<a href="https://kyzylorda-news.kz/">Kyzylorda-news.kz.</a> Отан қораушылар мен Жеңіс күні мерекесі қарсаңында Қызылорда қаласындағы №7 мектеп-лицейінде «Бейбіт күн жасасын әлемде!» тақырыбында салтанатты шара өткізіліп, білім саласының ардагерлері оқушылармен кездесті.
Салтанатты шараға қатысқан ардагерлер оқушылармен патриоттық, туған жерге деген сүйіспеншілік, ерлік туралы әңгімелерді қозғаса, облыстық білім басқармасының басшысы Ақзира Қасымова ардагер ұстаздарға өзінің ыстық лебізін білдіріп, мерекемен құттықтады.
<blockquote>
 «Бүгін тәлімі мен тағылымы мол кездесу өтуде. Оқушыларымыз аймағымыздың білім саласының дамуы мен өркендеуіне зор үлесін қосқан ардагер ұстаздарымен кездесіп, отанды қорғау жауапкершілігінің қаншалықты маңыздылығын ұғынып, туған жерге деген сүйіспеншіліктерін арттырды деп есептеймін. Осы орайда облыстық ардагерлер кеңесіне ерекше алғысымды білдіріп, баршаңызды мерекемен құттықтаймын», – деді Ақзира Бақтыбайқызы.
</blockquote>
Облыстық білім басқармасының басшысы мұнан соң ардагер ұстаздармен бірге білім ошағының оқу үздіктері мен олимпиада, ғылыми жобалар және спорттық жарыстардың жеңімпаздарымен кездесіп, сұхбаттасты.
Шара барысында Асыл жандар әжелер ансамблі әндер шырқаса, көрермендерге мектеп оқушыларынан құралған театрдың қойылымы көрсетілді.
Кеш қорытындысы бойынша №7 мектеп-лицейінің ұжымы облыстық білім басқармасы және облыстық білім саласы ардагерлері кеңесінің арнайы алғыс хаттарымен марапатталды.
<img src="https://kyzylorda-news.kz/wp-content/uploads/2022/05/okwshy-1.jpg" alt="" />
<img src="https://kyzylorda-news.kz/wp-content/uploads/2022/05/akzira.jpg" alt="" />
<img src="https://kyzylorda-news.kz/wp-content/uploads/2022/05/279720788_1348738278962707_2459745016244005479_n.jpg" alt="" />

Қызылордада оқушылар білім саласының ардагерлерімен кездесті

<a href="https://kyzylorda-news.kz/">Kyzylorda-news.kz.</a> Қызылорда облысының әкімі Нұрлыбек Нәлібаевтың қатысуымен облыстық мәслихатының кезектен тыс XV сессиясы өтті. Сессияны облыстық мәслихат хатшысы Наурызбай Байқадамов жүргізді.
Жиынға облыстық мәслихат депутаттары, басқарма басшылары, қала және аудан әкімдері қатысты. 
Күн тәртібінде «2022-2024 жылдарға арналған облыстық бюджет туралы» Қызылорда облыстық мәслихатының 2021 жылғы 13 желтоқсандағы №72 шешіміне өзгерістер мен толықтыру енгізу және Қызылорда облысы әкімдігінің дербес құрамын келісу туралы 2 мәселе қаралды.
Аймақ басшысы өңірдің әлеуметтік-экономикалық көрсеткішін саралап, бюджет қаражатын тиімді жұмсау бағытында алдағы міндеттерге тоқталды.
<blockquote>
 «2022-2024 жылдарға арналған облыстық бюджетке өзгерістер мен толықтырулар енгізу туралы шешім жобасы сіздерге ұсынылды. Алайда, бюджет тұрақтылығын қамтамасыз ету, бюджет қаражатын тиімді пайдалану мақсатында жобаларды қайта қарадық. Нәтижесінде біршама инвестициялық жобалар оңтайландырылды. Мен білім, мәдениет, спорт саласының жанашырымын. Аймағымызда жаңа нысандардың бой көтергенін мен де қалаймын. Бірақ, бірінші кезекте тұрғындарға ауыз су, газ, жол инфрақұрылымдарын жеткізу, осы мәселелерді шешу маңызды. Осы орайда, менің тапсырмама сәйкес жоба құжаттарының өзектілігі, тиімділігін және сәулеттік келбетінің үйлесімділігін қарайтын арнайы кеңес құрылды. Кеңестің құрамына елге белгілі қаржыгерлер, құрылысшылар, жобалаушылар, өз саласының білікті мамандары кіргізілді. Бұдан былай, бағдарлама әкімшілері, қала және аудан әкімдері жүзеге асыратын жобаларын осы кеңесте қорғайды. Кеңестің оң шешімін алғаннан кейін ғана жоба жүзеге асырылатын болады», – деді Нұрлыбек Нәлібаев.
</blockquote>
Жиында облыс әкімі әлеуметтік мәселелерге арнайы тоқталды. Мәселен, автобус паркінің көліктері тозуына байланысты жөндеуге жұмсалатын шығындар көбейіп, күнделікті түсім төмендегенін жеткізді. Бұл ретте халықтың сұранысын қанағаттандыру мақсатында жаңадан 150 дана автобус алынатынын айтты.
Сондай-ақ, білім, мәдениет, спорт саласындағы нысандарды салу барысында нақты қажеттілікті ескеру және бос тұрған ғимараттарды тиімді пайдалану мәселесін көтерді. Мұнымен қоса, облыс әкімі азық-түлік бағасын тұрақтандыру бойынша нақты шаралар қабылданатынын жеткізді.
<blockquote>
 «Соңғы уақыттағы геосаяси жағдай мен инфляция әсерінен азық-түлік бағасының қымбаттауы орын алды. Бұл ретте, аудан әкімдеріне жергілікті шаруашылықтармен бірлесіп, тұрғындарға бау-бақша және көкөніс егуге жағдай жасауды тапсырдым», – деді Нұрлыбек Нәлібаев.
</blockquote>
Жиын барысында депутаттар тарапынан ұсыныстар айтылды. Облыс әкімі көтерілген мәселелер мен жолданатын ұсыныстар зерделеніп «Қызылорда облысы әкімінің іс-қимыл жоспары» енгізілетінін атап өтті.
<img src="https://kyzylorda-news.kz/wp-content/uploads/2022/05/nalibaev.jpg" alt="" />
<img src="https://kyzylorda-news.kz/wp-content/uploads/2022/05/sessija1.jpg" alt="" />

Нұрлыбек Нәлібаев: Бюджет қаражатын тиімді пайдалану мақсатында жобаларды қайта қарадық

<a href="https://kyzylorda-news.kz/">Kyzylorda-news.kz.</a> Атмосфералық фронталды бөліктердің өтуіне байланысты ҚР басым бөлігінде жаңбыр жауады, елдің оңтүстігінде, оңтүстік-шығысында қатты жаңбыр болады, деп хабарлайды Қазгидромет.
Қазақстанның батысы жоғары қысым алқабында болғандықтан жауын-шашынсыз ауа райы сақталады. Республика бойынша кей жерлерде найзағай күтіледі, жел күшейеді, оңтүстік пен оңтүстік-шығыста бұршақ, дауыл, батыста – тұман, оңтүстік-батыста – шаңды дауыл күтіледі.
Қызылордада күн райы көшпелі бұлтты, ауа температурасы +27 +29 градус болады. Желдің жылдамдығы 9-14 м/с.

5 мамырға арналған ауа райы болжамы

Kyzylorda-news.kz. Қызылорда қаласы ЗК- 169/мекемесінің сәлем- сауқаттарды қабылдау бөлмесіне келген Б. есімді азаматтың әкелген азық-түлігін тексеру барысында, тыйым салынған зат анықталды.
Нақтырақ айтар болсақ, бір реттік қалтаға салынған ыстық палаудың ішінен фальга қағазына оралған 1- дана «HUAWEI» маркалы ұялы телефоны мен 1-дана «билайн» сим картасы табылды.
ҚР ҚК- ның 106-бабының 1-бөлігімен 8 жылға сотталған ағасына жаны ашып тыйым салынған затты өткізбекші болған бұл азаматтың өзі енді жауапқа тартылады. Өйткені, ұялы телефонды жасырып өткізбекші болған азаматтың үстінен ҚР- ӘҚБтК-нің 481бабы 1-бөлігі бойынша әкімшілік хаттама толтырылып, ісі сотқа жолданды.
<img src="https://kyzylorda-news.kz/wp-content/uploads/2022/05/img-20220504-wa0024.jpg" alt="" />

Қызылордада қамаудағы ағасына ұялы телефон жібермекші болған тұрғын ұсталды

<a href="https://kyzylorda-news.kz/">Kyzylorda-news.kz.</a> Қызылорда облыстық Полиция департаменті қызметкерлері мен Ардагерлер кеңесі тыл ардагерлерін құттықтады.
Отан қорғаушылар және Ұлы Жеңіс күндері қарсаңында Қызылорда облысы Полиция департаменті Ардагерлер кеңесімен бірлесіп Ішкі істер органдарында қызмет атқарып, абыроймен зейнетке шыққан тыл ардагерлерін мерекемен құттықтады.
Мереке қарсаңында тыл ардагерлеріне Полиция департаменті мен Ардагерлер кеңесінің атынан «Алғыс хаттар», ақшалай сыйақы, азық-түлік себеттері табысталды.
Ал ардагерлер, өз кезегінде, әріптестеріне ерекше көңіл бөліп, құттықтаулары үшін алғыс айтып, оларға денсаулық, бақыт және амандық тіледі.
<img src="https://kyzylorda-news.kz/wp-content/uploads/2022/05/279866159_1089558078261294_7242924745798500137_n.jpg" alt="" />

Тыл ардагерлерін құттықтады

<a href="https://kyzylorda-news.kz/">Kyzylorda-news.kz.</a> Эльдар Жұмағазиев «AMANAT» партиясының хатшысы болып тағайындалды, деп хабарлайды партияның баспасөз қызметі.
Эльдар Жұмағазиев 1973 жылы 12 мамырда дүниеге келген. Атырау Мұнай және газ институтының түлегі.
2007 жылы Ресей мемлекеттік қызмет академиясын бітірді. 1996 жылдан 2002 жылға дейін коммерциялық компанияларда басшылық лауазымдарды атқарды.
2002-2006 жылдары Атырау облысы ішкі саясат департаментінің бөлім басшысы болды.
2006-2011 жылдары «Атырау-Ақпарат» медиахолдингін, 2011-2012 жылдары Атырау облысының ішкі саясат басқармасын басқарды.
2014 жылдан бастап «Атамекен» Ұлттық Кәсіпкерлер палатасында түрлі қызметтер атқарды, басқарма төрағасының кеңесшісі, аппарат басшысы, басқарма төрағасының бірінші орынбасары болды.
2020 жылдың қараша айынан бастап «ADAL» партиясының Хатшысы қызметін атқарды.

«AMANAT» партиясының хатшысы тағайындалды

<a href="https://kyzylorda-news.kz/">Kyzylorda-news.kz.</a> «Азаматтарға арналған үкімет» корпорациясы мемлекеттік қызметтердің басым бөлігін қағазсыз қызметке ауыстырмақ.Ол үшін халыққа қызмет көрсету орталықтарында 8 қызмет бойынша қағаз түрінде берілетін қолхатты қысқартты. Жақын арада барлық мемлекеттік қызмет қолхатсыз көрсетілетін болады.
«Азаматтарға арналған үкімет мемлекеттік корпорациясы» КЕ АҚ» Қызылорда облысы бойынша филиалының директоры Айнұр Тобаеваның айтуынша қағазсыз қызмет көрсетуге көшу бірнеше кезең арқылы жүзеге асырылмақ.
<blockquote>
 «Қазіргі таңда халыққа қызмет көрсету орталықтарында көрсетілетін қызметтердің дені электронды форматқа ауыстырылып жатыр. Корпорация басшысының тапсырмасы бойынша біз алдағы уақытта қағазбастылықтан мүлдем арылуымыз керек. Бұрын мемлекеттік қызмет алушы тапсырыс берген уақытта қолына қағаз түрінде қолхат берілетін еді. Енді клиенттерге құжаты дайын болғанда қай ХҚО-ға жүгіну керектігі және уақыты көрсетілген sms-хабарлама келеді. ХҚО операторына клиент қолхаттың электронды нұсқасын көрсетсе болды», – дейді Айнұр Тобаева.
</blockquote>
Еліміздегі халыққа қызмет көрсету орталықтарының мамандары қазақстандықтарға осы 8 қызмет бойынша жылына 6 млн-ға жуық қолхат береді (бұл қолхаттардың жалпы санының 40%-ын құрайды). Енді клиенттер құжаттарын алу кезінде қағаз түріндегі қолхатты көрсету қажеттілігінен құтылды. Бұл жүйенің экологиялық және экономикалық пайдасы да зор.
Мұнан бөлек, бюджетті оңтайландыру мақсатында Азаматтарға арналған үкімет жартылай ағартылған целлюлозадан жасалған эко-қағазды пайдалануға көшу туралы шешім қабылдады. Ол әдеттегі қолданатын қағаз түсінен сарғыш болғанымен, басылған мәтіннің сапасына әсер етпейді. Сонымен қатар, ол кез-келген принтер мен көшіру құрылғысына жарамды. Қазіргі уақытта мемлекеттік органдардың, университеттер мен банктердің көпшілігі осындай эко-қағазды пайдалануға көшті.
Халыққа қызмет көрсету орталықтарында көрсетілетін мемлекеттік қызметтердің ішінде қолхат берілмейтін қызметтер де бар екенін айта кеткен жөн. Олардың тізімі мыналар:
<ol>
<li>Қазақстан Республикасының Ұлттық куәландырушы орталығының тіркеу куәлігін беру және кері қайтарып алу;</li>
<li>Қазақстан Республикасы халқын тұрғылықты жері бойынша тіркеу;</li>
</ol>

Халыққа қызмет көрсету орталықтары қолхат беруді тоқтатады

<a href="https://kyzylorda-news.kz/">Kyzylorda-news.kz.</a> Бүгін ауданда акробатикадан қазақ жастары арасынан шыққан тұңғыш КСРО спорт шебері Дәри Әбуұлы Құттымұратовты еске алуға арналған 2007-2008 және 2009-2010 жылы туылған жасөспірімдер арасында грек-рим күресінен республикалық турнир бастау алды.
Турнирдің ашылу салтанатына қатысқан аудан әкімінің орынбасары Б.Жұмағұлов спортшының жетістіктеріне тоқталып, жарысқа қатысушы жас балуандарға сәттілік тіледі.
Жастайынан спортқа бейім болған Дәри Құттымұратов он бес жасынан бастап акробатикаға ден қойған. Он сегіз жасында республикалық жарыстың чемпионы болды. Студент кезінің өзінде 8 дүркін республика чемпионы атанған.
Жарысқа Ақтөбе облысы және Қызылорда облысы мен аудандарынан арнайы келген 154-ке жуық жасөспірімнен құралған 9 команда 12 салмақ дәрежесі бойынша боз кілемде бақтарын сынауда.
<img src="https://kyzylorda-news.kz/wp-content/uploads/2022/05/aral.jpg" alt="" />
<img src="https://kyzylorda-news.kz/wp-content/uploads/2022/05/twrnir.jpg" alt="" />

Аралда грек-рим күресінен республикалық турнир басталды

<a href="https://kyzylorda-news.kz/">Kyzylorda-news.kz.</a> Жаңақорған ауданында екі отбасыға баспана кілті табысталды.
Қазақта «Қос тойың қабат келсін» демекші, бүгін Жаңақорған төрінде үлкен қуаныш. Жылдағы дәстүрінен жаңылмаған «Жаңарған Жаңақорған жастары» қоғамдық қорының еріктілері биыл бір емес, екі баспанаға шын мұқтаж шаңырақты шаттыққа бөледі.
Қасиетті Ораза айттың соңғы күніне сәйкес келген жаңа баспаналардың кілтін табыстау рәсіміне аудан әкімі Мұрат Тілеуімбетов арнайы қатысты. Мерейлі сәтте құттықтау сөзін сөйлеп, ақжарма лебізін білдірді. Ауданның бас имамы Әбдіхалық қажы Махмұтұлы елдің атынан ерікті жастарға алғысын айтты.
Қос үйдің бірі «МАИ бекеті» аумағында болса, екінші баспана орталық стадион маңында орналасқан. Осындай сауапты істерге мұрындық болып, қолынан келгенше қазағына қамқор бола білген жастарға жаңақорғандықтар риза.
<img src="https://kyzylorda-news.kz/wp-content/uploads/2022/05/7d2f43ca-8dd1-4d91-b36f-0d5dbc66724a.jpg" alt="" />
<img src="https://kyzylorda-news.kz/wp-content/uploads/2022/05/eeec4a12-89a3-4fe2-853a-545a9db25eb8.jpg" alt="" />

Жаңақорғанда екі отбасыға баспана кілті табысталды

<a href="https://kyzylorda-news.kz/">Kyzylorda-news.kz.</a> Қызылордада Кәсіпкерлердің құқығын қорғау кеңесі жетпістен астам жер телімін бизнесмендерге қайтаруға көмектесті.
Осы жылдың ақпанында қала әкімдігінің аукцион арқылы кәсіпкерлік мақсатқа берген жетпістен астам жер телімін қайта алып қойғалы жатқаны айтылып, мәселе Қызылорда облысының кәсіпкерлер палатасы жанындағы Кәсіпкерлердің құқығын қорғау және сыбайлас жемқорлыққа қарсы іс-қимыл жөніндегі кеңесінде қаралды.
Проблемаға қысқаша тоқталсақ, 2020-2021 жылдары Қызылорда қаласы әкімдігі 7 рет аукцион өткізіп, жеке және заңды тұлғаларға сол жағалаудан кәсіпкерлік мақсатта жер телімдерін табыстайды.&nbsp; Бірақ ғимарат құрылысын бастауға негіз болатын рұқсат құжаттары жергілікті атқарушы орган тарапынан бекітілмеген. Салынатын нысандардың эскиздік жобаларына әкімдік келісім бермеген.
2017 жылдан бері Қызылорда қаласы Сырдария өзенінің сол жағалауын игеру жобасы бойынша облыстық штаб жұмыс істейді. 2021 жылғы мамыр және қазандағы отырыстарында қала әкімдігіне сол жағалауда салынатын барлық нысанның эскиздік жобаларын штабтың талқылауына шығарып,&nbsp; бекітілген егжей-тегжей жоспарлау жобасына сәйкес келмейтін, аукцион арқылы жалға берілген 72 жер телімін мемлекет меншігіне қайтаруды міндеттейді. Штабтың хаттамасын негізге алып, қалалық сәулет бөлімі эскиздік жобаларды келісуден бас тартқан. Мұнымен қоса, жер телімі уақытша пайдалануға 1 жылға ғана беріп, пайдалану мерзімін&nbsp; ұзартпаған.
Кәсіпкерлердің құқығын қорғау кеңесінде прокуратура өкілдері заңдылығы тексерілетінін жеткізген болатын.
Жақында Кәсіпкерлер палатасына қалалық прокуратурадан төмендегідей ақпарат келді.
<blockquote>
 «Қызылорда қалалық прокуратурасы жүргізген қадағалау жұмыстарының нәтижесінде жергілікті атқарушы орган тарапынан кәсіпкерлердің құқығын шектейтін акті қабылданғаны анықталды. Атап айтқанда, Қызылорда қаласы әкімдігінің қалалық жер қатынастар бөлімі 2020 жылы өткізген сауда-саттық хаттамасымен Қызылорда қаласы Сырдария өзенінің сол жағалауынан 70 кәсіпкерлік субьектіне кәсіпкерлік қызметтерін дамыту және жүзеге асыру үшін 1 жылға жалдау құқығымен жер учаскелерін сатқан. Алайда жергілікті атқарушы орган жер учаскесін жалдау құқығын аукционмен сату кезінде 3 жылға бермей, заңсыз түрде 1 жылға белгілеп, кәсіпкерлердің құқығын шектеген. Соның салдарынан кәсіпкерлер қысқа мерзімде құрылысын жүргізе алмаған. Аталған дерек бойынша қалалық прокуратура кәсіпкерлік субьектілердің бұзылған құқығын қалпына келтіру мақсатында&nbsp; қала әкімдігіне қадағалау актілерін енгізіп, нәтижесіндеқайтадан қосымша шарт жасалды. Жер телімдерін жалға алу мерзімі ұзартылып, жер қатынастар бөлімінің басшысы тәртіптік жауапкершілікке тартылды», – делінген ресми хатта.
</blockquote>
Осы мәселеге қатысты сұрақтар туындаған жағдайда Қызылорда облысы кәсіпкерлер палатасының мамандары көмек көрсетуге әзір. Байланыс телефоны: 8 /7242/ 40-09-81.
Қызылорда қалалық прокуратурасы бизнесті қорғау бағытында қадағалау жұмыстарын жалғастырады. Бұл бағытта мобильді топ жұмыс істейді және 24-76-95, Whatsapp 8-775-721-45-28 сенім телефондарына кәсіпкерлердің құқығын бұзу деректері бойынша хабарласуға болатынын назарға саламыз.

Қызылордада 70-тен астам жер телімі кәсіпкерлерге қайтарылды

<a href="https://kyzylorda-news.kz/">Kyzylorda-news.kz.</a> Қызылордалық полицейлер 10 жыл бұрын фирмадан 74,5 млн теңгеден астам қаражат ұрланған күдіктіні ұстады.
Қызылорда облысы Полиция департаментінің Криминалдық полиция басқармасының қызметкерлері 2014 жылдан бері іздеуде жүрген қылмыскерді қолға түсірді.
56 жастағы Қостанай облысының тұрғыны адамдар тобының алдын ала сөз байласуы арқылы аса ірі мөлшерде ұрлық жасаған. Оған қатысты қылмыстық іс қозғалып, бас шарасы «қамауға алу» бұлтартпау шарасы қолданылып, іздеу жарияланған. Бұл оқиға бойынша арнайы іздестіру ісі арналып, тиісті шаралар жүргізілді.
Белгілі болғандай, 2012 жылдың ақпан айында күдікті сыбайласымен бірге жалған келісімшарт негізінде Қызылорда қаласындағы фирмалардың бірінен 74 580 940 теңге көлемінде ақшаны банк арқылы есепшотына аударып, жымқырып кеткен.
Іздестіру шараларының нәтижесінде, Қызылорда облысы Полиция департаментінің қызметкерлерімен іздеуде жүрген қылмыскер Ақмола облысында ұсталып, Нұр-Сұлтан қаласында қамауға алынды.

Қызылордада 74,5 млн. теңге қаражат ұрлаған күдікті ұсталды

<a href="https://kyzylorda-news.kz/">Kyzylorda-news.kz.</a> Бүгін ҚР Премьер-Министрі Әлихан Смайыловтың төрағалығымен өткен селекторлық жиында қалалық және ауылдық елді мекендерді сумен жабдықтау және геология саласын дамыту перспективалары қаралды.
Отырысқа ведомство басшылары мен өңір әкімдері қатысты. Бірқатар министрлер мен облыс әкімдері баяндама жасады.
Индустрия және инфрақұрылымдық даму министрі Қайырбек Өскенбаев бірқатар облыс орталықтарында сумен жабдықтау қызметтері 100% жеткенін атап өтті. Оның ішінде Қызылорда қаласы да бар. Қазіргі кезде өңірдегі халықтың 97,8% орталықтандырылған жүйедегі суды тұтынады.
Үкімет басшысы 2025 жылдың соңына дейін халықты 100% таза ауыз сумен қамту қажет екенін, геология және жер қойнауын пайдалану саласындағы инвесторларға геологиялық мәліметтерді қолжетімді ету үшін ақпараттық жүйе құру қажеттігін тапсырды.
Селекторлық жиыннан кейін облыс әкімі Нұрлыбек Нәлібаев бұл бағытта өңірде жүргізілген жұмыстарды саралап, қала, аудан әкімдері мен салалық басқарма басшыларына бірқатар тапсырма жүктеді.
Нұрлыбек Нәлібаев елді-мекендерде қала және аудандарда ауыз судың үздіксіз берілуін қатаң бақылауда ұстап, жерасты сулары бойынша мониторинг жүргізіп, жаңа кен орындарында бұрғылау жұмыстарына жете мән беруді тапсырды. Сондай-ақ, топтық су құбырларына қосу, су жүйесін жүргізу, су тұщытқыш орнату бағытында жұмыстарды күшейтуді міндеттеді.
<img src="https://kyzylorda-news.kz/wp-content/uploads/2022/05/akim1.jpg" alt="" />

Қазақстан және Қызылорда облысының жаңалықтары