүргізу жұмысы регламенттелді. 1 сәуірден бастап №109 бұйрыққа өзгерістер енгізіліп, мүгедектік мерзімін автоматты түрде ұзарту құқығы берілді. «Төтенше жағдай аяқталғаннан кейінгі кезең үшін коронавирус инфекциясының алдын алу шарасы ретінде мүгедектік мерзімін қайта тексеруден өткен күннен бастап үш айға автоматты түрде ұзарту туралы бұйрық қабылданды. Бұл шаралар мүгедектерге әлеуметтік қолдау көрсету, сондай-ақ төтенше жағдай режимі аяқталғаннан кейін карантиндік шараларды сақтау мақсатында жүргізілді. Мүгедектікті автоматты түрде ұзарту медициналық-әлеуметтік сараптамаға құжаттарды рәсімдеу кезінде азаматтардың вирус жұқтыру қаупін азайтады», – делінген хабарламада.
</blockquote>
Сонымен қатар мүгедектерді оңалту бағдарламасын жүзеге асыру мерзімі де 3 айға шегерілді. Бұрыннан бар барлық оңалту шарасы мен көмекті техникалық құралмен қамтамасыз ету тетіктері де сақталады.
<blockquote>
 «Барлық жеңілдік пен әлеуметтік қолдау шаралары да үш айға ұзартылды. Жәрдемақы бұрын бекітілген топтар мен еңбек қабілеттігін жоғалту дәрежесі бойынша беріледі. Денсаулық күйінің өзгеруіне байланысты мүмкіндігі шектеулі жандар бұрын бекітілген мүгедектік мерзімін қайта куәләндыра алады. Қазіргі таңда автоматты түрде 18,3 мың мүмкіндігі шектеулі адамның мүгедектік мерзімі 3 айға ұзартылған», – деп хабарлайды Еңбек және халықты әлеуметтік қолдау министрлігінен.
</blockquote>

Мамыр айынан бастап мүгедек жандардың жәрдемақысы өседі

<a href="https://kyzylorda-news.kz/">Kyzylorda-news.kz.</a> Тестілеуге кіргізу барысында тыйым салынған затпен ұсталған түлек биыл ҰБТ тапсыру мүмкіндігінен айрылады. Бұл туралы ҚР БҒМ баспасөз қызметі хабарлады.
<blockquote>
 «Тестілеуге кіргізу барысында тыйым салынған затпен ұсталған түлек тестілеуге жіберілмейді және биыл ҰБТ тапсыру мүмкіндігінен айрылады. Айта кеткен жөн, ҰБТ аяқталғаннан кейін 25 тамызға дейін бейнебақылау жазбасы талданып, оқуға түсушінің тыйым салынған заттарды пайдаланғаны анықталған жағдайда, оның ҰБТ және білім беру грантын тағайындау конкурсының нәтижесі жойылады», – делінген хабарламада.
</blockquote>

Биыл ҰБТ-да телефонмен ұсталған түлекке қандай шара қолданылады?

<a href="https://kyzylorda-news.kz/">Kyzylorda-news.kz.</a> Мемлекет басшысы 2020 жылды – Волонтерлер жылы деп жариялағаны белгілі. Еліміздегі Төтенше жағдай кезінде Қызылорда облысында полицейлердің таптырмас көмекшілері болған еріктілер жақында арнайы марапатталды.
Сыр өңірінде еріктілер қауымы полиция қызметкерлеріне ыстық тамақ жеткізу үшін блок-посттарға жиі барды. Түрлі рейдтік іс-шараларға қатысып, қоғамдық тәртіпті сақтауға жәрдемдесті.
Міне, осындай волонтерлерге Қызылорда облысының Полиция департаментінде белсенді азаматтық ұстанымдары мен ішкі істер органдарына қоғамдық тәртіпті сақтауға және өңірдің төтенше жағдайлар кезінде азаматтардың қауіпсіздігін қамтамасыз етуге көмек көрсеткен көмектері үшін ерекше көзге түскен еріктілерге ІІМ министрі атынан алғыс хаттар табыс етілді.
Атап айтқанда, министрдің марапатына қызылордалық еріктілердің арасынан Ольга Чебакова, Олег Шакиев, Татьяна Косарева, Айсұлу Ерсайын, Салтанат Сауапова, Наталья Зорило, Гүлім Мүңке ие болды.
Қызылорда облысы Полиция департаментінің басшылығы барлық іріктілерге белсенді азаматтық ұстанымдары, патриотизм және адамның қоғам өміріне саналы қатысуы үшін алғыс білдірді.
<img src="https://kyzylorda-news.kz/wp-content/uploads/2020/05/02-21.jpg" alt="" />
<img src="https://kyzylorda-news.kz/wp-content/uploads/2020/05/03-13.jpg" alt="" />
<img src="https://kyzylorda-news.kz/wp-content/uploads/2020/05/04-5.jpg" alt="" />

Қызылорда облысының үздік еріктілері марапатталды (ФОТО)

<a href="https://kyzylorda-news.kz/">Kyzylorda-news.kz.</a> 18 мамырдан бастап Қазақстанда бірқатар карантин шаралары жеңілдейді.
ҚР Үкіметінің шешімімен 2020 жылғы 18 мамырдан бастап мына нысандарға санитарлық талаптарға сай жұмыс істеуге рұқсат беріледі:
– қонақ үйлерге
– сыйымдылығы 30 адамдық орынға дейінгі қоғамдық тамақтану объектілеріне
– таза ауада қызмет көрсететін қоғамдық тамақтану объектілерінің жазғы алаңдарына.
Еске сала кетейік, кеше ҚР Премьер-Министрінің орынбасары Ералы Тоғжановтың төрағалығымен коронавирусқа қарсы ведомствоаралық комиссияның отырысы өтті. Онда экономика салаларын қалпына келтіруге және халықты жұмыспен қамтуға бағытталған бірқатар нақты шешімдер қабылданды.
Атап айтқанда, 18 мамырдан бастап <a href="https://kyzylorda-news.kz/kogam/18-mamyrdan-bastap-meshitter-ashylady-qandaj-talaptardy-saqtaw-kerek-61802/">мешіттер жұмысы</a> қайта басталып, 1 маусымнан бастап қалааралық <a href="https://kyzylorda-news.kz/kogam/1-mawsymnan-bastap-pojyzdar-qaj-qalalargha-qatynajdy-61787/">пойыздар қатынасы</a> жанданатын болды.

Қазақстан және Қызылорда облысының жаңалықтары