<a href="https://kyzylorda-news.kz/">Kyzylorda-news.kz.</a> &nbsp;Облыс әкімі Нұрлыбек Нәлібаев Қармақшы ауданына жұмыс сапарымен барып, «Ауыл – ел бесігі» жобасы аясында салынған дене шынықтыру-сауықтыру кешені ғимаратының ашылу рәсіміне қатысты.Аймақ басшысы Жосалы кентінің тұрғындарын жаңа нысанның ашылуымен құттықтады. Спорт кешенінің тұрғындар бұқаралық спортпен айналысу үшін жиналатын тәрбие ошағы болуына тілектестік білдірді.<blockquote>«Мемлекет басшысы Қасым-Жомарт Кемелұлы өз Жолдауында «Денсаулық кепілі – дене шынықтыру. Халықтың спортпен шұғылдануына барлық жағдай жасалуы қажет» деген болатын. Өңірде спорт инфрақұрылымын дамытуға ерекше мән беріліп келеді. Қазіргі таңда облыс бойынша 10 дене шынықтыру және спорт кешенінің құрылысы жүргізілуде. Оның бірін бүгін пайдалануға берудеміз. Бұдан бөлек, биыл облыс орталығынан құны 6,9 млрд. теңгені құрайтын көпсалалы спорт кешенінің құрылысын бастау жоспарланған. Жанашыр жерлестеріміздің, демеуші азаматтарымыздың арқасында аймағымызда көптеген жаңа нысанның құрылысы жүргізілуде, алдағы уақытта да ауқымды жоспарларымыз бар. Жергілікті «Қайсар» футбол клубы үшін заманауи жабық стадион салу жұмыстары демеуші есебінен атқарылуда. Былтыр «Балалар жылы» аясында демеушілер 1,6 млрд. теңгенің 80 спорт-ойын алаңын балдырғандарымызға тарту етті», – деді Нұрлыбек Машбекұлы.</blockquote>Салтанатты шарада Қармақшы аудандық ардагерлер кеңесінің төрағасы Асқар Мереков те жерлестерін құттықтап, ақ батасын берді.Жалпы аумағы 1500 шаршы метрден асатын спорт кешенінде тренажер, фитнес және әмбебап залдар бар. Мердігер мекеме «Сапақ» өндірістік кооперативі құрылысты 2021 жылдың қазан айында бастап, жуырда аяқтады.Айта кетейік, биыл Қармақшы ауданында бірқатар әлеуметтік нысанның құрылысы басталмақ. «Жайлы мектеп» ұлттық жобасы аясында аймақта осы жылы 10 мектептің құрылысы басталса, оның 2-уі Қармақшы ауданынан салынады. «Ауылда денсаулық сақтауды жаңғырту» ұлттық жобасы аясында 2023-2024 жылдары облыста 27 денсаулық сақтау нысаны бой көтермек. Осы жоба бойынша Дүр Оңғар, Тұрмағанбет, Ақжар ауылдарында дәрігерлік амбулатория салынбақ. Ал, ІІІ Интернационал және Дүр Оңғар ауылдарында спорт кешенінің құрылысы басталады.«Ауыл – ел бесігі» бағдарламасы шеңберінде ауданда жалпы құны 580 млн. теңгені құрайтын, ұзындығы 17,5 шақырымдық 21 көше орташа жөндеуден өтіп, 225,4 млн теңгеге 24 көше жарықтандырылады. Облыстық бюджет есебінен Самара-Шымкент жолынан Ақжар, Тұрмағанбет, Көмекбаев ауылдарына дейінгі жолдың 27 шақырымы орташа жөндеуден өтеді. Бұл жұмыстарға 503,4 млн. теңге қаралды. Көмекбаев, Қармақшы, Алдашбай ахун ауылдарындағы су қабылдайтын құрылғыны қайта жаңғыртуға 774,3 млн. теңге бөлінген. Ақай ауылы мен Төретам кентіне 654,5 млн теңгеге газ тарту жұмыстары жүруде.

Қармақшы ауданында спорт кешені ашылды

<a href="https://kyzylorda-news.kz/ru">Kyzylorda-news.kz.</a> 2022 жыл «Қайсар» футбол клубы үшін жемісті кезең болды. Маусым қорытындысы бойынша біріншіліктің күміс жүлдесін еншілеген команда келер жылы премьер-лигада ойнауға мүмкіндік алды. Бұл – футболшылардың жасыл алаңда жарқын ойын көрсеткенінің белгісі. Біріншілік барысында сәтті ойын көрсетіп, «жыл жаңалығы» болған футболшылар да болды. Соның бірі – Әділбек Жұмаханов. Ол жыл қорытындысы бойынша біріншіліктің «ең үздік қорғаушысы» атанып, жанкүйерлерді бір серпілтіп тастады. Әлем чемпионаты қарсаңында үздік қорғаушы болған Әділбекті әңгімеге тарттық.– Әділбек, үздік қорғаушы болуыңызбен құттықтаймын. Бұл мансабыңдағы мерейлі сәттің бірі болар…– Рақмет. Жаңалықты естігінде қуанғаным жасырын емес. Бас бапкерлер мен команда капитандары арасындағы сауалнамаға сәйкес үздік атандым. Бұл жетістік одан әрі ширауға мүмкіндік сыйлады. Мансабымдағы қуанышты жағдайдың бір көрінісі десем болады. Мұндай қуаныш ең бірінші Қазақстан жастар құрамасына одан кейін Қазақстан ұлттық құрамасына шақырту алғанымда болды. Жетістіктерді одан әрі жақсарту үшін тынымсыз еңбек етемін.– Инсайдтарға жүгінсек, жыл басында «Қайсарға» келуіңіз қызықты оқиғаға үйлесіпті. Қызылордаға қоныс аудару бірнеше мәселенің шешімін табуға мүмкіндік сыйлаған көрінеді…– Иә, ойламаған жерден «Қайсарға» тап болдым (күлді). Негізі биыл туған жерімнің бас командасы- «Атыраудың» намысын қорғауым керек болған. Оқу жаттығу жиынын да сол командамен өткізіп, премьер-лигаға қызу дайындық жүргіздік. Бас бапкер Константин Горовенкомен тығыз байланыс орнатып, жолдастық кездесулерде негізгі құрамда ойнап жүрдім. Елге келгеннен кейін жағдай өзгерді. Көбіне қосалқы құрамда қалып, ойынның тек екінші жартысында қосылуға мүмкіндік алып жүрдім. Бұл тәжірибемді одан әрі шыңдауға жеткіліксіз болды. Сондықтан жаңа ұсыныстарға ашық болдым. Ол кезде бірінші лиганың маусымы басталуға жақын қалған. Орайлы сәтте «Қайсардан» ұсыныс түсті. Команда капитаны Мақсат Байжановпен тағы бір маусым доп тепкім келді. Ел футболының аңызына баланатын Мақсат ағамызбен бір командада ойнау кез келген аяқдопшының арманы десек болады. Мұндай мүкіндік алғаш рет 2020 жылы «Атырауда» болды. Биыл екінші мәрте осы мүмкіндікке ие болдым. Тәжірибесі тоғысқан ойыншыдан үйренеріміз көп. Сондықтан ұсынысты қабыл алып, Қызылордадан бір-ақ шықтым. Негізгі құрамда ойын көрсетіп, жақсы маусым өткіздім.– Келер жылы жанкүйерлер Жұмахановты «Қайсардан» көре ала ма?– «Атырау» футбол клубымен келісім шартым бар. Биыл «Қайсарда» жалда ойнадым. Ол жақта бапкерлік құрам өзгерді. Жаңа жаттықтырушы Виталий Жуковский мені «Атыраудан» көргісі келеді екен. Әзірге нақты шешім жоқ. Әрине, көп мүмкіндік берген «Қайсарда» мансабымды одан әрі жалғастырғым келеді. Бірақ құжат шешеді. Сол себепті алдағы жоспарым белгісіз.– Маусымды өзіңмен түйіндесек. Чемпионатта жеңімпаз болуға не жетіспеді?– «Қайсар» – биыл Қазақстанда ең көп ойын өткізген ұжым. Сәуір айынан бастап қарашаға дейін 36 кездесу өткізді. Чемпионаттан бөлек, Қазақстан кубогында ширек финалға дейін өтіп, үлкен жаңалық жасады. Топтық кезеңде премьер-лига өкілдерін жеңіп, сенсацияға тап болдық. Тығыз график «Қайсардың» біріншіліктегі кейбір ойындарына әсер етті. 10 күнде 3 матч өткізген кез болды. Футболшылар қалыпқа келу процесін атқара алмады. Сондай сәтте ұпай жоғалтып, негізгі бәсекелесіміз «Оқжетпестен» қалып қойдық. Бірақ жеңімпаз болған «Оқжетпестен» ұтылған жоқпыз. 3 рет кездесіп, екеуінде жеңіп, біреуінде тең нәтиже көрсеттік. Бұл көкшелік командадан мықты екенімізді дәлелдейді.– Әлем чемпионатына ойыссақ. Қай құрамаға жанкүйерсіз?– Португалияға қолдау көрсетіп жатырмын. Криштиану бастаған футболшылардан үмітім көп. Биыл титулды жеңіп алатындай мүмкіндігі бар. Құрамы да керемет. Бруно Фернандештың ойынын сүйсініп қараймын. Топтық кезеңде Уругваймен өткен ойында дубль жасап, Португалияға керемет жеңіс сыйлады. Бруноның соққан голынан кейін плей-офқа жолдама алды. Енді финалға дейін жету оңай болмасы анық. Бірақ ширек және жартылай финалда Франция, Испания, Англия секілді құрамалармен кездесіп жатса, Португалияның жеңісіне сенімім мол.– Қазір әлемде футбол саясаттың бір құралы есебінде көрініп жүр. Мұны әлем чемпионатынан да аңғардық. Кәсіби футболшы ретінде алып қосарыңыз бар ма?– Осы кезге дейін футбол достыққа, татулыққа шақыратын спорт түрі болып саналды. Әлі сол қалпында деп есептеймін. Иә, Катарда жағымсыз жайттарды көрдік. Германияның сурет арқылы не айтқысы клегенін білдік. Катар ислам мемлекеті болғандықтан теріс пиғылдарға шектеу қойды. Меніңше, құптарлық іс. Еуропа оның ішінде Германия қазір жағымсыз жаңалықтармен әлемді таңқалдыруда. Сол жаңалықты, яғни бір жыныстыларды одан әрі нәсихаттауды әлем чемпионатында жалғастырғысы келді. Гюндоган секілді мұсылмандары бар құраманың мұндай әрекеті ұят. Сондықтан футбол саясатқа айналмауы керек.

«Қайсар» футбол клубының футболшысы Қазақстан ұлттық құрамасына шақырту алды

<a href="https://kyzylorda-news.kz/">Kyzylorda-news.kz.</a> Жалағашта білім саласымен қатар нәтижелі жұмыстарды көрсетіп келе жатқан сала – спорт саласы. Бұлай деуіміздің себебі де жоқ емес. Сала саңлақтары біріненс оң бірі дүбірлі додаларда топ жарып, ауданымыздың атын республикаға, тіпті халықаралық дәрежеде асқақтатып жүр. Осындай мықтылардың жетістігінің, маңдай терінің арқасында аудандағы спорт саласы дамып келеді. Жуырда тағы бір ауқымды спорттық шара өтіп, қазақстандық спортшылар қала берді, көршілес республикалардан да спорт саңлақтары келіп, бақ сынады. Аудан төрінде өткен, бірнеше күнге созылған турнир тартысты өтіп, кіл мықтының ішінен шын мықтыны анықтау қиынға түсті.Аудан жұртшылығы 3 күн бойы былғары қолғап додасының куәсі болды. Жұдырықтасу десе деребесі қозатын халықтың аузында «Кім жеңеді екен», «Пәленшенің баласы мықты», «Жекпе-жек тартысты болды» деген спорт төңірегіндегі сөздер өріп жүрді. Медицина саласының үздік дәрігері, КСРО-ның құрметті доноры, «Шапағат» мерекелік медальдарының иегері Ақназар Бектасовты еске алуға арналған ашық турнирдің жоғары деңгейде өткендігін осыдан-ақ пайымдауға болатын секілді. Турнирге Ақтөбе, Өскемен, Оңтүстік Қазақстан облыстарынан және де Өзбекстан елінен 2007-2008 және 2010-2011 жылғы туылған жасөсіпірімдерден құралған командалар келіп, жалпы 153 боксшы бақ сынады. Бір қызығы аудандағы бокстан аға-жаттықтырушы Нұрлан Есжановтың айтуынша, еліміздің әр аймағынан, тіпті көрші Қырғызстан, Тәжікстан мемлекеттерінен ашық біріншілікке қатысуға ниет білдірген спортшылар қатары көп болған.Бірінші күннен бастап жарысты тамашалауға келген спортсүйер қауымның қарасы қалың болды. Бірі баласын, бірі немересін, бірі інісін додаға қосқан жалағаштық жанкүйерлер таң атқаннан кеш батқанға дейін тапжылмай турнирді тамашалады. Заңдылық десек те болар, мұндай қолдауды көрген қызуқанды спортшылар да шаршы алаңда барын салды, сонысымен жарыс тартысты өтті. «Чемпион боламын» деген мақсатпен келген жасөспірімдердің бір-біріне жеңісті оңайлықпен бермейтінін алғашқы күннен-ақ байқадық. Бірінші күні турнирдің 1/8 кезеңі өтсе, ертеңіне 1/4 және жартылай финалдық кезеңіне жалғасты. Екінші күннің жекпе-жектерінде спортшылар жан алыспай, беріспеді. Жанкүйерлердің күткені де осы болды, өйткені боксшыларды енді бір атта са, алда финалдық кезең күтіп тұрды, яғни жүлдеге іліктің деген сөз. Сөйтіп 2 күн ішінде ақтық кезеңге кіл мықтылар іріктеліп шықты. Алғашты кезеңдерде Жалағаштың боксшылары жарады. Ақтық кезеңге ауданымыздан 10 боксшы өтті, осылайша жергілікті жанкүйерлер үшін турнирдің маңыздылығы одан бетер арта түсті.&nbsp;Сенбі күні көптен күткен финалдық кезең де басталды. &nbsp;Жарыс өтіп жатқан кешеннің іші боксты тамашалауға келген халыққа толған. «Баласы атқа қонса, анасы үйде отырып, тақымын қысады» демекші, көрермен ретінде финалға анасы келмесе де, көрші-көлем, ағайын-туыс бәрі осында жиналған. Талқылайтын бір ғана тақырып, ол – бокс. &nbsp; Кешке дейін созылған бокс мейрамында спортшылар өзара мықтыны анықтады. Әрине, шын жүйрікті анықтау оңай болған жоқ, боксшылардың барын салары анық. Бірінің бабы жанса, бірінің бағы жанған финалдық кезең де кешкітұрым өз мәресіне жетті. Ақтық кезеңнің қорытындысы бойынша жалағаштық 7 боксшы жүлдеге ілігіп, таңнан жүрген жанкүйерлердің мерейін бір үстем етті.Көрші Өзбек елінің жас боксшылары да осал емес екен. Өзге мемлекетке жұдырықтасуға келіп тұрған жасөспірімдердің көзінен я қорқыныш, я тартыну байқалмады. Бала болса да мұндай жігерлік көрсеткен қонақтарға жергілікті жанкүйерлер де дән риза болды. Жарыс қорытындысы бойынша Өзбек боксшылары 1 алтын, 1 күміске ие болса, Асатбек Нарузов ең үздік боксшы атағын алды. Сондай-ақ турнирдің ең үздік боксшы атағын жалағаштық Айбар Ақназаров пен спорт интернатының түлегі Нұрсаят Тынысбеков та иемденді. Үздік былғары қолғап шеберлеріне ерекше белбеу сыйлығы табысталды.<blockquote>«Жарыс оңай болған жоқ. Қарсыластарымның барлығы мықты, осалы көрінбеді. Ақтық кезеңге дейін сенімді жұдырықтастым деп айта аламын. Бірақ финалда жұдырықтасу қиынға соқты. Өйткені қарсыласым ретінде жерлесім Бек Мұхамедияр болды. Екеуміз бір-біріміздің жұдырықтасу тәсілдерімізді жақсы біліміз. Жекпе-жек тартысты өтті. Иә, бүгін менің бағым жанды, десе де қарсыласыма басымды иемін, әрине финалға шығу оңай емес. Жаттықтырушыма, жанкүйерлерге алғыс айтамын», – дейді жалағаштық чем¬пион Бейбарыс Танатарұлы.</blockquote>Жалағаштық чемпиондарға нақтырақ тоқталсақ, 32 келі салмақта 1 орынды жалағаштық боксшы Шахмардан Бисенов иеленсе, 34 келі салмақта Қалдан Нұрмұхамед алтыннан алқа тақты. Ал 57 келі салмақта жалағаштық Ернияз Мұратұлы, 70 келі салмақта Бейбарыс Танатарұлы жеңіс тұғырынан көрініп, чемпион атанды. &nbsp;Сонымен қатар жерлестеріміз Нұрсұлтан Нұрадин, Сәндібек Парасат, Аманжол Қасым жүлделі орындардан көрініп, жанкүйерлерді бір қуантты. Дүркіреген дода осылайша өте шықты. Ең бастысы турнирге келген қонақтар дән риза, келесі жылы міндетті түрде тағы да келетіндерін жеткізді. Ал Өзбекстан жаттықтырушысы мұндай жарыстардың жасөспірімдер үшін үлкен тәжірибе берітінін айтады. Иә, Өзбек елінде бүгінде бокстан әлем чемпионаты өтіп жатыр. Сол жарысты тамашалудың орнына Өзбек елінің жаттықтырушысы тәрбиеленушілерін осы турнирге алып келіпті. Міне, турнирдің жас өрендер үшін маңыздылығын осыдан-ақ түсіне беруге бо¬латын секілді. Осы ретте ел тізгінін ұстаған өңір азаматтары аталған турнирдің келесі жылы да жалғасын табатынына уәдесін берді. Жарыс соңында аудандық емхана бөлімінен Ақназар Бектасұлының атынан ұйымдастырудың басы-қасында жүрген аудандық бокс бөлімшесіне бағалы смарт теледидар тарту етілді.

Жалағаш ауданында тартысты турнир өтті

<a href="https://kyzylorda-news.kz/">Kyzylorda-news.kz.</a> &nbsp;Абзал мен Гүлшаттың отау құрғанына тура бес жыл болды. Бірақ отбасынан сыңғырлаған сәби күлкісі естілмейді. Туыстары Гүлшатты бір емес бірнеше рет дәрігердің алдына апарды. Алайда тексерудің қорытындысы оң нәтижемен аяқталатын. Ал Абзал болса қаралуға намыстанып бой бермейді. Осылай жүріп арада тағы бір жыл өтті. Үміт оты өшкен соң әйелінен күдіктенуді қойып, кінәратты өзінен іздей бастады. Бар күшін жиып білікті дәрігердің алдына бас сұғалады. Қабағы қатулы, жасы егде тартқан ақ халатты жан күрсініп &nbsp;«балам-ай, өміріңде бір рет болса да неге атқа мінбедің?» деп сұрақты төтесінен қойды. Аң-таң болған Абзал бұл сұрақтан соң біраз абдырап қалды.Иә, дүниеде ұрпақсыз қалу қандай қасірет десеңші. Бүгінде «вирустай» тараған бедеулік пен белсіздік – басты трагедия болып отыр. Жолын іздеп, әуре-сарсаңға түскендер қатары да аз емес. Ал сіз білесіз бе? Белсіздіктің басты себебі – ердің атқа отырмауынан екен. Мұны ғылым әлдеқашан дәлелдеп қойды. Қалай деймісіз? Өткен ғасырдың 60 жылдарынан бастап 90 жылдарға дейін қазақ халқының саны қарқынды өскен. Сол кездегі Алпысбай, Жетпісбай, Сексенбай, Тоқсанбай, Жүзбайлардың өмірге келгенін бағамдай беріңіз. Он құрсақ көтеріп, Батыр ана атанған әйелдер де аз болмады. Бертін келе бұл үрдіс табалдырығымызды батыстың мәдениеті аттағалы тежелді. Рухсыздандық, құндылықтар жойылуға сәл-ақ қалды. Солай ер жігіттің атқа қонуы ұмытыла бастады. Сол кездегі өмірі жылқының үстінде өткен аталарымыз белсіздіктің не екенін білмеген. Оның емі де осы – ат үстінде серуендеу. Жалпы қазақ өмірін атпен байланыстырған халық. Олай болса неге аттан жериміз?Ат спорты кенжелеп қалған ба?Бағзы заманнан бері дайындығы мен шеберлігі мықты сарбаз әрдайым жеңіс шыңынан көріне білген. Ал бабаларымыз сарбаздың жауынгерлік даярлығын ұдайы жетілдіріп отырған. Яки шайқаста қолданатын әдіс-тәсілді бейбіт күндері ұлттық ойын ретінде дамытқан. Әрі қомақты бәйге тігіп, оларды ынталандырған. Мәселен көкпарды алайық. Бұл – жауынгердің ат үстіндегі ептілігі мен тақымын шынықтыратын жаттығу. Шайқас кезінде жолдасың жараланып аттан ауса оның денесін жерге түсірмей іліп алып құтқару керек. Немесе жау сарбазының тақымға басқан жарағын тартып алу қажет. Осылай көкпар тартып шыныққан жауынгер қиналмай-ақ жеңіске жетеді. Жалпы ат спорты – ат үстінде орындалатын спорт түрі. Бұл спорт бізде қаншалықты дамуда? Бір жылдары «Қазақстан» ұлттық арнасында «Көкпар» ұлттық ойыны көрсетілетін. Күнделікті. Қол соғып қошеметтеген үлкен буын аз емес еді. Жанымен беріліп «ал да ал» деп тақымын қысып отыратын. Бертін келе бұл бағдарлама да көгілдір экраннан көрсетілмей қойды. Қош. Одан қалды әлеуметтік желіні шулатқан бейнебаян тарады. Мұнда қырғыз жұртында өткен көшпенді ойындағы Қазақстан Өзбекстаннан жеңілгеніне қырғыздық жігіттің қазаққа үндеуі, жекуі түсірілген. Бұл да біраз дауға апарды. Жұрт та екіге бөлінді. Бірі – біреудің бабы, біреудің бағы деді, енді бірі – дайындықтың мүлдем болмауын тілге тиек етті. Айтып айтпай не керек, уақыт өте бұл да ұмытыла бастады. Бірақ, қашан аттың құлағында ойнаған жігіттер көк туымызды желбіретпек?Ауылда туыс ағам ерте көктем мен күз мезгілінде ұйымдастырылатын ат жарысына қатысатын. Әкесі &nbsp;атсейіс болған. Жылқы баптаудың қыр-сырын үйретіп кеткен. Ұлының жасы келген соң жас жігітті қасына алды. Сондағы ойы бәйгеге қатыстыру. Қанша машықтанғанымен әлгі жігіт жарыстан соң атты суарыпты. Солай аяғына жем түскен екен. Әкесінің көзіндей болған жылқы бір ғана қателіктен көз жұмды. Бұдан біз ат спортының еріккеннің ермегі емесін анық аңғарамыз. Қазекемнің сәйгүлік баптайтыны – жылқы мінезді халыққа тән қасиет. Жалпы жылқы баптау жеңіл іс пе? Жеңіл болса неге өңірдегі ат спортының бағы жанбай отыр? Аймақтағы ат спорты Жалағаш, Тереңөзек пен Шиеліде жақсы дамыған. Әсілінде Жаңақорғанның орны тым бөлек. Себебі Қызылорда облысы құрама командасының көп пайызын жаңақорғандық жігіттер құрайды. Ал Қармақшыда бұл спорт біршама кенжелеуде. Бірақ бұл салы суға кетті деген сөз емес. Ат спортының дамуына кей ауылдың жігіттері өз үлесін қосуда. Мұны елді мекенде көп өтетін ұлттық жарыстан аңғаруға болады. Мәселен түлектердің 10, 20, 30 жылдығы мен бітіруші түлектердің соңғы қоңырауында, наурыз мерекесі мен қарттар күнінде бәйге ұйымдастырылады. Бәйге қоржынын да ауыл азаматтары қалтасынан шығарып, томпайтып қояды. Бұл үрдістің ұрпақ тәрбиесіндегі мәнін де қалай айтпаймыз?!Бұл ауылдағы атқа мінгендерді біз де байқадық. Бірде сол ауылдың молдасын Жосалы совхозына жеңіл көлікпен әкелгенбіз. Қайтарда Жосалыға жетпей Дүр Оңғарға аялдадық. Жаз. Ораза айы. Күннің ыстығына қарамай 10-15 жастағы балалар аттың құлағында ойнап жүр. Жөн сұрасқанбыз. &nbsp;Жақында өтетін бәйгеге дайындық үстінде екен. Қуандық, қошеметтедік. Рас. Ауданда өтетін ат жарысқа жастардың талабы бар. Қатысып та талай бәйгеден олжалы оралып жүр. Десе де ат спортын дамыту мақсатында оқу пәніне қоссақ қалай болар еді? Әйтпегенде дене шынықтырудан қашқан талай бозбаланы көз көріп жүр.«Саусақ» ойынының берер пайдасы бар ма?Иә, саусақ деп отырғанымыз тек қолдың күшімен ойналатын ойын. Күш дейміз-ау, күшке жатпас бәлки?! Айтпағымыз жақында ғана спорт түріне енген – киберспорт ойыны. Бұл тек екі қолдың батырманы шертуі арқылы жүзеге асады. Бұған қызыққан жастар да аз емес. Тіпті әлемдік турнирге қатысып бағы жанғандар тізімі де жетерлік. Бұрын денди, сега секілді ойын аппараты бір үйде ғана болатын. Оған көрші балалар келіп жарыса ойнайтын. Сондағы «Мортал Комбат» ойынының қыр-сырын меңгеріп, функциясын дәптерге түсіретін-ді. Түрлі сан мен әріпті ойын төбелесінде қолданып, «фаталити» жасағанына мәз болады. Бертін келе компьютер қолжетімді бола бастады. Ғаламтор аз тартылғандықтан ойынды жүктеп алып, онымен біраз әуреге түсетін. Әсіресе кеңінен таралған «Контер Страйк» ойынын ауыл жігіттері жарыса ойнап, бақ сынайтын. Әлемтор да әр үйге тартылған соң бұл ойынды «сетевой» ойнап, түрлі жарысқа да қатыса бастады. Солай оқуы жайына қалған бала талай сан соққаны бар. Енді бұл ойындарды спорт түріне енгізіп қойды. Сол кезде ашушаң болып, өзіне әрең келгендері қолын бір сілтесе де ойынның қоржыны қомақты екенін ести сала қайтадан машықтануға көшті. Әлемдік деңгейде бақ сынап, ел абыройын көтергісі келеді-мыс. Жалпы киберспорт пен ат спортының аражігін ажыратып көрелік.Ат спорты бір орында тұрмайды. Ұдайы қозғалысты талап етеді. Жылқы баптау баланы сабырлыққа, төзімділікке тәрбиелейді. Бастысы жануарға деген құрметін арттырады. Сондай-ақ ұлттық құндылықты бағалай отырып, баланы ержүрек, батыл, алғыр, әрі шапшаң етеді. Әлгінде айтып өткен белсіздіктің де алдын алады. Ал киберспорт ше? Бұл ойын баланың интеллектуалдық ойлау қабылетін арттырады дейді. Расымен солай ма? Қазір ғаламторды ашсаң шимайланған бейнебаяннан көз сүрінеді. Одан ғаламтордың шырмауына түскен кіп-кішкентай баланың өлгісі келетінін анық байқайсың. «Интернетсіз» өмір жоқтай. Психикаға әсер ете ме? Етеді. Ал киберспорттағы ойын уақытыңды зая кетіріп қана қоймай, «ауру» адамдай шырмауына түсіреді. Тек ойын, ойын деп жынды адамдай «дымың» қалмайды. Олай дейтініміз, атыс-шабыс ойынынан бір сәтке ұтылса ашуланған баланың сұрықсыз түрін сонда көресіз. Тәрбиелік мәні бар ма? Жоқ. Бұл баланы – қатігездікке тәрбиелейді. Ал бір орыннан қозғалмай отырған бала қалай қабілетті болады? Күні-түні ойнап, ертеңіне көз жұмғандары да бар еді ғой. Бізге бұл ойын несімен жақын болды? Ата-бабамыз қылыштың орнына «тышқан» алып, найзаның орнына пернетақтамен жауға шапқанын көрдіңіз бе?! Өкініштісі сол ат спорты емес киберспортқа көңілдің көп бөлінуі. Жаңа ғасыр талабын алға тартқанымызбен мәңгүрт болып бара жатқанымызды бір сәтке есімізге алайық.Иісі қазаққа құлаққағыс«Алма піс, аузыма түс» деп құр жатуды нарық көтермейді дейміз. Иә, кәсібін бастап, дөңгелеткендер қатары көп. Оның ішінде анаубіржылдары аудандардың бірінде – иппотерапия ашылғанда бөркімізді аспанға аттық. БАҚ жарыса жазды. Бұл не деп таңқалғандары да аз болмады. Иппотерапия – жылқы үстінде науқасты емдеу. Әлеуметтік осал топтағы, аурушаң балаларға арналған бұл кәсіпті мақалаға арқау болсын деп жазбаққа жүгіндік. Бірақ өкініштісі бұл терапия жабылып қалыпты. Аспанға атқан бөркімізді қайта қағып алдық.Бірде фейсбуктен Мөлдір Әнуарбекқызының жазбасын оқыдым. Марқайдым. Жазбаның мәні мынада, Жоламан есімді жас жігіт жастайынан жылқы малын қадір тұтқан екен. Осы мақсатта ол сәйгүлік баптап, бәйге аттарын жаратады. Жоламанның жүйріктері аламан бәйгелерде топ жарып та жүр. Осындай кәсібін өзі ғана біліп қоймай, жасөспірімдерге үйретуді қолға алған. Баптауындағы 7 сәйгүлікпен (ағылшын, қолтума тұқымдар) мектеп оқушыларына үйрету үшін тегін үйірме ашыпты. Жылқы десе қанымыз қозатын қазақпыз ғой. Үйірмеге жиналған қарадомалақтар қатары көп. Олардың ішінде бұрымдылар да бар екен.Кәсіпкерлерге құлаққағыс дейміз бе, әйтеуір осы ат спортына деген үлесін тигізсе деген ниет біздікі. «Қалауын тапса қар жанар». Ұлттық кодымызды сақтап қалған да ғана болашақтың тұтқасын ұстар нағыз азамат өседі.P.s Ақан серінің Құлагерін білесіз бе? Сері мен жылқының арасындағы сүйіспеншілік жүрегімізді жібітті емес пе? Ақаң оған өзге аттан бөлек қарады. Арнайы құдық қаздырды, қайыңнан қора, жер астынан монша салғызды. Құлагер көз жұмғанда серінің оны күткендегі бейнесі нағыз трагедияның көкесі еді. Осыдан-ақ жылқының қазақ үшін орны тым ерекше екенін бағамдай беріңіз. «Көш – жүре түзелетінін» білсек ат спортының дамуына бір қазақтың баласындай атсалысуымыз керек.&nbsp;

Аймақтағы ат спортының жай-күйі қалай?

<a href="https://kyzylorda-news.kz/">Kyzylorda-news.kz.</a> Компьютер дегеннің біздің ауылға енді келген кезі. Ағаммен жағаласа отырып сол кездегі «хит» болған «Counter Strike 1.6» ойынын жарысып ойнаймыз. Серверге кіріп, жаңа адамдарымен араласамыз. Екі топқа бөлініп сайыс ұйымдастырамыз. Күні-түні ұйықтамай, ақыры сабақтан да кешеуілдеу байқалды. Ойынның адамды қызықтырып, өзіне тартатыны психикалық ауытқуға әкеледі екен. Дер кезінде компьютерден бас тартып, жан-жағыма қарай бастадым. Мұнан алған «минус» – босқа өткен уақытыммен қоса көз жанарымның дұрыс көрмеуі болса, оң әсері – бүгінде киберспорт елдегі спорт қатарына енді. Жалпы киберспорт деген не? Бұл қандай ойын?Анау бір жылдары компьютер ойынынан бас алмай, күні-түні қозғалмай отырып ойнаған жап-жас жігіт қайтыс болып еді. Мұндай жағдай бірнеше рет тіркелді емес пе? Тіпті, ойын үшін өз әке-шешесін өлтіруге дайын тұратын балаларды көріп жағамызды ұстайтынбыз. Бірақ, бұрын босқа уақыт өткізген ойындар бүгінде ақша көзіне айналды. Киберспорттың бізге келгеніне де көп болған жоқ. Алайда, түрлі сайыс ұйымдастырылып, қазақ ойыншылары шетелден көрініп жүр. Орын алған әр командаға, жеке ойыншыға қаржылай сыйлық беріледі.Киберспорт – компьютер ойындары арқылы өткізілетін топтық жарыс түрі. Оның тарихы 1997 жылы CPL-ның (The Cyberathlete Professional League) құрылуынан және Quake атты компьютер ойынынан турнир өткізуінен бастау алды. Жастар арасында кеңінен танылған «Dota 2», «Counter Strike GO», «Star Craft», «FIFA», «Mortal Kombat X», «Warface» секілді ойындар бүгінде киберспортта ойнатылады.Жалпы, бұл ойын дүниежүзінде қарқынды дамып келе жатқан спорт түріне жатады. Ресей, Корея, Қытай секілді мемлекеттерде киберспортсмендерді оқытып шығаратын кафедралар ашылған. Мұнда студенттерді қабылдап, ойынға машықтандырады. Біздікілер де озық технологиядан қалыс қалмауда. Киберспорт жанашырларының құрған «Qazaq Cybersport Federation» республикалық қоғамдық бірлестігі ҚР Мәдениет және спорт министрлігінің тарапынан қолдау мен ықыласқа бөленген болатын. Қазақстанда бұл спорт түрі ресмиленіп, талай жас компьютер додасында топ жарып жүр. Мәселен, тарихта алғаш рет қазақ командасы жаһандық киберспорт ойындарында жеңіске жетті. Қазақ еліне жеңіс әкелген ақырғы жекпе-жектің трансляциясын ғаламтор бойынша бүкіл әлемнің әр атырабынан бір мезгілде 1 миллион 864 мың 604 көрермен тамашалаған екен.Қазақстандық Counter Strike ойыншылары тұңғыш рет әлемдегі беделді әрі «ежелгі» турнир «PGL Major Krakow» чемпионатының жеңімпаздары атанды. Бұл ретте, жаһандық жекпе-жекті дүниежүзіне таратқан HLTV шетелдік порталы мэйджордың ең құнды ойыншысы деп «AdreN» лақап атымен танылған Дәурен Қыстаубаевты таныды. Отандық Gambit Esports командасы финалда бразилиялық жаһанға танымал Immortals («өлмейтіндер») ұжымын 2:1 есебімен ұтып, 500 мың доллар көлеміндегі бас жүлдені қанжығалады. Сондай-ақ, Халықаралық олимпиада комитеті киберспортты олимпиадалық спорт түрі ретінде тану мәселесін қарауға алған. Сарапшылардың мәліметі бойынша, 2017 жылы киберспорт нарығының айналымы 655 миллион доллар болған, ал 2021 жылы оның айналымы 1,6 миллиард доллардан асады деген үміт бар.Қазір не көп? Қалада болсын, ауылда болсын компьютерлік клубтар, яғни PS4 орталығы, новигаторлар көп. Ал, оған келген жастардың саны шексіз. Демалыста уақытын ойынмен өткізгісі келетіндерге мұнда 24 сағат бойы есік ашық. Иә, қалауын тапса, киберспортты кәсіпке, бизнес көзіне айналдыруға да болады. Енді компьютерлік ойындарға еліккен балалардың «кумирі» де табылды. Тек әлгіндегідей өз өміріне зиянын тигізіп алмаса болғаны. Компьютерлік ойындар ойын-сауыққа арналған және бәсекелестікте өз қабілеттерін көрсеткісі келетін геймерлерге арналған деп екі түрге бөлінеді. Қазақстанда 2018 жылдан бастап киберспорт ресми спорт түрі болып танылды. Киберспорттың жыл сайын танымалдылығы артып келеді.Киберспортта, әдеттегі спорт сияқты, жеке жаттығу жабдықтарыңыз болуы керек (мысалы, қуатты компьютер және барлық қажетті компоненттер) және шапшаң жылдамдық, ақыл мен саусақтардың автоматтандырылған реакциясы сияқты дағдыларды үнемі шыңдап отыру қажет. Стресске төзімділік және командада жұмыс істеу сияқты дағдылар маңызды болып табылады.Қызылорда облысы әлемдік үрдістен қалыс қалмай, осы бағытты да дамытып келеді. Киберспортты дамытуға сол жағалауда орналасқан Жастар ресурстық орталығындағы IT парк резиденттері ерекше көңіл бөлуде. 2020 жылдың басында «AVALON-Lankor» киберспорттық жобасының CS:GO 5х5 форматы бойынша IT парк орталығында алғашқы киберспорт турниры өткізілді. Турнирге 240-тан астам адам тіркеліп, құрамы 5 адамнан тұратын 16 команда іріктелді. Жеңімпаздар ақшалай сыйлықтармен марапатталды. Аталған жобаның 2-ші маусымы жаз айында аралығында 80 адамның қатысуымен өткізілді. Бұл маусымға 5 адамнан тұратын 16 команда қатысып, жеңімпаздарға грамоталар, медальдар, атаулы футболкалар және ақшалай сыйлықтар табысталды.Сонымен қатар, алдыңғы жылдары орталық резиденттері «Portal eSports» командасы Gorilla Esports Season 3CS:GO (Amateur Division) турниріне қатысқан болатын. Оған біздің елден бөлек Қырғызстан, Тәжікстан және Өзбекстан ойыншылары шақыртылды. Қызылорда облысының командасы 154 команданың ішінен 16 үздік команданың қатарына енді. Бұл өңір тарихындағы ірі турнирдің плей-офф кезеңіне өткен алғашқы команда болды.Облыс орталығындағы IT парк киберспортты қолдауды және киберспорттық жарыстарды ұйымдастыруды жалғастыра бермек. &nbsp;

Киберспорт: Қызылордалық командалар үздіктер қатарынан көрінуде

<a href="https://kyzylorda-news.kz/">Kyzylorda-news.kz.</a> Ташкент төрінде өткен бокстан Әлем чемпионаты қазақ былғары қолғап шеберлеріне табысты болды.&nbsp;Төрт алтын, бір күміс медаль! Бұл – біздің құрама үшін жаһандық додада жақсы жетістік. Осылайша қазақ боксының беделі айдай әлемге тағы бір танылды.Несін жасырайық, спорттағы әділетсіздіктер үміттен гөрі күдіктің таразы басын тартып кететіні бар. Кейінгі жылдарда төрешілердің бұра тартуынан талай боксшының рухы сынды. Сонан да ел көкейінде «Еншімізге қанша жүлде бұйырар екен?» деген сауал бар еді. Ұлттық құрама бапкерлері де шәкірттерінің шыңдалу жолында аянып қалған жоқ. Бокс әлеміндегі бұл бәсеке шынында маңызды болатын.Осыдан біршама уақыт бұрын құрама тізгінін белгілі маман Мырзағали Айтжанов қайта қолға алғаны белгілі. Тәжірибелі маман 2009-2018 жылдар аралығында қазақстандық боксшыларды баптады. Қаншама шәкірті әлемдік додаларда атой салды. Қай сайыстан да жүлдесіз қайтқан кезі жоқ. Жас таланттарды табуға қолдан келгенше үлес қосты. Ал оның басшылықтан тыс жүргенінде құрама нәтижесі ала-құла болғанын тағы жасырудың жөні жоқ.Ташкентті бетке алған тұста құрама сапына тәжірибелі былғары қолғап шеберлерімен бірге жастар да шақыру алды. Олардың өзі – кейінгі жылдарда жоғары нәтижеге қол жеткізіп, бапкерлер сенімін ақтап жүрген саңлақтар. Жиырма жастың желкенін керген жұлдыздар шаршы алаңда жарқылдап көзге түсіп, талай мықтының тауын шақты. Олардың қатарында Махмуд Сабырхан (54 келі), Санжар Тәшкенбай (48 келі), Нұрбек Оралбай (80 келі) бар. Сондай-ақ, бұдан бұрын халықаралық жарыстарда жүлдегерлер қатарынан көрініп жүрген Асланбек Шымбергенов (71 келі), Қамшыбек Қоңқабаев (92 келіден жоғары) сынды тәжірибелі боксшылар әлем чемпионатына аттанды.Чемпионатта төрешілердің әділетсіз шешімдерінен зиян шеккен жастарымыз да бар. Ендігі бірінің бабы келіспей, жүлденің ауылынан алыстап қалды. Осылайша ел құрамасынан ширек финалға жеті саңлағымыз жолдама алса, олардың бесеуі ақтық сынға дейін жетті. Жеңіске желпінген жанкүйерлер қазақстандық былғары қолғап шеберлерінің барлығы чемпион атанса деген тілеулес пейілде болды.Дүбірлі дода басталған сәттен жанкүйерлер жеңіл салмақтағы Санжар Тәшкенбай мен Махмуд Сабырханның жекпе-жектеріне ерекше назар аударды. Оның себебі де жоқ емес. Жиырма жастан енді асқан жас жігіттер кейінгі жылдарда жақсы ойын өрнегімен елдің көзіне түсіп келеді. Санжар өткен жылы Азия чемпионатында топ жарды. 2021 жылы жастар арасындағы Әлем чемпионатында алтыннан алқа тақты. Енді сол жеңісті жолды жалғастырып, ересектер арасында өз салмағында әлемнің мықты боксшысы атанды. Биылғы бәсекеде де оған оңай қарсылас жолыққан жоқ. Алдымен 1/8 финалда өзбекстандық Шодиерджон Меликузиевтің осал тұсын тапты. Одан кейін ширек финалда жапониялық Кадзума Аратакені айқын басымдықпен жеңді. Жартылай финалда ресейлік Эдмонд Худоянды қапы қалдырып, ақтық сайысқа жолдама алды. Финалда Сахиль Алахвердовидің апшысын қуырып, шаршы алаң төрінде шапшаң қимыл көрсетті. Нәтижесінде төрешілер бірауыздан жеңіске Санжар лайықты деп санап, оның қолын көтерді.Тағы бір үздігіміз Махмуд Сабырхан 2021 жылы Әлем чемпионатында күміс медальді қанағат тұтқан еді. Ол жолы жас боксшының тәжірибесі аздық етті ме, финалда жапониялық Томоя Цубоиға есе жіберіп қойған болатын. Қателігінен сабақ алған сайыпқыран биыл ешқандай кездесуінде арқа басын кеңге салған жоқ. Шаршы алаңда шеберлігін дәлелдеп, қарсыластарын қапы қалдырып жатты. Алғашқы жекпе-жегінде венгриялық Иштван Сабоны, одан кейін үндістандық Сачин Сивачты, ширек финалда Ахмаду Мохаммедті рингте қуып жүріп сабады десек те болады. Жекпе-жектердің барлығында Махмуд қарсыластарынан 5:0 есебімен басым түсті. Жартылай финалда оған кубалық Йосвани Вейтиа жолыққанда жанкүйерлер «Қалай болар екен?» деген ой үстінде еді. Бұл жолы да Махмуд азулы қарсыласынан қаймықпай, оған көп соққы жасады. Финалға жолдама алды. Ендігі кезекте ол өзбекстандық Ойбек Жураевпен қолғап түйістірді, әрі жеңісті жұлып алды. Осылайша Махмуд бокстан 2023 жылғы Әлем чемпионатының жеңіс тұғырына көтерілді.Тағы бір алтын Нұрбек Оралбайдың еншісіне бұйырды. Ол да алғашқы барлық жекпе-жегінде қарсыластарын ірі есеппен жеңді. Ал ұлттық құрама капитаны Асланбек Шымбергеновтің жасы биыл отызға толады. Бұған дейін 2022 жылы Азия чемпионы болса, енді оның қатарын Әлем чемпионы атағымен толықтырды. Ал ел құрамасынан 67 келі салмақтағы ақтық сында Асадхуджа Муйдинхуджаевқа есе жіберіп, күміс медальді қанағат тұтты.Ел құрамасында 92 келіден жоғары салмақта қызылордалық Қамшыбек Қоңқабаев сынға түсті. Оған жеребе жолдас болмай, басты қарсыласы өзбекстандық Баходир Джалоловпен ширек финалда кездесті. Бұл жолы өзбек боксшысына есе жіберіп, дүбірлі додадан жүлдесіз қайтты.Жалпыкомандалық есепте қазақстандық боксшылар 4 алтын, 1 күміс медальмен екінші орынға жайғасты. Басты қарсылас – Өзбекстан құрамасы 5 алтын, 2 күміс, 2 қоламен көш басында тұрса, үздік үштікті 2 алтын, 4 қоламен ресейліктер түйіндеді.Айта кетсек, 1974 жылдан бері Әлем чемпионатында еліміздің былғары қолғап шеберлері барлығы 56 медаль еншілеп, үшінші орында тұр. Бірінші орындағы Кубаның – 149 (81-38-30), Ресейдің – 75 (28-21-26) медалі бар.Енді алда Париж олимпиадасына іріктеу ойындары өтеді. Одан өзге де сайыстар бар.

Қазақ боксшылары олжамен оралды

<a href="https://kyzylorda-news.kz/">Kyzylorda-news.kz.</a> Ауылдың баласынан көптеген дүние күтуге болады. Жетістік пен жаңалық, білек пен білімнің жарқын үлгісін көрсететін де солар. Сол азаматтар байрақ пен ардың беделін төмен түсірмеуге тырысады. Себебі олардың қайнаған қанында халқына деген шынайы сүйіспеншілік, таза патриоттық сезім бар. Сол үшін де біз олармен мақтануымыз керек. Мұндай мақтаныштарымыз әсіресе спорт саласында көптеп кездеседі. Бүгінгі біздің әңгімемізге арқау болатын кейіпкердің есім-сойы – Нұрлыбек Рысмағамбетов.«Arm Wrestling» атты спорт түрінен талай бәсекеде топ жарып жүрген тарланбоздың бүгінгі шыққан биігімен аудан мақтана аларлықтай жағдайда. Ол қандай спорт деп отырған боларсыз. «Arm Wrestling» атты спорт біздің тілмен айтқанда қол күрес. Жақсықылыш кентінде тұрмыс кешіп, сол ауылдың мектебінде қарапайым ұстаз болып еңбек ететін Нұрлыбектің бүгінде 100 келіге дейінгі салмақ дәрежесінде бірнеше мәрте Азия чемпионатының күміс және алтын жүлдегері екенін бірі білсе, бірі білмес. Халықаралық дәрежедегі спорт шеберлігі тағы бар.1967 жылы Жақсықылыш кентінде ауданға белгілі Өтеу Рысмағамбетов ағамыздың шаңырағында дүниеге келген кейіпкеріміз өзінен бөлек тоғыз бауырының жанында ойнап өскен. Әкесі Өтеу мен анасы Зияштың тәрбиесін алған ол сонау бала күнінде өзінің алдындағы Арғынбай есімді ағасын үлгі тұтқан. Айтуынша, ағасы Арғынбай да жас күнінде гір тасын көтеруде алдына жан салмайтын үздіктер қатарында болған. Тіпті, облыстық сайысқа қатысып, кіл шеберлердің арасынан гір тасын көтерудегі шеберліктен шашасына шаң жұқтырмаған.<blockquote>– Әлі есімде. Бала кезімізде аулада Арғынбай ағам салмағы зіл батпан болатын гір тасын допша үйіріп, төспен, аяқпен қағатын. Сондағы шеберлігіне таң қалып, мен де жастайымнан гір тасына құмар болдым. &nbsp;Талай көше балаларымен жүргенде өзіме ағамды үлгі етіп, соның ізін қудым. Соның пайдасы болса керек, жас күнімнен білектерім қатайып, қолыма қысқанды қабыстыратын ерекше күшке ие болдым. Осылай келе 1985 жылы Отан алдындағы әскери борышымды өтеуге Владивостокқа бардым. Теңіз әскері құрамында болып, 90 күндеп сүңгуір қайықпен Тынық мұхиты теңізінің астында болатынбыз. Ол жақта Александр Спиранский деген орыс офицері менің ерекше қабілетімді байқап, осы қол күрестің ерекше тәсілдеріне бейімдеді. Сол арқылы мен қол күрестен әскери достарымның арасында үздік болдым, – дейді халықаралық дәрежедегі спорт шебері Н.Рысмағамбетов.</blockquote>Спорттағы карьерасы осылай басталған Нұрлыбек елге келген соң, кенттегі «Аралтұз» комбинатына жұмысқа орналасады. Сол жақта жүріп те аудандық, облыстық сайыстарға қатысып, бапкері әрі құрдасы Жаңалық Тоқсанбаевпен бірге біршама жетістіктерге жеткен. Бұл жеңісті жетістіктердің жалғасы 2005 жылы ауылдағы №19 орта мектепке дене шынықтыру пәнінен мұғалім болып қызметке орналасқан соң да жалғасты. Спорттың бұл түрінен бөлек тоғызқұмалақ ойынына да құмарлығы ауған кейіпкеріміз мектеп оқушыларын озық ойға баулып, тоғызқұмалаққа бейімдеген. Қазірге дейін олардың арасынан 1 спорт шебері, 5 спорт шеберлігіне үміткер және 7 бірінші разряд шыққанын мақтанышпен айтуға болады.Негізінен қол күрес әлемдік деңгейде қолдауға ие болғанымен, елімізде кенжелеу дамыған. Десе де Қазақстан әлемдік көрсеткіш бойынша қол күрес спортынан 2 орында тұр. Бойды билеген бұл күшпен қатар, асқан ептілікті және шапшаңдықты қажет ететін бұл спорт түрі бүгінде Орталық Азияда еркін дамыған. Оған жыл сайын өтіп тұратын Азия чемпионаттары мен әлем біріншіліктері дәлел. Бүгінде Нұрлыбек Өтеуұлы сол Азия чемпионаттарына қатысып, бірнеше мәрте жүлдегер атанған. Айталық, 2017 жылдың маусым айында Қырғызстан елінде өткен Азия чемпионатында 100 келіге дейінгі салмақ дәрежесінде ІІ орын, 2018 жылдың сәуірінде Көкшетау қаласында өткен Азия чемпионатында жүлделі ІІ орын және 2019 жылы Қырғызстан елінде өткен Азия чемпионатында жүлделі І орынды қанжығасына байлаған. Осылайша сайдың тасындай іріктелген кіл мықтылар арасында топ жарған спорт шебері бірнеше мәрте әлемдік додаларға жолдама алған. Алайда ол жаққа барып-қайтуда қаражат жағы қолбайлау болып, бірнеше мүмкіндікті жіберіп алған.&nbsp;Бүгінде өзінен кейінгі ізбасар қалдыруды көздейтін Нұрлыбек ізін жалғаушы төрт ұлының ішінен Бақтиярын осы спортқа ыңғайлы көреді. Соны осы бастан баптап, спорттың осы түріне бейімдеуді көздейді.<blockquote>«Аллаға шүкір, ізімді жалғайтын төрт бірдей мұрагерім бар. Олардың екеуі үйленді. Жұбайым Роза екеуміз 1990 жылы шаңырақ көтердік. Тәрбиелеп отырған төрт ұлымыздың әр кәсіпке қабілеттері әрқалай. Бақтияр есімді балам биыл тоғызыншы сыныпқа көшті. Болашақ осы балам өзімнің ізімді жалғайтындай көрінеді. Қимылы да, қабілеті де ерекше көзге түседі. Кезінде өзім Орынбай, Қуаныш сынды ағайлардан дәріс алып, осы спортқа деген қызығушылығым арта түскен еді. Енді ізбасарларыма да бір биікке шығатындай үлгі болсам ба деймін», – деп өз ойын жеткізді әңгіме барысында Азия чемпионы.</blockquote>

Аралдан шыққан Азия чемпионы   

Сырдарияның атын асқақтатқан бапкер

<a href="https://kyzylorda-news.kz/">Kyzylorda-news.kz.</a> Кеше Сырдария ауданында ҚР еңбек сіңірген жаттықтырушысы, КСРО спорт шебері, Сырдария ауданының Құрметті азаматы Қобландин Сұлтанбек Ибрагимұлын еске алуға арналған республикалық турнирінің ашылу салтанаты өтті.Турнирдің ашылу салтанатына аудан әкімі Б.Сәрменбаев, аудандық мәслихат төрағасы Е.Әжікенов, ҚР Хоккей федерациясының президенті Б.Сексенбаев және аудан ардагерлері мен спортшылар қатысты.Турнир басталмас бұрын аудандық тарихи-өлкетану музейінің ұйымдасты-руымен көрме көрсетілді. Көрмеге С.Қобландиннің жеке мұрағатынан алынған заттар, жетістіктерін айшықтайтын медальдар, суреттер қойылды. Мұнан соң аудан әкімі жиналғандарды турнирдің басталуымен құттықтап, жарысқа қатысушыларға сәттілік тіледі.<blockquote>– Спорттың бұқаралық сипатын дамыту бағытында ауданда ауқымды жұ-мыстар атқарылып жатыр. Оның қатарында жасөспірімдерді спортқа бейім-деу үшін түрлі деңгейдегі жарыстар тұрақты ұйымдастырылып келеді. Соның айғағы ретінде бүгін ауданымызда өткізіліп отырған осы спорттық іс-шараны айтуға толық негіз бар. Бүгін Қазақстан Республикасының еңбек сіңірген жаттықтырушысы, КСРО спорт шебері, Сырдария ауданының құрметті азаматы Қобландин Сұлтанбек Ибрагимұлын еске алуға арналған көгалдағы хоккейден республикалық ашық турнир жалауын көтерді. Көгалдағы хоккейдің шебері болған Сұлтанбек Ибрагимұлы – ел спортының дамуына сүбелі үлес қосқан азамат. Ол жастайынан спортқа бейім болып, КСРО чемпионатының қола және күміс жүлдегері атанған. Көптеген елдерде өткізілген байрақты бәсекелерде топ жарып, өз мықтылығын дәлелдеген азамат еді.</blockquote>Соның бір айғағы 2001 жылы көгалдағы хоккейден Қазақстан Республикасына еңбегі сіңген жаттықтырушы атағы берілді. 1986 жылдан бастап Қызылорда облысының көгалдағы хоккейден ерлер-әйелдер құрама командасының аға бапкері, Қазақстан Республикасы ерлер құрама команда-сының аға бапкері сынды қызметтерді абыроймен атқарды. Абыройлы еңбегі үшін 2020 жылы «Сырдария ауданының Құрметті азаматы» атағы берілді. Еңбек жолында 125 спорт шеберін және 5 «Халықаралық дәрежедегі спорт шеберін» дайындап шықты. Сұлтанбек Ибрагимұлы арамызда болғанда бұл көрсеткіштер еселенері сөзсіз еді. Дегенмен, жақсының ісін ұлы мен шәкірттері жалғастырып, ауданымызда көгалдағы хоккейді дамытуға өз үлесін қосып келеді. Сұлтанбек Ибрагимұлының жарқын бейнесі өңір спортының дамуына ерекше үлес қосқан азамат ретінде әріптестерінің есінде мәңгі сақталатыны анық. Биыл бірінші рет жалауын көтергелі отырған Сұлтанбек Ибрагимұлын еске алуға арналған көгалдағы хоккейден республикалық ашық турнир соның бір дәлелі. Бүгінгі айтулы спорттық бәсекеге жиналған спортшыларға сәттілік тілеймін, – деді Берік Әбдіғаппарұлы.Содан соң ҚР Хоккей федерациясының президенті Б.Сексенбаев пен Қызылорда облыстық хоккей федерациясының президенті М.Текетаев сөз сөйлеп, көгалдағы хоккей спортын дамыту мақсатында атқарылып жатқан жұмыстар жөнінде айтты. Сондай-ақ С.Қобландиннің еңбегін жоғары бағалап, оның ізбасар шәкірттеріне әркез қолдау көрсетілетінін жеткізді. Ал әулет атынан С.Қобландиннің жеңгесі Б.Маханова сөз сөйлеп, турнирді ұйымдастырушыларға шынайы риза¬шылығын білдірді.– Бүгін біздің әулетіміз үшін өте маңызды тарихи күн. Әулетіміздің аяулы азаматы Сұлтанбекті жоғалтқанымызға бүгін бес айдың жүзі болыпты. Жүректі сыздатқан жан жарамыз жазылмай, орны бөлек, бірімізге адал жар, бірімізге қамқор бауыр, бірімізге қимас дос болған, ал мен үшін тіптен орны бөлек Сұлтанбекті жоқтаудамыз. Жасынан елгезек, бауырмал, өжет, өзіне де, өзгеге де талап қоя білетін Сұлтанбектің өмірі көз алдымыздан өтіп жатыр. Ол көп балалы отбасының перзенті еді. Жақсы оқушы, озат студент, қамқор бауыр, адал дос, ата-анасының, елінің мақтанышы бола білді. Оның көгалдағы хоккейдегі жеткен жетістіктері мен марапаттары бүгінде бәріміз үшін зор мақтаныш. Бапкер болу үлкен біліктілікті, төзімділікті, қабілетті қажет етеді десек, осы керемет қасиеттер Сұлтанбектің бойынан табылатын. Ардақты азаматтың Қазақстан спортына сіңірген еңбегін ескеріп, бүгін турнир ұйымдастырып жатқан барлық азаматтарға әулетіміздің атынан алғыс айтамыз, – деді Бибімария Маханова.Айта кету керек, 8 командаға топтасқан 200-ге жуық спортшы қатысып жатқан турнир бірнеше күнге созылмақ. Жеңімпаздарға «Қайсар» хоккей клубының, ҚР Хоккей федерациясының және Қобландиндер әулетінің атынан арнайы марапаттар беріледі.&nbsp;

Сырдарияда даңқты бапкерге арналған турнир басталды 

<a href="https://kyzylorda-news.kz/">Kyzylorda-news.kz.</a> 13 мамырда Алматы қаласында күллі қазаққа есімі танымал, &nbsp;белгілі комментатор, спорт журналисті Амангелді Сейітхановты еске алуға арналған БАҚ өкілдері арасында республикалық турнир өтті.Қаламгерлер бас қосқан аладоп бәсекесінде Сыр өңірінің БАҚ өкілдерінен құралған «Ақмешіт-Қызылорда» футбол командасы топ жарып, чемпион атанды. Бүгін Өңірлік коммуникациялар қызметінің ақпарат алаңында әріптестеріміз арнайы брифинг беріп, республикалық турнирдегі қызықты сәттерді бізбен бөлісті.<blockquote>«Қазақ спортының майталманы, барша спорт сүйер қауымға белгілі &nbsp;комментатор, журналист Амангелді Сейітхановты еске алуға арналған БАҚ өкілдері арасындағы республикалық жарыс өте жоғары деңгейде өтті. Біздің қызылордалық команда бұл жарысқа үлкен дайындықпен барды. Алғашқы жылғы ойында сәтсіздік орын алып, жеңіліске ұшырасақ та намысты қолдан бермей биыл аладоп бәйгесіне тыңғылықты дайындалдық. Осы еңбегіміздің арқасында жігіттер жұдырықтай жұмылып, алаңның әр бұрышында кескілескен ойын болды. Біздің командаға үлкен қолдау көрсеткен және жеңіске жетуімізге себепкер болған облыс әкімі Нұрлыбек Машбекұлы Нәлібаев пен барша Сыр халқына алғысымыз ерекше», - деді «Ақмешіт-Қызылорда» құрама командасының жетекшісі Әділбек Жақанов.&nbsp;</blockquote>Одан әрі ойын барысы туралы «Ақмешіт-Қызылорда» командасының мүшесі Асқар Тәжиев баяндап берді.&nbsp;<blockquote>«Бұл республикалық турнирдің басты ерекшелігі – жасы 30 жастан жоғары журналистер арасында ұйымдастырылды. Сонымен қатар ойын шарты бойынша міндетті түрде командадағы бір ойыншы 40 жастан жоғары болуы керек-ті. Біздің командада 42 жастағы Ержан Батыршаев пен 52 жастағы «Qyzylorda» телеарнасының телеоператоры Бауыржан Қожамұратов алаңда бір-бірімен алмасып тұрды. Жалпы бұл турнирге 16 команда қатысты. Біздің команда төрт топта өнер көрсетті. Одан кейін «Қаракет-Жетісу», «Спорт журналистері», «Қазгеди» командаларымен негізгі уақытта теңесіп, пенальти барысында жолымыз болды. Осы 3 пенальтиден кейін финалда жеңіске жеттік. Турнирде команда мүшелері жарақат алса да берілмей, тартысты ойын көрсеттік», - деді Асқар Сәрсенұлы.</blockquote>Өз кезегінде «Ақмешіт-Қызылорда» командасының мүшесі, «Хабар» телеарнасының Қызылорда облысындағы меншікті тілшісі Нұрлан Жақыпбек команда тарихына тоқталып өтті.<blockquote>«Жалпы сырбойылық журналистердің басын біріктірген «Ақмешіт-Қызылорда» футбол командасы 10 жылға жуық бір алаңда салауатты өмір салтын насихаттап келеді. Команда құрылғанда ең алғашқы турнирлерде үздіктер қатарынан көрініп жүрдік. Әр жыл сайын республикалық футбол ойындарына қатысуды үрдіске айналдырдық. Біздің команда Сейдахмет Бердіқұлов атындағы турнирдің жүлдесін иеленді. Одан бөлек, бірнеше турнирлерде күміс, қола жүлделерді қанжығаға байлады. Мінекей, екінші мәрте ұйымдастырылған Амангелді Сейітхановты еске алуға арналған республикалық футбол бәсекесінде біздің команда чемпион атанды. Мұнымен біздің команда мүшелері осал еместігін тағы бір дәлелдеді, - деді Нұрлан Жанақұлұлы.</blockquote>Республикалық турнирде 40 жастан асқан ойыншы ретінде «Ақмешіт-Қызылорда» құрама командасында бой көрсеткен Ержан Батыршаев аладоп алаңында керемет ойын үлгісін көрсетті.<blockquote>«Расында, еліміздің түкпір-түкпірінен жиналған БАҚ өкілдері арасындағы футбол бәсекесі тартысты өтті. Турнир барысында бір-бірімізді демеп, жеңіске жетудің жолын ақылдасып жүрдік. Дайындық барысы үзілмей, жауапкершілікті сезінген жігіттеріміз бұл ойында сәтті жеңіске жетті. Қолдаған баршаларыңызға алғыс айтамыз», - деді Ержан Оразбекұлы.&nbsp;</blockquote>Ерекше айта кетін жәйт, «Ақмешіт-Қызылорда» сапында чемпиондық атаққа қол созған Әділбек Жақанов турнирдің «Үздік ойыншы» атағына ие болды.P.S Биыл Сыр өңірінде журналистер арасында республикалық турнир өтеді деп жоспарлануда.

Биыл Қызылордада журналистер арасында республикалық турнир өтеді

<a href="https://kyzylorda-news.kz/">Kyzylorda-news.kz.</a> Өткен аптада Сырдария ауданына қарасты «Сұлу-ай» шығармашылық және «Аслан» спорт орталығының шәкірттері толағай табысқа қол жеткізе білді. Халық қалаулысы Анар Қалдыбаева жетекшілік ететін екі орталықтың өнерпаздары өнер мен спорттан өзара даралана алған еді.Бірінші кезекте Алатау бөктерінен ақжолтай жаңалық келіп жеткен болатын. Атап айтқанда, «Сұлу-ай» шығармашылық өнер орталығының асқарлық өнерпаздары республикалық «Жарқын Болашақ» өнер орталығының ұйымдастыруымен жүзеге асқан VII «Жарық жұлдыз» тақырыбындағы өнер байқауының финалдық кезеңінде аудан мерейін тасытты. Аталған байқауда Марфуға Әубәкірова «Вокал» жанры бойынша І орынды жеңіп алды. Ал Ақәділ Пернебаев «Аспапта ойнау» жанры бойынша І орынды, Еркежан Кеңесбайқызы ІІІ орынды еншіледі. Осы ретте, республикалық байқауға оқушыларын бастап барған жетекшілер Әсел Ибраева мен Гүлназ Сералиеваның еңбегі ерен.<blockquote>Алматы қаласында өткізілген байқауда орасан табысқа қол жеткізген өнерлі өрендер «Сұлу-ай» шығармашылық өнер орталығының жас таланттары болып табылады. Біз мақтан тұтатын шәкірттеріміз көбейе бергенін қалаймыз. Оқушыларды өнерге баулып жүрген жетекшілеріміз бен ата-аналарды кезекті жеңісімен құттықтаймын, – деді Анар Қалдыбаева.</blockquote>Өз кезегінде «Аслан» спорт орталығының жетістігі де күн санап артып келеді. Мысалы, өткен аптаның соңында дзюдо ше­берлері «Samruk kids» жүлдесіне орай өткізілген облыстық ашық біріншіліктен олжалы оралды. Екі тәулікке созылған жарыстың алғашқы күнінде 8 жүлдеге іліккен спортшылар жексенбіде жүлде санын еселей түскеніә мәлім.Расында, «Samruk kids» жүлдесіне орай дзюдодан облыстық ашық біріншілікте 2016-2017 жылы туған балалар арасында 23 келі салмақта Мирас Марат І орын, 26 келіде Дарын Куанышұлы І орын, 2014-2015 жылы туған балалар арасында 23 келіден Асылхан Нұрлан ІІІ орын, 26 келіден Нұралы Мейрамбекұлы мен Бақдәулет Саятұлы ІІІ орын, 29 келіден Нұрғиса Бекболат ІІ орын, Нұрбол Мұханбет ІІІ орын иеленді. 2014-2013 жылы туған балалар арасында 23 келіден Дастан Нұрланов ІІ орын, 29 келіден Нұрғиса Бекболат І орын, 26 келіден Мағжан Нұрлан ІІІ орын, 2012-2013 жылы туған жасөспірімдер арасында 23 келіден Дастан Нұрланов І орын, 26 келіден Мағжан Нұрлан ІІІ орын, 29 келіден Рахман Дарханұлы мен Әділет Қалдыбек ІІІ орын, 42 келіден Мирас Алтынбеков ІІІ орын, 2010-2011 жылы туған жасөспірімдер арасында 29 келіден Санат Бақытжанұлы мен Сабыржан Мешітбаев ІІІ орын, 35 келіден Арман Тұрғанбай мен Гажданбек Мұхаммедәли ІІІ орын, 32 келіден Диас Нұрланов ІІІ орын, 38 келіден Мырза Смагұл ІІІ орын иегері атанды.<blockquote>Мақтаулы бапкеріміз Аружан Темірғали – өте еңбекқор жан ретінде көпшілікке таныс. Әр апта сайын спортшыларды жарыс жолына шығарып, зор жетістігімен риза қылуда. Оның табандылығы мен қайсарлығын айрықша атап өту керек. Спортшыға жоғары талап қояды. Белгіленген межеден көріну үшін алға қойған мақсаты мен ұмтылысы жақсы. Бірнеше жүлдеге қол жеткізген спортшылардың жеңісі бізге қуаныш сыйлады, – деді Анар Қалдыбаева.</blockquote>Негізінен, өткен аптаны көңілді нотада түйіндеген ақжармалық бишілеріміз болды. «Сұлу-ай» шығармашылық өнер орталығының Ақжарма ауылындағы «Ұлтық би» үйірмесінің жетекшісі Ақжан Сәкенова шәкірттерін киелі Түркістан қаласына апарған болатын. Мұнда «Сұлу-ай» би тобының екі ұжымы «Атадан-мұра» қоғамдық қорының бүлдіршіндер, мектеп оқушылары мен жасөспірімдер арасында ұйымдастырылған республикалық байқауында І және ІІ орынды жеңіп алды. Жүлдегерлер қатарынан көрінген өнерпаздарымыз Алматы қала­сында өткізілетін халықаралық байқауға қатысу үшін 50 пайыз жеңілдік ұта білді. Өз кезегінде «Ұлттық би» үйірмесінің жетекшісі Ақжан Сәкенова «Атадан-мұра» қоғамдық қорының президенті Т.Сауранбаевтың «Алғыс хатына» ие болды. &nbsp;

Сырдарияда қос орталықтың оқушылары жеңімпаз атанды

<a href="https://kyzylorda-news.kz/">Kyzylorda-news.kz.</a> ​ Өзбекстан астанасы Ташкентте бокстан ерлер арасындағы XXII әлем чемпионаты мәресіне жеткен болатын. Осы дода нәтижесінде Қазақстан әлем чемпионаты тарихындағы медальдар саны бойынша үшінші орынға көтерілді, деп хабарлайды Спортты дамыту дирекциясының баспасөз қызметі.Еске салайық, чемпионат финалында 4 отандасымыз – Санжар Тәшкенбай, Махмұд Сабырхан, Асланбек Шымбергенов пен Нұрбек Оралбай жұдырықтасып, бәрі жеңіске жетті.Алдыңғы әлем чемпионатының күміс жүлдегері Махмұд Сабырхан (54 кг) бұл финалда сол кездегі қателіктерін қайталаған жоқ. Отандасымыз ринг қожайыны Ойбек Джураевпен жекпе-жекте бар шеберлігін паш етті. Мұны қапталдағы төрешілер де мойындады. Тіпті, 21 жастағы боксшымыз 3-раундта қырғыз төрешісіне 2 мәрте нокдаун тіркетті. Қазақ боксшысы осыған дейін шаршы алаңда Куба, Гана, Үндістан мен Мажарстан спортшысын ұтқан. Айта кетейік, Махмұд 2 жыл бұрынғы Белградтағы әлем чемпионатында да күміс жүлдеге ие болған.Ұлттық құрама капитаны Асланбек Шымбергенов өзі қатысқан 2-і әлем чемпионатында топ жарды. Отандасымыз финалда (71 кг) тағы бір өзбекстандық Саиджамшид Джафаровты тізе бүктірді. Алдыңғы жекпе-жектерде Асланбек Үндістан, Франция, Израиль, Тринидад және Тобаго боксшысынан басым түскен.Нұрбек Оралбай Ташкентте өз салмағында (80 кг) қарсылас шақ келтірмей тағы бір мәрте әнұранымызды шырқатты. Отандасымыз шешуші, көптің қызығушылығын тудырған жекпе-жекте Қытай атынан сынға түскен қазақ Тоқтарбек Таңатқанды ұтты. Осыған дейін Нұрбек Ресей, Иордания, Түркия мен Әзербайжаннан келген боксшылардан басым түскен.Финалдардың алғашқы күні Ұлттық құрамадағы ең жеңіл спортшы Санжар Ташкенбай топ жарып, чемпион атанған ең жас қазақ боксшысына айналды. Ал одан кейін шаршы алаңға шыққан Дулат Бекбауов (67 кг) қарсыласына жол беріп, күміс медальға қол жеткізді. Өзбекстандағы додаға Ұлттық құрама барлық 13 салмақта спортшы апарған болатын. Бұл қатардағы Сәкен Бибосынов (51 кг), Серік Теміржанов (57 кг), Талғат Сырымбетов (60 кг), Санатәлі Төлтаев (63,5 кг), Нұрқанат Райыс (75 кг), Сағындық Тоғамбай (86 кг), Айбек Оралбай (92 кг) мен Қамшыбек Қонқабаев (+92 кг) жүлдегерлер қатарынан көріне алмады.Осылайша, Қазақстан құрамасы Ташкентте 4 алтын, 1 күміс медальді қоржынға салып, жалпы есепте 2-орын алды. Көш басында жарыс қожайыны Өзбекстан қалды. Жалпы Қазақстан 1993 жылдан бері егемен ел ретінде осымен 16 рет әлем чемпионатына былғары қолғап шеберлерін жіберді. Қазір еншімізде 18 алтын, 16 күміс, 22 қола жүлде бар. Осының арқасында жалпы Әлем чемпионаты тарихындағы медаль есебінде Қазақстан АҚШ-ты басып озып, 3-орынға көтерілді. Бірінші орынға - Куба, екінші орынға Ресей жайғасқан. Ұлттық құрама осыған дейін тек 2013 жылы Алматыда өткен дүниежүзі бәсекесінде 4 алтынға ие болған.«Құрметті Қазақ елі, бәріңізді шын жүректен құттықтаймын! Бұл – бүкіл елдің жеңісі! Ташкенттегі осы әлем чемпионаты құрамамыз үшін ерекше нәтижемен есте қалды. Боксшыларға қолдау көрсету үшін Қазақстаннан көп жанкүйер келгенін алғашқы күннен байқадым. Федерация мен команданың атынан оларға рақмет айтамын»,-деді Қазақстан бокс федерациясының президенті Кеңес Рақышев финалдардан кейін берген сұхбатында.Тағы айта кетейік, әлем чемпиондары Халықаралық бокс қауымдастығынан (IBA) 200 мың АҚШ долларынан алды. Күміс жүлдегерлерге 100 мың, қола жүлдегерлердің әрқайсысына 50 мың АҚШ доллары берілді. Биылғы доданың жалпы жүлде қоры – 5,2 млн АҚШ доллары.Сондай-ақ Қазақстан бокс федерациясының президенті Кеңес Рақышев осы нәтижеге үлес қосқан Мырзағали Айтжанов бастаған бапкерлер қосынын, боксшыларды, дәрігерлерді, ғылыми топтың мамандарын өз есебінен марапаттайды. Бұл ретте чемпион атанған Ұлттық құрама боксшыларына сыйақы ретінде 100 мың АҚШ долларынан табыстайды.

Қазақстан және Қызылорда облысының жаңалықтары: Спорт