<a href="https://kyzylorda-news.kz/">Kyzylorda-news.kz.</a> Аудан орталығында 1999 жылдан бері мектеп жасына дейінгі бүлдіршіндерді туберкулез ауруынан оқшаулап, алдын алу жұмыстарын жүргізетін №6 "Ботакөз" санаториялық бөбекжай жұмыс жасап келеді. Бүлдіршіндердің денсаулығын жіті қадағалап, сауықтыруы үшін жұмыс жасайтын бұл мемлекеттік мекеме аптасына бес күн бойы жұмыс жасау тәртібіне 2007 жылдан бері көшірілген.&nbsp;Санаториялақ бөбекжай 2015 жылдан бері екі топтың қысқаруына байланысты кенттегі №1 "Қызғалдақ" балабақшасының ғимаратымен ауыстыру жұмыстары жүргізілген. Соңғы 8 жылдан бері бөбекжайда 1-5 жас аралығындағы "Ақ көгершін" тобы жұмыс істесе, өткен жылы қазан айында қосымша екінші топ ашылып, қазіргі таңда 39 бала тәрбиеленуде. Бөбекжайда 9 педагог, 14 техникалық қызметкер жұмыс жасайды.&nbsp;Осы аптада балалардың мерекесіне орай "Ақ көгершін" және "Балапан" топтарында "Көк аспанда күн сөнбесін – бірге күлсін бүлдіршін" тақырыбында мерекелік ертеңгілік өткізілді. Мерекелік ертеңгілікте балақайлар ән айтып, би биледі. Олардың өнерін тамашалаған ата-аналар тәрбиешілерге алғыстарын білдірді. Сонымен қатар жеке кәсіпкер Мағрипа Өтепбергенова балаларға арнайы сый жасап, қуанышты еселей түсті. Кәсіпкер жазғы маусымда балалардың шомылуы үшін арнайы хауызды сыйлады.&nbsp;<blockquote>«Биылғы мереке біздің балалар үшін ерекше көңіл күймен өтті. Тәрбиешілерімен бірге ән айтып, би билеген балдырғандарға сыйлық өте қатты ұнады. Негізінен бөбекжайда асыраушыларынан айрылған, жалғыз баста аналар, көп балалалы аналардың балалары, учаскелік дәрігерде әртүрлі диагнозбен "Д" есепте тұратын балалар қабылданады. Әрине санатоиялық бөбекжай болған соң балаларға жағдай жасалған, балалар алты мезгіл тамақтанады, арнайы күн тәртібімен тынығады, сауығады. Бөбекжаймен тығыз байланыс орнатқан жеке кәсіпкер Мағрипа Өтепбергеноваға айтар алғысымыз мол. Күннің ыстығында балалар осы хауызда шомылатын болады», – дейді бөбекжай меңгерушісі Қарлығаш Байжанова.</blockquote>Ауласы жасыл желекке көмкерілген, қос қабатты ғимаратта орналасқан бөбекжайдың тыныс тіршілігі күн сайын тәрбиешілердің бүлдіршіндерді жақсы көңіл күймен қарсы алуымен басталады. &nbsp;&nbsp;

Сырдариялық жеке кәсіпкер балаларға қуаныш сыйлады

<a href="https://kyzylorda-news.kz/">Kyzylorda-news.kz.</a> 1 маусым – Халықаралық балаларды корғау күні! Қазақстан үшін ана мен бала жағдайы ешқашан көңілден тысқары қалған емес.Мемлекет басшысы Қасым-Жомарт Тоқаев «Өскелең ұрпақтың үйлесімді дамуы мен бақытты балалық шағы- біздің жалпыұлттық міндетіміз» - деп атап өткен болатын. Расында, еліміздің келешегі – бүгінгі жас ұрпақ. Балаларымыздың әрбір сәтін бақытқа кенелту үшін оларға жылылық пен мейірім шуағын аямауыз қажет. Осы орайда, қызылордалық полицейлер Балаларды қорғау күніне орай мерекелік іс-шара өткізді. Балаларға қуаныш сыйлау мақсатында арнайы ұйымдастырылған.&nbsp;Мерекелік шара барысында балалар жылдам қимылдайтын арнайы жасақ қызметкерлерінің құралдарымен жəне техникаларымен жақынырақ танысты. Аты айтып тұрғандай, бұлар – ерекше мақсаттағы арнайы жасақ. Төтеден келген оқыс оқиғаларда тосыннан жедел тойтарыс беріп, бейбіт күндегі тыныштығымызды күзетіп жүрген азаматтар. Арыстандай айбатты, қырандайын қайратты арнайы жасақ қызметкерлері кәсіпқойлығы да, жасанып жарақтануының &nbsp;да жоғары деңгейде екендігін көрсетті.&nbsp;Бұдан бөлек, балаларға арналған бүгінгі мерекелік шара барысында «Біз сенің балаларыңбыз Қазақстан» тақырыбында сурет байқауы ұйымдастырылды. Балалар тақырып бойынша өз өнерлерін ортаға салды. Балалардың құқықтық сауаттылығын арттыру, заңымызға деген сүйіспеншілік сезімін қалыптастырып, &nbsp;шыншыл да әділетті және парасатты тұлғаны қалыптастыру, полиция қызметкерлерінің ерліктерін насихаттау мақсатында өткізілген байқау жоғары деңгейде өтті.&nbsp;Арнайы құрылған комиссия мүшелері балалардың салған суреттеріне баға беріп, жеңімпаздарды анықтап, &nbsp;марапаттады. Сондай-ақ, балалардың көңілін көтеру үшін арнайы шақыртылған аниматорлар өнер көрсетіп, қызықтыойындар ойнатты. Тəртіп сақшылары мен арнайыбалалар үшін ұйымдастырылған бүгінгі мерекелік шара &nbsp;барысында балалар полиция қызметкерлерімен әңгімелесіп, қызықтырған сұрақтарына жауап алды.Іс-шара соңында барлық балаларға тәтті сусындар мен балмұздақ таратылып берілді. Өз кезегінде Департамент басшылығы балалардың құқығын қорғап, оларға қамқор болуға үндейтін мейрам қарсаңында ұйымдастырылған іс-шараның маңызын атап өтіп, ата-аналар мен балаларды құттықтап, жылы лебіздерін жеткізді. Қызықты әсерге бөленген балалар өздерінің қиялындағы суреттерді асфальтқа таңбалап, естелік сыйлықтарын алып, жоғары көңіл күйде тарасты. Өткізілген іс-шара балалардың естерінде ұзақ қалатыны сөзсіз.

Қызылордалық полицейлер балаларға ұмытылмас мереке сыйлады

<a href="https://kyzylorda-news.kz/">Kyzylorda-news.kz.</a> Халықаралық балаларды қорғау күні аудандық білім бөлімінің ұйымдастыруымен кенттегі Ы.Жақаев атындағы саябақта кең көлемде аталып өтті. Дәл осы күні балғындардың шат-шадыман қуанышы салтанат құрды.Адамзаттың бәріне ортақ ізгі мерекеде күн де ерекше мейірін төгіп, көк аспан бала көңіліндей тұнық тұрды. Таң ата саябаққа «Балалық шақ қандай ғажап!» атты шараға қатысушы меймандар жиналды. Одан кейін балаларға арналған «Бейбітшілік. Ынтымақ. Бірлік» көрмесі мен «Дала кітапханасын», «Балалық шаққа саяхат» қалашығын аудан әкімі Нұржан Ахатов кішкентай көрермендермен бірге тамашалады. Мерекелік шараға мыңға жуық баланың қатысуы оның мәнін ашып, мазмұнын байыта түскендей болды. Саябақтың қақ ортасындағы сахнада балабақша бүлдіршіндері өнер көрсетіп, мерекенің көрігін қыздырды. Балаларға арналған мерекені ертегі кейіпкерлерінсіз елестету әсте мүмкін емес. Мұнда әртүрлі қаһармандар төбе көрсетіп қана қоймай, түрлі сайыстар ұйымдастырып, мереке иелерінің көңілін көтеріп бақты. Солардың бірінде «Асық party» ұлттық ойыны ұйымдастырылып, жиналғандарды тәнті қылды. Ал «Мен және менің отбасым» ¬сайысында жас жанұялар бақтарын сынады. «Тәй-тәй жүргім келеді» тұсаукесер рәсімінде бүлдіршіннің ата-анасы аудан әкіміне ырымдап, балаларының тұсауын кестірді.&nbsp;Нұржан Сәбитұлы бүлдіршіннің тұсауын кесіп, «Еліне қызмет ететін үлкен азамат болсын» деп батасын берді. Бәрін айт та, бірін айт балдырғандарға атымтай жомарттардың атынан 1000 дана балмұздақ тегін таратылды.Мұнан соң ¬аудан әкімі мерекеге жиналғандарды құттықтап, ізгі лебізін білдірді. 20 үздік оқушыға Алматы қаласындағы «Спутник» сауықтыру лагеріне жолдама тарту етті. Сондай-ақ Тартоғай ауылында орналасқан №153 Ш.Есенов атындағы мектеп-лицейі оқушыларын тасымалдау үшін су жаңа автобустың кілті табысталды.Өміріңді қызық пен қуанышқа бөлейтін балалардың әр күні мереке болса дейміз. Тек ерекше көңіл-күйде өтетін балалар мерекесінде ғана емес, балалар үшін дүниенің бәрі тегін болса деген де тілек бар. Өйткені, бүлдіршінге бір күн назар аударған жеткіліксіз.Болашағының жарқын болуы үшін өмір бойы жұмыс істеген игі. Олай дейтініміз «Ұл тәрбиелей -отырып, жер иесін тәрбиелейсіз, қыз тәрбиелей отырып, ұлтты тәрбиелейсіз».

Шиеліде балалар шаттанды

<a href="https://kyzylorda-news.kz/">Kyzylorda-news.kz.</a> Мемлекеттік қызметшілер күніне орай облыс әкімінің жүлдесіне арналған XXVII дәстүрлі облыстық, қалалық және аудандық жергілікті атқарушы органдары мен жергілікті мемлекеттік орган қызметкерлері арасындағы спартакиада өтті.&nbsp;Күн ұзағына жалғасқан спорттық бәсекеде командалар бар шеберліктерін салып, жеңісті қолдан бермеуге барын салып бақты. Қоғам айнасы саналған мемлекеттік қызметкерлердің басын қосқан қызу да тартысты жарыстың нәтижесінде «Қазақ күресі» спорт түрі бойынша Қармақшы ауданы командалық есеп бойынша I орынды иемденіп, жеңіс төрінен көрінді. Атап айтар болсақ, 75 келі салмақ бойынша күрескен Қармақшы аудандық мәдениет және спорт бөлімінің сектор меңгерушісі Нұрбол Мырзабаев &nbsp;– І орын, 90 келі салмақ бойынша күрескен Қармақшы ауданы әкімі аппаратының ұйымдастыру және инспекторлық жұмыс бөлімінің бас инспекторы Нұржан Арыстанұлы – І орын, 90+ келі жоғары салмақта күрескен Қармақшы ауданы әкімі аппаратының құжаттамалық қамтамасыз ету және бақылау бөлімінің бас инспекторы Нұрсұлтан Жолмаханов &nbsp;жүлделі ІІІ орынға ие болды. Аудан намысын қорғаған мемдекеттік қызметшілердің жеңісі құтты болсын! Аталған спартакиадада мемлекеттік қызметшілер басқа да спорт түрлері бойынша 10 маусымға дейін жалғаспақ.

Қармақшылық мемлекеттік қызметшілер жеңіс төрінен көрінді

<a href="https://kyzylorda-news.kz/">Kyzylorda-news.kz.</a> «Үздік концертмейстер – 2023» облыстық байқауында Қорқыт Ата атындағы өнер мектебінің ұстаздары жеңіс тұғырынан көрінді.Қызылорда облыстық білім басқармасы мен білім және ғылым қызметкерлері кәсіподағының облыстық комитеті және облыстық оқу орталығының ұйымдастыруымен 31 мамыр күні қосымша білім беру ұйымдары (өнер мектебі) педагогтары арасында «Үздік концертмейстер - 2023» облыстық байқауы өткізілді.Байқау 3 кезең бойынша өткізілді. Педагог пианист - концертмейстерлік өнер(өзін таныстыру) Презентация, Шығармашылық шыңы (жеке сабақ барысы), Шыңдалған шеберлік (Еркін тақырыпта кәсіби шеберлікті көрсету). Байқауға облыс өнер мектептерінен (Жаңақорған, Сырдария, Қармақшы, Қазалы аудандары мен Қызылорда қаласы) 6 педагог- концертмейстерлер қатысып, байқау нәтижесінде:Қазалы ауданының Қорқыт Ата атындағы өнер мектебінің фортепиано класының ұстаздары Дарибаева Айгүл Таласқызы жүлделі ІІ орын және жас маман, фортепиано класының мұғалімі Сәрсенбай Гүлболған Ақболатқызы жүлделі ІІІ орын иеленіп, арнайы дипломдармен және облыстық кәсіподақ комитетінің бағалы сыйлықтарымен марапатталды.&nbsp;Байқау жеңімпазы атанған Қорқыт Ата атындағы өнер мектебінің қос ұстазын жеңістерімен құттықтаймыз.

Қазалылық ұстаздар облыстық байқауда жеңімпаз атанды

<a href="https://kyzylorda-news.kz/">Kyzylorda-news.kz.</a> Диқан қауымының астық дақылдарының көтеріліп, дән толтыру үшін нағыз ылғал тілейтін шағы — осы шілде айы. Еңбек етпей, жетістікте жету мүмкін емес. Өңірлік коммуникациялар қызметінің ұйымдастыруымен, Қосшыңырау ауылдық округіне қарасты Абай ауылындағы «Ақжол» шаруа қожалығында баспасөз туры өтті.&nbsp;Өндіріс бригадирі Жетпісбай Ерденов БАҚ өкілдерін күтіп алды. Былтыр «Ақжол» шаруа қожалығының диқандары су тапшылығына қарамастан әр гектардан 60 центнерден жоғары өнім алған. Өңірлік коммуникациялар қызметінің мәліметінше, облыс бойынша барлығы 195,6 мың гектарға ауылшаруашылығы дақыларын орналастыру жоспарланған. Негізгі дақыл − күріштің көлемі 83,9 мың гектарды құрайды. Өткен жылға қарағанда дән егу көлемі 7 мың гектарға артқан. Диқандар өткен жылы күз айларында 4,8 мың гектар күздік бидай егуді және 41,2 мың гектар сүдігер жыртуды қамтамасыз еткен. Биыл көктемде 250 гектарға дейін егін еккен.1997 жылдан бері егін шаруашылығымен айналысатын «Ақжол» шаруа қожалығында бүгінде 15 адам еңбек етеді. Өндіріс бригадирі Жетпісбай Ерденовтің айтуынша, биыл су тапшылығына байланысты егіс көлемі азайған. Егін егуге қажетті техникалар толық қамтамасыз етілген. Жерді тыңайту үшін 3 жыл күріш, 3 жыл жоңышқа егеді. Күрішті бастыру үшін судың көлемі көп болуы қажет. Диқандар жерді «MARA» лазерлі құрылғысымен тегістеген. Жалпы жерді тегістеу суды үнемдеуге септігін тигізеді. Ал өңірдегі су тапшылығы биылғы егін шаруашылығына да қолайсыздық тудыруда. Дегенмен диқандар қол қусырап қарап отырмақ емес. Шамасы келгенше аз сумен мөл өнім алуды көздеп отыр.Күн сәскеден ауғанда егінтайға барған біз күн ұясына батар тұста қайтуға ыңғайландық. Ал диқандар күнделікті қауырт тірлігіне кірісіп, жұмыстарын жалғастырып жатыр. Іштей «Өнімдеріңіз мол болсын», − деген тілек айтып, қалаға қарай бет бұрдық.

Қызылордада егіс көлемі артты

<a href="https://kyzylorda-news.kz/">Kyzylorda-news.kz.</a> Бүгін қаладағы барлық білім ұяларында күміс қоңыраудың сыңғыры естіліп, жұртшылық түлектерге сәт сапар тіледі. Он бірінші сыныпты бітірушілер жаңа өмірге жолдама алып жатса, мектеп табалдырығын өткен жылы алғаш аттаған бүлдіршіндер бір сатыға көтеріліп, ата-ананың, ұстаздар қауымының көз қуанышына айналды.Соңғы қоңырау рәсімі қаладағы Ы.Алтынсарин атындағы №10 мектеп-лицейде «Сәт сапар саған, Жас түлек!» тақырыбында өтті. Салтанатты жиынға қалалық кәсіподақ ұйымының төрағасы Орынша Міржақыпқызы қатысып, 1 маусым балаларды қорғау күнімен құттықтап және жаңа өмірге қадам басқалы тұрған түлектерге сәттілік тіледі.&nbsp;Айта кетейік, Ы.Алтынсарин атындағы №10 мектеп-лицейді 61 жас түлек алтын ұядан үлкен өмір аспанына қанат қаққалы отыр. Оның ішінде «Алтын белгіге үміткер» 4 оқушы, «Үздік аттестатқа» 2 оқушы үміткер қатарында.Салтанатты шарада Орынша Міржақыпқызы 2022 жылғы мемлекеттік аттестаттаудың қорытындысы бойынша үздік нәтиже көрсеткені үшін Ы.Алтынсарин атындағы №10 мектеп-лицейге білім саласында сапаны қамтамасыз ету комитетінің төрағасының дипломын табыстады.Алтын ұяларынан қимастықпен қоштасқалы отырған оқушылар әсерлі ән, көңілді күй, ерекше билерімен шара көркін қыздырды. Бүгінде қала бойынша жеке мектепті қосқанда 2827 түлек мектепті аяқтады. Оның ішінде 146 оқушы «Алтын белгіге», 302 оқушы «Үздік аттестатқа» үміткер.&nbsp;Ақ тілектер мен ізгі ниет ақтарылған кеш соңында күміс қоңырау үні сыңғырлады.

Қызылорда: Сәт сапар саған, Жас түлек!

<a href="https://kyzylorda-news.kz/">Kyzylorda-news.kz.</a> Бүгін Қызылорда облыстық мәслихат төрағасы Наурызбай Байқадамовтың төрағалығымен облыстық мәслихаттың кезектен тыс 3 сессиясы өтті.&nbsp;Сессия жұмысына облыс әкімінің орынбасары Нұрымбет Сақтағанов, облыстық мәслихат депутаттары, тексеру және сайлау комиссияларының төрағалары және БАҚ өкілдері қатысты. Ауданнан сайланған депутаттар бейне-конференция байланысы арқылы қатысып, сессия тікелей онлайн режимінде өткізілді.&nbsp;Күн тәртібіндегі облыс әкімдігі жанындағы терроризмге қарсы комиссияның құрамын бекіту, облыстық сайлау комиссиясының құрамын сайлау туралы, облыстық мәслихатта «Еңбек» депутаттық тобын құру, облыс бойынша тексеру комиссиясының мүшесін лауазымынан босату, сондай-ақ, жаңа мүшесін лауазымына тағайындау, облыстық мәслихаттың кейбір шешімдерінің күші жойылды деп тану, кейбір шешімдерін жойылды деп тану туралы және облыстағы елді мекендердің жасыл екпелерін жасау, күтіп-баптау және қорғаудың қағидаларын бекіту туралы 8 мәселе бойынша тиісті басқарма басшылары хабарлама жасады.&nbsp;Облыстық мәслихат төрағасы Наурызбай Байқадамов күн тәртібіндегі екінші мәселеге қысқаша тоқталып өтті. Қызылорда облыстық мәслихатының №18 шешімімен «Қызылорда облыстық сайлау комиссиясының құрамын сайлау туралы» Қызылорда облыстық мәслихатының 2019 жылғы 11 қаңтардағы №290 шешіміне өзгерістер енгізіліп, облыстық сайлау комиссиясының құрамынан «Асыл – Мұра Орда» қоғамдық қоры арқылы ұсынылған Баймурзаев Галым Конакбаевич және «Самұрық» инновациялық идеяларды дамыту орталығы қоғамдық қорынан ұсынылған Ерлан Қарабалаев шығарылған болатын.Осыған орай, облыстық мәслихаттың ресми интернет ресурсында «Қызылорда облыстық мәслихатының облыстық сайлау комиссиясының құрамына толықтырулар енгізу туралы хабарлама жарияланды. Хабарландыру нәтижесінде, «Respublica» саяси партиясы қоғамдық бірлестігінің Қызылорда облыстық филиалы Ахмет Берлібек Әнуарбекұлын ұсыну жөнінде өтініш келіп түсті.Соған сәйкес, Қызылорда облыстық сайлау комиссиясының құрамына «Respublica» қоғамдық бірлестігінен Ахмет Берлібек Әнуарбекұлының кандидатурасы сессия қарауына ұсынылып, оның кандидатурасы депутаттардың көпшілік дауысымен қолдау тауып, қабылданды.Күн тәртібіндегі өзге де мәселелерге қатысты депутаттар өз ұсыныс-пікірлерін айтып, басқарма басшылары тарапынан жауаптар берілді.&nbsp; Сондай-ақ, халық қалаулылары күн тәртібіндегі «Облыста елді мекендердің жасыл екпелерін жасау, күтіп-баптау және қорғаудың қағидаларын бекіту» туралы мәселені арнайы құрылған комиссияда қайта қарап, егжей-тегжейлі талқылау қажеттігін айтып, келесі сессияға ұсыну мәселесін көтерді.Сессия соңында депутаттар аталған мәселелерге қатысты ұсыныстарды қолдап, ұсынылған шешім жобасын бір ауыздан бекітті.

Қызылорда: Облыстық мәслихаттың кезектен тыс ІІІ сессиясы өтті

<a href="https://kyzylorda-news.kz/ru">Kyzylorda-news.kz.</a> 2022-2023 оқу жылының аяқталуына орай бүгін Қызылорда қаласындағы Назарбаев Зияткерлік мектебінде салтанатты шара өтті.Биылғы соңғы қоңыраудың үні ерекше. Себебі осыдан 10 жыл бұрын мектеп тарихында алғашқы оқу жылы басталып, бүгінгі күнге дейін мыңға жуық түлек бітірді. Осы жылы тағы 75 шәкірт алтын ұямен қоштасып, үлкен өмірге қадам басты.Салтанатты шарада алғашқы құттықтау сөз алған мектеп директоры Жаңбыржан Бекболатов мектептің жыл бойына жеткен жетістіктерін атап өтіп, барлық жас зияткерлерге сәт сапар тіледі.Мектептің 10 жылдығы және NIS-тің 15 жылдық мерейтойларына орайластырылған шарада білім, ғылым, спорт, өнер жұлдыздарының шеруі ұйымдастырылып, жыл үздіктері ұлықталды. Сонымен қатар академиялық жоғары көрсеткіштерге ие болып, қоғамдық жұмыстарда ерекше белсенділігімен көзге түскен «Алаш» Шаңырағы үздік атанды.Мерекенің басты кейіпкерлері – түлектер ізбасарларына мектеп құндылықтары мен жобаларын тапсырып, ақжолтай тілектерін арнады. Ал озат оқушы, халықаралық домбырашылар байқауының лауреаты, неміс тілінің білгірі Майя Жалғасбаева өзін-өзі басқару ұйымының президенті Әсем Табынбайға Білім кілтін табыстады. Білім мен тәрбие берген ұстаздарына деген риясыз алғыстарын түлектер ән арқылы жеткізіп, құрбы-достарымен қоштасу вальсін биледі.Салтанатты шарадан соң 12-сынып оқушылары барлық мектеп қызметкерлеріне арнап концерт ұйымдастырып, қуаныш пен қимастық сезімдерге толы көңіл-күй сыйлады.<figure class="image"><img src="https://knadmin.beoblood.kz/uploads/351120595_790237929148313_4074926174663673867_n_336fe5fcf9.jpg" alt="351120595_790237929148313_4074926174663673867_n.jpg"></figure>&nbsp;<figure class="image"><img src="https://knadmin.beoblood.kz/uploads/350344799_787993769526995_4113945728388475526_n_0941f26518.jpg" alt="350344799_787993769526995_4113945728388475526_n.jpg"></figure>&nbsp;<figure class="image"><img src="https://knadmin.beoblood.kz/uploads/350791664_213791741463906_3559273709803707376_n_04def684b9.jpg" alt="350791664_213791741463906_3559273709803707376_n.jpg"></figure>&nbsp;<figure class="image"><img src="https://knadmin.beoblood.kz/uploads/350813785_1280065155957236_2932780779562703313_n_947a8dd11a.jpg" alt="350813785_1280065155957236_2932780779562703313_n.jpg"></figure>&nbsp;<figure class="image"><img src="https://knadmin.beoblood.kz/uploads/350780000_755851232992854_1068796679941442383_n_b760748f5c.jpg" alt="350780000_755851232992854_1068796679941442383_n.jpg"></figure>

Қызылордадағы Назарбаев Зияткерлік мектебінен 75 түлек қанат қақты

<a href="https://kyzylorda-news.kz/">Kyzylorda-news.kz.</a> Жақсылық жасау – жүректің ісі. Қысылғанға қол ұшын беріп, қиналғанның жанына желеу болу әр адамның қолынан келеді, тек ниет болса болғаны. Қайырымдылық қайырлы іс. Осы жолды таңдап, талайдың сауабын арқалаған Қазалыдағы «Сауаптан құр қалмайық» қайырымдылық қорының әрекеті көпге үлгі. Бүгінде аты жұртшылыққа етене таныс қордың қызметі мен алдағы жоспары туралы төрағасы Мақсұт Мұратұлыннан сұраған едік.– Мақсұт Мұратұлы, қор қашан құрылды. Бұл бастамаға кім түрткі болды?– Жалпы қор 2021 жылы ақпан айында құрылды. Осы уақытта қолымызға заңды құжаттарын алдық. Бірақ 2018 жылдан бастап сауапты іс жасап келеміз. «Оң қолың бергенді, сол қолың білмесін» дейді ғой. Жарияға жар салуды қаламадық. Ең алғаш аудандағы бір нысанның ішкі жұмыстарына күрделі жөндеу жүргіздік. Өзім бастап, жігіттердің басын құрап, қаражат жинастырдық. Сөйтіп, нысанның жаңаруына себепкер болдық. Содан кейін маған: «Неге қаражат жинап, мұқтаж отбасыларына қол ұшын созбасқа?» деген ой келді. Міне, осы ойды жүзеге асырып, содан бері жақсы амал жасауды жалғастырып келеміз. Бізбен бірге жақсылық жасауға ұмытылып жүрген баршаға алғысым шексіз.– Көпшілікке қордың аты тарқатып айтпаса да түсінікті болар. Дегенмен өз аузыңыздан естісек…– Сауап – жөн, шын, лайық деген мағынаға саяды. Ислам дінінде жасалған игілікті іс үшін Алла тағала тарапынан берілетін сый. Ислам парыздарын орындау әр мұсылманның міндеті. Міне, осындай жақсылық жасаудан, сауап жинаудан құр қалмайық деген ниеттен туған болатын.– Ең бірінші кезекте кімдерге көмек беріледі?– Көп балалы, асыраушысынан айырылған жандарға, мүмкіндігі шектеулі, тұрмысы төмен отбасыларына, жалғыз басты қарттарға, ата-анасынан айырылған балаларға, жалғыз басты әкелерге көмек көрсетеміз. Кезектілігі әр кезде әр қалай, жағдайға байланысты болады.– Қанша отбасыға баспана сыйлап, бақытқа бөледіңіздер?– Осы кезге дейін Әйтеке би кенті мен Абай, Жанқожа батыр ауылдарынан төрт отбасыны баспаналы қылдық. Бірін салсақ, енді бірін сатып әпердік. Мұқтаж жандарды дәрі-дәрмек, азық-түлік, киім-кешекпен қамтамасыз ету күнделікті жұмысымыз. Үйден бөлек, алты шаңыраққа көгілдір отын кіргізіп, барлық құжаттарын дайындап бердік.– Алдағы жоспарларыңызбен бөлісе отырсаңыз…– Осы жылы он үйге көгілдір отын құрғызып беруді жоспарлап отырмыз. Қанша қаражат кететіндігінде есептеп, шығарып қойдым. Енді осыған қарай әрекет етеміз. Президент Қасым-Жомарт Тоқаев атаған «Жаңа Қазақстанды» бірге құруға атсалысуды жөн санаймыз. Әр адам қолынан келгенше жаңаруға, жаңғыруға ұмтылса, кез келген қиындықтың күрмеуі табылады. Ер азаматтар барда әйел-аналар, қарындастарымыз, жетім-жесірлеріміз көшеге шығып, көмек сұрамауы керек. Осы орайда баршаны қайырымды болуға шақырамын. Табысыңды түгелдей садақаға бер деуден аулақпыз. Тек бір бөлігін беріп отырса жеткілікті. Реті келіп тұрғанда айтайын, бұрынғы «Наурыз» театрының ішінен арнайы офис ашылды. Бізді сол жерден табасыздар. Аудан жігіттерін бірлесіп жұмыс істеуге шақырамын.– Қордың құрамына кімдер кіре алады?– Қазір менімен бес адам бар. Олар Талғат Ембергенов, Жарылқасын Ділімбетов, Рауан Нұрбаев, Сердалы Ықыласов. Қордың мүшесі болмай-ақ кез келген адам өз көмегін бере алады. Мүше боламын деушілерге ешқандай қарсылық жоқ.– Сұхбатыңызға рахмет!

Мақсұт Қарымсақ, «Сауаптан құр қалмайық» қайырымдылық қорының төрағасы: Жақсылық – жанды жадыратады

<a href="https://kyzylorda-news.kz/">Kyzylorda-news.kz.</a> Қазалы ауданы әкімінің орынбасары Дәурен Тілеумбетов ауданның батыс беткейіндегі тұрғындармен кездесіп, ұсыныс-пікірлерін тыңдады.&nbsp;Басқосуда Дәурен Оңғарбайұлы аталған аумақ жастарының жуырда ғана ауызбіршілікпен ауқымды шараны өткізгенін айтып өтті. Сондай-ақ, татулықты ту еткен тұрғындардың бірлігіне ризашылығын білдірді.&nbsp;Сонымен қатар аудан әкімі Мұхтар Оразбаевтың тапсырмасына сәйкес жастар арасындағы құқық бұзушылық пен топтық төбелестің алдын алу бойынша арнайы топтардың рейд жұмыстарын жүргізіп жатқанын тілге тиек етті.Оған қоса мемлекет тарапынан жастарға берілетін несие аясында, «Ауыл аманаты» жобасы туралы және өскіндердің әскерге баруы жөнінде түсіндірме жасады.&nbsp;Мұнан соң жастар өздерінің талап-тілектерін жеткізіп, түрлі сауалдар жолдады. Әрбір сұрақтарға жеке-жеке тоқталған аудан әкімінің орынбасары барлығы уақытымен шешім таба беретінін айтты.Ағайынды ауызбіршілікке шақырып, көпшілікті ортақ мекеннің гүлденуіне біркісідей атсалысуға үндеген Дәурен Тілеумбетовті тұрғындар құптай кетті. Оның айтқан әрбір сөзін зер сала тыңдап, мемлекет тарапынан жастарға көрсетіліп жатқан қолдаулардың жыл санап артып келе жатқандығына тұрғындар ризашылық білдірді

Қазалы ауданы әкімінің орынбасары тұрғындармен кездесті

<a href="https://kyzylorda-news.kz/">Kyzylorda-news.kz.</a> Қазалы ауданын қазыналы деп бекер атамаса керек. Қасиетті жердің әр сай саласы шежіреге тұнып тұр. Киелі топырақта дүниеге келіп, батырлығымен, шешендігімен, әулиелігімен ел арасында өзіндік орнын алған ерекше жандар көптеп кездеседі. Олар мықтылығын қай кезде де дәлелдей білген. Жауға қарсы айбаты мен дауға қарсы тұрар от ауызы, қиындыққа төтеп берер намысы болған. Соның бірі – елдің береке-бірлігін ойлаған Құттыбай би Сыр бойындағы тарихи тұғырлы тұлға деуге әбден лайық. Халқымыз елдің туын көтерген ерлердің ерек істерін, би-шешендердің өнегелі жолын аңыз қылып ұрпақтан-ұрпаққа жеткізіп келеді.Құттыбай Ақболұлы шамамен 1807 жылы туып, 1900 жылы дүниеден өткен. Ол жасынан зерек, алғыр болған. Өз заманының атақты биі, әрі батыры атанған.1848-1856 жылдардағы Жанқожа Нұрмұхамедұлы бастаған Сыр бойы қазақтарының отаршылдыққа қарсы күресіне қатысқан. Жанқожа баба Құттыбай бидің әділдігіне бас иген екен. Ел аузындағы әңгімеге сенсек, Жанқожа батыр бітпейтін даулар мен шағымдарды шешуге Құттыбай биді жіберіп отырған. Халық та қара қылды қақ жарған өткірлігі мен әділдігіне сай оны аузы дуалы би деп дәріптеген. Сыр бойына қоқандықтар мен хиуалықтар өктемдігін жүргізіп тұрған шақта Құттыбай би ел билігіне араласады. Он сегізінші ғасырдың жиырмасыншы жылдарынан бастап Сыр бойы мен Арал теңізінің шығыс жағалауын мекендеген қазақ руларына өз үстемдігін орната бастаған Хиуа, Қоқан хандықтары езгіні күшейтті. Бұл кезде Құттыбай би елден алым-салық, зекет жинау кезіндегі асыра сілтеушілікті, жер бөлісіндегі теңсіздікті ақыл-ойымен, көсемдігімен халықтың көңілінен шығатындай шешіп отырған. Кейде дұшпандардың зорлық-зомбылықтарына шыдамай бетпе-бет қарсыласқан. Сырттан келген ел билеушілерінің күшінің басымдығынан тайсалмастан турасын айтып, әділ төрелік еткен. Мұндай өжет іс-әрекеттеріне қарап, халық Құттыбайды би, батыр, тентек жігіт деп атаған.Халық аңызына сенсек, Құттыбай би жылқы айдап жүріп, Қыдырды үш рет көрген. Билігімен қоса онда төрт түлік малдың жиналып, байлықтың иесі болуы оның Қыдырды көргенін растаса керек. Малының есебі болмаған көрінеді. Жылқы 15 мыңнан асқан. Құттыбай Ақболұлы талай дауды даулап, төрелігін айтқан. Үш адамға құн төлеген. Екі адамға мал айдап берген. Сыр бойындағы елдің барлық түйткілді мәселелерін бітістіріп отырған.Деректерге сүйенсек, Құттыбай би 1897 жылы 90 жастан асқан шағында әкесі Ақбол бидің құрметіне өздерінің ата қонысы ежелгі Жанкент қорғанының іргесінен 5-6 шақырым қашықтықта күмбезді ескеркіш-кесене тұрғызған. Оны салдырған кезде 70 биені байлап, сүтін сауып, саз топырақты биенің сүтіне илеп, сексеуілдің шоғына күйдіріп, 23 түрлі үлгіде қыш кірпіш дайындаған. Ал кірпішті күйдіретін шеберханасы кесененің қасында болған деседі. Мазардың ішіне 7 адам жерленген. Бейітті салдырғаннан кейін үш жылдан соң 93 жасында дүниеден озып, денесі кесене ішіне қойылған.Кесенені 1980 жылы Казпроектреставрация институты XVIII-XIX ғасырда тұрғызылған республикалық санаттағы сәулет ескерткіші есебінде тізімге алған. 2010 жылы тарихи-мәдени нысанға қайта жаңғырту жұмыстары жүргізіліп, көне дәуір келбетінің айқын белгісі ретінде сақталуда.

Қазақстан және Қызылорда облысының жаңалықтары