<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ардақ Ибраимовтың төрағалығымен мәжіліс өтті. Мәжілістің күн тәртібінде теміржол саласы мен инфрақұрылымды дамыту, &nbsp;макроэкономикалық көрсеткіштердің орындалуы және өзге де қосымша мәселелер қаралды.Жалағаш ауданы аумағы арқылы 47 шақырым теміржол желісі өтеді. Теміржол бойында 2 станция мен 1 разъезд орналасқан. Жалағаш станциясы арқылы тәулігіне 5 жұп, яғни 10 пойыз қатынайды.Қазіргі таңда Жалағаш теміржол вокзалының құрылыс жұмыстары жүргізілуде. Бүгінгі күні құрылыс жұмыстары аяқталу сатысына жетті.Сонымен қатар, мәжілісте Конго-Қырым геморрагиялық қызбасының алдын алу, зиянкестерге қарсы залалсыздандыру жұмыстарын жалғастыру мәселелері талқыланып, жауапты сала басшыларына нақты тапсырмалар жүктелді.<blockquote>"Конго-Қырым геморрагиялық қызбасының алдын алу бағытындағы жұмыстарды күшейту қажет. Елді мекендерде залалсыздандыру шараларын сапалы әрі мерзімінде жүргізіп, олардың нәтижелілігіне тұрақты мониторинг жасауды тапсырамын. &nbsp;Бұл мәселе тұрақты бақылауда болуы тиіс", – деді аудан әкімі А.Ибраимов.</blockquote>2026 жылдың алғашқы 5 айының қорытындысы бойынша ауданның макроэкономикалық көрсеткіштерінде оң өсім қалыптасты.Атап айтсақ, өнеркәсіп өнімінің көлемі 114 пайызға орындалып, 16 167 млн теңгені құрады. Оның ішінде өңдеу өнеркәсібінде 3 810 млн теңгенің өнімі өндіріліп, көрсеткіш 104,8 пайызға жетті. Негізгі капиталға тартылған инвестиция көлемі 8 544 млн теңгені құрап, 107,6 пайызға орындалды.Ауыл шаруашылығы өнімінің көлемі 2 717,2 млн теңге болып, 101,3 пайызды құрады. Пайдалануға берілген тұрғын үй көлемі 7 812 шаршы метрге жетіп, жоспар 101,1 пайызға орындалды. Бөлшек сауда көлемі 1 363,7 млн теңгені құрап, 100,1 пайыз болды. Құрылыс жұмыстарының көлемі 4 624 млн теңгеге жетіп, 114,3 пайызға орындалды.Мәжіліс қорытындысымен жауапты сала басшылары мен кент және ауылдық округ әкімдеріне күн тәртібінде қаралған мәселелердің сапалы әрі уақытылы орындалуын қамтамасыз ету жөнінде нақты тапсырмалар берілді.<img src="https://knadmin.beoblood.kz/uploads/Zhala_ash_temir_zhol_salasy_7802416e50.jpg" alt="Жалағаш темір жол саласы.jpg">

Мәжілісте макроэкономикалық көрсеткіштердің орындалуы мен өзге де мәселелер сараланды

<a href="https://kyzylorda-news.kz/">Kyzylorda-news.kz</a> Сырдария ауданының әкімі Берік Сәрменбаевтың төрағалығымен мәжіліс өтті. Мәжілісте теміржол саласы мен инфрақұрылымын дамыту мәселесі қаралды.Мәжілісте Тереңөзек кентінде салынып жатқан теміржол вокзалының құрылыс жұмыстарының барысы жан-жақты талқыланды.Бүгінгі таңда ғимараттың кіреберіс баспалдағының астыңғы іргетасы құйылып, электр желілерін қосу, есік-терезе откостарын әрлеу жұмыстары жүргізілуде.&nbsp;Аталған жоба аудан тұрғындары үшін аса маңызды. Себебі аудан аумағы арқылы өтетін 46 шақырымдық теміржол желісі халықтың еркін қатынауына мүмкіндік береді. Жаңа вокзал пайдалануға берілгеннен кейін жолаушыларға көрсетілетін қызмет сапасы артып, қолайлы жағдайлар жасалмақ. Сонымен қатар нысанның іске қосылуы ауданның көлік-логистикалық әлеуетін арттырып, Тереңөзек кентінің инфрақұрылымдық дамуына оң әсерін тигізетін болады.<blockquote>– Жаңа вокзал халыққа сапалы қызмет көрсетіп қана қоймай, ауданның әлеуметтік-экономикалық дамуына оң ықпал етеді. Бұл нысан пайдалануға берілгеннен кейін тұрғындардың қатынауына қолайлы жағдай жасалып, жолаушыларға көрсетілетін қызмет сапасы артады. Сонымен қатар вокзалдың іске қосылуы ауданның көлік әлеуетін арттырып, елді мекеннің келбетін жақсартуға және әлеуметтік-экономикалық дамуына оң әсерін тигізеді. Сондықтан құрылыс жұмыстарының сапасына ерекше мән беріп, барлық жұмыс белгіленген талаптарға сәйкес әрі уақытылы орындалуы қажет. Біз үшін ең бастысы – тұрғындардың игілігіне қызмет ететін нысанды сапалы әрі мерзімінде ел игілігіне беру, – деді Берік Әбдіғаппарұлы.&nbsp;</blockquote>Сонымен қатар мәжілісте «Ауыл аманаты» жобасының жүзеге асырылу барысы, «Таза Қазақстан» республикалық экологиялық бағдарламасы аясында атқарылып жатқан жұмыстар, әлеуметтік желілердегі ақпараттық белсенділікті арттыру, мектеп бітіруші түлектерге аттестат тапсыру рәсімінде қауіпсіздік шараларын қатаң сақтау және суға түсу маусымындағы қауіпсіздік шараларын күшейту мәселелері қаралды.Жиын қорытындысында аудан әкімі жауапты мекеме басшыларына көтерілген мәселелер бойынша нақты тапсырмалар жүктеп, олардың уақытылы әрі сапалы орындалуын қамтамасыз етуді міндеттеді.<img src="https://knadmin.beoblood.kz/uploads/Syrdariya_temirzhol_salasy_2_02f84e2de1.jpg" alt="Сырдария теміржол саласы 2.jpg">

Жолаушыларға көрсетілетін қызмет сапасы артып, қолайлы жағдай жасалмақ

<a href="https://kyzylorda-news.kz/">Kyzylorda-news.kz</a> Қармақшы ауданының әкімі Жандос Еркінбектің төрағалығымен кезекті мәжіліс өткізіліп, облыс әкімінің төрағалығымен өткен жиында көтерілген мәселелер мен ауданның дамуына қатысты өзекті бағыттар қаралды.Күн тәртібінде теміржол саласын дамыту және инфрақұрылымдық жобалардың орындалу барысы талқыланды. Осыған сәйкес Мемлекет басшысының тапсырмасы және облыс әкімінің қолдауымен жүргізіліп жатқан Жосалы мен Төретам кенттерінің теміржол вокзалдарын қайта жаңғырту жұмыстарының барысы сараланды. Бұл бағытта жауапты сала басшылары мен кент әкімдері тарапынан атқарылып жатқан жұмыстар бойынша баяндап өтті.<blockquote>«Вокзал инфрақұрылымын заманауи талаптарға сай жаңғырту, аумағын толық абаттандыру және барлық жөндеу жұмыстарын бекітілген мерзімде, жоғары сапада орындалуын қамтамасыз етіңіздер,- деді аудан әкімі.</blockquote>Күн тәртібінде облыстық маңызы бар «Жалағаш – Жосалы» автомобиль жолының 46 км теміржол арқылы өтетін көпірдің күрделі жөндеу жұмыстарының барысы да қаралды. Бұл бойынша жобаның сапалы орындалуы мен белгіленген мерзімде аяқталуын тұрақты бақылауда ұстау тапсырылды.Жалпы 2026 жылдың бес айының қорытындысымен аудан бойынша барлық макроэкономикалық көрсеткіштерде оң динамика қалыптасып отыр. Алдағы уақытта да барлық көрсеткіштерде оң динамиканы сақтау және жоспарланған межелерге қол жеткізу бағытында тапсырмалар берілді.Сондай-ақ аудан аумағындағы санитариялық-эпидемиологиялық ахуал назардан тыс қалмады. Жандос Еркінбек Конго-Қырым геморрагиялық қызбасы бойынша аудандық санитариялық-эпидемиологиялық бақылау басқармасына, аудандық ветеринариялық станциясына, кент, ауылдық округ әкімдеріне тұрғындар арасында түсіндіру жұмыстарын күшейтуді, аулалар мен мал қораларын тазалау жұмыстарын ұйымдастыруды және кенеге қарсы профилактикалық шараларды қатаң бақылауға алуды тапсырды.Барлық жауапты мекемелер мен сала басшыларына берілген тапсырмалардың уақытылы әрі сапалы орындалуын қамтамасыз етуді ескертілді.

Жобаның сапалы орындалуы мен белгіленген мерзімде аяқталуын тапсырды

<a href="https://kyzylorda-news.kz/">Kyzylorda-news.kz</a> Үкімет отырысынан кейін облыс әкімі Мұрат Ергешбаевтың төрағалығымен мәжіліс өтіп, онда теміржол саласы мен инфрақұрылымды дамыту мәселесі талқыланды. Бұл жиындағы бағыттар бойынша қала әкімдігінде шаһар басшысы Нұржан Ахатов тиісті сала жетекшілеріне бірқатар тапсырмалар жүктеді.&nbsp;Қалаға келетін қонақтар мен транзиттік жолаушылар бас шаһардың алғашқы көрінісін теміржол аумағынан бастап көреді. Бұл тұрғыда күрделі жөндеуден өткен теміржол вокзалы барлық талаптарға сай жұмыс істеп тұр деуге толық негіз бар. Өйткені жолаушыларға қажетті жағдай жасалған. Қауіпсіздік шаралары қатаң бақылауда. Мамандар бекітілген кестеге сәйкес қызмет атқаруда. Дегенмен, теміржол бойындағы тазалық талабын ерекше назарда ұстау керек.<blockquote>«Бірқазан елді мекенінен Қараөзек стансасына дейін жауапты қызметкерлер бекітіліп, теміржол бойы күнделікті аралануы қажет. Теміржол жиектері мен оған іргелес аумақтар толық тазалануы тиіс. Әрбір жолаушы қаланың тазалығына, аумағының дұрыстығына өз бағасын беретінін жақсы білесіздер. Сондықтан тазалық жұмыстарын жүйелі түрде жүргізіп отыруды тапсырамын»,- деді Нұржан Сәбитұлы.</blockquote>Жиында күн тәртібінен тыс мәселелер де қаралды. Қала әкімі жауапты мекеме басшыларына жұмысты ұтымды үйлестіруді, қала тазалығын қамтамасыз ету, абаттандыру қағидаларын сақтау және қоғамдық орындарды ластаудың алдын алу бағытындағы шараларды күнделікті бақылауда ұстауды тапсырды.<img src="https://knadmin.beoblood.kz/uploads/ala_kimdigi_temirzhol_salasy_2_9dc8e2ef7d.jpg" alt="Қала әкімдігі теміржол саласы 2.jpg">

Тиісті сала жетекшілеріне бірқатар тапсырма берді

<a href="https://kyzylorda-news.kz/">Kyzylorda-news.kz</a> Шиелі ауданы әкімдігінде аудан әкімі Айтбай Жандарбековтың төрағалығымен мәжіліс отырысы өтті. Жиынға аудандық мәслихат төрағасы, аудан әкімінің орынбасарлары, дербес бөлім басшылары, сондай-ақ кент және ауылдық округ әкімдері қатысты.Күн тәртібіндегі негізгі мәселе ретінде аудандағы теміржол саласы мен инфрақұрылымын дамыту жайы қаралды. Теміржол саласы – өңір экономикасының маңызды құрамдас бөлігі. Бұл сала, тұрғындардың қауіпсіз әрі қолайлы қатынасын қамтамасыз етумен қатар, кәсіпкерліктің дамуына, жүк тасымалы көлемінің артуына және инвестиция тартуға тікелей ықпал етеді.Мемлекет басшысы Қасым-Жомарт Кемелұлы Тоқаев еліміздің көлік-логистикалық әлеуетін арттыруға, инфрақұрылымды жаңғыртуға және өңірлер арасындағы байланысты нығайтуға ерекше мән беріп келеді. Осыған сәйкес, ауданымызда да теміржол нысандарының жағдайын жақсарту және жолаушыларға қолайлы жағдай жасау бағытында жүйелі жұмыстар атқарылуда.Атап айтқанда, 836 млн теңге қаржыға Шиелі теміржол вокзалы ғимаратына күрделі жөндеу жұмыстары жүргізіліп, нысан толықтай жаңғыртудан өтті. Бас мердігер – «Дәнекер құрылыс компаниясы» ЖШС. Құрылыс жұмыстары 2025 жылдың мамыр айында басталып, 2026 жылдың сәуір айында негізгі жұмыстар толық аяқталды. Қазіргі уақытта вокзал ғимаратын қажетті жиһаздармен және заманауи құрал-жабдықтармен қамтамасыз ету жұмыстары жүргізілуде.Мәжіліс барысында күн тәртібіне енгізілген қосымша екі мәселе қаралды. Атап айтқанда, «2026 жылдың ІІ жартыжылдығына мерзімді басылымдарға жазылу барысы және әлеуметтік желідегі белсенділік туралы» аудандық қоғамдық даму бөлімінің басшысы Кенжехан Есенбаев хабарлама жасап, тұрғындарды отандық мерзімді басылымдарға жазылуға тарту және ақпараттық кеңістіктегі белсенділікті арттыру бағытында атқарылып жатқан жұмыстарға тоқталды.Сондай-ақ, «Аудан көлемінде жол-көлік оқиғаларының алдын алу шаралары туралы» аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Ғабит Аманжолов баяндама жасап, жол қауіпсіздігін қамтамасыз ету, жол белгілерін жаңарту, қауіпті учаскелерде алдын алу шараларын күшейту бағытында жүргізіліп жатқан жұмыстар жөнінде мәлімет берді.Мәжіліс қорытындысында аудан басшысы жауапты сала басшыларына көтерілген мәселелер бойынша нақты тапсырмалар жүктеп, олардың орындалуын тұрақты бақылауда ұстауды тапсырды.<img src="https://knadmin.beoblood.kz/uploads/Shieli_infra_rylymdy_damytu_m_selesi_2_db2ec9dc2e.jpg" alt="Шиелі инфрақұрылымды дамыту мәселесі 2.jpg">

Күн тәртібіндегі негізгі мәселелер талқыланды

<a href="https://kyzylorda-news.kz/">Kyzylorda-news.kz</a> 2026 жылдың бес айында үш мыңнан астам есірткіге қатысты құқық бұзушылықтың жолы кесілді, оның ішінде шамамен 1,5 мың есірткі қылмысы анықталды. Сонымен қатар алты ұйымдасқан қылмыстық топтың, оның ішінде бір трансұлттық топтың қызметі тоқтатылды. Синтетикалық есірткі өндіретін 12 зертхана және 42 фитозертхана жойылды.12 мыңға жуық заңсыз онлайн-ресурс бұғаттауға жіберілді. Ұлттық банкпен бірлесіп, есірткі бизнесіне қатысты қаржылық операцияларға тосқауыл қойылуда. Нәтижесінде 107 миллион теңгеден астам күмәнді қаржы аударымы тоқтатылды. 125 мыңға жуық шетелдік төлем картасы бұғатталды. Сондай-ақ 20 мың криптоәмиян тексерілуде.Үлкен қауіптің бірі - синтетикалық есірткілер. Заңсыз айналымнан 466 килограмм синтетикалық есірткі және 11 тоннадан астам прекурсор тәркіленді.Алдын алу жұмыстары да жалғасуда. Жыл басынан бері мектептер мен жоғары оқу орындарында 6,5 мыңнан астам есірткіге қарсы іс-шара өткізілді. Сегіз мыңнан астам ақпараттық материал жарияланды.Халықаралық ынтымақтастық дамып келеді. Қазақстан шетелдік әріптестерімен бірлесіп, трансұлттық есірткі қылмысына тосқауыл қоюда.<blockquote>– Қоғамдық қауіпсіздікті нығайту, азаматтардың денсаулығын қорғау және жас ұрпақтың болашағын сақтау мақсатында есірткі қылмысына қарсы кешенді жұмыстар жалғасатын болады, - деді ІІМ есірткі қылмысына қарсы іс-қимыл комитеті төрағасының орынбасары Елдар Әбдікенов.</blockquote>Сурет: ҚР ІІМ

Криптоәмияндар, транзакция және синтетика: ІІМ есірткі бизнесінің қаржылық және цифрлық схемаларына соққы жасауда

<a href="https://kyzylorda-news.kz/">Kyzylorda-news.kz</a> Арал ауданы әкімдігінің мәжіліс залында аудан әкімі Аманжол Оңғарбаевтың төрағалығымен әкімдік мәжілісі өтіп, теміржол саласын дамыту және инфрақұрылымды жаңғырту мәселелері талқыланды.&nbsp;Қазіргі таңда еліміз бойынша теміржол вокзалдарын жаңғыртуға бағытталған кешенді жобалар жүзеге асырылуда. Осы бағытта Арал қаласы мен Сексеуіл кентіндегі теміржол вокзалдарының ғимараттары қайта салынып жатыр. Дегенмен, құрылыс жұмыстарының қарқыны әлі де болса көңіл көншітпейтінін айтқан аудан басшысы жауаптыларға жұмысты жандандыруды тапсырды.Сонымен қатар, вокзал аумағындағы кәсіпкерлік нысандарды заман талабына сай келтіру мәселесі де күн тәртібінде тұр. Бұл мәселе бұған дейін көтерілгенмен атқарылған жұмыстардың нәтижесі әлі де көңлі көншітпейтінін жеткізді. Осыған байланысты жауапты тұлғаларға аталған мәселені бірлесіп шешуді тапсырды.Мемлекет басшысының тапсырмасына сәйкес республика көлемінде «Таза Қазақстан» экологиялық бағдарламасы үздіксіз жүзеге асырылып келе жатқаны белгілі. Жиында бұл мәселе де назардан тыс қалмай, жаз мезгілінде көркейту-көгалдандыру және санитарлық тазалық жұмыстарын күшейту қажеттігі айтылды.Арал ауданының әкімі анықталған кемшіліктерді қысқа мерзім ішінде толық ретке келтіріп, алдағы уақытта бұл мәселені тұрақты бақылауда ұстауды тапсырылды.&nbsp;Жиынды қорытындылаған аудан әкімі Аманжол Сақыпұлы бірқатар салаларда кемшіліктердің әлі де орын алып отырғанын атап өтті. Әсіресе ауылдық округ әкімдерінің жұмысы мен эпизоотиялық ахуалға жауапты мекемелердің қызметіне қатысты сын-ескертпелер айтылып, атқарылып жатқан жұмыстардың тиімділігін арттыру қажеттігі көрсетілді.Аудан басшысы барлық жауапты тұлғаларға жұмысты жандандырып, нәтижеге бағытталған нақты шаралар қабылдауды тапсырды. Сонымен қатар, мәжіліс барысында көтерілген мәселелерді тұрақты бақылауда ұстап, олардың уақытылы әрі сапалы орындалуын қамтамасыз етуді жауапты тұлғаларға міндеттеді.

Арал: Инфрақұрылымды жаңғырту мәселелері қаралды

<a href="https://kyzylorda-news.kz/">Kyzylorda-news.kz</a> Облыс әкімі Мұрат Ергешбаев азаматтарды кезектілік тәртібімен жеке қабылдады. Бүгінгі қабылдауға 12 адам тіркелсе, олардың екеуі онлайн қосылды.Келушілердің басым бөлігі әлеуметтік қолдау, баспана, көшелерді асфальттау және жұмыспен қамту мәселелерін көтерді. Арал ауданы Сексеуіл кентінің тұрғыны Ақтан батыр және Тәжібаев көшелерін асфальттау туралы айтты. Бұл көшелердің жобалық құжатын әзірлеу 2028 жылға жоспарланған. «Ауыл – ел бесігі» бағдарламасымен 2023 жылы Сексеуіл кентіндегі Ақорда тұйығы орташа жөнделген. Енді тұйықтың балабақшаға дейінгі бөлігін жөндеу алдағы кезеңге межеленген.Қабылдауда «Базис-А» мекемесінің теміржолшыларға арнап салған тұрғын үйлер құрылысын аяқтау мәселесі де көтерілді. Қазір екі пәтерлі 38 тұрғын үйдің 8-і толық бітіп, белгіленген тәртіппен пайдалануға берілген.&nbsp;Қызылорда қаласындағы Әл-Фараби шағын ауданының тұрғыны балалар ойын алаңын салу, жол жөндеу және қоғамдық көлікке қатысты мәселелерді көтерді.Осыған байланысты аталған аумақта балалар ойын алаңын салуға арналған бос жер телімі анықталып, жобаны «Халық қатысатын бюджет» бағдарламасы аясында іске асыру жоспарына енгізу көзделуде.Сондай-ақ бұған дейін Қызылжарма-3 тұйық көшесінің тұрғындары №27 қоғамдық көліктің С. Бәйсейітова көшесінен Қарауылтөбе ауылына жетпей, бұрылыс тұсында аялдауын сұраған еді. Тұрғындардың өтініші қаралып, мәселе оң шешімін тапты.Инфрақұрылымды жақсарту бағытындағы жұмыстар да жүйелі &nbsp;жүргізілуде. Әл-Фараби шағын ауданынан Қарауылтөбе ауылының шекарасына дейінгі аумақтағы жеті көшенің бесеуінде &nbsp;«Әлем Транс Жол» ЖШС &nbsp;жол жөндеді.Қазір Аралбаева көшесіндегі жөндеу жұмыстары аяқталу сатысында. Тұрғындардың өмір сүру сапасын арттыруға бағытталған жобалар кезең-кезеңімен жалғасады.Ақжарма ауылының тұрғыны мамандығы бойынша жұмысқа орналасу мәселесімен келген. Аймақ басшысы жұмыспен қамту назардан тыс қалмайтынын және заңнама аясында қарастырылатынын атап өтті.Қабылдауда көтерілген мәселелердің барлығы қолданыстағы заңнама талаптарына сәйкес кезең-кезеңімен шешімін тауып келеді. Бұл жолы да әрбір тұрғынның өтініші бойынша жауапты сала басшыларына нақты тапсырмалар берілді.Айта кетейік, облыс әкімінің жеке қабылдауына жазылу үшін тұрғындар eGov порталы, e-Otinish бірыңғай платформасы арқылы немесе әкімдікке жазбаша өтініш беру жолымен өтініш қалдыра алады.

Тұрғындар жеке қабылдауда әлеуметтік мәселелерді көтерді 

<a href="https://kyzylorda-news.kz/">Kyzylorda-news.kz</a> Қылмысты ашудағы әрбір дәлел мен айғақтың артында кәсіби біліктілік пен мұқият еңбектің жатқандығы белгілі. Құқық қорғау саласындағы маңызды буындардың бірі – криминалистика қызметі. Осы салада табысты еңбек етіп жүрген мамандардың қатарында Қызылорда облысы Полиция департаментінің жедел-криминалистика басқармасының криминалисі полиция подполковнигі Жаңабай Сапарбаев бар.Криминалист мамандығы ерекше жауапкершілікті талап етеді. Оқиға орнын зерттеу, заттай дәлелдемелерді саралау, қылмыстың мән-жайын анықтау және күдіктінің тұлғасын айқындау – осы қызметтің негізгі міндеттері. Жаңабай Сапарбаев бұл міндеттерді кәсіби деңгейде атқарып қана қоймай, өнер әлеміндегі талантымен де ерекшеленеді.Бала күнінен сурет салуға қызығушылық танытқан ол шығармашылық қабілетін бүгінге дейін дамытып келеді. Бос уақытында қағаз бетіне түрлі бейнелерді түсіріп, әсіресе адам портреттерін салуға ерекше мән береді. Оның айтуынша, сурет өнері ойды жинақтап, рухани тынығуға мүмкіндік береді.Көпжылдық шығармашылық тәжірибесі қызмет барысында да пайдасын тигізуде. Жаңабай куәгерлер мен жәбірленушілердің сипаттамалары негізінде арнайы бағдарламалық кешен арқылы күдіктілердің бейнесін жасап, қылмыстарды ашуға өз үлесін қосып келеді. Оның пікірінше, криминалист маман үшін кәсіби біліммен қатар есте сақтау қабілеті, байқағыштық, аналитикалық ойлау және шыдамдылық аса маңызды.Өнерлі полицей шебер қолымен әдемі иллюстрациялар да салып келеді. Әдеби шығармаларға иллюстрация салу – мәтіннің мазмұнын көркем бейнеге айналдыратын шығармашылық жұмыс. Полицей-суретші мұндай жұмыста өзінің байқағыштық қабілетін, дәлдікке негізделген сурет салу шеберлігін және оқиғаны нақты бейнелеу дағдысын пайдаланады.Ол шығарманы оқи отырып, кейіпкерлердің бейнесін, оқиға орнын және негізгі көріністерді қағаз бетіне түсіреді. Әсіресе детектив жанрындағы кітаптарда тәртіп сақшысының &nbsp; иллюстрациялары ерекше рөл атқарады. Мұндай суреттер оқырманға оқиғаның желісін жақсы түсінуге көмектесіп, шығарманың әсерін күшейтеді. Кейіпкерлердің бейнесі мен оқиға сәттері көрнекі түрде берілгенде, мәтін мазмұны одан әрі жандана түседі.Полицей-суретші салған иллюстрациялар нақты және шынайы болуымен ерекшеленеді. Себебі ол кәсіби тәжірибесі арқылы адамның бет-әлпетін, қозғалысын және жағдайын дәл бере алады.1985 жылы Қызылорда облысы Шиелі ауданының Еңбекші ауылында дүниеге келген Жаңабай Сапарбаев бірнеше жоғары оқу орнында білім алып, бейнелеу өнері, сәулет және құқық қорғау қызметі бағыттары бойынша маманданған. Құқық қорғау органдарындағы еңбек жолын 2012 жылы бастап, бүгінде тәжірибелі криминалист ретінде абыройлы қызмет атқарып келеді.<img src="https://knadmin.beoblood.kz/uploads/Whats_App_Image_2026_06_16_at_17_52_58_b609d83e8d.jpeg" alt="Қызылордлық криминалист.jpeg">Қызметтік міндетін адал орындап жүрген маман түрлі марапаттарға ие болған. Сонымен қатар ол – өнегелі отбасының отағасы. Жұбайымен бірге төрт қыз бен бір ұл тәрбиелеп отыр. Әкесінің шығармашылық жолын үлкен қызы Балауса жалғастырып, сурет салу бағытында жетістіктерге жетуде.<blockquote>«Полиция қызметкері үшін ең басты құндылық – адалдық пен жауапкершілік. Халық сенімін ақтап, ел игілігі үшін қызмет ету – менің басты мақсатым», – дейді Жаңабай Сапарбаев.</blockquote>Өнер мен қызметті қатар алып жүрген осындай білікті мамандардың еңбегі құқық қорғау органдарының беделін арттырып, жас буынға үлгі болары сөзсіз.

Иллюстрация арқылы шындықты бейнелейтін қызылордалық криминалист

<a href="https://kyzylorda-news.kz/">Kyzylorda-news.kz</a> Бүгін ҚР Премьер-министрі Олжас Бектеновтің төрағалығымен өткен Үкімет отырысында теміржол саласы мен инфрақұрылымын дамыту мәселесі қаралды. Оған облыс әкімі Мұрат Ергешбаев селекторлық режим арқылы қатысты. Үкімет отырысынан кейінгі мәжілісте мәселелер жан-жақты талқыланды.Аймақ басшысы теміржол вокзалдарын коммуналдық меншікке қабылдауды заңнама талаптарына сәйкес уақытылы аяқтауды тапсырды.<blockquote>– Теміржол вокзалдарының сыртқы келбеті ғана емес, жолаушыларға қызмет көрсетуі де жаңа сапаға көшуі тиіс. Қала, аудан әкімдіктерімен бірлесіп, вокзалдар аумағының абаттандырылуын, көгалдандырылуын, санитарлық тазалығын күнделікті қамтамасыз етіңіздер, – деді Мұрат Нәлқожаұлы.</blockquote>Облыс аумағынан 1051 шақырым теміржол желісі өтеді. Оның 83,4 шақырымын күрделі жөндеу басталды. Бүгінгі күнге дейін 50,4 шақырымы жөндеуден өткен, қалған 33 шақырымы жыл соңына дейін бітеді. Сексеуіл станциясында 18,7 шақырым теміржол салынып, 77 жиынтық бағыттамалы бұрма орнатылуда.Қызылорда облысынан 15 жұп, облыс орталығынан Астана, Петропавл, Павлодар, Көкшетау, Семей, Түркістан қалаларына 6 жұп жолаушы пойызы қатынайды.Осыдан екі жыл бұрын Қызылорда қаласындағы теміржол вокзалы күрделі жөнделіп, іргелес аумағы абаттандырылды. Бүгінде өңірдегі &nbsp;7, атап айтқанда Жаңақорған, Шиелі, Жосалы, Төретам, Қазалы, Арал теңізі, Сексеуіл вокзалдарында, Тереңөзек пен Жалағаштағы қызмет көрсету пункттерінде, Жаңақорған ауданы Талап бекетіндегі жолаушылар платформасында күрделі жөндеу және қайта жаңғырту жұмыстары жүргізілуде. Қазалы, Шиелі, Жаңақорған вокзалдары мен Талап бекетінде құрылыс-монтаждау жұмыстары аяқталды.Сондай-ақ мәжілісте жауапты басшыларға бір апта ішінде өндірістің жаңа бағыттарын дамыту және іске қосуға қатысты нақты ұсыныстар әзірлеу міндеттелді. Негізгі әлеуметтік-экономикалық көрсеткіштердің оң динамикасы сақталуы тиіс.Конго-Қырым геморрагиялық қызбасына қарсы күзгі залалсыздандыру жұмыстарын сапалы әрі бекітілген кестеге сәйкес жүргізу мәселесі де талқыланды.Облыс әкімі кенеге қарсы өңдеу шараларын ветеринариялық талаптарға сай ұйымдастырып, орындалуын қатаң бақылауды тапсырды. Аурудың алдын алудың және алғашқы белгілері байқалған бойда медициналық көмекке жүгінудің маңызы туралы ақпараттық-түсіндіру жұмыстары жүйелі жүргізілуі қажет.

Теміржол саласы мен инфрақұрылымын дамыту мәселесі қаралды

<a href="https://kyzylorda-news.kz/">Kyzylorda-news.kz</a> Қызылорда қаласы полиция басқармасының патрульдік полиция батальонының қызметкерлері күшейтілген режимде қызмет атқарады.<blockquote>– Жол қозғалысы қауіпсіздігі және жол-көлік оқиғаларының алдын алу үшін рейдтер барысында бір апта ішінде мас күйінде көлік құралдарын басқарған 10 жүргізуші анықталды. Құқық бұзушыларға қатысты Қазақстан Республикасы Әкімшілік құқық бұзушылық туралы Кодексінің 608 – бабына сәйкес тиісті әкімшілік ықпал ету шаралары қабылданды, - делінген полиция хабарламасында.</blockquote>Тәртіп сақшылары алкогольдік ішімдіктерді ішкеннен кейін көлік құралын басқару сіздің өміріңізге және денсаулығыңызға ғана емес, сонымен қатар басқа жол қозғалысына қатысушылардың қауіпсіздігіне де қауіп төндіретінін еске салады.<blockquote>– Сіздерді жол қозғалысы ережелерін қатаң сақтауға, жауапкершілік танытуға және мас күйінде көлік жүргізбеуге шақырамыз. Жолдардағы қауіпсіздік әрқайсымызға байланысты, - деп қосты ведомство.</blockquote>Сурет: &nbsp;freepik.com

Қызылордалық полицейлер мас күйде көлік жүргізген жүргізушілерді анықтады

<a href="https://kyzylorda-news.kz/">Kyzylorda-news.kz</a> Қазақстанда пойыз билеттерінің қымбаттауы инфляция деңгейі мен жыл сайынғы индексация тетігіне байланысты. Бұл туралы Үкіметтегі брифингте «Қазақстан темір жолы» ұлттық компаниясының өкілі мәлім етті, – деп хабарлайды <a href="https://kaz.inform.kz/news/ktzh-poyiz-biletter-bagasinin-ozgeru-sebebn-tusndrd-43bd8f00">Қазақпарат.</a>«ҚТЖ» басқарма төрағасының орынбасары Әнуар Ахметжановтың айтуынша, биыл пойыз билеттерінің бағасы 7 пайызға өскен. Ал өткен жылғы инфляция 12 пайыздан асқан.<blockquote>— Биыл 1 сәуірден бастап билет бағасына 7 пайыздық индексация жүргізілді. Өткен жылғы инфляция 12 пайыздан жоғары болды. Демек, бұл өсім инфляция қарқынын толық өтеп отырған жоқ, — деді ол.</blockquote>ҚТЖ өкілдері билет бағасы жыл ішінде өзгермейтінін атап өтті. Тариф маусымға да, тәуліктің уақытына да байланысты өзгермейді. Баға тек Көлік министрлігімен келісілген тәртіп бойынша жылына бір рет индексация арқылы жаңартылады.Сондай-ақ компания өкілдері пойыз бен ұшақ билеттерін тікелей салыстыруға болмайтынын айтты. Себебі әуе тасымалында сұранысқа қарай өзгеріп отыратын икемді баға жүйесі қолданылады.<blockquote>— Әуе билеттерінің құны сұраныс пен ұсынысқа қарай құбылып отырады. Кей кезеңдерде 70–100 мың теңгеге дейін жетуі мүмкін. Ал теміржол билеттері жыл бойы бір деңгейде сақталады, — деді Әнуар Ахметжанов.</blockquote>Фото ҚТЖ

Қазақстан және Қызылорда облысының жаңалықтары