<a href="https://kyzylorda-news.kz/date/2020/10/29/">Kyzylorda-news.kz.</a> Жыл басынан бері пандемияға байланысты аймақтағы әуежай мен вокзалдарда санитарлық-эпидемиологиялық талаптардың сақталуына қатысты зерделеу жұмыстары жүргізіліп келеді.
Қызылорда облыстық жолаушылар көлігі және автомобиль жолдары басқармасының мамандары көлік инфрақұрылымы нысандарына барып, жолаушылардың қауіпсіздігін әрдайым қадағалауда.
Бүгінде облыс орталығындағы «Салтанат» ЖШС-не қарасты автовокзал және темір жол вокзалы жанындағы аралық аялдамада коронавирус инфекциясына қарсы тәртіп күшейтіліп, профилактикалық дезинфекциялық шаралар тиісті көлемде атқарылады. Жолаушылар арасындағы әлеуметтік арақашықтық және бетперде режимі талапқа сай жүргізіліп, әрбір жолаушыда өзімен бірге міндетті түрде жеке қорғаныс құралдарының болуы қатаң қадағалануда. Сондай-ақ, автовокзал, темір жол вокзалдары ғимаратына кірер кезінде қызметкерлер әрбір жолаушыларды термометрия бақылауынан өткізеді. Жолаушыларда жеке қорғаныс құралдары болған жағдайда ғана автобустарға отырғызу жүзеге асырылады. Сондай-ақ, тасымалдаушыларға жүк және жолаушы тасымалдаудың арнайы алгоритмдері әзірленді. Қазіргі уақытта автовокзалда, автобус салондары мен багаж бөлімдерінде рейс алдындағы және рейстен кейінгі дезинфекциялық өңдеу жұмыстары тұрақты түрде жүргізіліп, бұл іс-шараға темір жол және вокзалдары басшылығымен арнайы мамандар бөлінген.
Әуе тасымалында да жағдай да қатаң қадағалауға көшкен. Әуежай ғимараты санитайзермен жабдықталған. Сонымен бірге, жолаушылар көп шоғырланатын жерлер, әуе кемесінің, автобустар мен шағын автобустардың салондары, автомобиль траптары арнайы дезинфекциялық құралдармен өңделеді. Әуежай қызметкерлері жолаушыларды сапарға шығар алдында термометрия бақылауынан өткізеді. Әуежай кешенінде коронавирустық инфекцияның белгілері мен сақтық шаралары туралы ақпараттандырылған парақшалар ілінген және 4 минут сайын сақтық шараларына қатысты дауыс ұлғайтқышпен хабарландырулар жүргізіліп отырады. Мұндағы қызметкерлер де жеке қорғаныс құралдарымен жеткілікті көлемде қамтамасыз етілген.

Қызылордада әуежай мен вокзалдарда санитарлық талаптар бақылауда

<a href="https://kyzylorda-news.kz/date/2020/10/29/">Kyzylorda-news.kz.</a> Қызылорда облыстық көпбейінді ауруханасына шұғыл күндері орта есеппен 10 адам инсультпен түседі.
Аймақта диспансерлік есепте инсульт алған 3 мыңға жуық адам тұр. Олардың қатарында қала тұрғыны Айнагүл Бермағанбетова да бар. Жақында ол облыстық ауруханаға ауыр халде жеткізілді. Нейроинсульт бөлімшесінің дәрігерлері санаулы минуттарда науқастың өмірін сақтап қалды.
<blockquote>
 _“Менің қан қысымым жоғары. Сол күнде ол 220-ға дейін көтерілді. Жұлынның өткір ауыруы пайда болды. Жедел жәрдем шақырылды, тез ауруханаға жеткізілді, шұғыл ота жасалды. Дәрігерлерге рахмет! Олар менің өмірімді сақтап қалды”, – деді науқас _Айнагүл Бермағанбетова__.
 _“Науқаста ми тамырларының аневризмасы бар. Ісінген тамырдың қуысына, аневризмаға платина микроспиралы орнатылды. Бұл нәзік, уақытты қажет ететін ота. Микрокатетор жамбас артериясы арқылы енгізіледі, ол спиральды ми тамырына жеткізеді. Айта кетейік, осындай бір спираль 250-300 мың теңге тұрады. Науқас аневризманың мөлшеріне байланысты 10 спиральға дейін енгізіледі. Міндетті әлеуметтік медициналық сақтандыру жүйесінің арқасында аталған жоғары технологиялық медициналық қызметтер барлық пациенттер үшін тегін”, – дейді _нейрохирург-дәрігер_ Қанат Набдинов._
</blockquote>
Инсульт және оның салдары мүгедектікке апарып соқтыратын себептердің арасында бірінші орын алады. Инсульт белгілерін уақтылы анықтау маңызды. Бұл бас айналу, қатты бас ауруы, қолдың, аяқтың ұйып қалуы, сөйлеу, көру, мимика қабілеттерінің бұзылуы және т.б. 5-8 сағат ішінде мұндай белгілері бар науқастың өмірін сақтап қалуға болады.
<blockquote>
 “Бізге жоспарлы түрде де пациенттер келіп түседі. Егер инсульт қаупі болса. Оларға да оталар тегін жүргізеледі. Науқастар ес түссіз күйінде де түседі. Мұндай кезде біз науқастың денсаулық жағдайының жақсаруын күтеміз және ол есін жиғаннан кейін ғана хирургиялық ота жасауды жүзеге асырамыз”, – дейді Қанат Набдинов.
</blockquote>
Ағымдағы жылдың 9 айында облыстық стационарлық ауруханаларда инсульттің&nbsp;&nbsp;&nbsp; &nbsp;2 096 жағдайы емделіп шықты. Бұл мақсатқа Әлеуметтік медициналық сақтандыру қорынан 560,3 млн теңге бөлінді.
Дәрігерлердің айтуынша, профилактикалық тексерулерден уақытылы өту қан айналымы жүйесі ауруларының, соның ішінде инсульттің алдын алуға мүмкіндік береді. 40 жастан кейін ерлер мен әйелдер екі жылда бір рет артериялық гипертонияны, жүректің ишемиялық ауруын, қант диабетін, глаукоманы ерте анықтауға скринингтен өтеді.
Айта кету керек, профилактикалық тексерулерді қаржыландыру МӘМС қаражаты есебінен жүзеге асырылады, сондықтан скринингтен өту үшін сақтандыру мәртебесіне ие болу қажет.

Қызылордада шұғыл күндері 10 адам инсультпен ауруханаға түседі

<a href="https://kyzylorda-news.kz/date/2020/10/29/">Kyzylorda-news.kz.</a> Қызылорда облысында 5 шілдеден бастап мониторингтік топ бақылау жұмыстарын жүргізіп келеді. Осы уақыт аралығында 736 заңбұзушылық анықталды.
Карантин талаптарын бұзудың басым бөлігі үй жағдайында көпшілік жиын ұйымдастыру және қоғамдық тамақтану орындары мен азық-түлік сауда үйлеріне қатысты тіркелген. Оның ішінде, 14-і жеке кәсіпкерлікке, 722-і жеке тұлғаға айыппұл салынды. Халыққа қызмет көрсету орындарындағы карантин талаптарын бұзушылықтың басым бөлігі санитариялық талаптардың сақталмауына қатысты, яғни қызметкерлер маскасыз, қорғаныш қолғаптарынсыз қызмет көрсеткен.
Сонымен қатар, шекті уақыттан асырып жұмысын жалғастырған нысандар да бар.Атап айтқанда, 257 дерек маска тағу ережесін бұзған және әлеуметтік арақашықтықты сақтамаған , 58-і жұмыс жасау уақытының шектелуі , 29-і тыйым салынған нысанның қызмет көрсетуі, 14-і залалсыздандыру талаптарының сақталмауы бойынша бұзушылық орын алды.

Карантин: Қызылордада той өткізушілер көп

<a href="https://kyzylorda-news.kz/date/2020/10/29/">Kyzylorda-news.kz.</a>&nbsp;Қызылордада “Пандемия кезеңіндегі цифрландыру: жаңа сын-қатерлер мен үрдістер” тақырыбында онлайн-форум өтті. Zoom қосымшасы арқылы өткен жиынға Сингапур мен республикадағы бірқатар ұйымдардың IT сала мамандары қатысты.
Цифрландырудың басты міндеті – халықтың цифрлық сауаттылығын арттыру болып табылады. Бұрындары кез-келген қағазды алуға күндер, тіпті, апталар да кететін. Бұл процестер бүгінде цифрландырудың арқасында әлдеқайда жеңілдетілді. Қазіргі таңда қажетті анықтамалар мен құжаттарды алуға және шығаруға бірнеше минут ғана кетеді.
Жиында қатысушылар өз салаларындағы жаңалықтар мен өзгерістері турасында баяндама жасап, тәжірибелерімен бөлісті. “Азаматтарға арналған үкімет” мемлекеттік корпорациясы” КЕ АҚ Қызылорда облысы бойынша филиалының директоры Айдын Қайруллаев өз баяндамасында мемлекеттік қызметтер жайында сөз сөйлеп, атқарылып жатқан жұмыстар мен жаңа бастамаларға тоқталды.
Әлем жұртын алаңдатқан пандемия мемлекеттік қызметтерді онлайн форматқа көшу процесін әлдеқайда жеделдетті. Қазіргі кезде азаматтар үйден шықпай-ақ, кез-келген жерде смартфон мен компьютер арқылы қызметтердің 80%-дан астамын онлайн түрде алуға мүмкіндіктері бар.
Бұрын тұрғындар бала тууына байланысты жәрдемақы мен балабақша кезегіне қою мен “Алтын алқа” және “Күміс алқа” иегерлері жәрдемақы алуы үшін Халыққа қызмет көрсету орталықтарына келіп, құжат өкізу қажет болатын. Ал, бүгінде бұл қызметтерді бір ғана СМС-тің көмегімен проактивті түрде алуға мүмкіндіктер жасалынған. Ол үшін бар болғаны тұрғындар мобильді азаматтар базасына тіркелуі тиіс.
<blockquote>
 “Біз мұнымен тоқтап қалмай, мемлекеттік қызметтерді автоматтандыру мен оңтайландыру бойынша одан әрі жұмыс істейтін боламыз”, – деді филал директоры Айдын Бөкенбайұлы.
</blockquote>

Қызылорда: Пандемия кезіндегі цифрландыру

<a href="https://kyzylorda-news.kz/date/2020/10/29/">Kyzylorda-news.kz.</a> Қазақстан Тәуелсіздігінің 30 жылдығына орай, заңға сәйкес, азаматтарға және жалпы мемлекетке қауіп келтірмейтін қылмыс жасаған адамдарға амнистия жасалады. Бұл туралы Президент Қасым-Жомарт Тоқаев Ішкі істер министрлігінің кеңейтілген алқа мәжілісінде айтты, деп хабарлайды Ақорданың баспасөз қызметі.
Президент полиция қызметін цифрландыру, заңсыз есірткі айналымымен күресті күшейту, түзету жүйесінің жағдайын жақсарту керек екенін мәлімдеді.
<blockquote>
 “Елдегі күрделі әлеуметтік-экономикалық жағдайда қылмыстың өршуіне және түрме «тәртібінің» таралуына мүлде жол беруге болмайды. Ондағы жағдайдың аса мәз емес екені мәлім. Бас бостандығынан айырмай жазалауға қатысты түйткілдер бар. Министрлік қылмыстық-атқару жүйесіндегі мәселелерді шешу бойынша нәтижелі жұмыстар көрсетуі керек”, – деді Мемлекет басшысы.
</blockquote>

Тәуелсіздіктің 30 жылдығына орай амнистия жасалады

<a href="https://kyzylorda-news.kz/date/2020/10/29/">Kyzylorda-news.kz</a>. Қызылордалық полицейлер «Hi-tech» іс- шарасы барысында интернет алаяқты ұстады.
Соңғы кездері интернет-алаяқтар әлеуметтік желілерде, соның ішінде Telegram, Facebook, Instagram желілерінде белсенділік танытып, жалған боттар жасау арқылы қолданушылармен хат алмасып, олардың сеніміне кіреді.
«Hi-tech» жедел-профилактикалық іс-шара аясында қалалық Полиция басқармасының қызметкерлері интернет – алаяқты ұстады. Ол WhatsApp мессенджерінде Life Styler чатын ашып, ақшаны көбейтемін деп уәде беріп, уәдесін орындамай облыс орталығының тұрғыны 54 жастағы әйелді алдаған.
Жедел-іздестіру іс-шараларының нәтижесінде полиция қызметкерлері 36 жастағы күдіктіні ұстады.
Қазіргі таңда Қазақстан Республикасы Қылмыстық кодексінің 190-бабы 2-бөлігінің 4-тармағы бойынша (Ақпараттық жүйені пайдаланушыны алдау немесе сенімін теріс пайдалану жолымен жасалған алаяқтық) сотқа дейінгі тергеп-тексеру амалдары жүргізілуде.

Қызылордада интернет-алаяқ ұсталды

<a href="https://kyzylorda-news.kz/date/2020/10/29/">Kyzylorda-news.kz</a>. Алдағы 3 жыл ішінде полицейлердің жалақысы 30 пайызға өседі. Бұл туралы бүгін Президент Қасым-Жомарт Тоқаевтың төрағалығымен өткен Ішкі істер министрлігінің кеңейтілген алқа мәжілісінде айтылды, деп хабарлайды Ақорданың баспасөз қызметі.
Мемлекет басшысы ішкі істер саласы қызметкерлерінің еңбекақысы төмен екенін айтты. Бұл көптен бері қордаланған мәселелерді бірі. Осыған орай ол Үкіметке 3 жылдың ішінде тәртіп сақшыларының еңбекақысын 30 пайызға көтеру туралы тапсырма берді.
Сонымен қатар Президент тәртіп сақшыларына баспана жалдауға өтемақы ретінде 15 миллиард теңгеден астам қаржы бөлінетінін жеткізді.
<blockquote>
 “Келер жылдың 1 қаңтарынан бастап осы мақсаттарға қосымша 10 миллиард теңге бөлінеді. Бұл шара аясында кезекші бөлімнің қызметкерлері, қарауыл қызметі, арнайы күзет ұйымдары, ведомстволық оқу мекемелері және қылмыстық-атқару жүйесінің қызметкерлері қамтылып, жалпы 8 мың адамға қолдау көрсетіледі”, – делінген хабарламада.
</blockquote>
Президент барлық мемлекеттік басқару жүйесіне үлкен сынақ болған COVID-19 пандемиясы кезінде полиция қызметкерлерінің ерекше еңбегін атап өтті.
<blockquote>
 “Қазіргі жағдайда дәрігерлермен қатар майданның алғы шебінде полиция қызметкерлері де жүр. Өйткені азаматтардың қауіпсіздігі ғана емес, олардың денсаулығы мен берекелі өмірі сіздердің жұмыстарыңызға тікелей байланысты. Сондықтан бүгінгідей күрделі жағдайда мемлекет індетке қарсы тұрғандардың барлығын қолдайды. Менің тапсырмам бойынша пандемияның бірінші кезеңінде карантин шараларын қамтамасыз етуге қатысқан ішкі істер органдарының қызметкерлеріне сыйақы төлеуге 6,6 миллиард теңге бөлінді. Жыл соңына дейін тағы да 11,5 миллиард теңге беріледі”, – деді Мемлекет басшысы.
</blockquote>

Тоқаев полицейлердің жалақысы өсетінін айтты

<a href="https://kyzylorda-news.kz/date/2020/10/29/">Kyzylorda-news.kz</a>. Бүгін әлемнің барлық елдерінде Дүниежүзілік инсультпен күрес күні атап өтіледі, ол әлем халқының осындай өте ауыр, дей тұрғанмен алдын алуға болатын ауру туралы хабардарлығын арттыруға арналған. Жыл сайын әлемде миға соққы 15 миллионнан астам адам өмірінде орын алады. Осы ретте халықаралық медициналық статистика 10 инсульттің 8-ін болдырмауға мүмкіндік бар екендігін көрсетеді.
Соңғы он бес жыл ішінде инсульт әлемдегі өлімнің басты себептерінің бірі болып қала беруде. Қазақстанда жыл сайын 40 мыңнан астам пациент инсульт алып, оның ішінде 5 мың адам алғашқы 10 күн ішінде қайтыс болады. Ал келесі айда 5 мың адам үйінде көз жұмады. Әр екінші адам мүгедек болады. Барлық қабылданған шараларға қарамастан, инсульт саны артып келеді және соңғы 20 жылда ол шамамен 3 есе өсті. Мәселен, ҚР ДСМ статистикалық жинақтарындағы ресми деректерге сәйкес, 2017 жылы 100 мыңға 16360,6 инсульт, ал 1998 жылы – 5891,8 инсульт болды. Ауырғандардың 53%-ы ер адамдар, 47%-ы әйелдер.
Сонымен бірге инсульт тез жасаратын кеселдердің қатарында. Соңғы жылдары қан айналымы бұзылыстарының едәуір саны 60 жасқа дейінгі науқастарда байқалады. Қазақстанда аурудың 37%-ы 41-ден 60 жасқа дейінгі жас тобында байқалады, одан әрі 61-ден 70 жасқа дейінгі жас санаты – 31%. 71 жастан жоғары шамамен 28%-да байқалады. 16 жастан 40 жасқа дейінгі адамдарға ең аз қауіп төнеді, бұл 4% құрайды.
<blockquote>
 – Аурудың алдын-алу өте маңызды және инсульт жағдайында да бұл өзекті. Дегенмен, инсульттің өзгермейтін қауіп факторлары бар, мысалы, тұқым қуалаушылық, жас және жыныс (ер адамдар инсультқа жиі ұшырайды). Алайда түрлендіруге болатын, яғни біз өз тарапымыздан өзгертуге тырысатын факторлар да бар. Оларға артериялық гипертензия (инсульттан болатын өлімнің кем дегенде 51%-ын құрайды), қант диабеті, гиперхолестеринемия, жүрек ырғағының бұзылуы, алкогольді мөлшерден артық пайдалану, темекі шегу, аз қимылды өмір салты, артық салмақ, жиі стресстер, сондай-ақ рационның ерекшеліктері және балансталмаған тамақтану жатады. Қазақстандықтардың қауіпті симптомдар туралы хабардар болуы да өзекті. Кеселдің алдын алу – басты шешім, – деді Инсульт мәселелері жөніндегі республикалық үйлестіру орталығының бас маманы Зәуреш Ахметжанова.
</blockquote>
Сарапшылар инсульт кезінде жедел көмек көрсетудің өзектілігін түсіну маңызды екенін алға тартады, ол – алғашқы белгілер пайда болған сәттен бастап 4,5 сағат ішінде. Мамандар инсульттің белгілері мен алғашқы симптомдарын еске салады: әлсіздік, аяқ-қолдағы ыңғайсыздық; беттің, аяқтың әртүрлі бөліктерінде сілеюдің пайда болуы; сөйлеу және көру қабілетінің бұзылуы; бас айналуы және тепе-теңдіктің бұзылуы.
Инсульт мүгедектіктің жоғары деңгейімен және еңбекке қабілеттіліктен айырылудың жоғары деңгейімен қауіпті. Сондықтан осы аурумен күресте оңалту шешуші рөл атқарады. Орташа алғанда, пациенттердің жартысына жуығы инсульттан кейінгі когнитивті бұзылуларға (ПИКБ) ие, ал ең ауыр типтегі постинсульттік деменцияның ықтималдығы адам жасына және инсульттің ауырлығына байланысты 7-48% құрайды. Мұндай науқастарда есте сақтау функциялары бұзылады, талдау процесі қиындайды, зейіннің шоғырлануы және логикалық ойлау қабілеті төмендейді. Инсульттан аман қалғандардың үштен бірінен астамында сөйлеуде айтарлықтай бұзылыстар байқалады. Сондықтан инсульт алған науқасты оңалту – ауру терапиясының маңызды буындарының бірі. Бұл пациентке танымдық және қозғалу функцияларын қайтаруға ғана емес, сонымен қатар келесі 5 жыл ішінде 50% ықтималдылықта қайталанатын инсульттің алдын алуға мүмкіндік береді, ал бірінші жылы ол — әрбір оныншы науқаста тіркеледі.
Амбулаториялық-емханалық деңгейде оңалту өте маңызды, өйткені пациенттерге жеке, маңызды мақсаттарға қол жеткізуге жол ашады. Оңалту ең алдымен, пациенттердің өздері үшін құнды іс-әрекеттерді атқару мүмкіндіктерін қалпына келтіруді білдіреді – өзін-өзі күту, өз-өзіне қызмет көрсету, үй өмірі, жұмыс, оқу, отбасылық немесе әлеуметтік өмір, өзін-өзі бағалау сезімін сақтау.
Сонымен бірге, когнитивті оңалтудың тиімділігі нейропсихологпен және логопедпен өткізілетін интенсивті сабақтарға да, нейропротекторлық әсері бар препараттарды қамтитын дәрілік терапияға да байланысты, өйткені оңалту процесінде нейрондарды өлімнен құтқару және мидың зардап шеккен аймақтарын қалпына келтіру өте маңызды. Сонымен қатар, қозғалу функциясының бұзылуы әрдайым когнитивтік саладағы проблемалармен байланысты екенін есте ұстаған жөн, сондықтан қозғалу аппаратын оңалту когнитивті жүйелерді қалпына келтірумен тікелей байланысты.

Дүниежүзілік инсультпен күрес күні: Кеселдің алдын алу – басты шешім

<a href="https://kyzylorda-news.kz/date/2020/10/29/">Kyzylorda-news.kz</a>. Лицензиясынан айырылған жоғары оқу орындарының студенттері семестрдің аяқталуын күтпей-ақ басқа университетке ауыса алады. Бұл туралы білім және ғылым министрлігі хабарлады.
<blockquote>
 “Жоғары оқу орындары жабылып, студенттерді басқа оқу орындарына уақытылы ауыстыру қажеттілігі туындауына байланысты министрлік нормативтік құжаттарға өзгерістер енгізді”, – делінген хабарламада.
</blockquote>
Соған сәйкес, ЖОО білім беру қызметімен айналысу лицензиясынан немесе лицензияға қосымшадан айырылғанда немесе жоғары оқу орны жабылған жағдайда аталған оқу орнының студенттері семестрдің аяқталуын күтпей-ақ бірден басқа жоғары оқу орындарына ауыса алады.
Бұл студенттердің оқуын жалғастыруы үшін жасалып отыр.

Лицензиясынан айырылған университет студенттері не істейді – министрлік жауабы

<a href="https://kyzylorda-news.kz/date/2020/10/29/?doing_wp_cron=1603954660.9408171176910400390625">Kyzylorda-news.kz.</a> Бүгін облыс әкімі Гүлшара Әбдіқалықоваға Қызылорда облысының балық шаруашылығын дамытудың 2021 – 2030 жылдарға арналған өңірлік бағдарламасы таныстырылды. Аталмыш бағдарлама Үкімет басшысының тапсырмасына сәйкес әзірленген.
Бағдарламаның іске асыру жөніндегі іс-шаралар жоспары 5 бағыттан тұрады. Атап айтқанда, тұрақты сумен қамтамасыз ету, мемлекеттік қолдау, инфрақұрылымды құру, балық ресурстарын қорғау, халықаралық ынтымақтастықты дамыту, саланы ғылыми сүйемелдеу және кадрлармен қамтамасыз ету жөніндегі шаралар.
Елбасы Нұрсұлтан Назарбаевтың бастамасымен «Сырдария өзенінің арнасын реттеу және Арал теңізінің солтүстік бөлігін сақтау» жобасының жүзеге асырылуы нәтижесінде облыста балық шаруашылығын дамуына үлкен мүмкіндіктер жасалды.
Облыс аумағында Сырдария өзені, Кіші Арал теңізі және 207 көл бар. Балық өнімдерін өңдеумен және экспортпен айналысатын жылдық қуаттылығы 12,5 мың тонна құрайтын 9 балық өңдеу зауыттары жұмыс істеуде.
Ғылыми-ұйымдардың зерттеулеріне сәйкес облыстағы 207 көлдің 95-сі тауарлы балық өсіруге қолайлы. Сондықтан, 2030 жылға қарай өңірде тауарлы балық өсіруді 5 мың тоннаға жеткізу жоспарлануда. 
Балық шаруашылығына қазіргі таңда балық өсіру кезінде пайдаланылатын азықты сатып алуға жұмсалатын шығындардың 30% өтеу және ауданы 50 гектардан кем емес көл-тауарлы балық өсіру шаруашылығы үшін жабдықтар мен техниканы сатып алуға жұмсалған шығындардың 25% субсидиялау сияқты мемлекет тарапынан қолдау көрсетіліп келеді.
Алдағы уақытта, 50%-ға дейін акваөсіру субъектілері үшін балық өсіру-биологиялық негіздемені әзірлеу, балық өсіру материалын, дәрілік препараттарды сатып алу, бағалы балық түрлерінің толықтырушы-аналық табындарын сатып алу және күтіп ұстау кезіндегі, сондай-ақ балық өсіру шаруашылықтарын құруға инвестициялық салымдар кезіндегі шығындарды өтеуге бағытталған субсидиялау түрлері кеңейтіледі.
Сонымен қатар, Үкімет деңгейінде балық өсіру шаруашылықтарының орналасуын, оларға қызмет көрсету жөніндегі құрылыстардың (базаның) құрылғыларын ескере отырып, инфрақұрылымды жүргізу үшін жағалау аймағында және су қорғау белдеуінде жер учаскелерін бөлу мәселесі пысықталады.
Бағдарламаны іске асыру үшін 30,6 млрд.теңге қаржы қарастыру жоспарланып отыр. Соның ішінде, балық шаруашылығын қолдау мақсатында, «Байқоңыр» әлеуметтік кәсіпкерлік корпорациясына 2021 жылы облыстық бюджеттен 1 млрд.теңге қаржы бөлінеді. 
Атап өту керек, 2030 жылға дейін, тауарлық балық өндірісінің көлемін 5 мың тоннаға дейін ұлғайту индикаторына қол жеткізу үшін облыста мынадай шаралар қабылданады: 
– 4 шарбақтық балық өсіру шаруашылықтары құрылатын болады (600 тонна/жыл); 
– тауарлық балық өсіретін 10 тоған шаруашылықтары соғылады (787 тонна /жыл); 
– 3 тұйық жүйелі сумен қамтамасыз ету құрылғысы іске қосылады (400 тонна/жыл); 
– көл-тауарлы су айдындары саны 55-ке жетеді (3,2 мың тонна/жыл); 
– құрама жем зауытында тәулігінде қуаттылығы 80 тонна жем өндірісі қамтамасыз етіледі; 
– пластикалық қайықтар шығаратын цех салынады; 
– Қамыстыбас балық питомнигін қайта жаңғыртылады. 
Сондай-ақ, бағдарлама аясында 45 көлге электр жүйесін жеткізу және 49 дана гидротехникалық қондырғылар орнатылады. 
Нәтижесінде, 2030 жылға дейін облыстың балық экспорты 2 есеге, тауарлы балық өндіру көлемі 34 есеге өседі, 500-ден аса жаңа жұмыс орны құрылады, балық өңдеу зауыттары толығымен шикізатпен қамтамасыз етіледі. 
Жиынға қатысқан балық шаруашылығы саласының ғалымдары, кәсіпкерлері мен табиғат пайдаланушылары бағдарлама жобасы бойынша өз ой-пікірлерімен бөлісті. 
Жиын соңында облыс әкімі Гүлшара Әбдіқалықова «Балық шаруашылығын дамытудың 2021 – 2030 жылдарға арналған өңірлік бағдарламасын бекіту туралы» облыс әкімдігінің қаулысын әзірлеп, ұсынуды тапсырды. 
Айта кетейік, Қызылорда облысы республика бойынша алғашқы болып балық шаруашылығын дамытудың өңірлік бағдарламасының жобасын әзірлеп, Экология, геология және табиғи ресурстар министрлігінен келісім алды.
<img src="https://kyzylorda-news.kz/wp-content/uploads/2020/10/123135864_2854687584634292_3194670558555543221_o.jpg" alt="" />
<img src="https://kyzylorda-news.kz/wp-content/uploads/2020/10/123105139_2854687611300956_3960348307632762065_o.jpg" alt="" />

Қызылордада балық шаруашылығын дамыту жөніндегі өңірлік бағдарлама таныстырылды

<h5 id="kyzylordanewskzhttpskyzylordanewskzdate20201029"><a href="https://kyzylorda-news.kz/date/2020/10/29/">Kyzylorda-news.kz.</a> Бұл туралы ҚР БҒМ Мектепке дейінгі және орта білім комитетінің төрайымы Майра Мелдебекова тоқсандық жиынтық бақылау қатысты өткен брифинг кезінде айтты.</h5>
Ол бірінші тоқсан аяқталуға жақындап, барлық мектепте жиынтық бағалау жұмысы бөлім бойынша өтіп жатқанын айтты.
<blockquote>
 “Қашықтан оқыту кезіндегі жиынтық бағалау бойынша 2-11 сыныптарда аптасына 2 және одан да көп апталық жүктемесі бар оқу пәндері бойынша формативті бағалау, бөлім бойынша жиынтық бағалау және тоқсан бойынша жиықтық бағалау жүргізіледі. Сонымен қатар, 2-11 сыныптарда аптасына 1 сағат оқу жүктемесі болатын оқу пәндері бойынша формативті бағалау, бөлім бойынша жиықтық бағалау жүргізіледі және баға жарты жылдыққа қойылады. Оларда ТЖБ жүргізілмейді. 1-сыныпта білім алушылардың оқу жетістігі бағаланбайды және жылдық баға қойылмайды”, – деп атап өтті Майра Мелдебекова.
</blockquote>
Оның айтуынша, білім беру ұйымдарында оқу пәндері, күні және уақыты көрсетілген БЖБ мен ТЖБ өткізу кестесі жасалады.
<blockquote>
 Кестені мектеп директорларының орынбасарлары пән мұғалімдеріне түсіндіріп, жеткізіп отырады. Сонымен қатар, БЖБ мен ТЖБ саны бір күнде үш жиынтық бағалаудан аспауы керек. Мұны мұқият сақтау керек. Себебі оқушыға салмақ түсірмеу керек. 2-4 сыныптарға БЖБ мен ТЖБ уақыты реттелмейді, сондай-ақ 2 тапсырмадан артық және күрделі тапсырмалар берілмеуі керек. Сондай-ақ, 5-11 сыныптарға 3 оқу тапсырмасынан аспайтындай жұмыстар берілуі керек. Әр берілген жұмыс күрделі болуы қажет. БЖБ мен ТЖБ оқу жылының соңына дейін электронды форматта сақталады. Бұл бойынша да көп сұрақтар туындап жүр. Кей мектеп әкімшіліктері оны қағаз түрінде шығарып, сақтау керектігін айтады екен. Олай дұрыс емес, электронды түрде дайындалғаннан кейін солай сақтауға болады, – деді ол.
</blockquote>
Күнделік жүйесінде бағалар қойылады.
<blockquote>
 Қазір қашықтан оқыту кезінде формативті бағалау енгізілгенін бәріміз білеміз. Мұның себебі оқушы мен педагогтың арасындағы тығыз байланыс қашықтан болғандықтан формативті бағалауды да белгілеп, нәтижесін көрсетіп отыратындай етіп жасадық, – дейді Мелдебекова.
</blockquote>
<a href="https://baq.kz/news/othernews/bzhb-men-tzhb-okushyga-salmak-tusirmeu-kerek-bgm/?live=Y&fbclid=IwAR14haZeRbCZ7dXF8J1yoLLJlj-zfTMRtOFvAN6hXZhGu6dOfu-ak7BVrSg">Baq.kz</a>

БЖБ мен ТЖБ: Оқушыға салмақ түсірмеу керек

<a href="https://kyzylorda-news.kz/date/2020/10/29/">Kyzylorda-news.kz.</a> Қазақстанда жол қауіпсіздігін бағалаудың InternationalRoadAssessmentProgramme халықаралық жүйесін енгізу жүргізілуде.
Аталған жоба биылғы жылдың қаңтарынан бастап Дүниежүзілік банктің қолдауымен іске асуда. Оны ҚР ИИДМ Автомобиль жолдары комитеті, «SweRoad» компаниясы және «Қазақстан жол ғылыми-зерттеу институты» бірлесіп жүзеге асырып жатыр.
Бүгінге дейін «Қазжол ҒЗИ» АҚ мен «Жол активтерінің ұлттық сапа орталығы» РМК мамандары Ақмола, Солтүстік Қазақстан, Қостанай, Ақтөбе, Қызылорда, Түркістан, Жамбыл, Алматы облыстары және Алматы қаласының жолдары мен белгілерін арнайы құрылғыға түсіріп, бағасын берген.
Жоба аясында 25 ұлттық сарапшы оқытудан өтіп жатыр. Олар жолдарды дербес бағалауда. Автомобиль жолдарының қауіпсіздігіне толық әрі нақты баға беру үшін жол жүйесі әр 100 метр сайын 50 параметр бойынша кодталуда. Жолшылар осылайша 5700 шақырым жолды зерттеп үлгерген. Атап айтсақ, бұл – «Батыс Еуропа – Батыс Қытай» дәлізі, сондай-ақ «Нұр-Сұлтан – Петропавл», «Нұр-Сұлтан – Атбасар», «Қостанай – Қарабұтақ», «Шымкент – Сараығаш», «Алматы – Талдықорған» автожолдары. Жалпы барлығы 6200 шақырым жолды бағалау жоспарланыпты.
Кодтау үрдісі аяқталғаннан кейін, жолдың әр участкесіне IRAP стандарттары мен нұсқауларына сәйкес бес балдық жұлдызшалар рейтингі берілетін болады. Бұл өз кезегінде қауіпсіздік көрсеткіштерін жақсартып, жол-көлік оқиғаларын азайтуға септігін тигізеді.
Жоба жол жүру қауіпсіздігін жақсарту бойынша инвестициялық жоспарды және IRAP озық білімдерінің ұлттық платформасын құруға мүмкіндік бермек. Бұдан бөлек, аталған жүйені ұлттық заңнамаға енгізу бойынша егжей-тегжейлі ұсыныстар әзірлеу көзделген.
Жолдарды бағалаудың халықаралық жүйесі Орталық Азия елдері мен ТМД алғаш рет Қазақстанда енгізіліп жатқанын айтып өткен жөн. Аталған бағдарлама бойынша бағалау бүгінге дейін 100-ден астам мемлекетте жүзеге асқан екен.

Қазақстан және Қызылорда облысының жаңалықтары