<a href="https://kyzylorda-news.kz/">Kyzylorda-news.kz.</a> Жыл басталғалы да 3 ай өтті. Сатып алу саласындағы өзгерістерге сай «4 пайыз» ұғымы пайда болды.
<blockquote>
 «Соңғы кезде кәсіпкерлерден түсетін сауалдардың басым бөлігі осы 4 пайызға қатысты болып отыр. Түсінбей жатқан азаматтар да бар», – деген Қызылорда облысы кәсіпкерлер палатасының сатып алу саласындағы сарапшысы Әйгерім Рахымжанова жаңа өзгеріспен таныстырып шықты.
</blockquote>
Мемлекеттік сатып алулардың қағидасында егер мемлекеттік сатып алуға, яғни лоттың бөлінген сомасы жылдық көлемі тауарларда 4000 АЕК (айлық есептік көрсеткіш), жұмыстарда 20&nbsp;000 АЕК, көрсетілетін қызметтерде 8 000 АЕК-тен асатын болса конкурс (аукцион) тәсілімен қатысатын әлеуетті өнім берушілерге қаржылық тұрақтылығы түріндегі біліктілік талабы қойылады.
<blockquote>
 «Кәсіпкердің, яғни әлеуетті өнім берушінің қаржылық жағдайын мемлекеттік кірістер органдарының кірістер, төленген салықтар, негізгі құралдар, еңбек ақы төлеу қоры секілді мәліметтері негізінде веб-портал автоматты түрде айқындайды», – дейді Әйгерім Рахымжанова.
</blockquote>
Бүгінгі материалда біз жоғарыда айтылған ақпараттардың ішіндегі ең негізгі атап өтілуі керек талап – &nbsp;биылғы жылы енгізілген өзгеріс, төленген салықтардың көрсеткіші&nbsp; 4 пайыздан кем болмауына қатысты айтпақпыз.
Төленген салықтардың көрсеткіші&nbsp; дегеніміз – мемлекеттік кірістер органдарының ақпараттық жүйелерінің деректері бойынша, өткен жылдың алдындағы 3 жылдың, яғни мысал үшін алатын болсақ өткен 2020 жылдың алдындағы үш жыл – 2017-2019 жылдар ішінде кәсіпкердің кірістерінің сомасына төленген салықтар сомасының проценттік қатынасы.
Аса мән беретін тұс та осы.Конкурста құжаттамалық талаптардан өткізілген әлеуетті өнім берушінің жеңімпаз болуына бірден бір әсер ететін өлшемшарттардың бірі – төленген салықтар көрсеткіші. Осылайша, қай әлеуетті өнім берушінің көрсеткіші жоғары болса, сол кәсіпкер жеңімпаз болуы әбден мүмкін.
Және бір айта кететін жайт, мемлекеттік сатып алу қағидасының талабына сәйкес, егер әлеуетті өнім берушінің төленген салық көрсеткіші 4%-дан жоғары болған жағдайда, веб-портал автоматты түрде әрбір 0,1 асатын пайыз үшін 0,1% мөлшерінде, бірақ 3%-дан аспайтын шартты жеңілдік береді.
Айта кету керек, былтырғы жылы төленген салықтардың көрсеткіші&nbsp; 3%-дан кем болмауы керек болатын.
<blockquote>
 «Сол себепті әлеуетті өнім берушілерден веб-порталдағы мемлекеттік кірістер органдарының ақпараттық жүйелерінің деректеріне мән берулерін сұраймыз. Егер де әлеуетті өнім берушілер қосымша салық есептілігін табыс еткен және салықтарды төлеген жағдайда олардың қаржылық орнықтылығы көрсеткіштері және төленген салықтары өзгереді», – деген Палата сарапшысы &nbsp;кәсіпкерлерді мемлекеттік кірістер органдарының мәліметтерін веб-порталда жаңарту Мемлекеттік кірістер органдары енгізген өзгерістердің дұрыстығын растағаннан кейін жүзеге асырылатындығына назар аударуға шақырды.
</blockquote>

Мемлекеттік сатып алуда мән берілуі керек 4 % дегеніміз не?

<a href="https://kyzylorda-news.kz/">Kyzylorda-news.kz.</a> Қызылорда облысы бойынша ішкі мемлекеттік аудит департаментіне конкурс рәсімдеріне байланысты 1356 шағым келіп түсті.
Қызылорда облысы бойынша ішкі мемлекеттік аудит департаменті өз құзыреті шегінде осы заңда және камералдық бақылау жүргізу қағидаларында белгіленген тәртіппен мемлекеттік аудит объектілерінің қызметі бойынша әртүрлі ақпарат көздерінен алынған мәліметтерді салыстыру арқылы мемлекеттік аудит объектісіне бармай-ақ мемлекеттік сатып алу рәсімдеріне күнделікті камералдық бақылау жүргізеді.
Өткен жылғы камералдық бақылау қорытындысы бойынша департаментпен 433 640,9 млн теңгеге 6753 лот қамтылды. Оның ішінде 52 504,8 млн теңгеге 2 102 хабарлама бойынша мемлекеттік сатып алуды өткізу нормаларын бұзу жағдайы анықталды. Өткен жылдың 31 желтоқсаны бойынша есепті кезеңге аудит объектілері 2102 хабарламаның 2097-ін орындады. Оның ішінде 5 хабарлама бойынша орындау мерзімі аяқталған жоқ. Аудит объектілерінің жіберілген хабарламаны орындамауы үшін департамент осы заңның 32-бабында және Қазақстан Республикасының басқа да заңнамалық актілерінде белгіленген тәртіппен мемлекеттік аудит объектілерінің бюджетті атқару жөніндегі орталық уәкілетті органда ашылған кодтары мен шоттары бойынша шығыс операцияларын тоқтата тұру бойынша камералдық бақылауға ден қою шараларын қабылдады. Қазақстан Республикасының Әкімшілік құқық бұзушылық туралы заңнамасында көзделген 462-баптың 3-бөлігі бойынша 84 507 теңге өндіріп алынды.
Сонымен қатар конкурс рәсімдеріне шағымдану шеңберінде департаментке 1356 шағым келіп түсті. Оның ішінде 588 шағым толық және ішінара қанағаттандырылды. Сондай-ақ 768 шағымды қанағаттандырудан бас тартылды.

Қызылорда: Конкурс рәсімдеріне байланысты 1356 шағым түсті

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласында әлеуметтік маңызы бар азық-түлік тауарларының бағаларын тұрақтандыру бойынша баспасөз туры ұйымдастырылды.
Қазіргі таңда тұрақтандыру қорында 1433,9 тонна өнім көлемі, оның ішінде бірінші сортты бидай ұны – 671,4 тонна, күріш – 226 тонна, қант – 31,4 тонна, макарон – 85 тонна, сәбіз – 65,3 тонна, жуа – 250,7 тонна, қырыққабат-10,5 тонна, қарақұмық жармасы – 22 тонна, тауық еті – 45,7 тонна, сүт – 26 тонна бар. Тұрақтандыру қорында қоры азайған немесе таусылған өнімдер әріптестер арқылы әлеуметтік дүкендерге жеткізіліп, қамтамасыз етілуде.
Қорқыт ата көшеcінде орналасқан әлеуметтік дүкендер, тұрақтандыру қорының мамандандырылған ұйымы «Байқоңыр» ӘКК» АҚ-ның әріптестері мен ауыл шаруашылығы мамандары «Аль-Асад», «Ажар City» сауда орындарында ашылған әлеуметтік бұрыштар қамтылды.
Әлеуметтік дүкен мен сауда орындарында ашылған әлеуметтік бұрыштарда картоптың келісі – 135 теңгеден, бөлке нан – 55 теңге, қырыққабат – 67 теңге, басты пияз – 60 тенге, сәбіз – 70 теңге, бірінші сортты бидай ұны – 127 теңге, макарон – 200 теңге, күріш – 210 теңге, қант – 233 теңге, өсімдік май – 552 теңге, тұз – 40 теңге, сиыр еті – 1650 теңге, тауық еті – 600 теңге, СІ тауық жұмыртқасы – 40 тенге, сары май – 2377 теңге, қарақұмық жармасы – 356 теңге, сүт 2,5% – 280 теңге, айран 2,5% – 225 теңгеден сатылуда.

Қызылордада әлеуметтік маңызы бар азық-түлік бағалары қанша?

<a href="https://kyzylorda-news.kz/">Kyzylorda-news.kz.</a> Қазақстанда жастарды қолдауға арналған мемлекеттік бағдарлама жетерлік. Тіпті бұл мақсатта жыл сайын ел бюджетінен миллиардтар жұмсалады. Бірақ, әлі де үй-күйсіз, жұмыссыз жүрген жастар көп. Депуттар осы мәселені жан-жақты қарастыруға тырысты, деп хабарлайды&nbsp;<a href="https://stan.kz/">Stan.kz</a>.
Жауапты министрлік өкілдерінің&nbsp;“жастардың 96 пайызы тұрақты жұмыс істейді” дегеніне біраз депутат сенбеді. Нұротандық мәжілісмендердің айтуынша 100 жастың тек үшеуі ғана мемлекеттік бағдарламаның игілігін көрген.
Ал қалғандары жұмыс іздеп, шекара асып жатыр. Соның бірі –&nbsp;Данияр Өтегенов. Ол үш жылдан бері Оңтүстік Кореяның Танджин қаласында автокөліктің бөлшектерін тасып, нәпақа тауып жүр. Дәнекерлеуші мамандығын игерген ол бұған дейін Қазақстанда тұрақты жұмыс таба алмай, такси айдап жан бағыпты.
“Жататын жерді өзі зауыт береді. Үш мезгіл тамағы бар. Осы жаққа келіп жағдайың, бәрін туырлап алдық қой. Менімен келген балалар біразы үй алып, жағдайын жасап алғандар бар”, – деді&nbsp;Танджин қаласының тұрғыны&nbsp;Данияр Өтегенов.
Ал, қағаздағы есебін оқып берген үкімет мүшелерінің мәліметінше – біздегі 2 миллионнан астам жастардың басым көпшілігі тұрақты жұмыспен қамтылған.
“Жаңа бизнес идеяларды дамытуға 200 АЕК шамамен 600 мың теңгеге дейін өтеусіз гранттар беріліп жатыр. Аталған гранттарды 11 мың жас адам пайдаланып, өз кәсібін бастап кетті”, – деді&nbsp;Еңбек және халықты әлеуметтік қорғау вице-министрі Ержан Біржанов.
Мәжілісмен Елнұр Бейсенбаев 600 мың теңге гранттың пайдасы аз, оның үстіне Еңбек бағдарламасынан нәпақа тауып қарық болып отырғандар шамалы екенін айтады. Бағдарлама бойынша алты ай тәжірибеден өтетін жастардың тұрақты жұмысқа орналасуына ешкім бас қатырмайтынына алаңдаулы.
“Белігілі бір ұйымдардың осы жобаға қатысушы практиканттарға өтінім беретіні белгілі. Бірақ оларды жұмысқа орналастыруды қамтамасыз етпейді. Яғни бұл ұйымдар жоба қатысушыларын тегін жұмыс күші ретінде пайдаланады. Бізде жоғарғы оқу орнын бітірген жастардың 41 пайызы өз мамандығы бойынша жұмыс істемейді”, – деді мәжіліс&nbsp;депутаты&nbsp;Елнұр Бейсенбаев.
Депутат Айбек Паяев жастарға ұлттық, рухани тәрбие төңірегінде мүлдем жұмыс істемей отырмыз, әлеуметтік желілер мен отандық телеарналарда жастарға қатысты хабарлар мүлдем аз деп, дабыл қақты.
Ал&nbsp;депутат Ерлан Саиров әр өңірде ел бюджетінен ашылған жастар ресурстық орталықтарының ешкімге қажеті жоқ деп санайды. Дипломмен ауылға бағдарламасы болса да қазір шалғайдағы ауылда жастар қалмады, сондықтан қалаға келіп жұмыссыз тентіреп жүргендердің мәселесіне нүкте қоятын кез келді деді.
Президент тапсырмасын бұлжытпай орындайтындарын айтқан депутаттар: “барлық кем-кетікті түзеп, нақты ұсыныстарды Парламентте көтереміз” деп тарқасты.

«Түк пайдасы жоқ»: Мәжілісмендер жастарды қолдауға арналған бағдарламаларға шүйлікті

<a href="https://kyzylorda-news.kz/">Kyzylorda-news.kz.</a>&nbsp;&nbsp;Наурыз айының 15-19 күндері аралығында қала көлемінде заңсыз көші-қон орындарын анықтау және жолын кесу, қоғамдық тәртіпті сақтау және бақылау жұмыстарын жүзеге асыру кезінде Қызылорда қалалық Полиция басқармасының &nbsp;көші-қон қызметі бөлімінің қызметкерлерімен 50 заңбұзушылық анықталды.&nbsp;
Қазақстан Республикасының Әкімшілік құқық бұзушылық туралы Кодексінің 517 – бабының 5 – бөлігімен (Шетелдіктің немесе азаматтығы жоқ адамның жүзеге асыратын қызметті визада көрсетілген мақсаттарға сәйкес болмауынан көрінген, Қазақстан Республикасның халықтың көші-қоны саласындағы заңнамасын бұзуы немесе халықтың көші-қоны мәселелері жөніндегі уакілетті орган берген өз бетінше жұмысқа орналасу үшін біліктілік сәйкестігі&nbsp; туралы анықтаманы&nbsp; немесе жұмысқа орналасуға рұқсатты алу еңбек қызметін жүзеге асыруға қажетті шарт болып табылатын жағдайда, мұндай анықтаманы не рұқсаттарды алмастан) Өзбекстан Республикасының 40 азаматына Қызылорда қалалық мамандандырылған әкімшілік сотымен шара көрілді.&nbsp;
Сонымен бірге, Қазақстан Республикасының Әкімшілік құқық бұзушылық туралы кодексінің 518 – бабымен (Шетелдіктерді және азаматтығы жоқ адамадарды қабылдайтын жеке немесе заңды тұлғалардың ҚР-ның халықтың көші-қон саласындағы заңнамасын бұзуы) Қазақстан Республикасының 7&nbsp; азаматына ескерту жасалды &nbsp;және 519 – бабы (Шетелдік жұмыс күшін және еңбекші көшіп келушілерді ҚР заңнамасын бұза отырып тарту, шетелдіктің немесе азаматтығы жоқ адамның ҚР еңбек қызметін заңсыз жүзеге асыруы) &nbsp;Қазақстан Республикасының 3 азаматына айыппұл салынды.
Қызылорда облысы полиция департаменті аталған бағыттағы жұмыстарды жандандыру мақсатында&nbsp; көші-қон қызметі бөлімінің қызметкерлеріне нақты тапсырмалар берілді.
<img src="https://kyzylorda-news.kz/wp-content/uploads/2021/03/whatsapp-image-2021-03-30-at-18.14.17.jpeg" alt="" />

Қызылордада көші-қон заңына қарсы 50 дерек тіркелді

<a href="https://kyzylorda-news.kz/">Kyzylorda-news.kz.</a> Қазақстанда коронавирусқа қарсы ақылы вакцинацияға рұқсат етілмеген. Бұл туралы денсаулық сақтау министрі Алексей Цой мәлімдеді, деп хабарлайды&nbsp;<a href="https://sputnik.kz/">Sputnik Қазақстан</a>.
<blockquote>
 “Қазіргі таңда Қазақстанға тек мемлекеттік айналымда қолданылатын вакциналар өндіріліп, жеткізілді. МӘМС жүйесіне қатысатын жекеменшік клиникалар қормен келісімшартқа отырып, адамдарға вакцинаны тегін салады…Жалпы Қазақстанда қазіргі таңда вакцина сатуға ресми рұқсат жоқ”, – деді Цой баспасөз мәслихатында.
</blockquote>
Алайда, айтуынша, министрлік коммерциялық нарықта вакцинаға қолжетімділікті кеңейтуді және екпе түрлерін ұлғайтуды көздеп отыр.
Бұған дейін министр Цой сәуір айында Қазақстанға ресейлік вакцинаның 2,5 миллион дозасы жеткізілетінін мәлімдеді.
1 ақпаннан бері елде 131 170 адам “Спутник V” вакцинасының бірінші компонентін салғызды. Ал екінші компонентін 32 482 адам қабылдады.

Министр Цой: Қазақстанда ақылы вакцинация жоқ

<a href="https://kyzylorda-news.kz/">Kyzylorda-news.kz.</a>&nbsp;Қазақстандағы коронавирусқа қатысты 30 наурыз 23:59-дағы эпидемиологиялық жағдай бойынша ПТР арқылы 1 663 адамда коронавирус індеті расталды, деп хабарлайды &nbsp;<a href="https://www.coronavirus2020.kz/kz">coronavirus2020.kz</a>.
Аймақтар бойынша:
Нұр-Сұлтан қаласы – 356,
Алматы қаласы – 526,
Шымкент қаласы – 47,
Ақмола облысы – 38,
Ақтөбе облысы – 82,
Алматы облысы – 191,
Атырау облысы – 75,
Шығыс Қазақстан облысы – 24,
Жамбыл облысы – 24,
Батыс Қазақстан облысы – 96,
Қарағанды облысы – 93,
Қостанай облысы – 37,
Қызылорда облысы – 13,
Маңғыстау облысы – 13,
Солтүстік Қазақстан облысы – 21,
Түркістан облысы – 7.
Жалпы ел бойынша ауырғандар саны 244 981.

Коронавирус: Қызылордада бір тәулікте 13 адам жұқтырды

<a href="https://kyzylorda-news.kz/">Kyzylorda-news.kz.</a> <a href="https://www.kazhydromet.kz/weather/prognoz-vazhneyshih-meteorologicheskih-yavleniy">«Қазгидромет»</a>&nbsp;РМК-сы наурыздың 31-не арналған ауа райы болжамын жариялады.
Наурздың 31-і күні атмосфералық фронталды бөліктердің өтуіне байланысты республиканың басым бөлігінде ауа райы құбылмалы болады. Кей жерлерде жауын-шашын болып, оңтүстік-шығыста нөсер жауын жауады.
Республиканың батыс және солтүстік аймақтары жоғары атмосфералық қысым аумағында болғандықтан, күн жауын-шашынсыз болады. Кей жерлерде тұман түсіп, көктайғақ болып, жел күшейеді, күндіз оңтүстік-шығыста найзағай ойнайды.
Қызылорда облысының кей жерлерінде тұман түсіп, күндіз желдің жылдамдығы секундына 15-20 метрге жетеді.

Сәрсенбіде ауа райы қандай болады?

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықованың қатысуымен 2021 жылдың 31 наурыз күні сағат 09-00-ден 16-00 аралығында «Қашықтықтан оқыту және білім берудің қолжетімділігі» тақырыбында интернет-конференция өтеді.
<img src="https://kyzylorda-news.kz/wp-content/uploads/2021/03/356a2f09-afda-465e-8ca0-3f99ca072722-1.jpg" alt="" />

Гүлшара Әбдіқалықованың қатысуымен интернет-конференция өтеді

<a href="https://kyzylorda-news.kz/">Kyzylorda-news.kz.</a>&nbsp;Бүгінде Жалағаш, Сырдария, Шиелі аудандары жаңа полигондар мен сұрыптау кешендерінің жобасын әзірлеуде.
Ал Жаңақорған ауданы Ызғар елді мекенінде 20 гектар жер бөлініп, техникалық экономикалық негіздемесін әзірлеуге аудандық бюджеттен қаржы бөлген. Бұл туралы Өңірлік коммуникациялар қызметінің ақпарат алаңында өткен брифингте облыстық табиғи ресурстар мен табиғат пайдалануды реттеу басқармасы басшысының міндетін атқарушы Бауыржан Оспанов мәлімдеді.
<blockquote>
 «2030 жылға дейін қалдықтарды өңдеу үлесін – 40 пайызға, экологиялық және санитарлық талапқа сай келетін полигондар үлесін – 95 пайызға, халықты қоқыс шығару қызметімен қамтамасыз ету үлесін – 100 пайызға жеткізуіміз қажет. Бұған қоса, «Су-өмір нәрі», «Таза су айдындары» акцияларында облыстағы су айдындары, су арналары мен каналдар тұрмыстық қалдықтардан, қоқыстардан тазалау жұмыстары жүргізілді. «Таза аула-таза табиғат» және «Бірге-Таза Қазақстан» жалпы республикалық сенбіліктерінде өңір тұрғындары, еріктілер, экобелсенділер санитарлық тазалық, көркейту және абаттандыру жұмыстарын ұйымдастырды. Нәтижесінде полигондарға 125 тонна қалдықтар шығарылса, 88 шақырымға жуық арықтар мен аяқ су жолдары тазаланды», – деді Бауыржан Әліпбайұлы.
</blockquote>
Сонымен қатар, өткен жылы 21 мың тонна қатты тұрмыстық қалдық өңделді.

Қызылордада 21 мың тонна қатты тұрмыстық қалдық өңделді

<a href="https://kyzylorda-news.kz/">Kyzylorda-news.kz.</a>&nbsp;«Бастамаларды қолдау» қоғамдық бірлестігінің ұйымдастыруымен Арал ауданында «Ұлт саулығы – басты назарда» тақырыбында шара өтті.
Шара барысында аудан әкімінің орынбасары Ербол Талекенов өңірдегі денсаулық сақтау саласында атқарылып жатқан жұмыстармен таныстырып өтсе, «Бастамаларды қолдау» қоғамдық бірлестігінің атқарушы директоры Жанат Сапаржанова «Ұлт саулығы – басты назарда» жобасы аясында жүргізілген зерттеулер жөнінде хабарлама жасады.
Мұнан өзге, шараға қатысқан аудандағы қоғам белсенділері мен тұрғындар денсаулық сақтау саласына қатысты проблемалармен бөлісті.
Атап айтқанда, тұрғындарды аудандық перзентхананың жүктілігі қиын жағдайдағы әйелдерді қабылдай алатын деңгейге өткенімен іс жүзінде жабдықталуында, дәрігерлердің біліктілігін арттыруда мәселе бар екендігі айтылда.
Сонымен бірге, аралдықтарды ауылдық елді-мекендерде мамандардың тапшылығы мен КТ, МРТ сынды құралдардың ауданда жоқтығы да мазалауда. Себебі аталмыш аппараттың жоқтығынан тұрғындар қажеттілік туындағанда өзге ауданға немесе облыс орталығына барып түсуге мәжбүр болады екен. Бұл қосымша қаржыны, сондай-ақ уақытты талап ететіні айтпаса да түсінікті. 
Келесі мәселе дәрі-дәрмекке қатысты болып отыр. СК «Фармация» мекемесінің бекіткен шектік бағаның жоғары болуына байланысты тұрғындардың айтуы бойынша ауданда дәрі-дәрмектің бағамы да ұшып тұр. Салыстырма үшін, Ресейге қарайтын көрші «Байқоңырдағы» баға анағұрлым төмен көрінеді.
Мұнымен қоса, кездесуде портал арқылы ауруханаға жатудың мәселесі, міндетті әлеуметтік медициналық сақтандыру аясында тегін ем қабылдау жолдары, мүмкіндігі шектеулі жандар үшін оңалту орталығының аудандажоқтығы салдарынан туындайтын проблемалар, т.б. талқыланды.
Шара қорытындысымен ұйымдастырушылар аталмыш мәселелерді тиісті орындарға жолдап, шешу жолдарын жергілікті атқарушы органмен бірге қарастыратындығын жеткізді.
Айта кету керек, «Бастаманы қолдау» қоғамдық бірлестігі Қызылорда облысында «Ұлт денсаулығы – басты назарда» жобасын жүзеге асыруда.
Жобаны АҚШ-тың Халықаралық даму агенттігі (USAID) қаржыландыратын Орталық Азиядағы азаматтық қоғамды қолдау бағдарламасы аясында Еуразия қоры қолдауда.

«Ұлт саулығы – басты назарда»: Арал ауданы тұрғындарының мәселесі талқыланды

<a href="https://kyzylorda-news.kz/">Kyzylorda-news.kz.</a> Бүгін Қызылорда қалалық қоғамдық кеңестің кезекті отырысы өтті.
Күн тәртібіндегі басты мәселе – қаладағы жолаушылар тасымалы болды.
Кеңес барысында қала көлемінде шалғай орналасқан елді мекендердегі тұрғындарға қоғамдық көлік тасымалымен тұрақты сапалы қызмет көрсету мақсатында облыстық бюджеттен субсидиялауға ұсыныс білдіру мәселесі талқыланды.
Бұдан бөлек, қоғамдық көліктердің жол сызбасын оңтайландыру үшін бүгінде қала әкімдігімен мемлекеттік сатып алу конкурсы жарияланған. Конкурс негізінде Алматы қаласының Көлік және коммуникациялар ғылыми-зерттеу институты қазіргі таңда зерделеу жұмыстарын жүргізуде. Жаңа жол сызба құруда тұрғындардың сұранысын қанағаттандыру басты назарға алынған.
Сонымен қатар, оқушылардың қауіпсіз қозғалысы үшін аялдамалар бойында жол сызбаларынан бөлек сәйкесінше жол белгілерін орнатуға ұсыныс білдірілді.
Кеңес мүшелерінің ұсыныстары негізінде қала әкімінің орынбасары Е.Рахматуллаев заң аясында тиісті зерделеу жұмыстарын жүргізе отырып, мекемелерге ұсыным беру бойынша жұмыстар жүргізілетіндігіне тоқталды.
Айта кету керек, «Цифрлы Қазақстан» мемлекеттік бағдарламасы аясында қалаішілік қоғамдық көліктерде электронды төлем жүйесін орнату бойынша Алемпай (Alempay) ЖШС-мен «Қызылорда» автобус паркі» ЖШС-нің теңгеріміндегі 103 автобусқа орнатылды. Дегенмен, электронды төлем жүйесі құрылғысын орнатуда жеке тасымалдаушылар тарапынан бүгінде белсенділік болмауда.
Осы ретте, кеңес мүшелерімен жеке тасымалдаушылар арасында электронды төлем жүйесі құрылғысын орнатудың тиімділігін насихаттау бағытындағы жұмыстарды күшейту ұсынылды. Бұл бағыттағы жұмыстарға кеңес мүшелері де қолдау білдіретіндіктерін жеткізді.

Қазақстан және Қызылорда облысының жаңалықтары