<a href="https://kyzylorda-news.kz/">Kyzylorda-news.kz.</a>&nbsp;6 сәуір күні сағат 22.00-ден бастап 07 сәуір күнгі сағат 06.00-ге дейін «Ақмешіт», «Мерей» мөлтек аудандарының және Тубдиспансердің ауыз су жүйелеріне жуу, шаю және залалсыздандыру жұмыстары жүргізіледі.
Осыған байланысты «Ақмешіт», «Мерей» мөлтек аудандарында 2022 жылы 6 сәуір күні кешкі сағат 22.00-ден 07 сәуір күні түнгі сағат 03.00-ге дейін ауыз су беру уақытша тоқтатылады.
Ауыз суды пайдаланар алдында кранды ашып хлордың иісі толық кеткенше ауыз суды пайдаланбауды сұраймыз. 
Ведомстволық мекемелерде 2022 жылы 07 сәуір күні сағат 06.00-ден бастап хлордың иісі толық жойылғанға дейін суды ағызуға жауапты кісілерді бекіту қажет.
Көпқабатты тұрғын үй пәтер иелерінің кооперативтері мен көпқабатты тұрғын үйлерге жауапты мекемелерін өжіре ішіндегі таратушы ауыз су құбырынан тазарту жұмыстарынан кейінгі құбыр ішіндегі шөгінді қалдықтар тазарғанша 10-15 минут ағызып жіберу ескертіледі.

Қызылордада ауыз су уақытша тоқтатылады

<a href="https://kyzylorda-news.kz/">Kyzylorda-news.kz.</a>&nbsp;Халықтың табысын арттыруға 197 млрд теңге жұмсалады. Бұл туралы бүгін Үкімет отырысында ҚР Премьер-Министрінің орынбасары – Қаржы министрі Ерұлан Жамаубаев айтты, деп хабарлайды <a href="https://lenta.inform.kz/kz/halyktyn-tabysyn-arttyruga-197-mlrd-tenge-zhumsalady_a3919133">ҚазАқпарат</a>.
Оның атап өтуінше, 2022 жылға арналған республикалық бюджетті нақтылау туралы заң жобасында халықтың табысын арттыруға бағытталған жалпы шығыстар 197 млрд теңгені құрайды. Осы қаражат аясында жастарды қолдау, өз бизнесін ашу үшін микрокредиттер беру, жалға алынған тұрғын үй үшін төлемнің бір бөлігін субсидиялау және халықтың нақты табысын арттыруға бағытталған басқа да маңызды іс-шаралар қамтамасыз етіледі. Ал азық-түлік қауіпсіздігін қамтамасыз ету жоспары аясындағы іс-шараларға 238 млрд теңге жұмсалады.
<blockquote>
 «Қосымша қаражат агроөнеркәсіптік кешенді субсидиялауға, көктемгі егіс және егін жинау жұмыстарына жеңілдікпен кредит беру көлемін ұлғайтуға және ауыл шаруашылығындағы басқа да мәселелерді шешуге бағытталатын болады», – Ерұлан Жамаубаев.
</blockquote>
Сонымен қатар оның айтуынша, жалпы сомасы 476 млрд теңге болатын қосымша шығыстар өңірлерді дамытуға бөлінеді.
<blockquote>
 «Аталған шығыстардың 271 млрд теңгесі немесе 57 пайызы батыс және оңтүстік өңірлерді дамытуға бағытталған. Жалпы алғанда, нақтылауды ескере отырып, өңірлерге республикалық бюджеттен 5,5 трлн теңгеден астам қаражат немесе жалпы шығыстардың 29,3 пайызы бағытталатын болады. Сондай-ақ, қосымша қаражат аясында инфляция дәлізінің өзгеруіне байланысты әлеуметтік төлемдерді индекстеуге арналған шығыстар көзделген. Бұл 110 млрд теңгеден асады», – Ерұлан Жамаубаев.
</blockquote>
Министрдің айтуынша, осылайша бюджет түсімдері 15,8 трлн теңгені немесе жалпы ішкі өнімге 17,3 пайызды құрайды. Шығыстар 18,8 трлн теңге немесе жалпы ішкі өнімге 20,5 пайыз деңгейінде болжанып отыр.
<blockquote>
 «Бюджет тапшылығы бұрын бекітілген деңгейде сақталды. Барлық жоспарланған шаралар экономика мен өңірлердің дамуына серпін береді, халық табысының өсуін қамтамасыз етуі және азаматтардың өмір сүру сапасын жақсартуы тиіс», – деді ол.
</blockquote>

Халықтың табысын арттыруға 197 млрд теңге жұмсалады

<a href="https://kyzylorda-news.kz/">Kyzylorda-news.kz.</a>&nbsp; Жақында Бекарыстан би мен Жаңақұрылыс елді мекендері аралығындағы автомобиль жолын орташа жөндеу жұмыстары басталды.
Мердігер мекеме «Нұрас и К» ЖШСреспубликалық және облыстық бюджеттерден бөлінген қаржыға Бекарыстан би ауылынан Арал ауданының шекарасына дейінгі 12,3 шақырым жолға құм аралыс малта тас қоспасын жайып, асфальт қабатын төсейді.
Сондай-ақ, жол қауіпсіздігін қамтамасыз ету мақсатында 30 жол белгісі орнатылып, жол жолақтары сызылады.
Аудан әкімі Мұхтар Оразбаев Бекарыстан би ауылынан басталған жол құрылысына арнайы барып, атқарылып жатқан жұмыстарды көрді.
Жол құрылысы жайлы аудандық тұрғын үй коммуналдық шаруашылығы, жолаушылар көлігі және автомобиль жолдары бөлімінің басшысы Мұрат Әбсұлтанов айтып берді.
Ал, «Нұрас и К» ЖШС бас директоры Нүркен Ботабаев жол құрылысы жобасына қатысты кейбір мәселелерді аудан басшысының назарына ұсынып, өз ой-пікірлерін жеткізді.
Аудан әкімі Мұхтар Оразбаев тиісті бөлім басшысына айтылған мәселелерге байланысты ұсыныстар дайындап, тез арада шешілу жолдарын қарастыруды тапсырды.
Аудан басшысы аталған автомобиль жолының бойындағы көне темір көпір орнына жаңадан салынып жатқан су өткізгіш құбыр құрылысын да көрді.
Қазіргі таңда ұзындығы 12 метр, диаметрі 1,5 метрді құрайтын су өткізгіш құбырының құрылысы аяқталуға жақын қалды.
<img src="https://kyzylorda-news.kz/wp-content/uploads/2022/04/01.jpg" alt="" />

Қазалыда жол жөндеу жұмыстары қарқынды

<a href="https://kyzylorda-news.kz/">Kyzylorda-news.kz.</a>&nbsp;Қазақстанда өткен тәулікте 15 адамда коронавирус індеті ПТР арқылы расталып ауырғаны белгілі болды, деп хабарлайды&nbsp;<a href="https://t.me/coronavirus2020_kz">coronavirus2020.kz.</a>
Аймақтар бойынша:
Нұр-Сұлтан қаласы – 3
Алматы қаласы – 7
Шымкент қаласы – 1
Қарағанды облысы – 1
Қызылорда облысы – 1
Солтүстік Қазақстан облысы – 2
Жалпы ел бойынша ауырғандар саны 1305214.

Қызылордада тағы бір адамнан коронавирус анықталды

<a href="https://kyzylorda-news.kz/">Kyzylorda-news.kz.</a>&nbsp;Қызылорда қаласындағы Назарбаев Зияткерлік мектебінің оқушысы Айшани Даттатрея Дубайда өткен халықаралық музыка және би байқау-фестивалінде бірінші орынды жеңіп алды. Өңірлік коммуникациялар қызметінің ақпарат алаңында БАҚ өкілдеріне конкурс барысын баяндады.
<blockquote>
 «Музыка әлеміне қызығушылығым 5 жасымнан басталды. Содан бері алты тілде ән орындаймын. Дубайда өткен байқау 9 бен 15 жас аралығындағы жасөсірімдер арасында өтті. Мен қазақ халқының әндерін орындағанды ұнатамын. Сол арқылы өзіме шабыт сыйлаймын. Осы орайда ұстаздарыма және барша қолдау білдірген жандарға алғысым шексіз», – деді Айшани Даттатрея.
</blockquote>

НЗМ: Қызылордалық оқушы Дубайдан жеңіспен оралды

<a href="https://kyzylorda-news.kz/">Kyzylorda-news.kz.</a>&nbsp;Сырдария өзенінің су деңгейі көтеріліп, Қызылорда су торабынан 536 текше метр су өтуде. Шардара су қоймасының толуына орай Сырдария өзенінің төменгі ағысына 1000 текше метр су жіберілуде. Бұл туралы Өңірлік коммуникациялар қызметінде өткен брифингте облыстық жұмылдыру дайындығы басқармасы басшысының орынбасары Бағдат Әлиев хабарлады.
<blockquote>
 «Қазіргі уақытта Шардара су қоймасы арқылы Сырдария өзенінің төменгі ағысына мың текше метр су тасталуда. Оның 450 текше метрі Көксарай су реттегіш қоймасына келуде. Бүгінде облыс аумағына 600 текше метр су келіп түсуде. Соған сәйкес облыс аумағынан магистральді каналдар мен көлдер жүйесі арқылы су алу жұмыстары жүргізіліп жатыр. Сонымен қатар 56 су басу қаупі бар аймақ анықталып, оларға 398 арнайы техника және 1 367 адам күші бар 197 мекеме бекітілді», – деді Бағдат Әлиев.
</blockquote>
Салаға жауапты мамандардың айтуынша Сыр суының дәл осылай толуы бес жыл бұрын тіркелген екен. Қазіргідей өзен арнасының толуына көктемгі жауын-шашының мол түсуі әсер еткен.
<blockquote>
 «Наурыз айының басында Сырдария өзенінің су жиналатын аймақтарында жауын-шашынның мол түсуіне байланысты су көлемі көбейді. Осы себепті Шардара су қоймасын транзиттік режимге қойып, төменге тасталынатын су көлемін – 1340 текше метрге көбейттік. Қазір Көксарай су реттегіш қоймасында – 658 млн.текше метр су бар», – деді Арал-Сырдария бассейндік инспекциясы РММ –нің басшысы Сейілбек Нұрымбетов.
 «Сырдария өзенімен облыс шекарасына 650 текше метр су түсуде. Ал Қазалы су торабынан төменгі ағысқа – 235 текше метр су тасталуда. Сырдария өзеніндегі мол суды қауіпсіз өткізу мақсатында каналдармен су алу кестесі әзірленеді. Биыл Шардараға – 2,3 млрд.текше немесе Көксарайға – 1,5 млрд.текше су жиналмаса егістікке су беру маусымы кезеңінде су тапшылығы болады деп күтілуде», – «Қазсушар» РМК Қызылорда филиалы директорының орынбасары Жорабек Ерназаров.
</blockquote>

Қызылорда су торабынан 536 текше метр су өтуде

<a href="https://kyzylorda-news.kz/">Kyzylorda-news.kz.</a> 5 сәуірде Қазақстанның басым бөлігінде жауын-шашынсыз ауа райы сақталады, деп хабарлайды Қазгидромет.
Тек солтүстікте, батыста және елдің оңтүстігінің таулы аймақтарында жаңбыр мен қар түрінде жауын-шашын күтіледі. Республика бойынша тұман, көктайғақ, желдің күшеюі, оңтүстік-батыста шаңды дауыл болжанады.
Күндіз&nbsp;Қызылорда облысының&nbsp;орталығында жел 15-20 м/с артып, шаңды дауыл тұрады.

5 сәуірге арналған ауа райы болжамы

<a href="https://kyzylorda-news.kz/">Kyzylorda-news.kz.</a> Қызылорда қаласмында «Балалар жылы» және «Халықаралық балалар кітабы» күніне орай «Ертегімен есейемін» дәстүрлі қалалық байқауы өтті.
Жас оқырмандарды кішкентайынан халық ауыз әдебиетімен сусындатып, балалардың тілін, қиялын, сөздік қорын, ой – өрісін дамытуға, адалдыққа, адамгершілікке, парасаттылыққа, елжандылыққа тәрбиелеу мақсатында ұйымдастырылған байқауға қала аумағынан 7 мектептің бастауыш сынып оқушылары қатысты.
<blockquote>
 «Халқымыз «көп жасаған білмейді, көп оқыған біледі» деп ежелден кітаптың адам өміріне әсерін осы бір қарапайым сөзбен-ақ айтып кеткен. Өйткені кітап – тәрбиенің қуатты құралы. Жақсы кітаптар оқу дегеніміз – өткен замандардың ең жақсы адамдарымен әңгімелесу», – дейді қалалық мәдениет және тілдерді дамыту бөлімінің басшысы Н.Әбілдаев.
</blockquote>
Айта кетейік, байқауға «Петро Қазақстан Құмкөл Ресорсиз» АҚ, «Халық» банкі АҚ, «Әбіл ата» сантехника дүкені демеушілік жасаса, қалалық орталықтандырылған кітапханалар жүйесінің директоры Г.Рахметова, «Халық» банк қызметкері Д.Алдоңғарова, «Қоғам ТВ» телеарнасының шеф редакторы Б.Құлтанова төрелік етті.
Әр мектептен келген өнерпаз оқушылар байқаудың бірінші кезеңінде дат жазушысы Г.Х.Андерсеннің ертегілерінен қойылым көрсетсе, екінші кезеңде қазақ халық ертегілерін сахналап, көрермен ықыласына бөленді.
Нәтижесінде №136 Т.Жүргенов атындағы орта мектеп оқушылары Бас жүлдені жеңіп алса, І орынға №23 Ж.Қизатов атындағы мектеп-лицей лайық деп танылды. 2 орынды №217 Б.Шалғынбаев атындағы орта мектеп пен №5 И.Панфилов атындағы мектеп-лицей оқушылары өзара бөліссе, №120 Ж.Жабаев атындағы, № 171 Ғ.Мұратбаев атындағы және №143 орта мектептер 3 орынды қанағат тұтты. Жеңімпаздар мен жүлдегерлерге дипломдар мен бағалы сыйлықтар табыс етілді.
Балалардың тыңғылықты дайындығы мен жеңіске деген құштарлығын көре отырып, жыл сайын дәстүрге айналған «Ертегімен есейем» қалалық байқауының мақсаты айқын, берері мол деп ойлаймыз.
Себебі бүгінгі ұрпақ білімді болса ел ертеңі жарқын болмақ.
<img src="https://kyzylorda-news.kz/wp-content/uploads/2022/04/277556777_161870879541948_2566108034149658868_n.jpg" alt="" />
<img src="https://kyzylorda-news.kz/wp-content/uploads/2022/04/277666584_161870819541954_4351150963376173580_n.jpg" alt="" />
<img src="https://kyzylorda-news.kz/wp-content/uploads/2022/04/277741856_161870806208622_2348701349087610115_n.jpg" alt="" />
<img src="https://kyzylorda-news.kz/wp-content/uploads/2022/04/277731113_161870886208614_8039671652001511376_n.jpg" alt="" />

Қызылордада «Ертегімен есейемін» атты байқауы өтті

<a href="https://kyzylorda-news.kz/">Kyzylorda-news.kz.</a> Елді мекендерде қордаланып қалған мәселелерді шешу, ауылдардың инфрақұрылымын жақсартып, тұрғындарға қолайлы жағдай жасау бағытында Қызылорда облысының әкімі Гүлшара Әбдіқалықова 1,5 жыл ішінде 120-ға жуық елді мекенді аралап, әр ауылдың мәселесін жеке қарап, тұрғындардың ұсыныс-пікірлерін тыңдады. Енді жыл аяғына дейін өңір басшысы шалғай орналасқан өзге де ауылдарға барып, өзекті ұсыныстарды ескеріп, мәселелерге талдау жасайды.
Облыс әкімінің баспасөз қызметі халық үшін аса маңызды саналатын газдандыру, жол салу, ауыз су желілерін тарту, медицина, тұрғын үй мен мектеп салу ісінде нақты орындалған жұмыстарды тізбелейді.
Өңірдегі барлық аудан орталығы газға қосылған
Бүгінгі күні аймақта тұрғындардың газ тұтыну деңгейі 67 пайызға жетті. Өткен 1 жыл ішінде Қармақшы, Жалағаш, Сырдария ауданының орталықтарында газдандыру жұмыстары толық аяқталып, 46 мыңнан астам тұрғын табиғи газға қол жеткізді. Ал, Шиелі ауданы Н.Бекежанов, Қодаманов елді мекендеріне табиғи газ беріліп, 6 мыңнан астам тұрғын көгілдір отынның игілігін көруге мүмкіндік алды. Бүгінде Қызылорда қаласындағы Наурыз, Махамбет елді мекендерін газдандыру жұмыстары жүргізілуде.
Биыл Қазалы қаласы мен Жалаңтөс, Басықара, Пірімов, Шиелідегі Алғабас, Ақмая ауылдарында алау оты жағылады. 2025 жылға дейін өңірде тағы 38 елді мекенге көгілдір отын жетеді.
<img src="https://kyzylorda-news.kz/wp-content/uploads/2022/04/gaz.jpeg" alt="" />
Өңірдегі жақсы жолдардың үлесі 75 пайызға жетті
Аймақ үшін «Батыс Еуропа – Батыс Қытай» құрлықаралық автокөлік дәлізінің маңызы зор. Бес облыс аумағынан өтетін 2787 шақырым жолдың 812 шақырымы Қызылорда жерінде. Бұл аудан орталықтары теміржол мен автожол бойында орналасқан облыс үшін ең тиімді. Қазір өңірдегі жақсы жағдайдағы жолдардың үлесі 75 пайызға жетіп отыр. Ел Президентінің Ұлытау облысын құру тапсырмасы аясында Қызылорда-Жезқазған тас жолының жаңартылуы да ерекше мәнге ие. Құрылыс жұмыстары биыл басталмақ.
<img src="https://kyzylorda-news.kz/wp-content/uploads/2022/04/zhol.jpeg" alt="" />
Облыс халқының 98 пайызы таза суды тұтынады
Өткен жылы «Нұрлы жер», «Ауыл – ел бесігі» мемлекеттік бағдарламалары арқылы 110,7 шақырым ауыз су және 11,4 шақырым кәріз желілері тартылды. Субсидиялауға облыстық бюджеттен 3,3 млрд.теңге бөлініп, 178 елді мекен сумен қамтылды.
Нәтижесінде облыс халқының 97,8 пайызы орталықтандырылған ауыз су жүйесіне қосылды.
<img src="https://kyzylorda-news.kz/wp-content/uploads/2022/04/whatsapp-image-2022-04-04-at-16.27.21.jpeg" alt="" />
2 жылда 12 медициналық нысан іске қосылды
Соңғы 2 жылда Сыр елінде 12 медициналық нысан ашылды. Атап айтқанда, 3 дәрігерлік амбулатория, 6 медпункт, Жалағаш аудандық, Қызылорда қаласында модульді жұқпалы аурулар ауруханалары. Сондай-ақ, Қызылорда қаласында 60 төсектік «Қамқорлық» оңалту орталығы мен Әйтеке би кентінде 250 келушіге арналған емхана құрылысы аяқталуға жақын. &nbsp;
<img src="https://kyzylorda-news.kz/wp-content/uploads/2022/04/whatsapp-image-2022-04-04-at-16.27.202.jpeg" alt="" />
Жыл аяғына дейін 7 мектеп пайдаланылуға беріледі
Білім беру саласында былтыр 750 орындық 3 мектеп пайдалануға берілді, оның ішінде 448 орындық 2-уі жеке меншік мектеп. Биыл 8 мектептің құрылысы жүргізіліп, 7 білім ордасы жыл аяғына дейін пайдалануға беріледі.
<img src="https://kyzylorda-news.kz/wp-content/uploads/2022/04/mektep.jpeg" alt="" />
Сырбойылықтарға жылына 1500 пәтер табысталады
1 жылда 463 аз қамтылған көпбалалы отбасы, 160 әлеуметтік аз қамтылған отбасы, тұрғын үйі апатты деп танылған 50 азамат үйлі болды. Ал, республикалық бюджеттен 321 көпбалалы ана баспаналы болды. Биыл қызылордалықтарға 122 пәтер кілтін табыстау жоспарда бар.
<img src="https://kyzylorda-news.kz/wp-content/uploads/2022/04/whatsapp-image-2022-04-04-at-16.27.23.jpeg" alt="" />
P.S. Тұрғындардың жеке мәселелерін қарауда облыс әкімі айына екі рет кезектілік тәртіппен азаматтарды қабылдайды. Ал, жылына 2 рет Орталық коммуникациялар алаңында журналистер алдында баспасөз брифинг өткізеді. Бұдан былай аймақ басшысының тапсырмасына сәйкес облыс әкімінің орынбасарлары тоқсан сайын және шұғыл мәселелерде жедел түрде брифинг береді.
<img src="https://kyzylorda-news.kz/wp-content/uploads/2022/04/whatsapp-image-2022-04-04-at-16.27.231.jpeg" alt="" />
<img src="https://kyzylorda-news.kz/wp-content/uploads/2022/04/whatsapp-image-2022-04-04-at-16.27.22.jpeg" alt="" />
<img src="https://kyzylorda-news.kz/wp-content/uploads/2022/04/whatsapp-image-2022-04-04-at-16.27.222.jpeg" alt="" />

Қызылорда облысының әкімі 120 елді мекенді аралады

<a href="https://kyzylorda-news.kz/">Kyzylorda-news.kz.</a> Әлеуметтік желіде підия садақасына байланысты біржақты пікір айтылуда. Осыған байланысты ҚМДБ Шариғат және пәтуа бөлімі әзірлеген материалды назарларыңызға ұсынамыз.
Ислам дінінде бұйырылған белгілі бір құлшылықтың орнына төлем жасау «підия» деп аталады. Алла Тағала қасиетті Құранда: «Парыз ораза санаулы әрі белгілі күндерде ғана өтеледі. Араларыңнан әлдекім ауырып қалып немесе сапарда жүріп ораза ұстамаса, (қаза болған күндерін) басқа уақытта ұстасын. Ораза ұстауға шамасы әзер жететіндер (яғни, қарттар және созылмалы дертке шалдыққан науқастар қаза болған әр күнге) підия ретінде бір жарлының (бір күндік екі мезгіл) тамағын (немесе соның құнын ақшалай) беруі керек» («Бақара» сүресі, 184-аят), – деп бұйырған.
Жылдың басқа мезгілінде ораза ұстауға шамасы келмейтін қария кісіге және өмір бойы ауыратын созылмалы дерті бар адамға ораза ұстамауға рұқсат етіледі (Радду әл-мухтар, 3/410. Абдулхамид Махмуд Туһмаз, әл-фиқһ әл-ханафи фи сәубиһи әл-жәдид, 1/442). Мұндай топтағы адамдар оның орнына підия садақасын береді.
Підия садақасы – ол бір адамның күнделікті (таңғы және кешкі) тойып ішетін асы. Оның ең аз мөлшері биыл 3000 (үш мың) теңге деп белгіленді. Өйткені, барлық облыстардан алған мәліметтер бойынша, бір адамның ең төменгі бір мезгіл тойып ішетін ас-суының орташа құны шамамен 1500 теңгеге тура келді.
Бұл садақаны халықтың кедей топтарына, тұрмыстық жағдайы төмен көп балалы отбасына, хәлі нашар мүгедек жандарға үлестірген абзал. Бекітілген підияны (3000 теңгені) беруге шамасы келмесе, оразаның әр күніне пітір садақа мөлшерінде (500 теңге) підия берсе де болады. Оған да жағдайы келмесе – беру міндет емес. Шамасы келмеген кісі Алла Тағаладан кешірім тілеп, тәубе етеді.
Підияны бірден Рамазан айының басында немесе соңында беруге болады. Сондай-ақ бір айдың підиясын бір адамға немесе бірнеше адамға бөліп берсе, оның оқасы жоқ.
Алдағы уақытта науқас ауруынан айығып кетсе, дәрменсіз адам күш алса, үзірі кеткен боп саналады да, берген підиясы жәй садақаға айналады. Яғни, ол адам бұрынғы оразалардың қазасын өтейді («Әл-фәтауа әл-һиндия», 1/270). Өйткені, підия беру үшін науқастың әлсіздік, сырқатты жағдайы өмірінің соңына шейін жалғасуы шарт.
Егер ораза ұстаған адамның ауру, әлсіздік секілді қиындық тудыратын халі уақытша құбылыс болса, қалған күндерін рамазан айынан кейін толтырып береді. Қаза оразаны үздіксіз тұту шарт емес. Қаласа бөліп, қаласа үздіксіз тұтады. Қазасын келесі оразаға дейін ұстап үлгермесе, онда ол оразаны Рамазан айынан кейін өтейді.
<a href="https://www.facebook.com/profile.php?id=100024423729069&__cft__[0]=AZU4aUSsmNYR7gaYjVxaY_m8cioatYKeIgsPyeLWq7dUNyfTZ6MLfHMVzcvWLPOrKS5f71XQlziZ3zJ_76S9_jtySfFjGR6nySnSPMZr5P9WUsneOR_NyqOK-8XEIyxNStM&__tn__=-UC%2CP-R">Ағабек Қонарбайұлы</a>

Ораза ұстауға шамасы келмеген жандар  підия беру керек

<a href="https://kyzylorda-news.kz/">Kyzylorda-news.kz.</a>&nbsp; Қызылордада жоғары оқу орындары, техникалық және кәсіптік білім беру ұйымдарының білім алушылары арасында өткен бокстан облыстық ашық біріншілік аяқталды.
Спорттық шара Қорқыт ата атындағы Қызылорда университетінің ұйымдастыруымен, қалалық мәслихат, облыстық білім басқармасы, облыстық дене шынықтыру және спорт басқармасының қолдауымен «Сейхун» спорттық-сауықтыру кешенінде өтті.
Университетте осымен төртінші мәрте ұйымдастырылған облыстық біріншілік төрт күнге созылды. &nbsp;
Бокстан облыстық ашық біріншіліктің жеңімпаздарды марапаттау салтанатына университеттің Басқарма Төрағасы – Ректоры Бейбіткүл Кәрімова қатысты.
<blockquote>
 &nbsp;Қазіргі уақытта оқу ордасында спорттың 13 түрінен секциялар жұмыс жасайды. Білім алушылар жыл сайын жаңа биіктерді бағындырып, әлемдік деңгейде танылуда. Оқу ордасында 2005 жылы ашылған бокс үйірмесі талантты жастарды шыңдап, спорт додаларында топ жаруына ықпал етті. Бокстан Токио олимпиадасының қола медаль иегері Қамшыбек Қоңқабаев, әлем чемпионатының қола жүлдегері және кәсіпқойлар арасында бірінші орта салмақта WBC International тұжырымдамасының чемпионы Тұрсынбай Құлахмет, Азия чемпионы Нұрлан Мәсенов және өзге де чемпион түлектер – біздің мақтанышымыз, – деді Бейбіткүл Сәрсемханқызы.
</blockquote>
&nbsp;Айта кету керек, қазіргі уақытта университетте әлем чемпионатының – 9, Азия чемпионатының – 27, Қазақстан чемпионатының 120 жеңімпазы мен жүлдегері бар.
Былғары қолғап шеберлерінің бәсекесіне облыс бойынша білім беру ұйымдарынан 16 салмақ дәрежесінде ерлер мен қыздардан құралған 16 команда, 122 білім алушы қатысты.
Бокстан облыстық ашық біріншілікте жалпы командалық есеп бойынша Қорқыт ата атындағы Қызылорда университеті жеңіске жетіп, 29 медаль еншіледі. Оның сегізі – алтын, алтауы – күміс, он бесі – қола.
Ал, Жалаңтөс Баһадүр атындағы олимпиадалық резервтің облыстық мамандандырылған мектеп-интернат-колледжі командасы ІІ орын, Болашақ университетінің командасы ІІІ орын иеленді.
Спорттық шарада әлем чемпионатының қола жүлдегері және кәсіпқойлар арасында бірінші орта салмақта WBC International тұжырымдамасының чемпионы Тұрсынбай Құлахмет университеттің «Үздік түлек» медалімен марапатталды.
Жарыстың бас демеушілері, университет түлектері – «Шебер ЖБИ» мекемесінің құрылтайшысы Досхан Жүнісов, «Қазақстан Астық Компаниясы» ЖШС-ның атқарушы директоры Қазыбек Омаров.
Сондай-ақ, жеңімпаздарға ұйымдастырушылар тарапынан дипломдар мен естелік сыйлықтар, «Amanat» партиясы «Тұран» филиалының Алғыс хаттары табысталды.
<img src="https://kyzylorda-news.kz/wp-content/uploads/2022/04/276303201_2523249557812455_5097920539077242884_n.jpg" alt="" />
<img src="https://kyzylorda-news.kz/wp-content/uploads/2022/04/277173355_2523249877812423_3435947684142989940_n.jpg" alt="" />
<img src="https://kyzylorda-news.kz/wp-content/uploads/2022/04/277354148_2523249571145787_4286305171294564398_n.jpg" alt="" />
<img src="https://kyzylorda-news.kz/wp-content/uploads/2022/04/p1766134.jpg" alt="" />

Бокстан облыстық ашық біріншіліктің жеңімпаздары анықталды

<a href="https://kyzylorda-news.kz/">Kyzylorda-news.kz.</a> Қазақстанда жаңа кәсіби мереке – ветеринарлық қызметкерлер күнін енгізу ұсынылды. Бастаманы депутат Екатерина Смышляева үкімет сағатында көтерді, деп хабарлайды <a href="https://stan.kz/kazakstanda-zhana-kasibi-mereke-engizu-ysinildi-362526/">Stan.kz</a>.
<blockquote>
 «Ветеринарлық қызметкердің кәсіби мерекесінің жоқтығы мал дәрігеріне деген мемлекеттің, біз бен сіздің қарым-қатынасымызды көрсетеді. Есепшілер мен қаржыгерлерде 2-3 мерекеден бар, ал мал дәрігерінің күні жоқ. Біз сонда бұйрықтағы 15 әріпті аяймыз ба? Онда ешқандай шығын немесе демалыс күні жоқ. Бұл тек елдегі азық-түлік пен жануарлардың қауіпсіздігін қамтамасыз ететіндерге құрметті көрсетеді», –&nbsp;деді парламент депутаты ауыл шаруашылығы министріне.
</blockquote>
Министр Ербол Қарашүкеев депутаттың ұсынысын қолдады.&nbsp;
<blockquote>
 «Қолдаймын, мал дәрігері күнін біз енгізуге тырысып жатырмыз. Сондай-ақ қызметкерлерімізді материалдық емес тұрғыдан мадақтау үшін еңбек сіңірген мал дәрігері мен жаңа ведомстволық наградалар енгізсек деген ойымыз бар», – деді министр.
</blockquote>
Бұған дейін Ербол Қарашүкеев қазақстандық жастардың бұл салаға барғысы келмейтінін айтқан еді. Қазіргі уақытта еңбек нарығында жасы 40-тан асқан қызметкерлер жұмыс істеуде, ал жаңа мамандар жоқтың қасы.

Қазақстан және Қызылорда облысының жаңалықтары