<a href="https://kyzylorda-news.kz/">Kyzylorda-news.kz.</a> Қызылорда облысында арнайы газ инспекциясы құрылып, жұмыс жасауда. Бұл өңірдегі өрт пен газдан туындайтын апатты жағдайлардың алдын алуға көмектесетін негізгі күшке айналмақ. Бұл туралы Өңірлік коммуникациялар қызметінің ақпарат алаңында өткен брифингте облыстық ТЖД Мемлекеттік өрт бақылау басқармасының бастығы Бақтияр Тұрманов мәлімдеді.
<blockquote>
 «Біз осы тілсіз жаудың алдын алу мақсатында бірқатар ауқымды шараларды қолға алдық. Мәселен, бүгінде газ құю станцияларының барлығына рұқсат беретін облыстық өнеркәсіптік қауіпсіздік департаментімен қосылып жұмыс жасап жатырмыз. 19 наурыз күні газ құю станцияларының басышылары және «Қаз Транс Газ Аймақ» қызметкерлерін қатыстырып дөңгелек үстел өткізіп, түсінідірме жұмыстарын жүргіздік. Бұдан бөлек, жылу маусымы басталғалы ТЖД саласының еріктілерін қатыстырып әр аптаның сенбі күні өрт қауіпсіздігін алдын алу мақсатында профилактикалық жұмыстар жүргізіп келеміз», – деді Бақтияр Маханбетжанұлы.
</blockquote>

Бақтияр Тұрманов: Газ тарататын мекемелерге түсіндірме жұмыстары жүргізілді

<a href="https://kyzylorda-news.kz/">Kyzylorda-news.kz</a>. Бүгін 26 наурыз – Арал теңізі күні. 2017 жылы облыс әкімдігі мен Халықаралық Аралды құтқару Қорының ұйымдастыруымен өткен тұрақты даму форумында Халықаралық Аралды құтқару Қорының құрылған күнін – «Арал теңізі күні» ретінде атап өту туралы шешім қабылданған болатын.
Теңізді сақтап қалу үшін «САРАТС» жобасының бірінші кезеңінің жүзеге асырылуымен бірге аталған қордың Арал теңізін құтқаруға және өңірдің экологиялық жағдайын жақсартуға бағытталған ауқымды жобалары оң нәтижелерін беруде.
Бүгін айтулы күн аясында «Барсакелмес» мемлекеттік-табиғи қорығының кеңсесінің ауласында ағаш отырғызу шарасы өткізілді.
Аталған шараға аудан әкімінің орынбасары Жәнібек Жұбанов қатысып, «Арал теңізі күнінің» мән-мағынасына тоқталды. Сонымен қатар, ата-бабаларымыздың «Атадан мал қалғанша, тал қалсын», «Бір тал кессең, он тал ек» деген тәмсілдердің тәрбиелік мәні зор екендігін, ағаш отырғызу халқымыздың сауапты істерінің бірі екендігін айтып өтті.
Шара барысында туя ағашы мен жеміс талдарының көшеттері отырғызылды.
Атап өтейік, Ұлыстың Ұлы күні – Наурыз мейрамы қарсаңында «Таза табиғат» республикалық акциясы аясында Арал теңізінің ұлтанына 180 мың түп сексеуіл, аудан бойынша 2000 түп ағаш көшеттері отырғызылған болатын.
<img src="https://kyzylorda-news.kz/wp-content/uploads/2021/03/fb_img_1616748891800.jpg" alt="" />

&#8220;Арал теңізі күні&#8221;: Аралда ағаш көшеттері отырғызылды

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова батыр ана, Социалистік Еңбек ері Сәлима Жұмабекованың 85 жылдығына арналған ғылыми-танымдық конференцияға қатысты.
Жиынға ҚР Парламенті Сенатының депутаты Ақмарал Әлназарова, ҚР Ұлттық ғылым академиясының академигі, техника ғылымдарының докторы, профессор Уалихан Бишімбаев, Әл-Фараби атындағы Қазақ ұлттық университетінің профессоры, филология ғылымдарының докторы Фатимабибі Дәулет, ҚР Ұлттық ғылым академиясының академигі, техника ғылымдарының докторы, профессор Қылышбай Бисенов, Қазақстанның Еңбек ері, Қызылорда облыстық күріш өндірушілер және өңдеушілер қауымдастығының Президенті Абзал Ералиев, мемлекет және қоғам қайраткері Рзақұл Нұртаев және еңбек озаттары, ғалымдар мен жазушылар қатысты. Конференцияны облыстық мәслихат хатшысы, тарих ғылымдарының кандидаты Наурызбай Байқадамов жүргізіп, еңбектің шыңын бағындырған Сәлима Жұмабекованың қайраткерлігі мен еңбек жолын қозғады.
Конференцияда облыс әкімі Гүлшара Әбдіқалықова еңбектен бақытын тапқан Сыр елінің батыр анасы Сәлима Жұмабекованың елдің ырыс-несібесін молайтудағы елеулі еңбегін атап өтіп, қарапайымдылықты ту еткен өмірлік ұстанымын сөз етті.
<blockquote>
 “Тағдырдың талай тауқыметіне қазақ әйеліне тән қайсарлықпен, төзімділікпен қарсы тұрған «Ғасырдың Батыр Анасы» талай сынақты басынан өткерді. Сауыншы да, бақташы болды. Алайда, еңбегінің мәнін күріш алқабынан тапты. Бірақ, ең қиыны, өмірлік серігін де күріш алқабында мәңгіге жоғалтты. Ерінің жұмыс кезінде қайғылы қазаға душар болғанына қарамастан, отырып қалмай, бір қолымен сәбиін, бір қолымен Сыр маржанын қорғаштап, ерлермен бірдей иық тірестіре еңбек етті. 
 Ұрпағымен бірге көркейіп, төккен тердің, еткен еңбектің, зейнетін көрді. Ел мен жерге жасаған қалтқысыз еңбегі өзін ұшар биікке көтерді, шексіз алғысқа бөледі. Сөйтіп, халқымыздың мақтан тұтар аяулы аналарының біріне, тіпті бірегейіне айналды”,-деді Гүлшара Әбдіқалықова.
</blockquote>
Конференцияда батыр ананың бейнесі, қайраткерлік жолы, қайраткер әйел бейнесі мен абзал ананың ұрпақ тәрбиесіндегі ұстанымы жан-жақты айтылды. Техника ғылымдарының докторы, профессор Қылышбай Бисенов қайраткер тұлғаның өмірлік жолдағы жанкешті еңбегін сөз етсе, педагогика ғылымдарының докторы, облыстық қоғамдық кеңес төрағасы Бақытжан Сайлыбаев «Ерлікке толы ғұмыр» тақырыбында ой қозғады. Ал, Әл-Фараби атындағы Қазақ ұлттық университетінің профессоры, филология ғылымдарының докторы, Жоғары оқу орнының үздік оқытушысы Фатимабибі Дәулет қазақ фольклорындағы ананы жоқтау өлеңдерінің стильдік ерекшеліктеріне тоқталды.
Конференцияда құрметті қонақтар Уалихан Бишімбаев, Абзал Ералиев, Рзақұл Нұртаев, Нұржан Прмантаев абзал ананың ғибратты ғұмыр жолындғы ерекше естеліктерімен бөлісті.
Айта кетейік, бүгін Сыр анасы Сәлима Жұмабекованың 85 жылдығына орай оның есімін ұрпақ жадында сақтау мақсатында өзі тұрған үйге мемориалдық тақта орнатылып, мұражай-бөлмесі ашылды.
Ел ырысын еселеген Сәлима Жұмабекованың есімі республиканың, облыстың «Алтын кітаптарына» енгізілген. «Социалистік Еңбек Ері», екі мәрте «Ленин», «Құрмет белгісі» ордендерімен, «Ардақты ана» медалімен марапатталған.
2000 жылы «Ғасырдың батыр анасы» құрметті атағы, 2005 жылы 70 жасқа толуына орай «Қармақшы ауданының құрметті азаматы» атағы берілген. Ал, 80 жылдық мерейтойында Ыбырай Жақаев атындағы “Қазақ күріш шаруашылығы ғылыми-зерттеу институы” қатал ауа-райына, қоршаған ортаға төзімді, әрі мол өнім беруге қауқарлы күріштің жаңа сортына «Сәлима» деп атау берілген.
<img src="https://kyzylorda-news.kz/wp-content/uploads/2021/03/fb_img_1616745516281.jpg" alt="" />
<img src="https://kyzylorda-news.kz/wp-content/uploads/2021/03/fb_img_1616745497891.jpg" alt="" />

Ғасыр анасы атанған Сәлима Жұмабекованың 85 жылдығына арналған конференция өткізілді

<a href="https://kyzylorda-news.kz/">Kyzylorda-news.kz.</a> Биыл «Арал теңізі» күні төртінші рет атап өтілуде. Яғни 2017 жылы Қызылорда қаласында өткен Арал теңізі бассейнін тұрақты дамыту бойынша бірінші халықаралық форумда 26 наурыз «Арал теңізі» күні деп белгіленді.
Атаулы датаға орай аймақта бірқатар іс-шаралар өткізілуде. Мәселен Арал теңізінің құрғаған ұлтанына 180 мыңға жуық сексеуіл отырғызылды. Сонымен қатар, «Солтүстік Арал теңізі және Сырдария өзеңінің жағалауларын қоқыстан, балық аулайтын торларының қалдықтарынан тазалау акциялары, шетелдік консулдармен инвестициялық жобаларды талқылау мақсатында кездесу, «Барсакелмес» мемлекеттік табиғи қорығының аумағында тал отырғызу, инвесторлардың қатысуымен Арал өңіріне геологиялық және археологиялық экспедициялар, Арал теңізінің қайтуы атты ғылыми-деректі фильмнің түсірілімі жалғасатын болады. Жасөспірімдер арасында футболдан халықаралық «Aral Cub-2021» турнирі, Солтүстік Арал теңізінің Көкарал бөгетінде тәжірибелік балық қорғау қондырғысын маусымдық іске қосу жұмыстары, Дәстүрлі балық аулау турнирі, Арал тағдыры бойынша фото және көрмелері ұйымдастырылып, ғылыми-деректі фильмдер дайындау және тағы да басқа іс-шаралар өткізілуде.
Айта кетейік, Арал теңізінің құрғаған ұлтанында ұшқан тұздарды тоқтату және экологиялық жағдайды жақсарту мақсатында соңғы 25 жылда Арал теңізі ұлтанына 173 мың гектар жеріне сексеуіл егілді. Жыл сайын облыстық бюджет есебінен Арал теңізінің құрғаған ұлтанында 5 мың га орман отырғызу жұмыстары жүргізіліп келеді. Оған қоса, 2018 жылдан бастап Оңтүстік Корея Республикасының гранты есебінен, Арал теңізінің құрғаған ұлтанында фитоорманмелиоративтік жұмыстар жүргізілуде.
Қазір Кіші Аралда 20-дан аса балықтың түрі кездеседі. Теңізден жылына 8 мың тонна су маржаны ауланып, жергілікті зауыттарда өңделуде. Балық өнімдері Дания, Польша, Ресей, Грузия, Әзірбайжан елдеріне экспортталуда.

Бүгін Арал теңізі күні

<a href="https://kyzylorda-news.kz/">Kyzylorda-news.kz.</a> Ағымдағы жылдың 3 айында Қызылорда облысы бойынша 99 өрт оқиғасы орын алды. Өткен жылдың тиісті кезеңімен салыстырғанда 17 өртке, яғни 17,2 % көбейген. Бұл туралы Қызылорда облысы ТЖД мемлекеттік өрт бақылау басқармасының бастығы Бақтияр Тұрманов мәлімдеді.
<blockquote>
 «Өрт оқиғасынан 9 адам, оның ішінде – 3 бала қаза болды. Өткен жылғымен салыстырғанда қаза болғандар 3 есеге, жарақат алғандар 4,5 есеге өсіп отыр. Биыл 20-24 наурыз аралығында облыс бойынша 6 өрт оқиғасы тіркелді. Өрт оқиғалардың барлығы тұрғын үй секторында орын алған. Өрт кезінде тұрғындардың қаза болу, жарақат алу, күйік алу фактілері тіркелген жоқ», – дейді Бақтияр Тұрманов. &nbsp; &nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;&nbsp;
</blockquote>
Басқарма бастығының айтуынша, өрт оқиғалардың жиі орын алуына әсер ететін факторлардың бірі тұрғындардың өрт қауіпсіздігіне немқұрайлы қарауы себеп болуда.
<blockquote>
 «Өрттің пайда болуы себептерінің басым бөлігі ашық отты пайдаланудан, электр желілерінің және қондырғылардың қысқаша тұйықталуынан, тұрмыстағы пештің ақаулығынан, тұрмыстық газ қондырғыларының және газ баллондардың ақаулығынан, балалардың оттықпен ойнауынан болып жатады», – дейді Бақтияр Тұрманов.
</blockquote>

Қызылордада өрт оқиғасы көбейген

<a href="https://kyzylorda-news.kz/">Kyzylorda-news.kz.</a> Халқымыздың мақтан тұтар аяулы қыздарының бірі – Сыр өңірінің мақтанышы, қармақшылық күріш өсіруші-диқан Сәлима Жұмабекованың есімі республика жұртшылығына түгел танымал. Социалистік Еңбек Ері, Батыр Ана, өз заманында үлкен мәртебе саналатын Кеңес Социалистік Республикалар Одағының Халық депутаты болған қайраткер анамыздың өміржолы ұлтымызға өнеге, жас ұрпақ өкілдеріне тағылым мен тәрбие.
Осы ретте осындай ерен еңбек иелері-аға ұрпақтың еңбек дәстүрін жастардың санасына жеткізіп, оларды аянбай еңбек етуге тәрбиелеудің мәні өте зор. Еліміздің бастан кешкен тарихына зер салсақ,алдыңғы өткен аға буынның еңбек жолында қалыптасқан ізгі дәстүрлері халқымыздың жалпы ұлттық мұрасы, мақтанышы екеніне көз жеткіземіз. Себебі еңбек – өмір өзегі, бақыт кілті. «Еңбек етсең ерінбей, тояды қарның тіленбей» деген ұлы Абайдың ұлағатты сөзі құнын ешқашан жойған емес, жоймайды да. Біздің еліміздің алға қойып отырған мақсаттарының бірі – қоғамымыздың рухани жаңғыруына қол жеткізудің бір бағыты осындай адал еңбек етудің адам үшін, қоғам үшін, ел үшін алатын орнын дәріптеу, жастардың санасына сіңіру, іспен үлгі болу.Сондықтан жастарды еңбекке баулу арқылы аға ұрпақтың еңбек дәстүрлерінің лайықты ізбасарларын тәрбиелеп, жаңа буын тұлғаларды қалыптастыруға атсалысатынымыз анық. Өнегелі іс – өміршең келеді, ол қоғамның дамуымен үндесіп жатады. Бүгінгі ұйымдастырылып отырған конференцияның жастарды еңбексүйгіштікке, өз мамандығы бойынша шеберлікке үйретуге, олардың бойында игі қасиеттерді қалыптастыруға, ерік-жігерлі болып, білім мен ғылымды игеруге, халқымыздың өнері мен мәдениетін дамытып, ата салтын, ата дәстүрін алға апаратын ұрпақ тәрбиелеуге зор пайдасы тиері сөзсіз.Бала тәрбиесінің ең үлкені – оны еңбекке баулу. Осы орайда қазақтың белгілі жазушысы Әзілхан Нұршайықовтың «Еңбекшіл жас қана ең үздік азамат болып қалыптасады» деген мағыналы сөзін біз де құптаймыз.
Сәлима Жұмабекқызы 1935 жылы Қармақшы ауданына карасты Дауылкөл ауылдық Кеңесінде дүниеге келген. Ол өзінің еңбек жолын 1952 жылы Қармақшы ауданындағы Ленин атындағы кеңшарда жұмысшы болудан бастаған.
Сәлима апай 1962 жылға дейін құрылысшы болып істеп, бұл кәсіпті шебер меңгеріп, сылақшылық, тас қалаушылық өнерінің қыр-сырын игерген кәнігі маман болып қалыптасады.
Бірде шаруашылық басшылары егіс көлемінің ұлғаюына байланысты диқаншылар құрамын жастармен толықтыру үшін Сәлима апайды күріш өсіруге баруын өтініп сұрайды. «Сіздер, басшылар, солай ұйғарсаңыздар мен қарсы болмаймын» – деп,келісімін беріп, Сәлима Жұмабекова диқаншылықты, күрішшілік кәсіпті меңгеруге батыл қадам жасайды. Бұл 1963 жылдың көктемі болатын. Сөйтіп, өзі күріш еккен екі-үш жыл ішінде Сәлима апай жақсы көрсеткіштерге жетіп, диқаншылық шеберлігін шыңдай түседі. Оның бұл кәсіптегі үлгі тұтып, ақыл-кеңесіне сүйенген, күрішті баптап өсірудің қыр-сырына үйреткенақылшы-ұстазы – тәжірибелі диқан Шәймерден Шегебаев болды.
Еліміздің ырысына айналған Сыр күрішін, Сырдың ақмаржанын өсіруге жан-тәнімен ден қойған Сәлима апай өзі күріш еккен 1963-1966 жылдары әр гектардан 40 центнердің үстінде өнім жинайды. Бұл сол кездегі тегістелмеген және инженерлік жүйеге келтірілмеген жерден алынып жүрген жоғарғы көрсеткіштердің бірі еді.
Сәлима апай қайраты мен жігері ұштасқан, еңбектен жан рахатын тапқан, оны ұйымдастыра білетін қарым-қабілеті мол жан болғанын, өндіріске жаңа ғана араласқан жастарға қамқоршы болып, еңбекке баулып, білгенін үйретуден жалықпаған тәлімгер бола білгенін, сол арқылы ауылдастары тарапынан әрдайым ризашылық пен құрметке бөленген сыйлы тұлға болғанын Сәлима Жұмабекқызының өмір жолы туралы жазылған шығармалардан жақсы білеміз.
Ауылдастары жас келіншектің бойында еңбекті қалай беріле атқарса, соншалықты ұйымдастырушылық қабілеті, адам жанын түсініп, тіл табыса білетін қасиеті бар екендігін жақсы танып біледі.
1967 жылы Дауылкөл ауылдық Кеңесінің төрағасы болып сайланып, жергілікті кеңестің депутаты ретінде де шаруашылық, қоғамдық жұмыстардың қызу ортасында жүріп, ауыл мәдениетін көтеруге, көркейтуге мол үлес қосты, өзіне тән жігерімен қай қызметте де белсенділік танытты.
Сәлима апай ауылдық Кеңесте бес жыл қызмет атқарады. Дегенмен, жастайынан еңбек адамдарының арасында өскендіктен, өзін кеңседе отырғаннан гөрі әрдайым егіс даласының басында, жайқалған күріштік арасында, қызу еңбеккерлер ортасында, қызыл қырман басындаеңбек көрігін қыздырып жүргенін көз алдына елестетіп, ойынан шығармағанын аңғарамыз.
Сондықтан да, Сәлима апай тағы да күрішшілік кәсіпті мұрат тұтады. 1973 жылы Ленин атындағы совхоздың күріш өсірушілер звеносын басқаруға тілек білдіріп, өзі таңдаған диханшылықтың еңбек жолын қайта жалғастырады. Звенодағы жұмысын оңтайлы ұйымдастырып, күріштің өнімділігін арттырады.
Өздеріңізге белгілі, Қызылорда облысы еліміздің ең ірі күріш өндіруші өлкесі, бірақ табиғаты қатал осындай жағдайда жұмыс істеу қайбір азаматқа да жеңіл болмасы белгілі. Ал күрішші Сәлима апай жаздыкүні 40-450С-тан асқан ыстықта күріш алқабындағы маса, сона, шыбын-шіркейлердің ішінде күндіз-түні жүріп еңбек етіп, өзінің төзімділігімен жанқиярлық еңбекқорлығының арқасында еңбектің ең жоғарғы нәтижесіне жетті. Күріштен рекордтық өнім жинады.
Сәлима апайдың еңбектегі, өмірдегі жеке ерлігі ел есінде аңызға айналып, звеносының күріш егудегі тәжірибесі, жоғары өнім көрсеткіштері, ұсыныстары, адамгершілік ізгі істері Сыр өңірінің еңбеккерлеріне, әсіресе жастарға үлгі, өнеге болып, ел игілігіне айналды.
Өнегелі істердің шебері, ең озат күріш звеносының жетекшісі, Батыр-Ана Сәлима Жұмабекова 1979 жылы Кеңес Социалистік Республикалар Одағының Жоғарғы Кеңесіне депутат болып сайланады. Адал еңбегінің арқасында Батыр-Ана ел сеніміне лайықты ие болады. Депутаттық кызметінде мемлекеттік, қоғамдық тұрғыдан әрбір сөзі орынды, қандай мәселеде де өз пікірі, өз көзқарасы, өз ұстанымы бар халық қалаулысы ретінде өзін таныта білді.
Депутаттық міндеттің, ел сенімінің жауапкершілігін сезіне білумен қатар, туған өлкенің перзенті, азаматы ретінде міндеттерін орындау үшін Сәлима Жұмабекова кісілік істерімен, ел тағдыры туралы айтқан ұсыныс-пікірлерімен, сындарлы ойларымен елді еріксіз таңдандырған, аты аңызға айналған асыл-ана, қазақ әйелдерінің көрнекті де, парасатты өкілі.
Еңбектің де, тұрмыстың да бар қиындығымен қатар, тағдырдың да ауыр азабын ерлікпен көтере білген,Батыр-ана Сәлима апай барлықаналық махабатын, бар күш-жігерін ұрпақтарының бақытты өмір сүруіне арнап, сол жолда ерінбей еңбек етуге жұмсады. Ауыр жұмыста жүріп, бес қызды, бес ұлды қатарынан қалдырмай, жақсы тәрбиелеп өсірді. Жүрегінің жылуын, көңілінің бар арманын, қолынан келген бар қамқорлығын, адал еңбегінің нәтижесін балаларына арнады, бес ұлын ұяға, бес қызын қияға қондырған ардақты да асыл Ана болды.Сәлима апайдың бейнесі арқылы өрлік, төзімділік пен шыдамдылық, адалдық пен тазалық, даналық пен кеңпейілдік, еңбеққорлық, қарапайымдылықпен өрілген қайсар қазақ әйелінің жарқын келбетін танимыз. Тағдырдың талқысына жасымады, жүнжімеді.Қайратына қайрат, жігеріне жігер қосып, қиындыққа өршелене қарсы тұрып, кеудесін тік көтеріп, сындарлы шақтарда езілмей, егілмей, өзін де, өзгелерді де үлгілі істерімен жани түскен Батыр анаға қалай тәнті болмасқа, қалай риза болмасқа!?Сәлима апайдың болмысына қарап, «Міне біздің қазақ аналары, міне біздің еңбеккер қазақ әйелдері! деп, тебірене де, тамсана да айтуымыз әбден орынды!Парасатты әйелдің бар қасиетін бойына жинаған, намысты ту қылып ұстағанана, отбасының ғана емес, елінің де мерейін тасытты, абыройын асқақтатты. Отбасының да, ортасының да берекелі бірлігін еңбектен тапты, еңбекпен көрсетті.
Адал еңбек, өнегелі өмір тәжірибесі оны биік абыройға, мәртебелізор атаққа жеткізді. Еңбектегі ерен жетістіктері үшін бесжылдықтың қорытындысы бойынша Сәлима Жұмабековаға 1980 жылы Социалистік Еңбек Ері атағы берілді.
Сәлима Жұмабекованың бүкіл өмір жолы Қызылорда облысының өсіп-өркендеуімен, оның әлеуметтік-экономикалық дамуымен тікелей байланысты.Оның бар ғұмыры Сыр өңірінің тарихындағы ауыр кезеңдермен де қатар жүрді. Сыр өзенінің суы азайып, Арал теңізінің тартылуына байланысты қалыптасқан экологиялық ауыр жағдайда Сәлима апайдың сындарлы ұсыныстарының нәтижесінде республика басшыларының көз-қарастарында көп өзгерткені облыс жұртшылығының есінде, жақсы біледі.
Биыл еліміз Тәуелсіздігіміздің 30 жылдығын атап өтеді. Осы айтулы шараның аясында Сәлима апамыздай аңыз адамның өмір жолын, еңбек жолын кейінгілерге үлгі етіп, еңбектің қадір-қасиетін дәріптеудің, еңбек арқылы құрметке бөленген өнегелі өмір иелерін ұлықтаудың маңызы зор. Мұны «Әлемнің билеушісі – еңбек!» деген қанатты сөздің мән-маңызын жаңарған әлемде жастар жадына құя берудің зор мүмкіндігі деуге болады. Он балалы отбасының тыныс-тіршілігі өз алдына, аптап ыстық пен аңызақ желдің өтінде жүріп, шаң-тозаңы бұрқыраған дала төсінде күріш егіп, одан мол өнім жинаған еңбеккер Ана бейнесіндәл қазір біздің қоғамға саф алтындай жарқырата көрсету қажет-ақ. Қазақта қайсар қыздар аз болған жоқ! Біз Мәншүк, Әлия, Хиуаз апаларымыздың ерлігін жақсы білеміз. Роза Бағланова апамыздың да Мәскеу трибунасында Арал тағдыры туралы қасқая тұрып, қаймықпай айтқан сөзін де интернет бетінен көріп, естіп жүрміз. Сол сияқты Сәлима апамыздың да аналық, еңбеккерлік ерлігі, даналық қасиеттерін қалай дәріптесек те лайықты деп ойлаймын. Осындай аналарымыздың өмірін арқау еткен көркемфильм шығып жатса, сахналық шығарма – спектакль қойылып жатса қандай ғанибет! Ұрпағымызға жақсы үлгі етуге тұратын қажетті де лайықты іс орындалып жатса, бұлбіздің рухани&nbsp; жаңғыруымызға қосылған зор үлес болар еді.
Ана қашанда ақ тілегін ұрпағынан, елінен аямайтыны анық, сол үшін де ананың тұғыры биік, шұғыласы шуақты! Сәлима апа бір естелігінде&nbsp; аналық мейірбан жүрегімен: «Аллаға мың қайта шүкіршілік етеміз. Қиын күндерден кейін жарқын заман туды. Ата-бабаларымыз аңсаған тәуелсіздікке қол жеткіздік. Дініміз де оралды, діліміз де тазаруда. Ендігі арманымыз келешек ұрпақ бейбіт өмір аясында бақытты ғұмыр кешуі. Иманды болып, отанын, отбасын шексіз сүйіп, құрметтеуі. Біздіңше барлық Аналардың тілеуі осы!» &nbsp;&nbsp;деп тілеген екен.
Ақ тілегіңіз қабыл болсын, асыл Ана! Сіздің кеңпейіл, аппақ көңіліңізден шыққан ізгі тілектеріңіз ұрпақтарыңызға шарапатын төгіп, қолдап-қорғап жүрсін. Сіз бізге биіктен қарап, жақсымызға жадырап, жаманымызға тұнжырап тұрғандай көрінесіз. Біз де Сіздің аналық кең құшағыңызды, мейірім төккен жүзіңізді, нұрлы бейнеңізді әрдайым есте сақтаймыз. Еліңізге, халқыңызға тілеген тілектеріңіз қабыл болып, Сіз де пейіштің төрінде жүргейсіз деп тілейміз.
Бисенов Қылышбай Алдабергенұлы,
Қазақстан Республикасы Ұлттық ғылым академиясының академигі, техника ғылымдарының докторы, профессор, Қазақстанның еңбек сіңірген қайраткері
<img src="https://kyzylorda-news.kz/wp-content/uploads/2020/05/pikir-bisenov.jpg" alt="" />

Қылышбай Бисенов: Еңбектен бақыт тапқан батыр ана

<a href="https://kyzylorda-news.kz/">Kyzylorda-news.kz.</a> “Отбасы банк” басқарма төрағасы Ляззат Ибрагимова БЖЗҚ-дан зейнетақы жинағын мерзімінен бұрын шешуге арналған өтінімді қарастыруға қанша уақыт кететінін туралы айтты.
<blockquote>
 “Менің әріптестерім БЖЗҚ-дан біржолғы зейнетақы төлемін мақсатты түрде пайдалануға арналған құжаттарды өңдеу бойынша есеп әзірледі. Бұл – клиент құжаттарды жүктегеннен кейін операциялық департамент құжаттардың толықтығы мен мақсатты пайдалануын тексеріп, төлем жасауға рұқсат беруге кететін уақыт”, – деп жазды Ибрагимова әлеуметтік желіде.
</blockquote>
Ол бизнес-процестің бұл бөлігі шешім қабылдаудағы негізгі сәт екенін атап өтті.
Бастапқыда толтырылған өтінім порталда БЖЗҚ-ға жолданады. Бұл кемінде бір жұмыс күні.
Арнайы шотқа ақша аударылады – тағы бір жұмыс күні.
Одан кейін банкке тәцелді емес ең маңызды кезең – клиент құжаттарды порталға жүктейді (PDF-файл форматында).
“Мұнда барлығы клиентке байланысты. Мысал ретінде үш жұмыс күні кетеді деп есептейік. Себебі, клиент те қызығушылық танытып отыр”, – деп жазды Ляззат Ибрагимова.
Егер құжаттар қосымша өңдеуге жолданбаса, онда операциялық департаментте тағы 1,5-2 жұмыс күні кетеді.
Операциялық департамент келісім бергеннен кейін процесс соңында төлем жолданады. Бұл әдетте тағы бір жұмыс күні.
“Егер сіз мінсіз клиент болып, сіздің өтініміңізді бірде-бір рет кері қайтармаса, онда 7,5-8 жұмыс күні немесе 10 күнтізбелік күн ішінде сізге БЖЗҚ-дан төлем жасалады. Банк пен клиент тарапынан бірқатар қиындықтар бола тұра, жалпы 76 654 адам осы жолды бізбен бірге жүріп өтті”, – деп қорытты “Отбасы банк” басқарма төрағасы.
Ол, сондай-ақ, жеке тұрғын үй құрылысына арналған жинақты алу бойынша процесс ұзақ жүретінін айтты. Себебі қажетті құжаттар тізімі көбірек. Ұсынылған кестеге сәйкес, емдеу шараларына арналған құжатты өңдеуге шамамен 43 сағат, ипотекасыз баспана алуға – 37 сағат кетеді. Жеке тұрғын үй құрылысына арналған зейнетақы жинағын алу үшін тиісті құжаттарды тексеруге шамамен 78 сағат жұмсалады.
<h3 id="">БЖЗҚ-дан зейнетақы жинағын алу</h3>
Еске салсақ, Қазақстанда 23 қаңтардан бері зейнетақы жинағын пайдалануға арналған өтінімді қабылдайтын Enpf-otbasy.kz сайты іске қосылды. БЖЗҚ-да жиналған қаражаттың бір бөлігін баспана сатып алуға немесе кеңейтуге, емдеуге немесе инвестициялауға жұмсауға болады. Бүгінде 700 мың қазақстандықтың зейнетақы жинағы шекті деңгейден асып тұр.
<a href="https://sputnik.kz/society/20210326/16620494/zeynetaqy-merzim.html">Sputnik</a>

БЖЗҚ-дан ақшаны мерзімінен бұрын алуға қанша уақыт кетеді

<a href="https://kyzylorda-news.kz/">Kyzylorda-news.kz.</a>&nbsp;Түркістан қаласының мәдени-рухани орталығында орналасқан «Керуен сарай» туристік кешенінде әлемде теңдесі жоқ ұшатын театр ашылады.
Қаладағы құрылыс алаңдарын аралаған облыс әкімі Өмірзақ Шөкеев демалыс орталығының ашылуға дайындық барысымен танысты, деп хабарлады Түркістан облысы әкімінің баспасөз қызметі.
«Жоба авторларының айтуынша, қиял-ғажайып орталық Самұрық құстың жұмыртқасы халық аңызына негізделген. Бәйтеректің бұтағындағы ұясына келіп, киелі Самұрық құс күн бейнелі алтын жұмыртқа салады. Дәл осы алтын түсті алып жұмыртқа келбетіндегі ерекше театрда бәйтерегіміз сияқты сиқырлы ертегілер еліне, қазақ халқының тарихына жаңа технологиялардың көмегімен, 8 D форматта әсерлі саяхат жасауға болады. Еліміздің өткені, бүгінгісі мен келешегінің көрінісі осы театр-музейде көрсетіледі. Шығыс үлгісінде салынған кешен киелі шаһарға келетін меймандардың сүйікті демалыс орнына айналары сөзсіз», – делінген хабарламада.
Түркістан қаласының әкімшілік іскерлік орталығы (АДЦ) аумағында әкімшілік ғимараттар мен көпқабатты 24 үйдің қасбеттерін бір үлгіде жарықтандыру жұмыстары жүргізілуде. Қаладағы ғимараттардың айналасы көгалдандырылып, жарықтандырылуда. Қаланың басты көшелерінде түнгі жарықтандыру жұмыстары жүргізілді. Сондай-ақ Ясауи кесенесінің алдында ерекше жарықшамдар орнатылды. Минскіден арнайы алдырылған ағаш кейпіндегі бақша жарықшамдары түнде айналаны сан алуан түске бөлесе, күндіз салқын су шашып, аптап ыстықтан қорғайтын болады.
Облыс әкімі Өмірзақ Шөкеев осы қарқынды жұмыстардың барысын бақылап, жауапты тұлғаларға нақты тапсырмалар жүктеді. «Дендросаябақ» пен «Аттракциондар паркі» арасында жаңа көпір салу жоспарлануда. Сонымен қатар «Жібек жолы» саябағы, Б.Саттарханов бойындағы «Желілік саябағы» әсемделіп, қонақ үйлер жарықтандырылады. Облыс басшысы Б.Саттарханов даңғылындағы тұрғын үйлердің, кәсіпкерлік нысандардың сыртқы келбеттерін және «Рәміздер алаңы» мен «Түркі бағын» ретке келтіру жұмыстарымен танысты. Бұл жұмыстар кәсіпкерлер мен тұрғындардың күштерімен жүргізіліп жатыр.&nbsp;
<a href="https://24.kz/kz/zha-aly-tar/m-denie/item/463514-t-rkistanda-shatyn-teatr-ashylady">Хабар 24</a>

Түркістанда ұшатын театр ашылады

<a href="https://kyzylorda-news.kz/">Kyzylorda-news.kz.</a>&nbsp;«Қазгидромет» РМК 27-29 наурызға арналған ауа райы болжамын жариялады.
<blockquote>
 «Қазақстан аумағының үстінде біріккен Жерорта және Солтүстік-Батыс циклондары елдің оңтүстігінде, оңтүстік-шығысында және шығысында жауын-шашын тудырады. Кей жерлерде жаңбыр мен қар түрінде, оңтүстік өңірлерде найзағай ойнап, бұршақ жаууы ықтимал. Жекелеген аудандарда тұман, көктайғақ, желдің күшеюі, солтүстік өңірлерде жаяу бұрқасын байқалады. 29 наурызға қарай ауа температурасы төмендейді деп күтілуде», – делінген хабарламада.
</blockquote>

Наурыздың соңына қарай ауа температурасы төмендейді

<a href="https://kyzylorda-news.kz/">Kyzylorda-news.kz.</a> Шиелі ауданында «Бастаманы қолдау» қоғамдық бірлестігінің ұйымдастыруымен «Ұлт денсаулығы – басты назарда» атты дөңгелек үстел өтті.
Шараға аудан әкімінің орынбасары Алмасбек Есмаханов, «Nur Otan» партиясы Шиелі аудандық филиалы төрағасының бірінші орынбасары Болат Сыздықов, «Әлеуметтік медициналық сақтандыру қоры» ҰАҚ Қызылорда облысы филиалының бөлім басшысы Абылайхан Рахымов пен аудандағы денсаулық сақтау саласының мамандары мен қоғам белсенділері қатысты.
Кездесуде «Әлеуметтік медициналық сақтандыру қоры» ҰАҚ Қызылорда облысы филиалының халықты ақпараттандыру және өтініштерді қарау бөлімінің басшысы Абылайхан Рахымов міндетті әлеуметтік медициналық сақтандыру жүйесі бойынша тегін медициналық қызмет пен дәрі-дәрмектерді алу жолдары жөнінде жан-жақты ақпарат беріп, сала мамандарының байланыс құралдарымен бөлісті.
«Бастаманы қолдау» қоғамдық бірлестігінің атқарушы директоры Жанат Сапаржанова ұйымның 2020 жылдың желтоқсан айынан бастап Қызылорда облысы бойынша денсаулық сақтау саласын жақсарту бойынша «Ұлт денсаулығы – басты назарда!» жобасын жүзеге асырып жатқандығын жеткізді. Осы орайда, Жанат Айдарбекқызы жоба аясында тегін медициналық көмектің тиімділігін арттыру мақсатында және Қызылорда облысынының тұрғындарының денсаулық сақтау саласы бойынша құқықтары мен мүдделерінің қорғалуының тиімділігін арттыру мақсатында жүргізіліп жатқан зерттеудің қорытындысымен таныстырып өтті.
Шара соңында сала мамандары аудан тұрғындарының сауалдарына жауап беріп, көтерген мәселелерінің шешу жолдарын қарастырумен қорытындыланды.
Айта кету керек, «Бастаманы қолдау» қоғамдық бірлестігі Қызылорда облысында «Ұлт денсаулығы – басты назарда» жобасын жүзеге асыруда.&nbsp;Жобаны АҚШ-тың Халықаралық даму агенттігі (USAID) қаржыландыратын Орталық Азиядағы азаматтық қоғамды қолдау бағдарламасы аясында Еуразия қоры қолдайды.

Шиеліде «Ұлт денсаулығы – басты назарда» жобасы талқыланды

<a href="https://kyzylorda-news.kz/">Kyzylorda-news.kz.</a>&nbsp;Жыл басынан жалақы берешегі бойынша берілген ұйғарымды орындамаған жұмыс берушілерге қатысты сот орындаушыларына 718 іс жолданды. Бұл жайында Мәжіліс депутаттарының сауалына ҚР Премьер-Министрі Асқар Маминнің жауабында айтылған, деп хабарлайды ҚазАқпарат.
<blockquote>
 «Қазақстан Республикасының Үкіметі еңбек құқықтарының бұзылу фактілерін, сондай-ақ жалақы берешектерін болдырмауға қатысты жұмыстарды күшейтіп, тиісті шаралар қабылдауда. Осы жылдың 5 наурызына елімізде жалақы берешегінің сомасы 2020 жылдың осы кезеңімен салыстырғанда (1,1 млн теңге) 62 млн теңгеге немесе 4 пайыз төмендеп, 1 млрд теңгені құрады. Жалақы берешегіне жол берген 210 кәсіпорынның басшыларына мемлекеттік еңбек инспекторлары 189 ұйғарым берді және 18,5 млн теңгеге айыппұл салынып, 1,8 мың жұмыскер алдындағы 814,6 млн теңге сомасында жалақы берешегі өтелді. Жыл басынан бері жалақы берешегі бойынша берілген ұйғарымды орындамаған жұмыс берушілерге қатысты сот орындаушыларына 718 іс жолданды, ол өткен жылмен салыстырғанда 40 есе көп», – деді Асқар Мамин.
</blockquote>
Оның атап өтуінше, Қазақстан Республикасының еңбек заңнамасының сақталмауы, оның ішінде жұмыскерлерге жалақы төлемеу бөлігінде шағын және микрокәсіпкерлік субъектілеріне қатысты тексерулер тағайындау алгоритмі бекітіліп, жергілікті атқарушы органдарға жұмыс үшін жолданды.
<blockquote>
 «Жаңа Алгоритмнің өлшемшарттары негізінде жыл басынан бастап 22 шағын және микрокәсіпкерлік субъектісінде жоспардан тыс тексерулер жүргізілді. Сондай-ақ жалақы берешегі бар кәсіпорындар, оның ішінде шағын және микрокәсіпкерлік кәсіпорындарының басшылары алгоритмге сәйкес өңірлердің Дағдарысқа қарсы штабтары мен әлеуметтік әріптестік және әлеуметтік-еңбек қатынастарын реттеу жөніндегі үшжақты комиссияларында тыңдалуда», – деді Үкімет басшысы.
</blockquote>

Жұмыс берушілер қызметкерлеріне 1 млрд теңге қарыз

<a href="https://kyzylorda-news.kz/">Kyzylorda-news.kz.</a>&nbsp; Қызылорда гарнизоны әскери бөлімінің жеке құрамы «Алтын жебе-2021» арнайы операциялар күштері компоненттерінің кешенді тексерісі алдындағы дайындық оқу-жаттығуларын аяқтауға жақын.
Қазақстан Республикасы Қарулы Күштерінде өтіп жатқан «Алтын жебе-2021» арнайы кешенді тексерісінде Қызылорда гарнизоны әскери бөлімінің барлаушылары өз бағын сынайтын болады.
Бөлім жауынгерлері тексерістің жоспарындағы кездесетін барлық тапсырмаларды жоғары нәтижеде орындауға сақадай сай. Бұған, бөлімдегі арнайы мақсаттағы барлаушылардың суық қаруды лақтыру, байланыс, инженерлік және артиллерияның оқ атуын түзету мен ұшқышсыз ұшу аппараттарын пайдалану кезіндегі жинаған тәжірибелері, жауынгерлік тапсырмаларды дер кезінде орындаулары дәлел болады. Барлық санаттағы әскери қызметшілердің далалық дайындық деңгейі мен кәсіби даярлығының жоғары екендігі де жаттығулар барысында көрініс тапты.
<blockquote>
 «Тексеріс алдындағы дайындық жаттығулары кезінде қауіпсіздік шараларын қатаң сақтауға, тактикалық іс-қимылдарды дұрыс орындауға айрықша назар аударылуда. Лауазымдарына сай топография, радиациялық, химиялық және биологиялық қорғаныс, медициналық дайындық бойынша арнайы сынақтар тапсыру да тыс қалмады. Күндізгі және түнгі уақыттарда марш жасау мен оқу-тактикалық атыстарға да дайындалу үстінде. Жауынгерлердің ерекше қабілеті мен сайысқа деген белсенділігі және ынта-жігері көңіл қуантады», – дейді әскери бөлім командирінің жауынгерлік дайындық жөніндегі орынбасары, подполковник Нұрлан Шегебаев.
</blockquote>
&nbsp;«Алтын жебе – 2021» кешенді тексеруі осы жылдың 9 сәуіріне дейін жалғасады.
<img src="https://kyzylorda-news.kz/wp-content/uploads/2021/03/img_20210317_180356_342-scaled.jpg" alt="" />

Қазақстан және Қызылорда облысының жаңалықтары

Бақтияр Тұрманов: Газ тарататын мекемелерге түсіндірме жұмыстары жүргізілді

“Арал теңізі күні”: Аралда ағаш көшеттері отырғызылды

Ғасыр анасы атанған Сәлима Жұмабекованың 85 жылдығына арналған конференция өткізілді

Бүгін Арал теңізі күні

Қызылордада өрт оқиғасы көбейген

Қылышбай Бисенов: Еңбектен бақыт тапқан батыр ана

БЖЗҚ-дан ақшаны мерзімінен бұрын алуға қанша уақыт кетеді

Түркістанда ұшатын театр ашылады

Наурыздың соңына қарай ауа температурасы төмендейді

Шиеліде «Ұлт денсаулығы – басты назарда» жобасы талқыланды

Жұмыс берушілер қызметкерлеріне 1 млрд теңге қарыз

Нұрлан Шегебаев: Жауынгерлердің ерекше қабілеті көңіл қуантады

Қазақстан және Қызылорда облысының жаңалықтары

Бақтияр Тұрманов: Газ тарататын мекемелерге түсіндірме жұмыстары жүргізілді

&#8220;Арал теңізі күні&#8221;: Аралда ағаш көшеттері отырғызылды

Ғасыр анасы атанған Сәлима Жұмабекованың 85 жылдығына арналған конференция өткізілді

Бүгін Арал теңізі күні

Қызылордада өрт оқиғасы көбейген

Қылышбай Бисенов: Еңбектен бақыт тапқан батыр ана

БЖЗҚ-дан ақшаны мерзімінен бұрын алуға қанша уақыт кетеді

Түркістанда ұшатын театр ашылады

Наурыздың соңына қарай ауа температурасы төмендейді

Шиеліде «Ұлт денсаулығы – басты назарда» жобасы талқыланды

Жұмыс берушілер қызметкерлеріне 1 млрд теңге қарыз

Нұрлан Шегебаев: Жауынгерлердің ерекше қабілеті көңіл қуантады

“Арал теңізі күні”: Аралда ағаш көшеттері отырғызылды