Kyzylorda-news.kz. Қазақстанда өткен тәулікте 776 адамда коронавирус індеті ПТР арқылы расталып ауырғаны белгілі болды. Бұл туралы www.coronavirus2020.kz сайты хабарлайды.
Аймақтар бойынша:
Нұр-Сұлтан қаласы – 61
Алматы қаласы – 85
Шымкент қаласы – 7
Ақмола облысы – 55
Ақтөбе облысы – 7
Алматы облысы – 62
Атырау облысы – 132
Шығыс Қазақстан облысы – 39
Жамбыл облысы – 15
Батыс Қазақстан облысы – 34
Қарағанды облысы – 37
Қостанай облысы – 63
Қызылорда облысы – 6
Маңғыстау облысы – 19
Павлодар облысы – 79
Солтүстік Қазақстан облысы – 59
Түркістан облысы – 16
Жалпы ел бойынша ауырғандар саны 151727.

Қызылордада 6 адам коронавирус жұқтырды

Kyzylorda-news.kz. 27 желтоқсан күні республиканың батыс және оңтүстік-шығыс бөліктерінде жауын-шашын жауады. Ал еліміздің солтүстік, шығыс және орталығында ауа райы көбінесе жауын-шашынсыз болады.
Республиканың батысында және оңтүстігінде көктайғақ күтіледі.
Кей жерлерде тұман, жаяу бұрқасын және желдің күшеюі болжанады.

27 желтоқсанға арналған ауа райы болжамы

Kyzylorda-news.kz. Облыс әкімі Гүлшара Әбдіқалықованың жұмыс сапары Жаңақорған ауданында жалғасты.
Аймақ басшысы Екпінді ауылына кіреберістегі ауданаралық қашыртқы үстіндегі көпірдің жағдайымен танысып, ауыл тұрғындарымен пікірлесті. Аппатық жағдайдағы көпір 1975 жылы пайдалануға берілген. Екпінді көп жылдардан бері өзекті мәселе болып көтеріліп келеді. Егіс көлемінің артуына байланысты қашыртқының жағасы сумен шайылып, көпір тұғырларына зиян келуде. Аймақ басшысына облыстық жолаушылар тасымалы және автомобиль жолдары басқармасының басшысы Мұрат Тлеумбетов және «Қазсушар» РМК облыстық филиалының директоры Хамит Бейімбетов көпірдің жағдайын баяндап, К-3 қашыртқысының қазу тазалау жұмыстарының ақау актісі жасалынғанын, көпірдің жобалық сметалық жұмыстары жүргізілгенін жеткізді.
Мұнан кейін облыс әкімі Батыс Қытай-Батыс Еуропа автожолының бойында орналасқан «Орда Сығанақ» ЖШС-нің шипажайының ашылу салтанатына қатысты. Аймақ басшысы Гүлшара Әбдіқалықова жаңа санаторий «Батыс Еуропа – Батыс Қытай» автожолы бойындағы көрікті нысандардың біріне айналады деп сенім білдіріп, аудан тұрғындарын құттықтады.
<blockquote>
 Жыл қорытындыланар сәтте үлкен жолдың бойында заманауи үлгідегі шипажайды пайдалануға бергелі тұрмыз. Азаматтардың рухани дүниесі мен денінің саулығы – мемлекетіміздің басымдық беріп отырған маңызды міндеттерінің бірі десек, саламатты қоғам қалыптастыруда және дені сау ұрпақ өсіруде заманауи медицина мен шипажайлардың алар орны ерекше. 
 Ал, адам денсаулығын жақсартуда айрықша маңызы бар мұндай санаторийлер Жаңақорған жерінде салынса, онда оның мәні тіптен бөлек деуге болады. Өйткені бұл өңірдің батпағы мен суының қасиеті мол, дертке шипа қасиеті бар. Шипажайдың қасиетті суы дертіне дауа іздегендерге шипа болсын,-деді облыс әкімі.
</blockquote>
«Орда-Сығанақ» жауапкершілігі шектеулі серіктестігі салған нысанның жалпы құны 850 млн.теңге. Оның 326 миллион теңгесі «Байқоңыр» әлеуметтік-кәсіпкерлік корпорациясы арқылы қаржыландырылды. Жаңа шипажай алпыс адамды жұмыспен қамтитын болады.
Облыс әкімінің Жаңақорған ауданындағы сапары қайта жаңғыртудан өткен шынықтыру сауықтыру спорт кешенінде қорытындыланды. Ғимарат мемлекеттік-жекешелік әріптестік негізінде салынған. Бір ауысымда 48 бала спортпен шұғылданады Жасөпірімдер мұнда қол добы, баскетбол, волейбол, кіші футбол, стол теннисімен айналыса алады. Ғимаратта 2 ойын залы, 1 үстел теннисі бөлмесі орналасқан. Аудан әкімі Руслан Рүстемов аудан көлеміндегі мемлекеттік жәкеменшік әріптестік аясында салынған спорт кешендерінің мәселелеріне тоқталды.
Жұмыс сапарының соңында аймақ басшысы Гүлшара Әбдіқалықова аудан әкіміне инфрақұрылымдық жобаларды жалғастыруды және азық-түлік өнімдерінің баға тұрақтылығын бақылауда ұстауды тапсырып, бірқатар нақты тапсырмалар берді.
<img src="https://kyzylorda-news.kz/wp-content/uploads/2020/12/fb_img_1608987698979.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608987696029.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608987688312.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608987692775.jpg" alt="" />

Жаңақорған ауданында жаңа шипажай пайдалануға берілді

Kyzylorda-news.kz. Ақпараттық ашықтық мемлекеттік басқару тиімділігінің басты критерийі болып саналады. Бұл мемлекеттік органдағы кез келген ақпараттың елдің əр азаматына қолжетімді болуын көздейді.
Бүгінде Мемлекет басшысының «Халық үніне құлақ асатын мемлекет» тұжырымдамасына сәйкес есептілік пен ашықтықты одан әрі жетілдіру бойынша түрлі шаралар атқарылуда. Соның бірі, “Ашық бюджеттердің интерактивті картасы” жобасы.
Мектеп, балабақша, аурухана, емхана, жол бюджетіне бірыңғай платформада қол жеткізуге мүмкіндік беретін карта қоғамдық бақылауды іске асырудың пәрменді тетігіне айналды. Әсіресе, бюджетті игеру барысында сыбайластық, құқық бұзушылық секілді қоғам болып күресуді қажет ететін элементтерді болдырмау жолында қызметі ерекше. Ал сыбайластықпен күрес кез келген өркениетті қоғам үшін ең өзекті мәселенің бірі болып табылады.
Тәулігіне 24 сағат бойы өнім берушілер, бөлінетін сомалар, құрылыс мерзімдері, кепілдік міндеттемелер және басқа да параметрлерге дейінгі ақпаратқа қол жеткізуге мүмкіндік беретін «Ашық бюджеттер интерактивті картасы» жобасымен <a href="https://publicbudget.kz/ru">сілтемесі</a> арқылы кіріп, кез келген облыстық, қалалық және аудандық деңгейдегі мекемелердің бюджеттерімен танысуға болады.
Айта кету керек, аталған жобаның қызметімен танысу үшін электронды цифрлық қолтаңбаның қажеті жоқ, тек тікелей сілтеме арқылы кіруге болады. 
Егер құжаттамаларды салыстыру барысында алшақтықтар анықталған жағдайда тиісті фото – және бейнематериалдарды қоса отырып уәкілетті органға хабарлауға құқыңыз бар.
Бүгінгі күні, аталмыш картада облыс бойынша 698 мекеме, 2176 өз бюджеттерін енгізіп отыр. Барлығын қоса алғанда 803,3 млрд. теңге көлеміндегі бюджет жарияланған және осы бағыттағы жұмыстарды әрі қарай ілгерілету мақсатында 7 адамнан тұратын «Ашық бюджет» өңірлік клубы құрылған.
Қазақстан Республикасының мемлекеттік саясатының негізгі басымдылықтарын қамтитын аталмыш карта қазіргі таңда сыбайлас жемқорлық, құқық бұзушылықтардың алдын алудың белсенді нысанына айнала отырып, мемлекеттік мекемелердің халық алдында есептілігі және диалогын құрудың әмбебап құралын күшейтетіні анық.
<img src="https://kyzylorda-news.kz/wp-content/uploads/2020/12/9aa1eae6-9675-4a43-b068-568e883b6aae.jpg" alt="" />

Интерактивті карта: Енді бюджеттің жұмсалуын бақылай аласыз

Kyzylorda-news.kz. Бүгін облыс әкімі Гүлшара Әбдіқалықова жұмыс сапарымен Шиелі ауданына барды. Алдымен аймақ басшысы Тартоғай елді мекенінің ауыз сумен қамту жүйелерін көріп, бас су қоймасының іске қосылу рәсіміне қатысты.
Ауданда инженерлік, коммуналдық инфрақұрылымды дамытуда, жол сапасын жақсартуда кешенді шаралар қабылданған.
Нәтижесінде елді мекенде 293 дана көру құдықтары орнатылып, қыстақішілік 28,38 шақырым, тұтынушы тұрғын үйлерге дейін 19,26 шақырым ауыз су құбырлары жүргізілді. Жаңа ауыз су нысаны құрылысының сметалық құны 401 млн.теңгені құрайды. Облыс әкімі құрылыс жұмысын сапалы орындағаны үшін мердігер компанияға алғысын білдірді.
Мұнан кейін облыс әкімі Шиелі кенті, «Көкшоқы» мөлтек ауданынан тұрғындарға 3 қабатты 18 пәтерлі тұрғын үйді табыстады. Тұрғын үй құрылысына облыстық бюджеттен 176 млн.теңге қаржы қаралып, бас мердігер «СМП-Қызылорда» ЖШС-і тарапынан құрылыс-монтаждау жұмыстары жүргізілген. Құрылыстың жер көлемі 1,76 гектар, ал ғимараттың жалпы ауданы 60 шаршы метрді құрайды.
Игі шарада баспаналы болған 8 баланың анасы Марал Дастанова облыс әкіміне алғыс білдіріп, тебіреніске толы сәттерімен бөлісті. Қоныс тойын тойлаған тұрғындарға аудан ардагері Жақай Сақбаев бата беріп, ел игілігі жолындағы елеулі істерге ризашылығын білдірді.
Әкім сапары барысында қос жолды темір жол үстінен соғылған автомобиль көпірі құрылысының ашылу салтанатына қатысты. Шиелі станциясының «Шиелі-20 бекет» учаскесіндегі автомобиль жолы көпірі «Жұмыспен қамту жол картасы» аясында салынған. Жобаға 673 млн.теңге қаржы қаралып, құрылыс жұмыстары іске асты. Құрылыс алаңына 75 маман тартылып, 18 техника жұмылдырылды. Көпірдің ұзындығы 60 метр, ені 11 метр, жолдың жалпы ұзындығы 1,2 км.
Облыс әкімі жаңа көпір аудан тұрғындарының алтын уақытын барынша үнемдейтін, тұрғындарды қуантатын маңызды нысан болатынын ерекше атап өтіп, тұрғындарды құттықтады.
Мұнан кейін аймақ басшысы Жаңатұрмыс ауылдық округіне барып, «Жұмыспен қамтудың жол картасы» бағдарламасы аясында іске асқан тұрғын үйлерді газға қосу рәсімін көріп, елдің көптен күткен бастамалы іске сәттілік тіледі.
“Бүгін біз аудандағы тағы бір игілікті істің куәсі болғалы тұрмыз. Өздеріңіз білесіздер, бұған дейін жыл сайынғы есепті кездесуде ауыл халқының көтеріп жүрген ең басты мәселесі ауылға көгілдір отын тарту болатын. Міне, бүгін сол мақсатқа қол жеткізіп, табиғи газды салтанатты түрде қосқалы тұрмыз. Құны 204 млн.теңге болатын бұл жобаға облыстық бюджеттен қаржы қаралып, Жаңатұрмыс ауылдық округі бойынша мыңнан аса ауыл тұрғындарының қуанышына орай 205 тұрғын үй табиғи газбен қамтамасыз етіледі”,-деді Гүлшара Әбдіқалықова.
Шара барысында арнайы қондырғыдан газ алауы жағылып, Жаңатұрмыс халқының тұрғын үйлері газға қосылды. Өңір басшысы айрықша сәтте аудан тұрғыны Р.Мұстафаевтың тұрғын үйіне барып, газды пайдалану жұмысын көріп, отбасыға береке тіледі.
Айту керек, биыл аудан орталығы Шиелі кенті 100 пайыз газбен қамтылған. Жақаев елді мекенінде 260, Бидайкөл елді мекенінде 210 жеке тұрғын үй газға қосылған. Алдағы уақытта Н.Бекежанов, Қодаманов, Ақмая, Алғабас елді мекендерін газдандыру бойынша жұмыстар жалғасады.
Жұмыс сапарының қорытындысында облыс әкімі Гүлшара Әбдіқалықова аудан әкімі Қамбарбек Мүбараковқа негізгі басым салалардағы ауқымды жұмыстарды жалғастыруды және халықтың саулығын сақтауға қажетті шараларды қарқынды іске асыруды тапсырды.
<img src="https://kyzylorda-news.kz/wp-content/uploads/2020/12/fb_img_1608988616707.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608988626763.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608988621129.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608988629615.jpg" alt="" />
<img src="https://kyzylorda-news.kz/wp-content/uploads/2020/12/fb_img_1608988635377.jpg" alt="" />

Облыс әкімі жұмыс сапарымен Шиелі ауданына барып, жаңа әлеуметтік нысандарды ашты

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Түскі ас ішкеннен кейін жұмысқа деген ынта жоғалып, білек сыбана кірісу кейде қиындайды. Бұл әлсіздік пе, әлде жалқаулық па? Расында, бұл – табиғи құбылыс. Жалғыз адамдар ғана емес, кей жан-жануарларда да мұндай босаңсу болады. Ғалымдар бұған табиғи заңдылық деп қарайды.
“Түсте аз уақыт көз шырымын алу – ағзаның бір қалауы” дейді зерттеушілер. Әсіресе ыстық аймақтарда түс ауа бір тынығып алу көп кездеседі екен.
Түскі астан кейін ұйқының келуі де – табиғи әрі физиологиялық құбылыс. Ал ұйқы келмеу үшін не істеу керек?
Жаттығу жасау
Түскі астан кейін оңай әрі жеңіл жаттығулар жасау керек. Эндорфин мен адреналин гормондары көбірек бөлініп,&nbsp; ұйқы қашып, босаңсу бойдан арылады. Ағзаға күш жиналып, жұмысқа құлшыныс артады.
Монитордан алыс болу
Кеңседе жұмыс істейтіндер уақытының көбін монитор алдында өткізеді. Мұндай қызметкерлер үшін түскі астан кейін жарты сағат таза ауада тыныққан абзал. Болмаса бірден мониторға үңілмей, басқа іспен уақытша айналысса, ұйқы да келмейді, деннің саулығына да пайдалы.
Музыка тыңдау
Түскі астан кейін бір ауық сүйікті музыкаңды тыңдау да ұйқыдан арылтады. Бастысы – айналаңдағы әріптестерге кедергі келтірмесең болғаны. «Құлақтан кіріп, бойды алған» тамаша әуен көңіл-күйіңізді көтеріп, жаныңызды сергіте түсері анық.
Шоколад жеу
Шоколад жеу де адамға сергектік сыйлайды. Эндорфин (қуаныш гормоны) көбірек бөлініп, құлшыныс артады. Ащы шоколадтың пайдалы екенін де ұмытпаңыз.
Салқын душқа түсу
Жұмыс кезінде душқа түсуге мүмкіндік көп бола қоймас. Ал карантинде үйден жұмыс істеп жүрсеңіз бұл амал көмектеседі. Күн райы, болмаса үйіңіз жылы болса түскі астан кейін салқын душқа түсіп шықсаңыз, ұйқыңыз ашылып, бойыңыз сергіп қалады.
Түскі ас құнарына мән беру
Түс ауа сізді аса маңызды істер күтіп тұрса, оның да алдын алуға болады. Ол үшін түсте тамақтанғанда глюкоза мен көмірсуы аз ас ішіңіз. Сорпа, майға пісірілмеген ет және түрлі салаттарды жесеңіз болады. Шай да сергектік сыйлайды. Бұл – қарапайым бір жолы.
<a href="https://massaget.kz/layfstayl/zhadnama/64115/?fbclid=IwAR373owlTmTRu_YIbOblmT8ZfA94IapKbjXQlabYMMIqWPrfR9azI3eohbM">Massaget.kz</a>

Түскі астан кейін ұйықтап қалмаудың 6 амалы

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Коронавирустық пандемия басталғаннан бері Дания халқы одан сайын байи түсті. Осы жылдың үшінші тоқсанындағы мәліметтерге сәйкес ел тұрғындарының жинақтары 5,66 трлн кронға (930 млрд доллар) жетті.
<blockquote>
 «Соңғы екі тоқсанда елдің қаржылық әл-ауқаты 709 млрд кронға өсті», – делінген хабарламада.
</blockquote>
Қазіргі уақытта даниялық отбасылардың жылдық орташа табысы шамамен екі млн кронды құрайды – шамамен 327 мың доллар. Сарапшылардың пікірінше, келесі тоқсанда ел тұрғындарының қаржылық жағдайы жаңа рекордты жаңартуы мүмкін.
<a href="https://24.kz/kz/zha-aly-tar/lemde/item/444491-pandemiya-kezinde-t-r-yndary-bajy-an-el-ataldy">Хабар 24</a>

Пандемия кезінде тұрғындары байыған ел аталды

<a href="https://kyzylorda-news.kz/">Kyzylorda-news.kz.</a> Ұшаққа найзағай түспейді емес, түседі. Бірақ ұшақтың өзіне не қаңқасына еш зиянын тигізбейді. Алып апатқа ұшырамайды. Мұндай апат осыдан 20 жыл бұрын 2000 жылы Қытайда болған. Содан бері ұшақтың қаңқасы түзетуден өткізіліп, найзағайдан тиімді қорғанудың тәсілдері қолданылды.
Көбіне найзағай ұшаққа бұлт арасымен – электр тоғымен зарядталып тұрған бұлтқа жолығып қалғанда түседі. Ұшақ екі бұлттың немесе бұлт пен жердің арасындағы электрдің зарядталып өтуіне өткел болады. Найзағай алдымен ұшақтың қанаты не тұмсығы сынды сүйір бұрышына келіп түседі де, ұшақ аппаратының сыртымен “сырғып” басқа сүйір жерінен (мәселен, құйрығынан) “шығып” кетеді.
Ұшақтың найзағай жанасқан жері жарқ етеді: өйткені ауа молекуласы иондалып ұшқын шығарады.
Ұшақтың корпусы алюминийден жасалады. Алюминий электр тоғын жақсы өткізеді. Ал ұшақтың басқа бөліктері – фюзеляжы алюминиймен араластырылған электр зарядын өткізе алатын композитті металдармен қорытылып құрастырылады. Композитті металдар зарядталған электр бөлшектерін мүлт жібермей оңай өткізеді.
Ал найзағай түскен ұшақ бөлігінде аздаған қара дақ пен із, күйік қалады. Ондай дақ пен күйік 1 миллиметрден аспайды.
Ұшақтың сырты қалың металмен қапталады. Сондықтан найзағай ұшақтың жалпы күйіне зиян келтірмейді.
Оның үстіне ұшақта алды-артына найзағай өткізгіш, жиналып қалған статикалық күшті босатып жіберетін арнайы бөлшектер болады. Олар да найзағайды ұшақ бойымен өткізіп жіберуге көмектеседі.
<a href="https://massaget.kz/layfstayl/tehno/64104/">Massaget.kz</a>

Ұшаққа неге найзағай түспейді?

*<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> «Қазгидромет» РМК-сы 2021 жылдың қаңтар айының ауа райы болжамын жария етті, деп хабарлайды <a href="https://lenta.inform.kz/kz/2021-zhyldyn-kantar-ayynda-aua-rayy-kanday-bolady-kazgidromet-bolzhamy_a3734226">ҚазАқпарат.</a>*
Кәсіпорынның консультативті болжамына сәйкес, 2021 жылы қаңтарда республиканың басым бөлігінде ауа температурасы норма шамасында болады, Қазақстанның шығыс жартысында 1°C мөлшерден төмен болуы мүмкін.
Республиканың басым бөлігінде жауын-шашын мөлшері климаттық норма шамасында, республиканың қиыр батысында – нормадан көп, солтүстік-батыста, орталықта, Қазақстанның солтүстігі мен оңтүстіктің кей жерлерінде нормадан аз болады деп болжанып отыр.
Қаңтардың бірінші және үшінші онкүндіктерде бірнеше суық толқындар күтіледі. Ауа температурасы қаңтардың екінші жартысында төмендей түседі.
Бұл ретте ауа температурасы:
солтүстік, орталық және шығыс&nbsp;аймақтарда түнде -25-35 °С дейін, кей жерлерде -39 °С дейін, күндіз -20-27 °С дейін;
республиканың батысында&nbsp;түнде -20-27 °С дейін, күндіз -10-20 °С дейін;
оңтүстік және оңтүстік-шығыс&nbsp;аймақтарда түнде -15-25 °С дейін, жерлерде -30 °С, күндіз -7-15 °С дейін төмендейді.

2021 жылдың қаңтар айында ауа райы қандай болады?

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Тәуелсіздік алғаннан бастап елдің қоғамдық-саяси өміріндегі өзгерістер мүлдем жаңа институт – мемлекеттік көрсетілетін қызметтер саласының туындауына алып келді.
Мемлекет әрқашанда мемлекеттік қызметтер көрсеткені анық. Дегенмен, бұл қызметті процедура ретінде мойындау тек қана дамудың демократиялық тұғырына өткеннен кейін ғана мүмкін болды.
Мемлекеттік қызметтер көрсетудің қолжетімділігі мен сапасын қамтамасыз ету маңызды. Себебі осы көрсеткіш қоғам мен оның әрбір азаматының қажеттіліктеріне мән беру дәрежесін айқындайды. Бұл саладағы сыбайлас жемқорлыққа қарсы іс-әрекеттер мәселесі де өзінің маңыздылығын жоғалтпай отыр және бұл кездейсоқтық емес.
Мемлекеттік қызметтер көрсету саласы өз табиғатында, мемлекеттік аппарат қызметінің сыбайлас жемқорлыққа бейім бағыттарының бірі болып табылады. Осы салада қызмет көрсетушілер мен мемлекеттік қызметтерді алушылардың, яғни қарапайым азаматтар, кәсіпкерлер және т.б. арасында тікелей қарым-қатынас жүзеге асады.
Ең алғаш рет мемлекеттік қызметтер көрсету тізілімін қалыптастыру бойынша тапсырма Елбасының 2007 жылғы «Жаңа әлемдегі жаңа Қазақстан» атты Жолдауында белгіленіп, сол жылы Қазақстан Республикасы Үкіметінің №561 қаулысымен, құрамында 132 мемлекеттік қызмет көрсету түрі енгізілген тізілім бекітілген болатын.
Сол кезеңде, «е-лицензиялау» мемлекеттік деректер базасы, «е-үкімет» төлемдік шлюзі, «е-нотариат» бірыңғай нотариалдық жүйесі сияқты жүйелер енгізіліп, халыққа электрондық сандық қолтаңбалар беріле бастады.
Мемлекет өзінің сыбайлас жемқорлыққа қарсы бағдарламаларында мемлекеттік қызметтер көрсету саласындағы сыбайлас жемқорлыққа қарсы іс-қимыл мәселелеріне ерекше көңіл бөліп, Қазақстан Республикасында сыбайлас жемқорлыққа қарсы іс-қимыл жөніндегі 2011-2015 жылдарға арналған салалық бағдарламада алғашқы рет мемлекеттік қызметтер көрсету рәсімдерін «электрондық» форматқа өткізу бойынша міндеттер қойылды.
Қазақстан Республикасының 2015-2025 жылдарға арналған сыбайлас жемқорлыққа қарсы стратегиясында мемлекеттік қызметтер көрсетуді автоматтандырумен қатар, «бір терезе» қағидасы бойынша көрсетілетін қызметтер тізімін кеңейту міндеті де көрсетілді.
Ұйымдастырушылық және технологиялық мәселелермен бірге, бірінші кезеңде мемлекеттік қызмет көрсетулер процестерін оңтайландыру мен автоматтандыру бойынша мемлекеттік саясатты құқықтық қамтамасыз ету де шешілді. Осылайша, мемлекеттік қызмет көрсетулер процесін оңтайландыру мен автоматтандыруға негіз болған заңдар қабылданды.
Мемлекеттікқызметтер көрсету саласындағы сыбайлас жемқорлыққа қарсы іс-қимыл бойынша іс-шаралар қатарында мемлекеттік көрсетілетін қызметтерді стандарттау және регламенттеу қадамдарын жатқызуға болады, себебі мемлекеттік қызметтер көрсету стандарттарында ең алғаш рет қызмет көрсетулер процестеріне қойылатын талаптар көрініс тапты. Регламенттеу мемлекеттік қызметтер көрсету процестеріндегі өзара қарым-қатынастарды реттеудегі маңызды тетікті құрай отырып, стандарттау процесінің жалғасы болды.
Бүгінгі таңда, мемлекеттік көрсетілетін қызметтер тізіліміндегі қызметтер саны – 698 болып бекітілген.
Әлеуметтік-еңбек саласында 44 қызмет түрін көрсету көзделген, оның 38 қызметі электрондық түрде көрсетіледі, ал оның ішінде, 18-і проактивті түрде, яғни азаматтың қатысуынсыз автоматты түрде тағайындалатын төлем, не қызмет.
Мемлекет басшысы зейнетақы мен жәрдемақыларды тағайындау процестерін толық цифрландыруды тапсырған болатын. Бұл жұмыстың негізгі бағыты – мүмкіндігінше барлық қызметтерді проактивті форматқа көшіру, яғни қызмет көрсету бастамашысы азамат емес, мемлекет болады. Барлық қажетті мәліметтер, ақпараттық жүйелердің өзара іс-қимыл жолымен қалыптасады. Азамат тек қызметтерді алуға келісім ғана беруі қажет болады.
Проактивті қызмет түрі – қызметті берушімен алушының байланысын болдырмайды, қызмет көрсету уақытын барынша қысқартады, қағазды құжаттарды жинаудың және уәкілетті органдар қызметкерлерінің қатысу қажеттілігін жояды.
Мысалы, бұған дейін көпбалалы отбасына жәрдемақы тағайындау үшін өтініш беруші қағаз түріндегі қажетті құжаттарымен Мемлекеттік корпорацияға жүгінетін. Ол үшін алдын ала сол құжаттарды алу үшін бірнеше ұйымдарға барып, уақытын кетіретін.
Ал, бүгінде осы процесті автоматтандырудың нәтижесінде Еңбек және халықты әлеуметтік қорғау министрлігінің жүйесіне басқа ақпараттық жүйелерден қажетті жеке тұлға және балалардың туылуы мен саны туралы мәліметтер проактивті түрде түседі. Сол мәліметтердің негізінде автоматты түрде жәрдемақы тағайындалып, көпбалалы анаға ол туралы SMS-хабарлама жіберіледі.
Жылдан жылға электрондық түрде көрсетілетін қызметтер саны ұлғаюда. Қазіргі таңда мемлекеттік тізіліміндегі 698 қызметтердің 85,5 пайызы электронды түрде көрсетілуде.
Алдымызда осы көрсеткішті 90 пайызға жеткізу мақсаты тұр. Осы ретте қабылданған шаралар қызмет көрсетушілердің тиімділігін арттыруға, әкімшілік кедергілердің азаюына ықпал жасайды.
Әлия ИСКАКОВА,
ҚР Мемлекеттік қызмет істері агенттігінің Қызылорда облысы
бойынша департаментінің бас маманы

Әлия Искакова: Жылдан жылға электрондық түрде көрсетілетін қызметтер саны ұлғаюда

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> ҚР Сыбайлас жемқорлыққа қарсы іс-қимыл Агенттігі Төрағасының кеңесшісі Анар Жарова мемлекеттік қызметшілердің қандай жағдайда шетелдік банктерде есепшот аша алатынын түсіндірді, деп хабарлайды <a href="https://lenta.inform.kz/kz/memlekettik-kyzmetshilerge-sheteldik-bankten-esepshot-ashuga-tyyym-salyndy_a3734151">ҚазАқпарат.</a>
Кеңесші биылғы 19 желтоқсанда Мемлекет басшысы қол қойған «Қазақстан Республикасының кейбір заңнамалық актілеріне қылмыстық процесте азаматтардың құқықтарын қорғауды және сыбайлас жемқорлыққа қарсы іс-қимылды күшейту мәселелері бойынша өзгерістер мен толықтырулар енгізу туралы» заңда қамтылған кейбір новеллаларды түсіндірді.
<blockquote>
 «Шетелдік банктерде шоттар ашуға және иеленуге тыйым салудан бастайық. Мұндай тыйым мемлекеттік қызметшілерге, Парламент депутаттары мен судьяларға енгізілген. Мұнда мемлекеттік қызметтің бірқатар шектеулер қабылдайтын қызметтің ерекше түрі екенін түсіну қажет. Аталған түзетулерді әзірлеу кезінде ел мен халықтың мүддесі үшін қызмет ету идеологиясы бірінші орынға қойылды. Қоғамда ақшасын көптеген азаматтар сияқты қазақстандық банктерде емес, шетелдік банктерде сақтайтын шенеуніктерге сену қажет пе, бұл шоттар сыбайлас жемқорлық схемаларымен және капиталды шетелге шығарумен байланысты емес пе деген сұрақтар туындауы мүмкін. Сондықтан Мемлекет басшысының тапсырмасын заңнамалық іске асыру орынды және дер кезінде болып отыр», – деді Анар Жарова Сыбайлас жемқорлыққа қарсы іс-қимылды күшейту жөніндегі заңнамалық шаралар туралы онлайн брифингте.
</blockquote>
Спикердің айтуынша, енді мемлекеттік қызметшілерді қызметке тағайындауда оларға шетелдік шоттарын жабу үшін 6 айлық мерзім берілетін болады. Жұмыс істеп жүрген мемлекеттік қызметшілерге заң қолданысқа енген күннен бастап, Қазақстан Республикасынан тыс орналасқан шетелдік банктердегі шоттарын жабуға 6 ай беріледі.
<blockquote>
 «Бұл ретте, заңда мемлекеттік қызметшілерге шетелдік банктерде шот ашуға рұқсат беру жағдайлары да айқындалған.Оның ішінде – шетелде жұмыс істеу, оқу, тағылымдама, іссапар немесе емделу немесе кәмелетке толмаған баланың заңды өкілі ретінде шетелде болу. Бұл жағдайлар тоқтатылған соң (мысалы, шетелдік іссапардан, оқудан және т.б. оралған күннен бастап) мемлекеттік қызметші 6 ай ішінде шетелдік банктегі құндылықтары мен қаражатын сақтауды тоқтатуға міндетті. Дәл осы талап пен мерзім мұраны қабылдау жағдайларына да қолданылады.
</blockquote>
Егер мемлекеттік қызметші шетелдік банктегі шотты жапқысы келмесе және мемлекеттік қызметтен кетуге ниет білдірсе, онда ол өз еркімен жұмыстан босату туралы өтініш беруге құқылы», – дейді Анар Жарова.

Мемлекеттік қызметшілерге шетелдік банктен есепшот ашуға тыйым салынды

<a href="https://kyzylorda-news.kz/?doing_wp_cron=1608783104.5910580158233642578125">Kyzylorda-news.kz.</a> Қызылорда қаласы полиция басқармасы қызметкерлері бұл мақсатта жедел-іздестіру шараларын жүргізді. Нәтижесінде 34 жастағы аудан тұрғыны және 30 жастағы қала тұрғыны екі күдікті азамат тәртіп сақшыларының қолына түсті.
Олар кешкі уақытта үй иелерінің жоқтығын пайдаланып, пластик терезелерін сындырып, ақша, зергерлік бұйымдарды және мылтық ұрлаған. Күдікті азаматтар қазан айынан бастап бірнеше рет ұрлыққа түскен.
Қазіргі таңда жалпы жәбірленушілерге келтірілген материалдық және мүліктік шығындар 6 миллионнан астам сомманы құрайды. Полицейлер күдіктілердің басқа да 10 ұрлық дерегіне қатысы бар екендігін анықтады. Күдіктілер уақытша ұстау изоляторына қамаққа алынды.
<blockquote>
 “Қазіргі уақытта, Қазақстан Республикасы Қылмыстық кодексінің 188-бабы 3-бөлігінің 1,2,3-тармақтарымен және 291-бабы 3-бөлігінің 4-тармағымен (Қаруды, оқ-дәрілерді адамдар тобының алдын ала сөз байланысуымен жымқыру) сотқа дейінгі тергеп-тексеру жұмыстары жүргізілуде. Биылғы ақпан айында қылмыстық заңнамаға енгізілген өзгерістерге сәйкес бірнеше рет жасалған ұрлық ауыр қылмыс санатына жатқызылады. Енді тараптардың татуласуына байланысты қылмыстық іс тоқтатылмайды. Ондай қылмыс жасағандар 12 жылға дейін бас бостандығынан айырылады”, – делінген департаменттің хабарламасында.
</blockquote>

Қазақстан және Қызылорда облысының жаңалықтары