<a href="https://kyzylorda-news.kz/">Kyzylorda-news.kz</a>&nbsp; &nbsp;Қазіргі таңда киберқауіпсіздік мәселесі өзекті. Бұл туралы Өңірлік коммуникациялар қызметінің ақпарат алаңында &nbsp;Қазақстан Республикасы Бас прокуратурасының Құқықтық статистика және арнайы есепке алу жөніндегі комитеті Қызылорда облысы бойынша департаментінің қылмыстық саладағы құқықтық ақпаратты қалыптастыру бөлімінің бастығы Жукашев Естай, аталған департаменттің азаматтық және әкімшілік салалардағы құқықтық ақпаратты қалыптастыру бөлімінің аға прокуроры Тілеужан Ғалымжан, сонымен қатар, облыстық полиция департаменті Әкімшілік полиция басқармасының бастығы Манатов Мұратбек баяндады.<blockquote>– Цифрлық технологиялардың дамуы халықтың өмірін жеңілдеткенімен, қылмыстың жаңа түрлерінің көбеюіне де әсер еткен. Қазіргі таңда әлеуметтік желілер мен интернет платформалар тек байланыс құралы ғана емес, сауда-саттық жүргізілетін негізгі алаңдардың біріне айналған. Осы мүмкіндікті пайдаланған алаяқтар түрлі айла-тәсілдерге көшуде. Бүгінде SMS-код арқылы қорқытып несие рәсімдету, жалған инвестициялық ұсыныстар ұсыну, мессенджерлерде таныстарының атынан хабарлама жіберіп ақша сұрау, сондай-ақ онлайн сауда барысында алдын ала төлем жасатып алдау секілді интернет-алаяқтық түрлері жиі кездеседі, – деді Естай Толыбайұлы.</blockquote>Жиында интернет-алаяқтық қылмыстарының пайда болу себептері мен оның алдын алу шаралары кеңінен талқыланды.<blockquote>– Интернет-алаяқтық қылмыстарының ашылу деңгейі артқан. Ғаламтор кеңістігіне жүргізілген мониторинг барысында заңсыз белгілері бар көптеген сайттар мен сілтемелер анықталып, оларды бұғаттау жұмыстары қолға алынған. Ең бастысы – қарапайым қауіпсіздік ережелерін сақтау. SMS-кодтарды ешкімге бермеу керек. Белгісіз адамдардың ұсынысымен түрлі қосымшаларды жүктеуге болмайды. Күмәнді қоңырау түскен жағдайда бірден байланысты үзіп, банктің ресми нөміріне хабарласқан жөн, – Ғалымжан Бауыржанұлы.</blockquote>Сонымен қатар спикер киберқылмыстың кең таралған тәсілдері – жалған қоңыраулар, мессенджерлер мен фишингтік сайттар арқылы жасалатын алаяқтық схемалар жөнінде түсіндірді.<img src="https://knadmin.beoblood.kz/uploads/Zhiynda_internet_alaya_ty_ylmystaryny_pajda_bolu_sebepteri_men_ony_aldyn_alu_sharalary_ke_inen_tal_ylandy_18473f8acd.jpg" alt="Жиында интернет-алаяқтық қылмыстарының пайда болу себептері мен оның алдын алу шаралары кеңінен талқыланды..jpg">Фото: nege kz

Өңірде интернет қауіпсіздігіне қатысты түсіндіру жұмыстары күшейтілуде

<a href="https://kyzylorda-news.kz/">Kyzylorda-news.kz</a>&nbsp; Қызылорда облысында «Таза Қазақстан» акцияcы аясында түсіндіру жұмыстары күшейтілді. «Таза Қазақстан» республикалық акциясы аясында полиция қызметкерлері қоғамдық тәртіп пен тазалық талаптарының сақталуын бақылауды жалғастыруда.Құқық бұзушылықтарды анықтау мақсатында бейнебақылау камералары тиімді пайдаланылып, тиісті әкімшілік хаттамалар толтырылуда. Сонымен қатар, қала орталығындағы халық көп шоғырланатын орындарда тұрғындарға арнайы жадынамалар таратылып, қоршаған ортаны таза ұстау, қоғамдық орындарды ластамау және ортақ тәртіпті сақтау бағытында түсіндіру жұмыстары жүргізілді.Жыл басынан бері ҚР әкімшілік құқық бұзушылық туралы кодексінің 434-2-бабы 1-бөлігі бойынша 113 хаттама, ал 505-бабы 1-бөлігі бойынша 547 хаттама рәсімделді.<blockquote>«Таза Қазақстан» акциясының басты мақсаты – тұрғындардың экологиялық мәдениетін қалыптастырып, қоғамдық тәртіпке деген жауапкершілігін арттыру. Осы бағыттағы профилактикалық және түсіндіру жұмыстары алдағы уақытта да тұрақты түрде жалғасады, – деді полиция өкілі.&nbsp;</blockquote>Акция аясындағы шаралар алдағы уақытта да жалғасын табады.Фото: polisia.kz

«Таза Қазақстан":  Қызылорда облысында акция аясында түсіндіру жұмыстары күшейтілді

<a href="https://kyzylorda-news.kz/">Kyzylorda-news.kz</a> 18 мамыр – Халықаралық музей күніне орай Қызылорда облысы Полиция департаментінің қызметкерлері Қызылорда облыстық тарихи-өлкетану музейіне арнайы барып, музей ұжымын кәсіби мерекелерімен құттықтады. Іс-шара барысында тәртіп сақшылары музейдің экспозициялық залдарын аралап, өңір тарихы мен рухани-мәдени мұрасын таныстыратын құнды жәдігерлермен танысты.Кездесуде Қызылорда облысы Полиция департаменті Жеке құраммен жұмыс жөніндегі басқарма бастығының орынбасары, полиция капитаны Шарипова Аида Сабитовна музей қызметкерлеріне алғыс білдіріп, олардың ұлт тарихын ұлықтау мен мәдени құндылықтарды сақтаудағы еңбегін ерекше атап өтті. Сондай-ақ кәсіби мереке иелеріне құрмет көрсетіліп, бірқатар қызметкерлер марапатталды.Музей – өткен мен бүгінді жалғайтын рухани алтын көпір. Өңірдің бай тарихы мен тағылымды шежіресін келер ұрпаққа жеткізуде музей қызметкерлерінің еңбегі зор. Танымдық кездесудің мақсаты – тарихи-мәдени мұраға құрмет көрсету, жас ұрпақтың ұлттық құндылықтарға деген қызығушылығын арттыру және қоғам мен мәдениет саласы арасындағы байланысты нығайту болды.&nbsp;

Қызылордалық полицейлер музей қызметкерлерін кәсіби мерекемен құттықтады

<a href="https://kyzylorda-news.kz/">Kyzylorda-news.kz</a> Қызылорда облысы Полиция департаменті Есірткі қылмысына қарсы іс-қимыл басқармасының ұйымдастыруымен жастар арасында есірткінің зиянын түсіндіру және салауатты өмір салтын насихаттау мақсатында, есірткіге қарсы комикс әзірлеу байқауы өткізілді. Аталған байқау жасөспірімдердің шығармашылық қабілетін дамытуға, құқықтық сауаттылығын арттыруға және қоғамдағы зиянды әдеттердің алдын алуға бағытталды.Байқауға Қызылорда облысының білім беру ұйымдарының оқушылары мен студенттері белсене қатысып, есірткіге қарсы тақырыптағы мазмұнды әрі көркемдік тұрғыдан жоғары деңгейдегі комикс жұмыстарын ұсынды. Қатысушылар өз туындылары арқылы жастарды салауатты өмір салтын таңдауға, зиянды әдеттерден аулақ болуға, өмір мен денсаулықтың құндылығын бағалауға шақырды. Сонымен қатар жұмыстарда қоғам үшін өзекті болып отырған мәселелер көркем сюжеттер арқылы ашық көрсетілді.Байқау қорытындысы бойынша жеңімпаздар анықталды: І орынды – Қызылорда қаласы №215 орта мектеп оқушысы Зейнулла Аян мен Жалағаш ауданы №116 орта мектеп оқушысы Әди Дидар иеленді; ІІ орын – Шиелі ауданы №45 мектеп-гимназиясының оқушысы Асқарова Айару және №127 мектеп-лицей оқушысы Тұрсынбай Сабинаға бұйырды; ІІІ орын – Қызылорда қаласы №296 орта мектеп оқушысы Ертай Каусар, №176 орта мектеп оқушысы Өтеген Дарын, Жалағаш ауданы №203 орта мектеп оқушысы Тасжарғанова Қарлығаш, №118 орта мектеп оқушысы Аманкелдіқызы Кәусар, Қармақшы ауданы №27 орта мектеп оқушысы Бағдатұлы Мансұр, М.Мәметова атындағы Қызылорда педагогикалық жоғары колледж студенті Жеткереген Жанна, Қазалы ауданы №226 мектеп-гимназия оқушысы Әлиханов Бекхан, Арал ауданы №14 орта мектеп оқушысы Қосанов Еркебұланға берілді.Ұйымдастырушылар мұндай байқаулар жасөспірімдер арасында құқық бұзушылықтың алдын алуға, шығармашылық белсенділікті арттыруға және салауатты өмір салтын қалыптастыруға оң ықпал ететінін атап өтті.

Сурет арқылы санаға әсер: есірткіге қарсы комикс байқауы

<a href="https://kyzylorda-news.kz/">Kyzylorda-news.kz</a> Қызылорда облысының Жаңақорған кентіндегі А.Абдуллаев атындағы зияткерлік мектеп-интернатында Ғазиз Байтасов атындағы «Жас сақшы» полиция сыныбының салтанатты ашылу рәсімі өтті.Іс-шараға Қызылорда облысы Полиция департаментінің Ардагерлер кеңесінің төрағасы Шаймағамбетов Әмірбек Бердібекұлы және Жеке құраммен жұмыс жөніндегі басқармасының бастығы Асқар Балқожаев қатысып, жас сақшыларға сәттілік тіледі.<img src="https://knadmin.beoblood.kz/uploads/policziya_fabaeed390.jpeg" alt="полиция.jpeg">Салтанатты жиын барысында «Жас сақшы» полиция сыныбының негізгі мақсат-міндеттері таныстырылды. Атап айтқанда, жас ұрпақты отансүйгіштікке тәрбиелеу, құқықтық мәдениетті қалыптастыру, тәртіп пен жауапкершілікке баулу, сондай-ақ полиция қызметінің беделін арттыру бағытындағы жұмыстар кеңінен айтылды.Шара аясында ант қабылдау рәсімі өткізіліп, сынып құрамына қабылданған 15 оқушыға арнайы куәліктер табысталды.Ғазиз Байтасов – ел тыныштығы мен қоғамдық қауіпсіздікті қорғау жолында ерлікпен қаза тапқан батыр сақшы. Ол 1971 жылы Жамбыл облысында дүниеге келген. Ішкі істер органдарындағы қызметінде кәсібилігімен, батылдығымен және адамгершілік қасиеттерімен ерекшеленіп, әріптестерінің зор құрметіне ие болды.<img src="https://knadmin.beoblood.kz/uploads/policziya_1910e7bcd5.jpeg" alt="полиция.jpeg">2011 жылғы 12 қарашада Тараз қаласында орын алған лаңкестік оқиға кезінде полиция капитаны Ғазиз Байтасов аса қауіпті қылмыскерді тоқтату барысында ерекше ерлік көрсетті. Қылмыскерді құрықтау кезінде ол өз өмірін қатерге тігіп, бейбіт тұрғындардың қауіпсіздігі үшін жан аямай күресті. Қарулы лаңкес өзін-өзі жарып жіберген сәтте батыр сақшы ауыр жарақат алып, ерлікпен қаза тапты.Көрсеткен жанқиярлығы мен антына адалдығы үшін Ғазиз Байтасов Қазақстан Республикасы Президентінің Жарлығымен «Халық қаһарманы» атағына ие болды. Оның ерлігі мен жарқын бейнесі ел жадында мәңгі сақталады.<img src="https://knadmin.beoblood.kz/uploads/policziya_2aab5d3687.jpeg" alt="полиция.jpeg">Шара барысында қатысушылар батыр сақшының рухына тағзым етіп, оның өнегелі өмір жолы мен ерлігі кейінгі жас буын үшін әрдайым үлгі екенін атап өтті.<blockquote>– «Ер есімі – ел есінде. Батыр полицейдің өмір жолы мен ерлігі жас ұрпақты отансүйгіштікке, батылдыққа және адалдыққа тәрбиелейді. Осындай “Жас сақшы” сыныптарының ашылуы – келешек ұрпаққа тағылым беретін маңызды бастама», – деді полиция подполковнигі Асқар Балқожаев.</blockquote>Салтанатты шара соңында оқушылар мен қонақтар ел тыныштығы жолында қызмет етудің маңыздылығын ерекше атап өтті. Ғазиз Байтасовтың ерлігі мен антына адалдығы жас ұрпақ жадында мәңгі сақталары сөзсіз.

Қызылорда облысында Ғазиз Байтасов атындағы «Жас сақшы» полиция сыныбы ашылды

<a href="https://kyzylorda-news.kz/">Kyzylorda-news.kz</a> Қызылордада пробация қызметі сотталғанға әлеуметтік қолдау көрсетті.Қызылорда қалалық пробация қызметі есепте тұрған азаматтарға әлеуметтік-құқықтық көмек көрсетуді жүйелі түрде жалғастырып келеді.&nbsp;Жуырда пробация қызметкерлерінің қолдауымен тағы бір азаматшаға мемлекеттік әлеуметтік көмек рәсімделді. Атап айтқанда пробация қызметі жергілікті атқарушы органдарға тиісті хаттар жолдап, нәтижесінде әйелге мемлекет тарапынан қарастырылған әлеуметтік көмектер тағайындалды. Сонымен қатар оған жеке кәсіп ашуға арналған қайтарымсыз мемлекеттік грантқа құжаттар әзірлеу бойынша көмек көрсетілді.&nbsp;<blockquote>Бұдан бөлек, оны тұрақты жұмыспен қамту бағытында да жұмыстар жүргізілуде. Көмек алған азаматша пробация қызметкерлеріне алғысын білдіріп, өз кәсібін бастауға мүмкіндік туғанына қуанышты екенін айтты. – Қалалық пробация қызметі қиын жағдайда маған қолдау көрсетіп, құжаттарымды рәсімдеуге көмектесті. Әлеуметтік көмек алып, енді өз кәсібімді ашуға мүмкіндік туып отыр. Арманымның орындалатынына қуаныштымын. Көрсеткен көмектері үшін алғысымды білдіремін, – деді есептегі сотталған.&nbsp;</blockquote>Пробация қызметінің негізгі мақсаты – есептегі азаматтарды қоғамнан оқшауламай, олардың қайта әлеуметтенуіне және бейімделуіне қолдау көрсету. Осы бағыттағы жұмыстар алдағы уақытта да жалғасын табады.Фото: polisia.kz

Қызылордада пробация қызметі есептегі сотталғанға әлеуметтік қолдау көрсетті

<a href="https://kyzylorda-news.kz/">Kyzylorda-news.kz</a> Қылмыстың алдын алу және жасөспірімдер арасындағы құқық бұзушылықтардың жолын кесу мақсатында Қызылорда облысы көлемінде жергілікті атқарушы органдарымен бірлесіп, “Түнгі қала” жедел-профилактикалық рейдтік іс-шарасы өткізілді.&nbsp;&nbsp;Іс-шара барысында полиция қызметкерлері мен жауапты мекеме өкілдері түнгі уақытта кәмелетке толмағандардың заңды өкілдерінсіз жүру деректерін анықтау бағытында күшейтілген жұмыстар жүргізді.&nbsp;Рейд қорытындысымен түнгі уақытта заңды өкілінсіз ойын-сауық орындарында және тұрғын жайдан тыс жүрген 147 жасөспірім анықталды. Аталған құқық бұзушылықтарға жол берген ата-аналар мен заңды өкілдерге қатысты әкімшілік шаралар қабылданып, жауапкершілікке тартылды.Сонымен қатар балаларды тәрбиелеу және білім беру жөніндегі міндеттерін тиісінше орындамаған 21 ата-анаға әкімшілік хаттамалар рәсімделді. Мұндай профилактикалық шаралардың негізгі мақсаты – жасөспірімдер арасындағы құқық бұзушылықтың алдын алу, олардың қауіпсіздігін қамтамасыз ету және ата-аналардың жауапкершілігін арттыру.&nbsp;Полиция ата-аналарды балалардың жүріс-тұрысына бейжай қарамай, олардың бос уақытын тиімді ұйымдастыруға және қауіпсіздігіне ерекше көңіл бөлуге шақырады.Фото: Polisia.kz

Қызылордада рейдтік шара өтті

<a href="https://kyzylorda-news.kz/">Kyzylorda-news.kz</a>&nbsp; Адамның өмірлік жолы оның ой-парасаты мен қабылдаған шешімдеріне тікелей тәуелді. Қазіргі өзгермелі қоғамда өз ұстанымыңнан таймай, дұрыс бағытты таңдау – жарқын болашақтың кепілі. ҚАЖ департаментіне қарасты №68 мекемесі “Заң мен тәртіп” идеологиясын іске асыру аясында Қызылорда облыстық прокуратурасымен бірлесіп ізгілікке бастайтын іс-шаралар өткізіп келеді. Бүгін Т.Жүргенов атындағы №136 мектеп-лицейіне барып, оқушыларға түсіндірме жұмысын жүргізгені сөзімізге тұздық.Текетірестен туындаған оқыс оқиғалар орға жығатыны рас. Сондықтан, жастардың теріс жолға түспей, қылмыс жасамағаны игі. Бұл туралы мекеме бастығының тәрбие ісі жөніндегі орынбасары әділет майоры Мирамбек Тұрымбетов толық тарқатып, мәні бар мысалдарды жіпке тізді.Тағылымды кездесуде өмірге азық боларлық кеңестер айтылды. Мәселен, АКАӘПТЖББ-ның бөлім бастығы әділет майоры Тулепбергенов Бақдәулет жасөспірім шақ – арман мен бағыт айқындалатын кезең екенін меңзеп, әрбір шешімнің ертеңге әсер ететінін түсіндірді. Ой жарыстырып, оқу-білімге ұмтылғанның ұтатыны көп екенін қаперге салды.Сонымен қатар, жаза басқан жандардың өкінішін жеткізген бейнеүндеуі оқушыларға ерекше әсер еткені анық.Иә, келтірілген әр мысал, айтылған салмақты сөзден оқушылар өмірлік сабақ алғаны сөзсіз.З.Қонысжан

Телемост: жастарға жол сілтеген жүздесу

<a href="https://kyzylorda-news.kz/">Kyzylorda-news.kz</a>&nbsp; Ел бірлігін, қоғам тыныштығын сақтайтын есіл ерлердің мерекесі бүгін. Осы тұста, ҚАЖ департаментіне қарасты №68 мекемесінің қызметкерлері сала ардагерінің шаңырағына барып, ықылас білдіруді жөн санады.Белді қызметтің бел ортасында жүріп, абыроймен зейнетке шыққан полковник Жамуров Серікбай Қойшыбайұлы есті естелігімен бөлісті. Сананы сан саққа бөлетін сүрлеу-соқпағы кездесетінін де жасырмады. Сондай-ақ, жұдырықтай жұмылып қызмет еткен, іскер басшылар жайындағы сөзін де іркіп қалмады. &nbsp;Ардагер үшін отбасы – басты тірек. Жары Ермағамбетова Роза Ідірісқызымен бірге екі ұл, екі қыз тәрбиелеп өсірген. Ұл-қызының таңдауы тастүйін болып, күрделі салаға қадам басамын дегенде қарсы болмаған.Иә, қатардағы қызметкерден полковник шеніне дейін көтерілу – кездейсоқ жетістік емес. Бұл – отыз жылдық қызметте осалдық танытпағанның нәтижесі.&nbsp;«Органда жұмыс істеген соң, қадамыңды аңдап басып, сөзіңді байқап айт», – дейді ардагер. Бұл – өмірден түйген тәжірибесінің қысқа да нұсқа формуласы.З.Қонысжан

Ұрпақ пен ұлағат: Өнегелі өмірдің өшпес ізі

<a href="https://kyzylorda-news.kz/">Kyzylorda-news.kz</a> От пен оққа оранған майданның ортасында талай жанның ерлікпен шайқасқаны мәлім. Үшбу хатта да үрейден гөрі үмітін үстем етіп, қорқыныштың көлеңкесін ысырып тастағаны содан. Бұл жанқиярлықтың өзі – болашақ ұрпаққа қалған үлгі мен ұлы сабақ. 9 мамыр – Жеңіс күні қарсаңында, ҚАЖ департаментіне қарасты №68 мекемесінің қызметкерлері “Мәңгілік алау” ескерткішіне арнайы барып, гүл шоқтарын қойды.Сондай, ақ, қызметкерлер бір минут үнсіздік жариялап, қиян-кескі ұрыста Отан үшін жанын қиған батыр бабалардың рухына тағзым етті.<blockquote>– Сұрапыл соғыстың от-жалынынан өткен аға буынның ерлігі – ұрпақ үшін өнеге. Біз олардың алдында әрдайым қарыздармыз. Бейбіт күннің әр сәті – батырлардың жанқияр еңбегінің жемісі. Сондықтан, ер есімін, ерлік ісін ұмытпай, қызметкерлердің бойына отансүйгіштік пен тарихқа құрмет сезімін сіңіруде селқостық танытпаймыз, - дейді мекеме бастығының тәрбие ісі жөніндегі орынбасары әділет майоры Мирамбек Тұрымбетов.</blockquote>Иә, жеңіс күні – бейбітшіліктің қадірін, ерліктің мәнін және бірліктің күшін байыптайды. Бейбіт күннің бағасын түсінетін қызметкерлер де антына адалдық танытып, тұрақтылықты сақтауда тынымсыз еңбек етпек.З.Қонысжан

Ұрпақ жадындағы Ұлы Жеңіс

<a href="https://kyzylorda-news.kz/">Kyzylorda-news.kz</a> Ішкі істер министрлігі көлік жүргізуге медициналық қарсы көрсетілімдері бар тұлғалар туралы ақпарат алатын болады. Тиісті норма жол қозғалысы қауіпсіздігін цифрландыру мәселелері жөніндегі заң жобасына <a href="https://kaz.inform.kz/news/tolenbegen-ayippuldari-bar-zhurgzushlerge-memlekettk-kizmetter-shektelu-mumkn-b3c2d098">енгізілген.</a>Атап айтқанда, заң жобасында медициналық деректерді ІІМ-нің автоматтандырылған жүйесіне біріктіру ұсынылады. Бұл көлік құралдарын басқаруға медициналық қарсы көрсетілімдері бар адамдарды жібермеу мақсатында қолға алынбақ. Мұндай жағдайларда тиісті диагноз қойылған сәттен бастап жүргізуші куәлігінің күші уақытша тоқтатылады.Сонымен қатар жол қозғалысы қауіпсіздігі саласында төленбеген айыппұлдар немесе оларды төлеу туралы нұсқамалар болған жағдайда бірқатар мемлекеттік қызметтерді алу шектеледі.Бұдан бөлек, заң жобасы құқық бұзушылықтарды автоматты түрде тіркеу жүйесін кеңейтуді көздейді. Бұл автожолдарда және мемлекеттік органдардың көліктерінде, жедел жәрдем қызметінде, сондай-ақ тұрақты жолаушылар тасымалын жүзеге асыратын тасымалдаушыларда орнатылатын техникалық құралдар арқылы жол қозғалысы қауіпсіздігін бақылауды күшейтуге бағытталған.Айта кетейік, елімізде жол-көлік оқиғаларының алдын алу және жолдағы тәртіпті күшейту мақсатында жоспарлы түрде ауқымды профилактикалық рейдтік шаралар тұрақты түрде өткізіліп келеді.Фото: Polisia.kz

Төленбеген айыппұлдары бар жүргізушілерге мемлекеттік қызметтер шектелуі мүмкін   

<a href="https://kyzylorda-news.kz/">Kyzylorda-news.kz</a> &nbsp;Қызылорда облысында «Есірткіге – жоқ деп айт!» тақырыбында билбордтар байқауы қорытындыланды.Аталған іс-шара Қызылорда облысы Полиция департаментінің Есірткі қылмысына қарсы іс-қимыл басқармасы ұйымдастыруымен өтіп, халық арасында нашақорлық пен уытқұмарлықтың алдын алуға бағытталған ақпараттық-түсіндіру жұмыстары аясында, әсіресе жастарға ерекше назар аудара отырып жүзеге асырылды.Байқаудың негізгі мақсаты – балалар, жасөспірімдер мен жастар арасында психоактивті заттарды тарату мен қолдануға деген теріс көзқарас қалыптастыру, сондай-ақ салауатты және қауіпсіз өмір салтын насихаттау болды. Байқау барысында қатысушылар өз жұмыстарында денсаулықтың құндылығын, жеке жауапкершілікті және есірткісіз өмірді саналы түрде таңдаудың маңыздылығын көрсетуге тырысты.Байқауға Қызылорда облысының білім беру ұйымдары қатысты. Әрбір оқу орны ұсынылған тақырыпты ашатын авторлық билбордтарын ұсынды. Жұмыстар креативтілігімен, әлеуметтік маңыздылығымен және өзектілігімен ерекшеленіп, оқушылар мен студенттердің қоғамдағы маңызды мәселелерді шешуге белсенді қатысуын көрсетті.<img src="https://knadmin.beoblood.kz/uploads/Konkurs_bilbordov_Skazhi_narkotikam_net_775730ada4.jpg" alt="Конкурс билбордов «Скажи наркотикам – нет!».jpg">Дайындалған билбордтар оқу орындарының сыртқы қабырғаларына орналастырылып, кең аудиторияға қолжетімді болды. Олар тек оқушылар мен студенттердің ғана емес, қала тұрғындарының, сондай-ақ өтіп бара жатқан жаяу жүргіншілер мен көлік жүргізушілерінің назарын аударып, қоғамда есірткіге қарсы үндеуді кеңінен таратуға ықпал етті.Байқау қорытындысы бойынша жеңімпаздар анықталды: бірінші орын – Қызылорда қаласындағы №144 орта мектеп, Жалағаш ауданындағы №115 орта мектеп, Шиелі ауданындағы №244 орта мектеп, Жаңақорған ауданындағы №239 орта мектеп және Қармақшы ауданындағы №269 орта мектеп. Екінші орын – Қармақшы ауданындағы №111 орта мектеп, Жаңақорған ауданындағы №221, №52, №169 орта мектептер, Шиелі ауданындағы №49 орта мектеп. Үшінші орын – Шиелі ауданындағы №50 және №45 мектеп-гимназия, Арал ауданындағы №260 орта мектеп,Қазалы ауданындағы №234 орта мектеп және Жаңақорған ауданындағы №256 орта мектеп.Аталған байқау жастар арасында профилактикалық жұмысты күшейтуге, қатысушылардың шығармашылық әлеуетін дамытуға және есірткі заттарының зияны туралы ақпараттандыру деңгейін арттыруға мүмкіндік берді. Байқаудың қорытындылануы өңірде салауатты қоғам қалыптастыру және есірткіге қарсы мәдениетті нығайту бағытындағы кешенді жұмыстардың маңызды кезеңіне айналды.

Қазақстан және Қызылорда облысының жаңалықтары: Құқық