<a href="https://kyzylorda-news.kz/">Kyzylorda-news.kz.</a> Бастауыш партия ұйымдарының қызметін жандандырудың тиімді жолдары мен тетіктерін талқылау мақсатында “AMANAT” партиясы Теміржол филиалының атқарушы хатшысы Базара Танбаева партия филиалына қарасты бастауыш ұйымдардың хатшыларымен кездесті.
Кездесу барысында ұйым жұмысын одан әрі жетілдіруде келелі ойлар ортаға салынды. Алдағы уақытта атқарылатын жұмыстар талқыланып, хатшылардың ұсыныстары тыңдалып, ұйымдастыру жұмыстары пысықталды.
<blockquote>
 «Жандандыру жұмыстардың аясында бастауыш партия ұйымдарының қызметін жетілдіріп, олардың іс-әрекетіне тың серпін беру. Бастауыш ұйым жұмысын заман талабына сай жаңғырту жөнінде нақты ұсыныс-пікірлер білдіру. Осы мақсатта екінші жарты жылдыққа арналған жұмыс жоспарлары дайындалып, алдағы басым бағыттар айқындалған болатын. Енді осы жайында кең ой-пікірлер алмасу керек»- деді Теміржол партия филиалының атқарушы хатшысы Базара Танбаева.
</blockquote>
Бастауыш ұйым хатшылары өздеріне жүктеліп отырған міндеттерді айқын сезінетіндерін, ұйым жұмысын әрі жақсартуға байланысты іс-шараларға белсенді түрде атсалысатындарын айтып тарқасты.
<img src="https://kyzylorda-news.kz/wp-content/uploads/2022/07/01a7f3be-cb45-4e46-864f-0f3617ecadc1.jpg" alt="" />

Бастауыш ұйымдардың хатшылары бас қосты

<a href="https://kyzylorda-news.kz/">Kyzylorda-news.kz.</a> «Қазгидромет» РМК-сы шілденің 8-і күнгі күн райы болжамын жариялады, деп хабарлайды кәсіпорынның&nbsp;<a href="https://www.kazhydromet.kz/weather/prognoz-vazhneyshih-meteorologicheskih-yavleniy">ресми сайты.</a>
Ондағы деректерге қарағанда, 8 шілдеде оңтүстік циклоны және онымен байланысқан атмосфералық фронталды бөліктер ҚР территориясының басым бөлігіне ықпал етеді. Соның салдарынан елдің басым бөлігінде жаңбыр жауып, орталықта, күндіз солтүстікте нөсер жаңбыр жауады, найзағай ойнап, бұршақ жауып, жел күшейеді, дауыл тұрады, оңтүстікте шаңды дауыл тұрады, солтүстікте түнде және таңертең тұман түседі.
Қызылорда облысының басым бөлігінде төтенше өрт қаупі сақталады.

Жұмаға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Осыдан бірнеше жыл бұрын «Бейнеу-Бозой-Шымкент» атты ірі жобаның құрылысы аяқталып, пайдалануға берілген болатын. Содан бері ауданды көгілдір отынмен қамтамасыз ету жұмыстары қарқын алып, бүгінде бірқатар қыруар шаруа тындырылған.
Нәтижесінде аудан орталығы – Әйтеке би кенті мен бірқатар елді мекендер табиғи газдың қызығын көруде. Жасыратыны жоқ, көгілдір отын аудан орталығы мен оның маңындағы ауыл тұрғындарының тіршілігіне ерекше серпін беріп, қатты отынға деген тәуелділіктен құтқарды.
Қазіргі таңда аудан бойынша тағы да 3 елді мекенді газдандыру жұмыстары қарқынды жүргізілуде. 
Бүгін аудан әкімі Мұхтар Оразбаев пен аудандық мәслихат хатшысы Бақытжан Жарылқап Жалаңтөс батыр, Қ.Пірімов, Басықара ауылдарына арнайы барып, газдандыру жұмыстарының барысын көрді.
Аудандық құрылыс, сәулет және қала құрылысы бөлімінің басшысы Нұрбек Күзембаев 3 елді мекенді газдандыру жұмыстары белгіленген кестеге сәйкес жүргізіліп жатқанын жеткізді. Қажетті қаржысы бөлініп, керекті материалдармен қамтамасыз етілген.
Аудан әкімі Мұхтар Оразбаев тиісті сала басшылары мен мердігер мекеменің жауапты қызметкерлеріне құрылыс жұмыстарын сапалы жүргізіп, белгіленген мерзімде аяқтауды тапсырды.
<img src="https://kyzylorda-news.kz/wp-content/uploads/2022/07/290922296_3399144410306482_2292381654135180971_n.jpg" alt="" />

Қазалыда газдандыру ісі қарқынды жүргізілуде

<a href="https://kyzylorda-news.kz/">Kyzylorda-news.kz.</a>&nbsp;Қанша жеке кәсіпкер&nbsp; міндетті әлеуметтік медициналық сақтандыру қорына төлем жасайды?&nbsp; Олар өз қызметкерлері үшін қандай көлемде аударым жасайды және жеңілдік санатына кіретін жұмыскерлер үшін төлем жасай ма? Жеке кәсіпкерлердің осы және өзге де жиі қойылатын 8 сауалына жауап бердік.
«2021 жылы Қорға 632,9 мың жеке кәсіпкерден 15,9 млрд теңге көлемде аударымдар мен жарналар түсті. Биыл медициналық сақтандыруға төлеушілер саны 691,2 мыңға жетті. Олар 5 айда жүйеге 10,3 млрд. теңге төледі. Яғни, біз жеке кәсіпкерлердің өздері және қызметкерлері үшін жауапкершіліктің артқанын байқап отырмыз», – дейді «Әлеуметтік медициналық сақтандыру қоры» КеАҚ жеке және заңды тұлғалармен жұмыс жөніндегі департамент директоры Забира Оразалиева.
<ul>
<li>Жеке кәсіпкерлер міндетті әлеуметтік медициналық сақтандыруға өз пайдасы&nbsp; үшін қанша төлем жасайды?</li>
</ul>
<img src="https://kyzylorda-news.kz/wp-content/uploads/2022/07/2.jpg" alt="" />
Жеке кәсіпкерлер мен жеке практикамен айналысатын азаматтар басқа да әлеуметтік аударымдармен қатар міндетті медициналық сақтандыруға белгіленген жарналарды төлейді.
2022 жылы осы санаттағы төлеушілер үшін жарналардың мөлшері ЕТЖ-ның 1,4 еселенген мөлшерінің 5%-ын немесе ай сайын 4 200 теңгені құрады. (60&nbsp;000*1,4) *5% = 4&nbsp;200 теңге
Қалай төлейді?
Жеке кәсіпкер ретінде өзі үшін МӘМС төлемін екінші деңгейдегі банктің кез келген бөлімшесі арқылы, оның ішінде мобильді қосымшалар арқылы, сондай-ақ “Қазпошта” АҚ, Касса 24 және Qiwi әмиян өзіне-өзі қызмет көрсету терминалдары арқылы аударуға болады. Төлем коды (ТК) – 122.
Сіз ай сайын да, ұзақ мерзімге де алдын ала төлем жасай аласыз. &nbsp;
<img src="https://kyzylorda-news.kz/wp-content/uploads/2022/07/3.jpg" alt="" />
2-3 жұмыс күні ішінде қаражаттың қайтарылуын міндетті түрде тексеріңіз.
Егер ЖСН немесе аты-жөні, төлем сомасы дұрыс көрсетілмеген болса немесе 10 ЕТЖ-дан асатын аударым базасы асып кетсе, жарналар қайтарылуы мүмкін.
<ul>
<li>Жеке кәсіпкерлер ретінде жұмыс берушілер медициналық сақтандыруға қанша төлейді?</li>
</ul>
Егер жеке кәсіпкердің жалдамалы қызметкерлері болса, онда олар жұмыс беруші ретінде төлемдер бойынша жауапты болады.
Аударымдар (жұмыс берүші қаражаты есебінен) – қызметкерлердің жалақысының 3% мөлшерінде, бірақ 18 мың теңгеден аспайды.
Жарналар (қызметкердің жалақысынан ұстап қалу) – қызметкерлердің жалақысынан 2% мөлшерінде, бірақ 12 мың теңгеден аспайды.
<img src="https://kyzylorda-news.kz/wp-content/uploads/2022/07/4.jpg" alt="" />
Мысалы:
N қызметкерге 2022 жылғы шілде айына 100 000 теңге сомасында жалақы есептелді. Бұл жағдайда қызметкер аударымдарының сомасы 2 мың теңгені құрайды, жұмыс беруші өз тарапынан 3 мың теңге аударады. Яғни, әр қызметкердің жалақысының мөлшеріне байланысты болады.
Қалай төлем жасауға болады?
Жеке кәсіпкер қызметкерлері үшін МӘМС төлемін банктің кез келген бөлімшесі, оның ішінде мобильді қосымшалар және «Қазпошта» АҚ арқылы аударуға болады. Төлем коды (ТК): 121.
<ul>
<li>Егер жеке кәсіпкер жеңілдік санатына кіретін болса, МӘМС үшін ақы төлеу қажет пе?</li>
</ul>
Жеке кәсіпкер өзі немесе оның жалдамалы қызметкерлері келесі санаттарда болған жағдайда жарналар мен аударымдарды төлемейді:
<ul>
<li>балалар (18 жасқа дейінгі);</li>
<li>зейнетақы төлемдерін алушылар, оның ішінде Ұлы Отан соғысының қатысушылары мен мүгедектері;</li>
<li>«Алтын алқа», «Күміс алқа» алқаларымен наградталған немесе бұрын «Батыр Ана» атағын алған, сондай-ақ I және II дәрежелі «Ана даңқы» ордендерімен наградталған көп балалы аналар;</li>
<li>мүгедектер;</li>
<li>орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында күндізгі оқу нысанында білім алатын адамдар.</li>
</ul>
<img src="https://kyzylorda-news.kz/wp-content/uploads/2022/07/5.jpg" alt="" />
<ul>
<li>Декреттік демалыстағы әйел жеке кәсіпкер болса, МӘМС үшін төлем жасауы керек пе?</li>
</ul>
Егер әйел жеке кәсіпкер болса, онда ол өзі үшін 4 200 теңге мөлшерінде белгіленген жарнаны төлейді.
Бұл санаттағы әйелдер жеңілдік санатына кәсіпкерлік немесе еңбек қызметін жүзеге асырмайтын, табысы жоқ кезде кіреді.
Егер жеке кәсіпкер жұмыс жасамаса (кірісі болмаса), онда салық органдарында кәсіпкерлігін тоқтата тұру үшін тиісті рәсімдерді жүргізу қажет.
<ul>
<li>Егер жеке кәсіпкер зейнеткер немесе мүгедек болса, ол медициналық сақтандыру үшін жарна төлеуі керек пе?</li>
</ul>
Жоқ. Мүгедектігі бар адамдар МӘМС жарналарын төлеуден толық босатылған азаматтардың жеңілдік санатына жатады, оның ішінде жеке кәсіпкер ретінде де. Сондай-ақ, Қазақстандағы қордан зейнетақы алушылар да МӘМС жарналарын төлеуден босатылды.
<ul>
<li>Бір мезгілде жалдамалы қызметкер болып табылатын жеке кәсіпкер медициналық сақтандыруға жарна төлей ме?</li>
</ul>
Иә. Бұл жағдайда «МӘМС туралы» Заңның 28-бабының 3 және 5-тармақтарына сәйкес төлеуші өзінің жалақысының 2%-ын жалдамалы қызметкер ретінде және ЕТЖ-нің 1,4 еселенген мөлшерінің 5% – ын жеке кәсіпкерр ретінде 4 200 теңге төлейді.
<img src="https://kyzylorda-news.kz/wp-content/uploads/2022/07/6.jpg" alt="" />
Жеке кәсіпкер қызметі тоқтатылған жағдайда, ҚР Салық заңнамасына сәйкес, МӘМС жарналарын кәсіпкер ретінде төлемеуі тиіс. &nbsp;
<ul>
<li>Жеке кәсіпкерге МӘМС жарналарын төлемегені үшін өсімпұл салына ма?</li>
</ul>
Иә. Төлем күнін қоса алғанда, мерзімі өткен әрбір күн үшін қайта қаржыландыру мөлшерлемесінің 2,5 еселенген мөлшерінде өсімпұл есептеледі.
Өсімпұлды болдырмау үшін жалдамалы қызметкерлері болса, жарналар мен аударымдарды уақтылы төлеу қажет. Есепті кезеңнен кешіктірмей, яғни кірістер төленген айдан кейінгі айдың 25-күнінен кешіктірмеу керек.
<img src="https://kyzylorda-news.kz/wp-content/uploads/2022/07/7.jpg" alt="" />
<ul>
<li>Жарналарды және (немесе) медициналық сақтандыру қорына аударымдарды төлеуден жалтарған жағдайда қандай шаралар қолданылады?</li>
</ul>
Мемлекеттік кіріс органдары (салық комитеті) аударымдар мен жарналардың уақтылы және толық есептелуіне және аударылуына бақылау жүргізеді.
Егер жеке кәсіпкер жарналарды және (немесе) аударымдарды төлеуден жалтарса, әкімшілік жауапкершілікке тартылады.
Жұмыс берушiлердiң, жеке кәсiпкерлердiң, жеке нотариустардың, жеке сот орындаушыларының, адвокаттардың, кәсiби медиаторлардың мiндеттi медициналық сақтандыруға аударымдарды және (немесе) жарналарды төлемеуi, уақтылы және (немесе) толық төлемеуi – ескерту жасауға әкеп соғады.
<img src="https://kyzylorda-news.kz/wp-content/uploads/2022/07/8.jpg" alt="" />
Бір жыл ішінде ескерту қайталанған жағдайда айыппұл салынады.
<ul>
<li>Шағын кәсіпкерлік субъектілеріне МӘМС төленбеген, уақтылы және (немесе) толық төленбеген аударымдар және (немесе) жарналар сомасының 20%-ы мөлшерінде</li>
<li>орта кәсіпкерлік субъектілеріне-30% мөлшерінде</li>
<li>ірі кәсіпкерлік субъектілеріне-50% мөлшерінде</li>
<li>МӘМС жарналарын және/немесе аударымдарын төлеу кезінде жеке кәсіпкер нені есте сақтауы қажет?</li>
<li>Қаражаттың қайтарылмауы үшін алушының ЖСН мен аты-жөнін дұрыс көрсету керек;</li>
<li>Міндетті түрде медициналық сақтандыруға төлемдердің қабылдануын 2-3 жұмыс күн ішінде тексеру қажет. Егер төлем қайтарылған болса, онда дұрыс ақпаратты көрсете отырып, төлемді қайта жүргізу қажет;</li>
<li>Есепті кезеңнен кешіктірмей салық органдарына есептілікті дайындау және тапсыру керек;</li>
<li>Өз жұмыскерлерін МӘМС төлемінің аударылғаны туралы хабардар ету керек.</li>
</ul>
&nbsp;Сіздер үшін fms.kz ресми сайты, 1406 байланыс орталығы, Qoldau 24/7 мобильді қосымшасы және Telegram-дағы SaqtandyryBot жұмыс істейді. Дәл осы құралдар сақтандырылу мәртебесін тексеруге мүмкіндік береді. Сондай-ақ электрондық үкіметтің egov.kz сайтындағы «Денсаулық сақтау» бөліміне өтіп, «Медициналық қызметтер туралы және МӘМС-ға аударылған сомалар туралы ақпарат» мемлекеттік қызметі арқылы медициналық сақтандыру жүйесіндегі өз мәртебеңізді тексеруге мүмкіндік бар.
<img src="https://kyzylorda-news.kz/wp-content/uploads/2022/07/9.jpg" alt="" />
<img src="https://kyzylorda-news.kz/wp-content/uploads/2022/07/10.jpg" alt="" />
<img src="https://kyzylorda-news.kz/wp-content/uploads/2022/07/11.jpg" alt="" />
<img src="https://kyzylorda-news.kz/wp-content/uploads/2022/07/12.jpg" alt="" />
<img src="https://kyzylorda-news.kz/wp-content/uploads/2022/07/13.jpg" alt="" />

Жеке кәсіпкерлер МӘМС жүйесіне жарнаны қалай төлейді?

<a href="https://kyzylorda-news.kz/">Kyzylorda-news.kz.</a> Бүгін Достық үйінде облыстық ардагерлер кеңесінің кеңейтілген кезекті алқа отырысы өтті.
Мәжіліске облыс әкімі аппаратының басшысы Ш. Байманов, Шиелі, Қармақшы аудандық және Байқоңыр қалалық ардагерлер кеңестерінің төрағалары, облыстық ардагерлер кеңесінің тексеру комиссиясының төрағасы, тұрақты комиссиялардың төрағалары, ардагерлер қозғалысының белсенділері, бұқаралық ақпарат құралдарының өкілдері қатысты.
Басқосуда Ш. Байманов мемлекеттік орган өкілдері тарапынан ардагерлерге тұрақты түрде қолдау көрсетілетінін айта келіп, алқа жиынының жұмысына сәттілік тіледі.
Мәжіліс модераторы, облыстық ардагерлер кеңесінің төрағасы С. Дүйсенбаев ардагерлер ұйымдарының жұмысын үйлестіру, жүйелік құрылымдарын жетілдіру мен олардың белсенділігін арттыру талаптары бойынша жұмыстарды жалғастыру мақсатында, облыстың ардагерлер ұйымдарындағы кадрлық өзгерістермен таныстырып өтті. Атап айтқанда алқа мүшесі Уәйіс Ержан дүниежүзі қазақтары құрылтайының Түркиядағы өкілі болып қызмет ауыстырып, қоныс аударуына байланысты, алқа мүшелігінен босатылып, ол орынға аймағымызға белгілі азамат Бақыт Нұртазаевтың кандидатурасын пленумға бекітуге ұсынылды.
Сондай-ақ, Байқоңыр қаласы ардагерлер кеңесінің төрағасының өмірден өтуіне байланысты, Байқоңыр қаласының ардагерлері кеңесітің орынбасары болған Амангелді Ирюковтың кандидатурасын Байқоңырлық ардагерлермен ұсынылғанын және Қармақшы аудандық ардагерлер кеңесі төрағасының денсаулық жағдайымен қызметінен босатылуына орай, аудандық ардагерлер кеңесінің кезектен тыс пленумында аудандық кеңестің орынбасары болған Асқар Мерековтың кандидатурасы Қармақшы аудандық ардагерлер кеңесінің төрағалығына бекітілгенін хабардар етті. Жаңадан бекітілуге ұсынылған облыстық ардагерлер кеңесі жанындағы тұрақты комиссиялар жетекшілерімен таныстырып өтті.
Күн тәртібіндегі бірінші мәселе бойынша «Шиелі аудандық ардагерлер кеңесінің үстіміздегі жылы атқарған жұмыстары мен алдағы міндеттері туралы» Шиелі аудандық ардагерлер кеңесінің төрағасы Ө. Исмайыл хабарлама жасады.
Ардагерлер кеңестерінің жалпыұлттық идея рухында патриоттық және адамгершілікке тәрбиелеу, саяси тұрақтылықты сақтау, қарт адамдардың әлеуметтік құқықтары мен мүдделерін қорғау басқа да мәселелерді шешу барысында тұрақты комиссиялардың алатын орны бар.
Күн тәртібіндегі «Облыстық ардагерлер кеңесінің тұрақты комиссияларының мақсат-міндеттерімен таныстыру және төрағаларын бекіту» мәселесі бойынша облыстық ардагерлер кеңесінің жауапты хатшысы М. Баекеев хабарлама жасады.
Облыстық ардагерлер ұйымында ардагерлер қатарының топтасқандығы мен бірлігін сақтау, бастауыш ардагерлер ұйымдарының жүйелік құрылымдарын жетілдіру мен олардың белсенділігін арттыру, ардагерлердің қоғамдық – саяси шараларға қатысуын қамтамасыз ету талаптары бойынша жұмыстарды жалғастыру мақсатында, аумақтық ардагерлер ұйымдары бойынша құрметті демалысқа шыққан зейнеткерлердің бастауыш ардагерлер ұйымдарына тіркелу жөнінде талдау жүргізілген болатын. Осы талдау қорытындысымен және ардагерлердің төл баспасөзі «Ардагер айнасы» газетіне жазылу барысымен облыстық ардагерлер кеңесі төрағасының орынбасары Ө.Шәменов таныстырды.
Аумақтық ардагерлер ұйымдарымен тығыз байланыста болып, тыныс-тіршілігімен танысып, қажетті жағдайда әдістемелік көмек көрсетілуін қамтамасыз ету мақсатында, облыстық ардагерлер кеңесінің Алқа мүшелері аумақтық ардагерлер кеңестеріне жауаптылыққа бекітілді.
Облыстық ардагерлер кеңесінің кеңейтілген алқа мәжілісінде қаралған мәселелер бойынша тиісті қаулылар қабылданды.

Облыстық ардагерлер кеңесінің кеңейтілген  алқа отырысы өтті

<a href="https://kyzylorda-news.kz/">Kyzylorda-news.kz.</a> Аудан әкімі С. Сермағамбетов Бахрейн мемлекетінің Манама қаласында грек-рим күресінен өткен жасөспірімдер арасындағы Азия біріншілігінде жеңіске жеткен қос бірдей аралдық жас спортшылар Алпамыс Болатұлы мен Әмірмұхаммед Ұланұлын қабылдады.
Чемпиондармен кездесу барысында аудан басшысы ауданның спорт саласындағы жетістігі тағы бір үлкен жеңіспен толыққанын, бұл жетістіктің күшті рух пен үздіксіз шынығу және үлкен еңбектің арқасында келгенін айтып өтті.
<blockquote>
 «Сіздерді жарқын жеңістеріңізбен шын жүректен құттықтаймын. Алпауыт мемлекеттердің спортшылары бақ сынасқан боз кілем бәсекесінде аралдық балуандардың топ жаруы біз үшін күтпеген жаңалық болды. Кез келген спортшыға бұйыра бермейтін Сіздердің айқын жеңістеріңіз барша қазақ елінің жеңісі, оның ішінде ауданымыз үшін зор мақтаныш. Ата-аналарыңыздың көз қуанышы болып, осындай жетістіктеріңізбен қуанта беріңіздер. Осы орайда, спортшылардың айтулы жарыста алтыннан алқа тағынып, жеңіс тұғырынан көрінуіне, оларды бала күнінен спортқа баулыған жаттықтырушыларының еңбегі өлшеусіз» – деп, ізгі лебізін жеткізді аудан әкімі.
</blockquote>
Кездесуде еліміздің абыройын асқақтатқан жас чемпиондар мен спорт жаттықтырушысына аудан әкімінің құттықтауы мен арнайы сый-сияпаттары табысталды.
Өз кезегінде жас балуандар мен жаттықтырушысы Төлебаев Бахтияр көрсетілген сый-құрметке ризашылықтарын білдірді.

Аудан әкімі Азия чемпиондарын қабылдады

<a href="https://kyzylorda-news.kz/">Kyzylorda-news.kz.</a> Қызылорда облысының бұрыңғы әкімі Қуанышбек Ысқақовтың жазасының қалған бөлігі бас бостандығынан айыру түрінен шектеу түріне ауыстырылды. Бұл туралы қорғаушы Ләззат Ахатова <a href="https://www.facebook.com/profile.php?id=100016633274234">фейсбук</a> әлеуметтік желісінде мәлімдеді.
<blockquote>
 «Сыр елі үшін жақсы жаңалық! Қызылорда соты облыстың экс-әкімі Қуанышбек Искаковтың жазасының қалған бөлігін бас бостандығынан айыру түрінен шектеу түріне ауыстырды! Қаулы 15 күнде күшіне енеді. Ол деген сөз – енді түрмеде емес, отбасының қасында болады. Жазасының қалған бөлігін енді үйінде жүріп өтейді. Пробациялық бақылауда болады. Толық ақталмаса да, осының өзі – күні-түні ұлының тілеуін тілеп, дұғасынан, намазынан тастамай отырған 86 жасар анасы үшін, жары, бауырлары, балалары үшін – дәтке қуат», – деп жазды қорғаушы Ләззат Ахатова.
</blockquote>
Айта кетейік, Қызылорда облысының экс-әкіміне қылмыстық кодекстің 190-бабы 4-бөлігінің 2-тармағы бойынша айып тағылып, 7 жылға бас бостандығынан айырылған болатын.

Қуанышбек Ысқақовтың жазасының қалған бөлігі бас бостандығын шектеу түріне ауыстырылды

<a href="https://kyzylorda-news.kz/">Kyzylorda-news.kz.</a>&nbsp; Биыл ауыл шаруашылығы айналымына 33,8 мың га учаске енгізілді. І жартыжылдық нәтижесімен ауыл шаруашылығы мақсатындағы жердің жалпы көлемі 1,2%-ға артты.
Көктемгі егіс жұмыстарына жоспарланған 185,9 мың гектар ауыл шаруашылығы дақылдары толық егілді, оның ішінде, негізгі дақыл күріш 78,4 мың гектарға егіліп, суға бастырылды.
Күріштен басқа дәнді дақылдармен қатар, картоп, көкөніс,бақша және мал азықтық дақылдарды орналастыру туралы шешім қабылданып, өткен жылмен салыстырғанда бұл дақылдардың көлемі 5,2 мың гектарға артық орналастырылған.
Ал, егіс алқаптарын әртараптандыру бағытында қосымша соя дақылының егіс көлемі 150 гектарға, қант құмайы 352 гектарға жетті.
Облыс әкімінің тапсырмасына сәйкес, өңірде азық-түлік қауіпсіздігін қамтамасыз ету және тұрғындардың өзін-өзі әлеуметтік маңызы бар картоп, көкөніс, бақша өнімдерімен қамтамасыз ету мақсатында қосымша 1482 гектар жер көлемі дайындалып, 6802 отбасыға бөлініп берілді. Бүгінгі күнге барлығы 1433 гектары егіліп, оның ішінде 461 гектар жерге картоп, 385 гектарға көкөніс, 587 гектарға бақша дақылдары егілді.
Жыл басынан бері экспортқа 27,2 мың тонна күріш, 1060,4 тонна балық, 1155,3 тонна қамыс және 155,0 тонна бидай қалдығы жіберілді.

Қызылорда облысында ауыл шаруашылығы мақсатындағы жердің көлемі 1,2%-ға артты

<a href="https://kyzylorda-news.kz/">Kyzylorda-news.kz.</a>&nbsp; 6 шілде күні болған қатты желдің әсерінен Жалағаш ауданындағы бірнеше ғимаратқа зақым келді.
Табиғи оқиға салдарынан көппәтерлі 2 тұрғын үйдің шатыры ұшып, сол жердегі 2 көлікке құлаған. Сондай-ақ, жақын маңда орналасқан электр бағаналары да үзілген. Қазіргі таңда шығын көлемі есептелуде. Бұл туралы Өңірлік коммуникациялар қызметінде өткен брифингте облыстық ТЖД төтенше жағдайлардың алдын алу бөлімінің бастығы Нұрбол Исанов хабарлады.
<blockquote>
 «Қатты желдің салдарынан тұрғын үй және әлеуметтік-мәдени нысандардың шатыры ұшып, коммуналдық қызметтердің жұмысы уақытша тоқтап қалды. Дегенмен оқиға салдарынан зардап шеккендер жоқ. Қазіргі уақытта жергілікті атқарушы органдар тексеріс жұмыстарын жүргізуде. Үзілген электр желілері қайта қалпына келтіріліп, коммуналдық қызметтердің жұмысы жалғасуда», – деді Нұрбол Исанов.
</blockquote>

Қатты желдің әсерінен Жалағаш ауданындағы бірнеше ғимаратқа зақым келді

<a href="https://kyzylorda-news.kz/">Kyzylorda-news.kz.</a>&nbsp; Биыл құрбан айт мерекесі 9-11 шілде аралығында атап өтіледі. Осы ретте облыстағы аз қамтылған отбасылар мен мұқтаж отбасыларға тегін құрбан етін үлестіру мақсатында арнайы тізім жасақталды. Құрбандық шалу рәсімі оффлайн және онлайн форматта жүзеге асады.
Бұл жөнінде Өңірлік коммуникациялар қызметінде өткен брифингте облыстық қоғамдық даму басқармасының басшысы Мира Қазбекова мәлімдеді.
<blockquote>
 «Барша мұсылмандар үшін қасиетті саналатын Құрбан айт мерекесімен баршаңызды шын жүректен құттықтаймын! Құрбан айт мерекесі қарсаңында жергілікті атқарушы органдар тарапынан дайындықтар басталды. Бұл бағытта облыс әкімінің орынбасарымен іс-шаралар жоспары бекітілді. Биыл құрбан шалу рәсімі оффлайн және онлайн форматта өтеді. Онлайн форматта жүргізу үшін ҚМДБ-ның qurban2022.kz сайты іске қосылды. Осы арқылы құрбандық шалу малына тапсырыс беру және мұқтаж жандар құрбандық етін алу үшін осы сайтқа өтініш бере алады. Айт күндері мал бағасын шарықтатпауға және азық-түлік бағасын көтермеуге тиісті мемлекеттік органдарға тапсырмалар берілді», – деді облыстық қоғамдық даму басқармасының басшысы Мира Жомартқызы.
</blockquote>
Құрбан айт мерекесінде қоғамдық тәртіпті сақтау мақсатында мешіттер мен белгіленген құрбан шалу орындарында құқық қорғау қызметкерлері рейд жұмыстарын жүргізеді. Жалпы бекітілмеген орындарда оның ішінде мешіттердің аумағында мал шалуға тыйым салынады.
<blockquote>
 «Құрбан айт күндері мұсылмандар үшін ең жақсы амал – құрбан шалу болып табылады. Облыс бойынша барлық мешіттерде таңғы 06.00-де айт намазы оқылады. Одан кейін құрбан шалу рәсімі басталады. Мұқтаж жандарға теңдей мал етін үлестіру үшін «Бақытты отбасы» орталығы арқылы тізім жасақталатын болады. Жалпы қала бойынша 2000-нан астам отбасының тізімі дайындалды», -деді ҚМДБ-ның облыс бойынша өкілі, «Ақмешіт-Сырдария» мешітінің бас имамы Болатбек Әбуов.
</blockquote>

Құрбандық шалу рәсімі оффлайн және онлайн форматта жүзеге асады

<a href="https://kyzylorda-news.kz/">Kyzylorda-news.kz.</a> 1 шілдеде үкіметтік емес ұйымдарға арналған сыйлықақыны беру үшін жыл сайын өткізілетін конкурсқа өтінімдерді қабылдау басталды.
ҮЕҰ үшін сыйлықақы-бұл ҮЕҰ әлеуетін нығайту, қоғамдық пайдалы жобаларды іске асыруға мотивацияны арттыру үшін институционалдық қолдау.
Сыйлықақы әлеуметтік маңызы бар 15 бағыт бойынша беріледі. Бір бағытқа арналған сыйлықақы мөлшері 2000 АЕК-ті құрайды.
Айта кетсек, соңғы 5 жылда 287 ҮЕҰ қоғамдық мәселелерді шешуге өз үлестерін көрсетіп, сыйлықақы иегері атанды.
Егер сіздің ҮЕҰ қоғам өміріне белсенді қатысып, өз қызметі саласында көшбасшы ретінде танылып, әлеуметтік маңызды мәселелерді шешуге түбегейлі үлес қосып, жаңашыл идеяларды белсенді іске асырса – үздік ҮЕҰ арасында өтетін конкурсқа қатысуға шақырамыз.
Конкурсқа қатысуға өтінімдерді қабылдау 2022 жылғы 1 қыркүйекте (қоса алғанда) сағат 18:30-да аяқталады.
Байқауға қатысу шарттары туралы толығырақ <a href="https://www.gov.kz/memleket/entities/akk/documents/details/321154?lang=kk">сілтеме бойынша</a> білуге болады.

ҮЕҰ үшін сыйлықақы беру конкурсы басталды

<a href="https://kyzylorda-news.kz/">Kyzylorda-news.kz.</a> Қызылорда облысында 17 маусым мен 5 шілде аралығында өткізілген Ұлттық бірыңғай тестілеу өз мәресіне жетті. Облыс бойынша 7 506 оқушы мектеп бітірсе, сынақ тапсыруға ниет білдірген түлектердің 6 452-і немесе 87 %-ы ҰБТ-ға қатысты.
Биылғы Ұлттық бірыңғай тестілеу Қызылорда қаласы мен Жаңақорған және Қазалы аудандарындағы 3 пунктте жүргізілді. Тестілеудің әділ өту барысын қадағалау мақсатында ҚР Оқу-ағарту министрлігі мен Сыбайлас жемқорлыққа қарсы агенттігінен, Үкіметтік емес ұйымдар, «Адалдық алаңы» жобалық кеңселерінің өкілдері және қоғам белсенділері бар арнайы мониторингтік топ мүшелері бақылады. Сондай-ақ, ҰБТ жүргізілген әр аудитория арнайы бейнебақылау камераларымен жабдықталып, тестілеу барысы тікелей эфир арқылы көрсетілді.
ҰБТ қорытындысы бойынша тестілеуге тіркелген азаматтардың 87% емтиханға қатысты. 815 талапкер 100-ден жоғары балды жинаса, бұл өткен жылғы көрсеткіштермен салыстырғанда бір деңгейде қалып отыр. Ал 416 тестіленуші 49 балдан төмен алып, шекті деңгейден өтпеген.
Айта кетейік, облыс бойынша ең жоғары 137 балды Қызылорда қаласы, №101 мектеп-лицейдің түлегі Омаров Дәулет иеленді. Сол секілді 133 балды Қазалы ауданының қос түлегі Әзен Аяулым мен Смағұл Іңкәр жинаса, Қармақшы ауданынан Қанибекова Қарақат 132 балға ие болды. Ал, Арал ауданының екі түлегі Әбдіхалық Аршын мен Жақсылықова Сымбат және №4 облыстық дарынды балаларға арналған мектеп интернатының түлектері Бергенбекұлы Нұрдаулет, Қайырбек Шаһида, Дүйсенбек Ернұр 131 ұпай жинап, жоғары нәтиже көрсетті.

Қазақстан және Қызылорда облысының жаңалықтары