<a href="https://kyzylorda-news.kz/">Kyzylorda-news.kz.</a> Республикалық «Дарын» ғылыми-практикалық орталығы оқушылардың республикалық олимпиадасының қорытынды кезеңіне қатысушы мектептер арасында &nbsp;100 олимпиадалық мектеп рейтингісін жариялады.Нәтижесінде «Қазақстанның 100 үздік олимпиада мектебі» қатарына Сыр өңірінен 3 білім беру ұйымы енді. Олар – №9 және №10 дарынды балаларға арналған «Білім-инновация» лицей-интернаттары және Абай атындағы №138 орта мектеп.Рейтинг формула бойынша шығарылды, мұнда алтын медаль 3 ұпаймен, күміс медаль 2 және қола медаль 1 ұпаймен бағаланады.Айта кетейік, Қызылорда облысында 295 мемлекеттік және 24 жеке мектеп мектеп бар.

Қызылордадағы 3 мектеп үздіктер қатарында

<a href="https://kyzylorda-news.kz/">Kyzylorda-news.kz.</a> Адамзат баласының пайда болуынан бас¬тап әрі қарай өмір сүруіне, тіршілікке үйренуіне үлкен септігін тигізген ол – еңбек. Еңбектің жемісін көру үшін сол жолда кездескен қиындықпен қарбаласқа толған өмірді бағындыру керек. Еңбек – адамның өз өмірін қалыптастыру қарсаңында қабілеті және рухани күштерінің нәтижесінде өз игілігін пайдалана білуі. Тынбай еңбек еткеннің тұрмысы берекелі болады. Бүгінгі заманның талабы да осы. «Кәсібіне қарай – нәсібі» демекші, бүгінде өз мүмкіндіктеріне қарай кәсіп ашып, ісін дөңгелентіп отырғандар саны күннен-күнге артып келеді. Сол жандардың санатында Изатулла Файзуллаұлы да бар.Мұғалім де, инженер де болған Изатулла Файзуллаев 1997 жылы отбасын асырап отырған «Автобаз» жабылған соң күнкөрістің көзін іздей бастайды. Сонымен, жеке кәсіпті қолай көріп, балаларымен кірісіп кетеді. Яғни, техниканың ақауын тау¬ып, бұзылған машиналарды жөндей бастайды. Бәрі де кәсіптік шеберлікті шыңдауға, өзің еңбек ететін сала жұмысын бес саусақтай, сауатты білуге байланысты екендігі даусыз. Және сол біліктілікті үнемі жетілдіріп отыру керек. Бұл жағынан алғанда да біз әңгіме етіп отырған шебердің де жұмысына ешкім сын айта алмады. Өз ісінің шебері қай уақытта да өзінің біліктілігімен, іскерлігімен, еңбекке қабілеттілігімен, уақытқа бейімділігімен бағалана біледі емес пе? Изатулла да алмағайып кезеңінде көптің бірі болып, толқын соғып жағаға шығарған балықтың күйін кешпей, қарманды. Қарманды да балаларының нәсібін өзі жетік меңгерген кәсібінен таба білді.<blockquote>– Өмір деген ағын су секілді екен. Көзді ашып-жұмғанша 60 деген асқаралы жасты еңсеріп, жетпіске де жақындап қалдым. «Көп еңбек еткенге бақыт басын иеді» деген сөздің жаны бар. Өткенге шегініс жасасам, жеткен әр белесім өмірімнің бір бөлшегі іспеттес. Қызметтің үлкен-кішісі болмайды. Тек жауапкершілігің жоғары болуы керек. Мейлі ол мемлекеттің жұмысы болсын, мейлі жеке жұмыс болсын. Әр жұмысқа кіріскенде ар алдында тұрғандай болам, – дейді мақаламыздың кейіпкері әңгіме арасында. Иә, еңбекпен шыңдалған жан осылай дейді. Расында да бұл бақытын еңбектен тапқан адамның сөзі.</blockquote>Алғаш аяқ алысы өз күшімен бастаған кәсібінің аясын кеңейту үшін қаржылай қолдау да қажет болды. Мұның да реті табылып, «Даму» кәсіпкерлікті дамыту қорынан қаржылай көмек алып, жұмысын жүргізіп отырған ғимаратты жөндеуден өткізеді. Сонымен қатар, жұмысының негізгі құрал-саймандары болып табылатын, кемпи, машина көтеретін аппаратын, аргон дәнекерін алады. Қосымша көлік жуатын орын да ашады. Сұранысқа көп ие қызметтің түрі мұнда әсіресе, автоген мен дәнекерлеу екен. Бағаларын да тым шарықтатпай, тұтынушының жағдайына қарай белгілейтіндігі аян болды. Тіпті, кейбір қысылып жағдай айтатын жандардың мәселен, егістік басына баратын машиналардың жөндеу жұмыстарының ақысын қарызға да жүргізетіндігін жасырмады.<blockquote>– Мен ылғи Изатулла ағамның қызметін пайдаланам. Жұмысының сапасы да, бағасы да көңілге қонымды. Кейде үйден асығыста қалтаңдағы тиыныңды санамай шығып кететін кез болады. Немесе, техника болған соң жолда бұзылады. Сондай жағдайда сөзге келместен, техника тіліндегі олқылықтың орнын толтырып, жөндеп береді. Адамдардың алғысын алғаннан, қалтасындағы тиынды бірінші орынға қоятындарды кездестіруге болады. Ал бұл жерде керісінше, – деп ағынан жарылды аудан тұрғыны Ә.Әлімбет.</blockquote>Иә, халық болған соң түрлі жағдай да болады. Сол жағдайды түсіне білгендіктен де болар, шебердің алды бос болған күні жоқ. Күніне кем дегенде, 7-10 көлікке дейін «Ізет» сервистік орталығының қызметіне жүгінеді. Өзіне қолқабыс етіп, тірліктің көзін үйреніп жүрген мектепте оқитын немересі Ғабит Мұхитұлының да осы іске шыңдалып қалғандығын байқады. Білгенін үйретіп, баулудан жалықпаған қарт ұстаның ыждағаты мен жігеріне тәнті болдық.<blockquote>– Баланы бастан тәрбиелеу – ата-ананың парызы. Жақсылыққа жақын етіп, еңбекке үйрету міндеті. Менің немереммен жасты немесе қатар балалардың жерден иіліп ағаш алмайтынын көзім шалады кейде. Сондайда қарным ашады. Менен жұмыс сұрап келген жастарды еш ойланбастан жұмысқа да алдым. Бірақ, сәл уақыт істеп, келмей кетеді. Соған қарағанда, қиынсынады ғой деймін. Қиындықсыз қамал алу деген мүмкін емес қой, балам. Адамды адам етіп, қоғамда орнын белгілейтін еңбек екендігін жастардың санасына құйып өсіруіміз керек. Сонда ғана ол ертеңгі күні өз орнын адаспай табады. Ал, өз орнын тапқан адам қай жерге де қажет, – деді Изатулла Файзуллаұлы.</blockquote>Бүгінгі таңда еңбек жолдары, білімі мен біліктілігі жастарға үлгі боларлық Изатулла Файзуллаұлының отбасына біз де амандық, кәсібіне табыс тіледік.

Шиелі: Техникамен тілдескен жан

<a href="https://kyzylorda-news.kz/">Kyzylorda-news.kz.</a> Шырайлы Шиелі кенті соңғы жылдары бұрынғысынан да көркейіп, көгалданып келеді. Бірқатар маңызы бар істер атқарылып, жылдан-жылға күрмеуі шешілмеген түйіткілді мәселер де оң шешімін табуда. Жыл сайын игілікті істер атқарылып, халықтың әл-ауқаты біршама жақсарды деуге де негіз бар. Елді мекендердің ажары да айшықталып, ауылдар көркейе түсті. Жолдар мен жол тораптары жөндеуден өтті. Бұдан бөлек санитарлық тазарту, көркейту-көгалдандыру жұмыстары да өз деңгейінде атқарылып келеді. Аяқ су мәселесі де оң шешімін табуда.Жер бетінің қайсыбір дамушы елі болмасын әуелі ауыл шаруашылығы мен оны көркейту жұмыстарына ден қойып, сол салалардың тамырына қан жүгіртуге күш салады. Өйткені бұқара халық үшін өмір сүруге қолайлы орта қалыптастырмай дамудың даңғыл жолына түсу мүмкін емес. Бұл тұрғыда жас мемлекеттің бүгінге дейін жеткен жетістігі ұшан-теңіз. Осы мақсаттың ұшқынымен Шиелі ауданында да ауқымды жобалар атқарылып жатқанқанын айта кеткен жөн. Жыл өткен сайын кент ішінде де көңіл көншітерлік жұмыстар жасалып, әртүрлі салалар да алға өрлеп келеді.Санитарлық тазалық – саулық кепілі«Тазалық – табалдырықтан басталады» деген тәмсілді негізге алар болсақ, өңірдің де тазалығы – ең әуелі өзіміз тұратын жерден басталатынын ұғынамыз. Сол себептен кент ішінің көріктенуі – тазалыққа тікелей байланысты. Ал Шиелінің шырайы артып, айналаның гүлденуі бүгінде кент әкімдігінің тікелей назарында. Мәселен, биылдың өзінде кенттің тазалығы үшін бірқатар жұмыстар атқарылған. Атап айтар болсақ, санитарлық тазалық үшін мемлекеттік сатып алу жұмыстары жүргізілген. Нәтижесінде «Қарамурзаев» жеке кәсіпкер жеңімпаз атанған. Қазіргі таңда Шиелі кентінің санитарлық тазалық жұмыстарын қамтамасыз ету мақсатында жоғарыда аталған мердігер мекеме арқылы кент айналасы 14 учаскеге бөлініп, тұрғындардың тұрмыстық қалдықтары шығарылуда. Айта кетейік, бүгінде кент аумағында 43 жерде тұрмыстық қатты қалдықтарды жинақтауға арналған арнайы орындар бар. Ал сол 43 орынға қалдықтарды тастауға арналған 163 дана контейнер және сынап шамдар мен химиялық қуат беру көздерін жинақтауға арналған 27 дана контейнер қойылған. Сонымен бірге тұрмыстық қатты қалдықтарды тастауға арналған жер учаскесінің жалпы алаңы – 25 гектарды құрайтын «Сасқұм» полигоны жұмыс істеуде. Аталған компания кенттің тазалығын қамтамасыз ету мақсатында тындырымды тірліктер атқарып, өндірістік кәсіпорындар мен жеке тұрғын үйлердің қоқыстарын тазалауда. Оған қоса кенттің гүлденуі үшін кент аумағында тұрақты түрде сенбілік шаралары кең көлемде өткізіліп келеді. Бұр үрдіс жыл сайын өз жалғасын тауып күні бүгінге дейін дәстүрге айналған. Ал оған барлық мемлекеттік мекемелер мен кәсіпорындар жұмылдырылып атсалысуда.Көктеген мекен – көптеген көңілді қуантады«Ағаш ек, гүл ек, туған жерді түлет» деп дана халқымыз бекер айтпаса керек-ті. Көгалданып, көктеген мекеннің жанға жайлылық сыйлайтыны белгілі емес пе? Әрине, біздің өңір – құрғақшылықтың мекені. Десек те, оны көгалдандырып, жасыл желекке айналдыру өзіміздің қолымызда. Бұл өзекті тақырып – кент әкімдігінің де назарынан тыс қалған емес. Күн тәртібінде тұрған өткір тақырып бұрынғыға қарағанда айтарлықтай шешіле бастаған сыңайлы. Өткені қазірдің өзінде аудан айналасында көркейту-көгалдандыру жұмыстары жүргізіліп, кент іші гүлденуде. Мысалы, Шиелі кентінің көркейту-көгалдандырылу жағдайын қамтамасыз ету мақсатында, «Көкшоқы» мөлтек ауданында бірқатар жұмыстар атқарылған. Бұл жұмыстардың тиімді жүргізілуіне жеңімпаз мердігер «НҰР» ЖШС компаниясы жауапты. Ал кент орталық бөлігінің гүлденуіне жеңімпаз мердігер «RusLider Group» ЖШС мекемесі барын салуда. Иә, көгалдандыру жұмысы әуелі саябақтан бастау алатыны анық. Осы мақсатта қазіргі таңда «Ы.Жақаев» саябағын күтіп ұстау жұмыстары жүргізіліп жатыр. Саябақта дәл қазірдің өзінде жасыл желектерді күтіп ұстау, дәрілеу, суару жұмыстары атқарылып жатыр. Мұнымен қоса, кент айналасына топырақтық-климаттық жағдайында өсуге бейімделген 10 693 дана терек, 8 747 дана бұталы ағаштар отырғызылған. Сонымен қатар автожолдар бойында жасыл қорғаныш аймақтарын құру жағдайы бойынша И.Әбдікәрімов, Самара-Шымкент тас жолы, әл-Фараби, Ш.Бәкіров, Б.Тоқбаулин, Ы.Жақаев, С.Сейфуллин, А.Яссауи, Дәулеткерей, Д.Смайлов көшелері және аспалы көпір айналасы бойына жасыл желек құру мақсатында 8,5 км аумаққа көшет ағаштары отырғызылған.Жол жұмысы да мол«Жолдың жайын жүрген білер». Рас. Бұл тақырып – әлі күнге дейін өзектілігін жойған емес. Әлем елдерін былай қойғанда, еліміздің өзінде жол мәселесі – өзекті тақырыптардың бірі болып отыр. Жә, жә, алысқа ұзамай-ақ қоялық. Кент ішінде де көшенің жолы күні бүгінге дейін көптеген тұрғындардың дегбірін қашырғаны жасырын емес. Бірақ бірнеше жылдан бері кентіміз көркейіп қана қоймай, көптеген көшенің де сәні кірген. Тіпті, біршама жолдар күрделі және орташа жөндеуден өткен. Әрине, мұның барлығы кент әкімдігінің тікелей назарында. Қазірдің өзінде бірқатар көшенің арнайы жоба сметалық құжаттары әзірленіп, орташа жөндеу жұмыстарының жоспары әзірленуде. Атар айтар болсақ, әл-Фараби, Досбол Датқа, Дәулеткерей, А.Байтұрсынов, Ы.Жақаев, Абылайхан, Бұдабай, С.Сейфуллин, Шәкәрім көшелерінің күрделі жөндеу жұмыстарына жоба сметалық құжаттамасы жасақталып, мемлекеттік сараптаманың оң қорытындысынан өткен. Ал жобаның құны – 1 млрд 560 млн 217 мың теңгені құрап отыр. Аталған жұмысты өтпелі кезең тәртібімен 2023-2024 жылдар аралығында жөндеу көзделген. Ағымдағы жылы осы жұмыстарға жергілікті бюджеттен 300 млн теңге қаржы қаралған. Қазіргі таңда мемлекеттік сатып алу жұмыстары жүргізілуде. Сонымен қатар, теріскейдегі Қажымұқан, Панфилов, Жұмабаев, Ковтунов, Бөлтекейұлы, И.Құтпанұлы тұйығы, Ботабаев тұйығы, Шәкәрім тұйығы, Жұбанов, Ж.Молдағалиев, Самара-Шымкент пен Құрманғазы аралығы, Боранов көшесі, Қабанбай батыр, Бурабай, М.Сыздықов, Қалдыбаев, Шопашев, Аманкелді көшесінің бас жағы, Ш.Бәкіров тұйығы, Шұғыла мөлтек ауданындағы атауы жоқ көшелер және Ағыбай батыр тұйығы көшелерін орташа жөндеу жұмыстарынан өткізу жоспарланған. Бұл тізімге Шиелі кентінің орталық бөлігінде орналасқан Ш.Уәлиханов, Алтынбеков, Абай тұйығы, Жайлыбаев тұйығы, Желтоқсан тұйығы, Ә.Иманбеков, Ә.Молдағұлова тұйықтары мен соңы, Ы.Жақаев тұйықтары, Т.Тоқтаров тұйықтары, Отырар, Жерұйық, Қаратаевтан қашыртқы каналға дейінгі аралық, сонымен қатар, Ердешбаев, М.Мырзахметов, Омаров, Атауы жоқ көше (Аурухана маңындағы 2 көше), Ермағанбетовтен Ә.Исмайловқа дейінгі аралық, Өмірбеков тұйығы, Қ.Нұртазаев көшесінің соңы, Кәрімбаев тұйығы, Әби Едігеев, Ж.Базарбаев және жанындағы көшелер де кіреді. Мұнымен қоса Шиелі кенті, Арай мөлтек ауданы, Қ.Шәукебаев, Т.Молдраймов, А.Мизамбаев, Ә.Ырзахметов, Ә.Дүйсенбаев, Т.Қосаев, М.Сыздықов аяғы және атауы жоқ 3 көше де орташа жөндеуден өтпек.Абаттандыру – айрықша ажар бередіОсы тұста кенттегі атқарылып жатқан абаттандыру жұмыстарын да тілге тиек еткен жөн. Биыл Шиелі кенті, Самара-Шымкент тас жолы, А.Яссауи және Ш.Бәкіров көшелері бойына 4 дана жер асты ұңғымалы су насостарын орнату, сатып алу жұмыстары жүргізілген. Ал жеңімпаз болған «Айсұлтан-А» және «Изумруд» компаниясының жеке кәсіпкерлерімен келісім шарт жасалып, бүгінгі таңда жұмыстары толығымен аяқталған. Сондай-ақ Абылайхан көшесі мен айналмалы көпір аумағында орналасқан мұнаралы сағат тұғырларына жөндеу жұмыстары жүргізілген. Мұнымен қатар, Шиелі кенті, Т.Жүргенов, әл-Фараби, И.Панфилов, Қ.Шәкәрім және И.Әбдікәрімов көшелері бойында орналасқан футбол алаңдарына ағымдағы жөндеуге мемлекеттік сатып алу жұмыстары жүргізіліп, жұмыстардың дені аяқталуға жақын қалған. Ал жақын арада И.Әбдікәрімов көшесі бойындағы көпқабатты 18 пәтерлі тұрғын үй ауласына балалар ойын алаңын орнату, 18 пәтерлі тұрғын үй ауласына балалар ойын алаңын орнату жұмыстары басталмақ. Оған қоса И.Әбдікәрімов көшесі бойындағы көпқабатты 18 пәтерлі тұрғын үй және Иманжүсіп аллеясы ауласына асфальт төсеу жұмыстары да жүргізіліп жатыр. Иә, кент ішінде мұнан өзге де жасалып жатқан жұмыстар жетерлік. Жоғарыда айтылған тізімге А.Яссауи көшесіде орналасқан алаң, И.Әбдікәрімов көшесіндегі, сондай-ақ «Анаға тағзым» аллеясы, Шиелі кентінде орналасқан көшелер және де А.Яссауи көшесі бойында орналасқан кітапхана ғимаратымен Шиелі ауданы әкімдігінің ауласы да кіреді. Қазіргі таңда бұл аталған ғимараттардың да айналасында абаттандыру жұмыстары жүргізіліп жатыр.Аяқ су мәселесі алаңдатпасын…Аяқ су мәселесі – көпшілікті алаңдатары анық. Әсіресе, су тапшылығы – шаруа қожалықтары мен егіншілер үшін айтарлықтай проблема. Бірақ кез келген істің оң шешімі болады емес пе? Бүгінде Шиелі кенті аумағының өзінде «Сырдария» өзенінен 22 бекет арқылы келетін тұрғындарды аяқ сумен қамтамасыз етіп отырған «Базар» және «Байсары» арықтары бар. Сол каналдардың Қызылорда облыстық табиғи ресурстар және табиғат пайдалануды реттеу басқармасынынң теңгерімінде екені белгілі. Ал аталған каналдарға ерте көктем мезгілінде, мекемелерді және жергілікті тұрғындарды тарта отырып толықтай тазарту жұмыстары жүргізілген. Кент ішілік аяқ су арықтары тереңдетіген, сондай-ақ қордаланған қоқыстардан толық тазартылған. Қазіргі таңда аяқ су өз деңгейінде толық жеткізілуде. Демек, тұрғындардың бұған алаңдамауына болады. Қазіргі таңда Шиелі кенті, М.Шоқай, С.Сейфуллин, Досбол Датқа, Ж.Қонаев пен Жайлыбаев аралығы көшелеріне аяқ су арықтарына темір бетонды лоток орнату жұмыстары жоспарлануда.

Шиелі кенті көркейіп келеді

<a href="https://kyzylorda-news.kz/">Kyzylorda-news.kz.</a> Жастардың арасындағы жұмыссыздық мәселесі – көбеймесе азаяр емес. Еңбекке икемді болса да, орта жастағы азамматтардың емес, жастардың екі қолға бір күрек таба алмай жүргені көңілге кірбің салары анық. Бұған әр түрлі жағдайлардың себеп екені белгілі. Бірі мамандық таңдаудан шатастым десе, енді бірі өзіне лайықты жұмыс таппай әлектенуде. Дегенмен мына заман – ынталы жастарды ешқашан жерде қалдырмайды. Қарекет үшін қам қылам дегендерге де мол мүмкіндік қарастырылған. Түрлі мамандықты аз ғана уақыттың ішінде игеруге де жол ашық. Мәселен, жуырда Жастар Ресурстық орталығында Қызылорда қаласындағы білікті орталықтың мамандары Шиелі жастары үшін арнайы келіп, тренинг-семинар өткізді.&nbsp;Өздеріңіз білетіндей, бүгінде Қоғамдық даму басқармасының бастамасымен аймақ жастарына арналған бірнеше бағдарламалар мен жобалар жүзеге асырылып жатыр. Басты мақсат – жастарды еңбекпен қамтитын түрлі шараларға тарту, өзіне қажетті дағдыларға баулу. Бұл ауқымды шара жастар арасында жұмыссыздық мәселесінің туындап, соңғы жылдары көптеген ер балалар мен әйел азаматтарының жұмыссыз жүргені үшін жүзеге асырылған. Соған байланысты Сыр өңіріндегі әр ауданынан құралған жастардың қатысуымен сауалнама да алынып үлгерген. Сауалнама – қазіргі таңда трендке айналған мамандық түрлерін анықтау үшін ұйымдастырылды. Нәтижесінде, Шиелі ауданы 20,3 процентпен өзге аудандарды басып озып, сұранысқа ие мамандықтарды сауалнама арқылы айқындады. Яғни, СММ таргетолог, мобилография, веб дизайнер, фотоөңдеуші, ерлерге арналған шаш әрлеуші, визажист, косметолог, аспазшы, кондитер, көлік, жөндеу, тігінші, агроном, дәнекерлеуші, ағаш ұстасы &nbsp;сынды кәсіп түрлерінің сұранысы ие екені белгілі болды.&nbsp;Жуырда Жастар ресурстық орталығында жүзеге асырылып жатқан бағдарламалардың бір бөлігі көрініс тапты. Ол – еңбек нарағына келген жастарды бірнеше салада оқыту. Бұл шараға ауданнан 47 жас қатысып, жиынға атсалысты. Қатысушыларға &nbsp;қас, және кірпік ламинациялау техникасы, СММ, таргетолог, мобилограф сынды жаңа мамандық түрлеріне баулыйтын арнайы оқыту шаралары өткізілді. Сонымен қатар, бұдан өзге жаңа кәсіпті меңгергісі келетін, оқуға ниетті жандар үшін бұл бағыттағы шаралар әрі қарай онлайн негізде өз жалғасын табатын болады.

Шиеліде жастар жалынды

<a href="https://kyzylorda-news.kz/">Kyzylorda-news.kz.</a> Ауылды ажарландырудың амалын қарастырған осы жылдар аралығында мемлекет қол қусырып отқан жоқ. Біраз бағдарлама жасалып, жаңа нысан бой көтеріп, көгілдір отын кіргізіліп, халық игілігі үшін жұмыстар атқарылуда. Мәселен бүгінде Шиелі ауданына қарасты 7 тірек, 22 ауылдық округ бар. Бұлар болашағы бұлыңғыр емес, керісінше келешегі жарқын ауыл-аймақтар. Яғни түндігінен түтіні түзу шыққан ауыл ретінде көрер жарығы һәм көркейер үміті бар алда. Мұны өткен аптада Сенат және Мәжіліс депутаттарының ауданға жасаған іс-сапарынан аңғардық.&nbsp;Шиелі кентіне ат басын бұрған ҚР Парламенті Сенатының депутаты Руслан Рүстемов, Мәжілістегі "AMANAT" партиясының фракция мүшелері Мархабат Жайымбетов және Мұрат Ергешбаев сапарды Ә.Тәжібаев ауылынан бастады. Толағай ақын, толастамас жыр иесінің атындағы ауылдың жалпы жағдайы бір қарағанда жаман емес. Қазіргі таңда ауылдық округ бойынша 9 әлеуметтік сала мекемелері халыққа қызмет көрсетеді. Ауыл жастары да белсенді әрі білімді екенін талай байқауда топ жарып жүргенінен байқаймыз. Алайда, мұның барлығы Ә.Тәжібаев ауылында тұрғындарды алаңдатқан мәселе жоқ екенін білдірмейді. Сол себепті де депутаттар тұрғындармен тілдесіп, мәселенің мән-жайын анықтады. &nbsp;Халықпен кездесуді "AMANAT" партиясының фракция мүшесі Мархабат Жайымбетов кейбір заңнамалық актілерге енгізілген өзгертулер және толықтыруларды таныстырудан бастады. Оның ішінде "Ұлттық қор – балаларға" бағдарламасын да тілге тиек етті. Айта кетейік, ел көңілінен шыққан тың бағдарлама туралы Президент "Әділетті қоғам. Біртұтас ұлт. Берекелі қоғам" атты халыққа Жолдауында айтқан болатын. Жаңа бағдарламаның негізгі мақсаты – балалардың болашағын баспана және біліммен қамтамасыз ету. Яғни Ұлттық қордың жыл сайынғы инвестициялық табысының 50 пайызы балалардың арнаулы жинақтаушы есепшотына аударылып отырады. Қаржы әр бала 18 жасқа толғанға дейін аударылып, кәмелет жасқа толғаннан кейін олардың баспана немесе білім алуына жұмсалады. Бұл қаражат өскелең ұрпақтың үлкен өмірге қадам басуына мүмкіндік берері сөзсіз. Жоба алдағы уақытта әлі де зерттеліп, 2024 жылдың 1 қаңтарынан бастап жүзеге аспақ. Қор, шын мәнінде ұлттық мәртебеге ие болып, халқымыздың игілігіне қызмет етеді деген сенімдеміз.&nbsp;Бұдан бөлек халықты елең еткізген жаңалықтың бірі – блогерлерге арналып заң қабылдануы. Иә, қазіргі таңда миллион қаралымы бар блогерлер жарнама жасау арқылы табыс тауып қана қоймай, жалған ақпарат беріп те жатады. Алдағы уақытта осындай олқылықтар орын алмас үшін әлеуметтік желіде жарнама орналастыратын азаматтар салық төлеуге міндеттеледі. Депутаттар бұл қадам әлеуметтік желілерде қаржылық пирамидалар мен жалған қайырымдылық шараларын ұйымдастырып, халықтан ақша жинап жатқандардың көбейгеніне байланысты жасалып отқанын айтты. Сонымен қатар парақшасына жарнама шығарған блогерлер оның жарнама немес пиар материал екенін, оған ақы төленгенін көрсету керек. Яғни контентке арнайы белгі қойылады. Депутаттардың сөзінше, бұл – әділеттілік мәселесі және тұлғалардың құқығын қорғау. Блогер қазіргі таңда халықпен етене араласатын адамдар болғандықтан олардың жүріс-тұрысы, атқарған қызметі, сөйлеген сөзі барлығы қоршаған ортаға әсерін тигізеді. Әсіресе, қазақ тілінде контент жүргізіп, өскелең ұрпақтың жанына рухани азық болар дүние түсірсе нұр үстіне нұр болар еді.&nbsp;Бірқатар жаңалықтарға шолу жасалған соң, депутаттар Ә.Тәжібаев ауылының тұрғындарына сөз кезегін берді. Көптің ішінен суырылып шыққан зейнеткер З.Тымбаулиев елдімекендегі газ мәселесі туралы сөз қозғады. Ауыл ақсақалының айтуы бойынша биыл көгілдір отынмен қамтамасыз ету кешігіп жатыр. Оған себеп – мемлекет тарапынан қажетті қаражаттың толық бөлінбеуі. Бұл мәселе бойынша М.Жайымбетов күз айларында жетпеген қаражатты есептеп, өзге аудандардан артылған ақшаны Ә.Тәжібаев елдімекеніне газ кіргізуге жұмсайтынын айтты. Жиналған қауымның арасында келесі мәселені ауыл тұрғыны, зейнеткер С.Телжанов көтерді. Бейнетінің зейнетін көріп отқан жан ауылда мал жайылымының жоқтығын тілге тиек етті. Қарияның сауалына Мұрат Ергешбаев қазіргі таңда мал жайылымдары туралы заң актілері дайындалып және шаруа қожалықтарға тиісті жайылымдық жерлері зерттеліп жатқанын жеткізді. Алдағы уақытта заң күшіне еніп, әр адамға тиісті жер өлшеніп берілетінін ескертті. Халықтың көкейіндегі сұрақтарға жауап берген соң аузы дуалы, сөзі уәлі ауылдың батагөй аталары депутаттарға сәт сапар тілеп, шығарып салды.&nbsp;Жаңа нысан жұрт игілігі үшін&nbsp;Құрылыс – адамзат баласымен бірге келе жатқан жасампаз кәсіп. Ауқымды саланы алға жылжытуда құрылысшылардың еңбегі ерен. Соңғы он жылда аудандағы әлеуметтік нысандардың құрылысы қарқынды жүруде. Заманауи үлгідегі аурухана мен емхана салынып, мектептер мен амбулаториялар, мәдениет ошақтары түгелдей дерлік жаңғыртылып келеді. Жаңадан бой көтеріп, халық игілігіне пайдалануға берілетін нысандар да аз емес. Соның бірі &nbsp;– Шиелі кентінде салынып жатқан дене шынықтыру-сауықтыру кешені. Сенат және Мәжіліс депутаттары сапар барысында аталған кешеннің құрылыс жұмыстарымен танысты. Бұл ғимараттың бой көтеруіне республикалық және облыстық бюджеттен 582 млн 212 мың теңге қаржы қаралып, мемлекеттік сатып алу нәтижесінде "Промстройсервис.Е" ЖШС жеңімпаз атанған. Қазіргі таңда жұмыс қарқынды жүруде. Құрылыс аймағында жергілікті тұрғындардан 20 адам жұмыспен қамтылып, кешеннің халыққа табысталатын күні де алыс емес.&nbsp;Мұнан соң депутаттар құрылысы жүріп жатқан Байсын ауылындағы 250 орындық мектеп құрылысы жұмыстарымен танысты. Нысанға облыстық бюджеттен жалпы 937 млн 558 мың теңге қаралған. Аталған нысанның да аяқталуына аз жұмыстар қалған. Жоспар бойынша биыл жаңа оқу жылын байсындықтар жаңа білім ордасында қарсы алады. Осы орайда Парламент депутаттары мердігерге бөлінген қаржының мақсатты игерілуі мен құрылыстың сапасы және мерзімінде аяқталуын тапсырды.&nbsp;Жаңа баспана – жақсылық бастауы&nbsp;Өз үйіңе қол жеткізу – жаңа, жарқын өмірдің бастамасы екені анық. Содан болса керек кез келген адам өзіне тиесілі тұрғын үйдің болғанын армандайды. Қазіргі таңда баспаналы болғысы келетін қазақстандықтар әртүрлі мемлекеттік тұрғын үй бағдарламаларына қатыса алады. Соның ішінде баспанаға мұқтаж, төлем қабілеті бар азаматтарға үй сатып алу мүмкіндігін ұсынатын бағдарламалар да жетерлік. Аудан халқы да үй кезегіне тұрып, баспанадан дәмелі болғанымен, біраз уақыт бойы өңірде мемлекеттік бағдарлама арқылы тұрғын үй салынбай келіп еді. Қазір сол олқылықтың орны толғандай. Айтпағымыз – "Нұрлы жер" мемлекеттік тұрғын үй құрылысы бағдарламасы аясында кентке кіре берістен салынған көппәтерлі үйлер. Сондай көппәтерлі үйлердің бірі – "Көкшоқы" мөлтек ауданынан бой көтерген 3 қабатты 18 пәтерлі тұрғын үй. Мәжілісмендер сапар барысында осы тұрғын үйдің де құрылысымен танысты. Атқарылып жатқан жұмыс туралы аудандық құрылыс, сәулет және қала құрылысы бөлімінің басшысы Дана Аман "Құрылыс материалдарының қымбатттауына байланысты жобаға қайта түзету жұмыстары енгізіліп, жергілікті бюджеттен қосымша 113 млн тенге қаралды. Қазіргі таңда құрылыс-монтаж жұмыстары жүргізілуде. Нысан тамыз айында халық игіліне беріледі" деді.&nbsp;Аудандағы бірнеше нысанды аралап болған соң депутаттар "AMANAT" партиясының Шиелі аудандық филиалында тұрғындарды қабылдады. Көкейдегі күрмеулі мәселесін ортаға салған аудандықтардың сауалына Сенат және Мәжіліс депутаттары жауап берді.

Мәжілісмендер Шиелі ауданының ахуалымен танысты

<a href="https://kyzylorda-news.kz/">Kyzylorda-news.kz.</a> Санаулы күн бұрын ғана ұлттық сипат алған "домбыра күнін" тойлаған шиеліліктер өткен аптада шіліңгір шілденің аптабына қарамастан Астананың туған күнін де атап өтті. Қазақ елінің тәжіндей болған айбынды Астана қаласы жиырма беске келсе, тарихтар тезінен түрленумен қадам басып келе жатқан Шиелі ауданы торқалы тоқсан бестің табалдырығын аттамақ. Не десек те, шиеліліктер үшін биылғы жыл – мерейлі, мерекелі жыл.&nbsp;Жиырма бес жылда түрлі белесті еңсерген Елорда көптеген жетістікке жетті. Атап айтқанда, 1999 жылы Астана ЮНЕСКО-ның "Әлем қаласы" сыйлығына лайық деп танылса, 2011 жылы &nbsp;"ТМД мен ЕураАзЭҚ-тың үздік қаласы" халықаралық байқауының жеңімпазы атанды. 2012 жылы Қазақстанның бас қаласы ТМД мен Түркі әлемінің мәдени астанасы" құрметті миссиясын табысты орындап шықты. Жалпы айтқанда, жиырма бес жылда бағындырған белес аз емес. Керісінше жыл өткен сайын өрісі кеңейіп, өркендеген бас қаланың "Ұлы дәуірі" бастау алып, көркейіп келеді. Халықаралық ынтымақтастық қаласына айналған Елорда ел мерейін өсіріп, айбынды мемлекеттің абыройын асқақтатуда. Сонымен еліміздегі қалалар мен облыс орталықтары, шағын аудандар Астанаға қарап бой түзесе, өркендеудің жаңа сатысына көтерілері хақ.&nbsp;Еуразияның жүрегі – Арқаның төріндегі Астанаға қарап бойын тіктеп келе жатқан киелі мекен Шиелінің де келбеті күн санап көркемделуде. Жылдардың тоғысында тамырын тереңнен тартқан Қызылорданың маржаны іспетті болған Шиелі ғасырға жуық кезеңдегі қаншама тарихи оқиғалардың куәгері. Әлеуметтік-экономикалық ахуалы артып, тұрғындардың көңілінде тұрақтылық орын тепкен осынау ауданның ауыз толтырып айтарлықтай жетістіктері жетерлік. Қай салаға қалам тартсақ та, қадау-қадау жаңалықтарды алға тартуға болады. Тотыдайын түрленген киелі топырақтың құрылысы сән санап қарыштап, өндіріс орындары іске қосылуда. Кәсіпкерлік те кең қолдау алып, жаңадан іс бастап жатқан тұрғындар да жетерлік. Ауыл шаруашылығы саласының тынысы кеңейіп, Шиелінен шыққан тауарлар да бар. Әлеуметтің әлеуеті де артып, спорт және мәдениет саласында сайыстарда бақ сынап, аудан абыройын асқақтатып жүрген жастар да бар. Жалпы айтқанда Шиелі ауданы бас қаламен бірге жанданып келе жатқан киелі мекен. Сол себепті Астана күнін атап өткенде Шиелінің де жеткен жетістіктерін ұмытпаған ләзім. Осыған байланысты мерекеге орай ауданда бірнеше шара &nbsp;ұйымдастырылды.&nbsp;Алтыннан алқа тағынды күмістей көркем аналар&nbsp;Мерейлі мереке демографияның өсім алуына үлес қосып, саналы ұрпақ тәрбиелеуде тер төгіп жүрген батыр аналарды марапаттаудан басталды. Елорданың 25 жылдық мерейтойымен тұспа-тұс келген салтанатты шарада аудан әкімінің міндетін атқарушы Б.Ысмағұлов 34 көпбалалы анаға арнайы наградалар табыстады. Оның ішінде 13-і "Алтын алқа" иеленсе, 21-іне "Күміс алқа" наградалары берілді.&nbsp; Кез келген адамның әдептлігі мен жан-дүниесінің сұлулығы ең алдымен ақ сүтін беріп, әлпештеп өсірген ана жүрегінің жылуынан басталады. Бала бойындағы ең жақсы қасиеттер де ең алдымен анадан тарайды. Ана – қасиетті де қастерлі сөз. Ана есімі қашанда ардақты. Аналардың абзалдығын айту – ұрпаққа аманат. Себебі адамзатты мойындатқан ғұлама-данышпан да, тарихқа есімі алтын әріппен жазылған арыстар да анадан туған. Бүгінгі таңда жас та болса көп баланы дүниеге әкелген алтын құрсақты батыр аналарымыз көбейіп келеді.Сол себепті оларға қандай құрмет көрсетсек те жарасады. Осы орайда аудан әкімдігінде өткен салтанатты шара әрмен қарай аудан өнерпаздарының ән шашуымен жалғасты. Көңілі жайланып, өздері марқайып қалған ақ жаулықтылар мереке қарсаңында марапат иегері атанып, мәз болысты. Жиынға қатысқан зиялы қауым өкілдері де алтыннан алқа тағынған күмістей көркем аналарды құттықтап, ризашылығын білдірді.Қол шатыр астында…Асқақ Астананың айтулы мерекесіне орай ұйымдастырылған шара Ы.Жақаев атындағы күріш өсіру тарихи музейінде жалғасын тапты. Көненің көзіндей болған ескі мұраларды жаңғырту мақсатында ұйымдастырылған "Қолшатыр астындағы шабадан" шеруі қонақтар мен қатысушыларға ерекше әсер сыйлады. Шеруге аудандағы белгілі кәсіпкерлер А.Әбдіқалықова, Д.Тәжікова, Д.Өтепбергенова, аудандық мәдениет бөлім басшылары мен ауылдық мәдениет үйінің, ауылдық әкімгершілік қызметкерлері және Шиелі аудандық өлкетану музейі мен Н.Бекежанов мемориалдық музейінің қыздары қатысты. "Өткеніңді білмей, болашағыңды бағамдай алмайсың" демекші тарихтан сыр шертетін шарада әйелдер қауымы бас қосып, әуелеген әнге билеп, мәдени мұралармен танысып, сыр бөлісті. Бұл мерекелік шара бір жағынан өткен күнге саяхат жасауға сеп болса, екінші жағынан жаздың жайма шуақ күнінде бір серпілуге әсер етті.Орталық алаң думанға толдыЕлорда күнін ескерусіз қалдырмаған шиеліліктер кеш батқан бойда орталық алаңға жиналып, мерекенің лебін сезінді. Әуелеген әуендер, күмбірлеген күй, сахнада мың бұралған биші қыздардың өнері, шаттықтан бал-бұл жанған жүздер, бәрі-бәрі Астанаға арналған мерекенің маңызын айшықтай түсті. Мерекелік концерттің шымылдығы бас қала туралы баяндайтын арнайы прологпен түрілді. Одан кейін аудан әкімінің міндетін атқарушы Б.Ысмағұлов жиналған қауымды &nbsp;айтулы мерекемен құттықтап, еліміздің дамуы мен өркендеуін тіледі. Әрмен қарай Елордаға арналған әндер шырқалып, мерекенің мазмұны әрлене түсті. Аудан өнерпаздары барын салып, көрерменді шат-шадыман күйге бөледі. Тіпті шара соңына жетсе де, жиын өткен орыннан тұрғындар тарқауға асықпады. Астана бүгінде жас мемлекетімізді және халқымызды әлемге әйгілеп, алпауыт елдермен тереземізді тең еткен шын мәніндегі бас қалаға айналды. Киелі Шиелі топырағында сол бас қаланың көптен күткен мерекесі осылайша көрініс тауып, жоғары деңгейде аталып өтті. Сонымен еліміздің жүрегі Елордаға бізден де бір тілек. Жайнай бер, жарқырай бер, қазақтың Астанасы, баянды бақытының бастауындай ғажайып бас қаласы!

Шиелі ауданына 95 жыл толды

<a href="https://kyzylorda-news.kz/">Kyzylorda-news.kz.</a> Бұдан сәл ертеректе «Әкесі қойшы ғой» болмаса «Қойшының баласы» деген деген тіркестер кәдімгідей беделді тіркес болатын. Сондықтан болар, «...қой бағып, құйрық жеген озар» деп қойшы баласының да бағасын арттырған. Қариялар: «кезінде қой баққан шопандарыңның түкірігі жерге түпсейтін», «қойшы болып, құйрық май жегенге не жетер, шіркін?!» деп, өткенді еске түсіріп, аңсап отыратын. «Қой шаруашылығы – екінші тың» деп ұрандатып, мектеп бітірген түлектердің қой бағуға, қырқуға шыққан қызыққа толы кезеңдері аға ұрпақтың естерінде болар. Өйткені, сол тұста Республика бойынша қой санын 50 миллионға жеткізу міндеті қойылған. Ата-бабамыз ежелден мал бағып, соның ырыздық-несібесіне кенелген ғой.&nbsp;Бұл шаруашылық ешқашан сұраныстан шықпайтын, құнсызданбайтын, әрдайым өнім беріп тұратын кәсіп. Иә, бүгінде қой шаруашылығының кенжелеп тұрғандығы жасырын емес. Ауданда қой мен ешкінің санын қосқанда 75705 ті құрайды екен. Бұл дегеніміз, сексен мыңнан аса халқы бар аудан тұрғындарына біреуден де келмейді деген сөз. Біз бұл тақырыпты қозғап отырғандағы себебіміз – нақ осы түліктің өнімдерінің қолданыс аясының тарылуы.Өзімізге белгілі, көбіне-көп тек етін ғана пайдаланамыз. Деректерге сүйенсек, әлемде одан басқа бір де бір жануар ол сияқты сан түрлі өнім бермейді. Атап айтқанда, жүн, елтірі, терісі, қозы, қой еті, сүті – әлемдегі ең қымбат рокфор ірімшігі және құйрық майы. Түліксіз тұрмысын елестете алмаған бабаларымызға қой кисе киім, жесе тамақ болды. Оның тұрмыстағы пайдасы түйе мен жылқы жануарынан да артық десек те болады. Жер ыңғайы мен шөпті де аса көп талғамайтындығын да дана халық білген. Мына бір дерек кімге де болса қызық болар. Аша тұяқтың осы түрі әлемде өсетін 800 шөптің 560-ын қорек ететін көрінеді. Ал, қоймен салыстырғанда, ірі қара мал 420, жылқы 415 шөп түрімен қоректенеді екен.&nbsp;Хош, сонымен негізгі тақырыбымызға ауыссақ. Бұдан түйгеніміз – малдың ішіндегі көл-көсір табысқа кенелтетіні қой болмақ.Ғалымдардың дәлелдеуінше, қойдың еті де сүті де адамның ағзасына күш-қуат беруден бөлек, адамның дертіне де шипа бола алатынын алға тартуда. Олай болса, осы біз тілге тиек етіп отырған жайттарды тізбектеп көрейік. Бірінші кезекте ғылыми дәйектерді сөз етер болсақ, қойдың етінің құрамында су – 68 пайыз, ақуыз – 17,3, май – 13,6, көмірсутегі – 0,5 пайыз болып түзіледі. Бұған кальций фосфор, темірді қосып қойсақ, ғалымдардың «қой етінің талай дертке дауа» деп отырғанының жаны бар екенін бағамдаймыз. Мұндай деректерді тізбелеп отырған генетиктер қой етінің бүйрек қызметін бекемдеп, белсіздіктің алдын алатынын баса айтып отыр. Қазақтың ежелден келе жатқан бір дәстүрі, ол жас босанған әйелге міндетті түрде бір қойды байлап оны қалжа етіп сою. Бұл – босанған әйелдің белі тез бекіп, сүйектері жылдам қатаюы үшін әуелден жасалынып келе жатқан ғұрып. Ауыр дерт меңдеген сырқаттарды, көз тиген баланы, ағза қорғанышын, яғни иммуниеттін жоғалтқан адамды қойдың етімен, сорпасымен емдеуді жөн көрген. Қимылсыз мешел болып қалған балаға қойдың сүйегін қайнатып беріп, оның сорпасын ішкізіп отырған. Бұдан соң баласына көз тисе қара қойдың терісіне салу арқылы баланың бойындағы тіл-көзді алған. Абайсызда жылан немесе басқа уытты жәндіктер шағып алса, жаңа сойылған қойдың қаракесек етін сол шаққан жерге таңу тәсіліне жүгінген. Өкпесі ауырған адамға да осы өнімдерден ем-шара жасаған.Созылмалы жөтелге шалдыққан сырқатқа қойдың өкпесін беру арқылы ем қолданған. Бұдан соң жиі несеп сындыратын балаларды қойдың терісіне салған. Қойдың майының өзі қаншама ауруларға ем болды, ертеректе әрине. Ертеректе деуімнің де себебі бар. Қойдың майын бүгінгі таңда көп пайдалана бермейді. Қойдың құйрық майы жөтелді басып, қақырықты босату үшін құйрық майды шыжғыртып, 50г мөлшерінде ыстықтай ішеді. Тұмаудан болған созылмалы жөтелге құйрық майды ыстық сүтке қосып ішеді. Балаларға тұмау тиіп жөтелгенде, алқымды, алақанды, табанды қойдың жылы майымен сыласа, сауығады. Ішуге және денедегі тері ауруына қолдану үшін қойдың майына дәрі өлтіреді. Қойдың майы ағзадағы суық тию процесінің алдын алатындықтан, әжелеріміз бен аналарымыз жаңа туған нәрестесін қойдың майымен сылаған. Ал, біүгінгі күні қойдың майын жолатпайтынымыз жасырын емес. Кез келген дәріханалардағы химиялық қоспалардан жасалған арнайы майларды пайдаланамыз. Оның нәрестеге қаншалықты пайдалы, зиянды екендігін саралап жатқанымыз жоқ. Қойдың жілік майын қолқасына қақырық жиі жиналатын адамдарға беру арқылы бабаларымыз кезінде өкпедегі құрт ауруының алдын алған. Мұнымен қоса, қойдың сүтін ашыту арқылы жасалатын бұл сусында адамның бойындағы қажетсіз микробтарды жойып жіберетін қасиет бар екен. Басымыз ауырып, балтырымыз сыздаса, дәрігердің көмегіне жүгінеміз. Мейлі ғой. Шипасын көріп жақсы болып кетерміз. Бірақ, жоғарыда айтқанымдай химиялық қоспалардан тұртын дәрі ауырған ағзамызға ем болғанымен, екінші бір ағзаның жұмысын әлсірететіндігін дәрігерлердің өздері де ескертеді. Терiсі, құйрығы, жыны өкпесi, тоқ iшегiн,қарны, өтi, жiлiк майы, сүйегi – міне осылардың барлығының ауруға мың да бір ем екендігін бірнеше ғасырлар бұрын біліп, тұрмыста пайдаланды. Иә, таза табиғи өнімге не жетсін. Осы тұста оқымай-ақ, көшіп-қонып, табиғатпен етене байланыса жүріп, ғалым, философ, дәрігер болғандықтарына таңданбасқа шараң жоқ.Жоғарыда біз қойдың адам денсаулығына қатысты тұстарын қаузадық. Енді осы кәсіптің керегесін кеңейту үшін кей азаматтар қозылай алып, өсіріп отыр. Бірақ, көп емес. Мұны санмен де әңгіме басында айтып өттік. Яғни, кей шаруашылықтарда егіз туған қозылардың сыңарын «мал бола ма, болмай ма?» деген оймен аз ақшаға сататын көрінеді. Сол арзанырақ сатылған қозыны өсіріп-жетілдірем деген азаматтар алып, бағады. Негізінен, бұл да ұтымды ой секілді. Бір қозыны 500 ден алса, бір алғанда жай 10000 ға жиырмасын алуға болады екен. Сонда оның он бесі жетіліп кетсе, қандай керемет. Бір жыл, жарым жылдан кейін ол қозыңыз тоқты болып, төл береді. Осылайша, өз шаруаңызды да оңдап, мал басын да көбейтуге болар еді.Рас, қазіргі кезде бақташылар мен қойшылардың еңбегі бағаланбайтыны рас, бірақ сол төрт түлікке барлық адамзат тәуелді ғой. Сондықтан, еті – уыз , сүті – бал, жүні – жібек, елтірісі – алтын болып саналатын берекесі мол қой шаруашылығы ешқашан кенжелеп қалмауы керек.

Қой шаруашылығы: кедергілер мен қателіктер

<a href="https://kyzylorda-news.kz/">Kyzylorda-news.kz.</a>&nbsp; «Бәйтерек» – Астананың символына айналған көрнекті ғимараттардың бірі. Қазір оған ұқсас көшірмелер еліміздің түкпір-түкпірінде бар. Мысалы, Өскемен, Қарағанды, Екібастұз, Жаңатас қалаларында, Шығыс Қазақстандағы Көкпекті ауылында да «Бәйтерек» орнатылған.Бұл қалаларда ғана емес, бізде де бірнеше «Бәйтерек» бар. Ұлы жолдың бойында орналасқан. Анығырақ айтсақ, «Қызылорда-Жезқазған» автокөлік дәлізінде тұр. Көзтартар дүниені қалаға кім тарту етті? Таратып айтсақ.Бексұлтан Баймаханов отбасылық бизнестің тізгінін жас та болса өзі ұстапты. Әрине, мұнда ата-ананың ақыл-кеңесі мен бауырлардың қолғабысы ұшан-теңіз. Былтыр «Бәйтерек» шағын ауданынан кәсіпкерлігін бастады. Қалааралық маңызды жол бойына үлкен азық-түлік дүкені мен асхана салды. Осы кешеннің атауын да жаңа қоныспен аттас етіп, «Бәйтерек» деп атады.<blockquote>– 2017 жылы Алматы қаласына қонаққа бардым. Кешке «Париж» деп аталатын дәмханаға бас сұқтық. Маған дәмханадан бұрын ұнағаны дәл алдында орналасқан Париждың ең басты мақтанышы Эйфель мұнарасының керемет көшірмесі еді. Астана дегенде ең бірінші көз алдымызға «Бәйтерек» келетіні рас. Әрі қаламыздан осы аттас аудан ашылды. Дүкен мен асхана салу барысында еліміздің мақтанышы «Бәйтеректің» көшірмесін тұрғызу ойымда болды, – дейді Бексұлтан.</blockquote>Алыстан көрінетін «Бәйтерек» Жезқазған бағытына қатынайтын &nbsp;жолаушыларға ақ жол тілеп тұрғандай. Екінші «Бәйтеректі» 2014-2015 жылдары «Қызылорда көркем» ЖШС Абай даңғылы бойына салған.Аудан, ауылдық жерлерден де «Бәйтерекке» ұқсас дүниені көптеп байқауға болады. Мысалы, Қармақшы ауданы Дүр Оңғар ауылындағы стелла. Жаңақорған ауданы Қожакент ауылында «Бәйтерек» монументі 2016 жылы салынған. Биіктігі 12,5, шарының диаметрі 2,5 метр. Сондай-ақ осы ауданға қарасты М.Нәлібаев ауылында 2012 жылы 1975 жылы туған түлектер 20 жылдық кездесу құрметіне «Бәйтерек» тұрғызған. Оның биіктігі 12 метр.Айтпақшы, жақында ғана Қазалы ауданының ең шеткі ауылдарының бірі Кәукейде де «Бәйтерек» бой көтерді. №225 орта мектепті 1993 жылы бітірген ауылдағы қыз-жігіттер ұрпақтар сабақтастығы мен туған жерді түлетуге өз үлестерін қосып, осындай тарту жасаған. Биіктігі 8,7 болатын «Бәйтерек» ауылға сән қосып тұр. Сұрастырғанымызда, бұған 800 мың теңгеден астам қаржы жұмсалғанын білдік. 30 жылдық кездесуден естелік қалдыру идеясын ұсынып, жұмысты іске асырған азаматтар – Ержан Әлімжанов, Ғабит Баймаханов, Бауыржан Шүкіралиев, Мейрамбек Рашаев, Серік Әбдіханиев және дәнекерлеуші Болатбек Айғабылов.Айта кетейік, Астана қаласында тұрғызылған «Бәйтерек» монументінің биікті 97 метр. 1997 – мемлекеттің жаңа астанасы Алматыдан Ақмолаға көшірілген жыл.

Астана символы: Әр ауылдың өз «Бәйтерегі» бар

<a href="https://kyzylorda-news.kz/">Kyzylorda-news.kz.</a> Келер жылдың 1 қаңтарынан жеке куәлік, паспорт, шетелдіктің Қазақстанда тұруына рұқсат ететін ықтиярхатын беру кезінде оның иесінен саусақ іздері алынбақ, деп хабарлайды ҚазАқпарат.«Жадының сыйымдылығы кемінде 64 Кб болатын микросхемада Қазақстан Республикасы азаматының, оның ішінде адамның азаматтығы мен заңды мекенжайы, фотосуреті мен қолы, 16 жасқа толған және «Дактилоскопиялық және геномдық тіркеу туралы» 2016 жылғы 30 желтоқсандағы ҚР Заңында белгіленген жағдайлар бойынша 12 жастан асқан құжат иесінің саусақ іздері туралы графикалық және мәтіндік ақпарат қорғалған түрде сақталады», - делінген <a href="https://legalacts.egov.kz/npa/view?id=14625923">Ашық НҚА порталында</a> жарияланған Ішкі істер министрінің бұйырық-жобасында.Сондай-ақ құжатта жазылғандай, саусақ іздері азаматтардың жеке куәлігінде, шетелдіктің Қазақстанда тұруына рұқсат ететін ықтиярхатында, азаматтығы жоқ адамның куәлігіне де орналастырылады.«Бұл – «Дактилоскопиялық және геномдық тіркеу туралы» 2016 жылғы 30 желтоқсандағы ҚР Заңына сәйкес 2024 жылғы 1 қаңтардан бастап саусақ ізін тіркеу талабының күшіне енуіне байланысты», - деп түсіндірме берілген бұйрық-жобасына.Құжат 20 шілдеге дейін көпшілік талқылауда болады.

Жеке куәлік, паспорт берілгенде қазақстандықтардан саусақ ізі алынады

<a href="https://kyzylorda-news.kz/ru">Kyzylorda-news.kz.</a>&nbsp; Астанада елорданың 25 жылдық мерейтойына орай ұйымдастырылған Астананың бауырлас қалалары форумы басталды, деп хабарлайды <a href="https://sputnik.kz/">Sputnik Қазақстан</a>.Қала әкімі Жеңіс Қасымбек елордада арнайы келген әлем астаналары мен муниципалитет басшыларын қарсы алды. Айтуынша, іс-шараға әлемнің 13 мемлекетінен 17 муниципалитет басшылары қатысып жатыр.<blockquote>"Астана қаласы – Қазақстанның маңызды жобаларының бірі. Алғаш рет ХХ ғасырдың соңында қаланып, ғасырлар тоғысындағы шекарадан өтіп, біздің Астанамыз әлемдік танымалдылыққа ие болды және бүгінде дамыған экономикасы мен инфрақұрылымы бар заманауи мегаполиске айналды", - деді Қасымбек.</blockquote>Айтуынша, 25 жылдың ішінде қаланың жалпы өнімі 22 миллиард долларға немесе 10 триллион теңгеге, ал өнеркәсіп 4,3 миллиард долларға немесе 2 триллион теңгеге дейін жеткен.Соңғы жылдары Астана 14 миллиард доллардан астам тікелей шетелдік инвестиция тартты.<blockquote>"Небәрі 25 жыл ішінде біз 33 млн шаршы метр тұрғын үй, 670 балабақша мен мектеп, жүзден астам мәдени және спорт нысандарын салдық. Астана әлемдік ауқымдағы таланттарды, жастарды, туристерді, инвесторларды және компанияларды тартатын креативті экономикасы бар сауда ағындары үшін аймақтық хабқа айналды. Шағын және орта бизнеске негізделген қала экономикасының өзін-өзі қамтамасыз ететін құрылымы қалыптасты", - деді қала басшысы.</blockquote>Қасымбек бүгінде елорда экономикалық өсу мен дамудың қаласы ғана емес, сонымен қатар тәуелсіз, күшті және сенімді дамып келе жатқан мемлекеттің бейнесі екенін атап өтті.Айта кетері, елорданың 25 жылдық мерейтойына орай ұйымдастырылған Астананың бауырлас қалалары форумына президент Қасым-Жомарт Тоқаев та қатысып жатыр.

Жеңіс Қасымбек: Астана – Қазақстанның маңызды жобаларының бірі

<a href="https://kyzylorda-news.kz/ru">Kyzylorda-news.kz.</a> Еліміздің бас қаласы Астана күніне орай кент орталығындағы «Prime Park» орталық саябағында &nbsp;«Асқақта, айбынды елдің Елордасы» &nbsp;атты мерекелік концерт өтті. Мерекелік шарада сөз алған аудан әкімі Мұрат Жолкелдіұлы Тілеуімбетов барша жиналған жұртшылықты Астана қаласының 25 жылдық мерейтойымен құттықтады.– Елорда күні – бұл астаналықтардың мерекесі ғана емес, жалпыхалықтық мейрам. Бұл – асқақ абырой мен еңселі елдіктің мерекесі. Астана қаласы – егемен еліміздің тәуелсіздік жылдары қол жеткізген ең басты жетістігі мен жеңістерінің бірегейі. Еуразия кіндігіндегі Астана қазіргі таңда халықаралық іргелі жиындардың, конфессияаралық келісімдердің алаңы іспеттес. Бүгінгі таңда Астанада әлемдік мәнмаңызға ие форумдар мен саммиттер өтуде. Астана шаһары талай жанның арманына қанат бітіріп, өмірден өз орнын табуына да даңғыл жол ашып берді. Астана – келешегі жарқын, болашағы айқын қала. Бүгінде Астана көпұлтты халқымыздың бірлігі мен ынтымағына тірек, достығы мен татулығына кепіл болып отыр. Биыл бұл мерекенің мәні де, маңызы да бұрынғыдан ерекше. Өйткені елдігіміздің еңселі ескерткішіне айналған Астанамыздың негізі қаланғанына биыл 25 жыл толып отыр. Ширек ғасырды еңсерген жас Астана бұдан кейінде Қазақстан халқы қол жеткізе алатын шексіз мүмкіндіктердің үлгісіне айнала беретініне сеніміміз мол.Туымыз тұғырлы, егемендігіміз еңселі, еліміз ғұмырлы болсы, – деп ақжарма тілегін білдірді аудан әкімі.Аудан әкімінің ақжарма тілегінен кейін, &nbsp;аудан әкімінің орынбасары Бектас Балғабайұлы баяндама оқып, Астананың тарихына бір шолу жасады.– 1994 жылы Қазақстан Республикасы Жоғарғы Кеңесінде Қазақстан Республикасының Президенті Нұрсұлтан Назарбаев Қазақстанның астанасын Алматыдан Ақмолаға көшіру туралы ұсыныс жасады. 1997 жылы қазанның 20-сында астананы ауыстыру туралы Жарлыққа қол қойды. 1998 жылы 6 мамырда Ақмола қаласының атауы Астана болып өзгерді. 1998 жылы маусымның 10-ында жаңа елорданың халықаралық тұсаукесер рәсімі өтті. 2019 жылы 20 наурызда Қазақстан Республикасының Президенті Қасым-Жомарт Тоқаев Парламент палаталарының бірлескен отырысында сөз сөйлеп, Елбасының атын мәңгі сақтау үшін Астана қаласының атауын Нұр-Сұлтан деп өзгерту жөнінде ұсыныс жасады. «Біз, қазіргі және келешек ұрпақ өкілдері, Елбасының саяси мұрасын жадымыздан шығармай, қадір тұтып, Нұрсұлтан Әбішұлы Назарбаевтың тарихи еңбегіне лайықты құрмет көрсетуіміз қажет. Елбасының халқымызға және әлем қауымдастығына сіңірген ерен еңбегі мен ұлы есімін мәңгі есте сақтауымыз керек. Бұл халқымызды, әсіресе, жастарды тарихқа құрметпен қарауға тәрбиелеп, Елбасының даңқты қызметін әділ бағалау үшін маңызды. Ұлы замандасымыздың, Қазақстан Республикасының Тұңғыш Президенті Нұрсұлтан Әбішұлы Назарбаевтың атын келесідей түрде есте қалдыру қажет деп санайын. Елордамыз оның атын иемденіп, Нұр-Сұлтан деп аталуы тиіс. Мұндай ұсыныс бұған дейін 2016 жылдың 23 қарашасында Қазақстан Республикасы Тәуелсіздігінің 25 жылдығына орай парламентарийлер қабылданған декларацияда айтылған еді», – деген болатын Мемлекет басшысы Қасым-Жомарт Тоқаев.Сол күні ҚР Парламенті палаталарының бірлескен отырысында дептуттар Астананың атауын Нұр-Сұлтан қаласы өзгерту туралы Заң қабылдады. Ал 2019 жылғы 23 наурызда ҚР Президенті Қасым-Жомарт Тоқаев Қазақстан Республикасының астанасы – Астана қаласын Қазақстан Республикасының астанасы – Нұр-Сұлтан қаласы деп қайта атау туралы Жарлыққа қол қойды.Жыл сайын елорда күні кең көлемде тойланып келді. Алайда, өкінішке қарай биыл елімізді жайлаған коронавирус індетіне байланысты барлық бұқаралық шараларға тыйым салынып отыр. Эпидемиологиялық ахуалға байланысты бұған дейін елорда күніне жоспарланған барлық іс-шаралар тоқтатылды. Шаралар тек онлайн режимде өтеді.Іс-шаралардың көпшілігі әлеуметтік сипатта болады – ерекше қажеттілігі бар балаларға арналған реабилитациялық орталық, жұмыссыз әйелдерге ШОБ негіздерін үйрететін «Кәсіпкер ана» әлеуметтік орталығы, Жағалау ауданында жедел жәрдем стансасы мен «Доктор у дома» медицина орталығы және басқа да әлеуметтік нысандар ашылады.Шараларға қатысатын адам саны шектелген. Сонымен қатар үй кезегіндегілер мен үлескерлерге пәтер кілттері тапсырылады – қатысушылар саны шектеулі және санитарлық нормалар қатаң сақталады: маска тағып, әлеуметтік қашықтықты сақтау керек, – деп тарих беттерінен сыр шертті.Сондай-ақ, Жаңақорған аудандық «Amanat» партиясының басшысы Арман Мәжитовке сөз бріліп, аудан жұртшылығын айтулы мерекемен құттықтады.– Біз жаңа ғасырға, жаңа мыңжылдыкка өркениетті ұлт ретінде, тарих сахнасына егеменді ел ретінде ендік. Әлемдік қауымдастыктың көшіне жеке керуен болып қосылдық. Тәуелсіздігіміздің айғағындай, елдігіміздің белгісіндей, алтын күндей Елтаңбамызды, желбіреген көк байрағымызды көргенде, әуелеген Әнұранымызды естігенде бойынды ерекше бір асқақ азаматгық сезім билейді. Бұны көру, сезіну де бір бақыт, мандайға біткен бақ емес пе?! Аз уақыттың ішінде көркейіп, түрленіп, тәуелсіздігіміздің түлегі, Отанымыздың жүрегі - Астанамыз да елдігіміздің жаңа бетгерін ашқандай, тәуелсіздігімізді әйгілеп тұр. Жастарымызды болашаққа бастайтын бас қаламыз, арман кала - жас қаламыз - өнер, білім мен мәдениеттің, ғылымның ордасына айналуда. Биыл Астананың еліміздің ордасы болып жарияланғанына - 25 жыл. Иә, бүгінде Астана қаласы еліміздің жетістіктерінің айнасы. Тәуелсіздік алғанымызға ширек ғасыр уақыт өтті. Әлемдік тарих үшін бұл, әрине, көп уақыт емес. Дегенмен осы тәуелсіздікте өткен аз уақыт қазақ халқының ғасырлық арманы болатын. Сол бабалар арманына жетуіміз – біздің Ұлы жетістігіміз. Ал, ұлы жетістігіміздің асқақ жемісі елордамыз – Астана. Шыңдары көкті тіреген асқақ Алатау баурайынан Ұлы даланың кіндігіне көшіріліп, ерке Есілдің жағасында бой түзеген әсем Астана – жаңа ғасыр ғажабынан жаралған жас қала. Еліміз егемендігін алып, дербес мемлекет болғаннан кейінгі астананы ауыстыру бас қаланы қайта жаңғыртуды ғана емес, ең алдымен, қазақтың өз таңдауы өз қолында екендігін көрсетті. Еліміздің ордасы Астана мәңгі асқақтай берсін, – дейді ол.Шара барысында орталық алаңда білім бөліміне қарасты мекемелерде өз үлестерін қосып, тұрғындарға ерекше көңіл күй сыйлады. Атап айтар болсақ, «Тау самалы» тынығу лагерьі, Диана-П, Меруерт, Бек-Шолпан, Ел-Ару, Еркежан, Жәния, Бекжан, Балбөбек жеке балабақшалары және «Алтын ғасыр» аудандық дебат клубы аудан тұрғындарына көрме ұйымдастырып фотогалерея ұйымдастырылды.Астана - еліміздің мақтанышы, ел жүрегі, әрі бойтұмары. Елорда күніне арналған думанды іс-шарада аудан өнерпаздары ән мен жырдан шашу-шашып келген қонақтарға мерекелік көңіл-күй сыйлады. Сондай-ақ, іс-шараға келген тұрғындар арасында викториналық ойындар ойнатылып, түрлі спорттық сайыстар ұйымдастырылды. Күннен күнге көріктене, заманауи жасампаздықпен дамып келе жатқан елорданы ән мен жырға қосқан аудан тұрғындары өнерпаздармен қосылып, ән мен биден шашу шашып, көрермен қошеметіне бөленді.&nbsp;Кешкілік ауыл тұрғындары орталық саябаққа жиналды. Олар аудандық жастар ресурстық орталығының ұйытқы болуымен өткізілген «Аялаған Астана» атты &nbsp;мерекелік концертті тамашалады. Жас кәсіпкерлер мүмкіндігі шектеулі және ата-анасының қамқорлығынсыз қалған балаларды ойын алаңдарында тегін ойнатты. Лагерьде демалып жатқан балаларға балмұздақ тегін таратылды.Сонымен қатар, «Prime Park» орталық саябағында бұл күні балалардың жарқын күлкісі мен шаттыққа толы болды. Өйткені, аудандық Адырбек Сопыбеков атындағы орталық кітапхананың ұйымдастыруымен осы жерде «Менің Астанам» атты мерекелік шара өтті. Саябақ нағыз шығармашылық шеберханасына айналды. Әр жастағы балғындар Астана тақырыбына акварельмен суреттер салып жатыр. Кейбіреуі буМагия техникасы бойынша қағаздан әртүрлі бұйымдар жасауда. Сегіз жастағы Әсия Астанада ешқашан болмаса да, еліміздің жүрегі саналатын бас қаламызға деген махаббатын қағаздан жасалған жүрек бейнесімен көрсетті. Бесінші сыныпты аяқтаған София болса Бәйтеректің суретін салыпты. Балалардың салған суреттері сол жерде бірден ілініп, жиналғандардың назарына ұсынылды.Шынында да, салынған суреттердің басым бөлігі еліміздің басты символы – Бәйтерекке арналыпты. Бір жерден ғана өзгеше суретті көріп, «бұл не екен» деп ойланып тұрсам, қасыма келген бала «бұл – менің суретім, Ханшатыр, мен оны осылай көрем» дегені. Балғындардың қыл қаламынан туған дүниелер кәсіби туындылар болмағанымен, олардың Елордамызға деген сүйіспеншіліктерінің көрінісі. Сонысымен де құнды екені даусыз. Мерекеге келген балғындар ақ қағазға алақандарының табын бояумен басып, белгі қалдырды.Дереккөзі: Облыстық "Дидар" газеті <a href="https://didar-gazeti.kz/31264-2">https://didar-gazeti.kz/31264-2</a>Астана болашақтың жарқын қаласы. Мәдениеттің ошағы, ғылым мен білімнің ордасы. Біз жаңа ғасырға, жаңа мыңжылдыққа өркениетті ұлт ретінде, тарих сахнасына егеменді ел ретінде ендік. Әлемдік қауымдастықтың көшіне жеке керуен болып қосылдық. Тәуелсіздігіміздің айғағындай, елдігіміздің белгісіндей, алтын күндей елтаңбамызды, желбіреген көк байрағымызды көргенде, әуелеген әнұранымызды естігенде бойыңды ерекше бір асқақ азаматтық сезім билейді. Бұны көру, сезінуде бір бақыт, маңдайға біткен бақ емес пе? Ал мерекеге келер болсақ, Астана әр қазақтың мақтанышы. Жыл сайын шілде айында тойланатын осынау мереке барша қазақ руханиятының айнасына айналуы тиіс. Астана – ару қала, ол– азия төріндегі салтанаты жарасқан көрікті мекен және әлем елдерінің қызыға көз тігетін туристік аймағы болуға лайық. Құрметті қарақиялықтар сіздерді осынау мерекелеріңізбен шын жүректен құттықтаймыз! Астана күні құтты болсын!

Жаңақорғанда астана күні асқақтап өтті

<a href="https://kyzylorda-news.kz/ru">Kyzylorda-news.kz.</a> Синоптиктер 6-8 шілде күндері ауа райы қандай болатыны туралы болжам жасады, - деп хабарлайды Tengrinews.kz.Метеорологтардың мәліметінше, алдағы мереке күндері республика аумағының басым бөлігінде тұрақсыз ауа райы сақталады. Соған байланысты найзағай ойнап, екпінді жел соғады, 6-7 шілдеде орталықта қатты жаңбыр жауады деп күтіледі.Оңтүстік-шығыста, 6-8 шілдеде Қазақстанның солтүстігінде, шығысында күндіз бұршақ жаууы мүмкін. Тек еліміздің батысында ауа райы жауын-шашынсыз."Батыста, оңтүстікте күндізгі температура 33-42 градус ыстық, республиканың қалған бөлігінде ауа температурасының аздап төмендеуі, солтүстік-батыста және орталықта 22-35 градусқа дейін көтеріледі. Солтүстікте 23-30 градус, шығыста және оңтүстік-шығыста 20-30 градус жылы", - делінген хабарламада.

Қазақстан және Қызылорда облысының жаңалықтары