<a href="https://kyzylorda-news.kz/">Kyzylorda-news.kz.</a> Бүгінде Қызылорда облыстық аумақтық кәсіподақтар бірлестігі 12 салалық кәсіподақта 1020 кәсіподақ ұйымы мен оған мүше ретінде 95 600 адам біріктірілген. Кәсіподақ ұйымының негізгі міндеті – еңбеккер мен жұмыс берушілер арасында туындайтын мәселелерді дер кезінде шешу болып табылады. Осыған сәйкес, биыл 52 ірі және орта кәсіпорындармен еңбек ұжымдарындағы әлеуметтік-еңбек жағдайын және өндірістік процестерді тұрақтандыру бойынша меморандум жасалды. Бүгін Қызылорда облысының Өңірлік коммуникациялар қызметінің ақпарат алаңында кәсіподақ бірлестігінде атқарылған жұмыстар баяндалды.<blockquote>«ҚР кәсіподақтар күні 10 қазан деп бекітілген болатын. Осыған орай, Мемлекет басшысы жұмыскерлердің құқықтары, кәсіподақтармен қамтамасыз етілуі және қауіпсіз еңбек ортасын құруды басты міндет екенін атап өтті. Осы бағыттағы жұмыстарды күшейту үшін биыл ҚР Кәсіподақтар Федерациясы «Қауіпсіз еңбек жылы» деп белгіледі. Облыс көлемінде еңбек саласындағы әлеуметтік әріптестік Қызылорда облысының әкімдігі, Қызылорда облыстық кәсіподақтар орталығы және Қызылорда облысындағы жұмыс берушілердің бірлестіктері арасындағы 2021-2023 жылдарға арналған облыстық келісім шеңберінде жүзеге асырылуда, алда 2024-2026 жылдарға арналған келісім жобасын қарастырамыз. Өзекті мәселелер әріптестермен облыстық үш жақты комиссияда қаралады», - деді Қызылорда облысы кәсіподақтар орталығы аумақтық кәсіподақтар бірлестігі төрағасы Мақсұт Нәлібаев.</blockquote>Жыл бойы кәсіподақ қатарын нығайту мақсатында Қазалы, Қармақшы, Сырдария аудандарында мәдениет және спорт мекемелерінде ұжымдармен кездесу өткізіледі. Нәтижесінде кәсіподақпен қамтылмаған ауылдық клубтар кәсіподаққа тартылуда.<blockquote>«Бүгінде облыстық кәсіподақ ұйымында 56 бастауыш ұйым, 4673 кәсіподақ мүшесі тіркелген. Олардың ішінде, мәдениет пен өнер саласы бойынша – 34 бастауыш ұйым бар. Және осы сала бойынша кәсіподақ мүшелігіне 90 пайыз қамтылған. Кәсіподақ қатарын нығайту мақсатында жаңадан ұйымдар құру жұмысы үнемі жүргізіледі. Биыл 1 бастауыш ұйым құрылды», - деді «Қазақстандық салалық мәдениет, спорт, туризм және ақпарат қызметкерлерінің кәсіптік одағы» Қызылорда облысы филиалы төрағасы Раушан Үмбетова.</blockquote><blockquote>«SENIM» денсаулық сақтау жүйесі жұмыскерлерінің салалық кәсіптік одағы» республикалық қоғамдық бірлестігінің Қызылорда облыстық филиалы 2018 жылдың 6 маусымында құрылды. Қазіргі таңда, құрамында 52 мекеме, 20 мыңнан аса мүшеден құралады. Қоғамдық бірлестік өз мүшелерінің экономикалық, әлеуметтік жағдайларын қорғау мақсатында жұмыс істеп келеді», - деді «SENIM» денсаулық сақтау жүйесі жұмыскерлерінің салалық кәсіптік одағы» Қызылорда облыстық филиалы төрағасы Асылхан Аблайханұлы.</blockquote>

Қызылордада 12 салалық кәсіподақта 1020 кәсіподақ ұйымы біріктірілген

<a href="https://kyzylorda-news.kz/">Kyzylorda-news.kz.</a> Облыс әкімі Нұрлыбек Нәлібаев аудандар мен облыстық маңызы бар қалалар әкімдерін сайлауды ұйымдастыру және өткізу мақсатында Қызылорда облысына келген Орталық сайлау комиссиясының мүшесі Асылбек Смағұловпен кездесті.Кездесуде пилоттық негізде өткізілетін аудан әкімдерін тікелей сайлауды ұйымдастыру мәселесі талқыланды.Аймақ басшысы Сыр жұртшылығы Мемлекет басшысының бастамаларын әрқашан қолдайтынын айтты. Асылбек Смағұлов сайлауды ашық әрі заң талаптарына сай өткізудің маңыздылығын атап өтіп, саяси науқан өңірде жоғары деңгейде ұйымдастырылатынына сенім білдірді.Орталық сайлау комиссиясының мүшесі сайлау өтетін екі аудандағы бірнеше сайлау учаскесін аралап, дайындық барысын көрді. Әрі қарай екі ауданда жергілікті әкімдік және құқық қорғау органдары өкілдерінің қатысуымен өткен семинар-кеңеске қатысты.Еске салсақ, 5 қараша күні Қызылорда облысының Сырдария және Шиелі аудандарында аудан әкімдерінің сайлауы өтеді.

Облыс әкімі орталық сайлау комиссиясының мүшесімен кездесті

<a href="https://pixabay.com/ru/photos/%D0%BE%D1%81%D0%B5%D0%BD%D1%8C-%D0%BB%D0%B8%D1%81%D1%82%D1%8C%D1%8F-%D0%BB%D0%B8%D1%81%D1%82%D0%B2%D0%B0-%D0%BE%D1%81%D0%B5%D0%BD%D0%BD%D0%B8%D0%B5-%D0%BB%D0%B8%D1%81%D1%82%D1%8C%D1%8F-6188152/">ФОТО</a><a href="https://kyzylorda-news.kz/">Kyzylorda-news.kz.</a> Қазақстанның басым бөлігі антициклон ықпалында болғандықтан бүгін ауа райы жауын-шашынсыз болады, деп хабарлайды «Қазгидромет» РМК.&nbsp;Синоптиктердің болжамы бойынша, тек республиканың батысында және таулы аймақтарында атмосфералық фронттардың әсерінен жаңбыр жауады. Сонымен қатар республика бойынша тұман түсіп, солтүстікте, оңтүстікте, батыста, оңтүстік-шығыста екпінді жел соғады,Түнде оңтүстікте, Ақмола орталығында, Қостанай, Солтүстік Қазақстан облыстарының оңтүстік-шығысында 1-2 градус үсік жүреді.Түркістанда, Қызылорда облысының оңтүстігінде өте жоғары өрт қаупі сақталады.

5 қазанға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Мәжіліс "Азаматтарға арналған үкімет "мемлекеттік корпорациясы" мәселелері бойынша депутаттық түзетулерді мақұлдады. Түзетулер мемлекеттік қызмет көрсету және мемлекеттік корпорация жұмысы саласындағы заңнаманы жетілдіруге бағытталған. &nbsp;Жоба үш негізгі блоктан тұрады.Мемлекеттік қызметтерді тікелей көрсететін және қолжетімділігі шектеулі дербес деректерге қол жеткізе алатын ХҚКО қызметкерлері мемлекеттік функцияларды орындауға уәкілеттік берілген адамдарға теңестіріледі. Бұл теріс қылықтар мен құқық бұзушылықтардың алдын алу, сондай-ақ азаматтардың құқықтарын қорғау үшін жасалады."Азаматтарға арналған үкімет" мемлекеттік корпорациясы " ұғымынан қызмет бағыттарына нұсқау алынып тасталады.Мемлекеттік корпорацияға "Е-өтініш" ақпараттық жүйесі шеңберінде жеке және заңды тұлғалардың өтініштерін қабылдауды ұйымдастыру құзыреті беріледі. Осының арқасында азаматтар әкімшілік органдарға жүгініп, жауап ала алады, сондай-ақ өтініштерді қарау сапасын бақылай алады.Заң жобасына өзгерістер мен толықтырулар 16 заңнамалық актіге, оның ішінде қылмыстық және жер кодекстеріне енгізіледі.<a href="https://stan.kz/halikka-kizmet-korsetu-ortaligi-endi-azamattardin-zheke-389201/">Stan.kz</a>&nbsp;

Халыққа қызмет көрсету орталығы енді азаматтардың жеке деректері тарап кеткені үшін жауапқа тартылады

<a href="https://kyzylorda-news.kz/">Kyzylorda-news.kz.</a>&nbsp;Ресми ақпарат бойынша аймақта 2 мыңнан астам волонтер тіркелген. Бұған қоса, 30-ға жуық волонтерлік топ бар. Жылдан-жылға еріктілердің қатары көбейіп келеді. Оларға мемлекет тарапынан қолдау да аз емес. Бүгін елімізде және жергілікті деңгейде волонтерлікті дамыту және қолдау шаралары жайында Өңірлік коммуникациялар қызметінің баспасөз алаңында айтылды.&nbsp;<blockquote>«Біздің «Ұлттық волонтерлік желі» заңды тұлғалар бірлестігі еріктілерді қолдау мақсатында біршама іс-шара өткізеді. Оның қатарында еріктілердің біліктілігін жетілдіруде кіреді. Сондай-ақ әр өңірдің волонтерлік жұмыстары жайында үздік кейстар жинаймыз. Сол арқылы волонтерлікті дамытудың жаңа жол картасын әзірлейміз. 2020 жылдан бастап осындай карта бойынша жұмыстар атқарылды. 3 жылды қорытындылап, жаңа картамен 2027 жылға дейін жұмыс істейтін боламыз. Жаңа картаны дайындаудың басты себебі – уақыт өткен сайын технологиямен қатар адамдардың ойлау қабілеті де дамып келеді. Сондықтан ескі картамен жұмыс істеу тиімсіз», - деді «Ұлттық волонтерлік желі» ЗТБ атқарушы директоры Татьяна Миронюк.</blockquote>Бүгінде облыстық волонтерлер фронт-офисімен қатар, барлық деңгейдегі «Жастар ресурстық орталықтары» жанынан аймақтық волонтерлер фронт-офистері құрылған. Сондай-ақ, өңірдегі 3 оқу орнының өз еріктілер ұйымы бар.<blockquote>«Барлық оқу орындары тарапынан еріктілерді қаржылық ынталандыру, арнайы іс-сапарға жіберу, демалыс орындарына жолдама беру бойынша қолдау тетіктері қолға алынған. 2023 жылдың басынан бері Қызылорда облыстық ҚХА жанындағы Волонтерлер қозғалысымен жүзеге асырылған қайырымдылық шараларды қоса алғанда барлығы 183 түрлі бағыттағы шара өткізіліп, 7 мыңға жуық тұрғын тартылды. 5 мың отбасыға әлеуметтік көмек көрсетілді. ҚР Мәдениет және ақпарат министрлігінің ұйымдастыруымен өтіп жатқан «Жыл волонтері» халықаралық сыйлығына өңірден үміткерлерді қатыстыру бойынша белсенді жұмыс жүргізілуде. Айта кету керек, жыл қорытындысымен үздік деп танылған 30 волонтерге «Жыл волонтері» облыстық сыйлығын табыстау жоспарланып отыр», - деді облыстық қоғамдық даму басқармасы басшысының орынбасары Артур Қамбаров.</blockquote>

Қызылордада 30-ға жуық волонтерлік топ бар

<a href="https://kyzylorda-news.kz/">Kyzylorda-news.kz.</a>&nbsp; Қазақ эстрадасының жарық жұлдызы Ақбота Керімбекова ұстаздарын әнмен құттықтады.<blockquote>«Жылдағы «Мұғалімдер күні» мерекесі қарсаңында Аманжол Шамкенов өлеңін жазған Әбілахат Еспаевтың «Ұстазым менің, Ұстазым» атты әнін орындап тұрған осы жастық шағымның бейнесі желіні шарлап кететінін байқаймын. Ақ бантик, ақ фартук таққан Ақботаның шәкірт бейнесі бәріне ұнайтын болса керек. Биыл осы әнді барша Ұстаздардың құрметіне, ардагерлердің құрметіне, музыка мектебіндегі алғашқы ұстазым Жамал Жүнісованың, сынып жетекшіміз болған Сұлтан Сүлеевтің, өнер академиясындағы ұстаздарым Рахилям Машурованың, ҚР Халық әртісі Кәукен Кенжетаевтың, өнердегі рухани ұстаздарым Роза Рымбаеваның, Мақпал Жүнісованың, Төлеген Мұхамеджановтың, Нұрлан Өнербаевтың, Шымкент университетінің проректоры Ақбөпе Керімбекова бауырымның, педагог сіңілілерім Ақзира Қасымованың, Жақсыгүл Тоғанованың құрметіне орындағым келеді. Ұстаз сыйлағаннан ұтылған ел көргенім жоқ. Мәртебелеріңіз өсе берсін, Мұғалімдер!”, — деп жазды ол әлеуметтік желідегі парақшасында.</blockquote>Айта кету керек, әнші арнайы құттықтағандар танымал педагогтар мен өнер қайраткерлері арасында жерлестеріміз Ақзира Қасымова мен Жақсыгүл Тоғанованың есімі ерекше аталған.

Қазақ эстрадасының жарық жұлдызы Ақбота Керімбекова ұстаздарын әнмен құттықтады 

<a href="https://kyzylorda-news.kz/">Kyzylorda-news.kz.</a> Қызылордада сот ер адамды кінәлі деп тауып оны 3 жыл 6 айға бас бостандығынан айырды.Келіп түскен ақпарат бойынша қызылордалық &nbsp;полицейлер облыс орталығы тұрғынының пәтерінен есірткі заттарын тапқан. Сараптама нәтижелері бойынша алынған заттар 3 кг 405 гр марихуана, 6,57 гр гашиш және 3,65 гр қара сора тұқымдары болып шықты.Аталған дерек бойынша сотқа дейінгі тергеп – тексеру әрекеттері жүргізіліп, қылмыстық іс айыптау актісімен сотқа жолданды.Сотталушы өз кінәсін мойындады. Сот үкімімен айыпталушы үш жарым жылға бас бостандығынан айырылды. Бұдан бөлек, оған сот сараптамаларының жүргізілгендігі үшін мемлекет кірісіне 159 262 теңге және Жәбірленушілерге өтемақы қорына 20 (жиырма) айлық есептік көрсеткіш мөлшеріндегі соманы төлеуге тура келеді.

Есірткі сақтағаны үшін қызылордалық азамат үш жарым жылға бас бостандығынан айырылды

<a href="https://kyzylorda-news.kz/">Kyzylorda-news.kz.</a>&nbsp; Елімізде әрбір алтыншы жұп сәби сүюді армандайды. ҚР Денсаулық сақтау министрлігінің мәліметі бойынша, қазір 15 мың ерлі-зайыпты бедеулік диагнозымен есепте тұр. «Аңсаған сәби» бағдарламасы іске қосылғалы бері 20 мың әйел жасанды ұрықтандыру қызметін алған. Бұл процедуралар МӘМС аясында қаржыландырылады. Әлеу¬меттік медициналық сақтандыру қорында ЭКҰ-ға кімдер қатыса алады және оған жолдаманы қалай алады, қайда өтуге болады деген сынды сұрақтарға жауап берді.&nbsp;&nbsp;Бағдарламаға кімдер қатыса алады? Бұл емшара терапиялық жолмен емдеу нәтиже бермейтін бедеулік диагнозы қойылған пациенттерге арналған. Оған қазақстандық отбасылық жұптар қатысады. Олар қосалқы репродуктивтік әдістер мен технологияларды жүргізу қағидалары мен шарттары белгілеген репродуктивті жас – 18-ден 42 жасқа дейінгі медициналық параметрлерге сәйкес келуі қажет. МӘМС бойынша ЭКҰ процедурасынан жылына бір рет тегін өтуге болады. Талпынысы сәтсіз аяқталған жағдайда қайтадан кезекке тұра алады.МӘМС аясында ЭКҰ жасайтын клиникалардың тізімін қайдан көруге болады? &nbsp; Қазір елімізде 19 клиника (1 мемлекеттік және 18 жекеменшік) міндетті әлеуметтік медициналық сақтандыру жүйесі шеңберінде жұмыс істейді. Жыл сайын квоталар аймақтарға сәйкес бөлінеді. Астана, Алматы және Шымкент қалалары бұл тізімде көш бастап тұр. Атап айтар болсақ, МӘМС шеңберінде жұмыс істетін Алматы қаласындағы 7 клиникада 2 мыңға тарта жасанды ұрықтандыру әдісі жасалды.&nbsp; Айта кету керек, пациент Қор сайтына кіріп, клиниканы өзі таңдай алады. Ол үшін fms.kz ресми сайтында &nbsp;«Пациент үшін», ары қарай «Клиниканы таңдау» батырмасын басып, «ЭКҰ қызметтерін көрсететін медициналық ұйымдардың тізбесін» ашу керек. Ол жерде клиникалардың тізімі, мекенжайы және телефоны көрсетілген.ЭКҰ-ға жолдаманы қалай алады? Бұл процедура МӘМС аясында тегін жасалады. Соған сай, квота алғысы келетін пациенттің мәртебесі сақтандырылған болуы тиіс.&nbsp; Алдымен сәби сүйгісі келетін жұп репродуктологтың кеңесіне бару керек. Оған жолдаманы &nbsp;өз емханасындағы гинеколог береді. Қажетті тексерілулерден соң, пациенттің ЭКҰ жасауға көрсеткіштері сай келсе, құжаттарды жинап, дәрігерлік-консультациялық комиссиядан өтеді. Комиссия оң шешім шығарған жағдайда, жұп кезекке тұрады.&nbsp; 2021 жылдан бері жыл сайын 7 мың ЭКО процедура &nbsp;МӘМС есебінен қаржыландырылады. Әлеуметтік медициналық сақтандыру қорында берген ақпаратқа сүйенсек, осы жылдың І жартыжылдығының қорытындысы бойынша, 5 млрд жуық қаржыға 4 мыңнан астам экстракорпоральды ұрықтандыру әдісі жасалды.&nbsp; ҚР ДСМ мәліметі бойынша, «Аңсаған сәби» бағдарламасы іске асырыла бастағаннан бері «өзін аңсатқан» 5000 нәресте дүниеге келді. &nbsp;Жасанды жолмен ұрықтандыруға бір адамға қанша қаражат жұмсалады? Бағдарлама аясында бір адамға МӘМС есебінен орта есеппен 1 млн теңге бөлінеді. Репродуктологтардың айтуынша, оның 600 мың теңгесі стимуляциялауға арналған гормондық препараттарға жұмсалады. 200-300 мың теңге шығын материалдарын жабуға кетеді. Кейде құны 1 млн теңгеден асып жығылатын мұндай процедураны кез келген отбасының қалтасы көтермейтіні рас. Оған қоса ЭКҰ әдісіне бірнеше мәрте жүгініп барып, сәбилі болғандар көп. Ал қазір бұған жұмсалатын шығынды Қор МӘМС есебінен төлейді. &nbsp; Қандай жағдайда квота берілмеуі мүмкін? Дәрігерлер әйелді медициналық тексеруден өткізгеннен кейін бірнеше мәселені ескереді. Олар жатырдың туа біткен немесе жүре біткен ауытқулары, соматикалық және психикалық бұзылулар, аналық без ісіктері, жедел қабыну және кез келген локализация онкологиясы сынды жағдайларда пациентке экстракорпоральды ұрықтандыру жүргізілмейді.Егер сіздің қосымша сұрақтарыңыз болса, өз емханаңыздағы «Пациенттерді қолдау қызметіне» жүгіне аласыз. Ал ол жерде мардымды жауап ала алмасаңыз, Қордың өзіңізге ыңғайлы арналары бойынша өтініш-шағымдарыңызды қалдыра аласыз: fms.kz ресми сайты, Qoldau 24/7 мобильді қосымшасы, Telegram-дағы @SaqtandyrýBot, 1414 Бірыңғай байланыс орталығы. Азаматтар мәртебесін келесі қосымшалар арқылы тексере алады:• Qoldau 24/7 &nbsp; мобильді қосымшасы&nbsp; • fms.kz &nbsp;ресми сайты • Telegram-дағы @SaqtandyrýBot &nbsp; • 1414 байланыс орталығы&nbsp; • Damumed мобильді қосымшасы. • Екінші деңгейдегі банктердің мобильді қосымшалары – Kaspi.kz, Halyk, Bcc.kz.Сондай-ақ, Электронды үкіметтің egov.kz сайтындағы «Денсаулық сақтау» бөлімінде «Міндетті әлеуметтік медициналық сақтандыру жүйесіне медициналық көрсетілетін қызметті тұтынушы ретінде қатысу туралы және аударымдардың және (немесе) жарналардың аударылған сомалары туралы ақпарат ұсыну» мемлекеттік қызметі арқылы медициналық сақтандыру жүйесіндегі өз мәртебеңізді тексеруге және жүргізілген төлемдер туралы ақпарат алуға болады. &nbsp; &nbsp;

МӘМС: «Аңсаған сәби» бағдарламасы аясында 5000 бала дүниеге келді

<a href="https://kyzylorda-news.kz/">Kyzylorda-news.kz.</a> ҚР Президенті Қасым-Жомарт Тоқаев атап өткендей, ең бастысы азаматтардың әл-ауқаты мен олардың әлеуметтік әл-ауқаты &nbsp;әрқашан мемлекеттің назарында болуы тиіс.Осы орайда «AMANAT» партиясының қоғамдық қабылдау орындары халықпен тығыз байланыста жұмыс жасайтындықтан, азаматтардың жұмысқа орналасуға қатысты проблемалық мәселелерінің шешілуіне мүмкіндіктер жасау және жұмыссыздық жағдайларына оңтайлы әсер ету мақсатында «Табысқа апарар жол. Жұмыспен қамтуға жәрдемдесу» партиялық жобасы &nbsp;басталады.&nbsp;Жобаның мақсаты азаматтарға жұмысқа орналасуда көмек көрсету және кеңес беру.Осыған орай бүгін «AMANAT» партиясының облыстық филиалы мен Еңбек Мобильділігі Орталығы коммуналдық мемлекеттік мекемесі меморандумға қол қойды.Аталған жоба облыстағы «Атамекен» ұлттық кәсіпкерлік палатасымен және басқа да ұйымдардың көмегімен жүзеге асырылады. Жаңа жобадан партияның имиджін және оған деген халықтың сенімін нығайту, партиялық тұғырнама аясында азаматтардың мәселелерін шешу, елдегі жұмыссыздық деңгейін төмендету, жұмыссыз халықты қайта даярлау секілді оң нәтижелер күтілуде.Меморандумға отыру арқылы бірлескен іс-қимыл жасайтын құрылымдар жұмысында табыс, зор жетістіктер болады деп сенеміз.<figure class="image"><img src="https://knadmin.beoblood.kz/uploads/26f83a8e_33d0_4b8c_825d_11898aeff5bb_dab7b8ce0e.jpg" alt="26f83a8e-33d0-4b8c-825d-11898aeff5bb.jpg"></figure>

«Табысқа апарар жол. Жұмыспен қамтуға жәрдемдесу» жобасы жүзеге асырылады

<a href="https://kyzylorda-news.kz/">Kyzylorda-news.kz.</a> Қазақстан аумағының басым бөлігіне антициклон жотасы әсер етіп, жауын-шашынсыз күн райы қалыптасады, деп хабарлайды Қазгидромет.Елдің батысында, солтүстік-батысы мен шығысында атмосфералық фронттардың өтуімен жаңбыр жауады, шығысында жаңбыр мен қар түрінде жауын-шашын күтіледі. Республика бойынша тұман болжанады. Сондай-ақ елдің солтүстігінде, оңтүстігі мен батысында екпінді жел тұрады.Атап айтқанда, түнде Ақмола облысының оңтүстігінде, шығысы мен орталығында, Солтүстік Қазақстан облысының оңтүстік-шығысында – 1-3 градус, Қостанай облысының оңтүстік-шығысында 1 градус үсік жүреді.Түркістан, Қызылорда облысының орталығында, шығысы мен оңтүстігінде өрт тұтану қаупі сақталып отыр.Жамбыл облысында, Атырау облысының оңтүстігі мен шығысында, сондай-ақ өрт қаупі жоғары.

4 қазанға арналған ауа райы болжамы

<a href="https://kyzylorda-news.kz/">Kyzylorda-news.kz.</a> Бүгінде өңірде күзгі егін жинау науқаны қызу жүруде. Ал осы жылы ерте егілген ауыл шаруашылығы дақылдарын жинау жұмыстары толық аяқталды. Нақтырақ айтқанда, күздік бидайдан – 7.0 мың тонна, жаздық бидайдан – 3,2 мың тонна, арпадан – 209 тонна өнім жиналды. Ал егілген күріштің 63,1 мың гектары орылып, 285,3 мың тонна Сыр салысы қамбаға құйылды. Бұл жөнінде Қызылорда облысының Өңірлік коммуникациялар қызметінің ақпарат алаңында облыстық ауыл шаруашылығы және жер қатынастары басқармасы басшысының орынбасары Қайратбек Сәрсенбаев хабарлады.<blockquote>«Биыл облыста барлығы 193,4 мың гектарға ауыл шаруашылығы дақылдары егіліп, былтырғы жылмен салыстырғанда 4,8 мың гектарға ұлғайды. Ал негізгі дақыл күріштің көлемі – 89,0 мың гектарды құрап отыр. Сондай-ақ, өңірімізде егіс көлемдерін әртараптандыру бағытындағы жұмыстар да белсенді жүргізілді. Нәтижесінде, егілген картоптың 3,8 мың гектарынан 200,4 центнер өнім жиналса, көкөністің 6,4 мың гектарынан &nbsp;223,4 центнер, бақша өнімдерінен 257,8 центнер алынды. Ал күріш егісінің суын байлау жұмыстары бүгінде толықтай аяқталды. Жалпы егілген күріштің 63,1 мың гектары орылып, оның 53,4 мың гектары бастырылған болатын. Нәтижесінде 285,3 мың тонна күріш өнімі жиналды. Бұдан бөлек, майлы дақылдар бойынша егілген &nbsp;мақсарыдан 4,5 мың тонна, ал соядан 112 тонна, күнбағыстан 195,5 тонна өнім алынды. &nbsp;Қазіргі таңда &nbsp;мал азықтық дақылдарын жинау жұмыстары да жалғасуда. Дегенмен, облыс бойынша барлығы 278,2 мың тонна жоңышқа шөбі жиналды», - деді Қайратбек Әубәкірұлы.</blockquote>Айта кетейік, егін жинау жұмыстары 10 қазанға дейін жалғаспақ.&nbsp;

Қызылордада егін жинау науқаны жалғасып жатыр

<a href="https://kyzylorda-news.kz/">Kyzylorda-news.kz.</a> Қызылорда қаласындағы Зияткерлік мектептің &nbsp;оқушылары қаладағы көпбалалы отбасыларының бүлдіршіндеріне ойыншықтар сыйлады.«Қолдан-қолға, жүректен-жүрекке» акциясын өткізуге мұрындық болған – «Ақмешіт» шаңырағының білім алушылары. Жас зияткерлер бір апта бойы жинаған 2 қорап сүйікті ойыншықтарын қала аралап, кішкентай балаларға үйлестірді.<blockquote>«Мейірімділік – адамның ең үлкен сұлулығы. Мырза болмасаң да мейірімді бол, айналаңа мейіріміңді төгіп жүр» деп ғұламалар бекер айтпаған. Біздің мақсатымыз – айналамызға жақсы істеріміз арқылы қуаныш сыйлау. Алдағы уақытта да аталмыш акциямызды жалғастыруға бел будық», – дейді шаңырақ көшбасшысы Арайжан Нартай.</blockquote>

Қазақстан және Қызылорда облысының жаңалықтары: Қоғам