<a href="https://kyzylorda-news.kz/">Kyzylorda-news.kz.</a>&nbsp;Нұр-Сұлтанда Ashyq қосымшасын әзірлеген мамандарды жеке кәсіпкер сотқа берді. Бұл туралы жобаны әзірлеуге қатысқан Виталий Пустовойтенко әлеуметтік желідегі парақшасында жазды, деп хабарлайды&nbsp;<a href="https://stan.kz/">Stan.kz</a>.
Оның айтуынша, сотқа арыз түсірген – жеке кәсіпкер. Бірақ оның сотқа не себепті арыз түсіргені әзірше белгісіз
«Алдымен ұйқысыз түндер, одан кейін жобаны тездетіп әзірлеу мен іске қосу, сосын хейтпен күрес, мемлекетке тапсыру, осымен бәрі бітті ме десем, олай емес екен. Енді, сотқа барып тұру қажет. Оған да уақыт кетеді. Бұл өнім біздікі екенін және оған өз қалауымыз бойынша иелік ете алатынымызды дәлелдеуге тура келетін шығар. Біз сыйға тарту шарты бойынша беруге шешім қабылдадық», – деп жазды Пустовойтенко әлеуметтік желідегі парақшасында.
Қалалық сотта арыздың түскенін растады. Бүгінде алдын ала отырыстың уақыты белгіленіп отыр. Алғашқы сот отырысы 20 сәуірде өтеді. Процесс ашық болады.
Айта кетсек, Ashyq қосымшасын 2021 жылдың басында коронавирус пандемиясы кезінде енгізген болатын. QR-код арқылы адамның вирус жұқтырғаны, я болмаса, науқаспен байланыста болғаны туралы мәлімет ақпараттық базадан алынып, арнайы түспен көрсетіліп тұрған.
Мобильді қосымшаның арқасында бизнес нысандары жұмыс істей бастады.
Биыл 12 наурызда ведомстоваралық комиссия Ashyq қосымшасын пайдалануды тоқтатуға шешім қабылдады.

Ashyq қосымшасын жасаған мамандардың үстінен арыз түсті

<a href="https://kyzylorda-news.kz/">Kyzylorda-news.kz.</a>&nbsp;Бүгін Қазақстанның барлық өңірінде жалпы білім беретін пәндер бойынша республикалық олимпиаданың қорытынды кезеңі басталды.
Офлайн форматта «USTUDY» тестілеу орталығы базасында өтіп жатқан білім бәйгесінің ІІ кезеңіне облыстық білім басқармасының басшысы Ақзира Қасымова келіп, оқушыларға сәттілік тіледі.
<blockquote>
 «Биылғы олимпиада «Бір қатысушы, бір компьютер, бір камера» форматы бойынша жүргізілуде. Ашықтықты бақылау үшін мүдделі емес үшінші тұлғалар – «Әділдік жолы» республикалық қоғамдық бірлестігінен, «Адалдық алаңы» мүшелері мен «Дарын» республикалық орталығының жауапты қызметкерлері қатысуда. Айта кетейін, өткен жылы олимпиадаға 56 оқушы қатысып, 26 оқушы жүлделі орынға ие болған болатын. Биыл да осы көрсеткішіміз жоғары болады деген сенімдемін. Оқушыларға сәттілік тілеймін», – деді Ақзира Бақтыбайқызы.
</blockquote>
Білім сынағына облыс көлемінде жалпы 14 пән бойынша 83 оқушы және Назарбаев Зияткерлік мектебінен 2 оқушы қатысуда. Ал тестілеудің алғашқы күніндегі жаратылыстану-математикалық бағытындағы ІІ кезеңге 22 оқушы бақ сынауда.
Айта кетейік, білім бәсекесі 18-23 сәуір аралығында өтеді. Олимпиаданың өткізілу барысы тікелей эфир арқылы YouTube желісінен қадағаланып, Syr-daryny.kz сайтында жариялануда.

Ақзира Қасымова олимпиадаға қатысушы оқушыларға сәттілік тіледі

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында биылғы жылдың бірінші тоқсанында туберкулез ауруының 97 жаңа жағдайы тіркелді. Оның 94%-ы өкпе туберкулезі, сондай-ақ 50%-нда туберкулездің жұқпалы, яғни ашық түрі анықталды. Бұл өткен жылдың осы мерзімімен салыстырғанда 17%-ке жоғары.
Індетке шалдыққандардың 70%-і әлеуметтік белсенді топтар, яғни 18-64 жас аралығындағы тұрғындар сырқаттанған.
Кәсіби құрамы бойынша жіктейтін болсақ, жұмыссыздар-38, зейнеткерлер-24, мектеп оқушылары мен студенттер-7, қалғаны басқа контингенттер үлесінде.
Тәуекел тобындағы контингенттердің флюрографиялық тексеруден уақытылы өтпеуінің, аурудың бастапқы клиникалық белгілері байқалса да, медициналық көмекке кеш жүгінуінің салдары туберкулездің ауыр ағымда өтуіне әкеп соқтырады. Жыл басынан бері ересектер арасында туберкулездің 1 асқынған түрі және 3 өлім жағдайы тіркелді. Туберкулез ошақтарына, қарым-қатынаста болған адамдарға эпидемиологиялық бақылау, зерттеу, ауру көзін анықтау шаралары медицина ұйымдары мамандарымен бірлесіп жүргізілуде.
Соңғы 2 жылда коронавирус инфекциясының пандемиясы туберкулез індетіне қарсы тиісті профилактикалық шаралардың уақытылы жүргізілуіне кері әсерін тигізді. Туберкулезді анықтау сынамаларын қоюға және екпе жүргізуге қарсылық танытқандар саны артты. Бұл сәйкесінше туберкулез ауруының эпидемиологиялық ахуалының тұрақсыз болып қалыптасуына әсер етті.
Санитариялық-эпидемиологиялық бақылау саласының қызметкерлері денсаулық сақтау ұйымдары мамандарымен бірлесіп, санитариялық-ағарту жұмыстарын жүргізуде. Мектеп оқушыларының ата-аналарымен кездесіп, екпенің маңызы туралы түсіндірді. Нәтижесінде балалар арасында туберкулез ауруын ерте анықтауға мүмкіндік беретін манту сынамасымен және туберкулезге қарсы ревакцинация жұмыстарымен 6-7 жастағы балалар оптималды деңгейде қамтылды.
Ауа барлық адамға ортақ болғандықтан туберкулез бактериясын жұқтырудан ешкім қорғалмаған. Әсiресе балалар мен егде жастағылар үшiн өте қауiптi. Туберкулезбен ауыратын адаммен жақын қарым-қатынас жиi, әрi ұзақ болса, түрлi себептермен ағзаның қорғаныш күшi әлсірегенде туберкулез таяқшалары белсендiлiк танытып, аталмыш аурудың қозуына себепшi болады.
Бүгiнде ауру ерте анықталып, емдеу шаралары уақытылы жасалған жағдайда туберкулезден толық сауығып шығу мүмкіндігі дәлелденген.
Туберкулездің алдын алудың тиімді әдісі –профилактикалық медициналық тексеруден өту.Туберкулез рентгенологиялық әдіспен анықталады, яғни кеуде қуысын флюорорграфиялық жәнерентгенологиялық тексеруден өткізу. Ал балалар арасында туберкулезді анықтаудың маңызды әдісі-туберкулин сынамасын қою. Туберкулин диагностикасы 12 айдан бастап 14 жасқа жеткен тәуекел тобындағы балаларға Манту сынамасын қою арқылы жүргзіледі.
Манту сынамасын бұрынғы қойылған сынамалардың нәтижесіне қарамастан жылына бір рет қояды. Ол БЦЖ вакцинасын егу мен қайта егу контингентін іріктеу мақсатында жасалады. Балалар үшін БЦЖ вакцинасын егу еңалдымен туберкулез менингиті, ауыр түрдегі аурулардың таралуынан қорғайды. Алғашқы екпені жаңа туылған бала перзентханада 0-4 күн ішінде алады. БЦЖ ревакцинациясы тек дені сау, қойылған Манту сынамасы теріс болған 6-7 жастағы балаларға жүргізіледі.

Қызылордада туберкулез сырқаты белең алып барады

<a href="https://kyzylorda-news.kz/">Kyzylorda-news.kz.</a>&nbsp;23 сәуірде сағат 19.00-де Қызылорда қаласында Нартай Бекежанов атындағы Қызылорда облыстық қазақ академиялық музыкалық драма театрында Қазақстанның Халық әртісі, Халық қаһарманы Роза Бағланованың 100 жылдық мерейтойына арналған «Қазақтың қаһарман қызы» атты мерекелік концерт өтеді.
Концерттік бағдарламада Қазақстанның халық әртісі Нұрғали Нүсіпжанов, Сұлушаш Нұрмағанбетова, Алтынбек Қоразбаев, Гүлнәр Сиқымбаева, Жеңіс Сейдуллаұлы, Жеңіс Ысқақова, Игорь Благодарный, Айгуль Иманбаева, Асхат Үрпеков, Шаба, Нұрлан Албан, Бауыржан Исаев, Зарина Жакенова сынды әртістер мен Құрманғазы атындағы Қазақ ұлттық оркестрі өнер көрсетеді.
Сыр елі –жыр елі талайды таңдай қаққызған тума таланттардан кенде емес. Ән мен сұлулық бәйгесінің тәжін қоса киген алаштың ай маңдайлы аруы, Ұлыбританияда өтетін жыл сайынғы «Әлемнің әйгілі әйелдері» атағын алған қазақ ханымы Роза Бағланованың 100 жылдық мерейтойы ресми түрде басталып, республика көлеміндегі іс-шараларға ұласып, енді міне, туып өскен жері Сыр елінде ғасырлық тойы тойланғалы жатыр.
Айта кетейік, қазақ өнерінің біртуар әншісіне арналған бұл керемет ән кеші Мәдениет және спорт министрлігінің ұйымдастыруымен өтеді.

Қызылордада Роза Бағланованың құрметіне концерт өтеді

<a href="https://kyzylorda-news.kz/">Kyzylorda-news.kz.</a>&nbsp;19-22 cәуір аралығында Үлкен және Кіші Алматы су алаптарында (2700 метр биіктігінен жоғары) жылымық әсерінен қар жамылғысының тұрақсыз болуына және жауын-шашынның күтілуіне байланысты қар көшкіні қаупі сақталады.
Көшкін жүру қаупі мүмкін болуына байланысты қарлы беткейлерге шығу ұсынылмайды.
Қызылорда облысының орталығында жел солтүстік-шығыстан соғады, күші 15-20 м/с сақталады.

Қызылордада ауа райына байланысты ескерту жарияланды

<a href="https://kyzylorda-news.kz/">Kyzylorda-news.kz.</a>&nbsp;18 сәуір – Халықаралық ескерткіштер мен тарихи орындар күніне орай Қармақшы аудандық пробация қызметі мен Қорқыт ата мемориалды музейі пробация есебінде тұрған азаматтарға «Қорқыт ата – қобыз үні» атты мәдени іс-шара ұйымдастырды.
Түркі дүниесінің қайталанбас дара тұлғасы Қорқыт Атаның жамбасы тиген қасиетті Қармақшы жеріндегі Қорқыт Ата кешеніне келген қонақтарды кешеннің меңгерушісі мен қызметкерлері қарсы алып, қонақтарды экскурсовод Қорқыт ата мұражайының экспонаттарымен таныстырды. Сотталған азаматтар, экскурсовод айтқан Қорқыт Ата туралы аңыздан, қобыз бейнесінен, сырынындай желден шығып тұрған қобыз үнінен біраз әсер алды.
Іс шараның негізгі мақсаты – Қармақшы аудандық пробация қызметінің есебінде тұрған қоғамнан оқшалауға байланысты емес жаза түрлеріне тартылған азаматтардың рухани байлығын арттырыра отырып, олардың өмірге деген көз қарасын өзгерту және түзелу жолына түсіуне ықпал ете отырып, қылмыс әлемінен алшақтату.
<blockquote>
 «Бүгінгі шарадан керемет әсер алдым. Қорқыт Ата туралы аныз әңгімелерді естіп, қобыздың үнін тыңдап, мұражай экспозициясынан бабамыздың өмір сүрген дәуірдің тарихы мен мәдениеті жайлы мәліметтер білдім. Шараны ұйымдастырушыларға алғысым айтамын», – деді есептегі азамат.
</blockquote>
<img src="https://kyzylorda-news.kz/wp-content/uploads/2022/04/img-20220414-wa0045.jpg" alt="" />

Қызылордада пробация есебіндегілер Қорқыт ата кешеніне барды

<a href="https://kyzylorda-news.kz/">Kyzylorda-news.kz.</a> Қорқыт ата атындағы Қызылорда университетінде «Энергия және ресурстарды үнемдеу технологиялары: тәжірибелер мен келешегі» атты IV халықаралық ғылыми-тәжірибелік конференция өтті.&nbsp; Ауқымды шараны университет Халықаралық жасыл технологиялар және инвестициялық жобалар орталығымен бірлесіп ұйымдастырды.&nbsp;
Конференцияда отандық және шетелдік ғалымдар қазіргі ғаламдық проблемелар мен ғылыми жаңалықтарды талқыға салды.
Жиында басқарма төрағасы – ректор Бейбіткүл Кәрімова жаһандану дәуірінде адамзат экономикалық, саяси, экологиялық, демографиялық проблемаларға тап болғанын, соның ішінде адамзатты отынмен және энергиямен қамтамасыз ету мәселесі туындағанын атап өтті.
<blockquote>
 «Жаңартылатын энергия көздерін дамыту үшін энергияның жаңа моделін құру, электр энергиясын өндірудің технологиялық базасын әртараптандыру, энергия тапшылығын азайту және жаһандық экологиялық мәселелерді шешу қажет екені анық. Жаңартылатын энергия көздеріне деген сұраныс үнемі өсіп келеді. 2050 жылға қарай олардың әлемдегі энергетикалық баланс үлесі 35%-ға дейін артады деп болжануда. Бүгінде барлық дамыған елдерде баламалы энергетикаға қатысты бағдарламалар жасалып, жүзеге асырылуда», – деді Бейбіткүл Сәрсемханқызы.
</blockquote>
Конференция барысында энергия үнемдеу, энергия тиімділігі және баламалы энергия, энергия мен ресурстарды үнемдеудің экономикалық аспектілері туралы тың мәліметтер айтылды. Сондай-ақ, инновациялық IT технологиялар және технологиялық процестерді модельдеу, агроөнеркәсіптік сектордағы ресурстарды үнемдеу, нанотехнологиялар және табиғи ресурстарды ұтымды пайдалану жолдары талқыланды.
Айта кету керек, жыл сайын конференцияға қатысушылардың саны артып келеді. Онлайн және офлайн өткен шараға университет бойынша 160-тан астам профессор-оқытушы қатысты.
<img src="https://kyzylorda-news.kz/wp-content/uploads/2022/04/a129cab5-c81f-4e31-a24d-f355f478978b.jpg" alt="" />

Ғалымдар баламалы энергияны алу жолдарын зерттеуде

<a href="https://kyzylorda-news.kz/">Kyzylorda-news.kz.</a> Қызылорда облыстық кәсіпкерлік және туризм басқармасы мемлекеттік қолдауға ие болған кәсіпорындарға баспасөз турын ұйымдастырды.
Журналистер «Қызылopдa өңipлiк инвecтициялық opтaлығы» микроқаржы ұйымы арқылы несие алған және «Бизнестің жол картасы 2025» мемлекеттік бағдарламасы аясында грант ұтқан бірнеше жеке кәсіпкерлік субьектілерін аралап, кәсіпкерлердің жұмысымен танысты.
<blockquote>
 «Қызылopдa өңipлiк инвecтициялық opтaлығы» микроқаржы ұйымы арқылы несие алып, кәсібін кеңейтіп отырғандардың бірі қала іргесіндегі Тасбөгет кентінің тұрғыны Асылхан Оңалбаев. Ол соңғы 5 жылда жылыжай өндірісімен айналысып келеді. Кәciпкep өткeн жылы «Қызылopдa өңipлiк инвecтициялық opтaлығы» микроқаржы ұйымы арқылы 6 пaйызбeн 5 млн тeңгe нecиe aлғaн. Бұл қаражатқа екінші жылыжайдың құрылысы жүргізіліп, кәсібін кеңейткен. Отбасылық кәсіпті әрі қарай дамыта бермекпіз, – дейді кәсіпкер Асылхан Оңалбаев.
</blockquote>
Жылыжайда тұқымнан көшет шығарып, оны жеке 2 гектар жер аумағына егіп, сонан мол өнім жинап алады. Қазіргі таңда кәсіпкердің жылыжайында қияр, қызанақ, баялды, болгар бұрышы және жүгері көшеттері бар. Кәсіпкер 35 жылдан бері жерге дән тастап, өз несібесін теріп келеді.
Басқармаға қарасты «Қызылорда өңірлік инвестициялық орталығы» микроқаржы ұйымы арқылы несие алған келесі кәсіпкер – Жасұлан Әбілов. Құрылыс заттарын өндіріп жатқан кәсіпкер Жасұлан Әбілов бұл салада 10 жылдан бері жұмыс істеп келеді. Ол алты жыл бойы құрылыс заттарын шығаратын кәсіпкерлердің құрал-жабдықтарын құрастыру, оны қондыру ісімен айналысқан. Соңғы төрт жылдың көлемінде өзінің цехын ашып, құрылысқа қажетті заттарды шығару ісін қолға алған. Қазіргі таңда «Абилов» жеке кәсіпкерлігі пенобетон, пескоблок өнімдерін шығарады.
Төрт жыл бұрын цех ашып, құрылысқа қажетті өнімдерді шығара бастаған. Өткен жылы мемлекеттің қолдауы арқылы цехты кеңейтуді көздеп, «Қызылорда өңірлік инвестициялар орталығы» бойынша 10 млн. теңге несие алып, оған пенобетон өндіру үшін жабдықтар сатып алынды. Барлығы компьютер арқылы басқарылады. Бүгінде цехта 20-ға жуық адам жұмыс істейді. Олардың барлығы тұрақты жұмыспен қамтылған.
Баспасөз туры барысында ақпарат құралдары өкілдері қаладағы жартылай фабрикатталған өнімдер шығаратын ЖК «ЛТД КАУ» кәсіпкерлік нысанының жұмысымен де танысты. Кәсібін кеңейту мақсатында «Қызылopдa өңipлiк инвecтициялық opтaлығы» микроқаржы ұйымына жүгініп, 10 млн. теңге несие қаражат алған. Бұл қаржыға кәсіпкер өндіріс орнын заманауи құрал жабдықтармен жабдықтап, автоматтандырылған құрылғылар сатып алған. Цехта жартылай фабрикатталған өнімнің 29 түрі шығады. Дайын өнімдерді қаладағы бірнеше сауда дүкендеріне өткізеді.
Тілшілер келесі кезекте жас кәсіпкер Данияр Тыныштықтың да кәсібін көрді. Қазақстанда алғаш рет Қызылорда да ет чипсиін шығаратын кәсіпкер 2021 жылы «Бизнестің жол картасы 2025» мемлекеттік бағдарламасы аясында грант ұтып, 2,6 млн теңге көлемінде қаржы алған. Ол еттен арнайы құрылғымен кептіріліп шығаратын ет чипсиін шығарады. Қала орталығындағы бөлшек сауда дүкендерімен қоса Атырау, Орал қалаларына да жіберіп отырады. Қазіргі таңда өнімге сұраныс жоғары. Ендігі мақсат, бұқтырылған ет шығарып, кәсібін кеңейтіп жаңа өнімдер шығару.
Айта кетейік, 2020-2021 жылдары «Қызылорда» өңірлік инвестициялық орталығы арқылы жылдық 2 пайыз жеңілдікпен 400 млн. теңгеге 14 жоба несиелендірілді.

Қызылордада кәсіпкерлерге қолдау көп

<a href="https://kyzylorda-news.kz/">Kyzylorda-news.kz.</a>&nbsp;«Атамекен» Қазақстан Республикасының Ұлттық кәсіпкерлер палатасы Мемлекет басшысының «Алтын сапа» сыйлығын алуға арналған конкурсты және «Қазақстанның үздік тауары» республикалық көрме-конкурсын ұйымдастырушы ретінде конкурстарға қатысушылар үшін оқыту семинар өтетіндігін хабарлайды.
Семинар конкурс қатысушыларына конкурстық материалдарды, оның ішінде конкурс критерийлері бойынша дайындау, конкурстарды өткізу тәртібі мен ережелерін түсіндіру, сапа саласындағы халықаралық конкурстармен танысу бойынша консультациялық-әдістемелік көмек көрсетуді көздейді.
«Атамекен» ҚР ҰКП семинарға қатысуға шағын, орта және ірі кәсіпкерлік субъектілерінің өкілдерін шақырады. Аltynsapa.kz сайтында «<a href="https://altynsapa.kz/kk/video-tutorials?fbclid=IwAR14ZtaUhmJCZIifuDX9ay7cAnWrZOrzLuauzVXzY0Qu8vx9D0Vdl1eyqcU">Оқыту</a>» бөлімінде конкурстар бойынша бейнесабақтар жарияланған. Семинар тақырыбын тиімді меңгеру үшін барлық бейнесабақтарды қарау қажет.
<img src="https://kyzylorda-news.kz/wp-content/uploads/2022/04/278617189_5334633386587171_2256053182468784503_n.jpg" alt="" />

Кәсіпкерлерге арналған семинар өтеді

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысында өтіп жатқан «Қару» жедел-профилактикалық іс-шарасы барысында Қазалы аудандық полиция бөлімінің қызметкерлері Ойынды бекетінің тұсында 36 жастағы ауыл тұрғынын тоқтатып тексеру жүргізген. Тексеру барысында ауыл тұрғыны өзімен бірге тіркеуде жоқ, 16 калибрлі, 2 ұңғылы аңшы мылтығын алып жүргені анықталды.
Аталған дерек бойынша Қазақстан Республикасы Әкімшілік құқық бұзушылық кодексінің 482 бабымен (Iшкi iстер органдарында тiркелмеген тегiс ұңғылы, газды қару мен олардың патрондарын, сол сияқты электрлі қаруды, үрлемелi қуаты 7,5 Джоульдан жоғары, калибрi 4,5 миллиметрден асатын пневматикалық қаруды заңсыз иеленіп алу, беру, өткiзу, сақтау, алып жүру, тасымалдау) әкімшілік хаттама рәсімделіп, сотқа жолданды.
Бұл бағыттағы жұмыстар жалғасуда.

Қазалыда аңшы мылтығын заңсыз алып жүрген тұрғын ұсталды

<a href="https://kyzylorda-news.kz/">Kyzylorda-news.kz.</a> Бүгін Қызылорда облысында «Дарын» республикалық ғылыми-практикалық орталығының ұйымдастыруымен жалпы білім беретін пәндер бойынша республикалық олимпиаданың қорытынды кезеңі басталды. Білім сынағы 25-30 сәуір аралығында өтеді.
Олимпиада офлайн форматта «USTUDY» тестілеу орталығы базасында «Бір қатысушы, бір компьютер, бір камера» форматы бойынша жүргізілуде.
Білім сынағына облыс бойынша жалпы жаратылыстану-математика, қоғамдық-гуманитарлық бағыттардағы 14 пән бойынша 83 оқушы және Назарбаев Зияткерлік мектебінен 2 оқушы қатысып, бақ сынауда. Ал, 18-19 сәуір күндері биология, физика, география, математика, информатика, химия пәндері бойынша 46 оқушы қатысуда. 
Білім бәсекесінің ашықтығын бақылау үшін мүдделі емес үшінші тұлғалар – «Әділдік жолы» республикалық қоғамдық бірлестігінің Қызылорда облыстық филиал басшысы Ляззат Бақтыбаева, «Адалдық алаңы» мүшелері мен «Дарын» республикалық орталығының жауапты қызметкерлері қатысуда.
Айта кетейік, олимпиаданың өткізілу барысы тікелей эфир арқылы YouTube желісінен қадағаланып, Syr-daryny.kz сайтында жарияланатын болады.
<img src="https://kyzylorda-news.kz/wp-content/uploads/2022/04/278600585_1337890363380832_8615920789382063312_n.jpg" alt="" />

Қызылордада республикалық пәндік олимпиада басталды

<a href="https://kyzylorda-news.kz/">Kyzylorda-news.kz.</a> Достық үйінде облыстық «Видергебурт» неміс этномәдени бірлестігінің ұйымдастыруымен немістердің Остерн мерекесіне арналған «Пасха қолөнері» тақырыбында шеберлік сабағы өтті.
Оған «Қоғамдық келісім» КММ директоры Болатбек Айтбенбетов, этномәдени бірлестіктердің жетекшілері мен белсенділері, этнос өкілдерінің жастары мен балалары қатысты. Қатысушылар мен балалар ашық ауада ойындар ойнап, флешмоб биледі. Неміс этномәдени бірлестіктерінің жетекшісі Ирина Шек балаларға Пасха жұмыртқаларын түрлі-түсті қағаздан жасау және безендіру бойынша шеберлік сабағын өткізді.
Балалар мерекенің басты кейіпкері Пасха қоянынан шоколадты жұмыртқаны сыйға алды.
Шеберлік сабағының соңында олар мерекелік тәттілерден дәм татты.
<img src="https://kyzylorda-news.kz/wp-content/uploads/2022/04/278727270_3188431951475963_4410014202300537754_n.jpg" alt="" />

Қазақстан және Қызылорда облысының жаңалықтары