<a href="https://kyzylorda-news.kz/">Kyzylorda-news.kz.</a> Қазақстан үкіметі ұлттық банкпен бірлесіп дағдарысқа қарсы іс-қимыл жоспарын әзірледі, деп хабарлайды <a href="https://sputnik.kz/20220225/ukraina-qaqtygys-qazaqstan-ukimeti-23098422.html">Sputnik Қазақстан.</a>
<blockquote>
 “Украинадағы оқиғаларға байланысты шұғыл әрекет ету мақсатында үкімет пен Ұлттық банк бірлескен іс-қимыл жоспарын дереу жүзеге асыруға кірісті. Ол жағдайдың Қазақстанға тигізуі мүмкін әлеуметтік-экономикалық салдарына қарсы бағытталады”, – делінген ресми хабарламада.
</blockquote>
Жоспар үш бағытта іске асырылады:
инфляцияны бақылау және валюта нарығындағы тұрақтылықты сақтау;
жұмыспен қамтуды қолдау және жаңа жұмыс орындарын құру;
кәсіпкерлікті дамытуға бағытталған шаралар.
Мәселен, қаржы нарығының тұрақтылығын және теңгемен ашылған депозиттердің тартымдылығын қамтамасыз ету мақсатында бюджет есебінен сыйақы төленеді. Осылайша, теңгелік салымдарды қорғау бағдарламасын іске асырылады.
Ал халықтың әл-ауқатын арттыру міндеттерін іске асыру бойынша ең алдымен ауылдық елді мекендерге, моно- және шағын қалаларға, елорда мен республикалық маңызы бар қалалар төңірегіне баса назар аударылады. 
Ол үшін биыл “Ауыл – Ел бесігі” жобасы, Өңірлерді дамытудың кешенді жоспары және басқа да бағдарламалар аясында республикалық бюджеттен 200 миллиард теңгеге дейінгі қаражат бөлінеді.
<blockquote>
 “Ауыл шаруашылығына арналған жерлерді айналымға қосымша тарту арқылы ауыл шаруашылығы кооперациялары мен отбасылық шаруашылықтарды дамыту үшін жағдай жасалады”, – дейді мамандар.
</blockquote>
Ал өндіріс саласында мемлекеттік қолдаудың негізгі бөлігі өнімділігі жоғары кәсіпорындарды технологиялық жаңғыртуға және дамытуға арналады. Ел экономикасын индустрияландыру және инвестициялық жобаларды іске асыру арқылы импорттық тауарларды алмастырудың маңызы зор. Мемлекеттік қолдауға ие болған кәсіпорындарға өз жұмыскерлерінің еңбекақысын, соның ішінде еңбек өнімділігін ұлғайту бойынша нақты міндеттер қойылады.
Осыған орай, биыл “Бизнестің жол картасы – 2025” бағдарламасын, атап айтқанда, кредиттерді субсидиялауды және кепілдендіруді қаржыландыру едәуір ұлғайтылады. Бұдан басқа, агроөнеркәсіп кешенін мемлекеттік қолдау тиімділігін арттыру мақсатында субсидиялау жүйесінің жаңа тәсілдері әзірленеді.
Ауыл шаруашылығы өнімдерінің өнімділігін ұлғайтуға және қайта тереңдете өңдеуге бағытталған жобаларға басымдық беріледі. Жылдың соңына дейін басым салаларда мемлекеттік органдардың 420-дан астам реттеу актісі қайта қаралады. Кәсіпкерлерге қойылатын талаптарға тексеру жүргізу басқа салалар бойынша да жалғасады. Үкімет, ұлттық банк пен “Атамекен” палатасы бағаны бақылап отырады.

Украинадағы қақтығыс: Қазақстанда қандай шаралар қабылданады?

<a href="https://kyzylorda-news.kz/">Kyzylorda-news.kz.</a> Олжас Бектенов Қазақстан Республикасының Сыбайлас жемқорлыққа қарсы іс-қимыл агенттігінің төрағасы лауазымына тағайындалды, деп хабарлайды Ақорданың баспасөз қызметі.
«Олжас Абайұлы Бектенов Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызметтің) төрағасы лауазымына тағайындалсын» делінген Президент қол қойған Жарлықта.
Бектенов Олжас Абайұлы 1980 жылы 13 желтоқсанда Алматы қаласында туған.
Қазақ мемлекеттік заң академиясын (2001 ж.) үздік бітірген, мамандығы «Заңгер».
2002-2005 жылдары Алматы қаласы Әділет басқармасы бөлімінің бас маманы.
2005-2006 жылдары ҚР Премьер-Министрі Кеңсесінің заң бөлімінің сарапшысы, бас сарапшысы.
2006-2009 жылдары ҚР Президенті Әкімшілігінде жұмыс жасады.
2009-2012 жылдары ҚР Әділет министрлігінің Тіркеу қызметі және құқықтық көмек көрсету комитеті төрағасының орынбасары.
2012-2014 жылдары ҚР Экономикалық қылмысқа жəне сыбайлас жемқорлыққа қарсы агенттігінің (қаржы полициясы) орталық аппаратында департамент бастығы.
2015-2016 жылдары Астана қаласы әкімінің аппарат басшысы, ҚР Президенті Әкімшілігі Басшысы Хатшылығының меңгерушісі.
2016-2017 жылдары Сыбайлас жемқорлыққа қарсы іс-қимыл Ұлттық бюросының (Сыбайлас жемқорлыққа қарсы қызмет) Астана қаласы бойынша департаментінің басшысы.
2017-2018 жылдары Ақмола облысы әкімінің орынбасары.
2018-2019 жылдары Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі Төрағасының орынбасары.
2019 жылдың маусымынан бастап Қазақстан Республикасының Сыбайлас жемқорлыққа қарсы іс-қимыл Агенттігі Төрағасының бірінші орынбасары қызметін атқарды.
ІІ дәрежелі «Айбын» орденімен наградталған (2014 ж.).

Олжас Бектенов ҚР Сыбайлас жемқорлыққа қарсы іс-қимыл агенттігінің төрағасы лауазымына тағайындалды

<a href="https://kyzylorda-news.kz/">Kyzylorda-news.kz.</a> Марат Ахметжанов Қазақстан Республикасының Ішкі істер министрі болып тағайындалды, деп хабарлайды Ақорданың&nbsp;<a href="https://akorda.kz/kz/mm-ahmetzhanov-turaly-251520">баспасөз қызметі.</a>
«Марат Мұратұлы Ахметжанов Қазақстан Республикасының Ішкі істер министрі болып тағайындалсын, ол Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызметтің) төрағасы лауазымынан босатылсын « деп жазылған ҚР Президенті қол қойған Жарлықта .
Ахметжанов Марат Мұратұлы 1964 жылы 22 желтоқсанда дүниеге келген.1991 жылы Е.А.Букетов атындағы Қарағанды мемлекеттік университетін бітірген, заңгер.
Еңбек жолын 1991 жылы тағылымгер қызметінен бастап, кейін Теміртау қаласы прокуратурасының тергеушісі болып қызмет атқарған.
1993-1996 жж. – Бас прокуратура жанындағы Сыбайлас жемқорлыққа қарсы күрес жөніндегі арнайы прокуратураның аса маңызды істер жөніндегі аға тергеушісі, Бас прокуратураның Аса қауіпті қылмыстарды тергеу басқармасы аймақтық тергеушілер бөлімінің бастығы.
1996-1997 жж. – Мемлекеттік тергеу комитетінің Аса қауіпті қылмыстарды тергеу басқармасының бөлім бастығы, Мемлекеттік тергеу комитетінің Әскери-тергеу департаменті тергеу басқармасының бастығы.
1997-1998 жж. – Ішкі істер министрлігінің Әскери-тергеу департаменті тергеу басқармасының бастығы.
1998-2001 жж. – Тергеу департаменті директорының орынбасары және Әділет министрлігінің Сот қаулыларын орындау комитеті төрағасының орынбасары.
2001-2003 жж. – Бас прокуратураның Тергеу және анықтау органдарындағы заңдылықты қадағалау департаментінің бастығы.
2003-2006 жж. – Павлодар облысының прокуроры.
2006-2009 жж.– Оңтүстік Қазақстан облысының прокуроры.
2009-2012 жж.–ҚР Бас прокуратурасы Құқықтық статистика және арнайы есепке алу жөніндегі комитетінің төрағасы.
2012-2014 жж. – ҚР Экономикалық қылмысқа және сыбайлас жемқорлыққа қарсы күрес агенттігі төрағасының орынбасары.
2014-2016 жж. – Атырау облысы Мемлекеттік қызмет істері және сыбайлас жемқорлыққа қарсы іс-қимыл департаментінің басшысы, Атырау облысы Сыбайлас жемқорлыққа қарсы іс-қимыл ұлттық бюро департаментінің басшысы.
2016-2021 жж. – Қазақстан Республикасы Бас Прокурорының орынбасары.
2021 жылдың 16 сәуірінен бастап Қазақстан Республикасының Сыбайлас жемқорлыққа қарсы іс-қимыл агенттігінің (Сыбайлас жемқорлыққа қарсы қызметтің) төрағасы болды.
«Құрмет» (2008) және ІІ дәрежелі«Даңқ» (2014) ордендерімен, «Қазақстан Республикасының Тәуелсіздігіне 10 жыл», «Қазақстан Конституциясына 10 жыл», «Астананың 10 жылдығы» мерейтойлық медальдарымен, «Ресей флотына 300 жыл» естелік медалі және «Адмирал Кузнецов» медальдарымен марапатталған.
Отбасылық жағдайы: Үйленген, екі бала тәрбиелеп отыр.

ҚР Ішкі істер министрі тағайындалды

<a href="https://kyzylorda-news.kz/">Kyzylorda-news.kz.</a>&nbsp; Қызылорда қаласындағы ЗК-169/4 мекемесінде&nbsp; 130-дан аса адам жазасын өтеп&nbsp; жатыр. Оның 100-ге жуығы&nbsp; жұмысқа орналастырылған.
<blockquote>
 «Жаза басып, жаңылғандарды қоғамға бейімдеп, еңбекке баулу мекемеде бірінші кезекте жолға қойылған.&nbsp; Қазіргі таңда&nbsp; 25 кәсіпкерлік нысанда келісім-шарт негізінде сотталғандар жұмыспен қамтылған. Олардың айлық табысының 50 пайызы мемелекетке, жеке тұлғаға келтірген шығындарын төлейді. Ал қалған бөлігін өздеріне, отбасыларына жаратады», – мекеменің сотталғандардың еңбегін ұйымдастыру тобының аға инспекторы&nbsp; Айгүл Ботпанова.
</blockquote>
Жуырда тағы 5 адам&nbsp; көлік жуу орталығына жұмысқа орналасты. Алдағы уақытта жазасын өтеушілерді көбірек еңбекке тартып, 100 пайыз жұмыспен қамту жоспарланған.

Қызылордада жазасын өтеушілер жұмыспен қамтылған

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Гүлшара Әбдіқалықова төтенше жағдайлардың алдын алу және оларды жою жөніндегі облыстық комиссияның кезекті отырысын өткізіп, 3 мәселені қарады. Атап айтсақ, су басу қаупі туындаған жағдайда қабылданатын шаралар, 2021-2025 жылдары елді мекендерде өрт сөндіру бекеттерін құру жоспарының орындалуы және орман, дала өрттері бойынша жергілікті атқарушы органдармен атқарылған жұмыс нәтижелері мен Конго-Қырым геморрагиялық қызбасының алдын алу жұмыстары.
Жиынға облыс әкімінің орынбасары Серік Ахмет, аппарат басшысы Ерлан Райғаниев, қала әкімі Ғанибек Қазантаев, салалық басқарма мен департамент басшылары және онлайн режимінде аудан әкімдері қатысты.
Алдымен облыстық жұмылдыру дайындығы басқармасының басшысы Мұса&nbsp;Қалдарбеков облыс көлемінде орналасқан елді мекендерді су басу қауіпі жоқ екендігін тілге тиек етіп, су алу қаупі туындамас үшін қажетті амалдар мен техникалардың дайындығы мәселесіне тоқталды. Мәселен, су тасқынына қарсы жұмыстарға пайдаланылатын материалдық-техникалық қорлар бойынша барлығы 161,2 тонна жанар-жағар май қоры және 118 700 дана қап сақтауда тұр. Сондай-ақ, Қызылорда қаласы мен аудандарда сең жүру кезеңінде халықты көшіруге арналған 83 эвакуациялық жинақтау және 102 қабылдау пункті дайындыққа келтірілген.
Екінші мәселеге қатысты облыстық төтенше жағдайлар департаменті бастығының міндетін атқарушы Буыржан&nbsp;Ізбасаров өткен жылы 13 өрт оқиғасы тіркелген. Бұл орман қорының былтырғы жылғы көрсеткішімен салыстырғанда 3,7 есеге төмен екендігін жеткізді.
Өрт қауіпті кезеңде құрамында 2027 адам, 8 өрт сөндіру автокөлігі мен 421 бейімделген техникасы және 21 мотопомпасы бар, барлығы 168 өртке қарсы ерікті құрылымы жасақталған. Сонымен қатар жергілікті атқарушы органдар, полиция қызметі, орман шаруашылығы мен төтенше жағдайлар қызметімен бірлесіп қала және аудандар бойынша&nbsp; құрамында 62 адам бар 14 мобильді топ&nbsp; құрылды. 2021 жылғы өрт қауіпті кезеңде мобильді топпен 514 рет рейдтік шара жүргізілді.
Аймақ басшысы «2021-2025 жылдарға мемлекеттік өртке қарсы қызметі жоқ елді мекендерде кезең-кезеңмен өрт бекеттерін құру» жоспарына сәйкес өрт сөндіру бекетін құруды және оларды бөлек ғимараттар мен қажетті құрал-саймандарымен жарақтандыруды, елді мекендердегі өрт сөндіруге бейімделген техникаларды жарамды күйде ұстап, өртке қарсы су көздерімен қамтамасыз етуді және жергілікті атқарушы органдарымен құрылған өрт бекеттері қызметкерлерінің біліктілігін арттыру жұмыстарын жандандыруды тапсырды. Мұнымен қоса, теміржол және автокөлік жолдарының бойында, егістік алқаптарға жаңа минералдық жолақтар жүргізіп, ескі жолақтарды қайта қалпына келтіру мен өрт қауіпті кезеңде орман шаруашылығына қарасты өрт сөндіру жасақтарының күшейтілген режимде жұмыс жасауын ұйымдастыруды жүктеді.
Күн тәртібіндегі үшінші мәселе бойынша облыстық санитариялық-эпидемиологиялық бақылау департаментінің басшысы Динара&nbsp;Жанабергенова өңірде геморрагиялық қызбасының 12 жағдайы тіркелгенін айтып, өлім жағдайы орын алмағандығын растады. Бұл үшін 239 елді мекеннің аумағына тоталды түрде зоопаразитологиялық зерттеулер жүргізілді, оның ішінде 113-і қолайсыз елді мекендер болды.
Департамент басшысы биыл кенелердің сандық көрсеткіштері жоғары екенін айтып, эпидемиологиялық ахуал «қолайсыз» болатындығын назарға салды.
Атқарылған жұмыстарды саралаған облыс әкімі эпидмаусымда қабылданатын шараларға қатысты бірқатар тапсырма берді.
<blockquote>
 «Конго-Қырым геморрагиялық қызбасының көктемгі залалсыздандыру жұмыстарының өз деңгейінде жүргізілуін және ветеринария мамандарының бірге жүруін қамтамасыз ету қажет. Елді мекендерде уақ малдарды ванналарда тоғыту жұмыстарын ұйымдастыру үшін қажетті препарат мен су мәселесін шешу жолдарын қарастыру керек. Тұрғындар арасында қауіпсіздік шараларын сақтау мақсатында ветеринария мамандары алдын ала түсіндірме жұмыстарын кеңінен жүргізсін», – деді Г.Әбдіқалықова.
</blockquote>
Жиын соңында аймақ басшысы көктемгі залалсыздандыру жұмыстарының кестеге сәйкес сапалы жүргізілуін қамтамасыз етуді және облыс бойынша елді мекендердегі мал қоралары мен мал басына жүргізілген көктемгі дәрілеу (дезинсекциялау) жұмыстарының тиімділігі бойынша талдау жасап, баяндауды тапсырды. Сондай-ақ, елді мекендер айналасында санитарлық қорғаныш аймағын құру жұмыстарына қажетті дезинсекциялық препараттар мен зертханалық зерттеу диагностикумдар қорының жеткілікті болуын қамтамасыз&nbsp; ету қажет екенін баса айтты.
<img src="https://kyzylorda-news.kz/wp-content/uploads/2022/02/6eb7b3856014198170e652c17543a743_1280x720.jpeg" alt="" />

Гүлшара Әбдіқалықова: Ветеринария мамандары алдын ала түсіндірме жұмыстарын кеңінен жүргізсін

<a href="https://kyzylorda-news.kz/">Kyzylorda-news.kz.</a> Қызылорда қаласындағы азық-түлік бағасын бағамдауда «Ел намысы» арнайы мониторингтік тобы жұмыс жасап жатыр. Жыл басынан бері әлеуметтік дүкендер мен сауда орталықтарындағы азық-түлік бағасында біршама өзгерістер орын алған. Өңірлік коммуникациялар қызметінде өткен баспасөз конференциясында «Ел намысы» арнайы мониторинг тобының жетекшісі Наталья Мишукова мен топ мүшесі Ляззат Бақтыбаева атқарылып жатқан жұмыстарға тоқталды.
<blockquote>
 «Қаладағы бірнеше азық-түлік дүкендеріне арнайы мониторинг жасаған болатынбыз. Тексеру барысында азық-түлік дүкендерінде ұн бағасының тұрақты екені белгілі болды. Ал нан бағасы әлеуметтік дүкендерде 55 теңгеден сатылса, басқа сауда орындарында әр түрлі бағада сатылуда. Күріш, сүт өнімдері, күнбағыс майы, картоп және сәбіз өнімдерінің бағалары айтарлықтай өскені байқалады. «Ел намысы» арнайы мониторинг тобы өкілдерімен бірге бағаны бақылауға алатын боламыз», – деді Наталья Мишукова.
 «Жергілікті өнім беруші немесе жергілікті кәсіпкерлердің кәсібін ашуда бірқатар бюрократиялық қиыншылықтар бар. Баға тұрақтылығын қамтамасыз ету бағытында жергілікті атқарушы органдармен бірлесіп жұмыс істелуі керек деген ойдамын. Қазіргі таңда «Ел намысы» арнайы мониторингтік тобы ішкі істер органдары мен білім саласына мониторинг жұмыстарын бастады», – деді Ляззат Бақтыбаева.
</blockquote>

Қызылордада баға тұрақтылығы бақылауда

<a href="https://kyzylorda-news.kz/">Kyzylorda-news.kz.</a> Ашық ақпарат заманында билік пен халық арасында тиімді диалог орнату және туындаған мәселелерді байыпты жолмен шеше білу – уақыт талабы. Мемлекет басшысы азаматтармен диалог орната білу қазіргі таңда аса маңызды екенін атап өтті. Бұл мақсатта облыс әкімі Гүлшара Әбдіқалықова қоғам қайраткері, ҚР Президенті жанындағы Қоғамдық сенiм Ұлттық кеңесінің мүшесі, «Serpin» Ұлттық бiлiм беру палатасының төрағасы Мұрат Әбеновпен кездесті.
Басқосу барысында аймақ басшысы азаматтық ұстанымы айқын тұлғалармен ортақ мәселелерді талқылауға әрдайым дайын екендігін білдірді.
<blockquote>
 «Сіз айқын азаматтық позицияңыз арқылы қоғам дамуына елеулі үлес қосып келесіз. Президент жанындағы Қоғамдық сенiм Ұлттық кеңесінің мүшесі ретінде түрлі деңгейдегі мәселелерде өз көзқарасыңызды білдіріп, ел дамуына қажетті ұсыныстар айтып келесіз. Сондықтан да мемлекет мүддесін әрдайым жоғары қоятын азаматтармен бірге сындарлы диалог орнатуға мүдделі екенімді жеткіземін. Қазіргідей күрделі кезеңде Президенттің «Жаңа Қазақстан» бастамасын жүзеге асыру аса маңызды. Бұл ең алдымен қоғамдық құндылықтарды қайта жаңғырту, жасампаздық жігерді нығайтуды қажет етеді. Сондықтан кезең-кезеңімен және жүйелі реформаларды бірлесіп атқарамыз деп сенемін», – деді облыс әкімі.
</blockquote>
Мұрат Әбенов өз кезегінде Сыр елінің тумасы ретінде өлкеге қызмет етуге әзір екенін жеткізіп, парасатты азаматтардың пікірін бір арнаға тоғыстыратын сарапшылық алаңдарды ашу өзекті екенін алға тартты.
<blockquote>
 «Халық үніне құлақ асатын мемлекет» тұжырымын іске асыруда ашық талқылаулар өткізу маңызды. Сыр елінен көптеген беделді азамат шыққанын білесіздер. Бізге мемлекет мүддесіне қызмет ететін азаматтардың интеллектуалдық потенциалын тиімді қолдану керек. Сол себепті де Сыр өңірінде талдау-сараптамалық орталық құрып, ашық пікірлесу алаңдарын іске асыруымыз қажет деп санаймын. Себебі өзекті мәселелердің шешімін табуда мемлекет пен азаматтық сектордың бірлескен диалогы керек. Яғни сарапшы азаматтардың жауапкершілігі қатар жүруі тиіс», – деді Мұрат Әбенов.
</blockquote>
Кездесу нәтижесімен аймақ басшысы қоғамдық құндылықтарды қайта жаңғырту жолында жаңашыл бастамаларды бірлесе атқаруға дайын екендіктерін жеткізді.
<img src="https://kyzylorda-news.kz/wp-content/uploads/2022/02/abenov.jpg" alt="" />

Мұрат Әбенов: Мемлекет мүддесіне қызмет ететін азаматтардың интеллектуалдық потенциалын тиімді қолдану керек

<a href="https://kyzylorda-news.kz/">Kyzylorda-news.kz.</a> Дариға Назарбаева парламент мәжілісінен кетеді, деп хабарлайды&nbsp;<a href="http://zakon.kz/">Sputnik.kz</a>
<blockquote>
 «Бүгін Мәжіліс депутаты өкілеттігін тоқтату туралы шешім қабылдадым және толығымен қоғамдық, гуманитарлық, мәдени және қайырымдылық қызметке ден қоюды ұйғардым», – деді Дариға Назарбаева өз үндеуінде.
</blockquote>
<a href="https://sputnik.kz/20220225/dariga-nazarbaeva-mazhilisten-ketetinin-malimdedi-23077463.html#"></a>Назарбаева Nur Otan партиясына дауыс берген қазақстандықтарға, партияластарына және өзіне сенім артқан ел басшылығына алғысын айтты.
Айтуынша, қайғылы қаңтар оқиғасы бейбітшілік пен Қазақстан халқының бірлігі болмаса, еліміз гүлденіп, одан әрі дамымайтынын көрсетті. Болған оқиғаның бәрі – біздің халқымыз үшін ауыр трагедия.
<blockquote>
 «Болған оқиғаға жан-жақты және объективті тергеу жүргізу қажет деп есептеймін, соның нәтижесінде кінәлілер әділ жазаға тартылып, кінәсіз адамдар босатылуы керек», – деді ол.
</blockquote>
Назарбаева барша қазақстандықты «қаралы қаңтардан» сабақ алып, мұндай жағдай ешқашан қайталанбас үшін барлық күш-жігерді салуға үндеді.
<blockquote>
 «Зұлымдық пен қорқынышқа толы күндер анархияның неге әкеп соғатынын көрсетті. Отанымыздың бүгіні мен болашағы үшін, оның ұлттық егемендігі мен тәуелсіздігін сақтау үшін, бейбітшілік пен қауіпсіздік үшін біз қоғамның бірлігі мен тұтастығын көрсетуіміз керек. Мен өз еліме және оның мүддесі үшін одан әрі қызмет ете беремін. Бұл үшін лауазым қажет емес», – деп түйіндеді сөзін Назарбаева.
</blockquote>
Еске салсақ, Дариға Назарбаева 2022 жылдың қаңтарынан бері парламентке келмеді. Алғашында ол коронавирус инфекциясынан емделіп, кейін оңалту курсынан өтіп жатқаны хабарланды. Назарбаева жалақысы сақталмайтын еңбек демалысында болған.<a href="https://sputnik.kz/20220225/dariga-nazarbaeva-mazhilisten-ketetinin-malimdedi-23077463.html"></a><a href="https://sputnik.kz/20220225/dariga-nazarbaeva-mazhilisten-ketetinin-malimdedi-23077463.html"></a><a href="https://sputnik.kz/20220225/dariga-nazarbaeva-mazhilisten-ketetinin-malimdedi-23077463.html"></a><a href="https://sputnik.kz/20220225/dariga-nazarbaeva-mazhilisten-ketetinin-malimdedi-23077463.html#"></a>

Дариға Назарбаева Мәжілістен кететінін мәлімдеді

<a href="https://kyzylorda-news.kz/">Kyzylorda-news.kz.</a> Ауыл шаруашылығы саласындағы негізгі мәселелерді ашық талқылау мақсатында «Шопан Ата» Қазақстан Ұлттық мал өсірушілер қауымдастығының бастамасымен шаруалардың ортақ мәселесі талқыланды. Жиында облыс әкімі Гүлшара Әбдіқалықова ауыл шаруашылығы саласының сарапшысы, қауымдастық төрағасы Алмасбек Садырбаевпен бірге егін егу, мал шаруашылығы саласындағы өзекті мәселелер бойынша фермерлерді жеке-жеке тыңдап, ұсыныс-пікірлерін ескерді.
Басқосу барысында Сырдария өзені деңгейінің төмен түсуі салдарынан туындайтын проблемалар, ауыл шаруашылығы саласын субсидиялау мен несиелендіру, мал азығының қымбаттауы мен жер мәселесі, көктемгі егін жұмыстарына дайындық барысы жан-жақты талқыланды.
Әрбір мәселенің өзектілігіне қарай облыс әкімі қала және аудан әкімдерінің орынбасаларлары мен салалық басқарма және департамент басшыларына тікелей тапсырма беріп, әрбір ұсыныстың зерделенетінін жеткізді. Сондай-ақ, бірқатар мәселелердің мемлекетаралық деңгейде көтерілгенін айтып, шауаралардан түсіністік пен шыдамдылық танытуды сұрады.
<blockquote>
 «Ауыл шаруашылығына қажетті судың жеткілікті көлемде келмеуіне байланысты соңғы 3 жылда агроөнеркәсіп кешенін дамытуға бұл мәселе кері әсерін тигізуде. Мамандар биыл да дариядағы су деңгейінің төмен болатынын ескертуде. Бұл мәселені шешуде кешенді шаралар қабылданып жатыр. Апта басында Президентке қуаңшылық, жер мен жем-шөп бағасына қатысты мәселелерді баяндадым. Сондықтан сырбойылықтарды түсіністік танытуға шақырамын. Бүгін саладағы қиындықтармен бетпе-бет келіп отырған шаруалардың үніне құлақ түріп, арыз-шағымдарыңыз бен ұсыныс-тілектеріңізді тыңдап, олардың шешу жолдарын қарастыру үшін жиналып отырмыз. Мәселелер белгіленген тәртіп пен заң аясында шешіледі», – деді Гүлшара Әбдіқалықова.
</blockquote>
50-ге жуық шаруаны тыңдаған аймақ басшысы әкімдік тарапынан агроөнеркәсіп кешенін қолдауға бағытталған іс-шаралардың кезең-кезеңімен жүргізілетінін қаперге салды. Мәселен, облыс аумағындағы 400-ден астам құдықты тазалауға жобалық-сметалық құжаттары әзірленуде. Аудандарда шабындық және жайылымдық жерлердің картасы жасалып жатыр. Сондай-ақ, өңір басшысы орын алған жағдайды ескере отырып, егістің көлемін белгілеп алу ұсынысын жеткізді. Айта кетейік, аймаққа келетін су көлемінің төмен болуы мемлекетаралық деңгейде қаралуда. Мемлекет басшысы бұл мәселе бойынша Өзбекстан президентімен бірқатар келіссөздер жүргізген болатын. ҚР Премьер-министрі Әлихан Смайылов та үкіметаралық деңгейде вегетациялық кезеңге дайындық жұмыстарын пысықтады.
Ал, «Шопан Ата» Қазақстан Ұлттық мал өсірушілер қауымдастығының төрағасы Алмасбек Садырбаев бірнеше ұсыныстарды ортаға салды. Атап айтқанда, өңірлердегі Су шаруашылығы мекемелері жанынан суды пайдалану саясаты бойынша қоғамдық кеңес құру, ауылшаруашылығы мақсатында пайдаланылатын жердің 10 пайызын жастардың жобаларына бөлу, субсидияны орта және шағын шаруа қожалықтарына үлестіру, ветеринария саласына реформа жүргізуді ұсынды. Сонымен бірге, салаға жаңа леп әкеліп, малшы мәртебесін көтеру бастамасын айтты.
Жиын соңында облыс әкімі Гүлшара Әбдіқалықова сындарлы диалог орнату арқылы ортақ мәселелерді бірлесіп шешетіндігін айтып, наурыз айында аудандардағы егіс алқаптарына барып, шаруалармен бірге ортақ мәселелерді бірлесіп қарайтынын жеткізді.
<img src="https://kyzylorda-news.kz/wp-content/uploads/2022/02/274718632_250346380619947_5097386733641296231_n.jpg" alt="" />

Гүлшара Әбдіқалықова: Биыл да дариядағы су деңгейі төмен болады

<a href="https://kyzylorda-news.kz/">Kyzylorda-news.kz.</a> Қазақстанда 1 996 адам коронавирус инфекциясынан жазылып шықты, деп хабарлайды coronavirus2020.kz.
Олар:
Нұр-Сұлтан қаласында – 175,
Алматы қаласында – 188,
Шымкент қаласында – 279,
Ақмола облысында – 210,
Ақтөбе облысында – 0,
Алматы облысында – 157,
Атырау облысында – 10,
Шығыс Қазақстан облысында – 39,
Жамбыл облысында – 26,
Батыс Қазақстан облысында – 89,
Қарағанды облысында – 49,
Қостанай облысында – 91,
Қызылорда облысында – 0,
Маңғыстау облысында – 49,
Павлодар облысында – 582,
Солтүстік Қазақстан облысында – 51,
Түркістан облысында – 1.
Елімізде барлығы 1 263 992 адам COVID-19-дан емделіп, сауығып шықты.

Қызылордада өткен тәулікте коронавирустан жазылғандар жоқ

<a href="https://kyzylorda-news.kz/">Kyzylorda-news.kz.</a> Қазақстанда өткен тәулікте 523 адамнан коронавирус инфекциясы ПТР арқылы анықталды, деп хабарлайды coronavirus2020.kz.
Аймақтар бойынша:
Нұр-Сұлтан қаласы – 32
Алматы қаласы – 144
Шымкент қаласы – 6
Ақмола облысы – 20
Ақтөбе облысы – 4
Алматы облысы – 48
Атырау облысы – 7
Шығыс Қазақстан облысы – 25
Жамбыл облысы – 14
Батыс Қазақстан облысы – 14
Қарағанды облысы – 41
Қостанай облысы – 49
Қызылорда облысы – 1
Маңғыстау облысы – 8
Павлодар облысы – 36
Солтүстік Қазақстан облысы – 70
Түркістан облысы – 4
Жалпы ел бойынша ауырғандар саны 1301253.

Қызылордада 1 адамнан коронавирус анықталды

<a href="https://kyzylorda-news.kz/">Kyzylorda-news.kz.</a> 25 ақпанда елімізде ауа райының тұрақсыз сипаты сақталады. Қар жауып жаяу бұрқасын болады, деп хабарлайды Қазгидромет.
Батыста жаңбыр мен қар түрінде жауын-шашын жауады және көктайғақ құбылыстары күтіледі. Еліміздің оңтүстігінде, оңтүстік-батысында және шығысында антициклон жотасының ықпалымен жауын-шашынсыз ауа райы ықтимал. Республика бойынша кей жерлерде тұман түседі.
Ақмола облысының оңтүстігінде, батысында, солтүстік-шығысында жаяу бұрқасын күтіледі, күндіз солтүстігінде – көктайғақ, батысында, оңтүстігінде – тұман, солтүстік-батысында, шығысында жел 15-20 м/с жылдамдықпен соғады.
Солтүстік Қазақстан облысында түнде шығысында, күндіз облысының оңтүстігінде, шығысында көктайғақ, жаяу бұрқасын, облыстың оңтүстік-батысында тұман, солтүстікте, шығыста жел 15-20 м/с күшейеді.
Түнде Павлодар облысының солтүстігінде жаяу бұрқасын, жел 18 м/с күшейеді, күндіз көктайғақ болады. Қостанай облысының шығысында жаяу бұрқасын күтіледі, жел 15 м/с күшейеді, облыстың оңтүстігінде тұман, көктайғақ болады.
Алматы облысының Жалаңашкөл ауданында жел 15-20 м/с күшейеді. Ақтөбе облысының солтүстігінде, шығысында тұман, көктайғақ күтіледі. Түнде және таңертең Жамбыл облысының солтүстігінде, таулы аудандарында тұман болуы ықтимал.
Батыс Қазақстан облысының батысында, солтүстік-батысында, шығысында тұман, көктайғақ болады.
Атырау облысының солтүстігінде, батысында, орталығында, Маңғыстау, Қызылорда облысының солтүстігінде, Қарағанды облысының солтүстігінде, батысында тұман күтіледі.

Қазақстан және Қызылорда облысының жаңалықтары