<a href="https://kyzylorda-news.kz/">Kyzylorda-news.kz</a>. Ескендір Хасанғалиев 1940 жылы 13 ақпанда Батыс Қазақстан облысы Қаратөбе ауданы Қалдығайты округі Батпақкөл мекенінде дүниеге келген. Қаралы хабарды әнші Елена Әбдіқалықова фейсбук әлеуметтік желісінде хабарлады.
Ауыл баласы алғаш рет нотамен Орал қаласында алты ай баян аспабында ойнайтын музыканттар курсында танысқан. Ал фортепианоны алғаш рет 1959 жылы Құрманғазы атындағы консерваторияның дайындық бөліміне түскен кезде көрген. Ол кезде әнші 19 жаста еді. 
1963 жылы Қазақ радиосында музыка редакторы болды. Бір жылдан соң Құрмaнғaзы aтындaғы Aлмaты мемлекеттiк консервaториясының вокaлды-хор фaкультетiн Галина Виногрaдова мен Надия Шәріповaның клaсында бітірген.
Қазақ ұлттық педагогикалық қыздар институтында хор дирижері, Қазақ радио және телеарна оркестрінің солисі қызметін атқарды.
1978 жылы әл-Фараби атындағы Шымкент мәдениет институтын сырттай оқып бітірген.

Ескендір Хасанғалиев өмірден өтті

<a href="https://kyzylorda-news.kz/">Kyzylorda-news.kz</a>. «Ashyq» жобасына қатысатын объектілердің жұмысына шектеу өлшемшарттарын белгілейтін жаңа Қаулы қабылданды.
Қаулыға сәйкес:
Қоғамдық тамақтану орындарының жұмысы- толтырылуы 50%-ға дейін, бірақ 50 орыннан асырмай сағат 7.00-ден 24.00-ге дейін
Сауналар- сағат 09:00-ден 23:00-ге дейін, жексенбі күні қызметін тоқтата отырып жұмыс жасайды
СПА-орталыктар, бассейндер- қалыпты режимде
Йога орталықтарын қоса алғанда фитнес-клубтары- қалыпты режимде
Театрлар, филармониялар, концерт залдар – қалыпты режимде
Компьютерлік клубтар, PlayStation клубтары – толтырылуын 50%-дан асырмай сағат 12:00-ден 24:00-ге дейін
Боулинг клубтары- толтырылуын 50%-дан асырмай сағат 12:00-ден 24:00-ге дейін шектеумен жұмыс жасауға рұқсат.
Қызылорда облысының тұрғындары және қонақтары келесі талаптарды сақтауы тиіс:
бұқаралық іс-шараларды, отбасылық, еске алу іс-шараларын қосқанда, оның ішінде үйде (ауыз ашар, банкеттер, үйлену тойлары, мерейтойлар, еске алу және т.б.) ұйымдастыру және өткізуге, митингілер, шерулер, жиындар және т. б. өткізуге және қатысуға тыйым салынады;
қызметі жаңартылмаған объектілерге: боулинг-орталықтарға, компьютерлік клубтарға («Ashyq» жобасына қатысатын объектілерді қоспағанда), кинотеатрлар, кинорумдар, бильярд, караоке, батуттар, түнгі клубтар, букмекерлік кеңселер мен ойын клубтарына, оның ішінде жабық үй-жайлардағы лотереялар, балалар ойын орталықтары және ойын алаңдары мен аттракциондар, оның ішінде спорт объектілерінде орналасқандарды қоспағанда, мұз және роликті мұз айдындарына баруға рұқсат берілмейді.
Осы Қаулы қол қойылған күннен бастап күшіне енеді.

Қызылорда қызыл аймақта: Жаңа қаулы шықты

<a href="https://kyzylorda-news.kz/">Kyzylorda-news.kz</a>. Кәсіпкерлік Кодекстің 124-6-бабының және&nbsp; Қазақстан Республикасы Ұлттық экономика министрінің 2017 жылғы 1 ақпандағы №36 бұйрығымен бекітілген Қоғамдық маңызы бар нарықтарда баға белгілеу Қағидаларының талаптарына сәйкес алдағы уақытта реттелетін қызмет бағаларының көтерілетіні туралы хабарламаны қарау кезінде жария тыңдаулар міндетті түрде өткізіледі.
Қазақстан Республикасы Ұлттық экономика министрлігі табиғи монополияларды реттеу комитетінің Қызылорда облысы бойынша департаментімен «Энергосервис» ЕЖШС-нің хабарламасын қарау кезінде &nbsp;жария тыңдау өткізді. Жария тыңдауға депутаттар, жергілікті атқарушы және мемлекеттік органдардың, бұқаралық ақпарат құралдарының, үкіметтік емес ұйымдардың өкілдері және тұтынушылар қатысты.
Электр энергия тарифтерінің өзгеруінің негізгі себебі Қазақстан Республикасы Энергетика министрінің 30 наурыздағы №108 бұйрығына сәйкес 2021 жылдың 1 сәуірінен бастап энергия өндіруші станциялардағы электр энергиясы құнының 11 пайыздан 25 пайызға дейін артуы.
«Энергосервис» ЕЖШС-нің электрмен жабдықтау қызметінің жобалық орташа босату бағасы ҚҚС-мен 1 кВт.сағ 21,97 теңгені құрады немесе 16,4 пайызға өзгеруімен.
Қазіргі кезде, Департаментпен бағалардың өзгеруін негіздеуге ұсынылған құжаттарға сараптама жүргізілуде. Сонымен бірге, Қазақстан Республикасы Ұлттық экономика министрлігі табиғи монополияларды реттеу комитетінің Қызылорда облысы бойынша департаментімен тұрғындарға тариф жүктемесін азайту үшін барлық қажетті шаралар қабылданатын болады.
Өткізіліп отырған жария тыңдаудың қорытындысы бойынша айтылған ескертпелер мен ұсынысынтарды ескере отырып, Департаментпен соңғы шешім 2021 жылдың 16 мамырында қабылданады.
Қазақстан Республикасы Ұлттық экономика министрлігі
табиғи монополияларды реттеу комитетінің
Қызылорда облысы бойынша департаменті

Электр энергиясының қымбаттауына байланысты тыңдау өтті

<a href="https://kyzylorda-news.kz/">Kyzylorda-news.kz</a>. Қатары сиреп, жойылу қаупі бар омыртқалы жануар мен өсімдіктер тізімі әр елдің “Қызыл кітабына” енгізілген. Олар заңмен қорғалады. Тізімде бар жануарды ату, өсімдікті жою заңмен қудаланады. “Түлкінің қызылдығы өзіне сор” демекші, бұл тізімдегі жануарларға аңшылардың қызығушылығы жоғары. Көктем шыға Қаратау аймағында жайқалып өсетін қызғалдақты қызық үшін үзетіндер де көп, деп хабарлайды <a href="https://sputnik.kz/?_ga=2.150607030.1493511750.1619495671-100027139.1602926215">Sputnik Қазақстан</a>.
<h3 id="">Қызғалдақ құны</h3>
Жуырда Түркістан облысында “Қызыл кітапқа” енген қызғалдақты жұлғанға ірі көлемде айыппұл салынатыны туралы ақпарат тарады. Көпшілік “9 миллион теңге” деген соманы көре сала, пікір екіге бөлінді. Бірі бұл соманың көп екенін, екіншісі табиғатты қорғау қажет екенін алға тартты.
Заңға сәйкес, өсімдіктің сирек кездесетін немесе жойылу қаупі төнген түрін заңсыз жойған адамның мүлкі тәркіленіп, белгілі бір лауазымды атқару құқығынан 5 жылға дейінгі уақытқа айырылуы мүмкін. Кей жағдайда 3000 АЕК-ке (8 751 000 теңге) дейін айыппұл салынады. Немесе осы мөлшерде түзеу жұмыстарына, 800 сағатқа дейін қоғамдық жұмысқа тартылады.
Одан бөлек азамат табиғатқа келтірілген шығын ретінде әр гүл үшін 0,5 АЕК немесе 1458,5 теңге өтемақы төлейді.
Заңгер, экобелсенді Абзал Құспанның айтуынша, айыппұл бір ғана мақсатта – сол экожүйені қалпына келтіруге жұмсау үшін салынады.
Түркістан облысы полиция департаментінің хабарлауынша, Бәйдібек ауданында 6 қызғалдақты жұлу фактісі бойынша қазір сотқа дейінгі тергеу жүріп жатыр.
Дәл осы Түркістан облысында 2020 жылы “Қызыл кітапқа” енген қызғалдақты жұлу бойынша 7 жайт тіркелген. Оның барлығы Бәйдібек ауданында болған. Оның ішінде 6 іс соттан өткен, біреуі сотқа жетпей қысқарған. Ол азаматтар соттың шешімімен әр қызғалдаққа 0,5 АЕК көлемінде өтемақы төледі.
Ал 2021 жылдың басынан бері дәл осындай 3 жағдай тіркелді. Оларға қатысты процессуалдық шешім қабылданбаған.
Жергілікті табиғатты қорғау саласындағы мамандардың айтуынша, қызғалдақ жұлу бойынша жылына 10 дерек тіркеледі, дәл сондай 100 жағдай назардан тыс қалады. Себебі жол бойында өсіп тұрған гүлді жұлып, көлігімен әрі қарай жүріп кететін адам көп. Оның бәрін бақылауға мүмкіндік жоқ, себебі аумақ үлкен, қызғалдақ әр жерде өседі.
<blockquote>
 “Түркістан облысында 110-нан астам өсімдік түрі “Қызыл кітапқа” енген. Соның ішінде қызғалдаққа деген сұраныс көп. Жыл сайын сәуір-мамырда қызғалдақ 15 күн бойы гүлдейді. Түркістан облысының Түлкібас, Төле би, Бәйдібек аудандарында “Грейг” қызғалдағы көп кездеседі. Көктем кезінде тауға тұрғындар демалуға барады. Сол кезде қызығып, гүлдерді жұлады”, – дейді Түркістан облысы орман шаруашылығы және жануарлар дүниесі аумақтық инспекциясының орман және ерекше қорғалатын табиғи аумақтар бөлімінің басшысы Нұрдәулет Оразымбетов.
</blockquote>
Маманның айтуынша, қызғалдақтың гүлін жұлған адам оны жоймайды. Себебі пиязшығы астында қалады. Алайда қызғалдақ гүлінен ұрық шашып, әрі қарай көбеюі керек. Демек, табиғатқа шығын келді. Сол себепті қызғалдақ жұлған адамның қоршаған ортаға қандай зиян келтіргені есептеледі.
Дей тұрғанмен, қызғалдақ жұлғандар сол арқылы табыс табуды көздемейді. Тіпті арасында оның заңмен қорғалатынынан бейхабар адамдар да бар. Алайда заң бәріне ортақ.
Айта кетейік, облыстағы Орман және ерекше қорғалатын табиғи аумақтар бөлімінде небәрі 4 адам жұмыс істейді. Олар мемлекеттік орман қоры жеріне, ерекше қорғалатын табиғи аумақтарды қадағалау-бақылау жұмыстарына жауапты.
<h3 id="-1">Арқарға көз тіккендер көп</h3>
Түркістан облысында “Қызыл кітапқа” енген балықтың 5 түрі, қосмекендінің 4 түрі, сүқоректілердің 14 түрі, құстың 23 түрі мекендейді. Көпшіліктің көзі Қаратау арқарына түседі. Сондай-ақ құмды аймақтарда қарақұйрықты аулау әрекеті жиі тіркеледі.
“Қарақұйрық аулау бойынша жылына 1-2 дерек тіркеледі. Содан кейін қарабауыр бұлдырық деген құс бар. Осы құсты және Қаратау арқарын ататындар бар. Арқар ату фактісі екі жылда бір рет тіркеледі. Алайда Қаратау арқарын атуға деген қызығушылық жоғары. Сондықтан көбіне күзет қызметін сол аумақтарды бақылауға үгіттейміз”, – дейді Түркістан облысы орман шаруашылығы және жануарлар дүниесі аумақтық инспекциясының жануарлар дүниесі және аңшылық шаруашылығы бөлімінің басшысы Бақыт Мұсалиев.
Арқар мекендейтін аумақта тұяқты жануарды атуға арналған суық қаруды асынып жүретіндер жиі кездеседі. Олардың әрекеті жүзеге аспаған соң пиғылын дәлелдеу мүмкін емес.
“Бізде қасқыр, шибөріні атуға арналған “жыртқыш аңдармен күрес” деген шара бар. Сол процесті жүргізуге рұқсатымыз бар деп, құжатын көрсетіп құтылып кетеді. Себебі оларда олжаланған аң болмайды”, – дейді Мұсалиев.
Оның сөзінше, табиғатқа ешқандай зиян келтірмесе, яғни аң аулауға шығып, ештеңе олжаламаса, ол адамға ескерту беріледі. Егер қоршаған ортаға зиян келтірсе, залал көлемі 5 АЕК (14 585 теңге) мөлшерінен асса, айыппұл салынады.
Мысалы, 2019 жылы Қаратау арқарын атқандар ұсталды. Ұрғашы арқардың буаз болғаны анықталған. Сол кезде қоршаған ортаға келтірілген шығын 17 миллион теңгеден асты.
Заңгер Абзал Құспанның айтуынша, қазір браконьерлерді ұстау оңай емес. Оларды ұстауға арнайы мамандар тартылады. Арнайы көлік пен арнайы құралдар қажет. Браконьерлердің бес сайманы түгел, дайындығы бар.
<blockquote>
 “Бюджеттік мекеменің қажетті техниканы алуға жағдайы жете бермейді. Қазіргі аңшылар балам үшін, ел үшін деп аң аулайтындар емес, олар – еріккендер. Олармен күреске жұмсалған шығын орнын толтыру, экожүйенің орнын толтыру мақсатында айыппұл салынады. Егер аңшы қарсыласқан жағдайда қоғамға қауіпті адам деп есептеледі. Табиғат қорғаушыларына қандай да бір қарсылық көрсетсе, бас бостандығынан айыру керек. Себебі ол қоғамға қауіпті деген сөз”, – дейді заңгер.
</blockquote>
Бұл мәселе жайлы жануарлар дүниесі және аңшылық шаруашылығы бөлімі басшысы да айтты. Бұл бөлімде облыс бойынша 3 адам жұмыс істейді. Одан бөлек таулы аймақтарды күзететін мекемелерде 2 топ бар, ол жерде 14 адам жүреді.
“Айыппұл көлемінің артуы аң аулау санының азаюына ешқандай әсер етпейді. Аумақтық инспекцияда облыс бойынша 3 адам жануарларды қорғаумен айналысады. Олар жануарларға қатысты шығынды есептейді, сот процесіне қатысады, аңшылық-шаруашылық аймақта рейд ұйымдастырады, жануарлардың санақ жұмыстарын жүргізеді. Аумақты қамтып үлгеруі мүмкін емес. Мүмкіндік болса, техника, жабдықпен қамтамасыз ету жағына көңіл бөлінгенін қалаймыз”, – дейді Бақыт Мұсалиев.
“Көлік керек. Өтімділігі жоғары көліктер керек. Джип немесе соған ұқсас көліктер қажет. Біз мініп жүрген Нива, УАЗ секілді көлік Джип автокөлігінің соңынан қуса жете алмайды”, – дейді ол.
Соған қарамастан қазір Түркістан облысында Қаратау арқары мен қарақұйрықтың саны артып келеді. Өңірде арқардың саны 1000-ға, қарақұйрық саны 100-ге жуықтады. Олардың саны көбейген сайын адамның көзіне де көп түседі. Елді мекендерге жақындайды. Алайда адамдар жауапкершілікті сезініп, артық әрекетке бармайды.
“Ақпарат қазір көпшілікке қолжетімді. Аң атқаны үшін берілетін жазаның қандай екенін оқып-біліп отыр. Қолында рұқсаты бар аңшының өзі бағалы аңды көрген кезде “ешкім көріп тұрған жоқ қой” демейді. “Бәлесінен аулақ, тыныштық керек” дейді. Қазір аңшылық тәрбие қалыптасып жатыр деп айтуға болады. Жылдан-жылға тұяқты аңдарға шабуыл жасау фактісі азайып жатыр”, – дейді маман.
<h3 id="-2">“Бүгінгі аңшылық – сананың құлдырауы”</h3>
Қоғам белсендісі, табиғат жанашыры Қайрат Кәрібаевтің айтуынша, ертеде адам аңға күн көру, отбасын асырау үшін шықса, қазір адамдар моральдық не материалдық аштықтан шығады.
“Қазақстан аумағында табиғаттың алуан түрлілігі жыл сайын азайып бара жатыр. Бұл мәселені шешу үшін биыл Экологиялық кодекске өзгерістер енгізіп, жауапкершілікті күшейтіп жатса да, флора мен фаунаға төнген қауіп азаяр емес. Өткенде ғана елді дүрліктірген “9 миллион теңге айыппұл” қоғамды екіге бөліп тастап еді. Бұл жағдай тек өсімдіктің бір түрі туралы. Ежелден-ақ адам аңшылыққа күнін көру, азығын табу үшін шыққан. Бүгінгі күннің аңшылығы – таза сұғанақтық. Көлікпен қуып жүріп аңның сілікпесін шығарып, сосын жанына барып, қырып салады. Бұл – сананың құлдырауы, обалды ұмыту”, – деді қоғам белсендісі&nbsp;<a href="https://sputnik.kz/?_ga=2.248666247.1493511750.1619495671-100027139.1602926215">Sputnik Қазақстан</a>&nbsp;тілшісіне берген сұхбатында.
Ол табиғатты қорғау саласындағы бірнеше мәселені көтерді. Айтуынша, табиғат қорғаушылардың материалдық-техникалық базасы жұпыны күйде тұр. Браконьер соңғы үлгідегі джип, оптикасы мықты қару, байланыс құралдарымен жүрсе, кейбір инспекторлар жеке көлігімен рейдке шығады.
<blockquote>
 “Табиғат қорғаушысының қолында қаруы жоқ, құқығы шектелген. Екіншіден, табиғат қорғаушылардың материалдық жағдайы төмен. Олар 70-80 мың теңге айлыққа жұмыс істейді. Соған байланысты саны азайып бара жатқан жан-жануар мен өсімдіктерге өзінің “доступын” пайдалануға беріп немесе жоғарыдағы “көке-Жәкелердің” тапсырысын орындауға мәжбүр болуы мүмкін. Қазір арқар, ақбөкен, бекіренің етін дастарқанға қою сәнге айналып бара жатқаны белгілі”, – дейді.
</blockquote>
Сол себепті қорықшылардың жалақысына мән беруді ұсынды. Белсендінің сөзінше, табиғатқа шабуыл жасаудың алдын алу – халықтың әлеуетін көтеру.
“Балық пен аңды заңсыз аулауға адам жетіскенінен шықпайды. Бұл да адамдардың тұрмысына тікелей байланысты. Сондай-ақ, экологиялық мәдениет пен сананы қалыптастыру күттірмейтін проблема. Тек солай ғана “Қызыл кітап”, “Қара кітап” тізімінің толығуын тоқтатуға мүмкіндік бар”, – дейді Қайрат Кәрібаев.
Ол сондай-ақ айыппұл санын арттырғаннан бұрын халыққа жан-жануардың киесі туралы ұғымды түсіндірген жөн деп санайды.
Айта кетейік, Қазақстанның “Қызыл кітабына” қазір өсімдіктің 400-ге жуық түрі және омыртқалы жануарлардың 133 түрі енген.
P.S.&nbsp;Қазақстанның қылмыстық кодексінің 339-бабы “Сирек кездесетін және құрып кету қаупі төнген, сондай-ақ пайдалануға тыйым салынған өсімдіктер мен жануарлар түрін, олардың бөлігін немесе дериватын заңсыз пайдалану” бойынша 3 жылдан 5 жылға дейін бас бостандығын шектеу немесе сол мерзімге бас бостандығынан айыру, 7 жылдан 12 жылға дейін бас бостандығынан айыру жазасы қарастырылған.

Алты қызғалдақ үшін 9 млн теңге: &#8220;Қызыл кітаптағы&#8221; өсімдік пен жануар қалай қорғалған?

<a href="https://kyzylorda-news.kz/">Kyzylorda-news.kz</a>. Президент Қасым-Жомарт Тоқаев “Қазақстанның 100 жаңа есімі” жобасының жеңімпаздарымен кездесті. Бұл туралы Ақорданың баспасөз қызметі хабарлады.
Мемлекет басшысы “Қазақстанның 100 жаңа есімі” жобасының жеңімпаздарын құттықтап, олардың өз дарынымен көпшілікті мойындата білгенін, мемлекетімізді өркендетуге айырықша үлес қосып келе жатқанын айтты.
<blockquote>
 “Қазақтың қандай халық екенін жер жүзіне танытып жүрген бірнеше азамат осы жобаның жеңімпазы атанды. Біз түрлі салада жетістікке жеткен осындай отандастарымыздың еңбегін дәріптеуіміз керек. Өйткені табысты жандардың тәжірибесі әрдайым басқаларға үлгі-өнеге. Өскелең ұрпақ өздеріңізге қарап бой түзейді, ұқсауға тырысады. Мен еліміздің әрбір перзенті сіздер сияқты өнегелі болсын деп тілеймін”, – деді президент.
</blockquote>
Ол осы уақытқа дейін 75 мың адам қатысқан жобаның жеңімпаздарының алдында гүлденген, әділ, прогрессивті Қазақстанды құру міндеті тұрғанын атап өтті.
Осы жобаның арқасында өзінің ерекше емдеу тәсілімен көптеген адамға перзент сүю бақытын сыйлаған дәрігер-репродуктолог Айдос Ибрагимовты бүкіл еліміз таныды.

Тоқаев: Жастар мемлекеттің басқару тізгінін қолға алуға дайын болу керек

<a href="https://kyzylorda-news.kz/">Kyzylorda-news.kz</a>. Сегіз жастағы велосипедшіні көлік қағып кетті, деп хабарлайды Polisia.kz.
Ақтөбеде көлік жүргізуші сегіз жастағы велосипедшіні қағып кетті.
28 сәуірде Мәртөк ауылында «Дэу Нексия» автокөлігінің 29 жастағы жүргізушісі Байтұрсынов көшесімен келе жатып, жолдың жүру бөлігін кесіп өткен сегіз жастағы велосипедшіні қағып кетті. Жол-көлік оқиғасы салдарынан кәмелетке толмаған бала жарақат алып, Ақтөбе қаласындағы ОБКА-ға жеткізілді.

Сегіз жастағы велосипедшіні көлік қағып кетті

<a href="https://kyzylorda-news.kz/">Kyzylorda-news.kz</a>. Белгісіз біреулер Ташкенттегі қайырымдылық қорабына 50 мың доллар салып кеткен. Бұл ақша ауыр науқас балаларды емдеуге жұмсалады, деп хабарлайды&nbsp;<a href="https://stan.kz/">Stan.kz</a>.
Жәшік Korzinka супермаркеттер желісінің&nbsp;бірінде болған деп хабарланған. Белгісіз адамдар оған 50 мың доллар қалдырып кеткен. Бұл туралы әлеуметтік желілерде дүкен&nbsp;жетекшісі Зафар Хошимов хабарлады.
<blockquote>
 “Бүгін біз тағы бір қайырымдылық қорабын ашып, ақшаны санап жатқанда қораптан оннан астам ақ конверт шықты. Біз оларды ашқан кезде конверттерде 50 000 доллар барын анықтадық. Қасиетті Рамазан айында ауыр науқас балаларға осындай керемет сыйлық жасаған біздің белгісіз отандасымыздың осындай шынайы әрекеті осы оқиғаның куәгері болған осы қасиетті айдың кереметіне деген сенімімізді нығайтты”, – делінген хабарламада.
</blockquote>
Кәсіпкердің айтуынша, барлық қаражат “Эзгу амал” қайырымдылық қорының шотына аударылады. Бұл қор онкологиялық аурулары бар балаларға көмек көрсетуге маманданған.
<img src="https://kyzylorda-news.kz/wp-content/uploads/2021/04/news_full1619782427a402cc863e74f5aa7710569f721f9c7b.jpg" alt="" />

Белгісіз біреу 50 000 доллар ақшаны қайырымдылық жәшігіне тастап кеткен

<a href="https://kyzylorda-news.kz/">Kyzylorda-news.kz</a>. Қызылордалық кәсіпкер Кемалладин Өтеев мал шаруашылығымен айналысу үшін «Еркебұлан» шаруа қожалығын құрып, несие серіктестігінен 40 млн теңге несие алады.
<blockquote>
 &nbsp;«Алынған несиеге 100 бас жылқы алдым. Мал басын көбейткім келген. Жоспарым бойынша 3 жылдан кейін пайдаға шығу мүмкіндігім бар еді. Негізі серіктестіктен несиені осы жылдың наурызында 16 пайызбен алдым. «Агробизнес» бағдарламасы арқылы алғандықтан 10 пайызы мемлекет есебінен субсидияланып, мен кәсіпкер ретінде тек 6 пайызбен ғана төлеуім керек еді. Алайда мемлекеттен ақша бөлінбегендіктен әлі күнге дейін «Qoldau.kz» қосымшасы арқылы өтініш бере алмай отырмын. Қосымша өтініш қабылдамай тұр. Қазір несиені толық 16 пайызбен төлеп жатырмын. Әрі қарай төлейтін ақшам жоқ. Мәселені шешудің жалғыз жолы – алған малымды сату. Олай жасамасам кепілге қойылған үйімнен айрылып қаламын», – дейді кәсіпкер Кемалладин Өтеев.
</blockquote>
Кәсіпкер несиені «Сырдария-1» несие серіктестігінен алған. Аталмыш серіктестік соңғы бес айда 45 шаруа қожалығына 850 млн.теңге несие беріпті. Бүгінде осы 45 кәсіпкер субсидия ала алмай отыр.
<blockquote>
 &nbsp;«Несие серіктестіктер «Аграрлық несие корпорациясы» арқылы мемлекеттік бағдарламаларды іске асырады. Бұл бағдарламалардың барлығы ауыл шаруашылығы саласына техника, мал және тағы да басқа заттар алуға бағытталған. Бағдарламаның шарты бойынша несие 14-16 пайыз аралығында беріледі. Ауыл шаруашылығы министрлігі бекіткен арнайы субсидиялау ережесі бар. Аталмыш ережеге сай сол 16 пайыздың 10 пайызы субсидиялауға жатады. Өкінішке орай, 2020 жылдың 8 желтоқсанынан бастап бүгінгі күнге дейін 5 ай болды бұл ереже жұмыс істемей тұр, яғни Үкімет 10 пайыздық субсидиялаудан бас тартып отыр. Оны бюджетте қаражаттың болмауынан деп түсіндіріп отыр бізге, – дейді «Сырдария-1» несие серіктестігінің төрағасы Алмат Абдуллаев.
</blockquote>
Несие серіктестігінің басшысы кәсіпкерлер несие алғанда мемлекеттен қолдау болатынына сенгендігін, алайда субсидияның төленбеуі салдарынан бүгінде 40 млн.теңге жоспарланбаған шығынға ұшырап отырғандығын айтты. Алмат Абдуллаев сұхбатында бұл шаруа қожалықтарының әрі қарай дамуына кедергі келтіріп қана қоймай, Үкіметке деген сенімінің төмендеуіне алып келуде екендігін де жеткізді.
Қызылорда облысы кәсіпкерлер палатасының бөлім бастығы Жасұлан Серіков бұл мәселеден Палата хабардар екендігін айтып отыр. Ол несие серіктестіктерінен өткен жылдың желтоқсан айынан бастап бүгінгі күнге дейін «Сыбаға», «Агробизнес» бағдарламалары аясында несие алған кәсіпкерлер қиын жағдайда қалып отырғанын айтуда.
<blockquote>
 &nbsp;«Мемлекеттік қолдаудың бір түрі ауыл шаруашылығы мақсатында алынған несиелердің пайыздық мөлшерлемесін субсидиялау мүмкіндігі. Өкінішке орай, осындай мемлекеттік қолдау бар болғанымен толық жұмыс жасамай тұр. Яғни мемлекеттік қолдау қағазда бар, ал іс жүзінде орындалмауда. Мәселе жақын арада шешілмесе ауыл шаруашылығы саласындағы кәсіпкерлер қаржылық қиындықтарға тап болады. Біздегі бар ақпарат бойынша бір ғана «Сырдария-1» несие серіктестігі соңғы бес айда 45 шаруа қожалығына несие берген. Ал облыста осындай 7 несие серіктестігі бар. Әрі қарай қанша шаруаның шығынға батып отырғандығын есептей беріңіздер», – дейді Жасұлан Серіков.
</blockquote>
Палата маманы, бұрын кедергісіз жұмыс жасап тұрған мемлекеттік бағдарламадағы бұл олқылық уәкілетті орган – Ауыл шаруашылығы министрлігі тарапынан қаржының дұрыс жоспарланбағандығынан орын алуы мүмкін екендігін жеткізді.
Кәсіпкерлер палатасы маманының айтуынша, қазіргі таңда 2021 жылға Қызылорда облысына 1,2 млрд.теңге бөлініпті. Ал негізгі қажеттілік 3 млрд.теңге.
<blockquote>
 «Егер жағдайға қазірден мән беріп, шешу жолдары қарастырылмаса қанша шаруа қожалығының жабылып, қаншасының несие тарихы бұзылатынын елестетудің өзі қорқынышты. Бұл біріншіден. Екіншіден, мемлекеттік бағдарламаларға деген сенімді азайтады», – дейді Жасұлан Серіков.
</blockquote>
Қызылорда облысының кәсіпкерлер палатасы мәселені өткен жылдың желтоқсан айынан бастап көтеріп келеді. Палата тарапынан облыс әкімдігі мен «Атамекеннің» орталық аппаратына тиісті ұсыныстар берілді. Енді уәкілетті органдардың жауабы күтілуде.

Қағазда ғана бар бағдарлама қызылордалық кәсіпкерлерді шығынға ұшыратуда

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықованың төрағалығымен ветеринария саласы бойынша жиын өтті.
Жиында облыс әкімінің орынбасары Бақыт Жаханов пен облыстық ветеренария басқармасы басшысының м.а. Әнуарбек Дәрмағамбетов атқарылған жұмыстар туралы баяндады.
Ағымдағы жылы ауыл шаруашылығы жануарларын бірдейлендіру дерекқорына 1 235 645 мал басы тіркелді. Бұл көрсеткіш 2019 жылмен салыстырғанда 7,6 % өсіп отыр.
2018 жылы жануарлар арасындағы аса қауіпті аурулар саны 14 болса, қазіргі таңда 16-ны құрап отыр. Аса қауіпті аурулардың алдын алу үшін жануарларға егілетін препараттар саны да өсуде. 2021 жылы облысқа 16 түрлі ауруға 6,3 млн доза препараттар қаралған. Оның қазіргі күні 3,9 млн. дозасы жеткізіліп, 1,7 млн. бас егілді.
Биылғы 4 айда энзоотиялық ауруларға қарсы 62,8 мың мал басы егілді. Алдағы уақытта 552,1 мың мал басын егу жоспарлануда.
Соңғы үш жыл көлемінде барлығы 3 млн 400 мың мал басына диагностикалық зерттеулер жүргізілді. Нәтижесінде 427 мал басынан бруцеллез ауруы анықталды. Барлығы санитарлық талапқа сәйкес сойылды.
Облыста барлығы 145 мал қорымдары бар. Оның ішінде 90 типтік жобада, 55 қарапайым түрінде салынған. Сондай-ақ, жиында қаңғыбас иттер мен мысықтарды аулау мәселесі де қаралды. Облыста барлығы 35 981 ит, 10 498 мысық бар, жалпы саны 46 479 құрайды. 2021 жылдың 4 айында 8502 бас ит пен мысық ауланды. Әсіресе, бұралқы иттер мен мысықтар Қызылорда қаласында көп шоғырланған. Осы орайда, арнайы ит аулау топтардың жұмыстары күшейтілуде.
Жалпы облыста 2021-2023 жылдарға арналған ветеринария саласын дамыту Жол Картасы қабылданып, тиісті жұмыстар атқарылуда.
Алдағы 3 жылдықта 139 ветеринариялық пунктерге «Нива» автокөліктерін алу көзделуде. 2021 жылға 15 автокөлік сатып алу үшін 66,0 млн. теңге қаржы бөлініп, мемлекеттік сатып алу жүргізілуде.
Авариялық жағдайға ұшыраған 4 ветеринариялық пункт (Арал-2, Қазалы-1, Жалағаш-1) ғимараттарын қайта салу жоспарлануда. Қазіргі таңда ЖСҚ әзірлеуге 9,9 млн.теңге қаржы бөлінді.
2021-2023 жж. 24 типтік жобадағы мал қорымдарын салу жоспарланса, 2021 жылы 7 (Арал-5, Қазалы-1, Жаңақорған-1) мал қорымы құрылысының ЖСҚ әзірленіп облыстық сәулет және қала құрылысы басқармасына тапсырылды.
Жиын соңында аймақ басшысы эпизоотиялық тұрақтылықты сақтауды, ветеринариялық дәрігерге кететін нормативтік жүктемені бекітіп, аудандардағы ветұйымдардың жұмысын жүйелі ұйымдастыруды және қаңғыбас иттер мен жабайы мысықтарды аулау фнукцияларын бәсекелестік ортаға беру үшін ұсыныстар әзірлеуді жүктеді.

Қызылордада 145 мал қорымы бар

<a href="https://kyzylorda-news.kz/">Kyzylorda-news.kz</a>. Қызылорда қаласындағы Достық үйінде Тәуелсіздіктің 30 жылдығына орай 1 мамыр – Қазақстан халқы бірлігі мерекесі күні қарсаңында дөңгелек үстел өтті.
«Достық, береке, бірлік – Тәуелсіздік тірегі» атты шараға облыстық ішкі саясат басқармасының басшысы Мира Қазбекова, ҚР Парламенті Мәжілісінің депутаты Бақытбек Смағұл, ҚР ҰҒА академигі Қылышбай Бисенов, этномәдени бірлестіктердің жетекшілері, жоғары оқу орындарының басшылары, көрнекті ғалымдар, қала және аудандардағы зиялы қауым өкілдері бейнебайланыс арқылы қосылып, қатысты.
Шараға қатысушылар ең алдымен «Сыр елі суретші көзімен: Кеше. Бүгін» атты облыстық суретшілердің жылжымалы көрмесін тамашалады. Көрмеге Сыр өңірінің белгілі суретшілерінің туындылары қойылды.
Іс-шара модераторы облыстық ішкі саясат басқармасының басшысы Мира Қазбекова қатысушыларды татулық пен достықты ту еткен – Қазақстан халқының бірлігі мерекесі күнімен құттықтап, дөңгелек үстел жұмысының маңызын атап өтті.
<blockquote>
 «Тәуелсіздіктің 30 жылдығында Елбасының көшбасшылығының арқасында, ел болып бірлесе атқарған жұмыстардың нәтижесінде саяси жүйесі тұрақты, экономикалық әлеуеті мықты, ұлттық рухы берік, бәсекеге қабілетті, халықаралық беделі зор қуатты мемлекет болып құрдық. Еңселі ел, іргелі мемлекет атануымызда бірлік, келісім және өзара қолдау қағидаттарына негізделген Қазақстан халқы Ассамлеясының орны ерекше», – деді Мира Қазбекова.
</blockquote>
Дөңгелек үстелді бейнебайланыс арқылы Нұр-Сұлтан қаласынан қосылған ҚР Парламенті Мәжілісінің депутаты Бақытбек Смағұл «Ынтымаө, бірлік, келісім, ең асыл бақыт – ел үшін» тақырыбындағы баяндамасымен жалғастырды. Сондай-ақ ҚР ҰҒА академигі Қылышбай Бисенов «Елбасы және Тәуелсіздік: Татулық пен келісім жолы» тақырыбында баяндама жасады. Ал облыстық неміс этномәдени бірлестігінің белсендісі Светлана Крюгер «Бірлік пен бейбітшілік – біздің ортақ мүддеміз» тақырыбында баяндама жасады.
Қорқыт Ата атындағы Қызылорда университетінің 3 курс студенті, ҚХА жанындағы «Абай қазынасына саяхат» клубының жетекшісі Елена Пак және облыстық «Кызылординске вести» газетінің жауапты хатшысы, журналист Кирилл Денисов танымдық шарада тұщымды ойларын ортаға салды.
Облыстық ішкі саясат басқармасының басшысы Мира Қазбекова мазмұнды шараны қорытындылай келе, Тәуелсіздік жылдарында дамудың қалыптасқандығына тоқталып, қазақы қаймағы бұзылмаған Сыр өңірінің бірлігі мен әрбір азаматтың Отанға деген сүйіспеншілігі, халқымыздың достығы мен өзара түсіністігі әрдайым берік болып, бірлігіміз мәңгі жасай берсін деген тілегін білдірді.

Қызылордада «Достық, береке, бірлік – Тәуелсіздік тірегі» атты шара өтті

<a href="https://kyzylorda-news.kz/">Kyzylorda-news.kz</a>. Қазақстан Республикасы Ұлттық экономика министрінің «Ауылдық елді мекендерге жұмыс істеуге және тұруға келген денсаулық сақтау, білім беру, әлеуметтік қамсыздандыру, мәдениет, спорт және агроөнеркәсіптік кешен саласындағы мамандарға, ауылдар, кенттер, ауылдық округтер әкімдері аппараттарының мемлекеттік қызметшілеріне әлеуметтік қолдау шараларын ұсыну қағидаларын бекіту туралы» 2014 жылғы 6 қарашадағы №72 бұйрығымен бекітілген қағиданың 19-тармағына сәйкес көрсетілетін қызметті алушыларға әлеуметтік қолдау шараларын ұсыну үшін бюджет қаражаты жетіспеген жағдайда, көрсетілетін қызметті беруші әлеуметтік қолдау шараларын алушы үміткерлердің қатарынан кезектілікті қалыптастыру жолымен әлеуметтік қолдау шараларын ұсыну мерзімін тоқтата тұрады.
Осының негізінде, «Дипломмен ауылға» бағдарламасы бойынша қызметті алушы сала мамандарына көтерме жәрдемақы рәсімдеуге 2021 жылға қаржы жетіспеуіне байланысты көтерме жәрдемақы әлеуметтік қолдау шараларын ұсыну мерзімі (құжат қабылдау) 19 сәуірінен бастап тоқтатылғанын хабарлаймыз.&nbsp;
Алайда, тұрғын үй сатып алуға бюджеттік кредит рәсімдеу бойынша қызмет алушылардан өтініш қабылдау (тоқтатылмай) жалғасады.&nbsp;
Сұрақтар бойынша, Қызылорда қаласы әкімдігінің «Қызылорда қаласының ауыл шаруашылығы бөлімі» коммуналдық мемлекеттік мекемесіне 70-10-02 телефон нөміріне хабарласып анықтама алуларыңызға болады

«Дипломмен ауылға»: Құжат қабылдау тоқтады ма?

<a href="https://kyzylorda-news.kz/">Kyzylorda-news.kz</a>. Сәуір айында Қызылорда облысында екі адамнан Конго-қырым геморрагиялық қызбасы анықталды. Қазір таңда, жағдайлары бірқалыпты, жұқпалы аурулар бөлімінде ем алуда. Екі деректе Шиелі ауданынан тіркеліп отыр. Жалпы облыста 113 елді мекен қолайсыз деп танылды. Бұл елді мекендерді залалсыздандыруға бюджеттен қаржы қарастырылған.
<blockquote>
 «Мемлекеттік сатып алу конкурсының нәтижесінде залалсыздандыру жұмыстарын жүргізуге мердігерлер белгіленді. Яғни 567 318 мал басы, 33385 қора, суаттар көктем және күз мезгілінде залалсыздандырылады. Қазіргі таңда, Шиелі, Жаңақорған аудандарында І-ші кезең аяқталып, ІІ-ші кезең жүргізілуде. Жалағаш пен Сырдария аудандарында І-ші кезең жалғасуда. Залалсыздандыру жұмыстарына дизицип ерітіндісі қолданылуда», – деді облыстық жұмылдыру дайындығы басқарма басшысының орынбасары Бағдат Алиев.
 «Кенелердің зақымдану көрсеткіші өткен жылы 1,7 пайыз болса, ал биыл 5,4 пайызды құрайды. Сонымен қатар, сәуір айында анықталған конго-қырым геморрагиялық қызбасының ошағына залалсыздандыру жұмыстары жүргізілді. Айта кететін жайт, кене шаққан жағдайда бірден тұрғылықты жеріңіздегі медициналық пунктке жүгініп, қажетті ем-дом шараларын алыңыздар», – деді облыстық санитариялық-эпидемиологиялық бақылау департаменті басшысының орынбасары Әлия Әбдіқайымова.
</blockquote>

Қазақстан және Қызылорда облысының жаңалықтары

Ескендір Хасанғалиев өмірден өтті

Қызылорда қызыл аймақта: Жаңа қаулы шықты

Электр энергиясының қымбаттауына байланысты тыңдау өтті

Алты қызғалдақ үшін 9 млн теңге: “Қызыл кітаптағы” өсімдік пен жануар қалай қорғалған?

Тоқаев: Жастар мемлекеттің басқару тізгінін қолға алуға дайын болу керек

Сегіз жастағы велосипедшіні көлік қағып кетті

Белгісіз біреу 50 000 доллар ақшаны қайырымдылық жәшігіне тастап кеткен

Қағазда ғана бар бағдарлама қызылордалық кәсіпкерлерді шығынға ұшыратуда

Қызылордада 145 мал қорымы бар

Қызылордада «Достық, береке, бірлік – Тәуелсіздік тірегі» атты шара өтті

«Дипломмен ауылға»: Құжат қабылдау тоқтады ма?

Қызылордада 2 адамнан Конго-қырым геморрагиялық қызбасы анықталды

Қазақстан және Қызылорда облысының жаңалықтары

Ескендір Хасанғалиев өмірден өтті

Қызылорда қызыл аймақта: Жаңа қаулы шықты

Электр энергиясының қымбаттауына байланысты тыңдау өтті

Алты қызғалдақ үшін 9 млн теңге: &#8220;Қызыл кітаптағы&#8221; өсімдік пен жануар қалай қорғалған?

Тоқаев: Жастар мемлекеттің басқару тізгінін қолға алуға дайын болу керек

Сегіз жастағы велосипедшіні көлік қағып кетті

Белгісіз біреу 50 000 доллар ақшаны қайырымдылық жәшігіне тастап кеткен

Қағазда ғана бар бағдарлама қызылордалық кәсіпкерлерді шығынға ұшыратуда

Қызылордада 145 мал қорымы бар

Қызылордада «Достық, береке, бірлік – Тәуелсіздік тірегі» атты шара өтті

«Дипломмен ауылға»: Құжат қабылдау тоқтады ма?

Қызылордада 2 адамнан Конго-қырым геморрагиялық қызбасы анықталды

Алты қызғалдақ үшін 9 млн теңге: “Қызыл кітаптағы” өсімдік пен жануар қалай қорғалған?