<a href="https://kyzylorda-news.kz/">Kyzylorda-news.kz.</a> ​ Өзбекстан астанасы Ташкентте бокстан ерлер арасындағы XXII әлем чемпионаты мәресіне жеткен болатын. Осы дода нәтижесінде Қазақстан әлем чемпионаты тарихындағы медальдар саны бойынша үшінші орынға көтерілді, деп хабарлайды Спортты дамыту дирекциясының баспасөз қызметі.Еске салайық, чемпионат финалында 4 отандасымыз – Санжар Тәшкенбай, Махмұд Сабырхан, Асланбек Шымбергенов пен Нұрбек Оралбай жұдырықтасып, бәрі жеңіске жетті.Алдыңғы әлем чемпионатының күміс жүлдегері Махмұд Сабырхан (54 кг) бұл финалда сол кездегі қателіктерін қайталаған жоқ. Отандасымыз ринг қожайыны Ойбек Джураевпен жекпе-жекте бар шеберлігін паш етті. Мұны қапталдағы төрешілер де мойындады. Тіпті, 21 жастағы боксшымыз 3-раундта қырғыз төрешісіне 2 мәрте нокдаун тіркетті. Қазақ боксшысы осыған дейін шаршы алаңда Куба, Гана, Үндістан мен Мажарстан спортшысын ұтқан. Айта кетейік, Махмұд 2 жыл бұрынғы Белградтағы әлем чемпионатында да күміс жүлдеге ие болған.Ұлттық құрама капитаны Асланбек Шымбергенов өзі қатысқан 2-і әлем чемпионатында топ жарды. Отандасымыз финалда (71 кг) тағы бір өзбекстандық Саиджамшид Джафаровты тізе бүктірді. Алдыңғы жекпе-жектерде Асланбек Үндістан, Франция, Израиль, Тринидад және Тобаго боксшысынан басым түскен.Нұрбек Оралбай Ташкентте өз салмағында (80 кг) қарсылас шақ келтірмей тағы бір мәрте әнұранымызды шырқатты. Отандасымыз шешуші, көптің қызығушылығын тудырған жекпе-жекте Қытай атынан сынға түскен қазақ Тоқтарбек Таңатқанды ұтты. Осыған дейін Нұрбек Ресей, Иордания, Түркия мен Әзербайжаннан келген боксшылардан басым түскен.Финалдардың алғашқы күні Ұлттық құрамадағы ең жеңіл спортшы Санжар Ташкенбай топ жарып, чемпион атанған ең жас қазақ боксшысына айналды. Ал одан кейін шаршы алаңға шыққан Дулат Бекбауов (67 кг) қарсыласына жол беріп, күміс медальға қол жеткізді. Өзбекстандағы додаға Ұлттық құрама барлық 13 салмақта спортшы апарған болатын. Бұл қатардағы Сәкен Бибосынов (51 кг), Серік Теміржанов (57 кг), Талғат Сырымбетов (60 кг), Санатәлі Төлтаев (63,5 кг), Нұрқанат Райыс (75 кг), Сағындық Тоғамбай (86 кг), Айбек Оралбай (92 кг) мен Қамшыбек Қонқабаев (+92 кг) жүлдегерлер қатарынан көріне алмады.Осылайша, Қазақстан құрамасы Ташкентте 4 алтын, 1 күміс медальді қоржынға салып, жалпы есепте 2-орын алды. Көш басында жарыс қожайыны Өзбекстан қалды. Жалпы Қазақстан 1993 жылдан бері егемен ел ретінде осымен 16 рет әлем чемпионатына былғары қолғап шеберлерін жіберді. Қазір еншімізде 18 алтын, 16 күміс, 22 қола жүлде бар. Осының арқасында жалпы Әлем чемпионаты тарихындағы медаль есебінде Қазақстан АҚШ-ты басып озып, 3-орынға көтерілді. Бірінші орынға - Куба, екінші орынға Ресей жайғасқан. Ұлттық құрама осыған дейін тек 2013 жылы Алматыда өткен дүниежүзі бәсекесінде 4 алтынға ие болған.«Құрметті Қазақ елі, бәріңізді шын жүректен құттықтаймын! Бұл – бүкіл елдің жеңісі! Ташкенттегі осы әлем чемпионаты құрамамыз үшін ерекше нәтижемен есте қалды. Боксшыларға қолдау көрсету үшін Қазақстаннан көп жанкүйер келгенін алғашқы күннен байқадым. Федерация мен команданың атынан оларға рақмет айтамын»,-деді Қазақстан бокс федерациясының президенті Кеңес Рақышев финалдардан кейін берген сұхбатында.Тағы айта кетейік, әлем чемпиондары Халықаралық бокс қауымдастығынан (IBA) 200 мың АҚШ долларынан алды. Күміс жүлдегерлерге 100 мың, қола жүлдегерлердің әрқайсысына 50 мың АҚШ доллары берілді. Биылғы доданың жалпы жүлде қоры – 5,2 млн АҚШ доллары.Сондай-ақ Қазақстан бокс федерациясының президенті Кеңес Рақышев осы нәтижеге үлес қосқан Мырзағали Айтжанов бастаған бапкерлер қосынын, боксшыларды, дәрігерлерді, ғылыми топтың мамандарын өз есебінен марапаттайды. Бұл ретте чемпион атанған Ұлттық құрама боксшыларына сыйақы ретінде 100 мың АҚШ долларынан табыстайды.

Бокстан әлем чемпионаты тарихында Қазақстан үшінші орынға көтерілді

<a href="https://kyzylorda-news.kz/">Kyzylorda-news.kz.</a> Алматы қаласында журналист, белгілі спорт комментаторы Амангелді Сейітхановты еске алуға арналған футболдан республикалық турнир өтті.Жыл сайын дәстүрлі түрде ұйымдастырылатын шағын футболдан Сыр өңірінің БАҚ өкілдері де қалыс қалған емес.&nbsp;Биылғы додада қызылордалық «Ақмешіт-Қызылорда» командасы топ жарып, бас жүлдені қанжығаға байлады.&nbsp;Айта кетейік, жаңақорғандық журналист Әлібек Жарықбаев «Үздік қақпашы», «Qazaqstan»&nbsp; Ұлттық телеарнасының Қызылорда облысындағы тілшісі Әділбек Жақанов «Үздік ойыншы» атанды.&nbsp;<img src="https://knadmin.beoblood.kz/uploads/Whats_App_Image_2023_05_13_at_17_49_51_30d14a5ef0.jpeg" alt="WhatsApp Image 2023-05-13 at 17.49.51.jpeg"><img src="https://knadmin.beoblood.kz/uploads/Whats_App_Image_2023_05_13_at_17_25_49_6b29da025d.jpeg" alt="WhatsApp Image 2023-05-13 at 17.25.49.jpeg">

«Ақмешіт-Қызылорда» командасы республикалық турнирде бас жүлдені иеленді

<a href="https://kyzylorda-news.kz/">Kyzylorda-news.kz.</a>&nbsp; Бүгін «Евразия» спорт кешенінде Қазақ күресінен облыстық «Алтын белбеу» жарысы өтті.Жарысты облыс әкімі аппаратының басшысы Шахмардан Байманов ашып, Сыр өңірінде бастау алған «Алтын белбеудің» маңыздылығына тоқталып өтті. Сонымен бірге, ҚР еңбек сіңірген жаттықтырушысы, облыстық мәслихат депутаты Садық Мұстафа Сыр өлкесінің палуандары өз мықтылықтарын дәлелдеп, үш рет «Қазақстан барысы» титулына ие болғандығы, өңірде осы спорт түрінің даму қарқынын көрсететінін айтты.Бұл жарыстың 1-ші, 2-ші орын иегерлері шілде айында Астана төрінде болатын республикалық «Қазақстан барысы» турниріне жолдама алды. Былтыр осы жарыс жеңімпазы Мақсат Исағабылов «Қазақстан барысы 2022» атанған болатын.Қазақ күресінен өткен «Алтын белбеу» облыстық ақтық жарысының жеңімпазы 106 кг Қармақшылық Айбек Серікбаев.Айбек Серікбаев беліне алтын белбеу тағып, Сыр барысы атанды. Сондай-ақ, 140 кг Қармақшылық Еламан Ерғалиев 2-ші орын иеленіп, Сыр арланы атанса, жүлделі 3-орынды 116кг Қызылордалық Нұрым Сәлімгереев иеленіп, Сыр сұңқары болды.«Түйе палуандар» сайысының жүлде қоры:1-орынға 1 млн. теңге2-орынға 700 мың теңге3-орынға 400 мың теңгеДәстүрлі түрде жыл сайын шілде айында Астана төрінде өтетін республикалық «Қазақстан барысы» турниріне биыл өңірімізден Айбек Серікбаев пен Еламан Ерғалиев барып, Сыр намысын қорғамақ. Сонымен қатар, әрине «Қазақстан барысы 2022» Мақсат Исағабылов та аталмыш турнирде өз титулын қорғап, бағын сынайтын болады.&nbsp;Айта кетейік, бүгінгі «Алтын белбеу» жарысы Сыр елінде он төртінші рет өткізілуде. Облыстық ақтық жарысқа іріктеу ауылдарда, аудандарда өтіп, 4 жас ерекшеліктері бойынша кіші жасөспірімдер, жасөспірімдер, жастар және ересектер арасындағы ең жоғары көрсеткішке қол жеткізген палуандар таңдалып алынды. Екі күнге созылған жарысқа 350 спортшы қатысты.<figure class="image"><img src="https://knadmin.beoblood.kz/uploads/345629534_5596899350410043_9127919175207072720_n_30912173be.jpg" alt="345629534_5596899350410043_9127919175207072720_n.jpg"></figure>&nbsp;<figure class="image"><img src="https://knadmin.beoblood.kz/uploads/345665081_625446166164502_8514093508933774195_n_8138a64e43.jpg" alt="345665081_625446166164502_8514093508933774195_n.jpg"></figure>&nbsp;&nbsp;

Қызылордада облыстық «Алтын белбеу» жарысы өтті

<a href="https://kyzylorda-news.kz/">Kyzylorda-news.kz.</a> Қырғызстанның Бішкек қаласында 4-8 мамыр аралығында өткен гір көтеруден Азия чемпионатына Қорқыт ата атындағы Қызылорда университетінің білім алушылары қатысты. &nbsp;Чемпионатта Корея, Қырғызстан, Пәкістан, Ресей, Моңғолия, Өзбекстан, Үндістан, жалпы саны 15 мемлекеттен келген 500-ден астам спортшы бақ сынады.Сайыста Қорқыт ата атындағы Қызылорда университетінің студенті Төлеген Қайсар 78 келі салмақта 1-орын иеленіп, екі дүркін Азия чемпионы атанды. Студент гір спортынан Қазақстан Республикасының Спорт шебері, Азия чемпионы және әлемнің қола жүлдегері.&nbsp;Чемпионатта университеттің аға оқытушысы Мұхан Әділбек ардагерлер арасында +85 келі салмақта 1-орын иеленіп, чемпион атанды. Сондай-ақ, оқу орнының студенті Әділет Қалжанов 68 келі салмақта Азия чемпионатының қола жүлдесін иеленді.&nbsp; &nbsp;

Төлеген Қайсар екі дүркін Азия чемпионы атанды

<a href="https://kyzylorda-news.kz/">Kyzylorda-news.kz.</a> Бүгін Қызылорда облысының Астана күніне орайластырылған қазақ күресінен «Қазақстан барысы» республикалық турниріне іріктеу жарысы өтті.Айтулы спорт додасында жерлесіміз Айбек Серікбаев топ жарып, жарыс жеңімпазы атанса, тағыда бір қармақшылық спортшы Еламан Нұрғалиев ІІ орынды иеленіп, аудан мерейін үстем етті. Жеңіс тұғырына көтерілген қармақшылық балуандар мен Қазақтан барысы – 2022 турнирінің жеңімпазы Мақсат Исағабылов алдағы уақытта өтетін «Қазақстан барысы» республикалық турнирінде Сыр елінің намысын қорғайтын болады.Жерлестерімізді бүгінгі жарқын жеңістерімен құттықтап, алдағы «Қазақстан барысы» сайысында сәттілік тілейміз!Ауданда ұстаз есімі ұлықталған білім бәйгесі өттіБүгін Қармақшы ауданына қарасты Ақжар ауылында саналы ғұмырын ұстаздық пен елдік іске арнаған ардақты ұстаз Сәден Нұртаев атындағы Қазақстан тарихы пәнінен республикалық олимпиада өтті.&nbsp;Жас білімгерлер сайысының ашылу салтанатында аудан әкімі Жандос Еркінбек ұлағатты ұстаз Сәден Нұртаевтың өмірі мен еңбек жолы туралы сөз қозғап, олимпиада қатысушыларына сәттілік тіледі. Биыл алтыншы рет ұйымдастырылған дәстүрлі білім додасында Қызылорда, Батыс Қазақстан, Түркістан облыстарынан 25 жас тарихшы өз білімдерін сарапқа салуда. Білім бәсекесінде жүзден жүйрік, мыңнан тұлпар шыққан жеңімпаздарға арнайы дипломдар мен қаржылай сыйлықтар табысталады.<img src="https://knadmin.beoblood.kz/uploads/346489454_266845895783071_1068998414744278198_n_bc59e3ad17.jpg" alt="346489454_266845895783071_1068998414744278198_n.jpg">&nbsp;

Қармақшылық балуандар жеңіс төрінде

<a href="https://kyzylorda-news.kz/">Kyzylorda-news.kz.</a> Қармақшы ауданында спорт саласының өсіп-өркендеуіне сүбелі үлесін қосқан азаматтар жетерлік. Өзі жоқ болса да көзі тірі кезінде елеулі еңбектерімен елге танылған, талай рет түрлі деңгейдегі дүбірлі жарыстарда аймақ, республика намысын қорғап, мерейі үстем болған аудан спортының нар тұлғалары Жарболсын Құндақбаев, Аманкелді Ерекешов, Қорғанбек Манасов, Зейнуллла Жәкеев, Сұлтанбек Омаров, Әділбек Серікбаев сынды атпал азаматтармен бірге бүгінде аудан спортының қара нарлары атанған Төленді Мырзабаев, Еркін Атабаев, Әлжан Төремаханов және басқалардың есімдері құрметпен аталады.Ауданымызда қазақ күресі, самбо, дзюдо, бокс, жеңіл, ауыр атлетика, волейбол, қол добымен қатар, футбол да жақсы дамыған. Осы спорт түрлерінен жерлестеріміз түрлі деңгейде өткізіліп жүрген байрақты, дүбірлі жарыстарда жүлделі орындардан көрінуде. Жерлес спортшылардың спорт аренасында жасындай жарқырап жүргендері әрине, сала мамандарының жемісті еңбегі. Осындай дарын иелерінің бірі – ауданда футбол, волейбол спортының дамуына сүбелі үлесін қосқан майталман маман, ұлағатты ұстаз, марқұм Сағат Бұқпанов. Оның өнегелі өмір жолы көпшілікке жақсы таныс.&nbsp;1953 жылы Жосалы кентінде өмірге келіп, Шоқан Уәлиханов атындағы №26 орта мектепті тәмамдаған, бала жасынан спортқа, оның ішінде футболға үйір болып өскен Сағат Мұсаұлы спорттық жоғары білімін жетілдіруде Алматы қаласындағы Қазақтың Мемлекеттік спорт институтына оқуға түседі. Жоғары білім ордасында оқи жүріп, институттың құрамасы сапында талай дүбірлі жарыстарға қатысып, жүлделі орындардан көрінеді. Тіпті, «Қайрат» командасының қосалқы құрамында біршама жыл ойнап, нағыз футболшы екенін дәлелдейді. Көптеген марапатқа да ие болады. Бірақ, жылдар өте туған елге оралып, аудан орталығындағы №26 орта мектепке денешынықтыру пәнінің мұғалімі болып қызметке орналасады. Сондай-ақ, елге оралған соң ұстаз Үміт Әбдіжәлелқызымен &nbsp;шаңырақ көтеріп, ұрпақ өсіріп, олардың қоғамнан орындарын сайлап алуына еңбек сіңіреді. Ол аудан спортының дамуына елеулі үлес қосқан азамат. Оның жаттықтырумен көптеген жас спорт деген сырылы өнерден өз орнын алып, үлкен жетістіктерге қол жеткізді. Аудан құрамасына басшылық жасап, облыстық, республикалық жарыстардың көшінен көрінді. Тіпті, шәкірттері арасында «Қайсар» командасы сапында облыс намысын қорғағандар да бар. Сондай-ақ, оның өмірлік жары Үміткүл Әбдіжәлелқызы да &nbsp;саналы өмірін білім саласына арнаған. Ол Қызылорда қаласындағы Н.Гоголь атындағы педагогикалық институтын тәмамдаған соң №26 орта метепте алғашқы еңбек жолын бастап, өмірінің соңына дейін сол білім ордасында еңбек етті. Талай дарынды шәкірттерінің адами қалыптасуына еңбек сіңірді.&nbsp;«Орнында бар оңалар», – дегендей, бүгінде ерлі-зайыпты ұлағатты ұстаздардың ұрпақтары да аудан экономикасын дамытуда еңбек етіп жүр. Барлығы да отбасылы, түрлі мамандық бойынша еңбек етуде. Қайраты аудандық мәслихатта бөлім басшысы болса, келіні Мөлдір ұстаз, Талғаты №121 орта &nbsp;мектепте директордың ғылыми-әдістемелік жөніндегі орынбасары, оның жары Алмагүл №27 орта мектепте бастауыш сынып мұғалімі, ал кенжесі Қуаныш №30 орта мектепте педагог-психолог, жары Маржан №26 орта мектепте шет тілі пәні мұғалімі.Осындай талант иелерінің туғанына биыл 70 жыл толды. &nbsp;Осы ретте, &nbsp;ұлағатты ұстаз Сағат Бұқпановтың 70 жылдық мерейтойын атап өтуде аудандық мәдениет және спорт бөлімінің қолдауымен &nbsp;№26 орта мектеп ұжымы мен демеушілердің ұйымдастыруымен &nbsp;№27 орта мектептің спорт алаңында жасөспірімдер арасында шағын футболдан аудандық жарыс өтті. Оған Жосалы кентіндегі орта білім беру мекемелерінен 8 команда қатысып, ұстаз атындағы жүлдені сарапқа салды.Жарыстың &nbsp;ашылу салтанатында аудандық мәслихаттың төрағасы Әділ Үсенов, аудандық ардагерлер кеңесінің төрағасы Асқар Мереков, туысқандары атынан Болат Есетовтер Сағат Мұсаұлының өнегелі өмір жолынан естелік айтып, жас футболшыларға сәттілік тіледі.&nbsp;Одан әрі командалар өзара ойын өрнегін көрсетіп, оның нәтижесімен №26 орта мектеп құрамасы жарыс жеңімпазы атанса, жүлделі ІІ және ІІІ орындарды №27 орта мектеп пен №183 орта мектеп құрамалары өзара бөлісті. Ал, үздік ойындарымен көрермен көзайымы атанған №27 орта мектеп құрамасының ойыншылары Арман Әбитай «Үздік ойыншы», Нұржан Жақсылық &nbsp;«Үздік шабуылшы», &nbsp;№26 орта мектебінің ойыншылары Аслан Жұманов «Үздік ойыншы», Ернұр Кәдірбеков «Үздік қақпашы», &nbsp;№183 орта мектептің шәкірті Дамир Шағалаев «Үздік сұрмерген» номинациясымен марапатталса, №121 орта мектептің спортшылары Нұрсұлтан Сағындық арнайы грамотамен, Жалғас Сұлтан қаржылай сыйлыққа ие болды. Жарыс соңында жүлдегер командалар мен номинация иегерлері аудандық мәдениет және спорт бөлімінің мадақтамаларымен, жарыс демеушілерінің сый-сияпатымен мадақталды. Жарыс соңында ұлағатты ұстаз Сағат Бұқпанов пен Үміт Әбжәлиеваға арнап ас берілді.

Қармақшыда жасөспірімдердің аяқдоп жарысы өтті

<a href="https://kyzylorda-news.kz/">Kyzylorda-news.kz.</a> Зейнолла жарқынбаев атындағы білім ордасының «мектеп мақтаныштары» тақтасынан азия чемпионы көзге түсті. Әлбетте, әңгімелесуді жөн көрдік. Біздің бүгінгі кейіпкеріміз – үлгерімі жақсы, спортқа құштар 10 сынып оқушысы нұрислам орынбасар. Жас өреннің белсенді, алғыр және ізденімпаз болып өсуіне отбасындағы тәлім-тәрбие мен мектеп қабырғасында алған білімі әсер еткені анық. Нұрисламды ұстаздар сенімін ақтаған азамат екенін аудан халқы жақсы біледі.Иә, бұлай мақтауға да себеп бар. Нұрислам жуырда Қырғызстан мемлекетінің астанасы Бішкек қаласында өткен чемпионатқа Қазақ елінің атынан қатысып, үздік нәтиже көрсетті. Осылайша 2005-2006 жылы туған жасөспірімдер арасында 73 келі салмақта өткен жарыста 3 орын иеленіп, Азияның қола жүлдегері атанды. Аудан абыройы асқақтаған чемпионатқа Корея, Қырғызстан, Пәкістан, Ресей, Моңғолия, Өзбекстан, Индия және Қазақстаннан 400-ге жуық спортшы қатысқан. Мұнан бөлек еңбексүйгіш, ізденімпаз, белсенді болып өсуді мақсат еткен Нұрислам – бүгінде мектептегі үлгерімі жақсы оқушылардың бірі. Бұл туралы бізге оның сынып жетекшісі Ақжайық Төлеуова айтып берді.<blockquote>«Шәкірттерімнің әрқайсысы – мен үшін шоқтығы биік жұлдыз. Олардың талабы мен талантын ұштап, шыңға шығаруды басты мақсатым деп білемін. Нұрисламның спорттан үздік екені белгілі. Сондықтан сынып жетекшісі ретінде оқушымның білімдегі қырына тоқталсам, үлгерімі жақсы, пән мұғалімдері тарапынан да мақтау жиі естіп тұрамын. Бос уақытында тарихи кітаптарды оқығанды ұнатады. Мектеп ішіндегі мәдени іс-шараларға да белсене қатысады. Қысқасы, мектептің мақтанышы деуге әбден болады», – дейді Ақжайық Төлеуова.</blockquote>Чемпион бос уақытында кенттегі «Наркескен» спорт клубында гір спортымен кәсіби түрде айналысады. Жаттықтырушысы халықаралық жарыстардың бірнеше дүркін жеңімпазы Абдулхасан Сейтенов те Зейнолла Жарқынбаев атындағы мектептің түлегі. Нұрислам жас болса да болашаққа нақты мақсат қоя білген. Жоғары сыныпты жақсы үлгеріммен бітіріп, кейін мемлекеттік грант иегері атанып, елдің дамуына үлес қосқысы келетінін жеткізді. Біз де жас өреннің талабына сәттілік тіледік. Бүгінде Зейнолла Жарқынбаев атындағы №202 орта мектеп өңірге спорт саласында топ жарған өрендерімен дара. Білім ордасының қабырғасында қазақ күресі, шахмат, тоғызқұмалақ, воллейбол, гір спорты, шағын футболдан үйірмелер жұмыс жасайды.&nbsp;Осы орайда шәкірт тәрбиелеуде, бәсекеге қабілетті ұрпақ қалыптастыруда мектептің мұғалімі Мейрамбек Есназаровтың еңбегіне ерекше тоқталуға болады. Қазір оны аудан халқы тек дене шынықтыру пәнінің мұғалімі деп қана емес, білікті бапкер деп таниды. Өйткені ол мектеп қабырғасындағы 19 жылдық еңбек өтілінде бірнеше чемпионды тәрбиелеп шығарды.&nbsp;<blockquote>«Қазіргі таңда мен 5-10 сынып аралығындағы оқушыларға дене шынықтыру пәнінен сабақ беремін. Оқушылардың барлығы спортқа құштар. Сабағыма барлығы да қалмай қатысады. Әрине құр жаттығулардан оқушыларға дене-бітімнің өсіп-жетілуіне физикалық тұрғыда пайдасы бар қызықты спорттық ойындарды ойнатқанды жөн көремін. Бекітілген сағатымнан бөлек гір спортынан үйірмем де бар. Үйірмеге қызығушылық танытып, қатысатын оқушыларым көп. Алды спортта бірқатар жоғары нәтижелерді көрсетіп үлгерді», – дейді дене шынықтыру пәнінің мұғалімі Мейрамбек Есназаров.</blockquote>Міне, бұл білім ордасында осындай білікті мамандар еңбек етеді. Әрқайсысының алдына қойған өз мақсаты бар. Ал шәкірт тәрбиелеуде, бәсекеге қабілетті ұрпақ қалыптастыруда олардың ойы бір мақсат, бір мүддеде түйіседі. Ал ауызбіршілікпен, ымырамен, айқын мақсатпен іс қылған ұжымның жұмысы қашанда алға басатыны анық. Иә, мектеп – жастардың талантын шыңдап, даналардың түлеп ұшар тұғыры. Ұлттың рухани байлығы білімінде болса, ұстанар бағыты – тәрбиесінде. &nbsp;Соған біз тағы бір мәрте көз жеткізіп қайттық.

Жалағаштағы мектеп мақтанышы

&nbsp;<a href="https://kyzylorda-news.kz/">Kyzylorda-news.kz.</a>Спорттағы әрбір жетістік жанкүйерлерге қуаныш пен жігер сыйлайды. Жарыс алаңында жеңіске жетіп, мойнына алқа таққан сәттегі қуанышы қандай болса, тақым қысып отырған қолдаушылары да одан бетер қуанады. Бірақ әр спортшы жарысқа түскен сәтте онымен бірге болып, бірге қиналатын бапкерлердің орны тіпті бөлек. Спортшылардың кәсіби мерекесі қарсаңында жас та болса жетістіктерге қол жеткізіп, талай додада топ жарған шәкірттерді тәрбиелеп өсірген бапкер Бақтияр Төлебаев жайында айтып өтуді жөн көрдік.Бақтияр 1995 жылы Арал қаласында дүниеге келген. Бала кезден қимылы ширақ, спортқа қызығушылығы басым кейіпкеріміз балғын шағынан бастап күрес кілемін армандады. Осылайша мектеп қабырғасында жүріп өзінің сүйікті спортына қадам басты. №19 Арал аудандық олимпиадалық резервтің мамандандырылған балалар-жасөспірімдер мектебінің еркін күрес бөлімшесіне қабылданды. Талапты ұлдың ұмтылысы, үйренуге деген қызығушылығы мен спортты сүйетіндігі алғашқы күннен-ақ байқалған. Соның нәтижесінде бапкері Бауыржан Жүсіповтен сабақ ала отырып, түрлі додаларда бақ сынады. Жеңіс пен жеңілістің де дәмін татты. Бірақ жеңіліс жігерін жасытқан емес. Керісінше, оның алға ұмтылуына, алдағы жарыстарда олжа салуына жол ашты. Оның шеберлігі күн санап ширыға түсті. 7 сыныптан кейін Қызылорда қаласындағы Жалаңтөс Баһадүр атындағы спортта дарынды балаларға арналған мектеп-интернатына грек-рим күресі бөлімшесіне қабылданды. Осы жерден 11 сыныпты бітіріп шыққан Бақтиярдың шеберлігі толысып, белді балуандардың біріне айналды. Жалпы, жерлесіміз спортшы ретінде талай биікті бағындырды. Түрлі деңгейдегі жарыстардың жеңімпазы, жүлдегері атанған ол еліміздің әр аймағынан тек бабы мен бағы келіскен балуан ғана қатысуға мүмкіндік алатын ҚР чемпионатына қатысып, жүлдемен оралған. ҚР спорт шеберлігіне кандидат.Бүгінгі таңда спорттан алыстамай, соңынан ерген жастарға күрестің әдіс-тәсілін терең меңгертіп жүр. Бапкерлікпен айналысып, аудан балуандарын өрге сүйреп келеді. Жаттықтырушы-оқытушылық шеберлігі жоғары Бақтиярдың бапкерлік деңгейде бағындырған белестері де көңіл қуантады. Шәкірттері Қанағат Төлебаев &nbsp;Атырау қаласында өткен ауыл жасөспірімдері арасындағы ҚР чемпионатының жеңімпазы атанып, алтыннан алқа тақса, Рауан Баймұратов &nbsp;пен &nbsp;Мақсат Алданиязов ҚР чемпионатының жүлдегерлері атанды.<blockquote>&nbsp;Спорт – менің өмірім. Мен одан алыстап кете алмаймын. Бала кезден жаныма серік еткен дүниені биік бағалаймын. Алғаш спорт залға келгенімде маған бапкерлерім бәрін үйретті. Менің жеңімпаз болуымды, биік тұғырдан көрінуімді қалады. Аудан абыройын асыруға үлкен көмек беріп, тілеуімді тіледі. Менің ендігі мақсатым да сол болмақ. Алдыңғы аға буынның үйреткенін, баулығанын кейінгі жастарға үйрету біздің міндетіміз деп білемін. Әр шәкіртім баламдай болады. "Қатты тәртіп көрсе бала күнінде, өнерімен қуантады түбінде" деген сөз бар ғой. Мен жаттығуда, дайындық кезінде өз шәкірттерімнен қандай нәрсе талап етіп, ауыр әдістер үйретсем де, жарыс барысында баламдай тілеулес боламын. Олармен бірге қиналып, қуанышына қуанғанда, өзім жеңіске жеткендей әсер аламын. Жалпы, спорт физикалық күш пен ақылды қатар алып жүретін ерекше нәрсе. Әр минут пен секундты ұтымды пайдалануға үйретеді. Сондықтан жастарды спортпен айналысуға шақырамын. Оған ауданда жағдай толықтай жасалған. Бұқаралық спортты дамытсақ қана, дарынды спортшылар өсіп шығады, – дейді Бақтияр Төлебаев.</blockquote>

Жас чемпиондар тәрбиелеп жүрген бапкер

<a href="https://kyzylorda-news.kz/">Kyzylorda-news.kz.</a> Қызылорда облысы прокуратурасының ұйымдастыруымен Қазақ ССР-нің Бас Прокуроры болған Сейітов Өтеген Сейітұлының 100 жылдығына арналған шағын футболдан турнир өтті.&nbsp;Спорттық сайыстың ашылу салтанатында сөз алған облыс прокуроры Н.Бижанов, Өтеген Сейітұлының 100 жылдығына арналған іс-шаралар Бас Прокуратураның қолдауымен республика көлемінде ұйымдастырылып жатқанын және мұндай жобалардың өскелең ұрпақтың тәрбиесі мен қызметтегі тәжірибелері үшін өте маңызды екенін, атап өтті.Турнирге аймақ көлемінде прокуратура органдарында қызмет ететін әріптестер арасында 8 команда жасақталып, өзара сынға түсті.Атап айтқанда, «Қылмыстық қудалау», «Қоғамдық мүдделерді қорғау», «Аппарат», «Қалалық прокуратура», «Оңтүстік», «Орталық», «Солтүстік» және «Құқықтық статистика» командалары бар.Іріктелген 8 команда арасындағы тартысты ойын 5 сағатқа созылды. Өз топтарынан озық шыққан «Қоғамдық мүдделерді қорғау» мен «Құқықтық статистика» командасы ақтық сайысқа жетіп, «Қоғамдық мүдделерді қорғаудың» жеңісімен аяқталды. Екінші орынды «Құқықтық статистика», үшінші орында «Аппарат» командасы иеленді.Жеңімпаздар алғыс хат және бағалы сыйлықтармен марапатталды.&nbsp;Еске салайық, Өтеген Сейітов 1923 жылдың 15 қыркүйегінде Ақтөбе облысы, Шалқар ауданы, Ақтоғай ауылында дүниеге келген. Прокуратура органдарындағы қызметін 18 жасқа толмастан бастаған. 1942 жылы Ұлы Отан соғысына қатысып, атқыштар взводының командирі болып, үш рет жараланған.Соғыстан кейін кәсіби жолын жалғастырып Оңтүстік Қазақстан және Алматы облысы прокуратурасында жұмыс істеді. 1962 жылы Республика прокурорының бірінші орынбасары, 1966 жылы Республика прокуроры болып тағайындалып, зейнет демалысына шыққанша, яғни 1984 жылға дейін, осы қызметті атқарған.&nbsp;Бүгінгі турнирдің мақсаты – Қазақстан прокуратурасының дамуына зор үлес қосқан Сейітов Өтеген Сейітұлын еске алу, еңбектерін дәріптеу және жастар арасында салауатты өмір салтын қалыптастыру.<img src="https://knadmin.beoblood.kz/uploads/346084110_2131748847215006_6405894475722381309_n_eb80a2f29c.jpg" alt="346084110_2131748847215006_6405894475722381309_n.jpg">

Қызылордада Өтеген Сейітұлын еске алуға арналған футбол турнирі өтті

<a href="https://kyzylorda-news.kz/">Kyzylorda-news.kz.</a>&nbsp; Қарағанды қаласында 2-7 мамыр аралығында 2006 жылы туған және одан кіші қыздар арасында гандболдан ел чемпионаты өтті. Онда Қазақстанның әр түкпірінен келген 6 команда бақ сынады.Тартысты өткен доп додасында жергілікті &nbsp;«Қайсар-ҚМУ» 2 құрамасы І орынды қанжығасына байлады. ІІ орынды алматылықтар еншілесе, үздік үштікті қарағандылықтар қорытындылады.Аға жаттықтырушы Құнанбай Салыбеков пен Ольга Егунова шәкірттері бұл сайыста бас жүлдені алып қана қоймай, сұрмергендер тізімінде көш бастады. Нақтырақ айтсақ, команда сапынан үш бірдей ойыншы, яғни, Қарлығаш Алтынбек пен Луиза Олейникова және Любовь Ковалева үздік бомбардир атанды. Ал барлық кезеңде аз гол жіберіп, сырбойылықтарды жеңіске жақындатқан Қызжібек Ғалым «Үздік қақпашы» жүлдесін жеңіп алды.<blockquote>– Бұл жарыста қарсыластарды айқын басымдықпен жеңіп, І орын иелендік. Ал үздік өнер көрсеткен 16 ойыншының 8-і жаңақорғандық. Қалғаны Қызылорда қаласы мен өзге аудандардан. Осы турнирден соң команданың 7 ойыншысы ұлттық құрама сапына жолдама алды. Олар шілдеде ел құрамасымен Үндістанның Нью-Дели қаласында өтетін Азия чемпионатына қатысатын болады, – деді Қ.Салыбеков.</blockquote>Айтпақшы, сырбойылықтар биылдыққа екінші рет ел чемпионы атанып отыр. Бұған дейін наурыз айында 2008 жылғы жасөспірімдер арасындағы жарыста жүлделі оралған еді. Орайы келгенде айта кетейік, гандболдан ел құрамасының басым бөлігі қызылордалықтардан құралған.Таеквондодан өткен ҚР чемпионаты аяқталдыАлматы қаласында жастар мен жасөспірімдер арасында Таеквондодан өткен ҚР чемпионаты аяқталды. Оған 3 қала мен 17 облыстан спортшылар қатысты. Боз кілемдегі бәсекеде Сыр спортшылары 7 алтын мен 7 күміс және 7 қола медаль еншіледі. Біріншілік қортындысымен сырбойылықтар &nbsp;командалық есепте жасөспірімдер мен жастар арасында, яғни, қос кезеңде де ІІ орын иеленді. &nbsp; Бес күнге созылған тартысты ойынның нәтижесі бойынша сырбойылықтардан 7 спортшы көш бастады. Атап айтсақ, жасөспірімдер арасында Дінмұхаммед Толыбай, Нұрперзент Саматұлы, Торғын Әлімхан және Назерке Жанаберген мен Нұрай Қазнабек үздіктер қатарынан көрінді. Ал жастар арасында Гүлназ Қайбулла мен Тоғжан Қазнабек жүзден жүйрік шықты. Жеңімпаз және жүлдегер командалар медаль, кубок, дипломдармен марапатталды.Ел үміті 7 боксшыдаТашкентте бокстан әлем біріншілігі өтуде. Оған 104 елден 600-дан аса былғары қолғап шебері жиналды. Байрақты бәсекенің ширек финалында жеті отандық боксшы өнер көрсетпек. Олардың қатарында Санжар Тәшкенбай, Махмұд Сабырхан, Серік Теміржанов, Дулат Бекбауов, Асланбек Шымбергенов пен Нұрбек Оралбай және Қамшыбек Қоңқабаев бар.&nbsp; Ширек финалға шыққан боксшылардың саны бойынша көшті 13 боксшымен Куба бастап тұр. Екінші орынға Өзбекстан құрамасы табан тіресе, үздік үштікті Ресей түйіндеп тұр. Ал біздің құрама төртінші сатыға жайғасқан.&nbsp; Айта кетейік, байрақты бәсекеге ел намысын қорғау үшін 13 боксшы аттанып, оның алтауы жарыс жолынан шығып қалды. Жүлдесіз қалған спортшылардың қатарында Сәкен Бибосынов, Санатәлі Төлтаев, Сағындық Тоғамбай, Талғат Сырымбетов, Айбек Оралбай және Нұрқанат Райыс бар.Бүгін ширек финалдық жекпе-жектер өтеді. Барлық жеті боксшы да шаршы алаңға шығады. Қамшыбек бұл жолы тәжірибелі өзбек боксшысы Баходир Джалоловпен жұдырық түйістіреді. Айтпақшы, боксшыларымыз жартылай финалға сүрінбей өтсе, чемпионаттың 5,2 млн АҚШ доллар тұратын жүлде қорын сарапқа салады.Жолдастық кездесу өттіҒ.Мұратбаев атындағы орталық стадионда өнерпаздар арасында «Шоу футбол» өтті. Облыстық Мәдениет және спорт басқармасының қолдауымен өткен жолдастық кездесуге қаладағы бірнеше кәсіпкерлер қолдау көрсетті. Атап айтарлығы, «Қызылорда» командасы «Медиа футбол» аталып кеткен бұл сайысқа биыл алғаш рет &nbsp;қатысып отыр. Өйткені бұған дейін өзге өңірлердің бәрінде мұндай командалар әлдеқашан құрылған.Енді ойынға ойысалық. Ойынның бір ерекшелігі кәсіби футбол ережесімен өтті, яғни, 45 минуттан 2 тайм болды. Ал төрешілер ереженің бұзылмауын қас қақпай қадағалады. Тек ойыншы алмастыруға ешқандай шектеу болған жоқ.&nbsp; Ойынның бірінші бөлігінде қызылордалықтар 2:1 есебімен көш бастады. Екінші таймда шымкенттіктер таразы басын теңестірген. Алайда Асылхан Дүкенбай бастаған, Ақжол Түменбай қостаған қызылордалықтар соңғы минуттарда шабуылды үдете түсті. Қос қапталдан әуелете асырылған пастар мен жойқын шабуылдар көп ұзамай нәтижесін берді. Қорытынды есеп – 6:5. Жеңіс сырбойылық өнерпаздардың еншісінде қалды.Айта кетейік, алда дәстүрлі түрде өтетін «Шоу футболда» «Қызылорда» командасы өзге өңірлерге барып, бақ сынайтын болады. &nbsp;<figure class="image"><img src="https://knadmin.beoblood.kz/uploads/228fdfb2_6f2f_41a4_a545_7099b0935469_9ecfb9ac8a.jpg" alt="228fdfb2-6f2f-41a4-a545-7099b0935469.jpg"></figure>&nbsp;<figure class="image"><img src="https://knadmin.beoblood.kz/uploads/43954521_8b0b_42f1_bfd2_533e8531309b_238a6bf8b0.jpg" alt="43954521-8b0b-42f1-bfd2-533e8531309b.jpg"></figure>&nbsp;<figure class="image"><img src="https://knadmin.beoblood.kz/uploads/452290fe_18fe_4205_8a16_c5f32fc5cb96_642ae456a0.jpg" alt="452290fe-18fe-4205-8a16-c5f32fc5cb96.jpg"></figure>

Спорт саласы елімізде кең қолдауға ие

<a href="https://kyzylorda-news.kz/">Kyzylorda-news.kz.</a> Өткен аптада Шиелі кентінің орталық спорт кешенінде 20 жасқа дейінгі жасөспірім зілтеміршілер арасында республикалық турнир өтті.Турнирді Шиелі аудан әкімінің орынбасары Болат Ысмағұлов ашып берді.<blockquote>«Шиелі ауданында бұқара¬лық спортты дамыту мақсатында, түрлі мәдени және спорттық іс-шаралар жоспары жасалып, талаптарға сай өтіп келеді. Осындай жоспарға негізделген іс-шаралардың бірі – жыл сайын тұрақты түрде өткізіліп келе жатқан Екі мәрте Социалистік еңбек Ері Ыбырай Жақаев атындағы республикалық турнир. Бүгінде ауданымызда спортқа, оның ішінде ауыр атлетикаға ерекше көңіл бөлінуінің нәтижесінде шиелілік ауыр атлетшілер Асылжан Бектай, Айзада Мүптілда, Айсамал Сансызбаева сынды батыр ұл-қыздарымыз әлем біріншілігінде топ жарып, әлемдік аренада қазақ елінің абыройын ауданның атын асқақтатып келеді», – деді Болат Ысмағұлов.&nbsp;</blockquote>Айта кетейік, турнирге еліміздің 8 облысынан және Қырғызстан мемлекетінен ұлдар мен қыздар арасында 15 саламақ дәрежесі бойынша 100-ден астам ауыр атлетшілер қатысып, бақ сынасты.Сонымен қатар турнирде күріш атасы Ыбырай Жақаевтың ұлы Сейітбек Жақай сөз алып, қатысушы жасөспірім зілтеміршілерге сәттілік тілеп, ақ батасын берді.Турнир соңында қатысушы зілтеміршілерге бағалы сыйлықтар табыстап, жеңімпаздарды аудан әкімінің алғыс хаттарымен марапаттады.&nbsp;

Шиеліде Ыбырай Жақаев атындағы жарыс өтті

<a href="https://kyzylorda-news.kz/">Kyzylorda-news.kz.</a>&nbsp; Өзбекстан астанасы Ташкент қаласында өтіп жатқан әлем чемпионатының ширек финалына Қазақстан құрамасынан жеті боксшы шықты. Бұл жөнінен ел құрамасы төртінші орында тұр, деп хабарлайды ҚазАқпарат.Елорда уақытымен сағат 15:00- де басталатын күндізгі сессияда А рингі үшінші жұпта Серик Теміржанов (57 келі) кубалық Сайдел Ортамен шықса, сегізінші жұпта Асланбек Шымбергенов (71 келі) француз Макан Траоремен қолғап түйістірсе, Б рингінде оныншы жұпта Нұрбек Оралбай (80 келі) иорданиялық Хуссейн Эйшаиш Ишайшпен кездеседі.Ал, сағат 19:00- де басталатын кешкі сессияда Б рингінде алғашқы жекпе-жек Санжар Ташкенбай (48 келі) мен жапониялық Кадзума Аратаке арасында өткізілсе, А ригінде үшінші жұпта Махмуд Сабырхан (54 келі) ганалық Мохаммедо Амадумен, А рингінде сегізінші жұпта Дулат Бекбауов (67 келі) мексикалық Мигел Анхел Мартинеспен шеберлік байқасады.Сондай-ақ, Б рингіндегі он төртінші жұбында Қамшыбек Қоңқабаев (92 келі) өзбекстандық Баходир Джалоловпен <a href="https://www.inform.kz/kz/bokstan-alem-chempionaty-konkabaev-dzhalolov-zhekpe-zhegi-10-mamyrda-otedi_a4065045">сайысқа түседі</a>.

Қазақстан және Қызылорда облысының жаңалықтары: Спорт