<a href="https://kyzylorda-news.kz/">Kyzylorda-news.kz</a>. Қызылорда облысы әкімінің орынбасары Мархабат Жайымбетов жұмыс сапарымен ауданда болып, құрылыс нысандарын аралап, тұрғындармен кездесті.
Алдымен Арал қаласындағы құрылысы жоспарланып жатқан «Арал Сода» зауытының орнында өндіріс орнына инженерлік-инфрақұрылым жеткізу жұмыстарының барысымен және қаладағы темір жол өткелі салынады деп белгіленген аймақта құрылыс жобасымен танысып шықты.
Қазіргі таңда темір жол үстінен салынатын аспалы көпірдің құжаттамалары әзірленіп, құрылысына қажетті қаржыға өтінім беріліп, нәтижесі күтілуде.
Одан соң апатты жағдайдағы «Жазира» балабақшасы мен №1 қалалық кітапхана ғимараттарының жағдайын көрді. Аталған нысандардың ішінде облыс әкімінің орынбасарына аудандағы 5 балабақша мен 4 кітапхана ғимаратына апатты жағдайда деген қорытынды берілгені және осыған сәйкес жасалып жатқан жұмыстардың барысы түсіндірілді. Апатты деп танылған балабақшаның үшеуі Арал қаласында орналасқан. Осыған орай жаңа ғимарат салу үшін жауапты басқармалар арқылы тиісті қаржы сұратылуда. Сондай-ақ, кітапханалар мәселесі бойынша да №1 кітапхана ғимаратын салу үшін жоба-сметалық құжаттамасы әзірленіп, сараптама қорытындысымен нысанның құрылысына және орталық кітапхана ғимаратының жобалау іздестіру жұмыстары жасалып, жоба-сметалық құжаттамасы тиісті басқармаларға тапсырылған. Жоба бойынша екі кітапхана құрылысы жүргізілсе, қалған екі кітапхана ғимараты осы екі нысанға біріктіріледі де жоспарлануда.
Аудан әкімі Серік Сермағамбетов өңірдегі алдағы уақытта жүзеге асырылуы жоспарланған балықшылар аллеясы, автомобиль жолдары, көпқабатты тұрғын үйлер мен денсаулық сақтау саласы бойынша жүргізілетін құрылыс жұмыстарының жобаларымен таныстырып шықты.
Облыс әкімі орынбасарының сапары Сексеуіл кентінде жалғасты. Кенттегі теміржолшыларға арнап салынып, құрылысы тоқтап тұрған 38 тұрғын үйдің және 40 төсектік аурухана ғимаратын көрген соң құрылыс жұмыстарын жалғастыру үшін тиісті шаралар қабылданатынын айтты.
Сонымен қатар, Тоқабай елді мекеніндегі апатты жағдайдағы №248 орта мектебінің ғимаратын көріп, жауапты мамандармен бірге толық зерттеу жүргізілген соң білім беру нысанын қайта салу немесе күрделі жөндеуден өткізілетіндігі туралы нақты шешім қабылданатынын білдірді.
Сапар барысында Қамбаш көлінің жағалауында болып, жағажайды туристік аймақ ретінде дамыту жобасымен де таныс болды.
Бұдан бөлек Аманөткел ауылдық округіндегі салынып жатқан дене шынықтыру және спорт кешенінің құрылысымен танысып, спорт кешенің құрылысын жүргізіп жатқан мердігер мекеме басшысына нысанды уақытылы аяқтауды тапсырды.
Одан соң Бөген елді мекеніндегі апатты жағдайдағы клуб ғимаратын көріп, жаңа нысан салу үшін басталған құжаттамаларын дайындау жұмыстарын жеделдету қажеттігін айтты.
Биылғы жылы құрылысы жалғасатын «Самара-Шымкент-Қамыстыбас-Аманөткел-Жаңақұрылыс» және «Бөген-Ақлақ-Қаратерең- Жаңақұрылыс» автожолдарының құрылысын жүргізетін мердігер мекеме өкілімен кездесіп, жол жөндеу жұмыстарын сапалы жүргізуді тапсырды.
Аудандағы құрылысы жүріп жатқан және алдағы уақытта жоспарланған жобалармен таныс болған соң, ауыл ардагерлерімен кездесіп, өңірдегі өзекті мәселелер жөнінде пікірлесті.
Құрылыс нысандарының басым көпшілігі республикалық бюджет есебінен қомақты қаржыны қажет ететіндіктен жауапты министрліктен жасалған жобалар негізінде қаржы сұратылып, тиісті жұмыс жасалатындығын жеткізді.
<img src="https://kyzylorda-news.kz/wp-content/uploads/2022/03/275902272_3218627845132246_4194766935985632043_n.jpg" alt="" />
<img src="https://kyzylorda-news.kz/wp-content/uploads/2022/03/275885637_3218627631798934_3075719469902111835_n.jpg" alt="" />
<img src="https://kyzylorda-news.kz/wp-content/uploads/2022/03/275940627_3218627725132258_3533792337561817721_n.jpg" alt="" />
<img src="https://kyzylorda-news.kz/wp-content/uploads/2022/03/275860538_3218627808465583_1905135831698032005_n.jpg" alt="" />
<img src="https://kyzylorda-news.kz/wp-content/uploads/2022/03/275880722_3218627628465601_7052221441501776766_n.jpg" alt="" />
<img src="https://kyzylorda-news.kz/wp-content/uploads/2022/03/275918276_3218627555132275_5378063416083967976_n.jpg" alt="" />
<img src="https://kyzylorda-news.kz/wp-content/uploads/2022/03/275942474_3218627758465588_8028178051994685515_n.jpg" alt="" />
<img src="https://kyzylorda-news.kz/wp-content/uploads/2022/03/275985667_3218627701798927_2949555461038034407_n.jpg" alt="" />

Мархабат Жайымбетов Арал ауданына барды

<a href="https://kyzylorda-news.kz/">Kyzylorda-news.kz</a>. Қызылорда қалалық Полиция басқармасының криминалдық полиция бөлімі жедел уәкілдерінің кәсіби шеберліктері мен қырағылықтары нәтижесінде ақша ұрлығы ізі суымай ашылды.
Қызылорда қалалық Полиция басқармасының кезекші бөліміне қала тұрғыны арызданған болатын. Белгісіз адам қала аумағында орналасқан азық-түлік дүкендердің бірінде тұрған терминалды бұзып, 160 мың теңгені ұрлап кеткен.
Жедел мәлімет бойынша полиция қызметкерлері күдіктіні ұстады.
Аталған дерек бойынша Қазақстан Республикасы Қылмыстық кодексінің 188-бабының 1-бөлігімен (Ұрлық, яғни бөтеннің мүлкін жасырын ұрлау) сотқа дейінгі тергеп-тексеру әрекеттеріжүргізілуде.

Қызылордада терминалдан ақша ұрлаған тұрғын ұсталды

<a href="https://kyzylorda-news.kz/">Kyzylorda-news.kz</a>.&nbsp;Мемлекет басшысы Қасым-Жомарт Тоқаев Ақорда резиденциясында облыстардың және Нұр-Сұлтан, Алматы, Шымкент қалаларының әкімдерімен кеңес өткізді.
Жиын барысында өңірлердің әлеуметтік-экономикалық дамуына қатысты өзекті мәселелер талқыланды. 
Президент Үкімет пен әкімдерге әлеуметтік-экономикалық мәселелерді жедел шешу және халықтың әл-ауқатын арттыру жөнінде шаралар кешенін қабылдауды тапсырды.
Қасым-Жомарт Тоқаев Жаңа Қазақстанды құру стратегиясы аясында саяси реформалардың кезекті топтамасын іске асыру бойынша бірқатар міндет жүктеді.
Атап айтқанда, әкімдер азаматтармен жұмыс істеу тәртібін қайта қарауы керек, сондай-ақ аудан және ауыл тұрғындарымен жиі кездесіп, оларды мазалаған мәселелерді шешуі, қоғам сенімін арттыруы қажет. Үкімет пен әкімдіктерге жұмыссыздық деңгейін төмендету, кәсіпкерлікті дамыту, жаңа жұмыс орындарын ашу жөнінде жүйелі шаралар қабылдауға тапсырма берілді.
Кеңес қорытындысы бойынша Мемлекет басшысы облыстардың және республикалық маңызы бар қалалардың әкімдеріне бүгінгі Қазақстан халқына арналған Жолдауда жүктелген міндеттерді сапалы жүзеге асыру жөнінде тапсырма берді.
<img src="https://kyzylorda-news.kz/wp-content/uploads/2022/03/prezident1.jpg" alt="" />

Мемлекет басшысы әкімдерге қандай міндет жүктеді?

<a href="https://kyzylorda-news.kz/">Kyzylorda-news.kz</a>.&nbsp;17 наурыз күні Қазақстанның басым бөлігінде жауын-шашын болады, деп хабарлайды Қазгидромет.
Оңтүстікте жаңбыр жауады. Мұндағы таулы аудандарда қатты жауын-шашын күтіледі.
Республиканың тек солтүстігінде ашық күн райы болжанады. Елдің барлық аумағында екпінді жел, тұман, көктайғақ, жаяу бұрқасын, оңтүстікте найзағай күтіледі.
Қызылорда облысының&nbsp;солтүстігінде, орталығында көктайғақ болады, жел 15-20 м/с күшейеді.

17 наурызға арналған ауа райы болжамы

Kyzylorda-news.kz. Наурыз – ұлттық дәстүр мен әдет-ғұрыпты жаңғыртып, қоғамдық құндылықтарды нығайтатын жалпыхалықтық мереке.
Осы орайда, Қызылорда облысының ішкі саясат басқармасына қарасты “Рухани жаңғыру” орталығы барша сырбойылықтарды “Ұлттық мерекеге ұлттық киіммен” атты этно-челенджді бастап, жыл сайын жаңғыртатын дәстүрге айналдыруды ұсынды.
«Ұлттық құндылықтарымызды дәріптеуді өзіңнен баста!» ұранымен өтетін этно-челленджге аймақтағы мекемелер, тұрғындар өз үлестерін қосуда.
Айта кету керек, Амал мерекесінен бастау алған Сыр өңіріндегі мерекелік шаралар салт-дәстүр мен әдет-ғұрыптарды жаңғырту, қайырымдылық шаралары, ұлттық спорт түрлерін кеңінен насихаттау, балалар үшін басты мерекеге айналдыру, қоршаған ортаны қорғау, қолөнер туындыларына қаморлық жасау бағыттарын қамтиды. Ал негізгі ірі шаралар 21-22 наурыз күндері аралығында өткізіледі.

Қызылордалықтар тоғыз күн бойы ұлттық киім киюге үндеді

Kyzylorda-news.kz. Ел Президенті Қасым-Жомарт Кемелұлы Тоқаевтың Парламент Палаталарының бірлескен отырысында Қазақстан халқына жариялаған Жолдауының елдің болашақ дамуы үшін мәні мен маңызы айрықша болды.
Мемлекеттігімізге қауіп төнген қаңтар оқиғасының сабақтарын талдай келе, бұндай жағдайдың енді қайталанбауы үшін қолдан келгеннің барлығын жасау қажеттігіне, Қазақстанды түбегейлі жаңғырту ісін жаңа қарқынмен жалғастырудың маңызына тоқталды.
Тоқыраудың жасампаздыққа ұласатыны қашанда белгілі. Ал бұған барлық саланы жүйелі жаңғырту арқылы қол жеткізе аламыз. Осы ретте Жолдауда еліміздің саяси жүйесін жаңғыртудың елеп-екшелген реформалары ұсынылды. Әділ әрі ашық бәсеке елді демократияландыруға ықпал етіп, мемлекеттің тұрақтылығын бекемдеуге бағытталмақ.
Ел Президенті енді саяси, экономикалық монополияға жол берілмейтінін қадап айтып, келесідей тарихи реформаларды ұсынды:
Президенттің қандай да бір партияның мүшесі болуына бұдан былай жол бермеу. Осы ұстаным Орталық сайлау комиссиясының, Конституциялық Кеңестің, Есеп комитетінің мүшелеріне де қатысты.
Өкілді билік тармақтарын қайта құру. Мақсаты-Парламенттің беделін арттыру. Сенат депутаттығына Президент ұсынатын квота санын 10-ға қысқартып, оның 5-ін ҚХА өкілдеріне беру орайы табылған құптарлық іс.
Заңдарды тек Мәжілістің қабылдауы, республикалық бюджетті бақылауын күшейтуі-осы Палатаның құзіретін кеңейтудің бірегей қадамы.
Облыстық мәслихаттардың, республикалық бағыныстағы қалалық мәслихаттардың төрағасы лауазымын ендіру, аталған мәслихаттарға бекіту үшін Президент тарапынан облыс әкімінің баламалы кандидатураларын ұсыну-шын мәнінде революциялық өзгерістер.
Әлемдік озық тәжірибеге сай сайлау жүйесін жетілдіру және партиялық жүйені дамыту. Мәжіліс депутаттарының 70% пропорционалды жүйе, 30% мажоритарлы жүйе арқылы сайлауға көшу, партияларды тіркеуді жеңілдету жаңа саяси мәдениетті дамытуға бағытталып отыр. Бұл қадамдардың барлық партиялардың мүддесіне қызмет ететіні сөзсіз.
Құқық қорғау органдарын күшейту, судьялардың тәуелсіздігін қамтамасыз ету мен адам құқығын қорғау істері прогрессивті бастамаларға толы.
Еліміздің идеологиялық, ақпараттық қауіпсіздігін қамтамасыз етуде БАҚ қабілетін арттырудың маңызы зор. Мемлекет пен қоғамның сындарлы әріптестігін дамытудағы Азаматтық қоғамның рөлін күшейту басты назарда болмақ. Өйткені, тәуелсіз БАҚ пен Азаматтық қоғам – реформаларды жеделдетуге ықпал етеді.
Өз құрамына сан алуан пікір иелерін топтастырған Ұлттық Құрылтай құру тәжірибесі Ұлы Дала демократиясының жалғасы іспеттес. Осынау мәртебелі құрылымның билік пен халық арасындағы алтын көпір, мықты дәнекер болатынына сенімдіміз.
Еліміздің әкімшілік-аумақтық құрылымын оңтайландыру әлдеқашан пісіп жетілген мәселе. Халықтың көкейіндегіні дөп басқан Қасым-Жомарт Кемелұлының бұрынғы Семей аймағы шегінде Абай облысын, Жезқазған шегінде-Ұлытау облысын, Алматы облысын екіге бөліп Жетісу және Алматы облыстарын құруын ел-халық үлкен көрегендік деп бағалауда. Бұл қадамдардың, көп күттірмей, аймақтардың серпінді дамуына әкелетініне сенімдіміз. Әрине, бұның бәрі Жаңа Қазақстанды құру үшін істеліп жатқан келелі жұмыстар.
Мемлекет басшысы тарихи өзгерістерді бастауда халықты бір кісідей жұмылуға шақыра отыра, «..Еліміздің егемендігі, жеріміздің тұтастығы бәрінен қымбат. Қазақстан тек бізге керек. Мемлекттілігімізді қорғау мен үшін аса маңызды. Бабалар аманатына адал болып, ұрпаққа табыстау қастерлі парыз» деп ағынан жарылды.
Жолдау әрбір қазақстандықтың жүрегіне жол тапты, халқымыздың өзінің жарқын болашағына деген сенімін еселей түсті.
Бейбіткүл КӘРІМОВА,
Қорқыт ата атындағы Қызылорда университетінің Басқарма
Төрағасы – Ректоры, қалалық мәслихат депутаты

Бейбіткүл Кәрімова: Жолдау ел сенімін еселей түсті

Kyzylorda-news.kz. Президентіміздің бүгінгі Жолдауында «Біз өзгерістерді жұртқа жақсы көріну үшін жасамаймыз. Қағаз бетінде ғана жүзеге асырылған, бірақ шындыққа еш жанаспайтын жалған табыстарға масаттанып отыратын заман келмеске кетті», – деді.
Ендігі тұста еліміздің саяси жүйесін жаңғырту арқылы халықтың мүддесін бірінші орынға қою керектігін дөп басып айтты. Бұл тұста біз, жастар қауымы Мемлекет басшысын толықтай қолдаймыз.
Еліміздің өркендеп, өзгеру жолындағы әрбір бастамасына өз ықпалымызды тигіземіз.
Рагиб АДИЛХАНОВ,
Қызылорда облыстық ҚХА волонтері

Рагиб Адилханов: Өркендеп, өзгеру жолындағы бастамаларды қолдаймыз

<a href="https://kyzylorda-news.kz/">Kyzylorda-news.kz</a>. Президент Қ.Тоқаевтың наурыз айында халыққа Жолдауы болатыны жайындағы хабарды естігелі осы күнді асыға күткеніміз рас.&nbsp; Міне, бүгін бұған да куә болдық және демімізді ішке тарта отырып, бастан аяқ тыңдадық. Тыңдадық та, риза болдық. Әрине, осы шара болады дегеннен бері әлемжеліде талай сарапшылардың да, қарапайым халықтың да алуан түрлі пікірлерімен таныс болғанбыз. Бүгінгі Жолдаудағы ұсыныстар осы пікірлердің ең өзіктілерін қамтыған, әсіресе Президенттің өзі атаған «Жаңа Қазақстанды» құру жолындағы ең қажетті деген бірсыпыра мәселелерді шешуге бағытталған, халықтың қолдауына лайық Бағдарлама болды десек артық айтқандық емес.
Соның ішінде, Президенттен бастап ең жоғары лауазымды мемлекеттік басшылардың партияға мүше болудан тыс болуы жөніндегі, елдегі сайлау жүйесін өзгерту, сайлауға партияға мүше емес азаматтардың да қатыса алуы туралы ұсыныстардың мәні зор деп ойлаймыз. Біздің ойымызша, бұл халықтың осы кезге дейінгі сайлауға деген өкпе-назын біршама тарқатуға септігін тигізері сөзсіз.
Сондай-ақ, сот жүйесін өзгерте отырып, бұл бағыттағы бұрынғы ата-бабаларымыздан қалған мұралардың жақсы жақтарын пайдалану жөніндегі пікіріне, соттардың, тергеу огандарының, полицияның халыққа барынша жақын болуы туралы айтылғандарға қосылмасқа болмайды.
Қазақстанды жаңарту жолындағы ең маңызды жұмыс БАҚ-қа байланысты екені, сондықтан тілшілердің ешкімге тәуелді болмай жұмыс жасауы қажеттігі, бұлардан да басқа бүгіннен бастап алда орындалуға тиісті көптеген мәселелер аталып, ұсыныстар мен тапсырмалар берілді.
Әсіресе, халықты көптен мазалап келе жатырған маңызды мәселе – бұрынғы жойылып кеткен Семей облысын «Абай облысы» деп, Жезқазған облысын «Ұлытау облысы» деп қайта құру және Алматы облысын екіге бөліп, бірін «Жетісу облысы», орталығы –&nbsp; Талдықорған қаласы, екіншісін «Алматы облысы», орталығы – Қапшағай қаласы ету жөніндегі ұсыныс. Тіпті, Президент Қапшағай қаласының атын «Д.А.Қонаев» деп атауға халық қосылса, өзінің де қолдайтынын білдіруі өте орынды болды.Бұған бүкіл еліміз болып қолдау білдіруміз қажет деп ойлаймын.
Әрине, бұл Бағдарламалық ұсыныстардың бір күнде, бір мезетте орындала қалуы мүмкін емес. Алдымен, Қ.Кемелұлының өзі ескерткеніндей, Заңдарға тиісті өзгерістер мен толықтырулар енгізілуге тиіс. Оның үстіне, осындай белгілі бір көлемді мерзімді қамтитын іс-шараларға Қазақстан халқы жұдырықтай жұмылып, бір кісідей атсалыспаса, ішкі, сыртқы ойы бұзық жандардың жетегінде кетпей, әркім өзіне лайықты жұмыспен айналысып, нақты нәтижелерге жетуге тырыспаса, Президенттің бұл ұсыныстарының да, «Қазақстанды жаңаша құрудың» да мүмкін емес екені өзінен өзі түсінікті.
Құрметті ағайын, Сіздерді Президентіміз Қ.К.Тоқаевтың бізге арнаған Жолдауында айтылған ұсыныстар мен тапсырмаларын қабыл алып, оны орындау жолында бірлесе жұмыс жасауға шақырамын.Еліміз аман, жұртымыз тыныш болып, жақсылықтарға жете берейік!
Жеңіс Сәдуақасұлы,
Филология ғылымының докторы,
Қорқыт ата&nbsp;атындағы Қызылорда университетінің құрметті профессоры.

Жеңіс Сәдуақасұлы: Қолдауға лайық Жолдау

<a href="https://kyzylorda-news.kz/">Kyzylorda-news.kz</a>. Бүгін мемлекет басшысы Қасым-Жомарт Кемелұлы Тоқаев өз халқына Жолдау жасады. Тәуелсіз Қазақстанның азаматы ретінде біз отбасымызбен бұл саяси жаңалықты үлкен ықыласпен тыңдап шықтық. Артынша талқылап та үлгірдік. Елімізде орын алғалы тұрған үлкен өзгерістер көңілімізден шықты.
Президентіміздің айтуы бойынша біз ескі құндылықтарымызды сақтай отырып, жаңа бастамаларға бет бұрамыз. Мақсатымыз ұлттық болмысымызды, қазақтың қазақ болып қалыптасуы жолында еңбегі ерең тұлғаларымызды құрметтей отырып, ата-бабамыз аңсаған, армандаған тәуелсіз, бейбіт ел болу.
Жолдауда қозғалған көп мәселенің ішінде халыққа ең жақын болғаны Қазақстанда облыс орталықтарын көбейтіп, әлеуетін көтеру, оларға қазақылықтың иісі аңқып тұратын атау беру мәселесі деп ойлаймын. Себебі, бұл бүгінгі күнге дейін халық аузында жүрген, көптің қалауы еді.
Сонымен бірге мемлекет басшысы қаңтар оқиғасынан кейін ел тұтастығы мен тұрақтылығының басты приоритет екендігі айқындалғанын және осы жайт қайталанбауы үшін барын салатынын, әрқашан да елмен бірге екендігін айтып, көңілімізге жылулық ұялатты. Біз де бұл жолда аянып қалмай, еліміздің өсіп-өркендеуі жолында бар күш-жігерімізді қосамыз дегім келеді.
Мөлдір Жаңбырбай,
каратэ-додан Әлем чемпионы

Мөлдір Жаңбырбай: Дамудың даңғыл жолындамыз

<a href="https://kyzylorda-news.kz/">Kyzylorda-news.kz</a>. ҚР Президенті Қасым-Жомарт Тоқаевтың «Жаңа Қазақстан: жаңару мен жаңғыру жолы» тақырыбындағы Жолдауынан ел болып үміт күткеніміз рас. Ғасырлар бойы қалыптасқан тарихы бар, шежіресі анықталған, шекарасы шегенделген ел ретіндегі жаңа қадам басуға соны серпін жасау үшін бірқатар нақты қадамдар айтылды.
Қазақ даласында ұлттық құндылықтардың сақталуын, бәсекеге қабілеттілік деңгейін арттыруды да тілге тиек етті. Еліміздің жаңа стратегиялық мақсатқа жетудегі 10 негізгі бастамасын ұсынды. Оның ішінде маңызды саяси құжатқа енгізілетін өзгерістер, елеулі сипатқа ие болатын жаңа заң жобаларын қабылдау әкімшілік-аумақтық құрылымдарға өзгеріс енгізілуінің өзі – ауқымды жұмысты қажет ететін бастама. Ұлы тұлғаларымыздың есімін ұлықтау мақсатында Абай облысын құру шешімі халықтың көңілінен шықты деп сеніммен айтуға негіз бар. Қасиетті де киелі өңір саналатын Жетісудың өз алдына облыс мәртебесін алуы, ұлан-ғайыр даламыздың дәл жүрегінде орналасқан, тарихы баянды өлке Ұлытау облысының құрылуы да жаңа сипат әкеледі деген үмітіміз жоқ емес.
Жолдаудың тақырыбының өзінен жаңа леп, жаңа көзқарас, жаңа қадам, жаңа кезең, тың мазмұнға ие жаңа бағыт, сенімді көзқарас, нақты мүмкіндіктердің бары аңғарылады. Біздің қоғамның келешек мүмкіндіктері мен мемлекеттің ұлық мұратын айқындауға бағытталған саяси салмағы басым құжат деп қарағанымыз ләзім. Ел президентінің бастамасымен қолға алынғалы отырған әр жұмысқа азаматтық үнімізді қосып, Жаңа Қазақстанды жаңғырта отырып жаңарту жолында бірлігімізді көрсету бабалар аманатын ұлықтау деп білемін.
Ел президентінің «Біз Тәуелсіздік жылдарында небір қиындықтан аман өттік. … Елімізді түбегейлі жаңғыртуға кірістік. Бұл кезең алмағайып уақытқа тұспа-тұс келіп отыр. Заман қаншалықты күрделі болса да, біз бағдарымыздан айнымаймыз. Өткеннен тағылым алып, келешекке сеніммен қадам басамыз. Осы жолда жұртымызға ең алдымен ауызбіршілік керек. Ақыл мен сабыр, парасат пен ұстамдылық қажет. Біз әр істі байыппен жасауға тиіспіз. …Біздің мұратымыз – Жаңа Қазақстанды құру» деген сөздерінен еліміздің жарқын болашағын, нық қадамдарын, қарышты дамуын көруге болады.
Сол ұлы мұратқа жетуде мемлекетімізге Жаратқан ие жар болсын!
Мақсат ДАУЫЛБАЙ,
«Рухани жаңғыру» орталығы КММ директоры,
Қазақстан Жазушылар Одағының мүшесі

Жолдауда тың мазмұнға ие жаңа бағыт бар

<a href="https://kyzylorda-news.kz/">Kyzylorda-news.kz</a>.&nbsp; Президент Қасым-Жомарт Тоқаев Парламент палаталарының бірлескен отырысында Қазақстан халқына «Жаңа Қазақстан: Жаңару мен жаңғыру жолы» атты Жолдауын жасады, деп хабарлады Ақорда.
Президент жуық арада жүзеге асырылатын ауқымды саяси реформалар мен бірқатар әлеуметтік-экономикалық шараларды жариялады.
<img src="https://www.akorda.kz/public/assets/media/uploadMedia/1647418432_DSC_2634__2.jpg" alt="" />
Мемлекет басшысы қайғылы қаңтар оқиғасына баға берді. Оның пікірінше, осы ауқымды әрі жан-жақты жоспарланған операцияның мақсаты жоғары басшылықты биліктен тайдырып, халық пен әлемдік қоғамдастық алдындағы оның беделін түсіру болды.
Қасым-Жомарт Тоқаев Күштік құрылымдар мен олардың сыбайластарының өзара ымыраласуына қатысты іс бойынша тергеу құпия жағдайда қарқынды жүргізіліп жатқанын айтты. Бұған кінәлілер лауазымдары мен қоғамдағы орындарына қарамастан, лайықты жазасын алады.
<img src="https://www.akorda.kz/public/assets/media/uploadMedia/1647418432_DSC_2613_2.jpg" alt="" />
Саяси реформаларды жүзеге асыру аясында Қасым-Жомарт Тоқаев Президенттің өкілеттігін&nbsp; қайта қараудың маңызды екеніне тоқталды. Бұл ретте суперпрезиденттік жүйеден мықты Парламенті бар президенттік республикаға көшу мәселесіне назар аударды. Атап айтқанда, Мемлекет басшысының өз өкілеттігі кезінде партияға мүше болуын тоқтату міндетін заңнамалық тұрғыдан ресімдеуді, әкімдер мен олардың орынбасарларының партия филиалдарындағы қызметіне тыйым салуды ұсынды.
Сонымен қатар Қасым-Жомарт Тоқаев Президенттің жақын туыстарына қатысты норманы конституциялық тұрғыдан бекіту қажеттігін айтты. Олардың мемлекеттік саяси қызметші және квазимемлекеттік секторда басшы лауазымдарын иеленуіне заңнамалық тұрғыдан тыйым салынады.
<img src="https://www.akorda.kz/public/assets/media/uploadMedia/1647418432_KZ3_3241.jpg" alt="" />
Бұдан бөлек саяси реформаларда биліктің заң шығарушы саласына&nbsp; да қатысты мәселе қамтылады. Сенатты жасақтау тәртібі мен оның бірқатар қызметі қайта қаралады. Мемлекет басшысы Парламенттің жоғарғы палатасындағы президенттік квотаны 15-тен 10 депутатқа дейін қысқартуды ұсынды. Сондай-ақ Мәжілістегі Қазақстан халқы Ассамблеясының квотасы алынып, Сенатқа беріледі. Осы ретте олардың саны 9-дан 5 депутатқа қысқарады.
Саяси реформалар бағдарламасында сайлау жүйесін жетілдіру, сайлау үдерісін жаңғырту, партия жүйесін дамыту мүмкіндіктерін кеңейту мәселелері қарастырылған. Мәжілістің депутаттық корпусы аралас негізде құрылады. Яғни, парламентарийлердің 70 пайызы пропорционалды, 30 пайызы мажоритарлы тәртіппен сайланады. Партияларды тіркеу рәсімі айтарлықтай жеңілдетіледі. Оларды тіркеу шегін төрт есе, яғни 20 мыңнан 5 мыңға дейін төмендету ұсынылды.
<img src="https://www.akorda.kz/public/assets/media/uploadMedia/1647418432_KZ1_7905_2.jpg" alt="" />
Мемлекет басшысы құқық қорғау институттарын күшейтуге, бұқаралық ақпарат құралдарының бәсекеге қабілеттілігін арттыруға және азаматтық қоғам институттарының рөлін нығайтуға баса мән берді. Қасым-Жомарт Тоқаев Негізгі Заңның ережелерін мүлтіксіз орындауды қамтамасыз ету мақсатында Конституциялық сот құруды тапсырды. Сондай-ақ табысты қызмет атқарған Ұлттық қоғамдық сенім кеңесінің орнына Ұлттық Құрылтай құруды ұсынды.
Ауқымды саяси реформалар еліміздің әкімшілік-аумақтық құрылымын жетілдіруге де қатысты болмақ. Президент Абай және Ұлытау облыстарын құруды ұсынды. Бұл облыстардың орталықтары Семей және Жезқазған қалалары болады. Мемлекет басшысы Алматы облысын екіге бөлу жөніндегі шешімін айтты. Алматы облысының орталығы Қапшағай және Жетісу облысының орталығы Талдықорған қаласы болмақ. Егер жұртшылық Қапшағай қаласына Қонаевтың есімін беру туралы ұсыныс айтса, Президент бұл пікірді қолдайтынын жеткізді.
<img src="https://www.akorda.kz/public/assets/media/uploadMedia/1647418432_KZ3_3245.jpg" alt="" />
Президент Жолдауда әлеуметтік-экономикалық мәселелерді шешуге мән бере отырып, дағдарысқа қарсы жедел жүзеге асырылатын шараларға арнайы тоқталды. Соның ішінде ұлттық валютаның тұрақтылығын қамтамасыз етуге, мемлекеттің үлесі бар компаниялардың валюталық табысының экспорттық сатылымын ұлғайтуға, мемлекеттік аппараттың қызметіндегі бюрократияны жоюға да баса мән берілді.
Жалпы, Мемлекет басшысының Жолдауында айқындалған бастамалар еліміздің саяси жүйесін және әкімшілік-аумақтық құрылымын барынша өзгертуге бағытталған. Қасым-Жомарт Тоқаевтың айтуынша, аталған бастамаларды іске асыру үшін Конституцияға 30-дан астам өзгертулер енгізіледі.
<blockquote>
 – Қызметіме түрлі адамдардың беретін бағасынан гөрі, мемлекетімізді қорғап қалу – мен үшін аса маңызды міндет. Осы жолда жауапкершіліктің бәрін мойныма алуға дайынмын! – деп түйіндеді Мемлекет басшысы.
</blockquote>
<img src="https://www.akorda.kz/public/assets/media/uploadMedia/1647418432_KZ4_1789.jpg" alt="" />
<img src="https://www.akorda.kz/public/assets/media/uploadMedia/1647418432_KZ3_3095_2.jpg" alt="" />
<img src="https://www.akorda.kz/public/assets/media/uploadMedia/1647418432_KZ3_3402.jpg" alt="" />
<img src="https://www.akorda.kz/public/assets/media/uploadMedia/1647418432_KZ4_1967.jpg" alt="" />
<img src="https://www.akorda.kz/public/assets/media/uploadMedia/1647418432_KZ4_1806.jpg" alt="" />
<img src="https://www.akorda.kz/public/assets/media/uploadMedia/1647418432_DSC_2766_2.jpg" alt="" />

Қасым-Жомарт Тоқаев Қазақстан халқына Жолдауын жариялады

<a href="https://kyzylorda-news.kz/">Kyzylorda-news.kz</a>.&nbsp;Бүгін Мемлекет басшысы Қасым-Жомарт Тоқаевтың «Жаңа Қазақстан: Жаңару мен жаңғыру жолы» атты Қазақстан халқына Жолдауында елдің саяси жүйесін жаңғырту мəселесі баяндалып, «Күшті Президент – ықпалды Парламент – есеп беретін Үкімет» формуласын берік ұстану арқылы мемлекетті демократияландыру үдерісіндегі Президенттің өкілеттілігін қысқарта отырып, Парламенттің төменгі палатасының құзыретін жоғарлату, елдің тұрақты жан-жақты дамуына əкеліп, ішкі саяси тұрақтылықты сақтайтыны сөзсіз.
Сонымен қатар Мемлекет басшысы Қасым-Жомарт Тоқаев бірқатар өзгерістер туралы айтты. Бұл уақыт тарих беттеріне жазылып, ел дамуының жаңа бағытының – Жаңа Қазақстанның бастауы болады. Президент әрбір сөзінде халықтың пікіріне құлақ асып шешім қабылдағанын жеткізді. Соның ішінде жаңадан облыстар құру Абай, Ұлытау, Жетісу сияқты атау берудің астарында зор мағына бар. Ерекше бір айта кететіні халық егер қарсы болмаса Қапшағайдың атауын аса көрнекті мемлекет және қоғам қайраткері, үш мәрте Социалистік еңбек ері, Қазақ КСР Ғылым академиясының академигі, техника ғылымдарының докторы Дінмұхамед Қонаевтың атына берудіде ұсынды! Біз жастар бұл ұсынысты толық қолдаймыз.
Халықтың пікіріне құлақ асатын билік әрдайым мәртебесі жоғары болады деп ойлаймын. Барлығы бірден болуы мүмкін емес сол үшін жасалатын жұмысты билікке артып қоймай қоғам болып, жастар болып ЖАҢА ҚАЗАҚСТАНДЫ бірге құрайық!
Нұрбек АҚПАНБЕТОВ,
АМАNAT партиясы Қазалы аудандық филиалының саяси бюро мүшесі,
«Жастар» БПҰ төрағасы,
Қазалы қалалық «Жастар ресурстық орталығы» КММ директоры

Қазақстан және Қызылорда облысының жаңалықтары