Kyzylorda-news.kz. Қызылорда облысындағы күн электр станциясы толық өндірістік қуатына көшті.
Жылдың басында пайдалануға берілген нысан сағатына 28 мегаВатт энергия өндіріп, республикалық желіге жіберіп отыр. Жалағаш ауданындағы 60 гектар аумаққа орналастырылған 84 мың айналмалы панель күнді шығыстан қарсы алып, ымырт үйіріле батыстан шығарып салады. Жылдың 4 мезгілінде үздіксіз максималды электр тоғын өндіретін станцияда 25 адам жұмыс істейді. Күн шуағы үнемі төгіліп тұратын аймаққа қоныстанған сәуле қабылдағыш қондырғылардың жарамдылық мерзімі 25 жыл. Энергетиктердің айтуынша, жоба өз тиімділігін жарты жылда дәлелдеп шыққан. Сондықтан алдағы уақытта күнсүйгіш станция аумағын ұлғайту жоспарланып отыр.
<blockquote>
 “Басқа жерлерге қарағанда жаңбыр бізде аз жауады. Күн жылына 300 күндей ашық болады. Күн ашық болған кезде максималды тоқ беріп отырамыз. Біздің жоба қыс демейді, жаз демейді, бұлт демейді ешқандай ауа райына қарамайды. Үздіксіз электр энергиясын беріп отырады. Қыста қардан қорықпайды, өйткені панельдер айналған кезде өзі түсіп қалады. Желден қорғау қорғаныс ерекшелігі бар, – деді станция басшысы Нұрсұлтан Қызылбаев.
</blockquote>

Қызылорда облысында күн электр станциясы толық қуатына көшті

Kyzylorda-news.kz. Ресей Ғылым академиясының біріккен жоғары температура институтының мамандары COVID-19 таралуының жаңа моделін жасады. Олар адамдардың 60-70%-і емес, 3-10%-і ғана вирус жұқтырса да, ұжымдық иммунитетті қалыптастыруға болатынын анықтады, деп хабарлады Sputnik Қазақстан.
Ғалымдар вирусқа қарсы иммунитетті қалыптастыру үшін халықтың 60-70%-іне дейін инфекция жұқтыруы қажет емес екенін, карантиндік шаралардың тиімділігі көптеген факторға, соның ішінде ұлттық дәстүр мен өмір салтына байланысты екенін анықтаған. Осыған байланысты карантиндік шараларды таңдау және оңтайландыру әр ел үшін әр түрлі.
БЖТИ ғалымдарының моделі бойынша, жаңа вирустың нақты ерекшелігіне сәйкес, ауру ұзақтығының аз болуы және карантиндік шараларды тиімді қолдану ұжымдық иммунитет пайда болу шегін өзгертеді.
“Аурудың қарқынын едәуір төмендетуге және ұжымдық иммунитеттің қалыптасуына халықтың аз бөлігі, мәселен 3-10% -і вирус жұқтырған кезде де қол жеткізуге болатындығы анықталды”, – деп атап өтті институт ғалымдары.
Институт мамандары ұжымдық иммунитетті экономикалық зардаптар мен халықтың психологиялық жүктемесін барынша азайтуға бағытталған дұрыс карантиндік талаптар арқылы қалыптастыруға болатынын айтты.
<blockquote>
 “Ғалымдар коронавирус ағымының ұзақтығын, сондай-ақ, карантин талаптарын қолданылуын ескере келе, инфекцияның таралуын сипаттайтын жаңа математикалық үлгіні жариялады. Жаңа модель SARS-CoV-2 вирусын жұқтырған кезде инфекцияның сипаттамалық ерекшелігін ескеруге және қолданылған карантиндік шаралардың әсерін анықтауға мүмкіндік береді”, – деді институттың баспасөз қызметі.
</blockquote>
Институттың мәліметінше, жаңа модель қазіргі уақытта вирустың таралуын сипаттайтын екі негізгі модель – SIS моделі мен SIR моделіне қарағанда, статистикалық деректерге көбірек сәйкес келеді. Бұл модельдер дифференциалдық теңдеулер негізінде құрастырылған. Белгілі бір уақыт ішінде ауырғандар мен жазылып шыққандардың саны ескерілген.Бірінші, яғни SIS моделі бойынша COVID-19-тен айыққан адамда иммунитет қалыптаспайды және қайтадан ауырып қалуы мүмкін, ал SIR моделі науқас адамда ұзақ уақыт бойы вирусқа қарсы иммунитет сақталатынын болжайды.
Профессор Сергей Тригердің айтуынша, бұл модельдердің ешқайсысы COVID-19 ағымының мерзімдік ерекшеліктерін ескермейді. Демек, вирустарды тасымалдау үшін ең аз дегенде қанша уақыт кететінін және коронавирусқа шалдыққан адамдардың бір-бірімен байланыс орнатқан кездегі жұқтыру дәрежесін көрсетпейді.
<blockquote>
 “Қолданыстағы түсіндірмелерді зерттей отырып, вирустың аурудың бірінші күнінде емес, келесі күні көп таралатынын түсіндік. Бұл статистикалық мәліметтерге сәйкес келеді”, – деді Тригер.
</blockquote>
Оның айтуынша, институтта жасалған вирустың таралу моделі төрт параметрді ескереді: халық саны, вирус жұқтырған адамның бір тәулікте басқа адамдармен байланыс орнату көрсеткіші, инфекция ықтималдығы және вирус ағымының ұзақтығы. Эпидемияның динамикасы, әрине, халық арасында инфекция жұқтырғандардың бастапқы үлесіне де байланысты. Бұл модельде сондай-ақ, ресми статистиканы қолдану арқылы карантиндік шаралар ескеріледі.

Ғалымдар COVID-19-ға қарсы ұжымдық иммунитет қай жағдайда қалыптасатынын айтты

Kyzylorda-news.kz. Жолаушылар автокөлігі қызметтерінің бағасы 1 жылда 6 пайызға қымбаттады. Бұған қоса тамыз айында жолаушылар тасымалы өткен жылмен салыстырғанда 8 есеге жуық төмендеп отыр, деп хабарлайды <a href="https://www.inform.kz/kz/zholaushylar-avtokoligi-kyzmetterinin-bagasy-1-zhylda-6-payyzga-kymbattady_a3702292">ҚазАқпарат</a>.
2020 жылдың қаңтар-тамызында автомобиль және қалалық электр көліктерімен 7 млрд адам тасымалданды. Бұл осыдан 1 жыл бұрынғы көрсеткіштен 2,2 есеге төмен. Ал тамыз айында 260,9 млн жолаушы тасымалданып, көрсеткіш шілдемен салыстырғанда 5,4 пайыз жоғары болғанымен 2019 жылдың тамызына қарағанда 7,9 есеге кеміді. Жолаушылар айналымы жыл ішінде 2,3 есеге азайып, 75 млрд жолаушы-шақырым болды. Тамызда жолаушылар айналымы 3,1 млрд жолаушы-шақырымға жетіп, осы жылдың шілдесімен салыстырғанда 9,1 пайыз өсім көрсетті. Дегенмен, 2019 жылдың тамызымен салыстырғанда бұл көрсеткіш 7,3 пайызға кем.
Автомобиль және қалалық электр көліктерімен тасымалданған жолаушылардың ең көбі әдеттегідей автобустар мен таксилерге тиесілі. Автобустармен 5 млрд жолаушы тасымалданды. Бұл өткен жылдың көрсеткішінен 2,3 есеге аз. Таксимен 2 млрд адам тасымалданып, 2019 жылғы көрсеткішпен салыстырғанда 48,7 пайызға төмендеді. Автомобиль көліктерімен 2 млрд тонна жүк және қол жүгі тасымалданып отыр. Көрсеткіш өткен жылмен салыстырғанда 8,5 пайызға кеміді. Жүк айналымы 98,7 млрд тонна-шақырымға жеткенімен бір жыл бұрынғы көрсеткішке қарағанда 14,3 пайызға төмендеді. Тамызда жүк айналымы көлемі шілдемен салыстырғанда 3,4 пайызға артып, 14,9 млрд тонна-шақырым болды. Дегенмен, өткен жылдың тамызымен салыстырғанда 15,4 пайызға кем.
Осы жылдың 8 айының қорытындысында автомобиль және қалалық электр көліктерінің кірісі 152,9 млрд теңгеге болғанымен бір жылдың ішінде 11,6 пайызға құлдырап отыр. Өткен жылы олардың кірістері 173 млрд теңгеге жетіп, жыл ішінде 8,2 пайызка артқан еді.
Тамызда жолаушылар көлігі қызметтерінің бағасы өткен жылдың тамызымен салыстырғанда 5,7 пайызға қымбаттады. Тек Шымкент қаласында ғана баға өзгеріссіз қалды. Қызмет бағасының ең жоғары өсімі Түркістан облысында 28,1, ал маңғыстау облысында 25,4 пайыз болды.

Жолаушылар автокөлігі қызметтерінің бағасы 1 жылда 6 пайызға қымбаттады

Kyzylorda-news.kz. Қызылорда қаласындағы ЗК-169/5 мекемесінің қызметкерлері ұстаздарды ұлықтады.
«Ұстаздар күні» мерекесіне орай, Қызылорда облысы бойынша ҚАЖ департаменті ЗК-169/5 мекемесінің қызметкерлері мекемеде жазасын өтеп жатқан сотталғандарға білім беретін кешкі мектептің оқытушыларын мерекемен құттықтады.
<blockquote>
 «Сіздер сан түрлі себептермен өмір сынағына ұшырап, жазасын өтеп жатқан сотталғандарға білім беріп қана қоймай, тәлімі мен тәрбиесін түзетуде, қажырлылыққа, ізгілік пен адамгершілікке баулып, қоғамнан аластатпай, керісінше табандылықпен еңбек етіп, алдарына биік мақсаттар қоюды үйретудесіздер. Қоғам мен адамзат алдындағы осындай өлшеусіз еңбектеріңізді ескере отырып, Сіздердің өскелең ұрпақ тәрбиелеудегі өрелі жұмыстар және мемлекеттің гүлденуі жолындағы абыройлы істеріңізге алғыс білдіреміз»,- деді ЗК-169/5 мекемесі бастығының орынбасары әділет майоры Ж.Есмаханов.
</blockquote>
Айта кетерлік жайт, қазіргі таңда мекемеде жазасын өтеуші 33 сотталған кешкі мектепте оқуда.

Қызылордада ҚАЖ қызметкерлері ұстаздарды құттықтады

Kyzylorda-news.kz. Абай Құнанбаевтың 175 жылдығына және Қазақстан Республикасы Ішкі істер министрлігінің “Динамо” дене шынықтыру-спорт қоғамының 95 жылдығына орай алысқа жүгіруден тәжірибесі бар 3 әуесқой спортшы еліміздің 18 қаласын жүгіріп өтпек.
Бүкілқазақстандық спорттық-экологиялық «Марафон 18 – 760greenkm» акциясы 20 қыркүйек күні Талдықорған қаласынан бастау алды. Болашақ ұрпақ үшін табиғат байлықтарын сақтап, салауатты өмір салтын насихаттап, қоршаған ортаны сауықтыру мақсатында ұйымдастырылған бұл акция еліміздің 18 қаласында өткізіледі.
«Динамо» қозғалысының белсенділері, спортшылар Ғалым Чуашев, Айдын Сәдібеков және Дмитрий Ким марафон өткізіп келеді. Сыр еліне ат басын тіреген марафон қатысушыларына қызылордалық тәртіп сақшылар лайықты қолдау көрсетіп, оларды қарсы алды.
<blockquote>
 «Біздің мақсатымыз еліміздің экологиялық мәселелеріне қоғамның назарын аударту, себебі бүгінгі таңда экология мәселесі өзекті. «Динамо» қоғамының философиясы салауатты өмір салтын ұстану, қоршаған ортаны қорғау. Сондықтан біз «Динамо» қызметкерлерімен бірігіп, табиғатты көркейту үшін ағаш егіп жатырмыз. Өз тарапымыздан біз Динамо басшылығына, әр қаладағы қолдау көрсеткен қызметкерлерге алғыс айтамыз», – деді спортшы Ғалым Чуашев.
</blockquote>
Спортшылардың батыл бастамасын қолдаған қызылордалық тәртіп сақшылары да салауатты өмір салтын ұстанады. Себебі кәсіби біліктілігімен қатар спортты жанына серік еткен полицейлер ел алдындағы борышын сезінеді.
Талай сындарда шыңдалған мықты азаматтармен ұйымдастырылған бұл марафон өскелең ұрпақты отансүйгіштікке, туған жерді қадірлеуге, салауатты өмір салтын ұстанып, спортпен шұғылдануға шақыратыны сөзсіз.

Қызылордалық полицейлер «Динамо» спортшыларына қолдау көрсетті

Kyzylorda-news.kz. Қызылорда қаласында «Орталық қазақ бейіті» аумағынан өрт шықты.
Өрт 4 қазан күні 12.30 шамасында тұтанған. Облыс орталығындағы А.Тоқмағанбетов көшесінің бойында орналасқан «Орталық қазақ бейіті» аумағында 2 гектарға жуық қураған шөп жанған.
<blockquote>
 «Өрт 15.24-те толық сөндірілді. Оған облыстық Төтенше жағдайлар департаменті өрт сөндіру және авариялық-құтқару жұмыстары қызметінің 25 өрт сөндірушісі және 7 техникасы тартылды. Өрттің шығу себебі мен шығыны анықталуда. Зардап шеккендер жоқ», – деді өрт сөндіру кезекші қызметінің жедел кезекшісі Бекзат Макулов.
</blockquote>
Оқиға орнында Қызылорда қалалық Полиция басқармасы, Қызылорда облысы Жұмылдыру дайындығы басқармасы, жедел жәрдем бригадасы, «Қызылорда тазалығы» ЖШС мамандары жұмыс істеді.

Қызылордада Орталық зираттың аумағы өртенді

Kyzylorda-news.kz. Ресейлік дәрігер-терапевт Лариса Алексеева пәтерге коронавирустың енуінің жұртқа беймәлім жолын атады, деп хабарлайды Stan.kz.
Оның айтуынша, көптеген адамдар дүкендерде және қоғамдық көліктерде маска тағу арқылы инфекцияның таралуын болдырмауға болады деп санайды. Ол бұл қате пікір екенін алға тартты. Лариса Алексееваның сөзіне қарағанда, вирус ауырған көршілерден сорғыш арқылы пәтерге кіруі мүмкін.
<blockquote>
 “Сүзгілерді жиі ауыстыру керек. Жылына бір рет ауыстыру керек дейді, бірақ пандемия кезінде оны жиі жасау керек”, – деп түсіндірді ол.
</blockquote>
Сонымен қатар, дәрігер коронавирусты аяқ киім немесе киім арқылы да әкелуге болатынын еске салды.
<blockquote>
 “Мұнда аэрозоль форматындағы антисептиктерді қолдану тамаша нұсқа бола алады”, – деді Лариса Алексеева.
</blockquote>
Сондай-ақ, маман аяқ киімді сабынды суда жууға кеңес берді, өйткені сабын да вирустан қорғай алады.
<blockquote>
 “Айтпақшы, үйге әкелген әрбір нәрсені өңдеуіңіз керек. Мысалы, азық-түлік. Мен әр қаптаманы жылы суға жуамын”,- деп қорытындылады Алексеева.
</blockquote>

Коронавирустың таралуының жұртқа беймәлім жолы аталды

Kyzylorda-news.kz. Қазақстанның бес облысында ауа райының қолайсыздығына байланысты ескерту жарияланды, деп хабарлайды Қазгидромет.
5 қазанда Қызылорда облысында солтүстік-батыстан, солтүстіктен жел соғады, күші кей жерлерде 15-20 м/с күтіледі. Күндіз төтенше өрт қаупі сақталады.

Дүйсенбіге арналған ауа райы болжамы

Kyzylorda-news.kz. АҚШ ғалымдары ересектерде коронавируспен байланысты қабыну синдромын анықтады, деп хабарлайды <a href="https://m.sputniknews.kz/world/20201004/15123741/COVID-19-sindrom.html">Sputnik Қазақстан.</a>
Бұған дейін мұндай синдром тек балаларда кездескен еді. Ал қазір бүлдіршіндер мен жасөспірімдерде коронавирустың асқынған түрі саналатын MIS-A синдромы ересек науқастарда да байқалып жатыр, деп хабарлады АҚШ-тың ауруларды бақылау және алдын алу орталығының сайты.
Мұндай синдром анықталған пациенттердің жүрек ырғағы бұзылып (аритмия), іші ауыра бастаған. Айта кетерлігі, олардың ешқайсысында бұған дейін жүрек және асқазан-ішек жолдары аурулары болмаған.
Америкалық мамандар 21-50 жас аралығындағы 16 науқастың жағдайын толық сипаттап берді. Олардың бәрінде аритмия анықталған, 12 адамның дене қызуы көтерілді, тек сегіз пациентте ғана респираторлық симптомдар байқалған. Салдарынан он адам жансақтау бөліміне түсті, екеуі қайтыс болды.
Ғалымдар коронавирусты жұқтыру мен MIS-A синдромының пайда болуы арасында қанша уақыт өтетінін әзірге анықтаған жоқ. Сондықтан олар бұл синдром COVID-19-дың ауыр түрі ме, жоқ әлде “инфекциядан кейінгі процесс” пе, ол жағын нақты айта алмай отыр.

COVID-19-бен байланысты қауіпті синдром байқала бастады: ғалымдар дабыл қақты

<a href="https://kyzylorda-news.kz/">Kyzylorda-news.kz.</a> Ұстаз – шәкіртінің бойына білім нәрімен қатар ақыл-парасат пен көркем мінез сіңіруші жан. Сол себепті ұстаз есімі – қашанда ұлағатты. Ал осы ұлағат алып бәйтерек секілді жайқалған әулетте ұрпақтан ұрпаққа сабақтасып жатса оның орны тіпті ерек.
Бұл отбасының перзенттерінің барлығы педагогтық жолды таңдады. Сейіт қожа әулетінің ақылшысы болған Жағыпаров Дәулет пен Ханшайым үш ұл, жеті қыз тәрбиелеп өсірген. Олардың үш ұлы мен келіндері де қазір педагогика саласында қызмет атқарады. Жеті қызы да педагогикалық білім алып, алды 40-50 жыл бойы ұстаздық етті. Айта кетерлігі, бүгінде сол жарасымды үрдісті немерелері жалғастырып келеді.
Халқымыздың «Тәрбие тал бесіктен басталады» деген тәмсілі осындайдан басталса керек-ті.
Бүгінге дейін 30 жылдан астам саналы ғұмырын ұрпақ тәрбиесіне арнаған Жанатбек Дәулетұлы Жағыпаров Жезқазған педагогикалық институтын бітіріп, 1987 жылы туған жеріне келді. Жоғары оқу орнын жаңа бітірген жас Сырдария ауданы Ақжарма ауылында орналасқан Абай атындағы № 130 орта мектепте еңбек жолын бастады.
Педагогикалық еңбек жолын еңбек пәнінің мұғалімі болып бастаған ол көп ұзамай-ақ өзінің біліктілігі мен білімділігін көрсете білді. 1990 жылы мектеп директордың оқу ісі жөніндегі орынбасары қызметіне тағайындалды. Ал 1993 жылдан бастап оған мектеп директоры қызметіне атқаруға сенім артылды. Сол уақыттан бастап мектептің өсіп-өркендеуіне сүбелі үлес қосты.
Еселі еңбегі елеусіз қалған жоқ. Аудан әкімінің алғыс хатымен, аудандық білім бөлімінің Құрмет грамоталарымен марапатталды. 2006 жылы «Үздік грант иегері» атанып, 2019 жылы ҚР Білім министрінің Алғыс хатына, басқа да жоғары марапаттарына ие болды. Бүгінде көптеген жылдар бойы педагогикалық тәжірибесін сарқа пайдалануды мақсат тұтқан, бала психологиясын терең меңгерген Жанатбек аталған білім ошағында педагог-психолог қызметін атқарып келеді. 
Ұстаз қашан да өзгенің бақытын аялап, шәкіртін өмірге баулушы екені белгілі. Шәкіртіне өмірлік азық боларлық пайдалы білім береді. Жас ұрпақтың бойына ізгілік нәрін егеді. Жақсы мен жаманды айыра білуге үйретеді. Адамгершілік қасиеттерді сіңіреді. 
Жанатбек Дәулетұлының құдай қосқан қосағы Сәуле Жағыпарова да ұстаздық мамандықтың ұлағатты қасиетін бойына сіңірген жан. Педагогикалық мамандық алған ол туған жерге қызмет жасауға келді. Жас ұстаздар отбасы еңбек жолын бірге қол ұстасып Абай атындағы № 130 орта мектептен бастады. Ол кісі орыс тілі мен әдебиеті пәнінің мұғалімі, білікті ұстаз. Жастайынан қазақ әдебиетімен қатар орыс әдебиетінен нәр алып, екі тілді де шебер игерген. 
Үлгілі отбасы үш ұл тәрбиелеп өсірді. Үлкені Жандос Алматыдағы М. Тынышпаев атындағы Қазақ көлік және коммуникациялар академиясының, Елдос Қорқыт ата атындағы Қызылорда мемлекеттік университетінің, кенже ұлы Сейітхан Алматы технологиялық университетінің түлектері. Үшеуі де орта мектепте тиянақты білім алуының арқасында грант иегерлері атанып, оқу орнын жақсы аяқтады. Бүгінде өз мамандығының білікті иелері атанып жүр. Ұстаздықтың қыр-сырын шебер игерген Сәуле апай Гүлназ, Перизат, Рахима есімді келіндеріне қазақтың салт- сіңіріп келеді. 
«Ұстазы жақсының ұстамы жақсы» дегендей Жанатбек пен Сәуле ұстаздар тәрбиелеген шәкірттер жыл сайын түрлі облыстық, республикалық олимпиадалардың жеңімпаздары атанып келеді. Солардың бірі – Б.Ахмедияров бүгінде өзі түлеп ұшқан мектептің директоры. Ал Ж.Орынбаев, А.Жақанова осы білім шаңырағында мектеп директорының орынбасары қызметін абыроймен атқарып келеді. 
Ұстаздар мерекесінің қарсаңында саналы ғұмырын ұрпақ тәрбиелеуге арнаған мұғалімдерді, Жанатбек ағай мен Сәуле апайдай ұлағатты ұстаздарды төл мерекелерімен құттықтаймыз. Ұрпақ тәрбиесі жолындағы, қоғам мен адамзат алдындағы өлшеусіз еңбектеріңіз әрдайым жоғары бағаланады. Сіздерге өскелең ұрпақ тәрбиелеудегі өрелі жұмыстар және мемлекеттің гүлденуі жолындағы абыройлы істеріңізге толымды табыс тілейміз. Себебі ертеңгі мемлекеттің болмысы — ұстаздың бүгінгі тәлімінде

Ұлағатты ұстаздар әулеті

Kyzylorda-news.kz. Қызылорда облысының әкімі Гүлшара Әбдіқалықова Ұстаздарды кәсіби мерекесімен құттықтады.
Құрметті ұстаздар!
Сіздерді кәсіби мерекелеріңізбен шын жүректен құттықтаймын! 
«Ұстаз» деген ұлы ұғымда ұлылық та, жылылық та бар. 
Барлық кәсіп иесі, ол дәрігер не кәсіпкер болсын, ол ақын не әкім болсын ұстаздан білім-тәрбие алып шығады. Бүгінге дейін мен де өзімді білім шыңына жетелеген аяулы ұстаздарымның алдында бала шәкірттей сезінемін. 
Нағыз ұстаз болу кез-келгенге бұйыра бермеген бақыт. Өз ұстаздарымды сол бақытты еселеген жандар деп түсінемін. Мен білім алған Қызылорда қаласының қақ ортасында орналасқан Сәкен Сейфуллин атындағы №4 мектепте түрлі пәннен сабақ берген Райхан Көшкінова, Сара Тайманова, Кәмила Әбілова, Алуа Разақова, Ксения Тимофеевна Цой, Үміткүл Айманова, Айша Үсенова, Тоқсұлу Көшербаева, Күлбарам Сәдуақасова, Спандияр Дүйсеков, Жүсіп Ахметов сияқты ұстаздарымды күні бүгінге дейін ұмытқан емеспін. Өкінішке қарай, олардың кейбірі арамызда жоқ. 
Алғашқы ұстазым – Айша Үсенова апай. Жетінші сыныпқа дейін Үміткүл Айманова апай, сегізінші сыныптан бастап бітіргенше Сара Тайманова апай сынып жетекшіміз болғанын айта кетейін. 
Ұстаздарымның сабақта түрлендіріп өткізіп, қызықты шаралар жасаудағы тынымсыз еңбегін, сабақты ынта-шынтасымен түсіндіргендегі сәтін есіме алсам, таң қаламын. Жұмысты беріліп істеу үлкен энергияны қажет етеді. Ұстаздарымның көбі – көпбалалы. Соған қарамастан үйде бала тәрбиелеуге, мектепте бізге білім нәрін беріп, нағыз мұғалім екенін көрсетуге күш-қуаты жететін. Оларда бүгінгідей дайын тұрған көрнекі құралдар да жоқ. Бізге қолымен жасап әкелген көрнекілігінің өзі көрнекті көрінетін. Қазіргі ұстаздар да оқушыларға өз заманына лайықты білім беруде дәл осы ұстаздардай еңбек етіп жүр деген ойдамын. 
Мектебіміздің түрлі жылдардағы түлектері тәуелсіз еліміздің төрт бұрышында абыройлы еңбек етіп, сүйікті Отанымыздың көркейіп-көріктенуіне сүбелі үлес қосуда. Олардың арасында менен басқа облыстық мәслихат хатшысы Қылышбай Бисенов, кәсіпкер-меценаттар Рая Үдербаева, Асқар Махамбетовтер де бар. 
Бүгін бірнеше ұстазымның үйіне төл мерекесімен құттықтап барып, шәкірт екенімді тағы бір сәт сезіну бақыты бұйырып тұр. 
Өз уақытын аямаған, өзгенің бақытын аялаған ұстаздарымызға қандай мақтау, мадақ айтсақ та жарасады. 
Дарынды да талантты, тәлімді де тәрбиелі шәкірттеріңіз көп болсын! Шаңырақтарыңызға шаттық, шығармашылық табыс тілеймін! 
Мерейлі мерекелеріңіз құтты болсын, құрметті ұстаздар!

Облыс әкімі Ұстаздарды кәсіби мерекелерімен құттықтады

Kyzylorda-news.kz. ҚР Президенті Қасым-Жомарт Тоқаев ұстаздарды кәсіби мерекелерімен құттықтады.
<blockquote>
 «Ұстаздарды кәсіби мерекелерімен құттықтаймын! Олардың ағартушылық қызметі және жас буынды тәрбиелеу жолындағы тынымсыз еңбегі әрдайым жоғары бағаланады. Күрделі кезеңге қарамастан мемлекет мұғалімдерге қолдау көрсете береді», – деді Мемлекет twitter парақшасында.
</blockquote>

Қазақстан және Қызылорда облысының жаңалықтары

Қызылорда облысында күн электр станциясы толық қуатына көшті

Ғалымдар COVID-19-ға қарсы ұжымдық иммунитет қай жағдайда қалыптасатынын айтты

Жолаушылар автокөлігі қызметтерінің бағасы 1 жылда 6 пайызға қымбаттады

Қызылордада ҚАЖ қызметкерлері ұстаздарды құттықтады

Қызылордалық полицейлер «Динамо» спортшыларына қолдау көрсетті

Қызылордада Орталық зираттың аумағы өртенді

Коронавирустың таралуының жұртқа беймәлім жолы аталды

Дүйсенбіге арналған ауа райы болжамы

COVID-19-бен байланысты қауіпті синдром байқала бастады: ғалымдар дабыл қақты

Ұлағатты ұстаздар әулеті

Облыс әкімі Ұстаздарды кәсіби мерекелерімен құттықтады

Күрделі кезеңге қарамастан мемлекет мұғалімдерге қолдау көрсете береді – Президент

Қазақстан және Қызылорда облысының жаңалықтары

Қызылорда облысында күн электр станциясы толық қуатына көшті

Ғалымдар COVID-19-ға қарсы ұжымдық иммунитет қай жағдайда қалыптасатынын айтты

Жолаушылар автокөлігі қызметтерінің бағасы 1 жылда 6 пайызға қымбаттады

Қызылордада ҚАЖ қызметкерлері ұстаздарды құттықтады

Қызылордалық полицейлер «Динамо» спортшыларына қолдау көрсетті

Қызылордада Орталық зираттың аумағы өртенді

Коронавирустың таралуының жұртқа беймәлім жолы аталды

Дүйсенбіге арналған ауа райы болжамы

COVID-19-бен байланысты қауіпті синдром байқала бастады: ғалымдар дабыл қақты

Ұлағатты ұстаздар әулеті

Облыс әкімі Ұстаздарды кәсіби мерекелерімен құттықтады

Күрделі кезеңге қарамастан мемлекет мұғалімдерге қолдау көрсете береді &#8211; Президент

Күрделі кезеңге қарамастан мемлекет мұғалімдерге қолдау көрсете береді – Президент