<a href="https://kyzylorda-news.kz/">Kyzylorda-news.kz.</a> Жанкент ауылындағы «Аққоян» бөбекжай-балабақшасы 2009 жылдың желтоқсан айында ашылды. Сол жылы 50 бала қабылданды. 2013 жылы балабақша ғимараты күрделі жөндеуден өтіп, жаңадан екі топ қосылды. Бұл кезде бала саны 90-ға жетті.&nbsp;Балабақша әр жаңа оқу жылынан бастап жазғы сауықтыру шараларына дейін түрлі мерекелік іс-шаралар өткізеді. Бұнда «Ақжүрек», «Балбөбек», «Балдырған», «Балдәурен» топтары бар. Ересек топтағы тәбиеленушілер «Сиқырлы қалам», сурет, «Мен әнші боламын» ән, «Шебер қолдар» қолөнер үйірмелеріне қатысып, шығармашылық қабілеттерін шыңдайды.&nbsp;Балабақша меңгерушісі Шаттық Сапарбайқызы бұл салада 13 жылдан бері басшылық қызметте. Жүзі жылы, жайдарлы мінезді жан алдымен балабақша жұмысының жоғары өрлеуіне аянбай үлес қосып отырған жұмысшы-қызметкерлердің еңбегін айрықша айтып өтті.&nbsp;Бірлік пен ынтымақты, тәртіп пен тазалықты сүйетін ұжымдағы әрбір жанның орны ерекше. ЕсепшіБақытгүл Құтжанова еңбек ақының дер кезінде қызметкерлердің қолына тиюін, шаруашылық меңгерушісі Айнагүл Баймағанбетова күнделікті балалардың тамағы уақытылы әрі сапалы берлуін, жылу жүйесінің сапалылығын қатаң қадағалайды. Ал техникалық қызметкерлер Бейбігүл Игілік, Гүлзира Бөлегенова, Қайрат Көбегенов, Еркебай Медетов, Мейрамбек Әлимаевтар ғимарат ауласына егілген тал, жеміс-жидектер мен гүлдердің жайқалып, өсіп, жанға сая сыйлауына үлес қосады. Психолог Жеңіскүл Меңдібаева өткізген түрлі тренингтер бүлдіршіндерге сергіту сәтін сыйлайды. Мейіркеш Мадира Сағындықова таңертең балаларды қабылдап, тазалықтары мен дене қызуын тексереді. Тамақтың сапасы мен оның қалай дайындалып жатқандығын қадағалауда мейіркештің міндетіне кіреді.&nbsp;Светлана Сырманова, Жанна Аязбаевалардың еңбегін балабақша ішіндегі мұнтаздай тазалыққа қарап-ақ аңғарасыз. Тәрбиешілердің көмекшілері Әсия Қалжанова, Ғалия Аралбаева, Гүлзат Есмаханова, Ұлболсын Мырзалиевалар бала жанының нағыз бағбаны. Дәмі тіл үйіретін тәтті тағамдармен тәрбиеленушілерді үнемі таң қалдырып отыратын аспазшы Задаш Абзалова, Зибаш Құлжақова, Гүлжайна Қалқамановлар балдырғандардың ең сүйікті апайлары.&nbsp;Баланы бастан өнер-білімге баулитын тәрбиешелер аудандық облыстық, республикалық жарыстарға балдырғандарды үнемі қатыстырып отырады. Әрі жүлдемен оралады. «Тәуелсіздік – мәңгілік елдің тұғыры» атты республикалық байқауда үздік шығармашылық жұмысымен тәрбиеленуші Айзере Мырзамұрат және Ақкербез Әбілқайыр бірінші дәрежелі дипломды жеңіп алды. Оларды өнеге баулыған жекетшілері Гүлназ Әбдікемалова мен Шаттық Көбеген. Осы сайысты Аяулым Бимырзақызы екінші дәрежелі дипломға қол жеткізді. Жетекшісі Нұргүл Айзақова. Республикалық «Жас дарын» дарынды балалар орталығы ұйымдастырған «Самға СамұрықVIII» байқауында «Бейнелеу өнері» аталымы бойынша Айзере Дінислам бірінші орын, «Қолөнер» номинациясында Айдәулет Қозыбағар бас жүлдені иеленді. «Елін сүйген, елі сүйген Елбасы» атты республикалық байқауда «Қолөнер» аталымы бойынша Әдеміай Серіктің туындысы бірінші орынға лайық болды.&nbsp;Тәуелсіздіктің 30 жылдығына орай Мемлекет басшысы Қасым-Жомарт Тоқаевтың «Тәуелсіздік бәрінен де қымбат» атты бағдарламалық мақаласын педагогтер мен білім алушылар арасында кеңінен насихаттау мақсатнда «Білім беру саласының көшбасшысы» атты респубилкалық байқауда тәрбиеші Ақмарал Кадирова бірінші дәрежелі дипломмен марапатталды. Білім беру саласына қосқан елеулі еңбегі үшін Зияш Өмірзақова облыстық кәсіподақ комитеті төрайымының «Құрмет» грамотасын иеленді. Республикалық «Үркер» зияткерлік орталығының директоры Данагүл Құрақбаеваға жас өреннің бойына білімге құштарлық нәрін себе білгені үшін «Алғыс» хат берді. «Бақытты бала әлемі» II республикалық байқауында шәкірті ерекше дарынымен көзге түскен Мөлдір Сfрман «Үздік тәрбиеші» атанды. Халықаралық ПОНИ сайысында жеңімпаздар мен жүлдегерлерді дайындаған Бақыт Аязбаева арнайы «Диплом» иеленді. А.Байтұрсынұлы атындағы республикалық педагогикалық шығармашылық олимпиадасында Нұргүл Айзақова екінші орын алды. Тәрбиеші Аманкүл Өтепбергенова білім басқарамсының «Алғыс» хатын алды. Тәуелсіздіктің 30 жылдығы аясында республикалық балалар арасында мәнерлеп оқу сайысында Ақнұр Әлиева дайындаған тәрбиеленуші Нұрсәуле Нұрлан бірінші орын иеленді. Жіпке тізсек, жетістіктер жетерлік. Тәрбиешілер де тәрбиеленушілер де талаптың тұлпарын мініп, талай белесті бағындырарына бек сенімді. Бар білімнің баспалдағына баланған балабақшада басты талап – тәрбие мен тәртіп екенін аққояндықтар ерекше атады

Тәртіп пен тәрбиені тең берген

<a href="https://kyzylorda-news.kz/">Kyzylorda-news.kz.</a>&nbsp; Қазақстанда соңғы екі жыл бойы өткен заңсыз қаржылық операцияларға қарсы іс-қимыл бойынша өзара бағалау рәсімін сәтті аяқтады.​Бұл туралы кірістерді заңдастыруға және терроризмді қаржыландыруға қарсы іс-қимыл жөніндегі Еуразиялық Топтың (ЕАТ) 38-ші пленарлық отырысында белгілі болды.​Бағалау нәтижелері инвестициялық ахуалға және экономикалық дамуға, сондай-ақ Қазақстанның халықаралық рейтингтердегі (БҰҰ, ЭЫДҰ, ХВҚ, Дүниежүзілік банк, Transparency International, World justice project және т.б.) позициясына мультипликативтік әсер береді. ​Өзара бағалау қорытындысы бойынша Қазақстан Республикасы стандартты мониторингке қойылды.​Бұл елімізде кірістерді заңдастыруға және терроризмді қаржыландыруға қарсы іс-қимылдың тұрақты және тиімді жүйесі қалыптасқанын, ал елдің КЖ/ТҚҚ саласындағы заңнамасы FATF стандарттарына едәуір дәрежеде сәйкес келетіндігін айғақтайды. ​Атап айтқанда, ведомствоаралық және халықаралық ынтымақтастықтың айтарлықтай деңгейі еліміздің "жылыстатуға қарсы" жүйесінің ерекше жақтарына айналды.Қылмыстық кірістерді жылыстатуға байланысты істерді тергеу тиімділігі айтарлықтай деңгейінде бағаланды. Бұл Еуразия өңірі елдерінің арасындағы ең үздік нәтиже. Мұндай бағаны FATF жаһандық желісіне кіретін 200-ден астам мемлекетінің 15 елі ғана алған болатын.Естеріңізге сала кетейік, Алматыда өткен ЕАТ-тың 38-ші пленарлық отырысына 20 елден 200-ден астам делегат, оның ішінде ЕАТ-ға мүше мемлекеттердің қаржы барлау бөлімшелерінің 9 басшысы (Беларусь, Үндістан, Қазақстан, Қытай, Қырғызстан, Ресей, Тәжікстан, Түрікменстан, Өзбекстан), 9 елден (Армения, Иран, Моңғолия, Сербия, АҚШ, Германия, Корея, Түркия, Франция) ​бақылаушылар мен қатысушылар, сондай-ақ шетелдік қонақтар қатысқан болатын.Отырысқа FATF және басқа да беделді халықаралық ұйымдардың (БҰҰ, ХВҚ, ЕҚЫҰ, АДБ, ҰҚШҰ, ШЫҰ, ЕЭК, ТМД Атқару Комитеті, БКБОП, ТМД АТО, ОАӨАОА, ЕАДБ, ЕҚДБ, ҰБР) өкілдері қатысты. &nbsp;

Заңсыз қаржылық операцияларға қарсы іс-қимыл бойынша өзара бағалау рәсімін сәтті аяқтады

<a href="https://kyzylorda-news.kz/">Kyzylorda-news.kz.</a> Жаңа жағдайдағы жаңашыл қоғам қалыптастыруға бағытталған Жолдауда елдегі саяси, әлеуметтік-экономикалық мәселелер қамтылып, соған орай жаңа реформалар енгізуге нақты тапсырмалар берілді.Жолдауда Президент еліміздің әлеуметтік дамуына, ел тұрғындарының табысы мен жұмыс орындарының сақталуына, халқымыздың денсаулығы мен өмірін сақтау жолындағы жұмыстарға басты назар аудару керектігіне тоқталды. Оның ішінде, денсаулық сақтау саласындағы атқарылып жатқан жұмыстарды жетілдіруге, ұлт саулығын жақсартуға қатысты негізгі міндеттерді атап көрсетті.«Ұлт саулығы жақсы болса ғана, қоғам орнықты дамитыны сөзсіз. Денсаулық сақтау саласында біраз реформа жүргізілгені мәлім. Дегенмен, оның жағдайы әлі де мәз емес. Әрине, жылдар бойы қордаланған түйткілдер бір мезетте шешілмейді» деген Мемлекет басшысы медициналық инфрақұрылымды кешенді түрде жақсартуға баса назар аудару керектігін айтты. Бұл ретте, Мемлекет басшысы медициналық қызметтің сапасын арттыруға қатысты Ұлттық жобаны жүзеге асыруға шешім қабылдап отыр. Соның нәтижесінде, елімізде медициналық мекемелері жоқ 650 ауылда медициналық және фельдшерлік-акушерлік пункттер салынып, толық жарақтандырылады. Сондай-ақ, жоба аясында 32 аудандық аурухана жаңғыртылып, ауданаралық көпсалалы мекемелер болып қайта құрылады. Бұл медициналық мекемелерде инсульт орталықтары, хирургия, реанимация және оңалту бөлімшелері де пайда болмақшы. Яғни, денсаулық сақтау саласына бағытталған осындай қолдау нәтижесінде медициналық қызметтердің сапасының арттуына айтулы мүмкіндік жасалады.Жолдауда медицина қызметкерлерін қуантқан жаңалықтардың бірі – мамандардың білімін жетілдіруге гранттардың бөлінуі. Атап айтқанда, жоғары оқу орнын бітірген медицина қызметкерлері біліктілік талаптарын аттыру үшін резидентура оқуы тиіс. Бұл олардың кәсіби деңгейін шыңдайды. Міне, осыған бөлінетін грант көлемі 70 пайызға дейін артатын болады. Осы гранттар негізінде ауданның медицина қызметкерлері біліктіліктерін арттырып, тұрғындар денсаулығын жақсартуға қызмет көрсете береді.Жалпы, бұл жолғы Мемлекет басшысының Жолдауында да ұлт саулығын жақсартуға айрықша мән берілді. Оны жүзеге асыруда аудан медицинасының мамандары бірлесе жұмыс атқара беретін боламыз.Жанар Жұмабаева, Сырдария аудандық ауруханасы бас дәрігерінің орынбасары.

650 ауылда медициналық және фельдшерлік-акушерлік пункттер салынады

<a href="https://kyzylorda-news.kz/">Kyzylorda-news.kz.</a> Биыл тау беткейдегі ауылдардың хал-ахуалы жақсы деуге болады. Өйткені, су қоймаларының арнасы толды. Мәселен, Жайылмадағы Жиделі, Ақүйіктегі Көлтоған, Жаманбай батырдағы Бесарық су қоймаларында диқандар мен шопандар пайдалануға жетерлік тіршілік әрі бар. Бірлік ауылы тұсындағы агроаймақ пен Жайылманың қарбызы да аяқ судан тарықпайды. Былтыр су болмай, керіз суын пайдаланып, мол өнім алған дала еңбеккерлерінің шаруасы ширақ. Аудан әкімі бастаған делегат алдымен Жайылмаға жол жүріп, дала тынысын бағдарлап қайтты.Ауылдың брендісіне айналған қауын-қарбыздың нақ «отаны» осы Жайылма екенін екінің бірі біледі. Тіпті, көршілес Ресейдің кейбір өңірлеріне танымал болған ауыл тұрғындары жер жыртып, дән тастауға кірісті. Аудан басшысы айтпақшы, ауылшаруашылығы саласында тың идея туындаса, ол – Жайылмадан шығады. Рас, бірер жыл бұрын қарбыз егудің тәсілдерін үйрету, шырын шығаруды жолға қойды. Былтыр керіз жүйесін іске қосып, жақсы жетістікке жетті. Бір сөзбен айтқанда, қара жерге тамшы тер төгіп, нағыз еңбектің майданы осында қайнайды.Алдымен іскер топ Мұхтар Оспанов басқаратын «Сенім» шаруа қожалығының жоңышқа егу жұмыстарын көрді. Инженерлік жүйеге келтірілген жер бабында тұр, жақын күнде су көзін ашу көзделуде екен. Мұхтардың қос қолқанаты ұлдары, бірі – трактор рулінде, екіншісі – тұқым дайындауды атқаруда. Бұл жолы 100 гектар жаңа жоңышқаның жағдайын білуді мақсат тұтты.<blockquote>«Су тапшылығын ескеріп, жоңышқа егісін көбейтуді жөн санадық. Себебі, ауыл тұрғындарының басым бөлігі мал ұстайды. Оған қажетті жем-шөпті сырттан тасымалдаған тиімсіз болып отыр. Осы мәселе шешімін тапты», – деді ауыл шаруашылығы бөлімінің басшысы Талғат Зейдалиев.</blockquote>– Мұрат Жолкелдіұлы, менде бір ұсыныс бар. Қазір су қоймасында су жеткілікті. Бірақ маусымның аяғына қарай су проблемасы басталады. Көлден су тартуға насос бөлінсе құба-құп болар еді, – деді ауыл әкімі Әліби Бөкеев.<blockquote>«Тиісті ұсыныс берілсе, ол шешімін табады. Су тапшылығы жағдайында қосымша су қорымен қамтамасыз ету үшін «Қазсушар» ШЖҚ РМК Қызылорда филиалы арқылы 8 дана, облыстық табиғи ресурстар және табиғат пайдалануды реттеу басқармасы арқылы 11 дана су насос қондырғыларын алу көзделуде», – деді аудан басшысы.</blockquote>Одан соң екі жылыжай жұмысын көріп, шаруалармен дидарласты. Бірі – «Шоқымазар», екіншісі – «Қансейіт» шаруа қожалығының жылыжайы. Қожалық төрағалары Самат Дүй¬сенбаев пен Уәлихан Пазылов қарбыз тұқымын жылыжайда өндіру үстінде екен.– Жылыжайдың тиімділігі қан¬шалықты? – деді аудан басшысы.<blockquote>«Осы жылыжай арқылы уақыттан ұтамыз. Мысалы, өнген тұқымды топырағымен егіс алқабына отырғызамыз. Сонда мерзімінен 20 күн ерте піседі. Жалпы шығымы жақсы, сондықтан кеңейтуге мүмкіндік іздеп келеміз, – дейді Самат Маратұлы. Иә, жылыжай кешенімен жұмыс жасау өте тиімді тәсіл. Әсіресе, маусымдық жұмыстардан бұрын басталған іс ертерек жиналып, табысты болады. Өнімнің бітік шығуы, көктемгі егістің нәрі – су екені рас, жоғарыда айтқандай бұл ауыл Жиделі су қоймасы суландырылады. Су мәселесі өте өзекті. Оны сарқа жұмсау емес, сапалы жұмсауға халықты бейімдеу керек. Үнем дегенді үнемі назарда ұстамасақ болмайды», – деп қалды аудандық мәслихат хатшысы Ғалымжан Сопбеков.</blockquote>Қазір су қоймасында 7,6 миллион текше метрдан астам су жиналыпты. Судың деңгейі қалыпты жағдайға келіп, артығы латокқа құйылып жатыр.<blockquote>«Аудан бойынша 200 гектар картоп егісін егуді жоспарладық. Әрине, әртараптандыру бағытында. Бұл өз халқымызды жергілікті өніммен қамтамасыз етуге мүмкіндік береді. Ендеше, осы жоспарға Жайылма ауылының үлесі аз болмау керек», – деді аудан әкімі.</blockquote>– Негізінен, тұрғындар өз ауласына егу үрдісін ұстанады. Ол 37 гектар шамасында. Мұнан бөлек 3 гектар картоп, 2 гектарға сәбіз егуге жер бөлдік. Суды үнемдеуге байланысты жоңышқаға басымдық берілді, – деді ауыл әкімі.Жалпы, ауылдың көктемгі жұмыстарының бір күндік көрінісі осындай. «Бір ауыл – бір кәсіп» қағидатына сай келетін Жайылма округінде жаңалық аз емес, тек уақыт керек. Бақша өнімдеріне басымдық беретін ауыл халқы соңғы жылдары мал азығын дайындауға бет бұра бастады. Өйткені, ауылдың екінші тынысы мал шаруасымен тығыс байланысты, сондықтан Сыр беткейге мойын бұрғаннан ауылда өнім өндірген тиімдірек дейді жайылмалықтарЖайылмалық 11 шаруа қожалық қарбыз егуге маманданған. Жыл сайын экспортқа шығаратын өнім көлемін арттырып, науқандық жұмысты жандандыра түседі. Олар биыл 450 гектар қарбыз егуді жоспарлауда. Мән-жайдың анық-қанығын білу үшін ауыл әкімі Талғат Зейдалиевпен байланыстық.– Межеміз айқын, жоспарды мамыр айының 1-3 аралығында орындаймыз. Әзірге 225 гектар бақша дақылдарының дәнін тастадық, оның ішінде қарбызға көбірек басымдық бердік. Бірақ биыл елдегі төтенше жағдайға байланысты қарбыз көлемін көбейткен жоқпыз, керісінше картоптың көлемін арттырдық. Осы күнге дейін 15 гектар картоп егіп үлгердік, – дейді әкім.Ауылда еңбекке жарайтынның барлығы да алқаптан табылады. Таңның атысы, күннің батысы қарбызды егуден бастап, арамшөптен тазалау, суару, содан кейін шірітіп алмай жинап, сатқанға дейін тайлы-тұяғына дейін дамыл таппайды. Анығын айтқанда, көк-тем басталысымен баладан бастап, еңкейген қарияға дейін қарбыз науқанына үлесін қосып, ала-жаздайғы еңбектің сәтті аяқталуына тілекші болады. Шыққан күнмен таласа ауыл сыртындағы алқапқа асығатын елдің жаз бойғы еңбегі де, тіршілігі де осы. Жылдағыдай қарбыздың алғашқы өнімі 25 маусымнан басталады.– Жылыжайларда көшетпен еккен қарбыз 25 маусым мен 1 шілде аралығында өнім бере бастайды. Ал пленка арқылы егілген дән шілденің 10-шы жұлдызына дейін толық шығады. Биыл ерте пісімге жоспар құрудамыз. Оған су жеткілікті, тыңайтқыштар уақытылы алынуда. Ал қарбыз сортына келетін болсақ, жылдағы америкалық түрін егеміз, – деді ауыл басшысы.Шыны керек, бренд өнімнің дәмі ерекше, оны Елорда төріндегі тұрғындар мен көрші Ресей тұтынушылары да мойындағаны қашан. Өнімнің дәмді болуының да өзіндік құпиясы бар. Қарбыз егетін жер ауысып отырады. Яғни жылда жусандықты ашып, қорамен қоршалап, су жеткізіп, жерді өңдеп, дақыл дәні жерге тасталады. Ол жерге жусандық қайтадан шығуын күтеді. Бұған 10 жылдай уақыт кетеді. Бұл – өзгермейтін қағида. Себебі жусан жерді минералды қорек заттарымен байытып, тыңайтады. Екіншіден, қарбыз таудың өзенінен келетін таза судан нәр алады.Осындай озық тәжірибемен бөлісу үшін былтыр жайылмалық диқандар ауылдағы және аудандағы қарбыз егуге ниетті жастарға семинар өткізген болатын. Нәтижесінде практикалық және теориялық түрде жүзеге асқан оқыту-семинары жемісін берді. 15 кәсіпкер 5,5 миллион теңге көлеміндегі грантты жеңіп алып, қарбыз дақылын жылыжайларда көшеттеп егу тәсілі бойынша кәсіпкерлікке бейімделіп, 42 адам шаруа қожалықтарында тұрақты жұмыспен қамтылды. Осыған аздап тоқтала кетейік.Қарбыз дақылын өсіру және мол өнім алу жобасына қатысып, қайтарымсыз қаржыға қол жеткізген жайылмалықтардан бөлек аудан көлемінде 200-ге тарта жас оқып, өздері жоба дайындапты. Яғни оқыту-семинар тиімділігін көрсетті. Самат Оспанов грант жеңіп алғандардың қатарында.– Былтыр 1 млн теңге жеңіп алып, Жайылманың шұрайлы жеріне қарбыз егіп, жақсы өнім ала алдым. Биылғы меже егіс көлемін көбейту, ең бастысы күтімі жақсы болса болды, еткен еңбек жерде қалмайды. Бір жағынан жұмыссыз жастардың санын азайтуға септігін тигізеді, – деді Самат кәсіпкер.Жалпы алғанда әзірге жайылмалық дала еңбеккерлерінің қарекеті осылай өрбуде. Сәуірдегі сәтті тіршілік тамызға дейін толық өнім беріп, ел несібесін Жер-Анадан еселеп алуға ниетті.

Жаңақорғанда су қоймаларының арнасы толды

Жаңақорғанда «Музейге сый тарту» акциясы өтті

<a href="https://kyzylorda-news.kz/">Kyzylorda-news.kz.</a> Елімізге танымал зерттеуші ғалым, ауыз әдебиеті үлгілерін жинаушы, Қорқыт ата атындағы Қызылорда университетінің профессоры, ҚР Мәдениет қайраткері, Қазақстан Жазушылар, Қазақстан Журналистер одағының мүшесі, Жалағаш ауданының Құрметті азаматы Тынышбек Дайрабайдың 80 жылдығына орай Жалағаш ауданына Жаңаталап ауылдық кітапханасының ұйымдастыруымен «Сырдың ұлы перзенті» атты өмірі мен шығармашылығына арналған аймақтық байқау өтті.&nbsp;Қазақ әдебиетіне, мәдениетіне, жалпы руханиятқа деген құштарлығы Сыр өңірінде ғұмыр кешкен ақын-жыраулар, батырлар мен би-шешендер, ел бастаған көсемдер мен көрнекті тұлғалардың өмірі мен шығармашылық жолына деген қызығушылықтың әсерімен Тынышбек ағамыз журналистік қызметін зерттеушілікке ұластырды. Осылайша өлкетану оның шығарма-шылығының бір бағыты іспетті қоғамдық қызметіне айналды. «Тоғанас батыр», «Сырдың сырлы сыры», «Сыр перзенттері», «Темірбек Жүргенов», «Қорқыт ата» энциклопедиясы, «Билер сөзі киелі», «Сыр елінің ескерткіштері», «Кете Шөмекей» және басқа да зерттеу еңбектері – қаламгердің тынымсыз &nbsp;еңбегінің жемісі.&nbsp;Шара барысында тынымсыз ізденіс, еңбексүйгіштік қасиеттерімен көпке үлгі болған Тынышбек ағамыздың өмірі мен шығармашылығынан жас жеткіншектерімізге көптеген мағлұмат берілді. Байқауға аймақтағы бірнеше білім ошағынан 6-7 сынып оқушылары қатысып, өзара бақ сынады. Олар қайраткердің өмір жолына тоқталып, өздері шығарған арнауларын мәнерлеп оқыды.Әділқазылардың шешімімен І орынды Ә.Оңалбаев атындағы №117 орта мектептің 6 сынып оқушысы Дамир Амандық жеңіп алды. Ал ІІ орынды І.Қабылов атындағы №32 орта мектептің 7 сынып оқушысы Нұрислам Қонысбай мен №119 орта мектептің 6 сынып оқушысы Томирис Муса өзара бөлісті. Шалғайдағы Аққыр ауылында орналасқан №188 орта мектептің 7 сынып оқушысы Қарақат Әбдір мен №122 орта мектептің 6 сынып оқушысы Ақнұр Тұрақбай үздік үштікті түйіндеді. Шара соңында белсене қатысқан оқырмандар арнайы алғыс хатпен марапатталып, бағалы сыйлықтарға ие болды.Тынышбек Дайрабай 1943 жылы 12 ақпанда Қызылорда облысы Жалағаш ауданының Жаңаталап ауылында шаруа отбасында дүниеге келген. Мұнда «Бекбергеннің бес баласы» деген сөз кең тараған. Сол бес ағайынды кісінің қай-қайсысы да өнерге жақын, сөзге шешен, шежіреге аса жетік, беделді кісілер болған. Әке сөзін жаттап, ізіне ерген Тынышбек Майлыбайұлы да өнерге құштар болған. Кеңес дәуірінде кино маңызды өнер саналған. Соның әсері болса керек, бозбала жігіт өзінің еңбек жолын ауыл клубында киномеханик болудан бастаған. Негізгі арманы журналист болу екен. Соның жетегімен КазҰУ-дың Журналистика факультетіне оқуға түседі. Еңбек жолын Тереңөзек аудандық «Еңбек туы» газетінде бөлім меңгерушісі болып бастайды. Кейін сауатты, тілге жүйрік, іске икемді азамат билікке де араласып, біршама жыл Тереңөзек аудандық атқару комитеті төрағасы қызметіне жоғарылап, әлеуметтік саланың дамуына еңбек сіңіреді. Жоғары партия мектебін бітіріп, шаруашылықта істеуді жөн көріп, партком хатшысы атанады. Кеңес жұмысына да араласады. Соның нәтижесінде аудан әкімінің орынбасары қызметін де абыроймен атқарды. Мамандығы журналист болғандықтан «Еңбек туына» редактор болып қайта оралады.Тынышбек Дайрабайдың Алматы қаласына қоныс аударғанына да көп жылдың жүзі болды. Ол Халықаралық «Түркістан» газетінде бөлім меңгерушісі болып, жемісті еңбек етті. Түрлі тақырыпқа, оның ішінде рухани құндылық мәселелеріне үзбей қалам тартқан. Осы ұжымда еңбек ете жүріп, «Құрмет» орденінің иегері атанды. Зерттеушінің ел тарихын, оның ішінде Сыр өңірінен шыққан ахун, жыраулардың, би-шешендердің бай мұраларын насихаттап, жарыққа шығару жолындағы қажырлы еңбегі еленді.Тынышбек Майлыбайұлының бүгінге дейін 30-ға тарта тарих және ақын-жыраулар жайлы кітабы жарық көрген. Кезінде олардың бәрі де оқырман тарапынан лайықты бағасын алды. Ол «Сыр елі» энциклопедиясын шығарушылардың бірі болды. Сол секілді «Сырдария» кітапханасы сериясымен шыққан көптомдық кітапты шығаруға да үлес қосты. Зерттеуші, қаламгер Тынышбек Дайрабай 80 жылдық өмір жолында бір институттың жұмысын атқарған қоғам қайраткері дәрежесіне көтерілді. 1998 жылы Темірбек Қараұлы Жүргеновтың 100 жылдық мерейтойын өткізуге бастамашы болды. Қазақстан Жазушылар және Журналистер одақтарының мүшесі, ҚР Мәдениет қайраткері, Сырдария, Жалағаш, Қармақшы аудандарының және Қызылорда қаласының Құрметті азаматы, Қорқыт ата атындағы Қызылорда университетінің «Құрметті про¬фессоры», Әлеуметтік ғылымдар академиясының «Құрметті академигі» Тынышбек Дайрабай – өзінің қажырлы еңбегі, маңдай тері арқылы міне, осындай жоғары дәрежелі атақтарға ие болған тұлға.Иә, рухани жан дүниесі бай адам ешқашан тоқырау, шаршау дегенді білмейді. Ізденген үстіне іздене түскенді жақсы көреді. Осынысымен ол бүгінгі жас ұрпаққа өнегелі жол, ғибратты үлгі көрсетіп жүр. «Ауылда қартың болса, жазып қойған хатпен тең» деген аталы сөзге адал бір адам болса, ол – Тынышбек ағамыз.Қазақ елінің, кең байтақ жерінің тарихы тым тереңде жатыр. Оның әлі ашылмаған тұстары да көп болуы мүмкін. Бұл бәрінен бұрын халық ауыз әдебиетінің көрнекті өкілдері – ақын, жырау, би, шешен, тағы басқа да өнер адамдарының асыл мұраларының зерттеліп зерделенуіне де аса қатысты екені даусыз. Бұл ретте ертеден осы саланың жоғын тауып, барын мәзір етіп жүрген өлкетанушы, этнограф, зерттеуші ғалымдарға үлкен салмақты жүк, айрықша сенім артылып келгені белгілі. Ұзақ жылдардан бері көптеген ізденісті жұмыстарды тындырған тұлғаның бірі де бірегейі – Тынышбек Дайрабай ағамыз.

«Сырдың ұлы перзенті» атты аймақтық байқау өтті

Жаңақорғанда қаңылтыр шығарылады

<a href="https://kyzylorda-news.kz/">Kyzylorda-news.kz.</a>&nbsp;Дүйсенбі мен жұма – редакция тілшілері үшін күрделі күн. Себебі дәл осы күндері біз халыққа ақпарат таратуға асығып, басылымның жаңа санын дайындауға кірісеміз. Бар назарымыз мақалаға ауып, кейде кештің қалай батқанын да аңғармай қаламыз. Бұқаралық ақпарат көздерінде жұмыс істейтін әріптестер мұны жақсы біледі. Бір жақсысы, шығармашылықтың адамдары қанша шаршаса да өз ісінен ләззат алады. Тек қағаз бен қалам ұстағандарға ара тұра еркіндік пен демалыс қажет-ақ. Әсіресе, нәзік жандарға бір сәт тынығып, шаршағанын сұлулық салонынан шығарған ұнайды. Осы тұста сіздерге бірдеңе айтып берейін...&nbsp;Кеш қарайып барады. Ал біз газеттің 8-ші санын әзірлеп бітіп, жұмыстан шықтық. Өздеріңіз көріп жүргендей, аудан айналасы бұрынғысынан да ажарлана түскен. Ғимараттар мен тамақтанатын орындардағы қызылды жасылды түстер көздің жауын алады. Жарқ-жұрқ еткен көше шамдары да ерекше шабыт береді. Кенет, сондай жарықтардың арасынан бір жарқыл көзіме оттай басылды. Кеш батса да, жарығы жанып тұрған бұл не болды екен? «Жақсыны көрмекке» демекші, мен де әлгі жалт-жұлт еткен ғимаратқа кіріп көрмекке бекіндім. Жанына жақындай берген едім, ғимарат деп отырғаным – сұлулық салоны болып шықты. Сыртқы көрінісінің өзі бір көрген адамды баурап алатын бұл сән салонының жаңадан ашылғаны көрініп тұр. Сыртқы дизайны да адамды магнитше тартып тұр. Ақырын қадам басып, жаңа ғимараттың ішіне кірген едім, мені Бота Төлегенова жылы шыраймен қарсы алды. Сөйтті те, асқан мәдениеттілікпен сән салонындағы қызмет түрлерімен таныстырып шықты. Ағылшынша айтқанда, өзі «nail master» екен. Сұлулыққа жаным құмар менің де тырнақтарымды қолжетімді бағада істеп беремін деген соң, ойланбастан орындыққа жайғаса кеттім. Сүйрік саусақтары оның нағыз шебер екендігін анық байқатады. Тырнақтарымды боятып отырып, әлгі келіншекті ақырын әңгімеге тарттым. Аталған сән салоны кешкі уақытта да келушілерге қызмет көрсететін болып шықты.Ботаның негізгі мамандығы – есепші. Өз мамандығымен жұмыс істеген ол бүгінде құй сеніңіз, құй сенбеңіз аудандағы «Таңсу» сұлулық салонының ең деген тырнақ әрлеушісі. Оның бұл салаға келуінің де өзіндік себебі бар. Бота Төлегенова – 1 қыз, 2 ұлы бар жалғызбасты ана. Тағдырдың ісіне шара бар ма?! Оның екінші ұлы аутизмге шалдыққан. Сол себепті өз мамандығынан бас тартып, сұлулық әлеміне келуге тура келген. Баласын ай сайын қажетті емдерге апаруына байланысты мемлекеттік жұмысты істей алмайды. Сосын өзіне жеке кәсіп табудың жолын іздейді. Бүгінде күн-түн демей, балаларының тамағы тоқ, көйлегі көк болуы үшін аянбай тер төгуде. «Тәуекел түбі – желқайық, өтесің де кетесің» демекші, тәуекел етіп, тәжірибелі жандардан дәріс алып, сертификатталған маман атанды. Аз уақыттың ішінде тырнақ әрлеуші мамандығының қыр-сырын меңгеріп, бүгінде көпшіліктің алғаусыз алғысын арқалап жүр.<blockquote>«Әркімнің бұл өмірде алар белесі бар. Бұл мамандыққа аяқасты келдім. Ойымда да болмаған. Қазіргі күні кең әрі жарық «Таңсу» сұлулық салонында қызмет етемін. Бір уақытта 7-8 адамға түрлі сәндік қызмет көрсете аламыз. Менің осындай жетістікке жетіп, кәсіп ашуыма отбасым балаларым себепкер. Мемлекет еңбекқор жастарға мүмкіндік беруде. Түрлі бағдарлама арқылы қайтарымсыз және жеңілдетілген несие түрін қарастырып, кәсіп ашуға жағдай жасауда. Ойы озық, ізденімпаз жастарымыз арасында бұл мүмкіндікті құр жібермей, өз кәсібін бастап кеткендер қаншама. Мен де мемлекеттен қолдау алып, өз кәсібімді әрі қарай кеңейткім келеді», – дейді жас кәсіпкер.</blockquote>Салонда өзге де шеберлер қызмет етеді. Олар жас болса да заман талабына сай өзгеріп келе жатқан сән әлемімен бірге дамып, сұлулықтың сырын меңгере түсуде. Өзі сұлу болып қана қоймай, елдің сұлулығы мен игілігіне қызмет етіп жүрген жас кәсіпкерге қалың көпшіліктің алғысы шексіз. Жасаған еңбегіңнің нәтижесі жеміс бергенде анық көрінеді емес пе? Сол себепті Ботаның кәсібі халықтың ықыласы арқылы алға қарай дамитына еш күмәніміз жоқ.Айта кету керек, ашылғанына небәрі үш ай болған сән салонының тұрақты тұтынушылары да қалыптасып үлгерген. Өйткені ондағы қызметкерлер тұтынушы талғамынан шығуға бар күш-жігерін салады. Соған сай заманауи құрылғылары да тапсырыспен алыныпты. Кейіпкеріміз әңгіме барысында болашақта өзінен кейінгі жас буынды осы кәсіпке баулып, үйреткісі келетінін тілге тиек етті. Сонымен қатар кәсібін одан әрі кеңейтуді де жоспарлап отыр. Демек еңбегіне қарай өнбегі. Өзі жас болса да, тағдыр тәлкегіне мойымай, әр ісіне ыждағаттылықпен қарап, келешегінен мол үміт күтетін жас кәсіпкердің ісіне біз де береке тілейміз.

Бота Төлегенова: Әркімнің өз белесі бар

Жаңақорғанда «Құрметтеуге лайық жан» жобасы жүріп жатыр

<a href="https://kyzylorda-news.kz/">Kyzylorda-news.kz.</a> Жұма күні Жаңақорған ауданында аймақ басшысы Нұрлыбек Нәлібаевтың төрағалығымен кеңейтілген мәжіліс өтті. Мәжіліске облыстық мәслихат төрағасы Наурызбай Байқадамов, Қызылорда облыстық сот төрағасы Әділхади Шығанбаев, облыс прокуроры Нұрлан Бижанов, облыстық полиция департаменті басшысы Мақсұтхан Аблазимов және облыс бойынша негізгі салалық басқармалардың басшылары қатысып, тиісті мәселелер бойынша өңір жағдайынан толық мағлұмат алып, халық игілігі жолында бірге атқарылатын міндеттер сараланды.Ауданның әлеуметтік-экономикалық дамуы және алдағы міндеттері талқыланған жиында облыс әкімі Нұрлыбек Машбекұлы ауыл әкімдерінің жұмысына ерекше тоқталды.2022 жылдың қорытындысында негізгі макроэкономикалық көрсеткіштер бойынша 4-орынға тұрақтаған Жаңақорған ауданында өңдеу өнеркәсібінде 86,1 млрд теңгені құрап, 2,6 пайызға, бөлшек сауда көлемі 7,1 млрд теңгені құрап, 1,6 пайызға артқанын, негізгі капиталға салынған инвестициялар көлемі 53,2 млрд теңгені құрағанына тоқталып, өнеркәсіпті өңірдегі өсу тенденциясына оң бағасын берді. Одан әрі Жаңақорған ауданының даму перспективасы жөнінде аудан әкімі Мұрат Тілеуімбетовтың хабарламасы тыңдалды. Ол ауданда инвестициялық жобалар есебінен салық түсімін 4 млрд теңгеге жеткізу жоспарланып отырғанын, есепті кезеңде өңірде 35 млрд теңгенің өнеркәсіп өнімдері өндірілсе, өңдеу өнеркәсібі көлемі 22 млрд 400 млн теңгеге жеткенін айтты.<blockquote>«Негізгі капиталға тартылған инвестиция көлемі 9 млрд 900 млн теңгеге жетіп, өткен жылдың есепті кезеңімен салыстырғанда 2,7 есеге арттырылған. Ауданда 38 млрд теңгені құрайтын 10-ға тарта ірі инвестициялық жобалар жүзеге асырылды. Құрылыс жұмыстарының көлемі есепті кезеңде 1 млрд 900 млн теңге болып, өткен жылмен салыстырғанда 123 пайызға орындалды. Тұрғын үйді пайдалануға берудің жалпы ауданы 17 мың 300 шаршы метрге жеткізіліп, бөлшек сауда көлемі 2млрд 200 млн теңгеге жетті», – деді аудан әкімі хабарламасында.</blockquote>Сонымен қатар ауданда шағын және орта кәсіпкерлік саласында 7666 кәсіпкер тіркеліп, бұл өткен жылғыдан 1476 кәсіпкерге, яғни 26,2 пайызға артқаны көңіл тоғайтты. Оның ішінде нақты жұмыс жасап тұрғаны 6841 болса, белсенділік көрсеткіші 96,8 пайызға артқан. Өткен жылдың қорытындысымен аудан кәсіпкерлерінің тарапынан 54 млрд теңгенің өнімі өндіріліп, 25,5 пайызға өскен. Жыл басынан бері барлық қаржы көздерінен 124 жобаға 723 млн 500 мың теңгеге қаржылай қолдау көрсетілген. Оның ішінде 2021-2025 жылдарға арналған кәсіпкерлікті дамыту бағдарламасы шеңберінде жқмыспен қамту орталығы арқылы 51 млн теңге құрайтын 37 жоба грантты жеңіп алса, 87 жобаға 672 млн 500 мың теңге несиелер берілген.Ауданда ауыл шаруашылығы жалпы өнімдерінің көлемі 4 млрд 800 млн теңгені құрап отырғанын айтқан әкім одан әрі ауданда азықтүлік бағдарламасын тұрақтандыру мақсатында қосымша 295 га жер аршылып, 845 отбасы осы шаруаға жұмылдырылып отырғаны жөнінде жеткізді. Ауданда ауылшаруашылық өнімдерімен айналысатын 781 шаруашылық құрылымдары болса, 485 егін, оның ішінде 234 шаруашылық күріш егеді. Аудан басшысы одан әрі өзекті мәселелер қатарында ауыз су, электр қуаты, елді мекендерге газ апару, ішкі жолдарды асфальттау және аяқсумен қамту бойынша атқарылған жұмыстарды баяндады. Өзі ауданға әкім болып келгелі 9 елді мекенге электр желісін жаңғырту бойынша жалпы құны 2 млрд 300 млн теңге құрайтын жоба әзірленіп, оны бастауға 2023 жылы республикалық және облыстық бюджеттен 503 млн теңге қаржы бөлінгенін айтты.Сонымен қатар осы жылдың басында демеушілер есебінен тағы да 10 елді мекенге электр желілерін жаңғырту жобасы жасалынып, 2024 жылдың бюджетіне өтінім тапсырылды. Жоба құны 3 млрд 300 млн теңге. Елді мекендерді табиға газға қосуда атқарылып жатқан бұл жұмыстар толық іске асқанда 13 елді мекен немесе 53 мың халық табиғи газды пайдалана алады. Әкім одан әрі аймақ басшысы бастамасымен Жаңақорған ауданының орталығында аз қамтамасыз етілген отбасыларға арналып 80 пәтерлік тұрғын үй құрылысы басталғанын жеткізді. Ол үшін 480 млн теңге қаржы бөлінді. Сол сияқты «Ел бесігі» жобасы аясында Төменарық және Әбдіғаппар, Өзгент ауылдары тұрғындарының көптен күткен тілегі – ауылдық аурухана мен ауыл клубтарына назар аударылып, осы жылы пайдалануға берілетінін білдік.&nbsp;«Ел бесігі» жобасына екпін берілуі керекАталмыш жоба бойынша былтырғы жылы аймақтағы ауылдарға 7,8 млрд теңге бағытталды. Үкіметтен жасалып отырған осындай мумкіндіктен қағажу қалған ауыл әкімдерін орнынан тұрғызған аймақ басшысының талабы халыққа қажетті жағдайды жасауда қатаң сұрау болатынына жауапты өкілдердің көзін жеткізді.Мұнан бөлек Президенттің бастамасымен жүзеге асырылып жатқан «Ауыл аманаты» жобасы бойынша Жаңақорған ауданында Қожакент пен Аққорған ауылы ғана жобаға қатысуы көңіл көншітпейді деген аймақ басшысы әрбір ауыл әкімі мемлекеттік бағдарламаларға азаматтарды барынша қатыстыруға мүдделі болу керектігін айтты.2022 жылы облыс бойынша кәсіпкерлікті қаржылай қолдауға әртүрлі көздерден 42 млрд теңгеге жуық қаржы бағытталса, оның ішінде Жаңақорған ауданына 2,4 млрд теңге тартылған. Биыл кәсіпкерлікті қаржылай қолдауға 22 млрд теңгеге жуық қаржы қарастырылуда. Ынталы азаматтарды осы ақпаратпен қамтамасыз етуге барлық тиісті шараларды жүргізуді тапсырды. «Жастардың кәсіпкерлік бастамасына жәрдемдесу үшін бюджеттік кредиттер ұсыну» бағдарламасы бойынша жеңілдетілген 2,5 пайызбен несие алу үшін ауданда 30,1 млн теңгеге 9 жоба ғана қолдау тапқанын сынға алды.Ауыл әкімдері инвестиция тартуға жауапты<blockquote>«Инвестиция тартуға ауыл әкімдерінң де жауапты екенін Президент баса айтқанын еске алсақ, елді мекендегі жұмыссыздар санын азайту, жаңа жұмыс орындарын құру, табыс көзін арттыру секілді шараларға назар аударылу қажет. Ауыл әкімдерінің рейтингі осы көрсеткіштер қорытындысымен сараланады», – деді Нұрлыбек Машбекұлы.</blockquote>Аймақ басшысы ауылдың өркендеуіне инвестиция тартып, туған жердің ынталы азаматтарын жұмылдыруда аудан әкімі Мұрат Жолкелдіұлының еңбегіне жоғары баға беруді де ұмытпады. Міне, осындай жұмыстар нәтижесінде ескі құрылыс алаңына айналған аймақта балалардың игілігіне үлкен заманауи саябақ салынып, кенттің де көркін кіргізіп тұр. Сондай-ақ елді мекендерді газдандыруда жобалық құжаттамалар дайындауда уақыттан ұтып, өздігінше демеушілер тартып, соның нәтижесінде ауыл тұрмысына аса қажет көнілдір отынмен қамтылуын жеделдетуге жол таба білген жанашырлығына жеке тоқталып, ел сенімін арқалап отырған билік өкілдерінің қайқайсысында да осындай биік жауапкершіліктің болуы маңызды екенін ескертті. Ауданда жұмыссыздықты азайтуда жастардың жұмыспен қамтылуына мән беруге тиіспіз. Бір қынжыларлығы, шағын бизнесті дамытуға деп несие ұйымдарынан қаржының басым бөлігін мал шаруашылығына алған екен. Бірақ ауылдарда мал жайылымына қатысты мәселе аз емес. Аудан бойынша мал басына 602,2 мың гектар жайылым алқабы қажет. Жетпейтін жайылым көлемі 321,6 мың гектарды құрап отыр. Бұл жағдай ауылдық жерде кәсіпкерлікті дамыту бағытында заманауи тың кәсіптерге негіз қалаудың қажеттігін алдыға тартатынын айтты аймақ басшысы.Ауылдарда қылмыстылықты ашу көрсеткіші төмен бе?2022 жылы ауданда 113 қылмыс тіркеліп, оның 75-і ашылса, 2023 жылы 53 қылмыс тіркелген, оның 30-ы әлі ашылмаған. Аядай ғана ауылдарда қылмыс фактілері орын алып, оның дер кезінде ашылмай отыруына учаскелік инспекторлардың ауылда тұрмай қатынап жұмыс істеуінің де кері әсері көп деді әкім. Өйткені жағдайы жоқ, екі ортада сабылып жүретін әкім мен мектеп директорлары немесе учаскелік инспекторлардың жұмысқа салғырттығы ел арасында бейберекет жағдайлардың орын алуына, заңсыздықтардың дер кезінде жауапкершілікке тартылмауына алып келетінін айтып, бұл жолсыздықты тәртіпке түсіруге пәрмен берді. Айта кету керек, соңғы бір жылда Қыраш, Қыркеңсе, Қандөз, Қожамберді ауылдық округтерінде қылмыстылық тіркелмегенін, жоғары нәтиже көрсеткен ауыл әкімдеріне ынталандыру шаралары қаралатынын да айтты. Одан әрі бүгінгі таңда өзекті болып отырған су мәселесі туралы мамандарды тұрғызып, нақты тапсырмалар берді.Жергілікті жерде негізгі дақыл болып есептелетін күріштен нәтижелі өнім алуда еңбеккерлердің маңдай тері еш кетпеу жолында кәсіби және адами тұрғыда аянбай жұмыс жасау маңызды. Біріккен тірлікте береке болады. Жиын қорытындысы халқымыздың осынау тұғырынан түспеген асыл дағдысына тоқтаған бәтуалы байламмен түйінделді. Облыс әкімі бастаған ресми өкілдер қатарында құқық қорау саласы басшылары одан әрі Манап Көкенов атындағы Мәдениет сарайының кең ғимаратында аудан тұрғындарын жеке қабылдады.

Жаңақорған өндірісінде өркендеу бар

Қармақшы: Шалғай мекендердің шаруасы ширақ

<a href="https://kyzylorda-news.kz/">Kyzylorda-news.kz.</a> Қызылорда облыстық кәсіпкерлік және өнеркәсіп басқармасының басшысы Исатай Сәбиұлы аймақтағы жиһаз кәсіпорындарының жұмысымен танысты.&nbsp;Басқарма басшысы ең алдымен «Сыр жиһазы» цехының жұмыс барысымен танысты. Бүгінде тек қаланы емес, облысқа қарасты аудан, ауыл-аймақ пен өзге де облыстардың сұранысын өтеп келе жатқан цехтың құрылғанына биыл 14 жыл болыпты. Ағаш бұйымдарын шығарудан бастаған мекеме 2009 жылдан бері «Сыр жиһазы» ЖШС ретінде сырбойылықтарға етене танылды.&nbsp;Бүгінде 30-дан аса адамды тұрақты жұмыспен қамтып отырған мекемеде 3 цех жұмыс істеуде.Әрі қарай басқарма басшысы «Алис Трейд Казахстан» жиһаз цехымен танысты. Компания 2004 жылы құрылған, мұнда&nbsp; 40-қа жуық адамды жұмыспен қамтып отыр.&nbsp;Түрлі сәнді үлгіде жасалынған жиһаздарға Қазақстанның барлық аймағынан тапсырыстар түседі. Цех қытай, испан және Ресей өндірушілерінің жабдықтарымен қамтамасыз етілген. Кәсіпорын басшысы Алексей Антоновтың айтуынша, бүгінде цех өндіріс көлемін арттырып қана қоймай, сонымен қатар өнім ассортиментін кеңейтуде.Мұнан әрі Исатай Ансат "Панабек" жиһаз фабрика басшысымен кездесіп, жиһаз өнеркәсібі соңғы жылдары экономиканың ең қарқынды дамып келе жатқан салаларының бірі болып табылатынын жеткізді.

Қазақстан және Қызылорда облысының жаңалықтары