<a href="https://kyzylorda-news.kz/">Kyzylorda-news.kz</a>. Ыдыс жуатын раковинаға қайнаған суды төге салатын әдет бәрімізде бар. Әсіресе тамақ істеген суды солай қарай қотара саламыз. Алайда мұның сантехникаға зиян екенін білесіз бе?
Ендеше есіңізде болсын, ыстық суды раковинаға құюға болмайды. Одан да суық сумен араластырып төккен немесе суық суды ағызып тұрып, ақырыңдап құйған дұрысырақ. Өйткені ыстық суды раковинаның астындағы шүмек пен құбыр “көтере алмай” қалуы мүмкін.
Қазіргі сантехникалық заттардың көбі поливинилхлоридтен, яғни пластик пен полимерден жасалады. Ал мұндай арзан шүмек 60°C градустан ыстық суды ұзақ ұстап тұра алмайды. Ары кетсе, 1 минуттай шыдауы мүмкін.
Егер ыстық суды раковинаға жиі қоя беретін болсақ, ыстық температураның кесірінен пластик-құбыр деформацияға ұшырап, біріккен, қосылған бөліктері ісініп сынып не кішірейіп бүлініп кетуі ықтимал. Герметикалық қасиеті жойылады. Содан герметикалық бөлігі ажырап, су кетуі мүмкін. Астыңғы көршіге су кететіні де көбінде осыдан.
Мұны тексеріп көргісі келгендер сынақ жасап та көрген екен. Бір шәугім ыстық су құйып, шүмекті тазаламақ болған тұрғын пластмасс ағызғыш мыжырайып ішке қарай кіріп кеткенін байқаған.
Ыстық судан раковинаның өзі де шытынап кетуі мүмкін. Мәселен ваннаға ыстық су құя берсе, сызат түскенін бәрі көрген болар. Раковина да солай, ыстық су мен суық су кезек-кезек құя берсе, шытынап кетері анық.
<a href="https://massaget.kz/men_kasipkermin/kenester/64534/">massaget.kz</a>

Раковинаға ыстық су төгуге болмайды

Kyzylorda-news.kz. 18 ақпанда Perseverance атты жаңа ровер Марс бетіне қонды. Ғылыми жабдықтармен қатар, ол Қызыл планетаға миллиондаған адамның есімдерін жеткізді. Олардың арасында Димаш Құдайбергеннің есімі де бар, деп хабарлайды <a href="https://www.inform.kz/kz/dimash-kudaybergennin-esimi-marska-zhetti_a3755497">ҚазАқпарат</a>.
Perseverance ровері 2020 жылдың 30 шілдесінде алыс сапарға аттанып, жеті айға жуық уақыттан кейін Қызыл планетаға сәтті қонды.
Perseverance – технологиялық жағынан ең дамыған робот және оны Марсқа NASA жіберіп отыр.
2,7 миллиард доллар тұратын робот бір марстық күн ішінде орташа есеппен 200 метрді бағындырып отырады. Ол ұзындығы шамамен 2 метр манипулятор қолымен, бұрғылаумен және ғылыми құрылғылармен жабдықталған. Оның ішінде жоғары технологиялы түсірілім камерасы, ауа райын өлшеуге және шаңды бақылауға арналған сенсорлар, рентген жүйесі және тау жыныстарының химиялық құрамын өлшеуге арналған камера жүйесі бар.
Сондай-ақ, Perseverance Марсқа коронавирус инфекциясымен күресіп жатқан дәрігерлердің құрметіне жасалған ескерткіш тақтаны, сондай-ақ NASA-ның «Марсқа өз есіміңді жібер» акциясына қатысқан 11 миллионға жуық адамның аты жазылған тырнақ көлеміндегі 3 кремний чипін жеткізді.
АҚШ, Түркия, Ресейді қоса алғанда, түрлі елдердегі жанкүйерлер тақтайшаға Қазақстандық орындаушы Димаш Құдайбергеннің есімін жазуды ұсынды.
Perseverance роверінің Марстағы мақсаты – ежелгі өмірдің белгілерін іздеу және планетаның бетін зерттеу. Оның миссиясы шамамен екі жылға созылады деп күтілуде.

Димаш Құдайбергеннің есімі Марсқа жетті

Kyzylorda-news.kz. Қазақстанда кәсіпкерлерге мобильді қосымшалар арқылы картадан картаға жіберілетін ақша аударымдарына салық енгізу жоспарлануда. Бұл туралы премьер-министрдің бірінші орынбасары Әлихан Смайылов мәлімдеді, деп хабарлайды <a href="https://stan.kz/kazakstanda-mobildi-kosimsha-arkili-audarim-zhasagandar-343442/">Stan.kz</a>.
<blockquote>
 “Сонымен қатар, кәсіпкерлердің тұтынушылардан банктік мобильді қосымшалар арқылы алатын ақша аударымдарын фискализациялау мәселесін шешуге баса назар аудару қажет. Біз қолма-қол ақшасыз төлемдердің дамуы жақсы қарқынмен жүріп жатқанын көріп отырмыз, олардың саны екі есеге артқан. Бірақ, мобильді қосымша арқылы ақша айналымын жүзеге асырып отырған кәсіпкерлер де салық төлеуі керек”, – деді Әлихан Смайылов қаржы министрлігінің алқа отырысында.
</blockquote>
Ол салық салу қазіргі кезде кәсіпкерлерге берілетін жеңілдіктерді ескере отырып жүргізілуі керек екенін атап өтті.

Қазақстанда мобильді қосымша арқылы аударым жасаған кәсіпкерлерге салық салынады

Kyzylorda-news.kz. Емделу үшін зейнетақы қорындағы ақшаны мерзімінен бұрын алу порталы 25 ақпанда іске қосылады, деп хабарлады “Отбасы банкі” басқарма төрағасы Ләззат Ибрагимова.
<blockquote>
 “Соңғы жаңашылдықтарға қатысты өзгеріс енгізу үшін 3 жұмыс күні қажет. Бастапқыда қосылған кейбір сырқат түрлері алынып тасталды. Қазір барлық механизмді реттеп жатырмыз. Бұл іс бірнеше кезеңнен тұрады. Өтініш беруші өз өтінішінің “Отбасы банкі” порталынан БЖЗҚ сайтына жіберіліуін екі күндей күтетін болады. Әдетте бұл бір жұмыс күні ішінде жасалады. БЖЗҚ бес күн ішінде ақшаны арнайы есепшотқа аударуы тиіс”, – деді Ләззат Ибрагимова.
</blockquote>
18 ақпандағы жағдай бойынша “Отбасы банкінде” 160 мыңнан астам арнайы есепшот ашылған. 96 мыңнан астам қазақстандық баспанаға жұмсау мақсатында өтініш рәсімдеген.
<blockquote>
 “Бағдарламаны күтіп отырған көптеген адамның медициналық картасында диагнозы бар. Ережеге сәйкес, адам өтініш берген соң 5 күн ішінде дәрігерлер кеңесі жиналады. Кеңес өткеннен кейін екі күні ішінде комиссия хатшысы клиентке нақты жауап жеткізуі тиіс. Комиссия қорытындысы порталда клиент берген өтініш жанында бекітіледі”, – деп түсіндірді банк басшысы.
</blockquote>
Емделу үшін бірыңғай жинақтаушы зейнетақы қорынан ақша алуға өтініш беру механизмі баспана жағдайын жақсартуға берген өтінішпен бірдей болады.
Қазақстандықтар шетелде емделе алады
Наурыз айының басында “Отбасы банк” шетелдік медициналық ұйымдармен жұмыс істеу мүмкіндігін қосу қарастырылатынын хабарлаған еді. Қазіргі уақытта ақша конвертизациялау мәселесі шешіліп жатр. Өйткені өтінім берушіге қаражат тек теңгемен түседі.
<a href="https://m.sputnik.kz/society/20210219/16339206/zeynetaqy-jinagy.html">Sputnik.kz</a>

Зейнетақы жинағын пайдалану: емделуге өтінім қабылдау мерзімі аталды

<a href="https://kyzylorda-news.kz/">Kyzylorda-news.kz</a>. Matchroom Boxing промоутерлік компаниясының жетекшісі Эдди Хирнорта IBF/IBO нұсқасы бойынша орта салмақтағы әлем чемпионы Генадий Головкин (41-1-1, 36 КО) мен осы санатта WBA Super белбеуінің иегері жапон спортшысы Риота Муратамен (16-2, 13 КО) болатын жекпе-жек туралы айтты, деп хабарлайды <a href="https://www.inform.kz/kz/golovkinnin-promouteri-ush-titul-ushin-alem-chempionymen-otetin-aykastyn-kunin-aytty_a3755400">ҚазАқпарат</a>.
<blockquote>
 «Головкин мен Мурата арасындағы айқас жылдың соңына қарай ұйымдастырылуы мүмкін. Бұл – әдетте жапондар 31 желтоқсанда өткізетін жекпе-жектің түрі. Біз Мунгиямен де айқас туралы келіссөздер жүргізіп жатырмыз, бұл да керемет кездесу болмақ. Бірақ GGG Муратамен айқасты желтоқсан айында қарастырады деп ойлаймын. Әрине, «Канело» да бұл жекпе-жекті желтоқсан айында нысанаға алады. Алдағы екі аптада не болатынын көрейік», — деп мәлімдеді Хирн IFL.tv-ге берген сұхбатында.
</blockquote>
35 жастағы Мурата 2019 жылдың 23 желтоқсанында Йокогамада канадалық Стивен Батлерді (28-3-1, 24 КО) нокаутқа жіберген сәттен бастап шаршы алаңға шыққан жоқ. Головкинге келетін болсақ, ол өзінің соңғы жекпе-жегін өткен жылдың 18 желтоқсанында АҚШ-та өткізді, онда GGG міндетті қарсыласы поляк боксшысы Камил Шереметаны (21-1, 5 КО) жеңген болатын.

Головкиннің промоутері үш титул үшін әлем чемпионымен өтетін айқастың күнін айтты

<a href="https://kyzylorda-news.kz/">Kyzylorda-news.kz</a>. Коронавирус пандемиясы адамзаттың 20 миллион жылын жалмады. Зерттеу жүргізген испандық ғалымдар осындай жаға ұстатарлық мәлімдеме жасады.
Олар 81 елде коронавирустан көз жұмған азаматтардың жасы мен сол мемлекеттегі өмір сүру ұзақтығын салыстырған. Сөйтсе, індет кесірінен адамзат 20 миллион 507 мың жылын жоғалтқаны белгілі болды. Бұл көрсеткіш бойынша 81 елдің ішінде бірінші орында Непал тұр. Бестікке сондай-ақ Тайвань, Боливия, Сальвадор мен Доминикан Республикасы кірген. Ал антирейтингтің соңында Еуропа елдері&nbsp;Бельгия, Дания, Люксембург, Словения, Швеция мен Швейцария тұр.
<a href="https://24.kz/kz/zha-aly-tar/lemde/item/456524-koronavirus-adamdardy-20-mln-zhyl-a-t-rarly-mirin-zhalmady-alymdar">Хабар 24</a>

Ғалымдар: КВИ адамдардың 20 млн жылға тұрарлық өмірін жалмады

Kyzylorda-news.kz. Қазақстанда өткен тәулікте 827 адамда коронавирус індеті ПТР арқылы расталды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 127,
Алматы қаласы – 112,
Шымкент қаласы – 11,
Ақмола облысы – 77,
Ақтөбе облысы – 14,
Алматы облысы – 46,
Атырау облысы – 34,
Шығыс Қазақстан облысы – 50,
Жамбыл облысы – 13,
Батыс Қазақстан облысы – 61,
Қарағанды облысы – 45,
Қостанай облысы – 68,
Қызылорда облысы – 9,
Маңғыстау облысы – 11,
Павлодар облысы – 111,
Солтүстік Қазақстан облысы – 31,
Түркістан облысы – 7.
Жалпы ел бойынша ауырғандар саны – 206 652.

Қызылордада 9 адам коронавирус инфекциясын жұқтырды

Kyzylorda-news.kz. Бүгін Қазақстанның басым бөлігінде атмосфералық фронталды бөліктердің өтуіне байланысты ауа райы құбылмалы болады, деп хабарлайды Қазгидромет.
Синоптиктердің мәліметінше, 20 ақпанда жаңбыр, қар жауады. Шығыс және оңтүстік-шығыс аудандарда қатты жауын-шашын мол көлемде жауады. Республиканың кей жерлерінде тұман түсіп, көктайғақ, бұрқасын болып, жел күшейеді.
Шығыс Қазақстан облысының кей жерлерінде жаяу бұрқасын, көктайғақ, тұман болып, желдің күші секундына 15-20 метрге, екпіні 23-28 метрге жетеді.
Алматы облысының кей жерлерінде тұман, көктайғақ болып, жел 17-22 м/с, кей жерлерде 27 м/с жылдамдықпен соғады.
Жамбыл облысының кей жерлерінде тұман түсіп, көктайғақ болады, түнде жел 15-20 м/с-қа дейін күшейеді, жаяу бұрқасын болады.
Түркістан облысының кей жерлерінде көктайғақ болып, тұман түседі, жел 15-20 м/с жылдамдықпен соғады.
Ақмола облысында кей жерлерде тұман түсіп, жаяу бұрқасын болады, күндіз жел 15-20 м/с жылдамдықпен соғады.
Күндіз Солтүстік Қазақстан облысында жел 15-20 м/с жылдамдықпен соғады, жаяу бұрқасын соғады.
Павлодар облысында түнде желдің күші секундына 17 метрге жетеді.
Атырау, Батыс Қазақстан, Қызылорда облыстарының кей жерлерінде тұман түседі.
Ақтөбе, Қостанай облыстарының кей жерлерінде жаяу бұрқасын болып, тұман түседі, күндіз желдің күші секундына 15-20 метрге жетеді.

20 ақпанға арналған ауа райы болжамы

Kyzylorda-news.kz. Биыл облыста 17954 жаңа жұмыс орны ашылады. Оның 13500-і тұрақты жұмыс орны. Бұл туралы Өңірлік коммуникациялар қызметінің ақпарат алаңында өткен брифингте облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова мәлімдеді.
Өңірде «Жұмыспен қамту жол картасы» бағдарламасын жүзеге асыруға 11,7 млрд. теңге қаржы бөлінді. Жобалардың басым бөлігі құрылыс саласына бағытталады. Жергілікті тұрғындардың жұмыссыздық мәселесі осы бағдарлама арқылы шешу көзделуде.
<blockquote>
 “Біз биыл 18 мыңға жуық жаңа жұмыс орнын ашуды жоспарлап отыр. Межені артығымен орындауға күш саламыз. Жақында білесіздер Президент Үкіметке облысқа қолдау білдіруге тапсырма берді. Жаңа жобалар әзірленді. Соның аясында жаңа жұмыс орындары ашылатын болады. Жыл басынан бері өңірде мыңға жуық азамат жұмысқа орналасты. Бұл жұмысты тұрақты жалғастыратын боламыз”, – деді облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова.
</blockquote>
Пандемия кезінде жұмыспен қамту мәселесі күрделене түсті. Көптеген мекемелер жұмысшыларын қысқартты. Бұл мәселені шешу бағытында 3208 кәсіпорынмен меморандум жасалды.

Қызылордада 17954 жаңа жұмыс орны ашылады

<a href="https://kyzylorda-news.kz/">Kyzylorda-news.kz</a>. Биыл Қызылорда облыстық тілдерді оқыту орталығы 2500 адамға үш тілді тегін үйретеді.
Атап айтсақ, қазақ тілі – 1008, ағылшын – 828, орыс тілі -648 адамға оқыту жоспарланған. Курстарға қазір 330 адам өтініш білдірген.
35 маман жұмыс істейтін орталыққа мемлекеттік қызметкерлер, мемлекеттік емес ұйым өкілдері көптеп жүгінеді. Осында санаулы ай білімін жетілдіріп, курс соңында сертификат алып шығады. Айта кететін жайт, бұл оқу курстарының барлығы келушілерге тегін түрде үйретіледі. Мұнда, мемлекеттік тілді оқыту 100 сағатқа жоспарланса, ағылшын және орыс тілі курстары 72 сағатты құрайды. Ескерте кететін жайт, оқыту курсы тек ересек адамдарға арналған.
<blockquote>
 «Еліміз карантиндік режимге ауысқан тұста біз онлайн форматта жұмыс істедік. Мамандарымыз қашықтан оқыту жүйесіне арналған kzordatil.kz интернет порталын жасақтады. Үш тілдегі деңгейлік оқыту курстарының барлық сабақтарын порталға орналастырдық. Сөйтіп, тіл курстары онлайн форматқа ауыстырылды. Бүгінде порталымыз тіл үйренушінің уақыты мен мүмкіндігіне сәйкес қолжетімді әрі тиімді ресурс ретінде қолданылуда», – деді облыстық тілдерді оқыту орталығының директоры Ләззат Ортаева.
</blockquote>
Өңірде ағылшын тілін үйренуге сұраныс жоғары екен. Ал аудандық жерлерде орыс тілін меңгергісі келетіндер көп. Көбісі іс-қағаз және құжаттарға байланысты сауаттылығын арттырмақ ниетте. Курсқа қатысушы өзіне тиімді офлайн немесе онлайн форматты таңдай алады.

Қызылордада 2500 адамға үш тіл тегін үйретіледі

<a href="https://kyzylorda-news.kz/">Kyzylorda-news.kz</a>.&nbsp; Бүгінде халыққа көрсетілетін мемлекеттік қызметтер саны жыл сайын арта түсуде, ал оны алу процессі бұрынғыдан жеңілдетілгенін ерекше атап өту қажет. Оның электронды форматқа көшуі де – жемқорлыққа қатысты құқық бұзушылықтарды жоюға мүмкіндік беріп келеді. Нақты статистиканы сөйлетсек, облыстағы қызмет беруші мекемелермен былтыр 372 мемлекеттік қызмет түрі бойынша 6&nbsp;155&nbsp;896 қызмет көрсетілген. Осыған қарап, көрсеткіштің 2019 жылмен салыстырғанда 2&nbsp;454&nbsp;316 қызметке немесе 66,3 пайызға артқанын айқын аңғаруға болады.
Ал, электрондық түрде 3&nbsp;748&nbsp;279 қызмет көрсетілген. Жалпы, мемлекеттік көрсетілетін қызметтердің, оның ішінде электрондық қызметтердің саны атқарылған жұмыстардың ауқымын байқатып отыр. Азаматтардың сұранысының өсуі, сонымен қатар пандемия кезіндегі карантиндік шектеулердің де әсері мемлекеттік қызметтерді ақылы түрде көрсететін орындардың көптеп ашылуына ықпал етті. Аталған орындарда «электронды үкімет» веб-порталынан тегін алуға болатын қызметтерді алуға делдалдық жасағаны үшін тұрғындардан 500 теңгеден бастап 3000 теңгеге дейін сұралған. Мысалы, кез-келген анықтама алу құны – 500 теңге, ЭЦҚ алу, мекенжайға тіркелу – 1000 теңге, балабақшаға тіркеу үшін – 2000 теңге. Ал, бұл қызметтерді артық шығынсыз алуға мүмкіндік бар. Тек құлшыныс керек. Құпиялылық жағынан да мәселе жоқ емес. Тарқатсақ, біріншіден, жоғарыда айтқанымыздай, тегін қызметті ақылы алады, екіншіден, тұрғындар ЭЦҚ-сын құпия сөздерімен бірге сол қызмет алған орындарға тастап кетеді. Одан кейін сіздің ЭЦҚ-дың қандай мақсатта пайдаланылатыны белгісіз.
Дегенмен де маңызды мәселе бақылауда. Өткен жылдың соңында Қазақстан Республикасының Мемлекеттік қызмет істері агенттігінің Қызылорда облысы бойынша департаментінің бастамасы негізінде облыс әкімдігінің қолдауымен «Электрондық қызметтерді өздігінен алу орталығы» жұмысын бастап кетті. Орталық осы кезеңге дейін 7000-ға жуық тұрғынға қызмет көрсетті. Аталған орталықта «Азаматтарға арналған үкімет» мемлекеттік корпорациясы филиалының мамандары кеңес беріп, сан сауалға жауап беруге дайын. Орталық дүйсенбі-жұма күндері сағат 09:00-20:00 аралығында және сенбі күні сағат 09:00-18:00 аралығында қызмет көрсетеді. Орталық мекен-жайы: Қызылорда қаласы, Бектұрғанов көшесі, 70 (И.Панфилов көшесімен қиылысы), Көші-қон полициясы ғимараты, 1-қабат.
Айта кету керек, өткен жылы Департаментпен мемлекеттік көрсетілетін қызметтер саласындағы заңнаманың сақталуы бойынша 47 тексеру жүргізілді. Тексеру нәтижесімен 222 заң бұзушылық анықталды. Ең көп орын алған факт қатарында стандартта көзделмеген құжаттарды талап ету, қызмет көрсету рәсімдерін, мерзімін бұзу, құжаттар топтамасы толық болмаса да қызмет көрсету бар. Әкімшілік құқық бұзушылықтар туралы кодексінің 465-бабы бойынша 11 және 462-бабы бойынша 1 әкімшілік хаттама толтырылды. Салынған және өндірілген айыппұл мөлшері – 432&nbsp;257 теңге.
Азаматтардың назарына! Егер де, мемлекеттік көрсетілетін қызметтерді алу барысында Сіздің құқықтарыңыз бен заңды мүдделеріңіз бұзылса Қызылорда қаласы, Бейбарыс Сұлтан көшесі, 1 мекенжайда орналасқан Қазақстан Республикасының Мемлекеттік қызмет істері агенттігінің Қызылорда облысы бойынша департаментіне хабарласуды сұраймыз. Байланыс телефондарымыз: 8 (7242) 70-56-36, 70-00-40.
Роллан ЕСПЕНБЕТОВ,
ҚР Мемлекеттік қызмет істері агенттігінің
Қызылорда облысы бойынша департаментінің бас маманы

Роллан Еспенбетов:  Мақсат – мемлекеттік қызмет көрсету сапасын арттыру

<a href="https://kyzylorda-news.kz/">Kyzylorda-news.kz</a>. ҚР Денсаулық сақтау министрлігі Медициналық көмекті ұйымдастыру департаменті директорының орынбасары Гүлнар Сәрсенбаева Бірыңғай жинақтаушы зейнетақы қорынан алынған қаражатты қандай емге жұмсауға болатындығын айтты, деп хабарлайды <a href="https://lenta.inform.kz/kz/zhakyn-tuystardyn-zeynetaky-zhinagyn-emdeluge-zhumsauga-bolady_a3755406">ҚазАқпарат</a>.
<blockquote>
 «Оны алу үшін азамат БЖЗҚ-ның интернет-ресурсы немесе «электрондық үкімет» веб-порталы арқылы біржолғы зейнетақы төлемінің қолжетімді сомасын анықтауы қажет. Егер қордағы сома жеткілікті болса, онда азамат тіркелген жері бойынша медициналық ұйымға жүгініп, дәрігерлік комиссияның біржолғы зейнетақы төлемдері есебінен емделуге жіберу туралы қорытындысын алуы қажет», – деді ол Орталық коммуникациялар қызметіндегі баспасөз мәслихаты барысында.
</blockquote>
Оның түсіндіруінше, дәрігерлік комиссия өтініш берген күннен бастап 5 жұмыс күнінен кешіктірмей зейнетақы төлемдері есебінен емделуге жіберу туралы не медициналық көрсеткіш болмаған жағдайда бас тарту туралы шешім қабылдайды. Қорытынды дәрігерлік комиссияның отырысы өткізілген күннен бастап 2 жұмыс күні ішінде беріледі.
Жинақталған зейнетақы қаражаты есебінен азаматтар орфандық ауруларды емдеу, Қазақстан Республикасының аумағында орналасқан медициналық ұйымдарда көрсетілетін стоматологиялық қызметтер (тісті протездеу, имплантация), операциядан кейінгі тыртықтар мен туа біткен ақауларды түзету мақсатында реконструктивті және қалпына келтіру операциялары (пластикалық), сондай-ақ мастэктомия, радионуклидтік және радиойодтерапия, радиохирургиялық емдеу (гамма-пышақ, кибер пышақ), протонды терапия, офтальмологиялық қызметтер сияқты қымбат тұратын қызметтерді ала алады. Сонымен қатар, аталған тізбе халықтың қажеттілігін ескере отырып, өзгеруі мүмкін.
Медициналық комиссияның оң қорытындысы болған жағдайда өтініш беруші медициналық ұйымды таңдап, шарт жасасуы қажет. Содан кейін, ЭЦҚ көмегімен уәкілетті оператордың интернет-ресурсында өзінің жеке кабинетін ашу, онда сомасын, пайдалану мақсатын көрсете отырып, біржолғы зейнетақы төлеміне электрондық өтінішті толтыру, дәрігерлік комиссия қорытындысының сканерленген көшірмелерін, медициналық ұйыммен емдеу туралы шартты бекіту және өзінің ЭЦҚ-мен куәландыру қажет. Өтініш берушінің ЭЦҚ-сы қойылған, уәкілетті операторда тіркелген Төлемге арналған өтініш туралы мәліметтер БЖЗҚ-ға электрондық хабарлама шеңберінде келіп түседі. БЖЗҚ уәкілетті оператордан электрондық хабарлама алған күннен бастап 5 жұмыс күні ішінде біржолғы зейнетақы төлемінің сомасын өтініш берушінің уәкілетті операторда ашылған арнайы шотына аударады.
Уәкілетті оператор алушы ұсынған біржолғы зейнетақы төлемдерінің нысаналы мақсаты бойынша құжаттарды тексереді және олар сәйкес келген жағдайда оларды алған күннен бастап 5 жұмыс күні ішінде өтініш беруші таңдаған медициналық ұйымның нысаналы мақсаты бойынша қаражатты аударады.
«Сондай-ақ, жұбайының (зайыбының), жақын туыстарының біржолғы зейнетақы төлемдерін емдеуге пайдалануға болатынын атап өткім келеді. Мұндай жағдайларда тараптар жеке кабинетте туыстық қатынастарды растайтын құжаттарды қоса көрсетіп, олардың ЭЦҚ-мен куәландырылатын біржолғы зейнетақы төлемдерін беру туралы келісім жасасады», – деді Г.Сәрсенбаева.

Қазақстан және Қызылорда облысының жаңалықтары