*<a href="https://kyzylorda-news.kz/">Kyzylorda-news.kz</a>. Қазақстанда елдің 2025 жылға дейінгі дамуының ұлттық жоспары бекітілді, деп хабарлайды&nbsp;<a href="https://www.gov.kz/memleket/entities/economy/press/news/details/170579?lang=kk">ұлттық экономика</a> министрлігі.*
Ұлттық жоспарда жаңа экономикалық бағыттың негізгі міндеттері мен параметрлері айқындалып отыр. Оны президенттің тапсырмасы бойынша ұлттық экономика министрлігі стратегиялық жоспарлау және реформалар агенттігімен бірлесіп әзірледі.
<blockquote>
 “Жоспар халықтың өмір сүру сапасы мен әл-ауқатын арттыруға бағытталған түбегейлі институционалдық және салалық реформалар үшін негіз қалайды”, – делінген ресми хабарламада.
</blockquote>
Құжатта аса маңызды салаларды дамытуға қатысты стратегиялық ұстанымдар, коронавирус дағдарысының салдарын жеңілдету шаралары, сондай-ақ, қазіргі жаһандық үрдістер жағдайында экономиканы орнықты әрі сапалы түрде дамыту саясаты жазылған. Нақты стратегиялық көрсеткіштердің егжей-тегжейлі картасы да бар. Ол ұлттық жоспардың ажырамас бөлігі болып саналады. Ал нақты көрсеткіштерге жету үшін экономиканы әртараптандыру, инвестицияларды тарту, экспортты ілгерілету, жеке кәсіпкерлікті қолдау және кешенді дамыту сияқты нақты шаралар қабылданады.
<blockquote>
 “Денсаулық сақтау мен білім беру қызметтерін жақсартуға, инфрақұрылымды дамытуға, нәтижелі жұмыспен қамтуға және халықтың әлеуметтік әл-ауқатын арттыруға ерекше назар аударылатын болады”, – дейді мамандар.
</blockquote>
Сондай-ақ, мемлекет басшысы қол қойған “Қазақстан Республикасының 2025 жылға дейінгі жалпыұлттық басымдықтары туралы” жарлық бар. Онда үш негізгі басымдық көрсетілген. Соның ішінде азаматтардың әл-ауқаты, институттардың сапасы және күшті экономика құру бағыты бар. Соған жету үшін 10 нақты міндет белгіленіп отыр. Осы бағытта реформалар жасалады. Олар:
<ol>
<li>әділ әлеуметтік саясат;</li>
<li>денсаулық сақтаудың қолжетімді және тиімді жүйесі;</li>
<li>сапалы білім беру;</li>
<li>азаматтардың мүдделерін қорғауға арналған әділ және тиімді мемлекет;</li>
<li>мемлекеттік басқарудың жаңа моделі;</li>
<li>патриотизм құндылықтарын дәріптеу;</li>
<li>ұлттық қауіпсіздікті нығайту;</li>
<li>әртараптандырылған инновациялық экономика құру;</li>
<li>экономикалық және сауда дипломатиясын белсенді дамыту;</li>
<li>теңгерімді аумақтық даму.</li>
</ol>
Ұлттық даму жоспарының және жалпыұлттық басымдықтардың барлық индикаторы бүкіл мемлекеттік аппарат жұмысының өзекті бағыттарын айқындайды. Осы стратегиялық құжаттар қазіргі кезеңнің сын-қатерлерін еңсеруге, сондай-ақ, ортамерзімдік перспективада елдің өмір сүру сапасы мен табысын өсіруге көмектеседі деген жоспар бар.

«Халықтың әл-ауқаты артады»: Қазақстанда ұлттық жоспар бекітілді

<a href="https://kyzylorda-news.kz/">Kyzylorda-news.kz</a>. Қызылорда облыс бойынша мемлекеттік орман қоры жерлері 6509,7 мың гектарды құрайды. Оның ішінде орманды алқаптар 3103,2 мың гектар жерді алып жатыр. Осы орманды алқаптардың 54,7 мың гектары өрт қауіптілігі аса жоғары болып саналады. Бұл туралы Қызылорда орман және жануарлар дүниесін қорғау жөніндегі мемлекеттік мекемесінің директоры Бағдат Абжапбаров мәлімдеді.
<blockquote>
 «Айналамыздың экологиялық дағдарысқа ұшырауына байланысты егеменді еліміздің табиғи байлығы, Орман қорына шаруашылық көзбен қарап, болашақ ұрпақтарымыздың мүдделері үшін оны ұлғайта беру әрбір Қазақстан Республикасы азаматының міндеті. Қазақстан Республикасында барлық ормандар қорғауға және сақталуға жатады. Алайда табиғат байлығына немқұрайлы қарайтын жеке азаматтар мен шаруашылық субекілері тарапынан келтірілген зиян шексіз және жылдан жылға азаймай келеді», – дейді Бағдат Абжапбаров.
</blockquote>
Мекеме басшысының айтуынша, орман өрті қыруар байлықты жалмап қана қоймайды, сонымен бірге мемлекетке көп шығын әкеледі. Қазіргі таңда орын алатын тілсіз жаудың 80%-і адамдардың қатысуымен болады.
<blockquote>
 «Табиғат аясына қыдырып барып, от жағып, оны сөндірмей кетеді. Сондай ақ темекі тұқылын өшірмей тастай салады. Оның соңы алапат өртке айналып, табиғат анаға өлшеусіз зиян келеді», – дейді мекеме директоры.
</blockquote>
Жыл басынан бері өртті болдырмаудың және өрт қаупі бар кезеңдерде өртке қарсы дайындық жұмыстарын жүргізу&nbsp;жайлы түрлі іс-шара ұйымдастырылып келеді.
<blockquote>
 «Қоршаған ортаны қорғау, ауыл шаруашылығы, ішкі істер, өрттен қорғау Төтенше жағдайлар бөлімдерімен келісіліп, қала әкімшілігінде бекітіліп, ауыл округтеріне өрт қаупі ережелерін сақтау жайлы ескерту хаттар дер кезінде тарату арқылы өрт қауіпсіздігін сақтауға болады. Дегенімен бір ғана мекеме өртке қарсы қызметті толыққанды атқара алмасы тағы белгілі. Мекеме тарапынан барлық ауыл округі әкімдерімен, жеке шектеулі серіктестік төрағаларымен өртке қарсы іс-шаралар жүргізіліп, жұмыс кестесі бойынша біріккен жұмыстар қолға алынды», – дейді Бағдат Абжапбаров.
</blockquote>
Айта кетейік, ормандарда өрт қауiпсiздiгi талаптары мен санитариялық қағидаларды бұзғандар заң бойынша жазаланады. Яғни, жеке тұлғаларға – 10, лауазымды адамдарға, шағын кәсiпкерлiк субъектiлерiне – 30, орта кәсiпкерлiк субъектiлерiне – 50, iрi кәсiпкерлiк субъектiлерiне 150 айлық есептік мөлшерінде айыппұл салуға әкеп соғады.

Бағдат Абжапбаров: Ормандағы өрттің 80%-і адамдардың қатысуымен болады

<a href="https://kyzylorda-news.kz/">Kyzylorda-news.kz</a>. 2021 жылдың 1 сәуірінен бастап БЖЗҚ-дан ай сайынғы төлемді есептеуді жүзеге асыру әдістемесі өзгереді, деп хабарлайды <a href="https://www.enpf.kz/kz/about/press-center/news/?ELEMENT_ID=11685">қордың</a> баспасөз қызметі.
БЖЗҚ-дан төленетін ай сайынғы зейнетақы төлемінің мөлшері Қазақстан Республикасы Үкіметінің 2013 жылғы 2 қазандағы № 1042 қаулысының (Зейнетақы төлемдерінің мөлшерін есептеуді жүзеге асыру Әдістемесіне 2-қосымша) ережелеріне сәйкес есептелген зейнетақы төлемдерінің жылдық сомасының он екіден бір бөлігі ретінде айқындалады. Бұл ретте БЖЗҚ-дан ай сайынғы зейнетақы төлемі&nbsp;ең төменгі күнкөріс деңгейінің 70% кем емес&nbsp;мөлшерде жүзеге асырылады. (Бұрын БЖЗҚ-дан ай сайынғы зейнетақы төлемі&nbsp;ең төменгі күнкөріс деңгейінің 54% кем емес мөлшерде&nbsp;жүзеге асырылған болатын).
Зейнетақы төлемдерінің мөлшерін есептеуді жүзеге асыру Әдістемесіне сәйкес&nbsp;2021 жылдың 1 сәуірінен бастап&nbsp;зейнетақы төлемдерін жүзеге асырудың бірінші жылындағы зейнетақы төлемдерінің жылдық сомасы зейнетақы жинақтары сомасының зейнетақы жинақтары төлемдерінің мөлшерлемесіне көбейтіндісі ретінде есептелетін болады – 6,5 %.
Одан кейінгі жылдары ай сайынғы зейнетақы төлемінің мөлшері өткен жылғы ай сайынғы зейнетақы төлемінің мөлшерін зейнетақы төлемдерін индекстеу мөлшерлемесіне&nbsp;жыл сайын арттыру&nbsp;жолымен қайта есептелетін болады – 5%.
Мысал келтірейік:
ЗЖ сомасы = 6 000 0000 теңге
Бірінші жылдағы зейнетақы төлемдерінің жылдық сомасы: 6&nbsp;000&nbsp;000*6,5%=390&nbsp;000 теңге;
Бірінші жылдағы ай сайынғы зейнетақы төлемінің мөлшері: 390&nbsp;000/12 ай =32&nbsp;500 теңге;
Екінші жылға арналған ай сайынғы зейнетақы төлемінің мөлшері: 32&nbsp;500+ 32 500*5%=34&nbsp;125 теңге.
Бұдан басқа, зейнетақы төлемдерінің мөлшерін есептеуді жүзеге асыру Әдістемесінде белгілі бір санаттарға жататын, яғни мерзімсіз уақытқа белгіленген 1 немесе 2-топтағы мүгедектігі бар, сондай-ақ, жинақтары міндетті кәсіптік зейнетақы жарналары есебінен кемінде алпыс ай жинақталатын зиянды және қауіпті өндірістерде жұмыс істеген алушылар үшін&nbsp;түзетілетін арттыру коэффициенттері&nbsp;көзделген. Бұл ретте, жоғарыда көрсетілген шарттардың біреуін ғана емес, одан да көбін қанағаттандыратын тұлғалар үшін ең үлкен мәнге ие түзету коэффициенті қолданылады.
Айта кету керек, зейнетақы төлемдерінің мөлшерін есептеуді жүзеге асырудың аталған Әдістемесі&nbsp;2021 жылдың 1 сәуірінен бастап&nbsp;туындаған қатынастарға қолданылады.
БЖЗҚ-дан зейнетақы төлемдерін алу құқығын 2018 жылғы 1 қаңтарға дейін іске асырған адамдарға зейнетақы төлемінің жыл сайынғы мөлшері ең төмен зейнетақының отыз еселенген мөлшерінен кем болмайды (2021 жылы 30 х 43 272= 1 298 160 теңге). Төлемдер бұрын таңдалған кесте бойынша жүзеге асырылады.
Зейнетақы төлемдерінің мөлшерін есептеуді жүзеге асырудың жаңа Әдістемесіне сәйкес, БЖЗҚ-дан зейнетақы төлемдерін алу құқығын&nbsp;2018 жылғы 1 қаңтардан бастап 2021 жылғы 31 наурызға (қоса алғанда) дейін&nbsp;іске асырған адамдарға&nbsp;2022 жылғы 1 қаңтардан бастап&nbsp;ай сайынғы зейнетақы төлемдері 5% мөлшеріндегі зейнетақы төлемдерін индекстеу мөлшерлемесіне ұлғайтылатын болады, ол кейіннен жыл сайын индекстеліп отырады.
Осылайша зейнетақы төлемдерінің мөлшерін есептеуді жүзеге асырудың жаңа Әдістемесі алушылардың еңбек жағдайлары мен денсаулығының ерекшеліктерін ескереді, сондай-ақ, БЖЗҚ-дан берілетін жыл сайынғы төлемдер мөлшерін ұлғайтуға ықпал ететін болады.
Еске сала кетейік, БЖЗҚ-дан зейнетақы төлемдері жеке зейнетақы шотындағы зейнетақы жинақтары таусылғанға дейін жүзеге асырылады.

Зейнетақы төлемін есептеудің тәртібі өзгереді

<a href="https://kyzylorda-news.kz/">Kyzylorda-news.kz</a>. Қызылорда облысының Сыбайлас жемқорлыққа қарсы қызметі 2020-2021 жылдары жүйелік негізде COVID – 19 ПЦР сынамаларын теріс нәтижелері бар сертификаттарды жүйелі түрде тексерістен өткізбей сатумен айналысқан екі медициналық мекеменің қызметкерлерін анықтап, оларға қатысты қылмыстық істі тергеуде. Бұл туралы Қазақстан Республикасының Сыбайлас жемқорлыққа қарсы іс-қимыл агенттігінің Қызылорда облысы бойынша департамент басшысының орынбасары Сұлтан Пирметов айтты.
ПЦР сынағының сертификаттары вахталық әдіспен жұмыс істейтін жұмысшылар, шетелге саяхаттайтын адамдар, Байқоңыр қаласына кіретін тұрғындар үшін және т.б мақсатта пайдалануға арналған.
Сонымен бірге, медицина қызметкерлері 1 анықтама үшін 7 мың теңге көлемінде заңсыз сыйақы алу арқылы облыстық Ұлттық сараптама орталығының қызметкерлеріне пара беруге итермеленген&nbsp; деген дерек те бар.
<blockquote>
 «Ағымдығы жылдың басынан бастап Қызылорда облысының тұрғындарының ПЦР тестінен өткендігі туралы 60 жалған куәлік анықталды. Осылайша, медицина қызметкерлерінің қылмыстық іс-әрекеттерінің нәтижесінде облыс азаматтарының шексіз саны тәуекелге ұшырады. Жедел іздестіру кезінде ПЦР COVID – 19 сынамаларының жалған сертификаттары жасалған компьютерлік жабдық пен мөр тәркіленді», – дейді Сұлтан Пирметов.
</blockquote>
Арнайы мониторингтік топ өкілдері мен “Ақмешіт-Адалдық алаңы” жобалық кеңсесінің менеджерлері жыл басынан дәріханалардағы дәрілік препараттардың бағасының негізсіз көтерілуін болдырмау мақсатында 80 дәріханаларға, «СК-Фармация» мекемесінің облыстық қоймасы мен өңірлік емдеу мекемелеріндегі дәрі-дәрмек қорына мониторинг жұмыстарын жүргізген.
Мониторинг барысында азаматтарды ақпараттандыру мақсатында дәріханаларда сыбайлас жемқорлықтың алдын алуға бағытталған көрнекі құралдарды және дәрілік препараттардың шекті бағалары жайлы ақпараттар мен QR- коды бар парақшаларды ақпарат тақталарына орналастырылған. &nbsp;
Емдеу мекемелеріне гуманитарлық көмек ретінде шет елдерден келген емдеу препараттары, медициналық қорғау жабдықтары, ИВЛ-аппаратары және т.б мақсатты таратылып, емдеу мекемелеріне толық жетуіне қоғам өкілдерімен бақылау жүргізілуде.
<img src="https://kyzylorda-news.kz/wp-content/uploads/2021/03/157307050_438165944186006_6185844280271567368_o.jpg" alt="" />
Қазақстан Республикасының Сыбайлас жемқорлыққа қарсы іс-қимыл агенттігінің Қызылорда облысы бойынша департамент басшысының орынбасары Сұлтан Пирметов

Қызылордада ПЦР тестінің анықтамасын сатқандар ұсталды

*<a href="https://kyzylorda-news.kz/">Kyzylorda-news.kz</a>. Бүгін Сырдария ауданының әкімі Талғат Дүйсебаев аудандық ауруханада коронавирус инфекциясына қарсы ресейлік «Спутник V» вакцинасын салдырды. Екпе аудан басшысының ағзасына теріс әсер берген жоқ.*
Қауіпті індетке қарсы вакцина салдыру ауданда бүгіннен басталды. Қазіргі таңда ауданға ресейлік I, II типтік вакцинасының 100 дозасы жеткізілді. Ал қалған бөлігі кезең-кезеңімен толықтырылады.
Екпе егу жұмыстарын жүргізу үшін аудандық ауруханада санитарлық-эпидемиологиялық талаптарға сай егу бөлмелері әзірленген. Вакциналау жұмыстарына аудан бойынша 6 дәрігер, 4 мейірбике тартылып отыр.
<blockquote>
 «Қазір ауданда жағдай қалыпты болғанымен қауіпті індет түбегейлі жойылуы қажет. Сондықтан адам ағзасы жұқпалы кеселге қарсы тұру үшін екпе салдырған жөн. Бүгін ауданда вакциналау басталып, арнайы екпе салдырдым. Дәрігерлер ине салған орынды су тигізбей, жылы ұстауға кеңес берді. Баршаңызды екпе салдыруға шақырамын», – деді аудан әкімі Талғат Дүйсебаев.
</blockquote>
Сондай-ақ бүгін қауіпті инфекцияға қарсы аудан әкімінің орынбасары Димаш Байдушев, аудан әкімі аппаратының басшысы Талант Ерманов және аудандық санитариялық-эпидемиологиялық бақылау басқармасының қызметкерлері екпе салдырды.
Ауданда вакциналау жұмыстары алғашқы кезеңде медицина саласының қызметкерлеріне, оның ішінде қабылдау, жұқпалы аурулар бөлімінің, жансақтау және хирургиялық бөлім қызметкерлеріне жүргізілмек. ІІ кезеңде мұғалімдерге және жұқтыру қаупі неғұрлым жоғары болып саналатын жұмыс орындарының қызметкерлеріне салынатын болады.
Айта кетейік, еліміз бойынша биылғы жылдың 1 ақпанынан бастап ерікті түрде коронавирусқа қарсы вакциналау жұмыстары басталған болатын.

Сырдария ауданының әкімі «Спутник V» вакцинасын салдырды

<a href="https://kyzylorda-news.kz/">Kyzylorda-news.kz</a>. 1 наурыздан бастап ҚР Президентінің жанындағы Мемлекеттік басқару академиясында магистратура және докторантураға құжаттарды қабылдау басталды. Қабылдау 5 маусымға дейін жалғасады. Мұнда 2 жылдан әрі еңбек өтілі бар барлық мемлекеттік қызметшілер магистратураның жеті, докторантураның екі білім беру бағдарламаласының бірі бойынша грантқа түсе алады.
<blockquote>
 «Қазіргі таңда академияда мемлекеттік қызметшілердің біліктілігін арттыруда көптеген жұмыстар атқарылып жатыр. Оқуға түсуіне бар жағдай жасалған. Бұл олардың қоғамдағы рөлін және үлесін арттыруға үлкен мүмкіндік береді. Мәселен, өткен жылы біздің филиалдан 1680 тыңдаушы оқудан өтті. Оның ішінде 1039-ы мемлекеттік қызметшілер, қалған 641-і азаматтық қызметшілер», – деді ҚР Президентінің жанындағы Мемлекеттік басқару академиясының Қызылорда облысы бойынша филиалының директоры Мұрат Әйтімов.
</blockquote>
Басшы бұдан бөлек, биыл филиалды дамыту мақсатында өзгермелі әлемдік трендтерге сәйкес еліміздің мемлекеттік қызметін кәсібилендіру, мемлекеттік ұйымдарда, квазимемлекеттік секторда жобалық басқару стандартын дамыту, құзыреттілікті бағалау орталығын құру секілді бірқатар жұмыстар жоспарланып отырғанын тілге тиек етті.
<blockquote>
 «Біз биыл мемлекеттік қызметшілердің оң имиджін қалыптастыру бағытында ауқымды шараларды қолға алдық. Мәселен, мемлекет басшысының «Халық үніне құлақ асатын мемлекет» қағидатына сәйкес, ақпан айынан бастап, тұрақты түрде мемлекеттік қызмет көрсетуші мекеме басшыларының ХҚКО-да тұрғындарға жеке қабылдаулар жұмыстары жүргізілуде. Сонымен қатар, Қорқыт ата атындағы университетімен меморандумға отырып, «Абырой» жас мемлекеттік қызметшілер мектебі ашылды. Әрі аталмыш университет базасында алдағы жаңа оқу жылынан бастап, «Адам ресурстарын басқару» мамандығы енгізіліп, HR-мамандарын дайындау қолға алынатын болады», – деді ҚР Мемлекеттік қызмет істері агенттігінің Қызылорда облысы бойынша департаменті басшысының міндетін атқарушы Берікбол Байхожаев.
</blockquote>
Айта кетейік, бұрын бос лауазымдар конкурсына қатысу үшін қызметкерлер 9 құжат тапсыратын болса, қазір 3 құжатқа төмендеген. Оған қызметшінің төлқұжат, қызметтік тізімі, бос тұрған лауазым қатысу туралы өтінішіңіз болса жеткілікті.

Академияға құжат қабылдау басталды

<a href="https://kyzylorda-news.kz/">Kyzylorda-news.kz</a>. Қазақстанда Тәуелсіздіктің 30 жылдығы құрметіне мерекелік медаль пайда болады. Ақпарат және қоғамдық даму министрлігі мерекелік медаль туралы президент жарлығының жобасын дайындады, деп хабарлады <a href="https://sputnik.kz/culture/20210309/16487428/Tauelsizdik-medal.html">Sputnik Қазақстан.</a>
<blockquote>
 “Мерекелік медальмен Қазақстан Республикасы мемлекеттілігінің қалыптасуына, егемендігінің нығаюы мен әлеуметтік-экономикалық дамуына елеулі үлес қосқан Қазақстан азаматтары және шетел азаматтары наградталады”, – делінген құжатта.
</blockquote>
Мерекелік медальді Қазақстан президенті тапсырады. Наградталған адамға медальмен қоса белгіленген үлгідегі куәлік табыс етіледі.
Медаль салтанатты түрде марапатталатын адамның жеке өзіне тапсырылады.
Мерекелік медаль сол жақ омырауға тағылады. Қазақстан Республикасының мемлекеттік наградалары болған жағдайда олардан кейін орналасады.
<h3 id="">Медальда не бейнеленген</h3>
“Қазақстан Республикасының Тәуелсіздігіне 30 жыл” мерекелік медалі дұрыс шеңбер формасында болады, диаметрі – 34 мм.
Бет жағында (аверсінде) “ҚАЗАҚСТАН ТӘУЕЛСІЗДІГІНЕ 30 ЖЫЛ” деген жазу орналасқан. Төменгі бөлігінде ұлттық ою-өрнек бейнеленген.
Мерекелік медальдің сыртқы бетінің (реверсінде) ортаңғы бөлігінде төрт жолмен орындалған “ҚАЗАҚСТАН РЕСПУБЛИКАСЫНЫҢ ТӘУЕЛСІЗДІГІНЕ 30 ЖЫЛ” деген жазу бейнеленген. Жазудың төменгі және жоғарғы жағында ұлттық ою-өрнек элементтері орналасқан.
Медальдағы бейнелер мен жазулардың бәрi де бедерлi, алтын түстес. Аверс пен реверс беті күңгірт.
Мерекелік медаль сары түсті металдан (жезден) дайындалады.

&#8220;Қазақстан Тәуелсіздігіне 30 жыл&#8221; медалімен кімдер марапатталады?

<a href="https://kyzylorda-news.kz/">Kyzylorda-news.kz</a>. Қармақшы ауданында «Самара-Шымкент» тасжолының бойында Қызылорда облысы Полиция департаментінің патрульдік полиция қызметкерлерімен «ВАЗ-2115» үлгісіндегі автокөлігі тоқтатылды.&nbsp;
Полиция қызметкерлерінің тоқтатуы барысында жүргізуші автокөліктің алдыңғы терезесінен жолаушы жағынан полиэтилен пакетін лақтырып жібереді. Жедел-тергеу тобымен жүргізілген қарап-тексеру барысында пакет ішінен есірткі затына ұқсас жасыл түсті ерекше иісі бар зат анықталды.
Сараптама қорытындысымен&nbsp; алынған ерекше иісі бар заттар салмағы 464,84 гр «кептірілген марихуана» екендігі анықталған.
Күдікті жүргізуші Қызылорда қаласының 40 жастағы тұрғыны болып шықты.
Қазақстан Республикасы Қылмыстық кодексінің 296-бабының 2-бөлігімен &nbsp;(Есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау) сотқа дейінгі тергеп-тексеру амалдары жүргізілуде. Оқиғаның мән-жайы анықталуда.

Қармақшыда есірткі затын тасымалдаған күдікті ұсталды

<a href="https://kyzylorda-news.kz/">Kyzylorda-news.kz</a>. Тәуелсіздіктің 30 жылдығына орай Қызылорда облыстық Қазақстан халқы ассамблеясы жанындағы Аналар кеңесінің ұйымдастырумен «Әке – өмір тірегі» фотожобасы қорытындыланды.
Бір айға созылған жобаға қатысуға қызығушылық танытқандар қатары көп болды. Отбасылық құндылық, әкенің қоғамдағы рөлін арттыру мақсатындағы жоба қорытынды кешінің алғы сөзі «Қоғамдық келісім» КММ директоры Бауыржан Мастековке берілді.
Фотожобаға облыстың барлық аудандары мен қаланың әртүрлі саласында жұмыс жасайтын әкелер атсалысты.
Бірінші орын Қазалы ауданының тұрғыны Қанат Нұрлан мен Жалағаш ауданының тумасы Нұрболат Ахановқа бұйырды. Сондай-ақ, жобаға қолдау білдірген облыстық іскер әйелдер қауымдастығының төрайымы Манат Алмашева 5 әкені арнайы номинациялармен марапаттады.

Қызылордада «Әке &#8211; өмір тірегі» фотожобасы қорытындыланды

<a href="https://kyzylorda-news.kz/">Kyzylorda-news.kz</a>. Елімізде орта мектептерде «қазақ күресі», «тоғызқұмалақ», «асық ату» бойынша міндетті сабақ өткізу әдістемесі әзірлеп жатыр. Бұл жайында Мәжіліс депутаттарының сауалына орай ҚР Премьер-Министрі Асқар Маминнің жауабында айтылған, деп хабарлайды <a href="https://www.inform.kz/kz/mektepterde-kazak-kuresi-men-togyzkumalak-mindetti-sabak-retinde-otkizilmek_a3761886">ҚазАқпарат</a>.
<blockquote>
 «Бүгінде спорт секциялармен шамамен 1,4 млн бала немесе мектеп жасындағы балалардың жалпы санының (3,5 млн) 40 пайызы, оның ішінде 422 мыңнан бастам бала мектептен тыс ұйымдарда қамтылған. Бұқаралық спортты дамыту аясында спорт инфрақұрылымын, оның ішінде ауылды жерлерде дамытуға баса назар аударылып отыр. Мәселен, 2023 жылға дейін шамамен 159 ауыл мектебін спорт залмен қамтамасыз ету жоспарланған», – деді Асқар Мамин.
</blockquote>
Үкімет басшысының атап өтуінше, Білім және ғылым министрлігі дене шынықтыру мұғалімдерінің біліктілігін арттыру жұмысын жолға қойған. Өткен жылы 447 дене шынықтыру мұғалімі біліктілік арттыру курсынан өтті. Ал биыл 2 мыңнан астам педагогты қайта даярлау көзделіп отыр. Сонымен қатар 2021 жылдың қаңтарынан сабақтан тыс спорт үйірмелерін өткізгені үшін дене шынықтыру мұғалімдеріне базалық лауазымдық жалақының 100 пайызы мөлшерінде үстемеақы төлеу енгізілді. Үстемеақы дене шынықтыру мұғалімдерін білім беру ұйымдарында секциялар ашуға ынталандыратын болады.
<blockquote>
 «Балалардың денсаулығы мен тәлім-тәрбиесіне ұлттық спорт түрлерінен сабақ өткізу де оң әсерін тигізбек. Қазіргі уақытта Мәдениет және спорт министрлігі мен Білім және ғылым министрлігі «қазақ күресі», «тоғызқұмалақ», «асық атуды» алдағы уақытта дене шынықтыру бойынша мектеп бағдарламасына қосу және міндетті сабақ ретінде өтізу үшін әдістеме әзірлеп жатыр», – деді Премьер-Министр.
</blockquote>

Мектептерде қазақ күресі мен тоғызқұмалақ міндетті сабақ ретінде өткізілмек

<a href="https://kyzylorda-news.kz/">Kyzylorda-news.kz</a>. 2021 жылдың 1 мамырынан балалар спорт секцияларын жан басына қаржыландыру енгізіледі. Бұл жайында Мәжіліс депутаттарының сауалына орай ҚР Премьер-Министрі Асқар Маминнің жауабында айтылған, деп хабарлайды <a href="https://www.inform.kz/kz">ҚазАқпарат</a>.
<blockquote>
 «Спортпен айналысу қолжетімділігін қамтамасыз ету үшін осы жылдың 1 мамырынан балалар спорт секцияларын жан басына қаржыландыруды көздейтін мемлекеттік спорттық тапсырыс енгізіледі. Жаңа әдіс спорт секциялары тапшылығы проблемасын шешуге және жеке секторды тарту есебінен көрсетілетін қызметтер сапасын арттыруға мүмкіндік береді. Мемлекеттік спорттық тапсырыс 4 жастан бастап 17 жасқа дейінгі барлық балаға, оның ішінде ерекше қажеттілігі бар балаларға таралады», – деді Үкімет басшысы.
</blockquote>
Оның атап өтуінше, мемлекет спорт секцияларына барумен байланысты шығындардың басым бөлігін өз мойнына алады. Ал ата-аналар қызмет көрсетушіні таңдау және оның қызметіне баға беру құқығына ие болады. Шығындар баланың тұрғылықты жерін, спорт түрін, қызмет көрсету әдісін және өзге де бірқатар факторды есере отырып бекітілген тарифпен төленеді.
<blockquote>
 «Мемлекеттік спорт тапсырысының операторы қызметі жергілікті атқарушы органдарға жүктелген. Әкімдіктер мемлекеттік спорттық тапсырыс орналастырып, қызмет көрсетушіні іріктеу, кезек қалыптастыру, қызметке төлем жасау және қаражаттың мақсатты түрде жаратылуына бақылау жасау жұмыстарын үйлестіреді. Жемқорлық тәуекелдерді төмендету үшін мемлекет, қызмет көрсетуші және ата-ана арасындағы өзара қарым-қатынас электронды форматта қалыптастырылады», – деді ол.
</blockquote>
Премьер-Министрдің айтуынша, барлық қызмет көрсетушілер біліктілік іріктеуінен өтеді.
<blockquote>
 «Іріктеудің басты критерийлерінің бірі – кәсіби спорттық нұсқаушының болуы. Қаржыландыру жергілікті бюджеттен жүзеге асырылады. Биыл бұқаралық спортты, оның ішінде балалар секциясын қолдау үшін кәсіби спорт клубтарына арналған шығыстарды қысқарту нәтижесінде үнемделген 16 млрд теңгені қосымша бағыттау жоспарланған», – деді Асқар Мамин.
</blockquote>

1 мамырдан балалар спорт секцияларын жан басына қаржыландыру енгізіледі

<a href="https://kyzylorda-news.kz/">Kyzylorda-news.kz</a>. Сыр өңіріне 35 жылдан бері келін болған өзге ұлт өкілі қазақ аналарының ақ жолын ардақтап келеді, деп хабарлайды <a href="https://24.kz/kz/zha-aly-tar/o-am/item/460037-aza-d-st-rin-d-riptegen-orys-kelin">«Хабар 24»</a>.
Екі баласымен ерте жесір қалған ол қара шаңырақты шайқалтпай, отбасы дәстүрлерін берік ұстап қалған. Ұлттық құндылықтарды ұлықтап жүрген Марина Тебенькованың шаңырағындағы тұсау кесу рәсімі өтті.
Марина Тебенькова қазақ дәстүріне сай жетінші немересінің тұсауын кесті. Үлкендердің батасын алып, өздері өнеге тұтқан жанға ұқсасын деген ниетпен рәсімін жасады. Қаз басқан балақайды ұлттық нақышта киіндіріп, тағылымды тәрбиенің үлгісін дәріптей түсті. Осыдан 35 жыл бұрын Сыр еліне келін болып түскеннен бері қазақ аналарының парасаттылық болмысын терең ұғына бастадым дейді ол.
<blockquote>
 «Өзімнің анам ерте қайтыс болған соң туған анам сияқты болып кетті. Басқа ұлт болғанмен, «сен орыссың» деген жоқ. Сонымен қазақ сияқты тәрбиеледі. Енем не істесе, қасында жүріп соны үйрендім. Қазақшаны кішкентай қайын інім үйретті», – дейді Жалағаш ауданының тұрғыны Марина Тебенькова.
</blockquote>
Отасқандарына 10 жылдан аса бергенде Маринаның жары өмірден өтіпті. Бірақ орыс келін шаңырақтың туын жықпай, Жалағаштағы жақын-жуықтарының ортасында екі баласын үйлі етіп, немере сүйіп отыр. Барлық ұлттық рәсімдердің жоралғысын жасап, енесі көрсеткен тәлім-тәрбие ізімен ізеттілік жолынан айныған емес деп мақтан тұтты әулет үлкендері.
<blockquote>
 «Қазақтың барлық кәдесін біледі. Құранын оқытады ата-енесіне. Жұмыс істейді. Ауылда ел-халықтың қуанышына да барады. Ағайын-жекжатқа, көршілерге де сыйлы», – дейді М.Тебенькованың қайын апасы Бекзада Жүсіпәлиева.
</blockquote>
Көктемнің шуақты күнімен қатар келген отбасы қуанышы ағыл-тегіл ақ дастарханмен көмкерілетіні рас. Бауырсағын пісіріп, қымызын сапырып, етін ұсынған Марина қазақ аналарына тән бар асылды бойына жия білген жан.

Қазақстан және Қызылорда облысының жаңалықтары

«Халықтың әл-ауқаты артады»: Қазақстанда ұлттық жоспар бекітілді

Бағдат Абжапбаров: Ормандағы өрттің 80%-і адамдардың қатысуымен болады

Зейнетақы төлемін есептеудің тәртібі өзгереді

Қызылордада ПЦР тестінің анықтамасын сатқандар ұсталды

Сырдария ауданының әкімі «Спутник V» вакцинасын салдырды

Академияға құжат қабылдау басталды

“Қазақстан Тәуелсіздігіне 30 жыл” медалімен кімдер марапатталады?

Қармақшыда есірткі затын тасымалдаған күдікті ұсталды

Қызылордада «Әке – өмір тірегі» фотожобасы қорытындыланды

Мектептерде қазақ күресі мен тоғызқұмалақ міндетті сабақ ретінде өткізілмек

1 мамырдан балалар спорт секцияларын жан басына қаржыландыру енгізіледі

Қазақ дәстүрін дәріптеген орыс келін

Қазақстан және Қызылорда облысының жаңалықтары

«Халықтың әл-ауқаты артады»: Қазақстанда ұлттық жоспар бекітілді

Бағдат Абжапбаров: Ормандағы өрттің 80%-і адамдардың қатысуымен болады

Зейнетақы төлемін есептеудің тәртібі өзгереді

Қызылордада ПЦР тестінің анықтамасын сатқандар ұсталды

Сырдария ауданының әкімі «Спутник V» вакцинасын салдырды

Академияға құжат қабылдау басталды

&#8220;Қазақстан Тәуелсіздігіне 30 жыл&#8221; медалімен кімдер марапатталады?

Қармақшыда есірткі затын тасымалдаған күдікті ұсталды

Қызылордада «Әке &#8211; өмір тірегі» фотожобасы қорытындыланды

Мектептерде қазақ күресі мен тоғызқұмалақ міндетті сабақ ретінде өткізілмек

1 мамырдан балалар спорт секцияларын жан басына қаржыландыру енгізіледі

Қазақ дәстүрін дәріптеген орыс келін

“Қазақстан Тәуелсіздігіне 30 жыл” медалімен кімдер марапатталады?

Қызылордада «Әке – өмір тірегі» фотожобасы қорытындыланды