<a href="https://kyzylorda-news.kz/">Kyzylorda-news.kz.</a> Шиелі аудандық соттың берген мәліметіне сүйенсек, өткен жылы өңірде 237 адам ажырасуға өтінім берген. 218 заңды тұлғаның өтінім-талабы қабылданып, 134 жанның шешімі шығарылып, 133 отбасының некесі бұзылған. Ал биыл жыл басынан күні бүгінге дейін 43 адам заңды некені бұзуға арыз тастап үлгерсе, жауапкершіліктен жалтарып, баланың қажеттіліктерін өтеуге құлықсыз 47 адамға сот бұйрығы шығарылған. Демек, аудан көлемінде ажырасудың көрсеткіші жоғары. Бұған не себеп? Жауабын бірге іздеп көрелік…Қазіргі таңда отбасының құндылығы жоғалып, ар-ұят, намыс секілді қазақ халқы жанынан қымбат санаған қасиеттер кеміп, қоғамның санасы улануда. Соның салдарынан бүгінгі қазақ қоғамында жетім-жесір, жауапсыз әке, «көкек ана» көбейіп, бұл мәселе қазіргі уақыттың асқынған дертіне айналды. Қырық жыл қырғын болса да, ажалы жетпей шаңырағын шайқалтпаған әкелер, тағдырдың қанша тауқыметін көрсе де мойымай, баласын мойынына салып жүріп жеткізген аналар көп еді бұл елде. Өкінішке қарай, тағдырдың ыстығы мен суығын бірге көтеретін жандар азайды.«Осыншама отаудың шаңырағы неге шайқалды?» деген сұраққа отбасылық мәселемен айналыспайтын жандар да жобалап жауап бере алар-ау. Дегенмен, ғалымдар соңы міндетті түрде ажырасуға апаратын 13 түрлі себепті атайды. Ал статистиканың беретін дерек пен дәйегі жыл сайын өзгеріп отыратыны сөзсіз. Біз де ажырасудың өзіндік себептерін іздеп көрдік. Сонымен...Ажырасуға не себеп?Ойланып қарасақ, тұрмыстағы жандар тек бір себеппен емес, түрлі жағдаяттармен ажырасып жатады. Көп жағдайда үйдегі қаражаттың аздығы ажырасудың басты факторы болып табылады. Ол рас.Ал одан бөлек, бір-бірін құлай сүйіп қосылған жастардың арасындағы сезім басылғандықтан, көп ұзамай ажырасып жатады. Сезім суыса арадағы сыйластықтың қалмайтыны бесенеден белгілі емес пе? Ал сыйластықтың жібі үзілсе, шаңырақ шайқалып, түтіні түзу желбіреген үйдің күйрейтіндігі белгілі. Ажырасуды ардан аттау деп ойлайтын бұрынғы аға-жеңгелеріміз отбасын сақтап қалуға барын салды емес пе?Қазір қыздар тұрмыстың тауқыметіне шыдас бере қоймайды. Әсіресе, ауылдық жерге келін болып, ақ босаға аттаған арулар ауылдың өмірінен қашады. Бұрындағы «Сиыр сауып, жүн түту сенің мойныңда» деген әндерді бүгінгі бұрымдылар тіпті естігісі келмейді. Қаланың өмірін құп көрген қылықтылар қиындықтың қамытынан қашады. Одан бөлек, ауылдағы ағайынның сөзіне шыдамай, ажырасуға дайын тұрады. Ата-енені баққысы келмейтін келіндер, күрсініс білдірсе, кім жақтырсын? Қиыншылыққа қалтаның жұқалығы, қаражаттың жоқтығы тағы қосылады. Міне, бұл әйел затын ажырасуға алып келетін басты себептер. Ал, ер азаматтарды тізбектеп көрсек…Жас шағынан тұрмыстық өмірге ерте араласқан еркектердің 40 проценті көбіне ажырасып жатады. Бұл статистикалық дерек. Дегенмен, жастықтың буымен отау құрған ер азаматтың ажырасу себебі нақты ол емес. Ажырасқан қыздардың айтуы бойынша, еркек біткеннің есіктен ентелейтін бірнеше жаман әдеттері бар. Олар маскүнемдік, құмар ойын ойнау, мезгілсіз қыдыру, жауапкершілікті сезінбеу, және жұмыссыздық. Иә, былай қарасақ, шындық осы. Расымен, отбасын құруға батыл шешім қабылдаған ер азаматтар көп жағдайда жауапсыздық танытып жатады. Көпке топырақ шашудан аулақпыз, әрине. Десек те, үйленген соң үйден алыстап, маскүнемдікке салынып, отбасында жанжал шығаратын жігіттер жоқ емес. Мұндайда тауқымет зардабын тартатын ерлі-зайыптылар емес.Ажырасулардың түрлі себептері болғанымен қатып қалған бір сценарийі жоқ. Мына бір жағдайға қараңызшы. Біраз жыл бұрын күйеуінен кетіп қалған бір көршіміз араға алты жыл салып қайта қосылды. Бұл оқиғаның ұзын-ырғасы мынадай. Баласы тілі шығып, құлдыраңдап жүгіре бастағаннан-ақ, әкесін сағынып, ауладан әрі-бері өткен ер-азаматтарға қарап отырады екен. Түсі жылы, жақсы киінген, жібі түзу бір адам көріп, ол жылышырай қабақ танытса болды: «Сіз менің әкемсіз бе?» деп сұрайды…Баласының мұндай қылықтарын үнемі сыртынан бақылап отырған анасы ақыры жүрегі шыдамаған болуы керек, ұлы үшін бұрынғы күйеуінің барлық кемшіліктері мен қылықтарын кешіруге мәжбүр. Дәл осы оқиға біздің әрқайсымызды ойлантуы тиіс.Статистика сөйлесінСтатистикаға сүйенсек, көбінесе ажырасуға 5-10 жыл бірге тұрған, 30-34 жас аралығындағы ерлі-зайыптылар барады. Он шақты жыл бірге өмір сүргендердің арасында әрине, бала болатыны белгілі. Алайда, осы аралықта олардың бір-бірінен көңілдері қалып, бірге құрған қиялдарының кемесі күйрейді. Психологтардың айтуынша, әр 10 жыл сайын туындайтын мұндай отбасылық дағдарыстарды жеңуге бүгінгі адамдардың жігері жетпей жатыр. Осы мәселеде Статистика комитеті ұсынған кестелерге көз салсақ, ауылдық жерлерге қарағанда, қала тұрғындары арасында ажырасулар екі есе көптігін байқаймыз. Сонда ауылдағылардың өмірі қаладағылардың тұрмысынан жақсарып кеткені ме?! Бұл жерде мамандар қалалықтардың ішкі еркіндігі әлдеқайда жоғары екендігін алға тартады. Ажырасуға бел байлаған қалалықтар миллион халқы бар мегаполиске сіңіп, жеке өмір сүрудің жүз түрлі айласын біледі. Ал «Ел не дейді? Ағайын-туыстан ұят болады» дейтін ауылдың жайы белгілі.Бала демекші, республика бойынша 2018 жылы жеті айда 32 мың адам ажырасса, оның 19 мыңында бала бар. Сирек жағдайда ерлі-зайыптылар бір перзент үшін ажырасуға мәжбүр болып жатса, көп жағдайда кетісетін жұптарды бірнеше баласы да ұстап қала алмай отыр. Дегенмен, мына бір дерекке көз салайықшы, заңгерлер соңғы жылдары ажырасып кеткеннен кейін балаларын өзі бағуға тырысатын әкелердің саны ұлғайғанын алға тартады. 2000-2010 жылдары бұл көрсеткіш 30-40 пайыз болса, қазір 70 процентке өскен. Ал 2023 жылдың өзінде ажырасуға өтінім білдіргендердің қатары артқан. Мәселен, ажырасу бойынша үздік үштікке Алматы, Түркістан, Солтүстік Қазақстан облыстары енген. Алдыңғы көшті Шымкент тұрғындары да бастап тұр. Қызылорда облысында да жағдай мәз емес. Мысалы, Шиелі, Қазалы, Жаңақорған аудандарында тұратын жас отбасылар ажырасудан алдыңғы қатарда тұр. Бұл қуанарлық жағдай емес, әрине. Десек те аудан көлемінің өзінде 2022 жылы 222 адамға алимент өндіру бойынша сот бұйрығы шығарылған. 2023 жылы 47 тұлғаның сот шешімі шығарылған.

Ажырасу мәселені шеше ме?

Kyzylorda-news.kz. &nbsp;Ұлыстың ұлы күні қарсаңында Қызылорда қаласы «Сабалақ» елді мекенінде дарынды балаларға арналған, заманауи үлгідегі жабдықтармен жарақталған 150 орындық №285 мамандандырылған мектеп-лицей-интернаты ел игілігіне табысталды.Облыс әкімі Нұрлыбек Нәлібаев білім ордасының ашылу рәсіміне қатысып, жерлестерін мерекемен құттықтады. Күні кеше елімізде өткен Мәжіліс және барлық деңгейдегі мәслихат депутаттарын кезектен тыс сайлауда белсенділік танытқан жұртшылыққа алғыс білдірді.<blockquote>«Мемлекет басшысы Қасым-Жомарт Кемелұлы Тоқаевтың, Үкімет деңгейіндегі жан-жақты қолдаудың және бірлескен жұмыстардың нәтижесінде Сыр өңірінде тың жобалар жүзеге асуда. Біз адами капиталды дамыту және білім сапасын арттыру мемлекеттің негізгі міндеттерінің бірі екенін әрдайым айтамыз. Өңірімізде заманауи жаңа білім ошақтары бой көтеріп, жас ұрпақтың сапалы білім, саналы тәрбие алуына бар жағдай жасалуда. Өткен жылы облыста 19 балабақша, 6 мектеп, Жалағаш ауданында Оқушылар үйі және Өнер мектебі пайдалануға берілді. Туған жерге жанашыр меценаттар, кәсіпкерлер 9 млрд.теңгеден астам демеушілік қаржыға ауқымды жобаларды жүзеге асырды. Нәтижесінде 80 спорт-ойын алаңы, демалыс парктері мен аллеялар ел игілігіне табысталды. Қызылорда қаласында «Анаға тағзым» орталығы, Арал ауданы Тоқабай ауылында жаңа мектеп құрылысы жүргізілуде. «ҚазГерМұнай» ұлттық компаниясы басшылығымен келісім нәтижесінде Қызылорда қаласында заманауи үлгідегі «Оқушылар сарайының» жобасы басталады. Алдағы уақытта да мемлекет, облыс басшылығы тарапынан бүлдіршіндерімізді, талантты оқушыларымызды қолдау тұрақты жүргізіледі», &nbsp;– деді Нұрлыбек Машбекұлы.</blockquote>Салтанатты шарада ел ағасы Бекмырза Еламанов жерлестерін құттықтап, білім саласының ардагері Оразбай Сағындықұлы бата берді.Еске салсақ, өткен жылдың желтоқсан айында Үкімет басшысы&nbsp; Әлихан Асханұлы Смайылов Сыр өңіріне арнайы жұмыс сапары кезінде Қызылорда қаласында дарынды балаларға арналған физика-математика мектеп-интернатын салу, тағы 1 775 орынға арналған 4 мектеп құрылысын аяқтау «Білімді қолдау қоры» қаражаты есебінен қаржыландырылатын құрылыстар тізіміне енгізілді. «Жайлы мектеп» ұлттық жобасы аясында облыста алдағы 3 жылда 15 100 орынға арналған құны 100 млрд. теңгеден асатын 21 мектеп салынады. Биыл 10 мектептің құрылысы басталады. Нәтижесінде 2025 жылы өңірдегі үш ауысымды және апатты мектептер мәселесі шешімін тауып, балалардың сапалы білім алуына жағдай жасалады.Бұған қоса аймақтағы еңбек нарығының сұранысына сай мамандықтарды игеру үшін тұрмысы төмен отбасы балаларына облыс әкімінің 100 гранты бөлінді. Жүзден аса оқушы халықаралық және республикалық олимпиадалар мен ғылыми жобалар конкурсының жеңімпазы атанды.<img src="https://knadmin.beoblood.kz/uploads/FB_IMG_1679305612952_75f72572a3.jpg" alt="FB_IMG_1679305612952.jpg"><img src="https://knadmin.beoblood.kz/uploads/FB_IMG_1679305579700_d8cf241cba.jpg" alt="FB_IMG_1679305579700.jpg"><img src="https://knadmin.beoblood.kz/uploads/FB_IMG_1679305597304_15f9b4be7b.jpg" alt="FB_IMG_1679305597304.jpg"><img src="https://knadmin.beoblood.kz/uploads/FB_IMG_1679305584049_efc56e0552.jpg" alt="FB_IMG_1679305584049.jpg"><img src="https://knadmin.beoblood.kz/uploads/FB_IMG_1679305589171_0a2d5383d9.jpg" alt="FB_IMG_1679305589171.jpg"><img src="https://knadmin.beoblood.kz/uploads/FB_IMG_1679305611201_c8798a405b.jpg" alt="FB_IMG_1679305611201.jpg">

Қызылордада жаңа мектеп ашылды

<a href="https://kyzylorda-news.kz/">Kyzylorda-news.kz.</a> Хор музыкасы бойынша дүниежүзілік симпозиумы (WSCM) 25-30 сәуірде Стамбұлда өтеді. Түркия Республикасы Мәдениет және туризм министрлігі ұйымдастыратын симпозиум Стамбұлдағы Бейоғлы ауданының тарихи орындарында, әсіресе, Ататүрік мәдени орталығында әлемнің ең үздік хор ұжымдары мен тәжірибелі мамандардың басын қосады.Конгресс туризмі (MICE) бойынша әлемдегі жетекші қалалардың бірі ретінде Стамбұл жыл сайын түрлі шаралар ұйымдастырады. Халықаралық хор музыкасы федерациясының (IFCM) соңғы алты жылдағы ең үлкен шарасы саналатын Дүниежүзілік хор музыкасы симпозиумы (WSCM) – солардың бірі. 25-30 сәуір аралығына жоспарланған симпозиум пандемиядан кейінгі алғашқы әлемдік байқау ретінде тарихта қалады.Биылғы Дүниежүзілік хор музыкасы симпозиумының тақырыбы – “Көкжиекті кеңейту”. Жер шарындағы барлық ұлт пен ұлысқа тән ән айту дәстүрін құрметтеу, әлемнің әртүрлі аймақтарын бір біріне таныстыру және хор музыкасының барынша әртүрлі баламаларын қамту – басты мақсат.Конгресс туризмінде көп жылдық тәжірибесі бар Стамбул Бейоглының көрнекті жерлеріне бес континенттегі 28 түрлі елден 50-ден астам баяндамашы, мыңнан астам суретші және 2000-нан астам қатысушының басын қосып, ортақ жобаларды жүзеге асырудың жолдарын қарастырады.Ыстамбұлдың көрнекті және тарихи орындарында ұмытылмас концерттер Симпозиум бағдарламасында хор музыкасының әртүрлі стильдері мен дәстүрлері ұсынылған. Түркиядан және шетелден келген әртістерге арналған бірқатар концерттер, көрмелер, шеберлік сабақтары мен іс-шаралардан тұратын шара мәдениеттер мен өркениеттерді біріктіруге ықпал етеді. Симпозиумға Түркиядан 30-дан астам хор және шетелден арнайы шақырылған 11 хор қатысады. Түрік және шетелдік хор ұжымдары Бейоглудың Галат Мевлеви үйі, Әулие Антуан шіркеуі және Гранд Пера сияқты көрікті тарихи орындарында әр кеш сайын 40-тан астам қойылым көрсетеді.Дүниежүзілік хор симпозиумы шеңберінде Ататүрік мәдени орталығының даңқты сахнасында Эстониядан Грэмми сыйлығын алған Эстония филармониясының камералық хоры, Индонезиядан Батавия Мадригал әншілері, Ливаннан Файха ұлттық хоры, Джорджия мемлекеттік университетінің әншілері өнер көрсетеді. АҚШ-тан және Габоннан Ле Чант Сур Ла Лоу, сондай-ақ Испаниядан Лейоя Кантика Корала, Пуэрто-Рикодан Орфеон Сан-Хуан Баутиста, Швециядан София Вокаленсамбль, Тайваньдан Тайбэй филармониясының камералық хоры, Канададан Ванкувер жастар хоры және Түркиядан мемлекеттік хор. Кешкі концерттер барысында шақырылған хор ұжымдары «Өзгеретін көкжиектер» тақырыбымен Симпозиумға арнайы жазылған шығармалардың премьераларын орындайды.

Стамбұлда Хор музыкасы бойынша дүниежүзілік симпозиум өтеді

<a href="https://kyzylorda-news.kz/">Kyzylorda-news.kz.</a> Стамбұлда қызғалдақ маусымы көктемнің келуін білдіреді. Жыл сайын сәуір айында қаланың ең танымал жерлерінің кейбірі көктемгі қызғалдақтармен безендіріліп, хас сұлулықтың мерекесіне айналдырады.&nbsp;Сұлтанахмет алаңында қызғалдақ өсірудің аквакультура әдісімен үлкен қызғалдақ кілемі “тоқылады”. Бұл таңғажайып көрініс жергілікті тұрғындарды да, шетелдік қонақтарды да баурап алады. Осыған ұқсас түрлерді Стамбұлдағы Эмирган тоғайы, Гүлхане саябағы, Йылдыз тоғайы, Соганлы ботаникалық саябағы, Бейкөз тоғайы, Бүйүк Чамлыжа тоғайы, Күчүк Чамлыжа тоғайы, Фетипаш тоғайы және Хидив павильон тоғайында кездестіруге болады. Қызғалдақтың символы түрік өнері мен мәдениетінде ерекше орын алады.Оларды Анадолыға түркілер Орта Азиядағы Памир тауларынан әкелген, қызғалдақтың түп мекені және түрік мәдениетінің ең маңызды символдарының бірі. Қызғалдақ, пиязды және шөптесін өсімдік, 12 ғасырдан бастап қолөнерде сәндік ою ретінде қолданылады. Бұл әдемі, түрлі-түсті гүл Османлы дәуірінде өлеңдер, жарлықтар, әңгімелер және миниатюралық суреттер тақырыбы ретінде сәнге айналды. Қызғалдақ өрнектері мешіттерде, құлпытастар мен сарай әшекейлерінде, сондай-ақ кілемдер мен кілемдер өрнектерінде, кафтандар мен қанық сандықтарда, тіпті тиындарда, жауынгерлік дулығаларда және зеңбірек құймаларында қолданылған.&nbsp;&nbsp;

Стамбұлда қызғалдақтар гүлдейді

2023 жылғы 16 наурызда «Шымбұлақ» тау курортында «могул», «параллельді могул» және «шаңғы акробатикасы» түрлері бойынша фристайлдан FIS Әлем Кубогының финалдық кезеңдерін өткізу шеңберінде БАҚ үшін баспасөз мәслихаты өтті.<a href="https://kyzylorda-news.kz/">Kyzylorda-news.kz.</a> Баспасөз мәслихатының спикерлері болып «Шымбұлақ»ТК бас директоры Ринат Абдрахманов, «ҚР Ұлттық шаңғы қауымдастығы» ФА ЗТБ бас хатшысы Аскар Валиев және FIS Халықаралық шаңғы спорты федерациясының фристайл жөніндегі рейс директоры Андреа Риналди сөйледі.Спикерлер іс-шаралар бағдарламасы туралы, ҚР ұлттық құрама командасының құрамы, қатысушы елдер туралы және могул мен шаңғы акробатикасы трассаларындайындау туралы толықтай айтып берді.«Шымбұлақ» ТК бас директоры Ринат Абдрахмановтың айтуынша, ауқымды дайындық жұмыстары жарыс басталардан 3 ай бұрын басталған.<blockquote>«2022 жылдың жазында қарлы жүйенің жаңа тармағы (2 км) салынды, жаңа жол тұжырымдамасы бекітілді және қосымша жол іске қосылды, ал 2022 жылдың қарашасында FIS өкілдері могул мен шаңғы акробатикасы трассаларынаинспекция жүргізді. 6 ратрак, 4 қарда жүретін көлік жұмылдырылды, 47 000 текше метрден астам қар өндірілді және Қазақстанның әртүрлі өңірлерінен, сондай – ақ жақын және алыс шетелдерден 30-дан астам адам тартылды» деді «Шымбұлақ» ТК Бас директоры.</blockquote>Сондай-ақ, Р.Абдрахманов командалардың 150-ден астам өкілі, оның ішінде 14 елден 70-тен астам спортшы қатысуы жоспарланғанын атап өтті.<blockquote>«Спорт әртүрлі елдердің, мәдениеттер мен ұлттардың адамдарын біріктіретінін бәріміз білеміз. Бүгін Шымбұлақ тау курортының баурайында бүкіл дүние жүзінің мықты спортшылары жиналды. Биылғы жылы біздің курорт әлемнің түкпір – түкпірінен спортшылар мен жанкүйерлерді тағы бір рет қабылдап, қонақжайлылығымызды, жайдарылық пен төзімділік рухын көрсете алуғамүмкіндігін болғанын мақтан тұтады» деді Р.Абдрахманов.</blockquote>ҚР Ұлттық Шаңғы Қауымдастығының бас хатшысы Аскар Валиев жарыс Шымбұлақта 2019 жылдан бері өткізіліп келе жатқанын атап өтті.<blockquote> «Курорттың бірегей жерде орналасуының арқасында біз наурыз айының соңына дейін шаңғы жарыстарын өткізе аламыз. Алғаш рет Алматы қаласында фристайлдың «могул» түрінен Әлем Кубогының кезеңдері 2019 жылы өткізілді, келесі жылы Алматы тағы да фристайлдың «параллельді могул» түрінен FIS Әлем Кубогының кезеңдерін қабылдады, ал 2021 жылы Алматыда фристайлдың «параллельді могул» және «шаңғы акробатикасы» бойынша FIS Әлем Чемпионаты және &nbsp;Әлем Кубогының кезеңдері ұйымдастырылды» деп атап өтті А.Валиев.</blockquote>«Могул» жарысының ресми жаттығулары 15 наурызда басталды. Биылғы жылы трасса Сухой Лог деген жаңа жерде орналасқан. «Жаңа трасса Юлия Галышеваның құрметіне Yuka G деп аталды. Оны спорт әлемінде достары осылай атайды. Спортшылар «могул» бойынша ең әсерлі болып танылуымүмкін бұл трассаға жоғары баға берді» деді ҚР Ұлттық Шаңғы Қауымдастығының бас хатшысы.<blockquote>Біздің құраманың дайындығы туралы айта келе Аскар Валиев Қазақстан өте мықты орындарға ие екенін және басқа елдермен лайықты бәсекелес екенін атап өтті: “Өте лайықты өкілдер. Бізде жақсы өнер көрсететін және трассада жақсы жүретін жас ұрпақ бар. Жарыста Қазақстан атынан 7 спортшы қатысты. «Могул/параллельдімогул» түрлерінде – Аяулым Амренова, Антон Бондарев және Павел Колмаков. «Шаңғы акробатикасы» түріндеЖанбота Алдабергенова, Аяна Жолдас, Роман Иванов және Шерзод Хаширбаев. Ұйымдастыруда бізге серіктестеріміз бен демеушілеріміз көмектеседі және қолдау көрсетеді”.&nbsp;Қазақстандық құраманың толық дайындығын Халықаралық Шаңғы Спорты Федерациясының (FIS) өкілі рейс директоры Андреа Ринальди атап өтті: &nbsp;«Бірінші кезекте осындай іс-шараны ұйымдастырғаны үшін алғыс айтқым келеді. Мен үйлесімді команданы, трассалардың дайындық деңгейін бөлек атап өткім келеді. Бүгін мұнда әлемдегі ең мықты спортшылар жиналды. Жыл сайын – бұл жаңа старт. Және әр жолы ол қайталанбастай, сондықтан бізге әрқашан процестің өзі қызықты» деп қосты Андреа.</blockquote>Андреаның айтуынша, Қазақстанда спортшылардың өте перспективті ұрпағы өсіп келеді және фристайлдың лайықты болашағын құруға үлкен мүмкіндік бар.<blockquote> «Мен мұнда балаларға арналған бағыттың жақсы дамып келе жатқанын мақтан етемін. Мұнда Snow Park және мектеп салынды. Бізге бұл беталыс ұнайды. Біз Қазақстанда қалып, одан әрі бірге қызмет жасауға қуаныштымыз» деді рейс директоры Андреа Риналди.</blockquote>Іс-шара соңында Parimatch Kazakhstan Қазақстанда спортты дамыту үшін негіз ретінде әлемдік брендтің тәжірибесі туралы айтты:<blockquote> «Қазақстанның ең танымал тау курорты – Шымбұлақта фристайлдан Әлем Кубогын өткізу – ойлап табуға мүмкін болған ең үздік «комбо»! Parimatch еш күмәнсіз осы ауқымды іс-шараның серіктесі болу туралы шешім қабылдады. Бұл біздің «Барлығына Спорт!» деген ұстанымызбен және елімізде спортты дамыту және қолдаудеген миссиямызбен байланысады. Шаңғы, сноуборд – бұл мегаполистің әр тұрғынын бей-жай қалдырмайды. Егеркөрген финттерден кейін кем дегенде екі адам шаңғымен сырғанауды шешсе – бұл біз үшін кішкене жеңіс болады!» деді Parimatch Kazakhstan бренд-маркетинг жөніндегі директоры Надежда Рязанцева.</blockquote>

Фристайлдан FIS Әлем Кубогының финалдық кезеңдері

<a href="https://kyzylorda-news.kz/">Kyzylorda-news.kz.</a> 2023 жылғы 17 наурыз, Алматы қ. – AM Best агенттігі (бұдан әрі – Агенттік) 2023 жылғы 16 наурыздағы ресми мәлімдесінде «Халық-Life» АҚ (бұдан әрі-Компания) қаржылық тұрақтылық рейтингін «B+»-ден «B++»-ге дейін, сондай-ақ эмитенттің ұзақ мерзімді кредиттік рейтингін «bbb –» – ден &nbsp;«bbb»-ге дейін көтерді. Рейтингтер бойынша болжам «Тұрақты».Компанияның ұзақ мерзімді рейтингтері рейтингтердің халықаралық классификаторы бойынша Қазақстан Республикасындағы өмірді сақтандыру компаниялары арасында ең жоғары болып табылады.Рейтингтің жоғарылауына Компанияның соңғы жылдардағы сенімді инвестициялық кірістілікпен қамтамасыз етілген операциялық көрсеткіштерінің жақсаруы ықпал етті. Сонымен қатар, 2022 жылы Компания меншікті капиталдың кірістілігін 2021 жылмен салыстырғанда 13,8 пайызға (21,8пайыздан 35,6 пайызға дейін) ұлғайтты. Бұл көрсеткіштің бес жылдағы орташа өлшенген мәні (2018-2022) шамамен 31% құрады.AM Best болашақта Компания өмірді сақтандыру және аннуитеттер портфелінің өсуіне, сондай-ақ өзінің операциялық шығындарын қысқарту үшін қабылдайтын іс-қимылдар салдарынан жоғары операциялық нәтижелерді көрсетуді жалғастырады деп күтеді.Сонымен қатар AM Best &nbsp;сарапшылары өсу жоспарларын қолдау үшін пайданы жеткілікті көлемде ұстауға мүмкіндік беретін сенімді операциялық нәтижелер мен дивидендтік саясатқа негізделген Компания капиталының жеткіліктілігін жоғары деңгейде бағалайды. AM Best, болашақта Компания капиталының жеткіліктілігі осы деңгейде сақталады деп болжайды.<blockquote>«Біз беделді халықаралық агенттіктің біздің жұмысымызды жоғары бағалағаны үшін өте қуаныштымыз. Халықаралық агенттіктің қабылданған рейтингтік әрекеттері Компанияның дұрыс стратегиялық бағытты ұстанғанын және оның тиімділігін тағы да растай түседі. Бұл жоғары баға Компанияның ішкі нарықтағы қатысуды кеңейтуге, сондай-ақ Компанияның клиенттер базасын ұлғайтуға қосымша әсер етеді деп санаймыз. Жоғары рейтингтер Компанияның нарықтағы мықты жайғасымын әрі өз міндеттемелері бойынша жауап беруге қабілеті жоғары екенін көрсетеді» деп түсіндірді Басқарма Төрайымы Жанар Жұбаниязова.</blockquote>2023 жылғы 1 қаңтардағы жағдай бойынша Компания қазақстандық өмірді сақтандыру нарығында барлық қаржылық көрсеткіштері бойынша көшбасшы болып табылады. Сақтандыру сыйақылары бойынша нарық үлесі 33 пайыз, активтер бойынша – 31 пайыз, меншікті капитал мөлшері бойынша – 32 пайыз, таза пайда бойынша 27 пайыз көлемінде.

AM Best халықаралық рейтингтік агенттігі «Халық-Life» АҚ қаржылық тұрақтылық рейтингін және ұзақ мерзімді кредиттік рейтингін көтерді

<a href="https://kyzylorda-news.kz/">Kyzylorda-news.kz.</a> Сырдың даңқты шайыры Омар Шораяқұлы бабамыздың туғанына – 145 жыл. Осыған орай Қызылорда қаласындағы Асқар Тоқмағамбетов атындағы мәдениет үйінде «Орамды ойдың омары» атты жас жыршылардың облыстық байқауы өтті. Оған Қызылорда қаласы мен аудандардан жас термешілер жыр додасына түсті.Ақынның бай мұрасын насихаттап, ұрпақ жадында жаңғырту мақсатында өткен байқау Қызылорда қаласы әкімдігінің қолдауымен, облыстық халық шығармашылығын дамыту және мәдени-продюсерлік орталығы, қалалық мәдениет және спорт бөлімі, Айтыс ақындары мен жыршы-термешілердің халықаралық одағы Қызылорда облысы бойынша филиалының бірлесе ұйымдастыруымен, сондай-ақ Омар Шораяқұлының ұрпақтарының демеушілігімен өткізілді.Жыр байқауына арнайы қатысқан қала әкімінің орынбасары Жанмұрат Сейілов жиылған жұртшылықты көрісу күнімен құттықтап, қатысушыларға сәттілік тіледі.<blockquote>«Кез келген ұлттың өзіндік кескін-келбеті мен болмыс-бітімін айқындайтын ұғымды оның өзіне тән ұлттық мәдениеті десек, өнер сол мәдениеттің ең маңызды құрамдас бөлігі саналады. Сондықтан өнердің қай түрі болмасын ата-бабамыздан қалған асыл мұрамыз, таусылмас қазынамыз. Соның ішінде «Сыр елі – жыр елі» деп айдар таққан осы топырақтан түлеген ұрпақтың қанға сіңген жыраулық өнерден алшағы жоқ екені даусыз. Өздеріңізге белгілі, Сыр елінде өзіндік тарихы қалыптасқан 3 жыршылық мектеп бар. Осы ретте, жүз жырау жүзіктеген Қармақшы өңірінен шыққан Омар Шораяқұлының бай мұрасын насихаттау арқылы жас ұрпақ жадында жаңғыртуды мұрат еткен бұл байқаудың берері мол деп білемін», – деді ол.</blockquote>Жыр бәйгесінде шайырдың ұрпағы, мәдениет саласының үздігі, Қармақшы ауданының Құрметті азаматы, Алашқа танымал ақын Серік Ыдырысов жас дарындарға батасын беріп, өнердегі жолдарының даңғыл болуына тілегін білдірді.Байқауға жырау, ҚР Мәдениет қайраткері Руслан Ахметов, облыстық халық шығармашылығын дамыту және мәдени-продюсерлік орталығының жыраулармен жұмыс секторының меңгерушісі Майра Сәрсенбаева, белгілі жырау Марат Сүгірбай қазылық жасап, жыршылардың өнерін сарапқа салды.Сайыс қорытындысында бас жүлде мен «Жыршы бала – 2023» номинациясын қызылордалық жас жыршы Нөсер Айдосұлы қанжығасына байласа, қызылордалық Аяулым Абдумажит пен қармақшылық Мәди Елдес І орынды иеленді. Сондай-ақ, аралдық Инабат Толғанбекова мен қармақшылық Талант Балтабай ІІ орынды еншіледі. Жалағаш ауданынан келген Дәулетбек Бақытбек, қармақшылық Айдана Амантай, қызылордалық Қарақат Әбдікерім жүлделі ІІІ орынды өзара бөлісті. Ал қызылордалық Аңсаған Ділдәбекқызы мен Жанұзақ Рысбек және Досымжан Құрманғалиев, қармақшылық Арай Оңғарқызы арнайы жүлдеге ие болды.Жеңімпаздар мен жүлдегерлерге Омар Шораяқұлының ұрпақтары атынан қаржылай сыйлықтар табысталды. &nbsp;

Жас жыршылардың облыстық байқауы өтті

<a href="https://kyzylorda-news.kz/ru/">Kyzylorda-news.kz</a>. Қызылордалық кәсіпкер «Бастау» жобасында алған біліктілігін бизнесте қолданып, қызмет көрсету сапасын жетілдіре түсуде. &nbsp;Қызылордалық Салтанат Қылышбекқызы он жылдан бері гүл өсіру, гүлмен әрлеу, көркемдеу саласында еңбек етеді. Бұл бизнесте сұраныстың жоғары екенін байқаған Салтанат гүл дүкенін ашу мақсатында Кәсіпкерлер палатасынан кеңес алады, «Бастау» жобасын онлайн оқып, бизнесте біліктілігін арттырады. Осылайша «Еңбек» бағдарламасы аясындағы гранттық конкурсқа қатысып, қайтарымсыз қаржыға қол жеткізеді.Гүлді баптап өсіру, күтімін жасау екінің бірінің қолынан келетін іс емес. Себебі гүл көп нәрсені ұната бермейді. Тіпті гүл қоятын орынды да алдын ала таңдап алу керек. Суды көп ішпейтінін, салқын жерді ұнатпайтынын жапырағындағы өзгерістен бірден аңғаруға болады. Жалпы гүл өсірудің қияметін мамандардан біледі. Олар тіпті қай гүл аса күтімді қажет етеді, қай гүл көлеңке жерде тұра береді, соның бәрін біліп тұрады. Ал үйдегі қырық шақты гүлден бөлек гүл өсіру ісін кәсіп қылу қиынның қиыны. Одан да өзге кәсіп түрін таңдаған тиімді ме дерсіз. Қай іске де махаббат керек.<blockquote>– «Бастау» жобасын онлайн бітіріп алғаннан кейін жобамды гранттық комиссия алдында қорғадым. Осылайша 555 600 грант ұтып алдым. Бұл кезге дейін Қызылорда қаласының орталығында жұмыс істеп келдім. Арманым гүлдер дүкеннін ашу еді. Оқудың арқасында өз бизнесімді аштым. Қазір «Шұғыла» мөлтек ауданында дүкенім бар. Тұтынушылар риза, қуанышты. Табысым да, шүкір, жақсы, – дейді жас кәсіпкер Салтанат Қылышбекқызы.</blockquote>Кәсіпкер бүгінде «Бастау» жобасында алған біліктілігін бизнесте қолданып, қызмет көрсету сапасын жетілдіре түсуде. Сыйлық түрлерін жоғары талғаммен жасайды. Бұл жерде оның бейнелеу өнері мамандығы бойынша алған кәсіби білімі де көмектесуде.«Шұғыла» мөлтек ауданынан ашылған гүл дүкеніне келушілер қарасы да басым. Әр тұтынушының көңілінен шығу Салтанат үшін де жоғары мәртебе. Қызылордалықтарға кәсіпкер түрлі раушан гүлдерімен қоса, лала, экзотикалық гүлдерді де ұсынуда. Алдағы уақытта үй жағдайында өсірілетін гүл түрлерінің көлемін арттыруды жоспарлауда.<blockquote>– Бүгінде үй жағдайында өсірілетін гүлдерге сұраныс жоғары. Барлығының да талғамы бөлек. Тұтынушылар гүлдің кішісін емес, үлкенін алғысы келеді. Ал ол гүлді өсіру оңай болмасы анық. Әрі қарайғы жұмыс та шаш етектен. Күтімді ерекше қажет ететін гүл түрлері көп. Уақыт тауып, гүлмен сөйлесіп тұрған да артық болмас еді. Тұрғындардың гүлге сұранысы жоғары екенін дүкенді ашқан кезде аңғардым. Болашақта гүл санын көбейту жоспарда бар, – дейді кәсіпкер.</blockquote>Айта кетейік, биыл Қызылорда облысында 2181 азамат «Бастау» жобасы бойынша онлайн біліктілігін жетілдірді. Оқыған азаматтардың 42 пайызының жобасы, нақтырақ айтқанда, жалпы құны 515,9 млн теңгені құрайтын 914 жоба қаржыландырылды. Басым бөлігі «Еңбек» бағдарламасы аясында қайтарымсыз қаржыға ие болған.

Салтанат Қылышбекқызы : Қайтарымсыз грант арманыма жеткізді

Айдос Есмағамбетов: Жастар да кез келген саланы жүрексінбей игеріп кетеді

<a href="https://kyzylorda-news.kz/">Kyzylorda-news.kz.</a> Күні кеше өткен Мәжіліс және барлық деңгейдегі мәслихат депутаттарын кезектен тыс сайлау науқанында Қызылорда облысының халқы бірліктің, тұтастықтың ерен үлгісін көрсетіп, республика бойынша сайлауға қатысу деңгейі 67,21 пайызбен бірінші орынға тұрақтады, деп жазады Қызылорда облысы әкімінің баспасөз қызметі.&nbsp;Бұл туралы облыс әкімі Нұрлыбек Нәлібаев актив отырысында хабарлады. Аймақ басшысы Сыр жұртшылығы қай кезде де Президент Қасым-Жомарт Кемелұлының жаңа бастамаларына қолдау білдіретінін айтты. Жерлестеріміздің өзгерістерге қадам жасауда айрықша белсенділік танытқанына, саяси маңызды науқандарға белсене қатысқанына шынайы алғысын білдірді.Актив отырысында Нұрлыбек Машбекұлы 2020 жылдан бастап денсаулық сақтау басқармасының басшысы қызметін атқарып келген Пазылов Сәбит Бексейітұлы «Әлеуметтік медициналық сақтандыру қоры» акционерлік қоғамы Алматы облыстық филиалының директоры қызметіне тағайындалғанын айтты.<blockquote>«Сәбит Бексейітұлы – білімді, білікті хирург ретінде кәсіби ортада мойындалған, емделушілердің, елдің алғысына бөленген бірегей кадр. Ол облыс тұрғындарын сапалы және қолжетімді медициналық қызметпен қамтамасыз етуге бағытталған бірқатар маңызды жобаның жүзеге асырылуына дәнекер болды. Өңір медицинасының өзекті мәселелерін республикалық мінберден батыл айтып, республикалық деңгейде қаражат бөлінуіне де өзіндік үлесін қосты. Ол салаға жетекшілік еткен кезде Жалағаш ауданында 100 орындық аурухана, Қызылорда қаласында 200 төсекке арналған жылдам тұрғызылатын модульдік аурухана, Қазалы ауданында ауысымына 250 келушіге арналған емхана іске қосылды. Арал, Жалағаш, Жаңақорған аудандарының елді мекендерінде 4 дәрігерлік амбулатория ел игілігіне пайдалануға берілді» деді аймақ басшысы.</blockquote>Сыр өңірінің денсаулық сақтау саласына қосқан үлесі үшін Сәбит Пазыловқа Қызылорда облысының Құрмет грамотасы табысталды.Денсаулық сақтау саласының ардагері Тұрғанбай Маханов пен облыстық Қоғамдық кеңес төрағасы Әріп Хожбанов әріптесін жаңа қызметке тағайындалуымен құттықтап, сәттілік тіледі.Актив отырысында 2-3 наурыз күндері Қызылорда облысында алғаш рет өткізілген «Қазақстан Республикасы Ұлттық қауіпсіздік комитеті барысы» республикалық турнирін ұйымдастыруға белсенді атсалысқан азаматар марапатталды. ҚР ҰҚК Қызылорда облысы және Байқоңыр қаласы бойынша департаментінің бастығы Болат Қалмырзаев байрақты бәсекені жоғары деңгейде өткізгені үшін алғыс білдіріп, комитет Төрағасының Алғыс хаттарын табыс етті.&nbsp;

Сыр өңірі дауыс беру бойынша республикада көш бастады

<a href="https://kyzylorda-news.kz/">Kyzylorda-news.kz.</a> Егемендік алғалы Қазақстанда оң өзгерістер етек алып, экономиканың едәуір өскені мұқым елге мәлім. Қазіргі күнімізді кешегі тоқырау тоқсаныншы жылдармен мүлдем салыстыруға келмейді. Осы жылдар аралығында көрші елдермен келісімге келіп, шекарамыздың да қадасын қағып, нақтылап алдық. Сонымен қатар кезіндегі орысша аталып кеткен көше, ауыл, аудан, тіпті қала аттарына қазақы атаулар беріп, мемлекеттік тілді қазақ тілі етіп бекіттік.Халқының 96 проценті қазақ ұлтынан тұратын Қызылорда облысы ел үшін атқарылып жатқан келлі істердің әркез алдында келеді. Иә, біздің өңір тоғыз жолдың торабында орналасқан құтты мекен. Ауыл шаруашылығы мен мал ұстауға өте қолайлы бұл өлкенің сауда-саттық бағыты да жақсы дамыған. Оған үстімізден өтіп жатқан «Батыс Қытай-Батыс Еуропа» халықаралық транзиттік автожолы да сеп болып отыр. Тақтайдай төселген трассамен астымыздағы темір тұлпарымыз тапжылмай жүріп, діттеген жерімізге жылдам жетудеміз. Бұрынғы қырық жамау, шұңқыры қасқырдың апанындай тесік жолдан құтылғанымызға да біршама уақыт болды. Талай ырғалып, жете алмай шаршаған қиыншылықтарымыздың барлығы дерлік артта қалды. Бұл да болса халыққа жасалған жақсылықтың бірі деп білеміз. Бақытымызға орай жаңа жөндеуден өткен Ұлы Жібек жолы халыққа әлі талай қызмет көрсетері анық.Осы жолдың бойында ауданға қарасты бірнеше ауылдық округтер орналасқан. Әр ауылдың тұсында ауыл аттары жазылған белгілер бар. Сол белгілер ертең алынып тасталатын баннер яки плакат емес. Ол тұтас бір елдің атын айшықтап тұрған белгі болғандықтан, оның дизайны мен сапасы барынша ескерілу керек. Мәселен, Бала би ауылындағы кіре беріс қақпаны тілге тиек етуге болады. Аталған ауылдың кіре берісіндегі хан сарайының қақпасындай етіп соғылған әлгі белгіні көргенде еріксіз тамсанасың. Ұлттық нақышта бой көтерген қақпалардың сапасы мен сипатына сын айта алмайсың. Көрген жанды өзіне тартып, артындағы ауылға атбасын еріксіз бұрғызады.Бүгінде көше мен елді мекен атауларының төңірегінде қордаланып қалған мәселе жетерлік. Оның үстіне кейінгі кездері көшелерге елге еңбегі сіңбеген, беймәлім адамдардың аттарының берілуі жайлы да баспасөзде жиі айтылып жүр. Жалпы көшелерге ат беру қоғамның әр саласын дамытуға сүбелі үлес қосқан, елін-жерін жаудан қорғауда еңбегі сіңген бабалар мен отаншыл, елжанды азаматтарды ел есінде мәңгі сақтау мақсатын көздейді. Алайда бұл үдеден шықпайтын жандардың есімі көше атауына беріліп жатқандығы да мәлім. Ол былай тұрсын бұрындары көше атауы жазылған тақтайшалардың үлгісі мен өлшемінде де бірізділік байқалмайтын. Қазір бәрі рет-ретімен қалыпқа келуде. Яғни, көше атаулары жазылған тақтайшалардың үлгісі, түсі, өлшемі бірдей орналастырылып, аудан көркі ажарлана түсуде.«Батыс Қытай-Батыс Еуропа» халықаралық транзиттік жол болғандықтан бұл трассамен тек еліміздің азаматтары ғана емес, шетелдіктерде жүріп жатыр. Ауданды айналып өтетін сан мыңдаған жолаушылар орталыққа кіріп көрікті жерлерімізді көрмейтін болғандықтан Шиеліні осы белгілер арқылы танып, өзге аудандармен салыстыратыны анық. Сол себепті де, белгілерімізді келген мейманның есінде қаларлықтай етіп, ұлттық сипат пен Сыр елінің символын кірістіріп қайта жасауымыз қажет секілді. Шиелінің өз стилін қалыптастыруда да бұл белгілердің алар орны ерекше болар еді .Бет қатталып жатқанда: Еңбекші, Жиделі, Қосүйеңкі ауылдарына баратын айналма тым ұзақ болып тұр. Төңкеріс ауылынан асып барып бұрылатын бұрылысты, Еңбекші ауылының тұсынан қайыруды қарастырса екен деген ниетіміз бар. Әйтпесе, төрт ауыл мен Қаратаудың етегіндегі қаншама өндіріс орындарының көліктері бес шақырым жерді құр айналуға мәжбүр.

Көркі кірген белгілер

<a href="https://kyzylorda-news.kz/">Kyzylorda-news.kz.</a> Таңғы жаттығу мен жүгіруді күн сайын қалт жібермейтін бұл спортшыны сырдариялықтар жақсы біледі. Саламатты өмір салтын ұстану бойынша өзгеге үлгі көрсете білетін Бегалы Серікбаевты орталық стадионнан жиі кезіктіреміз. Денсаулықты барынша күте білетін оның басты міндеті – жастайынан жанына серік еткен спортты бір сәтке де тастамау екені айдан анық. Кезекті рет жаттығу жасау барысында жолыққанымызда ол бізге дене шынықтыру мен спортқа байланысты біршама маңызды ақпаратты кеңінен айтып берген болатын.Күнделікті орталық стадионға жаттығу үшін келетін көпшілікке ақыл-кеңесін аямайтын Бегалы Серікбаевтың биыл 60 жасқа толатындығына ешкім сене қоймас. Дене бітімін қаз-қалпында сақтауға барын салатын кейіпкерім – Тереңөзектің тумасы. Жылдар бойы күрес түрлерімен айналысқан спортшы аудан мерейін тасыта білген. Алғашқы жаттықтырушысы Сұлтан Сексенбаев 15 жастағы бозбаланың томағасын сыпырады. Айта кетейік, Бегалы аға №35 М.Калинин атындағы орта мектептен білім алып, кәсіптік колледждің де шеберханасында шыңдалады. Кейіннен, Отан алдындағы борышын өтеген Бегалы аға үлкен міндетті абыроймен атқарып, туған жерге оралады.<blockquote>«Біздің балалық кезең небір қызыққа толы еді. Оң-солымызды тани бастаған кезімізде спортпен айналысуға бел будым. Еркін күреспен тұрақты түрде шұғылданғаныммен, сан түрлі күрестің қыр-сырына қанықтым. Тұрақты түрде жаттығуға келетін палуандар арасында бәсекелестік жоғары болатын. Тек аудандық жарыстардан топ жарған спортшы ғана облысқа жолдама алатын. Өз кезегінде Жұмабек Дәрменов, Ақылбек Нұрахатов, Жорабек Шамкенов сынды замандастарыммен бірге аудан намысын өз деңгейінде қорғай білдім. Күресті жаныма серік ете жүріп, кросс жүгіруге дағдыландым. Расында, әлі күнге дейін жүгіруді тастаған емеспін. Таңғы жаттығу жасау – мен үшін үйреншікті әдетке айналған», – дейді кәсіби спортшы.</blockquote>Негізінен, Бегалы Серікбаев 40 жылға жуық уақытын ұстаздық қызметке арнап келеді. Әскерден оралған жас спортшы Сырдария ауданы Асқар Тоқмағамбетов ауылындағы білім ошағына жұмысқа орналасады. Әсілінде, теориялық білімді тереңнен игеру үшін ұлағатты ұстаз Қарағанды қаласындағы педагогикалық институтқа оқуға түседі. Сарыарқа төрінде дене шынықтыру пәні бойынша үздік оқытушылардан тәлім алған ардақты жан сол кездегі №36 А.Жданов атындағы орта мектепте қызмет ете бастайды. Кейіннен, өзі білім алған қарашаңырақ – №35 М.Калинин атындағы орта мектепке ауысады. Мұнда 5 жыл халық баласына білім беріп, жан-жақты спортқа баулиды. Бір жылдары жеке кәсіпкерлікпен айналысқан Бегалы аға еңбекпен тапқан нанның қадірін жақсы біледі. Осы күні №210 О.Әбілпаттаев атындағы орта мектепте оқушыларға сабақ беретін Бегалы Серікбаев өз ісінің шебері десек, қателеспейміз.&nbsp;<blockquote>«Иә, ауданға қарасты 4 білім ошағында еңбек ете білгеніме қуаныштымын. Оқушы алдында үлгілі болу мақсатында ерік-жігерімді спортқа арнап келемін. Күнделікті жүріп, жүгіріп дағдыланбаған адам әуелі ерте тұрып қарапайым дене жаттығуларын жасау арқылы денсаулықты қалыптастыру керек. Ең алдымен, жаттығу жай жүруден басталады. Содан кейін адам 100 және 200 метрге жүгіруге ауысып дағдылануға болады. Жаттығуға қалыптасқан кезде 200 метр жүгіріп, 100 метр жүруге машықтанған дұрыс. Толықтай жаттығу мен жүгіруге ағза қалыптасқан уақытта таңғы ұйқыдан емін-еркін оянуға мүмкіндік туады. Жаз мезгілінде таңғы 4.00-де жүгіруге шығамын. 15-18 минутта үлкен көпірге барып, осынша уақытта стадионға келемін. Содан кейін 1 сағат бойы бірнеше жаттығу жасаймын», – дейді білікті маман.</blockquote>Қазіргі уақытта орталық стадионда таңғы және кешкі жаттығу жасайтын жандар қатары көбейген. Жақында халықаралық «Қазақ тілі қоғамы» ҚБ Сырдария аудандық филиалының төрағасы Шаһарбек Нұрсейітовтің демеушілігімен орта және аға буын өкілдері арасында спорттық жарыс ұйымдастырылған. Аталған жарыстың талапқа сай өтуіне Бегалы Серікбаев өзіндік үлесін қосты.&nbsp;&nbsp;Негізінен, ұлағатты ұстаз жаңартылған білім мазмұны бойынша жас мамандарға бағыт-бағдар беріп келеді. Ұстаздық қызметте зор тәжірибе жинақтаған ардақты ағаның зайыбы – Жанар Нағызханқызы да педагогика саласының білікті майталманы. Отбасындағы 4 ұл, 1 қыздың аяулы анасы математика пәні бойынша жас өрендерді қажетті білім нәрімен сусындатып келеді.<blockquote>«Шын мәнінде, осы спорт саласында жүріп, көптеген жетістіктерге қол жеткіздім. Президенттік көпсайыстан жүлделі орындарды алған сәттерім әлі есімде. Күнделікті білім саласында сан түрлі өзгерістер орын алады. Әркез оқушыға сабақ беруге мұқият дайындықпен барамын. Денсаулықты күтіп ұстаудағы ұстанатын қатаң ережелерді жастарға айтуға жалықпаймын. Анығын айтқанда, 45 минут ішінде бала ұстаздан өзіне керекті білімді ала білген жөн», – дейді ұлағатты ұстаз.&nbsp;Қай кезде де денсаулықтың қалыпты жағдайда болуына аса мән беретін Бегалы Серікбаевтан жас ұрпақтың әлі талай үйренері көп деп білеміз. Ардақты аға, ақылман ұстаздың еңбегі барынша елене берсін демекпіз.</blockquote>

Қазақстан және Қызылорда облысының жаңалықтары