<a href="https://kyzylorda-news.kz/ru/">Kyzylorda-news.kz.</a> Қызылорда облысының әкімі Гүлшара Әбдіқалықованың төрағалығымен жылу беру маусымына дайындық жөніндегі облыстық штаб отырысы өтті.
Кеңейтілген жиында аймақ басшысы бірқатар сала басшыларының баяндамаларын тыңдап, жылыту маусымы кезінде қолға алынған жұмыстардың барысын саралады.
Облыс әкіміне алдымен облыстық энергетика және тұрғын үй-коммуналдық шаруашылық басқармасының басшысы Руслан Нұрмағанбетов атқарылған жұмыстарды тізбелеп, қазіргі ахуал барысын баяндады.
Бүгінгі күні өңірде жылу беру жұмыстары 85 пайызға аяқталған. 2020 жылға ағымдағы және күрделі жөндеуге, «Нұрлы жер» бағдарламасы және «Жұмыспен қамту жол картасы» аясында 4 млрд.теңге қаржы қаралған. Нәтижесінде жылу қазандықтарына жөндеу жұмыстары жүргізіліп, ұзындығы 15 шақырым болатын магистралды және квартал ішілік жылу желілері қайта жаңғыртылуда. Бұл жұмыстардың нәтижесі өңірдегі жалпы жылу желілерінің тозу пайызын 42 пайыздан 39 пайызға дейін төмендетеді.
Облыс әкімі қала, аудан ішіндегі жылыту жағдайларын бағамдай келе, бірқатар мәселелерге уақытылы мән беріп, жұмысты тез арада реттеуді тапсырды.
<blockquote>
 “Қызылорда қаласындағы, Белкөл кентінде жылу құбырларын күрделі жөндеу жұмыстары бекітілген жоспарға сәйкес жүргізілмей отыр. Барлық жүзеге асып жатқан жобалар 1 қазанға дейін аяқталуы қажет. Жөндеу жұмыстарының барысына арнайы кесте әзірлеп, орындалуы туралы әр аптаның дүйсенбісінде маған баяндауларыңыз тиіс”,-деді облыс әкімі сала басшыларына.
</blockquote>
<img src="https://kyzylorda-news.kz/wp-content/uploads/2020/09/119238198_2717732981663087_6029773932837964431_o.jpg" alt="" />
Жиында Гүлшара Әбдіқалықова аудандарға газ тарату мәселесін алға қойып, әлеуметтік нысандарға жылу беру жұмысын уақытылы іске асыруды тапсырды. Атап айтқанда, «ҚазТрансГаз Аймақ» АҚ Қызылорда өндірістік филиалының директоры Талғат Қызылбаевқа Қармақшы, Жалағаш Сырдария аудандары орталығына газ тарату стансаларын пайдалануға қажетті қаржы шешілгендіктен, аудан халқына уақытылы газ беруді міндеттеді.
<blockquote>
 “Облыстағы жылу беру нысандарының басым бөлігі әлеуметтік салаға тиесілі. Денсаулық сақтау мекемелерінде, әсіресе, Қазалы аудандық Туберкулезге қарсы диспансері және Сырдария аудандық ауруханасының күрделі жөндеу жұмыстары бүгінде толық аяқталмаған. Жылу беру маусымына аз ғана уақыт қалса да, денсаулық сақтау саласының әзірлігіне күмәнім бар. Сондықтан, аудан әкімдігімен бірлесе отырып, аурухананың жылу жүйесінің қалыпты жұмыс жасауына жағдай жасаңыздар”,-деді облыс әкімі.
</blockquote>
Отырыста облыс әкімі көпқабатты тұрғын үйлерге жылу беру мәселесін қарап, модернизациядан өткен үйлердің жұмыстарына қатысты қала әкіміне бірқатар тапсырма берді. Сондай-ақ, отын қоймаларына керекті отын көлемін қамтамасыз етуде әлі де жұмысты жандандыру қажет деді. Көмір қоймаларында тапшылық туындамасы үшін бағаның негізсіз өспеуіне жол бермеу қажеттігін мән беріп, кәсіпкерлік және туризм басқармасының басшысы Фердауси Қожабергеновке нақты тапсырма жүктеді.
<blockquote>
 “Алдыңғы жылдары көмір тапшылығы мен бағаның күрт өсуіне байланысты тұрғындар тарапынан дүрбелең туғанын білесіздер. Сондықтан бағаның өсуін, екі ортадағы делдалдықты болдырмау мақсатында, көмір өндіруші мекемелермен тікелей келісім-шартқа отыру үшін кәсіпкерлермен жұмыстарды үйлестіріңіз”,-деді өңір басшысы.
</blockquote>
Жиын соңында облыс әкімі жоспарда айқындалған, межеде міндеттелген жұмыстарды тарқата келе, қала, аудан әкімдіктері, сала басшылары, коммуналдық қызметтің жетекшілеріне 1 қазанға дейін әлеуметтік нысандар бойынша қажетті отын қорын жасақтауды 100 пайызға, тұрғындарды 70 пайыз қамтамасыз етуді, коммуналдық төлемдерді жинақтауды басты назарға қойды. Сондай-ақ, облыстық энергетика және тұрғын үй-коммуналдық шаруашылық басқармасының басшысына мекемелер арасындағы берешек қарыздарды болдырмау шараларын қабылдауды қатаң тапсырды. Ал, облыстық экономика және бюджеттік жоспарлау басқармасының басшысы Нұрғали Қордабайға электр энергиясы тарифінің өсуіне байланысты бюджеттік мекемелердің шығындарын қайта қарауды міндеттеді. Сондай-ақ, білім, мәдениет саласындағы нысандарға жылу беру жұмыстарын өз мерзімінде аяқтауды жауапты басқармаларға жүктеді.
Мұнан бөлек, облыс әкімі аппаратының ұйымдастыру-инспекторлық жұмыс және аймақтық даму бөлімінің инспекторлары 1 қазанға дейін қаладағы және аудандардағы нысандарды аралап, мониторинг жүргізуі қажеттігін атап өтіп, жұмыстың орындалуын бақылауды облыс әкімінің орынбасары Серік Сүлейменовке тапсырды. 
Отырысты қорытындылаған облыс әкімі жылу беру маусымын ешқандай кедергісіз өткізуіміз қажет деді.
<img src="https://kyzylorda-news.kz/wp-content/uploads/2020/09/119136756_2717733938329658_585324095466108049_o.jpg" alt="" />
<img src="https://kyzylorda-news.kz/wp-content/uploads/2020/09/119169939_2717734388329613_8849743776379925329_o.jpg" alt="" />
<img src="https://kyzylorda-news.kz/wp-content/uploads/2020/09/119210886_2717734144996304_4947428226490667683_o.jpg" alt="" />

Жылу беру маусымына дайындық жөніндегі облыстық штаб отырысы өтті

<a href="https://kyzylorda-news.kz/date/2020/09/10/">Kyzylorda-news.kz</a>. «Қазгидромет» РМК 11 қыркүйекке арналған ауа райы болжамын жариялады.
«Қазгидромет» РМК Қызылорда облысы бойынша филиалының хабарлауы бойынша 11 қыркүйекте Қызылорда облысының кей жерлерінде найзағай күтіледі. Шығыстан батысқа ауысып, жел соғады, күші күндіз кей жерлерде 15-20 м/с күтіледі. Күндіз төтенше өрт қаупі сақталады.

Қызылордада найзағай ойнап, күшті жел соғады

<a href="https://kyzylorda-news.kz/date/2020/09/10/">Kyzylorda-news.kz.</a> Жарты жылдың қорытындысы бойынша Әлеуметтік медициналық сақтандыру қоры МӘМС пакетіндегі медициналық көмекті төлеуге 4,2 млрд теңгеден астам қаржы жіберді. Бұл туралы «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов мәлімдеді.
Қор филиалының басшысы төлем халыққа көрсетілген медициналық қызметтердің сапасы мен көлеміне мониторинг жүргізілгеннен кейін ғана жүзеге асырылатындығын атап өтті. Клиникалық хаттамаларды және емдеуге қажетті талаптарды сақтай отырып, факті бойынша көрсетілген және құжатпен расталған қызметтер ғана төленеді.
Бақыт Исмаханбетовтың айтуынша, жарты жылдықтағы шығындардың басым бөлігі стационарлық медициналық көмек төлемі – 927,9 млн теңге. 6 ай ішінде жоспарлы түрде еліміздің стационарларында 7,2 мыңнан астам адам емделді.
Көрсетілген консультациялық-диагностикалық көмек үшін шамамен 1,5 млрд теңге төленді. Атап айтқанда, диагностикалық қызметтер арасында КТ және МРТ қызметтері&nbsp; азаматтар үшін өзекті. Жарты жыл ішінде пациенттерге КТ және МРТ 7,9 мың қызмет көрсетілді: 34,7 млн. теңге сомасына 3,5 мың компьютерлік томография қызметі, 70,7 млн. теңге сомасына 4,3 мың МРТ қызметі.
Сонымен қатар, қаңтар мен маусым аралығында 102,1 мың-нан астам стоматология, 39,2 мыңға жуық рентген және 24,8 мыңнан астам УДЗ-диагностика қызметтері көрсетілді, олардың жалпы құны 494,8 млн теңгеден асады. Олардың барлығы МӘМС пакетінде медициналық сақтандыру қаражаты есебінен көрсетілді, пациенттерге медициналық көмек үшін Қор ақы төледі.
Одан бөлек, құны 478 млн теңгені құрайтын 2 611 қызылордалық медициналық оңалтудан өтті. Жарты жылда тағы 38 мыңнан астам азамат 147 млн теңге сомасына жоғары технологиялық медициналық қызмет алды.
<blockquote>
 «Естеріңізге сала кетейік, бірінші жартыжылдықта барлық қазақстандықтар МӘМС жүйесінде шартты түрде сақтандырылған және медициналық қызметтерді кепілді көмек аясында, сондай-ақ МӘМС аясында пайдалана алатын. Екінші тоқсанда карантин аясында жоспарлы түрде медициналық көмек көрсетуге шектеу қойылды. 1 тамыздан бастап еліміздің клиникаларында жоспарлы медициналық көмек қайта басталды, сондықтан екінші жартыжылдықта МӘМС жүйесінде көрсетілген медициналық қызметтер бойынша көрсеткіштердің өсуі күтілуде», – деп атап өтті ӘМСҚ филиалының директоры.
</blockquote>
2020 жылға Әлеуметтік медициналық сақтандыру қорының филиалымен 55 медициналық қызмет көрсетушілермен келісім – шарт жасалды, оның ішінде 28 (50,9%) – мемлекеттік, 27 (49,1%) – жеке меншік.

МӘМС қызылордалықтарға 4 млрд.теңгеден астам қаражат бөлді

<a href="https://kyzylorda-news.kz/date/2020/09/10/">Kyzylorda-news.kz.</a> Биыл әлеуметтік медициналық сақтандыру қорының филиалымен 55 медициналық қызмет көрсетушілермен келісім – шарт жасалған, оның ішінде 28 – мемлекеттік, 27–жеке меншік. Сондай-ақ төлем халыққа көрсетілген медициналық қызметтердің сапасы мен көлеміне мониторинг жүргізілгеннен кейін ғана жүзеге асырылады.
<blockquote>
 «Клиникалық хаттамаларды және емдеуге қажетті талаптарды сақтай отырып, факті бойынша көрсетілген және құжатпен расталған қызметтер ғана төленеді. Пандемия кезінде табысынан айырылған немесе бенефициарлардың арасынан шыққан азаматтар медициналық сақтандыру жүйесіне қайтарылады және медициналық көмектің барлық көлемін ала алады. Мәртебені алу үшін азаматтарға қандай-да бір жерге барудың қажеті жоқ. Барлық деректер ақпараттық жүйелерде автоматты түрде жаңартылады»-деді “Әлеуметтік медициналық сақтандыру қоры” КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Қазіргі таңда, қор уәкілетті министрліктермен бірлесіп, 2020 жылдың 1 қазанына дейін МӘМС жарналары мен аударымдарынан босатылған ШОБ-тың сақтандырылған қызметкерлеріне мәртебе беру бойынша жұмыс жүргізуде. Жұмыс берушілер «Saqtandyry» ақпараттық жүйесінде қызметкерлердің ЖСН-ін тіркеуі қажет. Ол үшін Мемлекеттік кірістер департаментінің сайтына&nbsp;<a href="https://msb.fms.kz/login?fbclid=IwAR0dro0oLn5enzRCXTwtT-6wsDWoDig61xD6sIFFqfVfj539hif16Gi-nmY">https://msb.fms.kz/login</a>&nbsp;сілтемесі бойынша өтіңіз. Яғни тіркеуді «Qoldau-24/7» мобильді қосымшасы арқылы өтуге болады.

МӘМС: Пандемия кезінде табысынан айырылған азаматтар медициналық көмектің барлығын алады

<a href="https://kyzylorda-news.kz/date/2020/09/10/">Kyzylorda-news.kz.</a> Соңғы жылдары өңірде тұрғын үй құрылысын салу қарқын алды. Тек Қызылорда қаласында емес, аудандарда жаңа баспанаға қолы жеткен отбасылар көп.
Қызылорда облысы әкімдігінің хабарлауынша Сырдария ауданының орталығы Тереңөзек кентіне қарасты О.Мәлібаев мөлтек ауданында 2 бөлмелі және 3 бөлмелі 20 үй бой көтерді. Мұнан бөлек, Тереңөзек кентіне кіреберісте №3 және №4 көппәтерлі тұрғын үй салынып, кезектілікте тұрған сырдариялықтар қоныс тойын тойлады.
Ал, тамыз айында 42 пәтерлі №1 және №2 тұрғын үйдің алғашқы кірпіші қаланып, бүгінде құрылыс қарқын алған.Тұрғын үйлер жобасына 466 млн 195 мың теңге қаржы бөлінген.
Құрылыс жұмыстары «Жұмыспен қамту жол картасы» мемлекеттік бағдарламасы аясында жүргізілуде. Баспана салу ісіне ауданда 116 адам жұмыспен қамтылып, оның 58-і жұмыспен қамту бөлімі арқылы алынған. Қазірде құрылыс алаңында 27 адам жұмыс істеп, кірпіш қалауға тартылған.
<blockquote>
 “Екі тұрғын үйдің алғашқысының екі қабатын көтеріп, плитасы салынуда. Мұның кірпіш қалау жұмыстарын осы айдың соңына аяқтауды жоспарлап отырмыз. Сонымен қатар бұл үйдің ішкі сылақ жұмыстары жүргізіліп жатыр. Ал екінші тұрғын үйдің қабырғасын өруді енді бастадық. Екі айдың ішінде тұрғын үйдің екіншісін де бітіретін боламыз. Жалпы, көпқабатты тұрғын үйдерді жылдың соңына тапсыру жоспарланған”, – дейді бас мердігер «НұрТалап және К» ЖШС-нің прорабы Артур Қалмұратов.
</blockquote>
Айту қажет,Сырдария ауданында аудан бойынша 516 адам тұрғын үй кезегінде тұр.

Сырдария ауданында 42 пәтерлі тұрғын үй салынуда

<a href="https://kyzylorda-news.kz/date/2020/09/10/">Kyzylorda-news.kz</a>. Еңбек және халықты әлеуметтік қорғау министрлігінің өкілі Виктория Шегай тұрғын үй сатып алу үшін зейнетақы ақшасының мақсатты жұмсалуын қалай қадағалайтындықтары&nbsp;туралы айтты.
Ол зейнетақы жинағы ең төменгі жеткілікті мөлшерге жеткен салымшылар оның бір бөлігін алуға құқы бар екенін еске салды. Бұл шек адамның жасына қарай анықталады. Оған қатысты есептеулерді мына жерден табуға болады.
<blockquote>
 “Бүгінгі күні Үкімет осы реттегі іс-шараны іске асыру үшін заңнамаға түзетулер енгізіп, жоба әзірлейді. 2021 жылдан бастап талапқа сай келетін қазақстандықтар зейнетақы жинақтарының бір бөлігін ала алады деп үміттеніп отырмыз. Бұл ретте қаражаттың мақсатты пайдаланылуын қамтамасыз ететін бірыңғай операторлар болады. Егер “салымшыға зейнетақы жинақтарының бір бөлігі өз қолына беріледі ме” деген сұраққа келсек, әрине оған “жоқ” деп жауап береміз”, – деді ол TENGRI TV-ға берген сұқбатында.
</blockquote>
Оның айтуынша, мақсатты бағдарды бұл арада “Отбасы” банкі жүзеге асырады, сондықтан тұрғын үй жағдайын жақсарту үшін ақшаны пайдалануда осы банкті қарастыру ұсынылады.
<blockquote>
 “Ипотекалық несие алу үшін тұтынушы жүгінген кез-келген екінші деңгейдегі банкпен келісім жасалады. Ол адам “Тұрғын үй құрылыс жинақ банкіне” хабарласып, зейнетақы жинағын пайдалануға құқы бар-жоқтығын және ондағы ақша алғашқы төлемге жеткілікті ме, жоқ па, соны алдымен тексеруі керек. Осыдан соң БЖЗҚ-мен ақпараттық интеграциядағы ТҚЖБ бұл мәліметті анықтап, растайды, содан соң үш жақты келісім жасалады. Қажетті сома ТҚЖБ арқылы екінші деңгейдегі банкке аударылады. Соңында ақша пәтерді сатушының шотына барып түседі. Қолға ақша берілмейді. Ақша электронды операция арқылы соңғы адамға жетеді”, – деп түсіндірді Шегай.
</blockquote>
Тура осылай үйді күрделі жөндеуден өткізу үшін де ақша бөлінеді. Құрылыс материалдарына, құрылыс қызметтеріне қажетті ақыны төлеудің банктерде бағдарламалары бар. Міне, сонда барлық құжаттар (чектер, қабылдау-тапсыру актілері және т.б.) ақшаның мақсатты бағытталғанын растайды.
<a href="https://kaz.zakon.kz/">zakon.kz.</a>

Пәтер сатып алу үшін бөлінетін зейнетақы ақшасы қолға берілмейді

<a href="http://kyzylorda-news.kz">Kyzylorda-news.kz.</a> «Атамекен» Ұлттық кәсіпкерлер палатасы қызметінің басты бағыты – кәсіпкерлердің құқықтары мен заңды мүддесін&nbsp; қорғау.
Палата құрылған сәттен, яғни 7 жылда кәсіпкерлерден 6 мыңнан аса арыздар келіп түскен, оның ішінде бизнесті қорғау бағытында түскен өтініштер саны – 1877.
<blockquote>
 «Орташа есеппен Палата сарапшылары түскен өтініштердің&nbsp; 42 пайызында оң шешімге қол жеткізіп, 50-ден астам лауазымды тұлға жауапкершілікке тартылды. Сонымен қатар, 7 жылда Палатамен өтініштерді қарау барысында кәсіпкерлердің 5 млрд. 928 млн. теңгеден аса қаражаты сақталып қалды. Оның ішінде қаржының 69 пайызы орта кәсіпкерлік субъектілерінікі болса, 31 пайызы шағын бизнестікі», – дейді Палата директорының орынбасары Салават Құлмахан айтты.
</blockquote>
Салават Аязбайұлының айтуынша, аталған сомма күші жойылған айыппұлдар, өсімпұлдардан, мемлекет тарапынан қайтарылған қаражат есебінен, сақталып қалған бизнес мүлкінің құнынан және т.б.қаржыдан құралып отыр екен.
Өтініштердің құрылымына жасалған талдау, кәсіпкерлерден келіп түскен өтініштердің басым бөлігі сатып алулар, жер, сәулет, құрылыс салаларындағы жергілікті атқарушы органдардың әрекетіне келетінін көрсетіп отыр.
<blockquote>
 «Палата жұмысының соңғы үш-төрт жылын&nbsp; бөліп алып қарайтын болсақ, кәсіпкерлердің құқықтары мен заңды мүдделерін шектеген немесе бұзғаны үшін жауапкершілікке тартылған лауазымды тұлғалар санының арту көрінісін байқауға болады», – дейді Салават Құлмахан.
</blockquote>
Мәселен, 2015 жылы кәсіпкерлердің жұмыс жасауына кедергі жасаған тек 5 мемлекеттік қызметкер тәртіптік жауапкершілікке тартылса, 2018 жылдың қорытындысымен19 қызметкер, 2019 жылы 15 мемлекеттік қызметкер, ағымдағы жылы 6-уы тәртіптік жауапкершілікке тартылыпты.
Лауазымды тұлғалар кәсіпкерлік қызметтерге тексеру жүргізу, мемлекеттік сатып алу және&nbsp; рұқсат беру рәсімдері барысында кәсіпкерлерге қатысты заңсыз әрекеттерге барып, олардың құқықтарын шектеген.
Одан бөлек, кәсіпкерге қатысты азаматтық істі сот тәртібімен қарау барысында мемлекеттік сатып алу барысында заң бұзушылықтарға жол бергені үшін сотпен&nbsp; 8 мемлекеттік органдарға қатысты жеке ұйғарым шығарылған.
Палата жанында тұрақты жұмысшы орган –&nbsp; Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес жұмыс жасайды.
Кеңес отырыстарында 82 жүйелі мәселелер қаралып, оның 68 оң шешімін тапты. Нәтижесінде&nbsp; 600 аса кәсіпкердің құқықтары мен заңды мүдделері қалпына келтіріліп,17 лауазымды тұлға жауапкершілікке тартылды.
<img src="https://kyzylorda-news.kz/wp-content/uploads/2020/09/salavat-kwlmahan-scaled.jpg" alt="" />

Қызылорда: Палата 7 жылда кәсіпкерлердің 5 млрд.928 млн.теңгесін сақтап қалған

<a href="https://kyzylorda-news.kz/date/2020/09/10/">Kyzylorda-news.kz.</a> Денсаулық сақтау министрі Алексей Цой қашықтан білім беру форматын енгізудің негізгі себептерін атады.
<blockquote>
 “Біріншіден, наурыз айынан бері елімізде карантин мен адамдардың қарым-қатынасын барынша азайту шаралары қолға алынса да, 2 418 бала коронавирус инфекциясын жұқтырды. Олардың 98 проценті жазылып шықты. 34 бала әлі емделіп жатыр. Демек, жабық ұжымдардың ішінде инфекция таралу деңгейі жоғары”, – деді Цой орталық коммуникациялар қызметінде өткен онлайн брифингте.
</blockquote>
Министрдің айтуынша, 12 жасқа дейінгі балалар инфекцияны көп таратпайды. Дегенмен, ондай оқиғалар бар. Ал 12 жастан асқан балалар вирусты тез таратады. Ондайда отбасы мүшелеріне, әсіресе, үлкен адамдарға қауіп төнеді. Бұл – Дүниежүзілік денсаулық сақтау ұйымының мәліметі және қашықтан оқыту форматын енгізудің екінші себебі.
<blockquote>
 “Үшіншіден, мектептерде термометрия, арақашықтық, бетперде тағу, балалардың қозғалысын шектеу, сыныптағы оқушылар санын азайту сияқты шаралар қолға алынса да, бұның барлығын қатаң сақтап жүру оңай емес. Әсіресе, бастауыш сынып оқушыларын ұзақ уақыт бір жерде ұстау қиын. Ал жабық нысандарда адамдар көп жиналса, вирустың таралу қаупі күшейеді”, – деп атап көрсетті Цой.
</blockquote>
<a href="https://sputniknews.kz/">Sputnik Қазақстан</a>

Балалар қай жастан кейін коронавирусты жылдам таратады?

<a href="https://kyzylorda-news.kz/date/2020/09/10/">Kyzylorda-news.kz.</a> Қазіргі таңда балалар арасындағы жұқпалы аурулардың көрсеткіші Қызылорда облысы бойынша 48 707 көрсеткішпен – 187,67 ЖРВИ-мен аурушаңдық тіркелді. Сондай-ақ өткен жылмен салыстырғанда 9,7% – ға төмендеді. Бұл туралы Өңірлік коммуникациялар қызметінде өткен баспасөз мәслихатында облыстық денсаулық сақтау басқармасының ана мен бала денсаулығын қорғау бөлімінің басшысы Бибізада Дүйсенбаева мәлімдеді.
<blockquote>
 «Биыл 90 000 вакцинаға сұраныс беріліп, жалпы халық санының -11,4% қамтуға мүмкіндік бар. Қазақстан Республикасы Үкіметінің 2009 жылғы 30 желтоқсандағы №2295 «Қарсы профилактикалық егу жүргізілетін аурулардың тізбесін, оларды жүргізу ережесін және халықтың жоспарлы егілуге жатқызылатын топтарын бекіту туралы» қаулысымен бекітілген тізбеге сәйкес 2020 жылға: медицина қызметкерлері –10 254, диспансерлік есепте тұрған балалар-26 125, ересектер-29 869, тәуекел тобындағы жиі ауыратын балалар – 9350, интернатты мекемелер балалары – 1083, мамандандырылған сәбилер үйінің балалары-130, қарттар үйі балалары-190, мүгедектер мен диспансерлік есепте тұратын ересектер – 6025, жүкті әйелдер– 6974 іріктеліп, жоспарланды»,- деді Бибізада Әшімқызы
</blockquote>
Облыс бойынша маусымға 8 стационар, 61 алғашқы медициналық-санитарлық мекеме жұмылдырылады, оларда 54 фильтр кабинеттер, қосымша 79 телефон арқылы кері байланыс шақырулар мен консультациялар үшін жұмыс істейтін болады, үйде қызмет көрсету үшін қосымша -81 автокөлік бөлінді. Сонымен қатар Медициналық ұйымдарда шұғыл медициналық көмек көрсету үшін өкпені жасанды желдетуге арналған- 117 аппарат (стационарларда), 597 пульсооксиметр, 258 кислоротерапияға амбулаториялық жағдайда қосу нүктелері қарастырылған.

Қызылордада эпидемиологиялық маусымға дайындық басталды

<a href="https://kyzylorda-news.kz/date/2020/09/10/">Kyzylorda-news.kz.</a> Қазақстанда қараша мен желтоқсан айларында коронавирус індетінің өршуі тіркелуі мүмкін. Мұндай болжамды ҚР Денсаулық сақтау министрі Алексей Цой жасады.
<blockquote>
 «Қазіргі уақытта болжам жасаумен айналысып жатырмыз. Ең нақты болжам екі апталық кезеңге жасалады. Күн сайын қолымызға түсіп отырған көрсеткіштер ауытқып тұрады. Толықтай алғанда, қазірі уақытта бұл болжамдар маска тағатын, яғни әлеуметтік арақашықтық пен маска режимін сақтайтын адамдардың жалпы пайызына байланысты. Дәл осыған ауруға шалдығу болжамы тікелей байланысты. Ауруға шалдығуға қатысты болжам жасау үшін қазіргі уақытта азаматтардың қарым-қатынасты қаншалықты қысқартқандығын білуіміз қажет», – деді ол Орталық коммуникациялар қызметіндегі баспасөз мәслихатында БАҚ өкілдерінің сауалына орай.
</blockquote>
Оның атап өтуінше, індеттің таралуына күнделікті мониторинг жүргізіліп,болжам жасалып отырады.
<blockquote>
 «Шамамен қараша мен желтоқсан айлары кезеңінде өсім болуы мүмкін деп отырмыз. Бұл екінші толқынның орын алуы мүмкіндігімен, өткір респираторлық вирустық инфекциялардың және тұмаудың өршуімен байланысты», – деді Алексей Цой.
</blockquote>
<a href="https://lenta.inform.kz/kz/kazakstanda-koronavirus-kashan-orshui-mumkin-ministrlik-bolzhamy_a3693092">ҚазАқпарат</a>

Қазақстанда коронавирус қашан өршуі мүмкін – министрлік болжамы

<a href="https://kyzylorda-news.kz/date/2020/09/10/">Kyzylorda-news.kz.</a> Қызылорда қаласындағы азық-түлік дүкендерінің бірінде сатушыны ойыншық тапаншамен қорқытып арақ-шарап алып кеткен бұзақы ұсталды. Күдікті сол уақытта басқа дүкенге кіріп сатушыдан ақша талап еткені анықталды.
«Бірнеше сағат ішінде патрульдік полиция қызметкерлері жүргізген жедел-іздестіру жұмыстарының нәтижесінде бұрын сотталған 26 жастағы жұмыссыз қала тұрғыны ұсталды.&nbsp; Одан айғақты заттар тәркіленіп, ойыншық тапанша қолданғаны белгілі болды. Тексеру барысында күдікті азаматтың екі тонау дерегіне қатысы бар екені анықталды», – делінген полиция департаментінің таратқан хабарламасында.
Күдіктіге қатысты Қазақстан Республикасы &nbsp;Қылмыстық кодексінің &nbsp;191-бабы 2-бөлігінің 1-тармағымен&nbsp;сотқа дейінгі тергеп-тексеру басталды.&nbsp;Қазіргі таңда күдікті уақытша ұстау абақтысында.

Қызылордада ер адам сатушыны ойыншық тапаншамен қорқытып тонамақ болған

<a href="https://kyzylorda-news.kz/date/2020/09/10/">Kyzylorda-news.kz.</a> Бүгін аймақ басшысы Гүлшара Әбдіқалықова жаңадан сайланған өңірлік кәсіпкерлер кеңесінің мүшелерімен кездесіп, кәсіпкерлік саласындағы ортақ мәселелерді талқылады. 
Жиында облыс әкімі өңірлік кәсіпкерлер кеңесі кәсіпкерлік саласындағы негізгі мәселелерді шешіп, бизнес идеяларды қолдау бағытында жаңаша жұмыс жүргізетінін атап өтіп, жаңадан сайланған кеңес мүшелерін бірлесіп жұмыс істеуге шақырды.
<blockquote>
 “Өңірлік кәсіпкерлер кеңесінің үшінші сайлауында 8000-нан аса сайлаушы-кәсіпкерлер Сіздерге дауыс беріп, таңдау жасады. Электоралды кампания кезінде Сіздер өздеріңіздің жоғары кәсіби деңгейлеріңізді көрсету арқылы жеңіске жеттіңіздер. Бүгінгі күні кәсіпкерлік саласын дамыту бағытында облыс әкімдігі өңірлік кәсіпкерлер палатасымен тығыз байланыста жұмыс жасауда. Сол себептен сіздермен бүгінгі кездесуді ұйымдастырып отырмын”,-деді Г.Әбдіқалықова.
</blockquote>
<img src="https://kyzylorda-news.kz/wp-content/uploads/2020/09/2c445a563bc3bd9f7e5252f0dd80f6d8_original.150881.jpg" alt="" />
Кездесуде облыс әкімі бизнес қауымдастық өкілдерінің өзекті мәселелерінің шешілуіне және кәсіпкерлерге қолдау көрсету бағытында тұрақты көмектің бар екенін атап өтті. Сонымен бірге шағын және орта бизнес иелерінің жобалары қолдау табатынын атап өтті. 
<blockquote>
 «Қызылорда» өңірлік инвестициялық орталығы ауылдық елді-мекен кәсіпкерлерінің жобаларын жеңілдікпен несиелендіруде үлкен сұранысқа ие микроқаржы ұйымы болып отыр. Оның қызметі қолданыстағы заңнамаларға сәйкес 2020 жылдың 31 қазанына дейін шектелген болатын. Дегенмен, біз Орталық қызметін 2025 жылдың 31 желтоқсанына дейін ұзарттық. Жобаны қаржыландыру үшін әртүрлі қаржы көздерінен 1,2 млрд. теңге қаржы тартылды. Осыған орай Қызылорда облысының 2023 жылға дейінгі экономикалық даму жоспарын жасадық,-деді облыс әкімі.
</blockquote>
Кеңес мүшелерімен кездесуде аймақ басшысы карантин уақытында бизнес субъектілерінің 75 пайызы жұмысын уақытша тоқтағанын ескере келе, орта және кәсіп иелеріне тұрақты қолдау болғанын атап өтті.
Айта кету керек, төтенше кезең уақытында өңірде 51 мыңнан аса шағын және орта бизнес субъектісіне салықтық жеңілдіктер берілді, 8 мыңға жуық кәсіпкердің несие төлемдері кейінге шегеріліп, сауда нысандары 700,0 млн. теңгеге жалға алу төлемдерінен босатылды. Мұнан бөлек, «Бизнестің жол картасы 2025» бағдарламасын іске асыруға бөлінген қаржы 1,7 млрд. теңгеден 2,9 млрд. теңгеге дейін ұлғайтылды.
Карантиннен кейін кәсіпкерлер бизнесін әртараптандыруға көшті. Аймақта тоқтап тұрған тойханалардың қызметін өндіріске бағыттау жұмыстары да жүргізілуде. Бүгінгі күннің өзінде 9 тойхана өз қызметін басқа салаға ауыстыруға дайын.
Басқосуда кеңес мүшесі, «K-GroupLTD ЖШС директоры Қайрат Боранбаев пен кәсіпкер Айткүл Әбдіқадырова сөз алып, кәсіпкерлікке бағытталған гранттар мен өндіріс орындарын ашу мәселесін сөз етті. Сондай-ақ, кәсіпкер Манарбек Еспенбетов құрылыс саласының мамандарын даярлауда жас мамандарды тәжірибе алаңына тарту мәселесін көтерді.
Өз кезегінде аймақ басшысы жаңа өндіріс нысандарын ашу арқылы бағыттас шағын өндірістерін құрып, тұрақты жұмыс көздерін тауып, кәсіпкерлерді оқыту мәселелеріне жете мән беру қажеттігін қаперге салды.
Кездесуде облыс әкімі осы кезге дейін өңірлік кеңес төрағасы қызметін атқарған, пандемия кезеңінде халық қажеттілігіне орай қызмет көрсеткен кәсіпкер Дінмұхамед Абизовқа «Халық алғысы» медалін табыстады.
Жиын соңында Гүлшара Әбдіқалықова биылғы жылы 26 млрд. теңгені құрайтын 108 жобаны іске асыру арқылы өңірде 2000-ға жуық жаңа жұмыс орны құрылып, кәсіпкерлерге қолайлы жағдай жасалатынын атап өтіп, кездесуді қорытындылады.
<img src="https://kyzylorda-news.kz/wp-content/uploads/2020/09/119137738_2716826885087030_4708743839756218010_o.jpg" alt="" />
<img src="https://kyzylorda-news.kz/wp-content/uploads/2020/09/119169261_2716828115086907_527249797609538090_o.jpg" alt="" />
<img src="https://kyzylorda-news.kz/wp-content/uploads/2020/09/119123597_2716828241753561_3600039278335576993_o.jpg" alt="" />

Қазақстан және Қызылорда облысының жаңалықтары