<a href="https://kyzylorda-news.kz/date/2021/04/21/?doing_wp_cron=1618989415.2240319252014160156250">Kyzylorda-news.kz.</a>&nbsp; Бүгін Қызылорда облысының әкімдігі, «Астана» Халықаралық қаржы орталығының» Жасыл қаржы орталығы» және «Еуразия даму банкі» араларындағы «Қызылорда облысында жасыл және әлеуметтік жобаларды іске асыруға бағытталған өзара тиімді ынтымақтастық орнату» туралы меморандум жасалды. Шарада аймақ басшысы Гүлшара Әбдіқалықова бүгінгі келісімнің өңірдегі экологияны, жасыл және әлеуметтік жобаларды жақсарту мәселелерінде алға қойылған мақсаттарды шешуге үлкен қолдау боларын сөз етті.
<blockquote>
 «Бүгінгі күні Президент тапсырмасына сәйкес Үкіметпен 2021-2025 жылдарға арналған «Жасыл Қазақстан» ұлттық жобасының тұжырымдамасы әзірленуде. Оларды жүзеге асыру ғылым мен бизнестің әлеуетін біріктіруді, сондай-ақ қоғамның мемлекетпен, халықаралық ұйымдармен жүйелі диалог орнатуын талап етеді. Бүгін «Астана» халықаралық қаржы орталығының» еншілес ұйымы Жасыл қаржы орталығының бас директоры Айдар Қалымтайұлы Қазыбаев және Еуразия даму банкінің Басқарма Төрағасының орынбасары Аманкелді Сағандекұлы Исенов Қызылорда облысында жасыл және әлеуметтік жобаларды іске асыруға бағытталған өзара тиімді ынтымақтастық орнатуға келіп отыр. Біздің өзара әріптестік орнатуымыз тиімді нәтижелер береді деп үміттенеміз», – деді облыс әкімі Гүлшара Әбдіқалықова.
</blockquote>
Шарада «Астана» халықаралық қаржы орталығының» еншілес ұйымы Жасыл қаржы орталығының бас директоры Айдар Қазыбаев осы ынтымақтастық аясында Сыр өңірінде бірнеше жобаны жүзеге асыруға ниетті екенін жеткізді.
<blockquote>
 «Біздің орталық әлеуметтік жобаларды дамытумен ғана шектелмейді, өзге де ірі жобаларды жүзеге асырамыз. Бүгінгі меморандум аясында біз Еуразия даму банкімен бірлесіп, мемлекеттік жекеменшік әріптестік тетігі арқылы Қызылорда облысында жасыл және әлеуметтік жобалардың санын ұлғайтуды көздейміз. Сондай-ақ Арал өңіріндегі экологиялық жобаларды іске асыру мәселесінде де жәрдемдесуге ниеттіміз. Өңірде ауылшаруашылық саласы ең маңыз ие, сондықтан біз осы салаға көп көңіл бөлеміз. Табиғи энергия көздерін де дамытуға күш саламыз», – деді Айдар Қазыбаев.
</blockquote>
Ал, Еуразия даму банкінің Басқарма Төрағасының орынбасары Аманкелді Сағандекұлы Исенов меморандум шеңберінде облыстың экономикалық әлеуетін арттыру бағытында біршама жұмыстардың атқарылатынын айтты.
Үш жақты ынтымақтастықтың жобасы мен маңыздылығы талқыланғаннан соң, облыс әкімінің орынбасары Бақыт Жаханов, «Астана» Халықаралық қаржы орталығының» Жасыл қаржы орталығының Бас директоры Айдар Қазыбаев және «Еуразия даму банкі» Басқарма Төрағасының орынбасары Амангелді Исенов маңызды құжатқа қол қойды.
<img src="https://kyzylorda-news.kz/wp-content/uploads/2021/04/02-1.jpg" alt="" />

«Жасыл Қазақстан»: Қызылордада үшжақты меморандум жасалды

<a href="https://kyzylorda-news.kz/date/2021/04/21/?doing_wp_cron=1618989415.2240319252014160156250">Kyzylorda-news.kz.</a> Бүгін облыс әкімі Гүлшара Әбдіқалықованың төрағалығымен обстық әлеуметтік әріптестік және әлеуметтік еңбек қатынастарын реттеу жөніндегі облыстық үш жақты комиссия отырысы өтті.
Күн тәртібінде екі мәселе қаралды. Нақты айтсақ, еңбек қарым-қатынастарының жағдайы және еңбек дауларын алдын алу бойынша атқарылып жатқан жұмыстар мен кәсіпорындардағы орын алған қысқартулар және қабылданып жатқан еңбекпен қамту шаралары талқыланды.
Бірінші мәселе бойынша облыстық еңбек саласындағы бақылау басқармасының басшысы Төрахмет Жолымбетов баяндады.Облыс бойынша «Еңбек жанжалдарын уақытылы болжау және жол бермеу бойынша» мониторингтік топ құрамы бекітілген. Резонанстық жағдай туындауы мүмкін кәсіпорындар туралы ақпараттар белгіленген тәртіпте Еңбек Министрлігі жанында құрылған Ахуалдық орталыққа күнделікті хабарланып отырылады. «ПетроКазахстан Құмкөл Ресорсиз» АҚ, “CNEC” ЖШС, «ТузкольМунайГазОперейтинг» ЖШС туындаған мәселелер шешімін тапты.
«ҚуатАмлонМұнай» БК ЖШС ұжымының жұмыскерлері арасында наразылық белгілерінің қалыптасуы байқалды. Осыған орай, компания басшылығына жұмыскерлердің жалақысын көтеру мәселесіне қатысты ұсыныс берілді. Сонымен қатар «Қызылорда су жүйесі» мен «Қазалы-су сервис» кәсіпорнында еңбек құқықтарының бұзылу фактісі бойынша арыздар тіркелген. Бұл бағытта тиісті жұмыстар атқарылуда.Аймақ басшысы еңбек саласындағы мәселелер бойынша бірқатар тапсырма берді.
<blockquote>
 «Қызылорда қаласының және Қазалы ауданының әкімдері облыстық еңбек саласындағы бақылау басқармасы, облыстық кәсіподақтар орталығымен бірлесіп, жалақының мерзімінде төленуін қатаң бақылауға алып, шиелініске жол бермеу бағытында жедел әрекет ету шараларын қабылдасын. Облыстық еңбек саласындағы бақылау және индустриалды-инновациялық даму басқармалары «ҚуатАмлонМұнай» компаниясының ұжымындағы ахуалды бақылауда ұстап, нәтижесін хабарласын. Әрбір кәсіпорында адами капитал бірінші орында болу қажет. Жұмысшылармен кездесіп, түсіндіру жұмыстарын күшейтіңіздер. Серік Сүлейменов пен Нұрлан Тілешевке облыстағы кәсіпорын мен мекемелердегі еңбек ұжымындағы ахуалды қатаң бақылауда ұстауды жүктеймін», – деді Гүлшара Әбдіқалықова.
</blockquote>
Күн тәртібіндегі екінші мәселе бойынша облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова баяндады.Облыс бойынша бірқатар кәсіпорындарда қызметкерлерді қысқарту орын алуда. Осыған орай, аудан және қала әкімдіктері тұрғындарды тұрақты жұмыспен қамту бойынша тиісті жұмыстар атқаруда.
Облыста 37 ірі және орта кәсіпорындар тізімі анықталып, 30 кәсіпорынмен 2017-2025 жылдарға арналған қызметкерлердің ағынын басқару бойынша Жол карталары бекітілген.2016 жылдан бастап облыстағы жұмыс берушілермен бірлесе отырып, әлеуметтік шиеленістің алдын алу, жұмыс орындарын сақтап қалу мақсатында ынтымақтастық туралы 3208 кәсіпорынмен меморандумдар жасалып, оған 54 мынға жуық адам қамтылды.
Облыс әкімі Қызылорда қаласы мен аудан әкімдері, басқарма басшыларына берілген тапсырма созбалаңға салынбай уақытында сапалы орындалу қажет екенін баса айтты.
<blockquote>
 «Жұмыстан қысқартылғандарды жұмыспен қамтудың белсенді шараларына тартып, бірінші кезекте тұрақты жұмыспен қамтамасыз ету қажет. Аудандық әлеуметтік әріптестік жөніндегі үш жақты комиссияны апта сайын өткізу қажет. Қызметкерлердің жұмыспен қамтылуы, еңбек құқықтары мен кепілдіктерін сақтау және өндірістің қалыпты жұмыс істеуін қамтамасыз ету мәселелері жөніндегі өзара ынтамақтастық туралы меморандумға қол қою жұмыстары 30 сәуірге дейін аяқталсын. Тапсырма орындалмаған жағдайда жауапкершіліктері қаралады. Осы тапсырмалардың орындалуын бақылауды Балжан Шәменоваға тапсырамын», – деді Гүлшара Әбдіқалықова.
</blockquote>

Гүлшара Әбдіқалықова: Тапсырма созбалаңға салынбай уақытында орындалуы қажет

<a href="https://kyzylorda-news.kz/date/2021/04/21/?doing_wp_cron=1618989415.2240319252014160156250">Kyzylorda-news.kz.</a> Бүгін облыс әкімі Гүлшара Әбдіқалықованың төрағалығымен өңірлік жедел штаб отырысы өткізілді. Жиынға әкім орынбасарлары, құқық қорғау және арнайы органдардың басшылары, салалық басқарма басшылары мен аумақтық департамент, инспекция басшылары және селекторлық режимде қала, аудан әкімдері қатысты.
Аймақ басшысы індеттің өрши түсуінен Қызылорда облысы «қызыл» аймақ қатарына енгенін айтып, сақтық шараларын күшейтудің амалдарын қайта қарап, вакцина салдыру жұмыстарын белсенді жүргізу қажет деді.
<blockquote>
 «Аймағымызда эпидемиологиялық жағдай күрделенуде. Бүгіннен бастап облысымыз «қызыл аймаққа» кірді. Тәулігіне 50-ден астам жағдай тіркеліп, жаппай қайта жұқтыру қаупі өте жоғары. Бұл ретте резервтегі төсек-орындар, дәрі-дәрмектердің және қорғаныш құралдарының қоры, медициналық бұйымдардың қажеттілік саны дайын болу керек. 
 Індетті жеңудің жолы – сақтық шараларын күшейтумен қатар жаппай вакцинациялау болып табылады. Жерлестеріміздің жауапкершілік пен тәртіптілігін арттыруға шақыруымыз қажет»,-деді Гүлшара Әбдіқалықова.
</blockquote>
Отырыста денсаулық сақтау басқармасының басшысы Сәбит Пазылов өңірдегі инфекцияға қарсы атқарылып жатқан шаралар мен вакцинациялау жұмыстарының қарқынын баяндады.
Облыста індет жұқтырған 4890 адамның 86 пайызы жазылған. Ал, пневмониямен ауырған 548 науқастың 447-і емделіп шықты. 
Қазіргі таңда стационарларда 715 төсек-орын ұйымдастырылған. Егер індет күшейген жағдайда, инфекциялық және провизорлық стационарларда төсек-орын қорын 3200-ге дейін ұлғайтуға мүмкіндік бар. Оның 518 орны орталықтандырылған оттегімен жабдықталған. 
Індет ахуалына сәйкес тәуекел топтағы адамдар да ерекше бақылауда. Ол үшін 138 дәрігерлік мобильдік топ үйден ем жасауға көшті. 
Өңірде екпе егу өз деңгейінде жүргізілуде. Бүгінгі күні вакцинаның I компонентінің 21 100 дозасынан 20 945 адамға егілсе, II компоненттегі 16 100 дозаның 5108-не екпе жасалды. Қалған 10 992 доза кестеге сәйкес жасалады.
Жиында облыстық санитарлық эпидемиологиялық бақылау департаментінің басшысы Динара Жаңабергенова аймақтағы эпидемиологиялық ахуал барысына тоқталды. Ал, облыстық полиция департаменті басшысының бірінші орынбасары Шамшадин Амитов карантин режімін бұзу деректерін анықтау жұмыстарының нәтижелерін баяндады.
Шектеу шараларына сай талапты сақтау мақсатында құрылған мобильді топ құрамына 108 полиция жұмылдырылған. Арнайы топ жыл басынан 216 карантин талаптарын бұзу дерегін анықтады. Оның ішінде 144 дерек тойханалар мен үй жағдайларында жиын өткізу, 49 ойын-сауық мекемесінде, 22 дүкенде карантин талаптарын бұзу дерегі орын алған.
Облыс әкімі індет көрсеткіштерінің көбеюіне орай қоғамдық орындарда, халық көп шоғырланатын нысандарда рейдтік шараларды қатаң түрде күшейтуді тапсырып, мониторингтік топ жұмысының белсенділігін арттыруді жүктеді.
Жиында облыстық медициналық және фармацевтикалық қадағалау департаментінің басшысы Ғалия Байменова дәрі-дәрмек қорын толықтыру бағытындағы жағдайды баяндады. Ал, облыстық ішкі саясат басқармасының басшысы Мира Қазбекова халық арасында індеттен сақтану, вакцинаның қажеттілігі туралы ақпараттық кеңістікте материалдар қорын топтастыру бағытындағы жұмыстарды тізбеледі. 
Сала басшыларының індетпен күрес жүргізудегі жұмыстарын саралаған облыс әкімі денсаулық сақтау басқармасының басшысына барлық медициналық мекемелердегі төсек-орындарға ревизия жасап, тұрғындар арасында вакцинациялау жұмыстарын күшейтіп, қосымша егу пунктері ашуды жүктеді. Сондай-ақ, облыстық санитарлық эпидемиологиялық бақылау департаментінің басшысына екпе жұмыстарын жүргізу барысында «Мұздай тізбек» ережелерінің сақталуын бақылауды, коронавирус инфекциясына қарсы барлық медициналық мекемелердің дайындығына мониторинг жүргізіп, нәтижесін баяндауды тапсырды.

Гүлшара Әбдіқалықова  өңірлік жедел штаб отырысында індетпен күрес амалдарын күшейтуді тапсырды

<a href="https://kyzylorda-news.kz/">Kyzylorda-news.kz</a>. Кеше Қызылорда қалалық жұмыспен қамту орталығында «Бастау бизнес» жобасына оқуға жолдама алу үшін азаматтар жаппай жиналған болатын. Оқиғаның себебін бүгін сала мамандары Өңірлік коммуникациялар қызметінің ақпарат алаңында өткен онлайн брифингте түсіндірді.
<blockquote>
 «Бір мезетте 500-ден астам адам келеді деп күтпедік. Халық көп жиналғандықтан қала әкімдігінің қызметкерлері барып, түсіндіру жұмыстарын жүргізді. Бірақ тәртіпке бағынбай, кезектілік сақталмады, санитарлық талап ескерілмеді. Негізгі себеп әлеуметтік желілерде «жолдама бір күн ішінде ғана беріледі» деген жалған ақпарат тараған. Сондықтан халық көп жиналды. Бұл мәселе қала әкімінің назарында. Келеңсіздікке жол бергені үшін қала әкімінің орынбасарынан бастап тиісті мекеме басшылары жауапкершілікке тартылады. Ал кезектілікті сақтамай, таныстарын кіргізгендерге қызметтік тексеріс жүргізіледі. Барлық бейне-бақылау қаралады. Мемлекеттің мүлкіне зиян келтіргендер де жауапсыз қалмайды. Бүгінде жағдай тұрақталды», – деді қала әкімінің орынбасары Бектас Нуридинов.
</blockquote>
Орталыққа келген азаматтар «Бастау бизнес» жобасына оқу үшін жолдама сұраған. Негізі үміткерлер жұмыспен қамту орталығы арқылы немесе Atameken academy (www.atameken.co) сайтына онлайн тіркеле алады.
<blockquote>
 «Үміткерлердің мәртебесі тексерілгеннен кейін жолдама тек қағаз жүзінде беріледі. Жобаның аты айтып тұрғандай бұл бизнесті енді бастаушыларға арналған. Ескере кететіні, оқуды аяқтаған соң тест тапсырады. Сәтті өтсе сертификатын алады. Ал қайтарымсыз грантты алу үшін арнайы комиссия алдында жобаны қорғайды. Яғни, оқу курсынан өткеннің барлығы грантты иеленеді деген сөз емес. Ал, грантты алғаннан кейін адам салық және әлеуметтік төлемдерді төлеуі тиіс. Кәсібін арнайы мониторингтік топ жыл бойы тексереді. Мақсатсыз алынған гранттар кері қайтарылады. Мысалы, мониторингтік топтың жұмысының нәтижесінде 54 адамның ісі сотқа беріліп, 5 адам грантын бюджетке қайтарды», – деді облыстық жұмыспен қамтуды үйлестіру және әлеуметтік бағдарламалар басқармасының басшысы Гаухар Қалмақова.
</blockquote>
Биыл облыста «Бастау бизнес» жобасы бойынша 2500 адамды оқыту жоспарланған. 6 кезеңге бөліп оқытады. Бірінші легі 26 сәуірде басталады. 21 күнге созылатын оқу онлайн форматта өтеді. Үміткерлерге жолдама беру 19 сәуірде басталды.
<blockquote>
 «Бірінші лекте 112 азаматты оқытуымыз керек. Бірақ жолдама саны одан еселеп асып кетті. Кеше 112 азамат сайтқа тіркелді. Одан кейін автоматты түрде жабылды. Бірақ біз өзіміздің басшылыққа шығып, бұл сайттың мүмкіндігін қайта аштырып, 250 азаматқа дейін тіркеуге рұқсат алдық. Ал қалғанын журналға жазып жатырмыз. Оларды келесі лекте тіркейміз», – деді Қызылорда облысының Кәсіпкерлер палатасының директоры Ғалымбек Жақсылықов.
</blockquote>

Гаухар Қалмақова: Оқу курсынан өткеннің барлығы грантты иеленеді деген сөз емес

<a href="https://kyzylorda-news.kz/date/2021/04/21/?doing_wp_cron=1618989415.2240319252014160156250">Kyzylorda-news.kz.</a> Полиция қызметкерлерімен жүргізіліп жатқан алдын алу шараларына қарамастан алаяқтарға алдану деректері азаяр емес. Әлеуметтік желілер мен мессенджерлер арқылы жеке мәліметтерді таратпау, жеке басты куәландыратын құжаттарға абай болу керектігі туралы үнемі ескертіледі. Алайда тұрғындар сақтық шараларын елемей, көбіне салғырттық танытып келеді.
Осындай алаяқтықтың құрбаны Шиелі ауданының тұрғыны 19 сәуір күні &nbsp;полицияға арызданды. 35 жастағы азаматшаның айтуынша, 2020 жылдың тамыз айында оның танысы сеніміне кіріп, құжатын пайдалып, банктен 135&nbsp;000 теңге көлемінде несие рәсімдеген.&nbsp;
Шиелі аудандық полиция бөлімінің қызметкерлері алаяқтық қылмысына күдіктіні анықтады.&nbsp; Тексеру барысында бұрын сотты болған 22 жастағы аудан тұрғыны жұмыс істеу үшін Нұр-Сұлтан қаласына&nbsp; кетіп қалғандығы белгілі болды. &nbsp;Қазіргі таңда күдіктіге қатысты бұлтартпау шарасы туралы мәселе шешілуде.
Аталған дерек бойынша Қазақстан Республикасы Қылмыстық кодексінің 190 – бабының 1-бөлігімен (Алаяқтық, яғни бөтеннің мүлкін жымқыру немесе алдау немесе сенімді теріс пайдалану жолымен бөтен мүлiкке құқықты иемдену) сотқа дейінгі тергеп-тексеру амалдары &nbsp;жүргізілуде.&nbsp;&nbsp;&nbsp;&nbsp;&nbsp;&nbsp;&nbsp;
Полицейлер оқиғаның мән-жайларын анықтауда.

Танысының атынан несие рәсімдеген Шиелі ауданының тұрғыны анықталды

<a href="https://kyzylorda-news.kz/date/2021/04/21/?doing_wp_cron=1618989415.2240319252014160156250">Kyzylorda-news.kz.</a> Жобаға қатысқысы келетін азаматтар жұмыспен қамту орталығынан жолдама алып,&nbsp;<a href="http://www.atameken.co/?fbclid=IwAR3J-gInFrZFhOk1GCgq3rd-9RCtlFe2kxcD5fasy73Ax5F8urQln_E92H4">www.atameken.co</a>&nbsp;сайтына онлайн тіркеле алады.
Ол үшін курсқа қатысуға ниет білдіруші:
– atameken.co сайтына кіріп ЭЦП-мен қол қояды;
– курстар деген жерде «Бастау Бизнес» курсын таңдайды;
– анкетаны толтырады;
– «ЖАЛҒАСТЫРУ» түймесін басады;
– алдын ала скандалған жолдаманы жүктейді;
– алдын-ала скандалған жеке куәлікті жүктейді;
– аяқтау түймесін басады.
Одан бөлек жолдама алып келген қызылордалықтарды тіркеп беруге Палата мамандары да көмектесіп жатыр. Тіркеу жұмыстары 25 сәуірге дейін жүргізіле береді. Жоба аясында алғашқы потоктың сабағы 26 сәуірде басталады. Оқу онлайн өткізіледі. Оқу күні 21 күн.
Келесі потоктардағы сабақтардың басталу мерзімдері:
2-поток 24 мамырда басталады;
3-поток 21 маусымда басталады;
4-поток 19 шілдеде басталады;
5-поток 16 тамызда басталады;
6-поток Қызылорда қаласы мен Қазалы, Жаңақорған аудандарында өтеді, 13 қыркүйекте басталады.
«Бастау» жобасына қатысушылардың бөлінісі:
– Жыл көлемінде Қызылорда қаласынан 535 азаматты оқыту жоспарлануда;
– Арал ауданынан 300 адам;
– Қазалы ауданынан 420 адам;
– Қармақшы ауданынан 115 адам;
– Байқоңыр қаласынан 30 адам;
– Жалағаш ауданынан 120 адам;
– Сырдария ауданынан 180 адам;
– Шиелі ауданынан 300 адам;
– Жаңақорған ауданынан 500 адам.
<blockquote>
 «Болған жағдайға қатысты түсінгенімізше, Қызылорда қаласы тұрғындары жолдама бір күнде ғана беріледі және сайтта тіркеу де бір күнде ғана болады деп түсінген секілді. Тағы да қайталап айтамын, жолдама алған азаматтарды біз 25 сәуірге дейін тіркей беретін боламыз. Жалпы биыл «Бастау» жобасының жүзеге асырылып келе жатқанына 5 жыл толады. Бағдарлама халық арасында кең қолдауға ие. Сұраныстың жоғары болуының тағы бір себебі – биылғы жылға мемлекеттік бағдарлама аясында кәсіпкерлікке оқытатын өзге жобалардың барлығы әзірге тоқтап тұр. Бұл да өз әсерін тигізіп отыр. Біз қазір орталық аппарат арқылы Үкіметке де осы ұсыныстарымызды берудеміз. Қызылорда қаласы бойынша 1-потокта 112 азаматты оқыту жоспарланған болатын. Алайда жұмыспен қамту орталығы 500-ден астам азаматқа жолдама беріпті. Жолдама алған азаматтар Кәсіпкерлер палатасына келіп сайтқа тіркелуде. Сайт 112 азаматты тіркегеннен кейін уақытша жабылды. Біз Орталық аппаратпен келіссөздер жүргізіп, 250 адамға дейін тіркеуге рұқсат алдық. Қазір Палата мамандарының барлығы осы тіркеу жұмысына жұмылдырылып, жұмыс жасауда», – деді баспасөз мәслихатында Палата директоры Ғалымбек Жақсылықов.
</blockquote>

Қызылордада «Бастау» жобасымен 2500 адам оқытылады

<a href="https://kyzylorda-news.kz/">Kyzylorda-news.kz</a>. Мүлік иелерінің бірлестігі коммуналдық борыштарды өндіруге нотариус арқылы сот орындаушыларын тарта алады, деп хабарлайды <a href="https://www.inform.kz/kz/mulik-ielerinin-birlestigi-kommunaldyk-karyzdy-kalay-ondiredi_a3779102">ҚазАқпарат</a>.
Орталық коммуникациялар қызметінде «Тұрғын үй-коммуналдық шаруашылығын жаңғырту мен дамытудың қазақстандық орталығы» АҚ өңірлік даму және әдіснама департаментінің басшысы Марғұлан Әбдікәрімов мүлік иелерінің бірлестігі коммуналдық борыштарды қалай өндіретінін түсіндірді.
<blockquote>
 «Әрбір пәтер иесі меншігіндегі пәтерден бөлек кондоминиум нысанының ортақ мүлігінде үлесі бар екенін түсінуі керек. Ол осы үлес үшін жауапкершілік арқалайды. Яғни ортақ мүліктегі үлесін күтіп ұстау шығындарын өтеуге міндетті. «Пәтерімді жауып тастасам, қалған мәселенің маған қатысы жоқ» деп ойлауға болмайды. Егер тұрғын үйде пәтер жалдаушылар өте көп болса, мүлік иелерінің бірлестігі «Азаматтарға арналған үкімет» мекемесіне жүгініп, адвокаттың көмегімен әлгі пәтердің меншік иелері туралы ақпарат сұрата алады», – дейді акционерлік қоғам өкілі.
</blockquote>
Марғұлан Әбдікәрімов ортақ мүліктің ортақ шығындарын төлеуге құлықсыз адамдарды МИБ аясында қалай тәртіпке шақыруға болатынын түсіндіріп өтті.
<blockquote>
 «Коммуналдық шығындар мен өзге төлемдерді төлеуге құлықсыз пәтер иелеріне қатысты заң 2019 жылы барынша оңтайландырылды. Енгізілген түзетулер бойынша ортақ мүлікті басқарушы орган борышкерлер пайда болған жағдайда жеке нотариусқа өтінішпен жүгіне алады. Өтінішпен бірге борышкер туралы анықтама мен төленбеген түбіртектер тапсырылады. Жиын арқылы бекітілген тарифтер де көрсетілуі керек. Осы құжаттардың бәрін тексергеннен кейін нотариат базасында атқару парағын рәсімдейді. 10 күннің ішінде борышкер қарызын төлемесе немесе қарсы дәлел келтірмесе, атқару парағы сотқа жолданады. Жеке сот орындаушы құжатты қабылдағаннан кейін ақшаны өндіруге кіріседі. Яғни, сот орындаушы борышкердің қаражатына, басқа қалаға шығуына шектеулер қоюға құқылы», – дейді маман.
</blockquote>
Оның айтуынша, «ұмытшақ» борышкерлер сот орындаушысымен сөйлескеннен кейін тиісті төлемді уақтылы төлей бастайтын көрінеді.

Мүлік иелерінің бірлестігі коммуналдық қарызды қалай өндіреді?

<a href="https://kyzylorda-news.kz/">Kyzylorda-news.kz</a>. Польшаның Кельц қаласында бокстан жастар арасында өтіп жатқан Әлем чемпионатында жерлесіміз Әсел Сағатова (81 келі) қола жүлдені иеленді. Ол осы жүлдесі арқылы бокстан “Қазақстан Республикасының спорт шебері” спорттық атағына қол жеткізді.
Бұл оның Әлемдік додада жеңіп алған алғашқы жүлдесі.
Ә. Сағатова – 2002 жылы Қызылорда қаласында дүниеге келген. Бокспен 14 жасында шұғылдана бастады. Айтулы спорт түріне келгеніне бір жыл болмастан 2017 жылы қаласында Қарағандыда өткен А.И. Апачинский және В.Р. Тулов жүлделеріне арналған республикалық турнирде екінші орынға ие болды. Қазіргі таңда 3 дүркін Қазақстан чемпионы.
Ол № 2 облыстық олимпиадалық резервтің мамандандырылған балалар-жасөспірімдердің мектебінде тәлім алады. Боксшы қыздың спортта жетістіктерге жетуіне жаттықтырушысы Шахноза Исаханованың еңбегі ерен екенін айтуға болады.

Қызылордалық боксшы Әлем чемпионатында  қола жүлдені иеленді

<a href="https://kyzylorda-news.kz/">Kyzylorda-news.kz</a>. «Nur Otan» партиясы Қызылорда облыстық филиалы жанындағы сыбайлас жемқорлыққа қарсы іс-қимыл жөніндегі Кеңес төрағасы Мақсұт Нәлібаев ЗК-196/4 мекемесінің жеке құрамымен кездесті.
Жиында сыбайлас жемқорлыққа қарсы мәдениетті қалыптастыру сыбайлас жемқорлықтың кез келген көріністеріне төзбеушілік ахуалын құру мәселелері талқыланды. Мұндағы басты мақсат – қызметтегі сыбайлас жемқорлық тәуекелдерін жою, әкімшілік кедергілерден қорғау, сыбайлас жемқорлыққа қарсы мәдениетті қалыптастыру.
Басқосуда ЗК-196/4 мекемесі бастығының тәрбие жұмыстары жөніндегі орынбасары, әділет майоры Қанат Дайрабаев қызмет барысында сыбайлас жемқорлықтың алдын алу бағытында атқарылып жатқан жұмыстар барысын баяндады.
«Nur Otan» партиясы Қызылорда облыстық филиалы жанындағы сыбайлас жемқорлыққа қарсы іс қимыл жөніндегі Кеңес төрағасы Мақсұт Нәлібаев өз сөзінде сыбайлас жемқорлық саяси және қоғамдық институттардың дамуына кері әсерін тигізіп, еліміздің дамуына қауіп төндіріп тұрғандығын атап өтіп, қай бір сала болмасын ең алдымен сыбайлас жемқорлық тәуекелдерін анықтап оларды жою және алдын алу жұмыстарын үздіксіз жүргізуіміз қажеттігін атап өтті. Сондай-ақ, қазір елімізде сыбайлас жемқорлыққа қарсы бірнеше ірі жобалар жүзеге асып жатыр. Олар парақорлық пен осы сипаттағы заң бұзушылықты дер кезінде анықтап, әшкерелеуге мүмкіндік береді.
Жалпы кездесу барысында Кеңес төрағасы қатысушыларды сыбайлас жемқорлық фактілерінің неден пайда болатындығын, оған жол бермеудің қарапайым әдістері жөнінде түсіндірме жұмыстарын жүргізді,Сыбайлас жемқорлыққа қарсы жалғыз адам емес, қоғам мемлекеттік органдар мен қоғамдық бірлестіктердің бірігуімен қарсы тұруға болатынын, әрбір қызметкер жауапкершілікті сезініп, өз қызметінде осы індетпен барынша күрес жүргізбей, жеңіске жету мүмкін емес екенін айтты.

Жемқорлықтың алдын алу бағытында түсіндірме жүргізді

<a href="https://kyzylorda-news.kz/">Kyzylorda-news.kz</a>. Қазақстан Республикасының денсаулық сақтау вице-министрі – еліміздің бас санитар дәрігері Ерлан Қиясовқа сөгіс жарияланды. Бұл туралы Nur Otan партиялық бақылау комитетінің басшысы Артур Платонов&nbsp;<a href="https://www.facebook.com/artur.platonov.184">Faceboоок</a>&nbsp;парақшасында хабарлады.
Депутаттың айтуынша, адамдар оған әлеуметтік желі арқылы шағымданған. Олар министр орынбасарлары мен өңірлердегі шенеуніктер азаматтармен кездесу кезінде қандай да бір мәселе бойынша “партиялық міндеттемені орындаудан қашатынын” айтқан.
Артур Платоновтың сөзінше, азаматтар елде бәрі қымбаттап жатқанын жеткізген. Сондай сәтте партия төсбелгісін тақпайтын шенеуніктер жауапкершіліктен жалтарып кететінін айтқан.
<blockquote>
 “2019 жылдың 21 тамызындағы Саяси кеңестің кеңейтілген отырысында Nur Otan партиясының төрағасы Нұрсұлтан Әбішұлы Назарбаев партияны қайта жаңарту бағдарламасының негізгі тезистерінің бірі – дәрежесіне, лауазымына, мәртебесіне қарамастан партия тәртібін, сайлаушылар алдындағы жауапкершілікті арттыру екенін мәлімдеді. Оның ішінде партия құрамында бар екенін көрсететін партия нышанына құрмет мәселесі де бар”, – деп жазды Платонов.
</blockquote>
Кей мырзалар азаматтардың алдында өз жұмысынан ұяла ма? Әлде партия белгісін тағар болса, костюмін бүлдіріп алудан қорқа ма? деп сауал қойды комитет басшысы.
<blockquote>
 “Денсаулық сақтау вице-министрі Е.А. Қиясов, Қызылорда облысы әкімінің орынбасары Б.Д. Жаханов, Алматы қаласы әкімінің орынбасары М.С. Кикимов, Шығыс Қазақстан облысы әкімінің орынбасары Ш.С. Буктугутов, Жезқазған қаласының әкімі Қ.Б. Әбсаттаров партия нышанынсыз жүруді артық көретінін айтуға мәжбүрміз”, – деп жазды Платонов.
</blockquote>
Осыған байланысты Қиясовқа сөгіс беріліп, қалған шенеуніктерге ескерту жасалды.

&#8220;Костюмін бүлдіріп алудан қорқа ма?&#8221;:   Шенеуніктерге ескерту жасалды

<a href="https://kyzylorda-news.kz/">Kyzylorda-news.kz</a>. Арал ауданы әкімінің 2021 жылғы 21 сәуірдегі № 98-ө/жқ санды өкімімен, Арал ауданы әкімінің орынбасары лауазымына Әбішев Еркін Жұмаханұлы тағайындалды.
Әбішев Еркін Жұмаханұлы – 1987 жылы 3 маусымда Арал ауданы, Шижаға елді мекенінде дүниеге келген. Білімі жоғары.
2008 жылы Қорқыт ата атындағы Қызылорда мемлекеттік униврситетін «Аудармашы-реферант», 2010 жылы Болашақ университетін «Экономика» мамандықтары бойынша бітірген. 
Еңбек жолын 2009 жылы Қызылорда облыстық «Азаматтық Альянс» қауымдастығының Қазалы ауданы бойынша өкілі қызметінен бастаған.
2010-2013 жылдары аралығында Қазалы аудандық ішкі саясат бөлімінің бас маманы;
2013-2014 жылдары аралығында «Қызылорда облыстық ішкі саясат басқармасы» мемлекеттік мекемесі, Ақпараттық саясат және БАҚ-на мониторинг бөлімінің бас маманы, басшысы;
2014-2017 жылдары аралығында Арал аудандық ішкі саясат бөлімінің басшысы;
2017 жылдың сәуір – тамыз айлары аралығында Октябрь ауылдық округінің әкімі;
2017-2018 жылдары Арал ауданы әкімінің орынбасары; 
2018 жылдан бастап осы уақытқа дейін Қызылорда облыстық ішкі саясат басқармасы басшысының орынбасары қызметін атқарып келді.
Отбасылы, 2 бала тәрбиелеп өсіруде.

Арал ауданы әкімінің орынбасары тағайындалды

<a href="https://kyzylorda-news.kz/">Kyzylorda-news.kz</a>. Ағымдағы жылдың 13-17 сәуір аралығында Алматы қаласында күрес түрлерінен өткен Азия чемпионатында жерлестеріміз Айдос Сұлтанғали грек-рим күресінен Азия чемпионы атанса, әйелдер күресінен Асылзат Сағымбай қола жүлдені иеленген болатын. Бүгін облыс әкімі Гүлшара Әбдіқалықова Айдос Сұлтанғали мен Асылзат Сағымбаймен кездесіп, жеңісімен құттықтады.
<blockquote>
 “Биыл облыс спортшылары әлемдік ареналарда көптеген жоғары табыстарға қол жеткізіп, Тәуелсіз Еліміздің мәртебесін асқақтатуда. Спортшылардың жеңісі Сыр жастарының жігерін арттырып, жаңа биіктерге жетелейді. Қазіргі уақытта коронавирус пандемиясы кезеңіндегі уақытша шектеулерге қарамастан спорттық нысандарды салу бойынша жұмыстар атқарылуда. Бұл ретте, «Жұмыспен қамтудың» жол картасы бағдарламасы аясында 5 спорт кешені және «Ауыл ел бесігі» бағдарламасы бойынша 5 спорт кешенінің құрылыстары осы жылы басталуы жоспарлануда. Жыл басынан бері облыс спортшылары ҚР-ның чемпионаттары мен кубоктарында 329 медальды жеңіп алса, ірі халықаралық жарыстарда 12 медальға қол жеткізді. ҚР еңбек сіңірген спорт шеберлері, боксшы Қамшыбек Қоңқабаев пен балуан Дәулет Ниязбеков Токио Олимпиадасына 2 лицензия алды. Осындай мерейлі жеңістеріңізбен Сіздерді құттықтаймын!” – деді облыс әкімі Гүлшара Әбдіқалықова.
</blockquote>
Жиында сөз алған чемпион Айдос Сұлтанғали спорттағы жетістіктерін одан әрі жетілдіріп, бұдан да жоғарғы белестерді бағындыруға ниетті екенін жеткізді. Ал, Асылзат Сағымбай жастарға қолдау білдіріп, олардың сүйікті ісімен айналысуына жағдай жасаған аймақ басшылығына алғысын білдірді. 
Спортшыларды жарысқа дайындаған бапкер Ғабиден Райымбек облыстағы спорт саласындағы атқарылып жатқан орасан жұмыстар жастардың жеңіске жетуіне ыпал етті дейді.
<blockquote>
 “Спортшылардың жеңіске жетуіне еңбекпен қатар қолайлы жағдай қажет. Бүгінде аймақтың спорт саласында атқарылып жатқан ауқымды жұмыстар жастардың алаңсыз дайындалуына мүмкіндік беруде. Сол үшін сіздерге айтар алғысымыз шексіз. Осы демеулердің арқасында алдағы уақытта да спортшыларымыз бәскелерде топ жарады деп сенемін”, – деді Греко-рим күресінен ҚР-на еңбегі сіңірген жаттықтырушы Ғабиден Райымбек.
</blockquote>
Шара соңында аймақ басшысы Айдос Сұлтанғали мен Асылзат Сағымбайға қаржылай сертификат тапсырып, естелік суретке түсті.

Қазақстан және Қызылорда облысының жаңалықтары

«Жасыл Қазақстан»: Қызылордада үшжақты меморандум жасалды

Гүлшара Әбдіқалықова: Тапсырма созбалаңға салынбай уақытында орындалуы қажет

Гүлшара Әбдіқалықова өңірлік жедел штаб отырысында індетпен күрес амалдарын күшейтуді тапсырды

Гаухар Қалмақова: Оқу курсынан өткеннің барлығы грантты иеленеді деген сөз емес

Танысының атынан несие рәсімдеген Шиелі ауданының тұрғыны анықталды

Қызылордада «Бастау» жобасымен 2500 адам оқытылады

Мүлік иелерінің бірлестігі коммуналдық қарызды қалай өндіреді?

Қызылордалық боксшы Әлем чемпионатында қола жүлдені иеленді

Жемқорлықтың алдын алу бағытында түсіндірме жүргізді

“Костюмін бүлдіріп алудан қорқа ма?”: Шенеуніктерге ескерту жасалды

Арал ауданы әкімінің орынбасары тағайындалды

Облыс әкімі Сыр палуандарын жеңісімен құттықтады

Қазақстан және Қызылорда облысының жаңалықтары

«Жасыл Қазақстан»: Қызылордада үшжақты меморандум жасалды

Гүлшара Әбдіқалықова: Тапсырма созбалаңға салынбай уақытында орындалуы қажет

Гүлшара Әбдіқалықова өңірлік жедел штаб отырысында індетпен күрес амалдарын күшейтуді тапсырды

Гаухар Қалмақова: Оқу курсынан өткеннің барлығы грантты иеленеді деген сөз емес

Танысының атынан несие рәсімдеген Шиелі ауданының тұрғыны анықталды

Қызылордада «Бастау» жобасымен 2500 адам оқытылады

Мүлік иелерінің бірлестігі коммуналдық қарызды қалай өндіреді?

Қызылордалық боксшы Әлем чемпионатында қола жүлдені иеленді

Жемқорлықтың алдын алу бағытында түсіндірме жүргізді

&#8220;Костюмін бүлдіріп алудан қорқа ма?&#8221;: Шенеуніктерге ескерту жасалды

Арал ауданы әкімінің орынбасары тағайындалды

Облыс әкімі Сыр палуандарын жеңісімен құттықтады

“Костюмін бүлдіріп алудан қорқа ма?”: Шенеуніктерге ескерту жасалды