<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданынан биыл «Тұлпар мініп, ту алған» байқауына 57 оқушы, 51 жетекші қатысады.
«Qazaq epos» қоғамдық қоры жариялаған «Тұлпар мініп, ту алған» жобасына қатысушылар байқаудың аудандық кезеңіне қызу дайындық үстінде. Қазіргі таңда Ер Едіге батыр жырын толық жаттап алған оқушылар да бар. Қатысушылардың қатарындағы 20 оқушы жырды түгел жаттап, сайысқа сақадай сай. Олар аудандық кезеңді асыға күтуде.
Алдағы байқауда оқ бойы оза шауып, үздіктер қатарынан көрінуді мақсат етіп отырған №93 мектеп ұландары жырды толық жаттаған. Мектеп мұғалімдері оқушыларға жырды аз уақыттың ішінде толық жаттатудағы тәжірибелерімен бөлісті.
<blockquote>
 «Жырды&nbsp;оқушылар қызыға жаттау үшін әр оқиғаға құрылған&nbsp;жыр жолдарын бөліп бере отырып жаттатқыздым. Дайындық&nbsp;барысында екі оқушымды тосыннан тоқтатқызып, жарыса жаттатқызу өз жетістігін&nbsp;берді. Қазіргі уақытта&nbsp;тарихи&nbsp;сөздердің мағынасын ашып, Алтын&nbsp;орда тарихына қосымша әдебиеттерді қарап дайындалудамыз», – дейді қазақ тілі мен әдебиеті пәні мұғалімі Раиса Рахмет.
 «Негізі эпостық&nbsp;жырлар оқиғалы болып келеді. Сол оқиғаларды жоспар бойынша еске түсіре отырып жаттау жеңіл болды. Баланың&nbsp; есте сақтау қабілетін&nbsp; арттыру&nbsp; мақсатында кез келген оқиғаны айтып беруді талап&nbsp;еттім. Қазіргі уақытта қазақ әдебиетінен өткен &nbsp;тақырыптарға шолу жасап жатырмыз», – дейді қазақ тілі мен әдебиеті пәні мұғалімі&nbsp; Ұлпан Тәуекелова.&nbsp;
</blockquote>
Байқауға қатысушы №93 мектептің оқушысы Нұржамал Мнажадин Едіге жырының басқа&nbsp;жырларға&nbsp;қарағанда өзіндік ерекшелігі бар екенін айтады. Қатысушының айтуынша, жырды жаттау аса қиындық туғызбаған. Ол сайысқы қатыстырушы мұғалімнің өзіне үнемі сенім артып келе жатқанын айтып, алдағы уақытта сол сенімді ақтауға тырысатынын жеткізді.

«Тұлпар мініп, ту алған»: Қазалыда байқауға 57 оқушы қатысады

<a href="https://kyzylorda-news.kz/ru/obshestvo/">Kyzylorda-news.kz</a>. Бүгін Асқар Тоқмағанбетов атындағы мәдениет үйінде «Ұстаз аты – биік, әрі мәңгілік» атты ұстаздар мерекесіне арналған салтанатты шара өтті.
<blockquote>
 «Халқымыз ұстаздық ету талабы қашанда таусылмайтын, заманы ешқашан ескірмейтін кәсіп. Ұстаздарды ұлықтап, қадір тұтып, құрметтеу – парыз. Білім беру ісі бұл тамыры тереңде жатқан, бір күн немесе бір жылда көрінбейтін еселі еңбек», – деген қала әкімі Ғ.Қазантаев қаладағы барлық ұлағатты мамандық иелері мен білім саласының ардагерлерін кәсіби мерекелерімен құттықтады.
</blockquote>
Шара барысында ардагер ұстаздарға ерекше алғысын жеткізіп, ұлағатты мамандық иелерінің мәртебесінің қашанда биік екендігін тілге тиек етіп, ардагер ұстаздарға сый-сияпат жасап, құрмет көрсетті.
Өз ісіне деген адалдығын нақты іспен, нәтижелі жұмыспен дәлелдеп, жаңалықты жатсынбай қабылдайтын ұстаздар еңбегі қай уақытта да ескерусіз қалмайды. Осы орайда шаһар басшысы білім саласында үздік нәтижеге қол жеткізген сала мамандары үшін ең биік марапат болып саналатын “Алтынсарин” төсбелгісін «Orda School» мектебінің мұғаліміне табыстап, жоғары жетістіктерге жеткен ұстаздарды ҚР Білім және ғылым министрлігінің және облыс әкімінің алғыс хатымен марапаттады. Сонымен бірге педагог-қызметкерлерге қала әкімінің алғыс хаты және (150 мың теңге) қаржылай сыйақысы табысталып, қаланың біршама директорлары «Серіктес директорлар» лигасы принтерінің иегері атанды.
Бүгінгі мерекеде қалалық қосымша білім беру орталығының жас өнерпаздары әсем әуенмен сүйемелденген вальс биін билеп, ұстаздардың құрметіне ән шырқады.
Жалпы, білім саласын дамыту жолында қаламызда да көптеген оңды істер атқарылуда. Бүгінгі күні 55 жалпы орта білім беру ұйымдарында қала бойынша 7 мыңға жуық бала білім алсағ оның ішінде 3-6 жас аралығындағы 21 мыңнан аса бала мектепке дейінгі мекемелермен 100% қамтылып отыр. Биылдан бастап 1-3 жас аралығындағы балаларды мектепке дейінгі мекемелермен қамту көрсеткішін арттыру жұмыстары қолға алынып, қаладағы 21 балабақшада тәрбиеленуде. Осы жылдан бастап бүлдіршіндерімізге заманауи тәрбие мен білім беру мақсатында қала аумағында орналасқан 8 балабақшада «Стэм» кабинеттер жұмыс жасауда. 55 мектептің 30-ы арнайы мамандармен қамтылып, инклюзивті білім беруге жағдай жасалды. Атап айтқанда, Өңірлік Жол картасына сәйкес, өткен жылдан бастап облыс орталығында 13 инклюзивті кабинет өз жұмыстарын бастады. Одан бөлек, инклюзивті білім беруді дамытудың 2020-2022 жылдарға арналған Өңірлік жол картасына сәйкес, білім беру ұйымдарынан 1 ресурстық орталық және 1 аутизм балаларды қолдау кабинеті ашылып, жұмыс жасауда. Соңғы үш жылда оқушыларды сапалы білім нәрімен сусындатып, болашағы жарқын болуы мақсатында қызмет еткен Тәкей Есетов атындағы №264 мектеп лицейі облыс деңгейінде «Үздік орта білім беру ұйымы» атанды.
Бүгінде қызылордалық жас шәкірттерді 19-ы Ыбырай Алтынсарин атындағы төсбелгі иегері, 3-і ҚР «Білім беру ісінің үздігі» және 12-сі «ҚР Білім беру ісінің құрметті қызметкері» білім нәрімен сусындатып жүр. Жалпы Қызылорда қаласының мектептерінде 7336 мұғалім, оның ішінде жоғарғы санатты 178, Шебер 15, Педагог зерттеуші 1614, бірінші санатты 121, 1705 педагог сарапшы, 331 екінші санатты, 1511 педагог модератор қызмет етеді. Сондай-ақ биылғы оқу жылында 81 жас маман жұмысқа қабылданды.
<img src="https://kyzylorda-news.kz/wp-content/uploads/2021/10/244554162_2933546903578715_8737160770291384614_n.jpg" alt="" />
<img src="https://kyzylorda-news.kz/wp-content/uploads/2021/10/244513999_2933546970245375_8274199062489782518_n.jpg" alt="" />
<img src="https://kyzylorda-news.kz/wp-content/uploads/2021/10/244521560_2933547070245365_7189711663388943479_n.jpg" alt="" />
<img src="https://kyzylorda-news.kz/wp-content/uploads/2021/10/244605067_2933547210245351_2875663995753896211_n.jpg" alt="" />
<img src="https://kyzylorda-news.kz/wp-content/uploads/2021/10/244605521_2933546943578711_2605801813084228485_n.jpg" alt="" />

Ғанибек Қазантаев ұстаздарға құрмет көрсетті

<a href="https://kyzylorda-news.kz/ru/obshestvo/">Kyzylorda-news.kz</a>. Облыс әкімі Гүлшара Әбдіқалықованың төрағалығымен«Nur Otan» партиясының сайлауалды бағдарламасының іске асыру жөніндегі Жол картасының орындалу барысы бойынша мәжіліс өтті. Жиынға Nur Otan партиясы төрағасының бірінші орынбасары Ләйла Төрешова, облыс әкімінің орынбасарлары мен басқарма басшылары қатысты. Сондай-ақ, селекторлық режимде қала жәнен аудан әкімдері қосылды.
Жиында мемлекеттік бағдарламалардың орындау барысы туралы облыстық экономика және бюджеттік жоспарлау басқармасының басшысы Нұрғали Қордабай баяндады.
Партия бағдарламасын іске асыру жөніндегі облыстық және аудандық Жол карталарының орындалу барысын облыстық партия филиалы төрағасының бірінші орынбасары Ләйла Төрешова хабарлады.
Өз кезегінде облыс әкімі Гүлшара Әбдіқалықова жауапты басқармалар мен Қызылорда қаласы мен аудан әкімдеріне барлық мүмкіндіктерді қарастырып, «Nur Оtаn» партиясының сайлауалды бағдарламасында көзделген барлық шараларды жыл соңына дейін жүзеге асырылуын қамтамасыз етуді тапсырды.
<img src="https://kyzylorda-news.kz/wp-content/uploads/2021/10/244412805_3770860949683613_4852835849482454194_n.jpg" alt="" />
<img src="https://kyzylorda-news.kz/wp-content/uploads/2021/10/243994320_3770860886350286_2861794380082392660_n.jpg" alt="" />

«Nur Otan» партиясының сайлауалды бағдарламасын орындау барысы пысықталды

<a href="https://kyzylorda-news.kz/ru/obshestvo/">Kyzylorda-news.kz</a>. Әр аптаның сәрсенбі, жұма және сенбі күндері Облыстық төтенше жағдайлар департаменті және Полиция департаментінің қызметкерлері волонтерлермен бірлесіп жылу беру маусымы кезеңінде өрттің пайда болуын, адамдардың қаза болуын және жарақат алу қауіп-қатерін азайту мақсатында түсіндіру жұмыстарын жүргізуде. Аралау жұмыстары «Өрт қауіпсіздігі айлығы» аясында 15 қазанға дейін жалғасатын болатын.
Бұл туралы Өңірлік коммуникациялар қызметінде өткен баспасөз конференциясында Облыстық төтенше жағдайлар департаменті бастығының орынбасары Бауыржан Ізбасаров мәлімдеді.
<blockquote>
 «Үгіт-насихат жұмыстары барысында 156 тұрғын үйде 216 өрт қауіпсіздігі талаптарын бұзғандығы анықталса, 178 кемшілік сол сәтте қалыпына келтірілді. Басты назар облыстық жұмыспен қамтуды үйлестіру және әлеуметтік бағдарламар басқармасынан алынған тізімге сәйкес тұрмысы төмен, көпбалалы, жалғызбасты ана және мүгедек жандары бар 7 691 отбасы тұратын үйлерге аударылуда. Оларға 3 941 отбасына көмірқышқыл газын анықтайтын датчик сатып алу бойынша жергілікті атқарушы органға ұсыныс хаттар жолданып, қазіргі таңда 4 000 дана көмірқышқыл газын анықтайтын датчик сатып алу процесі жүргізілуде. Сонымен қатар 4 қыркүйекте «Қызылорда қалалық мүгедектер қоғамы» қоғамдық бірлестігі ұсынған тізім бойынша Департамент қызметкерлерімен Наурыз және Махамбет елді мекенінде тұратын тұрмысы төмен мүгедек жандардың 23 тұрғын үйінің мұржаларын тазарту жұмыстары жүргізілді»,- деді Бауыржан Шірімбекұлы.
</blockquote>

Бауыржан Ізбасаров: Қауіпсіздік шаралары қадағалауда

<a href="https://kyzylorda-news.kz/ru/obshestvo/">Kyzylorda-news.kz</a>. Дүйсенбіде “Вечерний Ургант” Байқоңыр ғарыш айлағынан екінші рет эфирге шығады. Мұнда 5 қазанда Халықаралық ғарыш станциясына әлемдегі алғашқы “кино экипажын” аттандыру жоспарланып отыр.
“Вечерний Ургант” шоуының командасы экипаж мүшелері “Вызов” фильмінің түсіріліміне қатысатын ғарыш кемесін ұшыру сәтін көрсетеді. “Союз МС-19” ғарыш кемесі 5 қазанда Байқоңыр ғарыш айлағынан ұшады. Шоу жүргізушісі Иван Ургант пен қатысушылары зымыранды ұшыруға дайындық туралы айтып, кемені ғарышқа аттандыру сәтін көрсетеді.
Бағдарлама 1 және 4 қазан күндері эфирге шығады деп жоспарланды. Жүргізуші Иван Ургант тизерде Земляне тобының “Трава у дома” әнін домбыраның сүйемелдеуімен орындады. 1 қазанда “Первый канал” арқылы көрсетілген эфирге Imanbek те қатысты.
<blockquote>
 “Ол бүгін “Фрукты” тобына көмектеседі. Ол жақын жерде, Павлодарда тұрады. 1600 километрді жылдам еңсеріп, осында келді”, – деп қалжыңдады Ургант.
</blockquote>
“Вечерний Ургант” түсіріліміне 170-ке жуық көрермен – ғарыш айлағының жұмысшылары мен Байқоңыр қаласының тұрғындары шақырылды.
Көшпелі студия ұшыру алаңындағы далада жайғастырылды. Осы алаңнан 5 қазанда “Союз МС-19” зымыранымен әлемдегі тұңғыш кино экипажы ғарышқа аттанады. Экипаж құрамында командир Антон Шкаплеров, режиссер Клим Шипенко мен актриса Юлия Пересильд бар. 4 қазанда Ресейдің мемлекеттік комиссиясы кино экипаж мүшелерін бекітті.
Оларды және дублер әртістерді корпорацияның бас директоры Дмитрий Рогозиннің төрағалық етуімен мемлекеттік комиссия мақұлдады. Рогозин картина продюсерінің бірі ретінде де таныстырылды.
“Байқоңырдағы кездесулер ерекше. Шыны арқылы өтсе де, таңғажайып! @urgantcom, сендердің келгендерің жақсы болды! Ертең маңызды күн! Бүгін “рақмет” дегім келеді. Мен осынша махаббатты бұрын-соңды сезініп көрмеппін”, – деп жазды Instagram парақшасында Юлия Пересильд.
Бұл кинематограф тарихындағы бұрын болмаған жағдай. Осылайша Роскосмос ғарышқа Голливуд жұлдыздары Том Круз бен режиссер Дага Лайманды аттандыруды жоспарлаған NASA мен SpaceX-тен озып отыр.
“Союз МС-19” кемесі бар “Союз-2.1а” зымыранын Байқоңыр ғарыш айлағындағы алаңнан ұшыру 5 қазанда Нұр-Сұлтан уақыты бойынша сағат 14:55-ке жоспарланып отыр.
<a href="https://sputnik.kz/society/20211004/18315600/Ivan-Urgant-dombyra.html">Sputnik Қазақстан</a>

Иван Ургант Байқоңырда домбыра тартты

<a href="https://kyzylorda-news.kz/ru/obshestvo/">Kyzylorda-news.kz</a>. Биылғы жылы егін шаруашылығында су тапшылығының орын алуы ескертілген болатын. Осыған сәйкес суды аз қажет ететін дақылдарды орналастыру көзделіп, дақылдарды орналастыруды әзірлеу барысында әртараптандыру бағытында ерекше мән берілді. Осының нәтижесіндеШиелі ауданы Бәйтерек ауылдық округіне қарасты «Бидайкөл» шаруа қожалығы 70 га жерге соя дақылын орналастырды. Бүгінде соя дақылын ору, жинау жұмыстары жүргізілуде.
Соя дақылы – бұршақ тұқымдасына жататын бір жылдық шөптесін өсімдік, бұршақ дәнді, майлы дақыл. Биіктігі 40 – 100 см, жапырағы күрделі, үш құлақты келеді, гүлі ұсақ, ақ не күлгін түсті. Сабағы ірі, тік. Жемісі – бұршақ. Сояның дәнінде: белок, көміртек, май, D, B, E витаминдері бар. Қарашірігі мол қара топырақты жерде жақсы өседі, ал қышқыл, сор, батпақты топырақтарда нашар өседі. Соя ұнынан сүт, сүзбе, айран және кондитер тағамдары дайындалады, тазартылған майын тағамға пайдаланады. Соя белогынан жасанды талшық, пластмасса, желім алынады. Сояның майы сыр, бояу, сабын, маргарин жасауда, тоқыма өнеркәсібінде және медицинада қолданылады. Сондай-ақ соя – құнарлы мал азығы, шөбінің құрамында 36,4% шикі протеин, 6,5% май, 32,4% азотсыз заттар, 5,2% клетчатка, ал 100 кг шөбінде 51% мал азықтық өлшем болады. Соядан пішен, жарма, сүрлем, күнжара, т.б. дайындалады. Картоп, жүгері, жаздық бидай, т.б. дақылдар үшін жақсы алғы дақыл. Оны малға көк балауса түрінде беру, сүрлемге қосу үшін жүгері және қонақ жүгерімен араластырып егеді.
Күтімді аз қажет ететін, климаттық жағдайларға төзімді, топырақ құнарлығын арттыратын, суды аз қажет ететін дақыл болып саналады.

Шиеліде соя дақылын жинау жұмыстары жүргізілуде

<a href="https://kyzylorda-news.kz/ru/obshestvo/">Kyzylorda-news.kz</a>. «Qazaq epos» қоғамдық қоры жариялаған «Тұлпар мініп, ту алған!» жобасына қатысушылар байқаудың аудандық кезеңіне қызу дайындық үстінде. Солардың бірі – Жалағаш ауданы Есет батыр ауылдық №124 орта мектептің 7-сынып оқушысы Ақбаян Әбдімәлік. Зерделі жас кішкентайынан қазақ ақындарының өлеңдерін жатқа айтып, қазақ әдебиеті пәнін сүйіп оқиды.
<blockquote>
 «Едіге батыр» жырын толық жаттап алдым. Жазғы каникул кезінде күн сайы жырдың бір бетін жаттап, қайталап отырдым. Қазір қайталап, мәнерлеп оқуды пысықтап жатырмын, – дейді ол.
</blockquote>
Ақбаянның ұстазы, №124 орта мектептің қазақ тілі мен әдебиеті пәнінің мұғалімі Зухра Тоқшылықова «Тұлпар мініп, ту алған!» жобасының берері мол екенін айтады.
<blockquote>
 Баланың өлең-жырға деген сүйіспеншілігін оятудың пайдасы зор. Жыр жаттау эмоционалды ойлау қабілетін, оны белгілі бір мақаммен оқу сөйлеу мәдениетін жақсартады. Өлең жаттау баланың жадын жаттықтырудың ең тиімді құралы, – дейді Зухра Тоқшылықова.
</blockquote>
Айта кетейік, «Тұлпар мініп, ту алған» республикалық байқауы өткен жылы да ұйымдастырылып, жыр жаттаған жастар миллионер атанған еді. Биыл да дәстүр үзілмеді. Тәуелсіздіктің 30 жылдығына орай өтіп жатқан байқаудың аудандық іріктеу кезеңі Жалағаш ауданында 27 қазан күні өтеді. Ауданға қарасты мектептерден байқауға 6-10 сыныптардан 60-тан астам оқушы қатысуда.

Ақбаян Әбдімәлік: «Едіге батыр» жырын толық жаттап алдым

<a href="https://kyzylorda-news.kz/ru/obshestvo/">Kyzylorda-news.kz</a>. Қазалы ауданының әкімі Мұхтар Оразбаев Әйтеке би кентіндегі редакцияларға арнайы барып, газеттердің тыныс-тіршілігімен танысты. Журналистермен кездесіп, олардың жұмыстарына сәттілік тіледі.
Аудан басшысы алдымен аймақтық «Тұран Қазалы» газетінің баспаханасында болып, басылымды шығару барысын көзбен көрді.
Газеттің бас редакторы Ғазиз Әліш баспаханадағы техникалармен таныстырып, әрбірінің атқаратын қызметтері туралы айтып берді.
Сондай-ақ екінші қабаттағы редакция ұжымымен кездесіп, журналистермен пікір алысты.
«Тұран Қазалы» газеті 10 мыңнан астам тарылыммен облыс аумағына таралатын басылым. Қазіргі таңда редакцияда ардагер журналист, бас редактордың орынбасары Раушанбек Сейтенов бастаған шығармашылық ұжым еңбек етеді.
Аудан әкімі Мұхтар Оразбаев мұнан соң облыстық «Сыр медиа» ЖШС-на қарасты «Қазалы» газетіне жол тартты. Еліміздегі ең жас газеттің бас редакторы Есет Табынбаев аудан басшысына редакция жұмысымен таныстырды. 
Аудан тұрғындарын жедел ақпарат, сүбелі сұхбаттармен, танымдық және сараптамалық материалдармен қуантып отыратын журналистермен жүздескен Мұхтар Әуесұлы алдағы уақытта да халық сүйсініп оқитын мақалалар көп болсын деген тілегін жеткізді.
<blockquote>
 «Аудандық газет редакциялары – шығармашылықтың ордасы, қаламгерлердің құтханасы. Басылымдардың ауданның рухани-мәдени дамуында алатын орны ерекше. Тарихты таңбалап, қағаз бетіне түсіріп, насихаттап келе жатқан журналистер қауымының жұмысын жоғары бағалаймыз», – деді Мұхтар Әуесұлы.
</blockquote>
Редакция аптасына екі рет газет шығарудан бөлек, «Сыр медиа» ЖШС-на қарасты басылымдар мен республикалық «Халық» газетін аудан тұрғындарына тарату қызметін де ұсынады.
Биыл редакция орналасқан ғимаратқа күрделі жөндеу жұмыстары жүргізілді. Қазіргі таңда редакция қызметкерлері жарқыраған жарық бөлмелерде отырып жұмыс істеуде. Журналистерге жағдай жасаған аудан басшылығына аудандық «Қазалы» газетінің бас редакторы Есет Табынбаев алғысын айтып, ризашылығын білдірді.
Аудан әкімі Мұхтар Оразбаев №17 Қазалы ауданының олимпиадалық резервтің мамандандырылған балалар-жасөспірімдер мектебіне де арнайы барып, спорт мектебінің жұмысымен танысты. Боз кілемде республикалық, облыстық жарыстарға дайындалып жатқан жас спортшыларға сәттілік тіледі.
<img src="https://kyzylorda-news.kz/wp-content/uploads/2021/10/244389241_3170828776471381_4254917161271404219_n.jpg" alt="" />
<img src="https://kyzylorda-news.kz/wp-content/uploads/2021/10/244411573_3170828413138084_6201544765036809423_n.jpg" alt="" />
<img src="https://kyzylorda-news.kz/wp-content/uploads/2021/10/244648424_3170828869804705_1197369575057456196_n.jpg" alt="" />

Мұхтар Оразбаев: Аудандық газет редакциялары – шығармашылықтың ордасы, қаламгерлердің құтханасы

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысының әкімі Гүлшара Әбдіқалықова Еуропа қайта құру және даму банкінің (ЕБРР) Қазақстан бойынша директоры Хусейн Озханмен кездесті.
Жиынға облыс әкімінің орынбасары Серік Сүлейменов, қала әкімі Ғанибек Қазантаев және жауапты салалық басқарма басшылары қатысты. Басқосуда екі тараптың іскерлік байланысын одан әрі дамыту мәселесі сөз болды.
Аймақ басшысы алдымен Хусейн Озханды жаңа лауазымға тағайындалуымен құттықтап, Қызылорда облысының Еуропа қайта құру және даму банкімен бірлескен жобаларды жүзеге асыруда бастамашыл өңірлердің қатарында екенін атап өтті.
<blockquote>
 «Бүгінгі таңда сіздермен бірлескен 4 жобаны жүзеге асырдық. Олар жылу, су, электрмен қамту және автобус паркін құру бойынша жобалар. Облыс орталығын жылумен қамтамасыз ету бойынша 6,3 шақырым жылу желісі жүргізілді. Су жүйесін жаңарту бойынша қалада арнайы техника мен жылжымалы зертхана сатып алынды. Электрмен қамтамасыз ету бойынша Қызылорда және Шиелі ауданында электр желілері мен трансформаторлық қосалқы станция жаңартылды. Электр қуатын тіркеудің автоматтандырылған жүйесіне қосылды. Бұл 3 жоба бойынша жауапты коммуналдық мекемелер Банк алдындағы міндеттемелерін уақытылы орындауда. Ал, Қызылорда қаласында автобус паркін құру жобасы бойынша бірлесе атқаратын жұмыстар бар. Жоба аясында 112 автобус сатып алынды, оның ішінде, 92 көлік Еуропа қайта құру және даму банкі арқылы алынды», – деді облыс әкімі.
</blockquote>
Айта кетейік, облыс әкімдігімен жыл сайын бұл салаға субсидия бөлініп, жол ақысы 90 теңгені құрады. Электронды билет жүйесі енгізілді.
Кездесуде өңір басшысы Банк тарапынан берілген несие көлемін қайта қарап, уақытын созуды ұсынды. Бұдан бөлек екі тараптың келсуімен Қызылорда-Жезқазған тас жолын қайта жөндеу жұмысы қолға алынды. 208 шақырымды құрайтын жол пайдалануға берілсе, жолаушылар мен жүк тасымалы көлемін стратегиялық бағыт бойынша ұлғайтуға септігін тигізеді.
Хусейн Озхан өз кезегінде аталған жұмыстардың уақытылы орындалуына мүдделі екенін және екі жақты серіктестіктің одан әрі дамитынына сенім білдірді.
Жиын соңында облыс әкімі өңірге келген делегатқа алғысын білдіріп, облыстың инфрақұрылымын дамытуда бірлескен жобалар қатарын көбейту керектігін тілге тиек етті.
<img src="https://kyzylorda-news.kz/wp-content/uploads/2021/10/244475390_3769810569788651_130755159839324331_n.jpg" alt="" />

Гүлшара Әбдіқалықова: 92 автобус Еуропа қайта құру және даму банкі арқылы алынды

<a href="https://kyzylorda-news.kz/ru/obshestvo/">Kyzylorda-news.kz</a>. Қызылорда облысының әкімі Гүлшара Әбдіқалықова Н.Бекежанов атындағы Қызылорда облыстық қазақ академиялық музыкалық драма театрында ұстаздар күніне арналған «Ұстаз аты – биік, әрі мәңгілік» атты салтанатты жиынға қатысты.
Шараға білім саласының ардагерлері, директорлар, мектеп мұғалімдері мен жас педагогтар шақырылды. 
Төл мерекеде аймақ басшысы еңбегімен елдің құрметіне бөленген педагогтарды құттықтап, бала жанының тәрбиешісі атанған ұстаздардың жұмысын жоғары бағалайтынын тілге тиек етті.
<blockquote>
 «Қиындықпен бетпе-бет келген осындай сындарлы кезең мұғалімдерге де оңай тиген жоқ. Ұстаздарымыздың жаңа технологиялармен байланысты дағдыларды тез игеріп, тосын жағдайға шұғыл бейімделуіне тура келді. Ата-аналар да өз кезегінде ұстаздар қауымына қолдауларын білдірді. Бүгінгі мерейлі сәтті пайдалана отырып, барлық кедергілермен қиындықтарға қарамастан, жаңа ғасырдың зерделі ұрпағын тәрбиелеу жолында талмай еңбек етіп жүрген Ұстаздар қауымына алғысымды білдіремін. Мұғалімге қолдау көрсету – әрдайым біздің басты назарымызда. Биыл білім беру саласына облыс бюджетінің 45 пайызы, яғни 171 миллиард теңгеден аса қаржы бөлінді. Ел Президенті Қасым-Жомарт Тоқаев биылғы Жолдауында педагогика саласы қызметкерлерінің жалақысын жыл сайын көтеруді тапсырды. Президент тапсырмасын орындау мақсатында 2021 жылы облысқа республикалық бюджеттен 32 миллиард теңге қаржы бөлінді. Алдағы жылдарда бұл өз жалғасын табатын болады. Сәйкесінше ұстаздарға қойылатын талап та күшейеді. Сондықтан, білім сапасының жоғары деңгейде болуы аса маңызды», – деді Гүлшара Әбдіқалықова.
</blockquote>
Өңір басшысы ұстаздарға арналған ыстық лебізінен соң, отандық білім саласына елеулі үлес қосқан тәжірибелі ұстаздарға түрлі деңгейдегі марапаттарды табыстады.
Ұстаздар басқосуында Ы.Алтынсарин төсбелгісімен Қармақшы ауданы, Байқоңыр қаласы, №277 мектеп-лицейінің бастауыш сынып мұғалімі Ақзия Байтөреева, Қызылорда қаласындағы «№176 орта мектебінің директоры, қазақ тілі мен әдебиеті пәнінің мұғалімі Қадіркүл Шаймағанбетова, «ORDA SCHOOL» мектебінің директоры Рауаш Алиева, М. Мәметова атындағы Қызылорда педагогикалық жоғары колледжінің математика пәнінің мұғалімі Ғазиза Суханбердина және «№ 10 дарынды балаларға арналған облыстық «Білім-инновация» лицей-интернатының қазақ тілі мен әдебиеті пәнінің мұғалімі Нағиша Есбосын марапатталды.
Мұнан бөлек, 2 сала қызметкеріне «Білім беру ісінің құрметті қызметкері» төсбелгісі, 2 ардагер ұстазға «Еңбек ардагері» төсбелгісі тасбысталды. Ал 11 педагог «Қызылорда облысының білім беру саласын дамытудағы еңбегі үшін жергілікті ерекшелік белгісімен» марапатталды.
Ерекше айту керек, өткен жылдан бастап конкурстық негізде үздік ұстаздарға 300 айлық есептік көрсеткіш мөлшеріндегі қаржылай сыйақы табысталды. Биыл да 10 ұстаз «Үздік педагог-2021» облыстық байқауының жеңімпазы атанып, 875 мың теңге көлеміндгі қаржылай қолдауға ие болды.
Салтанатты рәсім арнайы концерттік бағдарламамен жалғасып, төл мереке иелері үшін қазақ эстрадасының жарық жұлдыздары Ақбота Керімбекова, Төреғали Төрәлі, Кенжебек Жанәбілов әннен шашу шашып, Сыр еліне деген ыстық ықыластарын білдірді. Сондай-ақ, жергілікті өнерпаздар мерекелік тарту жасады.
Айта кетейік, бүгінгі күні өңірде 22 мыңнан аса мұғалім қызмет етсе, оның 94,2 пайызы жоғары білімді педагог.
<img src="https://kyzylorda-news.kz/wp-content/uploads/2021/10/o-1.jpg" alt="" />
<img src="https://kyzylorda-news.kz/wp-content/uploads/2021/10/d.jpg" alt="" />
<img src="https://kyzylorda-news.kz/wp-content/uploads/2021/10/rp.jpg" alt="" />
<img src="https://kyzylorda-news.kz/wp-content/uploads/2021/10/k.jpg" alt="" />
<img src="https://kyzylorda-news.kz/wp-content/uploads/2021/10/i.jpg" alt="" />

Қызылордада 10 мұғалімге 875 мың теңге сыйақы табысталды

<a href="https://kyzylorda-news.kz/ru/obshestvo/">Kyzylorda-news.kz</a>. Қазақстанда 2 257 адам коронавирус инфекциясынан жазылып шықты, деп хабарлайды coronavirus2020.kz.
Нұр-Сұлтан қаласында – 330,
Алматы қаласында – 434,
Шымкент қаласында – 17,
Ақмола облысында – 147,
Ақтөбе облысында – 343,
Алматы облысында – 162,
Атырау облысында – 17,
Шығыс Қазақстан облысында – 151,
Жамбыл облысында – 245,
Батыс Қазақстан облысында – 58,
Қарағанды облысында – 82,
Қостанай облысында – 57,
Қызылорда облысында – 21,
Маңғыстау облысында – 6,
Павлодар облысында – 127,
Солтүстік Қазақстан облысында – 16,
Түркістан облысында – 44.
Елімізде барлығы 832 498 адам COVID-19-дан емделіп, сауығып шықты.

Қызылордада 21 адам коронавирустан жазылды

<a href="https://kyzylorda-news.kz/ru/obshestvo/">Kyzylorda-news.kz</a>. Өткен тәулікте коронавирус инфекциясын жұқтырудың 1 624 жағдайы тіркелді, деп хабарлайды coronavirus2020.kz.
Оның ішінде:
Нұр-Сұлтан қаласында – 287,
Алматы қаласында – 328,
Шымкент қаласында – 54,
Ақмола облысында – 54,
Ақтөбе облысында – 26,
Алматы облысында – 169,
Атырау облысында – 19,
Шығыс Қазақстан облысында – 101,
Жамбыл облысында – 44,
Батыс Қазақстан облысында -21,
Қарағанды облысында – 174,
Қостанай облысында – 104,
Қызылорда облысында – 12,
Маңғыстау облысында – 7,
Павлодар облысында – 115,
Солтүстік Қазақстан облысында – 93,
Түркістан облысында – 16.
Елімізде коронавирус инфекциясын жұқтырғандар саны 894 334 жетті.

Қазақстан және Қызылорда облысының жаңалықтары