Kyzylorda-news.kz. Арал теңізінің тартылуы салдарынан құрғаған ұлтанда топырақтың тұздануы артты.
Қазіргі таңда топырақ тұздануын азайту және құм көшкінін тоқтату мақсатында құрғаған ұлтанға сексеуіл және галофитті өсімдіктер егу жұмыстары жүргізілуде. Сексеуіл егу жұмыстары жылдың екі мезгілінде екі түрлі әдіспен жүзеге асырылуда. Көктемде көшет егу және күз мезгілінде тұқым себу арқылы жүргізіледі.
Басқармаға қарасты орман және жануарлар дүниесін қорғау жөніндегі мемлекеттік мекемелері өздерінің уақытша сексеуіл тұқымбағына егіліп, дайындалған сексеуіл көшеттерін қазып, теңіз ұлтанына отырғызу жұмыстарына дайындық жүргізуде.

Қызылордада сексеуіл көшеті дайындалып жатыр

Kyzylorda-news.kz. Қызылорда облыстық Өңірлік коммуникациялар қызметінің ақпарат алаңында өткен брифингте БАҚ өкілдерінің Сыр елі азаматтарының көктемгі шақырылымы туралы сұрақтарына полковник Айдын Сағынбеков жауап берді.
18-27 жас аралығындағы жеті жүз елуге жуық Сыр елінің азаматтары көктемгі мерзімді әскери қызметке аттанады. Әскери қызметке шақыру жұмыстары 2022 жылдың 4 наурызындағы Қазақстан Президенті Қасым-Жомарт Тоқаевтың «Әскери қызметтің белгіленген қызметін өткерген мерзімді әскери қызметтегі әскери қызметшілерді запасқа шығару және Қазақстан Республикасының азаматтарын 2022 жылғы наурыз–шілде және қыркүйек–желтоқсан айларында кезекті мерзімді әскери қызметке шақыру туралы» Жарлығының талаптары негізінде ұйымдастырылатын болады.
Сарбаздардың мерзімді қызмет кезінде несие мерзімін ұзартуға, белгіленген мерзімдегі қызметіне біржолғы ақшалай сыйақы төлеуге, білім беру секторында жеңілдіктер беруге, сондай-ақ олардың отбасы мүшелеріне коммуналдық қызметтерге ақы төлеу сияқты Қорғаныс министрлігінің жастардың мерзімді әскери қызмет өткеруге деген ынтасын арттыру мақсатындағы ұсыныстары қазір мүдделі мемлекеттік органдармен келісілу үстінде.
Әскерге шақыру науқанын жергілікті атқарушы органдар ұйымдастырып, қамтамасыз етеді. Комиссияларды қалалар мен аудандар әкімдерінің орынбасарлары басқарады.
Әскери қызметке шақырылушы азаматтарды хабардар ету пандемия кезіндегі қарым-қатынасты азайту мен денсаулық қауіпсіздігін қамтамасыз ету мақсатында 1414 сервис қызметі пилоттық режимінде SMS-хабарламалар жіберу арқылы жүзеге асады.
<blockquote>
 «Пандемия жағдайына байланысты алдын алу шаралары толықтай қолға алынуда. Әскерге шақырылушылардан әскерге шақыру уақытында және әскери бөлімдерге келген кезде белгіленген арнайы пункттерде ПТР-талдамасы алынады. Ал, шақырылушыларға екпе жүргізу келген әскери бөлімде, яғни, қызмет өткеру орындарында ұйымдастырылатын болады. Шақыру науқаны барлық санитарлық-эпидемиологиялық талаптарды сақтай отырып жалғасады», – деді Қызылорда облысы Қорғаныс істері жөніндегі департаментінің бастығы полковник Айдын Сағынбеков.
</blockquote>

Қызылордада көктемгі мерзімді әскери қызметке шақыру басталды

Kyzylorda-news.kz. Бүгін қала әкімі Ғанибек Қазантаев 8 наурыз – Халықаралық әйелдер күні мерекесіне орай, өңір дамуына сүбелі үлесін қосып, түрлі салада толымды еңбек етіп жүрген белсенді әйелдер қауымын салтанатты түрде қабылдады.
Көктемнің шуақты мерекесіне арналған жарқын жүздесуде шаһар басшысы Ғанибек Қонысбекұлы және қалалық мәслихат хатшысы Ибадулла Құттықожаев ақжүрек аруларға жылы лебіздерін арнап, ілтипат көрсетті.
Салтанатты шарада Қазақстанның еңбек сіңірген артисі Күлән Қалымбетоваға «Қызылорда қаласының Құрметті азаматы» атағы берілді. Өз кезегінде Күлән Жантемірқызы құрмет жасаған ел азаматтарына алғысын жаудырды.
Осылайша жүздері бал-бұл жайнаған әйелдер қауымы шарапаты мол, шаттығы көл қуанышқа толы салтанатты шараның шынайы куәсі болды. Олардың құшақтары гүлге толды. Әкімдік тарапынан сый-сыяпаттар табысталды. Мерекелік қабылдау соңында аруларға арнап әннен шашу шашылды.
Айта кету керек, бүгінде еліміздің мемлекеттік қызметтегі әйелдер қауымының үлесі 35 пайыз болса, Қызылорда қаласының өзінде бұл көрсеткіш 48 пайызды құрап отыр.
<img src="https://kyzylorda-news.kz/wp-content/uploads/2022/03/fb_img_1646469379396.jpg" alt="" />
<img src="https://kyzylorda-news.kz/wp-content/uploads/2022/03/fb_img_1646469354471.jpg" alt="" />
<img src="https://kyzylorda-news.kz/wp-content/uploads/2022/03/fb_img_1646469383163.jpg" alt="" />

Қызылорда: Мемлекеттік қызметтегі әйелдер қауымының үлесі  48 пайыз

Kyzylorda-news.kz. Тар бейінді дәрігерлердің консультациялары, КТ/МРТ, рентген және диагностиканың басқа да түрлерінің қызметтері сақтандырылған азаматтарға МӘМС жүйесінде емдеуші дәрігердің жолдамасы бойынша көрсетіледі. Олар үшін қосымша ақы талап етілмеуі керек. Егер емхана осы қызметтерді өзі ұсына алмаса, онда оны орындау шарты бойынша пациентке басқа клиникада қабылдауды қамтамасыз етуі қажет.
Әлеуметтік медициналық сақтандыру қорының Қызылорда облысы бойынша филиалының директоры Бақыт Исмаханбетов консультациялық-диагностикалық қызметтерді алу мүмкіндіктері туралы толығырақ айтып берді.
КДҚ-ны қалай алуға болады?
Науқасқа кез келген консультациялық-диагностикалық қызметті емдеуші дәрігер тағайындайды. Ол науқастың жағдайын, шағымдарын, аурудың белгілерін зерттейді. Тиісті көрсетілімдер болған кезде дәрігер КТ, МРТ немесе басқа да зерттеулер жүргізуге жолдама жазады. Қызметті жоспарлы түрде алу үшін пациент «Сақтандырылған» мәртебесіне ие болуы тиіс, өйткені емхана деңгейінде бұл қызметтер МӘМС шеңберінде көрсетіледі.
Егер КДҚ-ны көрсетуден бас тартылса…
ТМККК шеңберінде және МӘМС жүйесінде қызмет көрсететін медициналық ұйым Әлеуметтік медициналық сақтандыру қорымен тиісті шарт жасасады және пациенттерге осы қызметтерді ұсыну бойынша міндеттемені орындауға тиіс.
<blockquote>
 «Біз азаматтардан емхана көрсетілімдер болған кезде, оны өткізу мүмкіндігінің жоқтығына сілтеме жасай отырып, консультациялық-диагностикалық қызметке жіберуден бас тартады деген өтініштерді жиі аламыз. Алайда, мұндай жағдайда өнім беруші Қор дерекқорында (сілтемесі – https://fms.kz/kz/useful-to-know/vybrat-kliniku/) тұратын медициналық ұйымдар қатарынан бірлесіп орындаушыны тартуға міндетті. Егер бірлесіп орындау шарты ешкіммен жасалмаса, онда пациентті осы қызмет түрі бойынша Қордың өнім берушілерінің біріне жіберуге тиіс, шарт бағыт бойынша қызмет көрсету қорытындылары бойынша автоматты түрде жасалады», – деп атап өтті ӘМСҚ облыстық филиалының директоры Бақыт Исмаханбетов.
</blockquote>
Алайда пациент емханаға бармай, КДҚ-ны ақылы негізде алу үшін тікелей жіберілетін басқа да жағдайлар бар.
<blockquote>
 «Кейде біз әлеуметтік желілерде науқасқа жолдама берілмегені және олар ақылы түрде қызмет алғаны, мысалы, КТ туралы шағымдарды көреміз. Мұндай жағдайларда науқастың құқығын қорғаушы ретінде Қор іске қосылады. Алайда, нәтижесінде науқас тіпті өз емханасына жүгінбеген, бірақ дереу басқа жерде ақылы тексеруден өтуге шешім қабылдаған болып шығады. Біз азаматтарды ТМККК шеңберінде және МӘМС жүйесінде медициналық қызметтерді пайдалануға шақырамыз. Егер мәселелер туындаса, Пациентті қолдау қызметіне хабарласыңыз және өз құқықтарыңызды қорғаңыз», – деп Бақыт Исмаханбетов атап өтті.
</blockquote>
ӘМСҚ филиалының директоры атап өткендей, 2022 жылы аймақтың халқына медициналық көмекті қаржыландыруға 75,7 млрд. теңге бағытталды, оның ішінде ТМККК бойынша – 46,2 млрд. теңге, МӘМС бойынша – 29,5 млрд. мың теңге.
Бұл ретте консультациялық-диагностикалық қызметтерді қаржыландыру ұлғайды. Бұл мақсаттарға 9,7 млрд. теңге қарастырылған, оның ішінде МӘМС бойынша – 7,9 млрд. теңге.
Егер сізде консультациялық-диагностикалық қызметтерді алуға қатысты сұрақтар туындаса немесе сіз оларды көрсетуге қол жеткізе алмасаңыз, онда өз емханаңыздың Пациентті қолдау қызметіне хабарласуыңыз қажет. Ұзақ күтуге байланысты өз аймағыңызда томографиядан немесе басқа да қызметтерден өту мүмкіндігі болмаған жағдайда, сіз өз аймағыңыздың денсаулық сақтау басқармасындағы жағдайды нақтылай аласыз.
Егер мәселені сол жерде шешу мүмкін болмаса, онда Әлеуметтік медициналық сақтандыру қорына өзіңізге ыңғайлы тәсілмен өтініш беріңіз: fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot.
<img src="https://kyzylorda-news.kz/wp-content/uploads/2022/03/kdw-kaz-.jpg" alt="" />

Консультациялық-диагностикалық қызметтерді қалай алуға болады?

Kyzylorda-news.kz. Жер әлем нұрланатын, жан жүректі жадырататын мерейлі сәт 8 наурыз мерекесі қарсаңында облыс әкімі Гүлшара Әбдіқалықова түрлі салада тер төгіп, қоғам дамуына қызмет еткен шаңырақ шырайы әйелдер қауымымен кездесті.
Ерекше басқосуға ел дамуына елеулі үлес қосып жүрген 30-ға жуық көпбалалы батыр аналар мен еңбек адамдары шақырылды. Ерге бергісіз қызмет етіп, аналық мейіріммен қоғамға жақсылық тілеп жүрген аналар арасында әскери бөлімнің ефрейторы, кран жүргізуші, аула сыпырушы секілді ерекше мамандық иелері де бар.
Көрікті кездесуде аймақ басшысы Гүлшара Әбдіқалықова әйел-аналарды көктемнің шуақты меркесімен құттықтап, Сыр өңірінің өркендеуіне аянбай үлес қосып жүрген белсенді әйелдер қауымы, іскер әйел-аналар, қыз-келіншектер үшін бұл мейрамның ерекше мәнге ие екенін жеткізді.
<blockquote>
 Бүгін аяулы аналарға шынайы алғысымызды білдірсек деген ниетпен жиналып отырмыз. Біздің аналарымыз, аруларымыз тек отбасының ұйытқысы ғана емес, олар – бүкіл қоғамды алға сүйреп, ел ынтымағын нығайтып, несібесін молайтып жүрген қуатты күш. 
 Мемлекет басшысы Қасым-Жомарт Кемелұлы Тоқаев 2022 жылды Балалар жылы деп жарияды. Бала тәрбиесіне қашанда ұлт тәрбиесі деп қараған дана халқымыз болашақ ұрпақты дүниеге әкеліп, бағып-қағып, қияға ұшыратын аналарды ардақтай да, аялай да білген. Барлық уақытта халқымыз өзіне ең қымбат ұғымдарды – Отан мен Жер, Тілді – Ана атымен байланыстырған. Өйткені, тіршіліктің нәрі де, мәні де – Ана. 
 Сіздер әрқашан ибалық мен ізеттің, парасат пен пайымның, мейірімділік пен ізгіліктің бастауы болып келесіздер. Бүгінгі күні билік пен мемлекеттік қызметте, республикалық деңгейдегі басқарушы органдарда әйелдер үлесінің артуы – Сіздердің қарымды қабілеттеріңіз бен іскерліктеріңіздің дәлелі. 
 Төл мерекеміз тағы да құтты болсын!, – деді Гүлшара Әбдіқалықова.
</blockquote>
Кездесуде батыр ана, еңбек және тыл ардагері Күлтай Рыспамбетова, төл өнерімізді жаңғыртып жүрген жырау Зәуре Кәрібаева, үш дүркін «Алтын домбыра» иегері, айтыскер ақын Мұхтар Ниязовтың анасы Жұмакүл Оңғарбаева ақжарма тілегін жеткізді. Құрмет төрінен көрінген әскери қызметшінің анасы Алмагүл Құрманбаева да ел тыныштығы үшін қиындықпен бетпе-бет келген азаматтардың анасына шынайы алғысын білдіріп, “Қасіретті қаңтар” оқиғасы кезінде ұлынан айырылған аналардың жан-дүниесін жақсы түсінетінін тілге тиек етті.
Жиында «Ел намысы» арнайы мониторингтік тобының жетекшісі Наталья Мишукова, каратэ-додан халықаралық дәрежедегі спорт шебері, екі дүркін Әлем чемпионы Мөлдір Жаңбырбай құрметке ие болды.
Шара арнайы концерттік бағдарламамен жалғасып, жергілікті өнерпаздар аналарға құрметін әсерлі әнмен жеткізді.
<img src="https://kyzylorda-news.kz/wp-content/uploads/2022/03/fb_img_1646462936219.jpg" alt="" />
<img src="https://kyzylorda-news.kz/wp-content/uploads/2022/03/fb_img_1646462951443.jpg" alt="" />
<img src="https://kyzylorda-news.kz/wp-content/uploads/2022/03/fb_img_1646462959161.jpg" alt="" />
<img src="https://kyzylorda-news.kz/wp-content/uploads/2022/03/fb_img_1646462966988.jpg" alt="" />

Гүлшара Әбдіқалықова түрлі саладағы әйелдер қауымымен кездесті

<a href="https://kyzylorda-news.kz/">Kyzylorda-news.kz.</a> Қызылорда қалалық пробация қызметінің ең жас қызметкері Зарина Мұратқызы ішкі істер органының қызметкері болуды балалық шағынан армандаған.
Ол 2018 жылы орта мектепті бітіргеннен кейін ҚР ІІМ-нің Ш. Қабылбаев атындағы Қостанай академиясына оқуға түседі. Қазіргі таңда соңғы курсында қалалық пробация қызметінде Ювенал тобының инспекторы болып практикадан өтеуде. Жас маман тәжірибе жинақтап, қызметке бар ынтасымен кіріскен. Өзінің есебіндегі кәмелет жасқа толмаған жасөспірімдерді мәдени-спорттық шараларға қатыстырып, тәрбиелік жұмыстар жүргізеді.
<blockquote>
 «Үйде бес баламыз. Мен ортаншысымын. Бұл мамандықты таңдағаныма ата-анам қарсы болмады. Керісінше, әкем мені қолдап, ақылын айтып отырады. «Антыңа адал болып, еліңе қызмет ету басты парызың», дейді әкем. Жас маман болсам да қызметке бірден кірісіп кеттім. Өйткені теориялық сабақ барысында оқытушылар сотталған азаматтармен тікелей жұмыс істейтінімізді айтып, теория жүзінде үйреткен. Сондықтан маған қызметім еш қиындық тудырмады» – дейді курсант Зарина Мұратқызы.
</blockquote>

Зарина Мұратқызы: Басты ұстанымым қызметке адалдық

<a href="https://kyzylorda-news.kz/">Kyzylorda-news.kz.</a> Көктемнің шуақты мерекесі – 8 наурыз Халықаралық әйелдер күні жақындап қалды. Жақындарыңызға қандай сыйлық жасайсыз? Әлі сыйлық таңдап үлгермесеңіз біздің кеңеске назар аударыңыз.
1. Гүл шоқтары.&nbsp;8 наурыз әйелдер мерекесінде гүл шоқтары әдемі сыйлық екені бәріне мәлім, алайда гүл шоқтарын ғана сыйға тартсаңыз аздап ыңғайсыз болады, өйткені әйел қауымы сізден әдемі гүлмен қоса ерекше сыйлық күтетінін де ұмытпаңыз!
2. Әшекей бұйымдар.&nbsp;Мұнда таңдау өте көп деуге болады, алқа, жүзік, сырға, білезік, түйреуіш, жас қыздарға арнап, шашқа қыстырғыш т. б. Барлығы бағасына қарай. Зергерлік бұйымды қаламайтын әйел баласы жоқ шығар. Мұнда бір ескеретін жайт, әйелдің жасы мен қоса түр тұлғасын да ескерген жөн. Мысалы, толық әйелдер қауымына жұқа алқа, жіңішке сақина жарасымды бола қоймайды. Кейбір қыз – келіншектер күмісті қаласа, кейбірі алтыннан жасалған бұйымды қалайды. Сонымен қоса, жүзік сыйлайтын болсаңыз саусақ өлшемін білуге тура келеді. Қазіргі кезде көптеген қыз – келіншектер қауымы зергерлік бұйым таңдауда «жұлдыз белгісіне» қарай таңдау жасағанды жөн санап жатады, мұны да біле жүргеніңіз абзал!
3. Төсек жаймалары.&nbsp;Егер, ер азаматтар қауымы сыйлық таңдау үстінде, төсек жаймаларын сыйлауды жөн санасаңыздар, оны туыстарыңызға сыйлауға болатынын, сүйіктіңізге мұндай сыйлық таңдамай – ақ қойғаныңыз дұрыс екенін біле жүріңіз. 
Мұнда да таңдау өте көп, жұқа көрпе, жастық, жамылғы т. б.
4. Сүлгі және моншаға арналған құралдар.&nbsp;Мұндай сыйлықтарды күнделікті өмірде пайдаланатын болғандықтан, қажетті сыйлық түрлеріне жатқызуға болады. Мұндай сыйлықтар барлық адамның көңілінен шығады деген ойдамын.
5. Ыдыс – аяқтар.&nbsp;Ыдыс – аяқтың түрлерінің көптігі соншалық адам көзі сүрінеді. Мұнда да сыйлық алушының қалауын білген жөн, өйткені сіздің сыйлаған сыйлығыңыз бір кәдесіне жарап жатса құба – құп.
6. Жұмсақ ойыншықтар.&nbsp;Мұндай сыйлық түрін көбіне жас қыздарға сыйлаған жөн шығар, ондай сыйлықты көп адам қалайды деп айта алмаймын. Сонымен қоса мұндай ойыншықтар өзіне шаңды көп сіңіретін болғандықтан қайта – қайта жуып тазартуға тұруға тура келеді, сондықтан аса қажетті сыйлық түрі деп атай алмаймын. Алайда жұмсақ ойыншықтарды да ұнататын қыз – келіншектер бар екенін де ескеруіміз керек.
7. Техника түрлері.&nbsp;Техника түрлерінен телефон, ноутбук, электронды кітап (дәл қазір актуалды деуге болады), планшет, флешка, шаңсорғыш, асханалық комбайн, шырынсыққыш, блендер, еттартқыш т. б. сыйлауға болады. 
Әйелдің денсаулығы мен сырт келбетін әрлендіруге қажетті құралдар сыйға тартсаңыз, сыйлық алушы әбден қуанып қалады деп ойлаймын. Мысалы, басқа, көзге, бетке массаж жасайтын құрал түрлері немесе косметологиялық құрал Дарсонваль.
8. Спорттық құралдар.&nbsp;Егер сыйлық алушы спортпен шұғылданатын адам болса, спорт залға абонемент алып беріңіз, бұл да жақсы сыйлық.
9. Косметика.&nbsp;Егер сыйлық алушының қандай косметика түрлерін қолданатынын білсеңіз ғана косметика түрлерін сыйлауға болады. Сондай – ақ бет терісінің немесе шашының майлы не құрғақтығын біліп барып, таңдау жасаған дұрыс. Мысалы: иісмай (крем), шампунь, ваннаға арналған құралдар, иіссу т. б. Иіссу таңдағанда жұмсақ жағымды иіссу түрлерін таңдаған абзал! Өткір иісті көп адам ұната бермейді.
10. Көлікке қажетті.&nbsp;Қазір көп қыз – келіншектер көлік жүргізе біледі. Егер көлік жүргізетін әйел болса, көліктің ішіне қажетті заттар таңдауға болады.
11. Картина.&nbsp;Үйдің интерьеріне сәйкес етіп таңдаған дұрыс. Гобелен технологиясы бойынша тоқылған картиналар ерекше әрі әдемі сыйлық болады. 8 наурызға жоғарыдағыдай көптеген сыйлық түрлерін таңдауға болады. Сыйлықтың түрі мұнымен бітіп қоймайды: әмиян, қолғап, киім, концертке немесе саяхатқа шығу билетін т. б. сыйлауға болады.
Ең бастысы сыйлық таңдауда немқұрайлылық танытпаңыз, сыйлықтық ең үлкені – шын көңілмен берілгені. Сыйлықпен қоса гүл алуды және жүректі жарып шыққан шынайы тілектеріңізді білдіруді ұмытпаңыз!
<a href="https://www.bilimdiler.kz/oyin_sayk/kizikti/1955-8-nauryzga-kanday-syylyk-zhasaysyz.html">Bilimdiler.kz</a>

8 наурызға арналған сыйлықтар

«Қазақстан халқына» қорынан көмек алу үшін не істеу керек?

&nbsp;<a href="https://kyzylorda-news.kz/">Kyzylorda-news.kz.</a>&nbsp;Былтыр Түркістан қаласында «Халықаралық «Қазақ тілі» қоғамы» қоғамдық бірлестігінің ҮІ Құрылтайы өтті. Құрылтай барысында қазақ тілінің қолданыс аясын кеңейту, мәртебесін көтеру мақсатында маңызды жұмыстардың жалғасатындығы, оған Үкімет тарапынан барынша қолдау көрсетіле беретіндігі айтылды. Қоғамның жаңа бағдарламасы мен Жарғысы қабылданып, қоғамның президенті болып Мәжіліс депутаты Берік Әбдіғалиұлы сайланды.
Осы ретте, Халықаралық «Қазақ тілі» қоғамының жұмысына жаңа серпін беру мақсатында бірқатар міндеттер жүктелген болатын. Соның ішінде «Қазақ тілі» қоғамы тіл тақырыбынан бөлек ұлттық рухани даму, ұлттық мүдде, салт-дәстүр бағытындағы мәселелер бойынша да жұмыстар жүргізілу керектігі баса айтылды.
Осыған байланысты Халықаралық «Қазақ тілі» қоғамы» қоғамдық бірлестігі Қызылорда облыстық филиалы мен Қызылорда облысының ішкі саясат, мәдениет, білім, дене шынықтыру және спорт басқармалары арасындағы мемлекеттік тіл мен ұлттық салт-дәстүрді кеңінен қолданудағы өзара іс-қимыл мен әріптестік жайлы меморандумға қол қойылды.
Меморандум аясында ішкі саясат басқармасымен мемлекеттік тілдің мәртебесін арттыру, латын графикасына көшу, рухани жаңғыру бағытында, білім басқармасымен мемлекеттік тіл мен салт-дәстүрді насихаттау бағытында, мәдениет басқармасымен ұлттық музыканы пайдалану, қазақ тілді ресурстар мен контенттер әзірлеу, дене шынықтыру басқармасымен түрлі спорттық іс-шараларды мемлекеттік тілде өткізу, ұлттық спортты насихаттау жұмыстары жүргізілетін болады.

Мемлекеттік тілдің мәртебесін көтеру мақсатында меморандум жасалды

&nbsp;&nbsp;<a href="https://kyzylorda-news.kz/">Kyzylorda-news.kz.</a> &nbsp;Қызылорда қаласындағы ЗК-169/1 тергеу изоляторында&nbsp; 8 наурыз – Халықаралық әйелдер күніне арналған дәстүрлі салтанатты кеш өтті.
&nbsp;&nbsp; Мерекелік жиында&nbsp; алғаш сөз алған ҚАЖ департаментінің бастығы Ш.Есенкелдиев барша нәзік жанды қыз – келіншектерді төл мейрамдарымен құттықтап, жеке құрамның аналарына&nbsp; «Офицердің анасы» медалін тапсырды. Аналарға &nbsp;нағыз офицер мен Отан сүйгіш, Қазақстанның лайықты азаматтарын тәрбиелегендері үшін алғысын білдірді.
Мекеме бастығы, әділет подполковнигі А.Тасқараев&nbsp; аса жауапты қызметті адал әрі кәсіби шеберлікпен жоғары деңгейде атқарып келе жатқан мекеме &nbsp;қызметкерлері &nbsp;мен ардагер әйелдерді және салтанатты шараға арнайы шақырылып, мекеме қызметіне үлесін қосып жүрген&nbsp; әр сала қызметіндегі нәзік жанды азаматшаларға ризашылылығын білдіріп, алғыс хатпен марапаттады.
<blockquote>
 «Мен ұлым, Нұрсұлтанның осы саланы таңдап ел қауіпсіздігін сақтау жолында еңбек етіп жүргендігін мақтан тұтамын. Ерте кетіп, кеш келетін қиындығы басым тергеу изоляторы қызметіндегі отбасымыздың азаматын, әрдайым қолдап отырамыз. Балам мектеп пен жоғарғы оқу орнын&nbsp; үздік оқып бітірді. Өмірден өз орнын табу үшін аналық мейірімімді төгіп, қамқорлық жасадым. Бүгінгі кеудеме&nbsp; тағылған « Офицердің анасы» атты медальім сол еңбегімнің өтеуі деп білемін», – деді жасақ бастығы, әділет лейтенанты Ниязов Нұрсұлтанның &nbsp;анасы.
</blockquote>
<img src="https://kyzylorda-news.kz/wp-content/uploads/2022/03/img-20220304-wa0066.jpg" alt="" />
<img src="https://kyzylorda-news.kz/wp-content/uploads/2022/03/img_20220304_171235.jpg" alt="" />

Тергеу изоляторының қызметкерлеріне құрмет көрсетілді

<a href="https://kyzylorda-news.kz/">Kyzylorda-news.kz.</a> Қала аумағын тазалау және тұрғын үйлерді ауыз сумен қамту ісінде коммуналдық қызметтердің бір арнадан басқарылып, қызмет ету аясын оңтайландыру маңызды. Осы себепті де өткен жылдың соңында «Қызылорда тазалығы» ЖШС мен «Қызылорда су жүйесі» кәсіпорны қызметі біріктіріліп, қайта жұмысын бастады. Дегенмен, екі кәсіпорынның жұмысын жолға қоюда бірқатар мәселелер бар. Осы себепті бүгін облыс әкімі Гүлшара Әбдіқалықова «Қызылорда тазалығы» ЖШС-не барып, мамандармен пікірлесіп, ортақ мәселелерді ашық талқылады.
Талқылау жиынына облыстық мәслихат хатшысы Наурызбай Байқадамов, қала әкімі Ғанибек Қазантаев, облыстық энергетика және тұрғын үй-коммуналдық шаруашылық басқармасының басшысы Ерлан Жаңабаев және кәсіпорын басшылығы қатысты.
Қызылорда қаласының әкімінің орынбасары Ғабит Жаңабаев кәсіпорын жұмысын ілгерілету ісіне қажетті жоспарлар жасалғанын тілге тиек етті. Мәселен, өткен жылы екі кәсіпорын атқаратын қызметтер біріктіріліп, 1590 адам тұрақты жұмыспен қамтылды. Дегенмен, коммуналдық қызметтерді атқаратын техникалардың 77 пайызы тозғандықтан, жаңа көліктерді алудың қажеттілігі туындағанын атап өтті. Себебі қала ішіндегі көше тазалау жұмыстарының ауқымы кеңеюіне байланысты арнайы техникаларды дайындау маңызды.
Кәсіпорын жұмысын зерделеген облыс әкімі бюджет мүмкіндігіне қарай мәселені жан-жақты сараптап, техникаға қажетті қаржыны табу ісі қаралатынын жеткізді.
<img src="https://kyzylorda-news.kz/wp-content/uploads/2022/03/274724950_255743746746877_1323936017819257693_n.jpg" alt="" />

Қызылорда қаласындағы коммуналдық қызметтердің басқару ісі оңтайландырылды

<a href="https://kyzylorda-news.kz/">Kyzylorda-news.kz.</a> Мүгедектігі бар жандар қиындыққа қарамай іс бастап, қоғам дамуына қызмет етуде. Олардың әрбірі туған жерді өркендету ісінде өзіндік қолтаңбасын қалдыруда. Бүгін облыс әкімі Гүлшара Әбдіқалықова ерекше жандардың орталықтарына барып, қайсар азаматтардың мәселесіне құлақ түріп, пікірлесті.
Алдымен аймақ басшысы А.Иманов көшесінде орналасқан «Қазақ соқырлар қоғамы» қоғамдық бірлестігіне барды. Орталық 2014 жылы грант ұтып, арнайы құрал-жабдықтарын сатып алды. Өз бастамаларымен 16 адамды қосымша жұмысқа тартты. Ал, 30-ға тарта азаматқа қайта даярлау тігін курсын оқытып, сертификат берді.
Қазіргі таңда орталықтың жанында ашылған оқу-өндірістік кәсіпорнында тігін цехы мен картон өңдеу цехы жұмыс жасауда.
Мекеме төрағасының міндетін атқарушы Данияр Нұрымбетов облыс әкіміне кәсіпорындағы өндірістерді таныстырып, ғимаратты абаттандыру және қосымша құрылыс салу жұмыстарына қолдау көрсетуді сұрады. 
Өз кезегінде Гүлшара Әбдіқалықова қаладағы бірқатар кәсіпкерлерге орталықтың шағын көлемдегі жөндеу жұмыстарына көмек көрсетуге ықпал жасау қажет екенін қаперге салды.
Әрі қарай аймақ басшысы «Қызылорда облыстық мүгедектер қоғамы» қоғамдық бірлестігі құрған орталыққа келді. Арнайы орталық мүгедектігі бар азаматтарға әлеуметтік қолдау көрсетіп, психологиялық тренингтер өткізіп, құқықтық кеңес береді. Мұнан бөлек, инва-СТО, арба жөндеуді үйрету және өзге де қызметтері де бар.
Бірлестік төрағасы, белсенді жас Сағатбек Сиюов орталықта жұмыс істейтін ерекше жандардың әрбір ісін таныстып, бастамалы жұмыстарын тізбелеп берді. Яғни мұнда қолөнермен айналысып, төмен бағамен шаштараз қызметін ұсынып, маникюр жасайды.
Облыс әкімі талпынысы ерек жандардың жұмысын көріп, олардың табанды ісі мен дамуға деген ұмтылысы көптеген азаматтарға үлгі-өнеге екенін жеткізді. Сондай-ақ, олардың ұсыныс-негіздерін ескеріп, әрбір бастамаларына қолдау болатынын айтты.
<img src="https://kyzylorda-news.kz/wp-content/uploads/2022/03/274997705_255742526746999_4356789761464823189_n.jpg" alt="" />

Қазақстан және Қызылорда облысының жаңалықтары