<a href="https://kyzylorda-news.kz/">Kyzylorda-news.kz.</a>&nbsp;&nbsp;Ішкі істер министрлігінің ақпараттық сервисінде болған техникалық ақау салдарынан мамандандырылған халыққа қызмет көрсету орталықтарының жұмысы уақытша тоқтатылды, деп хабарлайды “Азаматтарға арналған үкімет” мемлекеттік корпорациясының баспасөз қызметі.
<blockquote>
 “Бүгін, сағат 9:10-нан бастап ішкі істер министрлігінің ақпараттық сервисіндегі техникалық ақауға байланысты мамандандырылған халыққа қызмет көрсету орталықтарының жұмысы уақытша тоқтатылды. Ақпараттық сервис қызметінің қолжетімділігін қамтамасыз ету бойынша қосымша хабарлайтын боламыз. Келтірілген қолайсыздықтар үшін кешірім сұраймыз”, – делінген хабарламада.
</blockquote>
Қазіргі кезде техникалық ақаулықтарды жою бойынша сала мамандары тиісті деңгейде жұмыс істеп жатыр.

Қазақстанда мамандандырылған ХҚКО қызметі уақытша тоқтады

<a href="https://kyzylorda-news.kz/">Kyzylorda-news.kz.</a>&nbsp;Қызылорда қалалық Полиция басқармасына&nbsp;арызданушының айтуынша белгісіз біреулер орталық алаңдағы бір ғимараттың жанында баласын ұрып-соғып, қолындағы «Самсунг S20» үлгісіндегі ұялы телефонын, «Радо» үлгісіндегі қол сағатын және 2000 теңге ақшасын тартып алған. Келтірілген материалдық шығын 310 мың теңге.
<blockquote>
 «Басқарма полицейлерінің жедел-іздестіру шараларының арқасында күдікті азамат ретінде, облыс орталығының 17 жастағы тұрғыны ұсталды. Оған қатысты Қазақстан Республикасының Қылмыстық кодексінің 191-бабы 2-бөлігі 1 тармағымен&nbsp; (Тонау, жәбiрленушiнiң өмiрiне немесе денсаулығына қауiптi емес күш қолданып не осындай күш қолдану қатерін төндіріп) сотқа дейінгі тергеп-тексеру жұмыстары жүргізілуде», – делінген полиция департаментінің хабарламасында.
</blockquote>
Күдіктіге қатысты, ешқайда кетпеу және тиісті мінез-құлық туралы қолхат түрінде бұлтартпау шарасы қолданылды.&nbsp; Оқиғаның мән-жайы анықталуда.

Қызылорда қаласының тұрғынын ұрып-соғып, заттарын тонаған күдікті ұсталды

<a href="https://kyzylorda-news.kz/">Kyzylorda-news.kz.</a>&nbsp;Қызылордалық Мейрамкүл Жүсіпова Нұрсұлтан Назарбаев қоры ұйытқы болған республикалық «Қайырымдылық керуені» конкурсының «Туған жер» номинациясы бойынша жеңіске жетті.
<img src="https://kyzylorda-news.kz/wp-content/uploads/2021/03/163634547_2898004597185368_1071775707489047789_n.jpg" alt="" />
Ал 22 жерлесіміз Дариға Назарбаеваның алғыс хатымен марапатталды. Олардың қатарында облыстық өзбек этномәдени бірлестігі жетекшісінің орынбасары Манзура Абдугафарова, «Қоғамдық келісім” КММ баспасөз хатшысы Әсел Абзал және аға сарапшысы Руслан Орлов бар.
<img src="https://kyzylorda-news.kz/wp-content/uploads/2021/03/163513411_2898004703852024_3391668516831344858_n.jpg" alt="" />
Бұл байқауға өңірден 37 азамат өтінім беріп, 23-і бақ сынап, осындай жетістіктерге қол жеткізді. Бұл ретте, облыстық іскер әйелдер қауымдастығы ұжымының сіңірген еңбегін айрықша атап өткен жөн. Марапат иелері қайырымдылық шараларына шын ниетпен, бар ынта-ықыласымен араласқан, ізгі ниетті, жомарт жүректі, мейірімді жандар.

Қызылордалық Мейрамкүл Жүсіпова республикалық байқауда жеңімпаздар қатарынан көрінді

<a href="https://kyzylorda-news.kz/">Kyzylorda-news.kz.</a> Өткен жылы Қазақстанда алғаш рет ҚР Әкімшілік рәсімдік-процестік Кодексі қабылданған болатын. Жаңа Кодекс биыл 1 шілдеден бастап қолданысқа енгізіледі. Бұл туралы бүгін өңірлік коммуникациялар қызметінде өткен брифингте облыстық сот судьялары Светлана Жуынтаева, Шолпан Мәлікова және қалалық сот судьясы Гүлжан Мырзатаева &nbsp;тарқатты.
<blockquote>
 «Жаңа Кодекс мемлекеттік органдардың ішкі әкімшілік рәсімдерін, әкімшілік рәсімдерді жүзеге асыруға байланысты қатынастарды, сондай-ақ әкімшілік сот ісін жүргізу тәртібін реттейді. Сотқа төрт түрлі талап қоюмен жүгінуге болады. Істі жүргізу заңды мүдделерді қорғау, соттың белсенді рөлі, әкімшілік сот ісін жүргізудің мерзімі, сот актілерінің міндеттілігі қағидаттар негізінде жүзеге асырылады. Азаматтық сот ісін жүргізу қағидаттары осы тарауда баяндалған қағидаттарға қайшы келмесе, әкімшілік сот ісін жүргізуде қолданылады», – деді Светлана Жуынтаева.
</blockquote>
Әкімшілік рәсімдік-процестік кодекстегі тағы бір жаңалық судья құзыретіне қатысты. Соған сәйкес, жаңа заңнаманы негіз еткен судьялар мемлекеттік орган мен жеке азаматтар әкелген дәлел-дәйектерді қанағат тұтып отырмайды. Қажет еткен жағдайда судья істі нақтылауға көмектесетін дәлелдерді, құжаттарды қосымша сұратып, өз бастамасымен оларды жинауға құзырлы.
<blockquote>
 «Сонымен бірге Кодекстегі ерекшелік сот өзі қабылдаған шешімнің орындалуына тікелей бақылау жасайды. Кодекске «Сот бақылауы» деген арнайы тарау енгізілген.&nbsp; Соттың шешімі заңды күшіне енгеннен кейін оны үш жұмыс күні ішінде сот орындау үшін жауапкерге жібереді. Жауапкер әкімшілік іс бойынша соттың шешімін заңды күшіне енген күнінен бастап бір ай мерзімде орындауға міндетті, ол туралы сотқа хабарлауға тиіс. Егер соттың шешімінде белгіленген мерзімде ол ерікті түрде орындалмаған жағдайда, бірінші сатыдағы сот осы Кодекстің&nbsp;<a href="http://adilet.zan.kz/kaz/docs/K2000000350#z625">127-бабында</a>&nbsp;белгіленген мөлшерде ақшалай өндіріп алуды қолданады», – деді спикерлер.
</blockquote>
Оған қоса сотта медиация жүргізу тәртібіне сәйкес, бірінші сатыдағы сотта медиация жүргізу үшін әкімшілік іс медиация туралы келісімді бекітетін басқа судьяға беріледі. Тараптардың өтінішхаты бойынша медиацияны әкімшілік істі іс жүргізуші судья жүргізуі мүмкін.

Жаңа Кодекс 1 шілдеден бастап қолданысқа енеді

<a href="https://kyzylorda-news.kz/">Kyzylorda-news.kz.</a> Қызылордалық спортшылар пара жеңіл атлетикадан Тунисте өткен Әлемдік Гран-при сериясындағы классификациялық халықаралық жарыста табысты өнер көрсетті.
Токио-2021 Паралимпиада ойындарына лицензия алу жарысына әлемнің 62 елінен 500-ден астам спортшы қатысты.
ҚР еңбек сіңірген жаттықтырушысы Юрий Мощеевтің айтуынша, Қазақстан Ұлттық Паралимпиада құрама командасында қызылордалық 5 спортшы бақ сынасты. Бұл жарыста Еламан Жоламан найза лақтыру сайысында үздік нәтиже көрсетсе, диск лақтыруда қола жүлдеге ие болды.
Жарақат салдарынан Ислам Салимов өзінің спорттық қасиеттерін көрсете алмады. Дегенмен, ол секіруде IVорынға ие болды.
Қалған паралимпиадашылар мықты спортшылардың ондығына кірді. Гран-gридің әлемдік сериясының келесі кезеңі 11-19 сәуір аралығында Италияда жалғасады.
<img src="https://kyzylorda-news.kz/wp-content/uploads/2021/03/165341688_5952139368145567_7531219419666678658_n.jpg" alt="" />

Қызылордалық параатлеттер Тунисте табысты өнер көрсетті

<a href="https://kyzylorda-news.kz/">Kyzylorda-news.kz.</a>&nbsp; Бүгін облыс әкімі Гүлшара Әбдіқалықова Президент Жарлығымен берілген «Қазақстанның еңбек сіңірген ұстазы» құрметті наградасын иеленген педагог Жәмилә Әбжанмен кездесті.
Аймақ басшысы педагогика саласында тұңғыш рет берілген құрметті атақты облыс ұстаздарынан алғаш болып иеленген ауыл мектебінің мұғалімі Жәмилә Әбдінағиқызын құттықтап, мемлекет тарапынан ұстаздарға қолдаудың жоғары екенін айтып, айрықша құрметін жеткізді.
<blockquote>
 «Ұлағатты ұрпақ тәрбиелеу – аса жауапты әрі күрделі міндет. Сындарлы сәтте ешбір қиындыққа мойымай, балаларға үздіксіз, сапалы білім беруде педагогтардың еңбегін ерекше айтуға болды. Облысымызда ұстаздық ұлы жолды мұрат еткен, шәкірт тәрбиелеуде елеулі еңбек сіңіріп, педагогика саласына өлшеусіз үлес қосқан ұстаздар жетерлік. 
 Жәмилә Әбдінағиқызы, мемлекеттік наградаңыз құтты болсын! Республикадағы ең үздік мұғалімдер қатарынан көрінуіңізбен. Бұл марапатыңыз білім саласында аянбай еңбек етіп жүрген әріптестеріңізге, жас педагогтарға ерекше сенім мен жігер береді деп сенемін»,-деді облыс әкімі Гүлшара Әбдіқалықова.
</blockquote>
Кездесуде құрмет биігінен көрінген үздік ұстаз Жәмилә Әбжан бұл марапат барша ұстаздардың ортақ жеңісі екенін айтып, арнайы қабылдап, ілтипат танытқан облыс әкіміне алғысын айтты. Сондай-ақ, ауыл балалаларының ағылшын тіліне деген қабілетін ашуда өзіндік әдіс-тәсілдерінің нәтижесі барын атап өтті.
Қабылдау соңында облыс әкімі педагогика саласына елеулі үлес қосып, ең жоғары награда иеленген Жәмилә Әбжанға ноутбук сыйға тартты.
Жәмилә Әбдінағиқызы – Қазалы ауданы, Әйтеке би кентіндегі №249 мектепте педагог-зерттеуші, бірінші деңгейлі ағылшын тілі пәні мұғалімі.
“Білім Беру Ісінің Құрметті қызметкері”, Облыстық білім департаментінің Құрмет грамотасы, облыс әкімінің Алғыс хаты, республикалық Білім Академиясының Құрмет грамотасы, халықаралық АКСЕЛС қоғамының Құрмет грамотасының иегері. 
Шәкірттері халықаралық АКСЕЛС қоғамы ұйымдастырған сайыстың жеңімпазы ретінде АҚШ-та білім алуда. Мұнан бөлек, бірқатар оқушылары «Болашақ» бағдарламасы бойынша Еуропа елдерінде білім игеруді. Оқушылары ҰБТ көрсеткіші бойынша жыл сайын жоғары балл жинап, мемлекеттік грант иегері атануда.
Жәмилә Әбдінағиқызы Америка Құрама Штаттарының елшілігі мен Қазақстан Білім Министрлігі ұйымдастырған ағылшын тілі пәні мұғалімдерінің сайысында жүлдегер атанып, АҚШ елінің ұстаздарымен тәжірибе алмасуға жолдама алған ұстаз.
2020 жылы Америка Құрама Штаттарының елшілігі және Қазақстанның Фулбрайт қауымдастығы ұйымдастырған ауыл мектептеріне арналған семинарда үздік кәсіби шеберлік танытқаны үшін жұмысы өте жоғары бағаланған.
Республикалық педагогикалық басылымдарда еңбектері жарияланған “Үздік Ұстаз”, “Үздік авторлық бағдарлама” номинация иегері.
Еске салайық, Ж.Әбжанға үздік ұстаз ретінде 1000 айлық есептік көрсеткіш мөлшерінде сыйақы тағайындалды.
Айта кетейік, Қызылорда өңірінде өткен жылы алғаш рет «Қызылорда облысының білім беру саласын дамытудағы еңбегі үшін» төсбелгісін тағайындап, 12 ұстазға табыс етілді. Сонымен қатар, аймақтың білім саласына елеулі үлес қосып жүрген 10 үздік ұстазға 300 айлық есептік көрсеткіш мөлшеріндегі біржолғы сыйақы берілді.
<img src="https://kyzylorda-news.kz/wp-content/uploads/2021/03/165584406_3224157547687292_2482808819505003316_o.jpg" alt="" />

Гүлшара Әбдіқалықова «Қазақстанның еңбек сіңірген ұстазы» мемлекеттік нагрдасын иеленген педагогпен кездесті

<a href="https://kyzylorda-news.kz/">Kyzylorda-news.kz.</a>&nbsp;&nbsp; ҚР Премьер-Министрінің орынбасары Ералы Тоғжанов Жер реформасы жөніндегі комиссияның нақты міндетін атады, деп хабарлайды <a href="https://lenta.inform.kz/kz/eraly-togzhanov-zher-reformasy-zhonindegi-komissiyanyn-nakty-mindetin-atady_a3767938">ҚазАқпарат</a>.
<blockquote>
 «Бүгінгі кеңесіміздің ұлтымыз үшін қасиетті күндерімен тұспа-тұс келуде де тегін емес деп ойлаймыз. Халқымыз үшін жер – кәсіптің көзі. Сондықтан да ол ерекше бағалы ұғым. «Жер – ырыстың кіндігі, еңбек – ырыстың қазығы, бірлік – ырыстың тізгіні» деп бабаларымыз тегін айтпаған. Осында айтылған ойдың бұл да бір бүгін нақты дәлелі деп айтуға толықтай негіз бар», – деді комиссияның бірінші отырысын ашқан ҚР Премьер-Министрдің орынбасары.
</blockquote>
Сонымен қатар ол 2016 жылы ауыл шаруашылығы жерлерін қазақстандықтарға жекеменшікке, шетелдіктерге, шетелдік заңды тұлғаларға және шетелдік үлесі бар қазақстандық заңды тұлғаларға жалға беруге мораторий енгізілгенін атап өтті.
<blockquote>
 «25 ақпандта өткен Ұлттық қоғамдық сенім кеңесінің 5-отырысында ҚР Президенті Қасым-Жомарт Тоқаев ауыл шаруашылығы жерлерін шетелдіктерге және шетелдік компанияларға, азаматтығы жоқ адамдарға, халықаралық қатысуы бар ғылыми орталықтарға, сондай-ақ қандастарға беруге толықтай тыйым салу туралы саяси шешімін жариялады. Бұл бойынша заң жобасы 12 наурызда Парламентке енгізілді. Мемлекет басшысының тапсырмасына сәйкес, жер заңнамаларын жетілдіру мақсатында Премьер-Министрдің өкімімен жер реформасы жөніндегі комиссия құрылды», – деді ол.
</blockquote>
Үкімет басшысының айтуынша, комиссия құрамына ауыл шаруашылығы саласындағы қауымдастықтар мен бірлестіктердің өкілдері, агробизнестегі беделді азаматтар, сонымен қатар ҚР Парламенті депутаттары, жергілікті атқарушы органдар өкілдері, ұлттық қоғамдық сенім кеңесінің мүшелері, «Атамекен» ҰКП өкілдері, қоғам қайраткерлері, саясаткерлер, журналистер еніп отыр. Комиссия 80 адамнан тұрады. Оның 60 пайызы азаматтық оғам өкілдері және тәуелсіз сарапшылар.
<blockquote>
 «Комиссияның алдында ауыл шаруашылығы мақсатындағы жер қатынастары саласын дамыту мәселесі бойынша ұсынымды әзірлеу міндеті тұр. Сондықтан ел басшылығы, бүкіл еліміз, әсіресе кәсібі жермен тікелей байланысты ауыл шаруашылығы өнімдерін өндірушілер күтіп отырғанын ескеріп, ақылдасып, нақты шешім қабылдайтындығымызға күмін жоқ», – деді Ералы Тоғжанов.
</blockquote>

Ералы Тоғжанов Жер реформасы жөніндегі комиссияның нақты міндетін атады

<a href="https://kyzylorda-news.kz/">Kyzylorda-news.kz.</a>&nbsp;&nbsp; Жер реформасы жөніндегі комиссияның бірінші отырысы жұмысын бастады, деп хабарлайды <a href="https://lenta.inform.kz/kz/zher-reformasy-zhonindegi-komissiyanyn-i-otyrysy-bastaldy_a3767922">ҚазАқпарат.</a>
Санитарлық нормаларды сақтау қажеттілігіне байланысты комиссия жұмысы Ауыл шаруашылығы министрлігінің ресми сайтында және Facebook парақшасында онлайн көрсетілуде.
Естеріңізге сала кетсек, Ұлттық қоғамдық сенім кеңесінің 5-отырысында ҚР Президенті Қасым-Жомарт Тоқаев бір айдың ішінде жер реформасы жөніндегі&nbsp;комиссияны құрып<a href="https://www.inform.kz/kz/prezident-zher-reformasy-zhonindegi-komissiya-zhumysyn-bastaudy-tapsyrdy_a3757526">,</a>&nbsp;25 наурызда жұмысқа кірісуді, комиссияның құрамына аграрлық сектордың беделді өкілдерін және жер мәселесін жетік білетін сарапшыларды қосуды тапсырған болатын.
Сондай-ақ, Мемлекет басшысы Үкіметке биылғы тамыз айының соңына дейін жер реформасының негізгі мәселелері бойынша ортақ мәмілме арқылы түбегейлі байлам жасауды міндеттеген еді.
Ал 23 наурызда ҚР Премьер-Министрі Асқар Мамин «Жер реформасы бойынша комиссия құру туралы» жылғы «№ 62-ө» өкімге қол қойды. Аталған өкімге сәйкес, комиссия төрағасы болып ҚР Премьер-Министрінің орынбасары Ералы Тоғжанов, ал оның орынбасары болып ҚР Ауыл шаруашылығы министры Сапархан Омаров бекітілді.

Жер реформасы жөніндегі комиссияның І отырысы басталды

<a href="https://kyzylorda-news.kz/">Kyzylorda-news.kz.</a> Елде өмірін сақтандыратын азаматтар көбейіп келеді.
Осы салада жұмыс істейтін компанияларға былтыр 144 миллиард теңге түсті. Бұл 2019 жылмен салыстырғанда 10 процентке көп. Сондай-ақ нарықта сақтандыру компаниясы арқылы табыс табудың жолдары пайда бола бастады.
Нарықта бұл жүйе банк депозитіне балама саналады. Өйткені салған ақшаңыз өмірді сақтандырып қана қоймай, қосымша табыс әкеледі.
Өміріңді сақтандырып, қосымша пайда табуға болады. Сақтандыру компаниялары азаматтарға осындай мүмкіндік ұсынып отыр. Нарықта оны unit-linked деп атайды. Жүйенің қалай жұмыс істейтініне тоқталсақ. Сіз өміріңізді сақтандыруға салған қаржыңызды компания инвестиция ретінде пайдаланады. Яғни нарықта акциялар мен құнды қағаздарға салып, түскен табысты сізбен бөліседі. Оқыс жағдайға тап бола қалсаңыз, сақтандыру төлемін ала аласыз.
Қазақстан қаржыгерлер қауымдастығының директоры Ерлан Бурабаевтың айтуынша, unit-linked сақтандыру мен инвестицияны бірлестірген жүйе. Енді өмірін сақтандыру арқылы табыс тапқысы келген азаматтардың құқығын толық қорғау үшін заңға өзгеріс енгізу мәселесі қарастырылып жатыр.
<blockquote>
 «Өмірді сақтандыруға қажетті қаржыны бөліп төлеуге болады. Сәйкесінше жинақ біртіндеп көбейеді. Ол инвестиция ретінде жұмсалады. Сақтандыруға қаржы салуды 10 мың теңгеден бастауға болады. Ол компанияның ішкі ережелеріне байланысты. Бірақ салым ай сайын төленуі керек. Қаржы салуды қанша уақыт жалғастыратыныңызды да өзіңіз таңдайсыз», – Қазақстан қаржыгерлер қауымдастығының атқарушы директоры Ерлан Бурабаев.
</blockquote>
<a href="https://24.kz/kz/zha-aly-tar/ekonomika-zhnalyktary/item/463234-mirdi-sa-tandyru-ar-yly-alaj-pajda-tabu-a-bolady">24 kz</a>

Өмірді сақтандыру арқылы қалай пайда табуға болады

<a href="https://kyzylorda-news.kz/">Kyzylorda-news.kz.</a>&nbsp;&nbsp;Биыл республикалық «Жас Алаш» газетінің жарыққа шыға бастағанына 100 жыл толып отыр. Басылымның алғашқы саны 1921 жылы 22 наурызда Ташкент қаласында жарық көрген. Алғашқы саны араб қарпінің төте жазу үлгісімен жарық көрген газеттің тұңғыш редакторы Ғани Мұратбаев, жауапты хатшысы ақын Ілияс Жансүгіров болған.
«Жас Алаш» газетінің шығармашылық тобы – басылымның бас редакторы Қайрат Мәтіреков қоғам қайраткері, саясаткер Дос Көшім, бас редактордың орынбасары Сейсен Ұлықбеков , газеттің жауапты хатшысы Нұрымжан Мауытов, Қызылорда облысындағы меншікті тілшілері Миуа Байназарова және Нұрбек Дәуренбеков іс-сапармен өңірімізде болып, аудан активімен кездесті.
Жиынды аудан әкімінің орынбасары Бектемір Жұмағұлов жүргізіп, оқырман қауымның газетті өткірлігі мен батылдығы, жаңашылдығы мен тапқырлығы үшін сүйсіне оқитындығын айтып, кезінде Алаш арыстарының еркін ойларының мінберіне айналған газеттің беттерінде халқымыздың біртуар перзенттерінің айқын қолтаңбалары бар екендігін айтып өтті.
Одан соң сөз кезегін басылымның бас редакторы Қайрат Мәтіреков, қоғам қайраткері, саясаткер Дос Көшім, газеттің жауапты хатшысы Нұрымжан Мауытов алып «Жас Алаш» газетінің шығу тарихынан бастап, түрлі кезеңдерден өткен жолдары мен тарихи сәттеріне тоқталды.
Ұлтымыздың Шерхан Мұртаза, Сейдахмет Бердіқұлов, Мұхтар Шаханов, Фариза Оңғарсынова сынды қабырғалы қаламгерлері осы басылымда қызмет етіп, жазу өнерінің мәйегін бойына сіңірген.
Мұнан кейін Халықаралық «Қазақ тілі қоғамы» бірлестігінің Арал аудандық филиалының төрағасы, Жұмабай Жақып, Халықаралық Жазушылар одағының және Қазақстан Журналистер одағының мүшесі, «Арал әлемі» газетінің редакторы Ерғали Абдулла, ардагер Әнес Әуезов сөз алып бұқаралақ ақпарат құралдарының қоғамдағы маңызы мен «Жас Алаш» газетінің ерекшеліктеріне тоқталып, ой-пікірлері мен ұсыныстарын ортаға салды.
Ауданға келген қонақтар Ә. Нұрпейісовтің Әдебиет үйінде болып, жазушының өміріне қатысты деректермен және шығармашылығымен танысты.
<img src="https://kyzylorda-news.kz/wp-content/uploads/2021/03/164070780_2940681096260257_8468684681001275014_o.jpg" alt="" />

«Жас алаш» газетінің шығармашылық тобы Арал ауданында болды

<a href="https://kyzylorda-news.kz/">Kyzylorda-news.kz.</a>&nbsp; Семей қаласының санитарлық-эпидемиологиялық бақылау департаментінің қызметкерлері қаладағы мейрамханалардың бірінде өткен той-жиынның мән-жайын анықтап жатыр. Видеода танымал қазақстандық әнші Қайрат Нұртас та қонақтар арасында көрінеді, деп хабарлайды жергілікті&nbsp;<a href="https://sputnik.kz/society/20210324/16604048/Qayrat-Nurtas-zhauapkershilik.html">Sputnik</a>.&nbsp;
<blockquote>
 “Танымал әншіге қатысты видео 23 наурыздан кейін әртүрлі желілерде жариялана бастады. Ал мемлекеттік бас санитар дәрігердің қаулысына сәйкес республика аумағында бұқаралық іс-шаралар өткізуге тыйым салынған. Қазіргі кезде қазақстандық әншінің қатысуымен өткен жиынға баланысты мейрамхана иесі мен лауазымды тұлғаға қатысты санитарлық-эпидемиологиялық талаптарды бұзғаны туралы полициядан алынған материалдар негізінде тиісті шара қабылдау мәселесі қарастырылып жатыр”, – делінген Семей қаласының санитарлық-эпидемиологиялық бақылау департаментінің хабарламасында.
</blockquote>
Ал Instagram желісінің қолданушылары жарияланған видеодағы той иесі Семей қалалық мамандандырылған халыққа қызмет көрсету орталығының басшысы екені айтылады.
<blockquote>
 “Бүгін “Жібек жолы” мейрамханасында Семей қаласының мамандандырылған ХҚКО-ның басшысы Ержан Тілеужанов той өткізді. Тойға Қайрат Нұртас келді. Ол Қайраттың жанында көк костюммен отырған адам”, – деп жазылған видео астына жазылған пікірлердің бірінде.
</blockquote>
Аталған фактіге орай, қалалық санитарлық-эпидемиологиялық бақылау департаментінің қызметкерлері сотқа дейінгі тергеп, тексеру жұмыстарын жүргізуде. Соның аясында карантиндік шектеулерді бұзушылар Әкімшілік құқықбұзушылық туралы кодекстің 425-бабының 1-бөлігі бойынша жазаға тартылады. Оларға ірі көлемде айыппұл салынуы мүмкін.
Сондай-ақ, Шығыс Қазақстан облыстық полиция департаментінің хабарлауынша, карантиндік шектеу кезінде өткен мерекелік іс-шараның барлық қатысушыларымен бірге Қайрат Нұртасқа қатысты да әкімшілік материалдар жиналған.

Қайрат Нұртас жауапкершілікке тартылуы мүмкін

<a href="https://kyzylorda-news.kz/">Kyzylorda-news.kz.</a>&nbsp; Әлемнің 20 мемлекетіне шұғыл түрде азық-түлік түрінде көмек қажет. Олай болмаған жағдайда аталмыш елдерді аштық жайлауы мүмкін.
БҰҰ-ның азық-түлік мәселесімен айналысатын екі ұйымы осындай байлам жасап отыр.
Йемен, Оңтүстік Судан, Нигерияның солтүстігі аштықтан қырылуға шақ қалған, деп ескертті Бүкіләлемдік азық-түлік бағдарламасы мен БҰҰ-ның Азық-түлік және ауыл шаруашылығы ұйымы тарапынан дайындалған баяндама авторлары. Бұл туралы «<a href="https://lenta.inform.kz/kz/alemnin-20-memleketine-ashtyk-kaupi-tonip-tur-buu_a3767843">ҚазАқпарат</a>» ХАА&nbsp; хабарлайды.
Аштық жайлау қаупі төніп тұрған мемлекеттердің басым бөлігі Африкада орналасқанымен бұл мәселе өзге өңірлер үшін де өзекті болып отыр.
<blockquote>
 «Азияда Ауғанстан, Таяу Шығыста Сирия мен Ливан, Латын Америкасында Гаити сияқты мемлекеттер халықаралық қоғамдастықтың көмегінсіз мәселені шеше алмайды», дейді сарапшылар.
</blockquote>
БҰҰ-ның Азық-түлік және ауыл шаруашылығы ұйымының іріктеуі бойынша, 34 млн адам аштан өлуі мүмкін. Бұл дегеніңіз азық-түлік жетіспеушілігінің 4 деңгейі. «Осыншама ауқымда адамдардың зардап шегуі әрине, алаңдатады»,-дейді БҰҰ-ның Азық-түлік және ауыл шаруашылығы ұйымының Бас директоры Цюй Дунъюй.
<blockquote>
 «Біздің парызымыз – адамдардың өмірін сақтап қалу үшін тиісті шаралар қолдану, тұрғындардың кіріс көздерін сақтап, жағдайдың одан әрі шиеленісуіне жол бермеу».
</blockquote>
Бас директор сөзінде әлемнің көптеген елдерінде жақында егін егу жұмыстары басталатынын, кейбір елдерде тіпті басталып та қойғандығын еске салды. Мемлекеттердің азық-түлік өнімдерінің көлемін арттыруға көмектесу үшін жағдайды пайдалану керек.
Баяндамада көтерілген мәселелерге пікірін білдірген Бүкіләлемдік азық-түлік бағдарламасының басшысы Дэвид Бисли: «Біз үлкен қайғылы жағдайдың куәсі болғалы тұрмыз. Қақтығыстар, климаттық катаклизм және COVID-19 пандемиясы, миллиондаған отбасыларға төніп тұрған аштық мәселесін ушықтыра түседі»,-деді.
Оның сөзінше, аштықтың алдын алу үшін шұғыл түрде әскери іс-қимылдарды тоқтатып, тұрғындардың ең әлсіз топтарына гуманитарлық жолжетімділікті қамтамасыз етіп, биылғы жылға аштықпен күрес үшін деп деп сұралған 5,5 млрд долларды жинау керек.
Қазіргі таңда БҰҰ-ның Азық-түлік және ауыл шаруашылығы ұйымы өкілдерінің хабарлауынша, жағдай қиындап барады.
Ауғанстан, Орталықафрикалық мемлекет, Эфиопоия, Нигерияның солтүстігі, Сомали мен оңтүстік Суданда қақтығыстар ушыға түссе, пандемия мен онымен байланысты шектеулер әлем елдерінің тұрғындарының өмірін одан сайын күрделендіре түсуде.
Йемен, Ливан мен Таяу Шығыстағы өзде де бірқатар мемлекеттерде ұлтық валюта құнсызданып, инфляция өсіп барады.
Бұған қоса алдағы айларда Ла-Нинья климаттық феноменін қоса алғанда, жаңа табиғи апаттар күтіп тұр. Яғни Ауғанстан, Мадагаскар мен Африка мүйісінде азық-түлікпен байланысты жағдай қиындай түсуі мүмкін.
Африка континентінің шығыс бөлігін саранша басу қаупі төніп тұр. Зиянды жәндіктер Ангола, Ботсвана, Намибия, Замбия және Зимбабве сияқты елдердің астығын құртып жіберуі мүмкін.
Әлемнің көптеген аудандарына көмек жеткізу қиын. БҰҰ мекемелері халықаралық қоғамдастыққа гуманитарлық қолжетімділік мәселесін шұғыл түрде шешу қажеттігін еске салады.
Баяндамада қиындық туындап отырған әрбір аумақ бойынша нақты кеңестер берілген. Баяндама авторлары аштық қаупі ерекше аудандарды атап көрсеткен.
Көрсетілуі тиіс көмектер қатарында – дәнді дақылдарды жеткізу, жануарларды вакцинация жасау, қаржылай көмек, су сақтайтын құрылғылардың жөндеу сияқты өзге де көптеген шаралар бар.

Қазақстан және Қызылорда облысының жаңалықтары