<a href="https://kyzylorda-news.kz/">Kyzylorda-news.kz</a> Медицина саласы&nbsp;деп&nbsp;айтқанымызбен, ол бірнеше&nbsp;саладан&nbsp;тұрады.&nbsp;Мысалға дәрігерлер – науқастың&nbsp;қандай&nbsp;аурумен&nbsp;ауыратынын&nbsp;анықтап, диагнозын қояды, медбикелер – дәрігерлердің берген нұсқаулығымен ем-дом шарасымен&nbsp;айналысады. Ал енді тағы бірі – &nbsp;ауруханада шаруашылық бикелері&nbsp;науқастарға&nbsp;қызмет&nbsp;көрсетеді.&nbsp;Бүгінгі біздің кейіпкеріміз осы саланың білікті маманы Күлпаршын Оспанова Қармақшы аудандық аурухананың терапия бөлімінің шаруашылық бикесі болып еңбек етеді.&nbsp; Ол Қармақшы ауылының тумасы. 1966 жылы дүниеге келген. №113 орта мектебінен білім алған. Мектеп қабырғасында жүргенде өте белсенді болады. Білім ұясын бітіріп, арман қуып Қызылорда техникумына оқуға түсіп,одан бухгалтер мамандығын алып шығады.&nbsp;Өзі ақ халатты мейірбике болуды армандаған бойжеткен медициналық училищеде оқымасада, 1988 жылы аудандық аурухананың терапия бөліміне шаруашылық бикесі болып жұмысқа орналасады. Ол кезде аудандық аурухананың бас дәрігері Асқар Омаров, ал терапия бөлімінің меңгеруші дәрігері Садродин Нәбиев болатын.&nbsp;Сырт көзге қарағанда шаруашылық бикесінің жұмысы елеусіздеу көрінетіні рас. Бірақ оның атқаратын жұмысы аз емес. Бөлімге келген төсек-жабдықтары, ас-ауқаттар, іштің тазалығына керекті жабдықтар, &nbsp;бәрі-бәріне шаруашылық бикесі жауапты. Бастысы – өз ісіне адал және махаббатпен жұмыс жасайды.&nbsp; Өзі 36 жылдан бері еңбек етіп келе жатқан білікті маманның қазіргі таңда атқарып жүрген шаруасы, елге көрсететін қызметі жайлы өз аузынан сұрап білген едік.<blockquote>&nbsp; – Әр жұмыстың өз қызығы мен қиыншылығы қатар жүретіні рас. Емделуге келген науқастың көңілінен шыға білу керек. Ауырып ем іздеп келіп тұрған науқасқа жылы шырай танытып, қал-жағдайын сұрап, жылы сөйлейміз. Менің негізгі міндетім – келген әрбір емделушіге төсек-орнын салып, 3 мезгіл мемлекеттен берілетін тегін ас-ауқатпен қамтамасыз ету. Кей уақыттарда болады күндізгі ауысымнан шығып, кешке отбасыммен отырған уақытта науқас түсіп жұмысқа шақыратын кездер. Ондай кезде үйдің барлық шаруасын тастай сала жұмысқа келемін,– дейді ол.</blockquote>&nbsp; &nbsp;Қай жұмыста да аға буынның өзінен кейінгі жастарға өз білгенін, жұмыстың қыр-сырын үйреткен жақсы ғой.<blockquote>&nbsp; – Біздің де Күлпаршын апайымыз ұжымдағы жастарға осы кезге дейінгі қызметінен жинаған тәжірибесін іспен көрсетуден де, ауызбен насихаттаудан да шаршаған емес. Бүгінде ұжымның аға буынының алды. Жастардыңоған қарап бой түзейтін, жақсы көріп, сыйлайтын, құрметтейтін әпкесі, кейбіреулеріне екінші анасы сияқты. Ақылын беріп, басу айтып отыратын сондай қарапайым кісі. «Жақсы адамдар өзіне байлық жинамайды» деген әдемі нақыл сөз біздің Күлпаршын апайымызға арналғандай. Ол әркез ертеңгі өмірі үшін аянбай еңбек етіп, өз уақытын аямай, өзгенің дененің саулығын аялап, жылы шыраймен қарсы алып, құрақ ұшып ауырған жанның жанынан табылатын ізгі мамандық иесі. Науқас алып жатқан емінің шипалы,ол орналасқан бөлме оған жайлы, таза әрі ыңғайлы болуы керек.Апайдың еңбек жолы, шынайы болмысы, сіңірген еңбегі көпке үлгі. Көпшіліктен алған алғыс пен ризашылық, ілтипаты еңбекпен келген жемістің абыройы. Кент тұрғындарының ыстық ықыласына бөленіп, өз ұжымының ортасында сыйлы бөлімше ішінің береке-бірлігін жарастырып, кез-келген істі ұйымдастыра білген өз ісінің шебері, – дейді терапия бөлімінің меңгеруші дәрігері Айгерім Шүлтікова.</blockquote>&nbsp; Күлпаршын ұжымында сыйлы әріптес болса, жанұясында ардақты жар, аяулы ана. Жұбайы Әділ ағамызбен бірге отбасында 3 ер бала тәрбиелеп өсіріп, ұлдарын ұяға қондырып, бүгінде шаңырақта көз қуанышы болған 6 немеренің асыл әжесі.&nbsp;

Күлпаршын Оспанова: Жақсы адамдар өзіне байлық жинамайды

<a href="https://kyzylorda-news.kz/">Kyzylorda-news.kz</a> Қашан көрсеңіз де, жүзінен мейірімі төгіліп тұрады. Ашық-жарқын әңгімесін айтып, туыстық қатынасымыз болмаса да туған қызындай іш тартып тұрғаны. Өнегелі, өрелі әңгімесін жалықпай тыңдай бергіңіз келеді. Сөйлегенде де жай сөйлей салмайды, бар ықыласымен шешіліп, жандүниесімен беріле айтады әңгімесін. Шынайылық, адалдық ананың ақ дидарынан анық байқалатын қасиет. Бұл кім десеңіз, ол – Жосалы кентінің тұрғыны, «Күміс алқа» иегері, көпбалалы ана Әлияш Арыстанбаева.Апамыз 1942 жылы дүниеге келген. Мектеп бітірген соң педагогикалық училищеге оқуға түсіп, мұғалімдік мамандық алады. Бірақ анамызға ол мамандықпен жұмыс істеу бұйырмапты. Өмір арнасы басқа салаға бұрып, саналы ғұмырында хатшы-іс жүргізуші болып абыройлы қызмет еткен. Алғашында аудандық сотта сегіз жыл іс жүргізуші болып еңбек етсе, одан соңғы жұмыс орны аудандық комсомол комитетінде жалғасқан.<blockquote>– Ағаңмен 1963 жылы көңіл жарастырып, шаңырақ көтердік. Ол кезеңде жігіттердің әскери борышын өтеу уақыты үш жыл болып белгіленген-ді. Бас қосқанымызда ағаң медициналық оқу орнының студенті болатын. Тұңғышымды босанып перзентханадан шығып жатқанымда оны әскер қатарына шақыртып, сөйтіп елден жыраққа кете бар-ды. Бас-аяғы төрт жылдай борышын өтеп, Вьетнамда болды. Онда ата-енем бар, дүниеге келген сәбиім төрт жасқа келгенше бағып-қағып, жұмысымды істеп жүре бердім. Сотта қызмет ететін кезім. Жұмыс барысымен ауыл-ауылға іссапармен жиі шығып тұруға тура келетін. Бала жас, ата-ене бар дегендей, бұл жағдай отбасына қолайсыз болғасын ол жерден шығып, аудандық комсомол комитетіне ауыстым.&nbsp;Сөйтіп жүргенде жолдасым әскерден оралып, қуанышымызда шек болмады. Жаңадан бас қосқан ерлі-зайыптылармыз. Төрт жыл күту де аз уақыт емес қой. Ағаңның мамандығы дәрігерлік болған соң қызмет бабымен Қуаңдарияға көштік. Онда отыз үш жыл тұрақтап тұрдық. Ол жаққа барғанда да мені ауылдық кеңестің кеңсесіне іс жүргізушісі етіп жұмысқа қабылдады. Содан зейнеткерлік демалысына шыққанға дейін тапжылмай қызмет еттім, – дейді алтын құрсақты ана бізге ағынан жарылып.</blockquote>«Ата-енем жақсы кісілер болды. Атам – Бисен Сақтағановты ауыл халқы қатты құрметтейтін. Енем – Бибігүл Асанова үй шаруасындағы әйел болды. Бәріміз бір шаңырақтың астында тату-тәтті өмір сүрдік. Олардың бар жағдайын жасап, қолдан келген қамқорымызды аямадық. Өмірден өткенше ата-анамызға адал қызметімізді жасап, бағып-қақтық. Атамыз кезінде мұғалім, балалар үйінің директоры болып түрлі қызмет атқарған білімді де беделді кісі болған» дейді Әлияш анамыз толғаныспен сөйлеп.Әлияш Смайылқызы ауданымызға белгілі ақсақал, «Вьетнам Республикасының құрметті азаматы», «Қармақшы ауданының құрметті азаматы», медицина саласының ардагері Иса Бисеновтің зайыбы. Екеуінің ұлағатты ұрпақ өсіріп, отау құрғанына әні-міне дегенше алпыс жыл толып отыр.Өмір – күрес. Әрбір басқан қадамыңды рухани тазалыққа, адалдыққа арнамасаң, тайып кетуің бір демде-ақ. Күрес бұл алысу немесе арпалысу емес, мақсатыңа ұмтылу, өсіріп отырған бала-шағаңа дұрыс тәрбие бере білу. Ағайын, көршімен тату болу. Жарыңды сыйлап, келген қонағыңды Құдайдай күтіп алып, кең пейіліңмен дастарқаныңды жаю. Обал, сауап, ұят деген сөздерді үнемі жадыңнан шығармау деп білетін ардақты анамыздың өмірден көрген-түйгені жетерлік. Әсіресе сүйген жарға деген адалдық бәрінен жоғары тұрды.«Қуаңдарияда елу жасқа толғанымда менің елу жылдық мерейтойымды дүркіретіп туған-туыс, ұжымдастармен атап өткенбіз. Одан бері де аттай тулап отыз жылда өте шығыпты-ау, жарықтық! Сонда маған мекемеден құттықтау адресаты табысталып, онда ауылдың атпал азаматы Сламбек Жақсылықов өлең жолдарын арнап жазыпты. Сонда «Жеті жыл күйеуін күтумен өткізген...» деп келетін жолдары бар. Соны тыңдап, «Мен де біраз бейнет көрген екенмін ғой» деп, өзімнің өткен күндерімді есіме алып, көз-жасқа ерік бергенмін. Расымен де Исекең төрт жыл әскерде болса, үш жыл қалада оқуда (студент) болыпты. Балаларымызды тәртіпті де тәрбиелі етіп ер жеткіздік. Қатарынан қалдырғанымыз жоқ. Әрбір адамның өмірінде өзіне тән қиыншылық, бейнеті болады. Ол біздің де басымызда болды. Бірақ соның бәрін мәпелеп өсірген ұл-қызың жақсы болып, ата-ана атына кір келтірмей, өмірден өз орындарын тауып жатса, сол көрген бейнеттің мысқалдай да жұрнағы қалмайды екен. Қиналған сәтімде мені жарының, ата-енесінің абыройын биік қоятын, пендешіліктен жоғары тұра білетін ішкі түйсігім үнемі алға жетелеп, күш-қуат беріп отырды» дейді ардақты анамыз.Бүгінде Бисеновтер өсіп-өнген әулет. Ағамыз бен апамыздың өңірінен өрбіген 27 немере мен 6 шөбере тамырын тереңге тартып, жасыл құрақтай жапырағын жайқалтуда. Балаларының үлкені Сағындық Тараз қаласында "Сақтаған намыс" жауапкершілігі шектеулі серіктестігінің директоры болса, Гүлнар Қызылорда қалалық No2 емханасында мейірбике болып қызмет етеді. Амандық Байқоңыр қаласында әскери қызметкер. Аманжол мен Гүлдана бірі Таразда, бірі Қызылордада жеке кәсіппен айналысуда. Дәуірбек болса аудандық обаға қарсы күрес мекемесінде жүргізуші болып жұмыс істейді. Ал Гүлсара Қызылорда облыстық диагностикалық орталығында мейірбике болып ақ халатты абзал жандардың қатарында еңбек етуде.<blockquote>– Иса ағаң қыз дегенге тәйт дегенді білмейді. Жалпы қыз баласына құрметпен қарайтын азамат. Өтірік айтқанды жаны сүймейді. Отбасына қамқор. Жас күнімізде көбінесе жұмысбасты болды. Фермаға кетеді, малшыларды аралайды, сөйтіп жұмыстан қолыда тие бермейтін. Балаларға үйде өзім бас-көз болатынмын. Жамбылда сіңілім тұрады. Балалар мектеп бітірсе, сол жаққа қарай жіберемін. Ұл-қыздарымыз технологиялық институтты, медициналық училищені бітіріп, бір-бір мамандық иелері атанды. Бүгінде балалардың барлығы отбасылы. Үбірлі-шүбірлі. Келіндерім де Алладан сұрағандай. Алдыңғы үшеуі Жамбыл жақтың қыздары. Қолымдағы кенже баламызға көршіміздің қызын құда түсіп алып бердік. Олар да өсіп-өнген үлкен әулеттің баласы. Құда-құдағайларымыз жақсы адамдар. Сыйластығымыз да өте керемет. Шүкір. Сексенге келіп жатырмын. Осы уақытқа дейін ағаң екеуміз ұлды – ұяға, қызды – қияға қондырдық. Ендігі арманымыз – ұрпағымыз аман болса дейміз. Немере-шөберелер сүйіп отырған бақытты ата мен әжеміз. Осы жасқа дейін өмірден түйгенім – лайым да бәрі жақсы болсын. Ұрпағымыздың абыройлы, өмір жастарының ұзақ болғанын тілеймін. Барлық қиыншылыққа төзе білсең, жақсылыққа жетеді екенсің. Тек адамның баласы әр нәрсені ақылмен шешіп, төзе, шыдай білсе – Алланың сынағынан аман өтіп, игілікке жетеді. Ақырын күте білсең ғана, адам өмірінің қызығын, зейнетін көреді. Бағып-қаққан перзентің жақсы болса, жақсы атын шығарып, ата-анасына қамқорлық етсе – өмірдің қызығы сол деп ойлаймын, – дейді ардақты ана. &nbsp;</blockquote>

Өнегелі ғұмыр иесі

<a href="https://kyzylorda-news.kz/">Kyzylorda-news.kz</a>&nbsp; Бүгін облыс әкімі Нұрлыбек Нәлібаевтың төрағалығымен өткен мәжілісте Қызылорда облысының кәсіпкерлік және өнеркәсіп басқармасының жаңа басшысы таныстырылды.Облыс әкімі аппаратының бірыңғай конкурстық комиссиясының шешімі және облыс әкімінің өкімімен Қызылорда облысының кәсіпкерлік және өнеркәсіп басқармасының басшысы лауазымына Шәріпбеков Бекболат Жүнісәліұлы тағайындалды.Аймақ басшысы Бекболат Жүнісәліұлына сәттілік тіледі.<blockquote>«Бекболат Жүнісәліұлы аймақтың әлеуметтік-саяси ахуалымен етене таныс, мемлекеттік қызметтің барлық сатысынан өтіп, мол тәжірибе жинаған әлеуеті жоғары кадр. Осы ретте, жауапкершілік жүгі ауыр салада Мемлекет басшысы жүктеген және Үкіметпен бекітілген көрсеткіштерге қол жеткізуде ауқымды міндеттер бар. Өңір экономикасын көтеру мен негізгі көрсеткіштерге қол жеткізуде кәсіпкерлік және өнеркәсіп саласы аса маңызды рөл атқарады. Өткен жылы өңірімізге жұмыс сапарымен келген Мемлекет басшысы отандық өнім өндірушілерге қолдау көрсету арқылы өңірдің экспорттық әлеуетін одан әрі жетілдіру және жаңадан инвестиция тарту қажеттігін атап өткен болатын. Бұл ретте өңір экономикасын әртараптандыру арқылы кәсіпкерлік субьектілерінің экономикадағы үлесін арттыру, халықты жұмыспен қамту мақсатында мемлекеттік қолдау шараларын тиімді пайдалану, өңірге инвестиция тарту басты міндетіміз. Өңірге инвестиция тарту - экономикалық дамудың жоғарғы және тұрақты қарқынын қалыптастырып, жаңа жұмыс орындарын қалыптастыру арқылы, салық базасын кеңейтуге мүмкіндік береді. Ынталы инвесторларға қолайлы жағдайлар жасаудың нақты шараларын қарастыра отырып, отандық өнім өндіру аясын кеңейту, түрлі қызмет көрсету бағытындағы жұмыстарды жаңа деңгейге шығаруымыз қажет. Осы ретте Бекболат Жүнісәліұлына алған білімі мен түрлі салаларда жинаған мол тәжірбиесін күрделі де жауапты қызметті мінсіз атқарып, өңірдегі кәсіпкерлік саласын дамыту және өнеркәсіпті өркендетуге жаңа серпін береді деп сенім білдіреміз», - деді Нұрлыбек Машбекұлы.</blockquote>Бекболат Жүнісәліұлы 1973 жылы Қызылорда облысында дүниеге келген. Қызылорда агроөнеркәсіп өндірісі инженерлері институтын «агроөнеркәсіп салаларын басқару және оның экономикасы» мамандығы бойынша бітірген.Еңбек жолын 1990 жылы «Келінтөбе» күріш совхозының жұмысшысы болып бастаған. 1990-1999 жылдары «Келінтөбе» күріш совхозының механизаторы, «Құмиян» АҚ Ақниет бөлімшесінің есепшісі болған. 1999-2010 жылдары Келінтөбе ауылдық округі әкімі аппаратында, Жаңақорған ауданы және Түркістан қаласы бойынша салық комитеттерінде түрлі деңгейдегі лауазымдарда қызмет атқарған. 2010-2018 жылдары Қызылорда облысы бойынша қаржылық бақылау инспекциясының бас маманы-мемлекеттік аудиторы, бөлім басшысы-мемлекеттік аудиторы болған. 2018-2020 жылдары Қызылорда қаласының Қарауылтөбе ауылдық округінің әкімі ретінде тұрғындардың өзекті мәселелерін шешу жолында аянбай еңбек етті. 2020-2022 жылдары Қызылорда облысы бойынша ішкі мемлекеттік аудит департаментінің бөлім басшысы қызметінде нәтижелі қызмет көрсетті.2022 жылдың шілде айынан бастап осы кезге дейін Жаңақорған ауданы әкімінің орынбасары қызметін атқарып келді.

Кәсіпкерлік және өнеркәсіп басқармасының жаңа басшысы тағайындалды 

<a href="https://kyzylorda-news.kz/">Kyzylorda-news.kz</a>&nbsp; Қызылорда облысы кәсіпкерлер палатасының алаңында кезекті өңірлік кеңес отырысы өтті.Жиынға Өңірлік кеңес төрағасы Ерлан Раимов, кеңес мүшелері (сонымен қатар бейне конференц байланыс арқылы), Палата директорының міндетін атқарушы Салават Құлмахан, палата қызметкерлері және Қызылорда облысының жұмыспен қамтуды үйлестіру және әлеуметтік бағдарламалар басқармасының Еңбек мобильділігі орталығы директорының орынбасары Ақерке Ахметова қатысты.Күн тәртібіндегі тақырып көптеген кәсіпкердің көкейінде жүрген облыс тұрғындарын жұмыспен қамту және әлеуметтік қолдау шаралары туралы болды. Тақырыптың өзектілігі жиынның алғашқы минуттарынан ақ байқалды. Өңірлік кеңесте жүздеген, тіпті мыңдаған адамды жұмыспен қамтып отырған кәсіпкерлер бар. Және олардың көбі қазіргі таңда кадр жетіспеушілігі мәселесімен бетпе-бет кездесуде, осы орайда аталмыш басқарманың көмегі бизнес өкілдеріне ауадай қажет.Қаламызда «Q-MED» клиникасымен танымал кәсіпкер, кеңес мүшесі Раушан Базарбай өз кәсібін бастағалы осы облыстық жұмыспен қамтуды үйлестіру және әлеуметтік бағдарламалар басқармасының шапағатын көріп келетінін айтып, алғысын білдірді. Оның сөзінше клиникада кезінде жастар практикасымен келген жас мамандар қазіргі уақытта білікті қызметкер атанып, жұмыстарын жақсы орындауда.Сонымен қатар, Қармақшы ауданындағы «Қармақшы құс» мекемесінің басшысы, кеңес мүшесі Нұрлан Іздібаев керісінше басқарманың көмегіне кадр мәселесімен қанша жүгінгенімен, олардан кері байланыстың болмауын айтты.Осы ретте кеңес мүшелері барлық кәсіпкерлердің атынан облыстық жұмыспен қамтуды үйлестіру және әлеуметтік бағдарламалар басқармасына кадр тапшылығы мәселесін бірлесіп шешуге ұсыныс білдірді. Басқарма өкілі өз ретінде ұсынысты қолдап, жұмыс орындарына кадр жіберу мәселесін әлі де жетілдіруге жұмыс жасайтынын айтты. Жиын барысында бұл мәселенің өзектілігіне байланысты тағы да кездесу өткізу жоспарланды.

Кәсіпкерлер палатасының алаңында кезекті өңірлік кеңес отырысы өтті

«Сот каникулы» пилоттық жобасы іске қосылмақ

<a href="https://kyzylorda-news.kz/">Kyzylorda-news.kz</a> &nbsp;«AMANAT» &nbsp; Партиясының облыстық филиалының атқарушы хатшысы Ләйлә Төрешова, партиялық бақылау комиссиясы төрағасы Нұркен Бақытбекұлы, облыстық мәслихаттағы депутаттық фракция және партиялық бақылау кеңесінің мүшелері жаз мезгілінде аймақтағы өрт қауіпсіздігін сақтау және алдын алу мақсатында облыстық орман және жануарлар дүниесін қорғау жөніндегі мемлекеттік мекемесінің материалдық-техникалық жабдықталуына мониторинг жұмыстарын жүргізді.&nbsp;Ұжым қызметкерлерімен кездесіп, жұмысты жетілдіру бағытында олардың ұсыныс - пікірлерін тыңдады.Аталмыш мекеме мемлекеттік орман қоры жерлерінің шекарасында, орманды қорғау, сақтау және өсімін молайту функцияларын жүзеге асыру үшін ұйымдық құқықтық нысанында құрылған, заңды тұлға мәртебесіне ие коммерциялық емес мекеме болып табылады.Мекемеге қарасты мемлекеттік орман қорының жалпы жер көлемі838,022 гектар оның 707612,9 гектары орманмен көмкерілген және 130409,1 гектары орман жерлер болып табылады. Қазіргі таңда мекмеде 8 орман өрт сөндіруші жұмыс жасайды. Өртке қарсы 2 дана өрт сөндіру авто көлігі, 1 дана мотопомпа бар. Бақылау жұмыстары мен жылдам хабар алмасуға негізделген мекемеге қарасты 3 өрт бақылау мұнарасы, 55 дана қолға ұстап жүретін рация және 1 дана стационарлы радиостанция қолданыста бар. Бұл үшін мотоцикл көлігіде сатып алынған. Жергілікті Төтенше жағдайлардың алдын алу департаментімен тығыз байланыста жұмыс жасайды.Мекеме басшысы Сейілбек Таймановтың айтуынша құрғақ және ыстық ауа райына байланысты өрттің болуы қауіптілігі неғұрлым жоғарылайды. Сондықтан осындай аумақтарда қауіпсіздік шаралары күшейтілген. Орманды, дала алқаптарда өрттердің себептері әртүрлі: демалыс орнында қараусыз жағылған күйінде қалдырылған от шоғы, сөндірмей тастап кеткен темекі тұқылы, майланған, тез жанғыш заттарды және қоқысты қалдырып кету себептерінен туындайды. Осыған орай ауа райының ысып кетуі салдарынан табиғат аясында демалушылардың отты абайсыз қолдануы және басқа да жағдайлардың, өрттің алдын-алу бағытындағы шаралар ұйымдастырылуда.Мониторинг барысында ұжым қызметкерлері тарапынан айтылған ұсыныс пікірлер назарға алынып, тиісті жұмыс жасалатын болды.

Өрт қауіпсіздігін сақтау және алдын алу мақсатындағы жұмыстар пысықталды

Қызылордада темір тұлпар тізгіндейтін нәзік жандар артуда

<a href="https://kyzylorda-news.kz/">Kyzylorda-news.kz</a> Кейінгі екі жылда облыста қылмыстық жазасын өтеген және пробация қызметі есебінде тұрған азаматтар арасында қайтарымсыз грант алып, өз кәсібін ашқандар аз емес. Бейсенбіде Қылмыстық жазасын өтеген адамдарды әлеуметтік бейімдеу және оңалту орталығында олардың жұмысын насихаттау үшін арнайы іс-шара ұйымдастырылды.&nbsp;Жиынды ашқан орталық басшысы Бақыт Нұртазаев мемлекет тарапынан мұндай санаттағы азаматтарды жұмыспен қамту және кәсіпкерлік қызметін жүргізуге жоғары дңгейде қолдау көрсетіп жатқанын жеткізді. Бүгінде еліміздің Қылмыстық атқару жүйесі департаментіне қарасты мемелкеттік мекемелерден жазасын толық өтеп шыққан, пробация қызметі мен облыстық полиция депараментіне қарасты жергілікті полиция қызметінің есебінде тұрған 245 адам есепке алынған. Оның ішінде 47-і қылмыстық жазасын өтеген азаматтар болса, қалғанын пробация қызметінің есебінде тұрғандар құрайды.&nbsp;<blockquote>– Олардың қоғамға бейімделіп кетуіне жағдай жасау – негізгі міндетіміз. Биыл қайтарымсыз грант алуға 15 азамат ниет білдірді. Қазіргі таңда «Бастау-бизнес» бағдарламасы бойынша оқу сертификатын алған 12 адамның 6-ы өзінің бизнес-жоспарын қорғап шықты. Алдағы уақытта олардың өз кәсібін дамытуына қолдау көрсетіледі. Сондай-ақ, аталған санаттағы 54 адам еңбек етуге мүмкіндік алса, оның ішінде 26-ы квота, қалғаны ақылы қоғамдық жұмыспен қамтылған. Жалпы, олардың қоғамға толық бейімделіп кетуіне қолайлы жағдай жасау үшін тиісті мекемелер тарапынан нақты іс-шаралар жүргізгеніміз дұрыс. Бұл бағытта нәтижелі істер атқарылады деген сенімдемін, – деді орталық басшысы.</blockquote>Іс-шара барысында Қызылорда қаласы әкімінің орынбасары Дархан Тұрсынбаев, қалалық полиция басқармасы бастығының бірінші орынбасары Ердәулет Баянбайұлы және өзге де азаматтар ой-пікірін білдірді.Іс-шара барысында мемлекеттік бағдарлама аясында қайтарымсыз грант алған азаматтардың жасаған бұйымдары мен өнімдері қойылған көрме өткізілді. Олардың бірқатары мал шаруашылығымен айналысуға ниет білдірген. Қазір қатық, құрт және өзге өнімдерді өндіруді жолға қойды. Енді бірі кондитерлік өнімдер арқылы пайда тауып жатса, көкөніс-бақша дақылдарын өсіріп жатқандары да бар. Сондай-ақ қолдан жасалған тоқыма бұйымдары да көздің жауын алады. Тіпті, тақтай бетіне өрнектеп сурет салған шеберлер де бар.&nbsp;<blockquote>– Біз секілді азаматтарға мемлекет тарапынан көптеген көмектер жасалуда. Ендігі кезекте адал жолмен нәпақа тауып, кіріс көзін молайтуға күш саламын. Бұл мақсатта орталық тарапынан бізге тиісті деңгейде қолдау көрсетілуде, – дейді олардың бірі.</blockquote>&nbsp;Орталық мамандары учаскелік комиссия мүшелерімен бірге қылмыстық жазасын өтеген 20 адамның тұрмыстық жағдайы зерделеніп, &nbsp;бір реттік әлеуметтік көмек көрсетілді. Сондай-ақ жыл басынан бері жазасын өтеген 14 адам «Белгілі тұрғылықты жері жоқ адамдардың уақытша болуына арналған орталығына» орналастырылса, 23 адамға атаулы әлеуметтік көмек берілді. Салауатты өмір салтын насихаттау бағытында 3 мәдени-спорттық шара ұйымдастырылған.&nbsp;Облыстық қылмыстық атқару жүйесі департаментіне қарасты мекемелерде 7 мәре «Қақпа алдындағы кездесу» шарасы болды. Пробация есебінде тұрған 15 адам еңбекке баулу мақсатында қаладағы пластик терезе шығаратын цех жұмысымен танысты.

Басты мақсат - әрбір азаматқа қолдау көрсету

<a href="https://kyzylorda-news.kz/">Kyzylorda-news.kz</a> &nbsp;Облыстық энергетика және тұрғын үй-коммуналдық шаруашылық басқармасының басшысы Усаин Медет &nbsp;"AMANAT" партиясы алаңында қоғамдық қабылдау өткізіп, тұрғындардың сауалдарына қатысты заңнамаларға сәйкес түсіндірме жұмыстарын жүргізді.Қабылдау барысында тұрғындар тарапынан көшелердегі жарық және газдандыру мәселесін реттеу, жарық жүйесі үшін тарифтің қымбаттауы, көпқабатты үйлердегі кәріз жүйесі мен жертөлелердің нашарлығына қатысты мәселелер көтерді.Көше жарығын реттеу мәселесі бойынша қосымша зерттеу жұмыстары жүргізілетінін және газдандыру жұмыстарына қатысты қазіргі таңда сметалық жобасы әзірленіп, экспертизадан өткеннен кейін қаржыландыру жұмыстары жүргізілетінін жеткізді.Коммуналдық төлемдердің қымбаттауы барысында түсіндірме жұмыстары жүргізіліп, 2023 жылдың 1 шілдесінен бастап заңға өзгерістер енгізіліп, тарифтік төлемдер көтерілгені айтылды.Көпқабатты үйлердегі кәріз жүйесіне байланысты өзінің қызметтік құзыреті шеңберінде мәселені зерттеуге жұмыс жасайтынын түсіндірді. Одан бөлек, жертөле мәселесі бойынша аталмыш көпқабатты үйлердегі жөндеу жұмыстары 2025 жылдың жоспарына енгенін жеткізді.Басқарма басшысы барлық тұрғындардың мәселелері толық зерттеліп, тиісті жұмыстар атқарылатынын хабарлады.

Тұрғын үй-коммуналдық шаруашылық бағытындағы өтініштер тыңдалды

<a href="https://kyzylorda-news.kz/">Kyzylorda-news.kz</a> Кеше&nbsp;"AMANAT" партиясы жанындағы аграрлық сектор мәселелері жөніндегі республикалық кеңестің отырысы өтті.&nbsp;Онда «Қазақстан Республикасының кейбір заңнамалық актілеріне жайылымдарды пайдалану мәселелері бойынша өзгерістер мен толықтырулар енгізу туралы» Заңын іске асыру жөніндегі шаралар талқыланды.Жиынға өңірден бейне байланыс режимінде партияның облыстық филиалының Атқарушы хатшысы Ләйлә Төрешова, партия филиалы жанындағы экономика, кәсіпкерлік және аграрлық сектор мәселелері жөніндегі аймақтық кеңес төрағасының орынбасары Ержан Искендермен жауапты сала өкілдері қатысты.Жалпы өңірде 145 ауылдық округтің 97-і жайылыммен толық қамтамасыз етілген. 99 ауылдық округ жайылыммен ішінара 19 округ жайылыммен қамтамасыз етілмеген. Жетіспейтін жайылым көлемі 332,3 мың гектар. Облыс әкімді тарапынан ҚР Парламенті Мәжілісі депутаттарының бастамасымен әзірленген Заң жобасын қарап- келісу барысында ҚР Ауыл шаруашылығы министрлігіне тиісті ұсыныстар берілген.Жалпы ауылдық округтерді жайылымдық жерлермен қамтамасыз ету мақсатында бүгінгі күні әр ауылдық елді мекенге іргелес орналасқан жайылымдық жері таңдалып, 2022 мың гектар жайылым карта схемасы белгіленген.Сонымен қатар мыңнан астам шаруашылықтың жайылым жерін пайдалану жөнінде келісім алынған. Бұл бағыттағы жұмыстар жалғасын таппақ.

Жайылымдық жерлерге қатысты Заң нормаларының орындалуы республикалық кеңес отырысында талқыланды

<a href="https://kyzylorda-news.kz/">Kyzylorda-news.kz</a> Неміс ойшылы Артур Шопенгауэр: «Біздің бақытымыздың оннан тоғызы денсаулымызға байланысты» дейді. Шынында, жанын қоярға жер таппай қиналғанда өміріне араша болып, емдесе, көмек қолын созса науқас үшін бір ғанибет емес пе? Адам өмірі қиындығы мен қызығы қатар жүретін ақ халатты абзал жандармен &nbsp;тікелей байланысты. Ауру алқымнан алып, дерт дендегенде әр адам ақ халат киген алтын қолды қауымнан көмек күтеді. Дәрігерлерге артылар жүк те, жауапкершілік те ауыр. Әйтсе де, олардың ешқайсысы ел басына күн туғанда жұмысын тастап, қара бастың қамын ойлап, тасада тығылып қалмайды. Алмағайып заманда да төтенше жағдайда да, зілзала мен тасқында да медицина қызметкелері адам жанының емдеушісі болуға әзір. Бұл сөзімізге қай уақытта да көмек сұрап барғанда бетімізді қайтармай қызмет көрсететін сала мамандарының еңбегі дәлел.&nbsp;Дүйсенбі күні. Медицина қызметкерлерінің жұмысы таңғы 8-ден бастап қыз-қыз қайнайтынын жақсы білеміз. Дәл осы сәтті пайдалананып біз де жұмыс барысымен Шиелідегі ауруханаға қарай бағыт алдық. Осы уақытқа дейін дәрігердің алдына шипа іздеп баратын едік, енді міне, олардың жұмысымен жіті танысуға келдік. Бұл жолғы бағытымыз –&nbsp;қалпына келтіру, емдік оңалту бөлімі. Бөлімге кіргеннен бастап тазалыққа мән беретінін білеміз. Тазалықты қатаң талап ететін орында қылаудың ізі де байқалмайды. Бізді аталған бөлімнің меңгерушісі Ақтілек Даниярова қарсы алды. Білгір дәрігермен тілдесе отырып, орталықта 1 дефектолог, 2 логопед, 1 психолог, 1 аға мейіргер, 9 кезекші мейіргер, 5 тазалықшы, 1 шаруа иесі, 1 ас таратушы бар екенін білдік. Оңалтудың негізгі міндеттеріне мыналар жатады. Атап айтсақ, физикалық тұрғыдан көмек көрсету. Нақтырақ айтсақ, механотерапиялық аппараттар арқылы тұлға және буындар деңгейіндегі қимыл-қозғалысын қалыпты шамаға дейін жеткізіп, логопедиялық іс-шара –сөйлеу мүмкіндігінен айырылған науқастарды дыбыстық және сөздік қорын толық қалпына келтіреді. Екіншіден, медико-әлеуметтік және психолого-педагогикалық жағынан жұмыс жүргізіледі.Келесі рухани жағынан және ұйымдастырушылық-әдістемелік қызметтер атқарылады. Мүмкіндігі шектелген науқастарға рухани-адамгершілік әлеуетін қарастырып, жағдай жасайды.&nbsp;– Ауруханадағы емдік оңалту шаралары физиотерапиялық бөлме, емдік денешынықтыру залы, механотерапия залы, логопед, дефектолог, психолог, массажист мамандарының бөлмелерімен қамтылған. Біз айтып өткен физиотерапиядан бөлек мұнда емдік денешынықтыру, эрготерапия, логопед, психолог секілді оңалтудың негізгі әдістерін жүргізетін бөлмелер талапқа сай жасақталған. Білікті аяжандар Ш.Бекзадаева, Б.Ниязханова, Г.Батталова, С.Мұхтар, А.Тоқтыбаева секілді білікті мамандар еңбек етіп келеді, – дейді бөлім меңгерушісі А.Асанбайқызы.&nbsp;Сөзіміз құрғақ болмас үшін емделушінің пікіріне ден қоялық.&nbsp;– Осыдан бір жыл бұрын микро-инсульт алдым. Қатты уайымдадым. Расында, бұл өмірде денсаулықтың қадірін түсінуіміз керек. Осындай қиын кезде дәрігерлер адам жанын барынша үғады. Қиналған кезімде осы оңалту бөлімінің қызметкерлері маған көмектесіп, ем домымды жасады. Алғысым шексіз. Қазіргі таңда жағдайым жақсы. Әлі де емделіп, дәрілерімді уақытылы қабылдаймын, – деді кент ардагерлер кеңесінің алқа мүшесі Рахманберді Қарантаев.Айта кетейік, оңалту орталығынан 2023 жылы 478 адам емделсе, 2024 жылы 3 айда 174 науқас оңалып шыққан. Расында, адам жанының арашасы болып жүрген жандардың орнына өзіңізді бір сәт қойып көріңізші? Әр емделушіні сағат сайын бақылап, әр түрлі диагнозбен жұмыс істеп, көңілін аулауға ауруханадан құлан таза айығып кетуіне атсалыса аласыз ба? Сырт көзге қарағанда бәрі оңай көрінуі мүмкін. Бір сарында көрінетін дәрігерлердің жұмысын атқаруға сабырыңыз бен батылыңыз жете ме? Бұл сұрақтардың жауабын білу үшін бір сәт дәрігерлердің тіршілігімен танысып көру керек шығар. Сол кезде ғана медицинада қызмет жасап жүрген қызметкерлердің жанқиярлық еңбек екенін ұғынармыз, бәлкім?!

Шиелідегі оңалту орталығының озық жұмысы

<a href="https://kyzylorda-news.kz/">Kyzylorda-news.kz</a> Мемлекетіміздің кәсіпкерлік саласына ерекше назар аударып, жеке кәсіпкерлер үшін тиімді жағдай жасап, қолдау көрсетуінің нәтижесінде ау­дан орталығымен қатар, ауылдық елді мекендерде де кәсіппен айналысуға ниетті азаматтар саны артып, кәсіпкерлік нысандарының көбейіп жатқаны қуантады.&nbsp;Қармақшыда да көптеген жаңа ғимарат бой көтеріп, ел игілігі үшін қалтқысыз қызмет етіп келеді. Кентіміз сәулеті келіскен тағы бір ғимаратпен толықты. Нақтырақ тоқталсақ.&nbsp; Бейсенбі күні Жосалы кентінің орталығында бой көтерген «Мағжан» асханасының ашылу салтанаты өтті. Онда Қармақшы ауданының әкімі Жандос Еркінбекұлы құттықтау сөз сөйлеп, туған жерде кәсіпкерліктің көкжиегін кеңейтіп жатқан кәсіпкерге алғысын білдірді.&nbsp;Жаңа нысанның тұрғындарға сапалы әрі тиімді қызмет көрсетуіне тілектестігін жеткізіп, кәсіпкердің жұмысына сәттілік тіледі. &nbsp;&nbsp; Одан кейін еңбек ардагері Орынбасар Сариев батасын беріп, аудан ардагерлерімен бірге жаңа нысанның лентасын қиып, асхана жұмысымен танысты.&nbsp;Ашылу салтанатына жиналғандар нысанды аралап, ақ дастарханнан дәм татты.&nbsp; Сәулеті жарасқан екі қабатты еңселі ғимарат соңғы үлгідегі заманауи дизайнмен жасалған. Іші жарық, әрі кең. Бірнеше саладағы кәсіпті тең игеріп отырған кәсіпкер Рабиға Балғабаеваның жаңа нысанына жиналған көпшілік ризашылығын білдіріп, сәттілік тіледі.<blockquote>– &nbsp;Бүгін кентімізде тағы бір асхана ашылып отыр. Жыл өткен сайын кәсіпкерлеріміз өз кәсібін ашып, аудан экономикасының да­муына атсалысып отыр. Нарықтық экономиканың талаптарына сәйкес, халықтың әлеуметтік тұрмыс-ахуалын жақсарту басты орынға қойылған. Тұрақты қолдаулардың арқасында ауданда бизнес жо­баны мақсатты түрде игеріп, кәсіпкерлікке бетбұрыс жасаушы­лар қатары көбейіп келеді. Ауданда осындай ғимараттың ашылуы ауданымыздың экономикасының кеңге қанат жайып, өркендеп, халқымыздың әл-ауқатының жақсарып келе жатқанының белгісі деп білемін. Алдағы уақытта кәсіпкердің бастаған кәсібі дамып, жаңа асхана халық игілігіне қызмет етеді деп сенеміз, – деді ардагер-ұстаз Дәмелі Жалғасбаева.</blockquote>&nbsp; Осы орайда айта кеткен жөн, асхананың бір мезетте 150 адамға дейін қабылдауға мүмкіндігі бар. Сонымен қатар 15 адам тұрақты жұмыспен қамтылатын болады.

Қазақстан және Қызылорда облысының жаңалықтары: Қоғам