<a href="https://kyzylorda-news.kz/">Kyzylorda-news.kz.</a> Асылында Алла әйел затын айрықша жаратса керек. Себебі әйел адам отбасының ұйытқысы болумен қатар қандай істе де келісті жұмыс, қыруар қызмет атқарып жүр. Бүгінгі біздің кейіпкеріміз Күнсұлу Ахметова да қолынан келетін істі сөзбен емес, іс жүзінде көрсетіп келе жатқан кәсіпкер ана. Нақтысы, ауыл шаруашылық бағытындағы еселі еңбек кейіпкеріміз түтінін түтетіп отырған Ахметовтар әулетіне тән. Ал соның нақ себепшісі әрі кәсіп иесі – Күнсұлу апамыз.&nbsp;Бүгінде осы салаға берілген басымдық көптеген жанның кәсіпте үлкен ізденістерге ұмтылып, соның жемісін жеуге сеп болуда. Бүгінде мұндай бастама аймағымызда белсенді түрде қолға алынып, ауыл шаруашылық бағытындағы кәсіпкерліктің қай түрі болмасын жанданып келеді. Әсіресе егін шаруашылығы.Мәселен, облыс әкімі Нұрлыбек Нәлібаевтың тапсырмасына сәйкес бақша дақылдарын егу үшін өңірде 3342 гектар жер арнайы дайындалды. Оның 3282 гектарына, атап айтқанда, 1021 гектарына картоп, 866 гектарына көкөніс, 1395 гектарына бақша дақылдары егілді. Тұрғындар қосымша жер дайындауды сұрап, егін егуге ынтасын білдіруде. Бұл бақшалық жер дайындаудың шаруаға қолайлы, тұрмыс сапасын арттыруға оң әсер еткенін көрсетеді. Осы ретте облыс әкімі қала, аудан әкімдері мен жауапты басқарма басшыларына алдағы уақытта бақшалық жерді жергілікті халықтың сұранысына сәйкес жоспарлап дайындауды тапсырған болатын. Сондай-ақ дақылдардың нақты су тұтыну нормасына сәйкес су беру кестесін шаруалармен келісіп жасау керек. Тиісті басшыларға егінге су беруді үйлестіріп, жиын-терімге дейін барлық жұмыстарға тұрақты бақылау жасау жүктелді. Сәйкесінше, бұл жұмыс жалғасын тауып, 1500 гектарға егіс егу жоспарланып, тиісті жұмыстар жүргізілуінің нәтижесінде қазірдің өзінде жерден түйнек көтерген шаруалар алған өнімдерінен пайда көріп келеді. Олардың қатарында кейіпкеріміз К.Ахметова да бар. Бүгінде ол отағасы Жанзақ ағамызбен бірге ауыл шаруашылық бағытында қаланың шығыс бетінен 1 гектар жер алып, оған қауын, қарбыз және асқабақ дақылдарын еккен. Бүгінде бұл маң жасыл желекке оранып, жаздайғы күтімінен күш алған көшеттер көптеп жеміс беруде. Бұл іске үлкен тәуекелмен келген кейіпкеріміз Күнсұлу:– Мен негізі үйдегі ағаңмен (Жанзақпен) бірге ет өнімін саудалауда кәсіппен айналысып келе жатқан жанмын. Қазір кәсіпкер ретінде тіркеліп, халыққа таза әрі сапалы ет өнімдерін ұсынып келе жатқаныма 10 жылдан астам уақыт болыпты. Алғашында бұл істі үй жағдайында қолға алып бастадық. Уақыт өте келе заңды кәсіп иесі атанып, мемлекет берген мүмкіндіктердің арқасында өзіміздің отбасылық ісімізді дөңгелетіп келеміз. Ал сіз куә болған мына егіншілік іске келсек, әлі тәжірибе аз. Оны мойындау керек. Үй жағдайында болмаса нақты егіншілік кәсіппен айналысып келе жатқан жандар емеспіз. Десе де «Ниетке найза бойламас» деген рас екен. Алғашында алаңдаушылық болды. Қаншама қаржыны құйып, қолға алған істің қайыры бола қояр ма екен деп уайымдадық. Бірақ еңбек еш кетпеді. Қазір тәубе, сол еккен дәндердің бүгінде түйнегін сатып, табыс тауып жатырмыз. Негізі мұндай іске келуімізге облыс әкімі Н.Нәлібаев бастаған бастама түрткі болды. Егін егуге жерді 5 жыл мерзімге жалдау құқығына ие болдық. Және ол жерде тамшылатып суару әдісін қолға алып, қажетті мүмкіндіктерді қолға алдық. Соның арқасында қазір бақшалықтағы өнім еселеніп, ісіміз жайлап алға басып келеді, – дейді.Қаладағы орталық базар маңайында жиі жүрген болсаңыз «Табыс» деген ет дүкенін байқар едіңіз. Міне, сол дүкен бүгінде кейіпкеріміз Күнсұлу апайдың табыс көзіне айналдырған құттыхана мешіті. Сөресінен сом ет пен майлы шұжық (фарш) үзілмеген бұл дүкенде әркез жаңа өнім тұрады. Одан бөлек, бақшалықтың да дәнді дақылдарды осы маңнан табасыз. Негізі қала сыртындағы ат шаптырым аумақтың азын-аулақ өнімі базар саудагерлерінің алдында тұр. Өйткені еткен істен табыс табуды көздеген жандар үшін бұл таңсық жағдай емес. Кәсіпкерлікті қолға алған бұл әулеттің бұдан былайғы ісі де осы сарында болмақ.&nbsp;Иә, біз әңгімеге арқау еткен кейіпкеріміз кәсіпкер ғана емес, бір әулеттің бақыты мен ырысы, құты мен қазынасы. Қазанын оттан түсірмеген отанасының осы әулетке келін боп түскеніне, яғни Жанзақ ағамызбен отасқандарына биыл тура 40 жыл уақыт болыпты. Байқап &nbsp;қарасаңыз, азды-көпті бір адамның болдым-толдым дейтіндей ғұмыры. Осы уақыттың ішінде отбасылық істің кетеуін кетірмей, табысты іске тас-түйін дайын болған Күнсұлу апамыздың өмірге әкелген 5 перзенті түрлі саланың шылбырын қаққан өз ісінің мамандары. Талғаты темір жолда, Азаматы кәсіпкер. Ал қыздары Лариса білім саласында білікті маман болса, Ленасы сұлулық әлемінің сиқыршысы дейтіндей-ақ жан. Бұл әулеттің кенже қызы Фарида бүгінде үлкен өмірге қадам басып, Ақтөбе қаласындағы жоғары оқу орнының түлегі атанған. Міне, отбасылық кәсіптің көкжиегін кеңейтіп, нарық заманында ел қатарлы еңбек етіп келе жатқан бұл әулеттің қос бәйтерегі Жанзақ пен Күнсұлу болса, оларды осы деңгейге жеткізген өздерінің ақадал еңбегі мен табан ет маңдай тері. Оны ешкім жоққа шығара қоймас. Сонысымен де бұл әулет – мерейлі отбасы, бақытты жанұя һәм үлгілі әулет.

Аралдық кәсіпкер жерде тамшылатып суару әдісін қолға алған

<a href="https://kyzylorda-news.kz/">Kyzylorda-news.kz.</a> Жылу беру маусымы қарсаңында аудан көлемінде біршама жұмыстар жүйелі атқарылып келеді. Аудан әкімімен бірге жауапты сала мамандары да бұл жұмысты басты назарға алды.Таяуда аудан әкімі Серік Сермағамбетов жұмыс сапарымен Жетес би, Қосжар ауылдық округтеріндегі әлеуметтік нысандардың жылу беру маусымына дайындық барысын саралап өтті. Алдымен аудан басшысы Жетес би ауылдық округінде болып, жаңадан сайланған ауыл әкімін елді мекен тұрғындарына таныстырып, қызметіне сәттілік тіледі. Айта кетейік, үстіміздегі жылдың 3 қыркүйегі күні ауыл әкімінің сайлауы өтіп, онда тұрғындардың басым дауысымен Райымбай Жолмырзаев жеңіп шыққан болатын. Райымбай Жолдасұлы 1972 жылы Райым елді мекенінде дүниеге келген. Білімі жоғары. 1990 жылдан бастап білім беру саласында еңбек етіп келеді. 2017-2023 жылдары №281 негізгі мектебінің директоры қызметін атқарған.&nbsp;Мұнан соң аудан әкімі №72 орта мектепте болып, білім ұясының қысқы жылыту маусымына дайындық барысын бағамдады. Тиісті сала басшыларына отын қорын жинақтау мен дайындық шараларына ерте бастан қамдану керектігін айтып өтті.&nbsp; Мұнан соң &nbsp;аудан басшысының жұмыс сапары Қосжар ауылдық округінде жалғасып, атаулы ауылдық округ тұрғындарымен кездесіп, теңізді өлкеде атқарылып жатқан толымды тірліктерді ортаға салды. Сондай-ақ алдағы атқарылар жұмыстар туралы баяндады.Аудан басшысы елді мекендегі әлеуметтік нысандардың жұмыс барысын саралап, халық үшін қажетті деген ғимараттардың тоқтаусыз жұмыс істеуін, оның ішінде білім беру мен медициналық орталықтардың қысқы маусымда отын қорымен толық қамтамасыз етілуін ұдайы бақылауда ұстау қажеттігін тапсырды. Сонымен бірге аудан әкімі Серік Сермағамбетов Сексеуіл кенті мен Қосаман, Мергенсай ауылдық округтерінде болып, бірқатар маңызды салалардың жұмыс барысын бағамдап, әлеуметтік нысандардың жағдайымен танысты.Жылу беру маусымы күн тәртібінде. Осыған орай аудан басшысы Сексеуіл кентіндегі «Нұрайжан» ЖШС-нің отын қоймасында болып, көмір жеткізумен айналысатын кәсіпкерлермен кездесті. Басқосуда аудан әкімі қыс маусымының ерте басталуын ескеріп, қажетті қатты отынмен кентті және жақын маңайдағы елді мекен тұрғындарын толықтай қамту үшін қажетті шараларды қолға алуды тапсырды. Сондай-ақ бизнес өкілдерімен пікірлесіп, ниет білдірген азаматтарға мемлекеттік бағдарламалар мен түрлі қолдаулардың, сүйемелдеулердің жасалатындығын жеткізді. Мұнан соң кенттегі 40 төсектік аурухананың құрылысының қазіргі жай-күйімен танысты. Бүгінде аталған ғимараттың құрылысын «Интегростой» ЖШС жүргізуде. Аудан әкімі халық игілігіне арналған нысанды жыл соңына дейін аяқтау қажеттігін тапсырды.&nbsp;Сексеуіл кентінде «Ауыл – ел бесігі» бағдарламасы аясында 7 көше салынды. Автожол құрылысы толығымен аяқталып, ел игілігіне пайдалануға берілді. Жаңа жол маңында аудан әкімі тұрғындармен кездесіп, ауданда атқарылып жатқан жұмыстарды ортаға салып, алдағы атқарылар жұмыс жоспарларын айтып өтті. Өз кезегінде кент тұрғындары жасалған жұмыстарға өз ризашылықтарын білдірді. Жұмыс сапары барысында емхана мен мектептердің жылу беру маусымына дайындық барысы да назардан тыс қалмады. Серік Сағитжанұлы жауапты басшыларға әлеуметтік нысандардың қысқа сақадай-сай болуы мен қажетті отын қорын қазірден бастап бақылауда ұстау қажеттігін тапсырды.&nbsp;Мұнан соң Қосаман ауылдық округіндегі №237 мектебі мен Мергенсай ауылдық округіндегі №58 орта мектебінде болып, білім ұясының қысқы маусымға дайындық барысын бағамдады. Сондай-ақ отын қорын ерте бастан жеткізу бойынша тиісті жұмыстар жасау керектігін айтты. Елді мекендерде ауыл халқымен кездесіп, аудандағы ілкімді істерді ортаға салып, атқарылар жұмыстарға тоқталды.

Арал ауданы әкімі елді мекендегі әлеуметтік нысандардың жұмыс барысын саралады

<a href="https://kyzylorda-news.kz/">Kyzylorda-news.kz.</a> Қалаға шыға қалсаңыз қазақтың қаракөздері мен қара домалақтарының шет тілінде қиналмай сайрап тұрғанын аңғару жат емес. Тіпті ағылшын тілін еркін меңгерген мұндай жастардың қатары күн санап көбейіп келеді. Расында бұл бүгінгі уақыттың талабы. Ілгері озамын деушілер үшін тіл өнерін терең меңгеру маңызды. Жаһандану үшін де шет тілін меңгеру қажеттігін жастар жақсы біледі. Себібі «көз – жанның айнасы, тіл – қоғамның айнасы» деген сөз бекер айтылмаса керек.Бұл ана тілін ұмытып, өзге тілде еркін сөйлеу қажет деген пікіріміз емес. Қазақтың біртуар қайраткері, поэзия әлемінде өзгеше орыны бар Қадыр ақынның: Ана тілің – арың бұл, Ұятың боп тұр бетте. Өзге тілдің бәрін біл, Өз тіліңді құрметте! – деген сөзі іспеттес дүние.Расында қала қазақтарының осы бір тілді меңгеруіне қызыға қарайтын кездер аз емес. Тілді меңгеру арқылы қалаған жерде, қалаған адаммен тез тіл табысып, одан қалды шет елдердің мәдениетінің озығын, әдебиетінің азығын, бізге қажетті құндылықтарын үйренуге мүмкіндік ашыла түседі. Мұны ешкім жоққа шығара алмайды. Әсіресе халықаралық байланыс құралына айналған ағылшын тілін терең түсінген адам үшін келешекте жетістікке жету үшін тағы бір қақпа артық ашылғандай болады.Ал осы мүмкіндік ауыл жастары үшін жасалған ба? Оның қандай жолы бар деген сауал баршамыздың көкейімізде тұрары анық. Шынымен санасы аппақ парақтай бүгінгі жастарға осы бастан ағылшын тілін үйретсек, болашақта балаларымыз бізге алғыс айтпайды ма?! Тез қабылдауға бейім тұратын олар мұны да жетік меңгерсе, күні ертең-ақ жемісін жейтінін ойласақ, бұл ұрпағымызға жасаған жақсылық сияқты көрінеді өзімізге.Иә, мұндай жағдай бізде де жасалған. Аралда қазірге дейін талай баланың тілін икемдеп, ағылшын тілін тереңірек түсіндірген жан қазірде арамызда жүр. Ол – Үміт Қазыбайқызы. Осы уақытқа дейін де әлеуметтік желідегі парақшалардан жарнамасымен жақын таныс жанның өзімен тілдесіп, жұмысы жайлы сөйлесудің сәті түсті. Ағылшын тілін ана тіліндей меңгерген Үміт өз кәсібі жайлы егжей-тегжейлі айтып, тіл меңгерсем деген адамның арманын тіпті асқақтататындай әсер қалдырды. Қазақ тілінен бөлек орыс, ағылшын, тіпті неміс тілінде де еркін сөйлейтін кейіпкеріміз осыдан тура бір жыл бұрын, нақтырақ 2022 жылдың тамызында ағылшын тілін үйрететін курсты бастап қолға алған. Қазірде аудандық мәдениет орталығына қарсы орналасқан тілдер орталығында өз кәсібін дөңгелетіп отырған Үміттің үйренушілерінің ең кішісі 5 жаста.– Жалпы тілді меңгеруде адамның жасы ешқашан кедергі болған емес. Тек оның қызығушылығын оята алсаңыз болғаны. Дегенмен бала кезден жаттап, бейімделетін болса, есте сақталып қалады. Әрі ары қарай алып кетуіне де өте оңай. Бүгінгі уақытта 5 жастан бастап бала қабылдап жатырмын. Бірақ бұл шамадағы оқушыларға бірден ағылшын алфавитін жаттатып, тереңірек үйренуіне ықпал жасау қателік болады. Себебі мектеп қабырғасында қазақ әліпбиін жаңа үйреніп жүрген бүлдіршіндер екі тілдің әріптерін қатар меңгеруінде кедергілер болуы әбден мүмкін. Өйткені жазылуы бірдей болғанымен, дыбысталуы әр түрлі болатын әріптер бар. Бірақ 5 жастағы бала сөздерді, шағын өлеңдерді жаттауға бейімделеді. Тіл сындырады. Өзіміз де жазудан бұрын мектеп қабырғасына бармай-ақ сөйлеп үйренеміз ғой. Бұл цикл де дәл сол сияқты өтеді. Сөйлеу білген бала әрі қарай оңай алып кете алады, – дейді Үміт.Иә, дегенмен біз үшін бірінші кезекте ең керегі – нәтиже. Ал Үміттің сабағын тыңдаған үйренушілерінің нәтижесі қандай? Осы жайлы сөз етер болсақ, тіпті сенбейтін боларсыз. Бірақ бұл ақиқат дүние.Еткен еңбегінің жемісін көріп, үйреткен білімінің далаға кетпегеніне қуанған кейіпкеріміз:– Болашақ білімді жастарды, үздіктерді нақтырақ лидерлікке сай жастардың тәжірибе алмасуына таптырмас мүмкіндік сыйлайтын халықаралық FLEX бағдарламасы бар. Міне, осы бағдарлама аясында 4 шәкіртім өз бағын сынап көрді. Қазіргі білімін жетілдіріп, шет елдерден тәжірибе жинаймын, олардың озық дүниелерін меңгеремін деген ниеттегі 4 шәкіртімнің екеуі соңғы шешуші кезеңіне дейін сүрінбей өтті. 40 мың талапкердің арасынан мұндай көрсеткіш көрсету олардың өзі үшін де, мен үшін де үлкен мақтаныш. Тағы бір айта кетерлігі, бұл тек бір жылда алған білімінің нәтижесі. Бірақ үйренушілерімнің сағы сынбады. Керісінше жігерленіп, алдағы уақытта тағы талап қылуды көздеп отыр, – деген ол, – мұнан бөлек менен ағылшын тілін үйреніп жүрген жастардың бір тобы IELTS халықаралық тестін тапсырды. Бұл бағдарлама да оларға шет елдерде оқып, сол жақта жұмыс жасап, тәжірибе жинақтауына ашылған жол. Сол тесттен сүрінбей өткен 2 оқушы қазір Англияда білім алып жатыр. Алдағы тестте тағы 3 қыз өз болашағы үшін IELTS тестін тапсыруды жоспарлап отыр, – деді.Иә, орталықта оқушылар үшін мұнан бөлек те түрлі дайындық жұмыстарын жүргізу жағы қарастырылған. Зияткерлік мектепке, Ұлттық бірыңғай тестілеуге даярлайтын орталықта ІТ мамандары да ағылшын тілін меңгеріп жатыр. Технология тіліне баланған бұл тілді меңгеру арқылы программалау тілін толықтай түсінуге болатынын білген жандар бүгінде жұмыстың жемісін көруде. Бұл жерде 5-6 айдың көлемінде ағылшынның барлық сөздігін жатқа білмесе де, ауызекі пікірлесуге, сұхбаттасушымен түсінісіп, сөйлесуге әбден болады.Мынаны қараңыз. Үміт тек Арал халқымен ғана жұмыс жасамайды. «UMKA» тіл үйрету орталығының арнайы парақшасы арқылы онлайн форматта да жұмыс жүргізеді. Уақыт талабына сай өз кәсібін бейімдей білген жерлесіміздің бұл еңбегі тіпті мақтауға тұрарлық. Өзінің қолында барды қоғамның қажетіне бағыттай алған Үміт тілді меңгеру тек біздің елде ғана емес, әлем халқы үшін өзекті нәрсе екенін анық байқаған. Оған төмендегі өзінің айтқан сөздері айқын дәлел бола алады.– Кәсіпті алғаш бастаған тұста оқушыларыммен жұмыс жасап, оларды нәтижеге жеткізуді ойладым. Ойға алған мақсатым орындалып, бұл кәсіпті одан әрі дамытуды көздедім. Бүгінде ғылым мен техниканың дамыған кезі. Сондықтан қай бағытта жұмыс жасаймын десеңізде еш кедергі жоқ. Міне, интернеттің көмегін пайдаланып, алға жылжуды көздедім. Бұл қадамым да өте сәтті шықты. Осылайша онлайн форматта жұмысты бастадым. Бірден нәтижеге жету оңай емес деп ойлағам. Оның үстіне үйренушілердің қызығушылығы да алаңдатты. Бірақ «көз – қорқақ, қол – батыр» екеніне тағы көзім жетті. Себебі бір ғана REELS(шағын көлемдегі видео сабақ) әп-сәтте 500 мыңнан аса қаралым жинап, тек Қазақстан ғана емес, өзге шет елдерден онлайн курсқа жазылушылар көптеп тіркелді. Бүгінгі уақытта 100-ден адам адам онлайн курстан тіл меңгеріп жатыр. Олар Қытай, Моңғолия, Корея, Албания елдерінде тұрғанымен барлығы дерлік қазақ тілін біледі. Сол жақта қоныстанып жатқан қазақтар. Бірінші кезекте өз ортасына тез бейімделіп, өздеріне ыңғайлы жұмыс табу үшін ағылшын тілінің қажеттігін сезініп жүргендер. Мұнан бөлек әншілер мен актерлер, тележүргізушілер мен эстрадада жүрген жандардың арасынан да ағылшын тілін үйреніп жүрген жандар бар, – дейді.Сондай-ақ кәсіпкердің айтуынша өзге елдегі бауырластардың онлайн форматта білім алуына мұндағы бағаның төмендігі өте қолайлы болып келуі. Кішісі 6 жасар, үлкені 61 жастағы тіл үйренушілердің барлығы «Сіздің ұсынып отырған бағаңыз қолжетімді. Бұл жақта тіл үйрену үшін өтетін курстар өте қымбат» деп пікірін айтып, батасын беріп жататын көрінеді. Иә, Үміт Қазыбаева мұнымен шектеліп қалғысы келмейді. Алдағы уақытта өзінің нәтижесімен бізді де, үйренушілерін де қуанта бермек. Ағылшын тілін өзі ғана жетік біліп қоймай, білгенін көппен бөлісіп жүрген жанға біз де сәттілік тілейміз. Және қолдау жасалар болса қолдан келері көп Үміттің бұл бастамасына дем берсек, әлем елдерімен бәсекелесуге қабілетті жастар Аралдан да көптеп шығары сөзсіз.

Аралда тіл үйрету орталығын ашқан кәсіпкер бар

<a href="https://kyzylorda-news.kz/">Kyzylorda-news.kz.</a> Кеше ҚР Парламенті Мәжілісінің депутаты М.Жайымбетов Сыр өңіріне келген сапарында Арал ауданына ат басын бұрып, өңірдегі елді мекендерді аралап, жүзеге асып жатқан жобалардың жай-күйін таразылады. Сондай-ақ тұрғындармен жүздесіп, талап-тілектерін тыңдады. Халық қалаулысы алдымен Арал қаласында жаңадан салынып жатқан темір жол арқылы өтетін автожол көпірінің құрылысымен танысты.Бүгінде аудан орталығында 40 мыңға жуық халық тұрады. Темір жолдың екі бетінде қоныстанған. Пойыз өткен сайын өткел жабылып, екі шақырымдық көлік кептілісі қалыптасады. Мұның зардабын жергілікті халық әлі күнге тартып келе жатыр. Әсіресе, жедел жәрдем, өрт сөндіру, құқық қорғау органдарының қызметіне орасан зор кедергісін келтіреді. Бүгінде осы мәселені түпкіліті жою мақсатында шойын жолдың үстінен аспалы көпір салынып жатыр. Ұзындығы 940 метр болатын маңызды құрылыс нысанында Мәжіліс депутаты болып, нысан басында мердігер компания өкілдерімен жүздесті. Қазіргі таңда жобалаудағы аздаған олқылықтарға байланысты жұмыс баяу жүріп жатыр. Соған қарамастан мердігер компания өкілі алдағы жылы көпірді ел игілігіне беруге уәде берді.Сонымен қатар құрылыс басында ауданның құрметті азаматтары, ардагерлер Әбілбай Садықбаев, Әділбек Айымбетов сынды зиялы қауым өкілдерімен жүздесіп, аудандағы өзге де өзекті деген мәселелерді өзара талқылады.Сондай-ақ М.Жайымбетов Арал қаласындағы «Қуатты өңірлер – ел дамуының драйвері» ұлттық жобасы аясында сатып алынатын пәтерлердің құрылыс алаңына барды. Қазір мұнда 42 үйдің (84 пәтер) құрылысы жүріп жатыр. Жалпы 100 пәтер бой көтереді. Әрқайсының көлемі 73 шаршы метрден. Құрылыс биыл мамыр айында басталды. Осы күзде, қарашада аяқталуы қажет. Баспаналар әлеуметтік осал топтағы азаматтарға, отбасыларға беріледі. Бұл – оң үрдіс. Игі жоба алдағы уақытта да жалғасын табады деген үміттеміз. Халық қалаулысының кезекті сапары Сексеуіл кентінде жалғасты. 12 мыңнан астам тұрғыны бар Сексеуіл елді мекеніне жаңа аурухананың қажеттігі көптен көтеріліп жүргені белгілі. Сол мәселенің шешімі табылып, 40 төсекке шақталған аурухананың құрылысы биыл көктемде басталған болатын. Нысан 8 ай ішінде бітуі тиіс. Алайда, құрылыс алаңында жүргізіліп жатқан жұмыстың баяу әрі мардымсыз екенін назарға алған Мәжіліс депутаты өз тарапынан сын-ескертпе айтып, құрылысты созбалаңға салмай, дер кезінде аяқтауға күш салуын тапсырды.– Мемлекет қазынасынан бөлініп жатқан әр тиынның сұрауы бар. Халық көріп-біліп отыр. Жауапкершілігі төмен мердігердің кесірінен адамдардың жергілікті атқарушы органдарға, жалпы билікке деген сеніміне селкеу түсуі мүмкін. Мұндайды болдырмауымыз қажет, – деді М.Жайымбетов.Сонымен қатар Сексеуіл кентінде жаңадан салынған ашық спорт алаңында болды. Бұған облыстық бюджеттен 72,3 млн теңге жұмсалған. Мердігер («Намыс-Құрылыс» ЖШС) барлығын сапалы жасауға тырысқан. Дегенмен футбол қақпасы мықтап бекітілмеген. Балалар деген жай қарап тұрмайды, әрнәрсеге сүйенеді, сүйкенеді. Сондықтан қақпа осал болмауы керек, баланың үстіне құлап кетпеуі тиіс. Спорт алаңын салғанда ең алдымен өрендердің қауіпсіздігіне баса мән беру қажет. Мұны да депутат назарға алып, жауаптыларға ескеру жасады.Бұдан кейін «Ауыл – ел бесігі» жобасы аясында кент ішінде салынып, жөнделіп жатқан жолдарды қарап шықты. Сонымен қатар, кентті газдандыру жұмыстарына куә болды. Бас мердігер – «AKBARS STROY Ltd» ЖШС. Жұмыс қарқынды. Қазіргі таңда 91 шақырым газ құбыры жүргізілген. Енді темір жол өткелінен өткізуге дайындық жасалып жатыр. Сондай-ақ, ГРШП орнатуға әзірлік жүруде. Сексеуіл кентін «көгілдір отынмен» толық қамтамасыз етуге, яғни газдандыру жұмыстарын аяқтауға 700 млн теңгеден астам қаржы қажет. Соны республикалық бюджеттен бөлдіру мәселесі күн тәртібінде тұр. Түйіткілді оңтайлы шешуге өз тарапынанықпал жасалатынын айтты ҚР Парламенті Мәжілісінің депутаты.Мұнаны соң Сексеуіл кентінің тұрғыны Ахметжан Бохановтың егістік алқабына барды. Жерлестеріне жақсы үлгі көрсетіп, 6 гектар аумаққа маңдай терін төгіп, бақша өсірген бақташы «Подпленка» әдісі арқылы өсірген өнімдерін аудан халқына сырттан келетін қауын-қарбыздан арзан сатып жатыр. Бұдан бөлек, ол 1 гектар жерге көкөніс дақылдарын еккен. Екі жылыжайы да бар. Онда голландиялық қиярдың бірнеше сорты өсіріледі. Кәсіпкер мемлекеттің жасаған мүмкіндігін пайдаланып, қайтарымсыз грантқа да қол жеткізген. Ахметжан өз отбасын асырап, табыс тауып қана қоймай, нарықтағы бағаның тұрақтануына үлес қосып жатыр. Өнімдер өзімізден шығарылса, импорттың үлес салмағы да төмендейтіні сөзсіз. Сол себепті талабы таудай осындай азаматтарды қолдау қажет.Кезекті сапар ауданға қарасты Сапақ ауылында жалғасты. Елді мекендегі осыдан жиырма жыл бұрын асар әдісімен салынған №69 орта мектебінің ғимаратында болып, жағдайымен танысқан халық қалулысы 60 балаға шақталған оқу ошағы заман талабына сай келмейтіндігін тілге тиек етіп, ауыл ақсақалдарымен, тұрғындарымен тілдесті. Тұрғындар тарапынан Сапаққа 100 орындық мектеп салу мәселесі көтерілді. Жобалық-сметалық құжаты дайын. Тек қаржы көзін қарастыру күн тәртібінде тұр. Сондай-ақ осы ауылдық округке қарасты Көктем елді мекеніне тартылып жатқан ауызсу желісінің құрылыс жұмыстарын қатаң сынға алды.– Сапақ ауылдық округіне қарайтын Көктем елді мекені бар. Сол ауылдың үлкендері де кездесуге келген болатын. Олардың айтуынша, былтыр Көктемде су жүйесінің құрылысы басталған. Жобаның құны – 298,5 млн теңге. Бас мердігер – «Корпорация Алем-құрылыс» ЖШС. Алайда әлі күнге дейін құрылыс аяқталған жоқ. Қазір мұнда су айдау стансасының насос құрылғысы орнатылып жатыр. Ел игілігіне беретін мерзімі өтіп кетті. Ауыл ақсақалдары осы су жүйесінің құрылысын ұзаққа создырмай, тезірек аяқтауға ықпал етуді сұрады. Бұл мәселе біздің басты назарымызда болады, – деді М.Жайымбетов.

Аралда қолға алынған жобалар көп          

<a href="https://kyzylorda-news.kz/">Kyzylorda-news.kz.</a> Қызылордада биыл наурыз айында халықаралық әуежай терминалының іргетасы қаланған еді.Осы күндері «Болат Өтемұратов қорының» демеушілігімен басталған «Қорқыт ата» әуежайының жаңа терминалы құрылысы қарқынды жүргізілуде.Құны 15 млрд. теңгені құрайтын заманауи үлгідегі жаңа нысанның жалпы аумағы &nbsp;3,9 гектар. Терминалда жолаушылардың жайлылығы үшін &nbsp;халықаралық стандарт талаптарына сай барлық жағдай қарастырылған. Мұнда жолаушыларға жоғары сапалы қызмет көрсету үшін соңғы үлгідегі құрал-жабдықтар қойылады. Сондай-ақ тіркеу орнының аймақтары, жалпы күту залы, билет &nbsp;кассаларының дүңгіршектері, қоғамдық тамақтану орындары, дербес тіркеу тіректері, намазхана, ана мен бала бөлмесі, трансферлік жолаушыларға арналған зал болады.Нысан 2024 жылдың мамыр айында ел игілігіне беріледі.

Қызылордада жаңа терминалы құрылысы қарқынды жүргізілуде

<a href="https://kyzylorda-news.kz/">Kyzylorda-news.kz.</a> Құрылыс саласының дамуы - өңір экономикасының маңызды тірегі. Бүгінде Қызылорда қаласында құрылыс саласы қарқынды дамып келеді. Қазіргі таңда шаһарымыздың сол жағалауында 16 тұрғын үйдің құрылысы салынып жатыр. Оның ішінде 6 тұрғын үй жеті қабатты болса, қалғаны 5 қабатты үйлер. &nbsp;Бүгін Қызылорда облысының Өңірлік коммуникациялар қызметінің ұйымдастыруымен өткен баспасөз турында БАҚ өкілдері облыс орталығында салынып жатқан бірқатар құрылыс нысандарымен танысты.&nbsp;<blockquote>«Бұл тұрғын үйлердің барлығы заманауи үлгіде және жаңа технологиялардың көмегімен салынуда. Құрылысы жүріп жатқан 7 қабатты тұрғын үй - 84 пәтерлі болса, 5 қабатты үйлерде - 470 пәтер қамтылмақ. Бұл тұрғын үйлер 2024 жылы ел игілігіне беріледі деп күтілуде. Осы тұрғын кварталдың инженерлік желілеріне жобалық-сметалық құжаттамасы толық әзірленіп, сараптаманың оң қорытындысы алынды. Көпқабатты үйлер ауыз су және кәріз жүйесімен толық қамтамасыз етіледі», - деді қалалық құрылыс бөлімінің басшысы Айдын Әнуар.</blockquote>Қаланың сол жақ жағалауында салынып жатқан көпқабатты тұрғын үйлердің жалпы ауданы – 37 284 шаршы метр болса, бір тұрғын үйдің ауданы – 6 213,9 шаршы метрді құрайды.&nbsp;<blockquote>«Көпқабатты тұрғын үйлердің құрылысы сәуір айында басталған болатын. Қазіргі таңда бригадалық топ құрылыс жұмыстарын жүргізуде. 7 қабатты тұрғын үй аймағымызда алғаш рет салынуда. Әрбір пәтерде жедел саты болады. Құрылысқа қолданылып жатырған барлық материалдар жергілікті өнімдер», - деді «Орион ЛТД» ЖШС директорының орынбасары Асхат Жаңабаев. &nbsp;</blockquote>Спорт – денсаулық кепілі. Ал мықты денсаулық – адамның еңбекке, қоғамдық іс-әрекетке белсенді қатысуының кепілі. Бүгінгі таңда облыста спорт нысандарын дамытуға айрықша көңіл бөлінуде. Сөзімізге дәлел ретінде Тасбөгет кентінде салынып жатқан &nbsp;дене шынықтыру-сауықтыру кешенін айтуымызға болады. Бұл спорт кешенінің жалпы ауданы - 1 655,1 м2 &nbsp;құрайды. Жоба осы жылдың соңында аяқталады деп жоспарлануда. Жауапты мердігер мекеме – &nbsp;«Интегрострой» ЖШС.<blockquote>«Осы спорт кешенінің құрылысы сәуір айында басталған болатын. &nbsp;Бүгінгі таңда құрылыста 50 шақты адам жұмыс істеп жатыр. Алдағы уақытта қосымша жұмыс күші тартылатын болады. Спорт кешенінде 100 адам бір уақытта дене шынықтыра алады. &nbsp;Сондай-ақ, мұнда футбол, баскетбол залдары, әмбебап спорт залдары қамтылады. Аталмыш кешен металл құрылымдарымен жабдықталуда. Сыртқы қабаттары толық жылу панельдерімен қапталатын болады. Бұл спорт кешені жыл соңында қолданысқа беріледі»,- деді участке мастері Талғат Маушев.</blockquote>

Қызылорда қаласында жаңа нысандар бой көтеруде

<a href="https://kyzylorda-news.kz/">Kyzylorda-news.kz.</a> Қызылорда қаласындағы Зияткерлік мектептің &nbsp;ұстаздары Шотландияның &nbsp;Глазго қаласында өткен Білім берудегі европалық зерттеу (ЕСЕR) халықаралық конференциясына қатысып, білім беру үдерісіндегі өзекті мәселелер бойынша өз зерттеулерін таныстырды.&nbsp;Ағылшын тілі мұғалімі Зәуре Ермаханова &nbsp;«Мұғалімдердің екі есе қажеттілігі бар оқушылармен жұмыс жасаудағы тәжірибесі және түсінігі» тақырыбында баяндама жасады. Бұл жұмыста педагог отандық мектептердегі инклюзиялық білім беруде оқушылардың арнайы қажеттілігін қанағаттандыра отырып, олардың дарындылығын дамыту бағытын жан-жақты қарастырған.&nbsp;Ал физика мұғалімдері Айнұр Құрақбаева мен Гүлназ Диханбаева оқыту үдерісінде онлайн платформалардың көмегі арқылы оқушыларға тиімді кері байланыс беруді ұйымдастыру жолдарын &nbsp;ұсынды. Авторлардың айтуынша, қазіргі таңда оқушының бойында өз бетімен білім алу, бәсекеге қабілетті болу, алғырлық сияқты қабілеттерін дамыту педагог мамандардың алдына қойған мақсаттарының біріне айналуы тиіс.&nbsp;80 мемлекеттен 3500-ден астам зерттеушінің &nbsp;басын қосқан педагогикалық алаңда ағылшын тілі пәнінің мұғалімі Жанат Төреханова да оқушылардың ЭССЕ жазу барысында аргументтеу дағдысын дамыту туралы еңбегін таныстырып, &nbsp;әдістемелік қоржынын тың идеялармен толықтырып қайтты.

ЕСЕR -2023: Сырбойылық ұстаздардың зерттеулері әлемдік алаңда таныстырылды

<a href="https://kyzylorda-news.kz/">Kyzylorda-news.kz.</a> Білім күні қарсаңында Қызылорда қаласындағы екі іргелі мектептің жанынан салынған қосымша ғимараттар пайдалануға берілді.Салтанатты ашылу рәсіміне облыс әкімі Нұрлыбек Нәлібаев қатысып, жиналған жұртшылықты Конституция және Білім күнімен құттықтады.<blockquote>«Ұлт ұстазы Ахмет Байтұрсынұлының «Құралсыз iс iстелмейдi һəм құрал қандай болса, iстеген iс те сондай болмақшы. Iстiң толық жақсы болуына мектеп &nbsp;сайлы һəм жақсы болуы шарт» деген сөзі баланы оқытуға, ең бірінші жайлы да заманауи мектептің керегін еске салады. Бүгін біз осындай жайлы да жаңа ғимараттың ашылуының куәсі боламыз. Бала санының жыл санап артуына байланысты бірнеше білім ошағы қосымша құрылысты қажет етті. Өздеріңіз білетіндей, орталықта жаңа мектеп салу үшін жер телімі табылмайды. Қала сыртына салынған мектепке қатынау ата-анаға да, балаға да айтарлықтай қиындық туғызады. Қосымша ғимарат салудың тағы бір тиімді тұсы – бюджет қаржысы үнемделеді, жаңа мектепке қарағанда арзанға түседі. Ең маңыздысы балалар өздері үйренген, үйіне жақын мектебіне қатынайды. Сондықтан бәріне бірдей оңтайлы шешімге, яғни үш ауысыммен оқитын мектептер ауласына қосымша ғимарат салуға тоқталдық», – &nbsp;деді аймақ басшысы.</blockquote>№101 мектеп-лицей ауласында салынған 375 орындық ғимаратта бастауыш сыныптар оқитын болады. Ал Абай атындағы үш тілде оқытатын дарынды балаларға арналған мамандандырылған сыныптары бар мектепке 550 орындық қосымша ғимарат салынды. Жаңа ғимараттарда оқу кабинеттері, шығармашылық бөлмелер талапқа сай жасақталған. Оқушыларға ыңғайлы болу үшін оқу құралдарын сақтауға, балалардың шығармашылық дамуы мен демалуына толық жағдай қарастырылған.Бейнебақылау, дыбыстық хабарлау және басқа да күшейтілген қауіпсіздік жабдықтары орнатылған. Облыс орталығындағы 4 мектептің (№№2,3,101,264) 1 850 балаға арналған қосымша ғимараттары жаңа оқу жылында балаларды қабылдайды.Айта кетейік, Сыр өңірінде заманауи жаңа білім ошақтары бой көтеріп, жас ұрпақтың сапалы білім, саналы тәрбие алуына баса мән берілген. Аймақта &nbsp;3-6 жастағы балаларды мектепке дейінгі тәрбиемен қамту үлесі &nbsp;100 пайызға, ал 2-6 жастағылардың қамтылуы 88,9 пайызға жетті. Мемлекет пен жекешеменшік әріптестіктің ынтымақтастық аясы кеңейіп келеді. Бүгінде облыстағы 613 балабақшаның 453-і немесе 73%-ы жеке сектордың үлесінде.Мемлекет басшысының бастамасымен қолға алынған «Жайлы мектеп» ұлттық жобасы шеңберінде құны 86,2 млрд.теңге болатын 21 заманауи мектеп салынбақ. Жаңа білім ордаларына 12 мыңнан аса оқушы барады. Биыл 10 мектептің іргетасы қаланады. &nbsp;Қаланың сол жағалауында «ҚазГерМұнай» компаниясының қаржылай қолдауымен 350 орындық заманауи Оқушылар сарайы салынады. Бұл қосымша білім беру ордасында озық ойлы, өнерге құштар, спортқа бейім дарынды балалар тәрбиеленеді.&nbsp;<img src="https://knadmin.beoblood.kz/uploads/369739994_602061185448463_3199870603202053135_n_b972854c24.jpg" alt="369739994_602061185448463_3199870603202053135_n.jpg"><img src="https://knadmin.beoblood.kz/uploads/369721634_602061218781793_4961128233330551728_n_7f9aef1abf.jpg" alt="369721634_602061218781793_4961128233330551728_n.jpg"><img src="https://knadmin.beoblood.kz/uploads/369721709_602061775448404_3008180181426105475_n_af27f6f3c8.jpg" alt="369721709_602061775448404_3008180181426105475_n.jpg">

Қызылордада жаңа оқу ғимараттары ел игілігіне табысталды

<a href="https://kyzylorda-news.kz/">Kyzylorda-news.kz.</a> «Назарбаев Зияткерлік мектептері» дербес білім беру ұйымы Педагогикалық шеберлік орталығында жас мұғалімдердің «Жас ұстаз: табысқа апарар жол»⠀ІІ республикалық форумы аяқталды.Жас ұстаздардың біліктілігін көтеруге арналған шараға Қызылорда облысынан аудандық және қаланың шет аймақтарында &nbsp;орналасқан 9 ауыл педагогі қатысты.Биылғы «Жас ұстаз – 2023» бағдарламасының басты ерекшелігі – сұранысқа ие алаңда ауылда еңбек етіп жүрген табысты 180 жас ұстаздар бас қосты. Олардың барлығы ауылдық білім берудің әлеуетін дамыту аясындағы жобаға қатысып жатқан тірек мектептерде жұмыс істейді.<blockquote>«Жаңа оқу жылы басталмас бұрын жас мұғалімдердің республикалық форумын өткізудің өзектілігі сонда, олардың әрқайсысы өзінің жеке даму траекториясын білім берудегі әлемдік трендтермен салыстырады. Ауыл мектебінде жұмыс істеу – нағыз миссия екенін бәріміз түсінеміз, ал «Жас ұстаз» кәсіби дамудың жаңа кезеңін ашады», – деп делегаттарға қош келдің айтты Білім беру жөніндегі жаһандық комиссияның Азия хабының комиссары Күләш Шәмшидинова.</blockquote>Әр форумда «Галстуксіз кездесуге» оқу-ағарту министрінің келуі әдемі дәстүрге айналып барады.Оқу-ағарту министрі Ғани Бейсембаевтың экспромттары қанатты сөздерге айналып, форум делегаттары өздеріне &nbsp;түртіп алды.<blockquote>«Менің өмірдегі барлық жетістіктерім оқушылардың арқасында ғана мүмкін болды. «Назарбаев Зияткерлік мектептері» ДББҰ Басқарма төрағасы Әнуар Жанғозин жақсы бір мақалды еске салды: «Егер ынта бар болса, ғаламда қиын іс жоқ». «Сондықтан біздің жас әріптестеріміздің ынта-жігері неғұрлым жоғары болса, соғұрлым оң нәтижеге қол жеткізе алады деп ойлаймын», - дейді.</blockquote>Жүзуден халықаралық дәрежедегі спорт шебері, жасөспірімдердің Бірінші Азия паралимпиада ойындарының жүлдегері &nbsp;Азамат Оразбек, ғалым-зерттеуші, «Mbionics» компаниясының негізін қалаушы, бірегей экзоскелеттің авторы Мәулен Бектұрғанов, «бокстан халықаралық дәрежедегі спорт шебері, халықаралық жарыстардың жеңімпазы әрі жүлдегері, балаларға арналған бокс секциясының жетекшісі Мұхит Амантаевпен кездесуден шабыттанған ұстаздар қаншама рет қол соққанын есептеу қиын! Олардың әрқайсысын өз замандастарына шабыт пен жігер &nbsp;бере алатын абсолютті мотивациялық көшбасшы деп атауға болады.Форумда қазіргі кәсіби басымдықтарға арналған тақырыптық алаңдар жұмыс істеді: тиімді жоспарлау, функционалдық сауаттылықты қалыптастыру, эмоционалды интеллекті дамыту, мұғалім жұмысындағы зерттеулер, оқытудағы саралаулар, бағалау. &nbsp;«Армандағы мектеп – киіз үй болғанда, бұрышқа ешкім тұрмайды» – мұндай қорытындыға форум делегаттары болашақ мектептің ең батыл және шығармашылық үлгілеріне арналған педагогикалық квест барысында келді. Олар Ыбырай Алтынсарин атындағы «Қара шаңырақ», Саммерхилл және Монтессорр, Вальдорф, «Дальтон-план» мектептерін ғана емес, өздерінің манифесттерін де ұсынды.<blockquote>«Бұл шараның басты мақсаты – ауыл мектебіндегі жас ұстаздардың беделін көтеру. Біз өз облысымыздағы, ауылымыздағы әріптестерімізбен тәжірибе бөлісіп, түрлі әдіс-тәсілдерді меңгердік. Ауыл мектебін таңдаудағы басты мақсатым – өзім түлеп ұшқан алтын ұя мектебімнің беделін көтеру. Сондай-ақ ауыл мектептеріндегі оқушылардың ғылымға деген қызығушылығын арттыру, мәртебесін көтеру», – дейді Сырдария ауданы, Амангелді ауылы №42 мектеп-лицейі мұғалімі &nbsp;Піржан Төлеген облысы.</blockquote>«Мұғалім жұмысындағы зерттеулер» тақырыбы болса, ұлттық құндылығымыз – киіз үйдің ассоциациясымен керемет ұштасқан болатын: форум қатысушылары соның моделінде зерттеу сабағының жоспарын құрастырды. Шұғыла Қалиханова мен Күнсая Утешева өткізген шеберлік сабақта жас ұстаздар зерттеу жұмысын дайындау процесімен танысты. Алаңның тағы бір өзекті тақырыбы – «Өз эмоциямызды басқарып үйренейік». Қызжібек Абдраманова мен Сәуле Журунтаева өзіннің және өзгенің эмоциясын оқу, оларды басқару және олардың себебін түсіну жөнінде айтты. Дауыс тембрі, ым-ишара тілі, дене мүсіні, арома-имидж – бұл ұстаздың имиджін қалыптастырып қана қоймай, сабақ атмосферасын құратыны сөзсіз.«Функционалдық сауаттылықты арттыру» тақырып алаңының тренерлері Қаламқас Абдикаримова мен Талғат Мукутовтардың пікірінше, педагогтың басты мақсаты – білімді тіпті тәжірибеде емес, өмірде қолдануы. Қазіргі таңда функционалдық сауаттылық анықтамасына дағды мен тәжірибе, талдау және түсіну, стандартты емес өмірлік жағдайлар мен сыни тұрғыдан ойлау ұғымдары кіреді.Табыс синергиясын құру үшін мұғалім педагогикалық, мазмұндық және технологиялық білімді өз тәжірибесіне қалай кіріктіре алады? Педагогикалық шеберлік орталығының тренерлері Ринат Рамазанов пен Бауыржан Ділманов TPACK Journey шеберлік сыныбында форум делегаттары үшін өзекті сұраққа жауап берді.Форум финалының леп белгісін «Сәттілікке ие бол» бірегей лотереясы қойды. Бірегейлігі сол, барлық жеңімпаздарға Педагогикалық шеберлік орталығынан вебинарларға сертификаттар мен еліміздің барлық мұғалімдері армандайтын Lesson box қорапшасы табыс етілді. Бүгінде барлық форум делегаттары олардың әрқайсысының жолы &nbsp;болғанына сенімді, өйткені нағыз сәттілік – Жас ұстазға қатысу!<blockquote>«Бірінші «Жас ұстаз: табысқа апарар жол» форумы жас әріптестеріміз әр мектептің стратегиялық ресурсы екенін дәлелдеді. Олар қазіргі таңдағы білім беруге жаңа идеялар мен жаңа шешімдерді енгізеді, балаға қолайлы атмосфера мен цифрлық білім беру ортасын қалыптастырады. Сонымен қатар форум табысқа жету жолында ең креативті және табысты мұғалімдерді біріктіреді. Бүгін біз барлық өңірдегі ауылдық мектептердің атынан қатысатын екінші форумның қатысушылары да жаңа буынның кәсібилігіне сенім ұялататынына қуаныштымыз», – деп атап өтті Педагогикалық шеберлік орталығының директоры Жанбота Кабдыкаримова.</blockquote>«Жас ұстаз: табысқа апарар жол» – тағы да өзінің символдық атауын ақтады. Екінші республикалық форум елімізде жас мұғалімдердің біліктілігін арттырудың жаңа шығармашылық алаңы құрылғанын растады.&nbsp;<img src="https://knadmin.beoblood.kz/uploads/Whats_App_Image_2023_08_31_at_09_45_41_2_d95267518b.jpeg" alt="WhatsApp Image 2023-08-31 at 09.45.41 (2).jpeg"><img src="https://knadmin.beoblood.kz/uploads/Whats_App_Image_2023_08_31_at_09_45_41_20eaafa975.jpeg" alt="WhatsApp Image 2023-08-31 at 09.45.41.jpeg"><img src="https://knadmin.beoblood.kz/uploads/Whats_App_Image_2023_08_31_at_09_45_41_3_a718f2f734.jpeg" alt="WhatsApp Image 2023-08-31 at 09.45.41 (3).jpeg">

Ауыл педагогтері біліктілігін көтеруде

<a href="https://kyzylorda-news.kz/">Kyzylorda-news.kz.</a> Ертең Мемлекет басшысы Қасым-Жомарт Тоқаев Қазақстан халқына Жолдауын жариялайды.Жиынға Мәжіліс және Сенат депутаттары, орталық мемлекеттік органдардың басшылары, Ұлттық құрылтай, Адам құқықтары жөніндегі комиссия, Әйелдер істері және отбасылық-демографиялық саясат жөніндегі ұлттық комиссия мүшелері, қоғам мен еңбек ұжымдарының өкілдері қатысады.Жолдау сағат 11:00-де республикалық телеарналардың, сондай-ақ <a href="https://www.akorda.kz/kz/memleket-basshysy-kasym-zhomart-tokaevtyn-kazakstan-halkyna-zholdauy-181416">akorda.kz</a> ресми сайтының, әлеуметтік желілердегі Aqorda аккаунттарының тікелей эфирінде көрсетіледі.

Президент Қазақстан халқына Жолдауын жариялайды

<a href="https://kyzylorda-news.kz/">Kyzylorda-news.kz.</a> Бүгін Қазақстанның басым бөлігінде атмосфералық фронталды бөліктердің өтуіне байланысты күн құбылмалы болады, деп хабарлайды Қазгидромет.Елдің басым бөлігінде жаңбыр жауып, солтүстік-батыста, солтүстікте, оңтүстікте, оңтүстік-шығыста найзағай ойнап, екпінді жел тұрады, нөсер жаңбыр жауады, бұршақ жаууы да мүмкін.Елдің оңтүстік-батысында, оңтүстігінде шаңды дауыл тұрады. Қазақстанның солтүстік-батысында, солтүстігінде, оңтүстік-шығысында тұман түседі.Жамбыл облысында, Қызылорда облысының шығысында, орталығында, Атырау облысының солтүстік-батысында, оңтүстігінде, Алматы облысының солтүстік жартысында, Ақтөбе облысының батысында төтенше өрт қаупі сақталады.Батыс Қазақстан облысының солтүстігінде, орталығында жоғары өрт қаупі, облыстың оңтүстік-батысында, солтүстік-батысында, шығысында төтенше өрт қаупі сақталады.Павлодар, Қарағанды, Ұлытау облыстарының оңтүстігінде, Абай облысының батысында, солтүстігінде, Жетісу облысының солтүстік-шығысында, орталығында жоғары өрт қаупі сақталады.

31 тамызға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Қазіргі таңда бірде-бір рет кредит немесе бөліп төлеуді рәсімдемеген еңбекке қабілетті жастағы адамды табу қиын. Қарыздың мақсаттары әртүрлі болуы мүмкін - техниканы сатып алу, майда қысқа мерзімді қарыздан бастап пәтер немесе үй сатып алуға арналған ипотекаға дейін.Fingramota.kz өзіңізді қарызға батырмау және қарыз алушылардың әдетте жіберетін қателіктері туралы ашып айтады.Майда қарыз ірі қарыздан қауіптіІрі қарыздары бар азаматтар басында қарызға кірмей ай сайынғы табысының қанша бөлігін қарызды өтеуге тұрақты түрде беруі керек екенін түсінеді. Аз мөлшерде қарыз алудың басты қауіптерінің бірі - олардың қолжетімділігі. Бір шағын кредит алған қарыз алушы басқа кредит алуға немесе шағын бөліп төлеуге қызығушылығы артуы мүмкін. Содан кейін адам үшінші, төртінші, бесінші, оныншы кредитті қалай алғанын байқамайды...Қарыз алушыда кредитке алынған әрбір сома аз болғандықтан, олар бірге оны қарызға батырмайды деген жалған сезім пайда болуы мүмкін. Нәтижесінде, адам барлық кредит бойынша ай сайынғы төлемнің айтарлықтай үлкен екенін анықтаған кезде, ол төлем мерзімін кешіктірмеу үшін үнемдеу режимін ұстануына тура келеді.Мұндай жағдайды болдырмау үшін сіз алған әрбір шағын кредиттен кейін барлық кредит бойынша ай сайынғы төлемнің жалпы сомасын қағазға жазып алуыңыз керек. Кейін ай сайын қанша төлеу керектігін көзбен елестете отырып, қарыз алушы оған тағы бір шағын кредит қажет пе және оны өтеуге жұмсалатын шығын қаншалықты өсетіні туралы ойланады.Депозитке сенуБанктерде депозиттерінде белгілі бір жинақтары бар қарыз алушылар өздерінің қаржылық мүмкіндіктерін жиі дұрыс бағаламайды. Олардың логикасы мынадай: « мен қазір депозиттегі ақшаны жұмсамай, бөліп төлей отырып, бір зат алсам, содан кейін егер кірісім төлеуге жеткіліксіз болса, депозит арқылы ішінара өтеймін ». Бір қарағанда, мұндай логиканың да өмір сүруіне құқығы бар, бірақ бұл жағдайда мұндай тәсілдің қауіпті екендігі туралы ұмытпау керек.Өмір деген күн санап өзгеріп отырады, кез келген уақытта ойламаған шығындарға тап болуға болады, себебі ешкім күтпеген жағдайлардан, қайғылы оқиғалардан &nbsp; сақтана алмайды. Дәл осындай кезде ақшаны депозиттен алуға тура келеді, ал кредит бойынша сомаларды өтеу ауыртпалығы депозиттер түрінде сақтандырылмаған кірістерге ғана түседі.Мәліметтерді артығымен көрсетуБүгінгі күні ірі банктер өз клиенттеріне күнделікті қажеттіктері үшін азғана сомаға кредиттер мен бөліп төлеулер беру рәсімін жеңілдетті.Осы уақытқа дейін азғантай сомаға кредиттер беру туралы шешім қабылдау үшін қарыз алушыдан оның жұбайының/зайыбының табысы туралы мәлімттер сұрату практикасы бар. Алайда, кейбір клиенттер кредит алу үшін өз кірісінің сомасын артығымен көрсетеді. Мұндай жағдайдан шығудың жолы оңай, тек отбасына келетін кірістің шынайы мөлшерін көрсету қажет, егер болашақта сіз қарыз сомасын қайтаруға қиналсаңыз, қарыз алушы ұтылмас &nbsp;үшін банк кредит беруден бас тартады.Жалақының 50%-ы сізде қалу керекӘрбір адам өз шығыстарын жоспарлаған кезде, егер ол кірісінің жартысынан көбін қарыздарын өтеуге ғана беретін болса, онда барынша қатаң &nbsp; үнемдеп, қалған қаражатқа өмір сүру қиынға соғатынын түсінуі қажет. Мұндай жағдайға душар болуды дұшпаныңа да тілемейсің, сондықтан қарыз алушы кредитті өтеуге неғұрлым аз сома жұмсаса, өмірінің жайлы болатынын түсінуі тиіс, бұл ретте 50% деген көрсеткішті есте мықтап сақтау қажет.ҚР Қаржы нарығын реттеу және дамыту агенттігі өз тарапынан қазақстандықтар несиеге кірмеу үшін ақпаратты әзірлеп, енгізді. Біріншіден, егер қарыз алушы жаңа кредит алғаннан кейін өзінің барлық қарыздары бойынша кірісінің 50%-ын төлейтін болса, банктер жаңа кредит бермейді.Сонымен қатар, 2022 жылғы 1 қазаннан бастап кредиттік бюроларға берілген жаңа қарыздар туралы ақпаратты өнім берушілер (кредиттік серіктестіктер мен коллекторлық агенттіктерді қоспағанда) бір жұмыс күні ішінде, ал кредиттік тарих субъектілері жөнінде кез келген ақпаратты кейіннен &nbsp;жаңартуларды 10 жұмыс күні ішінде енгізуге міндетті. Осыдан бұрын олар ақпаратты айына екі рет – 15 жұмыс күні ішінде жаңартып отырған.Бұл түзетулер кредиттік ұйымдарға қарыз алушының төлем қабілеттілігін бағалауға, кредит алуға берілген өтінімді қарау кезінде қарыз алушының борышты жүктемесі туралы өзекті ақпаратты көруге және оған жаңа қарыз беру немесе одан бас тарту туралы шешім қабылдауға мүмкіндік береді. Қарыз алушының өзі жаңа қарыз алғанға дейін өзінің кредиттік тарихын сұрай алады және өзекті ақпарат бойынша оның басқа кредитті «тартатынын» бағалай алады. Сондай-ақ, бұл механизм азаматтарды оның білімінсіз бір адамға кредит &nbsp;рәсімдеуге байланысты алаяқтықтан қорғайды – кез келген күдікті операцияларды тезірек бақылауға болады.

Қазақстан және Қызылорда облысының жаңалықтары