<a href="https://kyzylorda-news.kz/">Kyzylorda-news.kz</a>.&nbsp; Қазақстанда өткен тәулікте 1264 адамда коронавирус індеті ПТР-талдау арқылы расталды.
Өңірлер&nbsp;бойынша:
Алматы қаласында – 28991 (+366),
Нұр-Сұлтан қаласында – 27528 (+285),
Шығыс Қазақстан облысында – 22551 (+28),
Павлодар облысында – 18688 (+47),
Атырау облысында – 17881 (+36),
Қарағанды облысында – 16586 (+98),
Ақмола облысында – 14743 (+50),
Батыс Қазақстан облысында – 14078 (+81),
Қостанай облысында – 13300 (+44),
Солтүстік Қазақстан облысында – 12840 (+35),
Алматы облысында – 12078 (+91),
Шымкент қаласында -6476 (+36),
Жамбыл облысында – 6210 (+18),
Ақтөбе облысында – 4614 (+26),
Түркістан облысында – 4398 (+13),
Маңғыстау облысында – 4325 (+6),
Қызылорда облысында – 3930 (+4).
Жалпы пандемия басталғалы елде коронавирусқа шалдыққандар саны – 229217.

Коронавирус: Өткен тәуліктегі мәліметтер жарияланды

<a href="https://kyzylorda-news.kz/">Kyzylorda-news.kz</a>. Жұма күні елімізде жауын жауып, жел күшейеді, тұман түсіп, көктайғақ болуы ықтимал, деп хабарайды Қазгидромет.
19 наурызда Қара теңіз аймағынан келетін циклон республиканың барлық аймақтарына әсер етеді, онымен бірге жауын-шашын, кей жерлерде нөсер жаңбыр және қалың қар жауады, жел күшейіп, найзағай ойнайды, солтүстік-батыста жаяу бұрқасын соғуы мүмкін. Тек еліміздің оңтүстік-шығысында және солтүстігінде жауын-шашынсыз ауа райы күтіледі. Республиканың кей жерлерінде тұман түсіп, көктайғақ болуы ықтимал.
Қызылорда облыстарының кей жерлерінде тұман түсіп, жел күшейеді, жылдамдығы 15-20 м/с, екпіні 23-28 м/с жетеді.

Жұма күніне арналған ауа райы болжамы

<a href="https://kyzylorda-news.kz/">Kyzylorda-news.kz</a>. Қызылорда облысындағы дарынды ауыл балалары «Мың бала» ұлттық олимпиадасына қатысады. Қазірдің өзінде өңірде 3000-нан аса адам тіркеліп үлгерді.
Олимпиада жеңімпаздары еліміздің үздік мектептерінде білім алуға, сондай-ақ қашықтан академиялық қолдауға ие болады.Олимпиада тегін өткізіледі. Мұндағы басты ереже – үміткерлер соңғы екі оқу жылында ауыл мектептерінде білім алуы тиіс. Сондай-ақ, биыл олимпиадаға 2020 жылы қатысқан ауыл мектептерінің 6-сынып оқушыларына да қатысуға рұқсат етіледі.
<blockquote>
 «Өткен жылы олимпиадаға 5 және 6-сынып оқушыларынан І кезең қорытындысы бойынша 301 бала іріктеліп алынды. ІІ кезең қорытындысымен 5 сыныптан 38-бала, 6 сыныптан-37 бала, барлығы 75 оқушы жеңімпаз атанды. Бүгінгі таңда 23 оқушы дарынды балаларға арналған мамандандырылған мектептерде оқуын сәтті жалғастыруда. Биыл біз қатысушылардың саны еліміз бойынша 15500 дейін өседі деп болжап отырмыз. Жалпы біздің өңірде ауыл оқушыларының олимпиадаға қатысу үшін қажетті жағдайдың бәрі жасалған», – деді облыстық білім басқармасы басшысының орынбасары Бағдат Бердаулетов.
</blockquote>
Жоба порталындағы тіркеу нысаны Білім министрлігінің талдау орталығымен бірлесіп жұмыс істейді. Егер өтінішті қалалық жерден келген оқушы берсе, оған автоматты түрде бас тарту туралы смс хабарлама келеді. Жалпы, олимпиаданы өткізу кезінде оқушылардың танымдық және академиялық дағдылары онлайн және офлайн режимінде компьютерлік тестілеу арқылы бағаланады. Тест сұрақтарын мамандандырылған жұмыс тобы халықаралық стандартқа сәйкес әзірледі.
<blockquote>
 «Олимпиадаға қатысу үшін оқушы 24 ақпаннан – 24 наурызға дейін арнайы сайтқа тіркелуі тиіс. Олимпиада 2 кезең бойынша өтеді. Бірінші кезең логикалық және кеңістіктік ойлау секілді екі бөлімнен тұрады. Тестілеу Елбасы Академиясының платформасында онлайн форматта өткізіледі», – деді облыстық «Дарын» ғылыми-практикалық орталығының директоры Гүлжахан Ізбасарова.
</blockquote>
Өңірлер бойынша ең жоғары қорытынды балл жинаған 5 мың оқушы олимпиаданың екінші кезеңіне өтеді.

Ауыл балалары «Мың бала» Ұлттық олимпиадасына қатысады

<a href="https://kyzylorda-news.kz/">Kyzylorda-news.kz</a>. Мемлекеттік басқару саласында біраз өзгеріс болады. Тұжырымдама жасалып, кадр сапасын арттыру және аппартты кәсібилендіру үшін 14 жоба жасалды. Мемлекеттік қызметшіге қойылатын талап та күшейді. Кандидаттарды іріктеу ережесі жетілдіріледі.
Мемлекеттік қызмет істері агенттігі дарынды, білімді жастарды тәрбиелеу жүйесін жасамақ. Яғни жаңа заман көшбасшылары халықпен тығыз жұмыс жасауды үйренеді. Әдеп кодексін жаңғыртып, маман&nbsp; сапасын арттыру жоспары бар. Тұжырымдама аясында мемлекеттік қызметті автоматтандыру, электронды қызмет түрін дамыту жұмыстары жалғасады. Сондай-ақ мемлекеттік қызметшілердің әлеуметтік пакеті қайта қаралады.
<blockquote>
 «Мемлекеттік басқарудың жаңа құндылықтарын енгізу қажет. Бұл құндылықтар инновацияларға ашықтық. Жеке жауапкершілік, өкілеттілікті табыстау, азаматтар мен бизнестің қажеттілігін қанағаттандыруға бағытталған. Тиімділік пен нәтижеге бағдарлану, бизнес процесті оңтайлану, бюрократияны жою жөніндегі жолдарды іздестіру. Азаматтық қоғам мен сарапшылық қоғамды процестерге белсенді тарту», – дейді ҚР Мемлекеттік қызмет істері агенттігі төрағасының орынбасары Дархан Жазықбаев.
</blockquote>

Мемқызметшілердің әдеп кодексі жаңартылады

<a href="https://kyzylorda-news.kz/">Kyzylorda-news.kz</a>. Қызылорда қаласындағы көшелердің біріне Қазақ радиосының аты берілді.
Қызылорда облыстық мәслихат шешімі жақын күндері Әділет басқармасынан тіркеуден өтіп, қаладағы бұрынғы «Саяхат-11» көшесі «Қазақ радиосы» көшесі болып қайта аталады.
Қызылорда қаласындағы Қазақ радиосы көшесінің ұзындығы – 400 метр. Радио еліміздің сол кездегі астанасы Ақмешіттен 1925 жылдары әуе толқынына шыққан.

Қызылорда көшесіне Қазақ радиосының аты берілді

<a href="https://kyzylorda-news.kz/">Kyzylorda-news.kz</a>.&nbsp;Бүгін жергілікті уақытпен сағат 13-05 шамасында Шиелі кентіндегі «Сүйіндік» көлінде ата-анасының қарауынсыз қалған 2015 жылы туған қыз бала мен 2013 жылы туған ұл бала мұз&nbsp;астына түсіп кеткен.
Оқиға орнына Шиелі ауданы Төтенше жағдайлар бөлімінің аға инженері Ә.Нұрмантаев пен инженер Н.Мұсахан барған кезде балалардың көл маңында ойнап жүріп, көлге батып кеткені анықталды.
Жергілікті уақытпен сағат 12-55 кезінде ауыл тұрғындарының күшімен мәйіттер судан шығарылған. «Сүйіндік» көліндегі&nbsp; олардың түскен жерінде ені 5 метр, тереңдігі шамамен 1,5 метр, беті 3-4 см мұз қатқан.
Оқыс оқиғаға байланысты, Қызылорда облысы Төтенше жағдайлар департаменті облыс тұрғындарына ескертеді:
Балаларды бір минутке де қараусыз қалдырмаңыздар, мұзда сақ болыңыздар, қауіпсіздік ережелерін естен шығармаңыздар. Қазіргі карнатин кезінде балалардың үйде болуына байланысты олардың қауіпсіздігіне көп көңіл бөлу қажет.
Балаларға мұзда, өзен-көлдерде, арық пен каналдарда ойнауға болмайтынын түсіндіріңіз. &nbsp;18 жасқа толмаған балаларға үйден өз бетімен, ересек адамдарсыз шығуға болмайтынын да ескертіңіз.
Оған қоса отпен ойнамауға да &nbsp;кеңес беріп, өрт қауіпсіздігі ережелері туралы әңгімелеп беріңіз. Сіріңке баланың қолы жете бермейтін орындарда сақталғаны дұрыс. Мейілінше электр құралдары токтан ажыратылып, газ плитасының сөніп ұрғанын ұдайы қадағалаңыз. Бұдан басқа үйдегі терезелердің жабық тұрғанын қадағалаған маңызды.
Әрбір адам өз баласының қауіпсіздігі үшін жауап беретінін түсінуге тиіс. Барлық ата-ана және бала қауіпсіздік ережелерімен танысуы шарт. Ең бастысы, балаларды қараусыз қалдырмаңыз.

Шиеліде екі бала көлге батып кетті

<a href="https://kyzylorda-news.kz/">Kyzylorda-news.kz</a>.&nbsp; Талдықорған қаласында индорхоккейден ерлер мен әйелдер арасында өткен Қазақстан Республикасының чемпионатында қызылордалық “Қайсар” командасы табысты өнер көрсетті.
Дүбірлі бəсекеде әйелдер командасы 41 ұпаймен көш бастаса ерлер құрамасы 31 ұпаймен екінші орынды иеленді.
Әйелдер құрамасында ойнаған Ақнұр Нұрлыбекқызы мен Қарақат Төлепбергеновалар бұл жеңісі арқылы индорхоккейден Қазақстан Республикасының спорт шебері атағына қол жеткізді.
<blockquote>
 «Команда алдындағы мақсат орындалғаны үшін қуаныштымыз. Әйелдер құрамасы чемпион атанса, ерлер командасы күміс жүлдені иеленді. Спортшылар 15-24 сәуір аралығында Талдықорғанда көгалдағы хоккейден өтетін ел чемпионатының бірінші және екінші турларына қатысады. Биылғы жылдың күзінде Бельгияда индорхоккейден өтетін Әлем чемпионатына ерлер арасында Нұрхан Сансызбаев, Бақытбек Сәрсенбайұлы, Шыңғыс Сейітқалиев, ал әйелдер арасында Әйгерім Маханова, Малика Сражадинова, Гузаль Бахавадин, Қарлығаш Болғанбаева мен Алиса Чепкасовалар Қазақстан құрама командасы сапында сайысқа түседі. 
 Мақсатымыз – бірінші орынды алу », – деді көгалдағы хоккейден және индорхоккейден ҚР еңбек сіңірген жаттықтырушысы Сұлтанбек Қобландин.
</blockquote>
<img src="https://kyzylorda-news.kz/wp-content/uploads/2021/03/162284779_5921039344588903_3247954903576561344_n.jpg" alt="" />
<img src="https://kyzylorda-news.kz/wp-content/uploads/2021/03/162138179_5921040264588811_748431247273214926_n.jpg" alt="" />

Индорхоккейден қызылордалық команда Қазақстан жеңімпазы атанды

<a href="https://kyzylorda-news.kz/">Kyzylorda-news.kz</a>.&nbsp;Бүгінде Қызылорда облысында цифрландыру бағытында «Өңірлік геоақпараттық жүйесі» құрылуда. Барлық жер учаскесіне түгендеу жұмыстары жүргізіліп, автоматтандырылған ақпараттар жүйесіне енгізіледі. Бүгінде 1,9 млн га жайылымдық жердің электронды картасы әзірленді.
<blockquote>
 «Біз өңірдегі барлық егіс алқаптарын ауыл шаруашылығы министрлігінің QOLDAU веб-порталына енгіздік. Қазір онда облыстағы 199,9 мың гектар жер қамтылған. Мінекей қазір осы тәжірибелердің арқасында 2,1 млн. гектар ауыл шаруашылығы алқаптарының электрондық карталарын әзірлеп жатырмыз. Оның ішінде жайылымдық 1924 мың га, шабындық 37,0 мың га, көп жылдық екпелер 0,6 мың га құрайды», – деді облыстық жер қатынастары басқармасының басшысы Сұлтан Мақашов.
</blockquote>
Бұдан бөлек, аймақта үйлестіру кеңесінің шешімімен инвестициялық жобалар үшін 39 жер пайдаланушыға жалпы көлемі 8358,9 гектар жер учаскесі табысталды. Сонымен қатар, жерді дұрыс пайдалануға байланысты тұрақты тексеріс жүргізіледі. Мәселен, 2015-2020 жылдары мақсаты бойынша пайдалынбаған 233,8 мың гектар жер анықталған. Оның 65 мың гектары мемлекетке қайтарылса, 111,9 мың гектары шаруашылықтарға қайта берілді. Қалғанына заң шеңберінде жұмыстар атқарылуда.
<blockquote>
 «Бүгінде жердің пайдалануы мен қорғалуына қатысты «Бағдаржол» іс-шарасын бекітіп, 2020 жылдың басынан қазірге дейін 105 бақылау жұмысын жүргіздік. Соның нәтижесінде жерді негізгі мақсаты бойынша пайдаланбаған 78 субьектіден 86 заң бұзушылық деректері анықталды. Соған сәйкес, айыппұлдар салынып, қайта мемлекет бюджетіне өндірілді. Мұндағы біздің мақсат азаматтардың жерін тартып алу емес, олардың алған жерлерін заңға сәйкес және тиімді пайдаланса екен деген ниет қана», – деді облыстық жердің пайдалануы мен қорғалуын бақылау басқармасының басшысы Қайрат Тоғызбаев.
</blockquote>
Айта кетейік, биыл кәсіпкерлікті дамыту мақсатында жерді сауда-саттық жолымен айналымға алу, елді мекендердегі мал басына қажетті жайылымдықтарды анықтау бағытында жұмыстар атқарылатын болады.

Қызылордада ауыл шаруашылығы мақсатына арналған жерлердің электронды картасы әзірленуде

<a href="https://kyzylorda-news.kz/">Kyzylorda-news.kz</a>.&nbsp; Сенаттың жалпы отырысында депутат Мұрат Бақтиярұлы Арал теңізінің солтүстігіндегі Кіші Арал бассейнінде су деңгейінің төмендеуіне алаңдаушылық білдірді.
Сенатордың айтуынша, Кіші Аралдағы су көлемі қазір 22 млрд текше метрді құрайды. Ол алдыңғы жылдарға қарағанда 5 млрд текше метрге азайған. Кіші Аралға құятын Сырдария өзенінің суын пайдаланудың қазіргі қарқыны сақталар болса, алдағы 5-7 жылда теңіздің солтүстігі құрғаққа айналып, экологиялық апатқа ұшырауы мүмкін.
Осыған орай Мұрат Бақтиярұлы теңізді сақтап қалу үшін кешенді шаралар қабылдау қажеттігін айтты. Соның аясында су дипломатиясын белсенді жүргізу, суды тиімді пайдалану және тиісті заңдарға өзгертулер енгізудің берері мол екенін тілге тиек етті.
<blockquote>
 «Осыдан 17 жыл бұрын қабылданған еліміздегі су ресурстарын басқару заңы қазіргі талаптарға жауап бере алмайды. Сондықтан суды пайдаланудың жаңа тұжырымдамасы жасалып, ол тек суға қажеттілікті реттеп қоймай, су нысандарымен байланысты табиғи экожүйелерді сақтап, суды үнемдеуге ынталандыру үшін тұтыну саласындағы тарифтерді қайта қарап, озық технологияларды енгізуге мұрындық болуға тиіс», – деді Мұрат Бақтиярұлы депутаттық сауалында.
</blockquote>
<a href="https://www.inform.kz/kz">ҚазАқпарат</a>

Сенатор Кіші Аралдағы су деңгейін көтеруге қатысты ұсыныс айтты

<a href="https://kyzylorda-news.kz/">Kyzylorda-news.kz</a>. Нұр-Сұлтанда коронавирус жұқтырған науқастардың саны күн санап өсіп барады. Олардың жағдайы ауыр. Бұл туралы елорданың штаттан тыс бас инфекционист дәрігері Сәуле Атығаева мәлім етті, деп&nbsp;хабарлады&nbsp;<a href="https://sputnik.kz/society/20210318/16573785/darigerler-dabyl-qaqty.html">Sputnik</a>.
<blockquote>
 “Былтырғы жағдай тағы да қайталана ма деп қорқамыз. Қазіргі уақытта КВИ көрсеткіші бәрімізді алаңдатып отыр. Науқастар ауыр және өте мүшкіл халде ауруханаларға түсіп жатыр. 18 наурыз күні қала бойынша коронавирус инфекциясын жұқтырған 307 жағдай анықталды”, – дейді Атығаева.
</blockquote>
Оның айтуынша, жасанды тыныс алдыру аппаратына қосылған науқастардың саны күрт өсті. Жансақтау бөліміне тәулігіне бес адам жатқызылады. Әсіресе, артериялық гипертензиясы, қант диабеті, жүректің ишемиялық ауруы бар егде жастағы адамдардың жағдайы ауыр.
<blockquote>
 “Өткен жаздағы жағдай қайталанбас үшін, сондай-ақ, өлімге әкелетін өте ауыр жағдайлардың алдын алу үшін тұрғындарға санитарлық шаралардың бәрін сақтауды ұсынамыз. Күн сайын сіздер мен біздің амандығымыз үшін жұмыс істейміз. Бірақ жағдайды дәрігерлердің көмегімен ғана реттеу мүмкін емес. Әркімнің жауапкершілігі маңызды”, – деп атап көрсетті Атығаева.
</blockquote>
Дәрігерлер инфекция жұқтыратындардың саны мереке күндерінен кейін күрт артады деп отыр. Себебі адам көп жиналатын жерлерде санитарлық нормалар сақталмайды. Қала тұрғындары оны байқамауы мүмкін. Бірақ дәрігерлер ауруханадағы жағдайдан бәрін анық көріп отыр.

«Былтырғы жағдай қайталана ма деп қорқамыз»: Дәрігерлер дабыл қақты

<a href="https://kyzylorda-news.kz/">Kyzylorda-news.kz</a>. 2020 жылы қазақстандық банктердің карточка иегерлері 35,3 триллион теңгеге 3 миллиардқа жуық қолма-қол ақшасыз операция жасады. Бұл көлемнің 81%-і онлайн-операциялар – интернеттегі төлемдер мен мобильді банкингке тиесілі, деп хабарлайды ҚР Ұлттық банктің баспасөз қызметі.
Бұл ретте айтарлықтай өсім карантиндік шектеулерге байланысты қалыптасып отыр. Қолма-қол ақшасыз жасалған транзакциялардың жалпы санындағы онлайн-транзакциялардың үлесі 2020 жылдың соңында 66% -ті құрады, ал 2020 жылдың басында ол тек 46% болды.
2020 жылдың қорытындысы бойынша, мобильді және интернет-банкингті белсенді пайдаланушылар саны 82%-ке артып, 14 миллионды құрады. Жалпы, осы қызметтерді қолданушылардың саны бір жыл ішінде 46%-ке өсті.

Қазақстандықтар 3 миллиардқа жуық қолма-қол ақшасыз операция жасады

<a href="https://kyzylorda-news.kz/">Kyzylorda-news.kz</a>.&nbsp;Бүгін Қызылорда облысының әкімі Гүлшара Әбдіқалықованың төрағалығымен әлеуметтік-экономикалық даму жөнінде жиын өтті.
Жиында облыстық экономика және бюджетті жоспарлау басқармасының басшысы Нұрғали Қордабай атқарылған жұмыстар мен алдағы жоспарлар туралы баяндама жасады.2021 жылдың қаңтар-ақпан айларында облыстың өнеркәсіп кәсіпорындары 102,6 млрд.теңгенің өнімін өндірді.
Тамақ өнімдерін өндіру 3,2 пайызға, жеңіл өнеркәсіп 6,0 пайызға, өзге де бейметалл минералдық өнімдерді өндіру 2,2 есеге, жихаз өндіру 31,4 пайызға, машиналар мен жабдықтарды жөндеу және орнату 8,1 пайызға артуы есебінен өңдеу өнеркәсібінде өсім 9,1 пайызға қамтамасыз етілді (24,1 млрд теңге өнім өндірілді).
Есепті кезеңде өңір экономикасына 25,3 млрд теңге инвестиция салынды. Бұл өткен жылдың тиісті кезеңімен салыстырғанда 7,8 пайызға артық орындалған. Сонымен қатар 2,5 млрд теңгеге құрылыс жұмыстары орындалды немесе былтырғы жылдың тиісті кезеңімен салыстырғанда 129,6 пайызды құрады.
Сондай-ақ аймақта 99 мың шаршы метр тұрғын үй пайдалануға берілді, 2020 жылдың тиісті кезеңімен салыстырғанда НКИ 101,9 пайызды құрады.
Ауыл шаруашылығының жалпы өнімінің көлемі 8,8 млрд теңгені құрап, 2020 жылдың сәйкес кезеңіне 2,2 пайызға өсім қамтамасыз етілді.
Биылғы жылдың 1 наурызына 8 111 жаңа жұмыс орны құрылды, оның ішінде 1 264 тұрақты жұмыс орындары.
Биыл индустрияландыру бағдарламасының аясында облыста жалпы құны 48,5 млрд теңгені құрайтын, 506 жұмыс орындары құрылатын 4 жобаны іске асыру жоспарлануда. Атап айтар болсақ, «Табақша шыны шығару және өңдеу зауыты құрылысы» («Orda Glass ltd» ЖШС), «Қуаттылығы жылына 1500 тонна құс етін өндіру» («Қармақшы құс» ЖШС), «Ас тұзын өндіру» («Аралтұз» АҚ), «Түйе сүтінен құрғақ ұнтақ шығару өндірісі» («Qazaq Qamel» ЖШС).
Жиында аймақ басшысы әлеуметтік-экономикалық даму тұрғындардың өмір сапасына тікелей әсер ететінін атап өтіп, бірқатар тапсырма берді. Қала және аудандарда өндірісті дамытуды, су тапшылығы жағдайында ғылымның озық жетістіктерін енгізуді жүктеді.

Қазақстан және Қызылорда облысының жаңалықтары