<a href="https://kyzylorda-news.kz/">Kyzylorda-news.kz</a> «Қала күні» мерекесі аясында «Жастық шағымның куәсі – Қызылорда!» атты дәстүрлі ретро-фестиваль өтті. Ашық аспан астындағы мәдени шара өнерпаздардың тақырыптық қойылымымен басталды. Әнші-композитор Өктем Алтаев өзінің танымал әндерін орындап, ретро-кештің көркін қыздырды.Әрі қарай сахна төріне А.Тоқмағамбетов атындағы қалалық мәдениет үйі жанындағы «Мереке», облыстық филармония жанындағы «Сыр самалы», Тереңөзектен келген «Достар», Жаңақорған ауданының «Экспресс» және Қазалының «Сейхун» вокалды-аспапты ансамбльдері шығып, әсем әндерін ұсынды.Бұл әндер – балалық, жастық шақтың, тұтас бір дәуірдің бейнесі. Өткенді сағыну – бүгінді ұмыту емес, керісінше, қайдан келгеніңді білу.<img src="https://knadmin.beoblood.kz/uploads/V_Kyzylorde_proshyol_retrokonczert_ac4f1b8763.jpg" alt="В Кызылорде прошёл ретроконцерт.jpg">Бүгінгі Қызылорда – кешегі арманның жалғасы, ал кешегі Қызылорда – бүгінгі қаланың іргетасы. Өткен дәуірдің әндерімен бірге сол күндерді еске алған жұртшылық Сырдария жағасындағы қаланың тарихына да бойлады. Қызылорданың өткені туралы сұрақтарға жауап беріп, шаһардың тыныс-тіршілігіне қатысты қызықты деректерді жадында жаңғыртты.Фестиваль аясында көрермен назарына арнайы ретро көрме де ұсынылды. Көрме келушілерді өткен ғасырдың естеліктерімен қайта қауыштырып, бір сәтке уақытты кері шегергендей әсер қалдырды. Көрмеге көне тұрмыстық бұйымдар, ескі фотоаппараттар, телефондар, магнитофондар, винил пластинкалар, кассеталар және сол кезеңнің өзге де жәдігерлері қойылды. Әсіресе сол кезеңді көзімен көрген аға буын өкілдері үшін таныс дүниелер балалық пен жастық шақтың жарқын сәттерін еске түсірсе, жас көрермендер үшін өткен дәуірдің мәдениеті мен тұрмысымен танысуға мүмкіндік берді.<img src="https://knadmin.beoblood.kz/uploads/V_Kyzylorde_proshyol_retrokonczert2_f33b09f515.jpg" alt="В Кызылорде прошёл ретроконцерт2.jpg">Әсем ән мен әсерлі естелікке толы кеш соңында фестиваль қатысушылары сахнаға шығып, Тәңірберген Қалауовтың «Қызылорда вальсін» бірге орындады.Іс-шарада қала әкімінің орынбасары Еркін Турабаев өнер ұжымдарына аймақ басшысының алғыс хаттарын және қаржылай сый табыстады. Дәстүрлі ретро-фестиваль көрерменге көтеріңкі көңіл-күй сыйлап, жастық шақтың әуенімен өткенге бір сәт саяхат жасатты.<img src="https://knadmin.beoblood.kz/uploads/V_Kyzylorde_proshyol_retrokonczert3_8c2ba072b8.jpg" alt="В Кызылорде прошёл ретроконцерт3.jpg">

«Жастық шағымның куәсі – Қызылорда!» ретро-фестивалі өтті

<a href="https://kyzylorda-news.kz/">Kyzylorda-news.kz</a> ҚР Мемлекеттік қызмет істері агенттігінің Қызылорда облысы бойынша департаментінің басшысы Е.Мендалиев Сырдария ауданының А.Тоқмағанбетов ауылдық клубы үйінде аудан тұрғындарымен кездесу өткізді.Кездесу барысында тұрғындарға ҚР Мемлекеттік қызмет істеру агенттігінің қызмет бағыттары таныстырылып, «Қазақстан Республикасының мемлекеттік қызметі туралы» жаңа Заңның негізгі ережелері мен жаңашылдықтары түсіндірілді. Сондай-ақ «Адал азамат» және «Заң мен тәртіп» қағидаттарының мәні, қоғамдағы адалдық, жауапкершілік пен заң талаптарын сақтаудың маңызына назар аударылды.Бұдан бөлек, «Қазақстан Республикасының мемлекеттік қызметі туралы» жаңа Заңында көрсетілген жастарды ерте кәсіптік бағдарлау тетігі, мемлекеттік қызметке келешек ұрпақты оқу орындарынан бастап бағыттау және &nbsp;жоғары оқу орындарын мемлекеттік грант немесе ақылы негізде бітіріп, GPA көрсеткіші 3,33-тен жоғары нәтижеге қол жеткізген түлектердің мемлекеттік қызметке конкурссыз орналасу мүмкіндігі туралы ақпарат берілді.Кездесу соңында тұрғындар мемлекеттік қызметке орналасу, заңнамадағы өзгерістер және өзге де мәселелер бойынша сұрақтарын қойып, тиісті жауаптар алды.<img src="https://knadmin.beoblood.kz/uploads/V_Syrdarinskom_rajone_obsudili_novshestva_v_gosudarstvennoj_sluzhbe_a0782717b9.jpg" alt="В Сырдарьинском районе обсудили новшества в государственной службе.jpg">

Сырдариялық тұрғындарға жауапкершілік пен заң талаптарын сақтаудың маңызын түсіндірді

<a href="https://kyzylorda-news.kz/">Kyzylorda-news.kz</a> Шиелі ауданында тұрғындарды аяқсумен қамтамасыз ететін маңызды нысандардың бірі – «Базар» арығына күрделі жөндеу жұмыстары жүргізілуде.Бүгін аудан әкімі Айтбай Жандарбеков аудан ардагерлері және жауапты сала басшыларымен бірге Шиелі кентіндегі «Базар» арығын бетондау жұмыстарымен танысты.Шиелі кентінде 36 мыңнан астам тұрғын тұрады. Елді мекенге «Сырдария» өзенінен 22 бекет арқылы келетін «Базар» арығы кент тұрғындарын аяқсумен қамтамасыз етуде маңызды рөл атқарады.Жоба аясында ұзындығы 5 514 метр арыққа темір-бетонды науалар орнату жоспарланған. Көктем мезгілінде 1,2 шақырымы аяқталып, қазіргі таңда қалған бөлігі жалғастырылуда. Құрылыс жұмыстарын мердігер мекеме – «Мелиоратор» ЖШС жүзеге асыруда. Бетондау жұмыстары қазан айында толығымен аяқталады.<img src="https://knadmin.beoblood.kz/uploads/Shieli_ary_zh_ndeu_zh_mystary_588c6dba50.jpg" alt="Шиелі арық жөндеу жұмыстары.jpg">Күрделі жөндеу жұмыстары аяқталғаннан кейін су ысырабының алдын алу, су ағысының тұрақтылығын қамтамасыз ету және тұрғындарды аяқсумен қамту сапасын арттыру көзделіп отыр. Сонымен қатар, ашық арықтардың ретке келтірілуі кенттің санитарлық жағдайын жақсартуға және абаттандырылуына оң әсерін тигізеді.Жұмыс барысын бақылау кезінде аудан әкімі Айтбай Жандарбеков жауапты сала басшылары мен мердігер мекеме өкілдеріне құрылыс жұмыстарының сапасын басты назарда ұстауды тапсырды. Сондай-ақ нысандағы жұмыстарды белгіленген талаптарға сәйкес жүргізіп, жобаны белгіленген мерзімде сапалы әрі уақытылы аяқтау қажеттігін атап өтті.«Базар» арығының жаңғыртылуы Шиелі кентінің инженерлік инфрақұрылымын жақсартуға және тұрғындарды аяқсумен қамтамасыз ету жүйесінің тиімділігін арттыруға бағытталған.

Шиелі: «Базар» арығына күрделі жөндеу жұмыстары жүргізілуде

<a href="https://kyzylorda-news.kz/">Kyzylorda-news.kz</a> Жалағаш ауданының әкімі Ерлан Төрәлиев «HARVEST AGRO» компаниясының Қызылорда облысындағы директоры Жеңіс Ахметов пен компания өкілі Әліби Ғаниды қабылдап, агроөнеркәсіптік кластер жобасының жүзеге асырылу барысын талқылады.Агроөнеркәсіптік кластер жобасын іске асыру мақсатында Қаракеткен ауылдық округінен жер учаскесі бөлініп, биыл 5 мың гектарға жүгері, 2 мың гектарға мақсары егілді.&nbsp;Кәсіпорынды үш кезең бойынша толық іске қосу жоспарланған. Өндірілген өнім ішкі нарықты қамтамасыз етумен қатар, шетелге де экспортталады.Бүгінгі күнге дейін жобаға 26,3 млрд теңге инвестиция тартылды.&nbsp;<blockquote>«Жобаның толық іске қосылуы жаңа өндіріс орындарының ашылып, жергілікті тұрғындарды жұмыспен қамтуға мүмкіндік береді. Сондықтан тиісті мәселелерді уақытылы шешіп, жұмысты белгіленген жоспарға сәйкес жүргізу қажет. Біз өз тарапымыздан қажетті қолдауды көрсетеміз», – деді аудан әкімі Е.Төрәлиев.</blockquote>Кездесу барысында жобаны одан әрі дамыту, өндірістік қуаттарды арттыру және алдағы кезеңге дайындық мәселелері қаралды.

Агроөнеркәсіптік кластер жобасының жүзеге асырылу барысын талқылады

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмаханов тұрғындарды жеке мәселелері бойынша қабылдап, азаматтардың өтініштері мен ұсыныс-пікірлерін тыңдады. Қабылдауға келген 23 тұрғын аудан басшысына өздерін толғандырған мәселелерін айтып, олардың заңдылыққа сәйкес шешілуіне ықпал етуді сұрады.Тұрғындар тарапынан негізінен тұрғын үй кезегі, тұрақты жұмысқа орналасу, көшелерді асфальттау, түнгі жарықтандыру, жеке тұрғын үйлерге газ кіргізу, көпқабатты тұрғын үйдің шатырын жөндеу және жаяу жүргіншілер жолын салу мәселелері көтерілді.Аудан әкімі әрбір өтінішті мұқият тыңдап, көтерілген мәселелер бойынша тиісті түсініктемелер берді. Сондай-ақ, азаматтардың өтініштерін жан-жақты зерделеп, заң талаптарына сәйкес шешу жолдарын қарастыру жөнінде жауапты сала басшыларына нақты тапсырмалар жүктеді.Атап айтқанда, Әйтеке би кентіндегі Мақатаев көшесін жарықтандыру жөнінде тұрғынның өтінішіне байланысты кент әкімі мен аудандық электр тарату торабы мекемесінің басшысына нақты міндеттер жүктеліп, көшеге жарық шамдарын орнату мәселесін шешу тапсырылды.Бұдан бөлек, аудан орталығындағы Жанқожа батыр көшесінің 3 шақырымындағы жаяу жүргіншілер жолын салу жөніндегі өтініш бойынша аудан әкімі аталған аумаққа өзі барып, жағдайды зерделейтінін айтты.Жұмысқа орналасу мәселесін көтерген азаматтарға аудан бойынша қазіргі уақытта бар бос жұмыс орындары таныстырылып, мамандықтарына сәйкес қолайлы жұмыс орындары болған жағдайда жұмысқа орналасуға бағыт-бағдар берілетіні түсіндірілді. Осы ретте жауапты сала басшыларына жұмыс іздеуші азаматтармен тиісті жұмыстар жүргізіп, олардың өтініштерін заңдылыққа сәйкес қарау тапсырылды.Аудан әкімі тұрғындардың өтініштері назардан тыс қалмайтынын айтып, әр мәселе бойынша жауапты мекемелерге нақты тапсырмалар беріп, олардың орындалуын бақылауда ұстайтынын жеткізді.

Тұрғындардың өтініш-тілектерін тыңдап, шешу жолдарын қарастыратынын жеткізді

<a href="https://kyzylorda-news.kz/">Kyzylorda-news.kz</a> ҚР Премьер-министрі Олжас Бектеновтің төрағалығымен инвестициялар тарту кеңесінің отырысы өтті. Оған облыс әкімі Мұрат Ергешбаев селекторлық режим арқылы қатысты.Аймақта республикалық маңызы бар автомобиль жолдарын салу және реконструкциялау жобалары жүзеге асырылуда. Атап айтқанда, Қызылорда қаласының айналма жолы, «Қызылорда – Сексеуіл», «Бейнеу – Сексеуіл» және «Ұлғайсын – Сексеуіл» бағыттарында жол салынып жатыр.Қала маңындағы айналма жолдың құрылысы басталды. Мердігер «Қыран» ЖШС тас, &nbsp;қиыршық тас төседі. &nbsp;Свай қағылып, көпір тіреулері бетондалып, су құбырлары орнатылуда.&nbsp;Мемлекет басшысының қатысуымен «Қызылорда – Сексеуіл», «Ұлғайсын – Сексеуіл» және «Бейнеу – Сексеуіл» автокөлік жолдарының құрылысы телекөпір арқылы басталып, қазір қарқын алды. &nbsp;«Қызылорда – Сексеуіл» автомобиль жолының мердігері «Integra Construction KZ», қосалқы мердігерлері &nbsp;«ЭлитСтройКомплект» және «АРЕ-2013», «Бейнеу – Сексеуіл» автомобиль жолының мердігері «Integra Construction KZ», қосалқы мердігері &nbsp;«Коммерческая фирма «УНА», ал «Ұлғайсын – Сексеуіл» автомобиль жолының мердігері &nbsp;«Integra Construction KZ», қосалқы мердігерлері «E.S.T. Construction» &nbsp;және «СТАНДАРТ-1» серіктестіктері. Қазір геодезиялық және топографиялық жұмыстар жүргізіліп, &nbsp;топырақ төселуде. Құрылыс алаңдарында жұмысшылар, &nbsp;арнайы техникалар жұмылдырылған.Аталған жобалар өңірдің көлік-логистикалық әлеуетін, елді мекендер арасындағы жол қатынасын жақсартуға және аймақтың инвестициялық тартымдылығын &nbsp;арттыруға мүмкіндік береді.

Инвестиция тарту мәселесі қаралды

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмаханов Қазалы қаласындағы және Ақтан батыр ауылындағы бірқатар әлеуметтік нысандарды аралап, алдағы жылу беру маусымына дайындық барысын тексерді.Аудан басшысы алдымен Қазалы қаласындағы Қ.Нұрмаханов атындағы №95 орта мектептің жылу маусымына дайындығымен танысты. Биыл білім ошағының жылу жүйесіне жаңғырту жұмыстары жүргізіліп, жұмыстар толық аяқталған. Сонымен қатар мектептің кіреберіс бөлігіне де ағымдағы жөндеу жүргізілген.Бұдан бөлек Қазалы қаласындағы Ғ.Мұратбаев атындағы №17 орта мектеп, М.Горкий атындағы №16 мектеп-лицей, Қазалы аграрлы-техникалық колледжі және «Ақерке», «Өрімтал» бөбекжай-балабақшаларының жылу беру маусымына дайындығы, жылу жүйелерінің техникалық жағдайы мен қысқы кезеңге әзірлігі толықтай тексерілді.Биыл Қазалы қаласындағы қалалық мәдениет үйі ғимаратының жылу жүйелеріне ағымдағы жөндеу жұмыстары жүргізіліп, ғимарат газ отынына бейімделді. Жөндеу жұмыстарын мердігер мекеме – «АҢСАТ-ҚҰРЫЛЫС и С» ЖШС жүзеге асырған болатын. Ағымдағы жөндеу барысында ғимараттың жылу жүйесіндегі ақаулы бөліктер қалпына келтіріліп, қажетті жөндеу және алмастыру жұмыстары жүргізілді.Қазалы қаласындағы нысандардан кейін аудан әкімі Ақтан батыр ауылдық клубының жылу жүйесін көрді. Биыл ауылдық клубтың жылу жүйелерін ағымдағы жөндеу жұмыстарына қаржы бөлініп, жылу жүйесін газға бейімдеу мен ақаулы бөліктерді қалпына келтіру, жөндеу бойынша тиісті жұмыстар атқарылды.&nbsp;Аудан әкімі барлық әлеуметтік нысандардағы жылу қазандықтары мен инженерлік жүйелердің жағдайын жіті тексеріп, жауапты мекеме басшыларына жылу беру маусымына дайындықты сапалы аяқтау, анықталған кемшіліктерді дер кезінде жою және жылу жүйелерінің тұрақты жұмысын қамтамасыз ету жөнінде нақты тапсырмалар берді. Сондай-ақ жылу беру маусымын қауіпсіз әрі тұрақты өткізуде, әлеуметтік нысандарда қолайлы жағдай қалыптастыруда ешқандай мәселе туындамау керектігін қатаң ескертті.Айта кетейік, 2026–2027 жылдардағы жылу беру маусымына аудан бойынша қажетті қатты отын көлемі 11,0 мың тоннаны құрайды. Оның ішінде халық тұтынуына 8,6 мың тонна, әлеуметтік нысандарға 2,4 мың тонна жоспарланған. Сонымен қатар 1,9 мың тонна сұйық отын қажеттілігі белгіленген.

Әлеуметтік нысандардың жылу беру маусымына дайындық жұмыстары тексерілді

<a href="https://kyzylorda-news.kz/">Kyzylorda-news.kz</a> Премьер-министр Олжас Бектенов Мемлекет басшысының жаңа инвестициялық циклды іске қосу шеңберінде қойған міндеттеріне сәйкес, инвестиция тарту және оларды сүйемелдеу жүйесінің тиімділігін одан әрі арттыру жөнінде кеңес өткізді.Жиында инвесторлармен өзара іс-қимылды қызығушылық таныту және перспективалы бағыттарды зерделеу кезеңінен бастап жобаларды іске қосу, кеңейту және қайта инвестициялауға бағытталған инвестициядан кейінгі сүйемелдеуге дейінгі барлық кезеңде нығайту тәсілдері қаралды.Нәтижесінде келісу рәсімдерінен өту мерзімдерін қысқарту және жобаларды іске қосуды жеделдету, сондай-ақ оларды масштабтау және экспортқа шығару мәселелерін қатар пысықтау көзеделген.Сонымен қатар инвесторлар мен жетекшілік ететін мемлекеттік органдарға қолайлы жағдай жасауға мүмкіндік беретін цифрлық құралдарға назар аударылды.Сыртқы контурдағы белсенді инвестициялық саясат мәселелері де талқыланды.Премьер-министрге жауапты мемлекеттік органдар мен ұйымдардың инвесторлармен өзара іс-қимыл жөніндегі және жобаларды ел экономикасына қаражат салуға дейін, нысандарды пайдалануға беруге дейін жеткізу көрсеткіші бойынша жұмысын талдау нәтижелері ұсынылды.Бірыңғай инвестициялық вертикальды қалыптастыру жөніндегі ұсыныстарды талқылауға Премьер-министрдің орынбасары – ұлттық экономика министрі Серік Жұманғарин, Президенттің экономикалық мәселелер жөніндегі көмекшісі Нұрлан Байбазаров, Президенттің кеңесшісі – Стратегиялық жоспарлау және реформалар агенттігінің төрағасы Әсет Ерғалиев, сыртқы істер министрі Мұхтар Тілеуберді, сауда және интеграция министрі Арман Шаққалиев қатысты.Жиын қорытындысы бойынша Премьер-министр Олжас Бектенов Мемлекет басшысы инвестициялық саясат тетіктерін түбегейлі жаңарту міндетін қойғанын атап өтті. Капитал үшін жаһандық бәсеке жағдайында Үкімет болжамды әрі қолайлы инвестициялық климатты қамтамасыз етуі керек. Ұлттық экономика министрлігіне мүдделі мемлекеттік органдармен және ұйымдармен бірлесіп, қолданыстағы инвестиция тарту жүйесін жетілдіру жөніндегі іс-қимылдың барынша нақты жоспарын дайындау тапсырылды.

Олжас Бектенов инвестиция тарту жүйесін жетілдіру мәселесі жөнінде кеңес өткізді

<a href="https://kyzylorda-news.kz/">Kyzylorda-news.kz</a> Заман дамыған сайын ғаламтор зардабы да күшейіп келеді. Интернет-алаяқтықтың тұзағына бүгінде мыңдаған адам түсті. Десек те өңірде алаяқтарға алданатын азаматтар саны есепті кезеңмен салыстырғанда азайған. 2026 жылдың 8 айында, Қызылорда облысы көлемінде интернет-алаяқтық қылмыстарының 400 дерегі тіркелген. Бұл туралы Өңірлік коммуникациялар қызметінің ақпарат алаңында белгілі болды.Осы тұрғыда Қызылорда облысының полиция департаменті Киберпол басқарма бастығының орынбасары Тимур Хамитов интернет-алаяқтық қылмыстарының алдын алу мақсатында, сақтық шараларын сақтауға шақырады.<blockquote>«Қазіргі кезде болып жатқан алаяқтық қылмыстарының 70%-ы, СМС кодтан басталады. Яғни, Сіз күдіктеніп қалмауыңыз үшін, алаяқтар алдын ала SMS код жолдап, артынша Сізге қоңырау шалады. Көбінде интернет алаяқтар қоңырау шалғанда орыс тілінде сөйлейді, қазақ тілінде жауап берсеңіз олар сізді түсінбейді, яғни әрі қарай сөйлесуді жалғастырмай,байланысты үзген жөн. Бұл алаяқтардың құрығына түспеудің ең басты шарты десекте болады» - деді Тимур Хамитов.</blockquote>Тұрғындар қазірге дейін алаяқтардың СМС кодпен қорқыту, инвестиция арқылы ақша көбейту, ватсап желісі арқылы таныстарынан қаражат сұрау және жалған тауарлар мен қызметтер үшін алдын ала қаражат аудару секілді алдау тәсілдеріне сеніп, «қауіпсіз есепшот» деп сендірген дроперлердің есепшоттарына қаражат аударуда. Осы мәселелер бойынша құзырлы органдар тұрғындарға сақ болуды және алаяқтардың схемасынан абай болу керек екенін ескертеді.<img src="https://knadmin.beoblood.kz/uploads/Internet_alaya_ty_brifing_042f668cf0.jpg" alt="Интернет алаяқтық брифинг.jpg">Сурет: Fingramota.kz

Интернет-алаяқтық қылмысының алдын алу шаралары жүргізілуде

<a href="https://kyzylorda-news.kz/">Kyzylorda-news.kz</a> Шиелі ауданы әкімдігінде санитариялық-эпидемиологиялық қызмет саласының мамандарына арналған салтанатты жиын өтті.Кәсіби мерекеге орай ұйымдастырылған шараға аудан әкімі Айтбай Жандарбеков төрағалық етіп, сала қызметкерлерін мерекелерімен құттықтады.Жиын барысында аудан әкімі санитариялық-эпидемиологиялық қызметтің қоғамдағы маңызына тоқталып, бұл сала мамандарының атқарып жүрген жұмыстары халықтың денсаулығын сақтауда айрықша рөл атқаратынын атап өтті<blockquote>– Халықтың денсаулығын қорғау, санитариялық-эпидемиологиялық қауіпсіздікті қамтамасыз ету, жұқпалы аурулардың таралуының алдын алу – аса жауапты әрі маңызды міндет. Бұл бағыттағы жұмыстардың нәтижесі тікелей халықтың өмір сүру сапасы мен қауіпсіздігіне әсер етеді. Күн сайын үлкен жауапкершілікпен еңбек етіп жүрген санитариялық-эпидемиологиялық қызмет мамандары елдің амандығы мен қоғамдық денсаулықты қамтамасыз етуге елеулі үлес қосып келеді. Сіздердің кәсіби біліктіліктеріңіз, жауапкершіліктеріңіз және өз істеріңізге деген адалдықтарыңыз – санитариялық қауіпсіздікті сақтаудың маңызды кепілі. Еңбектеріңізге табыс, қызметтеріңізге абырой, отбасыларыңызға амандық тілеймін, – деді аудан әкімі.</blockquote>Санитариялық-эпидемиологиялық қызмет – халықтың денсаулығын қорғау бағытындағы маңызды салалардың бірі. Оның негізгі міндеттерінің қатарында қоршаған ортаның санитариялық жағдайын бақылау, инфекциялық және паразиттік аурулардың алдын алу, санитариялық талаптардың сақталуын қамтамасыз ету, сондай-ақ тұрғындар арасында профилактикалық жұмыстар жүргізу бар.Осы орайда сала мамандарының күнделікті еңбегі көзге көріне бермегенімен, оның қоғамдық маңызы зор. Әсіресе түрлі жұқпалы аурулардың алдын алу, санитариялық нормалардың сақталуын қадағалау және халыққа түсіндіру жұмыстарын жүргізуде мамандардың кәсіби шеберлігі мен жауапкершілігі айрықша мәнге ие.Салтанатты іс-шара барысында өз саласында ұзақ жылдар бойы жемісті еңбек етіп, санитариялық-эпидемиологиялық қауіпсіздікті қамтамасыз ету ісіне елеулі үлес қосқан сала ардагерлері мен бірқатар қызметкерлер аудан әкімінің «Алғыс хатымен» марапатталды.Марапат иелеріне құрмет көрсетіліп, олардың көп жылғы еңбегі мен кәсіби тәжірибесі ерекше атап өтілді. Сала ардагерлерінің еңбегі кейінгі буын мамандарына үлгі екені айтылып, олардың қызмет жолындағы табандылығы мен жауапкершілігіне жоғары баға берілді.Жиын барысында санитариялық-эпидемиологиялық қызмет саласының ардагерлері мен мекеме басшылары да сөз алып, әріптестерін кәсіби мерекелерімен құттықтады. Олар сала мамандарына ізгі тілектерін білдіріп, атқарып жүрген жауапты қызметтеріне табыс тіледі.Сондай-ақ ардагерлер өздерінің еңбек жолындағы естеліктерімен бөлісіп, салада қызмет атқарған жылдарындағы маңызды сәттерді еске алды. Өз тәжірибелерін ортаға салған аға буын өкілдері кейінгі буын мамандарына кәсіби мерекеге орай ақжолтай тілектерін жеткізіп, жауапты қызметте абыройлы еңбек етуге шақырды.Санитариялық-эпидемиологиялық сала қызметкерлерінің еңбегі – халықтың денсаулығы мен қоғамдық қауіпсіздікті қамтамасыз етудегі маңызды бағыттардың бірі. Күнделікті атқарылатын жауапты жұмыстар, алдын алу шаралары мен санитариялық талаптардың орындалуын қамтамасыз ету – елдің саулығы мен тұрғындардың қауіпсіз өмір сүруіне бағытталған ортақ істің маңызды бөлігі.

Санитариялық-эпидемиологиялық қызмет мамандарына құрмет көрсетілді

<a href="https://kyzylorda-news.kz/">Kyzylorda-news.kz</a> Қазалы ауданының әкімі Алмасбек Есмаханов аудан аумағында жүзеге асырылып жатқан бірқатар инфрақұрылымдық жобалардың құрылыс барысын аралап, нысандардағы жұмыстардың сапасы мен орындалу қарқынын бақылады.Алдымен аудан басшысы аудандық маңызы бар «Қазалы–Қожабақы–Бозкөл–Кәукей» автомобиль жолының 16 шақырымындағы Сырдария өзені арқылы өтетін Қарлан көпірінің құрылыс алаңында болды.Қазіргі таңда нысанда көпірдің негізгі конструкциялық элементтерін орнату жұмыстары жүргізілуде. Бүгінде 84 свай қағылып, 8 тіреудің барлығы толық орнатылған. 8 ригельдің 7-еуі дайындалып, қалған 1 ригельді орнату жұмыстары жүргізілуде. Құрылыс алаңында 30 арнайы техника мен 80 жұмысшы еңбек етуде. Сонымен қатар көпірге кіреберіс автомобиль жолын асфальттау жұмыстары да басталып кетті.<img src="https://knadmin.beoblood.kz/uploads/azaly_k_pir_rylysy_d3db9588c7.jpg" alt="Қазалы көпір құрылысы.jpg">Құрылыс барысын жауапты сала басшылары мен мердігер мекеме «Нұрлы Тау ЛТД» ЖШС-нің өкілдерімен бірге талқылап, нысандағы жұмыстардың сапалы орындалуына және белгіленген мерзімнің сақталуына баса мән беруді тапсырды. Сонымен қатар құрылыс қарқынын бәсеңдетпей, жұмысты жандандыру қажеттігін атап өтті.Аудан басшысы Қожабақы ауылы маңындағы аудандық маңызы бар автомобиль жолының 32,1 шақырымында орналасқан темірбетон көпірді қайта жаңғырту жұмыстарында көрді. Қазіргі уақытта мердігер «Гүлнұр МК» ЖШС тарапынан құрылыс жұмыстары жүргізілуде. Жаңа көпірдің ұзындығы – 21,6 метр, жүру бөлігінің ені – 7 метр. Құрылыс кезеңінде көлік қозғалысының үздіксіздігін қамтамасыз ету мақсатында ұзындығы 403 метр айналма жол ұйымдастырылған.Аудан әкімі мердігер мекеме өкілдеріне құрылыс жұмыстарының жобалық талаптарға сәйкес сапалы орындалуын қамтамасыз етуді және нысанды 10-ыншы қазанға дейін толық аяқтауды тапсырды.Бұдан кейін Қазалы қаласындағы электр желілері мен қондырғыларын қайта жаңғырту жұмыстарының да барысын көрді.«Шағын және моноқалалардағы бюджеттік инвестициялық жобаларды іске асыру» бюджеттік бағдарламасы аясында жүзеге асырылып жатқан жобаның жалпы құны 592,4 млн теңгені құрайды.Жоба кезең-кезеңімен іске асырылуда. 2024 жылы бөлінген қаржыға сәйкес 185 дана темірбетон бағана орнатылып, 3 шақырым электр желісі жүргізілді. 2025 жылы республикалық бюджеттен бөлінген қаржы толық игеріліп, 1052 дана темірбетон бағана, 30,5 шақырым электр желісі және 2 дана трансформатор орнатылды. Ал биыл жобаны толық аяқтау мақсатында бөлінген қаржыға сәйкес қазіргі таңда 9,8 шақырым электр желісін тарту, 4 дана трансформатор және 50 дана темірбетон бағана орнату жұмыстары жүргізілуде.Аудан әкімі аталған нысанда да атқарылып жатқан жұмыстардың сапасын бақылауда ұстап, электр желілерін жаңғырту жобасының белгіленген талаптарға сәйкес жүзеге асырылуын тапсырды.&nbsp;<img src="https://knadmin.beoblood.kz/uploads/Elektr_zhelilerin_zha_yrtu_ec49b64d39.jpg" alt="Электр желілерін жаңғырту.jpg">

Қазалы қаласының электр желілерін жаңғырту мен көпір құрылысының сапасын бақылады

<a href="https://kyzylorda-news.kz/">Kyzylorda-news.kz</a> Неліктен біз кейбір хабарламаларды шынайы әрі сенімді ақпарат ретінде қабылдаймыз, ал кейбірі бірден күмән тудырады? Ақпаратты қабылдауымызға әсер етуге бағытталған тәсілдер қалай жұмыс істейді?Осы және басқа да сұрақтарға Жалған ақпаратқа қарсы іс-қимыл орталығының (T.me/JAQortcomkz) жаңа материалдар топтамасы жауап береді.Орталық қысқа карусельдер арқылы кең таралған ақпараттық құбылыстарды талдап, пайдаланушының назарынан жиі тыс қалатын ақпараттық ықпал ету тетіктерін түсіндіреді.Жаңа материалдар JAQ.ORTCOM-ның Instagram (Instagram.com/jaqortcomkz) және TikTok (Tiktok.com/@jaq.ortcom.kz) әлеуметтік желілеріндегі ресми парақшаларында тұрақты түрде жарияланады.

Қазақстан және Қызылорда облысының жаңалықтары: Қоғам