<a href="https://kyzylorda-news.kz/">Kyzylorda-news.kz.</a> Қызылордада тергеу изоляторында қамауда отырған ағасына&nbsp; қарындасының алып келген сәлем-сауқатын тексерген мекеме қызметкерлері бауырсаққа жасырылған тыйым салынған затты тауып тәркіледі.
Қарындасы Nokia маркалы телефоны мен қуаттағыш құрылғысын фольга кағазына орап, бауырсақ ішіне жасырып өткізбек болған. Қамаудағы ағасы &nbsp;ҚР ҚК-нің 106 бабымен 8 жылға бас бостандығынан айырылған.
<blockquote>
 «Қазіргі таңда аталған факті бойынша&nbsp; ҚР ӘҚБтК-нің 481 бабына сәйкес іс –құжаттары процессуалдық шешім қабылдау үшін Қызылорда қалалық әкімшілік сотына жолданды», – делінген мекеменің таратқан хабарламасында.
</blockquote>
<img src="https://kyzylorda-news.kz/wp-content/uploads/2020/09/nan-ishine-zhasyrylghan-telefon-2.jpeg" alt="" />
<img src="https://kyzylorda-news.kz/wp-content/uploads/2020/09/nan-ishine-zhasyrylghan-telefon-3.jpeg" alt="" />

Тергеу изоляторына бауырсаққа жасырып телефон өткізбекші болған қызылордалық ұсталды

<a href="https://kyzylorda-news.kz/date/2020/09/25/">Kyzylorda-news.kz.</a> Қызылорда облысының әкімі Гүлшара Әбдіқалықова барша қызылордалықтарды қала күнімен құттықтады.
Құрметті қызылордалықтар! 
Қадірлі жерлестер!
Баршаңызды Елбасы Алаштың анасына балаған Сыр өңірінің бас шаһары – Қызылорда қаласы күнімен құттықтаймын! 
“Әркімнің туған жері – өзінің Мысыр шаһары”, – деген халықта бір тәмсіл бар. Туған жер туралы ойласақ, сұлу Сыр-ананың сағасын бойлай, тоғыз жолдың торабында орналасқан сүйікті қаламыз – Қызылорданы мақтанышпен айтамыз. 
Қызылорда – Қазақ Республикасының алғашқы астанасы болған қала! Бұл жерде ұлтымыздың тарихи «Қазақ» атауы қайтарылды. Бұл жерде ұлтым деп соққан ұлы жүректердің, Алаш арыстарының ізі жатыр. 
Заман алға жылжып, тарих алмасқан сайын қала да, оның тыныс-тіршілігі де өзгереді, жаңа парақтары ашылады. Бұл – заңды құбылыс. 
Екі ғасырдан астам тарихы бар Сыр елінің бас шаһары бүгінгі күні экономикасы дамыған, әлеуеті артқан қалаға айналды. Заманауи келбеті қалыптасты. Кеңейіп, ұлттық құндылықтар ұлықталып, сол жағалауда дамуда. Инженерлік, коммуналдық инфрақұрылым дамыды. Көп қабатты тұрғын үйлер, әлеуметтік нысандар салынып, халық игілігіне берілуде. 
Тұңғыш Президент саябағы, Рәміздер алаңы, Сыр ана монументі, сол жағалаудағы Рухани жаңғыру, Жастар орталықтары, Сыр сүлейлері аллеясы, әуежай кіреберісіндегі жаңа қақпа, екі жағалауды қосатын көпір, жаңа демалыс орындары, түрлі саябақтар, заманауи сауда орталықтары, қаланың әр бұрышында орналасқан түрлі архитектуралық кескіндер мен көздің жауын алатын әсем гүлзарларды көргенде, сүйсінесің. Ал, самаладай жарқыраған түнгі Қызылорданың келбеті бізді ерекше күйге бөлесе, сырт адам тамсана, қызыға әрі қызғана қарайды. 
Алдағы уақытта қалада Қызылорда су торабын жаңғыртып, саябақ, аллея, мәдени, спорттық ғимараттар, ойын-сауық, сауда орталықтарын салу, тұрғын үй кешенін ұлғайту жоспарлануда. 
Қай қала болмасын әуелі табалдырығынан, тазалығынан танылатыны белгілі. Тазалық, тәртіп, жарасымдылық болса еңбек те өнімді болып, адамдардың да көңіл күйі жақсаратыны анық. Ендеше, Қызылорда – ортақ үйіміз! Оның одан әрі көркейіп, гүлденуі – баршамызға ортақ іс. 
“Дарияның жағасында бір қала бар” деп, ақындар жырға қосқан Қызылорда қаласының мерекесі құтты болсын! 
Әр шаңыраққа шаттық, береке-бірлік орнасын! 
Жайнай бер, жасара бер, жаңғыра бер, сүйікті Қызылордам!

Гүлшара Әбдіқалықова  Қызылорда тұрғындарын қала күнімен құттықтады

<a href="https://kyzylorda-news.kz/">Kyzylorda-news.kz</a>. Бүгін қызылордалықтар «Қала күнін» атап өтеді. Шаһарда мерекеге арналған ауқымды шаралар ұйымдастырылуда.
Қызылорда қаласы – тарихы бай, өндірісі өркендеген, өткен ғасыр басында ұлт зиялылары қызмет еткен рухани орда.&nbsp; Сан ғасырлық тарихы бар Қызылорда қаласының бейнесінде терең саяси, рухани мән жатыр. Бұл тек жарқын заманауи облыс орталығы ғана емес. Бұл біздің елімізге астана болған, әрі&nbsp; тоғыз жолдың торабында орналасқан шаһар.
Қызылорда қаласының&nbsp; тарихында оның атауы бірнеше рет өзгергенін айта кеткеніміз жөн. 1918 жылы қала Ақмешіт аталса,1853 жылы Перовск болып&nbsp; өзгерген. 1922 жылы қайтадан өз атын алса,1925 жылдан бастап Қызылорда&nbsp; деп аталды. Ақмешіт 1818 жылы Қоқан хандығы кезінде Сырдария бойында алғаш қорған ретінде салынып, ақ кірпіштен өрілген мешіттің түсіне орай осылай аталса керек.
1853 жылы Орынбор генерал-губернаторы В.Перовский Сыр қазақтарын қорғаймын деген желеумен орыс әскерлерімен&nbsp; қамалды басып алып, қоқандықтары қуып&nbsp; шыққандықтан ол Перовск деп аталған.1867 жылы қала Сырдария уезінің орталығына айналды.1905 жылы Орынбор-Ташкент теміржолының пайдалануға берілуіне байланысты қалада депо, вокзал үйлері салынған. Ал,1922-1925 жылдары ол қайтадан Ақмешіт атауын алса, 1925-1929 жылдары Қазақстанның астанасы болғаны тарихтан мәлім.
1925 жылы қалаға Қызылорда атауы беріліп, астана атанса, 1938 жылы Қызылорда облысы құрылған. Сыр өңірі бұл қалада атақты ақын-жазушылардың туындылары сахналанғанын, М.Әуезовтың «Еңлік-Кебегі» қойылғанын мақтанышпен айтады. Қорқыт баба, Жалаңтас Баһадүр, Әйтеке би, Жанқожа, Бұқарбай,Тоғанас батырлар, сондай-ақ қазақтың біртуар перзенттері Мұстафа Шоқай, Темірбек Жүргенов, Ғани Мұратбаевтардың есімдерін жас ұрпақ жадында ұстап, үлгі тұтады.
Қызылордалықтар жер еміп, маржандай күріш егіп, еліне еңбегімен танымал болған Балдырған Мұстапаева, Балапан Арзымбетова, Бексұлу Синаева, Райкүл Жалғасбаева, Рысты Өкшебаева, Нәзира Сейсеновадай қыздарының есімін ерекше ілтипатпен атайды.
Қызылорда астана болған жылдары орта оқу және арнаулы оқу орындары, өнеркәсіп және ауылшаруашылық мекемелерімен қоса орталықтан ғылыми-зерттеу ғимараты қазақтың эпидемиология жәнек гигиена институтының негізінде егу лабораториясы дүниеге келді. Сондай-ақ, ең алғашқы рет қазақтың ғылыми-зерттеу, жер қыртысын зерттеу, қазақтың мал дәрігерлік-бактериологиялық және де басқа институттары өз жұмысын осы қалада бастаған.
Күн санап қала аумағы ұлғайып келеді. Соңғы жылдары қалада бірнеше тұрғын үйлер, мәдени-әлеуметтік нысандар, спорт кешендері бой көтерді.

Қызылорда қаласының тарихы тереңде

<a href="https://kyzylorda-news.kz/">Kyzylorda-news.kz.</a> Сенбі күні яғни, 26-шы қыркүйекте Қызылорда қаласында ауылшаруашылық өнімдерінің жәрмеңкесі өтеді. Жеті аудан мен қаладағы шаруалар 1 555 тонна әкеліп, нарық бағасынан арзан бағада сатады.
<blockquote>
 «Біз «Егіс алаңнан сөреге дейін» қағидаты бойынша жұмыс істеп жатырмыз. Яғни, шаруалар өз өнімдерін еш делдалсыз сата алатын болады. Көкөніс, жеміс-жидек, күріш, ет, балық және сүт өнімдерінің барлық түрлері әкелінеді. Аудандарға орындарын бөліп бердік. Барлық санитарлық талаптарды сақтап ұйымдастыратын боламыз», – деді облыстық ауыл шаруашылығы басқармасының басшысы Шахмардан Қойшыбаев.
</blockquote>
Барлық аудан мен қаладан 414 көлікпен 265,6 миллион теңгенің өнімі әкелінеді.

Қызылорда: Қала күніне орай ұйымдастырылған жәрмеңкеге 1,5 мың тонна өнім әкелінеді

<a href="https://kyzylorda-news.kz/">Kyzylorda-news.kz.</a> Қызылорда облысында «Ауыл мектебі» жобасы жүзеге асырылуда. Пилоттық жоба үш мектепке енгізілген. Негізгі мақсат ауыл мен қала балаларының арасындағы оқу алшақтығын жою.
<blockquote>
 «Біздің облыста дарынды, талапты, идеяға құмар оқушылар аз емес. Оларды жан-жақты қолдау шаралары тұрақты жүргізіліп келеді. Биыл біз ауыл мен қала балаларының арасындағы оқу алшақтығын жою бағытында «Ауыл мектебі» жобасын қолға алдық. Пилоттық жоба Қызылорда қаласына қарасты Махамбет ауылындағы №143, Жаңақорған ауданы Құттықожа ауылындағы №164 және Сырдария ауданындағы №132 орта мектебіне енгізілді», – деді облыстық білім басқармасының басшысы Ақзира Қасымова.
</blockquote>
Жоба аясында мектептердің оқу процесі мен материалдық-техникалық базасы зерделеніп, білім беру ортасының мониторингі жасалады. Бастысы, мұғалімдердің кәсіби сұраныстары ескеріліп, ата-аналар мен қоғамның мектеп өміріне қатысуын анықтау үшін арнайы топ құрылады. Пилоттық жоба сәтті жүзеге асса, бұл тәжірибе барлық білім ошақтарына келесі жылдан бастап енгізіледі.
<img src="https://kyzylorda-news.kz/wp-content/uploads/2020/09/brifing-kasymova-2.jpg" alt="" />

Қызылордада «Ауыл мектебі» жобасы жүзеге асырылуда

<a href="https://kyzylorda-news.kz/">Kyzylorda-news.kz.</a> Биылғы жылы қала күніне арналған мерекелік іс-шаралар 21-26 қыркүйек аралығында ұйымдастырылған.
Мерекелік іс-шараларды іске асыру эпидемияға қарсы карантиндік режимге байланысты санитарлық нормаларды сақтай отырып, жергілікті атқарушы органдардың жұмысын қабылданған шектеулерге байланысты үйлестірілетін болады. Осы ретте, іс-шаралар жоспарын дайындау барысында карантиндік ахуал ескеріліп, халықтың жаппай жиналуына жол бермей жаңа тәсілдерді қолдану арқылы ақпараттық тұрғыда және онлайн форматта ұйымдастырылады.
60 жуық мерекелік іс-шара онлайн форматта Ютуб каналы мен Фейсбук, Инстаграм тағы басқа да әлеуметтік желілері арқылы көрсетілетін болады. Негізгі мерекелік шаралар 25 қыркүйекте жаңадан және қайта жаңғыртудан өткен әлеуметтік нысандарды пайдалануға беру салтанатымен ұштасады.
Атап айтқанда, түске дейін облыс және қала әкімінің қатысуымен «Денсаулық» саябағын пайдалануға беру, қайта жаңғыртудан өткен «Сыр ана» алаңының жұмысымен танысу, Жаппасбай батыр көшесі бойындағы жаңа №282 мектеп-лицейін пайдалануға беру, облыстық медицина орталығы алдында «Дәрігерлер» аллеясының ашылуы, жаңадан салынған балалар ойын алаңын пайдалануға беру, мемлекет және қоғам қайраткері Ы. Қалиевтің ескерткіш бюстінің ашылуы, қайта жаңғыртудан өткен «Тағзым» алаңының жұмысымен танысу, сол жағалаудан салынған көпқабатты тұрғын үйлердің пәтер кілтін табыстау рәсімдері жүзеге асырылады.
26 қыркүйек сенбі күні мерейлі мерекеге тарту ретінде Қызылорда қаласы және барлық аудандардың қатысуымен биылғы жылдың алғашқы ауылшаруашылығы өнімдерінің жәрмеңкесі арнайы белгіленген орындарда өтеді.

Бүгін Қызылордада қала күні тойланады

<a href="https://kyzylorda-news.kz/">Kyzylorda-news.kz.</a> Қызылорда облысы әкімінің өкімімен Тремасова Юлия Александровна Қызылорда облысының цифрлық технологиялар басқармасының басшысы лауазымына тағайындалды.
Юлия Тремосова 1975 жылы туған, Қызылорда политехникалық институтын «Бухгалтер-экономист» мамандығы бойынша бітірген.
Еңбек жолын 1992 жылы «Қызылорда электр жарығы» ЖШС-нің жұмыскері ретінде бастаған.
1996 – 2005 жылдары Қызылорда облыстық экономика басқармасының маманы, І дәрежелі маманы, аға маманы, жетекші маманы, бас маманы;
2005 – 2018 жылдары Қызылорда облыстық экономика және бюджеттік жоспарлау басқармасының бөлім басшысы.
2018 жылдан осы кезге дейін Қызылорда облысының цифрлық технологиялар басқармасы басшысының орынбасары болып қызмет атқарып келді.

Қызылорда облыстық цифрлық технологиялар басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Арал ауданында «Цифрлық Қазақстан» мемлекеттік бағдарламасының аяқ алысы ширақ. Мәселен, аталған бағдарлама шеңберінде 2020 жылдың соңына дейін ауданымыздағы 15 елді мекенді Kcell, Tele2 және Beeline операторлары арқылы 3G/4G сымсыз технологияларымен және мобильді ұялы байланыс қызметімен қамтамасыз ету жоспарланған.
Осы бағытта ауданға қарасты Жіңішкеқұм ауылдық округі, Тоқабай елді мекеніне Beeline операторы арқылы байланыс орнатылып, мобильді интернетке (3G) қол жеткізілді. Қазіргі таңда қалған елді мекендерде мұнара орнатуға қажетті жер телімдерін рәсімдеу бойынша жұмыстар аяқталып, операторлар тарапынан монтаждау жұмыстары басталуда.
Бүгін аудан әкімі Мұхтар Оразбаев алыстағы ағайыннан тікелей хабар алысуына мол мүмкіндік туған Тоқабай ауылына жұмыс сапарымен барып, жергілікті тұрғындармен жүздесіп қайтты. Ауыл тұрғындарының қуанышында шек жоқ. Ауыл ақсақалдары атқарылған жұмыстардың нәтижесі үшін аудан әкіміне өз ризашылықтарын жеткізді.
Жұмыс сапары барысында аудан басшысы Тоқабай елді мекеніне кіреберіс 2 шақырым жолдың жөндеу жұмыстарын да бақылап өтті. Жол жөндеу жұмыстарына жауапты мердігер «СтандартОйлКЗО» ЖШС өкілдерімен кездескен аудан әкімі жүктелген міндеттерді сапалы әрі талапқа сай жүзеге асыруды тапсырды.
Сонымен қатар ауданға қарасты тұзшылар мекені – Жақсықылыш кентіне ат басын бұрған аудан әкімі №19 мектебіне қосымша 100 орындық оқу корпусын салу жұмыстарымен танысты. Құрылысқа жауапты мамандарға нысанның есік-терезелерін орнату жұмыстарын жеделдетіп, ішкі әрлеу жұмыстарын уақытылы қолға алу керектігін ескертті. Сондай ақ құрылыс жұмыстарын сапалы жүргізуді басты назарда ұстауды тапсырды. Айта кету керек, «Ауыл-ел бесігі» бағдарламасы аясында жүргізіліп жатқан құрылыс жұмыстарын «Самат-Мұнай» ЖШС-гі жүзеге асыруда.
<img src="https://kyzylorda-news.kz/wp-content/uploads/2020/09/aral-awdanyndaghy-2.jpg" alt="" />
<img src="https://kyzylorda-news.kz/wp-content/uploads/2020/09/aral-awdanyndaghy-3.jpg" alt="" />
<img src="https://kyzylorda-news.kz/wp-content/uploads/2020/09/aral-awdanyndaghy-4.jpg" alt="" />

Арал ауданындағы ауылдарда ұялы байланыс жүйесі іске қосылды

Kyzylorda-news.kz. <a href="https://www.kazhydromet.kz/weather/prognoz-vazhneyshih-meteorologicheskih-yavleniy">«Қазгидромет»</a>&nbsp;РМК-сы қыркүйектің 25-і күнгі ауа райы болжамын жария етті.
Кәсіпорын таратқан мәліметтерге қарағанда, қыркүйектің 25-і күні республиканың солтүстігі мен шығысында атмосфералық ағындардың өтуіне байланысты ауа райы құбылмалы болады.
Республика бойынша кей жерлерде жауын жауып, тұман түсіп, жел күшейеді, оңтүстікте шаңды дауыл тұрады.
Қызылорда облысында жел күшейіп, түнде кей жерлерде секундына 15-20 метр жылдамдықпен, күндіз басым бөлігінде 15-20 метр жылдамдықпен жел соғып, екпіні 23-28 м/с-ке жетеді. Республиканың кей жерлерінде шаңды дауыл тұрады.

Жұмаға арналған ауа райы болжамы

Облыстағы мәдениет ұйымдарында өнердің түрлі жанрлары бойынша 854 үйірме жұмыс істейді. 10 мыңнан аса өнерпаз қамтылған. Үйірмелердің 340-ы балаларға, 376-ы жасөспірімдер мен жастарға, 138-і егде жастағыларға арналған. Барлық аудандар мен Қызылорда қаласында жыр-терме, қобыз үйірмесі ашылып, 300-ден аса балалар дәріс алуда. 
-Жастардың музей жұмысына, бейнелеу өнеріне қызығушылығын арттыру бағытында «Жас өлкетанушы», «Мирас» экскурсоводтар клубы және С.Айтбаев атындағы көркемсурет галереясында ИЗО-студия жұмыс істеуде. Оған 70-ке жуық оқушылар мен студенттер тартылған. Бүгінгі таңда барлық үйірме жұмыстары бекітілген кестеге сәйкес онлайн түрде жүргізілуде. Үйірме мүшелеріне түрлі бағыттағы шеберлік сағаттары өткізіліп, олардың шығармашылық тұрғыдан білім алуына кең қолдау көрсетілуде, – деді облыстық мәдениет, архивтер және құжаттама басқармасының басшысы Мира Абуова. 
Ә.Тәжібаев атындағы облыстық әмбебап-ғылыми кітапханасында «Креатив-территория» атты жоба аясында АРТ-студия ашылды. Студияға келуші 100-ден аса жас таланттар бейнелеу өнері, домбыра, фортепиано және би үйірмелеріне қатысуда. Мұнда ағылшын, корей тілдерін үйрететін үйірме бар. Ал жұмыссыз жастар және әлеуметтік жағынан аз қамтылған азаматтар «Шаңырақ» интеллект-орталығында компьютерлік сауаттылығын арттыруда. 
Басқармаға қарасты мәдениет үйлерінің ұйымдастырып жатқан шараларын Youtube желісіндегі «Сыр шаңырағы» каналынан көруге болады.

Қызылорда: Барлық ауданда жыр-терме, қобыз үйірмесі ашылады

Kyzylorda-news.kz. Президентіміз Қ.К.Тоқаевтың биылғы «Жаңа жағдайдағы Қазақстан: іс-қимыл кезеңі» деп аталатын Жолдауында: «Бізге елімізді ғылыми – технологиялық тұрғыдан дамыту жөніндегі арнаулы бағдарламалық құжат қажет.
Оның басты міндеті ұлттық деңгейдегі нақты мәселелерді шешуге ғылымның әлеуетін пайдалану болмақ» – деп айтқан болатын. Алдағы уақытта, демек, Қазақстан қоғамының дамуында, Қазақстан мемлекетінің нығаюында ғылымның маңызы арта түспек. Ғылымды дамыту үшін алдымен оған жағдай жасау керек, ғылым өкілдері – ғалымдарды мемлекет қамқорлыққа алып, олардың материалдық, әлеуметтік жағдайын жақсарту үшін марапаттау, ынталандыру тетіктерін ойластырмаса болмайды. Өкінішке орай, қазіргі жағдайда ғылымды мемлекет тарапынан қаржыландырудың олқы тұстары жетерлік. 2019 жылдың 9-сәуірінде «Казахстанская правда» газетінде жарияланған сенатор Бақытжан Жұмағұловтың «Время определиться» деген мақаласында: Қазақстанда ғылымға 2015 жылы ішкі жалпы өнімнің 0,17%, 2016 жылы 0,14%, 2017 жылы 0,13% -ы бөлінгенін, ал дамыған елдерде Оңтүстік Корея, Германия, Бельгия, Австралияда ішкі жалпы өнімнің 2,3,4% дейін жұмсалатынын айтқан болатын. Президент Жолдауында жергілікті өндіріс орындары табысының 1% -н сол өңірдегі аймақтық жоғары оқу орындарына беру қажеттілігі айтылды. Бұдан университеттік ғылымды дамытуға жергілікті билік пен университет басшылығының бірлесіп атқаратын қызметтік міндеттері туындайды.
Президентіміздің 2020 жылғы жолдауынан кейін Үкімет ғылымды қаржыландырудың олқы тұстарына назар аударады деп үміттенеміз. Мемлекет басшысы өз сөздерінде, баяндамаларында әркез қоғам мен мемлекет даму үшін мектеп мұғалімдері мен жоғары оқу орындары оқытушыларының жағдайларын жақсарту мәселесін үнемі айтып келеді. Мемлекет басшысы Қ.К.Тоқаев мемлекеттік тілде зерттеу жүргізетін гуманитарлық бағыттағы ғалымдарға басымдық беруге арналған нақты шаралар қабылдауды үкіметке тапсырған. Осы мәселелер биылғы Жолдауда да айтылып, Қазақстан Үкіметінің нақты міндеттері айқындалды. Алдағы уақытта қоғам өміріндегі басқа мәселелермен қатар, ғылымды қаржыландыру да дұрыс жолға қойылады деп үміттенеміз.&nbsp;
&nbsp;&nbsp;Бағдат КӘРІБОЗҰЛЫ
Қорқыт Ата атындағы Қызылорда университеті
«Қорқыттану және өлке тарихы» ҒЗИ директоры,
Қазақстанның еңбек сіңірген қайраткері,
филология ғылымдарының докторы, профессор

Бағдат Кәрібозұлы: Президент  Жолдауында ғылымды дамытуға бағыт, бағдар берілді

<a href="https://kyzylorda-news.kz/">Kyzylorda-news.kz.</a> Шығыс Қазақстан облысының тауарлар мен көрсетілетін қызметтердің сапасы мен қауіпсіздігін бақылау департаменті кезекші сыныптар мен шағын мектептерде коронавируспен ауырып қалған төрт оқушы туралы ақпарат таратты.
<blockquote>
 “Бірінші қыркүйектен бастап облыста төрт бала коронавирус жұқтырды. Олар Шемонаиха ауданының төртінші сыныбында оқитын екі оқушы, Көкпекті ауданының 11-сынып оқушысы және Алтай ауданының 2-сынып оқушысы. Науқастар оқитын мектеп шағын жинақталған мектеп болып табылады”, – деп хабарлады департамент.
</blockquote>
Екі сынып пен бір мектеп екі апталық карантинге жабылды.
COVID-19 инфекциясы анықталған барлық мектепте эпидемияға қарсы дезинфекциялық шаралар жүргізілді.
Айта кетейік, 14 қыркүйекте 2-сынып оқушысының коронавирус жұқтырғаны белгілі болған.
Ал 18 қыркүйекте өткен брифингте тауарлар мен көрсетілетін қызметтердің сапасы мен қауіпсіздігін бақылау комитетінің жұқпалы ауруларды эпидемиологиялық қадағалау басқармасының басшысы Роза Қожапова кезекші сынып оқушылары арасында инфекция жұқтырғандар жоқ екенін хабарлады.
Алайда, коронавирус қашықтан білім алатын 9-сынып оқушысынан да анықталған.
<a href="https://m.sputniknews.kz/society/20200924/15042004/infektsiya-zhuqtygran-oqushylar.html">Sputniknews.kz</a>

Қазақстан және Қызылорда облысының жаңалықтары