<a href="https://kyzylorda-news.kz/">Kyzylorda-news.kz.</a> Өткен жылы қызылордалықтарға көрсетілген медициналық қызметтердің сапасы мен көлемі бойынша 59 мыңға жуық ақау анықталды.
Әлеуметтік медициналық сақтандыру қорының сарапшылары мемлекет тегін медициналық көмектің кепілді берілген көлемі (ТМККК) шеңберінде және МӘМС пакеті бойынша Жеткізушілер көрсеткен қызметтердің сапасы мен көлеміне мониторинг жүргізуді жалғастыруда.
2020 жылы халыққа медициналық көмек көрсету кезінде 58,7 мыңдай түрлі кемшілік анықталды, медициналық ұйымдарға салынған айыппұл сомасы 446 млн теңгеден асты.
<blockquote>
 «ТМККК және МӘМС пакеттері бойынша Қор жеткізушілері халыққа көрсеткен медициналық қызметтер үшін ақы төлеу осы қызметтердің сапасы мен көлеміне мониторинг жүргізілгеннен кейін ғана жүргізілетінін атап өткен жөн. Іс жүзінде көрсетілген және медициналық көмек көрсету стандарттары мен ережелерін, сондай-ақ клиникалық хаттамалардың ұсынымдарын сақтай отырып, құжатпен расталған қызметтерге ақы төленеді», – деп атап өтті «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Қор филиалының директоры түсіндіргендей, анықталған кемшіліктің ең көп саны жан басына шаққандағы нормативке кірмейтін, әрбір қызмет жеке төленетін консультациялық-диагностикалық қызметтерді көрсетумен байланысты. Жалпы құны 60,9 млн теңге болатын 47,6 мыңнан астам осындай ақаулар тіркелді. Сондай-ақ, амбулаториялық-емханалық көмек көрсету кезінде 4,9 мың ақау, тәулік бойы жұмыс істейтін стационарларда медициналық көмек көрсету кезінде 3,9 мың кемшіліктер және де басқа да 2,3 мыңдай ақаулар анықталды.
Жыл басынан сарапшылар нақты көрсетілмеген қызметтердің 288 – нен астам жағдайын анықтады, олар пациенттер медициналық қызметті алған болып ақпараттық жүйелерге енгізілген. Осындай жағдайлар бойынша анықталған бұзушылықтар үшін медициналық ұйымдарға 3,6 млн теңгеге айыппұл салынды.
Шағым немесе өтініш беру үшін 1406 телефонына немесе Qoldau – 24/7 мобильді қосымшасы арқылы хабарласу қажет.
<img src="https://kyzylorda-news.kz/wp-content/uploads/2021/01/algoritm-vyjavlenija-medwslwg-kaz-1.jpeg" alt="" />

МӘМС: Медициналық қызмет бойынша 59 мыңға жуық ақау анықталды

Kyzylorda-news.kz. Облыста жылу мен электр энергиясының бағасы төмендеді. Қалған коммуналдық қызметтердің бағасы өскен жоқ. Бұл туралы Өңірлік коммуникациялар қызметінің ақпараттық алаңында облыс бойынша табиғи монополияларды реттеу департаментінің басшысы Гүлмира Өтегенова баяндады.
«Қызылорда жылу электр орталығы» МКК кәсіпорны 1 шаршы метрге 96,76 теңгеден 91,37 теңгеге дейін, ал есептегіш құралдары бар тұрғындарға 1 Гкал-ға 1989,42 теңгеден 1878,44 теңгеге дейін төмендетті. Яғни тариф 5,6 арзандады. Ал «Теміржолсу-Қызыл-Орда» ЖШС сумен жабдықтау қызметіне тариф тұрғындар үшін 1 текше метрге 53,37 теңгеден 48,99 теңгеге дейін немесе 8,2 пайызға төмендетілді.
Аймақтағы 3 электр энергиясымен жабдықтаушы ұйым 1 қаңтардан бастап өз еркімен бағаларын төмендетті. Мәселен, «Энергосервис» ЕЖШС 2,2 пайызға, «Шиелі Жарығы» ЖШС 3,1 пайызға, «Дәулетэнерго» ЖШС 1,9 пайызға тарифті арзандатты.
<blockquote>
 Газды бөлшек саудада өткізу бағасы 2021 жылдың 1 қаңтарынан бастап 17 пайызға төмендетуге келісілді. Яғни, тұрғындар үшін мың текше метрге қосымша құн салығымен 20902,93 теңгеден 17351,52 теңгеге дейін төмендетілді. Алайда, «ҚазТрансГаз Аймақ» акционерлік қоғамы қабылданған шешіммен келіспей, сотқа жүгінді. Осыған орай, сот шешімі шыққанға дейін бағаның енгізу мерзімі тоқтатылды. Нақты шешім қаңтар айының аяғында белгілі болады, – деді Гүлмира Өтегенова.
</blockquote>

Қызылорда: Жылу мен электр энергиясының бағасы төмендеді

<a href="https://kyzylorda-news.kz/">Kyzylorda-news.kz</a>.&nbsp; «Қазақстан Республикасындағы сайлау туралы» Қазақстан Республикасының Конституциялық заңының 111-1 бабына, «Nur Otan партиясы» қоғамдық бірлестігі Жарғысының 9.8. тармағына сәйкес және 2021 жылдың 10 қаңтарында өткен Қазақстан Республикасы мәслихаттары депутаттарының сайлауына байланысты, «Nur Otan» партиясы Қызылорда облыстық филиалы» қоғамдық бірлестігі Саяси кеңесі Бюросы шешімімен 27 кандидаттан тұратын тізім бекітіліп, Қызылорда облыстық мәслихатының VII шақырылымының депутаттары ретінде тіркеу үшін облыстық сайлау комиссиясына жолданды.
Жалпы, облыстық мәслихаттағы «Nur Otan» партиясы депутаттық фракциясының құрамы 59,3%-ға жаңарды. Олардың орташа жасы -50, яғни 7 жылға жасарды.
Тізімдегі 19 кандидат – праймериз жеңімпаздары, 8 кандидат Саяси кеңес Бюросының квотасы бойынша бекітілген.
Партия Төрағасының облыстық мәслихаттағы жастар мен әйелдердің үлесін арттыру жөніндегі тапсырмасы нақты іске асырылды. Яғни, облыстық мәслихаттағы «Nur Otan» партиясы депутаттық фракциясының жаңа құрамының 45 %-ы әйелдер мен 35 жасқа дейінгі жастардан тұрады.
Негізінен облыстық мәслихаттағы «Nur Otan» депутаттық корпусына білім беру, денсаулық сақтау, ҮЕҰ, БАҚ, өнеркәсіп, ауыл шаруашылығы және т.б. салалардың өкілдері енді.
Депутаттық мандат иелерінің 3-уі ғана бұрынғы мемлекеттік қызметкерлер.
Естеріңізге сала кетейік, «Nur Otan» партиясы сайлау қорытындысы бойынша 27 депутаттық мандат алды. “Ақ жол” – 3 мандат, 3-і «Ауыл» Халықтық-демократиялық патриоттық партиясынан.

Қызылорда облыстық мәслихатындағы «Nur Otan» партиясы депутаттық фракциясының құрамы  59,3%-ға жаңарды

Kyzylorda-news.kz. Қызылорда – Құмкөл автожолында жол-көлік оқиғасы орын алды. Қайтыс болғандар бар.
Бүгін сағат 14:20 шамасында Қызылорда – Құмкөл автожолының 69 км-де «Мерседес Бенц Спринтер» және «Тойота Хайлюкс» автокөліктері соқтығысқан. Жол-көлік оқиғасы салдарынан 2 автокөліктің жүргізушілері және 1 жолаушы оқиға орнында, 2 жолаушы медициналық мекемеде қайтыс болды.
Сонымен қатар, қалған 5 жолаушыға медициналық көмек көрсетілді. 
Оқиға орнында полиция қызметкерлері, төтенше жағдай және медицина қызметкерлері жұмыс жасап жатыр. Жол – көлік оқиғасы жол ережесін бұзу салдарынан болуы мүмкін.
Қазақстан Республикасы Қылмыстық кодексінің 345-бабының 4-бөлігі бойынша сотқа дейінгі тергеу басталды (Көлік құралдарын жүргізуші тұлғалардың жол қозғалысы немесе көлік құралдарын пайдалану ережелерін бұзуы).
Тиісті сараптамалар тағайындалды. Оқиғаның мән-жайлары анықталуда.
<img src="https://kyzylorda-news.kz/wp-content/uploads/2021/01/img-20210113-wa0392.jpg" alt="" />

Қызылордада жол апатынан 5 адам көз жұмды

Kyzylorda-news.kz. Аймақта өткен жылы атаулы әлеуметтік көмек 68 мыңнан астам адамға төленді. Яғни, 13 мың отбасына берілді.
Әлеуметтік көмек алатын еңбекке жарамды 1521 адам тұрақты, 2063-і уақытша жұмыспен қамтылды. Биыл цифрлық әлеуметтік әмиян енгізіліп, азаматтың шотына аудару жүйесі іске қосылады. Яғни, әлеуметтік бағытта бөлінген ақшаның қалай жұмсалып жатқанына бақылау жүргізілетін болады.
<blockquote>
 “1-6 жасқа дейінгі балаларды кепілдендірілген әлеуметтік топтамамен қамтамасыз ету толығымен порталға көшірілетін болады. Әлеуметтік порталға көшу кепілдендірілген пакетті ұсыну тәртібін жеңілдетеді. Ол үшін АӘК алушының электронды цифрлы қолтаңбасы болуы міндетті. Егер порталға кіру мүмкіндігі болмаған жағдайда тұрғылықты жері бойынша жұмыспен қамту орталықтарына хабарласу керек, – деді облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова мәлімдеді.
</blockquote>

Қызылордада цифрлық әлеуметтік әмиян іске қосылды

<a href="https://kyzylorda-news.kz/">Kyzylorda-news.kz</a>. Қызылорда облысы кәсіпкерлер палатасы Кәсіпкерлерге қызмет көрсету орталығымен көрсетілетін қызметтердің бірі – заң қызметі. Заңды білу әр адамның міндеті. Осы орайда кәсіпкерлердің заңға қатысты сауалдарына Палатаның менеджер-кеңесшісі Мадина Касымжан жауап берді.
– Мадина, кәсіпкерлер палатасында бизнес өкілдерінің құқығын қорғайтын арнайы заңгерлер тобы жұмыс жасайды. Кәсіпкерлер палатасы Кәсіпкерлерге қызмет көрсету орталығында заңгерлік қызмет бар. Осының ара жігін ажыратып бересіз бе?
– Палатада арнайы кәсіпкелердің құқығын қорғайтын бөлім бар. Аталмыш бөлімдегі заңгерлердің атқаратын рөлі қомақты, арнайы үлкен істерде жұмыс жасайды. Былай айтқанда, кәсіпкерлердің қорғаушысы десе де болады. Мәселен, мемлекеттік органдар мен кәсіпкерлердің арасында қандай да бір даулы мәселе туындаған жағдайда, кәсіпкерге сотқа жүгіну қажет болса бизнес өкілдерінің атынан тиісті талап арызды біздің заңгерлеріміз әзірлеп, мұнымен қоса сот процесінде қорғаушы болып, істі сүйемелдейді. Өздеріңіз де жақсы білесіздер, азаматтардың барлығы құқық қорғау, сот органдарына құжатты қалай әзірлеу керек екенін біле бермейді. Мұндай жағдайда кәсіпкер ақылы қызметтерге жүгінсе жай ғана арыздың өзін ең кемі 5000 теңгеге жаздырар еді. Ал Палата заңгерлері құжаттарды әзірлеп берумен бірге әрі қарай түрлі органдарда кәсіпкердің заңды өкілі ретінде мүддесін қорғайды.
– &nbsp;&nbsp;Осы орайда Кәсіпкерлер палатасы Кәсіпкерлерге қызмет көрсету орталығындағы заң қызметі туралы айтып өтіңізші…
– Кәсіпкерлер палатасындағы көрсетілетін қызметтердің барлығы кәсіпкерлер мен кәсіпкерлік бастамасы бар азаматтарға ақысыз, тегін жүргізіледі. Сондай қызметтердің бірі – мен атқарып отырған заң қызметі. Заң қызметі деп жалпылама айтқанымен де оған 12 бағыт түрі кіреді. Түсінікті болу үшін назарларыңызға толық ұсынғым келеді: &nbsp;&nbsp;&nbsp;
– кәсіпорынды (жеке кәсіпкерді) тіркеу, қайта тіркеу, қызметін тоқтатуға байланысты құжаттарды әзірлеу бойынша кеңес беру қызметтері, сондай-ақ осы бағыттағы құжаттарды әзірлеу
– келісім шарттардың жобасын әзірлеу бойынша кеңес беру, құжаттың жобасын әзірлеу;
– азаматтық және еңбек құқығы саласында кеңестер беру;
– құжат айналымын жүргізу бойынша кеңестер беру;
– ұсыныстар бере отырып құжат айналымының аудитін жасау;
– несиелендіруге бизнес – жоспардан басқа құжаттар пакетін әзірлеу&nbsp; бойынша кеңестер беру, құжаттар пакетін әзірлеу;
– кадрлық құжаттамаларды жүргізу бойынша кеңестер беру;
– ұсыныстар бере отырып кадрлық құжаттамаларға аудит жүргізу;
– құжаттардың ҚР заңнамаларына сәйкестігін тексеруге байланысты кеңес беру қызметтері.
– Мысал келтірсеңіз…
– Жоғарыда заң қызметі бойынша бағыттарды айтқанда кеңес беру, одан кейін құжаттарды әзірлеу деп бөліп көрсеттім. Кеңес беру мен құжаттарды әзірлеудің айырмашылығына тоқталайын. Кей кәсіпкерлер құжаттарды өздері жасап үйренгісі келеді. Ол кісілер «Өз құқығымды өзім қорғай алатындай жағдайда болғым келеді. Басшы болғаннан кейін басқара алатындай болуым керек» деп кеңес алуға келеді. Әзірлеген құжаттарын көрсетеді. Кеткен кемшілігін, толықтыруларды сұрайды. Бұл жерде мен тек қана кеңес беремін. Заңнамаға сілтемелер айтамын немесе қолдарына шығарып беремін. Ал кәсібін енді бастап жатқан кәсіп иелері еңбек келісім шартынан бастап, өзге де құжаттарын әзірлеп беруге өтініш береді. Мұндай жағдайда құжаттарын толық әзірлеп беремін. Еңбек келісім шартына қатысты айтып өтейін, кәсіпкер қарамағына қызметкер алғаннан кейін еліміздің Еңбек Кодексіне сәйкес жұмыс берушіге айналады. Жұмыс беруші болғаннан кейін еңбек келісім-шартын жасауға міндетті. Өзін де, қызметкерін де қажетті жағдайда қорғай алу мүмкіндігі болу үшін бұл құжат аса маңызды рөл ойнайды, яғни екі тараптың да құқықтары қорғалу керек.
– Жыл басталғалы кәсіпкерлер заң қызметіне қатысты қандай өтініштер білдіруде?
– Өтініштердің басым көпшілігі лицензиялауға қатысты болып отыр. Мысалы, массаж қызметін ашуға, компьютерлік клубтар үшін лицензия керек пе деген секілді сауалдармен жүгінуде. Басым сұрақтардың екінші легін, ашылған кәсіптерді жабуға қатысты кеңес алушылар құрайды. Яғни бұрын ашылған кәсібін жапқан жағдайда алдағы уақытта қандай да бір қиындықтарға кездеспейміз бе деген қауіптерін де жеткізуде.
– Сұхбатыңызға рахмет!

Кәсіпкерлер палатасында 12 бағыт аясында заң қызметі көрсетіледі

<a href="https://kyzylorda-news.kz/">Kyzylorda-news.kz</a>. Полиция батальон қызметкерлері Қызылорда қаласындағы көшелерінің бірінде &nbsp;«BMW 520» автокөлігін тоқтатты.
Құжаттарын тексеру барысында 23-жастағы жүргізушінің&nbsp; автокөлікті алкогольдік масаң күйде басқарғаны анықталды. Жүргізушіге жасаған әкімшілік құқық бұзушылығы үшін Қазақстан Республикасының ӘҚБтК-нің 608 бабының 1 бөлігімен әкімшілік хаттама рәсімделіп, сотқа жолданған.
Қызылорда қаласы мамандандырылған әкімшілік сотында жоғарыда аталған жүргізушіге қатысты әкімшілік іс қаралып, сот шешімімен құқық бұзушы 15 тәулікке әкімшілік қамаққа алынып, 7 жылға көлік жүргізу құқығынан айырылды.

23 жастағы қызылордалық 7 жылға дейін көлік жүргізе алмайды

<a href="https://kyzylorda-news.kz/">Kyzylorda-news.kz</a>.&nbsp; Отбасы банктің қосымшасына зейнетақы жинақтарын аударуға арналған есепшотты ашу қызметі енгізілді, деп хабарлайды <a href="https://sputnik.kz/">Sputnik Казахстан</a>.
Отбасы банк” зейнетақы жинағының бір бөлігін мерзімінен бұрын алуға өтініш беретін онлайн-платформаны жасап қойды. Портал тиісті нормативтік-құқықтық актілерге қол қойылғаннан кейін іске қосылады.
Зейнетақы жинақтарының бір бөлігін аудару үшін өтініш берудің тәртібі төмендегідей:
<ul>
<li>“Отбасы банктің” мобильді қосымшасы жүктеу;</li>
<li>“БЗТ үшін есепшот ашу” қызметін таңдау;</li>
<li>ЖСН мен телефон нөмірін енгізу;</li>
<li>SMS-пен келетін кодты енгізу;</li>
<li>қосымшада жеке куәлікті сканерлеу;</li>
<li>бейне растаудан өту, ол үшін экранға қарап, бірнеше қимыл жасау қажет;</li>
<li>клиенттік анкетаны толтыру;</li>
<li>банктің стандартты шарттарымен, жеке мәліметтерді өзгерту мен бір реттік зейнетақы төлемі туралы өтінішпен танысу;</li>
<li>Оны растайтын тағы бір SMS жіберіледі;</li>
<li>кодты енгізу;</li>
<li>интернет-банкигке кіру үшін пароль орнату.</li>
</ul>
Осының бәрі жасағаннан кейін бірыңғай зейнетақы төлеміне арналған есепшот ашылады.
Бұдан бөлек, зейнетақы жинақтарының бір бөлігін алу үшін электронды цифрлық қолтаңба қажет болады. Оны халыққа қызмет көрсету орталығына бармай-ақ ашуға мүмкіндік бар. Зейнетақы жинақтары үшін ЭЦҚ-ны компьютер арқылы алған жөн. Себебі телефон арқылы алынған қолтаңбаны тек мобильді қосымшамен пайдалануға болады.

Зейнетақы жинағын шешіп алу үшін есепшот қалай ашылады?

<a href="https://kyzylorda-news.kz/">Kyzylorda-news.kz</a>. 2020 жылы Әлеуметтік медициналық сақтандыру қорының филиалына азаматтардан 15 450 өтініш келіп түсті, оның ішінде 15 219 өтініш консультациялық сипаттағы, 168 шағым, 63 алғыс. Бұл туралы Әлеуметтік медициналық сақтандыру қорының облыстық филиалының директоры Бақыт Исмаханбетов мәлімдеді.
Шағымданудың себептері: МӘМС мәртебесін алу, дәрі-дәрмектердің болмауы, консультациялық-диагностикалық қызметтерді ұзақ күту, емханалар мен ауруханалардағы медициналық көмектің сапасы, медициналық ұйымдар қызметкерлерінің дәрігерлік этика мен деонтологияны сақтамауы, ауруханаға жатқызудан бас тарту және т.б.
Көбінесе «Qoldau – 24/7» мобильді қосымшасы арқылы есепке қою кезінде сақтандырылу мәртебесі жоқ жұмыс істемейтін жүкті әйелдерден өтініштер түседі. Бұл жағдайда біздің сарапшылар жүктілікті растайтын анықтамалардың негізінде 1 айға уақытша мәртебе береді. Осыдан кейін жүкті әйел есепке алынады және болашақта оның мәртебесі өзгермейді, ол сақтандырылады.
Сондай-ақ, «Qoldau – 24/7» мобильдік қосымшасы арқылы уақытша мәртебеге отандық және шетелдік жоғары оқу орындары мен колледждердің күндізгі бөлім студенттері ие бола алады. Ол үшін студенттер белгілі бір оқу орнында оқығанын растайтын анықтаманы тапсыруы керек. Студентке 1 ай мерзімге уақытша сақтандыру мәртебесі беріледі. Әрі қарай, ол өзінің деректерін Ұлттық білім дерекқорына немесе egov.kz веб-сайтына «Білім» бөлімінде дербес тіркелу үшін оқу орнының деканатына жүгінуі керек.
Филиал директоры атап өткендей, уақытша сақтандыру мәртебесін азаматтардың 15 жеңілдік санатындағы барлық өкілдері ала алады (толығырақ – <a href="https://fms.kz/kk/content/azamattardyn-zhenildigi-bar-sanattary">https://fms.kz/kk/content/azamattardyn-zhenildigi-bar-sanattary</a>). Бұл кезең (1 ай) пациенттің жеңілдік мәртебесін қалпына келтіру үшін беріледі.
Егер пациентке медициналық көмек көрсетуден бас тартылса немесе тиісті түрде көрсетілмесе, онда 1406 нөмірі, «Qoldau – 24\7» мобильді қосымшасы немесе «SaqtandyruBot» Telegram-бот бойынша жүгіну қажет. Қордың мамандары мен сарапшылары жедел жауап беріп, қажетті көмек көрсетеді.
<img src="https://kyzylorda-news.kz/wp-content/uploads/2021/01/kaz-lgotniki-osms.png" alt="" />

Медициналық сақтандыру қорына қызылордалықтардан 15 мыңнан астам өтініш келіп түсті

<a href="https://kyzylorda-news.kz/">Kyzylorda-news.kz</a>. Қызылорда облысында 8 мыңнан астам тұрғын иелігіне 11 мыңнан аса қару тіркелген.
Өткен жылы заңсыз айналымнан атыс қаруын тәркілеуге, ұрланған, жоғалған қаруды іздестіруге және атыс қаруымен жасалатын қылмыстардың алдын алу бағытында&nbsp;«Қару» жедел-профилактикалық іс-шарасы жүйелі түрде&nbsp;өткізілуде. &nbsp;&nbsp;&nbsp;&nbsp;
Шара барысында өткен жылы заңсыз айналымнан барлығы 246 қару тәркіленді. Құқық бұзушылар ҚР ӘҚБтК-нің 482 бабымен (жеке және заңды тұлғалардың қаруды заңсыз иеленіп алуы, беруі, өткізуі, сақтауы, алып жүруi, тасымалдауы) әкімшілік жауапқа тартылды. 8 мыңнан астам жеке қару иелерiнің аңшы қаруын сақтау заңдылығы тексерiлiп, азаматтық, қызметтiк қаруды, оған арналған патрондарды сақтау, пайдалану және тасымалдау ережелерiн бұзу дерегімен 542 құқық бұзушылықтар анықталып, әкімшілік шаралар көрілді.
2020 жылғы 1 шілдеден бастап республика көлемінде заңсыз сақтаудағы қару, оқ-дәрілер, жарылғыш заттарды қабылдау акциясы өткізіліп, оның барысында азаматтардан 79 өтініш түсті. 126 дана қару қабылданып, Қызылорда облысына республикалық бюджеттен бөлінген 8 млн. 153 мың теңге қаражат толығымен игерілді.

Қызылордада былтыр заңсыз айналымдағы 246 қару тәркіленді

<a href="https://kyzylorda-news.kz/">Kyzylorda-news.kz</a>. Бүгін Қызылорда облысының әкімі Гүлшара Әбдіқалықова мүмкіндігі шектеулі азаматтарға қолайлы орта жасау бағытындағы мәселелер бойынша штаттан тыс кеңесшісі Нұрмұрат Ермановпен кездесіп, алдағы жұмыстарды саралады.
<img src="https://kyzylorda-news.kz/wp-content/uploads/2021/01/nwrmwratov.jpg" alt="" />
Талқылау барысында облыс әкімі аймақтағы мүмкіндігі шектеулі жандардың өмірін жақсарту, оларға тең орта құру бағытында мемлекеттік бағдарламалардың тиімділігін арттыру мәселесін қозғады. Сондай-ақ, мүмкіндігі шектеулі жандар үшін арнайы «Жол картасында» көзделген негізгі басымдықтар бойынша пікірлесті.
Бүгінгі күні өңірде әлеуметтік бағыттағы басымдықтар қамтылғаг 2021 жылға арналған жұмыс жоспарын жүзеге асыру бойынша Жол картасы бекітілді.Жол картасында облыстағы мүгедектігі бар адамдардың өмір сүру сапасын арттыруға, оларды қоғамда әлеуметтендіруге жағдай жасауға, бірыңғай ақпараттық ресурстар құруға бағытталған шаралар қамтылған.
Осы жылдың қаңтар айынан бастап мүмкіндігі шектеулі азаматтар онлайн портал арқылы оңалту құралдарының 55 техникалық түрі мен қызметтерін ала алады. Атап айтқанда, санаторий-курорттық емдеу, протез-ортопедиялық көмек, жеке көмекшінің және ымдау тілі маманының әлеуметтік қызметтері онлайн портал арқылы іске асады. Бұл ретте ерекше жандарға қажетті оңалтудың техникалық құралдары мен қызметтерді қамтамасыз етуге арналған қаржы жылдан-жылға артып келеді.
Өз кезегінде Нұрмұрат Ерманов мүмкіндігі шектеулі азаматтардың мүдделерін қорғау, олардың әлеуметтік қызметтерді алудағы мәселелеріне ерекше назар аударылғанын атап өтіп, тиісті жұмыстарды үйлестіруде бірлескен жұмыстардың нәтижелілігін баяндады.
Айта кету керек, Қызылорда аймағында 30 мыңнан астам мүмкіндігі шектеулі жан болса, оның 5 мыңы – балалар.
<a href="https://www.facebook.com/qyzylorda.press/photos/pcb.3042284865874562/3042282852541430/?__cft__[0]=AZVBsyhgGQYNWjiT1UnCxhge-IXcJiiBd0fPS7eLaPZlZVrJiTLjqNQC9Bb2mBz4-qgmY7_HWKhHZ1AtLsMpB9DOvgB0zPDYaWgpY8ZyBofiQU7RIMryC2WarefiUXFzHl-uYj_0mvnOPPPvXlIkTZOUvAWoJIZ0aCyP8xdi2oq4VtKkNYJbuiMY-DEc99CHzEw&__tn__=*bH-R"></a><a href="https://www.facebook.com/qyzylorda.press/photos/pcb.3042284865874562/3042283012541414/?__cft__[0]=AZVBsyhgGQYNWjiT1UnCxhge-IXcJiiBd0fPS7eLaPZlZVrJiTLjqNQC9Bb2mBz4-qgmY7_HWKhHZ1AtLsMpB9DOvgB0zPDYaWgpY8ZyBofiQU7RIMryC2WarefiUXFzHl-uYj_0mvnOPPPvXlIkTZOUvAWoJIZ0aCyP8xdi2oq4VtKkNYJbuiMY-DEc99CHzEw&__tn__=*bH-R"></a>

Гүлшара Әбдіқалықова мүмкіндігі шектеулі жандардың мәселелерін талқылады

<a href="https://kyzylorda-news.kz/">Kyzylorda-news.kz</a>. Қызылорда облысында жергілікті маңызы бар автомобиль жолдарын дамытудың 2021-2023 жылдарға арналған «Жол картасы» әзірленді. Оған облыстық және аудандық маңызы бар 73 жоба енгізілген. Бұл туралы Өңірлік коммуникациялар қызметінің ақпараттық алаңында облыстық жолаушылар көлігі және автомобиль жолдары басқармасының басшысы Мұрат Тілеумбетов мәлімдеді.
Жол картасы аясында 14 жоба жолдарды қайта жаңғыртуға, 36-сы күрделі және орташа жөндеуге, 23-і көпір өткелдерін салуға бағытталған. Сондай-ақ, Қызылорда қаласы мен 7 ауданның орталықтары және елді мекендер көшелерін жөндеуден өткізу жұмыстары да қарастырылған. Нәтижесінде 2021 жылы облыстық және аудандық маңызы бар автомобиль жолдарының жақсы және қанағаттанарлық индикаторлық көрсеткішінің үлесін 75%-ға жеткізу жоспарланған. Осы индикаторлық көрсеткішке жету мақсатында республикалық және облыстық бюджеттен барлығы 14 803,2 млн. теңге бөлінді.
“Осы қаражатқа ұзындығы 260 км құрайтын автомобиль жолдары мен көпір өткелдерін жөндеуден өткізуге мүмкіндік береді. Ал «Нұрлы жол» бағдарламасы аясында 8 812,5 млн. теңге бөлінді. Оған ұзындығы 216 км облыстық және аудандық маңызы бар жолдарды жөндеу жұмыстарын жүргізу жоспарлануда. Айта кететін жағдай, жоғарыдағы облыстық бюджеттен бөлініп отырған қаражатпен республикалық бюджеттен осыған дейінгі 50-де 50 пайыздық негізде бөлінген қаражаттың бөлінісін толықтай жауып отырмыз. 34 жобаға 8 466,0 млн. теңге бөлінді. Бұл объектілердің барлығы 2021 жылы аяқталып, пайдалануға беріледі. Сонымен қатар жыл көлемінде Индустрия және инфрақұрылымдық даму министрлігіне қосымша қаражат тарту жұмыстары жүргізілетін болады. Бүгінгі күнге 7,4 млрд теңгені құрайтын 17 жобаның жобалау-сметалық құжаттамасы дайын, – деді басқарма басшысы.
«Өңірлерді дамыту» бағдарламасы аясында 3 жоба іске асырылуда. Қызылорда қаласындағы С. Бейбарыс көшесінен Қызылжарма каналына дейінгі (оң жағалау) ұзындығы 4 км құрайтын магистралды көшенің құрылысын аяқтау, Қызылорда қаласының сол жағалауындағы Сырдария өзенінің қорғаныс бөгетін бойлай салынатын (УАД салған жолдан бастау алатын) С. Бейбарыс көпіріне дейінгі магистралды көше (2км) құрылысы жұмыстары, Қызылорда қаласындағы (Эдельвейс) саяжай ауданының солжағалау бөлігінде магистралды көше құрылысын бастау (аэропортқа баратын жолға қосу, 1,1 км) жұмыстары.«Ауыл ел – бесігі» бағдарламасы бойынша республикалық бюджеттен 9 жобаға іске асырылуда. Яғни, Қазалы, Қармақшы, Сырдария, Жалағаш аудандарының елді мекен көшелері жөнделеді. «Кіші қалаларды дамыту» бағдарламасы аясында 1 350,9 млн. теңге бөлінді. Арал мен Қазалы қалаларының көшелері асфальтталатын болады.
Бұдан бөлек, облыстық бюджеттен сол жағалаудағы өзеннің қорғаныс бөгетін бойлай орналасқан магистралды көше құрылысы салынады, аймақта 558 шақырым құрайтын көшелер жөнделеді, Қазалыдағы Қарлан учаскесінде Сырдария өзеніне көпір салуға (ОБ-95 млн. тг) жобалау сметалық құжаттамасы әзірленді, биыл құрылыс-монтаж жұмыстары басталады.

Қазақстан және Қызылорда облысының жаңалықтары