<a href="https://kyzylorda-news.kz/date/2020/05/24/">Kyzylorda-news.kz</a>. Қазақстанның Бас мемлекеттік санитар дәрігері Айжан Есмағамбетова Қазақстан Республикасының халқы арасында коронавирус инфекциясының алдын алу жөніндегі шараларды одан әрі күшейту туралы қаулы қабылдады, деп хабарлайды ҚР ДСМ Тауарлар мен көрсетілетін қызметтердің сапасы мен қауіпсіздігін бақылау&nbsp;<a href="https://beta.egov.kz/memleket/entities/kkkbtu/press/news/details/postanovlenie-glavnogo-gosudarstvennogo-sanitarnogo-vracha-rk-o-dalneyshem-usilenii-mer-po-preduprezhdeniyu-zabolevaniy-koronavirusnoy-infekciey-sredi-naseleniya-respubliki-kazahstan-37-ot-22-maya-2020-g?lang=kk">комитеті.</a>
Құжатта Қазақстанға шетелден келетін барлық адамдар 2 тәулікке дейін COVID-19-ға зертханалық тексеру жүргізу үшін карантиндік стационарда оқшауланатыны көрсетілген. COVID-19 ауруының белгісі бар адамдар карантиндік стационарға емес, провизорлық стационарға емдеуге жатқызылады.
Шекарадан өткен соң 5 күннен кешіктірілмей ПТР зертханалық тексеруде теріс нәтиже көрсеткен анықтамасы бар адам шет елден келген адам үйде (үй карантин) 14 тәулік бойы оқшауланады.
Үйде оқшаулау үшін жағдай болмаған жағдайда карантиндік стационарда оқшаулау ұсынылады.
Алғашқы екі күнде COVID-19-ға зертханалық тексеру нәтижелерін алғаннан кейін оң нәтижелі адамдар емдеу үшін инфекциялық стационарға ауыстырылады, COVID-19-ға теріс нәтижелі адамдар 12 тәулік бойы үйде (үй карантині) оқшауланады. Үйде оқшаулау үшін жағдай болмаған кезде жергілікті атқарушы орган белгілеген үй-жайларда оқшаулау ұсынылады.
Қазақстанға шет елден келген дипломатиялық өкілдік, консулдық мекеме және халықаралық ұйымдар өкілдігінің қызметкерлері және олардың отбасы мүшелері зертханалық тексеріледі және 14 тәулік бойы үйде өзін-өзі оқшаулауға (үй карантині) жатады.
Авиакомпаниялардың экипаждары, локомотив бригадаларының мүшелері қоңырау шалу арқылы (мүмкіндігінше бейнеқоңырау шалу) тұрғылықты (келген) жері бойынша медициналық бақылауға жатады.
Вахталық әдіспен жұмыс істейтін, «Теңізшевройл» ЖШС объектілерінен демобилизацияланған адамдар COVID-19-ға зертханалық тексеру жүргізу үшін келген орны бойынша карантиндік стационарда 2 тәулікке дейін оқшаулауға жатады, оң нәтижелі адамдар емдеу үшін инфекциялық стационарға ауыстырылады, COVID-19-ға теріс нәтижелі адамдар 12 тәулік бойы үйде (үй карантині) оқшауланады. Үйде оқшаулау үшін жағдай болмаған кезде жергілікті атқарушы органдар айқындаған үй-жайларда оқшаулау ұсынылады.
Көліктегі Бас мемлекеттік санитариялық дәрігері өңірдегі және әлемдегі қалыптасқан эпидемиологиялық жағдайды ескере отырып, шет елдерден келген жолаушыларды карантиндеу туралы шешім қабылдауға құқылы.
Қазақстан Республикасы Индустрия және инфрақұрылымдық даму министрлігі халықаралық жолаушылар қатынастарын шектеуді қамтамасыз ету міндеттелген.
Өңірде коронавирус сырқаттанушылығы 7%-дан асатын деңгейде тіркелген жағдайда облыстардың, Алматы, Нұр-Сұлтан, Шымкент қалаларының аумақтарындағы шектеу іс-шаралары қолға алынады.
Орталық мемлекеттік органдар, құқық қорғау және арнайы органдар, облыстардың, Алматы, Нұр-Сұлтан, Шымкент қалаларының әкімдері өңірде COVID-19 сырқаттанушылығының өсуі 7%-дан асатын деңгейде тіркелген жағдайда көпшілік іс-шараларын (мерекелік, спорттық-көпшілік, ойын-сауық, конференциялар, семинарлар, көрмелер және т. б.) өткізуге тыйым салады.
Сондай-ақ кинотеатрлар, түнгі клубтар, фитнес, тренажер залдары (орталықтары), сауда-ойын-сауық орталықтары жанындағы балалардың ойын алаңдары, мектептен тыс қосымша білім беру ұйымдары (дамыту, білім беру орталықтары, үйірмелер, факультативтер және т.б.), компьютер клубтары, Токио-2020 Олимпиада және Параолимпиада ойындарына ұлттық құрама командаларын дайындау үшін оларды пайдалану кезеңінде ғана Ұлттық олимпиада комитетінде аккредиттелген спорттық базаларды қоспағанда, спорт кешендерінің (үйірмелер, секциялар) қызметін тоқтатлады.
Өңірде COVID-19 сырқаттанушылығының өсуі 7%-дан асатын деңгейде тіркелген жағдайда Қазақстан Республикасы Білім және ғылым министрлігі 1) білім беру ұйымдарын қашықтықтан оқытуға, оның ішінде білімді бағалаудың барлық түрлерін қашықтықтан жүргізуге көшіруге, оқушылардың экскурсиясына тыйым салуды қамтамасыз етеді.
Қаулының толық мәтінімен комитеттің&nbsp;<a href="https://beta.egov.kz/memleket/entities/kkkbtu/press/news/details/postanovlenie-glavnogo-gosudarstvennogo-sanitarnogo-vracha-rk-o-dalneyshem-usilenii-mer-po-preduprezhdeniyu-zabolevaniy-koronavirusnoy-infekciey-sredi-naseleniya-respubliki-kazahstan-37-ot-22-maya-2020-g?lang=kk">сайтында</a>&nbsp;танысуға болады.

Бас санитар дәрігер қаулысымен коронавирусқа қатысты шектеу шаралары күшейді

Kyzylorda-news.kz. ҚР Тұңғыш Президенті – Елбасы Нұрсұлтан Назарбаев қазақстандықтарды Ораза айт мерекесімен құттықтады, деп хабарлайды &nbsp;<a href="https://elbasy.kz/kk/news/2020-05/kazakstan-respublikasynyn-tungysh-prezidenti-elbasy-nursultan-nazarbaevtyn-oraza-ayt">Elbasy.kz</a>.
Құрметті отандастар!
Баршаңызды мұсылмандардың қасиетті Ораза айт мерекесімен құттықтаймын!
Рамазан айының аяқталғанын білдіретін бұл мейрам исламның ең басты рухани құндылықтары – жақсылықты, кең пейілділік пен мейірімділікті дәріптейді.
Ислам бәрімізді бейбітшілікке, бірлік пен тұрақтылыққа шақырады. Бұл құндылықтар мұсылман үмбетімен бірге барлық дін өкіліне жақын. Сондықтан біздің елімізде Ораза айт діни сеніміне қарамастан күллі қазақстандықты біріктіре түседі.
Осы дәстүрлерді одан әрі нығайту, адамгершілік құндылықтарды бағалай білу маңызды. Бұл – Қазақстанның тұрақты және сенімді дамуының негізі.
Мереке күндері жақсы істер жасалып, жақын адамдарға қамқорлық, мұқтаж жандарға қолдау көрсетіледі. Мейрам қоғамдағы өзара түсіністік пен келісімді нығайтуға септігін тигізеді.
Осынау қастерлі күн секілді біздің өміріміз де игі істерге, ізгі ойлар мен мейірімділікке толы болсын.
Барша қазақстандыққа рухани күш-қуат, зор денсаулық және бақ-береке тілеймін!
Ораза айт қабыл болсын!

Нұрсұлтан Назарбаев: Ораза айт діни сеніміне қарамастан күллі қазақстандықты біріктіре түседі

<a href="https://kyzylorda-news.kz/">Kyzylorda-news.kz.</a> Оқиға 23 мамырда жергілікті уақытпен сағат 18.00 шамасында болды. Қызылорда қаласына қарасты Тасбөгет кентіндегі каналға шомылған үшінші сынып оқушысы суға ағып кеткен.
<blockquote>
 «Қазір оның денесі іздестірілуде. Оған Қызылорда облыстық Төтенше жағдайлар департаменті Өрт сөндіру және апаттық-құтқару жұмыстары қызметінің 22 қызметкері тартылған. Әзірге нәтиже жоқ. Жыл басынан бері облыста 7 адам суға кетті. Былтыр бұл жағдайдан барлығы 26 адам қаза тапса, оның 10-ы бала. Аймақта әлі суға түсу маусымы басталған жоқ. Сондықтар тұрғындардан қауіпсіздік шараларына назар аударуын сұраймыз», – деді Қызылорда облыстық Төтенше жағдайлар департаменті Өрт сөндіру және апаттық-құтқару жұмыстары қызметінің баспасөз хатшысы Әлия Ережепова.
</blockquote>

Қызылордада 10 жасар бала суға ағып кетті

<a href="https://kyzylorda-news.kz/">Kyzylorda-news.kz.</a> Бүгін облыс әкімі Гүлшара Әбдіқалықова «Ораза айт» мерекесіне орай орталық «Ақмешіт-Сырдария» мешітіне барды.
Өңір басшысы мешіттің жұмыс тәртібімен, «Діни кеңес беру орталығы» және «Шебер әйел қолөнер орталығының» жұмысымен танысты.
Сондай-ақ, облыс әкімі Гүлшара Әбдіқалықова сырбойылықтарды «Ораза айт» мерекесімен құттықтап, ҚМДБ-ның Қызылорда облысы бойынша Бас имамы Болатбек Абуовке қызметтік автокөлік сыйлады.
<blockquote>
 «Рамазан айында жасаған ізгі амалдарыңыз қабыл болсын және бүгінгі Ораза айт мерекесі құтты болсын. Ораза айт мерекесі – барша мұсылман қауымын бейбітшілік пен бірлікке, мейірімділік пен адамгершілік құндылықтарға үндейтін мейрам. Рамазан айында Сыр еліндегі ерікті азаматтардың жасаған қайырымдылық шараларына куә болдық. Бұл ислам дінінің – жамандықтан қайтарып, жақсылыққа бастайтынын көрсетіп отыр. Қазақстан мұсылмандары діни басқармасының Қызылорда облысы бойынша Бас имамы Абуов Болатбекке қызметтік автокөліктің кілтін табыстауға рұқсат етіңіздер. Мерекеге орай тарту етілген темір тұлпар игі істеріңізге жарасын! », – деді өңір басшысы.
</blockquote>
Өз кезегінде аймақтың Бас имамы облыс әкіміне Рамазан айында көрсетілген ізгі амалына алғыс білдірді.
Айта кетейік, биыл карантин режиміне сәйкес айт намазы мешітте оқылмайды.
Мүфтият қазақстандықтарды бұл мерекені үйде отбасымен бірге қарсы алуға шақырды.

Облыс әкімі «Ақмешіт-Сырдария» мешітіне автокөлік сыйлады

<a href="https://kyzylorda-news.kz/">Kyzylorda-news.kz.</a> Бүгін мұсылман қауымы үшін ұлық мереке – Ораза айт басталды.
Қазақстан мұсылмандары діни басқармасы биылғы төтенше жағдайға байланысты&nbsp;ораза айт мейрамын өткізу туралы арнайы мәлімдеме жасады. Онда&nbsp;Ораза айт мерекесі бір ай бойы шынайы ықыласпен ораза ұстап, әр күнін жақсылық жасаумен өткізген адамның құрметке, марапатқа ие болатын кезі екені жазылған.
<blockquote>
 «Алла Тағала құдси хадисте:&nbsp;«Пенделерiм Мен парыз еткен оразаны атқарып, ақысын алуға&nbsp;(айт намазын өтеуге)&nbsp;мешiтке бет алды. Олар Мен үшiн ораза ұстады, Менiң пәрменiммен ауыз ашты, ендi&nbsp;қуанышқа кенелсiн…»,&nbsp;– деген.
</blockquote>
Ислам дінінде кез келген мереке ғибадатпен бастау алады. Шариғатымыз бойынша айт намазын жамағатпен оқу – уәжіп. Алайда, биылғы ораза айт намазы еліміздегі карантин жағдайына байланысты мешіттерде жамағатпен өткізілмейді. Ханафи мәзһабы бойынша айт намазын үйде жеке оқу дұрыс емес.
Бірақ, айт күні күн найза бойы көтерілгеннен кейін әркім өз үйінде екі немесе төрт ракағат нәпіл (дұха) намазын жеке оқи алады. Оны төрт ракағат етіп оқу – абзал. Абдулла ибн Масғуд (Алла одан разы болсын): «Айт намазын оқи алмаған адам төрт ракағат намаз оқиды. Бірінші ракағатта «Фатиха» сүресінен кейін «Сәббихисмә раббикәл-ағлаа», екінші ракағатта «Уәш-шәмси уә духааһәә», үшінші ракағатта «Уәл-ләйли изаа яғшаа», төртінші ракағатта «Уад-духаа» сүрелерін оқиды», – деген. Ал аталмыш сүрелерді жатқа білмейтін кісілер басқа да сүрелерді оқыса болады. &nbsp;
Айт күні сәресін ішпейді, күндіз аузы ашық болады. Өйткені, хадисте:&nbsp;«Алла Елшісі (оған Алланың салауаты мен сәлемі болсын) ораза және құрбан айт күндері ораза ұстауға тыйым салатын»&nbsp;делінген.
Ораза айт – мереке. Сондықтан мейрам күні ата-анамызға, отбасымызға, балаларға, тума-туыстарға сыйлық үлестіру – сауапты әрі игі іске жатады. Алла Елшісі (оған Алланың салауаты мен сәлемі болсын):&nbsp;«Бір-бірлеріңе&nbsp;сыйлық беріңдер, араларыңда сүйіспеншіліктерің артады»&nbsp;– деп өсиет еткен.
Ораза айт – кешірім жасайтын күн.&nbsp;Пайғамбарымыз (оған Алланың салауаты мен сәлемі болсын):&nbsp;«Әрбір жүрегі пәк – тілі шыншыл адам», – деді.&nbsp;Сахабалар: «Тілі шыншыл деген түсінікті, жүрегі пәк дегенді қалай түсінеміз» деп сұрағанда Пайғамбарымыз (оған Алланың салауаты мен сәлемі болсын):&nbsp;«Жүрегі пәк дегеніміз&nbsp;–&nbsp;тақуа, таза, ыза және көре алмаушылықтан ада адам», –&nbsp;деді.
Ораза айт – мұқтаждарға көмектесетін күн. Құран Кәрімде:&nbsp;«Аллаға құлшылық етіңдер, Оған еш нәрсені ортақ қоспаңдар. Әке-шешеге, жақындарға, жетімдерге, міскіндерге, жақын көршіге, бөгде көршіге, жан жолдасқа, жолда қалғандарға және қол астындағыларға жақсылық жасаңдар», – делінген («Ниса» сүресі, 36-аят).
Жаратқан Алла әрбіріміздің ораза айт күні жасаған ізгі істерімізді, дұға-тілектерімізді қабыл етіп, жылдан жылға, айдан айға аман-есен жетуді нәсіп еткей!» делінген мәлімдемеде.

Бүгін &#8211; Ораза айт мерекесі

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда мемлекеттік университетінде Қазақстан Республикасы жоғары оқу орындарының студенттері арасында 5В011200-«Химия» мамандығы бойынша ХІІ Республикалық онлайн пәндік олимпиада өтті.
Олимпиаданы өткізудегі мақсат – жастардың шығармашылық ойлау қабілетін қалыптастыру және химия саласындағы студенттердің ғылыми-зерттеу қызметін ынталандыру.
Олимпиада нәтижесі бойынша «Үздік команда» номинациясы бойынша І-орын М.Қозыбаев атындағы Солтүстік Қазақстан мемлекеттік университеті жеңіп алды. ІІ-орынды екі университет: Қазақ ұлттық қыздар педагогикалық университеті, Ш.Уәлиханов атындағы Көкшетау мемлекеттік университеті алды. Ал ІІІ-орында үш университет жүлдегер атанды. Оңтүстік Қазақстан мемлекеттік педагогикалық университеті, Абай атындағы Қазақ ұлттық педагогикалық университеті, А.Яссауи атындағы Халықаралық қазақ-түрік университеті.
<img src="https://kyzylorda-news.kz/wp-content/uploads/2020/05/8ceac2ec-29e5-4102-80e9-e75da273c5ed.jpg" alt="" />
Олимпиаданың қорытындысы бойынша «Үздік студент» номинациясы бойынша І-орынды М.Қозыбаев атындағы Солтүстік Қазақстан мемлекеттік университетінің студенті Т.А.Горшкова алды. ІІ-орынды М.Қозыбаев атындағы Солтүстік Қазақстан мемлекеттік университетінің студенті И.А.Шкрябко, Қазақ ұлттық қыздар педагогикалық университеті студенті Н.М.Ералиева ие болды. ІІІ-орынды Ш.Уәлиханов атындағы Көкшетау мемлекеттік университеті студенті Ж.Б.Сейтқазы, Қазақ ұлттық қыздар педагогикалық университеті студенті А.Қ.Утегенова, Оңтүстік Қазақстан мемлекеттік педагогикалық университетінің студенті Н.Б.Тоқтамыс.
Олимпиаданың жабылу салтанатында Қорқыт ата атындағы Қызылорда мемлекеттік университетінің ректоры Бейбіткүл Кәрімова сөз алып, барша жеңімпаздарды жүлделі орындарымен құттықтады.
<img src="https://kyzylorda-news.kz/wp-content/uploads/2020/05/4da16c34-3027-43cb-bdaf-78a97e4687b2.jpg" alt="" />
<img src="https://kyzylorda-news.kz/wp-content/uploads/2020/05/3c84b550-0b26-41f0-9e55-aeba55f02605.jpg" alt="" />

Қызылордада химиядан республикалық олимпиада өтті

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықованың аудандардағы жұмыс сапары Сырдария ауданымен жалғасты.Өңір басшысы Тереңөзек кентіндегі жаңа 18 пәтерлі екі тұрғын үйдің құрылысын және жаңа шағын ауданның инфрақұрылымын тексерді. Бұл жерде электр желілері толық жүргізілген.Газ құбыры мен ауыз су желілерін салу бойынша жұмыстар басталды.Облыс әкімі инфрақұрылым желілерін толық жүргізіп,уақытылы тапсыруды жүктеді.
Сонымен қатар, аудан әкімдігінде өңір басшысының төрағалығымен Сырдария ауданының әлеуметтік-экономикалық дамуына арналған мәжіліс өтті.Облыс әкімі осы жылдың 4 айында атқарылған жұмыстарға тоқталып, бірнеше салада көрсеткіштердің төмендегенін айтты.
<blockquote>
 “Мәліметтерге сәйкес, Сырдария аудан бойынша бірқатар көрсеткіштер өткен жылдың осы кезеңімен салыстырғанда біршама төмендеген.Атап айтқанда, ауданда негізгі капиталға салынған инвестиция – 6,9 %, құрылыс жұмыстарының көлемі – 19,2 % азайған”,- деді облыс әкімі Гүлшара Әбдіқалықова.
</blockquote>
Жыл сайын ауданның кәсіпорындарымен күріш өнімдері шетелдік нарыққа экспортталуда. Елімізден экспортталған күріш өнімдері қайта өңделіп, бірнеше есе бағада өзімізге импортталады. Осыған байланысты аймақ басшысы күрішті қайта өңдеу және “даладан сөреге дейін”қағидаты бойынша өз өндірісін құру қажеттігін атап өтті.
Сонымен қатар, өңір басшысы Қалжан ахун ауылдық округіндегі №126 мектебінде Ақжарма ауылдық округіндегі спорттық сауықтыр кешеніндежәне «Ақжарма и К» фермерлік қожалығының күріш ақтау цехында болды. Тәулігіне 40 тонна күріш ақтайтын зауыт 15 адамды жұмыспен қамтып отыр.
Мұнан соң, өңір басшысы Болат Нұрсейітов атындағы орталық алаңда ардагерлер кеңесінің өкілдерімен кездесіп, «Ауыл – Ел бесігі» бағдарламасы аясында атқарылып жатқан жұмыстармен танысты. Мемлекеттік бағдарлама шеңберінде биылғы жылы 4 көшеге жарық, 9 көшеге орташа жөндеу жұмыстары және 3 көшеде арық жүйелері салынатынболады.
Облыс әкімі Гүлшара Әбдіқалықова Шаған ауылдық округіндегі «Бал бөбек» балабақшасының жұмысын көрді. Сонымен қатар, ауылдық округтердегі «Жұмыспен қамту жол картасы» бағдарламасы аясында салынатын балалар ойын алаңдарының жобасымен танысты. Өңір басшысы балалар ойын алаңы заманауи талапқа сай, сапалы салынуы қажеттігін ескертті.
Облыс әкімінің Сырдария ауданындағы жұмыс сапары Нағи Ілиясов ауылында жалғасты. Облыстық ауыл шаруашылығы басқармасы басшысы Сейілбек Нұрымбетов «Мағжан и К» ЖШС-нің астық тазалау қырманының жұмысымен таныстырды. Зауытта екі ауысым бойынша 40 адам жұмыс істейді. Сағатына 5 тонна күріш тазалайды.
Cонымен қатар, өңір басшысы Бесарық ауылындағы салынып жатқан жол құрылыс жұмыстарын көрді.2019 жылы республикалық бюджеттен Сырдария ауданындағы «Қызылорда-Аэропорт-Қоғалыкөл-Шіркейлі» жергілікті маңызы бар автомобиль жолының 0-8, 13,5-18 шақырымы және Бесарық ауылына кіреберісавтожолына күрделі жөндеу жұмыстары жүргізілген.
Ал, 2021 жылғы жоспар бойынша «Нұрлы жол» бағдарламасы аясында «Қызылорда-Аэропорт-Қоғалыкөл-Шіркейлі» автожолының 33-39 және 41-47 шақырымы мен «Самара-Шымкент-Жанадария» автожолы жөнделеді. Мұнан бөлек, осы ауылдағы “Абай-Дәулет” ЖШС -нің елді мекенді абаттандыру жқмыстарын көріп, шаруашылықтың жұмысымен танысты.
Облыс көлемінде ірі күріш өндіруші компания қазір кәсіптерін әртараптандырып, мал шаруашылығымен айналысып, алма өсіруді де қолға алған. Осылайша, ауыл азаматтарын тұрақты жұмыспен қамтып, халықтың әлеуетін көтеруге атсалысуда.
<blockquote>
 “Біздің жұмысымыздың негізгі басымдықтары-бұл жұмыс орындарын ашу және халықтың әл-ауқатын арттыру. Президент Қасым-Жомарт Кемелұлы Тоқаев біздің алдымызға қойған негізгі міндеттер осындай және біз оларды орындауымыз керек. Оған толық мүмкіндігіміз бар”,- деді аймақ басшысы.
</blockquote>
Сондай-ақ, жұмыс сапары барысында облыс әкімі Гүлшара Әбдіқалықова Айдарлы ауылдық клуб үйінде ерікті жастармен кездесті. Кездесу мақсаты – ауылдың жастар бригадасының жұмысымен танысу.
Айта кету керек, өткен жылы Айдарлы ауылдық округінің жастары Елбасының “Болашаққа бағдар: рухани жаңғыру” атты мақаласының “Туған жер” кіші бағдарламасынжүзеге асыру мақсатында ауылға кіре берісте арка салған.
Сондай-ақ, көп балалы отбасына көмек көрсетіп, үй салып берген.Өңір басшысы белсенді жастардың атқарып жатқан жұмыстарына ризашылығын білдіріп, оларды қолдап, өзгелерге үлгі етіп көрсету қажеттігін атап өтті.
<img src="https://kyzylorda-news.kz/wp-content/uploads/2020/05/ed360197-9a86-4d3b-a53e-2543968560b6.jpg" alt="" />
<img src="https://kyzylorda-news.kz/wp-content/uploads/2020/05/a9710b71-9a6f-4bf0-a0a9-c091185dcc87.jpg" alt="" />

Гүлшара Әбдіқалықова: «Біздің жұмысымыздың негізгі басымдықтары-жұмыс орындарын ашу және халықтың әл-ауқатын арттыру»

<a href="https://kyzylorda-news.kz/">Kyzylorda-news.kz.</a> Арал ауданының әкімі Мұхтар Оразбаев жұмыс сапарымен бірқатар елді мекендерде болды.
Сапарын Бекбауыл ауылдық округіне қарасты Құмбазар елді мекенінен бастаған аудан басшысы ең алдымен ауыл ақсақалдарымен жүздесті.
Кездесу барысында ауыл үлкендері көкейіндегі ұсыныс-пікірлерін білдірді.
Осы орайда аудан басшысы жергілікті тұрғындардың сұранысына сәйкес ағымдағы жылы Құмбазар елді мекенінің жоғары жағындағы дариядан бастау алатын «Кеңесарық» каналының ұлтанын тазалау жұмыстарына «Жұмыспен қамтудың жол картасы» аясында қаржы қаралып, арнайы конкурс қорытындысымен мердігері анықталып отырғандығын жеткізді.
Одан әрі ауыл жұртшылығының проблемалық мәселелерімен кеңінен танысу мақсатында Құмбазар, Үкілісай елді мекенінің тұрғындарын жеке мәселелері бойынша қабылдады.
Айта кету керек, биылғы жылы жергілікті төртінші деңгейлі бюджет есебінен Құмбазар елді мекеніндегі қорымды қоршау және түнгі жарықтандыруға жөндеу жұмыстарын жүргізу жоспарланып отыр.
<img src="https://kyzylorda-news.kz/wp-content/uploads/2020/05/fb_img_1590172642856.jpg" alt="" />
Аудан әкімінің жұмыс сапары Ақирек ауылдық округі, Ақбай ауылында жалғасты.
Ертеден егін шаруашылығымен айналысып келе жатқан жеке кәсіпкер Жаңабай Жолмырзаевтың бақшасына ат басын бұрып, 8 гектар егілген қауын-қарбыз алқабындағы жұмыс барысымен танысты.
Мұнан бөлек, Санат Нұрмановтың алма бағында болған аудан басшысы шаруа иелерінің ұсыныстарын тыңдап, жұмыстарына сәттілік тілесті.
Құм ортасында алма жемісін өсіруді қолға алған кәсіп иесінің жұмысымен кеңінен танысқан аудан әкімі одан әрі ауыл ақсақалдарымен кездесті.
Биыл Ақбай елді мекенінде жарықтандыру жұмыстары қолға алынса, күзге қарай диод шамдарын орнату жоспарланған.
<img src="https://kyzylorda-news.kz/wp-content/uploads/2020/05/fb_img_1590172648882.jpg" alt="" />
Аудан әкімі одан әрі Қамыстыбас, Аралқұм ауылдық округінде болып, жергілікті ақсақалдармен жүздесті.
Аудан көлемінде атқарылып жатқан жұмыстардың барысын ортаға салған ол, аталған елді мекен тұрғындарымен жеке мәселелері бойынша қабылдау өткізіп, заң аясында жауап берді.
Айта кетейік, қазіргі таңда Қамыстыбас ауылдық округінде өткен жылы салынған «Тағзым алаңының» жанынан сахына салу жұмыстары жүргізілуде.
Сонымен қатар, алдағы айларда трансформатор орнату, жарықтандыру, елді мекеннің кіре беріс қақпасын жаңалау, бағандарға жарық шамдарын орнату, көше жарықтарын жөндеу сынды жұмыстар да бастау алмақ.
Ал, Аралқұм елді мекені бойынша алдағы қараша айында трансформатор орнату жоспарланса, Шөміш елді мекенінде жарықтандыру және трансформатор орнату жұмыстары қолға алынбақ. Осы орайда, аудан басшысы атқарылатын әрбір жұмыстың сапалы жасалуына баса назар аудару қажеттігін ескертті.
Аудан әкімі жұмыс сапары соңында Сапақ ауылдық округіне аялдап, елді мекендегі су айдау станциясында ауыл ақсақалдарымен жүздесті. Жергілікті жұрттың тыныс-тіршілігіне қаныққан ол аталған елді мекенде жоспарланып отырған жұмыстарды тарқатып өтті.
Атап айтқанда, биылғы жылы аталған ауылдық округке қарасты Көктем елді мекеніне ауыз су жүйесін жүргізу жұмыстарына жоба-сметалық құжаттар әзірлеу, балалар ойын алаңын жөндеу және Сапақ, Көктем елді мекендерінің көше жарықтарын жөндеу жұмыстары жүргізілмек.
<img src="https://kyzylorda-news.kz/wp-content/uploads/2020/05/fb_img_1590172638299.jpg" alt="" />

Арал ауданындағы бірқатар елді мекенге жарық жүргізіледі

<a href="http://kyzylorda-news.kz/">Kyzylorda-news.kz</a>. Мемлекет басшысы Қасым-Жомарт Тоқаевтың Қазақстан мұсылмандарын Ораза айт мерекесімен құттықтады, деп хабарлайды Ақорданың баспасөз қызметінен.
Мемлекет басшысы Қасым-Жомарт Тоқаевтың Қазақстан мұсылмандарын Ораза айт мерекесімен құттықтауы
Құрметті отандастар!
Сіздерді Ораза айт мерекесімен шын жүректен құттықтаймын!
Бұл – ислам әлеміндегі айтулы әрі қастерлі мейрам.
Ораза айт рухани тұрғыдан жаңаруға және кемелденуге үндейтін қасиетті Рамазан айына жалғасып, жақсылыққа жетелейді.
Имандылықпен берік үндес адамгершілік пен бауырмалдық, қарапайымдылық пен кішіпейілділік – ұлттық тәлім-тәрбиенің бастауы. Оны бүгінгі ұрпақтың өмір салтына айналдыруымыз керек.
Мейрам күндері күллі мұсылман қауымы бір-біріне қамқорлық жасап, мұқтаж жандарға қолдау көрсетеді. Мұндай игі істер біздің ырыс-ынтымағымызды арттыра түседі.
Рамазан айында сабыр сақтап, төзімділік танытқанымыздың арқасында індетке байланысты қалыптасқан ахуал біршама тұрақтанды.
Халқымыздың парасаты мол, бірлігі бекем болса, бұл сынақтан да сүрінбей өтеміз деп сенемін.
Ораза айт құтты болсын!
Баршаңызға зор денсаулық, бақ-береке және толайым табыс тілеймін!

Мемлекет басшысы Қазақстан мұсылмандарын Ораза айт мерекесімен құттықтады

<a href="https://kyzylorda-news.kz/">Kyzylorda-news.kz.</a> Коронавируспен күресу үшін 32,8 миллион фунт стерлинг (40 миллион доллардан астам) жинаған Екінші дүниежүзілік соғыс ардагері Том Мурға Ұлыбританияның ең жоғары мемлекеттік марапаттарының бірі және рыцарь атағы берілді. Бұл туралы Ұлыбритания премьер-министрі Борис Джонсонның кеңсесі мәлімдеді.
<blockquote>
 “Полковник Том Мурдың ақша жинау жөніндегі керемет науқаны бүкіл елді шабыттандырды және біз үшін коронавируспен күресу үмітінің маягіне айналды. Оның ісінен шабыттанғандардың атынан мен оған үлкен алғысымды білдіремін. Бұл адам – ұлттың нағыз байлығы”, – деді Джонсон.
</blockquote>
Премьер-министр 100 жастағы ардагерге марапатты тағайындауды өтінді, ал Ұлыбритания патшайымы Елизавета II оның өтінішін орындады. Мурға рыцарь атағын беру рәсімі өтетін күн пандемияға байланысты әлі анықталған жоқ. Ұлыбританияда рыцарь атағы көбінесе 5-ші дәрежелі Британ империясының орденімен бірге беріледі. Қазіргі уақытта Мурдың қай деңгейге тағайындалатыны белгісіз, бірақ отставкадағы капитанға бұған дейін полковник дәрежесі берілген.
Соғыс кезінде Үндістанда және Бирмада қызмет еткен қарт кісі Ұлыбританияның ұлттық денсаулық сақтау жүйесіне коронавируспен күресу үшін қаржы жинайтынын мәлімдеген. Ол ақша жинау үшін бақшасындағы 25 метрлік қашықтықты өзінің жасымен бірдей, яғни, 100 рет жаяу жүріп өтетінін айтқан. Алайда, Мур мұнымен тоқтап қалмай, бақшаны 200 рет айналып шыққан.
Мурдың қайырымдылық науқаны британдықтардың қызығушылығын тудырды және ол бастапқыда жоспарланған 1000 фунт стерлингттің орнына 38, 8 миллион фунт-стерлинг қаражат жинаған.
<a href="https://massaget.kz/layfstayl/alemtanu/62217/">Massaget.kz</a>

Коронавируспен күресуге ақша жинаған қартқа рыцарь атағы берілді

Kyzylorda-news.kz. Қызылорда облысында коронавирус инфекциясын жұқтырғандар саны 290-ға жетті. Ал сауығып шыққандар саны – 225. Бұл туралы Өңірлік коммуникациялар қызметінің ақпараттық алаңында облыстық денсаулық сақтау басқармасының басшысы Жақсылық Абдусаметов мәлімдеді.
<blockquote>
 «Жаңадан 10 дерек тіркелді. Оның 9-ы індет жұқтырғандармен байланыста болса, 1-еуі скринингтеу барысында анықталды. Қазіргі таңда науқастардың жағдайы бірқалыпты, емдерін алуда», – деді Жақсылық Әбілқасымұлы.
</blockquote>
Сондай-ақ, вирус жұқтырғандармен байланыста болған– 3856 азамат анықталды. Оның ішінде, 2151-і жақын қарым-қатынаста, 1705-і жанама байланыста болған.

COVID-19: Қызылордада соңғы тәулікте 10 жағдай тіркелді

<a href="https://kyzylorda-news.kz/">Kyzylorda-news.kz.</a> Осыдан үш жыл бұрын елордадағы Оқушылар сарайында қазіргі қазақ бейнелеу өнерінің талантты өкілдерінің бірі, Қазақстан Суретшілер және Еуразия дизайнерлер одақтарының мүшесі Шыныбай Пірімбаевтың «Шабыт» атты жеке көрмесі өтті. Сонда суретшіні алғаш көрдім. Тым қарапайым, артық сөзі жоқ. Жылы жымиып жүрді де қойды. Адалдығы, адамдығы болмысынан байқалып тұрды. Жалпы, суретшілердің жан дүниесі басқа өнер иелеріне қарағанда бөлектеу. Олар оңаша аралда өмір сүретін адамға ұқсайды. Топырлаған топқа, дабыраға қосылмайды. Саяқтау жүреді.
Сол көрмеде автордың елуден астам жұмысы қойылды. Бәрі де – табиғат пен туған жерін шынайы бедерлеген туындылар. Соған қарағанда суретшінің жаны, болмысы табиғатпен бірге егіз жаратылған секілді көрінді. Әсіресе, бізге «Кәрітұма» атты картинасы ұнады. Мұнда автор туған ауылындағы талай тарихтың куәгері болып, айбыны асып, айдынданып жатқан тұманың тартылып бара жатқан бейнесін шебер зерлеген. Туындыға қарап тұрып, жүрегіңіз солқ етеді. Автор осы жұмысы арқылы кәрітұманың ғана емес, әлем проблемасына айналған Аралдың қайғы-мұңын бояу тілімен сөйлеткен. Сондай-ақ шебердің картиналарында елорданың көркем келбеті мен табиғаты келісті көрініс тапқан.
Арал демекші, біздің кейіпкеріміз кезінде толқыны тайдай тулап, буырқанып жатқан Арал теңізінің қолтығындағы қарапайым Қаратерең деген ауылда өмірге келген. Теңіз жағасында туған баланың арманы да бөлек болса керек. Жасынан сурет салуға құштар болып, алақандай ауылға «суретші бала» деген атағы жайылады.– Әкем соғысқа қатысқан майдангер еді. Әкемнің көзі тірісінде оның ағаш жонып, балта ұстап жүргенін көрген жоқпын. Бірақ оның құрдастары «Ізтілеу жас күнінен қолы ісмер, шебер болатын» деп айтып отыратын. Соған қарағанда бойымдағы өнерім әкемнен дарыған секілді. Алдымдағы ағаларым да суретті керемет салатын. Бала күнімнен сурет салғанды жақсы көріп, мектептегі барлық іс-шаралардың ортасында жүрдім. Ауылда жүргенде үш бала дос болдық, олар да бейнелеу өнерін ұнататын. Қазір соның бірі ауылдағы мектеп директорының орынбасары, екіншісі ұсталықпен айналысады. Егер екеуі де өнерді қуғанда танымал суретші болатын еді, – дейді кейіпкеріміз балалық күндерден сыр шертіп.
Он жылдықты бітіргеннен кейін жоғары оқу орнына баруға мүмкіндігі болмайды. Әкесі өмірден өткеннен кейін кейінгі бауырларына қамқор болып, анасына қолғабысын тигізіп, ауылда жұмыс істейді. Сөйтіп жүргенде, әскерге алынып, екі жыл Отан алдындағы азаматтық борышын өтеп келеді. Содан Шымкенттегі Ә.Қастеев атындағы көркемсурет училищесіне барады, бірақ одан жолы болмай, Қызылордаға келіп, облыстық Суретшілер одағының филиалында Жаңаберген Осымбетов деген ауылдас суретші ағасының шеберханасында бейнелеу өнерінің қыр-сырын үйренеді. Осы орта оған үлкен мектеп болды. Сөйтіп, келесі жылы Н.Гоголь атындағы Алматы көркемсурет училищесіне қабылданып, ұстаздары Қалиолла Ахметжан мен Аман Бақтығалиевтан тәлім алды. Бұл екі азамат та – Санкт-Петербургте оқып, бейнелеу өнерінің құпиясын меңгерген мамандар. Енді олар өздері жинаған білім нәрін шәкірттеріне сіңірді.
Қаламы жүйрік қайраткер-қаламгер Бауыржан Омар «Қаратерең» деген эссесінде: Мықты суретшілер шықты біздің Қаратереңнен. Бірінен-бірі өтеді. Қуантай Ршымбетов талантты болғанымен, алысқа құлаш сермей қоймады. Оның есесіне кәсіби суретші Жаңаберген Осымбетов әдемі пейзаждар жазды. Ал осы ауылдың топырағын борпылдатып басып өскен тағы бір дарынды суретші тіпті алысқа шапты. Ол – Шыныбай Пірімбаев. Мәскеудегі талайдың қолы жете бермейтін В.И.Суриков атындағы көркемсурет академиясын бітіріп, айды аспанға бір-ақ шығарды» деп төгілте жазғаны бар.
Мәскеуде оқыған жылдар біздің кейіпкерімізге шырқау шабыт сыйлады. Ежелден бейнелеу өнері қалыптасқан өрелі елде суретші шеберлігін одан әрі ұштай түседі. Бірегей оқу орнындағы ұстаздардың алдын көріп, тәлімін үйренеді. Көне қаладағы музейлерді армансыз аралап, орыстың бейнелеу өнерінде құбылыс жасаған тұлғалардың туындыларын тамашалайды.
«Шыныбай – өте талантты суретші. Ресейдегі В.Суриков атындағы көркемсурет академиясын тәмамдаған түлектердің бәрі де жоғары бағаланады. Сонымен бірге, ол – Еуропадағы бейнелеу өнерінің түрлі мектептерінен дәріс алып, өз шеберлігін байытқан жігіт. Суретшінің қолынан шыққан кез келген шығармаларынан философиялық ой түюге болады. Оның бәрі тазалығымен көз тартады» дейді суретші, Қазақстанның Мәдениет қайраткері Ермек Асылханов.
Осыдан алты-жеті жыл бұрын Шыныбай ағамыз әлемдік бейнелеу өнерінің алыптары туған Португалия, Испания, Италия, Түркия елдерінде болып, білімін жетілдіріп қайтады. Сол іссапар аясында көрмесі ұйымдастырылып, қазақ қылқалам шеберінің туындылары сурет өнерін жоғары бағалайтын еуропалықтарды сүйсінтеді.
– Жақсы суретші болу үшін практиканы ғана емес, теорияны да жетік білу керек. Біз шетелге барып, атақтылардан дәріс тыңдадық. Өмірден жинаған қорымыз мол. Біздің музейлерге әлемге танымал суретшілердің картиналарының көшірмесін салып, іліп қойса болады. Балалар соны көріп, әсерленер еді. Негізі, елордада бейнелеу өнерінің музейі бөлек болса деймін. Әлемдегі туристердің дені бейнелеу музейін көруге келеді. Бұл ел бюджетіне қаншама қаржы түсіреді. Айталық, өзіміз шетелге бара қалсақ, алдымен мұражайға табан тірейміз. Шетелдіктер халықты өнерімен бағалайды. Мысалы, Голландиядан қаншама талантты суретшілер шықты. Сол арқылы мемлекеттің де атағы жер жүзіне жайылды. Осындай насихат бізге де керек, – дейді ол.
Суретші көп жылдардан бері бас қалада тұрады. Шаһардағы Қазақ ұлттық өнер университетінде бейнелеу өнерінен жастарға дәріс оқиды. Жақында ғаламтордан қылқалам шебері туралы жазылған дүниелерді қарап отырып, Қаратерең ауылындағы орта мектептің мұғалімінің шағын ақпаратына көзім түсті. Онда ол кісі: «Біздің мектептің оқушыларынан: «Қазақстанның қандай атақты суретшілерін білесіңдер дегенде балалардың бірі Әбілхан атамызды атаса, екіншісі өзіміздің ауылдан шыққан Шыныбай ағамызды айтады» деп жазыпты. Көзкөргендердің айтуынша, Әбілхан атамыз өмірде өте қарапайым, дегдар адам болыпты. Өзім, Шыныбай ағаның болмысынан сол кісіге бір ұқсастықты көремін. Сондықтан да талантты суретшіні жерлестері «Қаратереңнің Қастееві» деп мақтаныш тұтуы да жарасымды.
<img src="https://kyzylorda-news.kz/wp-content/uploads/2020/05/1-3.jpg" alt="" />
<img src="https://kyzylorda-news.kz/wp-content/uploads/2020/05/2-3.jpg" alt="" />
<img src="https://kyzylorda-news.kz/wp-content/uploads/2020/05/3-1.jpg" alt="" />
<img src="https://kyzylorda-news.kz/wp-content/uploads/2020/05/4-2.jpg" alt="" />
<a href="https://www.astana-akshamy.kz/qaraterengning-qasteevi/?fbclid=IwAR2jfHPAJOOybC_AyEQFAzt_xhmztD5s73T9u2p5N2bv_tQdAcbVX32ovgw">Astana-akshamy.kz</a>

Қазақстан және Қызылорда облысының жаңалықтары

Бас санитар дәрігер қаулысымен коронавирусқа қатысты шектеу шаралары күшейді

Нұрсұлтан Назарбаев: Ораза айт діни сеніміне қарамастан күллі қазақстандықты біріктіре түседі

Қызылордада 10 жасар бала суға ағып кетті

Облыс әкімі «Ақмешіт-Сырдария» мешітіне автокөлік сыйлады

Бүгін – Ораза айт мерекесі

Қызылордада химиядан республикалық олимпиада өтті

Гүлшара Әбдіқалықова: «Біздің жұмысымыздың негізгі басымдықтары-жұмыс орындарын ашу және халықтың әл-ауқатын арттыру»

Арал ауданындағы бірқатар елді мекенге жарық жүргізіледі

Мемлекет басшысы Қазақстан мұсылмандарын Ораза айт мерекесімен құттықтады

Коронавируспен күресуге ақша жинаған қартқа рыцарь атағы берілді

COVID-19: Қызылордада соңғы тәулікте 10 жағдай тіркелді

Қаратереңнің «Қастееві»

Қазақстан және Қызылорда облысының жаңалықтары

Бас санитар дәрігер қаулысымен коронавирусқа қатысты шектеу шаралары күшейді

Нұрсұлтан Назарбаев: Ораза айт діни сеніміне қарамастан күллі қазақстандықты біріктіре түседі

Қызылордада 10 жасар бала суға ағып кетті

Облыс әкімі «Ақмешіт-Сырдария» мешітіне автокөлік сыйлады

Бүгін &#8211; Ораза айт мерекесі

Қызылордада химиядан республикалық олимпиада өтті

Гүлшара Әбдіқалықова: «Біздің жұмысымыздың негізгі басымдықтары-жұмыс орындарын ашу және халықтың әл-ауқатын арттыру»

Арал ауданындағы бірқатар елді мекенге жарық жүргізіледі

Мемлекет басшысы Қазақстан мұсылмандарын Ораза айт мерекесімен құттықтады

Коронавируспен күресуге ақша жинаған қартқа рыцарь атағы берілді

COVID-19: Қызылордада соңғы тәулікте 10 жағдай тіркелді

Қаратереңнің «Қастееві»

Бүгін – Ораза айт мерекесі