<a href="https://kyzylorda-news.kz/">Kyzylorda-news.kz</a>.&nbsp; «Қазақстанның Жауынгерлік Өнер Қауымдастығы» және «Қазақ күресі» Ассоциациясының бас директоры Абат Имамбаев, Қазақстанның Жауынгерлік Өнер Қауымдастығының басқарушы директоры Берік Құнанбаев, Қазақстанның Жауынгерлік Өнер Қауымдастығы бас директорының кеңесшісі Мұсабек Мәулен, «Қазақ күресі» Ассоциациясының басқарушы директоры, PhD доктор Ербол Мырзабосынов, Қазақ күресінен Қазақстан Республикасының бас жаттықтырушысы Ерлан Естек арнайы Қызылорда облысына жұмыс сапарымен келді.
Сапар барысында Қызылорда қаласындағы бірқатар спорттық нысандарды аралады. Облыс орталығындағы №1 және №2 олимпиадалық резервтің мамандандырылған балалар-жасөспірімдер мектептері мен жоғары спорт шеберлігі мектебінің жұмысымен танысты. Аталған спорт мектептеріндегі қазақ күресі, самбо, шинкиокушинкай каратэ, кикбоксинг бөлімшелерін көріп, спортшылармен кездесіп, жаттығуларын тамашалады.
Мұнан соң облыс әкімдігінің мәжіліс залында облыс әкімінің орынбасары Серік Ахметтің төрағалығымен өткен «Қазақстанның Жауынгерлік Өнер Қауымдастығы» және «Қазақ күресі» Ассоциациясының Қызылорда облысындағы көшпелі отырысына қатысты. Сондай-ақ, жиында ҚР Ұлттық қауіпсіздік комитетінің Қызылорда облысы және Байқоңыр қаласы бойынша департаменті бастығының міндетін уақытша атқарушы Бауыржан Құндызбаев, Қызылорда облысы бойынша Қазақ күресі федерациясының төрағасы Рзақұл Нұртаев, облыстық дене шынықтыру және спорт басқармасының басшысы Жақсылық Оспанов және Қызылорда облысы бойынша Қазақстанның Жауынгерлік Өнер Қауымдастығы құрамына кіретін жергілікті федерациялардың басшылары мен қазақ күресінен ұлттық дәрежедегі төрешілер болды.
Отырыста екі мәселе қаралып, алғашқы мәселе Қазақстанның Жауынгерлік Өнер Қауымдастығының құрамына кіретін жергілікті федерациялардың және қазақ күресін дамыту бойынша атқарылып жатқан жұмыстар туралы облыстық дене шынықтыру және спорт басқармасының басшысы Жақсылық Оспанов баяндама жасады.
<blockquote>
 «Қазақстанның Жауынгерлік Өнер Ассоциациясының құрамына кіретін 15 спорт түрлері бойынша облыста барлығы 5 339 спортшы жатығады. Сыр спортшылары ҚР Ұлттық құрама сапында 2018-2019 жылдары халықаралық ареналарда өнер көрсетіп, Азия чемпионаттары мен кубоктарында 49 медаль иеленсе, Әлем чемпионаттары мен кубоктарында 56 медальға қол жеткізді. Ал, қазақ күресімен өңірде 298 секцияда 4879 спортшы шұғылданса,114 жаттықтырушы жұмыс жасайды. Облыстағы 21 балалар мен жасөспірімдер спорт мектептерінің 17-де қазақ күресімен 159 секцияда 2005 спортшы шұғылданса, 59 жаттықтырушы тұрақты жұмыс атқарып келеді. 2019 жылы Азия чемпионатында облыстың 2 палуаны алтын және қола жүлдегер атанды. Әлем чемпионатында 1 палуан чемпион атанса, Әлем барысында 1 палуан күміс жүлдені иеленді. Соңғы 3 жылда Сыр бойылық спортшылар ҚР чемпионаттары мен кубоктарында 117 медаль жеңіп алды», – деді Жақсылық Оспанов.
</blockquote>
Күн тәртібіндегі екінші мәселе Қазақстан Республикасының «Қазақ күресі» Ассоциациясының басқарушы директоры, PhD доктор Ербол Мырзабосынов және Қазақ күресінен Қазақстан Республикасының бас жаттықтырушысы Естек Ерлан хабарлама жасады.
Сонымен қатар, ҚР Ұлттық қауіпсіздік комитетінің Қызылорда облысы және Байқоңыр қаласы бойынша департаменті бастығының міндетін уақытша атқарушы Бауыржан Құндызбаев «Қазақстанның Жауынгерлік Өнер Қауымдастығы» және «Қазақ күресі» Ассоциациясы туралы өз пікірін білдірді.
Сондай-ақ, көшпелі отырыста спорттық жарыстардың қатарын арттыру мен Қазақ күресін дамыту бойынша бірқатар ұсыныс айтылды.
Ассоциацияның бас директоры Абат Имамбаев Қазақстанның Жауынгерлік Өнер Қауымдастығы мен «Қазақ күресі» Ассоциациясы тарапынан атқарылып жатқан жұмыстарды жеткізіп, жиынды қорытындылады.
<blockquote>
 «Біздің Қызылорда облысына келген мақсатымыз Ассоциация жұмысын одан әрі жетілдіріп, өңірлердегі маңызын арттыру болып табылады. Сонымен қатар, қазақ күресін дамытып, жас спортшыларды патриоттыққа баулу да біздің негізгі бағыттарымыздың бірі екенін айта кеткен жөн. Сондықтан, аймақтағы федерация филиалдарымен ынтықмақтастықты арттыра отырып, жоспардағы жұмыстарды жүзеге асыра аламыз», -деді Абат Имамбаев.
</blockquote>
<img src="https://kyzylorda-news.kz/wp-content/uploads/2021/03/158708770_3183944785041902_3173239152442166984_o.jpg" alt="" />
<img src="https://kyzylorda-news.kz/wp-content/uploads/2021/03/159177662_3183944661708581_4421908953759108581_o.jpg" alt="" />

«Қазақстанның жауынгерлік өнер қауымдастығы» және «Қазақ күресі» ассоциациясы өкілдері Сыр еліне жұмыс сапарымен келді

<a href="https://kyzylorda-news.kz/">Kyzylorda-news.kz</a>.&nbsp; «Қазгидромет» РМК-сы наурыздың 10-ы күнгі ауа райы болжамын жариялады.
Кәсіпорын таратқан мәліметтерге қарағанда, Қазақстан территориясының басым бөлігінде атмосфералық фронталды бөліктердің өтуіне байланысты ауа райы құбылмалы болады.
Республиканың басым бөлігінде жауын, солтүстік өңірдің бірқатар бөлігінде қар жауады. Сондай-ақ Қазақстанның кей жерлеріне тұман түсіп, көктайғақ, жаяу бұрқасын болады, жел күшейеді.
Республиканың оңтүстігінің кей жерлерінде найзағай ойнайды.

Сәрсенбіге арналған ауа райы болжамы

Kyzylorda-news.kz. Бүгін облыс әкімі Гүлшара Әбдіқалықова өңірдегі мүгедектігі бар азаматтармен кездесті. Кездесуге тиісті жауапты тұлғалар қатысты.
2020 жылы өңірімізде мүгедектігі бар адамдардың құқықтарын қамтамасыз ету және тұрмыс сапасын жақсарту жөніндегі 2025 жылға дейінгі Жол картасы әзірленіп, бекітілді. 
Жол картасы мүгедектігі бар адамдардың профилактикасы, білім беруге, спорттық, мәдени өмірге қолжетімділігі, кедергісіз орта, экономикалық дербестік, сапалы жұмыспен қамту, әлеуметтік оңалту, абилитация тиімділігін арттыру, төтенше жағдайлар кезінде мүгедектердің қауіпсіздігін қамтамасыз ету, әлеуметтік қызмет көрсету жүйесін жаңғырту шараларын қамтиды. 
Мүгедектігі бар адамдарды қолдау шаралары әрі қарай да жалғасын табатын болады.
Кездесу барысында Қызылорда, Байқоңыр қалалары мен аудандардан келген мүгедектігі бар адамдар тарапынан жеке көмекшінің көрсеткен қызметі үшін 8 сағатқа толық ақы төлеу, санаторий-курорттық емделу кезінде ілесіп жүрушіге жол жүру ақысы мен тұруға қаржы қарастыру, бөлмелік кресло-арбаның қолдану мерзімін қысқарту және т.б. мәселелер көтерілді.
Жалпы облыста 30 мыңнан астам мүгедектігі бар адамдар тіркелген. Оларды әлеуметтік қорғауға бөлінген қаржы көлемі жыл сайын артып келеді. 2020 жылы бөлінген қаржы өткен жылдармен салыстырғанда 1,5 есеге артып, 1,4 млрд.тенге құрады. Нәтижесінде 15 мыңнан астам жеке оңалту бағдарламалары орындалды.
Мүгедектерге берілетін техникалық оңалту құралдарының тізбесі жылдан-жылға кеңейтіліп келеді. 2020 жылы 55 түрі болса, биылғы жылы енгізілген өзгерістермен оңалту құралдарының түрі 60-қа жеткізілді. 
2020 жылдан бастап мүгедектігі бар адамдарға әлеуметтік оңалтудың іс-шараларын оңтайландыруға бағытталған Әлеуметтік қызметтер порталы қолданысқа енгізілді. 2020 жылы әлеуметтік оңалту шаралары ішінара Портал арқылы алынса, 2021 жылдан бастап толығымен Порталға көшті.
ҚР Еңбек және халықты әлеуметтік қорғау министрлігі тарапынан Порталдағы техникалық кемшіліктерді оңтайландыруға бағытталған жұмыстар жүргізілуде.
Кездесуде облыс әкімі Гүлшара Әбдіқалықова жауапты мемлекеттік органдардың басшыларына көтерілген мәселелер бойынша тапсырма беріп, заңдылыққа сәйкес кезең кезеңімен қарастырылатынын айтты.
Сонымен қатар облыстық жұмыспен қамту және әлеуметтік бағдарламалар басқармасының басшысы Гаухар Қалмақоваға белсенді мүмкіндігі шектеулі азаматтардың қатысуымен арнайы жұмысшы топ құрып, көтерілген мәселелер бойынша тиісті жұмыстар жүргізуді тапсырды. Нәтижесі бойынша наурыз айының соңына дейін есеп беруді жүктеді.
<img src="https://kyzylorda-news.kz/wp-content/uploads/2021/03/fb_img_1615303479721.jpg" alt="" />

Гүлшара Әбдіқалықова мүгедектігі бар азаматтармен кездесті

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова мемлекеттік сатып алу бағытында атқарылған жұмыстарды саралады. Жиында облыстық мемлекеттік сатып алу басқармасы басшысының орынбасары Алтынай Қуандық өткен жылдан бері атқарылған жұмыстар мен алдағы міндеттерді баяндады.
2021 жылға облыс тапсырыс берушілерімен жалпы сомасы 88,8 млрд. теңгеге 2722 сатып алу жоспарланған. Оның 42,4 млрд.теңгені құрайтын 1294 сатып алуы жарияланып, аяқталған 154 сатып алу нәтижесімен 1,1 млрд.теңге үнемделген.
Жарияланған сатып алулардың 456-ы басқармамен ұйымдастырылса, қала мен аудандардың бірыңғай ұйымдастырушылары тарапынан 648 сатып алу өткізілсе, қалған 190 сатып алу тапсырыс берушілермен дербес жүргізілуде.
Айту керек, барлық жарияланған конкурстардың ішінде заңнамада белгіленбеген біліктілік талаптарын қою, стандарттарды көрсетпеу, жеткізу мерзімдерін бұзу себептерімен 9 конкурстың күші жойылған.
Қабылдау соңында аймақ басшысы Алтынай Қуандыққызына мемлекеттік сатып алудың рәсімдік сатыларын ескере отырып, бюджет қаражатының уақытылы игерілуі үшін барлық жоспарланған сатып алудың жариялануын қамтамасыз етуді тапсырды. Сондай-ақ, саладағы негізгі мәселелерге қатысты мамандарды оқыту шараларын ұйымдастыру қажеттігін атап өтті.
<img src="https://kyzylorda-news.kz/wp-content/uploads/2021/03/158833078_3183499021753145_7870684849484408741_o.jpg" alt="" />

Гүлшара Әбдіқалықова мемлекеттік сатып алу бағытында атқарылған жұмыстарды саралады

<a href="https://kyzylorda-news.kz/">Kyzylorda-news.kz</a>. Қазақстанда мектеп оқушыларының көктемгі демалысы 12 күнге созылады. Бұл туралы ҚР Білім және ғылым министрлігінің баспасөз қызметі мәлімдеді.
<blockquote>
 «Мектеп оқушыларының көктемгі демалысы 20-31 наурыз аралығында – 12 күн болады. 4-тоқсан сабағы 1 сәуірде басталады», – делінген хабарламада.
</blockquote>
Министрліктің мәліметінше, 3-тоқсанда 1 сынып оқушылары үшін қосымша демалыс болды. Ол 8-14 ақпан аралығында 7 күнге созылды.
Айта кетейік, оқу жылының 3-тоқсанынан бастап бітіруші сыныптар (9,11,12 сыныптар) санитарлық-эпидемиологиялық талаптар сақтала отырып, аралас оқыту (пәндердің 70 проценті дәстүрлі форматта, 30 проценті қашықтан) форматына көшірілді. Сондай-ақ ҚР Бас мемлекеттік санитариялық дәрігерінің жаңа қаулысына сәйкес 1 наурыздан бастап мектептерде білім беру аралас форматқа көшірілді. Оған сәйкес, 1-5 сынып оқушылары түгел мектептен оқи бастады.

Оқушылар көктемгі каникулда неше күн демалады?

<a href="https://kyzylorda-news.kz/">Kyzylorda-news.kz</a>. Қызылорда облысының тұрғыны сыр сақшыларына алғыс айтты.
Жәбірленушінің айтуынша ақпан айының 2-нен 3-не қараған түні белгісіз біреулер үйінің алдында тұрған «Daewoo Nexia» маркалы автокөлігін ұрлап кеткен. Ол Қызылорда облысы Полиция департаментінің Шиелі аудандық полиция бөліміне арызданған.
Арыз бойынша жүргізілген жедел іздестіру жұмыстарының нәтижесінде күдікті 36 жастағы көрші ауылдың тұрғыны анықталып, ұсталды. Күдікті автокөлікті Түркістан облысы Ленгер ауылына апарып, 450&nbsp;000 теңгеге сатып жіберген.&nbsp;
2 наурыз күні Түркістан облысы, Сайрам ауданының 34 жастағы тұрғынынан ұрланған «Daewoo Nexia» автокөлігі айғақ зат ретінде алынды.
Аталған дерек бойынша Қазақстан Республикасы Қылмыстық кодексінің 200-бабының 1-бөлігімен (Автомобильді немесе өзге де көлік құралдарын ұрлау мақсатынсыз заңсыз иелену) сотқа дейінгі тергеп-тексеру амалдары жүргізілуде. Оқиғаның мән-жайы анықталуда.
Жәбірленуші өз кезегінде көлігін тауып берген полиция қызметкерлеріне алғысын жаудырып, жұмыстарына сәттілік тіледі.

Көлігін тапқан қызылордалық тәртіп сақшыларға алғыс білдірді

<a href="https://kyzylorda-news.kz/">Kyzylorda-news.kz</a>. Жаңақорған аграрлы-техникалық колледжінің педагогтары министр Асхат Аймағамбетовтен көмек сұрайды. Жетпіске жуық мұғалім бір жыл бұрын білім басқармасы мен колледж басшылары кейбірімізге қысым көрсетіп, кейбірімізді алдап айлығымыздың тең жартысын қысқартып тастады дейді. Бұл туралы «Информбюро» жаңалықтар бағдарламасы хабарлады.
Аграрлы-техникалық колледжде өндірістік оқыту шебері болып жұмыс істейтін бір топ ұстаз аз айлыққа әзер шыдап жүргендерін айтып ашынады. Айтуларынша, өткен жылы білім басқармасының және оқу орнының басшылары студент санының аздығына байланысты қаржылай қиындық туындағанын айтып, тек өндірістік оқыту шеберлерінің ғана айлықтарының тең жартысын кемітіп тастаған. Ал студент көбейсе, жалақыларыңызды бұрынғыша төлейміз дегеніне ақыр соңы алданып қалдық дейді ұстаздар.&nbsp;
<blockquote>
 «Біз сендік. Басшыға да сендік, профкомға да сендік. Кеше сайланған жас орынбасарларға да сендік. Сол сенгеннен болып тұр. Біз негізі қысыммен, алдаумен жарты ставка болдық», – дейді өндірістік оқыту шебері Камила Ахметова.
</blockquote>
Мұғалімдердің айтуынша, содан кейін оқу орнының студенттерін көбейту үшін өздері де барынша ат салысыпты. Бірақ одан да нәтиже болмай отырғанын айтады. Ең қызығы, бізге жалақы тауып бере алмай отырған директор биыл колледжге жаңадан қызметкерлер алып жатқанына таңбыз дейді оқтыу шеберлері.
<blockquote>
 «2 топ ашсақ та 0,5 жүктемемен келе жатырмыз. Толықтырып бере алмады. Енді соған қарамастан адам алмаймын деп тұрып, 14-15 адамды жұмысқа алып тастады», – дейді өндірістік оқыту шебері: Қайрат Омаров.
</blockquote>
Мемлекеттік тапсырыспен жұмыс істейтін оқу орнына қаражат студент санына қарай бөлінеді, дейді колледж директоры. Ал осыған байланысты айлықтары қысқарған қызметкерлердің мәселесін шешу үшін колледжден жаңа мамандықтарды ашуды жоспарлап отырғанын айтады.
<blockquote>
 «Бүгін таңда 15 мамандықты таңдап, сол мақсатта жұмыс жасап жатырмыз. Егер сол мамандықтарға лицензия алып, студенттер сыртқа кетпейтіндей болып жатса, әрине бұл кісілердің ставкалары толық болады. Оларға жұмыс болады», – деді Жаңақорған аграрлы-техникалық колледжінің директоры: Жомарт Абибуллаұлы.
</blockquote>
Уәдеге бір жылдан бері әбден тойдық деген мұғалімдер мәселеге министрдің өзі тікелей араласса деп отыр.

Қызылордалық педагогтар министрден көмек сұрады (ВИДЕО)

<a href="https://kyzylorda-news.kz/">Kyzylorda-news.kz</a>. Шотландияның Сандей аралының тұрғыны 1994 жылы теңізге лақтырылған бөтелкедегі хатты тауып алды, деп хабарлайды <a href="https://sputnik.kz/world/20210309/16491016/Shotlandiya-zhagalau-olzha.html">Sputnik.kz</a>.
Йоханна Гилберт жағалауда итімен бірге серуендеп жүріп, тастардың арасында жатқан пластик бөтелкені көзі шалып қалады. Ішіне хат салынған бөтелкені толқын жағаға шығарып жіберген. Бөтелке ішіндегі қағаз екіге бөлінгенімен, Йоханна онда не жазылғанын оқи алған.
Хатта: «Бұл жазбаны Дэвид Бремнерге қайтаруыңызды өтінемін. Мейн-стрит 9, Лайбстер, Кейтнесс, Шотландия. 27 қазан, 1994 жыл» деп жазылған.
Отыз жылға жуық уақыт ішінде бөтелке небәрі 160 километр қашықтыққа ұзаған.
Йоханна көрсетілген мекенжайда хат авторының анасы тұрып жатқанын анықтаған. Ал Дэвидтің өзі Шотландияның басқа қаласына көшіп кеткен.
<blockquote>
 «Мені іздеп тауып, хатты тапсырғаны үшін Йоханна Гилбертке алғыс айтамын. Осындай ұзақ уақыт ішінде бөтелкенің аз ғана қашықтықты жүріп өткені қызық. Мен бөтелке жайлы ұмытып кетіппін», – дейді Дэвид Бремнер.
</blockquote>
Ол хатты 13 жасында жазғаны белгілі болды.
Жергілікті тұрғындардың пайымдауынша, Дэвид бұл хатты жыл сайын өтетін “бөтелкелер жарысы” кезінде суға жіберген болуы мүмкін. Сондай-ақ жасөспірім осы әдіс арқылы өзіне жақын дос тапқысы келген.

Тұрғын жағалаудан қызықты олжа тауып алды

*<a href="https://kyzylorda-news.kz/">Kyzylorda-news.kz</a>. Қазақстанда елдің 2025 жылға дейінгі дамуының ұлттық жоспары бекітілді, деп хабарлайды&nbsp;<a href="https://www.gov.kz/memleket/entities/economy/press/news/details/170579?lang=kk">ұлттық экономика</a> министрлігі.*
Ұлттық жоспарда жаңа экономикалық бағыттың негізгі міндеттері мен параметрлері айқындалып отыр. Оны президенттің тапсырмасы бойынша ұлттық экономика министрлігі стратегиялық жоспарлау және реформалар агенттігімен бірлесіп әзірледі.
<blockquote>
 “Жоспар халықтың өмір сүру сапасы мен әл-ауқатын арттыруға бағытталған түбегейлі институционалдық және салалық реформалар үшін негіз қалайды”, – делінген ресми хабарламада.
</blockquote>
Құжатта аса маңызды салаларды дамытуға қатысты стратегиялық ұстанымдар, коронавирус дағдарысының салдарын жеңілдету шаралары, сондай-ақ, қазіргі жаһандық үрдістер жағдайында экономиканы орнықты әрі сапалы түрде дамыту саясаты жазылған. Нақты стратегиялық көрсеткіштердің егжей-тегжейлі картасы да бар. Ол ұлттық жоспардың ажырамас бөлігі болып саналады. Ал нақты көрсеткіштерге жету үшін экономиканы әртараптандыру, инвестицияларды тарту, экспортты ілгерілету, жеке кәсіпкерлікті қолдау және кешенді дамыту сияқты нақты шаралар қабылданады.
<blockquote>
 “Денсаулық сақтау мен білім беру қызметтерін жақсартуға, инфрақұрылымды дамытуға, нәтижелі жұмыспен қамтуға және халықтың әлеуметтік әл-ауқатын арттыруға ерекше назар аударылатын болады”, – дейді мамандар.
</blockquote>
Сондай-ақ, мемлекет басшысы қол қойған “Қазақстан Республикасының 2025 жылға дейінгі жалпыұлттық басымдықтары туралы” жарлық бар. Онда үш негізгі басымдық көрсетілген. Соның ішінде азаматтардың әл-ауқаты, институттардың сапасы және күшті экономика құру бағыты бар. Соған жету үшін 10 нақты міндет белгіленіп отыр. Осы бағытта реформалар жасалады. Олар:
<ol>
<li>әділ әлеуметтік саясат;</li>
<li>денсаулық сақтаудың қолжетімді және тиімді жүйесі;</li>
<li>сапалы білім беру;</li>
<li>азаматтардың мүдделерін қорғауға арналған әділ және тиімді мемлекет;</li>
<li>мемлекеттік басқарудың жаңа моделі;</li>
<li>патриотизм құндылықтарын дәріптеу;</li>
<li>ұлттық қауіпсіздікті нығайту;</li>
<li>әртараптандырылған инновациялық экономика құру;</li>
<li>экономикалық және сауда дипломатиясын белсенді дамыту;</li>
<li>теңгерімді аумақтық даму.</li>
</ol>
Ұлттық даму жоспарының және жалпыұлттық басымдықтардың барлық индикаторы бүкіл мемлекеттік аппарат жұмысының өзекті бағыттарын айқындайды. Осы стратегиялық құжаттар қазіргі кезеңнің сын-қатерлерін еңсеруге, сондай-ақ, ортамерзімдік перспективада елдің өмір сүру сапасы мен табысын өсіруге көмектеседі деген жоспар бар.

«Халықтың әл-ауқаты артады»: Қазақстанда ұлттық жоспар бекітілді

<a href="https://kyzylorda-news.kz/">Kyzylorda-news.kz</a>. Қызылорда облыс бойынша мемлекеттік орман қоры жерлері 6509,7 мың гектарды құрайды. Оның ішінде орманды алқаптар 3103,2 мың гектар жерді алып жатыр. Осы орманды алқаптардың 54,7 мың гектары өрт қауіптілігі аса жоғары болып саналады. Бұл туралы Қызылорда орман және жануарлар дүниесін қорғау жөніндегі мемлекеттік мекемесінің директоры Бағдат Абжапбаров мәлімдеді.
<blockquote>
 «Айналамыздың экологиялық дағдарысқа ұшырауына байланысты егеменді еліміздің табиғи байлығы, Орман қорына шаруашылық көзбен қарап, болашақ ұрпақтарымыздың мүдделері үшін оны ұлғайта беру әрбір Қазақстан Республикасы азаматының міндеті. Қазақстан Республикасында барлық ормандар қорғауға және сақталуға жатады. Алайда табиғат байлығына немқұрайлы қарайтын жеке азаматтар мен шаруашылық субекілері тарапынан келтірілген зиян шексіз және жылдан жылға азаймай келеді», – дейді Бағдат Абжапбаров.
</blockquote>
Мекеме басшысының айтуынша, орман өрті қыруар байлықты жалмап қана қоймайды, сонымен бірге мемлекетке көп шығын әкеледі. Қазіргі таңда орын алатын тілсіз жаудың 80%-і адамдардың қатысуымен болады.
<blockquote>
 «Табиғат аясына қыдырып барып, от жағып, оны сөндірмей кетеді. Сондай ақ темекі тұқылын өшірмей тастай салады. Оның соңы алапат өртке айналып, табиғат анаға өлшеусіз зиян келеді», – дейді мекеме директоры.
</blockquote>
Жыл басынан бері өртті болдырмаудың және өрт қаупі бар кезеңдерде өртке қарсы дайындық жұмыстарын жүргізу&nbsp;жайлы түрлі іс-шара ұйымдастырылып келеді.
<blockquote>
 «Қоршаған ортаны қорғау, ауыл шаруашылығы, ішкі істер, өрттен қорғау Төтенше жағдайлар бөлімдерімен келісіліп, қала әкімшілігінде бекітіліп, ауыл округтеріне өрт қаупі ережелерін сақтау жайлы ескерту хаттар дер кезінде тарату арқылы өрт қауіпсіздігін сақтауға болады. Дегенімен бір ғана мекеме өртке қарсы қызметті толыққанды атқара алмасы тағы белгілі. Мекеме тарапынан барлық ауыл округі әкімдерімен, жеке шектеулі серіктестік төрағаларымен өртке қарсы іс-шаралар жүргізіліп, жұмыс кестесі бойынша біріккен жұмыстар қолға алынды», – дейді Бағдат Абжапбаров.
</blockquote>
Айта кетейік, ормандарда өрт қауiпсiздiгi талаптары мен санитариялық қағидаларды бұзғандар заң бойынша жазаланады. Яғни, жеке тұлғаларға – 10, лауазымды адамдарға, шағын кәсiпкерлiк субъектiлерiне – 30, орта кәсiпкерлiк субъектiлерiне – 50, iрi кәсiпкерлiк субъектiлерiне 150 айлық есептік мөлшерінде айыппұл салуға әкеп соғады.

Бағдат Абжапбаров: Ормандағы өрттің 80%-і адамдардың қатысуымен болады

<a href="https://kyzylorda-news.kz/">Kyzylorda-news.kz</a>. 2021 жылдың 1 сәуірінен бастап БЖЗҚ-дан ай сайынғы төлемді есептеуді жүзеге асыру әдістемесі өзгереді, деп хабарлайды <a href="https://www.enpf.kz/kz/about/press-center/news/?ELEMENT_ID=11685">қордың</a> баспасөз қызметі.
БЖЗҚ-дан төленетін ай сайынғы зейнетақы төлемінің мөлшері Қазақстан Республикасы Үкіметінің 2013 жылғы 2 қазандағы № 1042 қаулысының (Зейнетақы төлемдерінің мөлшерін есептеуді жүзеге асыру Әдістемесіне 2-қосымша) ережелеріне сәйкес есептелген зейнетақы төлемдерінің жылдық сомасының он екіден бір бөлігі ретінде айқындалады. Бұл ретте БЖЗҚ-дан ай сайынғы зейнетақы төлемі&nbsp;ең төменгі күнкөріс деңгейінің 70% кем емес&nbsp;мөлшерде жүзеге асырылады. (Бұрын БЖЗҚ-дан ай сайынғы зейнетақы төлемі&nbsp;ең төменгі күнкөріс деңгейінің 54% кем емес мөлшерде&nbsp;жүзеге асырылған болатын).
Зейнетақы төлемдерінің мөлшерін есептеуді жүзеге асыру Әдістемесіне сәйкес&nbsp;2021 жылдың 1 сәуірінен бастап&nbsp;зейнетақы төлемдерін жүзеге асырудың бірінші жылындағы зейнетақы төлемдерінің жылдық сомасы зейнетақы жинақтары сомасының зейнетақы жинақтары төлемдерінің мөлшерлемесіне көбейтіндісі ретінде есептелетін болады – 6,5 %.
Одан кейінгі жылдары ай сайынғы зейнетақы төлемінің мөлшері өткен жылғы ай сайынғы зейнетақы төлемінің мөлшерін зейнетақы төлемдерін индекстеу мөлшерлемесіне&nbsp;жыл сайын арттыру&nbsp;жолымен қайта есептелетін болады – 5%.
Мысал келтірейік:
ЗЖ сомасы = 6 000 0000 теңге
Бірінші жылдағы зейнетақы төлемдерінің жылдық сомасы: 6&nbsp;000&nbsp;000*6,5%=390&nbsp;000 теңге;
Бірінші жылдағы ай сайынғы зейнетақы төлемінің мөлшері: 390&nbsp;000/12 ай =32&nbsp;500 теңге;
Екінші жылға арналған ай сайынғы зейнетақы төлемінің мөлшері: 32&nbsp;500+ 32 500*5%=34&nbsp;125 теңге.
Бұдан басқа, зейнетақы төлемдерінің мөлшерін есептеуді жүзеге асыру Әдістемесінде белгілі бір санаттарға жататын, яғни мерзімсіз уақытқа белгіленген 1 немесе 2-топтағы мүгедектігі бар, сондай-ақ, жинақтары міндетті кәсіптік зейнетақы жарналары есебінен кемінде алпыс ай жинақталатын зиянды және қауіпті өндірістерде жұмыс істеген алушылар үшін&nbsp;түзетілетін арттыру коэффициенттері&nbsp;көзделген. Бұл ретте, жоғарыда көрсетілген шарттардың біреуін ғана емес, одан да көбін қанағаттандыратын тұлғалар үшін ең үлкен мәнге ие түзету коэффициенті қолданылады.
Айта кету керек, зейнетақы төлемдерінің мөлшерін есептеуді жүзеге асырудың аталған Әдістемесі&nbsp;2021 жылдың 1 сәуірінен бастап&nbsp;туындаған қатынастарға қолданылады.
БЖЗҚ-дан зейнетақы төлемдерін алу құқығын 2018 жылғы 1 қаңтарға дейін іске асырған адамдарға зейнетақы төлемінің жыл сайынғы мөлшері ең төмен зейнетақының отыз еселенген мөлшерінен кем болмайды (2021 жылы 30 х 43 272= 1 298 160 теңге). Төлемдер бұрын таңдалған кесте бойынша жүзеге асырылады.
Зейнетақы төлемдерінің мөлшерін есептеуді жүзеге асырудың жаңа Әдістемесіне сәйкес, БЖЗҚ-дан зейнетақы төлемдерін алу құқығын&nbsp;2018 жылғы 1 қаңтардан бастап 2021 жылғы 31 наурызға (қоса алғанда) дейін&nbsp;іске асырған адамдарға&nbsp;2022 жылғы 1 қаңтардан бастап&nbsp;ай сайынғы зейнетақы төлемдері 5% мөлшеріндегі зейнетақы төлемдерін индекстеу мөлшерлемесіне ұлғайтылатын болады, ол кейіннен жыл сайын индекстеліп отырады.
Осылайша зейнетақы төлемдерінің мөлшерін есептеуді жүзеге асырудың жаңа Әдістемесі алушылардың еңбек жағдайлары мен денсаулығының ерекшеліктерін ескереді, сондай-ақ, БЖЗҚ-дан берілетін жыл сайынғы төлемдер мөлшерін ұлғайтуға ықпал ететін болады.
Еске сала кетейік, БЖЗҚ-дан зейнетақы төлемдері жеке зейнетақы шотындағы зейнетақы жинақтары таусылғанға дейін жүзеге асырылады.

Зейнетақы төлемін есептеудің тәртібі өзгереді

<a href="https://kyzylorda-news.kz/">Kyzylorda-news.kz</a>. Қызылорда облысының Сыбайлас жемқорлыққа қарсы қызметі 2020-2021 жылдары жүйелік негізде COVID – 19 ПЦР сынамаларын теріс нәтижелері бар сертификаттарды жүйелі түрде тексерістен өткізбей сатумен айналысқан екі медициналық мекеменің қызметкерлерін анықтап, оларға қатысты қылмыстық істі тергеуде. Бұл туралы Қазақстан Республикасының Сыбайлас жемқорлыққа қарсы іс-қимыл агенттігінің Қызылорда облысы бойынша департамент басшысының орынбасары Сұлтан Пирметов айтты.
ПЦР сынағының сертификаттары вахталық әдіспен жұмыс істейтін жұмысшылар, шетелге саяхаттайтын адамдар, Байқоңыр қаласына кіретін тұрғындар үшін және т.б мақсатта пайдалануға арналған.
Сонымен бірге, медицина қызметкерлері 1 анықтама үшін 7 мың теңге көлемінде заңсыз сыйақы алу арқылы облыстық Ұлттық сараптама орталығының қызметкерлеріне пара беруге итермеленген&nbsp; деген дерек те бар.
<blockquote>
 «Ағымдығы жылдың басынан бастап Қызылорда облысының тұрғындарының ПЦР тестінен өткендігі туралы 60 жалған куәлік анықталды. Осылайша, медицина қызметкерлерінің қылмыстық іс-әрекеттерінің нәтижесінде облыс азаматтарының шексіз саны тәуекелге ұшырады. Жедел іздестіру кезінде ПЦР COVID – 19 сынамаларының жалған сертификаттары жасалған компьютерлік жабдық пен мөр тәркіленді», – дейді Сұлтан Пирметов.
</blockquote>
Арнайы мониторингтік топ өкілдері мен “Ақмешіт-Адалдық алаңы” жобалық кеңсесінің менеджерлері жыл басынан дәріханалардағы дәрілік препараттардың бағасының негізсіз көтерілуін болдырмау мақсатында 80 дәріханаларға, «СК-Фармация» мекемесінің облыстық қоймасы мен өңірлік емдеу мекемелеріндегі дәрі-дәрмек қорына мониторинг жұмыстарын жүргізген.
Мониторинг барысында азаматтарды ақпараттандыру мақсатында дәріханаларда сыбайлас жемқорлықтың алдын алуға бағытталған көрнекі құралдарды және дәрілік препараттардың шекті бағалары жайлы ақпараттар мен QR- коды бар парақшаларды ақпарат тақталарына орналастырылған. &nbsp;
Емдеу мекемелеріне гуманитарлық көмек ретінде шет елдерден келген емдеу препараттары, медициналық қорғау жабдықтары, ИВЛ-аппаратары және т.б мақсатты таратылып, емдеу мекемелеріне толық жетуіне қоғам өкілдерімен бақылау жүргізілуде.
<img src="https://kyzylorda-news.kz/wp-content/uploads/2021/03/157307050_438165944186006_6185844280271567368_o.jpg" alt="" />
Қазақстан Республикасының Сыбайлас жемқорлыққа қарсы іс-қимыл агенттігінің Қызылорда облысы бойынша департамент басшысының орынбасары Сұлтан Пирметов

Қазақстан және Қызылорда облысының жаңалықтары