<a href="https://kyzylorda-news.kz/ru">Kyzylorda-news.kz.</a> Александр Бубликтің Уимблдонның төртінші айналымындағы қарсыласы белгілі болды.Қазақстандық теннисші әлемнің 7-ракеткасы, ресейлік Андрей Рублевпен ширек финалға шығу үшін таласады.Қос спортшы бір-бірін жасөспірім кезінен жақсы біледі. Осыған дейін олар бес рет кездесіп, соның үшеуінде А.Рублев, екеуінде А.Бублик жеңген.Қазақстандық спортшы жуырда Галле (Германия) ATP 500 турнирінің финалында ресейлікті 6:3, 3:6, 6:3 есебімен ұтқан еді.А.Рублев Уимблдон жарысының үшінші айналымында рейтингте 123-орында тұрған бельгиялық Давид Гоффенді үш сағаттан астам уақытқа созылған матчта 6:3, 6:7 (6:8), 7:6 (7:5), 6:1 есебімен жолдан тайдырды.А.Бублик пен А.Рублев 9 шілде күні ширек финал жолдамасын сарапқа салады.Александр Бублик төртінші айналымға шыққаны үшін 207 мың фунт стерлинг (118 млн-дай теңге) табыс тапты.Сенбі күні Қазақстанның әйелдер арасындағы бірінші, әлемнің 3-ракеткасы Елена Рыбакина үшінші айналымда рейтингте 89-сатыдағы ұлыбританиялық Кэти Бултермен ойнайды. Мұнда жергілікті жанкүйерлер арасында корт иесінің барын салары сөзсіз.

Уимблдон: Александр Бубликтің келесі қарсыласы белгілі болды

<a href="https://kyzylorda-news.kz/">Kyzylorda-news.kz.</a>&nbsp; Ақтөбе облысында президенттік сынамадан Қазақстан Республикасының чемпионаты өтті.&nbsp;Жарыс нәтижесі бойынша жерлесіміз ардагерлер арасында Сырдария ауданы, Қалжан Ахун тұрғыны Мұрат Бөдеев бірінші орынды жеңіп алды. Сыр елінің атын қорғап сайысқа қатысқан жерлесіміз Президенттік көпсайыстан облыс құрама командасының мүшесі екенін айта кеткеніміз орынды. Сондай-ақ Мұрат Бөдеев бала тәрбиелеу ісіне ден қойған ұстаз. Нақтырақ айтсақ, ол №126 орта мектепте алғашқы әскери дайындық пәніен сабақ береді. Өзі де өмірінде салауатты өмір салтын ұстануды құп көретін жерлесіміз әрдайым спортпен шұғылданып, денсаулығына бей-жай қарамайды. Оқушыларын да спортпен шұғылдануға үйретіп, алғашқы әскери дайындық барысын үйретіп жүрген жайы бар.Айта кетейік, Президенттік сынама – 1996 жылдан бастап Қазақстан Үкіметінің №774 қаулысымен Қазақстан халқының денсаулығын сақтау мен қорғау үшін күнделікті емірге енгізген дене тәрбиесінің нормативтері. Президенттік сынама бірнеше жас топтарына бөлінген. Одан жарыстар сол жас топтары бойынша жыл сайын өтіп тұрады.Ақтөбе қаласынан жүлдемен оралып, мерейі үстем болған жерлесімізді марапатымен шын жүректен құттықтаймыз. &nbsp;

Сырдариялық спортшы жүлдемен оралды

<a href="https://kyzylorda-news.kz/">Kyzylorda-news.kz.</a>&nbsp; Бүгін Сырдария ауданына қарасты орталық стадионда аудандық мәдениет және спорт бөлімі мен спорт клубтың ұйымдастыруымен Астана күні мерекесіне орай стритболдан аудан тұрғындары арасында біріншілік өткізілген болатын. Негізінен, аталған жарыста 6 команда, 40-ға жуық спортшы қатысты.&nbsp;Аудандық біріншілік барысында стритбол спортының үздіктері анықталды. Елорда күні мерекесі аясында жастар жаңадан салынған стритбол алаңында қызықты ойын өрнегін көрсетті. Өз кезегінде 6 команда бір-бірімен кездесіп, өзара ұпай бөлісті. Ойынның &nbsp;әділ өтуін жарыстың бас төрешесі Мұхтар Әбжаппаров бақылады. Жарыс қорытындысында жүлделі І орынды «Golden state» командасы, ІІ орынды «Волейболшылар» командасы, ІІІ орынды Шаған ауылынан келген &nbsp;команда ойыншылары жеңіп алды.&nbsp;<blockquote>– Стритболдан жарысқа түскен командалар жақсы дайындықпен келгені байқалды. Барлық ойын барысы бас төрешінің нұсқауымен жүзеге асты. &nbsp;Шын мәнінде, еліміз бойынша тойланып жатқан Астана күні мерекесі көпшілікке ерекше көңіл сыйлады. Аудандық спорт клубы тарапынан бірнеше жарыс ұйымдастырылып, тұрғындардың бұқаралық спортпен айналысуына жағдай жасалады. Өз кезегінде бүгінгі жарыста жеңімпаз атанған жүлдегерлерді құттықтаймыз, – аудандық спорт клубтың директоры Диас Әлжанов.&nbsp;</blockquote>Бұл ретте, спортшы жастарға арнайы диплом мен бағалы сыйлық тапсырылды.&nbsp; &nbsp;&nbsp;&nbsp;&nbsp;

Сырдариялық спортшылар стритболдан жарысқа түсті

<a href="https://kyzylorda-news.kz/">Kyzylorda-news.kz.</a> Футбол миллиондаған жанкүйердің сүйікті ойыны. Сондықтан жер жүзінде теңбіл доп өнері жақсы дамыған. Қазақ футболының деңгейі де өсіп келеді. Соның дәлелі ұлттық құраманың соңғы жетістіктері. Сондай-ақ клубтар арасындағы тартыстарда футболшыларымыз шебер ойын көрсетіп жүр. Әсіресе жастардың ынтасы қуантады. Мәселен жерлесіміз Әділет Сәдібековтың есімін мақтанышпен айта аламыз.&nbsp;Әділетті Қазалының қалың жұрты жақсы тани қоймасы анық. Ол білім ордасына барғанша туған топырақта атасы Сәдібек пен әжесі Ханшайымның қолында болады. Кейін ата-анасының жұмыс бабымен Ақтөбе облысына қоныс тепкен. Артынша Алматы қаласына көшуге тура келеді. Міне, жарқын болашаққа деген айқын жол осы сәттен бастау алады.2002 жылдың 26 мамырында дүниеге келген Қазалының қара домалақ баласы қазір алматылық «Қайрат» футбол командасының қорғаушысы. Әкесі Нұркен Өтегенов Алматы қаласындағы «Метропроект» мекемесінің бас инженері болып қызмет етеді. Ал анасы Роза Құралбаева ҚазақҰлттық Аграрлық университетінің аға оқытушысы. Одан бөлек 9 сыныпта оқитын Рахат математика пәнінен талай олимпиадаларда топ жарып жүрген көрінеді. Әрі суға жүзумен және үлкен тенниспен де айналысады екен. Ал кіші інісі Данияр 4 сыныпта білім алуда.Сәдібек ақсақалмен тілдескенімізде, Әділеттің тұңғыш немересі екенін айтып, бала күнінен допқа деген қызығушылығының бар екенін сөз етті.<blockquote>«Немеремнің алды болған соң есімін өзім қойдым. Ол бала күннен допқа әуес болды. Таңнан аулада доп қуалап, кештің қалай батқанын білмейтін. Жасынан допқа деген құмарлығы оны осы күнге жетеледі. Қазір «Қайрат» командасының әр ойынын жібермей қараймын. Әділетімді көрген сайын бала күндегі шаң-шаң болып далада доп қуып жүрген сәттері жиі есіме түседі. Тағы бір қуанышты жаңалықпен бөлісейін. Немерем жақында ғана, тіпті 20 күн болған жоқ, «Қазақстан» ұлттық құрамасының сапында доп тебуге мүмкіндік алды. Шақырту келіп, 2 жыл келісімшарт жасасты. Сәтін салса, жуырда болатын Беларусь құрамасына қарсы ойында жасыл алаңнан көреміз деген үмітіміз бар», – деді қария.</blockquote>Әңгіме арасында ақсақалдың өзіменде жақын танысып үлгердік. Айтуынша, ертеректе Қазалы қаласындағы ауруханада дәрігер болып жұмыс жасаған. 38 жыл бойы бір орыннан тапжылай науқастардың дертімен күрескен. Ал өмірлік серігі Ханшайым Ғ.Мұратбаев атындағы №17 мектептің орыс тілі пәнінің мұғалімі болуға 40 жылға жуық уақытын арнаған.Әділеттің бала күннен футболға ашылған қызығушылығы кейін мектеп қабырғасында да жалғасты. Алматы қаласына көшіп барған соң, 8 жасынан бастап «Құлагер» шағын ауданында орналасқан «ФШМ» командасына футбол секциясына алынды. Бірінші бапкері Ағаділдә Хасенов ынта-жігері байқалып тұрған баланы қыран құстай баптап, топқа салады. Тәуір ойынымен көзге түскен кейіпкеріміз бірнеше жыл бойы қала біріншілігінде команда капитаны болып, «Қайрат» командасы селекционерлерінің көзіне түседі. Сөйтіп, 13 жасында «Қайрат» командасының шақыртуымен Тимур Сегізбаев атындағы футбол академиясына қабылданады.Академия жас өреннің екінші тынысын ашты десек артық айтқандық емес. Себебі мұнда жүріп, Еуропаның біраз қалаларында доп тепті, халықаралық турнирлерге барды. Ала допты ұршықша иіріп, дарынымен көзге түскен ол біршама жетістіктерге қол жеткізді. Тоқталсақ, Е.Пехлеваниди атындағы Халықаралық турнирінде І орын, «ValenciaCup» халықаралық турнирінде ІІ орын, «Еуразия кубогі» бірінші клубтық турнирінде ІІ орын, «KhimkiCup» халықаралық турнирінде ІІІ орын, әр жылдары жастар арасындағы Қазақстан біріншілігінде І-ІІ орын, Виктор Катков атындағы республикалық турнирінде І орын иеленді. Ал бұл оның футбол әлеміндегі ауыз толтырып айтарлықтай жетістіктері.Әділет осы аралықта жүріп экономикалық институтта білім алып та үлгерді.2020 жылы 1 лигада «Қайрат-Жастар» командасының футболшысы ретінде доп тепті. Сол жылы жастар арасындағы Чемпиондар лигасында өнер көрсетті. Сонымен қатар өткен жылы «Қайрат-Мәскеу» командасының футболшысы ретінде Ресейдің 2 лигасында өнер көрсетті. Бұл бұрыштамадан қақпа маңына желдей жеткен ала допқа бірінші жетіп, қақпашыдан айласын асырып жүрген кезі. Көрші елдің жасыл алаңында ол 11 кездесуге қатысты. Бірақ көрші елдегі мансап ұзаққа созылмады. Себебі, Ресейдің сыртқы шиеленісі мен команданың қаржылық дағдарысы ұжымның тарауына алып келді. Осы тұста команданың бас бапкері Кирилл Кекер Қазақстанға келіп, «Қайрат» командасының тізгінін қолына алды. Бас бапкер мәскеулік командадан жай келмей, әдемі ойын өрнегін көрсеткен бірнеше шәкіртін бірге ерте келді. Соның бірі – Әділет.Жас таланттың еңбекқорлығы, алаңды көре алуы, қорғаныстағы қабілеті команда басшыларын тәнті етсе керек, «Қайрат» Әділетпен бірден екіжылдық келісім-шартқа отырды. Елге оралған кейіпкеріміз команданың қосалықы құрамына емес, негізгі құрамына ілікті. Бүгінде ел чемпионаты мен Еуропа лигасында ойынға негізгі құрамда шығып жүр.<blockquote>«Менің Әділетті танығаныма біраз болды. Ол сабырлы, тұйық, бірақ спортқа бейім жігіт. Сенім білдіріп, негізгі құрамға алуыма оның ойындағы шеберлігі мен мінезі әсер етті. Бойы да ұзын. Қорғаныста тіптен керемет ойнайды. Ол «Қайраттың» негізгі құрамына ауыспай тұрып, қорғаушы болып келді. Оның ойын мәнерін жақсы білемін. Қазір оны жартылай қорғаушы ретінде де ойынға қосып жүрмін. Аяқалысы жаман емес. Биылғы маусымда баспен 2 гол соқты», – деді «Қайрат» футбол клубының жаттықтырушысы К.Кекер.</blockquote>Жанкүйерлер жүрегінен орын алған жас ойыншыны бүгінде футболсүйер қауым жақсы біледі. Әкесі Нұркен Өтегенов осы күнді көп күткен.<blockquote>«Арманым футболшы болу еді. Алайда, тағдыр мені басқа арнаға бұрды. Бірақ балам мен жетпегенге жетсе деп армандайтынмын. 2000 жылдары Ақтөбеде жұмыс істедім. Келіншегімнің жүкті кезі. Екеуміз «Ақтөбе» стадионына келіп, ойын көреміз. Сонда стадионда отырып, балам футболшы болады дейтінмін. Кейін келіншегім босанды. Әділет ес білгеннен бастап футболмен айналысуына жағдай жасадым. Содан өмірі осы саламен байланысып кетті. Қазір жетістіктеріне қарап марқайып отырамын», – дейді әкесі.</blockquote>Жастайынан аулада доп тепкен әрбір баланың арманы – елдің намысын арқалап ұлттық құрама сапында өнер көрсету, көптің қошеметіне бөлену. Әлемнің алпауыт командаларымен текетіресіп, стадиондағы аураны сезіну. Ал мұндай шыңға тек аянбай еңбек еткен жандар ғана жетеді. Иә, Әділет сонау есік алдында таңнан кешке дейін доп қуып жүргенде осы күнді армандағаны анық. Алдына айқын мақсат қойды. Көздегеніне жетті. Бірақ, алар асу әлі алда. Ал біз ауданнан шыққан аяқдопшының дүбірлі додаларда топ жаруына тілектеспіз.

«Қайрат» сапындағы қазалылық

<a href="https://kyzylorda-news.kz/">Kyzylorda-news.kz.</a> Қазалы қаласындағы №18 Қазалы ауданының балалар-жасөспірімдер спорт мектебіндегі балалар биылғы жылдың ақпан айынан бастап спорттың жаңа түрімен айналыса бастады. Грэпплинг деп аталатын спорт түріне жеткіншектердің қызығушылығы жоғары. Бүгінде аталған спортқа шәкірттерді екі жаттықтырушы баулиды.<blockquote>«Бұл Қазақстанға соңғы 15 жылдықта енген спорт. Қызылорда облысында 10 жылға жуық уақыттан бері бар. Ал біздің ауданда биыл ғана ашылды. Соған қарамастан біршама жетістіктеріміз бар. Тараз қаласында жасөспірімдер арасында өткен ҚР чемпионатында Үміт Ысқақ екінші орын иеленді. Осы сайыста Арайлым Бикпаева үшінші орын алды. Грэпплинг-гиден жасөспірімдер арасында ҚР чемпионатында Үміт Ысқақ пен Ринат Оразбек үшінші орынға лайықты болды. Бұйырса желтоқсан айында Үміт Әлем чемпионатында бақ сынайды», – дейді грэпплинг бөлімшесінің жаттықтырушысы Жансая Мұрат.</blockquote>Өрендерді шымырлық пен шыдамдылыққа шыңдап жүрген Жансая Ерланқызы өзі де 5 сыныптан бастап спорт әлеміне енген. Ол дзюдо, самбо, қазақ күресі және грэпплингтен спорт шебері. ҚР чемпионатының жеңімпазы. Азияның және Әлем кубогынан қола жүлдегері. ТМД елдерінің жеңімпазы. Оның мақсаты – күрестің осы түрін ауданда кеңінен дамытып, жеңімпаздар даярлау. Біз барғанда спорт залда бірнеше ұл-қыз жаттығу жасап жатты. Олардың барлығының бойынан спортқа деген құлшынысты анық көруге болады. Бір-бірімен тетелес оқушылар түрлі әдіс-тәсілдерді пайдаланып, озық шығуға тырысуда.<blockquote>«Маған грэпплинг қатты ұнайды. Бұнда қазақша күрестің де, дзюдоның да тәсілдері кездеседі. Бастысы – шапшаңдық қажет. Бұндай спорт түрінің біздің қалада ашылғаны мен үшін үлкен қуаныш. Біраз жарысқа барып та үлгердік. Болашақта керемет нәтижелер көрсетемін деген сенімдемін», – дейді Оңтүстік Батыры республикалық турнирінің бірінші орын жеңімпазы Ринат Оразбек.</blockquote><blockquote>«Аптасына төрт рет өтетін сабаққа қазіргі таңда 28 бала қатысуда. Балалар жаңа спорт түріне тез бейімделіп кетті. Жаттықтырушылар Жұлдызбек Қалмаш және Жансая Мұрат грэпплингтің қыр-сырын үйретуде. Спортты жанына серік еткен бала жаман болмайды. Біріншіден ол өз-өзін қорғай біледі, денсаулығына пайдалы және елінің, жерінің атын шығарып, атағын аспандатады. Қазір ата-аналардың да түсінігі өзгерді. Көпшілігі ұл-қызын спортқа баулуда. Елдің ертеңі осы балғындар», – дейді №18 Қазалы ауданының балалар-жасөспірімдер спорт мектебінің директоры Нұрболат Әбиев.</blockquote>Жалпы бұл мектепте грек-рим, дзюдо, футбол, бокс, волейбол, ауыр атлетика, грэпплинг, тоғызқұмалақ, қазақ күресі бөлімшелері бар. Жалпы 58 топта 758 оқушы оқуда. Оларға 23 жаттықтырушы дәріс береді. Мектепте бокс, ауыр атлетика, қазақ күресі бөлімшелеріне арналған спорт залы, жасанды кіші және үлкен жасанды футбол алаңы, 400 метрлік жүгіру жолы мен трибуналы стадионы бар.Ауладағы жасыл алаң балалардан бос қалған емес. Бүгінде футбол бөлімшесінің қатысушылары ойынның көркін қыздыруда екен. Екі топқа бөлініп алып, допты ұршықша иіріп жатқан жасөспірімдердің футболға деген ынтасы жоғары.2005 жылдан бері жұмыс істеп келе жатқан футбол бөлімшесінің жетістігі жетерлік. Мектеп құрамасы түрлі сайыстардың жеңімпазы. Жаттықтырушылар Біржан Медетбаев, Жарбол Өтеген, Сәкен Қарымсақ дайындаған аяқ допшылардың аяқалысы жаман емес. Облыс біріншілігінде үшінші орын иеленген Наурыз Сырғаш, Әмір Өтеубай, Әділет Ысқақ, Айдос Жақсылықов, Бақдәулет Қаржаубай, Рабат Нұршат, Әлім Өтеубай, Ержан Ерлепесов Біржан жаттықтырушы баптаған жүйріктер. Ал Жарболдың жеткіншектері Елдос Жанқат Тараз қаласында футболдан өткен ҚР чемпионатының үшінші орын иегері атанса, Дидар Алуадин, Аян Орманов, Данияр Еркін, Дидар Асылбек, Рамазан Сайфулла, Ерсұлтан Мұрат, Дәулет Ерғазы, Ерсұлтан Жетпісбайұлы, Нұрмұқасан Жанқуат, Мирас Берікжан Қызылорда облысы біріншілігінде үшінші орынды жеңіп алды. Сәкен Қарымсақ жаттықтырған Айдын Әнуарбекұлы, Ернұр Зикуллаев және Алихан Сыдық облыс біріншілігінде үшінші орынды қанжығалады.<blockquote>«Спорт – денсаулық кепілі. Таңертең 9-да келгеннен балалар алаңда жүгіреді, жаттығу жасайды, ойнайды және өздеріне дос табады. Олар жаман әдеттен аулақ болады. Түрлі жарыстарға қатысып, жер көреді. Кеше ғана аудан ортылығы Әйтеке би кентінде жарысқа қатысып, үшінші орын алып келдік. Шәкірттердің жеңіске деген құлшынысы ерекше. Барлығы да болашағы зор балалар», – дейді жаттықтырушы Біржан Медетов.</blockquote>

Биік белестерді бағындырған

<a href="https://kyzylorda-news.kz/">Kyzylorda-news.kz.</a> Бүкіләлемдік бокс ассоциациясы (WBA) барлық салмақтағы былғары қолғап шеберлерінің жаңартылған рейтинг нұсқасын жариялады, деп хабарлайды ҚазАқпарат.Аса ауыр салмақтағы боксшы Иван Дычко 15-орыннан 10-орынға жоғарылады.Айта кетсек, өткен айда Иван Дычко аргентиналық Ариэль Бракамонтемен жекпе-жегінде қарсыласын екінші раундта нокаутқа түсірді. Нәтижесінде WBA Fedecaribe аймақтық белбеуіне ие болды.Аталған салмақта Жан Кособуцкий екі сатыға төмендеп, 14-орынға жайғасты.Бірінші ауыр салмақ дивизионында Серик Мусәділов 15-орнын сақтап қалса, екінші орта салмақта Бек Нұрмағанбет сегізінші орыннан тоғызыншыға төмендеді.Екінші жартылай жеңіл салмақта Сұлтан Зәуірбек оныншы орында тұрақтаса, Евгений Павлов бір сатыға жоғарылап, бесінші орынға табан тіреді.

Қазақстандық боксшылар WBA рейтингінде қай орындарға жайғасты

<a href="https://kyzylorda-news.kz/ru">Kyzylorda-news.kz.</a> Қамшыбек Қоңқабаев – Әлем чемпионатының күміс жүлдегері, ҚР бокстан ұлттық құрама капитаны. Осы орайда Танымал спортшымен &nbsp;сұхбаттасудың сәті түсті.– Бүгінгі боксшы Қамшыбекке қарасақ, бала күнінде де бірінші атаман болған тәрізді. Алғашында футболға қызыққан атаман не үшін боксты таңдады?– Өмірде ұл баланың идеялы әкесі, ал қыз баланың үлгі етер тұлғасы анасы ғой. Менде кішкентай кезімде мемлекеттік қызметте жұмыс істейтін әкем тәрізді форма киіп, еңсесін биік ұстайтын үлкен азамат болғым келді. Одан бөлек футболшы немесе атақты спортшы болсам деген биік мақсатым бар еді. Шынымды айтсам бала күнімде боксқа қарағанда, футболды жақсы көрдім. Ал боксқа келуіме туған ағам Асқар Қоңқабаевтың ықпалы болды. Ол да былғары қолғап шебері еді. Асқар әскерге аттанып бара жатып маған: «Бір доптың артынан жүгіре бермей, боксқа бар» деп ақыл қосқаны әлі есімде (күліп). Содан бері спортты серік етіп келемін әрі бұл таңдауыма өкінген емеспін.– Бәсекеде топ жару үшін бірнеше белестерден өткеніңіз белгілі. Ең алғашқы шаршы алаңдағы кездесу, қарсылас есіңізде ме?– Алғаш рет шаршы алаңға Қазалыда өткен турнирде шыққаным есімде. Енді тәжірибе жинап жүрген маған сол жердегі барлық оқиға қызық көрінді.– Екі жыл қатарынан «Астана арландары» сапында да жұдырықтасқан екенсіз…– Иә бұл жерде де біршама өнер көрсеттім. Олимпиада болатын жылы сол кездегі бас бапкеріміз Мырзағали &nbsp;Айтжанов ұлттық құрамада жүргенімде «Астана арланға» барып, екі кезең тәжірибе жина» деп кеңес берді. «Астана арлан» мен үшін үлкен мектеп болды десем қателеспеймін. Осыдан кейін тез арада ширай түстім. Әрі өзімді техникалық және физикалық тұрғыда жетілдірдім деп толық айта аламын.– Шарша алаңға қанша рет шықтыңыз?– Нақты есептеген емеспін, бірақ үш жүз қырықтай жекпе-жек өткізген шығармын. Осы &nbsp;әуесқой бокстың отыз-қырқында жеңілген болуым керек.– «Қазақта батыр аңғал» деген сөз бар ғой. Өзіңіздің осал тұсым деп қай қасиетіңізді айтар едіңіз? Әдетте өз тарапына айтылған сынды көпшілік ауыр қабылдайды. Ал сіз сәтсіздікке сынып кетпейтіндер қатарынансыз ба?– Шаршы алаңда қателесу қалыпты дүние. Ер адамы сын ширатады. Егер ақиқат болса, сынның айтылғаны дұрыс деп есептеймін. Алайда кейде сынды қатты немесе дәлелсіз айтатындар да кездеседі. Ол кезде түсіністік танытып, кейін шаршы алаңда мықтылығыңды дәлелдеуге тырысасың. Сын орынсыз айтылған жағдайда айтушымен арпалысып, сөз таластырған кезім болған емес. Көп жағдайды үнсіз қалуды дұрыс деп санаймын. Өйткені барлық адамда түрлі пікір бар. Бәріне бірдей жақпайтының &nbsp;тағы белгілі.– Ал жеңіліс кезінде көңіл күйді қалай басқарасыз?– Жеңіліс кезінде Аллаға шүкірлік айтып, бұдан да көбірек еңбек етуім керек екенін еске алып, &nbsp;көңілімді көтеруге тырысамын.&nbsp;– Бір сұхбатыңызда «Әлем біріншілігінің ақтық сынында сәл ашуға бой алдырғаным да кері әсерін тигізген сияқты» деген екенсіз. Демек бокста да эмоция маңызды болғаны ғой…– Иә, ақтық сында біраз ашуға ерік бергенім рас. Менің тарапымнан тактикалық қателіктер кетті. Мұның өзі бокста адамның көңіл күйі маңызды екенінің дәлелі. Сондықтан Олимпиадаға жолдама алсақ, бұл қателікті қайталамауға тырысамын.– Қазіргі уақытта бокстан ұлттық құраманың деңгейі қандай? Осы орайда Қызылорда облысының даму бағытына тоқталсаңыз…– Қазақ боксы әрдайым мықты болған және алдағы уақытта да осы деңгейде болады деген сенімдемін. Өйткені ұлттық құрама әлемдік деңгейде үнемі үздік үштіктің қатарынан көрінеді. Сондықтан да қазақ боксының абыройы биік деп нақты айта аламын. Аймақта да бокстың даму бағыты қарқынды. 2017 жылы облыс атынан шығып тұңғыш рет әлем чемпионатынан медаль алып келгенімді білесіз. Мақтанғаным емес, бұл жеңіс ‒ халқымның дұғасы, жаттықтырушыларың еңбегі. Чемпионат араға екі жыл салып өтіп тұрады. Биыл сол бәсекеде екі қызылордалық өнер көрсетіп, мен қайтадан екінші орынға тұрақтасам, Тұрсынбай Құлахмет атты жерлес інім үшінші орынды қанжығасына байлады. Мұның өзі оң өзгерістің, дамудың белгісі деп түсінемін. Өз басым өңірден екі жыл ішінде тағы бір қызылордалық боксшының сапқа қосылғанын өте үлкен жетістік деп есептеймін. Қазір бас тренер Жәмил Жүсіпов ағайымыз боксты дамытуда көп еңбек етуде. Бұл кісі облыстағы жұмысынан бөлек, ұлттық құрамадағы бас бапкердің көмекшісі қызметін қоса &nbsp;атқарады. Алдағы уақытта Олимпидада топ жарып, ағайымызды, Сыр елін қуантсақ екен деген тілегім бар. &nbsp;– Еліміздегі әйелдер боксы жөнінде не айтар едіңіз? Бұл бағытты дамытуға сіздің көзқарасыңыз қандай?– Қарап отырсаңыз, бұрын әйелдер үш салмақ бойынша сынға түсетін, ал қазір бес салмақ бойынша өнер көрсетеді. Әйелдер боксын дамытамыз деп, ерлер боксының екі салмағын қысқартты. Бір жағынан өте өкінішті. Қазақстандағы жеңіл салмақтағы боксшылардың көбісі бокс нағыз кәсібі болған соң, тауып отырған табыс көзінен айырылып қалды. Бұл тек Қазақстанда ғана емес, бүкіл әлемде енгізілген жаңа жүйе. Негізінде әйелдер боксы үш салмақта тұра берсе, ал ерлерде он салмақтағы жүйе қайтып оралғаны дұрыс деп ойлаймын. Ал жеке көзқарасым бойынша қыз баланың бокспен шұғылданғанын құптамаймын. &nbsp;– Шаршы алаңға шықпас бұрын қарсыласқа қалай зерттеу жүргізесіз?– Кейбір бейтаныс адамдар болмаса, біраз қарсыласымды танимын. Ең бастысы қарсылас қандай болса да өзіңе сенімді болуың керек. Көп жағдайда қарсыласты ғаламтор арқылы зерттеп, оң немесе сол жақтан шығатынын, шапшаң немесе бір орында қимылдайтынын анықтап аламын. Содан кейін ойша бокстасып, қарсыласыңды көз алдыңа елесте отырып, жаттықтырушымен ақылдасып, тактикаларды әзірлей бастайсың.&nbsp;– Мансап жолында беделіңіз өсіп, мемлекеттік қызметке шақырса барар ма едіңіз?– Құдай қаласа, Олимпиададан үлкен нәтижемен оралған соң, мемлекеттік қызметке шақырса ойланатын шығармын. Кім біледі мемлекеттік сала да елге, ұлтқа пайдамыз тисе, нұр үстіне нұр емес пе?! Болашақта көк байрағымызды әлем алдында биікке көтеретін келер буынға пайдамыз тиер болса қуанамын. Сондықтан мемлекеттік қызметке баруға қарсы емеспін.– Спортта да төрешілер тарапынан қателік кететінін естиміз. Бокста да әділетсіздік бола ма?– Бокста өздеріңіз білесіздер әділетсіздік ара-тұра болып тұрды, бірақ бұл олқылық алдағы уақытта түбегейлі жойылады деген сенімдемін. Осы Олимпидада жаңадан төрешілер тағайындалатын болады, себебі Рио Олимпиадасында қазы болған төрешінің бәрі орнынан алынды. Әділетсіздік әсіресе Рио Олимпиадасына Әділбек Ниязымбетов, Василий Левитке жасалды. Бірақ ол тек төрешінің ғана кінәсі емес, себебі оларды осындай қадамға апарып отырған адамдардың да ықпалы болуы мүмкін. Сондықтан Токио Олимпиадасы әділетті өтеді деп ойлаймын.– Ұлттық құраманың капитаны ретінде Токио Олимпиадасында кімнің топ жару мүмкіндігі жоғары деп ойлайсыз?– Кеше өздеріңіз куә болғандай әлем чемпионатында сегіз салмақтағы боксшы бақ сынадық. Сол арада &nbsp;Бекзат чемпион болады деп кім ойлады?! Өйткені ол салмақта одан өзге өте мықты боксшылар бар еді. Сондықтан олимпиадаға сегіз боксшы барсақ, бәрінің де чемпион болуға мүмкіндігі бар. Бағы мен мен бабы қатар шапса, неге бәрі топ жарамасқа?! Әрине мұның бәрі ниетімізге, еңбегімізге байланысты.– Болашақта ұлдарыңыздың спортқа баруына рұқсат берер ме едіңіз?– Ұлдарым спортшы болсын деп қатты армандамаймын. Ең бастысы, адами қасиетін биік ұстап, еліне адал қызмет ететін тұлға болып өссе екен деп тілеймін. Егер спортқа ден қойса, білгенімізді үйретіп, жақсыға баулитынымыз айдан анық.– Сұхбаттасқаныңызға рақмет!

Қамшыбек Қоңқабаев: Ер адамы сын ширатады

<a href="https://kyzylorda-news.kz/ru">Kyzylorda-news.kz.</a> Спорт – бұл салауатты өмір салтын ұстанудың алғышарты ғана емес, сондай-ақ, ұлттың мықтылығын, азаматтың айбарлығын өзге елге танытатын негіз. Бұрын ат үстінен түспей, жорықта жанын сауғалаудан гөрі арын алдыңғы орынға қоятындарды, қабырғасы қайысса да, қабағын шытпаған шымырды батыр деп атаған. Ал, бүгінгі күннің батырлары деп спортта жүрген айбынды азамат пен қайсар қыздарды атауға әбден болар.Оңайлықпен келмейтін жеңіске ие болу үшін тапқырлық пен табандылықты түйістіре білетіндердің ісіне тәнті болатынымыз тағы рас. Асылында, спорт мұрынды бет қылатын ұрып-жығудан тұрмайды. Тиісінше, спорт алаңы бұзақылықтың ордасы емес. Бұл сана мен іс-қимылдың өз сәтінде сауатты өрбуі. Яғни, ақыл мен айланың арқасында орға жығылмай, ой мен әрекеттің нәтижесінде жеңіске жету. Осы ретте, қағидадан қашпай, өз ұстанымынан бас тартпайтын, діттегені мен көздегеніне жетпей қоймайтын қайратты болу маңызды. Ал, айтылған талапты түйсігінде сақтап, жадында жаңғыртып жүретін Сыр спортшылары сенім үдесінен шыға білді.Сайып келгенде спорт салауатты өмір салтын сақтаудың ғана емес, өз-өзіңді қорғаудың таптырмас тәсілі, қорғанудың жолы екені бәрімізге мәлім. Топ бала тап беріп, төбелеске түскенде жер бауырлап қалмай, жеке басты қорғауға сеп болады. Әсіресе, каратэ қатерден сақтайтын спорт түріне жатады. Себебі қарусыз-ақ аяқ-қолдың қайратымен қарсыласты жайратып тастауға мүмкіндік мол. Тек әдіс-тәсілді естен шығармай, ширақ қимылдың қалпын бұзбаған жөн. Шапшаңдық пен жылдамдыққа сүйеніп, спорттан сауаты мықты Сыр спортшылары каратэден жеңісті еншілеп келеді.<blockquote>– Облыста мейбукан годзю-рю каратэ-домен 2019 жылдан бастап айналыса бастадық. Үш жыл ішінде өте жақсы дамып келе жатыр деп айтуға негіз бар. Өйткені спортшылардың жеткен жетістігі мен көрсеткен нәтижесі көрсеткішімізді айғақтап береді. Сондай-ақ, спорт саласына ерекше ден қойып, дамуына зор үлесін қосқан облыстық дене шынықтыру және спорт басқармасының басшысы Асылжан Зұлфқарұлына алғыс айтамыз. Өңірде осы спорт түрімен 200-ге жуық спортшы мен 10-ға жуық жаттықтырушы жұмыс істеп жатыр. Асудан асып, белесті бағындыруда жаттықтырушының білім-білігі мен спортшы қабілеті ықпал етеді. Бүгінде үзеңгілестерінен оқ бойы озып, каратэде көш бастап келе жатқан мықты спортшыларымыз бар. Олар – Ернұр Рысбек, Еркін Әбіш, Азиз Мұса, Айым Алдаберген, Дамир Есдәулет, Райан бақытбек, Аяулым Тілектес, – деді облыстық мейбукан годзю-рю каратэ-до федерациясының аға жаттықтырушысы Еркін Боханов.</blockquote>Қарусыз күрес саналатын каратэде кейін шегінбейтін күш керек-ақ. Шаршы алаңда шалыс баспау үшін өз-өзін қорғау тәсілін меңгерудің маңызы зор. Осы тұста тактика мен техниканы тез меңгерген спорт саңлақтары әлемге де өзін мойындатып үлгерді. Үздіктердің жеңісте үзіліс жариялағысы келмейтіні қуантады. Каратэдегі көрсеткіш бойынша сан соғып қалмайтын Сыр спортшылары жүлде санын арттырып, аймақ абыройын асқақтатып келеді.<blockquote>– 2022 жылы Петропавл қаласында өткен Қазақстан Республикасының чемпионатында жалпы есепте ІІ орын алдық. Биыл чемпионат Сыр елінде өтіп, біздің команда тағы да сол белесті бағындырды. Сондай-ақ, Жанкерей Асқарұлы мен Еркін Әбіш Петропавл қаласында өткен ел біріншілігінде іріктеуден өтіп, Италияда әлем біріншілігінде қола медальді қанжығаға байлады. Енді келесі Әлем чемпионаты 2024 жылы Австрия елінде өтпек. Бұл сыннан да сүрінбейтін спортшыларымыз іріктеуден іркілмей өтіп, жеңімпаз атанатынына кәміл сенеміз, – деді жаттықтырушы Е.Боханов.</blockquote>Жетістікті жіпке тізер болсақ, Сыр елінің еншісіне тиген жүлде мен жеңіс аз емес. Қабілет-қарымы артып, күш қайраты тасыған біліктілер додада діттегеніне жетіп, мәртебені биіктете түсуде. Мұндай көрсеткіш, нанымды нәтиже ел дамуының негізгі тетігі десек артық айтқандық емес. Тиісінше бұл спорттың саласының деңгейін де анықтап береді. Бүгінде сүйінші хабар мен ақжолтай жаңалықтардың өзінен айтулы саланың алға шыққанын аңғаруға болады. Иә, бұрын спорт көптің аузында кемшін тұсы көп айтылатын еді. Ой үстінде ойнамалы боп тұратын саланың бүгінгі орны орнықты һәм тұрақты. Өйткені Сыр спортшыларының жетістігі мен жеңісі спорт саласының айнасына айналды. Жаттықтырушы өз сөзінде облыстық спорт басқрамасының каратэге жақсы көңіл бөлетіндігін тілге тиек етті. Расында да қолдау мен демеу азаймаса, шыңға шығатынымыз анық.Айтпақшы, каратэ шито-рюден де балалар, жасөспірімдер, жастар және ересектер арасында ұйымдастырылған бәсекеде Әсемгүл Ердаулеттің ҚР чемпионы атанғаны көпке мәлім. Ол Қазақстан чемпионатының 7 дүркін жеңімпазы атанған сырбойылық.Ел чемпионатында алғаш рет 55 келі салмақта бақ сынаған Әсемгүл Қорқыт ата атындағы Қызылорда университетіндегі «Дене шынықтыру және спорт» мамандығының студенті. Халықаралық дәрежедегі спорт шебері, Әлем чемпионатының алтын медаль және Әлем кубогының иегері Әсемгүл кезекті жарыстың да тартысты өткенін айтады.<blockquote>‒ Қазақстанның тағы бір шыңын бағындырғаныма шын қуаныштымын. Жарыс өте тартысты өтті, еліміздің барлық өңірінен мықты спортшылар қатысты. Финалда Маңғыстау қаласының спортшысымен кездесу өткізіп, 6-1 есебімен жеңіске жеттім. Бұл бәсекеге дайындық жоғары деңгейде болды, осы орайда өзімнің жаттықтырушыларыма алғыс айтамын, ‒ дейді Әсемгүл.</blockquote>Бір қызығы, Әсемгүлді &nbsp;бұл спорт түріне ата-әжесі алып келген екен. Ол кезде қаршадай қыз небәрі 8 жаста болатын.<blockquote>‒ Бала болғандықтан бастапқыда жаттығу алаңына жай ойнап келіп жүретінмін. Кейіннен 12 жастан бастап аға буынның жеңіске жетіп, әнұранды шырқатып жүргенін көре бастадым. Мен де сол спортшылар секілді елдің намысын қорғағым келді және сол нәтижеге &nbsp;ұмтылдым. Қазіргі таңда ел арасында осы спорт түрі жақсы дамып келеді. Өткен жылы Токио олимпиадасына осы спорт түрі қосылып, алғаш рет елімізден 5 спортшыға жолдама берілгенін білесіздер. Соның ішінде Сыр өңірінен Мөлдір Жаңбырбай ел намысын қорғады. Оның өзі бізге үлкен құлшыныс сыйлады. Жалпы Қазақстан бойынша Қызылорда облысы каратэ-до спорт түрінен жоғары денгейде, ‒ дейді ол.</blockquote>Әсемгүлмен әңгімелесе отырып, жарыстағы басты қарсылас кім екенін де сұраған едік. Алайда қазақ елін әлемге танытуды мақсат еткен жүректі қыз &nbsp;барлық спортшының мықты екенін алға тартты.<blockquote>‒ Жарыс кезінде қарсыластың қандай әдіс қолданатынын білмейміз. Сондықтан кей сәттерде ұпай өткізіп алатын кездер болады. Сол үшін біз әр қарсыласпен шыққанда жекелей дайындықпен, бапкердің айтуымен тәуекел етеміз, ‒ дейді Ә.Ердаулет.</blockquote>Түйіндей келе, рух пен жігер спортшының қос қанаты десек, спортшының қанаты қайырылмағаны ләзім. Ал, басқарманың қолдауы, жаттықтырушының еңбегі, спортшының қабілеті сабақтасса, осы үштікте үндестік табылса жеңісті күндер көбеймек.

Облыста каратэ жоғары деңгейде дамып келеді

<a href="https://kyzylorda-news.kz/ru">Kyzylorda-news.kz.</a> Бүгінде Сыр елінің еншісіне тиген жеңіс пен жүлде көп. Білімге бүйрегі бұрған жас буынның спортқа да қызығушылығы жоғары, тіпті осы салаға қатысты мақсаты айқын, арманы асқақ десек артық айтқандық емес. Нәтижеге жету үшін шыбын жаны шырқырап, қиындықтың қиысқан жолынан қаймықпай өтіп, кептелген кедергіге де тосырқап қалмауы талпынысынан көрінеді. Жеңіс пен жеңіліске жету бір ғана қадам екенін ұғынғандар ұстамдылықпен ұтымды әрекет етуді қаперде ұстайды. Содан болар, додада діттегеніне жетіп, тартыста табандылық танытып, ел мерейін үстем етіп жүр. Жалаудың жерге жығылмай, көкте желбіреуін тілеген Сыр спортшыларының бойында намыс қайнап, жүрегінде Отанға деген сүйіспеншілік сайрап жатыр. Байдарка мен каноэде есу бойынша да қоржынымыз талай мәрте алтынға толған. Әлбетте бұл бағыт беретін жаттықтырушы мен шымыр спортшының толассыз еңбегінің нәтижесі. Ендеше облысымызда байдарка мен каноэ спортының даму деңгейі қандай? Толығырақ тарқатып көрелік.Суды тілсіз жаудың біріне теңейміз. Өйткені абайламасаң ағызып әкететін қаупінен кейін көбісінің суық суға жүрегі дауаламайды. Ал ескек есудің шеберлері су бетінде қайықты игеріп жүріп, бақ сынайды. Көзге оңай көрінген спорттың өзіндік қиындығы да жоқ емес. Егер тепе-теңдікті сақтамай, ережені естен шығарып, мүлт кеткен жағдайда жеңіс қарсыластың еншісінде дей бер. Сондықтан қос қолдың қайратымен ескекпен қайықтың бағытын басқару екінің бірінің қолынан келе бермейді. Белгілі уақыт шегінде межеден өту жүгіріп барып мәрені үзе салатындай жеңіл іс емес. Жеңіс су, қайық һәм ескек үштігінің үйлесімін тапқан спортшының ғана қолында.<blockquote>Қызылорда облысында байдарка және каноэде есу 2013 жылдың қаңтар айында ашылған. Он жыл ішінде жеңіс тұғырынан көрінген чемпиондарымыз өте көп. 2022 жылы облысымызда ескек есу базасы пайдалануға берліген болатын. Бізде қазір жаттықтырушы жетпей жатыр, атап айтсақ 4 жаттықтырушы бар. Ал Шымкент қаласындағы жаттықтырушы саны – 26. Сондай-ақ, ескек есу спортына келген балалардың 90-99 пайызы жүзу білмейді. Сондықтан алдымен оларды жүзуге үйретіп, кейін қайыққа отырғызу, ескек ұстау сынды тәсілдерді меңгертеміз. Мұндай спорт түрі басқа қала мен аудандарда жоқ. Сол себепті спорт мектебінің қатарын көбейтсек, балалар жастайынан спортқа дағдыланып, тіпті жүзуге де ерте жастан бейімделетін еді. Бұл уақытты жоғалтпай, жеңіске жетудің төте жолын табуға зор мүмкіндік. Тағы бір айта кетерлігі, 60 спортшының барлығына қайық жетіспейді. Ескек есу базасына бірнеше қайық пен ескек құралдары керек. Бұл мейлінше көп балаға бір мезетте жаттықтыруға көмегін тигізуші еді, – деді ҚР еңбек сіңірген жаттықтырушысы Мұхитдин Миербеков.</blockquote>Кіл мықтылар жан-жақты дамудың кілтін табуда тосылмаған кезде арқасынан қағып, демеп жіберу маңызды. Яғни әрбір спорт түріне көп көңіл бөлінсе, көрер нәтижеміз де жемісті, естір жаңалық та сүйінші болмақ. Ескек есу базасында өз ісінің мықты мамандары қызмет атқарады.Жаттықтырушының нұсқаған жолымен жүрген спортшылар марапат мінберінен көрініп, Сыр елін қуанышқа кенелтіп жүргені көпке аян.Намысты қолдан бермеуге тырысқан қыздар да аймақтың абыройын арттырып келеді. Чемпионаттарда асығы алшысынан түсетін спортшылар сенім үдесінен шығуда ақсап қалғысы жоқ. Әлем төрінде егемен еліміздің еңсесін көтеріп, қанға сінген қайсарлықтың қалпын көрсететіні содан.Сонымен су үстіндегі жарыста жығылмай, қайықтың қозғалысын қалт жібермей, ескектің ебін табатын Алтынбек Қожахметтің байдарка мен каноэ спортына келгеніне 10 жылға таяған. Әлем чемпионатының жүлдегері атанған ол өзінің осал еместігін әлдеқашан танытып үлгерді. Тынымсыз дайындықты үзбей, жаттығуға ден қоятын спортшы ел қоржынын медальға толытыруда тағы қалыс қалғысы жоқ. Қожахмет алдағы тамыз-қыркүйек аралығын Азия ойындарына қатыспақ.<blockquote>– Су үстіндегі спорт болғандықтан біздің маусым сәуір айынан басталады. Содан кейін 4 жылда бір келетін қалааралық спартакиадаға дайындалатын боламыз. Одан 2 аптадан соң мен 23 жасқа дейінгі Әлем біріншілігінде бақ сынаймын. Бұйырса тамыз айында өтетін жарысқа да қатысамын. Демек бұл біздің тамыз айына дейінгі жарыс жоспарымыз. Ал жаттығуға келетін болсақ, бұрынғы қателіктермен жұмыс жасап, уақытымызды ұтымды пайдаланып, тиімді тәсіл мен әдістерді үйренуді үзбейміз. Ел үмітін арқалап барған жарыстарда көк туды желбіретіп, намысты қолдан бермеу – басты мақсат, – деді Қ.Алтынбек.</blockquote>«Чемпион жаттығу залдарында пайда болмайды. Адамның ішіндегі құлшыныс, арман, мақсат чемпионды тудырады» деген әлем мойындаған боксшы Мұхаммед Әли. Расында, арман асқақ болған кезде көздеген мақсатқа, діттеген мұратқа жету соншалықты жеңіл болмақ. Жетістікке жету жолында жауапкершілік жүктеп, ұмтылысы ұсақталып, талпынысы тып-типыл жоғалмаса талай спортшының белесті бағындыратыны бесенеден белгілі. Тиісінше спорт саласының дамуына сеп болатын шешім қабылданып, қолдау көрсетілсе айымыз оңынан тумақ.

Байдарка мен каноэ: Жалауды жерге жықпаған жерлестер

<a href="https://kyzylorda-news.kz/ru">Kyzylorda-news.kz.</a> Қызылорда қаласы әкімінің жүлдесі үшін журналистер арасында шағын футболдан республикалық турнирі өтті. Додаға Астана, Атырау, Түркістан, Шымкент, Қызылорда қаласынан 8 команда қатысып, қаламгерлер өзара мықтыны анықтады.Турнирдің ашылу салтанатында Қызылорда қаласының әкімі Асылбек Шәменов сөз сөйлеп, ойыншыларға сәттілік тіледі. Сонымен қатар «Қазақпарат» халықаралық ақпарат агенттігінің Қызылорда облысындағы меншікті тілшісі, спорт журналисі Әділжан Үмбет жылы лебіз білдірді.&nbsp;Қызылорда қаласы әкімдігінің ұйымдастыруымен биыл екінші мәрте байрағын көтерген бұл турнирдің мақсаты – салауатты өмір салтын насихаттау, әріптестік және достық қарым-қатынасты нығайту. Өткен жылы бастау алған журналистердің алаңдағы сайысы биыл да тартысты өтті.12 сағатқа созылған дода әлеуметтік желілер арқылы тікелей эфирден де көрсетіліп, арнайы фоторепортаждар қала әкімдігінің әлеуметтік желідегі парақшаларына жүктелді.Топтық кезеңнен сүрінбей өткен «Қазмедиа», «Qaz365.kz» және «Атырау», «Шымкент» командалары жартылай финалға шықты. Олардың арасынан бас жүлдені сарапқа салған «Қазмедиа» «Qaz365.kz» командасын жеңіп, республикалық турнирдің чемпионы атанып, 1 000 000 теңге қаржылай сыйлыққа ие болды. Екінші орын алған «Qaz365.kz» 700 мың, қола жүлдегер атанған «Атырау» 350 мың теңгеге қол жеткізді.Турнирдің «Үздік ойыншысы» номинациясымен 6 гол салған атыраулық Қайсар Жетпісбай марапатталса, «Қоғам ТВ» командасының ойыншысы Ержан Батыршаев «Үздік шабуылшы» деп танылды.Атыраудан келген Қайсар Жетпісбай турнирдің «Үздік ойыншысы» аталымы бойынша &nbsp;марапатталды. Ол 6 гол салып, сұрмергендігімен дараланды. «Қоғам ТВ» командасының ойыншысы Ержан Батыршаев «Үздік шабуылшы» деп танылды. Сонымен қатар «Шымкент» командасының ойыншысы Айбек Қабылша «Үздік қақпашы» атанса, турнирдің «Үздік қорғаушы» аталымымен Түркістан облысынан &nbsp;келген Самат Сүлей марапатталып, қаржылай жүлделер тапсырылды.Еліміздің түкпір-түкпірінен келген жүзге жуық БАҚ өкілінің басын қосқан турнирге қатысушылар қонақжай Сыр жұртшылығына ризашылықтарын білдірді. Осылайша, Жаңалықтың жаршысы, жақсылықтың хабаршысы болып қоғамдық ахуалдың алғы шебінде жүретін айрықша кәсіп иелерінің спорттан да құр алақан емес екенін білдірді.

Тілшілер доп тепкен күн

<a href="https://kyzylorda-news.kz/ru">Kyzylorda-news.kz.</a> Өткен ғасырдың тоқсаныншы жылдарында біздің аймақта ауыр атлетика өркен жая бастады. Бүгінде талай таланттың танылуына жол ашқан Вилорий Пак сол кезде ел ішінен зілтемір көтеруге бейім жас өрендерді тауып, оларды қиын да қызықты спорт түріне баулыды. Осы бір уақытта Қызылорда жұртшылығы Асқар Меңдияров есімді бозбаланың болашағынан үлкен үміт күтті.Қарапайым қазақ баласы үшін ауыр атлетика таңсық спорт түрі еді. Бірде Асқар білім алатын мектепке аймаққа белгілі бапкер Вилорий келді. Оң-солын енді танып келе жатқан өрендерге өзі жетекшілік ететін үйірменің қыр-сырын айтып берді. Бұл кезде Асқар небәрі он жаста екен. Ата-анасымен ақылдаса келе ауыр атлетика үйірмесінің есігін ашты. Қасында Ғалым, Ғани, Талант, Талғат, Ардақ есімді достары бар. Талантты тани білетін бапкер Вилорий оларды құшақ жая қарсы алды. Ұғымтал ұландарға асықпай ауыр атлетиканың қызығы мен қиындығы жайлы айтып берді.<blockquote>– Біздің балалық шағымызда қазіргідей қарыштап дамыған техника жоқ. Бар көретініміз – теледидар. Көгілдір экраннан көптеген спорт түрлерінен жарыстар жайлы көрсетеді. Сол сәтте біз Анатолий Храпатый есімді қазақстандық ауыр атлетті жанымызға жақын тартамыз. Сан алуан сайыста сыр бермеген саңлақ талай жүлдеге қол жеткізді. Олимпиаданың алтыны мен күміс медалін мойынға тақты. Әлем чемпионатында бес мәрте алтын, екі мәрте қола алды. Өзге де жарыстарда жетістікке жетті. Храпатый біз секілді өрендерге өнеге болды. Одан бұрынғы жылдарда да Олимпиада чемпионы атанған теміртаулық Юрий Зайцев (1976, Монреаль), шахтинскілік Виктор Мазин (1980, Мәскеу) сынды саңлақтар болды. Біз солар секілді болуға ұмтылдық, – дейді Асқар.</blockquote>Алғаш рет чемпион атанғанда небәрі 12 жаста болатын. 1987 жылы Арқалық қаласында өткен ел біріншілігінде жеңімпаз тұғырынан көрінді. Бұл толағай табыстарға қол созған өренге қанат бітіріп, алдағы күндерге үлкен үмітпен қарауына жол ашты. Одан кейінгі кезеңде жасөспірімдер мен жастар арасында тоғыз мәрте ел чемпионы атанды. Ал 1994 жылы Қырғызстан астанасы Бішкек қаласында өткен Орта Азия елдері жарысында өзінің мықтылығын танытты. Арада бір жыл өткенде Ресейдің Санкт-Петербург қаласында жалауын желбіреткен Тәуелсіз мемлекеттер достас¬тығы елдері спартакиадасында күміс жүлдегер атанды. Бұл жылдарда біздің елімізде ауыр атлетика спорты енді-енді өркенін жайып келе жатқан кезі еді. Бапкерлер Асқарды ересектер арасындағы ұлттық құрамаға қабылдауға ниет білдірген. Десе де, жарақатына байланысты жарыс жолын жалғастыра алған жоқ. 1996 жылы бапкерлік қызметке бет бұрды.Бапкерлік те оңай емес. Жауапкершілігі үлкен. Вилорий ұстазымен кеңесіп, талай таланттың жұлдызы жануына күш салды. Бұрынғыдай емес, бұл салаға да қамқорлық көрсетіле бастады. Қажетті құрал-жабдық қатары толықты.Жергілікті халық көп жылдарға дейін ауыр атлетиканың қыр-сырын түсіне қойған жоқ. Ауыл баласы негізінен оң жамбасына келетін күрес түрлерін таңдайтын. Олардың көбісі облыс орталығында орналасқан Жалаңтөс баһадүр атындағы спорттағы дарынды балалар мектеп-интернатына түсуге келетін. Бұл жерде кез келген өренді бірден қабылдай қоймайды. Түрлі сынақтар болады. Содан сүрінбей өткен баланың аталған білім ордасында тәлім алуына мүмкіндік туады.<blockquote>– Қашанда талантты жастарға кенде емеспіз ғой. Әрине, әркімнің қабілет-қарымын бағалауың тиіс. Біз дарынды ұландарды кейде кездейсоқ кездестіріп жатамыз. Спортшы тәрбиелеу оңайға соқпайды. Шәкіртің толайым табысқа кенеліп жатса, қандай ғанибет?! Барлық бапкер сол жолда тынбай тер төгеді. Аталған спорт мектебіне келген өрендер арасынан ауыр атлетикаға бейім талай жанға жол сілтедік. Олардың арасынан үмітімізді ақтаған шәкірттеріміз де аз емес. Қазір Алмас Өтешовті жанкүйерлер жақсы біледі. Ол әуелгіде күреспен айналысқан болатын. Оның болмыс-бітіміне қарап ауыр атлетикаға ыңғайлы екенін байқаған едік. Біздің берген ақыл-кеңесімізден кейін зілтемір көтерудің қыр-сырын меңгерді. Алмас үмітімізді ақтады, Әлем және Азия чемпионаттарында қор¬жынға жүлде салды. Азия ойындарында да топтың алдынан көрінді, – деді Асқар.</blockquote>Осы ғасырдың алғашқы он-он бес жылдығында Сыр өңірінің ауыр атлетикасында талай талантты жастар бой көрсетті. Жергілікті бапкерлер Айбол және Жеңіс Алдабергеновтер, Роман Русяновский, Дәурен Шаутеев, Жомарт Жарасбаев сынды саңлақтар сан алуан сайыстарда жеңімпаздар қатарынан көрінді. Өмір сәттілік пен сәтсіздіктен тұрады емес пе?! Олардың кейбірінің бағы жанбаған шығар. Ендігі бірінің бабы келіспеді ме екен? Десе де, олардың жолын жалғаған өрендер қатары бүгінде де аз емес. Кейінгі жылдарда Әділбек Балқаев, Есенгелді Сәпи, Рахат Бекболат сынды үздіктер шықты.<blockquote>– &nbsp;Соңғы уақытта әлемдік жарыстарда Рахаттың есімі жиі аталады. Солай болатын да жөні бар. Ауылдың қара топырағын кешіп өскен ол өзі қатысқан жарыстарда үнемі алдыңғы лектен көрініп жүр. Тіпті, әлемдік рекордты жаңартып, тәмам елді таңырқатып қойды. Ендігі кезекте Рахат секілді дарынды ұландарға барынша қамқорлық көрсетілуі тиіс. Спортшының бабында болуы – басты талап. Қажетті тағамдар және витаминмен қамтамасыз еткеніміз дұрыс. Осындай қолдаудың нәтижесінде еліміздің спорт көгінде талай таланттар жарқырай түседі, – деді Асқар әңгімесін одан әрі өрбітіп.</blockquote>Оның айтуынша, әлемде спорт саласына да саясаттың салқыны тиіп жатқан жайы бар. Жер-жаһандағы іргелі елдердің арасындағы қырғи-қабақ көзқарас кейбір белгілі спортшылардың жолын байлайды. Қазір бірқатар ауыр атлеттер қан құрамынан допинг табылды деген желеумен үлкен спорттан шеттетілді. Мұндай келеңсіз жағдай қазақстандық жастарға да кедергісін келтірді. Асқар спортшы әр жарысқа қатысар алдында бірнеше мәрте тексеруден өтетінін тілге тиек етті.<blockquote>– Солардың барлығында таза шыққан таланттарға қалайша бірнеше жылдан кейін допинг пайдаланды деген байлам жасалады? Бұл – ешбір логикаға сыймайтын түсініксіз жағдай. «Осындай қисынсыз жағдайға байланысты көптеген жастар үлкен спортпен қош айтысты. Әрине, алдағы уақытта әлемде бұған байланысты оң шешім қабылданады деген үміттенемін. Сонда ғана спортшылар әділетті жолмен жеңіске жетеді, – деді ол.</blockquote>Асқар шетелден легионерлер алдыртуға байланысты ұстанымға мүлдем қарсы екенін айтады. Бұл еліміздің спорт саласын дамытуға көп кедергісін келтіреді.<blockquote>– Мұндай жағдай ауыр атлетика саласында көп кездесті. Қазір де өзге елдерден шақыруға әуеспіз. Олар төменгі жалақыға келмейді. Бұл мақсатта қыруар қаржы жұмсалады. Сондықтан ойланғанымыз дұрыс. Ақшаны балалар мен жасөспірімдер спортын дамытуға жұмсағанымыз абзал. Ол өз жемісін береді. Оның орнына өзге елден білікті бапкер алып келген пайдалы. Қазақстандық жанкүйерлер түркиялық Энвер Туркелери деген маманды жақсы біледі. Талай талантқа ақжол сілтеген ол еліміздің ауыр атлетика құрамасына кеңесші ретінде ұзақ жылдар бойы еңбек етті. Білікті бапкер әрбір шәкіртінің мүмкіндігін толықтай біледі. Сол арқылы жүйелі жұмыс жүргізді. Кейінгі жылдарда қазақстандық ауыр атлеттердің Әлем және Олимпиада секілді додаларда топ жарғанын сол кісінің өлшеусіз еңбегінің жемісі деп санаймын, – деді Асқар сөзін одан әрі жалғап.</blockquote>Оның айтуынша, бұрынғы кезең мен қазіргі уақыттағы спорт саласының дамуын салыстыра алмайсың. Ертеректе жағдай оңай болмады. Жарысқа жол қаражат табудың өзі қиынға соғатын. Басқа да кедергісі аз болған жоқ. Бүгінде мұндай түйткілдің барлығы өзінің шешімін тапты. Әлемнің қай қиырындағы додаға бару үшін мемлекет тарапынан қамқорлық көрсетіледі. Сан алуан сайыстарда жеңіс тұғырынан көрінген саңлақтарға елге келгеннен кейін қомақты сыйақы беріледі. Бұрын спортшылар мұндай қолдаудан тыс қалып келді. Ал Олимпиада чемпионы мен жүлдегеріне мемлекет тағайындаған арнайы сыйлықтар тағы бар.<blockquote>– Қай кезде де әлемде Ресей, Қытай, Иран секілді елдердің ауыр атлеттері алдыңғы лектен көрінеді. Қазір олардың қатарына Қазақстанның қосылып келе жатқаны қуантады. Десе де, оған тоқмейілсуге болмайды. Әлі де жасалатын жұмыс көп. Өзіміздің таланттарға жол ашып, бұл мақсатта нақты жобаларды жалғастыра бергеніміз абзал, – деді Асқар әңгімесін түйіндеп.</blockquote>

Зілтемір: Сыр спортының саңлағы

<a href="https://kyzylorda-news.kz/">Kyzylorda-news.kz.</a> Қазалы аудандық Орталық «Жанқожа батыр» мешіті Қазалы ауданының әкімдігімен бірлесе Құрбан айт мерекесіне орай аудан мешіттерінің жамағаты арасында «Бірлігі жарасқан жамағат» атты кіші футболдан ашық турнирін өткізді.Футбол турниріне жеті команда қатысты. Аталған сайыстың басты мақсаты – жамағат арасындағы бірлікті, бауырмашылдықты, салауатты өмір салтын ұстануды насихаттау, жалпы құндылықтарды қалыптастыру. Бір-бірімен жарысқа түскен дүбірлі додада жүйріктердің тізімі төмендегідей: Бірінші орынды «Әли Муса-2» командасы алды (100 000 теңге). Екінші орын «Әли Муса-1» командасына (70 000 теңге), үшінші орын «Жанқожа батыр» командасына (50 000 теңге) бұйырды.&nbsp;Жолмырзаев Нұрқасым «Үздік қақпашы», Ерғалиев Дәуренбек «Үздік қорғаушы», Иман Мейірімжан «Үздік шабуылшы» номинациясымен марапатталды. Қалған қатысушы төрт командаға да 20 000 теңгеден ынталандыру сыйлығы берілді.<blockquote>«Осындай шараларды үнемі ұйымдастыру жамағат бірлігін арттыруға септігін тигізеді. Спорт – денсаулық кепілі. Әр адам жүйелі түрде спортпен шұғылданып тұрса нұр үстіне нұр болары сөзсіз. Игі іске бастамашы болған мешіт қызметкерлеріне алғыс білдіреміз» – дейді турнир қатысушылары.&nbsp;</blockquote>

Қазақстан және Қызылорда облысының жаңалықтары: Спорт