<a href="https://sputniknews.kz/society/20200603/14147677/bala-oqu-talap.html">Kyzylorda-news.kz.</a> ҚР Президентінің баспасөз хатшысы Берік Уәли коронавирустық инфекция жұқтырған. Ол бұл туралы өзінің Facebook әлеуметтік желісіндегі парақшасында мәлімдеді.
<blockquote>
 «Өкінішке қарай, бүгін аса бір жайсыз жаңалықты жариялайын деп отырмын. Әлемді айналып, елімізді шарлап кеткен коронавирус індеті менен де табылды. Кеше тапсырған тест қорытындысы оң нәтиже берді. Қазір ауруханада, дәрігерлердің қарауында жатырмын. Жағдайым бір қалыпты. Аса алаңдайтындай емес. Ем қабылдаудамын.
 Басын ашып айтатын мәселе, Президент белгіленген кестеге сәйкес жұмыс істеп жатыр. Мемлекет басшысының денсаулығына ешқандай қауіп төніп тұрған жоқ. Қасым-Жомарт Кемелұлы үнемі тест тапсырып, қорытындысын алып отыр. Ақордада санитарлық режим күшейтіліп, қауіпсіздік шаралары қатайтылған», – деп жазды ол.
</blockquote>
Сондай-ақ Берік Уәли коронавирустың барына сенбейтін азаматтар туралы айтты.
<blockquote>
 «Осы індет басталғалы барлығымыз дабыл қағып, сақтануға, дертті жұқтырмаудың жолдарын қарастыруға шақырып келеміз. Бірақ пандемияға сенбейтін, ауруды жоқ деушілер азаймай тұр. Ондайда «Ауырған адамды көрсетіңдерші», «Менің танысымның бірде-бірі ауырған жоқ. Сонда онымен кім ауырып жатыр?», «Ауырған адамдардың аттарын неге атамайды?» деген сияқты пікірлерді жиі еститінбіз. Міне, мен дерт жұқтырдым, оны жасырмай жариялап отырмын. Мұндағы мақсат алаңсыз жүрген азаматтар ойлансын, сенбей жүрген кісілердің көзі жетсін дегенім. Ауру бар. Оны жұқтырушылардың саны күн сайын артып жатыр. Қанша жерден сақтық шараларын қатаң сақтап жүрсек те, біз де жұқтырдық. Енді емделу керек.
 Баршаңызды өздеріңіздің және жақындарыңыздың денсаулығын сақтау үшін карантин режимі мен профилактикалық шараларды ұстануға шақырамын. Пандемияға жеңіл-желпі қарауға болмайды. 
Барлығыңызға амандық тілеймін!»,- деді Берік Уәли.
</blockquote>

Президенттің баспасөз хатшысы Берік Уәли коронавирус жұқтырған

<a href="https://kyzylorda-news.kz/">Kyzylorda-news.kz.</a> Сарапшылар коронавирус сөйлесу кезінде жиі жұғатынын мәлім етті, деп хабарлайды&nbsp;<a href="https://stan.kz/galimdar-kol-alisu-arkili-koronavirus-zhyktiru-kaupi-ot-332334/">Stan.kz</a>.
Мұндай тоқтамға Қытайдың ауруларды бақылау және алдын алу орталығының ғалымдары келіп отыр.&nbsp;
Мамандар індетке тап болғандар сағат сайын миллиондаған вирус қалдықтарын ауаға бөлетінін&nbsp;айтады. Сөздерінше, аурудың белгілері байқалмағандардың өзі басқаларына үлкен қауіп төндіруі мүмкін екен.&nbsp;
Сондай-ақ зерттеушілер зат арқылы немесе қол алысу арқылы вирусты жұқтыру ықтималдығы өте төмен екенін жеткізді. Себебі инфекция тудырушылар көбіне ауа арқылы таралатын көрінеді.&nbsp;
Сарапшылардың сөздерінше, маска кию расымен де індеттің жаппай таралуын алдын алатын сыңайлы.&nbsp;
Еске салайық, бұған дейін коронавирустың талауының бірнеше жолдары айтылған еді. Мамандар жұқпалы ауру қол алысу, сөйлесу, тіпті, шаш пен көзді ұстаған кезде жұғатынын анықтапты.

Ғалымдар қол алысу арқылы коронавирус жұқтыру қаупі өте төмен екенін айтты

<a href="https://kyzylorda-news.kz/">Kyzylorda-news.kz.</a> Атақты Черчилль тар жол, тайғақ кешуге тап болғанда, көңіл күйі болмай, күш-қуаты кеміп, сүйегі жасығанда да дәрігер шақырмайды екен. Ол заманның дәрігерлерінің қолынан көп нәрсе келетін: есірткі, элекртрошок, суық суға шомылдыру, лоботомия секілді әдістерді біліпті. Бірақ Черчилль креслоға отырады екен де, «маған қара ит келді» дейтін көрінеді. Азапты күндерді үндеместен өткереді екен. Сурет салады, кітап оқиды, үндемейді. Содан қара ит кетіп қалады екен.
Авраам Линкольн жастыққа жылайды екен. Төсекке етбеттеп жатып, өкіріп жылайды екен. Жылап алса, жеңілдеп, анадан жаңа туғандай болып, мемлекеттің ұлы істерін дөңгелетіп әкетеді екен. Ол кезде мұндай көңіл-күйді «меланхолия уақыты» депті. Джоан Роулинг те «қара итпен» таныс екен. Ол емханаға жатып, күйзелістен емделуден бас тартыпты. Содан Гарри Поттерді жазуға отырады. Осы кітапта адамның күш-қуатын, қуанышын сорып қоятын – дементорлар жайлы жазады. Мұндай адамдармен күресу керек. Ол күресті. Кітап жазды. Кітабы атақ пен даңқ әкелді.
Академик Бехтерев жас күнінде күйзеліске түсіп, жындыханада жатыпты. Ол кезде неврозға арналған емхана болмаса керек. Ол ауырып жүріп дәрігерлердің қалай емдегенін бақылапты, содан психиатр болам деп шешеді. Жазылып шығып, оқуды қолға алады. Содан адам жанын зерттеген ерекше білгір ғалымға айналады.
Көңіл күйдің болмауы адам болмысына тән құбылыс. Ол атақты адамдарға да тән. Күйзеліс оларға өз ісімен айналысуға, атақты болуға кедергі болмапты. Азапты күндерде адам миы қайта жаңғырып отырады. Жаңартулар енгізіліп, жаңа бағдарламалар жазылады. Адам өзгереді.
Бастысы – тым белсенді қимыл-қозғалысты міндеттемеу. Күйзелісті жоққа шығаруға тырыспау. Оны ішімдікпен басып тастамау. Не дәрі ішіп, емдеуге тырыспау. Психикалық дерт болмаса, ол жазылады. Қалыпты дүние. Мұндай көңілсіз күндер ойлануға түрткі болады. Табиғатты тамашалауға мүмкіндік береді. Шығармашылықпен айналысуға жол ашады. Оқшаулануға таптырмас мүмкіндік. Маңызды шешімнің бәрін кейінге қалдыра тұруға болады.
Ғылыми тұрғыда күйзеліс кезінде адамның ақылы кіретіні дәлелденген. Мұндай кезде сөзжұмбақ пен есепті жақсы шығарады екен. Сондықтан миға тынығуға уақыт беріңіз. Қызықсыз күндер де артта қалады. Ал сол сәтте туған шешімдердің пайдасы шаш етектен болатыны анық.
&nbsp;Анна КИРЬЯНОВА
Аударған Шынар ӘБІЛДА

Күйзеліс

<a href="https://kyzylorda-news.kz/">Kyzylorda-news.kz.</a> Парламент сенаты лотереялар және лотерея қызметі туралы заңды екі оқылымда қарап, қабылдады, деп хабарлайды&nbsp;<a href="https://sputniknews.kz/">Sputnik Қазақстан</a>.
Мәдениет және спорт министрі Ақтоты Райымқұлованың айтуынша, заң жобасы лотереялық қызметті құқықтық реттеуді жетілдіруге бағытталған.
Құжатта лотерея операторы болып саналмайтын тұлғаның лотерея ойындарын жүргізгені үшін әкімшілік жауапкершілік белгіленген.
Жеке тұлғаларға – 100 АЕК, шағын бизнес немесе коммерциялық емес ұйымдар үшін – 300 АЕК, орта бизнес үшін – 500 АЕК, ірі бизнес үшін 1 000 АЕК мөлшерінде айыппұл салынады.
<blockquote>
 «Ал бір жыл ішінде қайталанып жасалған заңсыз іс-әрекеттер үшін жеке тұлғаларға – 200 АЕК, шағын кәсіпкерлік субъектілеріне немесе коммерциялық емес ұйымдарға – 700 АЕК, орта кәсіпкерлік субъектілеріне – 1 000 АЕК, ірі бизнес үшін 2 000 АЕК айыппұл салынып, әкімшілік құқық бұзушылықтың табысы тәркіленеді», – деді Райымқұлова сенат отырысында.
</blockquote>
Сонымен қатар, лотерея операторымен немесе таратушыларымен (агенттерімен) орналастырылған жарнаманы қоспағанда, кез келген лотерея жарнамасына тыйым салынады.
Оператор – біреу, таратушы – үш мыңға жуық
Үкіметтің 2017 жылғы қаулысымен «Сәтті Жұлдыз» АҚ лотерея операторы болып 15 жыл мерзімге белгіленді. Лотерея операторында 748 қызметкер жұмыс істейді.
Министрдің ақпаратынша, республикада 3 мыңға жуық таратушы (агенттер) шағын және орта кәсіпкерлерден тұрады. Олармен келісімшарттар негізінде жұмыс жүргізіледі, яғни лотерея операторы лотереяның дұрыс жүргізілуіне және таратылуына тікелей өзі жауап береді.
Таратушылар (агенттер) лотерея операторынан жалпы таратылған лотерея билеттерінің құнынан 6 процентке жоғары сыйақы алады.

Сенат заң қабылдады. Заңсыз лотерея өткізетіндер қалай жазаланады?

<a href="https://kyzylorda-news.kz/">Kyzylorda-news.kz.</a> Мамандардың тұжырымын ДНҚ нәтижесі растады. Колорадо университетінің ғалымдары зерттеу жүргізіп, планетадағы ауасы ең таза аймақты атады.
Ғылыми жаңалықтың жай-жапсарын Proceedings of the Natural Academy of Sciences журналынан оқуға болады.
Олардың айтуынша, Жер шарында адамның әрекетінен бастапқы қалпы бұзылмаған, бүлінбеген табиғат қалмаған. Десе де ғалымдар Антарктиданы қоршай орналасқан Тынық, Атлант және Үнді мұхитының оңтүстік бөліктері, бір сөзбен айтқанда, Оңтүстік мұхитта ауа саф күйінде дейді.
Бұл жорамалға көз жеткізу үшін сарапшылар Антарктида жағажайларына сапарлайды. Жолай ауа сынамасын алып, ондағы бактерияларды зерттеген. ДНҚ қорытындысы ғалымдардың&nbsp;пайымы қисынды деуге негіз болып отыр.&nbsp; 
<a href="https://24.kz/kz/zha-aly-tar/lemde/item/400279-auasy-b-rinen-taza-zher">«Хабар 24»</a>

Ауасы бәрінен таза жерді білесіз бе?

<a href="https://kyzylorda-news.kz/">Kyzylorda-news.kz.</a> 2020 жылдың 1 ақпанына дейін Армениядан әкелінген автокөліктерді 1 қыркүйекке дейін тіркеу керек.
Үкіметтің 20 мамырдағы қаулысымен Армениядан Қазақстанға әкелінген автокөліктерді тіркеуге қоюға рұқсат берілді. Informburo.kz Алматы полиция департаментімен бірге көлікті тіркеу шарттарын түсіндіреді.
№1.&nbsp;Қандай көлік түрлерін тіркеуге болады?
Армения республикасының уәкілетті органдарында Қазақстан азаматтарына тіркелген және басқару құралы сол жағындағы автокөліктер тіркеуге жатады. 2020 жылдың 1 ақпанына дейін елге әкелінген автокөліктер&nbsp;1 маусым мен 1 қыркүйек&nbsp;аралығында тіркеуге қойылуға тиіс.
№2.&nbsp;Көлікті тіркеу үшін қайда бару қажет?
Әр азамат қайда тұратынына қарамастан кез келген өзіне жақын орналасқан арнайы ХҚКО-ға барып көлігін тіркеуге қоя алады. Оған өзі тіркелген өңірдің мемлекеттік тіркеу нөмір белгісі (МТНБ) беріледі. Мысалы, Алматы обласының тұрғыны автокөлігін Алматы қалалық арнайы ХҚКО-да тіркейтін болса6 оған Алматы облысының “05” сериялы нөмірі беріледі. Армениядан әкелінген көлік құралдары үшін берілетін МТНБ фоны сары түсті.
№3.&nbsp;Кімдер көлігін тіркей алмайды?
Армения республикасының уәкілетті органы берген тіркеу құжатында көлік иесі ретінде көрсетілмеген тұлғалар көлігін тіркей алмайды. Сондай-ақ, басқару рулі оң жақта немесе басқару рулі оң жақтан сол жаққа қайта жабдықталған автокөліктер тіркеуге қойылмайды. Мұндай көліктерді Армения еліне қайта шығару керек.
№4.&nbsp;Көлікті тіркеу кезінде қандай төлем жасау қажет?
Жалпы сомасы&nbsp;11 946 теңгені&nbsp;құрайтын үш төлем:
тіркеу жарнасы –&nbsp;695 теңге;
техникалық төлқұжат үшін мемлекеттік баж –&nbsp;3 473 теңге;
мемлекеттік нөмір үшін баж –&nbsp;7 778 теңге.
№5.&nbsp;Қандай құжаттар қажет?
– құжат, жеке куәлік;
– 0,25 АЕК көлемінде мемлекеттік тіркеу жарнасын және Салық кодексінің 615-бабына сәйкес мемлекеттік бажды төлегені туралы түбіртектер;
– Армения республикасы уәкілетті органы берген көлік құралын тіркеу куәлігі және мемлекеттік тіркеу нөмір белгісі.
№6.&nbsp;Құжаттар өзге тілде болса, аудару қажет пе?
Иә. Көлікті тіркеу үшін ұсынылған басқа тілдегі құжаттар мемлекеттік не орыс тіліне аударылуы тиіс. Аударманың растығы немесе осындай әрекетті жасауға құқылы басқа тұлға туралы нотариус куәландыруы шарт.
№7.&nbsp;Тіркеу туралы куәлікке өзгерістер енгізіле ме?
“Ерекше белгілер” бөліміне “АРКҚ” (Армения республикасының көлік құралы) және “өзге тұлғаға тіркеуге жатпайды” деген жазбалар енгізіледі.
№8.&nbsp;Тіркелген көлік иелерінің міндеті қандай?
Олар жыл сайын техникалық байқаудан өтуі керек. Уақытында салық пен айыппұлдарды төлеп, ең бастысы жол қозғалысы ережесін бұзбауы тиіс. Жол қозғалысы қауіпсіздігін қамтамасыз ету мақсатында қолданылатын барлық автоматтандырылған ақпараттық жүйелер, атап айтқанда “ЖҚҚ ААЖ”, “Сергек” камералары интеграцияланған және Армениядан әкелінген автокөліктердің мемлекеттік нөмірлерін айырып тани алады. Бұдан бөлек, есепке қою кезінде аталған көлік құралдарының Интерпол желісі бойынша қылмыстық шығу тегі тексеріледі.
№9.&nbsp;Көлікті басқа тұлғаға рәсімдеуге бола ма?
Аталған автокөліктерді үшінші тұлғаға сатуға рұқсат жоқ. Егер автокөлік иесі оны сатқысы келсе, ол автокөлікті есептен шығарып, бұрынғы Армения нөмірі мен техникалық төлқұжатын қайтарып алып, одан кейін оны Армения республикасының есебінен алып, барлық баждар мен жарналарды, яғни кәдеге жарату және бастапқы жарналарды төлеуі тиіс. Сонда ғана автокөлікті басқа тұлғаға рәсімдеуге рұқсат етіледі.
№10.&nbsp;Тіркеу нөмір белгісі жоғалса, қайта жасатуға бола ма?
Қазақстан республикасында берілген көлік құралын тіркеу куәлігі және мемлекеттік тіркеу нөмір белгісін жоғалтқан жағдайда жазбаша түрде оларды жоғалту себебі көрсетіледі. Мемлекеттік тіркеу нөмір белгісі жоғалса, Бірыңғай ақпараттық жүйеге ешқандай өзгеріс енгізбестен қайта жасалып, иесіне беріледі.
<a href="https://informburo.kz/kaz/sh-ayda-lgerp-alyyz-armeniyadan-kelngen-klkterd-trkeuge-atysty-10-sraa-zhauap.html">Informburo.kz</a>

Армениядан әкелінген көліктерді тіркеуге қатысты 10 сұраққа жауап

<a href="https://kyzylorda-news.kz/">Kyzylorda-news.kz.</a>&nbsp;Жасыратыны жоқ, әзірге қарапайым халыққа праймериз беймәлім сөз. Дегенмен бұл сөзді ағылшын тілінен қазақшаға аударғандағы баламасы алдын – ала іріктеу, сайлау дегенді білдіреді.
Тарихқа жүгінсек, праймериз XIX ғасырдың ортасында Еуропа, Азияның кейбір елдері және Латын Америкада кеңінен қолданылған екен. Бүгінде Германия, Ұлыбританияның саяси күштері, АҚШ пен Канаданың либералды партиялары Түркия секілді елдер бұл үрдісті сайлау қарсаңында жиі қолданады және оны Ата заң аясында реттеген. Олар, негізгі сайлауды ішкі іріктеуден соң өткізеді. Бұл ел ішінде беделі басым, халыққа сөзі өтімді, партияның жұмысын іштей білетін білікті мамандарды анықтау үшін таптырмас құрал екендігін сол елдер тәжірибесінен байқауымызға болады.
Өркениетті елдердің тәжірибесін тыңғылықты зерделеген «Nur Otan» партиясы, партия ішілік іріктеу өткізудің ережелерін бекітіп, сайлауға түсетін кандидатты өз арасында таңдау үшін осы әдісті қолданбақ. Яғни, праймериздің негізгі мақсаты – алдағы Мәжіліс пен барлық деңгейдегі мәслихаттар сайлауларына партиялық тізімдерді қалыптастыру үшін бәсекелестік негізде жаңа көшбасшыларды айқындау.
Қазір праймериз қоғамда қызу талқыға түсіп жатыр. Кеше облыстық партия филиалына қарасты 239 бастауыш партия ұйымдары төрағаларымен ZOOM бағдарламасы арқылы онлайн жиын өткізіп, ережеде көрсетілген мәселелер жан-жақты талқыланды.
Мәселен, праймериз әдісінің тиімді тұстарына тоқталар болсақ, ең біріншіден бұл алыс ауылдардағы партияның қарапайым мүшелеріне өз ойын айшық айтып, өзін-жан жақты көрсетуге үлкен мүмкіндік. Екіншіден, сол азаматтардың сайлау алды бағдарламалары арқылы ауылдық елді мекендердегі проблеммалық мәселелерді анықтауға, олардың шешілу жолдарын нақтылауға көмектеседі. Үшіншіден әрине бұл, партияның ресурстары арқылы азаматтарға жасалып отырған саяси және әлеуметтік лифт.
Өздеріңіз білесіздер, өткен жылы біздің өңірімізде партиялық резервке үміткерлер арасында бұл әдіс алғаш рет Сырдария ауданында пилоттық режимде өткізілді.
Бұл іріктеу жұмыстары бізге нақты ұсыныстары бар талантты азаматтар мен өңірдің өзекті мәселелерімен таныс жаңа қоғамдық пікір иелерін бәсекелестік негізде анықтауға мүмкіндік берді. Сонымен бірге партия мүшелері арасында қызығушылықпен қатар бәсекелестік туғызды.
Елбасы еліміздің сайланбалы органдарында әйел азаматтардың үлесін 30%-ға жеткізуді тапсырғанын білесіздер. Бұл партияішілік іріктеу – праймеризде ескеріліп отыр. Яғни, партиялық тізімдердің сапалық құрамында әйел азаматтардың үлесі кем дегенде 30 пайыз. Сол секілді 35 жасқа дейінгі жастардың үлесі 20 пайыз болуы шарт. Көпбалалы аналардың, қандастардың (оралмандардың), ерекше қажеттіліктері бар азаматтар мен басқа да әлеуметтік топтардың өкілдері сайлаушылардың өңірлік құрылымына сәйкес енгізілмек.
Міне, партия қатарына қосылып, еліміздің дамуына үлесімді қосамын, – деген сырбойылық азаматтар үшін жаңа мүмкіндік. Кеше Партия Төрағасы Нұрсұлтан Әбішұлы Назарбаев 17 тамыздан 3 қазанға дейінгі аралықта партияішілік таңдау – праймериз өткізу туралы Қаулыға қол қойды.
Праймериз 5 кезең бойынша жүргізілмек.
1) кандидаттарды ұсыну және тіркеу;
2) кандидаттарды үгітке даярлау;
3) үгіт жұмысы;
4) дауыс беруді өткізу;
5) тізімдерді дайындау.
Олай болса, осы мүмкіндікті пайдалана отырып, барша жерлестерді праймеризге белсенді қатысуға шақырамын!
Праймериз ережелері бойынша сауалдарыңыз болса, 8(7242) 26-46-28 байланыс телефонына хабарласуға немесе https://nurotan.kz/primaryze?lang=kz партияның ресми сайтынан білуге болатындығын назарларына саламын.
Ақмарал ӘЛНАЗАРОВА,
“Nur Otan” партиясы Қызылорда облыстық филиалы төрағасының бірінші орынбасары

Ақмарал Әлназарова: Праймериз – жаңа лидерлерді анықтаудың таптырмас құралы

<a href="https://kyzylorda-news.kz/">Kyzylorda-news.kz.</a> Мәжіліс депутаттары ауылдарды сапалы интернетпен қамту туралы заң жобасын бірінші оқылымда мақұлдады.&nbsp;
Депутат Майра Айсинаның айтуынша, қазіргі уақытта Қазақстанда 117 қала мен тұрғындар саны 250 және одан да көп&nbsp;3 324 ауыл кең жолақты интернетпен қамтылған.&nbsp;
<blockquote>
 «Екі мыңға жуық ауылда мұндай мүмкіндік жоқ. Сондықтан парламент депутаттары осы мәселені көтеріп отыр. Заң жобасындағы нормаларды жүзеге асырудың арқасында екі жылдың ішінде қазақстандықтардың 97%-і интернетпен қамтылады», – деді депутат.
</blockquote>
Айсина заң жобасына сәйкес, мобильдік желіге арналған антенналық-мачталық құрылыс жер учаскелерін алу процедурасын жеңілдету қарастырылып отырғанын айтты.
Қолданыстағы заң жобасы бойынша жалға алынған жер учаскесін пайдаланудың нысаналы мақсатын өзгерту керек. Демек, жерді жеке немесе ауыл шаруашылығы учаскесі айналымынан шығару қажет. Салдарынан телекоммуникациялық құрылғыны салу ісі екі жылға дейін созылады.&nbsp;
Депутаттардың Жер кодексіне енгізген түзетулері байланыс операторының антенналық-мачталық құрылысын жүзеге асыру процесін жеңілдетеді. Бұл үшін жалға алынған жерді пайдаланудың нысаналы мақсатын өзгерту қажет болмайды.&nbsp;
Сондай-ақ, мобильді байланыс желісі құрылысы бойынша әкімдіктердің өкілеттігіне байланысты толықтыру енгізіледі. Өйткені көп жағдайда тұрғын үйлердегі базалық ұялы байланыс станцияларын монтаждауға иелері келісім бермейді. Заң жобасында қарастырылған толықтыруларға сәйкес әкімдіктер осы мәселені шешетін болады.
<a href="https://sputniknews.kz/society/20200603/14147768/qazaqstandyqtar-internet.html">Sputniknews.kz</a>

2022 жылға дейін қазақстандықтардың 97%-і интернетпен қамтылады

<a href="https://sputniknews.kz/society/20200603/14147677/bala-oqu-talap.html">Kyzylorda-news.kz.</a> Білім және ғылым министрлігінің мектепке дейінгі және орта білім комитетінің төрағасы Майра Мелдебекова бірінші сыныпқа қабылданатын баланың жазып, оқу қабілетіне байланысты қойылатын талапқа қатысты пікір білдірді, деп хабарлайды&nbsp;<a href="https://sputniknews.kz/">Sputnik Қазақстан.</a>
<blockquote>
 «Бірінші сыныпқа қабылданатын балалар жазып-сызып, оқып, есептей алуы тиіс деген талап жоқ. Білім туралы заңға сәйкес еліміздегі барлық балалар тегін білім алумен қамтамасыз етілуі тиіс», – деді Майра Мелдебекова.
</blockquote>
Айта кетейік, осы күндері барлық мектептерде бірінші сыныпқа құжаттарды қабылдау жүргізілуде. 1 маусымнан басталған шара 1 тамызға дейін жалғасады. Ал өтінімдерді дәстүрлі қағаз түрінде немесе&nbsp;<a href="https://egov.kz/cms/kk">egov.kz</a>&nbsp;электрондық үкімет порталы арқылы беруге болады.
Сондай-ақ комтитет төрағасының айтуынша, тамыз айында еліміздің барлық аумағында жазғы мектеп ашу жоспарланған. Ол жерде балалар төтенше жағдайға байланысты төртінші тоқсанда өтпей қалған тақырыптарды меңгеріп, қайталайтын болады.

1-сыныпқа баратын балаға қандай талап қойылады?

<a href="https://kyzylorda-news.kz/">Kyzylorda-news.kz.</a> Тарих көрсеткендей адамзат қиын жағдайға тап болғанДА мәселенің басқа шешімін іздей бастайды, нәтижесінде жаңа өнертабыстар пайда болады. Коронавирус пандемиясы инновациялық технология үшін жаңа дәуірді бастап берді.
Коронавирус өршіп тұрған кезде қауіпсіз және жайлы өмір сүру үшін әртүрлі құралдар ойлап табылып жатыр. Солардың бірнешеуімен таныстырып өтеміз.
Медициналық маскадағы ыңғайсыздықты жоятын құрылғы
Медициналық маскада бірнеше сағат бойы жүру мамандар үшін ыңғайсыздықты тудырады. Тыныс алудың қиындығы, терлеуден бөлек құлақтың артқы бөлігі қажалады. Канадалық скаут Куинн Рони бұл қолайсыздықтың қарапайым шешімін тапты.
<img src="https://kyzylorda-news.kz/wp-content/uploads/2020/06/kvi1-1.jpg" alt="" />
Куинн Рони
Ол маска жібін құлақтың артына тағатын емес, бастың артқы бөлігінде ілетін қарапайым құрылғы ойлап тапқан. Оны 3D принтерде басып шығарып, өз қаласындағы ауруханаларға тегін таратқан.
Куинндер әулеті бұл құрылғыны әлеуметтік желіге салған. Кез келген адам жүктеп алып, 3D принтерде басып шығара алады.
Вирустан қорғайтын бетперде
<img src="https://kyzylorda-news.kz/wp-content/uploads/2020/06/kvi2-1.jpg" alt="" />
Британдық биохимиктер 10 жылдан бері вирусқа қарсы қорғаныc қабаты бар маскалар дайындап келеді. Коронавирус пандемиясы бұл процесті жеделдетті.
Virustatic Shield бетпердесінің басқа бетперделерден айырмашылығы – микробтар мен инфекциялардан қорғайтын арнайы қабатқа ие. Бұл бетперде инфекция қаупі бар ағзалар – ауызды, құлақты, мұрынды толық жабады. Жеңіл матадан жасалған, ұзақ уақыт киген кезде ыңғайсыздық туғызбайды, дем алуға кедергі келтірмейді. Бірнеше рет қолдануға арналған, жууға болады.
Қолдың көмегінсіз есікті ашуға арналған құрылғы
<img src="https://kyzylorda-news.kz/wp-content/uploads/2020/06/kvi3.jpeg" alt="" />
Коронавирус металл бетінде 3 күнге дейін өмір сүре алады. Сондықтан есіктің тұтқасын сақтықпен қолдану керек.
Есік тұтқаларын қолдың көмегінсіз болатын бірнеше құрылғылар әзірленді.
Солардың бірі – лондондық дизайнер Стив Брукс жасаған гигиеналық ілгек. Гигиеналық ілгек жеңіл, қалтаға сиятын шағын және жууға болатын материалдан жасалған. Ілгекті лифт түймесін басу үшін де пайдалануға болады.
Уэльстік тағы бір өнертапқыш Вин Гриффитс те есікті қолдың көмегінсіз ашудың қарапайым және ерекше әдісін ойлап тапқан.
<img src="https://kyzylorda-news.kz/wp-content/uploads/2020/06/kvi4.jpg" alt="" />
Тұтқаға бекітілген құрылғы сізге шынтақты пайдаланып есікті ашуға мүмкіндік береді. Гриффитс жобаны интернетте жариялап, мүмкіндігі бар адамдарға құрылғыны 3D принтерден шығарып, қажет болған жағдайда пайдалануға болатындығын айтты.
Бетті қорғайтын білезік
<img src="https://kyzylorda-news.kz/wp-content/uploads/2020/06/kvi5-1.png" alt="" />
Вирустан өзін-өзі қорғаудың ең басты талаптарының бірі – қолмен бетті ұстамау. Бірақ бұл өте қиын процесс. Себебі мұндай іс-әрекет автоматты түрде жасалады. Сиэттлдің үш тұрғыны мұның шешімін табуға тырысып,&nbsp;адам іс-әрекетін басқаратын Immunotouch атты смарт білезік ойлап тапты.
Білезік смартфонға қосылады, ал арнайы қосымшаны орнату кезінде бет мүшелері білезікпен “таныстырылады”. Егер қолыңыз автоматты түрде бетіңізге жақындай бастаса, білезік белгі береді. Өнім сатылымда, оның бағасы шамамен 50 доллар.
Курьер дрондар
<img src="https://kyzylorda-news.kz/wp-content/uploads/2020/06/kvi6-1.jpg" alt="" />
Әскери және таспаға түсіру мақсатында кеңінен қолданылатын дронды шектеулі карантин кезеңінде күнделікті тапсырмаларды орындау үшін де қолдануға болады.
Қосымша жүкті көтере алатын және қашықтан басқарылатын дрон моделін және смартфонға немесе компьютерге қосып азық-түлік, дәрі-дәрмек алып келуге болады.
Алайда, көптеген елде дрондарды қолдануға шектеу қойған. Мұндай шектеу технологияның танымал болуына кедергі келтіреді.
<a href="https://massaget.kz/layfstayl/tehno/62330/">Massaget.kz</a>

Коронавирус: Пандемия кезінде ойлап табылған өнертабыстар

Дүниежүзілік зиянкестерге қарсы күрес күні
Дүниежүзілік зиянкестерге қарсы күрес күнін енгізу бастамасын Қытайдың зиянкестермен күрес қауымдастығы 2017 жылы көтерді. Оның бастамасын басқа ұлттық және өңірлік ұйымдар да қолдады. Негізгі міндеті – кең жұртшылықтың назарын зиянкестерге қарсы күрестің қоғамдық денсаулықты сақтаудағы маңызына аудару.
Орыс тілі күні
Бұл мереке халықаралық күнтізбеде 2010 жылы БҰҰ қоғаммен байланыс департаментінің ұйымның ресми алты тіліне арналған күнді тойлау ұсынысынан кейін пайда болды. 6 маусымлды таңдау себебі – осы күні орыстың ұлы ақыны Александр Сергеевич Пушкин дүниеге келген.
1845 жылы Атбасар қаласының негізі қаланды. Астанадан солтүстік-батысқа қарай 232 шақырым жерде, Жабай өзенінің (Есілдің бір саласы) оң жағалауында орналасқан. Қазан төңкерісіне дейін мұнда Атбасар жәрмеңкесі өткізіліп тұрды. 1928 жылы аудан орталығына айналды. Ақмола-Қарталы тас жолының салынуы (1940) қаланың одан әрі дамуына қолайлы жағдай жасады.
1987 жылы Алматы облысының бұрынғы Кеген ауданында Ораз Жандосов тұрған және қызмет істеген үйде ескерткіш тақта орнатылды.
1991 жылы Қазақстанның жоғары білікті халық шаруашылығы мамандарын университеттік деңгейде даярлауды кеңейту мақсатында әрі Орта Азияның ежелгі ғылыми-мәдени ошағы болған Түркістан қаласын дамытуға серпін беру үшін Түркістан мемлекеттік университеті ашылып, оған ұлы ақын әрі ағартушы Қожа Ахмет Яссауидің есімі берілді.

6 маусым: Атаулы күндер мен оқиғалар

<a href="https://kyzylorda-news.kz/">Kyzylorda-news.kz</a> ақпараттық агенттігінің 6 маусымға арналған жұлдыз-жорамалы.
Тоқты
Бүгін өміріңізді жаңа бағытқа бұрасыз. Сізді көп өзгеріс күтіп тұр. Ең алдымен өзіңізге не қажет екенін айқындап алыңыз. Сонан соң іске кіріскеніңіз жөн.
Торпақ
Өз ісіңізге мығымсыз. Сондықтан жұмыста қысқарып қаламын деген ойдан аулақ болыңыз. Егер басыңыз бос болса, екінші жартыңызды жолықтырасыз.
Егіздер
Арманыңызға жетуге бірнеше ғана қадам қалды. Сәттілік серігіңізге айналғалы тұр. Сондықтан тез шешім қабылдағаныңыз жөн. Нағыз бақытты күндерге қарай жақындап келесіз.
Шаян
Достарыңыздың арқасында үмітіңіз ақталады. Серіктестермен бірігіп жұмыс жасау өз пайдасын әкеледі. Өз күшіңізге сеніп, өзіңізді жоғары бағалаудан сақтаныңыз. Бұл мақсатқа жетуге кедергісін келтіруі мүмкін. &nbsp;
Арыстан
Болмашыға бола мазаңызды қашырғыңыз келмейді. Алайда барлығы сіз қалағандай болмайтыны анық. Көңіл-күйіңіздің жоқтығынан жаныңыздағыларды ренжітіп алмаңыз.
Бикеш
Мақсатқа жету оңай емес, бірақ табандылық танытар болсаңыз ойыңыздағы орындалады. Есіңізде болсын, бүгін тек өзіңіз сенетін адамдарға ғана сенім артыңыз. Әйтпесе, әлдекімдер алдап кетуі мүмкін.
Таразы
Табысыңыз артады. Бірақ бұл айлық жалақыңызға еш қатысы жоқ. Яғни, сіз қосымша табыс табатын боласыз. Жол сапарға шығыңыз, сонда сіздің үй шаруасы мен жұмыстан шаршағаныңыз басылады.
Сарышаян
Жұмысыңыз бірқалыпты. Жақындарыңызбен қарым-қатынасыңыз жақсарады. Жоспарланған барлық істі атқаруға мүмкіндігіңіз артады. Әріптесіңізбен қарым-қатынасты бұзып алмаңыз.
Мерген
Бұрын атқарған жұмыстарыңыздың жемісін көресіз. Үй салу немесе отбасы құруды жоспарласаңыз, барлығына мұқият болыңыз. Мақсатқа жетуге нық қадам бассаңыз, өзгелердің қызғанышын тудыратындай әрекет етпеңіз.
Тауешкі
Мақсатқа жетуге деген құлшынысыңыздың, еңбекқорлығыңыздың арқасында көп жетістікке жетесіз. Материалдық жағдайыңыз жақсарады. Сондықтан қайырымдылықпен айналысқаныңыз жөн.
Суқұйғыш
Кәсіби тұрғыда біліктілігіңіз артады. Жұмыста өз құзыретіңізді толық пайдаланасыз. Бүгін тіл табыса алмай жүрген адаммен ымыраға келесіз. Өзіңіз ақылға қонымды мінез-құлық танытсаңыз, жолыңыз әркез болады.
Балықтар
Қосымша табыс тауып, материалдық жағдайыңызды жақсартасыз. Маңызды шаруаларға білек сыбана кірісіңіз. Тез шешім қабылдауға тырысыңыз. Бүгін сіз көп еңбектенуіңіз қажет.

Қазақстан және Қызылорда облысының жаңалықтары