<a href="https://kyzylorda-news.kz/">Kyzylorda-news.kz.</a> Нұржан Кенжебеков – Шиелі ауданы, Алмалы ауылының тұрғыны. Жұмысына тиянақты, ісіне мығым, жауапкершілігі мол, өз ісін адал атқаратын кәсіпкер. Ол төрт ай бұрын кір сабын шығаратын шағын кәсіп бастаған. Күнделікті қолданыстағы кір сабынның жасау әдісі қандай? Және сабын бизнесін бастау идеясы қалай келгені туралы Нұржанның өзінен сұрап білген едік.«Шах сабыны» қалай пайда болды?Негізгі мамандығым – инженер-механик. Бала кезімнен бірнеше істі қатар алып жүргеннен кейін, бұл кәсіпті бастау қиын болмады. Жалпы қазақ «көз – қорқақ, қол – батыр» дейді емес пе? Сол себепті сабын шығаруды қолға алдым. Ең алғаш сабын жасау техникасын қазалылық кәсіпкер Руслан Бөлекбаевтан үйрене бастадым. Тек теориялық тұрғыда ғана емес, тәжірибе жүзінде де іске асырып көргенмін. Соның нәтижесінде осы кәсіпті бастап, тәуекел жасадым. Кейін балаларымыз да бізге көмектесе бастады. Отбасымызбен жеке кәсібіміз болғанын қаладық. Мұрадан мұраға жалғасады деген мақсатпен, кенже ұлымның атымен «Шах сабыны» деп қойдық.Экологиялық таза өнімСабынның құрамы 100 пайыз экологиялық таза өнімдерден тұрады. Қасиеттері де жоғары. Былайша айтқанда, тері ауруларын, майлы беттерге пайдалы. Безеуді де кетіреді. Кәсіпкердің айтуынша, ешбір химиялық қоспа жоқ. Бастысы – табиғи таза өнім, сапасы жоғары. Тіпті суға да ерімейді. Қолданғанда жақсы көпіреді. Құрамының басым бөлігі тоқ май, күнбағыс майдың қалдығы және каустик содасынан жасалады.Қазіргі таңда 150, 200, 300 грамдық сабыннан тәулігіне 1000, 1500 дана шығарылады. Сабынның бағасы да тұрғындар үшін әлдеқайда қолжетімді.&nbsp;Сабын бағасы – 80, 150, 250 теңгеден сатылады. Ал сұранысына келер болсақ, бүгінде тек Алмалы ауылы ғана емес, Шиелінің түкпір-түкпірінен кең көлемді тапсырыстар түсіп жатыр.Бизнес бірден жүріп кетпейдіШынында да, бастаған бизнес бірден жүріп кетпейді. Кәсіп ашу табандылықты қажет етеді. Ешқандай қиындыққа мойымай, еңбекқорлықпен еңбек етіп келемін. Алғашқыда сабын жасауда қиыншылықтар кездесті. Мәселен, қоспалардың дұрыс қосылмай қалған кездері болды. Және шыққан сабынның сапасын дұрыс қадағаламай, қателік жіберген сәттерді айта кету керек. Бірақ, біз оған мойымадық. Бүгінде әр нәрсені бақылап, дұрыстап істеп, цехтағы жұмыс қызу жүргізілуде.Болашаққа сенімді қадамКелешекте бұл кәсіпті кеңейткіміз келеді. Бүгінде цехтағы жұмыс қызу жүргізілуде. Мақсатымыз – айқын, міндетіміз – зор. Алдағы уақытта қол жууға, кілем және ыдыс аяқ жууға арналған сұйық сабындар шығару ойда бар. Сондай-ақ арнайы үлкен аумақты ғимарат салсам, нұр үстіне нұр болар еді. Тапқан табысымыз адал, балаларымыздың қажеттіліктеріне жетеді. Басты мақсатымыз – ауылдың, ауданның атын шығарып, «Шах сабыны» өніміне сұранысты арттыру

Шиеліде «шах сабыны» шығады

<a href="https://kyzylorda-news.kz/">Kyzylorda-news.kz.</a> Шиеліде Жастар ресурстық орталығы және «Салауатты өмір салтын насихаттау және жастар шығармашылығын дамыту» әлеуметтік қызметі жобасы аясында Жастар форумы өтті. Оны «Қызылорда облысының жастар одақтары» қоғамдық бірлестігі ұйымдастырды.Іс-шараны аудандық қоғамдық даму бөлімінің басшысы Кенжехан Есенбаев ашып берді. Әрмен қарай ол өз саласы бойынша айрықша үлес қосып жүрген 10 жасқа аудан әкімінің «Жыл үздігі – 2023» жастар сыйлығын табыстады. Атап айтсақ, «Үздік оқушы» номинациясымен №45 Ақ Орда мектеп-гимназиясының 9-сынып оқушысы Аяулым Мұханбетияр, «Үздік жас дәрігер» номинациясы бойынша аудандық көп бейінді орталық ауруханасының стоматолог дәрігері, жас маман Дәурен Кенжебек, ал «Үздік жас ұстаз» №49 орта мектебінің қазақ тілі мен әдебиет пәнінің мұғалімі Шыңғыс Құдайберген иеленсе, «Үздік жас спортшы» номинациясына дзюдо күресінен республикалық турнирдің күміс жүлдегері Ердәулет Абдумуталапов алды. «Үздік жас журналист» номинациясын аудандық «Өскен Өңір» газетінің тілшісі Айнұр Ибрашева және «Үздік жас кәсіпкер» «Омар торт» кондитерлік өнім дүкенінің басшысы Гүлзия Мұратбекқызы, «Үздік жастар көшбасшысы» №252 мектеп-гимназиясының дене шынықтыру пәнінің мұғалімі, волонтер Азамат Қалиға берілді.Ал «Үздік мәдениет қызметкері» болып Шиелі кенті әкімі аппаратының «Арман» мәдениет үйі коммуналдық мемлекеттік қазыналық кәсіпорнының маманы Аякөз Қылышбаева және «Үздік жас волонтер» номинациясымен Шиелі «Біз біргеміз» қайырымдылық қорының жетекшісі Жасұлан Рысбек марапатталды.Жалынды жастарға қаржылай сыйақы, сертификат, диплом және статуэтка табысталды.&nbsp;

Шиелі: Жаңа леп, жаңа толқын

<a href="https://kyzylorda-news.kz/">Kyzylorda-news.kz</a> Кітап – адамзат баласының баға жетпес байлығы. Ғылымның қайнар бұлағы. Шығыс ойшылы Әлішер Науаи «Кітап – ақылына ақы сұрамайтын алтын қазына» десе, Л.Толстой «Жақсы кітап оқу ақылды адаммен сырласқанмен бірдей» деген. Ал Абай атамыз «Танымның бар тамашасы кітапта, оған қол жеткізу үшін кітап оқудан жалықпа, артық ғылым кітапта, ерінбей оқып көруге» деп насихаттайды. Алайда соңғы уақытта жастарымыз кітап оқудан шетте қалып, қол үзіп бара жатқаны рас.&nbsp;Осы орайда 2020 жылдан бастап Мемлекет басшысы Қасым-Жомарт Тоқаевтың тапсырмасы аясында ҚР Білім және ғылым министрлігі орта білім саласында «Оқуға құштар мектеп» жобасын қолға алған болатын. Ал былтыр аталған жобаға үлес қосу және оқушылар мен мұғалімдер арасында кітап оқу мәдениетін насихаттау мақсатында А.Байтұрсынұлы атындағы білім академиясының ұйымдастыруымен елімізде «Үздік оқырман» мұғалімдер байқауы өтті. 3 мың ұстаз қатысқан республикалық байқауға Жалағаш ауданының абыройын арқалап З.Жарқынбаев атындағы №202 орта мектептің орыс тілі және әдебиеті пәнінің мұғалімі Алтынай Медеуова қатысқан.&nbsp;– Кітап оқуға деген құштарлығым бала кезден пайда болды. Алдымдағы аға-апаларыма қарап, 3 жасымда әліппені оқып, 5 жасымда «Балдырған», «Парасат», «Ақжелкен» деген журналдарды оқитынмын. Кейін ертегі, әдеби кітаптар оқи бастадым. Негізі үйде анам кітапты жиі оқиды. Кітаптар жинақталған арнайы сөресі болатын. Бірде сол сөреден «Абай жолы» романының І және ІІ томын көріп оқымақшы болғанда анам «саған бұл шығарманы оқуға әлі ерте, кейін оқисың» деп бермей қойды. Ол кезде мен небәрі 3-ші сынып оқитынмын. Анамның қарсы болғанына қарамастан шығармаға деген қызығушылығым арта түсті. Содан бірде анамның рұқсатымен кітапты қолыма алып, жалықпастан 3 күн бойы шығарманың алғашқы томын оқып бітірдім. Біздің бала кезімізде қазіргідей кітап қолжетімді емес еді. Сондықтан болар, кейде кітапты ұрлап оқитынбыз. Мәселен, бірде көршімнің үйінің терезесінің алдынан Ә.Нұрпейісовтың «Қан мен тер» романын көріп қалдым. Сұрасам бермей қояр деген оймен, күртешемнің ішіне тығып алып, ұрлап шыққаным есімде. Үйге барып оқып болған соң көршімнен кешірім сұрап, кітабын табыстағанмын, – дейді Алтынай Мансұрқызы.&nbsp;Байқауға қатысушылар ІІ кезең бойынша сынға түскен. І кезеңде олар 2023 жылдың қаңтар мен сәуір аралығында ұйымдастырушылар тарапынан іріктелген 5 кітапты оқып, 15 сәуір күні онлайн формат арқылы тікелей эфирде сұраққа жауап берген. Мәселен, олар Д.Исабековтің «Гауһар тас» повесін, Ш.Мұртазаның «Ай мен Айша» романын, Ә.Нұршайықовтың «Ақиқат пен аңыз» романын, И.Тургеновтың «Әкелер мен балалар» романын, және Ш.Айтматовтың «Қош бол, Гүлсары!» повестін оқыған. Қатысушыларға әр кітаптан 2 сұрақ беріліп, әр сұраққа кемі 200 сөзден тұратын эссе арқылы жауап берген. &nbsp;ІІ кезең мамыр мен қазан айы аралығында өткен. Бұл кезеңде қатысушылар Б.Соқпақбаевтың «Балалық шаққа саяхат» повестін, М.Әуезовтың «Қилы заман» атты тарихи повестін, Б.Майлиннің «Күлпәш» повестін, А.Сент-Экзюперидің «Кішкентай шахзада» атты ертегі-повестін, және О.Бальзактың «Жергілікті дәрігер» романын оқыған.&nbsp;– Осы байқауда маған оқуға ауыр болған Мұхтар Әуезовтың «Қилы заман» атты тарихи повесті.&nbsp;Аты айтып тұрғандай, ол тарихи повесть болғандықтан тілі ауырлау әрі түсініп оқу қиын болды. Ал ерекше әсер сыйлаған Шерхан Мұртазаның шоқтығы биік туындыларының бірі – «Ай мен Айша» романы. Шығармада Айшаның күнделікті күйбең тірлігі арқылы сол замандағы қасіретті, қиындықты, әділетсіздікті көресіз. Ол кезде тұрмыстық заттарға деген тапшылық көп болған ғой. Отты тұтататын күкірт болмағасын тұтанған оттың шоғын өшірмей келесі күнге дейін сақтаған. Бір күні алай-дүлей боран болған кезде үйінде шоқ өшіп қалып, анасы баласын көрші ауылдан шоқ әкелуге жұмсайды. Әлгі бала бір үйден кішкене бір шоқты сұрап алып, оны шелектің ішіне салып өшірмей үйіне әкеліп тұтатқан екен. Осы романдағы әр оқиға маған ерекше әсер сыйлады, – дейді ол.Бір жылға созылған байқау нәтижесінде 3 мың қатысушының арасынан 50 ұстаз «Үздік оқырман» деп танылған. Айта кетейік, мақаламызға арқау болған кейіпкеріміз осы байқауда 335 балл жинап ІІ орынға ие болды. Сондай-ақ ол 300 мың теңге қаржылай сыйақы иеленген. 12 қатысушы ІІІ орын иеленіп, 100 мың теңге, 6 қатысушы ІІ орын иеленіп, 300 мың теңге, 2 қатысушы І орынға лайық деп танылып, 400 мың теңге сыйақыны жеңіп алған. Мұнан бөлек 30 қатысушыға ынталандыру сыйлығы мен 60 мың теңге көлемінде қаржылай сыйақы табысталған.Жеңімпаздар қорытынды кезеңде кітап оқу мәдениетіне қатысты шеберлік сағаттар мен семинарларға қатысып, ұлттық кітапханамен танысты. Қазақтың &nbsp;ұлы ақыны Абай Құнанбаев өз білімін жетілдіріп, көп кітап оқуының арқасында бірнеше тілді еркін меңгерген. Кейіпкеріміздің айтуынша, кітап оқудың ерте-кеші жоқ. «Тек оны қолға алып, парақтап оқу қажет» дейді. Кітап жас ұрпақтың рухани байлығы мен ой-өрісін дамытудағы тәрбие құрал екенін естен шығармағанымыз жөн.

Жалағаштық үздік оқырман

<a href="https://kyzylorda-news.kz/">Kyzylorda-news.kz.</a> «Жарыс кезінде көптеген қызыққа кезігесің. Мәселен, ойынның уақыты көп болған кезде, біздің үстелімізге ойыншылар келіп қарап тұратын кездер болады. Сонда қатты қобалжып, жан-жағыма алаңдай бастаймын. Бірақ оны білдіртпеймін. Мұндай сәтте ұтысқа мотивация болып, жеңілмеуге тырысамын. Ең ұзақ ойын – 6 жарым сағатқа созылған» деп бастады әңгіменің басын, жас шахматшы Нұрдәулет Таңатов.Анасының айтуынша, баласы өте ерекше бала болып туылған. Ол 6 жасынан бастап шахмат ойынына қызыққан.<blockquote>– 2012 жылдың қыс мезгілі болатын. Ол кез әлі есімде. Бірде мектепте балалар, ағайлар шахмат ойнап отырды. Шахматқа қатты қызықтым ба, менде дәл осылай ойнағым келіп кетті. Үйге бардым да, әпкем Сандуғаштан шахмат жайлы мағлұматтар сұрап алдым. Ол маған шахматтың әдіс-тәсілдерін, бағытын үйретті. Сол мезеттен бастап, шахматпен дос бола бастадым. Оны дамыту үшін аудандық үйірмелерге барып, ағайларымнан дәрістер алып, ойнап жүретінмін, – деді кейіпкеріміз.</blockquote>Бүгінде ол Қызылордадағы С.Толыбеков атындағы №3 IT мектеп-лицейінің 11 сынып оқушысы. Шиелінің ғана емес, Сыр елінің мақтанышына айналып жүрген жас өрендердің бірі. Оның алғаш жетістіктерінің бірі – Жеңістің 70 жылдығына орай өткізілген аудандық біріншілікте I орынды жеңіп алған мадақтамасы еді. Талабының арқасында аудандық, облыстық, республикалық, халықаралық дәрежеде үздік атанып жүр.Қазіргі таңда спортшының қоржыны медальдарға толы. Оның айтуынша, шахмат мансабындағы ең үлкен жетістігі – Astana Open 2019 халықаралық шахмат фестиваліндегі қола медалі. Бұл жарыста Швейция, Бельгия, Беларусь, Моңғолия және басқа да елдердің 628 спортшысымен бақ сынасты. Ол үшін жаңа қабілетін ашуға көмектескен ойындардың бірі болған көрінеді.Бұдан бөлек, Павлодар қаласында өткен шахматтан халықаралық жарыстан жүлделі II орынды жеңіп алды. Турнирге 7 елден, барлығы 200-ге жуық ойыншы қатысты. Осындай кіл мықтылар қатысқан үлкен байқауларды топ жарып жүрген жастарды қалайша қолдамасқа?!Сұхбат барысында Нұрдәулетті басқа қырынан таныдық.<blockquote>– Мен бос уақытымда шахмат, дойбы, волейбол, футбол ойнағанды жақсы көремін. Сондай-ақ ата-анама, бауырларыма тамақ істеп бергенді ұнатамын, – деді ол.</blockquote>Иә, Нұрдәулет өзгеше бала. Кейде қонақтарға дастархан жасап, оларды қонақ ететін көрінеді. Мешітке барып, садақа беріп, үлкендерге көмек қолын созады. Сабақтан тыс уақытта кітапханаға барып, мақал-мәтел, нақыл сөздер жазылған кітаптарды алып оқиды. Әр түрлі елдердің астанасын, мәдениеті мен тыныс-тіршілігін жақсы біледі екен. Оның бір ерекшелігі, аспаздық өнерінде. Тағам дайындап, тәтті бәліштерді дайындауды ұнататын кейіпкеріміздің тағы бір арманы – аспаз болу. Мейрамхана ашып, адамдарға қуаныш сыйлағысы келетіндігін айтты.Нақты мақсаты – үздік білім алып, шахмат спортынан үлкен белестерге жету. Ол Қазақстандық шахматшы, гроссмейстер Ринат Жұмабаевты үлгі тұтады. Ал шетел мемлекеттерінен норвегиялық гроссмейстер, шахматтан әлем чемпионы Магнус Карлсеннің ойындарын, жаңалықтарын үзбей көреді.<blockquote>– Шахмат – бұл менің өмірім. Ол маған қиындықтарды жеңуіме, есепті тез шығаруыма, алға қарай қадам басуыма көп көмектеседі, – деді арманшыл жігіт.</blockquote>

Нұрдәулет Таңатов: Ең ұзақ ойын алты жарым сағатқа созылды

Жаңақорғанның  экологиялық ахуалы қандай?

Kyzylorda-news.kz. Әлеуметтік &nbsp;желілерде жер сілкінісіне қатысты түрлі хабарламалар таралып жатыр, деп хабарлайды EL.kz ақпарат агенттігі.Ол хабарламаларда басқа өңірлердегі Төтенше жағдай департаментінің өкілдері Алматыға шақырылып жатқаны айтылады. Яғни, осы түні жойқын жер сілкінісі болатынына байланысты қосымша көмек қажет етіледі дейді.Алматы облыстық Төтенше жағдай департаменті өкілдері бұл ақпаратты жоққа шығарды.<blockquote>Алматы облысы Төтенше жағдайлар департаменті азаматтардан әлеуметтік желілер мен мессенджерлердегі таралып жатқан жалған ақпаратқа сенбеулеріңізді сұрайды. Тек ТЖМ және ТЖД парақшаларында жарияланған ақпараттарға ғана сенулеріңізді сұраймыз. Дүрбелеңге салынбай, сабырлық сақтаңыз! - деді ведомство өкілі.</blockquote>Фото: freepik.com

«Жойқын жер сілкінісі болады». Өңірлерден Алматыға ТЖД қызметкерлері келіп жатқаны рас па?

Kyzylorda-news.kz. &nbsp;Бүгін облыс әкімі Нұрлыбек Нәлібаев Жалағаш ауданына жұмыс сапарымен барып, «Таң» ауылдық округінің әлеуметтік-экономикалық дамуымен танысты.Алдымен аймақ басшысы ауылға кіреберіс жолдың бойындағы жобаларды көрді. Елді мекенге «Батыс Еуропа – Батыс Қытай» автодәлізінен кіреберіске дейін ағаш отырғызылмақ. «Таң – Жаңақоныс», «Таң – Самұрат» автомобиль жолдары мен «Бозарық» каналының көпірін қайта жаңғырту жұмыстары пысықталды. Бұл туралы Қызылорда облысы әкімінің баспасөз қызметі хабарлады.Айта кетейік, «Таң LTD» ЖШС ауданның әлеуметтік-экономикалық дамуына үлес қосып, бірқатар маңызды бастамаларды іске асыруда. Ауыл тұрғындарына арналған екі пәтерлік 10 тұрғын үйдің құрылысы жүргізілетін болады. Сондай-ақ, кәсіпорын 3 өндірістік базаны іске қосып, жаңа жұмыс орындарын ашуды жоспарлауда. Қазір шаруа қожалығының иелігінде күріш ақтау зауыты мен ет өңдеу цехы бар. Күріш ақтау зауыты 5 жыл бұрын іске қосылған, тәулігіне 100 тонна өнім өңдеуге қауқарлы, мұнда 15 адам тұрақты жұмыспен қамтылған. Ал 2019 жылы ауылдық округке қарасты «Жаңақоныс» елді мекенінде «Агролидер Таң» ЖШС-ның ет өңдеу цехы ашылған. Кәсіпорын тәулігіне 0,5 тонна ет өндіріп, 15 түрлі (түшпара, манты, қазы, әсіп, бір асым ет және т.б.) өнім шығаруда. Мұнда 8 адам жұмыс істейді.Мұнан әрі облыс әкімі «Таң» ауылындағы күрделі жөндеуден өткен әлеуметтік нысандардың эскиздік жобаларымен танысты.Серіктестіктің демеушілігімен мұнда балалар ойын алаңы мен кіші футбол алаңы салынып, жарықшамдар орнатылды. Сондай-ақ, Ұлы Отан соғысында қаза тапқан боздақтардың құрметіне «Тағзым алаңы» салынып, қазір жаңа спорт кешенінің құрылысы жүргізілуде. Өткен жылы бір ғасыр бұрын салынған «Әбжәли» мешітінің ғимараты жөнделді.Сапар соңында облыс әкімі ауылдағы жарықтандыруды қажет ететін көшелерді аралады. Жұмыстарды тиянақты орындап, нысандарды мерзімінде пайдалануға беруді тапсырды.<img src="https://knadmin.beoblood.kz/uploads/429673745_704059811915266_1712563867501880980_n_112fd7fc9a.jpg" alt="429673745_704059811915266_1712563867501880980_n.jpg">Фото: Қызылорда облысы әкімінің баспасөз қызметі

Облыс әкімі «Таң» ауылындағы жобаларымен танысты

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz</a> Жалағаш аудандағы білімімен бақ сынап жүрген жастар биыл жылды жақсы жетістікпен бастады. Соның бірі &nbsp;– №123 мектеп-лицейдің 11 сынып оқушысы Асыл Жақсылық.<blockquote>– Жалпы білім беретін пәндер бойынша республикалық олимпиаданың жаратылыстану-математика бағыты бойынша жеңімпаз атанып, Қ.Жұбанов атындағы Ақтөбе өңірлік университетінің білім беру грантын иелендім. Марапаттау рәсімінде дәл осы сөзді естіп, жүрегім толқып кетті. Себебі 11 сынып оқушысы үшін ҰБТ-дан бұрын грант иегері атану ең үлкен жетістік деп ойлаймын. Бұл олимпиада биыл алғаш рет болып жатыр. Жалпы пәндік олимпиадаларда әсіресе физика-математикадан тереңдетіп оқитын қалалық жердің оқушылары І орын иеленіп кетуші еді. &nbsp;Ал бұнда тек ауыл мектептеріндегі оқушылар бақ сынайтын болғандықтан, біз үшін үлкен мүмкіндік, - дейді кейіпкеріміз.</blockquote>Асылдың бұдан басқа да жетістіктері көп. Мұғалімдері мектептегі әрбір оқушыға үлгі етіп айтатын оқушылардың бірі. Физика пәнінен аудандық, облыстық пәндік олимпиадалардан бірнеше рет І орын иеленіп, мектептің абыройын асқақтатқан. Одан бөлек мектепте белсенділік танытып, кез келген іс-шараларда бой көрсетеді.Отбасында анасы мұғалім болғандықтан ба, кейіпкеріміз &nbsp;кішкентайынан ұстаз болуды армандайды екен. Қазіргі дәрежеге жеткізген ұстазы екенін және болашақта өзі де осындай білімді оқушылар тәрбиелегісі келетінін айтады.&nbsp;<blockquote>– «Ел боламын десең, бесігіңді түзе» дегендей, еңсесін енді ғана көтеріп келе жатқан біздің еліміз үшін дарынды, білімді, жігерлі ұрпақтардың орны бөлек қой. Ал барлық жігер, қайрат, еліміздің болашағы тек жастардың қолында. Асыл да осы жастардың қатарында дер едім. Кез келген тақырыпта сабақ түсіндіргенде де өзінің қабілеттілігін көрсетіп, оқушылардан оқ бойы озық тұрады, – дейді жетекшісі Нұрбол Құдабаев.</blockquote>Расында ұрпағың білімді болса, болашағың жарқын. Ал болашақ бүгінгі жастардың қолында. Бүгінгі жас – ертеңгі елдің тірегі, келешектің келісті келбеті. Сондықтан бәсекеге төтеп беретін білімді, алғыр, бастамашыл жастардың көп болуы ертеңіміздің берекелі, озықтығын дәлелдейді.

Жалағаштық оқушы мектеп қабырғасында жүріп мемлекеттік грант жеңіп алды

<a href="https://kyzylorda-news.kz/">Kyzylorda-news.kz.</a> «Шебердің қолы алтын» деген қазақта керемет тәмсіл бар. Қазақ халқы қашанда мәдениетімен ерекшеленген. Өнерді биік қойған халықпыз. Әр өнердің өзіндік бір өзгеше сыры болады. Қолөнердің өнердегі алатын маңызы орасан. Ата жолын ардақтап, келер ұрпаққа өнеге беріп отырған қолөнершілердің еңбегін жоққа шығара алмаймыз. Ата-бабалардан сақталған мұраны жалғастырып келе жатқан қолөнер шеберлеріміздің бары шексіз қуантады. Солардың бірі – Қорлан Елтаева. Ибалы келін, адал жар, аяулы ана болып отырған кейіпкеріміздің өрнекті туындылары көздің жауын алады. 2003-2007 жылдар аралығында Қорқыт ата атындағы Қызылорда мемлекеттік университетінде еңбек технологиясы және кәсіпкерлік мамандығы бойынша білім алады.Жастайынан әшекей бұйымдарға, әдемі кестеленген ою-өрнектерге қатты қызыққан. Қолөнерге деген икемі анасы Орынкүлден дарыған.<blockquote>– Кішкентай кезімде анамның жасаған ою-өрнектеріне, тоқыған тоқымаларына сүйсініп қарайтынмын. Сол мезеттен бастап, ине-жіпті серік ете бастадым. Менің бұл жолды таңдауыма анам мен әкем ықпал етті. Ол кісілерге өз ризашылығымды білдіргім келеді. Себебі олар менің қолөнерге бейімділігімді байқап, менен зор үміт күтті. Сондай-ақ осы саланың сырлы екенін ұғындырып демеу көрсетті, – дейді.</blockquote>Осы тұста «Әке көрген оқ жонар, ана көрген тон пішер» деген мақал-мәтел есіме түсіп отыр. Анасынан алған үлгі-өнегені Қорлан Нұрмаханқызы өзіңнің қыздарына да көрсетіп, тәрбиелеп жүр. Ерте кезден-ақ қазақ халқының асыл аналары қыздарыңа қалай ине-жіпті ұстау керек, қалай ұршық иіріп, кілем тоқу керек екенін үйреткен. Мінекей, соның бір парасын кейіпкерімізден көріп отырғандаймыз.Еңбегінің нәтижесі оған тек жетістіктер әкелді. Көптеген көрмеге мен фестивальге қатысып, бірнеше мәрте Алғыс хаттар мен Құрмет грамоталарымен марапатталған.Адам белгілі бір істі бастағанда оны тек өзі үшін ғана емес, халық үшін де жасайды. Көрген адамдар оның бастаған ісің көріп, жоғары бағаласа нұр үстіне нұр болып, жұмысы алға басатыны анық. Одан сайын шабыттанып, алға қарай қадам басады.Бір қызығы, Қорланның жасаған қолөнер туындыларын көрген достары, таныстары еңбегін көріп қатты қызығып, тамашалайды екен. Тіпті оларға өз қолыңнан әшекей бұйымдар жасап береді. Олардың ыстық ықыласы оған шабыт сыйлайтын көрінеді. Сол себептен болар, ою-өрнектері, суретті гобелен кілемдері, әшекей бұйымдары сәтті болып шығатыны.Әсілінде, қыз баласы әсемдікке, әдемілікке жақын болады емес пе? Сондай әсемдікті біз Қ.Нұрмаханқызы шығармашылығынан көре алдық. Әңгіме түйінінде алдағы жоспарларын айтып, қолөнер қыз-балаларға керек өнер екенін түсіндірді.&nbsp;

Шиелі: Қорланның құнды өнері

Kyzylorda-news.kz. Қызылорда қаласындағы Арай-3 тұрғын ауданы мен қаланың сол жағалау тұрғындарырың шағымдарына сәйкес ауыз судың сапасын жақсарту мақсатында су жүйелеріне тазарту, жуу, шаю және зазалсыздандыру жұмыстары жүргізіледі.<blockquote>«2024 жылдың 4, 5, 6, 7 наурыз күндері «Арай» су алу құрылымының таза су жинау резервуарларына, д-450мм &nbsp;жалпы ұзындығы 2288 қаршы метр болатын су өткізу құбырына және д-160мм кварталралық ауыз су жүйелеріне тазарту, жуу, шаю және зазалсыздандыру жұмыстары жүргізіледі. Осыған байланысты, 2024 жылдың 4, 5, 6, 7 наурыз күндері таңғы сағат 9.00-ден кешкі сағат 18.00-ге дейін Арай мөлтек ауданына, Халыққа қызмет көрсету аумағына (Ақжайық, Сейхун, Отырар, Мамыр, Баянауыл көшелері), Арай-Шұғыла мөлтек ауданына және Демесінов көшесіне ауыз су беру уақытша тоқтатылу мүмкіндігі болатынын хабарлаймыз», - делінген қала әкімдігінің таратқан хабарламасында.</blockquote>Фото: Нұрболат Нұржаубай

Қызылордада ауыз су беру уақытша тоқтатылады

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz</a> Жуырда бір құрбыма қонаққа бардым. Дәмді асқа толған дастарқанынан бұрын, көздің жауын алар әдемі мамық көрпешесі көзіме оттай басылды. Әрине нәзікжанды болған соң бұндай әдемілікті көзіміз шалып қалса, дереу қайдан алғанын сұрап, тапсырыс беруге асығамыз. Әңгіме барысында әлгі құрбымнан ісмер келіншектің мекен-жайын алып, жұмысына қарай бет алдым. Бір қызығы, облыс орталығында тұратын құрбымның тұрмыстық бұйымдары Жалағаш ауданында өндіріліпті.&nbsp;Соңғы жылдары Жалағаш ауданында кәсіпкерлік саласының артып, шағын және орта бизнес саласының дамуына өзіндік үлес қосып жүрген нәзікжандылар туралы бірнеше мәрте мақала жазған болатынбыз. Ауданда кәсіпкерлік саласының көптеген түрі жоғары деңгейде дамыған екен. Соның бірі – тігін кәсібі.Мен іздеп келе жатқан тігінші келіншек ауданға қарасты Қаракеткен ауылының тұрғыны екен. Бос уақытын тиімді пайдаланып, сүйікті ісін кәсібіне айналдырған Мейрамкүл Исаева анасынан дарыған өнер бойынша тігін тігумен айналысады. Бала күнінен анасының жанында жүріп, тігіншілікке қызыққан ол жастайынан бұл мамандықтың қыр-сырын жақсы меңгерген. Тігіншілікпен айналысқанына 10 жылдан асқан кейіпкеріміз бұл кәсібін тек хоббиі ретінде көреді. Бойындағы тігін өнеріне деген бейімділігінің арқасында талабын ұштай түскен ол кәсібіне тұрақты тапсырыс берушілер де қалыптастырып үлгерген.&nbsp;Кейіпкеріміз мамандығы есепші болса да, бала күнінен басталған қызығушылығы мен дарынын тың идея, мол тәжірибемен ұштастырып, бүгінде жұмысының жемісін көруде. Оның қолынан шыққан қыз жасаулары мен тіккен көрпе-төсегі тұтынушылар тарапынан зор сұранысқа ие.&nbsp;<blockquote>– Бала күнімнен анамның жанында жүріп үйренген өнерім бүгінде кәсібіме айналды. Соның арқасында нәсібімді тауып, халықтың алғысын алудамын. Алғашқыда маталардан қалған қиындыларды құрап, жеңіл көрпешелер жасауды меңгердім. Уақыт өте өзіме және балаларыма қажетті киімдер тіге бастадым. Кейін ауыл тұрғындарының «Мейрамкүл, мына көйлекті қысқартып берші» немесе «мына көрпешең әдемі екен, маған да тігіп берші» деген өтініштері бойынша жәймендеп тапсырыс ала бастадым. Қазір көбіне қыз жасауын тігемін. Себебі қазір аналар қауымы тұрмысқа шыққан қызының артынан әдемі қиындылардан құралған құрақ көрпе, көрпешесін апарады. Одан бөлек бесік жасауын да жасаймын. Жапқыш, жастыққа нәрестенің атын жазып, қалаған суретін салып беремін. Тұтынушыларым тек осы ауылда ғана емес, көршілес ауыл, ауданда да бар. Олар көрпе-төсектен бөлек киім тіктіруге немесе қысқартуға тапсырыс береді. Арасында қазақы киімдерге де тапсырыс қабылдаймын. «Instagram» &nbsp;әлеуметтік желісінде арнайы парақшам бар. Сол парақша арқылы басқа қаладан тапсырыс бергендер де болды. Бүгінге дейін бірнеше қаладан қыз жасауына тапсырыс түсіп, иелеріне жіберген болатынмын. Көздің жауын алар ерекше туындылардың артында әрине үлкен еңбек пен асқан шеберлік жатыр. Десе де күндіз-түні ыждағаттылықпен көз майымды тауысып тіккен еңбегім тұтынушының алғысын алғанда текке кетпегенін түсінемін, – дейді ол.</blockquote>Талғампаз тұтынушылар көңілінен шығу үшін ұзақ уақыт пен асқан шыдамдылықты талап ететін тапсырысты кейіпкеріміз шамамен 1 жарым, 2 аптада, тұтынушының талғамына сай етіп дайындауға тырысады. Заманның талабы мен ағысына қарай еңбек ететін кейіпкеріміз үнемі ізденіс үстінде жүретінін де тілге тиек етті. Он саусағынан өнер тамған Мейрамкүл – бүгінде шебер тігінші болумен қатар берекелі шаңырақтың отанасы, 4 қыз 3 ұлдың аяулы анасы, 2 немеренің асыл әжесі.&nbsp;Кәсіпкер келіншектің айтуынша, қыздары да аналарынан дарыған тігін өнерінен кенде емес. Ол тапсырыс көп болған кезде қыздарымен бірлесіп жұмыс жасайтынын да жасырмады. Ортаншы қызы Аяжан қазіргі таңда Астана қаласында «Басқару» колледжінде дизайнер мамандығының 4 курс студенті. Анасының жолын жалғаған бойжеткен алдағы уақытта бұл салада үлкен жетістіктерге жетіп, анасына қолғабыс етуді көздеп отыр.&nbsp;<blockquote>– Мен Мейрамкүл апайдың қолынан шыққан қолөнерлерін ең алғаш «WhatsApp» әлеуметтік желісіндегі жарнама чатынан көріп, хабарластым. Жақында ғана босанған қызымның баласына бесік апаратын болғандықтан, ол кісіге бесікке жасау жасаттым. Арнайы жапқыш, бөстек, жиен немеремнің аты-жөні жазылған көрпе, жастық пен ойнағанда жұмсақ болсын деген ниетпен әдемі мата қиындыларынан құралған допқа да тапсырыс бердім. Мейрамкүл апай тапсырысты межелеген күннен бұрын мен ойлағаннан да ерекше етіп әзірлеп берді. Оның маталарды үйлестіріп тіккен тігісіне қарап, жұмысын зор ынта-жігерімен, асқан шеберлікпен тіккенін аңғаруға болады, – дейді Ақсу ауылының тұрғыны Ақбота Смайлова.&nbsp;</blockquote>Ол шебердің жұмысына тәнті болған, тұтынушы бұл тапсырыстан кейін кейіпкеріміз Мейрамкүлге бірнеше рет тапсырыс беріп, үйінде той-томалақ болатын жақындарына оның жұмысын бөліскен.Үйінің бір бөлмесін шағын цех қылып ашып қойған Мейрамкүл болашақта кәсібіне қаржылай қолдау табылса, өзі сияқты қолы икемді, тігінмен айналысқанды жаны сүйетін ауылдың қыз-келіншектерін тұрақты жұмыспен қамтып, кәсібінің көкжиегін кеңейтуді көздеп отыр.&nbsp;Әңгіме барысында шебердің жұмысымен толыққанды танысқан мен де өзіме арнайылап көрпеше мен той-томалаққа қажет болатын көздің жауын алар әдемі моншақпен безендірілген кәрзеңкеге тапсырыс бердім.&nbsp;

Жалағаштық кәсіпкер үй жанындағы шағын цех шаруасын ширатып отыр

<a href="https://kyzylorda-news.kz/">Kyzylorda-news.kz.</a> Отбасылық демалыстың бір түрі – киноға бару. Себебі ол ересектерге де, балаларға&nbsp; да қызықты. Мәселен, балаңызды мультфильм көруге апардыңыз делік. Оны тек апарып ғана қоймайсыз, кинодан шыққан соң баланың ойын сұрап, талқылайсыз. Жарайды, киноға баруды түсіндік. Ал Шиеліде кинотеатр құрылысы бой көтергені рас па? Осы сауалға жауап тапқыңыз келсе, мақаланы мұқият оқып шығыңыз.Ауданда ашылғалы жатқан «Aizhuldyz cinema» кинотеатры 2023 жылдың тамыз айында құрылысын бастап кетті. Құрылыс нысанын жалға алған кәсіпкер Бағлан Сейтмұратов жастардың кино көруіне демалыс орын ашып беруді басты мақсат еткен.Кәсіпкердің айтуынша, кәсіпті өз қаражатымен бастаған. Мемлекеттік грант пен несиелерге өтініш берсе де, оның өтініші кері қайтарылып, қаржылай ақша алмағандықтан өзі тәуекел етіп бастап кетті. Құрылыс жаңа жыл алдында тоқтап, жылдың басы қайта қолға алуды жөн санады. Расында&nbsp; аудан жастарының көбісі дерлік Қызылордаға барып кино көреді. Неге өзіміздің ауданда ашылмасқа деген ой келеді? Бұл пайымыма ауданның жас ақыны Елдар Әмірхан былай жауап берді:<blockquote>–&nbsp;Ауданға ауадай кинотеатр қажет. Киноға тек жастар ғана емес, егде жастағы ересек кісілер, отбасылар барғанын&nbsp; көреміз. Сол себепті облыс орталығына сабылмай, өз өңірімізде кинотеатрдың ашылғаны дұрыс. Біріншіден, &nbsp;халықтың қалтасынан шығатын&nbsp; қаржыны жеңілдетеді. Екіншіден, ауданның дамуына үлес қосар еді. Заман талабына сай болса аудан жұртшылығы қалаға барып әуреленбейтін еді, – деді.</blockquote>Айта кетейік, кинотеатр 128 адамға арналған. 10-15 адамды жұмысқа қабылдайды.&nbsp;Фото:freepik.com

Қазақстан және Қызылорда облысының жаңалықтары