<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықова Байқоңыр қаласы әкімшілігінің басшысы Константин Бусыгинмен кездесті.
Отырысқа облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Серік Сүлейменов, ҚР Президентінің Байқоңыр кешеніндегі арнаулы өкілінің қызметін қамтамасыз ету басқармасының басшысы Жасұлан Абатов қатысты.
Жиын барысында тараптар арасындағы ортақ жоспарлар сөз болып, оның ішінде Байқоңырдағы жылу электр станциясын газға қосу арқылы тұрғындарға төлем құнын төмендету мәселесі талқыланды.
<blockquote>
 «Қазақстан мен Ресей Федерациясының мемлекеттік органдарының бірлескен нәтижелі жұмыстарының арқасында Байқоңыр қаласының және тұтастай кешеннің ұзақ мерзімде дамуын қамтамасыз ету мәселелері шешілуде. Қазіргі таңда Байқоңырда 5 тұрғын үйдің құрылысы мен инженерлік инфрақұрылымды жаңарту бойынша жұмыстар жүргізілуде. «Байқоңыр» кешенін газбен қамтамасыз ету бойынша келісім негізінде жұлдызды қаладағы көп қабатты тұрғын үйлер, шағын және орта бизнес нысандар көгілдір отынға қосылды», – деді облыс әкімі.
</blockquote>
Кездесу барысында Байқоңыр қаласы әкімшілігінің басшысы Константин Бусыгин жылу электр станциясын газға қосу мәселесіне қатысты бірлескен жұмыстардың маңыздылығын атап өтті. Бұл ретте «ҚазТрансГаз Аймақ» АҚ Қызылорда өндірістік филиалы директорының міндетін атқарушы Ермек Қалдығұлов, облыстық экология департаментінің басшысы Нұржан Өмірсерікұлы негізгі мәселелер бойынша жасалған жұмыстарды тізбелеп берді. Сондай-ақ, Байқоңыр қаласы аумағын қоқыстан тазартудың 2021-2023 жылдарға арналған Жол картасын жүзеге асыру, қоқысты сұрыптау кешенін іске қосу бағытында алдағы атқарылатын жұмыстарға тоқталды.
Кездесуді қорытындылаған облыс әкімі алдағы уақытта бірлескен жобалардың нәтижелі орындалатынына сенім білдірді.

Байқоңыр қаласын дамыту мәселелері талқыланды

<a href="https://kyzylorda-news.kz/">Kyzylorda-news.kz</a>.&nbsp; «Қандай ас ішемін, не киім киемін?» Қарап отырсақ, біз бұл сұрақтарға келгенде ұзақ ойланбаймыз. Аштықты көрген жоқпыз. Бейбіт өмірде ішкеніміз алдымызда, ішпегеніміз артымызда, ешкімге алақан жайып, жалтақтамаймыз. Ал, бұл жолда талай тарланның тақымындағы тер кеппеді. Ұлт-азаттық көтерілістер, Ұлы отан соғысы мен Желтоқсан оқиғасы, қатал сыннан өткен жандардың жан қияр ерліктері тарих қойнауында сақтаулы. «Қашан егемен ел боламыз?» деген бір кездегі мазалы сұрақ – бүгін біздің бақытымыз.
Тарих парағын ақтарсақ, тәуелсіздік жолында халқымыз түрлі сынақтан өтті. Ата-бабаларымыз жерді жауға бастырмады. Ұлын құл, қызын күң етпеуге барын салды, досына адал, дұшпанына қаталдық танытты. Қазақ елінің еркіндігі, тәуелсіздігі үшін тарихта ерекше орын алатын көтерілістер – Сырым Датұлы, Кенесары Қасымұлы, Махамбет Өтемісұлы мен Исатай Тайманұлы бастаған және 1916 жылғы ұлт-азаттық көтерілістер болды. Сонау «Ақтабан шұбырынды, Алқакөл сұлама» заманынан бастап, қынадай қырылған, ел тізгінін ұстаған азаматтардан 1938 жылдарына дейінгі аралықта халқымыздың осынау кең жақан далада өмір сүруі, тарих бетінен ұлт болып жойылып кету қаупі төніп тұрған еді. Қаракерей Қабанбай, Қанжығалы Бөгенбай батырлардан бастап, Иса, Досан, Шотан батырлар, беріректе Бауыржан, Мәншүк, Әлия сынды батырлар ел қорғауды ұран етіп, сол жолда құрбан болды. Тәуелсіздік үшін ақ білектің күшімен, ақ найзаның ұшымен елін қорғаған бабалар рухынан қуат алған ызғарлы Желтоқсан оқиғасы да кім кімді болмасын селт еткізбей қоймады. «Тәуелсіздік алдық, енді оны қалай сақтап қаламыз?» деген сауал көптің көкейін күпті еткен тағдырлы уақыт та болды. Ата-аналарымыз ол кезеңнің өтпелі болғанын, айлап-жылдап жалақы алмай, зейнетақыларына жете алмай зарыққан жандар жайлы күрсіне айтып отырады. Олар қиналды, бірақ, шыдады. Қиын күннің желдей есіп өтеріне сенгендіктен… 
Осыған қарап-ақ, қазақ деген елдің ежелден бергі арманы – азаттық екенін байқауға болады. Сол азаттық қаншама ғасырлар бойы қиын-қыстау кезеңдерден сүрінбей өткен қазақтың пешенесіне бұйырыпты.
Өзгелермен иық тірестіріп тұрып, тәуелсіздік алдық. Тәубе. Ақиқатын айтсақ, қаймана қазақ бұл жолда Тұңғыш Президент Нұрсұлтан Назарбаевқа қарыздар. Сонау 90-шы жылдардың басында жаңа заман туды. Осы қиын-қыстау тың жолда Қазақстанды сүріндірмей, адастырмай алып жүру екінің бірінің қолынан келмес еді. Бүгінде әлем сахнасынан сыйлы орынға жайғасып үлгерген егеменді еліміздің осынау жылдардың ішінде жеткен жетістігі мен бағындырған белесі биік. Экономикалық, саяси, әлеуметтік тұрғыда жедел қарқынмен дамып жатқан Қазақстан әлемді аузына қаратқан елге айналды. Тұңғыш Президент-Елбасы Нұрсұлтан Назарбаевтың арқасында еліміз әлемдік қауымдастықтардың ықпалды мүшесі атанды, халқына қауіпсіздік пен жарқын болашағы бар өмір сыйлай алды.
Табалдырығымыздан аттаған биылғы жылда Тәуелсіз ел атанғанымызға 30 жыл толып отыр. Мерейлі датаға орай Президент Қасым-Жомарт Тоқаев жариялаған «Тәуелсіздік бәрінен қымбат» мақаласында қазақ мемлекеттігінің, ата-бабаларымыз аңсаған азаттықтың тұғыры нығая түскеніне екпін берілген. Мемлекет басшысы «Азаттығымыздың айшықты белесіне шыққанда әрбір саналы азаматты «Отыз жылда біз қандай жетістіктерге жеттік?», «Келер ұрпаққа қандай елді аманаттаймыз?», «Мемлекеттігімізді нығайта түсу үшін тағы не істейміз?» деген сауал толғандырары анық. Осы тұрғыдан алғанда, бұл – арман-мақсаттарымызды тоғыстырып, болашаққа тың серпінмен қадам басу үшін өткенге тағы бір мәрте оралатын, жетістіктеріміз бен кемшіліктерімізді ой елегінен өткізетін маңызды мезет» деген орамды ой айтқан. Иә, тәуелсіздікті алу бар, бірақ оны қорғап қалу, баянды ету мың құбылған, алмағайып заманда оңай емес. Сондықтан да «Тәуелсіздік бәрінен қымбат» деген сөз мәңгілік ұранға айналғаны абзал. «Азаттық пен тыныштық, көксегенім» деп Абай атамыз жырлағандай, қазіргі қазақ қоғамына ең қажет дүние де – бейбіт өмір мен тату тірлік. Сондықтан әрбір азамат осы екеуінің қадірін біліп, соның қамын жемек керек. Өйткені, біз бақытты ұрпақпыз, алдағы жарқын болашақ та біздің қолда.
Қасым Аманжоловтың «Сен неткен бақытты ең, келер ұрпақ. Жүзіңе көп қараймын мен таңырқап» деген жалынды жырын да біздерге қарата айтуға болады. Менің де бала күнімде таңдаған құтқарушы мамандығын серік етуіме, арманыма қанат байлауыма себепші – ұрпақтарының алаңсыз өмірі жолында күрескен ата-бабамның ерлігі мен талай жылғы тар жол, тайғақ кешумен келген Тәуелсіздік. Жаратқан жаны жайсаң, дарқан жұртымызды бірлік-ынтымағынан ажыратпасын!
Хасен АМАНЖОЛОВ, 
Қызылорда қаласындағы №1 мамандандырылған өрт сөндіру бөлімінің бөлімше командирі, азаматтық қорғау сержанты
<img src="https://kyzylorda-news.kz/wp-content/uploads/2021/09/5c0b4405-a3b4-4641-9e23-6db8be490816.jpg" alt="" />

Тәуелсіз елдің ұланы

<a href="https://kyzylorda-news.kz/">Kyzylorda-news.kz</a>. ҚР Бас санитар дәрігері Ерлан Қисяов жаңа қаулыға қол қойды.
Құжатта 6 қыркүйектен бастап вакцина алмаған қызметкерлерін штаттық жұмысқа жібермеуге міндеттелеген нысандардың тізімі өзгеретіні айтылған, деп хабарлайды ҚазАқпарат.
<blockquote>
 «Осы қаулының 1-тармағының 1) тармақшасына енгізілмеген ұйымдардың/объектілердің COVID-19-ға қарсы вакцинация алмаған жұмыскерлері үшін күндізгі режимде жұмысқа жіберуді шектеу туралы шешімді қалыптасқан эпидемиологиялық жағдайға байланысты коронавирус инфекциясының таралуын болдырмау жөніндегі өңірлік жедел штабтар қабылдайды», – деп жазылған құжат мәтінінде.
</blockquote>
Қаулыдағы «1 тармақтың 1) тармақшасында көрсетілмеген» нысандардың санаты мынадай:
– базарлар, сауда үйлері, сауда желілері, сауда ойын-сауық орталықтары, дүкендер, шағын маркеттер, супермаркеттер, гипермаркеттер;
– музейлер, музей-қорықтар, кітапханалар, концерттік ұйымдар, филармониялар, театрлар, кинотеатрлар, концерт залдары, клубтар, галереялар, көрмелер, цирктер және басқа да мәдени-демалыс ұйымдары;
– қонақ үйлер, отельдер, хостелдер, мотельдер, жатақханалар, кемпингтер және тағы басқалар;
– әуежайлар, теміржол, автомобиль және су вокзалдары, өзен және теңіз порттары, автостанциялар/автоөтпе жолдары, жолаушыларға қызмет көрсету пункттері;
– білім беру және тәрбиелеу ұйымдары, оның ішінде білім беру дамыту және түзету орталықтары (ересектер мен балаларға арналған), оқу-өндірістік комбинаттар және басқа да мектептен тыс ұйымдар;
– санаторийлер, демалыс үйлері/ базалары/ аймақтары, профилакторийлер, балалардың сауықтыру лагерлері (мектеп жанындағы, қала сыртындағы), туристік базалар және басқалар;
– қоғамдық тамақтану объектілері, оның ішінде ұйымдасқан ұжымдарда орналасқан, сондай-ақ тамақ жеткізуді жүзеге асыратын объектілерд, стрит-фудтар;
– қарттар, мүгедектер үйлері, сәбилер үйлері және басқалары;
– денсаулық сақтау ұйымдары, оның ішінде зертханалар;
– дәріхана ұйымдары;
– сумен жабдықтау, жылумен жабдықтау, электрмен жабдықтау, аумақтарды жинау және қалдықтарды шығару, үй-жайлар мен аумақтарды дезинфекциялық өңдеу ұйымдары, авариялық-құтқару қызметтері, пәтер иелері кооперативтері және мүлік иелерінің бірлестіктері;
– экскурсиялық қызмет көрсететін ұйымдар;
– компьютерлік клубтар, бильярд залдары, боулингтер, ойын-сауық орталықтары/саябақтары, аттракциондар, аквапарктер, караоке, лотерея клубтары және лотерея билеттерін сату жөніндегі өзге де пункттер/нүктелер және басқалар;
– байланыс және телекоммуникация объектілері.
Сондай-ақ, құжатта вакцинацияланбаған жұмыскерлерін ПТР-тестілеуден өткізуге міндетті нысандардың санаты берілген.
Олар: халыққа қызмет көрсету орталықтары (ХҚКО), «Қазпошта» АҚ бөлімшелері, екінші деңгейдегі банктер, қаржы нарығының объектілері, сақтандыру компаниялары, жылжымайтын мүлік жөніндегі агенттіктер, жарнама агенттіктері, айырбастау пункттері, ломбардтар, сұлулық салондары, шаштараздар, химиялық тазалау орындары, кір жуу орындары, фитнес, спорт кешендері, спорттық-сауықтыру орталықтары, СПА және массаж салондары/орталықтары/кабинеттері, моншалар, сауналар, бассейндер, жағажайлар, типографиялық көрсетілетін қызметтер, тігін ательесі, фотосалондар, аяқ киім шеберханалары, гүл дүкендері, аяқ киім, киім жөндеу, ұйымдастыру техникасын жөндеу жөніндегі сервис, нотариус, бухгалтер және консалтинг, маникюр және педикюр, косметологиялық қызметтерді көрсету жөніндегі объектілер.
Құжат 6 қыркүйек күні сағат 0.00-ден бастап күшіне енеді. Қаулының толық мәтінін&nbsp;<a href="https://www.gov.kz/memleket/entities/kkkbtu/press/news/details/250844?lang=ru">мына</a>&nbsp;жерден көруге болады.

Жаңа қаулы: Қандай нысандардың қызметкерлері вакцина салғызбаса, жұмысқа кіргізілмейді?

<a href="https://kyzylorda-news.kz/">Kyzylorda-news.kz</a>. Елімізде жыл сайын қыркүйек айының алғашқы жексенбісінде мұнай-газ кешені қызметкерлері күні аталып өтіледі. Осыған орай бүгін Қазалы ауданы әкімдігінің мәжіліс залында газ шаруашылығы саласының мамандары марапатталды.
Басқосуда аудан әкімі Мұхтар Оразбаев мереке иелерін құттықтап, өңірдің әлеуметтік-экономикалық дамуына қосқан үлестері үшін газ шаруашылығы саласының мамандарына алғыс айтты.
Мұнан соң «Қаз Транс Газ Аймақ» АҚ Қызылорда өндірістік филиалы Әйтеке би газ шаруашылығы мекемесінің бір топ қызметкерлеріне аудан әкімінің «Алғыс хаты» тапсырылып, құрмет көрсетілді.
Мерекелік шарада облыстық мәслихат депутаты, «Тілеп» ЖШС директоры Ібайдулла Тілеп, аудандық мәслихат депутаты, аймақтық «Тұран Қазалы» газетінің бас редакторы Ғазиз Әліш құттықтау сөз сөйлеп, игі тілектерін жеткізді. Ал, «Қаз Транс Газ Аймақ» АҚ Қызылорда өндірістік филиалы Әйтеке би газ шаруашылығының директоры Қуаныш Сансызбаев мереке қарсаңында сала қызметкерлеріне көңіл бөліп, марапаттап жатқан аудан әкіміне алғысын айтты.
<img src="https://kyzylorda-news.kz/wp-content/uploads/2021/09/6382fdb5-7b7a-49f7-b796-5c7f7dd3529c.jpg" alt="" />

Қазалыда мұнай-газ саласының қызметкерлері марапатталды

<a href="https://kyzylorda-news.kz/">Kyzylorda-news.kz</a>.&nbsp;Қызылорда облысында бір жыл ішінде шағын және орта кәсіпкерлік саласында 7 679 жаңа жұмыс орны ашылған. Өткен жылмен салыстырғанда өсім – 8,5%.
Бұл туралы Қызылорда облысы кәсіпкерлер палатасының директоры Ғалымбек Жақсылықов Жолдауды талқылауға арналған активте айтты.
<blockquote>
 «Мемлекет пандемия кезінде кәсіпкерлерге ауқымды қолдау көрсетті. Салықтан босатылды.Облыста 460 кәсіпкерлік субъектінің несиелері бойынша төлемі кейінге шегерілді. Экономиканың зардап шеккен салаларындағы 40 кәсіпкердің жоғары пайызбен алынған несиелері 6%-ға дейін субсидияланды.Айналым қаражатын жеңілдетіп беру жөніндегі несиелендіру бағдарламасы іске қосылды. Шектеу шаралары кезең-кезеңімен алынып, реттеліп жатыр», – деген Палата басшысы осы қолдаулардың арқасында пандемияның салдарына қарамастан шағын және орта кәсіпкерліктің дамуында оң өзгерістер бар екенін жеткізді.
</blockquote>
Аймақта кәсіпкерлердің саны да артқан. 1 тамыздағы деректер бойынша Қызылорда облысында жұмыс істеп тұрған кәсіпкерлік субъектілерінің саны 50 357-ге жетіп, былтырғы осы кезеңмен салыстырғанда 9,1 %-ға немесе 4 204 нысанға артқан.
Ғалымбек Жақсылықов активте биылғы Жолдауда бизнес жобаларды жеңілдікпен несиелендірудің мемлекеттік бағдарламасы – «Қарапайым заттар экономикасының» бір жылға ұзартылғаны кәсіпкерлер үшін жақсы жаңалық болғанын атап өтті.
2019 жылдан бастап іске аса бастаған «Қарапайым заттар экономикасы» бағдарламасын орындау барысында Қызылорда облысында 10 млрд&nbsp; теңгені құрайтын 121 жоба іске қосылды. Осы жобалардың шеңберінде 589 жұмыс орны ашылды.
<blockquote>
 «Бұл бағдарлама биыл аяқталуы керек еді. Енді міне Жолдауда тағы бір жылға созылды. Қуантарлық жағдай, өйткені әлі де 9 млрд теңге тұратын 49 жоба қаралып жатыр», – деді жиында Кәсіпкерлер палатасының директоры.&nbsp;&nbsp;&nbsp;
</blockquote>
Палата басшысы Ғалымбек Жақсылықов мәжілісте банктердің агроөнеркәсіп кешеніндегі жобаларды қаржыландыруға ынтасы төмендігін де көтерді. Бұған қоса, банктер ауылдардағы үй-жайларды кепіл мүлік ретінде қарастырмайды .
<blockquote>
 «Ел Президенті банктер шағын жобаларға, әсіресе, ауылға арнап ақша салмайтынын қадап айтып, микроқаржы ұйымдарының әлеуетін іске қосуды тапсырды. Биыл «Атамекен» Ұлттық кәсіпкерлер палатасы мен облыстық әкімдік Atameken Qyzylorda микроқаржы ұйымын құрды. Бұл қаржы ұйымы «Бастау Бизнес» жобасының түлектерін несиелендіреді. Биылға 1 млрд теңге қаржы қарастырылған, оған 238 жоба несиелендіріледі деп жоспарланып отыр», &nbsp;– деді Палата директоры.
</blockquote>
Ғалымбек Жақсылықов облыстың активінде мектептердегі орын тапшылығын да көтерді.
Жолдауда Президент 2025 жылға дейін 1000 мектеп салуды міндеттеді. Мектептерді бюджет қаржысына салумен қатар, осы өзекті мәселені шешуге жеке секторды да тартқан жөн екенін атап өтті.
<blockquote>
 «Біздің облыста жеке мектептер салу бойынша оң тәжірибе бар. Бүгінгі таңда жергілікті кәсіпкерлер жан басына шаққандағы қаржыландыру тетігі негізінде 5000 оқушыға 12 жеке мектепте білім алуға жағдай жасаған. Дегенмен, Білім және ғылым министрлігінің мәліметтері бойынша Қызылорда қаласында&nbsp; 7 мыңнан астам оқушыға орын жетіспейді. 2023 жылға дейін бала саны тағы бірнеше мыңға көбейеді. Өткен жылдың өзінде 21 мың бала дүниеге келген», – деді Кәсіпкерлер палатасының басшысы.
</blockquote>
Ол осы тапшылықты жою үшін жер учаскелерін бөліп, жергілікті ірі кәсіпкерлерді жеке мектеп салуға тартуды ұсынды.&nbsp; Өтемақы қаражатының республикалық бюджеттен бөлінетінін, жергілікті бюджетке ауыртпалық жоқ екенін атап өтті.
Жиында Ғалымбек Жақсылықов еңбекақы қорының жүктемесін 34%-дан 25%-ға дейін төмендету туралы шешімнің кәсіпкерлер үшін жақсы жаңалық екенін айтты. Бұл мәселені «Атамекен» бірнеше жылдан бері көтеріп жүр. Бұл жұмысшылардың еңбекақысының өсуіне және еңбек қатынастарының көлеңкеден шығуына оң ықпал етері сөзсіз.

Қызылордада кәсіпкерлік саласында 8 мыңға жуық жаңа жұмыс орны ашылған

<a href="https://kyzylorda-news.kz/">Kyzylorda-news.kz</a>. Бүгін облыс әкімі Гүлшара Әбдіқалықованың төрағалығымен Қазақстан Республикасының Президенті Қасым-Жомарт Кемелұлы Тоқаевтың «Халық бірлігі және жүйелі реформалар – ел өркендеуінің берік негізі» атты Жолдауынан туындайтын міндеттерді айқындайтын кеңейтілген жиын өтті.
Жиынға тиісті әкім орынбасарлары, басқарма басшылары, салалық департамент басшылары мен селекторлық режимде Қызылорда қаласы мен аудан әкімдері қатысты.Аймақ басшысы өңір экономикасының алдағы даму стратегиясына тоқталды.
<blockquote>
 «Мемлекет басшысы пандемиядан кейінгі кезеңдегі елді одан әрі дамытуға, денсаулық сақтау жүйесінің тиімділігін арттыруға, сапалы біліммен қамтуға, өңірлік саясатты жетілдіруге, адам құқығын қорғауға бағытталған бастамаларын жариялады. Осылайша, қазақстандықтардың әл-ауқатын арттырудағы 5 бастама айқындалды. Жолдауда айтылған барлық бағыттар бойынша облыста нақты шаралар қабылданып, іске асырылатын болады», – деді Гүлшара Әбдіқалықова.
</blockquote>
ҚР Президенті Қасым-Жомарт Тоқаев «Саяси жаңғыруды біртіндеп жүзеге асыру – мемлекетіміздің стратегиялық бағдарының басым міндетінің бірі» деп атап өтті. Бұл бағытта облыстық мәслихат хатшысы Наурызбай Байқадамов баяндама жасады. Ал, Мемлекет басшысының Өңірлерді дамыту жоспарларын бекітілген жалпыұлттық міндеттерге сәйкес жаңарту және бюджет үдерістерін жеңілдетіп, бюрократияны барынша азайту, сондай-ақ, бюджетті жоспарлау мен орындау кезінде цифрлық тәсілдерді қолдану, бюджеттік бағдарламалар әкімшілерінің жауапкершілігін арттыра отырып, бөлшектенген бюджетті енгізу тапсырмасына сәйкес облыстық экономика және бюджеттік жоспарлау басқармасының басшысы Нұрғали Қордабай сөз сөйледі.
Жолдауда жер қойнауын пайдалану саласына, әсіресе геологиялық барлау және жер қойнауын кешенді зерттеу ісіне тың серпін қажет екені, геологиялық ақпараттың ашық цифрлық мәліметтер базасын құрып, оны инвесторлар үшін қолжетімді ету керек екені көрсетілген. Өңірдің алдағы инвестициялық мүмкіндіктері жөнінде облыстық индустриялды-инновациялық даму басқармасының басшысы Ринат Сұлтангереев тарқатып берді. Аймақ басшысы Гүлшара Әбдіқалықова геологиялық барлау және жер қойнауын кешенді зерттеу бойынша тиісті министрлікпен жұмысты қарқынды түрде жүргізуді тапсырды. Президент Жолдауында Қазақстанның ауыл шаруашылығының әлеуеті орасан зор екені айтылды. Бірақ, агроөнеркәсіп кешені саласында қордаланған проблемалар да аз емес. Ең алдымен, бұл – азық-түлік тауарларының бағасын белгілеуді, оны бөліп-таратудың тиімсіз жүргізілуі. Осы ретте облыстың аграрлық әлеуеті және Жолдаудан туындайтын міндеттерді орындауда нақты жүйелі жұмыстар туралы облыстық ауыл шаруашылығы басқармасының басшысы Талғат Дүйсебаев нақты басымдықтарға тоқталды.
Жиын барысында облыс әкімі ауылшаруашылық саласына қатысты бірқатар тапсырма жүктеді.
<blockquote>
 «Азық-түлік өндірісімен қамтамасыз ету балансын есептей отырып, ауыл шаруашылығы саласында әртараптандыру шараларын қабылдау қажет. Мал шаруашылығы саласында өндірілетін өнімдердің басым бөлігі жеке қосалқы шаруашылықтардың үлесінде болғандықтан, оларды қажетті жайылымдық жерлермен қамтылуы мәселесін заңдастыруды ұйымдастырып, ауылдық елді мекендерде кооперациялау жұмысын дамыту аясында жеке қосалқы шаруашылықтарды кооперцияға тарту бойынша жұмыстарын жандандыру міндеті қойылады. «Алқаптан сөреге дейін» пилоттық жобаның іске асыруы бойынша Жамбыл облысының тәжірибесін зерттеп, өңірге енгізу шараларын қабылдауды және суармалы сумен қамтамасыз үшін, су үнемдеу технологияларын кеңінен енгізуді тапсырамын», – деді Гүлшара Әбдіқалықова.
</blockquote>
Сондай-ақ, облыс әкімі көтерме-тарату орталығын қалыптастыратын инвестор тауып көтерме-тарату орталығын ашуды, қыркүйек айының соңына дейін субсидиялау қағидаларын толықтай қарастырып, өзгерістер енгізу үшін жүйелі проблемалар бойынша тиісті ұсыныстарды орталық атқарушы органдарға жолдауды, әлеуметтік маңызы бар негізгі азық-түлік таурларының бағаларын тұрақтандыру мақсатында өңірлік тұрақтандыру қорының мамандандырылған мекемесі арқылы уақытылы сатып алу интервенцияларын жүргізуді жүктеді.
Мемлекет Басшысы «Қарапайым заттар экономикасы» және «Бизнестің жол картасы» бағдарламаларының мерзімін 2022 жылға дейін ұзарту туралы шешім қабылдады. Сонымен бірге, Еңбекақы төлеу қорына түсетін салмақтың өзі барынша түсінікті әрі қарапайым болуы қажет. Бұл, әсіресе, микро және шағын кәсіпкерлік саласында қатты сезіледі. Мұндай бизнес үшін жиынтық салмақты 34 пайыздан 25 пайызға төмендете отырып, еңбекақы төлеу қорынан бірыңғай төлем енгізуді тапсырды. Қызылорда облысы кәсіпкерлер палатасының директоры Ғалымбек Жақсылықов осы міндеттерді жүзеге асыру барысын тілге тиек етті.
Жолдауда көтерілген әйелдердің қоғамдағы экономикалық және саяси ұстанымын барынша қолдауды қамтамасыз ету, «Халық үніне құлақ асатын мемлекет» тұжырымдамасын өзектендіру бойынша жобаларды іске асыруда азаматтық қоғам өкілдерінің рөлі маңызды. Осы ретте алдағы іске асатын жобалар бойынша «Азаматтық альянс» заңды тұлғалар бірлестігі» қауымдастығының төрайымы Анар Ізден сөз сөйлеп, бірқатар ұсыныстарын ортаға салды.
Жиын соңында облыс әкімі Мемлекет басшысының Жолдауында ұтымды ұсыныстар, кесімді пікірлер мен нақты тапсырмалар берілгенін айтып, бірқатар міндеттерді жүктеді.
<blockquote>
 «Ел Президенті қысқа мерзімде Үкіметке Ұлттық Жоспарды әзірлеп бекітуді тапсырды. Осы құжаттың аясында Қызылорда облысының өңірлік даму жоспары әзірленуі керек. Қазан айына дейін аталған құжат қабылдануы тиіс. Сонымен бірге, Қызылорда қаласының және аудан әкімдерінің жекелей жаңадан даму бағдарламалары қабылдануы қажет. Жолдау негізінде қабылданатын өңірлік даму бағдарламасы арқылы алдағы міндеттерімізді айқындап, нақты жоспарларды іске асыруға жұмыс жасаймыз», – деді Гүлшара Әбдіқалықова.
</blockquote>

Гүлшара Әбдіқалықова: Жолдауда айтылған барлық бағыттар бойынша нақты шаралар іске асырылатын болады

<a href="https://kyzylorda-news.kz/">Kyzylorda-news.kz</a>. Қазіргі уақытта әлемнің дамыған елдерінің көпшілігі вакцинациядан кейін ғана жүктілікті жоспарлау керек деп санайды. Бұл жағдайда тек әйелі ғана емес ерінің де вакцина алғаны абзал. Бұл туралы Өңірлік коммуникациялар қызметінде өткен баспасөз конференциясында №6 қалалық емхананың акушер-гинеколог дәрігері Индира Ермаханова мәлімдеп, вакцинаның жүктілікке әсерін түсіндіріп берді.
Айтуынша облыста коронавирус пен пневмонияға шалдыққан жүкті әйелдер саны көбеюде. Індеттің салдарынан мерзімінен бұрын босану және түсік тастау жағдайлары тіркелген. Акушер-гинеколог аурудың өршуін нәзік жандарда жүктілік кезіндегі иммуносупрессия және басқа физиологиялық өзгерістердің болуымен байланыстарады. Өзгеріс салдарынан тыныс алу және ауыр пневмонияға жоғары сезімталдық туындап, өкпені жасанды желдетуге мәжбүр етеді
<blockquote>
 «Пандемияның басында жүкті әйелдердің көпшілігі ауруды жеңіл түрде өткізген болатын. Алайда «Дельта» штамының пайда болуымен жағдай күрт өзгерді. Қазір жүкті әйелдердің көпшілігі ауруханаларда КВИ-мен емделуде. Жағдайлары асқынып барады. Егер аяғы ауыр әйел коронавирус жұқтырып алса, оқшалану керек және ауруды растау немесе теріске шығару мақсатында диагностикалық зерттеулер жүргізу қажет”,- деді Индира Елдесқызы.
</blockquote>
Сонымен қатар дәрігер қазақтандық репродуктологтардың тәжірибесінде коронавирус ер адамдарда сперматогенезге кері әсер етіп, шәуіт жасушаларын азайтып, сапасын төмендететіндігі және бұл жағдайдың 3 айға дейін созылатындығы анықталғандығын атап өтті. Сондықтан жүктілікті жоспарламас бұрын ер адамдардың вакцина алғаны дұрыс деген пікірде. Сондай-ақ акушер-гинеколог ковидтің белгілері байқалса тез арада дәрігерге тексерілу керектігін, өз бетінше емделудің кесірінен ауру асқынып, ауыр жағдайға әкелуі мүмкін екенін жеткізді.
<img src="https://kyzylorda-news.kz/wp-content/uploads/2021/09/241226791_1363894577339384_2736340188275852460_n.jpg" alt="" />

Индира Ермаханова: Вакцинадан кейін жүктілікті жоспарлауға болады

<a href="https://kyzylorda-news.kz/">Kyzylorda-news.kz</a>. Қазақстандық астролог Ирина Әбдірайымова күздің бірінші айына болжам жасады, деп хабарлайды Sputnik Қазақстан.
Қыркүйек тыныш болмайды
<blockquote>
 “Қыркүйек жағымды-жағымсыз оқиғаларға толы, тыныш болады деп айтуға келмейді. Жалпы, осы жылдың күзі мен қысы беймаза мезгіл. Бұл айда кредит алмаған дұрыс, себебі несиені уақытында төлеу қиынға соғады. Егер осы айда сізді мазалап жүрген проблемаларды кейінге қалдырсаңыз, қазан айының ортасында олармен тағы да бетпе-бет келесіз. Сондықтан қиындықтан қашпай, оны шешу жолын тапқан жөн”, – деді Әбдірайымова.
</blockquote>
Сондай-ақ, жұлдызнамашы аса қажеттілік болмаса, ұзақ сапарға шықпауға кеңес берді.
Айтуынша, қыркүйек – ұзақ мерзімге жоспар құрып, қордаланып қалған түйткілдердің түйінін тарқатуға таптырмас уақыт. Жаңа іс бастамай, керісінше бұрынғы істі соңына дейін жеткізген дұрыс.
Маман қыркүйектің үшінші онкүндігі мен қазанның оны аралығында адамдар еркіндік пен әділдік іздеп, наразылықтар болуы мүмкін екенін болжады.
Сонымен қатар, бұл кезеңде күмәндану, ашушаңдық, алаяқтық, алдау байқалады. Жағымсыз хабар да алуыңыз мүмкін. Көп адамға ортақ бизнес, мұрагерлік, алимент, қарыз, салықпен байланысты проблемаларды шешуге тура келеді.
Радикалды әрекеттерге үндейтін митингтер болуы ғажап емес. Ұрыс-керістен аулақ жүрмесеңіз, соңы төбелеспен аяқталуы мүмкін.
Сондай-ақ, қыркүйек – ынтымақтастыққа, бірлескен жұмысқа, келісімшарт бекітуге қолайсыз кезең.
Әбдірайымованың айтуынша, күздің бірінші айында ота жасатпаған жөн.
Айдың әр күніне болжам 
1 қыркүйек – логика, байыптылық, дау-жанжалдан аулақ болуға тырысу.
2-3 қыркүйек – өз-өзіңе көңіл толмау, озбырлық, қоғамға жат қылық. Бұл күндері жол апаты болуы мүмкін, берілген уәде орындалмайды, алаяқтар іс-әрекетке көшеді.
4 қыркүйек – логика іске қосылады.
5-6 қыркүйек – төбелес пен ашушаңдық.
7 мен 10 қыркүйек аралығы – бүкіл алауыздықты бейбіт жолмен шешуге болады. Сондықтан 3 мен 6 қыркүйек күндері дау-жанжалдан барынша аулақ жүріңіз, ашуды жеңген кезде ғана дау-дамай оңай шешіледі.
11 қыркүйектен бастап адамның ішкі жан-дүниесіндегі тартыс, қарама-қайшылық аласұрады.
13-14 қыркүйек – алдап-арбаудан, өзін-өзі алдаудан сақтаныңыз, айналада болып жатқан оқиғаға байыппен қарауға тырысыңыз.
Тағы оқыңыз: Алматыда ертеңнен бастап карантин жеңілдетіледі
16-17 қыркүйек – жұмыс қабілеті, белсенділік артады. Сондай-ақ күмән, қызғаншақтық, сараңдық сияқты жаман қасиеттер байқалады, олардың жетегінде кетпеңіз.
18-19 қыркүйек – позитив, жарқын ой, жаңа жоспар, сәтті таныстық.
Ал 20 қыркүйектен бастап айдың соңына дейін айтарлықтай күрделі кезең.
22-23 қыркүйек – ғашықтардың жолы екіге айырылуы мүмкін, бірақ егер ол адам сізге қымбат болса, бұған жол бермеңіз.
Адам бұл кезеңде болатын оқиғаларды өзгертуге қауқарсыз, сондықтан ондай жағдайларға тек басқа көзқараспен қарауды үйрену керек. Айналаңызда не болып жатқаны маңызды емес, ең бастысы, сіздің сол оқиғаларды қалай қабылдайтыныңыз. Эмоцияға ерік берсеңіз, қате шешім қабылдап қоюыңыз мүмкін.

Астролог қыркүйек айына болжам жасады

<a href="https://kyzylorda-news.kz/">Kyzylorda-news.kz</a>. Қасым-Жомарт Тоқаев VI Шығыс экономикалық форумының пленарлық мәжілісіне бейнебайланыс режимінде қатысты, деп хабарлайды Ақорданың&nbsp;<a href="https://www.akorda.kz/kz/kazakstan-prezidenti-vi-shygys-ekonomikalyk-forumynyn-plenarlyk-mazhilisine-katysty-381118">ресми сайты</a>.
Сонымен қатар аталған жиында Ресей Президенті Владимир Путин мен Моңғолия Президенті Ухнаагийн Хурэсух спикер ретінде сөз сөйледі. ҚХР Төрағасы Си Цзиньпин, Үндістан Премьер-Министрі Нарендра Моди, Таиланд Премьер-Министрі Прают Чан-Оча форумның қатысушыларына бейнеүндеу жасады.
<img src="https://www.inform.kz/radmin/fotofiles/2021/09/03/2109031551218560g.jpg" alt="" />
Мемлекет басшысы сөйлеген сөзінде осындай маңызды жиынға қатысуға шақырғаны үшін Ресей Президентіне ризашылық білдірді. Қазақстан Президенті аталған форумның экономикалық ынтымақтастықтың мейлінше өзекті проблемалары бойынша, шын мәнінде, беделді халықаралық диалог алаңына айналғанын атап өтті.
Қасым-Жомарт Тоқаев Қазақстан үшін бұл аймақтың стратегиялық серіктес ретінде маңызы зор екенін айтты. Өйткені өңір географиялық жағынан Еуразияны қарқынды дамып келе жатқан Азия Тынық Мұхит аймағымен түйістіреді.
<blockquote>
 – Қазақстан Орталық Азиядағы экономикасы ең ірі ел ретінде өзінің аталған аймақпен қарым-қатынастарын күшейтуді жоспарлап отыр. Мұндай қадам еліміздің Азиядағы серіктестерімен арадағы байланыстарға зор мән беретінін көрсетеді. Біздің стратегиялық серіктесіміз әрі одақтасымыз, ұлы еуразиялық алпауыт ел – Ресей Федерациясымен жан-жақты ынтымақтастық орнату Қазақстанның еуразиялық стратегиясының негізгі элементі болып табылады, – деді Мемлекет басшысы.
</blockquote>
<img src="https://www.inform.kz/radmin/fotofiles/2021/09/03/2109031551227261g.jpg" alt="" />
Мемлекет басшысы өзара ықпалдастықты күшейту үшін бірқатар бағытқа егжей-тегжейлі тоқталды.
Қазақстан Президенті тиімді көлік инфрақұрылымын қалыптастырудың маңыздылығына баса мән берді. Сондай-ақ транзиттік тораптарды дамытуда еліміздің әлеуеті мен мүмкіндіктері жөнінде, соның ішінде, осы саладағы ұлттық жоспарларды Еуразиялық экономикалық одақтың қызметімен және Қытайдың «Бір белдеу, бір жол» жаһандық бастамасымен ұштастыру туралы кеңінен айтты.
<blockquote>
 – Қазақстан транзиті өзінің экономикалық тұрғыдан тартымдылығы мен сенімділігін дәлелдеді. Сондықтан инфрақұрылымды жетілдіру ісін жалғастыра береміз. Атап айтқанда ҚХР-мен арадағы транзиттік қатынастарды кеңейту үшін «Достық – Мойынты» жаңа темір жол бағытының құрылысын бастаймыз. Инвестицияның жалпы көлемі 2 миллиард доллардан асады, – деді Президент.
</blockquote>
Қасым-Жомарт Тоқаев аймақтың әлеуетін арттыру үшін ынтымақтастықтың жаңа формасын қалыптастыру жөніндегі Шығыс экономикалық форумының идеясына қатысты ой-пікірін ортаға салды.
<blockquote>
 – Біздің ортақ мүддеміз инвестиция тартып, жаңа жұмыс орындарын ашатын және келешекте орнықты дамуды қамтамасыз ететін өсімнің жаңа көздерін табу, – деді Президент.
</blockquote>
<img src="https://www.inform.kz/radmin/fotofiles/2021/09/03/2109031551246062g.jpg" alt="" />
Осы ретте Мемлекет басшысы Қазақстан мен Ресей арасындағы тау-кен металлургиясы, цифрландыру, коронавирус індетіне қарсы вакцина әзірлеу, қаржы, ғарыш, мұнай-газ, жаңартылатын энергия көздері, автомобиль жасау салалары бойынша табысты жүзеге асырылып жатқан бірлескен жобалар жөнінде, сондай-ақ, жыл сайын өтетін Өңіраралық ынтымақтастық форум туралы айтты.
Бұдан бөлек Қасым-Жомарт Тоқаев ҚХР мен Оңтүстік Корея арасындағы ықпалдастыққа бағытталған осыған ұқсас бірлескен жобалар жайында мәлімет берді.
<blockquote>
 – Жалпы, шетел инвестициясын тарту – еліміздің экономикалық саясатының сөзсіз басымдығы. Қазақстанға 365 миллиард доллардан астам шетелден тікелей инвестиция тартылды. Тіпті былтырғы дағдарыстың өзінде Қазақстанға тартылған инвестицияның көлемі 35 пайызға артты, – деді Президент.
</blockquote>
Сонымен қатар Қасым-Жомарт Тоқаев Азия Тынық Мұхит аймағы елдерімен іскерлік байланыстарды нығайтудың перспективаларына тоқталды. Мемлекет басшысы Қазақстанның бұл өңірмен арадағы тауар айналымы былтыр 43 миллиард доллардан асқанын атап өтті. Соның 94 пайызы Ресей, Қытай және Корея елдеріне тиесілі.
<blockquote>
 – Сауда-саттықты одан әрі дамытып, оның географиясын кеңейту үшін әлеуетіміз жетеді деп санаймын. Осы ретте, әлемдік сауда-экономикалық қоғамдастықта маңызды орын алуға уәде беріп отырған Еуразиялық экономикалық одақтың рөлін ерекше атап өту керек, – деді Қасым-Жомарт Тоқаев.
</blockquote>
<img src="https://www.inform.kz/radmin/fotofiles/2021/09/03/2109031551260063g.jpg" alt="" />
Мемлекет басшысы өз сөзінде азық-түлік қауіпсіздігін жаһандық деңгейде қамтамасыз етуге бағытталған ықпалдастық орнатудың маңызды екенін атап өтті.
Қасым-Жомарт Тоқаев әлемдегі ауыл шаруашылығы дамыған елдердің мүмкіндіктеріне сілтеме жасай отырып, мұқтаж адамдарды сапалы әрі арзан азық-түлікпен қамтамасыз ету үшін бірлесе күш жұмылдыруға шақырды. Осы ретте Президент Қазақстанның аграрлық әлеуеті туралы, соның ішінде, отандық өңделген өнімді сыртқы нарыққа экспортқа шығару жөнінде айтты.
<blockquote>
 – Қазақстан мен Ресейдің салалық ведомстволары ауыл шаруашылығы өнімдерін үшінші елдердің нарығына шығару мақсатында күш жұмылдыру мүмкіндігін қарастыра алар еді. Қазақстан ауыл шаруашылығы өнімдерін ҚХР-ға экспорттау үшін номенклатураны кеңейту мәселелері бойынша Қытаймен жұмыс істеп жатыр. Азық-түлік тасымалдау саласындағы ұзақмерзімді ынтымақтастық көлік-транзит саласы сияқты өңірлік кооперацияны дамытудың тиімді үлгілерінің бірі бола алады, – деді Мемлекет басшысы.
</blockquote>
Қасым-Жомарт Тоқаев көміртекті азайта отырып дамуға көшуді Форумдағы өзекті тақырыптардың бірі ретінде атады. Осы ретте, ол көмір өнеркәсібіне тартылатын инвестицияның азаюына және мұнай-газ секторын қаржыландыру деңгейінің төмендеуіне байланысты туындауы мүмкін қиыншылықтарға баса мән берді. Оның пікірінше, бұл жағдайлар елдеріміздің экономикасына қатер төндіреді. Мұның салдары ресурс тапшылығына, инфляцияға және тұрмыс деңгейінің төмендеуіне алып келуі мүмкін.
<blockquote>
 – Аталған мәселеге барынша прагматикалық тұрғыдан, мүмкіндігінше, үйлесімді тұрғыдан келу керек деп есептеймін. Алдағы уақытта әрбір ел технологиялық және экономикалық құрылыс трансформациясына байланысты қиыншылықты бастан өткереді. Бұл, әрине, ұлттық экономикаға қауіп төндіреді. Бірақ бұл қатерді тек өңірлік, әсіресе жаһандық деңгейде бірлесе жеңуге болады, – деді Президент.
</blockquote>
Мемлекет басшысы сөзін қорытындылай келе, елеулі технологиялық прогресс пен тұрмыс сапасының артуына қарамастан, қауіпсіздік тұрғысынан әлем одан сайын әлсіз бола түскенін айтты.
– Қазақстан Еуразия – «біздің ортақ үйіміз» деген ұстанымды қолдайды. Біз барлық сала бойынша сындарлы ынтымақтастықты жалғастыруға дайынбыз. Керемет құрлығымыздағы мемлекеттер өзара тиімді сауда-саттық пен экономикалық ынтымақтастық арқылы ортақ әрі жарқын болашақ идеясы жолында бір жағадан бас, бір жеңнен қол шығарған қоғамдастық бола алар еді. Мұндай әдіс өңірлік және жаһандық кооперацияны дамытуға, экономикадағы өсімнің жаңа көздерін қалыптастыруға тың серпін беретіні сөзсіз, – деді Қасым-Жомарт Тоқаев.
Мемлекет басшысы форум аясында Ресей Президенті Владимир Путинмен бірге Қазақстан Үкіметі мен СБЕР компаниялар тобы арасында цифрлық трансформация, цифрландырудың платформалық моделіне көшу жобалары мен Data-Driven Government тұжырымдамасын жүзеге асыру саласындағы ынтымақтастық туралы меморандумға қол қою рәсіміне қатысты. Аталған құжатқа Қазақстан тарапынан Премьер-Министр Асқар Мамин, Ресей жағынан «Сбербанк» ЖАҚ басқарма төрағасы Герман Греф қол қойды.
Қасым-Жомарт Тоқаев қол қойылған Меморандумға қатысты түсіндірме жасай отырып, бұл жоба екі мемлекеттің бір-біріне деген өзара сенімін білдіретінін атап өтті. Сондай-ақ сипаты жағынан шын мәнінде стратегиялық бастама екеніне назар аударды.
<blockquote>
 – 15 жылдан астам уақыт біздің нарықта табысты жұмыс істеп келе жатқан СБЕР-дің қазақстандық мемтехтың институционалдық негізін қалыптастыруға атсалысуы Қазақстан мен Ресей арасындағы ынтымақтастықты зияткерлік технология сияқты аса маңызды сала арқылы жан-жақты ете түседі. Шын мәнінде, бұл өте маңызды қадам. Бұл стратегиялық жобаның жүзеге асырылуы Қазақстан азаматтарының тұрмыс сапасын арттыруға және бизнес-климатты жақсартуға ықпал ететіні сөзсіз, – деді Қазақстан Президенті.
</blockquote>
Өз кезегінде Ресей Президенті Владимир Путин СБЕР-ді стратегиялық серіктес ретінде таңдағаны үшін Қасым-Жомарт Тоқаевқа алғыс білдірді.
<blockquote>
 – Бүгінгі бірлескен жұмыстар жемісті әрі нәтижелі болады деп санаймын. Бұл елдеріміз бен халықтарымыз арасындағы толыққанды әрі маңызды серіктестікті одан әрі нығайтуға ықпал етеді, – деді Ресей Президенті.
</blockquote>

Қазақстан Президенті VI Шығыс экономикалық форумының пленарлық мәжілісіне қатысты

<a href="https://kyzylorda-news.kz/">Kyzylorda-news.kz</a>.&nbsp;&nbsp; Бүгін Қазақстан Республикасының Ақпарат және қоғамдық даму министрлігінің қолдауымен Қызылорда облысының ішкі саясат басқармасының ұйымдастырумен этносаралық қатынас тілі ретінде мемлекеттік тілдің қолданыс аясын кеңейту арқылы қазақстандық бірегейлікті қалыптастыру мақсатында «Тәуелсіздік – басты құндылығымыз!»&nbsp;тақырыбында жалпықазақстандық ашық диктант өтті.
Ауқымды шара этномәдени бірлестік өкілдері, жастар ұйымдарының өкілдері, мемлекеттік және азаматтық қызметкерлер, кітапхана қызметкерлерінің, этнос жастарының, үкіметтік емес ұйым өкілдерінің қатысуымен өтті. Достық үйінде, облыстық Ә.Тәжібаев атындағы облыстық әмбебап-ғылыми кітапханасында, облыстық Жастар ресурстық орталығында және барлық аудандардарда ұйымдастырылды. Диктант мәтінін облыстық тілдерді оқыту орталығының мамандары оқыды.
Облыс әкімдігінің мәжіліс залында өткізілген диктант жұмысына облыстық басқармалардан 20-дан аса мемлекеттік қызметкер қатысты.

Жалпықазақстандық ашық диктант өтіп жатыр

<a href="https://kyzylorda-news.kz/">Kyzylorda-news.kz</a>. Құжатқа сәйкес, 6 қыркүйектен бастап Ashyq жобасына қатысушалардың жұмыс күндері қызмет көрсету уақыты 22.00-ден 00.00-ге дейін ұзартылды. Ashyq көшбасшыларына түнгі сағат 02.00-ге дейін жұмыс істеуге <a href="https://sputnik.kz/regions/20210903/18033712/Almaty-erten-karantin.html">рұқсат етілді.</a>
Алматыда карантин талаптарын жеңілдетуге бағытталған санитарлық дәрігердің жаңа қаулысы шықты.
4 қыркүйектен бастап Алматыда демалыс күндері Ashyq жобасына қатысушы нысандар 00.00-ге дейін, Ashyq&nbsp;көшбасшылары 02.00-ге дейін жұмыс істей алады.
Алайда қызметкерлер мен келушілердің статусы «жасыл» болуға тиіс. Бұл талап қонақүй, әуежай, вокзал, білім беру нысандары және т.б. мекемелерге қойылған. Талаптарды орындамаған нысандар Ashyq жобасынан шеттетіледі.
Қаулының толық нұсқасымен&nbsp;<a href="https://www.gov.kz/memleket/entities/departament-kkbtu-almaty/documents/details/208161?lang=kk">мына жерде</a>&nbsp;танысуға болады.

Ертеңнен бастап карантин талаптары жеңілдейді

<a href="https://kyzylorda-news.kz/">Kyzylorda-news.kz</a>. Қазіргі таңда мемлекет басшысының Жолдауында көрсетілген су ресурстарын тиімді пайдалану мәселесі өзекті. Өзімізге белгілі, биыл өңіріміздегі ауыл шаруашылық мамандары үшін оңай жыл болмады. Су тапшылығы сезілді. Жалпы суды үнемдеу мақсатында бірқатар ұсыныстар айтылды. Аталған мәселеге байланысты біздің ғалымдар зерттеулер жүргізді. Күріш өнімін алмастыру ұсынылды. Дегенмен біз толығымен бас тарта алмаймыз. Себебі, күріш біздің экологиялық дақыл болып табылады.
Сыр елі тұзды жер болғандықтан, күріш егуге &nbsp;міндеттіміз. Жерді сумен бастырып, тұзді төменгі қабаттарына көшіргеннен кейін басқа дақылдарды екі жыл егуге болады.Кейін қайтадан күрішті егуімізге тура келеді.&nbsp; Алдағы уақытта осы бағыттадұрыс ауыспалы егіндік жүйесін пайдалансақ, суды аз мөлшерде тұтына аламыз. Есесіне өнімде молынан болады.
Нұрбол Аппазов,
Қорқыт ата атындағы Қызылорда университетінің профессоры

Қазақстан және Қызылорда облысының жаңалықтары