<a href="https://kyzylorda-news.kz/ru">Kyzylorda-news.kz.</a> ҚР Президенті Қасым-Жомарт Кемелұлы Тоқаевтың бастамаларын қолдау және «Жаңа Қазақстан: жаңару мен жаңғыру жолы» жолдауындағы тәуелсіздік идеяларын жүзеге асыру мақсатында «Bilim-orkenieti» ұлттық инновациялық ғылыми-зерттеу орталығы ұйымдастырған «ҚР Еңбек озаттарының алтын кітабы» патриоттық байқауында Қызылорда облыстық тарихи-өлкетану музейінің «Археология және этнография» ғылыми-зерттеу бөлімінің меңгерушісі Беккулиева Әйгерім Сейітбекқызы мәдениет саласы бойынша жеңімпаз атанды.&nbsp;Тәуелсіздік жылдары өз мамандығының хас шебері атанып, еліміздің дамуына үлес қосып жүрген азаматтарды қоғамда кеңінен насихаттау және жастарға үлгі етуді мақсат еткен байқауға қатысушы әрбір үміткер өмірбаяны мен еңбек жолында жеткен жетістіктерін растайтын құжат көшірмелерін өткізді.&nbsp;Әйгерім Сейітбекқызы еңбек жолын 2009 жылы Қызылорда облыстық тарихи-өлкетану музейінің ғылыми қызметкері болып бастап, 2018 жылдан осы күнге дейін Қызылорда облыстық тарихи-өлкетану музейінің "Археология және этнография" ғылыми-зерттеу бөлімінің меңгерушісі қызметін атқарып келеді.Беккулиева Әйгерім Сейітбекқызы – музей ісін жақсы игерген білікті маман. Жастар үшін тәрбиелік маңызы зор мәдени шаралар, тарихи-танымдық жобалар жасап келеді. Музей қорындағы экспонаттарды зерттеп, ғылыми айналымға шығарып, халықаралық және республикалық конференцияларға қатысып, ғылыми-зерттеу жұмыстары баспа беттерінде жарық көруде. Музей қызметкерлері арасында республикалық көлемде ұйымдастырылған байқауларда жүлделі орындарға ие.Мұражай ісі мамандығының дәрежесін көтеру, мұражайға келушілермен жұмыс істеуде жаңа әдістер енгізу мақсатында музей қызметкерлері арасында Семей қаласында 2013 жылы ұйымдастырылған «Жылдың үздік экскурсия жүргізушісі» атты республикалық байқауының ІІ орын иегері, Қызылорда қаласында өткен «2014 жылдың үздік ғылыми қызметкері» облыстық байқауының жеңімпазы, Қызылорда облысының 2014 жылғы «Үкілі үміт» облыстық номинациясының иегері, Қазақстан Республикасына еңбек сіңірген қайраткері Нариман Үлкенбайұлы атындағы музей қызметкерлерінің 2019 жылы Атырау қаласында өткен І Республикалық байқауының ІІІ орын иегері, 2020 жылы Астана қаласында өткен &nbsp;республикалық "Рухани қазына - 2020" байқауында «Асыл мұра» тележобасымен (авторы: Ә.Беккулиева) қатысып, "Үздік музейлік онлайн жоба – 2020" республикалық номинациясын иемденді.Ол бірнеше «SACRAL ТУР», «VILLAGE LIFE», «БОЛАШАҚ ЭКСПОНАТ», «АСЫЛ МҰРА», «МУЗЕЙ РАДИОСЫ» сынды музейлік жобалардың авторы.Музей ісі – қоғамдық іс-әрекеттің ғылым, білім беру, тәрбие, мәдениетке қатысы бар ерекше сала. Музейдің ғылыми зерттеу жұмыстарына және музей педагогикасына белсене қатысып, жан-жақты білімді, белсенді, эстетикалық талғамы зор, қоғамға пайдалы жастар тәрбиелеуге ат салысып келе жатқан Әйгерім Сейітбекқызына елімізге белгілі тұлғалар еліміздің бас қаласы – Астанада Министрліктер үйінде «ҚР Еңбек озаттарының алтын төсбелгісін» табыс етті. Сонымен қатар, жерлесіміздің есімі ҚР Еңбек озаттарының алтын кітабына енді.

Қызылорда облыстық тарихи-өлкетану мұражайының меңгерушісі «ҚР Еңбек озаты» атанды

<a href="https://kyzylorda-news.kz/">Kyzylorda-news.kz.</a>&nbsp; Белгілі жырау, Жиенбай жыр мектебінің өкілі Серік Жақсығұлов жуырда Өзбекстан Республикасының Гүлістан қаласында өткен ІІІ халықаралық Бахшы-жырау фестиваліне қатысып, «жоғары дәрежелі лауреат» (үшінші орын) номинациясын жеңіп алды.Отыз елдің жыраулары қатысқан өнер бәйгесінде жүзден жүйрік атанып, жүлделі орынды иеленген жыраудың бұл жеңісі Сыр мәдениеті мен өнеріне қосылған сүбелі үлес деп білеміз.Дәстүрлі өнер қайбір халықтың да түп тарихымен сабақтасып жатыр. Мысалы, Шығыстың «Шахнама», «Көрұғлы» дастандары, қырғыздың «Манас» жыры, қазақтың «Алпамыс батыр», «Қобланды батыр», «Ер Тарғын», «Қыз Жібек», «Кенесары – Наурызбай» сияқты жыр-дастандары осының дәлелі. Оның бер жағында Сыр сүлейлерінің мұрасы өз алдына тұнып тұрған қазына. Ал осынау рухани құндылықтар әр халықтың сол дәуірдегі қоғамдық, әлеуметтік даму сипатын аңғарта келіп, ел мен жерді қорғаудағы күрескерлігін, сонымен қатар, салт-сана, әдет-ғұрпын, мәдениеті мен өнерін, тұрмыс-тіршілігін, жалпы айтқанда, ұлттық ұстынын көз алдымызға әкеледі. Әлбетте, дәстүрлі өнерді насихаттау арқылы сол бабалардың асыл мұраты, аманаты бүгінгі күнмен ұштасып жатады.Жоғарыда айтқан Бахшы фестивалінің де түп-төркіні – түркі елдеріне тән &nbsp;дәстүрлі жыраулық өнерді насихаттай отырып, ғасырлардан үзілмей жалғасып келе жатқан жауһар туындыларды бүгінгі жыраулар, жыршы, шайырлар арқылы қайта жаңғырту. Айта кетейік, 2019 жылы Сырдан шыққан белгілі жырау Ұлжан Байбосынова осы өнер додасының бас жүлдесін иеленген болатын. Қатысушылардың айтуынша, фестивальде орындалған жыр, дастандардың мазмұны да түбі бір түркі жұртының асыл мұратын айқындай түсетіндей. Осы тұста Н.Бекежанов атындағы облыстық қазақ академиялық музыкалық драма театры басшысының шығармашылық жөніндегі орынбасары, ҚР Мәдениет саласының үздігі, фестивальдің биылғы жүлдегері Серік Жақсығұловты сөзге тарттық.– Өнер сапарымен Өзбекстан мемлекетінде өткен Бахшы-жырау фестиваліне қатысып, жүлделі оралдыңыз. Бұған дейін де Ресей, Венгрия, Түркіменстан, Түркия, Әзербайжан елдерінде концертте болып жүрсіз. Жалпы &nbsp;қазіргідей ғылым мен технологиядан бастап, мәдени құндылықтарға дейін жаһандана бастаған уақытта халықтың дәстүрлі өнерге деген көзқарасы қандай?– Биыл ІІІ рет байрағын көтерген Бахшы-жырау фестиваліне қатысып, ерекше рухани әсер алып, шабыттанып оралдық. Әсіресе, фестивальді ұйымдастырудағы жоғары деңгейдегі жұмыстар көңілімізді аударды. Өнер бәйгесі Өзбекстан мемлекетінің Сырдария облысы Гүлістан қаласында өтті. Сырдария өзенінің бастауы, яғни, жоғарғы ағысы сол жақта. Ал біз төменгі ағысының бойында орналасқанбыз. Жыр додасының осынау Сыр өзенінің бойында өтіп жатқаны, өнердің өлмейтінін, рухани құндылығымыздың мәңгі екенін еске салып тұрғандай. Екі жарым мың көрерменге арналған амфитеатрда ұйымдастырылған бахшы-жыраулар өнерін өзбек ағайындар үш күн бойы тамашалады.– Сіз қай шығарманы орындадыңыз?– Мен «Көрұғлы» дастанын орындадым. Бұл дастанды ХІХ ғасырдың аяғында Дүзбенбет жыраудың баласы Жиенбай ала келген екен. Жиенбай жыраудан бері қарай Көшеней, одан Рүстембек, Бидас, Арнұр жыраулар осы жырды бүгінге дейін саф қалпында сақтап жеткізген. Осынау алқалы жиында аңғарғанымыз, қазақ дәстүрлі өнері, оның ішінде Сыр бойындағы сүлейлер мұрасы жоғары деңгейге көтерілген екен. Осы орайда айта кетейік, Сыр елінде екі жылда бір рет өтетін дәстүрлі «Қорқыт және Ұлы дала сазы» халықаралық фестивалі бар. Ең алғаш 2006 жылы ТҮРКСОЙ ұйымы бірлесіп түркітілдес елдердің ұлттық фольклорлық музыкалық өнерін дәріптеу, мәдени байланысты нығайту мақсатында бастау алған халықаралық фестиваль 2019 &nbsp;жылы бесінші мәрте өткізілді. Оған Түркия, Иран, Әзербайжан, Сербия, Грузия, Өзбекстан, Қырғызстан, Татарстан, Башқұртстан, Саха республикаларынан және еліміздің әр өңірінен белгілі ғалымдар мен өнер иелері, шығармашылық ұжымдар қатысқан.–Қандай ой-пікір түйіндедіңіз?–Біріншіден, халықаралық фестивальдің негізгі мазмұны сақталуы керек. Мысалы, қатысушылар өз мүмкіндігін барынша көрсете алатындай бірнеше күнге ұласқан өнер жәрмеңкесі болғаны жөн. Жырдың ең күрделі әрі мазмұнды түрі – қисса, дастандар. Олай болса, кешегі Тұрмағамбет, Жиенбай, Нұртуған, Балқы Базар, Нартай жыраулардың ізімен таңды таңға ұрып жырлау дәстүрін жаңғыртып, дастандар орындауды ережеге енгізу қажет деп ойлаймын. Сондай-ақ, дәстүрлі қазақ-қырғыз айтыстарын қайта жалғастырсақ артық болмас еді. Бұдан бөлек, облыс деңгейінде жыраулар байқауының аясын ұлғайтып, аймақтағы әрбір жыр мектебінің жұмысы назардан тыс қалмай, лайықты насихатталуы керек. Сонда тыңдарманның да сұранысы артады. Айталық, Арқа, Жетісу өңірінде Жәнібек Кәрменовтің, Әміре Қашаубаевтың атында жыр байқаулары өтеді. Жүлдесі де жоғары. Кете Жүсіп, Көшеней жырау атында байқаулар ұйымдастырып, оның ішінде аға буын жыраулар мен жас жыршылар арасында өзінше бөлек жыр жүйріктерін анықтауға көңіл бөлгеніміз жөн. Жалпы Сыр бойында тек ел ішінде ғана емес, әлем назарына ұсына алатын дәстүрлі құндылықтарымыз бар. Тек соны заманауи талаптарға сай таспаға түсіріп, одан әрі ғылыми тұрғыда пайдаға жарата білсек болғаны. Осы жұмыстар мемлекеттің қолдауымен жүйелі жүргізіліп отырса, дәстүрлі өнердің ұрпақ тәрбиесіне тигізер ықпалы ұлан-асыр болмақ. Мәдениет пен өнер – халықтың қазынасы. Тек сол қазынамызды көздің қарашығындай қорғай білуіміз қажет. Қорғай білу дегенде айтпағымыз, құжат күйінде қағазға түсіріп, қаттап жинап қою емес, жарқыратып дүйім елдің назарына ұсыну керек. Ұлт мәдениетін айшықтайтын туындылар әлем сахналарында орындалғанда, жас ұрпақтың жүрегін мақтаныш кернеп, төл өнердің тәлімін бойына сіңіре білсе, бұл – үлкен жеңіс. Қысқасы, осы күні әрбірімізді толғандыратын ұлттық идеологияның да түп-тамыры осында жатқан секілді… &nbsp;

Серік Жақсығұлов «Жоғары дәрежелі лауреат» номинациясымен марапатталды

<a href="https://kyzylorda-news.kz/">Kyzylorda-news.kz.</a>&nbsp;Шиелі ауданына қарасты Жөлек ауылдық мәдениет үйінде аяулы ана, ардақты әже, жезтаңдай әнші, айтулы ақын, күйші Оразкүл Алтынбекованы еске алу шарасы өтті.Шараға ауыл тұрғындары, аудандық және ауылдық мәдениет үйінің қызметкерлері, облыстан арнайы келген өнер марқасқалары қатысты. Алдымен Оразкүл Шәкірбекқызының ғұмыр жолы мен жеткен жетістіктері «лэд» экраннан берілді.&nbsp;Содан соң Жөлек ауылының әкімі Мейірбек Мейрамбекұлы кейіпкеріміз жайлы естелік айтып, кештің шымылдығын түрді. Еске алу жиынын Шиелі ауданының «Құрметті азаматы», облыстың бас ақыны Кенжебай Жүсіп тізгіндеді.&nbsp;Оразкүл Шәкірбекқызының жүрекжарды жырларын мектеп оқушылары мәнерлеп оқып, көпшіліктің жанарына жас үйірді. Арал мен Қызылордадан ат терлетіп келген Серік Ыдырысов, Қазына Өзденбаева сынды қадірлі меймандар О.Алтынбекова жайлы ескірмес естеліктерімен бөлісті.&nbsp;Үзеңгілес досы, замандасы, Қармақшы ауданының «Құрметті азаматы», ақын, ұстаз Серік Ыдырысов Оразкүл Алтынбековаға арнаған жыр-шумақтарын оқыды. Көршілес жатқан Бәйгеқұм ауылының әжелері кешті әдемі әнмен әрлеп, Ортақшыл ауылдық клуб үйінің директоры Ғ.Нысанбаев жыр айтса, Бала би ауылдық мәдениет үйінің директоры, ақын Талғат Күзембаев өз арнауын арнады.&nbsp;Саналы ғұмырында ел есінде қаларлық тағылымды дүниелер жазып, игілікті іс тындырған Оразкүл апа туралы естеліктер легі таусылар емес, әрі ескірмейді де. Себебі ол елдің «жырын жырлаған» жан. Халықтың жүрегінің төрінен орын алған ғибратты ғұмыр иесі болды. Өресі биік ұрпағы, еңбегін бағалайтын халқы, ойлы оқырманы, «Ұстазым» деп ардақтайтын шәкірттері барда Оразкүл Алтынбекованың есімі мәңгі жасай бермек.

Шиелі: Ақынын ауылы еске алды

<a href="https://kyzylorda-news.kz/">Kyzylorda-news.kz.</a> Өткен жылдан бастап Жаңақорған ауданындағы жергілікті ақын жазушылардың туған жеріндегі оқырман кауыммен қауыштыру, олардың шығармашылығын насихаттау мақсатында, аймағымызда "Елге сәлем" жобасы жүзеге асып келеді.Осы жоба аясында, А.Сопыбеков атындағы аудандық кітапханасының үйлестірумен жерлестерімізді Ф.Сахиев, Б.Үсейнова, Н.Жапеков, Е.Мұстафаев сынды танымал ақындардың қатысуымен "Қаламгер - руханият шырақшысы" тақырыбында кездесу кеші болып өтті. Шараға облыстық кітапхананың кызметкерлері, ауданның ардагер ақсақалдары С.Ыдырысов, П.Айнақожаев және кітапхананың қызметкерлері мен колледж студенттері қатысты. Кешті ақын Ф.Сахиев ашып, ақындардың өмірінен сыр шертетін бейнеролик көрсетілді. Колледж студенті Ф.Сахивтің "Менің Қазақстаным" атты өлеңін оқыды. Е.Мұстафаевтің сөзіне жазылған "Анаға сәлем " атты әнін мәдениет үйінің әншісі Қ.Әлиева орындады.Сондай-ақ Б.Үсейнованың "Асыл анам" монологын оқыса, ауданның жас ақындары А.Бидашов пен М.Әбибулаев суырып салма ақындық өнерлерін паш етіп кешті қызықтыра түсті. Жыр сүйер қауым ақындарымызға көкейіндегі сұрақтарды қойып, жауабын алды. Ақындар сиясы кетпеген бір-бір өлеңдерін оқып оқырмандарға тарту етті. Шара соңында А.Сопыбеков атындағы кітапхананың директоры А.Тилеубергеноваға және Қызылорда Облыстық Ә.Тәжібаев атындағы кітапхананың әдіскері Мадина апайға сөз берілді. Шараның негізгі әрі бірегей кейіпкерлерін әр бір тұлға - бір театр болатындай азамат пен азаматша екендігін айта кетті.Жобаның мақсаты негізгі мақсаты осы Жаңақорған аудандық жергілікті жердегі ақын-жазушыларды, өлке тұлғаларын дәріптеу, насихаттау жастарға үлгі ету.

Жаңақорғандағы қаламгерлерге арналған жоба жалғасын тапты

<a href="https://kyzylorda-news.kz/">Kyzylorda-news.kz.</a> Америка Құрама Штаттарының Алматыдағы бас консулы Кэролайн Сэвидж іссапармен Сыр еліне келіп, Ә.Тәжібаев атындағы облыстық әмбебап ғылыми кітапханасына ат басын тіреді.Кітапханадағы кездесуге ардагерлер, жазушылар, жастар ұйымдарының өкілдері, кітапхана оқырмандары қатысты.Жылы жүздесу Қорқыт ата университетінің жанынан құрылған жастар &nbsp;театры дайындаған «Әуезовтің ой толғауы» спектаклінің үзіндісімен басталды. Мұнан соң Кэролайн Сэвидж сөз сөйлеп, кітапхана сөресіне М.Әуезовтің «Америка әсерлері» кітабын тарту етті.Абайды әлемге танытқан, қазақ әдебиетінің классигі Мұхтар Әуезовтің 125 жылдық мерейтойына орай шығарылған бұл кітап әзірше Алматы және Қызылорда кітапханасының қорындағы ағылшын тілінде жарық көрген &nbsp;құнды сыйлық болып отыр.1960 жылы қазақ жазушысы Мұхтар Әуезов КСРО-дағы Л.Леонов, О.Гончар, С.Щипачев секілді бірнеше әріптестерімен АҚШ Мемлекеттік департаментінің шақыруы арқылы Америкаға сапарлаған.Әуезов сол сапарда Нью-Йорк, Вашингтон, Аризона мен Калифорния штаттарын бір ай бойы аралап, көрген-білгендерін жолжазба жинағына түсірген. Жолжазба Американың сол замандағы әралуан саладағы жетістіктерін, табиғатының сұлулығын және халқының тұрмысын сипаттаған.Осы сапарынан бір жыл өткен соң 1961 жылы жазушы қайтыс болып, жолжазбасы аяқталмай қалады. Алайда, шығарма сол қалпында-ақ тарихи құндылығын сақтап қалған.Қазақстандағы АҚШ дипломатиялық миссиясы 2021 жылы Қазақстанда тұратын америкалық гид және оқытушы Деннис Кинмен бірігіп, Әуезовтің Америка сапарының жолжазбаларын ағылшын тіліне аударып, алғаш рет кітап етіп басып шығарды. Бас консул осы жайында айтқан сөзінің жарысын қазақ тілінде жеткізді.Кэролайннің қазақ тіліне деген қызығушылығы мен тіл үйренудегі талпынысы – жастарға үлгі боларлық қадам. Кездесуге қатысқан облыстық мәдениет және спорт басқармасының басшысы Мира Қазбекова бұл күнгі шараның маңыздылығына баса тоқталып, Бас консулға алғыс білдірді.<blockquote>«Абайды Әлемге танытқан Мұхтар Әуезовтің «Америка әсерлері» кітабын тарту етуіңіз – біз үшін баға жетпес сый, кейінгі ұрпаққа үлкен мұра. Бұл туындының кітапханадағы ағылшын тіліндегі маңызды әдебиеттерден ұйымдастырылған Америка бұрышын толықтырары сөзсіз. Алдағы кезеңде де екі ел арасындағы мәдени ынтымақтастығымыз арта түседі деген сенімдеміз», – деді М.Қазбекова. Сонымен бірге басқарма басшысы Бас консулға Мұхаммед Қайдар Дулатидің «Тарих-и Рашиди» еңбегін сыйға берді.</blockquote>Кітапхана басшысы, тарих ғылымдарының кандидаты &nbsp;Н.Мыңжас «М.Әуезовтің қазақ мәдениетіне әсері» атты баяндама жасап, ұлы жазушының қазақ руханияты мен әдебиетіне қосқан зор үлесін, халықаралық деңгейдегі орнын атап көрсетті. «Кітап құрттары» клубының мүшесі Қадыр Мырза Әлінің «Әуезовке арнау» өлеңін оқыды.Қонақтар «Әлем таныған Әуезов» кітап көрмесімен, «Шаңырақ» интеллект орталығымен, Қалтай Мұхамеджанов залымен және Ә.Тәжібаев мұражайымен танысып, Америка бұрышында видео түсірілім жасады.Көп жағдайда аудармашының аузына қарай бермейтін Кэролайн Сэвидж БАҚ өкілдеріне берген сұхбатында ынтымақтастық бағытындағы өзара іс-қимылдардың жалғаса беретіні туралы ойын жеткізді. &nbsp;

АҚШ-тың Алматыдағы бас консулы «Америка әсерлері» кітабын Сыр жұртшылығына тарту етті

<a href="https://kyzylorda-news.kz/">Kyzylorda-news.kz.</a>&nbsp; Сырдария ауданының халқы ер жүрек батыр ұл Талғат Қозыбаевтың есімін еш уақытта ұмытпайды.&nbsp;Қызмет бабында қарақшының қолынан қаза тапқан айбынды полиция қызметкерінің есімін мәңгі қалдыру мақсатында өзі оқыған орта мектепке есімі берілсе, Тереңөзек кенті мен Тартоғай ауылында Талғат Қозыбаевтың атында көше бар.Жыл сайын сырдариялықтар өзінің батыр ұлын еске алып, мәдени-көпшілік іс-шара өткізеді. Жақында Тереңөзек кенті әкімдігінің және аудандық мәдениет және спорт бөлімінің қолдауымен, Тереңөзек кенті клубының ұйымдастыруымен аудандық жазба ақындар мүшәйрасы өтті.ІІ дәрежелі «Айбын» орденінің иегері, полиция аға лейтенанты, Талғат Есентайұлы Қозыбаевтың туғанына 45 жыл толуына орай өткен мүшәйра «Антына берік ер Талғат» атты тақырыпқа негізделді.<blockquote>Мүшәйра өткізудегі мақсатымыз – ел тыныштығын күзетіп қаза болған қаһарман ұл, полиция аға лейтенанты, ІІ дәрежелі «Айбын» орденінің иегері Талғат Есентайұлының жалынды, намысшыл, ержүрек қасиеттерін ұрпаққа үлгі етіп, жастарды патриоттық сезімге баулу, жазба ақындардың өнерін шыңдау. Биыл Талғат тірі болғанда небәрі 45 жасқа толатын еді. Қыршынынан қиылған жас полицейдің артында ұрпағы қалды. Алмат әкесінің жолын жалғап, қазіргі кезде полиция қызметінде. Өнегелі өмір иесінің атын жас ұрпақ ұмытпауы тиіс, – деді клуб меңгерушісі Рүстем Байділдаев.</blockquote>Алдымен мүшәйраға қатысуға келген ақындар №131 Т.Қозыбаев атындағы орта мектептің алдында орналасқан бейбіт күннің батыры Талғат Қозыбаевтың ескерткішіне гүл шоқтарын қойып, бір минут үнсіздікпен еске алып, тағзым етті.Ауданның жазба ақындары мүшәйраның шарты бойынша әр елді мекеннен келген 19-35 жас аралығындағы бір-бір талапкер екі өлеңнен оқыды.Бірінші кезеңде жазба ақындар Талғат Қозыбаевқа арнау арнаса, екінші кезеңде еркін тақырыпта өз шығармашылығынан бір өлең оқыды. Ақындарға Халықаралық «Қазақ тілі қоғамы» қоғамдық бірлестігінің аудандық филиал төрағасы, Қазақстан Журналисттер Одағының мүшесі Шаһарбек Нұрсейітов, ардагер-журналист, Қазақстан Журналистер Одағының мүшесі Мейрамбек Шілдебаев, Қазақстан Республикасы «Мәдениет саласының үздігі» төсбелгісінің иегері, Сырдария ауандық мәдениет үйінің әдіскері Гауһар Сарсенбаева қазылық етті.Іс-шарада ер жүрек полиция аға лейтенанты Талғат Қозыбаевтың әкесі Есентай Қозыбаев бейбіт күні қарақшының қолынан қаза тапқан ұлының есімін мәңгі қалдыру мақсатында жыл сайын түрлі іс-шаралар өтетінін айтып, алғысын білдірді. Жас ақындарға сәттілік тіледі.Екі кезеңді қамтыған жазба ақындар мүшәйрасында қазылар алқасының ше¬шімімен тереңөзектік ақын Ақтолқын Абылаева бірінші орын, Шаған ауылынан келген ақын Ақерке Балманова екінші орын, ақжармалық Наурызбек Төребеков пен Қалжан ахунның ақыны Гүлімай Серікбай үшінші орынды өзара бөлісті.Талапкерлер Алғыс хат, диплом мен бағалы естелік сыйлықтармен марапатталды.Айта кету керек, жүлдегерлердің естелік сыйлықтарына «Қызылдихан» шаруа қожалығының төрағасы Алданберген Құлбаев демеушілік жасады.

Сырдарияда жазба ақындар мүшәйрасы өтті 

<a href="https://kyzylorda-news.kz/">Kyzylorda-news.kz.</a>&nbsp; Қазақстан Республикасының Ғылым және жоғары білім министрлігі Тіл саясаты комитеті ұйымдастырған ұлт ұстазы Ахмет Байтұрсынұлы атындағы Тілдерді оқыту орталығы оқытушылары арасындағы республикалық байқау қасиетті Атырау жерінде өз мәресіне жетіп, жүлдегерлер анықталды.Ұлт ғылымының негізін қалаушы, Алаштың рухани көсемі, ұлт ұстазы атындағы дәстүрлі байқау – қатысушылар үшін де, қатары қалың орман тіл жанашырлары үшін де орны бөлек рухани оқиға, жаңашылдыққа жол ашатын шоқтығы биік шара.Бұған қоса тіл меңгерту бойынша ұтымды әдіс-тәсілдерді игеруге ынталандырып, оқытушылардың кәсіби біліктілігін жетілдіруге, өзара тәжірибе алмасуға мүмкіндік береді.Көпшілік асыға күткен сайыстың биылғы үміткерлерін Атырау облыстық мәдениет басқармасының басшысы Әбіл Жоламан құттықтады.<blockquote>«Қойнауы ырысқа толы қазыналы өлке, еліміздің мұнайлы астанасы, қасиетті Атырау жеріне қош келдіңіздер! Батырлар атойлатып ат ойнатқан, аспанында күй шалқыған киелі топырақта ана тіліміздің аламан бәйгесі өтсе, оған таң қалуға болмас. Тіл – ұлттың әрі жаны, әрі ары. Кез келген адамның басындағы ойдың бәрі тіл арқылы шығады. Тіл кез келген ұлтты басқа ұлттардан ерекшелеп тұратын белгісі. Осы орайдағы істеріңізге береке тілейміз», – деді ол.</blockquote>Үш кезеңнен тұратын байқаудың алғашқы бөлігінде қатысушылар өзін және авторлық бағдарламасын таныстырды. Бірден айту керек, бекітілген ережеге сәйкес, бұл жолы тек қана Тіл оқыту орталықтарының оқытушылары ғана қатысты. Бұл – қазақ тілін үйретудегі әдістемелік дайындауда, бірінші кезекте, нақты тәжірибеге сүйенген кәсібилікке мән берудің белгісі болса, осы салада маңдай терін төгіп жүрген тіл майталмандарының еңбегін бағалау. Солай болған соң, бәйге шарты әр қатысушыдан тақырып, тақырыпша, коммуникативтік дағды, интенция, грамматика және қосымша материал болуын талап етті. Бұдан басқа әрбір тақырып бойынша коммуникативтік дағдыны таратып жазып, оның интенциясы мен грамматикасын беруге міндетті болды.Екінші кезеңде отандық және шетелдік танымал әдіскерлердің сөйлеудің 4 дағдысын үйретуге ұсынған тиімді әдіс-тәсілдері мен әдістемелері, пікірлері туралы сұрақтар берілді. Қатысушы ұяшықтардан таңдалған қос сұраққа толық жауап беруге тиіс болды. Соңғы айналымға В1 деңгейіне сәйкес келетін өзге этнос өкілдерінен тұратын 5-10 тыңдаушы сынама топ ретінде қатысты. Үміткер оларға сөйлеу әрекетінің 4 түрі бойынша (оқылым, жазылым, тыңдалым, айтылым) жағдаяттық тапсырма беріп, 20 минут көлемінде сабақ жүргізді.Байқау аса тартысты өтті. Қызу талқыдан кейін, білікті педагог-әдіскерлер мен ғалымдардан құралған қазылар алқасы топ жарған жеңімпаздарды анықтады.Қазылар алқасына А. Байтұрсынұлы атындағы Білім академиясының директоры, ахметтанушы, филология ғылымдарының кандидаты Ұлан Еркінбай төрағалық етті. Қазылар алқасының құрамында Астана ІТ университетінің қауымдастырылған профессоры, филология ғылымдарының кандидаты Бекзат Динаева, А.Қ.Құсайынов атындағы Еуразия гуманитарлық институтының доценті, педагогика ғылымдарының кандидаты Нұргүл Шадиева, Тіл саясаты комитеті Әдістемелік қамтамасыз ету және лингвистикалық жұмыстар басқармасының басшысы, филология ғылымдарының кандидаты Айнагүл Көкен, Х.Досмұхамедұлы атындағы Атырау университетінің доценті, филология ғылымдарының кандидаты Айгүл Елеуова болды.Қазылар алқасының шешімі бойынша Бас жүлде мен 500 мың теңге Қызылорда облысының тілдерді оқыту орталығының мемлекеттік тіл оқытушысы Дүзенова Гүлжанат Өмірқызының қанжығасына байланды.Бірінші орынды Жетісу облыстық «Тіл» оқу-әдістемелік орталығының мемлекеттік тіл оқытушысы Елесбаева Жанар Әлмұхаметқызы жеңіп алып, 350 мың теңге сыйлыққа ие болды.Екінші орын мен 250 мың теңге сыйлықты Ақтөбе облысы Тілдерді оқыту орталығының әдіскері Нұржанова Ақмарал Серікқызы мен Қарағанды облысының тілдерді оқыту орталығының әдіскері Ағымбаева Мүнира Шайхсламқызы бөлісті. Үшінші орынға Жамбыл облысы, Қордай аудандық тілдерді оқыту орталығының қазақ тілі оқытушысы Әшімхан Алтынай Бақытқызы, Қостанай облысы әкімдігі мәдениет басқармасының «Тілдарын» облыстық тілдерді оқыту орталығының әдіскері Крікпенова Гүлмира Талғатқызы, Ақмола облысы Ішкі саясат басқармасының Ақмола облыстық оқу-әдістемелік орталығының оқытушысы Жақанова Айман Сейілбекқызы ие болып, әрқайсысы 200 мың теңгеден сыйлыққа ие болды.Павлодар қаласының «Ана тілі» орталығының ұстазы Артықпаева Ақмарал Елдібайқызы, Қазақстан Республикасы Ұлттық ұланы академиясы тілдік дайындық кафедрасының бастығы, Солтүстік Қазақстан облысы тілдерді оқыту орталығының оқытушысы Ақмарал Саркенқызы, Астана қаласы «Руханият» КММ-сі мемлекеттік тіл оқытушысы Сейдахметова Айман Қалдыбекқызы, Алматы облысының «Тіл» оқу әдістемелік орталығының оқытушысы Дусанбаева Гүлмира Әбілқасымқызына ынталандыру сыйлығы мен 70 мың теңге табысталды.&nbsp;Бұдан басқа белсене қатысқаны үшін Алматы қаласы Мемлекеттік тілді дамыту институтының оқытушысы Боранбаева Бубайша Абдрахманқызы, Шымкент қалалық Тілдерді оқыту-әдістемелік орталығының қазақ тілі оқытушысы Әбдіғаппарова Гүлшахар Өтебайқызы, Түркістан қаласы Тілдерді оқыту және дамыту орталығының қазақ тілі оқытушысы Оразов Мадияр Лесұлы, Атырау облыстық Тілдерді оқыту орталығының оқытушысы Тәуекелова Раушан Сағынғалиқызы 30 000 теңге және арнаулы алғысхатпен марапатталды. &nbsp;<figure class="image"><img src="https://knadmin.beoblood.kz/uploads/55bb3179_b77a_46cc_9161_93708bce0fc6_4c546db847.jpg" alt="55bb3179-b77a-46cc-9161-93708bce0fc6.jpg"></figure>

Республикалық байқауда қызылордалық оқытушы жеңімпаз атанды

<a href="https://kyzylorda-news.kz/">Kyzylorda-news.kz.</a>&nbsp; Қай кезден де ақындықтың жалауын жықпай, арда өнердің абыройын асқақтатқан адырна ауыз, орақ тілді ақындардың ордасында аудандық мәдениет және спорт бөлімінің ұйымдастыруымен ақын, сатирик, аудармашы, сыншы Жарасқан Әбдірашевтың 75 жылдығына орай республикалық жазба ақындар мүшәйрасы өтті.Ақынның ғибратты ғұмырынан сыр шертетін бейнекөрсетілім мен өлеңі оқылған сахналық қойылыммен бастау алған жыр мүшәйрасына аудан әкімінің орынбасары К.Бержанов қатысып:<blockquote>&nbsp;Бүгін Аралдың атын әлемдік сахнада айшықтап көрсеткен, арда туған азаматымыздың бірі әрі бірегейі, ақиық ақын Жарасқан Әбдірашевты еске алуға арналған республикалық жазба ақындар мүшәйрасы шымылдығын түргелі тұр. Бұл өлеңге деген құрметі шексіз аралдықтар үшін тағы бір рухани серпіліс. Халқымыздың заңғар жазушыларының лайықты ізін жалғаған Жарасқан Әбдірашев ағамыз құт қонған мекен Арал топырағында дүниеге келіп, бала кезден-ақ жырды жанына тұмар етті. Шалқар шабытымен жақұт өлең өрді. Туған халқына, еліне, жеріне арнап 20-дан астам кітап жазып, өскелең ұрпаққа рухани азық қалдырды. Өлең – өмірдің үзіліп түскен бір тамшысы болса, сол тамшыны теңізге айналдырған ақын қаламынан туған шығарманың қайсыбірін алсақ та тұщымды ой, өнегелі тәрбие айқын көрінеді. Қазақтың көрнекті ақыны Қадір Мырза Әли: «Талант – халық қазынасы. Талантты қадірлемеу халықтың намысына тиеді» – дегендей ақындар мүшәйрасына келген барша сөз жақұтын терген ақындарымызға ыстық ықыласы мен шынайы ниеттеріне алғысымды білдіремін. Ұшқыр ойларыңыз бен шалқар шабыттарыңыз таси берсін! – деп барша қатысушыларға сәттілік тіледі.</blockquote>Жыр мүшәйрасына Қонаев қаласынан Үмітбек Бағдат, Қостанай облысынан Дәулет Жадырасын, ақтөбелік Исламғали Аманжол мен Дәурен Тілеухан, түркістандық Арқалық Әмәлият пен Азамат Әлібек және Сыр елінің ақындары Бекжан Ержігіт, Жасұлан Серік, Жанғазы Данабек, Тұрар Бекмырзаев, Аружан Оралбай, Әли Асқармен қатар аралдық Алтынбек Қыстаубаев, Айда Мырзабековалар қатысты.&nbsp;Жарасқан ақынның топырағында ерекше шабыттанған 14 ақын тыңдарманның көңілінен шығып, бірінен-бірі оза шапты. «Дала, сенің ұлыңмын!» атты осы мүшәйрада ақындар алғашқы тақырып бойынша Жарасқан Әбдірашевке өлең арнаса, «Сүйінші, теңіз анам келе жатыр» тақырыбы аясында теңізді өлкені жырға қосты.Тартысты жыр бәйгесінде ақын, Қазақстан Жазушылар одағының мүшесі, Ж.Әбдірашев атындағы әдеби сыйлықтың лауреаты, Қызылорда облысының құрметті ардагері, Арал ауданының құрметті азаматы, қазылар алқасының төрағасы Толыбай Абылаев, ақын, Қазақстан Журналистер одағының мүшесі, «Арал әлемі» газетінің редакторы Ерғали Абдулла, ақын, Қазақстан Журналистер одағының мүшесі Оңталап Базаралиевтердің шешімімен жүлделі ІІІ орынды Ж.Серік, А.Оралбай өзара бөліссе, ІІ орын А.Әмәлияттың еншісіне тиді. Қостанайлық Дәулет Жадырасын І орын иегері болса, арылдық Аида Мырзабек бас жүлдені еншілеп, мүшәйра жеңімпазы атанды.&nbsp; Жүлдегерлерге арнайы марапатпен қоса, қаржылай сыйлықтар табысталды.

Аралда республикалық жазба ақындар мүшәйрасы өтті

<a href="https://kyzylorda-news.kz/ru">Kyzylorda-news.kz.</a>&nbsp; 2016 жылы Қызылордада қала әкімінің қолдауымен А.Тоқмағанбетов атындағы мәдениет үйі жанынан «Жастар театры» құрылды. Театрдың көркемдік жетекшісі – Оңталап Нұрмаханов. Бүгінде бірнеше сахналық қойылымдар арқылы көрермен көзайымына айналған талантты жастар театр қабырғасында шыңдалуда. Шығармашылық ұжым аз уақыт ішінде облыстық, республикалық және халықаралық байқауларға қатысып, биіктен көрініп келеді.Театр ашылған жылы алғашқылардың бірі болып жас артист Айша Әбдірахманова қабылданды.&nbsp;Қазір ол ұжымның белді мүшесі.Кейіпкеріміз 1993 жылы 10 қарашада Шымкент қаласында дүниеге келген. №213 мектептің табалдырығын аттап, №8 П.Осипенко &nbsp;атындағы қазақ-орыс мектебін бітірген. Одан кейін М.Мәметова атындағы Қызылорда гуманитарлық жоғары колледжіне оқуға түсіп, актер өнері мамандығында білім алды. Сондай-ақ Қорқыт ата атындағы Қызылорда университетінде журналистика мамандығында оқыды. Университет қабырғасында білім алып жүріп, «Жастар театрында» өнер көрсетті. Бүгінде аталған театрда өзіндік орны бар талантты актрисаға айналды.<blockquote>– Менің театрға деген қызығушылығым мектеп бітіргеннен кейін оянды. Анам басқа қалада оқуыма қарсы болды. 2011 жылы педагогикалық колледжде Әлима Жақыпқызы мен Хұсейн Әмір-Темір ағайдың жетекшілігімен актер өнері мамандығы ашылды. Бағымды сынап, сол мамандыққа оқуға тапсырдым. Бағыма орай аталған мамандықтың студенті атандым. Осылайша театрға деген қызығушылығым өнер әлеміне алып келді. Одан қалды әдеби кітаптарды жиі оқыдым. Ізденісті де көбейттім. Нағыз маман болуға талпындым. Нәтижесінде өзім секілді жастармен бірге өнер сахнасында қызмет етіп жүрмін, – дейді Айша Қайратқызы.</blockquote>Айша – көпқырлы жан. Ол ізденуден жалықпайды. Әркез өнерін ұштап, шеберлігін шыңдауды әдетке айналдырған. Теориялық білімін тәжірибемен ұштастырып, сахнадан алуан қырлы адамдардың &nbsp;бейнесін жасаудың хас шебері. Оның өнеріндегі ерекшеліктің бірі – әрбір кейіпкердің жай-күйін айнытпай бере білетінінде. Актриса сахнада драмалық, комедиялық, трагедиялық кейіпкерлердің бейнесін айнытпай ойнайды. Әр кейіпкердің жан-дүниесіне үңіліп, сөздің ырғағы мен екпінін құбылта өзгертуі актриса шеберлігінің айғағы деуге болады. Артист үнінің тазалығы, әр сөздің мағынасын тура жеткізе білетін шеберлігі – әңгімеге арқау болатындай дүние.<blockquote>– Театр табалдырығын аттаған сәтім әлі есімде. Қатты қуандым, бірақ іштей бойымды қорқыныш биледі. Сахнаның киелі екенін сол кезде түсіндім. Алғашында түрлі шеберлік сағаттарына қатысып, шыңдалдық. Елімізге белгілі мәдениет майталмандары дәріс беріп, &nbsp;жас артистерді сахнаның қыр-сырын меңгеруге &nbsp;үйретті, – дейді ол.</blockquote>Айша театр сахнасында ең алғаш Қанат Жүнісовтің «Алғашқы махаббатындағы» мектеп директорының рөлін сомдады. Мұнан кейін де түрлі қойылымда басты кейіпкерді бейнеледі. Мәселен, «Қызылорданың қыздарында» – Мәрия, «Қыз қасқырда» – Құртқа, «Қалың елім, қазағым, қайран жұртым» қойылымында – бас шайтан, «Неге?» қойылымында – Әлима рөлдерін сомдады. Одан бөлек, театр саласы бойынша «Үздік әйел адам» номинациясын иеленіп, «ТТТ» халықаралық театрлар фестивалінің лауреаты атанды.<blockquote>– Біздің театр ұжымының сыйластығы ерекше. Қыздар мен жігіттердің барлығы өнерлі. Биге де, көркемсөз оқуға да талапты, қандай рөл берсе де жауапкершілікпен орындап шығуға барын салады. Бізге ізденіс керек, көп уақытымыз кітапханада өтетінін жасырмаймын. Шығарманы бастан-аяқ оқып, әр сөйлеміне мән беріп, өзімізше талдау жасаймыз. Бұл біздің қойылымды ойдағыдай алып шығуға үлкен септігін тигізеді, – деді Айша.</blockquote>Сахна төрінде жасындай жарқыраған өнер иесінің табиғи талантының ұшталып, &nbsp;қайталанбас бейнелер жасауында театр ұжымының ықпалы зор. Олардың бәрі талапты артистің өнерін бағалап, халыққа танылуына себепкер болды. Әркез өзін жаңа қырынан танытатын &nbsp;өрелі өнерпазға әріптестері үлкен ризашылық білдіреді.<blockquote>– Айша – ақылына көркі сай, ақжарқын жан. Ол мамандық таңдаудан мүлде қателеспеген. Нағыз сахнаның адамы. Театрға деген ықыласы ерекше. Әрбір қойылымға жауапкершілікпен қарайды. Қазір театр жанынан ашылған «Бастау» театр үйірмесіне жетекшілік етеді. Менің ойымша Айшадан тәлім алатын жандар өмірде өз орнын қалыптастыратын тұлға боларына сенемін, – дейді театр артисі Ілияс Өтетілеу.</blockquote>Адамның жан дүниесін тыныштандырып, керемет сезімге бөлейтін театр ұжымының жұмысы ерен. Жас артистерден құралған өнер ордасы бүгінде біршама табысқа жетті. Қанша спектакль көрерменге жол тартты. Оның бір парасын кейіпкеріміздің сомдаған қойылымдарынан байқауға болады. Аққұба жүзді, сұңғақ бойлы актриса ақылына көркі сай нәзік қалпымен көрерменінің ыстық ықыласына бөленіп, әлі де биік белестерді бағындырады деп сенеміз.

Өнерімен көпке танылған актриса

<a href="https://kyzylorda-news.kz/ru">Kyzylorda-news.kz.</a>&nbsp; Қазақ театрының тарихына бойласақ, өмірін өнермен өрнектеп, &nbsp; қайталанбас бейнелер қалдырған Сәбира Майқанова, Бикен Римова, Әмина Өмірзақова, Хадиша Бөкеева, Фарида Шәріпованың есімдері сақталған. Қазір де сол театр тарландарының ізін жалғастырып, &nbsp;қазақ сахнасының саңлағына айналған актрисалардың есімдерін аса құрметпен &nbsp;айтуымызға болады. Олардың қайсысын алсаңыз да, театр тарихынан таусылмас сыр шертеді. Солардың бірі – ҚР еңбек сіңірген қайраткері Залипа Төлепова. Бала күнінен сахнаны армандаған өнер иесі бүгінде талантымен төрге озған.Сұлутөбеде дүниеге келген Залипа Тұрғанбайқызы бойындағы өнерге деген ынтызарлық бала кезден басталғанын айтады.<blockquote>– 1968 жылы 1-сыныпта оқып жүргенімде ауылымызға «Қозы Көрпеш-Баян сұлу» спектаклімен артистер келді. Баянның тілерсегіне түскен бұрымына, сөйлеген сөзіне, жүріс-тұрысына қызығып, осындай актриса боламын деген ой қалыптасты. Сол ой арманға, арманым мақсатыма айналды. Осылайша өнер жолына қадам бастым, ̶ &nbsp;дейді.</blockquote>Алғашқыда өнер жолына келуіне ата-анасы қарсылық білдіргендіктен, медицина училищесіне құжат тапсыруға мәжбүр болған. Кейін Жамбылдағы өнер мектебіне оқуға түсіп, оны аяқтаған соң Н.Бекежанов атындағы қазақ музыкалық драма театрына жұмысқа орналасып, бүгінге дейін осы театрда қызмет етіп келеді.<blockquote>– Маған әсер еткен, көңілімді оятып, өнер жолына алып келген Ақбаянды 1990 жылы сомдадым. Оған дейін «Еңлік-Кебек» спектаклінде рөл ойнадым. Театрға келген күннен бастап бірыңғай басты рөлдерді сомдап жүрмін. Алғашқыда А.Чеховтың «Апалы-сіңлілі үш қыз» спектаклін қойып жатыр екен. Бас режиссері Хұсейін Әмір-Темір шығармадағы Наташа рөлін маған берді. Мінекей содан бері осы театрдың ыстығы мен суығына төзіп, айлап гастрольге шығып, жұмыс жасап келеміз, ̶ &nbsp;дейді ол.</blockquote>Н.Бекежанов атындағы қазақ академиялық музыкалық драма театры сахналаған әрбір қойылымда көрермендер Залипа Төлепованы қол соғып қарсы алады. Жуырда Сыр сахнасында И.Сапарбайдың «Сыған серенадасы» спектаклі қойылды. Аталған қойылымда сыған қызының рөлін сомдаған кейіпкеріміз көрермендердің ыстық ықыласына бөленді.<blockquote>– И.Сапарбайдың бұл шығармасы – театр сахнасындағы шоқтығы биік туындылардың бірі. Оның өресі кең, құпиясы ашылмаған. Әйгілі Шәмші рухына бағышталған бұл туынды оның тағдырын бейнелейді. Атақты композитордың әндері ешқашан өлмейді. Қайта жыл өткен сайын жаңғырып, айтқан сайын жаңара түседі. Оның әрбір әні тұла бойдың толқынын, сол кездің сағынышын жеткізеді. Оның жарыққа шығарған әрбір туындысы жеке бір тарих десем қателеспеймін, ̶ &nbsp;деп пікір білдірді.</blockquote>Жалпы, кез келген халықтың театр тарихында сахнаға шығысымен-ақ ешкімге ұқсамайтын даралығымен бірден ерекшеленетіндер өте аз. Ал, Залипа Төлепова – көп қырлы, терең сырлы артист. Ол ізденуден жалықпай, өнерін ұштап, шеберлігін шыңдауды әдетке айналдырған. Теориялық білімін тәжірибемен ұштастырып, сахнадан алуан қырлы адамдардың толыққанды &nbsp;бейнесін жасаудың хас шебері. Оның өнеріндегі басты ерекшелік – кейіпкердің психологиялық тебіреністегі жан-күйін айнытпай бере білетінінде. Актриса өзінің қиял көкжиегінің тереңдігімен драмалық, комедиялық, трагедиялық кейіпкерлердің кескін-келбетін бір-біріне ұқсастырмай даралай ойнайды. Олардың әрқайсысының ішкі сезім дүниесіне сыртқы әрекетті орайымен жымдастырып, сөздің ырғағы мен екпінін құбылта өзгертуі – актриса шеберлігінің айғағы. Артист үнінің тазалығы, дикциясының анықтығы, әр сөздің астарына мұқият үңіліп мағынасын тура жеткізе білетін шеберлігі – бөлек әңгімеге арқау болатындай дүние.Сахна мәдениетіне жетік, зерделі актриса бір спектакльде бірнеше жылдар бойы үздіксіз ойнаса да, жаңа бір серпін мен тың бояулар тауып, уақыттың талабына сай жаңғыртып көрермендердің эстетикалық талап-тілегіне лайық үн қата біледі. Қырық жылдан астам уақыттың ішінде көптеген үлкенді-кішілі рөлдерде ойнап, театр өнеріне өлшеусіз үлес қосты. Сахна төрінде жасындай жарқыраған өнер иесінің табиғи талантының ұшталып, &nbsp;қайталанбас бейнелер жасауына театр режиссерларының ықпалы зор. Олардың барлығы да актриса мүмкіндігін дұрыс танып, талантының халыққа жетуіне себепкер болды. Өнердегі ұлағатты өмірімен халқының қошеметіне бөленген Залипа Тұрғанбайқызы өзінің сүйікті театрының жаңа белестерден көрінуіне &nbsp;әлі күнге дейін аянбай еңбек етіп келеді. Сахнада сергек қимылдап, тез ойланатын өрелі өнерпазға әріптестері үлкен ризашылық білдіреді.<blockquote>– Залипа – мамандығын дұрыс тапқан жан. Көркіне ақылы сай, өз ісінің шебері әрі өте білікті ұстаз. Оның шәкірттері – үлкен сахнаға жол тапқан талантты жандар. Залипа кез келген сәтте басқаларға қол ұшын созуға дайын тұрады. Театрға деген ықыласы ерекше. Әрбір қойылымға жауапкершілікпен қарайды. Ал мұның барлығы үлкен тәжірибені талап етеді. Өмірдегі орны тіптен бөлек. Оның тәрбиесін алған жандар өмірден өз орындарын табатынына кәміл сенемін, ̶ &nbsp;дейді театр артисі Ұғым Баймаханов.</blockquote>Артистің сахнада бейнелеген сан алуан кейіпкерлерінің барлығы дерлік театр шығармашылығының белді-белді асуларының белгісіндей көзге түседі. Аққұба жүзді, сұңғақ бойлы актриса ақылына көркі сай нәзікжандылардың рөлін керемет сомдайды. Содан болар З.Төлепованың кейіпкерлері көрермендерді алға жетелеп, олардың кеудесінде оптимистік оттың шоғын маздатып жібереді. Залипа Тұрғанбайқызы – талантты артист ғана емес, аяулы жар, ардақты ана. Бүгінде жолдасымен бірге төрт ұл-қыз тәрбиелеп, жеті немере сүйіп отыр. Өнердегі өмір жолы бүгінгі жас ұрпаққа үлгі.&nbsp;

Залипа Төлепова: Өнерге деген қызығушылығым бала кезден басталды

<a href="https://kyzylorda-news.kz/">Kyzylorda-news.kz.</a> Күнделікті күйбең тіршіліктен бір сәт қол үзіп, рухани демалыс жасаудың пайдасын көзі ашық жұртшылық бүгінде жақсы түсінеді. Содан болар, театр, мәдениет үйіне ағылатындар да жетерлік. Бұл қала тұрғындарының рухани құндылықтарға басымдық беретінін аңғартса керек.&nbsp;Бүгінде аймақ халқының рухани демалыс орнына айналған Н.Бекежанов атындағы қазақ-музыкалық академиялық драма театры қызмет көрсетеді. 600 орындық руханият ордасында белгіленген кестеге сәйкес спектакльдер, эстрада жұлдыздарының концерті, шығармашылық кештер ұйымдастырылады. Бұдан бөлек қалада А.Тоқмағамбетов атындағы мәдениет үйі бар. Бұл мекемеде жоспар бойынша салтанатты жиындар, іс-шаралар өтеді. Десе де, халық саны өсіп, сана жаңғырған тұста аталған руханият ордаларына деген сұраныстың артуы заңдылық.&nbsp;Осы орайда облыс әкімі Нұрлыбек Нәлібаев Қызылордадан заманауи үлгідегі бірнеше әлеуметтік нысан салу туралы бастама көтерген болатын. Соның бірі – Бейбарыс сұлтан көшесі бойынан іргесі қаланған Өнер сарайы.&nbsp;Аталған руханият ошағының іргесі былтыр қаланды. Екі гектар аумаққа салынып жатқан ғимараттың жалпы ауданы 12,4 мың шаршы метрді құрайды. Ал, көпфункционалды кешеннің сыйымдылығы 1000 орындық. Онда мәдениет саласының симфониялық, эстрадалық және ұлттық өнер бағытындағы концерттік бағдарламалар мен түрлі форматтағы қоғамдық іс-шаралар өткізіледі деп жоспарлануда.&nbsp; Бүгінде аталған екі қабатты ғимараттың құрылысы қарқынды жүргізілуде. Нысанның жоба-сметалық құжаты демеушілер есебінен әзірленген. Ал, жоба құны 3 миллиард 370 млн теңгені құрайды. Өткен жылы басталған құрылысты жүргізуге 289 миллион теңге қаржы жұмсалыпты. Биыл 3 миллиард 80 миллион теңге игерілуі қажет. Руханият ошағын жоспар бойынша жыл аяғына дейін ел игілігіне беру көзделіп отыр.Аймақта алпыс жылдан астам тарихы бар «СМП-Қызылорда» ЖШС құрылыс компаниясы Өнер сарайының құрылыс жүргізуші мердігер мекеме. Сонау Кеңес заманынан бері құрылыс саласында еңбек етіп, өзіндік қолтаңбасын қалыптастырған бұл ұжым тек облыста емес, республика көлемінде әлеуметтік нысандардың іргесін қалап келеді. Екі өнеркәсіптік базасы жасақталған компанияға артылған жауапкершілік жүгіде ауыр. Сондықтан халық игілігіне қажетті ғимаратты талапқа сай сапалы әрі уақытылы орындауды мамандар жіті сезінеді.&nbsp;<blockquote>«1000 орындық Өнер сарайының құрылысы былтыр басталған. Ауқымы кең жоба болғандықтан нысанды салу өтпелі кезеңмен жүргізілуде. Бұйыртса, биыл желтоқсан айында пайдалануға беру жоспарланған. Қазір құрылыс басында 119 құрылысшы жұмыс істеуде. Әрқайсысының өзіне жүктелген міндеті бар. Күнделікті азанымен жұмыс қыза бастайды. Ел игілігіне қажетті ғимараттың сапалы салынуы әрі белгіленген мерзімде пайдалануға берілуін тиісті мамандар қадағалауда. Құрылысқа қажетті барлық техникалар, құрал-жабдықтар толық қамтылған», – дейді &nbsp;«СМП-Қызылорда» ЖШС бас инженері Жанаман Құлжанов.&nbsp;</blockquote>Бас инженердің айтуынша, құрылысқа қажетті құрал-жабдықтар мекеменің өндіріс ошағында шығарылады екен. Тек кейбір құралдар мен шикізат өнімдерін ғана сырттан әкеледі. Сол себепті, мұнда жетіспеушілік жағдайы жоқ. Құрылыс саласында алпыс екі жылдық тарихын қалыптастырған мекемеде мұндай ұсақ-түйек кемшілік болмауы тиіс. Сапаға жұмыс істейтін ұжымға абырой бәрінен маңызды.&nbsp; Мердігер мекеме директоры Темірхан Әлімқұлов алғаш еңбек жолын Шиелі ауданында жүргізуші болып бастаған. Одан кейін, Алматы темір жол транспорты инженерлер институтына «Инженер-құрылысшы» мамандығы бойынша оқуға түсті. Сөйтіп, Бәйгеқұм қыстағында ПМК-47 мекемесінде тас қалаушы болып жұмыс істеді. Қарапайым маман болып бастаған азамат еңбекқорлығының арқасында биіктен көріне білді. Атап айтсақ, Шалқар станциясындағы СМП-660 «Ақтөбетрансстрой» мекемесінде учаске мастері, 1983 жылы прораб, 1984 жылдан бас инженер қызметтерін атқарды. Содан бері құрылыс саласындағы қанша сатыдан өтті. Тәжірибесі толысқан майталман маман атанды.Қазіргі кезде «СМП-Қызылорда» ЖШС облыс көлемінде ғана емес, ел аумағындағы кез-келген күрделі ғимараттарды салу бойынша құрылыс монтаждау жұмыстарын бірінші санаттағы мемлекеттік лицензия негізінде жүзеге асырады. Бұл мекеме арнайы құрылыс техникасымен, түрлі мақсаттағы механизмдер және үлкен автомобильдер паркімен жабдықталған.<blockquote>«Мекемеде 245 адам еңбек етуде. Оның ішінде 171 әртүрлі мамандық иелері бар. Атап айтсақ, 42 экскаватор, бульдозер, кран машинистері мен жүргізушілер мен 32 инженерлік-техникалық қызметкерлер бар. Мұнда жұмысшылардың әлеуметтік жағдайын жақсарту, жалақы, еңбек демалысын уақытылы беру, арнайы киіммен қамтамасыз ету басты назарда. Бұл мекеменің тарихы тереңде жатыр. Толығырақ айтсақ, алғаш 1945 жылы Қызылорда қаласынан Ташкент темір жолы механикаландырылған колоннасының прорабтық учаскесі болып құрылды. Ал, 1958 жылы осы учаске базасында Теміржол байланысы министрлігіне қарасты Қазақ теміржолының СМП-355 құрылыс мекемесі жасақталады. Ол Түркістан станциясынан Сексеуіл станциясына дейінгі аралықтағы теміржол саласына байланысты барлық құрылыс-монтаж жұмыстарын жүргізумен айналысты. Айта кету керек, мекеме құрылғаннан бері қырық жыл ішінде вагон депосын қайта жарақтандыру кешенін, теміржол ауруханасын салды. Қалалық ішкі істер бөлімі орналасқан аудандағы, темір жол вокзалы маңындағы тұрғын үйді, монша, локомотив депосы, рельс дәнекерлеу зауыты, нан зауыты, балабақшалар және басқа да нысандар салып, пайдалануға берді. Осылайша, 1998 жылы темір жол құрылыс мекемесінің барлығы «Желдорстрой» акционерлік қоғамы құрамына еніп, осы құрамдағы біздің мекеме СМП-4 болып аталды. Сөйтіп, көптеген нысанға құрылыс монтаж жұмысын жүргізе бастады. Сол кезде қарашығанақ кешенінде темір жолды дамыту, Ақсай темір жолы, Ұзынағаш-Алматы темір жол учаскесін жарықтандыру, жанармай құю бекеті, шағын қазандық құрылысы салынды. Ал 2002 жылы «Желдорстрой» АҚ кәсіпорыны қайта құрымдауға түсіп, мекеме жаңадан өз алдына «СМП-Қызылорда» ЖШС болып аталды. Алғашқы кезде мекеменің ішкі жағдайының төмен екенін көрдім. Жұмысшылардың да жағдайы жасалмаған. Осы кезеңде құрылыс саласының ыстығына күйіп, суығына тоңып, шыңдалдым. Жылдар бойы жинақтаған тәжірибемді ел игілігі жолындағы жұмыстарға жұмсап келемін. Қиындықты көппен бірге көріп, жетістікке жұртпен бірге жетіп жүрміз. «Бір адам бейнеттеніп құдық қазса, мың адам мейірленіп шөл қандырады» деген даналық сөз бар. Біздің ісіміз көпшілікке саясын түсіріп жатса марқаямыз», – дейді «СМП-Қызылорда» ЖШС директоры Темірхан Әлімқұлов.</blockquote>Серіктестіктің өндірістік қуаты жоғары, ауқымы кең. Кәсіпорында лай-бетон дайындау торабы, ағаш құрылым цехы, арматура цехы, механикалық цех, пластикалық бұйымдар цехы, шағын темірбетон бұйымдарын дайындау цехы, қозғалқыштарды орау цехы, екі бетон зауыты және база аумағында ұзындығы 3,6 шақырым теміржол желісі бар. «СМП-Қызылорда» ЖШС құрылған уақыттан бері тұрғын үйлер, мектептер, балалардың жазғы тынығу лагерін, ауыл клубтарын, салды. Атап айтсақ, «Сейхун» спорттық-сауықтыру кешені, Қорқыт ата мемориалды кешені, әкімшілік ғимараттардың құрылысын жүргізді.Өнер орталығы заманауи құрал жабдықтармен қамтамасыз етілмек. Мың адамға арналған мәжіліс залы, арнайы үйірмелерге арналған бөлмелер жұмыс істейтін болады. Сонымен қатар, қаладағы көрікті нысандардың біріне айналмақ. Оқушылар мен жас жеткіншектердің бос уақыттарын тиімді пайдалануына арналған өнеге ордасы болмақ. Осынау дәуірлі өнер ордасы – Сыр төрінде салтанат құрмақ. Шаһардың жыл санап көркейіп, зәулім ғимараттар бой көтеріп жатқандығын байқау қиын емес. Әсіресе, биыл Бейбарыс сұлтан көшесі бойындағы құрылыс қарқынды жүруде. Бірқатар әлеуметтік нысан орналасқан көше бойы қайта жаңғыртылып, Өнер орталығы мен Неке сарайы бой көтермек. Ал облыс әкімдігінің алды – жазғы уақытта саялайтын демалыс алаңына айналмақ. Онда жарық шамдар, скверлер мен субұрқақтар орналастырылып, жанға жайлы жағдай жасалады. Одан бөлек көркейту-көгалдандыру жұмыстары жүргізіледі. Осылайша, «Сыр Ана» монументі, облыс әкімдігі, шығармашылық үйі, бірқатар білім ошақтары және ана мен бала орталығы, орталық мешіт орналасқан қатарға жаңа руханият ошағы &nbsp;қосылатын болады.

Қызылордада заманауи руханият ордасы ел игілігіне жарамақ 

<a href="https://kyzylorda-news.kz/">Kyzylorda-news.kz.</a> Бүгін «Белсенді ұзақ өмір» орталығы жанынан құрылған «Аталар» ансамблінің «Ардагерлерді ардақтайық!» атты 10 жылдық мерекелік кеші өтті.&nbsp;Мерекелік шараға облыстық ардагерлер кеңесінің төрағасы Серік Дүйсенбаев, қала әкімінің орынбасары Жанмұрат Сейілов арнайы қатысты. Айналасын думанға бөлеп жүрген, сегіз қырлы талант иелері – ардагерлер биыл ансамбльдің 10 жылдық белесін бағындыруда. Шараға келген қала әкімінің орынбасары Жанмұрат Сейілов ардагерлерді құттықтап, сый-құрмет көрсетіп, олардың иығына шапан жапты. &nbsp;<blockquote>«Бұл мерейлі сәт туған жеріміздің рухани дамуына және бай мәдени мұрамызды дәріптеуге зор үлес қосып жүрген шығармашылық адамдарына деген айрықша ілтипаттың белгісі. Елді ұлттық мәдениеттің қайнарына сусындатып, берекесі мен бірлігіне ұйытқы болып, жастарға лайықты үлгі көрсетіп келе жатқан Сіздерге деген құрметіміз ерекше. Алдағы уақытта да халықпен етене жұмыс жасап, ел мерейін көтерер әндеріңізбен қуанта береді деп сенемін. Киелі өнер жолында қасиетті Сыр өңірін елге танытып, биік тұғырдан көрсетіп жүрген баршаңызға зор денсаулық, шығармашылық табыс, отбасы-ордаларыңызға бақ-береке тілеймін», – деді қала әкімінің орынбасары Жанмұрат Жақсымұратұлы.</blockquote>Өнер ұжымы еліміздің бірқатар аумақтарында гастрольдік сапарда болып, көрермендерді өз өнерлерімен сусындатып келеді.Алғашқыда «Аталар» ансамблі 2013 жылы «Зейнеткерлер мен мүгедектерге әлеуметтік қызмет көрсету аумақтық орталығында қызмет алушы 7 ардагерден құралған. Қазіргі таңда ансамбль құрамында бес түрлі маман иелері өнер көрсетеді. Күләй Сағындыққызының бастамасымен негізі қаланған «Аталар» ансамблі бүгінде республикалық, облыстық, қалалық мәдени шараларға белсене атсалысып келеді және республикалық байқаулардың лауреаты атанған шығармашыл ұжым.

Қазақстан және Қызылорда облысының жаңалықтары: Мәдениет