<h2 style="text-align:justify;">Тұтыну бағаларының индексі</h2>Қазақстан Республикасының Стратегиялық жоспарлау және реформалар агенттігі Ұлттық статистика бюросының Қызылорда облысы бойынша департаментінің ақпаратына сәйкес 2026 жылдың маусым айында республика бойынша инфляция 0,8%-ды (аймақ бойынша – 0,4%) құрады. Инфляция құрылымында азық-түлік тауарларының бағасы 0,6%-ға (аймақ бойынша – 0,1%), азық-түлік емес тауарларға – 0,9%-ға (аймақ бойынша – 0,8%) өсті, ал ақылы қызметтерге – 1,1%-ды (аймақ бойынша – 0,2%) құрады.&nbsp;Жылдық инфляция 10,3%-ды (аймақ бойынша – 10,4%) құрады. Инфляция құрылымында азық-түлік тауарларының бағасы 10,4%-ға (аймақ бойынша – 10,3%), азық-түлік емес тауарларға – 11,7%-ға (аймақ бойынша – 10,9%) және ақылы қызметтерге – 9,0%-ға (аймақ бойынша – 10,1%) өсті.<h2 style="text-align:justify;">Банк секторы&nbsp;</h2>2026 жылдың 1 шілде деңгейіне Қызылорда облысы аумағында 11 екінші деңгейлі банктердің филиалдары және 1 «Қазпошта» АҚ филиалы, 2 уәкілетті ұйым, 5 микроқаржы ұйымдары, 8 несие серіктестігі, 2 ломбард қызмет атқарды.&nbsp; Айырбастау пункттердің жалпы саны – 50, оның 36-і екінші деңгейдегі банк филиалдары, 12 – «Қазпошта» АҚ филиалының және 2 уәкілетті ұйымдардың айырбастау пункттері.<h2 style="text-align:justify;">Банктегі депозиттер</h2>2026 жылдың 1 шілде деңгейіне облыстағы депозиттердің жалпы мөлшері (ағымдағы шоттарды қоспағанда) 2025 жылдың cәйкес кезеңімен салыстырғанда 4,1%-ға өсіп, 463,2 млрд. теңгені құрады. Заңды тұлғалардың салымдары 39,6%-ға азайып, 69,3 млрд. теңгені құрады. Жеке тұлғалардың салымдары 19,3%-ға өсіп, 393,9 млрд. теңгені құрады.&nbsp;Ұлттық валютадағы депозиттер көлемі 16,0%-ға өсіп, 423,5 млрд. теңгені құраса, шетел валютасындағы депозиттердің көлемі 2025 жылдың cәйкес кезеңімен салыстырғанда 50,1%-ға азайып, 39,7 млрд. теңгені құрады. Теңгедегі депозиттер үлесі – 91,4%, шетел валютасындағы депозиттер үлесі – 8,6%.2026 жылдың маусым айында ұлттық валютадағы депозиттердің сыйақы мөлшері – 12,6% (2025 ж. маусым айында – 12,0%), ал шетел валютасындағы депозиттер бойынша – 0,8% (2025 ж. маусым айында – 1,9%) құрады.<h2 style="text-align:justify;">Банк секторының несиелері</h2>2026 жылдың 1 шілде деңгейіне банк секторының жалпы экономиканы несиелеу көлемі (жалпы қарыз) 926,2 млрд. теңгені құрады (2025 жылдың сәйкес кезеңімен салыстырғанда 19,2%-ға өскен). &nbsp;Жеке тұлғалардың несиелері бойынша қарыз 2025 жылдың сәйкес кезеңімен салыстырғанда 18,7%-ға артып, 851,4 млрд.теңгені құрады, заңды тұлғалардың несиелері 25,7%-ға өсіп, 74,8 млрд. теңгені құрады.&nbsp;Қысқа мерзімді несиелердің көлемі 2025 жылдың сәйкес кезеңімен салыстырғанда 12,4%-ға өсіп, 58,8 млрд. теңгені құрады. Ұзақ мерзімді несиелердің көлемі 19,7%-ға артып, 867,4 млрд. теңгеге дейін өсті.Банк секторының тұтынушылық мақсатындағы несиелері бойынша қарыз көлемі 11,5%-ға өсіп, 555,1 млрд.теңгені (жалпы қарыздан үлес салмағы – 59,9%-ды) құрады.&nbsp;Банк секторының ипотекалық несиелері бойынша қарыз 26,0%-ға өсіп, 109,0 млрд. теңгені (жалпы қарыздан үлес салмағы – 11,8%-ды) құрады.2026 жылдың қаңтар-маусым айында банк секторының берілген несие көлемі 373,8 млрд. теңгені құрады (2025 жылдың сәйкес кезеңімен салыстырғанда 2,1%-ға артылған).Шағын кәсіпкерлік субъектілерінің несиелендіру бойынша қарызы 2025 жылдың сәйкес кезеңімен салыстырғанда 35,7%-ға өсіп, 219,0 млрд. теңгені құрады. Жалпы қарыздан үлес салмағы – 23,6%.2026 жылдың қаңтар-маусым айында шағын кәсіпкерлік субъектілеріне берілген несиелер көлемі 95,8 млрд. теңгені құрады. 2025 жылдың сәйкес кезеңімен салыстырғанда бұл көрсеткіш 15,0%-ға өскен.Банк секторының несиелері бойынша мерзімі өткен берешектер 1,7 есеге өсіп, 63,0 млрд. теңгені құрады. Жалпы қарыздан несиелер бойынша мерзімі өткен берешектердің үлесі 6,8%- ды құрады.Тұтынушылық мақсатындағы несиелер бойынша мерзімі өткен берешектер 44,7 млрд. теңгені құрады 1,6 есеге өскен. Мерзімі өткен ипотекалық берешектер 5,0%-ға көбейіп, 0,2 млрд. теңгені құрады. Жалпы мерзімі өткен берешектерден ипотекалық мерзімі өткен берекшектердің үлес салмағы – 0,4%.2026 жылдың маусым айында берілген несиелер бойынша орташа сыйақы мөлшері – 22,0%-ды (2025ж. маусым – 21,0%), шағын кәсіпкерлік субъектілеріне берілген несие бойынша – 26,4%-ды (29,2%), тұтынушылық мақсатында – 21,1%-ды (19,4%), ипотекалық несиеге – 8,9%-ды (8,8%) құрады.&nbsp;<h2 style="text-align:justify;">Нақты шетел валютасының нарығы</h2>2026 жылдың қаңтар-маусым айларында Қызылорда облысы бойынша айырбастау пункттері қолма-қол 45,0 млн. АҚШ долларын сатып, 15,2 млн. АҚШ долларын сатып алды. 2025 жылдың осы кезеңімен салыстырғанда АҚШ долларын сату көлемі 7,5%-ға, АҚШ долларын сатып алу көлемі 19,0%-ға төмендеген.АҚШ долларын сатудың/сатып алудың орташа бағамы 2026 жылдың қаңтар-маусым айларында АҚШ доллары үшін 490,29/483,22 теңгені құрады (2025 жылдың сәйкес кезеңінде – 514,60/507,74 теңге).2025 жылдың тиісті кезеңімен салыстырғанда еуроны сату көлемі 24,0%-ға (1,6 млн. еуроға дейін), сатып алу көлемі 14,4%-ға (517,3 мың. еуроға дейін) төмендеді. Еуроны сатудың/сатып алудың орташа бағамы еуро үшін 568,79/564,48 теңгені құрады (2025 жылдың осы кезеңінде – 560,56/551,29 &nbsp;теңге).Ресей рублін сату бойынша операциялар көлемі 11,9%-ға (104,9 млн. рубльге дейін) төмендеп, сатып алу көлемі 45,4%-ға (437,1 млн. рубльге дейін) өсті. Рубльді сатудың/сатып алудың орташа бағамы 6,50/5,87 теңгені құрады (2025 жылдың осы кезеңінде – 6,16/5,47 теңге).Қытай юандарын сату көлемі 40,3%-ға (142,8 мың юаньға дейін) өсіп, сатып алу көлемі 15,8%-ға (90,6 мың юаньға дейін) төмендеді. Юань сатудың/сатып алудың орташа бағамы 75,83/68,77 теңгені құрады (2025 жылдың осы кезеңінде – 74,32/66,76 теңге).<h2 style="text-align:justify;">Төлем карточкалары&nbsp;</h2>2026 жылдың 1 шілде деңгейіне Қызылорда облысында айналымдағы &nbsp;төлем карточкалары өткен жылдың сәйкес кезеңімен салыстырғанда 8,1%-ға өсіп, 3 220,8 мың бірлікті құрады.Облыс бойынша төлем карточкаларына қызмет көрсету инфрақұрылымы жайлы жалпы көрініс: POS-терминалдар саны – 36 769,0 бірлік (-4,2%), банкоматтар – 432,0 бірлік (+2,6%), кәсіпкерлердің саны – 29 455,0 бірлік &nbsp;(+6,5%). Төлем жүргізу үшін карточкамен қабылдайтын сауда кәсіпорындарының саны 33 734,0 бірлікке дейін артты (+7,5%).&nbsp;2026 жылдың қаңтар-маусым айы бойынша төлем карточкаларын қолдана отырып, қолма-қол ақшасыз төлемдер саны 189 312,9 мың транзакциялардың &nbsp;(2025 жылдың cәйкес кезеңімен салыстырғанда 8,2%-ға өскен) көлемі 1 729,8 &nbsp;млрд. теңгені құрады (4,6%-ға өскен).&nbsp;2026 жылдың қаңтар-маусым айында Қызылорда облысы бойынша қолма-қол ақша алу операциялары 5,6%–ға азайып, 3 823,7 мың транзакцияның көлемін көрсетті. 3,5%–ға азайып, 338,6 млрд.теңгені құрады.Толық мәліметтерді төмендегі телефондар бойынша алуға болады: +7(724) 255 15 22 +7(724) 255 15 23 e-mail: kuz_80@nationalbank.kz

01.07.2026 ж.  жағдайы бойынша Қызылорда облысының қаржы нарығының жағдайы туралы

<a href="https://kyzylorda-news.kz/ru">Kyzylorda-news.kz</a>&nbsp; Қазалы ауданы Руханият орталығында 10 тамыз – Абай күніне орай қазақтың ұлы ақыны, ойшыл, ағартушы, композитор Абай Құнанбайұлының рухани мұрасын ұлықтауға арналған «Хакім Абайдың аманаты» атты әдеби-сазды кеш өтті.Тағылымды іс-шараға аудан әкімі Алмасбек Есмаханов қатысып, ұлы ақынның мұрасын дәріптеудің маңызына тоқталып, көпшілікке ізгі тілегін жеткізді.<img src="https://knadmin.beoblood.kz/uploads/azaly_Abaj_m_rasy_3_b119759cb9.jpg" alt="Қазалы Абай мұрасы 3.jpg"><blockquote>– Абай – қазақ халқының ғана емес, адамзат өркениетінің ой-санасына өзіндік із қалдырған ұлы тұлға. Мемлекет басшысы Қасым-Жомарт Кемелұлы Абайдың мұрасын жоғары бағалап, ұлы ақынды – «Абай – еліміздің ғана мақтанышы емес, әлемдік деңгейдегі ұлы тұлға» деп, халқымыздың мәдениеті мен ұлттық санасының жаңғыруына өлшеусіз үлес қосқан кемеңгер деп атап өткен болатын. Бүгінде ауданымызда Президентіміздің, Үкіметтің және облыс әкімінің қолдауымен мәдениет пен өнерді, әдебиет пен ұлттық құндылықтарды насихаттауға айрықша мән беріліп келеді. Өткен жылы ауданда Сыр өңірінде жарияланған «Руханият жылы» дәл қазір өздеріңізбен бірге тағылымды шара өткізіп жатқан - неке қию залы, кітапхана, музей, архив, жастар сарайы, ардагерлер мен аналар үйі бірліктірілген «Руханият орталығы» ғимараты пайдалануға берілді. Роза Бағланова атындағы 600 орындық аудандық Мәдениет үйі, Кәукей және Майдакөл ауылдарында 100 орындық жаңа ауылдық клубтар салынып, бүгінде тұрғындар жаңа ғимараттардың игілігін көруде. Өткен жылы ұлы ақын Абай Құнанбайұлының 180 жылдық мерейтойы аясында Қазалы ауданында бірқатар ауқымды мәдени іс-шаралар өткізілді. Бүгінгі қазақтың дара тұлғасының туған күніне орай ұйымдастырылып жатқан әдеби-сазды кеш – ұлы ақынның шығармашылығын дәріптеп қана қоймай, оның терең ойларына қайта үңіліп, рухани әлеміне бойлайтын тағылымды басқосу болмақ. Ұлы ақынның мұрасы елді білімге, еңбекке, бірлікке, әділетке бастай берсін! Жастарымыз Абай армандаған білімді, бәсекеге қабілетті, парасатты ұрпақ болып өссін! Еліміздің руханияты асқақтап, ұлттық құндылықтарымыз ұлықтала берсін, - деді аудан әкімі Алмасбек Әбілқасымұлы.</blockquote>Кеш барысында көрермен назарына Абай Құнанбайұлының өмірі мен шығармашылығын арқау еткен бейнеролик ұсынылып, ақынның өмірлік ұстанымы мен ұрпаққа қалдырған аманаты сахналық көрініс арқылы әсерлі жеткізілді.Әдеби-сазды кеште Абайдың қара сөздерінен үзінділер оқылып, ақынның адамгершілік, білім, еңбек, талап, бірлік пен елдік туралы терең ойлары кеңінен насихатталды. Жас ақындар мен оқушылар хакімнің тағылымды сөздерін көрерменге жеткізді.<img src="https://knadmin.beoblood.kz/uploads/azaly_Abaj_m_rasy_4_8c23358872.jpg" alt="Қазалы Абай мұрасы 4.jpg">Сондай-ақ кеш барысында Абайдың қазақ музыка өнеріне қосқан өлшеусіз үлесін айшықтайтын «Көзімнің қарасы», «Желсіз түнде жарық ай», «Айттым сәлем, Қаламқас», «Бойы бұлғаң» сынды әндері орындалып, ақынның сырлы да сазды мұрасы дәріптелді.Кештің мазмұнын Абай поэзиясындағы махаббат, адамгершілік пен адалдық тақырыптарына арналған жастар диалогы толықтыра түсті. Жастардың өзара сұхбаты арқылы ақынның «Махаббатсыз дүние бос» деген тағылымды ойының бүгінгі қоғам үшін де мәні зор екені көрсетілді.Іс-шара басталмас бұрын шараға жиылған қонақтар Абайдың рухани әлемін танытатын ерекше көрмелермен, ұлы ақынның рухани мол мұрасымен танысты.&nbsp;

Абай мұрасын ұлықтауға арналған әдеби-сазды кеш өтті

<a href="https://kyzylorda-news.kz/ru">Kyzylorda-news.kz</a> Жеке куәлік пен төлқұжат алу – қазақстандықтар арасында сұранысқа ие мемлекеттік қызметтердің бірі. Жыл сайын миллиондаған азамат осы құжаттарды рәсімдеу үшін ХҚКО-ларға жүгінеді. Қызметті тез әрі еш қиындықсыз алу үшін рәсімдеу тәртібін алдын ала білген жөн.2026 жылдың бірінші жартыжылдығында қазақстандықтарға 1,5 миллионнан астам жеке куәлік пен төлқұжат берілді. Ең жоғары сұраныс дәстүрлі түрде демалыс пен саяхат маусымына тұспа-тұс келіп, маусым айында 269 мыңнан астам құжат рәсімделді. Төлқұжат пен жеке куәлікті ХҚКО-да тез әрі ыңғайлы рәсімдеу үшін нені білу қажет?Төлқұжат рәсімдеуТөлқұжатты тіркелген жеріңізге қарамастан, Қазақстанның кез келген ХҚКО-сында рәсімдеуге болады, өйткені қызмет экстерриториялық қағидат бойынша көрсетіледі.Төлқұжатты алғаш рет алу үшін жеке куәлікті ұсыну жеткілікті. Егер төлқұжаттың жарамдылық мерзімі аяқталуға жақын болса, оны алдын ала ауыстырған жөн. Бұл ретте төлқұжатты уақытында ауыстырмағаны немесе оның жарамдылық мерзімі өтіп кеткені үшін айыппұл қарастырылмаған. Қызметті оператор арқылы немесе құжаттандыру терминалы арқылы алуға болады.Төлқұжат рәсімдеу кезінде кәмелетке толған азаматтар 36 немесе 48 беттен тұратын төлқұжатты таңдай алады. 36 беттік төлқұжат үшін мемлекеттік баж – 34 600 теңге, ал 48 беттік төлқұжат үшін – 51 900 теңге. 16 жасқа дейінгі балаларға арналған 24 беттік төлқұжаттың құны – 17 300 теңге.Төлқұжатты дайындаудың стандартты мерзімі – 15 жұмыс күні. Қажет болған жағдайда жеделдетілген рәсімдеу қызметін пайдалануға болады. Астана, Алматы, Шымкент және Ақтөбе қалаларында төлқұжатты 1, 3 немесе 7 жұмыс күні ішінде жедел рәсімдеу мүмкіндігі бар. Облыс орталықтарында жедел рәсімдеу мерзімі 3 жұмыс күні, ал аудандар мен облыстық маңызы бар қалаларда 7 жұмыс күнін құрайды. Өтініш берілген күн мемлекеттік қызмет көрсету мерзіміне кірмейді.Жеделдетілген рәсімдеу қызметі қолданыстағы тарифтерге сәйкес қосымша ақыға көрсетіледі. Балаға төлқұжат рәсімдеу үшін оның туу туралы куәлігі, ата-анасының бірінің жеке куәлігі және мемлекеттік баждың төленгенін растайтын құжат қажет. Өтініш берген кезде ата-анасының бірінің қатысуы міндетті.Жеке куәлік рәсімдеуҚазақстан Республикасы азаматының жеке куәлігі 16 жасқа толған кезде рәсімделеді. Жеке куәлікті алғаш рет алған кезде және оның қолданылу мерзімі аяқталғаннан кейін ауыстырған жағдайда мемлекеттік баж алынбайды. Ал құжат жоғалған жағдайда мемлекеттік баж мөлшері 865 теңгені құрайды.Қажет болған жағдайда жеке куәлікті де жеделдетілген тәртіппен рәсімдеуге болады. Ол үшін қолданыстағы жеделдік санаттарының бірін таңдауға болады.

Қазақстандықтар ХҚКО-ларда 1,5 миллионнан астам төлқұжат пен жеке куәлік рәсімдеді

<a href="https://kyzylorda-news.kz/ru">Kyzylorda-news.kz</a> Биыл қазақтың ұлы ақыны, ағартушысы, философы және композиторы Абай Құнанбайұлының туғанына 181 жыл толды. Атаулы күнге орай Қызылорда қаласындағы Абай атындағы үш тілде оқытатын дарынды балаларға арналған мамандандырылған сыныптары бар мектеп алаңында ұлы ойшыл, кемеңгер ақын Абай Құнанбайұлының ескерткішіне гүл шоқтарын қою рәсімі өтті.Руханиятқа тағзым еткен шараға облыс басшылығы, мемлекет және қоғам қайраткерлері, зиялы қауым өкілдері, ұстаздар, жастар мен қала тұрғындары қатысты.Облыс әкімінің орынбасары Қайрат Нұртай өз сөзінде Абай мұрасының ұлттық руханияттағы маңызын атап өтіп, ұлы ақынның шығармалары жас ұрпақты білімге, еңбекке және адамгершілікке үндейтінін жеткізді.<blockquote>– Абай – қазақтың рухани әлемін жаңа деңгейге көтерген, білім мен ғылымды, еңбек пен адамгершілікті, ел бірлігі мен жауапкершілікті басты құндылық ретінде дәріптеген ұлы тұлға. Ақын өз дәуіріндегі қоғамның кемшіліктерін сынға алып қана қоймай, одан шығудың жолын да көрсетті, халықты білім алуға, ғылым үйренуге, еңбек етуге және өзін-өзі жетілдіруге шақырды. Бүгінде Абайдың осы тағылымды ойлары өзектілігін жоғалтпай, әсіресе жас ұрпақ үшін маңызды рухани бағдар болып отыр. «Ғылым таппай мақтанба» деген ақын өсиеті білімді, саналы әрі ел болашағына жауапкершілікпен қарайтын ұрпақ тәрбиелеудің маңызын айқындайды. Абайды ұлықтау - өткенге тағзым ету ғана емес, оның өнегесін бүгінгі күнмен сабақтастырып, болашақ ұрпаққа жеткізу, – деді Қайрат Ырзақұлұлы.</blockquote>Сонымен қатар, мемлекет және қоғам қайраткері Мұрат Бақтиярұлы Абайдың қазақ әдебиеті мен қоғамдық ойдағы айрықша орнына тоқталып, ақын мұрасын дәріптеу мен кейінгі ұрпаққа жеткізудің маңызын атап өтті.<blockquote>– Соңғы үш жыл көлемінде Абай күні барлық мектептерде, білім беру ұйымдарында және түрлі мекемелерде кеңінен атап өтіліп келеді. Абайдың осыдан 150 жыл бұрын айтып кеткен тағылымы мен өсиеттері бүгінгі күнге дейін өзектілігін жоғалтқан жоқ. Керісінше, уақыт өткен сайын оның ойларының мәні тереңдеп, маңызы артып, мәңгілік құндылыққа айналып келеді. Мен Абай мұрасындағы екі мәселеге ерекше тоқталғым келеді. Біріншісі – Абай тек қазақ ұлтының мәселесін ғана емес, жалпы адамзатқа ортақ мәселелерді көтерді. «Адамзаттың бәрін сүй бауырым деп» деген сөзі - соның айқын дәлелі. Адамзатты сүю, барша адамға құрметпен қарау, бірлік пен ізгілікті дәріптеу – Абай шығармашылығының негізгі өзегінің бірі. Екіншісі – Абайдың «толық адам» мәселесін көтеруі. Ұлы ойшыл өзінің қара сөздерінде бұл ұғымға бірнеше рет тоқталады. Бүгінде «толық адам» тұжырымдамасының маңызы артып отыр. Оны Мемлекет басшысы да өз сөздерінде атап өтіп, толық адамға ұмтылудың қажеттігін айтып келеді. Ал толық адам дегеніміз тек материалдық тұрғыдан қамтамасыз болған адам емес. Ол – рухани жағынан кемелденген, білім мен ғылымды меңгерген, әдеп пен иманды, адамгершілік пен ар-ұятты бойына сіңірген тұлға. Абай да адам бойындағы осы қасиеттердің тұтастығын жоғары бағалаған. Ұлы ақын бірінші орынға еңбекті, білім мен ғылымды қойды. Бұл құндылықтар бүгінгі қоғам үшін де аса маңызды. Сондықтан Абайдың сөзі де, өлеңі де, қара сөздері де ешқашан өзектілігін жоғалтпайды. Оның мұрасы - ұлт үшін мәңгілік рухани қазына. Сондықтан біз Абайдың осы тағылымын кейінгі ұрпаққа жеткізіп, оның шығармаларын кеңінен насихаттап жүруіміз керек. Өйткені Абайды насихаттау - ұлы ақынның есімін ұлықтау ғана емес, оның адамдық, білім мен ғылым, еңбек және ізгілік туралы өсиеттерін қоғам өмірінде жалғастыру, – деді Мұрат Бақтиярұлы.</blockquote>Гүл қою рәсімі ұлы ақынның шығармашылығын өнер арқылы дәріптеумен жалғасты. Шара барысында Абайдың «Желсіз түнде жарық-ай», «Өзгеге көңілім тоярсың» әндері орындалып, ақынның қара сөздерінен үзінділер оқылды.Әсіресе жас өрендердің Абай шығармаларын мәнерлеп оқуы шараның мазмұнын тереңдете түсті. Жас буынның орындауындағы әрбір өлең мен тағылымды сөз - ұлы ақын мұрасының бүгінгі ұрпақ санасында жаңғырып, рухани сабақтастықтың жалғасып келе жатқанының көрінісі.<img src="https://knadmin.beoblood.kz/uploads/Abaj_eskertkishine_g_l_oyu_2_cc6abef90d.jpg" alt="Абай ескерткішіне гүл қою 2.jpg">

Кемеңгер ақын Абай Құнанбайұлының ескерткішіне гүл шоқтарын қою рәсімі өтті

<a href="https://kyzylorda-news.kz/ru">Kyzylorda-news.kz</a> Бүгін облыс әкімі Мұрат Ергешбаев, қала әкімі Нұржан Ахатов және жауапты сала басшылары Қызылорда қаласындағы нысандарды аралап, арық жүйелеріне су жеткізу, тазалау және абаттандыру жұмыстарын тексерді.Алдымен М.Шоқай, Ж.Абдрахманов көшелері мен Б.Шөкенов атындағы саябаққа барды. Бүгінде қала аумағында жалпы ұзындығы 98,6 шақырым 68 көшеде арық жүйесі бар, 4,4 шақырымға созылған үш көшеге ірі лоток, 68,6 шақырымдық 39 көшеге кіші лоток орнатылған.Арық жүйелерін күтіп ұстау және қалпына келтіруге «Қызылорда тазалығы» мекемесінің жұмысшы тобы жұмылдырылған. Мамандар бекітілген жұмысты тұрақты жүргізуде. Алдағы жоспар бойынша Қызылжарма каналы қайта жаңғыртылғаннан кейін насос қондырғыларын орнатып, бірқатар аумаққа аяқсу беру жоспарланған.Бұдан бөлек, Әйтеке би және Қазыбек би көшелеріндегі аяқсу жүйесін қалпына келтіру, насос &nbsp;арқылы су айналымын қамтамасыз ету көзделген. Сондай-ақ &nbsp;Бейбарыс сұлтан көшесі мен Н.Назарбаев даңғылынан М.Шоқай көшесіне дейінгі аралықтағы арық қалпына келтіріліп, аяқсу жүйесіне қосылады.М.Шоқай, Е.Көшербаев және Жеңіс көшелерін аяқсумен қамтамасыз ету бағытында да тиісті жұмыстар қолға алынған. &nbsp; Жауапты сала мамандары жұмысты белгіленген мерзімде, талапқа сай, сапалы етіп аяқтап, қаладағы аяқсумен қамту мәселесін тұрақты бақылауы керек.&nbsp;Бұдан кейін аймақ басшысы тұрғындар жиі бас қосатын теміржол саябағына барды. Ондағы тазалық, абаттандыру және көгалдандыру жұмыстарын тексеріп, нақты тапсырмалар берді.&nbsp;

Арық жүйелеріне аяқсу жеткізу жұмыстары тексерілді

<a href="https://kyzylorda-news.kz/ru">Kyzylorda-news.kz</a> &nbsp;Қызылордадағы жаңа газ жылу электр станциясы 500 млн кВт·сағат электр энергиясын өндірді, – деп хабарлайды <a href="https://kaz.inform.kz/news/kizilordadagi-zhana-elektr-stantsiyasi-500-mln-kvtsagat-energiya-ondrd-38d8317d">Қазақпарат.</a>Қызылордада іске қосылған қуаты 240 МВт жаңа бу-газ қондырғысы Қазақстанның Бірыңғай электр энергетикалық жүйесіне қосқан үлесін ұлғайтуда. Станция іске қосылғаннан бері шамамен 500 млн кВт·сағат электр энергиясын өндіріп, тұтынушыларды электр энергиясымен сенімді қамтамасыз етуге өз үлесін қосып келеді.Бұл көлем 130 мың пәтерді бір жыл бойы электр энергиясымен қамтамасыз етуге немесе халқы 400 мыңнан астам адамды құрайтын қаланың бір жылдық электр энергиясына деген қажеттілігін өтеуге жеткілікті.Биыл Қазақстанда жалпы қуаты 2,6 ГВт жаңа генерация көздерін іске қосу жоспарланып отыр. Атап айтқанда, 4 газ электр станциясы пайдалануға беріледі, сондай-ақ екі электр станциясын кеңейту жоспарланған. Бұдан бөлек, жаңартылатын энергия көздерінің 10 жаңа нысаны іске қосылады.Бұл жобаларды іске асыру 2027 жылдың бірінші тоқсанында елдегі электр энергиясы тапшылығы мәселесін шешуге, ал 2029 жылға қарай электр энергиясының тұрақты профицитіне шығуға мүмкіндік береді.Сурет: Энергетика министрлігі

Қызылордадағы жаңа электр станциясы 500 млн кВт·сағат энергия өндірді

<a href="https://kyzylorda-news.kz/ru">Kyzylorda-news.kz</a> &nbsp;Мемлекет басшысы Қасым-Жомарт Тоқаев қазақстандықтарды Абай күнімен құттықтады, – деп хабарлайды <a href="https://kaz.inform.kz/news/kasim-zhomart-tokaev-el-halkin-abay-kunmen-kuttiktadi-dc517aa9">Қазақпарат.</a>Президент құттықтауында ұлы ойшылдың шығармашылық және зияткерлік мұрасы әлемдік әрі ұлттық мәдениеттің асыл қазынасында айрықша орын алатынын атап өтті.<blockquote>—&nbsp;Абай ілімі&nbsp;— рухани шамшырағымыз, айнымас темірқазығымыз. Ақын жұртшылықты толғандыратын көкейкесті мәселелерді бүкпесіз айтып, халқымызды бейқамдық пен жалқаулықтан аулақ болуға шақырды. Хакімнің «Толық адам» идеясы&nbsp;— әрбір азаматты рухани кемелденуге үндейтін және ешқашан өзектілігін жоғалтпайтын мазмұны терең тұжырым,&nbsp;— деді Тоқаев.</blockquote>Мемлекет басшысы биылғы Абай күні елімізде жүргізіліп жатқан ауқымды өзгерістермен тұспа-тұс келіп отырғанын айтты.<blockquote>—&nbsp;Қазақстанның Халық Конституциясы заңды күшіне еніп, биліктің барлық институттарын түбегейлі жаңғырту үдерісі басталды. Бұл&nbsp;— шын мәнінде, ұзақ мерзімге арналған даму бағдарымызды айқындайтын ерекше кезең. Көп ұзамай ел&nbsp;тарихында алғаш рет Құрылтай сайлауы өтеді. Бір палаталы Парламент реформаларды сапалы әрі тиімді жүзеге асыруға тың серпін беретіні сөзсіз&nbsp;— деді ол.</blockquote>Тоқаевтың айтуынша, жүргізіліп жатқан өзгерістердің түпкі мәні&nbsp;— жасампаздық құндылықтарын азаматтардың санасына сіңіріп, Қазақстанның тың қарқынмен дамуына жол ашу.<blockquote>—&nbsp;Біз қоғамда жаңа этиканы қалыптастыру, ұлттық бірегейлікті нығайту және гуманистік идеалдарды дәріптеу барысында әрдайым Абайға жүгінеміз. Ұлы ақын халықтың болашағы үшін білімпаздық, еңбекқорлық, жауапкершілік сынды қасиеттер өте маңызды екенін ұғындырды, көрегендік танытып, жұртты бірлік пен келісімді сақтауға шақырды,&nbsp;— деді Мемлекет басшысы.</blockquote>Президент Абай қара сөздерінің тағылымы қазіргі Қазақстанның құндылықтарымен толық үндесетінін атап өтті.<blockquote>—&nbsp;«Адал Азамат», «Таза Қазақстан», «Заң мен Тәртіп» тұғырнамалық идеялары&nbsp;— Абай армандаған берекелі қоғамның берік негізі. Сондықтан, біз Әділетті, Озық әрі Қуатты Қазақстанды құрып жатырмыз,&nbsp;— деді ол.</blockquote>Мемлекет басшысы ұлы ойшылдың мол мұрасы алдағы уақытта да&nbsp;өскелең ұрпақты шынайы отаншылдық пен туған елге сүйіспеншілік рухында тәрбиелеу ісінде рухани азық болатынына сенім білдірді.Сурет: Ақорда

Қасым-Жомарт Тоқаев ел халқын Абай күнімен құттықтады

<a href="https://kyzylorda-news.kz/ru">Kyzylorda-news.kz</a> Қорқыт ата атындағы Қызылорда университетінің ғалымдары қойдың құйрық майынан ылғалдандырғыш крем әзірлеп, ғылыми жетістікке патент алды, – деп хабарлайды <a href="https://kaz.inform.kz/news/kizilordalik-galimdar-koydin-kuyrik-mayinan-ilgaldandirgish-krem-azrled-fb4de598">Қазақпарат.</a>Бұл&nbsp;— университеттің Толыбек Қуанышбаев атындағы химия-биологиялық зерттеу ғылыми-білім беру орталығының қолданбалы ғылыми зерттеуі нәтижесінде жасалған алғашқы табиғи органикалық өнім.Зерттеуге орталықтың бас ғылыми қызметкері, химия ғылымдарының кандидаты Гүлмира Абызбекова, аға ғылыми қызметкерлер, химия ғылымдарының кандидаты Гүлжан Балықбаева, биология ғылымдарының кандидаты Райхан Жандәулетова, техника ғылымдарының кандидаты Шолпан Еспенбетова және Анипа Тапалова, педагогика ғылымдарының кандидаты Карима Арынова, жас зерттеуші, 4-курс студенті Аружан Талғатова қатысты.&nbsp;Сыр өңірінің континентальды климаты мен экологиялық факторлары теріні тез құрғатып жіберетіні белгілі. Ғалымдар тобы осы мәселені табиғи жолмен шешуді көздеген.&nbsp;<blockquote>—&nbsp;Кремге тек 5 табиғи компонент кіреді. Қойдың құйрық майы құрамындағы табиғи май қышқылы мен стерин терінің ең терең жасушалық қабаттарына өтіп, су-тұз балансын қалпына келтіретіні дәлелденген. Ол&nbsp;теріні ылғалдандырып қана қоймай, басқа да&nbsp;пайдалы заттарды терінің ішкі қабатына өткізу қабілетіне&nbsp;ие. Жасушалардың жаңаруын тездетеді. Жүзім тұқымының майы&nbsp;— теріні қоректендіріп, жараны жазатын антиоксидант. Ара балауызы кремнің жұмсақ құрылымын түзіп, теріні сыртқы жел мен суықтан қорғайды. Жалбыз және лаванда эфир майы&nbsp;— табиғи антисептик, қабынуды басады, хош иіс береді және бұлшықетті босаңсытады. Басқа кремдерде синтетикалық консервант, спирт немесе артық дәрумендер болуы мүмкін. Бұл кейде теріні тітіркендіріп, дәруменді шамадан тыс көбейтеді. Біздің өнім толық органикалық, химиялық қоспа немесе спирт қосылмаған,&nbsp;— деді Гүлмира Абызбекова.&nbsp;</blockquote><img class="image_resized" style="width:100%;" src="https://knadmin.beoblood.kz/uploads/G_lmira_Abyzbekova_529daa5075.jpg" alt="Гүлмира Абызбекова.jpg">Өнімнің қауіпсіздігі Алматы қаласындағы сынақ орталығының аккредиттелген зертханасында арнайы сараптамадан өтті. Құрамынан мышьяк, сынап, қорғасын сияқты улы заттар, микроорганизмдер мен бактериялар табылмады. «Теріні тітіркендірмейді, аллергия тудырмайды, pH&nbsp;көрсеткіші (6,1) терінің табиғи ортасына толық сәйкес келеді» деп қорытынды берілген.&nbsp;Патент авторы тоң майдың неліктен косметика өндірісінде кеңінен қолданылмай келе жатқанын түсіндірді.&nbsp;<blockquote>—&nbsp;Оның өзіне тән ерекше иісі мен тығыз, ауыр текстурасы&nbsp;бар. Дұрыс өңделмесе, теріге баяу сіңіп, майлы жылтыр із қалдырады. Біздің ғалымдар құйрық майын жүзім тұқымы және эфир майларымен дәл пропорцияда синергиялық түрде біріктіру арқылы жағымсыз иісті кетіріп, жұмсақ, жағымды әрі жылдам сіңетін заманауи консистенция алды. Шетелдік тұтынушылар үшін жануар майы негізіндегі косметика таңсық болуы мүмкін. Өйткені батыс елдерінде вегандық косметика тренді қатты дамыған. Халықаралық нарыққа шығу үшін өнімнің табиғилығын, қауіпсіздігін халықаралық ISO және ECO-сертификаттармен дәлелдеп, сауатты маркетинг әдісімен түсіндіру қажет. Сондықтан өнімнің эко-тазалығын ғылыми ағартушылық жолмен түсіндіру керек,&nbsp;— деді ғалым.&nbsp;</blockquote>Патент алу&nbsp;— ғылыми идеяның жұмыс істейтінін және оның жаңа екенін дәлелдеудің бастапқы кезеңі. Ғалымдар алдағы уақытта кремді өндіріске енгізіп, ел&nbsp;игілігіне ұсынуды көздеп отыр.&nbsp;Жуырда астаналық оқушы Зайна Жүсіпбекова түйежапырақ пен қалақайдан толық ыдырайтын экологиялық қағаз жасау жобасын әзірлеп, «Қазпатенттен» екі патент алған еді.Сурет: Гүлмира Абызбекованың жеке мұрағатынан

Қызылордалық ғалымдар қойдың құйрық майынан ылғалдандырғыш крем жасады

<a href="https://kyzylorda-news.kz/ru">Kyzylorda-news.kz</a> «Заң мен тәртіп» идеологиясын ілгерілету, азаматтардың құқықтық сауаттылығын арттыру және интернет кеңістігіндегі алаяқтықтың алдын алу мақсатында Қызылорда облысы Полиция департаментінің қызметкерлері өңірге танымал блогер Ерсұлтан Байжановпен бірлесіп, ақпараттық-түсіндіру жұмыстарын жүргізді.Іс-шара барысында полиция қызметкерлері мен блогер халық көп шоғырланатын орындарда тұрғындармен кездесіп, интернет алаяқтарының кең таралған тәсілдері туралы түсіндірді. Сондай-ақ азаматтарға жеке және банктік деректерді қорғау, күмәнді сілтемелерге өтпеу, бейтаныс нөмірлерден келетін қоңырауларға сақтықпен қарау және алаяқтардың арбауына түспеу жолдары жөнінде кеңестер берілді.<img src="https://knadmin.beoblood.kz/uploads/Whats_App_Image_2026_08_10_at_09_51_17_598f761a98.jpeg" alt="Заң мен тәртіп.jpeg">Тұрғындарға интернеттегі қауіпсіздік ережелері көрсетілген ақпараттық парақшалар таратылды. Сонымен қатар азаматтардың назарын аудару мақсатында интернет алаяқтықтың алдын алуға бағытталған арнайы бейнеДроппер – өзінің банк картасын, шотын немесе өзге де төлем құралдарын үшінші тұлғаларға беріп, заңсыз ақша аударымдарын жүзеге асыруға мүмкіндік беретін адам. Алаяқтар мұндай шоттарды жәбірленушілерден түскен қаражатты басқа шоттарға аудару немесе қолма-қол ақшаға айналдыру үшін пайдалануы мүмкін.Полиция азаматтарды өздерінің банк карталарын, шоттарын және банк қосымшаларына қатысты деректерді бөгде адамдарға бермеуге шақырады. Күмәнді ұсыныстарға сенбей, кез келген қаржылық операцияға барынша сақтықпен қарау қажет. Полиция интернет алаяқтықтың алдын алу бағытындағы түсіндіру жұмыстарын тұрақты түрде жалғастырады.<img src="https://knadmin.beoblood.kz/uploads/Whats_App_Image_2026_08_10_at_09_51_17_1_0989fc4b36.jpeg" alt="Заң мен тәртіп.jpeg">

Қызылорда облысында интернет алаяқтықтың алдын алуға бағытталған ақпараттық-түсіндіру іс-шарасы өтті

<a href="https://kyzylorda-news.kz/ru">Kyzylorda-news.kz</a> «12 тамыз – Халықаралық жастар күні» онкүндігі аясында Қызылорда қаласындағы Президент паркінің амфитеатрында «Жастар және заң мен тәртіп» тақырыбында облыстық «Жайдарман» ойындары ұйымдастырылды.Іс-шараның негізгі мақсаты – Мемлекет басшысының «Заң мен тәртіп» қағидатын қоғамда кеңінен насихаттау, жастардың құқықтық сауаттылығы мен мәдениетін арттыру, заңға құрметпен қарау және азаматтық жауапкершілік құндылықтарын қалыптастыру.Сайысқа Қызылорда қаласы мен облыс аудандарынан жас жайдарманшылар қатысып, қоғамдағы өзекті мәселелерді әзіл мен ұтқыр ой арқылы жеткізді. Қатысушылар өз қойылымдарында заң талаптарын сақтау, қоғамдық тәртіп, жауапкершілік, құқықтық мәдениет және азаматтық белсенділік тақырыптарын кеңінен қамтыды.Іс-шара барысында облыстық қоғамдық даму басқармасының басшысы Руслан Каюпов жастарға бағытталған мұндай бастамалардың тәрбиелік және қоғамдық маңызына тоқталды.<blockquote>– Заң мен тәртіп – орнықты қоғамның негізгі тірегі. Құқықтық мәдениет тек заң талаптарын білу немесе оны орындаумен шектелмейді. Ол – әр азаматтың өз құқығы мен міндетін терең түсінуінен, қоғамдық ортадағы жауапкершілігін сезінуінен басталады. Әсіресе, елдің ертеңін қалыптастыратын жастардың бойында осы құндылықтардың берік орнығуы аса маңызды. Бүгінгі «Жайдарман» ойыны – жастардың шығармашылық әлеуетін танытумен қатар, қоғамдағы өзекті мәселелерді ашық көтерудің, азаматтық ұстанымды әзіл арқылы жеткізудің тиімді алаңы. Жастардың құқықтық сауаты жоғары, ойы сергек, жауапкершілігі мол болған сайын қоғам да соғұрлым берік болады. Сондықтан «Заң мен тәртіп» қағидаты күнделікті өмір салтына айналуы тиіс, – деді Руслан Мұхамедәліұлы.</blockquote>Ойын барысында командалар сахналық қойылымдар арқылы құқық бұзушылықтың алдын алу, қоғамдық тәртіпті сақтау, заң талаптарына құрметпен қарау және азаматтық жауапкершілікті арттыру мәселелерін көрермен назарына ұсынды.Айта кету қажет, биылғы Халықаралық жастар күніне арналған мерекелік шаралар Қазақстан Республикасы Конституциясының күшіне енуі және алда өтетін Құрылтай депутаттарының сайлауы аясында өткізілуде. 10–12 тамыз аралығында республика көлемінде «Жастармен бірге!» акциясы ұйымдастырылып, оның басты іс-шарасы Астанадағы «Jastar Fest» республикалық жастар фестивалі болмақ.Сонымен қатар, өңірімізде Абай күніне арналған әдеби кештер, кітап оқу мәдениетін насихаттайтын «Оқы. Ойлан. Өзгер.» акциясы, «100 минут оқу» челленджі, жастардың цифрлық сауаттылығын арттыруға арналған кездесулер, сондай-ақ экологиялық және волонтерлік акциялар өткізіледі. Сондай-ақ, жастарға білім алу, жұмысқа орналасу, кәсіпкерлік пен мемлекеттік қолдау тетіктері бойынша кеңес беретін бірыңғай жастар алаңдары жұмыс істейді.

«Жастар және заң мен тәртіп» атты облыстық жайдарман ойындары өтті

<a href="https://kyzylorda-news.kz/ru">Kyzylorda-news.kz</a> Шиелі ауданы орталығында әр аптаның жұмасы дәстүрге айналған, ауыл жастарының шығармашылығын қолдау, ұлттық құндылықтар мен мәдени мұраны дәріптеуге бағытталған «Ауыл Vibe, Retro Night» байқауы өз жалғасын тапты.Мерекелік шараға аудан әкімінің орынбасары Болатбек Ысмағұлов қатысып, қатысушылар мен көрермендерді құттықтады. Болатбек Ысмағұлов сөзінде мұндай жобалардың ауыл жастарының шығармашылық әлеуетін дамытуға, ұлттық өнерді насихаттауға және ауылдық округтер арасындағы мәдени байланысты нығайтуға зор ықпал ететінін атап өтіп, барлық қатысушыларға сәттілік тіледі.<img src="https://knadmin.beoblood.kz/uploads/Shieli_audany_baj_au_2_0d12679eb3.jpg" alt="Шиелі ауданы байқау 2.jpg">Бүгінгі байқауда Қоғалы және Талаптан ауылдық округтерінің өнерпаздары сахна төрінде өз өнерлерін паш етті. Олар туған өлкенің тарихы мен мәдениетін, ұлттық салт-дәстүрлері мен шығармашылық әлеуетін әсерлі қойылымдар арқылы көрермен назарына ұсынды. Кеш барысында ретро әндерден құралған концерттік бағдарлама, заманауи музыкалық қойылымдар мен түрлі шығармашылық нөмірлер көпшілікке көтеріңкі көңіл күй сыйлап, ерекше әсер қалдырды.Байқаудың басты мақсаты - тұрғындардың бос уақытын тиімді ұйымдастыру, жастардың қоғамдық белсенділігін арттыру, ауылдардың мәдени әлеуетін кеңінен таныту, сондай-ақ ретро әндерді жаңғыртып, оларды заманауи технологиялар мен жасанды интеллект мүмкіндіктері арқылы жаңа форматта көпшілікке ұсыну.Сонымен қатар, жоба Мемлекет басшысы Қасым-Жомарт Кемелұлы Тоқаевтың цифрландыру мен жасанды интеллект технологияларын дамыту жөніндегі бастамаларын қолдай отырып, мәдениет пен өнер саласында инновациялық технологияларды тиімді пайдаланудың маңызын айқындай түседі.<img src="https://knadmin.beoblood.kz/uploads/Shieli_audany_baj_au_3_0263834c9f.jpg" alt="Шиелі ауданы байқау 3.jpg">

Шиеліде «АУЫЛ VIBE, RETRO NIGHT» байқауы өтті

<a href="https://kyzylorda-news.kz/ru">Kyzylorda-news.kz</a> &nbsp;Қызылорда облысында ауыл тұрғындарын жайылыммен қамтамасыз ету және пайдаланылмай жатқан ауыл шаруашылығы жерлерін қайта айналымға енгізу бағытында жүйелі жұмыстар жүргізілуде. Бұл Мемлекет басшысының жер ресурстарын тиімді пайдалану және елді мекендердің жайылым қажеттілігін қамтамасыз ету жөніндегі тапсырмаларын орындауға бағытталған.Қызылорда облысындағы 146 ауылдық округтің 97-сі бүгінгі таңда жайылыммен толық қамтамасыз етілген. Жалпы өзіндік қосалқы шаруашылықтардағы 153,8 мың шартты мал басына 1 966,5 мың гектар жайылым қажет. Қазіргі таңда оның 1 534,9 мың гектары немесе 78 пайызы қамтамасыз етілген. Бұл туралы Өңірлік коммуникациялар қызметінің ақпарат алаңында Қызылорда облысының ауыл шаруашылығы және жер қатынастары басқармасының басшысы Талғат Дүйсебаев мәлімдеді.&nbsp;Сонымен қатар елді мекендер маңындағы 98,5 мың гектар жер 19 елді мекеннің жайылымдық қажеттілігіне белгіленді. Бұл ауыл тұрғындарының мал жаю мүмкіндігін кеңейтіп, жайылым тапшылығын кезең-кезеңімен азайтуға мүмкіндік береді.<blockquote>- Жер қорын тиімді пайдаланудың тағы бір маңызды бағыты игерілмей жатқан ауыл шаруашылығы алқаптарын мемлекет меншігіне қайтару. 2026 жылы облыс бойынша 30 мың гектар пайдаланылмай жатқан немесе заң талаптарын бұза отырып пайдаланылған жерді қайтару жоспарланған болатын. Бүгінде бұл көрсеткіш артығымен орындалып, мемлекет меншігіне 35,9 мың гектар жер қайтарылды. Қайтарылған жерлерді ауыл шаруашылығы айналымына енгізу жұмыстары да қарқынды жүргізілуде. 2022-2025 жылдары мемлекетке қайтарылған 504,6 мың гектар жердің барлығы қайта айналымға енгізілді, - деді Талғат Тұрсынұлы.</blockquote>Биыл ауыл шаруашылығы айналымына қосымша 70 мың гектар жер енгізу жоспарланған. Қазіргі таңда оның 8,7 мың гектары игеріліп, айналымға алынды.<blockquote>- Жер ауыл шаруашылығының негізгі өндірістік ресурсы. Сондықтан пайдаланылмай жатқан алқаптарды мемлекет меншігіне қайтарумен қатар, оларды нақты ауыл шаруашылығы айналымына енгізуге басымдық беріп отырмыз. Бұл жерді тиімді пайдаланып, ауыл шаруашылығы өндірісінің көлемін арттыруға мүмкіндік беретін маңызды қадам. Сонымен бірге елді мекендердің жайылым қажеттілігін өтеу мәселесі де тұрақты бақылауда. Алдағы уақытта да жайылымдық жерлерді тиімді басқару, пайдаланылмай жатқан алқаптарды айналымға тарту және ауыл шаруашылығы мақсатындағы жерлерді ұтымды пайдалану бағытындағы жұмыстар жалғаса береді, – деді басқарма басшысы.</blockquote>

Қазақстан және Қызылорда облысының жаңалықтары

01.07.2026 ж. жағдайы бойынша Қызылорда облысының қаржы нарығының жағдайы туралы