<a href="https://kyzylorda-news.kz/">Kyzylorda-news.kz.</a> Оқу жылы аяқталған соң орта білім беру ұйымдарының базаларында 26 мамыр мен 17 маусым аралығында 1-8, 10 сыныптағы білім алушылар үшін жазғы мектеп жұмыс істейтін болады. Бұл туралы брифингте облыстық білім басқармасының басшысы Ақзира Қасымова мәлімдеді.
Жазғы мектеп жұмысында үлгерімі төмен білім алушыларға күрделі пәндерді игеруіне айрықша басымдық берілетін болады және бұл кезеңде үй тапсырмасы берілмейді. Сонымен қатар білім алушылар үшін еркін киім үлгісін киюге рұқсат беріледі. Оқыту процесін жүргізу үшін волонтерларды немесе студенттерді тартуға да болады.
<blockquote>
 «ҚР Білім және ғылым министрлігінің 2021 жылғы 26 мамырдағы №240 бұйрығына сәйкес, жазғы мектепті ұйымдастыру жөніндегі әдістемелік ұсынымдар барлық білім беру ұйымдарына бүгінде жолданды. Әдістемелік ұсынымдар оқыту сапасын арттыру, білім алушылардың, оның ішінде үлгерімі төмен білім алушылардың біліміндегі олқылықтарды қалпына келтіру және білімін толықтыру мақсатында әзірленді», – деді Ақзира Бақтыбайқызы.
</blockquote>
Айта кету керек, білім беру ұйымдарында жазғы мектептің сабақ кестесі мен жұмыс жоспары бекітіліп, топтардағы немесе сыныптардағы толымдылық – 25 адамнан аспайтын болады. Топтармен сабақтар өткізуге рұқсат етіліп, күніне 3-4 сабақтан оқу пәндері бойынша сабақ уақыты 40 минут болады. Сондай-ақ, кестеге балалардың оқу әдетін қалыптастыратын күнделікті 20-30 минуттық кітап оқуды қосу ұсынылды.

Жазғы мектеп бірнеше форматта жұмыс істейді

<a href="https://kyzylorda-news.kz/">Kyzylorda-news.kz.</a>&nbsp;Бүгін актив отырысында Қызылорда облысының әкімі Нұрлыбек Нәлібаев жаңадан тағайындалған бірқатар басқарма басшыларын таныстырды.
Қызылорда облысының энергетика және тұрғын үй-коммуналдық шаруашылық басқармасының басшысы қызметіне Дәрібаев Айдос Нағымадинұлы тағайындалды.
Айдос Нағымадинұлы 1987 жылы Қызылорда қаласында дүниеге келген. Алматы энергетика және байланыс институтын, Ресей халық шаруашылығы және мемлекеттік қызмет академиясын, Қорқыт ата атындағы Қызылорда мемлекеттік университетін бітірген.
Еңбек жолын «KEGOC» (КЕГОК) акционерлік қоғамының инженері болып бастаған.
Әр жылдары Қызылорда электр тарату тораптары компаниясының Сырдария, Қазалы аудандық, Қызылорда қалалық электр тораптарының директоры қызметтерін атқарды.
2014-2018 жылдары Еуразиялық экономикалық комиссиясы Энергетика департаментінің консультанты, Алматы, Қызылорда электр тарату тораптары компаниясының басқарма төрағасының орынбасары, бірінші орынбасары лауазымдарын атқарды. Энергетика министрлігі Электр энергетикасын дамыту департаментінің директоры ретінде жұмыс жасады.
Аймақ басшысы жаңа қызметке кіріскен Айдос Дәрібаевқа сенім білдіріп, қызметіне сәттілік тіледі.
<blockquote>
 «Айдос Нағымадинұлы жас та болса, іскерлігімен танылып, білікті маман ретінде өзін дәлелдеген азамат. Энергетика саласының барлық сатысынан өткен, орталық деңгейде жұмыс жасаған тәжірибесін ескере келе, осы саланың жандануына күш салып, алған білімі мен жиған тәжірибесін тиімді пайдаланады деген сеніммен шақырдым», – деді Нұрлыбек Нәлібаев.
</blockquote>
<img src="https://kyzylorda-news.kz/wp-content/uploads/2022/05/ajdos.jpg" alt="" />

Қызылорда облыстық энергетика және тұрғын үй-коммуналдық шаруашылық басқармасының басшысы тағайындалды

<a href="https://kyzylorda-news.kz/">Kyzylorda-news.kz.</a> Биыл Қызылорда облысы бойынша 292 оқушы «Алтын белгі» белгісіне үміткер болып отыр. Олардың 99-ы Қызылорда қаласы мен облыстық мектептің түлектері болса, ал, қалған 193-і аудандардан. Бұл туралы Қызылорда облыстық білім басқармасының басшысы Ақзира Қасымова хабарлады.
Алтын белгіге үміткер оқушылардың Назарбаев Зияткерлік мектебі базасында алгебра және анализ бастамалары пәнінен тапсыратын мемлекеттік емтиханы келесі, яғни, 2022-2023 оқу жылына ауыстырылды. Осы орайда, биыл мектеп бітірушілер емтиханды өз мектебінде тапсырады. Сондай-ақ, биылғы ҰБТ қорытындысы бойынша «Алтын белгіні» берудің объективтілігі бағаланатын болады.
<blockquote>
 «Осыған байланысты мектеп әкімшілігі мен білім бөлімдері мемлекеттік қорытынды емтихандардың ашықтығы мен объективтілігін қамтамасыз етулері керек. Әрбір үміткер оқушының ҰБТ нәтижелеріне талдау жүргізілетіндігін тағы да назарларыңызға саламын», – деді Ақзира Бақтыбайқызы.
</blockquote>

ҰБТ қорытындысы бойынша «Алтын белгіні» берудің объективтілігі бағаланатын болады

<a href="https://kyzylorda-news.kz/">Kyzylorda-news.kz.</a> Қызылорда облысының тұрғындары Әлеуметтік медициналық сақтандыру қорына 31,8млрд теңге аударды.
<blockquote>
 «Жүйе іске қосылған 2017 жылдың 1 шілдесінен 2022 жылдың 1 мамырына дейінгі аралықта Қызылорда облысының тұрғындары әлеуметтік медициналық сақтандыру қорына 31,8 млрд. теңге аударды, оның 20,6 млрд. теңгесі (64,8%) жұмыс берушілердің аударымдары болса, қалған 11,2 млрд. теңге (35,2%) – жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі», – деді «Әлеуметтік медициналық сақтандыру қоры» КЕАҚ Қызылорда облысы бойынша филиалының директоры Бақыт Исмаханбетов.
</blockquote>
Жарна төлеу жағынан Қызылорда қаласы, Шиелі мен Жанақорған аудандар көш бастап тұр.
Жинақталған қаржы сенімгерлік басқару туралы келісім бекітілген Ұлттық банкте сақталады және МӘМС пакеті шеңберіндегі қызметтер ақысын төлеуге жұмсалуда.

МӘМС: Қызылордалықтар қорға 31,8 млрд. теңге аударды

<a href="https://kyzylorda-news.kz/">Kyzylorda-news.kz.</a> 2021-2022 оқу жылында 8 мыңға жуық білім алушы мектепті бітіреді. 14 мамырға дейін Ұлттық бірыңғай тестке өтініш жасау электронды форматта қабылданады. Сондай-ақ, биылғы оқу жылында 7 508 оқушы ҰБТ-ға қатысады деп күтілуде. Бұл туралы Өңірлік коммуникациялар қызметінде өткен брифингте облыстық білім басқармасының басшысы Ақзира Қасымова хабарлады.
ҰБТ және барлық деңгейдегі олимпиадалар электронды форматқа көшірілді. Басқарма басшысы мұның ең басты артықшылығы – барлық процестің ашықтығы мен азаматтарға қолайлы жағдай жасалуында екенін айтты.
<blockquote>
 «ҰБТ-ға өтініштердің басым көпшілігінің электронды форматта тапсырылуы азаматтар арасында сұранысқа ие екенін көрсетеді. ҰБТ-ға өтініш қабылдау 28 сәуір мен 14 мамыр аралығында app.testcenter.kz сайтында жүргізілуде. Сондай-ақ, биыл ҰБТ тапсырушы түлектерге тест тапсыруға және грантқа түсуге екі мүмкіндік беріледі. Яғни, тек бір бейіндік пәндер комбинациясын таңдай алады. Пәндердің санында өзгеріс жоқ. Ең жоғарғы ұпай саны – 140», – деді басқарма басшысы Ақзира Бақтыбайқызы.
</blockquote>
Түлектердің ҰБТ-ға дайындалуына Ұлттық тестілеу орталығының тегін онлайн-сынақ тестілеуі бүгінде іске қосылып, көмек ретінде оқушыларға мүмкіндіктер жасалынуда. Мұнымен қоса, Ұлттық тестілеу орталығымен бірлесіп әзірленген білім беру орталықтарының тегін онлайн сабақтары да жалғасып жатыр. Ал, ерекше білім беруді қажет ететін талапкерлерге қолайлы жағдай жасау үшін алғаш рет негізгі 240 минутқа қосымша тағы 40 минут берілді. Сонымен бірге олар үшін тест нұсқалары суреттерсіз, диаграммаларсыз және сызбаларсыз әзірленді.
Айта кетейік, академиялық адалдықты сақтау үшін талапкерлердің тест нұсқасы таңбаланады. Ережелерді бұзған және тест тапсырмаларын аудиториядан тыс жерге шығаруға тырысқан жағдайда, Ұлттық тестілеу орталығы ереже бұзушыларды анықтап, оның тест нәтижелерін жояды. ҰБТ кезінде компьютер экранында калькулятор, Менделеев кестесі және металдардың бірқатар белсенділігі қосылған тұздың ерігіштігі кестесі қолжетімді болады.
Үміткерлер тестілеу аяқталғаннан кейін 30 минут ішінде апелляцияға өтініш бере алады.

Қызылордада биыл ҰБТ-ға 7 508 мектеп бітіруші түлек қатысады

<a href="https://kyzylorda-news.kz/">Kyzylorda-news.kz.</a> «Самұрық-Қазына» АҚ Қоғаммен байланыс және өзгерістерді басқару жөніндегі басқарушы директоры Ғибрат Ауғанов пен «Samruk-Kazyna Trust» әлеуметтік жобаларды дамыту қорының бас директоры Альфия Адиева Қызылорда облыстық көпбейінді балалар ауруханасында орналасқан «Қамқорлық» оңалту орталығында болды.
Статистикаға сәйкес, Қызылорда облысында 18 жасқа дейінгі мүгедектігі бар 5 000-нан астам бала бар, олардың көпшілігі тұрақты оңалту көмегін қажет етеді.
Қызылордадағы оңалту орталығы өз жұмысын 2022 жылдың қаңтарында бастады. Бүгінгі таңда мұнда нейро-ортопедиялық кінәраты бар 400-ден астам бала тегін оңалтудан өтті.
Орталықта Ұлыбритания, АҚШ, Германия, Австрия, Италия, Қазақстан және Ресейдің алдыңғы қатарлы оңалту жабдықтарын өндірушілерінің заманауи шешімдері қарастырылған. Оңалту орталықтарын қажетті жабдықтауды толықтайжобаның бас серіктесі «Самұрық-Қазына» АҚ және әлеуметтік серіктес «Samruk-Kazyna Trust» әлеуметтік жобаларды дамыту қоры қаржыландырды. 
Қызылордалық тиісті оңалту орталығы ерекше балаларды оңалтудың жүйелі және кешенді тәсілін көздейтін халықаралық модель бойынша жұмыс істейді. Мұнда әртүрлі бейінге оқытылған мамандар тобы жұмыс істейді: неврологтар, реабилитологтар, емдік-дене шынықтыру нұсқаушылары, психологтар, логопедтер, еңбек және эрготерапевтер, дефектологтар. Әрбір бала үшін олар мен ата-аналары қол жеткізгісі келетін, бастапқы деректері мен мақсаттарына сәйкес, оңалтудың жеке жоспары жасалады.
Қонақтар орталық жұмысымен танысып, күнделікті балаларды оңалту бағытын аралады: емдік-дене шынықтыру залдарына, педагогтар мен психологтардың кабинеттеріне, механотерапия залына, сенсорлық бөлмеге, бальнеотерапия кабинетіне, бассейнге барып, саяхатты кондуктивтік терапияда аяқтады.
Кондуктивтік емнің соңында қалыптасқан игі дәстүрге сай осында ұзақ күткен алғашқы қадамын жасаған Бекзат Ғалымжанұлы есімді бүлдіршіннің тұсауын орталықтың қадірлі қонағы Ғибрат Ауғанов кесіп, батасын берді.
<blockquote>
 «Самұрық-Қазына» АҚ өз қызметінде қоғам алдындағы әлеуметтік жауапкершілікті басты назарда ұстайды. Мәселен Қор компанияларының атынан әрекет ететін «Samruk–Kazyna Trust» корпоратвитік қоры өткен жылы жалпы сомасы 7 млрд теңгеден астам қаржыға 32 әлеуметтік жобаны іске асырды. Тиісті көмек арқылы біз жарты миллионға жуық адамды қамтыдық», – деді ол.
 «Жоба еліміздің ірі қалалары мен облыс орталықтарын ғана емес, сондай-ақ шалғай ауылдарды да қамтып, бұл балаларды жақын жерден тиімді оңалтумен қамтамасыз етуге мүмкіндік береді. Барлық оңалту орталықтарының жабдықталуын қаржыландырған «Самұрық-Қазына» АҚжобаны іске асыруда сенімді серіктесіміз болып отыр. Бұл қымбат және ең бастысы тиімді құрылғылардың кейбірі Қазақстанда тек біздің орталықта бар», – деді «Қамқорлық қоры» корпоративтік қорының директоры Арайлым Еркінова.
</blockquote>
«Қамқорлық» оңалту орталығында физикалық немесе психикалық жағдайына қарамастан барлық азаматтар үшін тең жағдай мен мүмкіндік жасау мақсат етілген. Жалпы бұған дейін «Samruk-Kazyna Trust» қорының қолдауымендәл осындай 15 оңалту орталығы Ақмола, Ақтөбе, Алматы, Атырау, Батыс Қазақстан, Шығыс Қазақстан, Түркістан, Жамбыл, Маңғыстау, Қостанай, Қызылорда облыстарында және Нұр-Сұлтан қаласында іске қосылды. Сонымен қатар8 инклюзияны қолдау кабинеті мен7 ерте араласу орталығына қазіргі заманғы озық құрал-жабдық орнатылды. Аталған орталықтарды толық жабдықтауға Қор тарапынан осы уақытқа дейін 3 млрд теңгеден астам қаржы жұмсалды.
<img src="https://kyzylorda-news.kz/wp-content/uploads/2022/05/7db3da9f-c454-4819-82bf-749b7352850e.jpg" alt="" />

Қызылорда облысында 400-ден астам бала тегін оңалтудан өтті

<a href="https://kyzylorda-news.kz/">Kyzylorda-news.kz.</a> Қазақстан Республикасының Президенті Қасым-Жомарт Тоқаев 05 мамыр күні Конституцияға өзгерістер мен толықтырулар енгізу бойынша жалпыхалықтық референдум өткізу туралы Жарлыққа қол қойды және референдум 5 маусым күні өткізілетін болып белгіленді.
Баршаға белгілі референдум демократияның маңызды институты болып табылады. Себебі мұндай тарихи шара кезінде, мемлекеттік маңызы бар мәселелерге қатысты тікелей бұқара халықтың пікірі міндетті түрде ескеріледі. Бұл дегеніміз, Президенттің Қазақстан халқына Жолдауында айтылған “Халық үніне құлақ асатын Мемлекет” тұжырымдамасы аясының тынысын кеңейтпек.
Мемлекет басшысы халыққа жасаған бейнеүндеуінде «Ата Заң баптарының үштен бірі өзгеретінін, Конституциямыз мүлде жаңа сипатқа ие болатынын ерекше атап айтты. Сондай-ақ, Президент құқық қорғау саласы бойынша маңызды өзгерістер орын алатынын, Конституциялық сот құрылатынын, аудандық және қалалық мәслихат депутаттарын сайлаудың мажоритарлық жүйесінің толықтай енгізілуі өңірлердің тыныс-тіршілігіне азаматтардың ықпал ету мүмкіндігін арттыруға жол ашатынын тілге тиек етті. Осы орайда Қазалы аудандық мәслихаттағы «AMANAT» партиясы депутаттық фракциясының мүшесі ретінде Мемлекет басшысының бастамаларын толық қолдаймын және барша қазақстандықтарды еліміз, болашағымыз үшін тарихи бетбұрысқа бастайтын маңызды шараға, халық үніне құлақ асуға негізделген халықтық референдумға белсене қатысып, 5 маусым күні өз таңдауларыңызды білдіруге шақырамын. Бұл тұста «AMANAT» партиясының барлық мүшелері Президент бастамасын қолдайды деген зор сенімдемін!
НҰРЛАН ИМАНДОСОВ, 
Қазалы аудандық мәслихаттағы 
«AMANAT» партиясы депутаттық фракциясының мүшесі

Бұқара халықтың пікірі ескеріледі

<a href="https://kyzylorda-news.kz/">Kyzylorda-news.kz.</a>&nbsp;«CHEVRON» компаниясы ұйымдастырған «Sustainability Living Lab» жобалар сайысында Қорқыт ата атындағы Қызылорда университетінің студенттері Темірлан Абжанов пен Ислам Жауынбай жеңімпаз атанды. Байқауда білім алушылар «Bike Parking» жобасын таныстырып, 800 мың теңге грант иеленді.
<blockquote>
 «Bike Parking» – университетіміздің оқу ғимаратының алдында вело-тұрақтарды қоюға бағытталған жоба. Бүгінде қалада велосипед айдайтын жастар көбейді, бірақ көліктің бұл түрін қауіпсіз орналастыру үлкен мәселе болатынын байқадық. Осы фактордың әсерінен денсаулыққа пайдалы, қоршаған ортаға зиянсыз транспорт түрін қолданудан бас тартатындар бар. Біз «Sustainability Living Lab» конкурсына қатысу арқылы университет инфрақұрылымының дамуына өз үлесімізді қосуды мақсат еттік. Алдағы уақытта университет ғимараттарының алдына 8 велотұрақ орналастыратын боламыз. Жоба студенттер арасында салауатты өмір салтын насихаттап, экологиялық тазалықты сақтауға септігін тигізеді», – деді Темірлан Абжанов.
</blockquote>
Конкурстың шарты бойынша оқу орындарының кампусын дамытуға арналған 100-ден астам жоба келіп түсті. Соның ішінде 16 жоба үздік деп танылып, арнайы грант бөлінді.
Айта кету керек, студенттер Темірлан Абжанов пен Ислам Жауынбай Қорқыт ата атындағы Қызылорда университетіндегі «Business Start» инкубаторының резиденттері. Қазіргі уақытта жастар кәсіпкерлігі орталығында 40 студент тіркелген. Оқу орны тарапынан жас кәсіпкерлерге тиімді түрде жұмыс орны беріліп, жобаларына инвестор тарту бойынша қолдау көрсетіліп келеді.

Қорқыт ата атындағы Қызылорда университетінің студенттері 800 мың теңге грант жеңіп алды

<a href="https://kyzylorda-news.kz/">Kyzylorda-news.kz.</a> Мамыр айында жауын-шашын аз болады, деп хабарлайды Қазгидромет.
Қатты қуаңшылық Қызылорда облысының Қармақшы және Маңғыстау облысының Маңғыстау ауданында күтіледі. Мамандар айдың аяғына дейін ауа райының қатты ыстық болатынын айтады. Дәл осы екі аудан былтыр да құрғақшылықтан зардабын тартқан еді. Соның кесірінен мыңдаған бас мал арам қатты. Кейбір аудандарда табиғи сипаттағы төтенше жағдай режімін жариялауға тура келді.&nbsp;
Биыл Маңғыстау өңірінде тағы төтенше жағдай енгізілді. Бұған малдың қырылуы емес, толастап жауған жауын-шашын себеп болды. Дегенмен қатты жаңбыр бұл аймақты құрғақшылықтан құтқармайын деп тұр.&nbsp;
Ал елдің өзге өңірлеріне келер болсақ, мамыр айында Ақмола және Солтүстік Қазақстан облыстарында орташа құрғақшылық болады. Қалған облыстарда қолайлы ауа райы сақталмақ.

Қызылорда облысын құрғақшылық күтіп тұр

<a href="https://kyzylorda-news.kz/">Kyzylorda-news.kz.</a> Нұр-Сұлтан қаласы Орталықтандырылған кітапханалар жүйесіне қарасты Көзі көрмейтін және нашар көретін азаматтарға арналған арнайы кітапхананың ұйымдастыруымен ақын Толқын Қабылшаның «Осы бір сәт ұнайды» атты аудиокітабының тұсаукесері өтті.
<blockquote>
 «Менің «Осы бір сәт ұнайды» аудиокітабым көз жанары мына әлемді дұрыс көре алмайтын жандар үшін өте оңтайлы мүмкіндік. Сонымен қатар, поэзияға шын мәнінде ынтызар, қазақтың қара өлеңіне деген құрметі басым, сезімтал оқырмандармен жүздесу маған ерекше сезім сыйлады. Бұған дейін қаншама шығармашылық кеш өткізіп, қаншама әдеби кездесулердің төрінде отырғаныммен бүгінгі әдеби шараның маған сыйлаған әсері өте өзгеше болды деп айта аламын. Өйткені, әр күн сайын мына әлемді көзімізбен құшып жүріп кейде біздің торығатын, мұңаятын сәттеріміз көп болады. Сол жердегі әр оқырман осы әлемді көру мүмкіндігі болмаса да, соншалықты жүрекпен, түйсікпен әр сөзіңізге, әр өлеңіңізге мән беріп, оны жатқа оқып, домбырамен ән салып отырғанда, қазақтың әдебиетіне деген асқан құштарлықты сезіндім, әрі әр күніміздің нығмет екенін ұғынып қайттым. Бұл екінші рет жарық көріп тұрған аудиокітап үлкен сұраныстың негізінде, көптің сұрауымен жарық көргені де мені қатты қуантады», – дейді аудиокітап авторы Т.Қабылша.
</blockquote>
Айта кетейік, «Дыбыстандырылған әлем» жобасы биыл басталған. Арнайы кітапхананың студиясында өзінің шығармашылығын аудиокітап түрінде тегін басып шыққысы келетін кез келген оқырман кітапхана басшылығына жүгіне алады.
<img src="https://kyzylorda-news.kz/wp-content/uploads/2022/05/280056556_1157730711708591_2016832404291443185_n.jpg" alt="" />

Ақын Толқын Қабылшаның аудиокітабы жарыққа шықты

<a href="https://kyzylorda-news.kz/">Kyzylorda-news.kz.</a> Қызылордада аудан тұрғынының автокөлігінен есірткі табылды.
Қызылорда облысы Полиция департаментінің патрульдік полиция ротасының қызметкерлері «Шымкент-Самара» тас жолы, яғни Тасбөгет кентінің тұсында қызмет атқару барысында Арал ауданының 57 жастағы тұрғынының басқаруындағы «Lada-Kalina» автокөлігін жол ережесін бұзғаны үшін тоқтатқан.
Тексеру барысында жолаушыдан газет қиындысына оралған шөп ұнтақтары тәркіленді, сараптамаға жолданды. Сараптама қортындысына сәйкес тәркіленген зат «кептірілген марихуана» екені белгілі болды.
Сонымен қатар күдікті үйінің ауласында 5-түп сораны егіп баптағаны анықталды. 
Аталған деректер бойынша Қазақстан Республикасы Қылмыстық кодексінің&nbsp;296-бабы 2-бөлігімен&nbsp;(Есiрткi, психотроптық заттарды, сол тектестерді өткізу мақсатынсыз заңсыз дайындау, қайта өңдеу, иемдену, сақтау, тасымалдау)&nbsp;және 300-бабының 1-бөлігімен (Өсiруге тыйым салынған өсiмдiктердi егу немесе өсiру немесе сораның, көкнәрдiң немесе құрамында есiрткi заттар бар басқа да өсiмдiктердiң сұрыптарын егіп-өсіру) сотқа дейінгі тергеп-тексеру әрекеттері жүргізілуде.
Д.МАХАНОВА

Қызылордалық полицейлер ауыл тұрғынынан есірткі затын анықтады (ВИДЕО)

<a href="https://kyzylorda-news.kz/">Kyzylorda-news.kz.</a>&nbsp;Елордада көпқабатты үйдің балконынан үш жастағы қызды құтқарып алған Сәбит Шонтақбаевтың ата-анасына құрмет көрсетілді.
Бүгінгі күннің батыры Сәбит Шонтақбаевтың ата-анасы Қызылорда облысы Жалағаш ауданына қарасты Аққұм ауылында тұрады.
Әлеуметтік желілерде кең тараған бейнежазбада Сәбит Серікұлының батылдығы, тез арада көмекке ұмтылғанын және өз өмірін қатерге тіккенін де көруге болады. Сондықтан көпшілік оның батыл әрекетіне тәнті болды.
Кеше Сәбит Шонтақбаев Нұр-Сұлтан қаласының әкімі Алтай Көлгіновтің қабылдауында да болды. Онан кейін «G-Park» компаниясының басшылығы оған елордадан үш бөлмелі пәтер сыйлады.
Батырдың ата-анасына да сый-құрмет көрсетілді. Жалағаш ауданы әкімінің орынбасары Жасұлан Еспенбет, аудандық төтенше жағдайлар бөлімінің басшысы Ерболат Серманов Аққұм ауылына арнайы барып, Сәбиттің әкесі Серік Сабырұлы мен анасы Гүлбаршын Пірімбетоваға алғыс айтты. Сондай-ақ ержүрек азаматты тәрбиелеп өсіргені үшін аудан әкімінің алғыс хатын табыстады.

Қазақстан және Қызылорда облысының жаңалықтары