<a href="https://kyzylorda-news.kz/">Kyzylorda-news.kz.</a> Жалағаш аудандық «Наркескен» спорт клубында 2016 жылдан бастап гір &nbsp;спортын дамыту мақсатында аталған спорт клубында арнайы үйірме ашылған болатын. Үйірме бүгінде өз жемісін беріп, гір спортына қызығушылығы артқан жастар қатары &nbsp;артқан. Қай спорт түрінен жарысқа барса да қоржындары бос қайтпайтын «наркескендіктер» биыл да жыл басын жақсы жаңалықпен бастады.<blockquote>– Аудан әкімдігінің қолдауымен, демеушілердің көмегімен гір спорты үйірмесін талапқа сай етіп, қажетті құралдармен қамтамасыз еттік. Спортшылардың сайыстарға қатысуына жағдай жасадық. Гір тасын алақанда ойнататын Абдулхасан Сейтеновтің шәкірттері – наркескендіктер намысты қолдан бермей, еліміздің, облыстың, ауданның абыройын асқақтатуда, – дейді – «Наркескен» спорт клубының директоры Ғалымжан Ержанов.</blockquote>Иә, «Наркескен» спорт клубындағы гір спортының үлкен жетістіктерге жетуінде үйірме жаттықтырушысы Абдулхасан Сейтеновтың еңбегі зор. Ол күні-түні шәкірттерін шыңдауда қажырлы еңбек етіп, бүгінде жемісін көріп отыр. Бағы мен бабы келіскен бапкердің шәкірттері өткен аптада Астана қаласында өткен ұзынайналым жаттығуынан ересектер мен жастар және жасөспірімдер арасындағы ҚР чемпионатына қатысты. Екі күнге жалғасқан жарыс нәтижесінде Қайсар Төлеген жастар арасында 78 келі салмақта ІІ орын, Нұрислам Орынбасар 2006-2007 жылы туған жасөспірімдер арасында 73 келі салмақта І орын алды.&nbsp;<blockquote>&nbsp;– 8 сыныпта оқитын кезім, бапкерім Абдулхасан Сейтеновпен аудан орталығындағы алаңда өтіп жатқан спорттық сайыста таныстым. Содан бері гір спортымен айналысып келемін. Аптасына 3 рет спорт залға келіп дайындаламын. Тыңғылықты үздіксіз дайындықтың арқасында бапкеріммен бірге үлкен жетістіктерге жетіп жатырмын. Қазақстанды әлемге танытып, көк байрағымды әлем додаларында желбірету үшін қолымнан келгенше еңбек етемін. Қазіргі таңда Қорқыт ата атындағы Қызылорда университетінде дене шынықтыру пәнінің мұғалімі мамандығы бойынша 3 курс студентімін. Жарысқа 500-ге жуық спортшы қатысты. Соның ішінде Қостанай мен Шардараның спортшыларын өзіме мықты қарсылас болды деп айта аламын. Себебі алдыңғы жылғы жарыстарда да бір алаңда бақ сынап, бәсекелес болғанбыз. Бұл жолы Қостанайдан келген спортшыдан озып, өкінішке қарай Шардараның спортшысынан жеңіліп қалдым. Ендігі мақсат – келесі сайыстарда қарсыластарымның барлығынан оза шауып, Әлем чемпионы атану, – дейді Қайсар Төлегенұлы.&nbsp;</blockquote>Елімізде қол күрес спорты дамыған аймақтың бірі Шардара болса, гір спорты дамыған өңір Жалағаш болуы үшін қызмет ететінін жеткізген Қайсар болашақта бапкерінің жолын қууды көздейді. Бүгінге дейін екі рет қола, бір рет күміс жүлде иегері атанып, ҚР чемпионатында алтыннан алқа таққан Нұрислам Орынбасардың да ендігі мақсаты – Әлем чемпионы атану.&nbsp;<blockquote>– Дайындық барысында кезіккен қиыншылықтан шаршап, қажыған сәтте бапкерім Абдулхасан ағайдың айтқан ақылы мен жігерлендіретін сөздері ғана әрі қарай спортты жалғастыруға күш береді. Жарыстарда қол терлемес үшін жағатын ұнтақты жиі жоғалтып алып, қажетті заттарымызды ұмытып кетіп жатамыз. Сондай сәттерде бапкеріміз бәрін байыппен шешіп, бізге жеңіске жету жолында кездескен қиыншылықтарға мойымауды үйретеді. Мойынға таққан медальда қаншама еңбек пен төгілген тер бар, – дейді Нұрислам Нұрланұлы.</blockquote>Аталған үйірменің ауыз толтырып айтатындай мақтан тұтар басқа шәкірттері де жетерлік. Себебі онда өз ісінің білікті маманы, нағыз шебер жаттықтырушы Абдулхасан Сейтенов чемпиондарды шыңдап шығарып, аудан спортының дамуына өзіндік үлесін қосып жүр.&nbsp;<blockquote>– Үйірмеге аудан, ауыл білім ошақтарынан аптасына 4 күн 60-тан аса оқушы келеді. Жалпы бұл жарысқа бармас бұрын спортшылар ең алдымен Тереңөзекте өткен облыстық жарысқа қатысты. Бұл жарыс ұзынайналым деген жаттығудан өтті. Жасөспірім мен жастар жас ерекшеліктері мен салмақ дәрежелеріне қарай бөлінді. Жарыс нәтижесі бойынша 5 оқушы ҚР чемпионатына қатысуға жолдама алды. Өздеріңіз білетіндей, 2 спортшымыз жүлделі орындарды иеленді. Бірі жастар арасында өткен жарыста ІІ орын, ал екіншісі жасөспірімдер арасындағы жарыстан І орын алды. Жігіттердің еңбекқорлығы спортта талай сыналды. Олар спорт шеберіне үміткер атағын алу үшін де біраз тер төкті. Мәселен, Қайсар Төлеген спорт шебері болса, Нұрислам Орынбасар спорт шеберіне үміткер, – дейді «Наркескен» спорт клубындағы гір спорты үйірмесінің бапкері Абдулхасан Сейтенов.</blockquote>Айта кетейік, үйірме қатысушылары жылда ауыл спортшылары бас қосатын «Алтын күз» спартакиадасынан соңғы 3 жылда командалық есеп бойынша алғашқы үштіктен түспеген. 500-ге жуық кіл мықтылар бас қосқан чемпионатта бапкерінің үмітін ақтаған спортшылар алдағы уақытта Қазақстан ұлттық құрамасына кіріп, ел абыройын Азия және Әлем чемпионатында қорғап, мемлекет мерейін үстем етеді деп сенеміз.

Жалағаштық спортшылар жеңіс тұғырында

<a href="https://kyzylorda-news.kz/">Kyzylorda-news.kz.</a> Бұқаралық спортты дамыту мемлекет алдында тұрған басты мәселелердің бірі. Оған дәлел жыл сайынғы Қазақстан Халқына арнаған Жолдауында мемлекет басшысы Қасым-Жомарт Тоқаев осыған басымдық беріп отырады. Жалпы мемлекеттің де мәртебесін әлемдік аренада айшықтап көрсететін саланың бірі де, бірегейі спорт екендігі жасырын емес. Қазіргі заманда баланы спортқа бауылып, салауатты өмір салтын насихаттау да игі іс. Біздің арамызда да өз алдына футбол командасын құрып, өз беттерінше жарыстарға қатысып аудан атын жақсы жағынан шығарып жүрген әуесқой спортшылар бар. Солардың бірі – «Порт» футбол құрама командасы.&nbsp;«Порт» командасы 2015 жылы әуесқой футболшылардан құралған. Командаға Төребек Дәрмағамбетов жетекшілік етеді. Жалпы бұл футбол командасының мүделерінің спорттық киімдері мен сырт өңірлерге жарыстарға барғандағы жол ақысына да демеушілік жасап отырған Төребек. Команда мүшелері кәсіпқой спортшылар емес. Қоғамда белгілеп алған әрқайссының өз мамандығы бар. Әр саладағы қызметкер азаматтар. Жас айырмашылықтары да бар. Алды 35 жаста болса, кішілері 17 жаста. Бірақ оларды спортқа деген сүйіспеншілік осы топқа біріктірген.&nbsp;Командадағы жігіттер спортты жан жүрегімен сүйеді. Олар өз командасына шын жанашыр. «Прот» командасында осындай спортшылар жиналған. Біз осынша жылдар ішінде тауды жарып, тас қопарып тастадық деп айта алмаймыз. Бірақ команда мүшелері жетілді. Өздерін мойындатты. Мен оларды тәжірбие жинасын деп, қызылордалық әуесқойлар арасындағы футбол жарысына, көршілес Қазалы ауданына жиі апарып жүрдім. Тіпті соңғы екі жылда Қазалы ауданының қыстық, жаздық әуесқойлар футбол лигасына қатысып жүр, – дейді Т.Дәрмағамбетов.Бүгінгі әңгіме де осы турасында болмақ. Яғни, Қазалы ауданында дәстүрлі өтетін әуесқой футболшылар арасындағы қысқы және жазғы ала доп додасында «Порт» командасының жеткен жетістіктері бір шоғыр. Қазалылық футбол сүйер қауым «Портты» жақсы таниды. Тіпті ондағы әрбір ойыншы туралы ақпаратқа қанық. Көршілердің қошеметіне бөленіп, Порттың ойынын тамашалау үшін келетін көрермен тапқан.&nbsp;Әр аптаның жексенбі күні Қазалыға барып әуесқойлар арасындағы лигаға қатыстық. Көршілес ауданның футбол деңгейінің жоғары екендігін айтуымыз керек. Ойыншылар арасындағы мәдинет, командалардың қарсыластарына құрметпен қарауы, төрешіні құрметтеу жолға қойылған. Мойындау керек, ең алғаш қатысқанда біз өзіміздің осал екенімізді білдік. Ал келесі ойындарда жаттығу мен ізденісті молайттық. Бірақ спортшы үшін баппен бірге бақ та қатар шабу керек сияқты. Өткен жылғы чемпион команданы биыл жеңсек те, жеңіс тұғырына шыға алмағанымыз өкінішті. Бір қуантатыны бізге деген қазалылықтардың ыстық қошеметі зор. Ерекше ықыласпен шығарып салды. Осыдан артық жеңіс бар ма? - дейді команда капитаны Ерлан Досжанов.Команда чемпион болмаса да өткен жылғы жазғы, биылғы қысқы лигада «Порт» командасының мүшесі Рахымбек екі мәрте, ең көп гол салған спортшы ретінде танылып, «Сұрмерген» атанды. Осылайша Қазалының әуесқойлар лигасының тарихында қалды.&nbsp;Жетекшіміз Төребек Әділбекұлына алғыс айтамыз. Бізге демеуші болып, бар шығынымызды көтеріп, өзімізді танытуымызға, Арал ауданының атын шығаруымызға көмегін көрсетіп жүр. Енді басшылық тарапынан біздің жаттығуымызға, ойын ойнауымызға зал мәселесін қарасытырып берсе деген кішкене өтінішіміз бар, - деген капитан Е.Досжанов біздің ауданда да әуесқойлар лигасын дамытса деген ойын ортаға салды.&nbsp;Өскелең ұрпақтың салауатты өмір салтын ұстанып, спортты жанына серік еткені жөн-ақ. «Порт» командасынан да бөлек біздің ауданда да әуесқой спортшылар көп. Солардың мүмкіндігін шыңдауға қолдау көрсетілсе нұр үстіне нұр болар еді.

«Порт» футбол құрама командасының жаңа белесі

<a href="https://kyzylorda-news.kz/">Kyzylorda-news.kz.</a>&nbsp; Бүгінде өңірімізде ел намысын қорғап жүрген апайтөс балуандар, тау көтерген толағайлар, желмен жарысқан желаяқ спортшылар жетерлік. Солардың арқасында байрақты бәсекеде Көк туымыз көкте желбіреп, әнұранымыз шырқалып жүр. Ал осы спортшылардың артында білікті бапкер мен жан аямай тер төгетін жаттықтырушы тұрғанын білеміз. Спортшы қанша жерден талантты болса да, бапкерсіз бәсекенің биік шыңына көтеріле алмасы анық.Кей жағдайда спорт саласында саңлақтардан чемпион шығарған жаттықтырушылардың маңдай тері мен ізденісі көзге көріне бермейді. Ал олардың жұмысына шын үңілсеңіз үлкен еңбек жатыр. Қазақ «жігітті кеткен күшімен сынама, еткен ісімен сына» деген. Бүгінде топ ішінде балаларды танып, оларды шынықтырып, ілкімді ісімен танылып жүрген мақтаулы бапкерлер Қармақшы елінде жетерлік. Солардың бірі – Айдар Ералиев.Белгілі бапкер кәсіби спорттағы еңбек жолын 2009 жылы бастаған. Бұдан бір жыл бұрын Сыр елінің дарабозы Илья Ильин олимпиада чемпионы болғаннан кейін облыстық спорт басқармасының қолдауымен аудандарда ауыр атлетикадан зал ашыла бастайды. Мақсаты – ауыл балаларын спортқа тарту. Сол жылы аудандағы спорт мектебінің директоры Әлжан Төремаханов пен Артур Әлиев ауыр атлеттен жаттықтырушыға лайық деп Айдарды қызметке шақырады. Себебі ол, Астана қаласындағы спорт мектебіне ауыр атлет бойынша оқуға түсіп, осы салада жаттығып, Қазақстан Республикасының бірнеше дүркін чемпионы атанған. Мұнан бөлек спорт шебері атағы тағы бар. Сөйтіп спортшы ұсынған қызмет орынға бірден келмейді. Алайда ауылдағы ағалары, достары «елге қызмет ету керек, ауылдан чемпиондар шығару керек» деп жігерлендіреді. Осындай қолдаудан күш алған ол қызметке кірісіп, көптеген шәкірт тәрбиелейді.<blockquote>– Әдепкі жылдары сәл қиыншылықтар болды. Спортта бала тәрбиелеп, чемпион шығару да оңай жұмыс емес. Елдің абыройын арқалау ол үлкен жауапкершілік. Көпшіліктің жігерлендіруімен алға мақсат қойып, шәкірттерімді үздіксіз жаттықтырдым. Сөйтіп ауылдан мықты спортшылар шықса екен деген арманым орындалып, шәкірттерім жоғары орыннан топ жарды. Атап айтсам, Айшолпан Әмзеева, Гүлназ Шәмиева, Нұрбол Мүсілімов, Әмірхан Қожабаев, Ержан Шамшатов, Еранат Рахметов, Әділет Әбдіқали, Ермахан Орынбеков, Бабыр Қожантай, Данияр Сайлаубеков және өздеріңізге белгілі Ерасыл Сәулебеков. Осы аты аталғандар Қазақстан Республикасының чемпиондары, жүлдегерлері және спорт шеберлері. Мұнан бөлек халықаралық дәрежедегі екі оқушым бар. Мақсатымыз осы киелі топырақтан спорт саңылақтарын шығару. Қазір шүкір ауданымыздың спорттан ойып алар өзіндік орны бар. Барлығы осы үлкен қолдаудың, еңбектің арқасында, – дейді білікті жаттықтырушы.</blockquote>Айдар Қойшыбекұлы қазіргі таңда аудандағы дене шынықтыру-сауықтыру кешенінде ауыр атлет бойынша қызметін жалғастыруда. Мұнда 35 оқушы әр күні залға келіп жаттығады. Бапкер оқушыларының әр жаттығуын қадағалап, көз алдынан таса қылмайды. Тіпті үлкен додаларда қасына алып жүріп, жағдайын жасайды.<blockquote>– Спортта шәкірт тәрбиелеп додаға қосу, астыңдағы атыңды бәйгеге баптағанмен бірдей. Осыдан төрт жыл бұрын елді індет жайлаған уақытта спорт залдар уақытша жабылып, оқушылар жаттығуға келе алмады. Сонда тәуекелге бел байлап жарысқа үміті бар шәкірттерімді жинап, 6-7 ай үйде жаттықтырдым. Соның ішінде Ерасыл қасымда көп дайындалып, менімен бірге болды. Оның тамағын, жаттығуын үнемі бақылап отырдым. Сол үздіксіз жаттығудың нәтижесінде ол 2022 жылы Әлем чемпионы атанды. Кез келген шәкірттеріме қояр басты талабым бірінші – темірдей тәртіп, одан кейін адамдық қасиеттерді үйрету, яғни дұрыс сөйлесу, адамды сыйлау. Үшінші – жаттығудан қалмау. Міне, осының барлығын жиі айтып отырамын, – дейді ол.</blockquote>Білікті бапкер шәкірттері додаға түскенде оның қарсыласынан сынып қалмауын да қатты қадағалайтынын жасырмады. Мұндай жағдай спортта жиі орын алып тұрады дейді ол.<blockquote>– Ерасылмен екінші рет Албания еліне барар алдында оның қарсыласын әлеуметтік желіден іздеп тауып, таныстырдым. Кейін жарысқа сол елге барғанда әр аймақтан келген барлық спортшылар бір қонақ үйде болдық, бірге тамақтандық. Бірақ шәкіртімді бір елі қасымнан тастамадым. Басқа елдің спортшылары қастарына бірге тамақтануға шақырғанда да жібермедім. Себебі, қазір допинг деген бәле бар. Кім біледі, тамағына қосып жіберуі мүмкін ғой. Спортта тайталас қатты. Жарыста жүргенде Ерасылды қарсыласы армиян жігіт бірден «досым» деп жақын тартып, оған дайындықтағы видеоларын, мынша ауыр зілтемір көтергенін көрсетіпті. Мен оның психологиялық шабуыл екенін бірден байқадым. Содан оны шақырып алып, жеңіс әуелі Құдайдан екенін айтып, қарсыластан ешқандай қорқудың, қобалжудың керегі жоқ екенін түсіндірдім. Жалпы Ерасыл екеуіміз бір адам болып, тек көзбен, ыммен сөйлесіп жүрдік. Ол айтқанды тез түсініп, қағып алады, – дейді Айдар Ералиев.</blockquote>

Білікті бапкер жеңіске жетелейді

<a href="https://kyzylorda-news.kz/">Kyzylorda-news.kz.</a> Бапкер Өмірбек Кәлменовтың №13 олимпиадалық резервтің мамандандырылған балалар мен жасөспірімдер спорт мектебінде еңбек етіп жатқанына 10 жылдан асқан. Өзі де бұған дейін дүбірлі додаларда қарсыластарын шаң қаптырған, ал бүгінде білікті бапкерге айналған. Алдыңғы буыннан жиған тәжірибесін аудан жастарының қажетіне жаратуда.&nbsp;Айта кетейік, аталған спорт мектебіне қарасты Жалағаштағы «Дзюдо» үйірмесінде бүгінде 200-ге жуық бала бар. Олар 4 ауысыммен осы залда шыңдалады. Үйірмеде Өмекеңнен бөлек Жайдар Есенов, Олжас Талапбекұлы және Шыңғысхан Әбілхасенұлы сынды тағы 3 бапкер бар. 4 азамат осыған дейін мұндағы балалардан әлем чемпионатының жүлдегерлерін, халықаралық жарыстар мен ел біріншілігінің жеңімпаздарын шығарды.Үйірменің жетістігіне келсек, мұндағы білікті бапкерлерден тәжірибе жинаған Әділбек Берікұлы 66 келі салмақта республикалық жазғы спартакиадада жеңімпаз атанды. Бұған дейін ол халықаралық жарыстарда бірнеше рет топ жарған. Осында алғаш спорттың бұл түріне баулыған бапкері Өмірбек Кәлменов бүгінде ол облыс орталығында байрақты бәсекеге дайындалып жатқанын айтады. Алдағы айдың аяғында жерлесіміз Польшада өтетін еуропа кубогына қатысады.Мұнан бөлек үйірме түлегі Тынарбай Тілеген 2019 жылы Азия чемпионатында топ жарып, ел біріншілігінде қарсылас шақ келтірмеген. Сондай-ақ ол әлем біріншілігінде ел қоржынына қола салған болатын. Ал Әсел Бейсенбай – ҚР чемпионатының қола жүлдегері, жастар арасында Азия кубогының жеңімпазы, самбодан Азия чемпионы, ел біріншілігінің жеңімпазы. Сондай-ақ ол – дзюдо және самбо күресінен ҚР спорт шебері. Міне, аудан орталығындағы спорттың бір бүйірін бүтіндеп тұрған үйірменің тізе берсек, басқа да жетістіктері баршылық.&nbsp;<blockquote>– Осы үйрмеден түлеп ұшқан мықты спортшылар бар. Әрине біз олармен мақтанамыз. Бірақ олардың бізден кеткеніне өкінбейміз. Дұрыс, есейді, енді үлкен додаларда топ жаруы керек. Бастысы, спорттан шет кеткен жоқ. Барлығы түрлі додаларда әлі де топ жарып жатыр. Керісінше біз олардың алдағы жетістіктеріне қарап марқаямыз. Қазір олардың ізін басқан жастар да үлкен жарыстарда қарсылас шақ келтірмеуде. Алды халықаралық жарыстардың жеңімпазы болды. Бастысы, сабақтастық бар, алдыңғы аға буынның ізін жалғап, жастар дүбірлі додаларда жеңіс тұғырынан көрінуде. Бұл да болса жасап жатқан жұмысымыздың жемісі деп білемін. Біз оған марқаямыз, олармен мақтанамыз, бірақ тоқмейілсуден аулақпыз, – дейді Өмірбек Кәлменов.</blockquote>Бапкердің ауызын бақсақ, расында сабақтастық үзілмеген. Қазірдің өзінде үйірме құрамындағы Бақдәулет Болатбекұлы 35 келі салмақта халықаралық жарыста ел қоржынына алтын салса, дәл осы салмақта Кемел Сырмағамбет күміс медаль алған. Ал Түркістан облысында өткен республикалық турнирде Нұрдәулет Садық ақтық мәреге шығып, облыс қоржынына күміс салды.Былтыр үйірме қатысушылары жылды оң нәтижемен қорытындылаған. Республикалық турнирлерде 38 келі салмақта Ақәділ Батыржанұлы, 60 келі салмақта Нұржан Әбдіхалық қарсылас шақ келтірмеген. Ал 66 келі салмақта Ерсұлтан Темірболат пен 42 келі салмақта Заңғар Сырмағамбет үздік үштікті түйіндеген. Сондай-ақ өткен жылдың басты жаңалығы үйірмедегі 15-ке жуық оқушы ҚР спорт шеберіне үміткер атанды.Ақпанның аяғында Түркістан төрінде өткен ел біріншілігінде Өмекең 4 шәкіртін қосты. Мұнан бөлек жаз айларында және күзде де үйірме мүшелерін үлкен жарыстар күтіп тұр. Әзірге бапкерлер балаларына сеніп отыр. Сол сенім үдесінен шығуға оқушылар да қам жасап жатыр. Міне, үйірменің бүгінгі тынысы осындай, жұмысы жүйелі, жетістігі мол.&nbsp;

Жалағаштық жасөспірімдерге тегін үйірмелер көп

<a href="https://kyzylorda-news.kz/">Kyzylorda-news.kz</a> Жалағаш ауданында спорт саласы өркендеп, спортшыларымыз биік белестерді бағындырып жүргенін көріп жүрміз. Олар мықтылығын дәлелдеп, әлемдік жарыстарда көк байрағымызды желбіретіп, ауданның намысын қорғауда. Облыстық шағын футболдан ұлттық мектеп лигасына ауданнан «Наркескен» спорт клубы футбол командасы қатысып, жүлделі І орын иеленді. Сондай-ақ олар наурызда өтетін республикалық жарысқа жолдама алды.3 күнге созылған аяқдоп шеберлері арасындағы тартысты бәсекеде 7 командамен кездесу өткізген аудан қыздары бірінші күннен-ақ чепиондыққа үміткер екенін көрсетіп, алғашқы ойында Сырдария құрамасын 10:0 есебімен тізе бүктірді.&nbsp;Дәл осы дайындықпен келесі күндері де қалған командаларды ойсырата жеңді. Ақтық ойында Арал қыздар құрамасымен бақ сынап, 3:1 есебімен жеңіп, биыл да облыстың чемпионы атанды. Қазіргі таңда қыздарымыз республикалық ойынға қызу дайындық үстінде.– 2014 жылдан бастап «Наркескен» спорт клубында аға жаттықтырушы қызметіне орналасып, 2016 жылы футболдан қыздар бөлімін аштым. Содан бері қыздар футболы жақсы дамып, облыс көлеміндегі ірі жарыстарда жарқын жеңістерге жетіп жүр. Облыстың үш дүркін чемпионы, үш рет күміс, екі рет қола жүлдегер атанды. Екі футболшы қызымыз «Қайсар» футбол клубында облыс намысын қорғап жүр. Чемпиондыққа жетелеп, қыздардың жүлдегер атануында менен бөлек Рашид Бекарыстанов пен Есмағанбет Ғабдулла да өз үлестерін қосуда. Күнделікті жаттығу мен дайындықтың арқасында үлкен нәтижелер көрсетуде. Жалпы ауданда қыздар футболының дамуына үлес қосқан мектептер ұжымы мен қыздарымыздың ата-аналарына айтар алғысым шексіз, – дейді жаттықтырушы Жаңқожа Сағынбайұлы.Аудан құрамасы тек чемпион болып қана қоймай, құрамадағы 14 допты қақпаға дәл бағыттаған Альбина Смайл «Үздік шабуылшы», ал Маржан Мейрамбекқызы облыс бойынша «Үздік ойыншы» номинациясымен марапатталды. Расымен спортшысы жеңіске жетсе, бапкерінің қуанышында шек болмас. Әрбір футболшының жетістігін мақтана айтып, Жорабек Ұлту мен Болатбек Назымның үлкен футболдан Қызылорда облысының «Қайсар» футбол клубына жолдама алып, қазір облыс намысын қорғап жүргенін және Сайлау Ферузаның Астана футбол клубында ойнап жүргенін де тілге тиек етті.&nbsp;Футболдан ауданда ұлдар құрамасы да осал емес. Мәселен, республикалық «Былғары доп» жарысының қола жүлдегері, облыстың бірнеше дүркін чемпионы. Құрамадағы Төлепберген Әнуар қазіргі таңда Алматы қаласындағы «Қайрат» футбол академиясында тәлім алуда. Мақсат Әбжами «Қайсар» футбол клубының негізгі құрамында.&nbsp;Аудан құрамасы алдағы уақытта болатын жарыстар мен жолдастық кездесулерге қызу дайындық үстінде.

Жалағаштың аудан құрамасы абырой биігінде

<a href="https://kyzylorda-news.kz/">Kyzylorda-news.kz</a>. Спорттың қай саласы болмасын үлкен күшті, тынымсыз еңбек пен шапшаңдық, қырағылық сынды қасиеттерді талап етеді. Әсіресе ауыр тасты бірнеше мәрте көтеру оңай емес. Осы бір спорт түрін жанымен қалап, сүйікті ісіне кейін мамандығына айналдырған жандар да бар. Солардың бірі «Арал спорт клубы» каммуналдық мемлекеттік мекемесінің жаттықтырушысы Қайрат Разақов. Ауданның атын жақсы қырынан шығарып, спорттың дамуы жолында табанды еңбек еткен жандар туралы ақпарат жинақтау барысында Қайраттың табысты жолы таң қалдырған болатын. Ендеше оның &nbsp;жемісті белесін бүгінгі әңгімеге арқау етпекпіз.&nbsp;Бала кезден спортты жанына серік еткен Қайрат гір тасын көтеру мен қол күрестен өзінің мықтылығын талай мәрте қатарластары арасында дәлелдеген. 2011 жылы Қорқыт ата атындағы Қызылорда мемлекеттік университетін денешынықтыру және спорт бағыты бойынша бітіріп, диплом алған соң «Арал Спорт клубы» КММ-не нұсқаушы болып жұмысқа орналасады.&nbsp;<blockquote>– Жас кезімде қол күрес, гір тасын көтерумен өз бетімше айналысып, үнемі өзімді шыңдап отырдым. Түрлі деңгейдегі жарыстарға қатысып жүрдім. Сол сәтте өзімнің болашағымның тек спортпен байланысты екендігін түсіне бастадым. Осылай сүйікті ісімді мамандыққа айналдырып, қазір тәжрибемді жастармен бөлісіп жүрмін. Шәкірт тәрбиелеу ісімен де тұрақты түрде айналыса бастағаныма 10 жылға жуықтап қалыпты. Мені шыңдап отыратыны да осы жұмыс, - деді Қайрат.&nbsp;</blockquote>Қайрат қазір гір тасын көтерудің қыр-сырын 60-қа жуық жеткіншекке меңгертіп жүр. Спортшының үміт артқан шәкірттері де жаттықтырушыларын жерге қаратқан емес. Республика көлемінен бөлек, әлем, Азия чемпионы атанып, көк байрақты көкте қалықтатын жүрген талантты шәкірттер.&nbsp;<blockquote>– Гір тасын көтеру серпе және жұлқа көтеру болып екіге бөлінеді. Жарыс жолында балалар ауыр тасты көтеру кезінде тез шаршап, аз көтеріп қалмас үшін пайданалылатын небір техникалар бар. Өзіме мұның бәрі тәжірибемен келді. Шәкірттерімнің арасында Әлем чемпионатына қатысқан балалардың екеуі чемпион болды. Екі спортшы жүлдегер атанды. 4 бала Азия чемпионы болды. &nbsp;Шәкірттерімнің екеуі спорт шебері. Спорт шеберлігінен кандидат &nbsp;ретінде 3 шәкіртім тұр. Олардың барлығы гір тасын көтеруді сүйікті спортына балап келген бір кездегі кішкентай жеткіншектер. Тынымсыз еңбектің арқасында жетістік жолдарын жалғап, әлемдік деңгейде танымал болды, - дейді жаттықтырушы.&nbsp;</blockquote>Қайрат Разақовтың өзі де гір тасын көтеруден алдына қара салмай келе жатқан спортшылардың бірі. 32 келі гір тасын бір көтергенде 80 рет &nbsp;көтереді. 5 мәрте Әлем чемпионы, 6 дүркін Азия чемпионы, Халықаралық &nbsp;дәрежедегі спорт шебері. Бұл жеңіс жолына шәкірттерінің бағындырған белесін қоссақ, бір Қайраттың өзі гір тасын көтеру спортына ауыз толтырып айтарлық нәтиже көрсетіп жүргендігін байқауға болады. Әрине бұл жеңісі жол жалғасын таба бермек.

5 мәрте Әлем чемпионы атанған аралдық спортшы 60 жуық шәкірт тәрбиелеуде 

<a href="https://kyzylorda-news.kz/">Kyzylorda-news.kz</a>. Бір отбасының 6 баласы шахматтан &nbsp;аудан мерейін асырып жүрген Қазақстан Республикасының чемпиондары. &nbsp;Алтаудың &nbsp;мектеп бітірген төртеуі «Алтын белгі» иегері атанып, еліміздің белгілі университеттерінің мемлекеттік білім грантын еншілеген. Ал қаладағы №62 мектеп-лицейде оқитын екі баласы да үздік шәкірттер көшін бастап тұр. Біз Мейірхан Бармағамбетов пен Роза Сабированың &nbsp;мерейін өсіріп, мәртебесін көтеріп жүрген балалары туралы айтып отырмыз. Бүгінгі мақалаға осы отбасы арқау болмақ.&nbsp;Мейірхан &nbsp;пен Роза &nbsp;ешқандай мемлекеттік мекемеде яки басқадай салада тұрақты жұмыс істеп көрген емес. Отағасы әртүрлі маусымдық жұмыстар істеп отбасына қамқор болса, отанасы шаңырақтың шырайын кіргізіп өмірге алты бала әкелген көпбалалы ана болы жүріп, бала тәрбиесімен үй шаруасымен айналысты.&nbsp;<blockquote>– Мектепті жақсы оқыдым. Әсіресе математика ең сүйікті пәнім болды. Кітап оқудан қол үзген адам емеспін. Бірақ өкінішке орай жоғары оқу орнын оқып, мамандық ала алмадым. Оған себеп анам жалғыз еді. Оны қалдырып кетуге дәтім жетпеді. Мектеп бітірген соң бірден еңбекке араласып, құрылыс саласында жұмыс істедім. 1999 жылы Роза екеуіміз отбасын құрдық, - деп бастады әңгімесін кейіпкеріміз.&nbsp;</blockquote>2000 жылы Сағыныш есімді тұңғыш ұлдары өмірге келеді. Жастайынан зерек болып өскен ұл әкесі секілді есепке жүйрік болып шықты. Мейірхан Бермағамбетов баласының болашағына зор үмітпен қарай бастады. Кішкентайынан шахмат тақтасы үстіндегі шайқастың қыр-сырын өзі үйретеді.&nbsp;<blockquote>– Сағыныш шахматты жақсы меңгерді. Мектеп қабырғасында жүргенде ойнап, облыстық, республикалық жарыстарда жеңімпаз болғаны болмаса қазір бар ынтасын тек білім жолына арнады. Мектепті «Алтын белгімен» бітірген соң Алматы қаласындағы ҚАЗГУ-дің математика пәні мұғалімі мамандығының білім грантын жеңіп алды. Кейін аталған оқу орнында өз мамандығы бойынша магистратура бітіріп, биыл доктарантураға түсті. 2002 жылы туылған Сақыпжамал қызым шахматтан Қазақстан біріншілігінің жүлдегері, әлем, Азия &nbsp;чемпионатына қатысты. Команда бойынша жүлдегер болды. Мектепті «Алтын белгімен» бітірген соң Алматы Аграрлық университетінің грантын алды. Қазір оқуын бітіріп мамандығы бойынша жұмыс істеп жатыр. Ол әлі шахматтан қол үзген жоқ, - дейді әкесі.</blockquote>Үшінші перзенті Мейіржан шахматтан Қазақстан біріншіліктерінде жүлделі жеңіс тұғырынан көрініп, Азия чемпонатына қатысқан. Мектепті үздік бітірген ол қазір Орал қаласындағы университеттің 4 курс студенті. Ал &nbsp;&nbsp;математик һәм шахматшылар көшін жалғаушы Сабина шахматтан облыс чемпионы, Қазақстан кубогінің иегері. Өткен оқу жылында мектепті «Алтын белгімен» бітіріп Мейіржан оқитын университеттің бірінші курс студенті атанды.&nbsp;Қазірі мектептегі үздік оқушы Ақылжан жуырда шахматтан Қазақстан чемпоны атанды. Еліміздің әр өңірінен іріктеліп келген 111 баланың арасынан оқ бойы озып шыққан Ақылжан осылайша командалық есеп бойынша Қызылорда облысына 3 орын алып берді.&nbsp;<blockquote>– Ақылжан алғыр, ізденімпаз. 7 сыныпта оқиды. Оның дайындалуына бәріміз көмектесеміз. Осы жарыста да ағалары, анасы, өзім бірге барып қолдау көрсеттім. Баламның таудай талабы болып тұрса, оның мерейін көтеру ата-ананың парызы деп білемін. Сондықтан «оқу оқимын, жарысқа барамын» деген талпынысы бар балаларымның бетінен қаққан емеспін. Кезінде өзімде ондай мүмкіндік болған жоқ. Бірақ менің армандарыма балалар жетіп жатыр, - дейді Мейіржан Кішібайұлы.&nbsp;</blockquote>Қазақтың «Болам деген баланың бетін қақпа, белін бу» деген тәмсіл сөзін санасына сіңірген әке дәл осы кезде кенжесі Айзерені Шымкент қаласында өтіп жатқан шахматтан Қазақстан чемпионатына алып барып, жарыс жолына салып жүр. Айзере 2 сынып оқушысы болса да өз қатарластарынан оза шауып облыста чемпион болған еді.&nbsp;Мейірхан Бермағамбетов сұхбаттасу барысында өзінің көкейіндегі мәселені де айтып қалды. Оның айтуынша шахматқа ынталы ауданда балалар көп, бірақ даярлайтын шахмат федерациясын айтпағанда &nbsp;не мектеп, не клуб жоқтығын тілге тиек етті. Расында осы отбасының балаларынан өзге шахматтан аудан атын асқақтатып жүргендер жоқ деуге болады.&nbsp;<blockquote>– &nbsp;Маған үйренуге келгісі келетін балалар көп. Бірақ мен қаншама уақытым мен энергиямды босқа сарп етпеймін ғой. Өзім жұмыссыз адаммын. Сондықтан ақылы түрде үйретемін десем көбінің қалтасы көтермей жатады. Және бұл тыңғылықты күнде дайындықты талап ететін ойын болған соң кейбірінің шыдамы түгесіп қалады. Сондықтан «ауданда шахматқа ынталы балаларды үйрететін неге бір орталық жоқ» деген сауал жанымды жегідей жейді. Арнайы мамандар алдырып, айлық төлесе ақыл мен ой ұшқырлығын дамытатын ойынды үйренушілер көп болар еді. Менің балдарымнан да талантты балалар бар. Шахматты дамытуға күш жалса Аралдан талай чемпиондар шығады әлі, – деп сөзін сабақтады кейіпкеріміз.&nbsp;</blockquote>Мейірхан Бермағамбетов белгілеп алған мамандығы болмаса да «әке» деген ардақты атты асқақтата білді. Әкелік рөлін қалтқысыз орындап, балаларына білім мен шахматтың қатар меңгертті. Соның арқасында ұрпағының жетістігімен мерейі өсіп, мәртебесі биіктеп отыр. Аралдағы шахметтан аудан мерейін асырып, білімннің алтынын алған алтын балалардың ата-анасы болудан асқан бақыт та жоқ шығар пенде үшін. Отбасындағы «алтын белгі» мен шахмат чемпиондарының көшін Ақылжан мен Айзере де жалғайтыны сөзсіз.

Аралда бір отбасының 6 баласы шахмат чемпион

<a href="https://kyzylorda-news.kz/">Kyzylorda-news.kz</a>. Аудан бойынша дене шынықтыру және спортпен жүйелі түрде шұғылданатын 31 208 адам бар. Бұл жалпы аудан тұрғындарының 39 пайыз үлесін құрайды.&nbsp;Аудан көлемінде тұрғындар арасында бұқаралық спортты дамыту мақсатында 75 спорттық іс-шара өткен. Оның бесеуі республикалық, алтауы қалааралық, елуі аудандық және он төрті кент, ауылішілік, мекемеішілік жарыстар.Жыл басынан бері ауданның спортшылары біршама жетістіктерге қол жеткізді. Қазақстан Республикасының чемпионаттары мен біріншілік жарыстарында аудан спортшылары 56 медальға ие болды. Оның &nbsp;29 алтын, 13 күміс, 14 қола.&nbsp;Сонымен қатар 10 грек-рим күресі бойынша спорт шеберіне кандидат, 5 бокс спорты бойынша, 1 еркін күрестен &nbsp;спортшы тіркелді. Унифайт спорты бойынша 1 спортшы спорт шебері атанды. &nbsp;&nbsp;&nbsp;&nbsp;I спорттық разряд бойынша волейболдан 3 спортшы аталынды.&nbsp;Өзбекстан Республикасы Хива қаласында өткен Гір спортынан Әлем біріншілігінде аралдық спортшылар 1 алтын, 3 күміс, 1 қола медаль иеленді.Әмбебап жекпе-жектен Қырғызстан Республикасында Азия чемпионатынан &nbsp;аудан спортшылары 7 алтын және Грузияның астанасы Тбилиси қаласында өткен әлем чемпионатында 7 алтын, 1 күміс медаль иеленді.&nbsp;Арал қаласында спортқа жаны құмар балаларды тәрбиелеп, чемпион шығарып, аудан абыройын асырып жүрген №19 Арал ауданының олимпиадалық резервтің мамандандырылған балалар-жасөспірімдер мектебінің қызметкерлерінің толымды тірлігі мен жеткен жетістігін тілге тиек етпеске болмас. Себебі осы мектептен тәй-тәй қадам басқан жас өрендер қазір спорт шебері, Азия және Әлем чемпионы болып, еліміздің көк байрағын желбіретіп жүр. Олардың жеңісті жолында аталған мектептің алар орны ерекше. Серік Алмағамбетав басшылық жасайтын мектептің жайына толығырақ тоқталып өтсек.&nbsp;Мұнтаздай етіп жинақталған, жаз мезгілінінде маңайы гүлмен көмкеріліп жататын бұл мекеме көңілге жайлылық, бойға серпіліс беретіндей. Бокс, күрес, дзюдо, таеквондо, каратэ, жекпе – жек залдары &nbsp;спортшы оқушылар киім ауыстыратын және жуыну бөлмелері де қарастырылған. Бұған қоса Аманөткел, Қамыстыбас елді мекеніндегі спорттық сауықтыру кешені де аталған мектеп құрамына кіреді. Сонымен қатар Қаратерең және Аралқұм орта мектептерінің залдарын пайдалана отырып бокс және грек-рим бөлімшелері жұмыс жасап тұр.Өткен оқу жылында мектепте 11 спорт бөлімшесі жұмыс істеген. Атап айтар болсақ, бокс, еркін күрес, грек-рим күресі, дзюдо, таэквондо, каратэ жекпе-жек сынды батылдық қайрат қалыптастыратын секциялар, баскетбол, волейбол, футбол және әмбебап спорт түрін меңгеруді меңзеген жастарған арналған бөлімшелер. Қазіргі таңда мектепте осы аталған бөлімшелер бойынша 36 &nbsp;жаттықтырушы жұмыс істейді.&nbsp;– Жыл сайын мектеп абырой бейігінен көрініп, спортшыларымыз көк байрағымызды көкте қалықтатып жатады. Әрине, мұның бәрі тыңғылықты дайындық, мол ізденіспен келетін дүние. Өткен оқу жылында №19 Арал ауданының олимпиадалық резервтің мамандандырылған балалар-жасөспірімдер мектебінде жалпы саны 11 спорт түрі бойынша, 112 топта барлығы 1368 оқушы спортпен шұғылданды. Оның ішінде спорттық сауықтырудың 29 тобында 504 оқушы, алғашқы дайындықтың 35 &nbsp;тобында 442 оқушы, оқу-жаттығу бойынша ашылған 38 топта 362 оқушы, спорттық жетілдіруге арналған 10 топта 60 оқушы алуан түрлі спорт түрінен дайындалды. Оқушылар артылған үміт пен жұмсалған күшті ақтай білді. Спортшыларымыз Алпамыс Болатұлы грек-рим күресінен Семей қаласында өткен жасөспірімдер арасындағы ҚР чемпионатында І орын, Ибраймов Айбат еркін күрестен Талдықорған қаласында өткен жастар арасындағы ҚР чемпионатында ІІІ орын, Тымақова Нұрдана, Олжабаева Айкен, Романқызы Нұрай волейболдан кіші жасөспірім қыздар арасында Шымкент қаласында өткен қысқы және Өскемен қаласында өткен көктемгі ҚР чемпионаттарында І орын, Естайұлы Әділбек волейболдан Талдықорған қаласында өткен жасөспірім ұлдар арасындағы ҚР чемпионатында ІІ орын иеленді, - деді Серік Алмағамбетов.Сондай-ақ жас өрендер әлемдік додаларда бой көрсетіп қана қоймай, еліміздің көк байрағын көкке көтерді. Унифайттан (әмбебап жекпе жек) Грузия мемлекетінің астанасы Тбилиси қаласында өткен жасөспірімдер арасындағы Әлем чемпионатында Диас Ғалымжанұлы, Жансүйен Мұхтарұлы, Мансұр Өтебай, Бақытжан Серікбай, Ерасыл Сәдіров, Ернұр Әбжамиев жүлдеді І орынды иеленге. Осы жарыста &nbsp;Кемалов Нұралы 2 орын алғанына да айта кету керек. Ерекше атап өтуге болады, унифайттан аралдық спортшылар талай биікті бағындырып жүр. Қырғызстан елінің Ыстықкөл қаласында өткен жастар мен жасөспірімдер арасындағы Азия чемпионатында, Түркістан қаласында өткен жасөспірімдер мен жастар арасындағы ҚР чемпионатында, Байқоңыр қаласында өткен жасөспірімдер арасындағы ҚР чемпионатында бірқатар жасөспірім спортшылар жеңіс түғырынан көрінген.&nbsp;– Толық түйіспелі жекпе-жектен Алматы қаласында өткен жасөспірімдер арасындағы ҚР чемпионатында Кеңесбаев Ерасыл І орын, Өтебай Мансұр, Ғалымжанұлы Диас ІІ орын, Өтеумағамбетов Марғұлан, Серікбай Бақытжан ІІІ орын, жекпе-жектен Түркістан облысы, Қазығұрт ауданында өткен жасөспірімдер арасындағы ҚР чемпионатында Әбжамиев Ернұр ІІ орын еншіледі. Ал аталған жарыста ІІІ орын алған Серікбай Бақытжан оқу жылы ішінде таэквондодан Алматы қаласында өткен жастар арасындағы ҚР чемпионатында ІІІ орын иеленіп жеңісті белестерді бағындырған болатын. Панкратионнан Қостанай қаласында өткен жасөспірімдер арасындағы ҚР чемпионатына қатысқан жас өрендер де жүлдесіз қайтқан жоқ. Осы жылы грек-рим күресмен шұғылданатын спортшыларымыз Алпамыс Болатұлы мен Әмірмұхан Қабылов Қазақстан чемпионатын жеңіп, Әлем чемпионатына қосуды жоспарлап отырмыз, - дейді мектептің басшысы.&nbsp;Мектепте аудандық мәдениет және спорт бөлімімен бірлесе отырып, спорттың бірнеше түрінен жыл сайын аудандық, облыстық, республикалық жарыстар өткізіліп тұрады. Атап айтқанда, еркін күрестен Сахытжан Мүсенов атындағы республикалық турнир, Жасағанберген Қазтуғанов атындағы облыстық турнир, грек-рим күресінен Дәри Құттымұратов атындағы республикалық турнир, бокстан Жалдыбай Нұрпейісов атындағы облыстық турнир, баскетболдан Алмас Жанназаров атындағы облыстық турнир, волейболдан Асхат Аханов атындағы қалааралық турнир, футболдан Аманқос Есмұрзаев атындағы аудандық турнирлер өткізілген.&nbsp;Жоғарыдағы айтылған жеңіс жолы мен жасалған жұмыстар алдағы уақытта да жалғасын табатынын мектеп директоры да тілге тиек етіп қалды.Спортқа құмар жандардың шамшырағын жаға білген, оларға дұрыс жол нұсқап, бағыт-бағдар беріп отырған спорт мектебі ұжымының да еңбегі орасан зор.

Аралдық спортшылар 56 медальға ие болды

<img src="http://degdar-news.kz/wp-content/uploads/2024/03/64DFC43E-6A55-4365-BAB8-F09842E9E636-920x425.jpeg" alt="" loading="lazy"><a href="https://kyzylorda-news.kz/">Kyzylorda-news.kz.</a>&nbsp; Аудан көлемінде отыз жылға жуық тарихы бар аралас жекпе-жек спорт түрімен жастар тұрақты түрде айналысуда. Білікті бапкер, өз ісінің шебері&nbsp;Иса Әкімжанов аудандық спорт клубының жанынан ашылған ММА үйірмесіне жетекшілік етеді. Аралас жекпе-жектен үздік нәтиже көрсетіп келе жатқан спортшылардың бірі – Нұртілеу Қалдыбек. Қазіргі кезде 55-56 салмақ дәрежесінде сынға түсетін жас спортшы жоғарғы дәрежедегі жарыстарда топ жарып келеді.Жас спортшы Нұртілеу Дастанұлы ММА үйірмесіне 3 жыл бұрын келген. Оған дейін былғары қолғап шебері ретінде рингте талай мәрте бағын сынады. Әкесінің бағыт-бағдарымен аралас жекпе-жекті таңдаған ол – биыл №36 Әбділда Тәжібаев атындағы мектеп-лицейінің 11 сыныбын аяқтағалы отыр. Әрқашан жаттығудан қол үзбейтін жеткіншек ел намысын әлемдік ареналарда қорғауға ниеті бар. ҰБТ-да шығармашылық бағытты таңдауға бел буған оқушы спорт саласының маманы атануға бел буған.<blockquote>– Күш қолданылатын спорт түрімен айналысу әркез қауіпті болатыны сөзсіз. Десе де, жаттығуда өзіңді аямау арқылы аралас жекпе-жектің ең үздігі болу үшін үздіксіз еңбектеніп келемін. Кез келген жарыс барысында 2-3 жекпе-жек өткізуге жан-жақты дайын болу керекпіз. Күн сайын өткізілетін жаттығу барысында кемшілікпен жұмыс жасап, ықтималды қарсыластың әлеуетін саралаймыз. Жеңіске жету, үздік деген атқа лайық болу – әсте оңай нәрсе емес. Салмақ қуалап, жарысқа тыңғылықты дайындалуға психологиялық тұрғыдан да әзір болған жөн. Шындығында, октагонда шыр айналып жүре бермей, қарсыласты зерттеп жеңіске жетуге бар күшті жұмсау қажет. Жекпе-жекке түспес бұрын, әдіс-тәсілді ұтымды қолдану – жақсы нәтижесін береді, – дейді сайыпқыран спортшы.</blockquote>Нұртілеу Қалдыбек үшін былтырғы жыл табысты болғаны мәлім. Себебі, жас спортшы өз салмақ дәрежесінде облыс чемпионы атанып, ел біріншілігіне жолдама алады. Байрақты бәсекеде сырдариялық саңлақ қолаға қол созады. Сонымен қоса Қостанай қаласы мен Арал ауданындағы республикалық жарыста жүлдегерлер қатарынан көрінді.<blockquote>– Жалпы, ММА үйірмесі ашылған уақыттан нағыз сайыпқыран спортшыларды дайындауды мақсат тұтып келеміз. Сондықтан аптаның 5 күнінде жаттығу залында балалар шынығады. Нұртілеу болашағынан зор үміт күттіретін спортшы саналады. Жарыс жолына шыққанда қарсыласты ұпай санымен жеңіп кетіп жатады. Бұл тұста, оның боксқа қатысқан кезінде меңгерген техникасы өз көмегін тигізіп жатады. Қылқындыру әдісі арқылы жекпе-жекті мерзімінен бұрын аяқтауға тырысады, – дейді ММА үйірмесінің жаттықтырушысы әрі білікті бапкер Иса Әкімжанов.</blockquote>

Нұртілеу аралас жекпе-жек шебері

<a href="https://kyzylorda-news.kz/">Kyzylorda-news.kz</a>. Қазақстан құрамасы Азия чемпионатында тағы 1 алтын медаль жеңіп алды, деп хабарлайды El.kz ақпарат агенттігі.Филиппиннің Нью-Кларк-Сити қаласында өтіп жатқан су спорты түрлерінен әлем чемпионатында ұлттық құрама қоржыны бір алтын медальмен толықты. ҚР Туризм және спорт министрлігі Спортты дамыту дирекциясының баспасөз қызметінің мәліметінше, көркем жүзуден Қазақстан құрамасы (13-15 жас) аралас топтық сайыста чемпион атанды.&nbsp;Команда құрамында Милана Ашаханова, Карина Доценко, Сания Гибадуллина, Анжелина Горюшина, София Ищенко, Даяна Жаманчалова, Альбина Өмірсерікова, Варвара Снегирёва, Аяулым Жақпаева, Перизат Багаева өнер көрсетті.&nbsp;Көркем жүзу. Қыздар. Аралас топтық сайысҚазақстан - 204.6708 ұпайӨзбекстан - 183.5552Таиланд - 124.9374

Азия чемпионаты: көркем жүзуден Қазақстан құрамасы үздік шықты

<a href="https://kyzylorda-news.kz/">Kyzylorda-news.kz.</a> Қазірде барлығын бір мезетте қолдағы қалтафоннан көре салатын кез ғой. Оның ішінде даму жолына, пайдалы ақпаратты көріп-біліп жүрсеңіз құба-құп. Жақында осындай жақсы дүниелермен бөлісіп отыратын бір қыздың парақшасынан кент орталығындағы орналасқан спорт кешеніне барып, фитнес залда жаттығып жүргенін көзім шалып қалды. Өзі қара шаңырақтағы келін. Бес бірдей баласының бабы, сабағы, келіндік міндетімен қоса тән саулығына да көңіл бөліп жүргені сүйсінтті. Кенжесі 8 айлық. Соған қарамай үй шаруасының бәріне үлгеріп жүргені таң-тамаша етті.«Қалауын тапса, қар жанады» дейді емес пе?! Ебін тапса бәрінің реті табылады. Бұл көп қызға мотивация да болған көрінеді. Себебі жаттығуға алғашқы барып жүрген кездердегідей емес, қазір адам қарасы көбейген.Мемлекет басшысы Қасым-Жомарт Тоқаев өз Жолдауында «Денсаулық кепілі – дене шынықтыру. Халықтың спортпен шұғылдануына барлық жағдай жасалуы қажет» деген болатын. Өңірімізде спорт инфрақұрылымын дамытуға ерекше мән беріліп келеді. Оның ішінде ауданымызда бұқаралық спортты дамыту бірізді жолға қойылуда. Осыған сәйкес өткен жылы «Ауыл – Ел бесігі» бағдарламасымен Жосалы кентінде Дене шынықтыру-сауықтыру кешені ел игілігіне берілген болатын. Жарты жылға жуық жұмыс істеп тұрған кешеннің бүгінгі тыныс-тіршілігін білмекке тілшілер табан тіреген едік. Түскі үзіліс уақытына сәйкес келіппіз. Мұндағы дайындықтың қызу жүретіні түстен кейін және кешкілік уақыт. Біз барған уақытта техникалық қызметкер үлкен залды тазалау үстінде екен. Қар жауып, дала батпаққа батқанда, бұл кісілердің сырт көзге білініп, елене бермейтін еңбегіне еріксіз бас игіңіз келеді.Соңғы жылдары ауданымызда құрылыс жұмыстары қарқын алып келеді. Жалпы аумағы 1500 шаршы метрден асатын спорт кешенінде тренажер, фитнес және әмбебап залдар бар. Кешенге Марат Асылов басшылық етеді.Еткен еңбек, төккен тер нәтижесіз емес қармақшылық спортшылар да байрақты бәсекелерде аудан намысын абыроймен қорғап, жеңіс тұғырынан көрініп жүр. Осы орайда олардың жайлы, қолайлы жерде тұрақты жаттығуы бәрінен маңызды. Бізде бүгінде жасөспірімдер арасында 192 спортшы жаттығады. Оның ішінде қол добы (гандбол), футбол, баскетбол, волейбол сынды спорт түрлерінен жаттығады. Сонымен қатар соңғы уақытта Президенттік көпсайыс жүгіру, секіру, доп лақтыру секілді түрлерге басымдық берілуде. Мұнан бөлек, кент тұрғындары кешкілік уақытта тренажер залдарына келіп инструктор көмегімен дене шынықтырумен айналысып келеді. Олардың арасында үлкен жастағы аға-апаларымызды көріп қуанып қаламыз. Себебі қай жаста болса да деннің саулығы бәрінен биік тұрады ғой, – дейді Марат Мұқанғалиұлы.Сонымен қатар мұнда Сания Молдабаеваның жетекшілігімен қыз-келіншектерге арналған «Зумба» биі жүргізілуде. Дүйсенбі, сәрсенбі, жұма күндері кешкі уақытта қатысуға болады. Қазірге бұл топта 20-ға жуық қыз бар. Мұнан өзге тренажер залында жаттығуға мүмкіндік бар. Апта ерлер мен әйелдер күніне орай бөлінген. Мысалы аптаның сейсенбі күні тек әйелдер жаттығады. Айта кетейік, бұл тегін. Яғни залға келіп дене шынықтырғаныңыз үшін ешкімге ақы төлемейсіз. Тән саулығына көңіл бөлемін деген жанға бұл тамаша емес пе?!Кент орталығынан спорт кешенінің ашылғанына қуаныштымын. Бүгінде көбінде кездесетін ең үлкен проблема ол – артық салмақ. Осы салмақтан арылу үшін қайда барып, не істерін білмей жүрген жандар бар. Олар осында келіп жаттығуына болады. Тек артық салмақ үшін емес, саламатты өмір салтын ұстану мақсатында да баруға кеңес берер едім. Үлкен кісілерден бөлек, жастарда қазір тізе, буын ауруларына көп ұшырап жатыр. Сол кісілерге жақсы көмектесер еді. Ең қолайлысы – тегін. Бәріне қолжетімді. Мұнда барлығына жол сілтеп, қалай жаттығу қажет, кімге істеуге болады, кімге істеуге болмайды, барлығын түсіндіріп жүрген инструктор тренер бар. Өз бетіңше жаттығу жасаған бір бөлек, тренердің нұсқауымен жасаған бір бөлек. Берілген бұл мүмкіндікті тиімді пайдаланып, басты байлық денсаулыққа көңіл бөлгеніміз дұрыс болар, – дейді Жосалы кентінің тұрғыны Назерке Қожаберген.

Жосалы кентінде дене шынықтыру-сауықтыру кешенінің жұмысы жүйелі 

<a href="https://kyzylorda-news.kz/">Kyzylorda-news.kz</a>. Қазақ халқының ұлттық ойыны әрі есеп-қисапқа негізделген спорт түрі – тоғызқұмалақ ойнауды кішкентай күнінен жанына серік еткен тереңөзектік Ақерке Кенжебекова Азия чемпионы атанып, ел мерейін үстем етіп жүр. Бұған дейін де Азия чемпионы атағын иеленіп, өткен жылы Моңғолияда өткен чемпионатта 9 мемлекеттен келген 200-ден астам спортшыны тағы да шаң қаптырған Ақеркемен сұхбаттасқан болатынбыз.– Ақерке, жаңа белес, екінің біріне бұйыра бермейтін жеңіс, екі дүркін «Азия чемпионы» атануың құтты болсын! Ең алдымен оқырманға өзіңді таныстырып өтсек?– Сырдария ауданы, Тереңөзек кентінде дүниеге келдім. 2007 жылы осы елді мекендегі білімнің қара шаңырағы атанған О.Әбілпаттаев атындағы №210 орта мектебінің табалдырығын аттадым. 2018 жылы оқуды тәмәмдап, Қызылорда қаласындағы Қорқыт Ата атындағы университеттің «Дене шынықтыру және спорт» мамандығына оқуға түстім. Отбасыма келер болсам, әкем, анам, әпкем, мен және інім бар. Қазіргі таңда Жалағаш ауданындағы «Наркескен» спорт клубында жаттықтырушы болып жұмыс істеймін. Тоғызқұмалақ үйірмесінде оқушылар дайындаймын.– Негізгі бағытымыз тоғызқұмалақшы Ақерке туралы болғандықтан, бірден спорт саласына ойысайық. Спортқа қай кезде, қалай келдің? Тоғызқұмалаққа бейімделуге не әсер етті?– Спортқа негізінен әпкемнің ықпалымен келдім деп айтуға болады. Себебі осы тоғызқұмалақ үйірмесіне бастапқыда әпкем қатысқан еді. Ақнұр тоғызқұмалағын үйге алып келіп, жаттығып жүрді. Отаудан отауға тасырлап түсіп жататын құмалақтарға қарап ерекше таң болып, қызығатынмын. Спорттың бұл түрін таңдауыма балалық кездегі осындай қызығушылығым себеп болған шығар. Үйірме жетекшілері мектепке келіп, түсіндірме жұмыстарын жүргізіп, үйірмелерге қатысуға үндейтін. Сондай сәттің бірінде мен де топқа қосылдым. Ол кезде небәрі 2 сыныпта оқитын едім. Сонымен қатар, спорт саласында үлкен жетістіктерге жетуімде атам Кенжебек Әбдіхановтың да рөлі зор. Орман шаруашылығы саласында жұмыс жасайтын атам мені кішкентайымнан қолдап, түрлі жарыстардан қалдырмауға тырысатын. Осылайша тоғызқұмалақ ойынына деген қызығушылығым арта түсті. Кішкентай балаларды бейімдеуде, оның қызығушылығын дамытуда ұстаздың рөлі зор ғой. Ағайым Білімжан Елеусінов оқушыларға жақсы қарап, ойынның қыр-сырын жалықпай үйретті. Менің ойымша, қандай спорт болмасын жаттықтырушы өз ісінің білікті маманы болса, сол спорттан көптеген чемпион шығады. Міне сондай білікті маман, өз ісінің нағыз шебері деп Білімжан ағайды айта аламын. Қазір ол кісі менің спорттағы жаттықтырушым болмаса да, өмірлік ұстазым болып қалары анық. Тіпті, Қызылорда бойынша ең мықты ойыншылар Тереңөзектен, Білімжан ағайдың үйреткен спортшыларынан шығуда деуге себеп бар.– Тоғызқұмалақ ойыны несімен ерекше? Ойында не маңызды?– Тоғызқұмалақ – қазақтың ұлттық ойындарының бірі, тіпті Абай Құнанбайұлының сүйікті ойыны болған екен. Сондай-ақ, адамның ойлау қабілетін, логикасын дамытатын қыры және бар. Сонымен қатар бұл ойынның тәрбиелік мәні де зор. Баланы сабырлыққа, ұстамдылыққа, төзімділікке, кез келген істе терең ойлай білуге дағдыландырады. Айта кетерлігі, спорттың бұл түріне тереңінен машықтанған жандарға түрлі деңгейдегі сайыстарға қатысып, бағы мен бабын сынап көруге мүмкіндіктер өте зор. Яғни, түрлі қала мен ел аралап, қазақтың ұлттық ойынын дәріптеуге де болады. Ойында ең маңыздысы асықпай дұрыс шешім шығара білу. Есепке жүйріктік пен логиканың мықтылығы да рөл ойнайды.– Былтырғы Азия чемпионаты қалай болды?– Ең бірінші мен 2010 жылы Қостанай қаласында өткен жасөспірімдер чемпионатына қатысып, тоғызқұмалақтың «классика», «рапид» деген екі түрінен де 1 орын алдым. Сол кезден бастап осы спортты әрі қарай үйреніп, өз қабілетімді шыңдауым керегін ұқтым. Азия чемпионатына жолдамамен қатыстым. Ол жолдамаға Қазақстан Республикасының Ересектер арасындағы чемпионатынан 1,2 орын алған адамдар ие бола алады. Мен Шымкент қаласында сәуір айында өткен Ересектер арасындағы чемпионатта «классика» түрінен 2 орын алдым. Солай Азия чемпионатына жолдама жеңдім. Моңғолия мемлекетінде, Баян-Өлгей қаласында 4-12 тамыз аралығында Азия чемпионатына барлығы 9 мемлекеттен 200-ден астам спортшы қатысты. Басты қарсыластарымның ең «қауіптісі» Қазақстаннан Асель Далиева болды. Ол – Әлемнің 11 дүркін чемпионы. Содан кейін Қырғызстан, Моңғолия мемлекетінің мықты ойыншылары басты қарсыластарым болды. Барлығы алты тур өтті. 4-ші турда Әлемнің 11 дүркін чемпионы атанған қарсыласымды басып оздым. Барлығы 6 турдан 5,5 ұпай жинап 1 орынға ие болдым. Айта кетсем, тоғызқұмалақтан халықаралық дәрежедегі спорт шебері, Қазақстан Республикасының бірнеше дүркін чемпионы, Азия чемпионатының екі дүркін чемпионы, Әлем чемпионатының қола жүлдесі сияқты үлкен жетістіктерім бар.&nbsp;Азия чемпионатында екі дүркін чемпион атану – мен үшін зор қуаныш.– Алдағы мақсат, жоспарларыңмен бөліссең?– Ендігі мақсат – Әлем чемпионатын бағындыру. Сонымен қатар, өзім де қазір жаттықтырушылықты кәсіп қылып жүргенімді айтып өттім. Осы ретте, жасөспірімдерді лайықты тәрбиелеп, мықты спортшыларды дайындап шықсам деген арманым бар.Сәті түссе, өзім түлеп ұшқан Сырдария ауданына қызмет етіп, ауданнан чемпиондар шығаруға өз үлесімді қосуға дайынмын. Бұл – бір сөзбен айтқанда спорттың дамуына зор үлес қосу. Жұмыспен бірге алдағы сайыстарға да дайындалуыма жағдай жасап, спорттың, спортшының өсуіне жағдай жасап отыр. Өзіме артылған жауапкершілікті жақсы сезінемін. Алда тек ауданның, облыстың емес, Қазақстанның атын әлем елдеріне танытқым келеді.

Қазақстан және Қызылорда облысының жаңалықтары: Спорт