<a href="https://kyzylorda-news.kz/">Kyzylorda-news.kz.</a> Облыста мереке күндері төтенше жағдайлардың алдын алу бағытында «Пиротехника» жедел профилактикалық іс шарасы жүргізілуде. Шара барысында талапқа сай келмейтін 929 дана пиротехникалық бұйым тәркіленді. Бұл туралы Өңірлік коммуникациялар қызметінде өткен брифингте облыстық төтенше жағдайлар департаменті бастығының орынбасары Бауыржан Ізбасаров хабарлады.
<blockquote>
 «Жаңа жыл мерекесі қарсаңында жыл сайын пиротехникалық заттарды дұрыс қолданбау салдарынан қайғылы жағдайлар жиі орын алады. Бұл іс шараның негізгі мақсаты – тұрғындар қауіпсіздігі. Сондықтан қаладағы ірі сауда орындары мен базарларда полиция департаментімен бірлесіп күнделікті рейд жүргізудеміз. Нәтижесіне, заң бұзушылықтар анықталып, тиісті әкімшілік шаралар қолданылуда», – деді Бауыржан Ізбасаров.
</blockquote>
Пиротехникалық заттарды қолдануға тыйым салған жерлерде құрылғыларды жару орын алса ҚР Әкімшілік құқық бұзушылық туралы заңға сәйкес 20 айлық есептік көрсеткіш яғни, 58 340 теңге көлемінде айыппұл салынады.
<blockquote>
 «Алдағы мереке күндері пиротехникалық өнімдердің саудасы қызатыны белгілі. Облыс тұрғындарына айтарым, бұл бұйымдарды сатып алу барысында рұқсат етілген құжатты талап ету керек. Сондай-ақ, пиротехникалық заттарды сақтау және сауда жасау тәртібін бұзған тұлғаларға ҚР Әкімішілік құқық бұзушылық туралы заңға сәйкес белгіленген мөлшерде айыппұл салынады», – деді облыстық әкімшілік полиция департаменті бастығының міндетін атқарушы Айбек Құлмағанбетов.
</blockquote>

Қызылордада талапқа сай келмейтін 929 дана пиротехникалық бұйым тәркіленді

<a href="https://kyzylorda-news.kz/">Kyzylorda-news.kz.</a> Қазгидромет синоптиктері 2021 жылдың 29-31 желтоқсанында&nbsp; ауа райы қандай болатынын хабарлады.
Солтүстік-батыс циклоны Қазақстанның солтүстігіне, солтүстік-батысына және шығысына өз ықпалын тигізеді. Қар жауып, боран соғып, жел күшейеді.
Содан кейін суық ауа массалары жауын-шашынды тоқтатады, елдің басым бөлігінде ауа температурасы төмендейді. Шығыс пен оңтүстік-шығыста құбылмалы ауа райы сақталады.

Жаңа жыл: Қар жауып, боран соғады

<a href="https://kyzylorda-news.kz/">Kyzylorda-news.kz.</a> Биыл өңірде 29 777 жаңа жұмыс орны ашылды. Оның 15 мыңға жуығы тұрақты жұмыс орны. Жыл басынан бері 73227 аз қамтылған отбасыға әлеуметтік көмек көрсетілді. Бұл жөнінде Өңірлік коммуникациялар қызметінде өткен баспасөз конференциясында облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Мейрамбек Абдукаримов мәлімдеді.
<blockquote>
 «Халықты тұрақты жұмыспен қамтуға және азаматтарды кәсіпкерлікке тарту мақсатында «Еңбек» мемлекеттік бағдарламасы жүзеге асырылуда. Биыл аталған бағдарламаға 34 мың адам тіркелді. Оның басым көпшілігі жұмыссыздар. Ал «Бастау Бизнес» жобасы арқылы 3079 адам кәсіпкерлік негіздегі курстардан өтіп, екі мыңға жуық азаматқа грант берілді. Қалалар мен ауылдарда жеке кәсіп ашқысы келетін 806 тұрғынға шағын несие берілген болатын. Нәтижесінде жаңа 722 жұмыс орны құрылды. Жалпы облыста 30 844 мүгедектігі бар адам болса, биыл оның 87,3 пайызы оңалтудың жеке бағдарламасына сәйкес техникалық құралдармен қамтамасыз етілді», – деді деді Мейрамбек Абдукаримов.
</blockquote>
Тағы бір айта кетерлігі, қалада мүгедектігі бар және осал топтағы азаматтарға әлеуметтік, психологиялық, құқықтық көмек көрсететін «Тең қоғам» орталығы ашылған болатын. Алдағы уақытта ардагерлердің өмір сүру сапасы мен денсаулығын нығайту мақсатында «Белсенді ұзақ өмір сүру» орталығын ашу жоспарлануда.

Қызылорда облысында 29 777 жаңа жұмыс орны ашылды

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысы бойынша ҚАЖ департаментіне қарасты мекемелерде жазасын өтеп жүрген орта білім жоқ сотталғандар кешкі мектепте білім алуда.
Мекеменің ішкі күн тәртібіне сәйкестендіріп, сотталғандардың сабақ кестесі құрылып,оқу жоспарына сәйкес, қауіпсіздігі барынша төмен ЗК-169/4 мекемесінде 8 сотталған кешкі мектеп мұғалімдерінен білім алып жатыр. Сотталғандарды пән мұғалімдері сабақ берумен қатар халықаралық, республикалық онлайн байқау сайыстарға қатыстыруда. Қазақстан тарихы пәнінен «КиО» республикалық интелектуалдық олимпиадасы мен «Юстади» тестілеу орталығы ұйымдастырған жарысқа қатысқан Ә есімді сотталған жүлдеді ІІІ орын алды.
Тағы бір сотталған «Ұстаз тілегі» ғылыми-әдістемелік орталығы ұйымдастырған оқушылар арасындағы онлайн блиц-турнирге қатысып арнайы сертификатқа ие болса, екінші бір сотталған математика пәнінен халықаралық «Кенгуренок-2021» олимпиадасына қатысып, дипломмен марапатталды.
Мекеменің тәрбие бөлімінің қызметкерлері мен кешкі мектеп мұғалімдері кешкі мектеп оқушыларын І жартыжылдықты аяқтап, оқу үлгерімі жақсы оқушыларды марапаттады.
<blockquote>
 «Белгілі бір себептермен орта мектепті аяқтай алмадым. Қателікке жасап,шалыс басып түрмеге тоғытылдым. Қылмыстың өтеуі – жаза. Жазамды өтей жүріп, орта білімімді де алып жатырмын. Мектепішілік шараларға да қатысып жүрмін. Оқу үлгерімім жақсы болғандықтан шығар кешкі мектеп мұғалімдері онлайн жарыстарға да қатыстырып жатыр. Жүлделі орын алып дипломмен марапатталдым. Білім беріп жүрген кешкі мектеп мұғалімдері мен мекеме қызметерлеріне алғысым шексіз», – деді сотталған.
</blockquote>
<img src="https://kyzylorda-news.kz/wp-content/uploads/2021/12/355ac1ce-8b08-45d8-bb97-57a60b19ab24.jpg" alt="" />
<img src="https://kyzylorda-news.kz/wp-content/uploads/2021/12/9db077ac-d9a3-41d8-9c80-d5ac7780851c.jpg" alt="" />

Қызылордада сотталғандар интеллектуалдық олимпиадаларға қатысуда

<a href="https://kyzylorda-news.kz/">Kyzylorda-news.kz.</a> Әлемде сырқаттанушылықтың өсуін және «Омикрон» штаммы нұсқасының кең таралуын ескере отырып, халықты вакцинациялау қарқынын арттыру және КВИ бойынша ағымдағы эпидемиологиялық жағдайдың тұрақтылығын сақтау қажет, деп атап өтті бүгін Үкімет отырысында министрдің міндетін атқарушы Жандос Бүркітбаев.
Инфекцияны таратпау мақсатында сауда-ойын-сауық орталықтарына, сауда үйлеріне, сауда желілеріне; спорттық-сауықтыру орталықтары мен фитнес-орталықтарға, йога-орталықтарға; караоке; бассейндер; сауналар, моншалар; банктер; «Қазпошта» АҚ бөлімшелері, ХҚКО-ларға тек «ASHYQ» қосымшасы бойынша жасыл мәртебесі бар тұлғаларға кіруге рұқсат беру бөлігінде қосымша алдын алу шараларын күшейту ұсынылады.
Бұл норманы 2022 жылғы 5 қаңтардан бастап енгізу ұсынылады.

«Ashyq» қосымшасы бойынша шектеу шаралары күшейтіледі

<a href="https://kyzylorda-news.kz/">Kyzylorda-news.kz.</a>&nbsp; Бүгінде учаскелік полиция инспекторлары ішкі істер органдары жүйесіндегі ең көпфункционалды қызмет болып табылады және халықпен жеке байланыста болады.
Учаскелік инспекторлар құқықтық тәртіпті, жол қауіпсіздігін, көші-қон саласындағы бақылауды, аумақтың абаттандырылуын, қоршаған ортаны қорғауды қамтамасыз етеді, сотталған адамдардың, отбасылық тирандардың және басқа да маргиналды элементтердің өмір салтын бақылайды.
Функционалдық міндеттеріне байланысты учаскелік инспектор халықпен тығыз байланыста болады. Осылайша «жұртқа жақын полиция» қағидатын іске асыруда маңызды рөл атқарады, өйткені ауылдағы учаскелік инспектор полицияның, кейде мемлекеттік биліктің жалғыз өкілі болып табылады.
Жыл қорытындысын шығара отырып, ІІМ кәсіби қасиеттерін, дене даярлығын, сондай-ақ халықтың пікірін тексеру жөніндегі комиссиямен таңдалған үздік учаскелік полиция инспекторларының слетін өткізді.
Қызылорда облысынан Қазалы аудандық полиция бөлімінің учаскелік полиция инспекторы полиция капитаны Жарас Маратов пен Қызылорда қаласы полиция басқармасының учаскелік полиция инспекторы полиция капитаны Бағдат Шахмет, Ювеналды полиция бөлімінің инспекторы полиция майоры Виталий Соболев қатысты.
Барлық қатысушылар грамоталармен және «Үздік учаскелік инспекторы» төсбелгісімен марапатталды.
<blockquote>
 Үздік қызметкерлерді марапаттай отырып, министр Ерлан Тұрғымбаев «учаскелік инспектор – нақты аумақтағы қылмыстың алдын алудың негізгі тұлғасы. Мемлекет басшысы учаскелік полиция инспекторларының ішкі істер органдары реформасын және «жұртқа жақын полиция» қағидатын іске асырудағы маңызды рөлін дәл осылай атап өткен еді. Бүгінгі іс-шара учаскелік полиция инспекторларының кәсіби біліктілігін және олардың жұмысын жоғары деңгейге көтереді деп есептеймін», – деп түйіндеді министр.
</blockquote>
Слет кезінде қызметкерлердің біліктілігін арттыру үшін полиция жұмысының негізгі бағыттары, соның ішінде сервистік модельге көшу, құқықтық тәртіп пен азаматтардың қауіпсіздігін қамтамасыз ету бойынша оқыту семинарлары өткізілді, сондай-ақ профилактикалық қызметті одан әрі жетілдіру бойынша ұсыныстар зерделенді.
<img src="https://kyzylorda-news.kz/wp-content/uploads/2021/12/270178174_1014450562438713_2215638772716329054_n.jpg" alt="" />
<img src="https://kyzylorda-news.kz/wp-content/uploads/2021/12/270214210_1014449632438806_5640556849332974190_n.jpg" alt="" />

Сыр сақшылары «Үздік учаскелік инспектор» төсбелгісімен марапатталды

<a href="https://kyzylorda-news.kz/">Kyzylorda-news.kz.</a>&nbsp; Жыл басынан «Қайырымды істер марафоны» жалпыұлттық жобасы аясында 3000-нан аса шара ұйымдастырылып, 100 415 адамға қайырымдылық жасалды. Оның ішінде 15403 отбасына азық-түлік себеті үлестірілді. Ізгілікті шаралар жайында Өңірлік коммуникациялар қызметінде өткен брифингте «Волонтерлар фронт офисінің» жетекшісі Болатбек Айтбенбетов кеңірек тоқталды.
<blockquote>
 «ПетроҚазақстан Құмкөл Ресорсиз» АҚ-ның ірі әлеуметтік жобаларының бірі Қазалы ауданындағы «Шапағат» мүгедек балаларды оңалту орталығын және Жаңақорған ауданындағы көп балалы және аз қамтылған отбасының балаларына арналған «Балдәурен» балабақшасын қамқорлықта ұстауға әрқайсына 22 млн. теңгеден бөлді. «Kazpetrol Group» ЖШС-гі облыстық инфекция ауруханасына 34 600 000 теңге тұратын 20 дана пациент мониторын алып берді. Марафон бастау алғаннан бері, білім беру саласы белсенді атсалысып келеді. Оның ішінде, мектеп оқушыларынан құралған еріктілер тобы үйден оқитын, ерекше білім беруді қажет ететін оқушыларға көмек көрсетуде, – деді Болатбек Серікбайұлы.
</blockquote>
Сонымен қатар, марафон аясында «Халық» қайырымдылық қоры да облыстағы аз қамтылған, мүмкіндігі шектеулі балалар тәрбиелеп отырған отбасыларға көмек көрсетті.
Ал, жыл басынан бері көпбалалы отбасылар, жетім балалар, ерекше қараудағы жандар мен апатты жағдайда үйде тұрған жанұяларға 90-нан аса баспана кілті табысталды. Оның ішінде Арал қаласының 40 жанұясы Болат Өтемұратов Қорының «Баламекен» жобасы шеңберінде жаңа баспанаға ие болды. Волонтерлік бағытында Қазалы ауданында 23 отбасы, Қармақшы ауданында 14 отбасы қоныс той тойлады.
Сондай-ақ, “Зекет” қайырымдылық қорының Қызылорда облысы бойынша жауапты өкілі Оңталап Жидебаевтың айтуынша, 3 жылдан бері 50 отбасыға баспана кілтін табыстаса, биыл 10 жанұяның қоныс тойын тойлауға себепші болған. Жалпы, «Зекет» қоры «Тайқазан», «Берекелі рамазан айы», «Ел үлесі пәтер» секілді жобалар бойынша түрлі шаралар өткізіп келеді.

Қызылордада 3 мыңнан аса қайырымдылық шарасы ұйымдастырылды

<a href="https://kyzylorda-news.kz/">Kyzylorda-news.kz.</a> Еркін күрестен Қазақстан құрамасының капитаны Дәулет Ниязбеков спорттағы мансабын аяқтады. Бұл туралы <a href="https://olympic.kz/">Olimpic.kz</a> сайты хабарлады. Ақпаратты Қазақстан құрамасының бас бапкері Әсет Серікбаев растады.&nbsp;
«Токио олимпиадасында алған жарақатым оңай соқпады. Еш ренішім жоқ. Шабатын жерге дейін шаптым. Күреске ықыласымды оятқан, жолымды ашқан, бар білігін үйреткен жаттықтырушыларыма алғыс айтқым келеді. Иә, күреске тоймай кетіп барамын. Олимпиада жүлдесін алсам деген арманым орындалмады. (…). Осы дәрежеге жеткенім үшін де Аллаға шүкір», – дейді ол.&nbsp;
Айта кетейік, Дәулет Ниязбеков 2012 жылы Лондон және биыл өткен Токио Олимпиадасында өнер көрсетті.

Қызылордалық Дәулет Ниязбеков спорттағы мансабын аяқтады

<a href="https://kyzylorda-news.kz/">Kyzylorda-news.kz.</a> Келесі жылдан бастап ақылы бөлімге түсетіндер үшін Ұлттық бірыңғай тестілеуді тапсыру құны екі есе қымбаттайды.
Тестілеуді мектеп бітірушілер 2022 жылдың 10 қаңтары мен 10 ақпаны аралығында тапсыра алады. Ол үшін 5640 теңге төлеуі қажет. Он жылдан бері 2242 теңге болған еді.
Бірақ бұл жоғары оқу орнының ақылы бөліміне тапсыратын түлектер үшін ғана. Ал мемлекеттік грант конкурсының тағдырын шешетін сынақ жылдағы дәстүр бойынша тегін болып қала бермек, деп хабарлады&nbsp;<a href="https://www.ktk.kz/kz/news/video/2021/12/27/199367/">КТК.</a>
Ұлтық тестілеу орталығының директоры Руслан Емелбаев тестілеу бағасының қымбаттауын ақпараттық қауіпсіздікті қамтамасыз ету деп түсіндірді.
Тест сұрақтарының сапасын арттыру мақсатында оны құрастырушылардың жалақысы көтерілетінін мәлімдеді. Түскен қаражаттың тағы бір бөлігі тестілеу пункттерін жалға алуға, компьютер, бейнебақылау камера сияқты керек жабдықтарға жұмсалады дейді.

ҰБТ тапсыру құны екі есе қымбаттайды

<a href="https://kyzylorda-news.kz/">Kyzylorda-news.kz.</a> ҚР Денсаулық сақтау министрінің міндетін атқарушы&nbsp;Жандос Бүркітбаев Үкімет отырысында 2022 жылдың 5 қаңтарынан бастап елімізде қосымша алдын алу шараларын енгізу жоспарлары туралы мәлімдеді, деп хабарлайды&nbsp;<a href="https://stan.kz/">Stan.kz</a>.
Жандос Бүркітбаев эпиджағдайға әсер ететін жағымсыз факторлардың бірі әлемде «омикрон-штамм» нұсқасының таралуының жоғары қарқыны екенін айтты.&nbsp;
<blockquote>
 «30 қарашадағы жағдай бойынша коронавирустың «омикрон-штаммы» 16 елде, ал бүгінгі күні әлемнің 110 елінде анықталды. «Омикрон» штаммының таралу&nbsp;коэффициенті жоғары –&nbsp;&nbsp;1:5-ке тең, сондай-ақ, штаммды қайта жұқтыру қаупі жоғарылағаны байқалады», – ҚР Денсаулық сақтау министрінің міндетін атқарушы&nbsp;Жандос Бүркітбаев.
</blockquote>
Денсаулық сақтау министрінің міндетін атқарушы Дүниежүзілік денсаулық сақтау ұйымының болжамын жариялады, оған сәйкес ауру бірнеше ай бойы бүкіл әлемге таралады.
Сауда-ойын-сауық орталықтарына, сауда үйлеріне, сауда желілеріне; спорттық-сауықтыру орталықтары мен фитнес-орталықтарға, йога-орталықтарға; караоке; бассейндер; сауналар, моншалар; банктер; «Қазпошта» АҚ бөлімшелері, ХҚКО-ға Ashyq қосымшасы бойынша «жасыл» статусы бар адамдарға ғана кіруге рұқсат беру бөлігінде қосымша алдын алу шараларын енгізу ұсынылады.
Аталған норманы 2022 жылғы 5 қаңтардан бастап енгізілмек.

Омикрон штаммға байланысты шектеулер енгізіледі

<a href="https://kyzylorda-news.kz/">Kyzylorda-news.kz.</a> Тәуелсіздік мерекесі қарсаңында «Заң» медиа-корпорациясы» Кемел Тоқаев атындағы детектив шығармалар байқауын ұйымдастырған еді.
Түркістан қаласында өткен байқауға 104 шығарма түсіп, олардың 14-і жүлделі болған.
Ал, алғашқы үш жүлделі орынның үшеуін де қызылордалықтар жеңіп алды.
Республикалық «Таң-Шолпан» журналының бас редакторы, белгілі жазушы, Жалағаш ауданының тумасы Нұрлыбек Саматұлының «Жапыраққа жұққан қан» атты деректі әңгімесі бас жүлде, «Егемен Қазақстан» газетінің тілшісі, Қазалы ауданынан шыққан қаламгер Абай Аймағамбеттің «Жаза» әңгімесі 1-орын, Ішкі істер саласының құрметті қызметкері, полиция полковнигі, Жалағаш ауданының құрметті азаматы Әмірбек Шаймағанбетовтің «Шымкентский транзит надежды» атты орыс тіліндегі деректі әңгімесі 2-орын жүлдесін иеленді.
Байқауға Түркістан облыстық соты демеушілік жасап, жүлдегерлердің бәрін де ақшалай сыйлықпен марапаттады.

Қызылордалықтардың үздік туындылары

<a href="https://kyzylorda-news.kz/">Kyzylorda-news.kz.</a>&nbsp;Қызылорда облысының әкімі Гүлшара Әбдіқалықова жұмыс сапарымен Қармақшы ауданына барды.
Сапар барысында аймақ басшысы Тәуелсіздіктің 30 жылдық мерейтойы аясында көпбалалы аналарға 10 пәтерлі 5 тұрғын үйдің кілтін табыстады. Жаңа үйлер «Нұрлы жер» мемлекеттік бағдарламасы аясында салынған. Бір тұрғын үйдің жалпы ауданы 136,6 шаршы метрді құрайды.
Облыс әкімі Тәуелсіздіктің 30 жылдығы және жаңа жыл мерекесіне орай құттықтауын жеткізіп, әрбір шаңырақтың шаттыққа бөленуін тіледі.
<blockquote>
 «Баршаңызды еліміздің ең басты ұлық мерекесі – қастерлі Тәуелсіздігіміздің 30 жылдығымен және келе жатқан Жаңа 2022 жылмен шын жүректен құттықтаймын! Баспанаға мұқтаж көпбалалы, аз қамтылған отбасылар үшін мемлекетімізде тиісті жағдайлар жасалғаны белгілі. Жаңа жыл қарсаңында көпбалалы аналарға қуаныш сыйлау мақсатында кезекте тұрған отбасыларға табыстағалы тұрмыз. Қоныс тойларыңыз құтты болсын!Шаңырақтарыңызға шаттық, отбастарыңызға құт-береке, амандық тілеймін», – деді Гүлшара Әбдіқалықова.
</blockquote>
Сонымен қатар аймақ басшысы жақында құрылысы аяқталған жаз-қыс мезгілдерінде балалар демалысына арналған лагерьді бағамдап көрді. 140 орындық жыл бойы жұмыс істейтін лагерде медпункт, клуб, асхана, ұлдарға және қыздарға арналған бөлек жатын орындары орналасқан корпустар, спорттық ойын алаңдары, автотұрақ, шаруашылық және бу қазандығы ғимараттары бар. Бас мердігер «Промстройсервис-Е» ЖШС. 
Облыс әкімі оқушыларды қабылдау процесіне қажетті қадамдарды іске асырып, танымдық бағыттағы жұмыстарды осы лагерь арқылы жандандыру қажеттігін атап өтті.
<img src="https://kyzylorda-news.kz/wp-content/uploads/2021/12/akim-karmakshy.jpg" alt="" />
<img src="https://kyzylorda-news.kz/wp-content/uploads/2021/12/karmakshy1.jpg" alt="" />
<img src="https://kyzylorda-news.kz/wp-content/uploads/2021/12/269852656_213424090978843_5121710046010575384_n.jpg" alt="" />
<img src="https://kyzylorda-news.kz/wp-content/uploads/2021/12/269796865_213424057645513_1739807677394550441_n.jpg" alt="" />
<img src="https://kyzylorda-news.kz/wp-content/uploads/2021/12/269766287_213424100978842_9121806378912595466_n.jpg" alt="" />
<img src="https://kyzylorda-news.kz/wp-content/uploads/2021/12/karmakshy3.jpg" alt="" />

Қазақстан және Қызылорда облысының жаңалықтары