<a href="https://kyzylorda-news.kz/">Kyzylorda-news.kz</a> «Азаматтарға арналған үкімет» мемлекеттік корпорациясы Қызылорда облыстық филиалы өз қызметкерлерін таныстыруды бастадық. Арнайы айдарымыздың алғашқы кейіпкері – Ізтелеуова Индира Жұбанышбайқызы.Индира Жұбанышбайқызы 10 жылдан астам уақыт мемлекеттік қызметтерді көрсетіп келеді. Оның негізгі міндеті – қағаз жүзінде қабылданған құжаттарды тексеріп, өңдеу. Күн сайын 100-ден аса құжатпен жұмыс жасайтын жауапты маман өз ісіне аса мұқият қарап, халыққа сапалы қызмет көрсетуге барын салуда.Қызметімен қатар, ол – төрт баланың анасы, отбасылық өмір мен жұмысты қатар алып жүретін жан. Өзінің еңбекқорлығы мен кәсібилігінің арқасында әріптестері арасында құрметке ие.

Халыққа қызмет – абыройлы міндет

<a href="https://kyzylorda-news.kz/">Kyzylorda-news.kz</a> Бүгін Қызылорда облысы Полиция департаменті бастығының орынбасары полиция полковнигі Омаров Оралбек Тәубақабылұлының, ішкі істер органдары ардагерлерінің, департаменттің және қалалық полиция басқармасы жеке құрамының қатысуымен жазғы киім үлгісіне ауысу рәсіміне арналған саптық байқау өтті, деп хабарлайды <a href="https://www.facebook.com/qyzylorda.pd?__tn__=-UC*F">Qyzylorda PD</a>.Қызылорда қаласындағы Тағзым алаңында жеке құрам саптық байқауға тұрғызылды. Саптық байқауды Арнайы және жұмылдыру даярлық басқармасының бастығы полиция полковнигі Балдақов Марат басқарды.Саптық байқау барысында қызметкерлердің сыртқы түр-сипаты, үлгілік киімі, қызметтік куәліктерінің, айырым белгілерінің талаптарға сай болуы тексерілді. Сондай-ақ, полиция қызметкерлерінің ұқыптылығы мен жинақылығы, шаш үлгісі, киімінің мұнтаздай тазалығы басты назарға алынды.Одан әрі саптық байқау жас қызметкерлердің ант қабылдау рәсіміне ұласты. Полиция қатарына жаңа қосылған 20 жас маман қызметті адал және абыроймен атқаруға, Қазақстан Республикасы азаматтарының құқығы мен бостандықтарын қорғауға салтанатты түрде ант берді. Полиция департаменті бастығының орынбасары полиция полковнигі Омаров Оралбек полиция қызметкерлерінің қатарын толықтырған әскери қызметкерлерді ант қабылдауларымен құттықтап, оларға сәттілік тіледі. Жас буынды айтулы күндерімен ішкі істер органдары ардагерлерінің атынан Қалалық ардагерлер кеңесінің төрағасы Алмағанбетов Жақсылық құттықтап, азаматтық борыштарын абыроймен атқаруларына тілектестік білдіріп, ыстық ықыласын жеткізді.Жазғы киімге ауысу рәсіміне арналған жиын қызметкерлердің шеруімен аяқталды.Фото: Qyzylorda PD

Қызылордалық полицейлер жазғы киім үлгісіне көшті

<a href="https://kyzylorda-news.kz/">Kyzylorda-news.kz</a> Жуық арада ғана Ақтөбе облысымен Қазалы ауданының арасында жаңа жолаушылар пойызы бағыты ашылған болатын.Бүгін Ақтөбе-Қазалы бағытындағы №630 жолаушылар пойызы Қазалы теміржол вокзалына келіп тұрақтады. Қазалылықтар жаңа жолаушылар пойызының алғашқы жолаушыларын ерекше құрметпен күтіп алып, жолаушыларға мерекелік көңіл-күй сыйлады. Аудан өнерпаздары әсем әннен шашу шашып, қазақы дәм ұсынды.Теміржол вокзалында өткен ерекше шараға аудан әкімінің орынбасары Мұрат Әбсұлтанов, Жәнібек Алиев және теміржол мекемелерінің басшылары қатысып, жаңа жолаушылар пойзының ашылуымен құттықтады. Сондай-ақ бұл аудан тарихындағы алғашқы жағдай екенін жеткізді.Жолаушылар пойызына бастапқы кезеңде 6 вагон тіркеледі: үш купе және үш плацкарт. Алдағы уақытта жолаушылар ағыны көбейген жағдайда тағы төрт және одан да көп вагон қосу жоспарланып отыр.Енді Қазалыдан Қазалы-Ақтөбе бағытындағы №629 пойыз тақ күндері сағат 18:20-да жөнелтіледі және келесі күні Ақтөбеге сағат 07:34-те жетеді. Ал, «Ақтөбе – Қазалы» бағыты бойынша № 630 пойыз жұп күндері сағат 22:25-те жүреді. Келесі күні Қазалы теміржол вокзалына сағат 11:32-де жетеді.<img src="https://knadmin.beoblood.kz/uploads/A_t_be_azaly_ba_ytynda_y_zha_a_zholaushylar_pojyzy_azaly_a_t_ra_tady_3b05133165.webp" alt="«Ақтөбе-Қазалы» бағытындағы жаңа жолаушылар пойызы Қазалыға тұрақтады.webp">Фото: Қазалы ауданы әкімінің баспасөз қызметі

«Ақтөбе-Қазалы» бағытындағы жаңа жолаушылар пойызы Қазалыға тұрақтады

<a href="https://kyzylorda-news.kz/">Kyzylorda-news.kz</a> Қызылорда облысында пробация қызметінің есебіндегі сотталғандармен тұрақты түрде профилактикалық жұмыстар жүргізілгеніне қарамастан, кейбір азаматтар сот жүктеген міндеттерді орындамай, жаза өтеу тәртібін қаскөйлікпен бұзып, түзеу мекемесіне қайта жіберілуде.Солардың &nbsp;бірі Қармақшы аудандық пробация есебіндегі А. есімді азамат бұған дейін сот үкімімен ұрлық бабы бойынша кінәлі деп танылып, 4 жыл мерзімге бас бостандығын шектеу жазасы тағайындалған. Оған пробациялық бақылау белгіленіп, тұрғылықты мекен-жайында болуын қадағалау мақсатында электронды бақылау құрылғысы тағылған.Алайда, пробация инспекторлары тарапынан бірнеше рет ескерту жасалып, жаза өтеу тәртібі мен міндеттері түсіндірілгеніне қарамастан, ол кешкі 22:00-ден кейін тұрғылықты мекен-жайында болмаған. Электронды құрылғы арқылы оның 3 рет жаза өтеу тәртібін бұзғаны және 2 рет әкімшілік құқықбұзушылық жасағандығы анықталып, осыған байланысты пробация қызметі оны бас бостандығынан айыру туралы сотқа ұсыныс жолдады.Нәтижесінде, сот оның жазасының өтелмеген бөлігін – 3 жыл 7 ай 16 күн мерзімін бас бостандығынан айыру жазасына ауыстырып, түзеу мекемесіне жіберу туралы шешім қабылдады. Қазіргі таңда ол қауіпсіздігі орташа&nbsp;түзеу мекемесінде жазасын өтеп жатыр.2025 жылдың алғашқы үш айында Қызылорда қалалық және аудандық пробация қызметінің есебіндегі 19 сотталған жаза өтеу тәртібін бұзғаны үшін сот шешімімен бас бостандығынан айырылып, жазасын түзеу мекемесінде одан әрі өтеуге жіберілді.Фото: freepik.com

Қызылордада жаза өтеу тәртібін бұзған сотталған түзеу мекемесіне жіберілді

<a href="https://kyzylorda-news.kz/">Kyzylorda-news.kz</a> Шараның негізгі мақсаты - облыс көлемінде құқықтық тәртіпті қамтамасыз ету. Сондай-ақ көшелерде, басқа да қоғамдық орындарда кәмелетке толмағандардың арасында және оларға қарсы жасалатын қылмыстарды, оның ішінде бұзақылықты болдырмау. Тәртіп бұзушылықты болдырмау мақсатында арнайы рейдтік жұмыстар жүйелі жүргізілген. Шараның нәтижесін облыстық ПД Жергілікті полиция қызметі басқармасының бастығы Ердәулет Жаукеев мәлімдеді.<blockquote>- Іс-шара барысында қалалық Полиция басқармасы мен барлық аудандық полиция бөлімдерінің қызметкерлері жастар ресурстық орталық өкілдері, педагогикалық ұжымды тарта отырып, балалардың қадағалаусыз және панасыз қалуының алдын алу, кәмелетке толмағандарды түнгі уақытта ойын-сауық орындарында және үй-жайдан тыс жүргендерін анықтау мақсатында рейдтік іс-шаралар ұйымдастырды. Іс – шараның қорытындысымен барлығы 296 түрлі әкімшілік хаттамалар ресімделсе, 11 кәмелетке толмаған ішкі істер органдарының есебіне алынды. Түнгі уақытта заңды өкілдерінің еріп жүруінсіз ойын-сауық мекемелерінде болған барлығы 235 кәмелетке толмаған анықталып, олардың заңды өкілдеріне хаттама толтырылды. Ішкі істер органдарының есебіне барлығы 11 жасөспірім алынса, ал кәмелетке толмағандарды тәрбиелеу, оқыту және бағып-күту жөніндегі өздерінің міндеттерін орындамайтын, олардың мінез-құлқына теріс әсер ететін кәмелетке толмағандардың ата-аналары мен заңды өкілдерінің профилактикалық есебіне барлығы 13 ата-ана алынды. Кәмелетке толмағандармен және оларға қарсы жасалатын құқықбұзушылықтардың алдын алу бағытындағы жұмыстар жалғасуда,- деді Ердәулет Баянбайұлы.</blockquote><img src="https://knadmin.beoblood.kz/uploads/Brifing_02_04_6d12a4e52e.jpg" alt="Брифинг 02.04.jpg">Фото: Нұрболат Нұржаубай

"Көктемгі демалыс" жедел профилактикалық шарасы өтті

<a href="https://kyzylorda-news.kz/">Kyzylorda-news.kz</a> Ішкі істер министрлігі жүйелі түрде азаматтардың құқықтарын қорғауға бағытталған заңнамалық және ұйымдастырушылық шараларды қабылдап, сондай-ақ қоғамда "Заң мен Тәртіп" қағидатын нығайту бойынша жұмыстарын жалғастыруда.Қазіргі заманғы цифрлық шешімдерді белсенді пайдалану, жастардың құқықтық санасын қалыптастыруға бағытталған ауқымды жұмыстар, сондай-ақ ішкі істер органдарындағы кадрлық әлеуетті арттыру қылмыс пен құқық бұзушылықтардың алдын алу ісінде маңызды рөл атқарды.2025 жылдың басынан бастап республика бойынша тәртіп сақшылары 3,7 млннан астам әкімшілік құқық бұзушылықты анықтады, оның 3,2 млн жол жүрісі қағидаларын бұзу фактілері. Жол ережесін бұзғаны үшін полиция қызметкерлері 5 417 "мас" жүргізушіні ұстады. Заң бұзған 116 004 жаяу жүргіншіге айыппұл салынды.2024 жылы Мемлекет басшысының тапсырмасы бойынша әйелдердің құқықтарын қорғау және балалардың қауіпсіздігін қамтамасыз ету мәселелері бойынша заң қабылданды. 16 жасқа толмаған адамдарға жыныстық сипатта тиісу және өз-өзіне қол жұмсауға үгіттеу үшін қылмыстық жауапкершілік қарастырылды. Сонымен қатар балаларды автобустардан түсіруге тыйым салынды. Буллинг үшін әкімшілік жауапкершілік көзделді. Тұрмыстық зорлық-зомбылық үшін жауапкершілік күшейтіліп, денсаулыққа жеңіл зиян келтіру және ұрып-соғу қылмыстық құқық бұзушылық ретінде қарастырылды. Отбасылық-тұрмыстық қатынастар саласында 710 қылмыстық құқық бұзушылық тіркелді. Ішкі істер министрлігінде әйелдер мен балаларды қорғауға бағытталған арнайы бөлімшелер жұмысын бастады.Сондай-ақ әрбір білім беру мекемесіне ювеналды полиция қызметкерлері, учаскелік инспекторлар мен криминалдық полицияның жедел уәкілдері бекітілді. Олар балалар мен олардың ата-аналарына құқықтық сауаттылықты арттыру бойынша профилактикалық жұмыстар жүргізеді.Мектеп оқушылары мен студенттер арасында заңсыз әрекеттерді анықтау және алдын алу жұмыстарына ерекше назар аударылады.Биыл барлық мектептер мен колледждерде "111" республикалық байланыс орталығына жедел түрде хабарласуға мүмкіндік беретін QR-кодтар енгізілді, мұнда құқықтық, ұйымдастырушылық және психологиялық көмек көрсетіледі. Білім беру мекемелерінің кіреберістерінде полиция қызметкерлерінің байланыс деректерімен анонимді шағымдар үшін ақпараттар орналастырылған.Соңғы жылдары цифрлық технологиялардың жылдам дамуына байланысты интернет-кеңістігінде заңсыз контенттің таралуын тоқтату маңызды міндеттердің біріне айналды. Жыл басынан бері есірткілерді жарнамалайтын 7 мыңнан астам сайт, экстремистік мазмұнды 2 мыңнан астам контент және интернет-алаяқтық белгілері бар 28 мыңнан астам ресурс анықталды.Барлық аталған шаралар азаматтардың конституциялық құқықтарын қорғауға, заңның үстемдігін қамтамасыз етуге және құқық тәртібін сақтауға бағытталған.Айта кету керек, 2025 жыл Ішкі істер министрлігі тарапынан "Құқық бұзушылықтардың алдын алу жылы: полиция "Заң мен Тәртіп" күзетінде" деп жарияланды. Негізгі мақсат – қылмыстардың алдын алу, олардың жасалуына ықпал ететін себептер мен жағдайларды жою.Фото: Нұрболат Нұржаубай

Құқық бұзушылықтардың алдын алу жылы: азаматтардың қауіпсіздігін қамтамасыз ету бойынша ІІМ шаралары

<a href="https://kyzylorda-news.kz/">Kyzylorda-news.kz</a> &nbsp;Қызылорда қаласының №2 соты 2023 жылдың желтоқсанында күш қолдану арқылы өз көлігінде облыс орталығының тұрғынын қала сыртына алып шығып, оған өлтіру қатерін төндірумен 1 миллион теңге талап еткен қылмыстық топтың 4 мүшесіне қатысты Республикасының Қылмыстық кодексінің 194-бабының 2-бөлімінің 1) және 2) тармақтарымен айыптау үкімін шығарды.Облыс прокуратурасының үйлестіруімен қылмыстық топтың барлық мүшелері мен орналасқан жерлері анықталып, оларды ұстау шаралары қабылданды.Барлық ұсталған тұлғалар бұрын ауыр қылмыстар жасағаны үшін сотты болған. Ұстау кезінде қылмыстық топтың бір мүшесінен атыс қаруы мен оған оқ-дәрілер табылып, алынды.Сотпен 3 айыпталушыға 6 жылға бас бостандығынан айыру, ал қылмыстық топтың бір мүшесіне шынайы өкінуіне байланысты 3 жыл 6 айға бас бостандығынан айыру жазасы тағайындалды.Фото: Нұрболат Нұржаубай

Қызылордада қылмыстық топқа қатысты үкім шығарылды

<a href="https://kyzylorda-news.kz/">Kyzylorda-news.kz</a> Аталған тыйым – бүгіннен бастап облыста «Уылдырық шашу» акциясының басталуымен байланысты болып отыр, деп хабарлайды&nbsp;<a href="https://egemen.kz/">Egemen.kz</a>.Осылайша Арал-Сырдария бассейнінің су айдындарында балық аулауға уақытша тыйым салынды.<blockquote>«Оның ішінде «Шардара» су қоймасының су айлағында 1 сәуір-20 мамыр, Түркістан облысы шегіндегі су айдындарында және «Шардара» су қоймасынан Қызылорда облысының әкімшілік шекарасына дейiнгi Сырдария өзенiнде 15 сәуір-31 мамыр, сағадан Түркістан облысының әкімшілік шекарасына дейінгі Сырдария өзенінде 1 сәуiр-30 мамыр аралығында балық аулауға болмайды. Ал Кiшi Арал теңiзiнiң су айлағында 1 мамырдан 10 маусымға, Қызылорда облысының шегіндегі су айдындарында 20 сәуірден 10 маусымға дейін жағдай бақылауымызда болады», деді Арал-Сырдария облысаралық бассейндік балық шаруашылығы инспекция басшысының орынбасары Жанқожа Сапаров.</blockquote>Аталған акция шеңберінде рейдтік іс-шаралар, су айдындарының мониторингі және табиғат қорғау заңнамасының сақталуын тексеру жоспарланған.Фото: Арал-Сырдария облысаралық бассейндік балық шаруашылығы инспекциясы

Қызылордада балық аулау уақытша тоқтатылды

Қаржылық мониторинг агенттігі кең ауқымды операция жүргізіп, тұтынушылық кооператив ретінде жасырылған «Buyers Union» қаржы пирамидасының қызметін тоқтатты.Салымшыларды жылжымайтын мүлік, көлік сатып алуға және Trade in және ReFinance бағдарламаларына қатысып инвестиция салуға үгіттеген.Сонымен қатар, кооператив жеке тұлғалардың қаражатын тартудан дивидендтер алу мүмкіндігімен менеджер болып жұмыс істеуге мүмкіндік берген.Кооперативке қатысудың міндетті шарттарының бірі өмірді сақтандыру үшін ай сайын 30 мың теңге төлеу және сатып алынатын мүліктің құнынан 10%-дық жарна төлеу болған.Маңыздысы, кооператив салымшыларға ақша алғаны туралы ешқандай құжаттарды ұсынбаған, ал салым сомасы тек пайдаланушылардың жеке кабинетінде көрсетілген.Нәтижесінде, пирамидаға 250-ден астам салымшы тартылып, 300 млн теңгеден астам қаражат салған.Пирамида ұйымдастырушысы екі айға қамауға алынды.Сотқа дейінгі тергеу жалғасуда.ҚР Қылмыстық іс жүргізу кодексінің 201-бабына сәйкес басқа ақпарат жария етуге жатпайды.

«Buyers Union» қаржы пирамидасының қызметі тоқтатылды

<a href="https://kyzylorda-news.kz/">Kyzylorda-news.kz</a> 2025 жылғы 28 наурызда облыс әкімінің бірінші орынбасары Д.Жаналиновтың төрағалығымен нашақорлыққа және есірткі бизнесіне қарсы іс-қимыл жөніндегі ведомствоаралық штабтың кезекті отырысы өтті.Жиында 2023-2025 жылдарға арналған кешенді жоспардың орындалу барысы қаралып, облыстық полиция департаменті, денсаулық сақтау және қоғамдық даму басқармаларының баяндамалары тыңдалды. Есірткі қылмысына қарсы күресті күшейту, нашақорлықтың алдын алу және оңалту жұмыстарын жетілдіру мәселелері талқыланды.Отырыстың қорытындысы бойынша тиісті құзырлы органдар мен жауапты басқармаларға нақты тапсырмалар берілді. Оның ішінде профилактикалық іс-шараларды күшейту, нашақорлықтың алдын алу шараларының тиімділігін арттыру, оңалту бөлімшелерінің жұмысын жетілдіру және инфрақұрылым мәселелерін шешу бойынша нақты шаралар қабылдау тапсырылды. Сонымен қатар, қала және аудан әкімдіктеріне кешенді жоспар аясында белгіленген көрсеткіштердің орындалуын қамтамасыз ету міндеттелді.Осы тапсырмалардың орындалуы облыс әкімінің аппаратының бақылауында болады.

Нашақорлыққа және есірткі бизнесіне қарсы іс-қимыл жөніндегі ведомствоаралық штабтың кезекті отырысы өтті

<a href="https://kyzylorda-news.kz/">Kyzylorda-news.kz</a> &nbsp;Облыс орталығындағы «Мың бала» спорт кешенінде Қызылорда облысы Полиция департаментінің Есірткі қылмысына қарсы іс-қимыл басқармасының жүлдесіне жасөспірімдер арасында бокстан ашық турнир өтті.Турнир «Спорт есірткіге қарсы» ұранымен өтуде. Айта кетерлігі мұндай шара өңірімізде алғаш рет ұйымдастырылып отыр.Турнирдің ашылу салтанатына Қызылорда облысы Полиция департаменті бастығының бірінші орынбасары полиция полковнигі Тоқтыбаев Серік Әбдімәуленұлы, Есірткі қылмысына қарсы іс-қимыл басқармасының бастығы полиция подполковнигі Біржан Бағысов, «Наман ата» қоғамдық қоры мен «Мың бала» спорт кешенінің директоры Сәдірбек Жұмабеков, сондай-ақ полиция қызметкерлері мен спорт өкілдері қатысты.Үш күнге созылатын жарыста 10 салмақ дәрежесі бойынша 100-ге жуық спортшы бақ сынамақ.Жастарды салауатты өмір салтын ұстануға шақыру мақсатында ұйымдастырылған шаршы алаң додасында болашағынан зор үміт күттіретін жас спортшылар іріктелмек.Фото: Qyzylorda PD

Қызылордалық полицейлер жасөспірімдер арасында бокстан ашық турнир ұйымдастырды

<a href="https://kyzylorda-news.kz/">Kyzylorda-news.kz</a> Қызылорда облысы аумағында орман және дала өрттерімен байланысты төтенше жағдайларды жою үшін арнайы іс-жоспары бекітілді. Аталған жоспарда орман және дала өрттері туындаған жағдайда күштер мен құралдарды тарту, &nbsp;сондай-ақ халықты құлақтандыру және байланыс схемалары енгізілген. Бұл туралы облыстық ТЖД Мемлекеттік өрт бақылау басқармасының бастығы &nbsp;Асхат Оразбеков мәлімдеді.<blockquote>– Қызылорда облысы аумағында мемлекеттік орман қоры жерлерінің жалпы көлемі 7,0 млн. гектарды құрайтын болса, оның 3,8 млн. гектары орманды алқаптар. Мемлекеттік орман қоры жерлерінің аумағында былтыр &nbsp;69 га құрайтын 14 өрт оқиғасы тіркелген болатын. 18 наурызда облыс әкімінің бірінші орынбасары Данияр Жаналиновтің төрағалығымен облыстық төтенше жағдайлардың алдын алу және оларды жою жөніндегі комиссия отырысы өткізілді. Жиын барысында өзекті мәселелер қаралып, тиісті мекемелерге тапсырмалар берілді. Қала және барлық аудандарда жергілікті атқарушы органдар, мемлекеттік өртке қарсы қызметі, орман шаруашылығы және полиция қызметтерімен бірлесіп 25 өрт-тактикалық оқу-жаттығу өткізілді. Қазіргі таңда 2025 жылға өрт қауіпті кезеңде профилактикалық шаралары жүргізілуде және қатаң бақылауда тұр, – деді Асхат Плалұлы.</blockquote><img src="https://knadmin.beoblood.kz/uploads/rt_2cfa5bdbd6.jpg" alt="өрт.jpg">Фото: Нұрболат Нұржаубай

Қазақстан және Қызылорда облысының жаңалықтары: Құқық